សឿន សំណាង - La Reine Media

រដ្ឋមន្ត្រីប្រទេសប្រេស៊ីល2រូបទៀត បានឆ្លងCOVID-19

រដ្ឋមន្ត្រីក្រសួងសិទ្ធិពលរដ្ឋ និងរដ្ឋមន្ត្រីថ្មីនៃក្រសួងអប់រំរបស់ប្រទេសប្រេស៊ីល បានប្រកាសលទ្ធផលវិជ្ជមានជាមួយនឹងវីរុសCOVID-19 នៅក្នុងថ្ងៃជាមួយគ្នា បន្ទាប់ពីបានធ្វើតេស្តរកវីរុស ហើយបច្ចុប្បន្នកំពុងបង្ខាំងខ្លួននិងព្យាបាលដាច់ដោយឡែក។

រដ្ឋមន្ត្រីក្រសួងសិទ្ធិពលរដ្ឋ លោក Onyx Lorenzoni ដែលជាសម្ព័ន្ធមិត្តជិតស្និទ្ធរបស់ប្រធានាធិបតី Jair Bolsonaro បានបង្ហោះសារនៅលើទំព័រ Twitter កាលពីថ្ងៃទី20កក្កដា ឱ្យដឹងថា លោកមានអាការរោគស្រាល និងកំពុងប្រើប្រាស់ថ្នាំប្រឆាំងគ្រុនចាញ់ hydroxychloroquine។

លោក Onyx Lorenzoni បន្តថា “ខ្ញុំដឹងថា ខ្ញុំបានទទួលផលប៉ះពាល់ល្អ (បន្ទាប់ពីបានទទួលការព្យាបាលដោយប្រាស់ថ្នាំhydroxychloroquine)។ ក្រៅពីថ្នាំ chloroquine លោករដ្ឋមន្ត្រីរូបនេះក៏បានលេបថ្នាំ azithromycin និង ivermectin ទៀតផង។

រីឯលោក Milton Ribeiro ដែលទើបត្រូវបានតែងតាំងជារដ្ឋមន្ត្រីក្រសួងអប់រំ ក៏បានប្រកាសថា បានឆ្លងវីរុសCOVID-19 និងកំពុងសម្រាកព្យាបាលដាច់ដោយឡែកពីគេឯងផងដែរ។

ចំណែកប្រធានាធិបតីប្រេស៊ីល លោក Bolsonaro ដែលកំពុងស្ថិតនៅដាច់ដោយឡែកបន្ទាប់ពីបានឆ្លងCOVID-19 ក៏កំពុងប្រើប្រាស់ថ្នាំប្រឆាំងជំងឺគ្រុនចាញ់ hydroxychloroquine ដើម្បីព្យាបាល បើទោះប្រសិទ្ធភាពរបស់ថ្នាំនេះមិនទាន់ត្រូវបានធ្វើតេស្តជាផ្លូវការក្នុងការព្យាបាលCOVID-19 ក៏ដោយ។ លោក Bolsonaro បានបង្ហោះសារនៅលើ Twitter កាលពីថ្ងៃទី20កក្កាដា ដើម្បីការពារការប្រើប្រាស់ថ្នាំ hydroxychloroquine ថា “ប្រការដែលគួរចងចាំ នោះគឺថា ការប្រើថ្នាំដែល “មិនមែនជាថ្នាំប្រែន” បាននាំមកនូវលទ្ធផលល្អប្រសើរនៅក្នុងវេជ្ជសាស្ត្រ ឱ្យតែអ្នកជំងឺយល់ព្រម”។

មុននោះមួយថ្ងៃ ប្រធានាធិបតីប្រេស៊ីល បានបង្ហាញវត្តមាននៅក្បែរអ្នកគាំទ្រនៅឯទីក្រុង Brasilia ព្រមទាំងបានលើកប្រអប់ថ្នាំមួយប្រអប់បង្ហាញសាធារណជនទៀតផងដែរ។

យោងតាមស្ថិតិថ្មីបំផុតរបស់ក្រសួងសុខាភិបាលប្រេស៊ីល ប្រទេសនៅអាមេរិកខាងត្បូងមួយនេះ បានរកឃើញអ្នកផ្ទុកវីរុសCOVID-19 ជាង2.1លាននាក់ និងអ្នកស្លាប់ដោយសារវីរុសនេះបានឡើងដល់ជាង80,000នាក់។

ក្រៅពីមន្ត្រីជាន់ខ្ពស់ខាងលើ ប្រេស៊ីលក៏នៅមានមន្ត្រីសំខាន់ៗផ្សេងទៀតដែលបានឆ្លងវីរុសនេះ ក្នុងនោះក៏មានលោក Augusto Heleno ដែលជាទីប្រឹក្សាសន្តិសុខជាតិរបស់ប្រធានាធិបតី Bolsonaro និងរដ្ឋមន្ត្រីក្រសួងថាមពលប្រេស៊ីល លោក Bento Costa Lima ផងដែរ៕

