សឿន សំណាង - La Reine Media

ហុងកុងចាប់ខ្លួនបាតុករ370នាក់ ក្នុងនោះមាន10នាក់ត្រូវបានចោទពីបទ “រំលោភច្បាប់សន្តិសុខថ្មី”

ប៉ូលិសហុងកុងបានចាប់ខ្លួនមនុស្សប្រមាណជា370នាក់ ក្នុងនោះមាន10នាក់ត្រូវបានចាប់ខ្លួនដោយយោងទៅលើច្បាប់សន្តិសុខថ្មីរបស់ហុងកុង ខណៈដែលមានមនុស្សរាប់ពាន់នាក់បានចេញធ្វើបាតុកម្ម។

កងកម្លាំងប៉ូលិសហុងកុងបានបាញ់ទឹក គ្រាប់ជ័រ និងផ្សែងបង្ហូរទឹកភ្នែកដើម្បីបំបែកហ្វូងបាតុករដែលបានចេញធ្វើបាតុកម្មកាលពីម្សិលមិញ នៅពេលដែលមនុស្សរាប់ពាន់នាក់បាននាំគ្នាហែក្បួនដើម្បីរំឭកដល់ថ្ងៃដែលប្រទេសអង់គ្លេសប្រគល់ហុងកុងមកឱ្យប្រទេសចិន ដោយមិនខ្វល់អំពីបម្រាមរបស់អាជ្ញាធរ។

បាតុករចំនួន10នាក់ដែលត្រូវបានចាប់ខ្លួនទៅតាមច្បាប់សន្តិសុខថ្មី ព្រោះតែពួកគេបាននាំយកទង់ឯករាជ្យ ស្លាកសម្រាប់បិទ និងខិត្តប័ណ្ណទៅតាមខ្លួន។ “ការធ្វើយុទ្ធនាការដើម្បីឯករាជ្យសម្រាប់ហុងកុងគឺជារឿងខុសច្បាប់” នេះបើតាមសម្ដីរបស់មេដឹកនាំផ្នែកសន្តិសុខហុងកុង លោក John Lee។

នៅក្នុងហេតុការណ៍ខាងលើនេះ មានមន្ត្រីរដ្ឋាភិបាលចំនួន7នាក់បានរងរបួស ក្នុងនោះម្នាក់ត្រូវបានចាក់នឹងរបស់ស្រួចចាំស្មា ខណៈកំពុងចាប់ខ្លួនបាតុករ ចំណែកមន្ត្រី3រូបផ្សេងទៀតរងរបួសដោយសារត្រូវគេជិះម៉ូតូបុក។

ទីក្រុងប៉េកាំងបានប្រកាសថា ច្បាប់សន្តិសុខថ្មីនេះនឹងជួយរក្សាសណ្ដាប់ធ្នាប់ក្នុងតំបន់រដ្ឋបាលពិសេសហុងកុង ក្រោយពីមានអស្ថិរភាពជិតមួយឆ្នាំមកនេះ។ ច្បាប់សន្តិសុខហុងកុងត្រូវបានប្រធានាធិបតីចិន លោក ស៊ី ជីនភីង ចុះហត្ថលេខាកាលពីល្ងាចថ្ងៃទី30មិថុនាកន្លងទៅ បន្ទាប់ពីច្បាប់នេះត្រូវបានគណៈកម្មធិការអចិន្ត្រៃយ៍នៃរដ្ឋសភាចិន អនុម័តក្នុងសម័យប្រជុំលើកទី20។

ច្បាប់នេះដាក់ទោសឧក្រិដ្ឋចំពោះសកម្មភាពល្មើសចំនួន4ប្រភេទ រួមមាន សកម្មភាពផ្ដាច់ខ្លួន រដ្ឋប្រហារ ភេរវកម្ម និងអំពើឃុបឃិតជាមួយបរទេស ឬក្រុមមនុស្សនៅខាងក្រៅដើម្បីបង្កគ្រោះថ្នាក់ដល់សន្តិសុខជាតិ។ ជនណាដែលបានរំលោភលើច្បាប់នេះ អាចត្រូវបានកាត់ទោសឱ្យជាប់ពន្ធនាគារអស់មួយជីវិត ហើយសិទ្ធិក្នុងការប្ដឹងនិងកាត់ទោសលើ “ករណីធ្ងន់ធ្ងរ” គឺស្ថិតក្រោមអាជ្ញាធរថ្នាក់ជាតិ។

រដ្ឋមន្ត្រីការបរទេសសហរដ្ឋអាមេរិក លោក Mike Pompeo និងក្រុមអ្នកតំណាងរាស្ត្រអាមេរិកាំង បានសម្ដែងការមិនសប្បាយចិត្តនៅពេលដែលចិនអនុម័តច្បាប់សន្តិសុខថ្មីនេះ។ សហភាពអឺរ៉ុប (EU) ក៏បានប្រកាសថា ច្បាប់នេះមានហានិភ័យបង្កឱ្យមានការធ្លាក់ចុះយ៉ាងធ្ងន់ធ្ងរនូវកម្រិតនៃស្វ័យគ្រប់គ្រងរបស់ទីក្រុងហុងកុង ហើយទន្ទឹមនឹងនេះក៏ផ្ដល់ផលអាក្រក់ដល់ឯករាជ្យភាពផ្នែកយុត្តិធម៌ និងនីតិរដ្ឋរបស់តំបន់រដ្ឋបាលពិសេសនេះផងដែរ។

ប្រទេសអង់គ្លេសក៏បានប្រកាសអនុញ្ញាតឱ្យពលរដ្ឋហុងកុងដែលមានលក្ខខណ្ឌគ្រប់គ្រាន់ចំនួន3លាននាក់ ទទួលយកលិខិតឆ្លងដែនបរទេសរបស់អង់គ្លេស រួមនឹងអ្នកដែលស្ថិតក្នុងបន្ទុក ឱ្យមកតាំងទីលំនៅក្នុងប្រទេសនេះ និងមានឱកាសក្លាយជាពលរដ្ឋអង់គ្លេសកទៀតផង។ ក្រសួងការបរទេសអង់គ្លេសបានឱ្យដឹងថា ការទទួលយកជនភៀសខ្លួនថ្មីនេះនឹងត្រូវបានធ្វើឡើង “ក្នុងរយៈពេលប៉ុន្មានខែខាងមុខនេះ”។

ចំណែកប្រទេសចិនវិញ បានឱ្យដឹងថា ប្រទេសចំនួន52 បានគាំទ្រច្បាប់សន្តិសុខហុងកុង ក្នុងនោះមានដូចជា ប្រទេសគុយបា ប្រទេសប៉ាគីស្ថាន មីយ៉ានម៉ារ អាហ្ស៊ីប កាមេរូន វេណេស៊ុយអេឡា និងបេឡារូស។ល។

ប្រភព៖ សារព័ត៌មានបរទេស

July 2, 2020

មហាសេដ្ឋីវៀតណាមនៅកម្ពុជា! ទិដ្ឋភាពខាងក្នុងបន្ទប់គេងនិងចំការចេកជាង8,000ហិចតានៅរតនគិរីរបស់ម្ចាស់ក្រុមហ៊ុន Hoang Anh-Gia Lai

បន្ទប់គេងរបស់មហាសេដ្ឋីវៀតណាម ដែលជាប្រធានក្រុមហ៊ុន Hoang Anh-Gia Lai នៅខេត្តរតនគិរី មិនមានបន្ទប់ទឹកនៅខាងក្នុងនោះទេ ប៉ុន្តែវាជាបន្ទប់ដែលមានសុវត្ថិភាពជាងគេបង្អស់ក្នុងតំបន់ចំការចេកដ៏មហាសែនធំរបស់ក្រុមហ៊ុននេះ។

ជាន់ទី3 នៅខាងក្រោយទ្វារឈើដែលបើកចំហគ្រប់ពេល នោះគឺជាបន្ទប់របស់លោក Doan Nguyen Duc (Đoàn Nguyên Đức) ប្រធានក្រុមហ៊ុន Hoang Anh-Gia Lai ដែលធ្លាប់ជាអ្នកមានជាងគេបង្អស់នៅប្រទេសវៀតណាម (គិតតាមតម្លៃមូលបត្រនៅលើផ្សារហ៊ុនកាលណោះ)។ បន្ទប់នេះមានទំហំប្រហែល15ម៉ែត្រក្រឡា និងមានទីតាំងនៅក្បែរក្បាលជណ្ដើរនៃជាន់ទី3 ក្នុងអគារចាត់ការរបស់ក្រុមហ៊ុន។

មហាសេដ្ឋីវៀតណាមនៅកម្ពុជា! ទិដ្ឋភាពខាងក្នុងបន្ទប់គេងនិងចំការចេកជាង8,000ហិចតានៅរតនគិរី — បន្ទប់គេងរបស់ម្ចាស់ក្រុមហ៊ុនវៀតណាម Hoang Anh-Gia Lai នៅរតនគិរី

អ្នកធ្វើការនៅទីនោះបានបង្ហើបឱ្យដឹងថា បន្ទប់ស្នាក់នៅរបស់មហាសេដ្ឋីវៀតណាមរូបនេះ ហាក់ដូចជាបន្ទប់នៃផ្ទះសំណាក់មួយដូច្នោះដែរ។

នៅក្នុងបន្ទប់នេះ មានតុសម្រាប់ធ្វើការមួយ ហើយនៅលើតុនេះក៏មានទូរទស្សន៍មួយគ្រឿង ប៊ិច និងក្រដាស ហើយនៅក្បែរតុធ្វើការ មានទូទឹកកកខ្នាតតូចមួយគ្រឿង។ នៅក្បែរគ្រែ មានដែកព្យួរខោអាវមួយ ចំណែកទូដែកដែលមានច្រើនថតត្រូវបានដាក់នៅជ្រុងមួយផ្សេងទៀតក្នុងបន្ទប់នេះ។

អ្វីដែលធំជាងគេនៅក្នុងបន្ទប់របស់ថៅកែវៀតណាមរូបនេះ នោះគឺគ្រែដែលមានដំបូងនិងមុងចងទុកជាស្រេច ខណៈដែលកម្រាលពូក ផួយ ខ្នើយ សុទ្ធតែមានក្លិនសាមញ្ញ និងមិនដូចទៅនឹងរបស់សម្រាប់មហាសេដ្ឋី។ តាមរយៈទិដ្ឋភាព សម្ភារៈប្រើប្រាស់ក្នុងបន្ទប់នេះ គេអាចដឹងបានថា ម្ចាស់របស់វាពិតជាមនុស្សប្រភេទសាមញ្ញនិយម។

បើនិយាយអំពីចំការចេកនៅជុំវិញនោះ គឺថា វាមានទំហំធំធេងខ្លាំងណាស់ អ្នកមិនអាចដើរដោយថ្មើរជើងដើម្បីរុករកត្រួសៗសព្វចំការនេះក្នុងរយៈពេលខ្លីនោះឡើយ។ ចំការចេកនៅទីនេះ មានទំហំផ្ទៃក្រឡារហូតដល់ជាង 8,000ហិចតា។

នៅពេលអ្នកជិះរថយន្តតាមបែបកម្សាន្តទៅតាមដងផ្លូវក្នុងចំការនេះ អ្នកនឹងត្រូវចំណាយពេលស្ទើរពេញមួយថ្ងៃដើម្បីធ្វើដំណើរបាន175គីឡូម៉ែត្រ ក៏ប៉ុន្តែនេះគ្រាន់តែជាចម្ងាយផ្លូវមួយខ្លីដែលស្មើនឹង35%នៃចម្ងាយសរុបរបស់ផ្លូវនៅទីនេះប៉ុណ្ណោះ ព្រោះថា ផ្លូវថ្នល់សរុបនៅក្នុងចំការចេករបស់មហាសេដ្ឋីវៀតណាមនេះ មានប្រវែងដល់ទៅ500គីឡូម៉ែត្រ ដែលនេះឆ្ងាយជាងប្រវែងផ្លូវ 438គីឡូមែត្រពីទីក្រុងបារិតនៃខេត្តស្វាយរៀងទៅកាន់ទីក្រុងសៀមរាបទៅទៀត (ចម្ងាយផ្លូវត្រង់ពីបាវិតទៅសៀមរាបគឺត្រឹមតែ356គីឡូម៉ែត្រប៉ុណ្ណោះ)។

“ដើមឡើយ ចំការរបស់អ្នកវិនិយោគវៀតណាមនៅក្នុងខេត្តរតនគីរីនេះ មានបុគ្គលិកត្រឹមតែជាង1,000នាក់ប៉ុណ្ណោះ ប៉ុន្តែមកដល់បច្ចុប្បន្ន ចំការនេះមានបុគ្គលិកច្រើនជាងមុនឆ្ងាយណាស់” នេះបើតាមប្រភពព័ត៌មានពីបុគ្គលិកប្រចាំនៅចំការចេកនៅក្នុងខេត្តរតនគិរិរបស់មហាសេដ្ឋីវៀតណាម Doan Nguyen Duc។ អ្នកធ្វើការនៅក្នុងចំការចេកឱ្យដឹងថា ជារៀងរាល់ថ្ងៃ មានភ្ញៀវចេញចូលចំការនេះជាហូរហែ។ ទាំងកុងតឺន័រដឹកទំនិញ ទាំងក្រុមអតិថិជនបរទេស រួមនឹងក្រុមអ្នកជំនាញផ្សេងៗ ក៏ចេញចូលទីនេះស្ទើររាល់ថ្ងៃ។

Truong Thi Tien ដែលជាអ្នកបម្រើកិច្ចការក្នុងផ្ទះរបស់ប្រធានក្រុមហ៊ុន Hoang Anh-Gia Lai ប្រចាំនៅចំការចេកក្នុងខេត្តរតនគិរី បានបង្ហើបឱ្យដឹងទៀតថា “ក្រុមមន្ត្រីជនជាតិវៀតណាមក៏មកកាន់ទីនេះកាន់តែច្រើនឡើងៗ។ ខ្ញុំមានមិត្តមួយចំនួន ដូច្នេះឱ្យតែយប់ឡើងគឺយើងនាំគ្នាចេញទៅអង្គុយជជែកគ្នាលេងនៅខាងក្រៅ។ ភ្លើងបំភ្លឺផ្លូវ មានជុំទិស មិនខ្លាចដូចប៉ុន្មានឆ្នាំមុនទៀតទេ”។ ស្ត្រីរូបនេះនិយាយបន្ថែមថា “សូម្បីតែនៅទីរួមខេត្តក៏មិនសប្បាយស្មើនឹងទីនេះដែរ”៕

June 26, 2020

សហរដ្ឋអាមេរិកបញ្ចូលឈ្មោះក្រុមហ៊ុនចំនួន20ទៅក្នុងបញ្ជី “ក្រុមហ៊ុនដែលគ្រប់គ្រងដោយបក្សកុម្មុយនិស្តចិន” ដើម្បីរៀបចំការដាក់ទណ្ឌកម្មផ្នែកហិរញ្ញវត្ថុ

អាជ្ញាធររបស់ប្រធានាធិបតិអាមេរិកាំង Donald Trump បានរកឃើញក្រុមហ៊ុនចិនចំនួន20ដែលជាកម្មសិទ្ធិ ឬគ្រប់គ្រងដោយកងទ័ពនៃបក្សកុម្មុយនិស្តចិន ដែលនេះបានធ្វើឱ្យក្រុមអ្នកវិភាគយល់ថា វាជាជំហានបឋមដើម្បីឱ្យសហរដ្ឋអាមេរិកធ្វើការដាក់ទណ្ឌកម្មថ្មីមួយទៀត។ ក្នុងបញ្ជីឈ្មោះនេះ ក៏មានក្រុមហ៊ុន Huawei, Hikvision, China Mobile និងក្រុមហ៊ុន China Telecom ផងដែរ។

យោងតាម Reuters ឯកសារពីក្រសួងការពារជាតិអាមេរិកបានបង្ហើបឱ្យដឹងអំពីបញ្ជីឈ្មោះមួយដែលមានរាយនាមក្រុមហ៊ុនចិនចំនួន20ដែលទទួលបានជំនួយពីកងទ័ពចិន និងកំពុងរកស៊ីនៅសហរដ្ឋអាមេរិក ភាគច្រើនគឺជាក្រុមហ៊ុនរដ្ឋ និងគ្របដណ្ដប់ទៅលើវិស័យជាច្រើនដូចជា អាកាសចរណ៍ ទូរគមនាគមន៍ ថាមពលនុយក្លេអែរ ផលិតកប៉ាល់។ល។

បណ្ដាក្រុមហ៊ុនចិនផ្សេងទៀតដែលមានឈ្មោះនៅក្នុងបញ្ជីនេះ រួមមានដូចជា៖ ក្រុមហ៊ុនឧស្សាហកម្មអាកាសចរណ៍ចិន (Aviation Industry Corporation of China) ក្រុមហ៊ុនសាងសង់ផ្លូវដែកចិន (China Railway Construction Corporation) ក្រុមហ៊ុនបច្ចេកវិទ្យាអាកាសចរណ៍ចិន (AviChina Industry & Technology Company Limited) ក្រុមហ៊ុនវិទ្យាសាស្ត្រនិងបច្ចវិទ្យាចិន (China Aviation Science and Industry Corporation) ក្រុមហ៊ុនបច្ចេកវិទ្យាចិនភាគខាងត្បូង (China South Industries Group) ក្រុមហ៊ុនឧស្សាហកម្មផលិតកប៉ាល់ចិន (China State Shipbuilding Corporation) ក្រុមហ៊ុនផលិតកប៉ាល់រដ្ឋចិន (China State Shipbuilding Corporation) ក្នុងក្រុមឧស្សាកម្មចិនភាគខាងជើង (China North Industries Group Corporation) ក្រុមហ៊ុន Inspur Group ក្រុមហ៊ុន Aero Engine Corporation of China ក្រុមហ៊ុន Panda Green Energy Group ក្រុមហ៊ុន China General Nuclear Power Group ក្រុមហ៊ុន China General Nuclear Power Group និងក្រុមហ៊ុន China National Nuclear Corporation ផងដែរ។