ប្រភព៖ សារព័ត៌មានបរទេស

July 21, 2020

ផែនទី3Dស្ដីអំពីចក្រវាលមហាធំធេង ត្រូវបានប្រកាសដាក់ឱ្យប្រើប្រាស់ហើយ

ក្រុមតារារូបវិទូ ថ្ងៃនេះ (20កក្កដា) បានប្រកាសបង្ហាញអំពីផែនទី3Dមួយដែលស្ដីអំពីចក្រវាលទាំងមូល ដែលនេះត្រូវបានបង្កើតឡើងបន្ទាប់ពីបានវិភាគទៅលើកាឡាក់ស៊ីចំនួនជាង4លាន បូករួមជាមួយនឹង Quasar (quasi-stellar object) ជាច្រើនដែលនៅសែនឆ្ងាយ និងមានពន្លឺខ្លាំងក្លាផងដែរ។

ការប្រឹងប្រែងពីសំណាក់អ្នកវិទ្យាសាស្ត្ររាប់រយនាក់ មកពីវិទ្យាស្ថានស្រាវជ្រាវចំនួន30នៅពាសពេញពិភពលោក បាននាំមកនូវ “រឿងរ៉ាវដ៏ពេញលេញមួយស្ដីអំពីការរីកមាឌរបស់ចក្រវាល” នេះបើតាមសាស្ត្រាចារ្យ Will Percival មកពីសាកលវិទ្យាល័យ Waterloo ក្នុងខេត្ត Ontario ប្រទេសកាណាដា។

នៅក្នុងគម្រោងមួយដែលបានចាប់ផ្ដើមអនុវត្តតាំងពីជាង20ឆ្នាំមុន ក្រុមអ្នកវិទ្យាសាស្ត្របានធ្វើការវាស់វែងដោយប្រើរង្វាស់សុក្រឹតបំផុត ទៅលើប្រវត្តិនៃការរីកមាឌក្នុងរយៈពេលវែងជាទីបំផុត។ ផែនទីចក្រវាលនេះ ត្រូវបានបង្កើតឡើងដោយយោងទៅតាមការសង្កេតថ្មីៗបំផុតក្នុងរយៈពេលជាង6ឆ្នាំរបស់អង្គការសង្កេតតារា Sloan Digital Sky Survey (SDSS) នៅក្នុងគម្រោងមួយដែលមានឈ្មោះថា eBOSS ជាមួយនឹងទិន្នន័យដែលបានមកពីកែវយឹតអុបទិកមួយដែលមានទីតាំងនៅ New Mexico សហរដ្ឋអាមេរិក។

មនុស្សជាតិបានយល់ដឹងច្រើនអំពីចក្រវាលនៃយុគសម័យដំបូងក្រោយការផ្ទុះ Big Bang តាមរយៈរូបមន្តនៃទ្រីស្ដី និងការសង្កេតទៅលើរលកមីក្រូវ៉េវនៃចក្រវាល ដែលជារលកវិទ្យុសកម្មអេឡិចត្រូម៉ាញេទិកពីអវកាសជំនាន់ដំបូង។ ការសិក្សាស្រាវជ្រាវអំពីកាឡាក់ស៊ី និងទិន្នន័យនៃការវាស់វែងគម្លាតរវាងវត្ថុអវកាសនានាក៏បានរួមចំណែកក្នុងការជួយឱ្យអ្នកវិទ្យាសាស្ត្រយល់កាន់តែច្បាស់អំពីការរីកមាឌរបស់ចក្រវាលក្នុងរយៈពេលរាប់ពាន់លានឆ្នាំផងដែរ។ សាស្ត្រាចារ្យ Kyle Dawson មកពីសាកលវិទ្យាល័យ Utah ដែលជាអ្នកប្រកាសឧទ្ទេសនាមផែនទីនេះ បានឱ្យដឹងថា អ្នកវិទ្យាសាស្ត្រនៅតែមានចន្លោះប្រហោងមួយត្រូវការបកស្រាយបំពេញបន្ថែម។ ប៉ុន្តែ លោកថ្លែងថា “តាមរយៈការសង្កេតជាប្រចាំក្នុងរយៈពេល5ឆ្នាំមកនេះ យើងបានធ្វើការដើម្បីបំពេញចន្លោះប្រហោងនោះ”។

ផែនទី3Dធំបំផុតស្ដីអំពីចក្រវាល ត្រូវបានប្រកាសដាក់ឱ្យប្រើប្រាស់ហើយ

តារារូបវិទូ Jean-Paul Kneib មកពីមន្ទីរស្រាវជ្រាវរបស់ស្វីស (EPFL) ដែលជាស្ថាបនិកនៃគម្រោង eBOSS ឆ្នាំ2012 បានឱ្យដឹងថា គោលដៅរបស់ក្រុមស្រាវជ្រាវនេះគឺដើម្បីបង្កើត “ផែនទី3D ពេញលេញបំផុតនៃប្រវត្តិសាស្ត្រចក្រវាលទាំងមូល”។ ជាលើកដំបូង ពួកគេប្រើប្រាស់អាចម៍ផ្កាយ ឬវត្ថុអវកាសទាំងឡាយដើម្បីបង្ហាញអំពីការពង្រាយខ្លួនរបស់វត្ថុធាតុក្នុងចក្រវាលនៅក្នុងកាឡាក់ស៊ីនានាដែលកំពុងបង្កបង្កើតផ្កាយ និង Quasar ដែលនៅឆ្ងាយសែនឆ្ងាយពីប្រព័ន្ធព្រះអាទិត្យរបស់មនុស្ស។