ក្រសួងការពារជាតិសហរដ្ឋអាមេរិក បានយោងទៅតាមច្បាប់ផ្ដល់សិទ្ធិការពារជាតិឆ្នាំ1999 ដើម្បីបង្កើតបញ្ជីឈ្មោះក្រុមហ៊ុនខាងលើនេះ។ របាយការណ៍បានឱ្យដឹងថា បច្ចុប្បន្ន មន្ទីរបញ្ចកោណមិនទាន់បានកំណត់សកម្មភាពទាក់ទិននឹងការដាក់ទណ្ឌកម្មណាមួយនៅឡើយ ប៉ុន្តែ ដោយយោងទៅតាមច្បាប់ ប្រធានាធិបតីសហរដ្ឋអាមេរិកមានសិទ្ធិអនុវត្តការដាក់ទណ្ឌកម្មហិរញ្ញវត្ថុទៅលើក្រុមហ៊ុនទាំងនេះ រួមមានទាំងការបង្កកទ្រព្យសម្បត្តិរបស់ក្រុមហ៊ុនទាំងនេះទៀតផង។ នេះបើតាមទំព័រ Axios។

ក្រៅពីនេះ Axios ក៏បានឱ្យដឹងថា ប្រធានាធិបតីសហរដ្ឋអាមេរិកក៏នៅមានសិទ្ធិក្នុងការប្រើប្រាស់ច្បាប់ “កម្លាំងសេដ្ឋកិច្ចបន្ទាន់អន្តរជាតិ IEEPA (International Emergency Economic Powers Act) ដើម្បីដាក់ទណ្ឌកម្មលើបណ្ដាក្រុមហ៊ុនរបស់កងទ័ពចិននៅលើទឹកដីសហរដ្ឋអាមេរិកផងដែរ។

សេតវិមានមិនបានបង្ហើបឱ្យដឹងថា នឹងបង្កកទ្រព្យសម្បត្តិរបស់បណ្ដាក្រុមហ៊ុននេះឬអត់ ប៉ុន្តែ មន្ត្រីជាន់ខ្ពស់រដ្ឋាភិបាលម្នាក់បានថ្លែងថា បញ្ជីឈ្មោះខាងលើនេះនឹងត្រូវបានរដ្ឋាភិបាលសហរដ្ឋអាមេរិក ក្រុមហ៊ុន អ្នកវិនិយោគ ក្រុមអ្នកសិក្សាស្រាវជ្រាវ និងដៃគូសហការជាដើម ធ្វើការស៊ើបអង្កេតលម្អិត មុនពេលអញ្ជើញបណ្ដាក្រុមហ៊ុនចិនខាងលើមកសហការ ពិសេសគឺនៅពេលដែលចំនួនក្រុមហ៊ុនក្នុងបញ្ជីនេះបានកើនឡើងច្រើន។

ប្រភពព័ត៌មានបានឱ្យដឹងថា បញ្ជីឈ្មោះនេះនឹងបង្កផលប៉ះពាល់ធ្ងន់ធ្ងរដល់បណ្ដាក្រុមហ៊ុនអាមេរិកាំងដែលសហការជាមួយក្រុមហ៊ុនចិន និងក្រុមជំនាញនានារបស់ចិនដែលកំពុងរកស៊ីនៅលើទឹកដីសហរដ្ឋអាមេរិក៕

ប្រភព៖ សារព័ត៌មានបរទេស

June 26, 2020

មេដឹកនាំ 3រូប…ខ្លាំង! តែខ្លោច…

ខណៈដែលមនុស្សទូទាំងពិភពលោកនៅតែត្រូវប្រុងប្រយ័ត្នការឆ្លងរាលដាលរបស់កូវីដ-19 ដែលនៅតែសាងបញ្ហានៅក្នុងភូមិភាគជាច្រើននោះ ប្រទេសដែលប្រកាសបន្ធូរបន្ថយវិធានការគ្រប់គ្រងការពារមួយចំនួន កំពុងប្រឈមនឹងការឆ្លងមេរោគរលកទី2 ដូចដែលយើងបានឃើញស្រាប់ហើយ ដូចជានៅក្នុងប្រទេសចិន កូរ៉េខាងត្បូង អូស្ត្រាលី និងថ្មីៗបំផុតគឺ អាល្លឺម៉ង់…។

នៅអាល្លឺម៉ង់ មានបុគ្គលិកមន្ទីរសត្តឃាតឆ្លងមេរោគជាង 1,500នាក់ ក្នុងទីក្រុងគូទើស្លូហ៍ ត្រូវបិទទីក្រុងដែលមានមនុស្សរស់នៅជាង 3សែននាក់មួយនេះ និងត្រូវប្រើកងទាហានចូលទៅជួយក្នុងការពិនិត្យរកមេរោគពីអ្នកដែលស្ថិតក្នុងក្រុមមនុស្សដែលមានភាពប្រថុយប្រថាន និងនៅមានភាពអាចទៅរួចក្នុងការត្រូវតែបិទ និងដាក់ទីក្រុងនោះឱ្យនៅដាច់ដោយឡែក។

ទោះជាយ៉ាងដូច្នោះក្ដី ក៏សហគមន៍ពិភពលោកនៅតែបានឃើញ និងបានដឹងពីអាការអំណួតអួតអាង មិនយកចិត្តទុកដាក់ខ្វល់ខ្វាយនឹងភាពប្រថុយប្រថានរបស់មេដឹកនាំ យ៉ាងតិច 3រូប របស់ប្រទេសដែលមានអ្នកឆ្លងមេរោគ និងស្លាប់ច្រើនបំផុត 3លំដាប់លើគេក្នុងពិភពលោក ក្នុងអំឡុងពេលកន្លងមក ដែលបានព្យាយាមមិនព្រមទទួលស្គាល់ថា កូវីដ-19 អាចសាងវិបត្តធ្ងន់ធ្ងរគ្រប់ផ្នែកបែបនេះ។

មេដឹកនាំទាំង 3រូបនោះ គឺលោកដូណាល់ ត្រាំ នៃសហរដ្ឋអាមេរិក លោកឆាអ៊ី បូលសូណារូ នៃប្រទេសប្រេស៊ីល និងលោកបូរីស ចនសុន នៃប្រទេសអង់គ្លេស។ ទាំង 3នាក់នេះមានទង្វើមិនខុសគ្នាទេ គឺអួតខ្លួនឯងពូកែ មិនខ្លាចការឆ្លងមេរោគ មិនព្រមពាក់ម៉ាស់អនាម័យការពារពេលទៅបង្ហាញខ្លួននៅក្នុងហ្វូងមហាជន និងធ្វើព្រងើយកន្តើយចំពោះសំឡេងរិះគន់ទាំងឡាយ។

គឺជាគំរូមិនល្អចំពោះប្រជាជន ដែលមើលឃើញច្បាស់នោះ គឺជនស្បែកសភាគច្រើនដែលទៅចូលរួមស្ដាប់លោកត្រាំថ្លែងការណ៍ រកសំឡេងឆ្នោតនៅទីក្រុងថាល់សា អូក្លាហូម៉ា ភាគច្រើនមិនព្រមពាក់ម៉ាស់អនាម័យការពារ ទោះជាអង្គុយជិតៗគ្នានៅក្នុងទីលានកីឡដ្ឋាន ហើយមន្ត្រីរបស់លោកត្រាំ ត្រូវបានរកឃើញថា ឆ្លងមេរោគដល់ទៅ 8នាក់។
លោកត្រាំ ត្រូវបាក់មុខ អារម្មណ៍មួម៉ៅល្អក់កករ ព្រោះអ្នកមកចូលរួមស្ដាប់ការថ្លែងប្រាស្រ័យនាពេលនោះ មានត្រឹមតែ 7ពាន់ជាងនាក់ នៅក្នុងទីលានកីឡាដ្ឋានដែលអាចដាក់មនុស្សបានដល់ទៅ 2ម៉ឺននាក់ ដែលមុនពេលនោះ មានការរំពឹងទុកថា នឹងមានមនុស្សមកក្បែរៗ 1លាននាក់ តាមរយៈការណាត់ទុកជាមុន។

សហរដ្ឋអាមេរិក ជាប់លេខ1 ជាប្រទេសដែលមានចំនួនអ្នកឆ្លងមេរោគជាង 2.3លាននាក់ ស្លាប់ជាង 1.22សែននាក់ ហើយលោកត្រាំថែមទាំងបានដកវិធានការការពារផ្សេងៗចេញ និងថែមទាំងប្រើពាក្យសម្ដីស្ទើរលេងស្ទើរមែន ពាក់ព័ន្ធនឹងវិធានការពិនិត្យរកមេរោគទៀតផង។ ភាពបរាជ័យក្នុងការទប់ទល់នឹងស្ថានការណ៍នេះ ធ្វើឱ្យលោកត្រាំលែងមានភាពគួរឱ្យគោរពជឿជាក់។

តែលោកត្រាំ ក៏នៅតែមាត់រឹង មិនព្រមទទួលស្គាល់ភាពខុសឆ្គងរបស់ខ្លួន គិតតែពីបន្ទោសអ្នកដទៃ និងរឿងហេតុផ្សេងៗ ព្រមទាំងបង្កើតរឿងផ្សេងៗឡើង ដើម្បីបិទបាំងភាពបរាជ័យរបស់ខ្លួន…ថ្មីៗបំផុតនេះ លោកត្រាំ បានចេញបញ្ជា ហាមជនបរទេសដែលមានជំនាញថ្វីដៃ មិនឱ្យចូលប្រទេសដើម្បីធ្វើការងារ ដោយយកលេសថា ត្រូវរក្សាការងារទុកឱ្យប្រជាជនអាមេរិក។

បទបញ្ជានេះ នឹងហុចផលប៉ះពាល់ដល់កម្លាំងពលកម្មជាច្រើនសែននាក់ ជាពិសេសក្នុងផ្នែកធុរកិច្ចរបស់ព័ត៌មានវិទ្យា ធ្វើឱ្យ Google ធ្វីតធើរ ហ្វេសប៊ុក និងអាម៉ាហ្សូន មានការមិនពេញចិត្តយ៉ាងខ្លាំង និងបានប្រុងប្រៀបរៀបចំថា នឹងធ្វើលិខិតចំហមួយ សម្ដែងពីក្ដីមិនពេញចិត្ត ព្រោះបទបញ្ជានេះ វានឹងធ្វើឱ្យខ្វះខាតកម្លាំងពលកម្មខាងផ្នែកនេះ។

លោក ត្រាំ នៅមិនទាន់មានវិធីណាមួយក្នុងការកែបញ្ហាកូវីដ-19 បាននៅឡើយ ព្រោះមិនបានយកចិត្តដាក់ចំពោះការដាស់តឿនរបស់បណ្ដាអ្នកជំនាញការ ដែលមិនអាចចូលជិតលោកត្រាំបាន ព្រោះទៅផ្ដល់ទិន្នន័យដែលធ្វើឱ្យលោកត្រាំមិនចូលចិត្ត ធ្វើឱ្យអ្នកជំនាញការពូកែៗ ដូចជាលោកវេជ្ជបណ្ឌិត អ៊ែនថូនី ហ្វៅស៊ី និងរូបឺត រេដហ្វ៊ីល របស់ស្ថាប័ន ស៊ីឌីស៊ី ត្រូវបិទមាត់។

ទាំង 2នាក់នេះ ទើបតែទៅផ្ដល់យោបល់ជាមួយគណៈកម្មាធិការរបស់សភាតំណាងរាស្ត្រកាលពីថ្ងៃអង្គារ រួមជាមួយប្រធានស្ថាប័នផ្សេងៗ ដែលមានចំណែកក្នុងការទប់ទល់នឹងការឆ្លងរាលដាលរបស់មេរោគកូវីដ-19 ដោយបានសម្ដែងពីក្ដីបារម្ភកង្វល់ថា នឹងមានការឆ្លងរាលដាលជាថ្មីម្ដងទៀត ព្រោះមើលឃើញតួលេខអ្នកឆ្លងបានកើនឡើងខ្លាំងនៅក្នុងរដ្ឋជាច្រើន ខណៈនៅមានទាន់វ៉ាក់សាំងការពារ។

មេដឹកនាំប្រទេសប្រេស៊ីល លោក ឆាអ៊ី បូលសូណារូ ត្រូវគេមើលឃើញថា ជាលោកត្រាំ នៃភូមិភាគអាមេរិកឡាទីន ក៏មានទង្វើមិនខុសគ្នាដែរ មិនពាក់ម៉ាស់អនាម័យការពារពេលទៅបង្ហាញខ្លួននៅក្នុងហ្វូងសាធារណជន ហើយរាងព្រហើនៗ មិនស្ដាប់អ្នកណា និងមិនជឿគោលការណ៍វិទ្យាសាស្ត្រ ធ្វើឱ្យតួលេខអ្នកឆ្លងមេរោគ និងស្លាប់នៅក្នុងប្រទេសប្រេស៊ីល ក្លាយជាប្រទេសលំដាប់លេខ2។

ប្រជាជនប្រេស៊ីលឆ្លងមេរោគជាង 1.12លាននាក់ ស្លាប់រួចទៅហើយជាង 5ម៉ឺននាក់ ជាប់លំដាប់លេខ2 បន្ទាប់ពីសហរដ្ឋអាមេរិក។ ជនរងគ្រោះភាគច្រើន ជាជនកុលសម្ព័ន្ធព្រៃនៅតាមដងទន្លេអាម៉ាហ្សូន ដែលការសិក្សាអប់រំទៅមិនដល់ និងនៅក្នុងទីប្រជុំជនអនាធិបតេយ្យចំនួនដ៏ច្រើនក្នុងទីក្រុងធំៗ ដូចជា រីអូ ដឺ ចាណេរ៉ូ, ប្រាស៊ីលៀ និងសៅ ប៉ូឡូ ជាដើម។

ការឆ្លងរាលដាលនៅប្រេស៊ីល ទើបតែមានតួលេខកើនឡើងក្នុងអត្រាខ្ពស់នៅក្នុងខែនេះឯង ហើយប្រទេសជិតខាង ដូចជា ប៉េរូ ឈីលី កូឡុំបៀ ជាដើម ក៏មានចំនួនអ្នកឆ្លងមេរោគច្រើនដូចគ្នា ក្លាយជាប្រភពចម្លងដ៏ធំមួយ នៅតំបន់អាមេរិកឡាទីន។

លោក បូលសូណារូ ធ្វើឫកពូកែអួតអាង រហូតដល់តុលាការបញ្ជាឱ្យពាក់ម៉ាស់អនាម័យការពារកាលពីថ្ងៃអង្គារ ដូច្នេះ ចាំមើលថា តើមេដឹកនាំដែលយកគំរូតាមលោកត្រាំ នឹងហ៊ានប្រឆាំងនឹងបញ្ជាតុលាការដែរឬទេ? និងថែមទាំងត្រូវចាំមើលទៀតថា តើការឆ្លងមេរោគ និងស្លាប់ប្រចាំថ្ងៃរបស់ប្រជាជនប្រេស៊ីល នឹងថយចុះឬទេ? បើមេដឹកនាំនៅតែគ្មានវិធានការដែលទទួលបានលទ្ធផលល្អបែបនេះ។

នៅមានម្នាក់ទៀត ដែលចេញក្បួនដូចលោកត្រាំដែរ នោះគឺលោក បូរីស ចនសុន នាយករដ្ឋមន្ត្រីនៃប្រទេសអង់គ្លេស ដែលច្រើនតែមិនពាក់ម៉ាស់អនាម័យការពារ និងយឺតយ៉ាវក្នុងការកែសម្រួលវិធានការទប់ទល់មេរោគកូវីដ-19។ អង់គ្លេសមានតួលេខអ្នកស្លាប់ជាង 5ម៉ឺននាក់ដូចគ្នា ហើយក្នុង 1ថ្ងៃៗ ការឆ្លងមេរោគ និងការស្លាប់ នៅតែស្ថិតក្នុងអត្រាខ្ពស់ជាងប្រទេសផ្សេងៗក្នុងទ្វីបអឺរ៉ុបនៅឡើយ។

កាលពីមុនហ្នឹង លោកចនសុន បានអះអាងថា ត្រូវឱ្យប្រជាជនទទួលមេរោគ និងសាងប្រពន្ធប្រឆាំងជំងឺដោយខ្លួនឯង។ វិធានការគ្រប់គ្រងក៏មិនតឹងរ៉ឹង រហូតដល់ការឆ្លងមេរោគ និងចំនួនអ្នកស្លាប់កើនឡើងច្រើន ពេញហៀរក្នុងមន្ទីរពេទ្យ និងកន្លែងទុកសាកសព ដែលភាគច្រើនជាជនស្បែកពណ៌ផ្សេងៗ និងជនជាតិភាគតិច។

ពេលខ្លះត្រូវប្រើប្រាស់អគារកន្លែងចតរថយន្ត ធ្វើជាកន្លែងដាក់សាកសពបណ្ដោះអាសន្នសម្រាប់អ្នកស្លាប់ដែលជាជនមុស្ល៊ីម រង់ចាំការនាំយកទៅបញ្ចុះ…និងទម្រាំតែចេញវិធានការតឹងរ៉ឹង ការឆ្លងរាលដាលក៏រីកធំបាត់ទៅហើយ តែលោកចនសុន ក៏ដូចលោកត្រាំដែរ គឺត្រូវការបន្ធូរបន្ថយវិធានការដើម្បីស្ដារសេដ្ឋកិច្ច ទាំងដែលការឆ្លងរាលដាលនៅមិនទាន់ថយចុះនៅឡើយ។

ថ្ងៃទី4 ខែក្រោយ លោកចនសុន នឹងអនុញ្ញាតឱ្យធុរកិច្ចផ្សេងៗ ដូចជា រង្គសាល ភោជនីយដ្ឋាន ហាងអ៊ុតកែសម្ផស្ស និងហាងបម្រើសេវាកម្មផ្សេងៗ បើកដំណើរការតាមប្រក្រតី នៅសល់តែក្រុមអាជីពដែលប្រថុយប្រថានប៉ុណ្ណោះ ដែលត្រូវរង់ចាំមើលស្ថានការណ៍បន្តទៀត។

មានអ្នកលើកចំណុចសង្កេតឡើងថា បើមេដឹកនាំ ទាំងលោកត្រាំ លោកបូលសូណារូ និងលោកចនសុន បានប្រកាសវិធានការគ្រប់គ្រងការពារតឹងរ៉ឹងឱ្យលឿនជាងនេះ ចំនួនអ្នកឆ្លងមេរោគ និងស្លាប់ ប្រហែលជាមិនច្រើនដល់ថ្នាក់នោះទេ តែទាំង 3នាក់មានភាពដូចគ្នាមួយ គឺមិនស្ដាប់អ្នកណា មិនជឿគោលការណ៍វិទ្យាសាស្ត្រ អំណួត និងមិនទទួលខុសត្រូវលើការខូចខាត។

លោកត្រាំ ថែមទាំងត្រូវអ្នកសារព័ត៌មានដាក់ចំណុចសង្កេតទៀតថា តើមើលឃើញជីវិតប្រជាជនអាមេរិកាំង គ្មានន័យ ឬយ៉ាងណា? បានជាយកទៅធ្វើជារឿងកំប្លែង ក្នុងអំឡុងការថ្លែងប្រាស្រ័យរកសំឡេងឆ្នោត និងការថ្លែងការណ៍នាពេលកន្លងមក និងប្រហែលជាលោក មានគ្រឹះនៃការរិះគិតក្នុងអារម្មណ៍រើសអើងពណ៌សម្បុរ ជាតិសាសន៍ទៀតផងក៏មិនដឹង ទើបមានផ្នត់គំនិតស្ដាំនិយមយ៉ាងគ្មានបិទបាំងបែបនេះ។

អ្នកជំនាញការដែលបានផ្ដល់យោបល់ទៅគណៈកម្មាធិការ បានឱ្យរង់ចាំមើលថា 2សប្ដាហ៍ទៀតបន្ទាប់ពីនេះទៅ តើតួលេខអ្នកឆ្លងមេរោគ នឹងកើនឡើងច្រើនឬទេ? ដោយសារតែការប្រមូលផ្ដុំគ្នានៅក្នុងទីកន្លែងផ្សេងៗ រួមទាំងអូក្លាហូម៉ាផង និងត្រូវចាំមើលថា នៅក្នុងតំបន់ផ្សេងៗ នៅក្នុងទ្វីបជាច្រើនដែលកំពុងបង្ហាញសញ្ញាថា មានការឆ្លងរាលដាលរលកទី2 នោះ មានភាពអាចទៅរួចខ្ពស់ណាស់៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 26, 2020

ម្ចាស់ SoftBank ចាកចេញពីក្រុមប្រឹក្សាភិបាលរបស់ Alibaba តែថានៅសង្ឃឹមទៅលើ TikTok និង ARM

Masayoshi Son ចាក់ចេញពីក្រុមប្រឹក្សាភិបាលនៃក្រុមហ៊ុនចិន Alibaba ក្រោយរយៈពេល15ឆ្នាំនៅជាមួយគ្នា ប៉ុន្តែបានអះអាងថា មិនមែនដោយមូលហេតុបាត់បង់ទំនុកចិត្តលើក្រុមហ៊ុន “យក្ស” របស់ចិនមួយនេះទេ។

បិទបញ្ចប់មហាសន្និបាតនៃភាគហ៊ុនិករបស់ Softbank កាលពីថ្ងៃទី25មិថុនា ស្ថាបនិក Masayoshi Son បានធ្វើឱ្យមានការភ្ញាក់ផ្អើលជាខ្លាំងនៅពេលលោកប្រកាសថា នឹងចាកចេញពីក្រុមប្រឹក្សាភិបាលនៃក្រុមហ៊ុន Alibaba។ លោកថ្លែងថា ជិត “បញ្ចប់ការសិក្សា” ពីក្រុមប្រឹក្សាភិបាលនៃក្រុមហ៊ុននេះហើយ។

Masayoshi Son បានបកស្រាយថា មូលហេតុដែលលោកចាកចេញនេះ មិនមែនដោយសារមានទំនាស់អ្វីនោះឡើយ បើទោះជាលោក Jack Ma (សហស្ថាបនិករបស់ Alibaba) កាលពីខែមុនក៏បានប្រកាសចាកចេញពីក្រុមប្រឹក្សាភិបាលរបស់ SoftBank។ មហាសេដ្ឋីទាំងពីររូបនេះនៅតែរក្សាទំនាក់ទំនងយ៉ាងជិតស្និទ្ធ ក្រោយពីលោក Masayoshi Son បានក្លាយជាវិនិយោគិនម្នាក់ក្នុងចំណោមមនុស្សដែលបានវិនិយោគទៅលើ Alibaba មុនគេ។ បច្ចុប្បន្ន ក្រុមហ៊ុនចិន Alibaba នេះ មានតម្លៃសរុបប្រមាណជា600ពាន់លានដុល្លារអាមេរិក និងត្រូវបានចាត់ទុកថាជាគ្រាប់ពេជ្រនៅក្នុងបញ្ជីវិនិយោគរបស់ SorfBank។

“យើងពុំមានការខ្វែងគំនិតគ្នាអ្វីនោះទេ។ នេះគឺជាការពេញចិត្តដ៏ល្អមួយ” លោក Masayoshi Son បានថ្លែងបែបនេះនៅក្នុងកិច្ចប្រជុំប្រចាំឆ្នាំរបស់ក្រុមហ៊ុន។

ការចាកចេញរបស់លោក Masayoshi Son និងលោក Jack Ma ហាក់មិនទាន់មានផលប៉ះពាល់ផ្ទាល់អ្វីមួយដល់ក្រុមហ៊ុនទាំងពីរខាងលើនៅឡើយ ប៉ុន្តែប្រការនេះបានក្លាយជាទីបញ្ចប់នៃយុគសម័យមួយ។ លោក Masayoshi Son និងលោក Jack Ma គឺជាអ្នកជំនួញពីររូបក្នុងចំណោមអ្នកជោគជ័យបំផុតនៃជំនាន់របស់ពួកគេ ហើយអាចពឹងផ្អែកទៅលើការណែនាំពីគ្នាទៅវិញទៅមកអស់រយៈពេលជាច្រើនទសវត្សរ៍កន្លងមកនេះ។

លោក Son បានចូលជាសមាជិកនៃក្រុមប្រឹក្សាភិបាលរបស់ Alibaba តាំងពីឆ្នាំ2005។ នៅពេល SoftBank ជួបបញ្ហាជាមួយនឹងខ្ទង់ខាតបង់ក្នុងឆ្នាំនេះ លោក Son អាចប្រើប្រាស់ភាគហ៊ុននៅ Alibaba ដើម្បីធ្វើជាទុនចាំបាច់នៅ SoftBank។

គិតមកដល់បច្ចុប្បន្ន Alibaba នៅតែជាខ្ទង់វិនិយោគជោគជ័យបំផុតរបស់ SoftBank។ ឆ្នាំ2000 លោក Son បានវិនិយោគ20លានដុល្លារទៅលើ Alibaba (ដែលកាលណោះ Alibaba មិនទាន់មានឈ្មោះល្បីនៅឡើយ) ដើម្បីតភ្ជាប់ទំនាក់ទំនងក្រុមអ្នកផលិតនៅប្រទេសចិនជាមួយនឹងអតិថិជននៅបរទេស។ បច្ចុប្បន្ន ភាគហ៊ុនខាងលើនេះ មានតម្លៃឡើងដល់ជាង150ពាន់លានដុល្លារអាមេរិកទៅហើយ។ ការវិនិយោគខាងលើ បានជួយឱ្យលោក Son មានឈ្មោះល្បី ហើយក្រោយមកក៏បង្កើតបាន Vision Fund ដែលមានតម្លៃជាទឹកប្រាក់ឡើងដល់ 100ពាន់លានដុល្លារអាមេរិក។

ម្ចាស់ SoftBank ចាកចេញពីក្រុមប្រឹក្សាភិបាល Alibaba តែនៅសង្ឃឹមទៅលើ TikTok — លោក Masayoshi Son

លោក Son មានឈ្មោះល្បីថាជាមនុស្សដែលយកចិត្តទុកដាក់នៅលើបណ្ដាក្រុមហ៊ុនដែលលោកគិតថា មានលទ្ធភាពក្លាយជា “Jack Ma បន្ទាប់”។ Alibaba ក៏បានក្លាយជាស្ដង់ដាមួយដើម្បីឱ្យលោក Son អាចធ្វើកិច្ចព្រមព្រៀងក្នុងការវិនិយោគទៅលើបណ្ដាក្រុមហ៊ុន startup ផ្សេងៗ។ ប៉ុន្តែ ថ្មីៗនេះ លោក Son ត្រូវរងការខាតបង់ច្រើនទៅលើខ្ទង់វិនិយោគនៅក្នុងបណ្ដាក្រុមហ៊ុនថ្មីៗ ដូចជា Wag Labs, Zume Pizza និង Brandless ជាដើម។ មុននោះ SoftBank ក៏ទទួលរងការខាតបង់យ៉ាងធ្ងន់ធ្ងរដោយសារតែ WeWork ផងដែរ។

យ៉ាងនេះក្ដី នៅក្នុងកិច្ចប្រជុំកាលពីថ្ងៃទី25មិថុនាកន្លងទៅ លោក Masayoshi Son នៅតែបង្ហាញការជឿជាក់។ នៅពេលត្រូវបានក្រុមភាគហ៊ុនិកសួរថា “តើមានចំនួនប៉ុន្មានក្នុងចំណោមក្រុមហ៊ុនទាំង88ដែលត្រូវបាន Vision Fund បណ្ដាក់ទុកនាបច្ចុប្បន្ន អាចក្លាយជា Alibaba បន្ទាប់?” លោក Son ថ្លែងថា “មាន mini Alibaba មួយ ឬពីរ”។

លោក Son ក៏បានបញ្ជាក់អំពីការជឿជាក់របស់ខ្លួនទៅលើការប្ដូរផ្លាស់ទៅរកឌីជីថល់និយមនៅទូទាំងពិភពលោក រួមនឹងការបង្ហាញវត្តមាននៃបច្ចេកវិទ្យាបញ្ញាសិប្បនិម្មិត។ ទាំងពីរនេះកំពុងតែរីកចម្រើនយ៉ាងល្បឿននៅក្នុងសម័យCOVID-19 ហើយវានឹងជួយនាំមកនូវប្រយោជន៍សម្រាប់ខ្ទង់វិនិយោគរបស់លោកទៅលើក្រុមហ៊ុនចិន ByteDance ដែលជាម្ចាស់បណ្ដាញសង្គម TikTok និងក្រុមហ៊ុនផលិតឈីប ARM របស់អង់គ្លេស៕

ប្រភព៖ Bloomberg

June 26, 2020

រន្ទះបាញ់នៅឥណ្ឌាបានសម្លាប់មនុស្សជាង100នាក់! គ្រួសារសពទទួលបានសំណងច្រើន

មនុស្សជាង100នាក់បានបាត់បង់ជីវិត និងរាប់សិបនាក់រងរបួសក្នុងថ្ងៃតែមួយនៅក្នុងរដ្ឋ Bihar និងរដ្ឋ Uttar Pradesh នៅភាគខាងជើងប្រទេសឥណ្ឌា ដោយសារតែត្រូវរន្ទះបាញ់។

មន្ទីរគ្រប់គ្រងគ្រោះមហន្តរាយនៃរដ្ឋ Bihar បានឱ្យដឹងថា ស្រុក Gopalganj មានអ្នកស្លាប់ច្រើនជាងគេ ដោយមាន13ករណី។ ចំណែកក្រៅពីនេះ គឺមាននៅក្នុងតំបន់ចំនួន22ផ្សេងទៀតរបស់រដ្ឋនេះ ខណៈដែលមានយ៉ាងតិច30នាក់ត្រូវរងរបួស។ រដ្ឋ Uttar Pradesh ក៏បានរាយការណ៍ថា មានមនុស្សចំនួន24នាក់បានស្លាប់ និង12នាក់រងរបួសដោយសាររន្ទះបាញ់។

ករណីខាងលើនេះបានកើតឡើងនៅក្នុងថ្ងៃទី25មិថុនា2020ដូចគ្នា។ Sandeep Kumar ដែលជាមន្ត្រីម្នាក់មកពីមន្ទីរគ្រប់គ្រងគ្រោះមហន្តរាយនៃរដ្ឋ Bohar ថ្លែងថា ក្រុមគ្រួសារនីមួយៗដែលមានអ្នកស្លាប់ដោយសាររន្ទះបាញ់ សុទ្ធតែទទួលបានប្រាក់ជំនួយចំនួន5,300នាក់។

នាយករដ្ឋមន្ត្រីឥណ្ឌា លោក Narendra Modi បានបង្ហោះសារនៅលើទំព័រ Twitter របស់លោកថា ករណីស្លាប់ដោយសាររន្ទះបាញ់នៅក្នុងបណ្ដាស្រុកនៃរដ្ឋ Bihar និងរដ្ឋ Uttar Pradesh គឺជា “ព័ត៌មានដ៏គួរឱ្យសង្វេគ”។ លោកបន្តថា អាជ្ញាធរមូលដ្ឋានបានចូលរួមបំពេញបេសកកម្មជួយសង្គ្រោះបន្ទាន់ ព្រមទាំងផ្ញើសារចូលរួមរំលែកទុក្ខជាមួយគ្រួសារនៃជនរងគ្រោះផងដែរ។

នៅប្រទេសឥណ្ឌា និងតំបន់អាស៊ីខាងត្បូង តែងតែមានករណីស្លាប់ដោយសាររន្ទះបាញ់ជាញឹកញាប់នៅក្នុងខែឧសភានិងខែមិថុនាជារៀងរាល់ឆ្នាំ។ យោងតាមអង្គភាពគ្រប់គ្រងឯកសារជាតិឥណ្ឌា មនុស្សចំនួន2,880នាក់បានស្លាប់ដោយសាររន្ទះបាញ់នៅក្នុងឆ្នាំ2017 និង2,357នាក់នៅក្នុងឆ្នាំ2018។

ករណីបាត់បង់ជីវិតដោយសាររន្ទះបាញ់នៅប្រទេសឥណ្ឌា ភាគច្រើនកើតឡើងទៅលើកសិករដែលជាអ្នកតែងតែចេញទៅធ្វើការនៅកណ្ដាលវាល សូម្បីតែពេលមេឃកំពុងភ្លៀង៕

ប្រភព៖ សារព័ត៌មានបរទេស

June 26, 2020

តៃវ៉ាន់បញ្ជូនទ័ពទៅកាន់ប្រជុំកោះដែលកំពុងដណ្ដើមគ្នាជាមួយចិន

កងទ័ពម៉ារីនតៃវ៉ាន់ បញ្ជូនទាហានរបស់ខ្លួនទៅកាន់ប្រជុំកោះ Pratas (ឬ Dongsha/Tungsha) បន្ទាប់ពីមានដំណឹងថា ទីក្រុងប៉េកាំងត្រៀមធ្វើសមយុទ្ធនៅក្នុងតំបន់។

កាលពីថ្ងៃទី22មិថុនាកន្លងទៅ មន្ត្រីម្នាក់ដែលស្ថិតក្នុងកងកម្លាំងការពារកោះរបស់តៃវ៉ាន់ បានឱ្យដឹងថា កងទ័ពម៉ារីនរបស់តៃវ៉ាន់កំពុងត្រូវបានបញ្ជូនមកកាន់ប្រជុំកោះ Tungsha ក្នុងរយៈពេលខ្លី ដើម្បីធ្វើការហ្វឹកហាត់។ ប៉ុន្តែ មន្ត្រីរូបនេះមិនបានបង្ហើបឱ្យដឹងលម្អិតអំពីចំនួនទាហានដែលត្រូវបញ្ជូនមកកាន់ទីនេះ រួមនឹងពេលវេលាច្បាស់លាស់នោះទេ។

ប្រជុំកោះ Tungsha ដែលស្ថិតនៅភាគឦសាននៃសមុទ្រចិនខាងត្បូង មានតួនាទីជាយុទ្ធសាស្ត្រយ៉ាងសំខាន់សម្រាប់ចិនប៉េកាំង និងចិនតៃប៉ិ ដោយសារតែប្រជុំកោះនេះនៅទល់មុខផ្លូវចេញចូលសមុទ្រប៉ាស៊ីហ្វីករបស់កងទ័ពជើងទឹកចិនដែលមានមូលដ្ឋាននៅកោះ Hainan។ បច្ចុប្បន្ន តៃវ៉ាន់កំពុងតែដាក់ពង្រាយកងកម្លាំងប៉ូលិសជើងទឹកដើម្បីត្រូតពិនិត្យប្រជុំកោះTungsha ប៉ុន្តែ ភាគីខាងទីក្រុងប៉េកាំងក៏បាននិងកំពុងអះអាងថា នេះគឺជាទឹកដីរបស់ខ្លួន។

តៃវ៉ាន់បញ្ជូនទ័ពទៅកាន់ប្រជុំកោះកំពុងដណ្ដើមគ្នាជាមួយចិន — ប្រជុំកោះនេះនៅទល់មុខផ្លូវចេញចូលសមុទ្រប៉ាស៊ីហ្វីករបស់កងទ័ពជើងទឹកចិនដែលមានមូលដ្ឋាននៅកោះ Hainan

សកម្មភាពខាងលើរបស់កោះតៃវ៉ាន់ ត្រូវបានធ្វើឡើងក្រោយពីមានដំណឹងថា កងទ័ពរំដោះប្រជាជនចិន (PLA) មានគម្រោងធ្វើសមយុទ្ធទ្រង់ទ្រាយធំនៅក្នុងតំបន់នាខែសីហាខាងមុខ ក្នុងនោះក៏នឹងមានឈុតឆាកអនុវត្តសេនារីយោវាយលុកដណ្ដើមប្រជុំកោះTungsha ផងដែរ។

ភាពតានតឹងនៅឆកសមុទ្រតៃវ៉ាន់ ថ្មីៗនេះបានឡើងកម្ដៅខ្លាំងបន្ទាប់ពីចិនបានបញ្ជូនយន្តហោះចម្បាំង យន្តហោះទម្លាក់គ្រាប់បែក រួមនឹងយន្តហោះដឹកជញ្ជូនចូលទៅក្បែរកោះក្នុងរយៈពេល6ខែ។ ភាគីក្រសួងការពារជាតិចិន មិនទាន់បានបញ្ជាក់អំពីមូលហេតុដែលនាំឱ្យមានការបង្កើនវត្តមានទ័ពនៅជុំវិញកោះតៃវ៉ាន់នៅឡើយ។

ក្រុមអ្នកវិភាគយល់ថា សកម្មភាពហោះហើរទៅកៀកកោះតៃវ៉ាន់ ហាក់ដូចជាការប្រតិកម្មរបស់ទីក្រុងប៉េកាំង ក្រោយពីទីក្រុងវ៉ាស៊ីងតោន បានបញ្ជូនយន្តហោះដឹកជញ្ជូនឱ្យហោះទៅដល់ជាយកោះ។ ទន្ទឹមនឹងនេះ ទីក្រុងប៉េកាំងក៏មានបំណងព្រមានទៅលើករណីតៃវ៉ាន់បាញ់រ៉ុកកែតចំនួន2គ្រាប់កាលពីថ្ងៃទី11មិថុនាផងដែរ។ ការបាញ់សាកល្បងកាំជ្រួចរបស់តៃវ៉ាន់នេះ ស្ថិតនៅក្នុងកម្មវិធីអភិវឌ្ឍអាវុធដើម្បីបង្កើនសមត្ថភាពការពារកោះតៃវ៉ាន់នៅចំពោះមុខការគំរាមកំហែងពីចិនដីគោក៕

ប្រភព៖ Focus Taiwan

June 25, 2020

ប្រព័ន្ធទទួលសញ្ញាអ៊ីនធើណិតពីផ្កាយរណបរបស់ Elon Musk មានរូបរាងខុសគេ

ឧបករណ៍ចាប់យកសញ្ញាអ៊ីនធើណិតពីផ្កាយរណប Starlink របស់ក្រុមហ៊ុន SpaceX មានរូបរាងប្រហាក់ប្រហែលនឹងថាសហោះ ដែលវាដូចទៅនឹងអ្វីដែលលោក Elon Musk ធ្លាប់បានលើកឡើងកាលពី5ឆ្នាំមុន។

អ្នកប្រើប្រាស់ Reddit (គេហទំព័រប្រមូលព័ត៌មានសង្គម…នៅអាមេរិក) ថតបានរូបភាពជាច្រើនសន្លឹកបង្ហាញអំពីឧបករណ៍ពិសេសដែលមានរូបរាងស្រដៀងទៅនឹងថាសហោះ UFO នៅក្នុងតំបន់សាកល្បងឧបករណ៍អវកាសរបស់ក្រុមហ៊ុន SpaceX ដែលស្ថិតនៅក្នុងភូមិ Merrillan ក្នុងតំបន់ Jackson នៃរដ្ឋ Wisconsin របស់សហរដ្ឋអាមេរិក។

បើទោះជាភាគីខាង SpaceX បានបដិសេធក្នុងការបញ្ជាក់ ឬបញ្ចេញមតិអំពីបណ្ដារូបភាពទាំងនេះ ប៉ុន្តែ សារព័ត៌មាន Business Insider យល់ថា នេះគឺជាឧបករណ៍ដែលធ្លាប់ត្រូវបានលោក Musk លើកឡើងកាលពីច្រើនឆ្នាំមុន។ ឧបករណ៍ទាំងនេះមានរូបរាងតូចល្មម និងហាក់មានភាពរឹងមាំល្អ និងមានកម្ពស់ប្រហែល1.5ម៉ែត្រ ដោយផ្នែកខាងលើមានបំពាក់ថាសសម្រាប់ចាប់រលកសញ្ញាអ៊ីនធើណិត ស្រដៀងទៅនឹងចានទូរទស្សន៍ផ្កាយរណប។

កាលពីឆ្នាំ2015 លោក Musk ធ្លាប់បាននិយាយអំពីឧបករណ៍ដែលជួយឱ្យអតិថិជនអាចប្រើប្រាស់សេវាកម្មអ៊ីនធើណិតពីផ្កាយរណបរបស់លោក៖ “វាមានរូបរាងដូចទៅនឹងថាសហោះ UFO ស្ដើង ស្មើ នឹងត្រូវបានភ្ជាប់ទៅនឹងផ្នែកខាងលើនៃដែកមួយកំណាត់។ វាមានប្រព័ន្ធម៉ាស៊ីនស្វ័យប្រវត្តដែលមានតួនាទីបង្វែងថាសទៅរកទិសដែលមានរលកសញ្ញាអ៊ីនធើណិតច្រើនដែលបាញ់ចេញពីផ្កាយរណប Starlink របស់ SpaceX”។ ក៏ប៉ុន្តែ 5ឆ្នាំកន្លងមកហើយបន្ទាប់ពីលោក Musk បាននិយាយដូចខាងលើ គេមិនទាន់បានឃើញរូបរាងជាផ្លូវការណាមួយបញ្ជាក់អំពីឧបករណ៍ចាប់សញ្ញាអ៊ីនធើណិតនេះនៅឡើយ។

បណ្ដារូបភាពជាក់ស្ដែងដែលទើបបែកធ្លាយនាពេលថ្មីៗនេះ ទទួលបានប្រតិកម្មវិជ្ជមានពីសង្គមបច្ចេកវិទ្យា។ អត្ថបទចែករំលែករូបភាពដំបូងៗនៅលើគេហទំព័រ Reddit បាននាំឱ្យមានការបញ្ចេញមតិប្រមាណជា100លើក ព្រមទាំងទទួលបានការវាយតម្លៃល្អ99%។ មនុស្សជាច្រើនយល់ឃើញថា វត្តមាននៃរូបភាពខាងលើនេះបានបង្ហាញថា គម្រោងផ្គត់ផ្គង់អ៊ីនធើណិតពីផ្កាយរណប់របស់មហាសេដ្ឋី Elon Musk នឹងក្លាយជាការពិតក្នុងពេលឆាប់ៗនេះ។

សូមរំឭកថា កាលពីប៉ុន្មានថ្ងៃកន្លងទៅនេះ គេហទំព័ររបស់ Starlink ក៏បានចាប់ផ្ដើមអនុញ្ញាតឱ្យមនុស្សគ្រប់គ្នាចុះឈ្មោះទទួលព័ត៌មានថ្មីស្ដីអំពីគម្រោងនិងការប្រើប្រាស់សាកល្បងសេវាកម្មអ៊ីនធើណិតពីផ្កាយរណបរបស់ក្រុមហ៊ុន SpaceX ផងដែរ៕

ប្រភព៖ Bussiness Insider

June 25, 2020

NASA សាកល្បងដំណើរការឧទ្ធម្ភាគចក្រស្វ័យប្រវត្ត សម្រាប់ហោះនៅលើពិភពព្រះអង្គារ (វីដេអូ)

ឧទ្ធម្ភាគចក្រ Ingenuity ទទួលបានជោគជ័យក្នុងការហោះហើរសាកល្បងផ្ដាច់ខ្លួនពី “ពោះ” របស់យានរុករក និងបានចុះចតលើដីដោយសុវត្ថិភាព។

យានរុករកឈ្មោះ Rerseverance របស់ទីភ្នាក់ងារអវកាសអាមេរិក (NASA) នឹងហោះទៅកាន់ពិភពព្រះអង្គារជាមួយនឹងឧទ្ធម្ភាគចក្រស្វ័យប្រវត្តឈ្មោះ Ingenuity។ តាមគម្រោង ឧត្ធម្ភាគចក្រស្វ័យប្រវត្ត Ingenuityនេះ នឹងធ្វើការហោះហើរសាកល្បងដំបូងនៅលើពិភពដទៃក្នុងលម្ហអវកាសក្រៅពីផែនដីនាពេលដ៏ខ្លីខាងមុខ។

ដើម្បីបំពេញបេសកកម្ម ដំបូង ឧត្ធម្ភាគចក្រស្វ័យប្រវត្ត Ingenuity ត្រូវតែមានសមត្ថភាពក្នុងការញែកខ្លួនចេញពី “ពោះ” របស់យានរុករក រួចហើយចុះចតនៅលើផ្ទៃដី។ នេះគឺជាការធ្វើតេស្តប្រព័ន្ធដំណើរការរបស់ឧត្ធម្ភាគចក្រស្វ័យប្រវត្តសម្រាប់ហោះនៅលើពិភពអង្គាររបស់អង្គការ NASA។

NASA សាកល្បងដំណើរការឧទ្ធម្ភាគចក្រស្វ័យប្រវត្ត ហោះនៅលើពិភពព្រះអង្គារ (វីដេអូ) — យានរុករកឈ្មោះ Rerseverance របស់ទីភ្នាក់ងារអវកាសអាមេរិក (NASA)

ដំបូង គម្របរបស់យានរុករកត្រូវបើកគន្លឹះដោយស្វ័យប្រវត្ត បន្ទាប់មក ឧត្ធម្ភាគចក្រស្វ័យប្រវត្ត Ingenuity នឹងត្រូវបានដាក់ចុះ។ ម៉ាស៊ីនតូចមួយនឹងធ្វើការរុញច្រានរហូតដល់ឧត្ធម្ភាគចក្រស្វ័យប្រវត្ត Ingenuity មានលំនឹងស្មើគ្នា ដោយជើងទាំងអស់របស់ Ingenuity ត្រូវជ្រែងចេញជា4ទិស។ ចុងក្រោយ Ingenuity នឹងត្រូវទម្លាក់ចុះទៅកាន់ផ្ទៃដីនៃពិភពអង្គារ ហើយយាន Perseverance នឹងចាកចេញ ទុកកន្លែងឱ្យ Ingenuity ដើម្បីហោះឡើង។

តាមផែនការ យានរុករក Perseverance នឹងត្រូវបញ្ជូនទៅចុះចតនៅលើផ្ទៃពិភពព្រះអង្គារនៅក្នុងខែកុម្ភៈ ឆ្នាំ2021ខាងមុខ។ ឧត្ធម្ភាគចក្រស្វ័យប្រវត្ត Ingenuity ក៏នឹងត្រូវចាប់ផ្ដើមដំណើរការបន្ទាប់នោះរយៈពេល2ខែ៕

ប្រភព៖ សារព័ត៌មានបរទេស

June 25, 2020

យន្តហោះប៉ាគីស្ថានធ្លាក់ដែលបណ្ដាលឱ្យមនុស្ស98នាក់ស្លាប់ ក៏ព្រោះតែអ្នកបើកបរគិតតែជជែកគ្នារឿងCOVID-19

ប្រទេសប៉ាគីស្ថានបានឱ្យដឹងថា យន្តហោះដឹកអ្នកដំណើរមួយគ្រឿងរបស់ប្រទេសនេះដែលបានធ្លាក់ចំតំបន់ប្រជុំជនកាលពីខែមុននិងបណ្ដាលឱ្យមនុស្ស98ស្លាប់នោះ គឺដោយសារអ្នកបើកបរយន្តហោះ គិតតែនិយាយគ្នាអំពីបញ្ហាជំងឺCOVID-19 ដោយមិនបានយកចិត្តទុកដាក់ទៅលើការព្រមានពីអង្គភាពគ្រប់គ្រងដែនអាកាស។

យោងតាមរបាយការណ៍បឋមដែលត្រូវបានប្រកាសកាលពីថ្ងៃទី24កន្លងទៅបានឱ្យដឹងថា ករណីធ្លាក់យន្តហោះនៅតំបន់ប្រជុំជននៃប្រទេសប៉ាគីស្ថានកាលពីខែឧសភា គឺកើតឡើងដោយសារកំហុសរបស់អ្នកបើកបរ ព្រោះពួកគេគិតតែនាំគ្នានិយាយរឿងCOVID-19 ដោយមិនបានគោរពតាមការណែនាំក្នុងការរក្សាសុវត្ថិភាពរបស់បុគ្គលិកគ្រប់គ្រងការហោះហើរនៅលើដី។

>វីដេអូស្ដែងៗបង្ហាញពីការធ្លាក់យន្តហោះនៅប៉ាគីស្ថាន ដែលបានសម្លាប់មនុស្សប្រមាណជិត100នាក់! 2នាក់នៅមានជីវិត

សូមរំឭកថា កាលពីថ្ងៃទី22ឧសភា យន្តហោះមួយគ្រឿងរបស់ក្រុមហ៊ុនអាកាសចរណ៍អន្តរជាតិប៉ាគីស្ថាន (PIA) ដែលដឹកអ្នកដំណើរ99នាក់ បានជួបគ្រោះសោកនាដកម្មនៅពេលបានធ្លាក់នៅលើតំបន់ប្រជុំជនក្បែរព្រលានយន្តហោះ Karachi ខណៈម៉ាស៊ីនទាំងពីររបស់វាសុទ្ធតែមានបញ្ហា។ ក្រៅពីអ្នកដំណើរ2នាក់ដែលបានគេចផុតពីការស្លាប់ប្រកបដោយភាពអស្ចារ្យ មនុស្សចំនួន97នាក់ផ្សេងទៀតបានបាត់បង់ជីវិតគ្មានសល់។ ហេតុការណ៍នេះក៏បានសម្លាប់កុមារាម្នាក់នៅតំបន់កើតហេតុផងដែរ នេះបើតាម New York Times។

រដ្ឋមន្ត្រីក្រសួងអាកាសចរណ៍ប៉ាគីស្ថាន Ghulam Sarwar Khan បានឱ្យដឹងថា ក្រុមបុគ្គលិកគ្រប់គ្រងដែនអាកាស បានព្រមានចំនួន3លើកទៅកាន់ក្រុមអ្នកបើកបរ PIA ថា យន្តហោះកំពុងតែហោះក្នុងរយៈកម្ពស់ខ្ពស់ខណៈដែលវាត្រៀមចុះចតលើកទី1នៅព្រលាន Karachi និងបានស្នើមិនឱ្យយន្តហោះចុះចត។

ប៉ុន្តែ ក្រុមអ្នកបើកបរ ចេះតែនាំគ្នានិយាយអំពីCOVID-19 និងចេះតែបន្តមិនយកចិត្តទុកដាក់លើការព្រមាន។ ជាងនេះ ពួកគេថែមទាំងមិនអើពើដល់ការព្រមានដោយស្វ័យប្រវត្តិពីប្រព័ន្ធកុំព្យូទ័រក្នុងកាប៊ីនយន្តហោះ និងមិនបានដាក់បញ្ចេញឧបករណ៍ចុះចត បណ្ដាលឱ្យម៉ាស៊ីនទាំង2របស់យន្តហោះត្រូវកកិតនឹងផ្លូវពេលចុះចតលើកទី1 នាំឱ្យមានការខូចខាតធ្ងន់ធ្ងរ។

ក្រោយពីបរាជ័យក្នុងការចុះចតលើកទី1 ក្រុមអ្នកបើកបរក៏បានហោះទៅលើអាកាសដើម្បីស្វែងរកវិធីចុះចតជាថ្មី។ ប៉ុន្តែ ដោយសារម៉ាស៊ីនខូចខាតធ្ងន់ធ្ងរ ទើបក្រោយមក យន្តហោះនេះក៏បានធ្លាក់តែម្ដង។

រដ្ឋមន្ត្រីប៉ាគីស្ថាន បន្ថែមថា អ្នកបើកបរឈ្មោះ Sajjad Gul គឺជាអ្នកមានបទពិសោធន៍ច្រើន ហើយយន្តហោះក៏មិនមានកំហុសបច្ចេកទេសអ្វីនោះដែរ។ ប៉ុន្តែ អ្នកបើកបររូបនេះត្រូវបានគេជឿថា មានការជឿជាក់ហួសហេតុលើកបទពិសោធន៍របស់ខ្លួន ទើបបណ្ដាលឱ្យមានសោកនាដកម្មនេះកើតឡើង៕

ប្រភព៖ SCMP

June 25, 2020

Author: សឿន សំណាង