ផែនទីនេះក៏បង្ហាញអំពីសរសៃវត្ថុធាតុ និងលម្ហអវកាសនានាដែលកំណត់រចនាសម្ព័ន្ធចក្រវាលតាំងពីយុគសម័យដែលវាមានអាយុត្រឹមតែ380,000ឆ្នាំ។

ផែនទីនេះក៏បានបង្ហើបអំពីការរីកមាឌរបស់ចក្រវាល ដែលចាប់ផ្ដើមបង្កើនល្បឿននៅក្នុងពេលវេលាមួយផងដែរ។ ក្រុមអ្នកវិទ្យាសាស្ត្រយល់ថា ប្រការនេះទំនងជាបណ្ដាលមកពីវត្តមានរបស់ថាមពលងងឹត ប៉ុន្តែប្រភពរបស់វានៅមិនទាន់ត្រូវបានយល់ច្បាស់នៅឡើយ៕

ប្រភព៖ សារព័ត៌មានបរទេស

July 20, 2020

ទារិកាភ្លោះជាប់គ្នាដែលទទួលការវះកាត់កាលពី5ថ្ងៃមុន ពេលនេះអាចកម្រើកដៃ និងញញឺមបានហើយ

វៀតណាម-ទារិកាម្នាក់ឈ្មោះ Dieu Nhi ដែលជាក្មេងស្រីម្នាក់ក្នុងចំណោមទារិកាភ្លោះជាប់គ្នាពីរនាក់ដែលទើបតែទទួលបានការវះកាត់ផ្ដាច់ចេញពីគ្នាកាលពីប៉ុន្មានថ្ងៃមុននោះ ពេលនេះអាចញញឹម និងលើកដៃបានហើយ នៅពេលអនុប្រធានាធិបតីវៀតណាមចូលទៅសួរសុខទុក្ខ។

>ព័ត៌មានទាក់ទង
វៀតណាមវះកាត់ទារិកាភ្លោះជាប់គ្នាដោយជោគជ័យ! វេជ្ជបណ្ឌិតនិងជំនួយការ93នាក់ចូលរួមក្នុងការវះកាត់នេះ

ទារិកាឈ្មោះ Dieu Nhi បានដឹងខ្លួនឡើងវិញ និងអាចកម្រើកអវយវៈមួយចំនួនដូចជាការលើកដៃ និងញញឺមជាដើម នៅពេលដែលអនុប្រធានាធិបតីវៀតណាម លោកស្រី Dang Thi Ngoc Thinh លើករបស់បរក្មេងលេង បង្ហាញ និងនិយាយលេងជាមួយនាង។ ចំណែកទារិកាម្នាក់ទៀតដែលត្រូវបានវះកាត់ផ្ដាច់ចេញពី Dieu Nhi នៅមានសុខខ្សោយនៅឡើយ និងនៅគេងដោយស្ងៀមស្ងាត់។ ទារិកាទាំងនេះ កំពុងទទួលការថែទាំនៅក្នុងបន្ទប់ជាមួយគ្នា ប៉ុន្តែគេងគ្រែដោយឡែក ក្រោយពីបានទទួលការវះកាត់ផ្ដាច់ចេញពីគ្នាកាលពីថ្ងៃទី15កក្កដា នៅមន្ទីរពេទ្យកុមារជាតិនៃទីក្រុងហូជីមិញ។

ក្រោយរយៈពេល5ថ្ងៃនៃការវះកាត់ ទារិកាទាំងពីរនៅតែបន្តដកដង្ហើមដោយប្រើម៉ាស៊ីនជំនួយ និងប្រើប្រាស់ថ្នាំងងុយគេង ថ្នាំបន្ថយការឈឺចាប់ និងត្រូវបញ្ចូលជីវជាតិអាហារទៅតាមសរសៃឈាម។ អត្រានៃការរស់រានមានជីវិតគឺសុទ្ធតែស្ថិតក្នុងស្ថានភាពល្អប្រសើរ។ ចំណែកអាការក្ដៅខ្លួនក្រោយពីការវះកាត់ក៏បានបាត់ ហើយក៏មិនបានឆ្លងមេរោគក្នុង និងក្រោយការវះកាត់នោះដែរ។

វេជ្ជបណ្ឌិតនៃមន្ទីរពេទ្យខាងលើថ្លែងថា នៅពេលវះកាត់ ក្រុមវេជ្ជបណ្ឌិតបានយកពោះវៀនមួយផ្នែករបស់ទារិកា Dieu Nhi តភ្ជាប់ទៅឱ្យទារិកា Truc Nhi ដូច្នេះ តិចឬច្រើនក៏នឹងមានប្រតិកម្មជាការរលាកខ្លះៗ។ វេជ្ជបណ្ឌិតបន្តថា អត្រាជោគជ័យក្នុងការវះកាត់បែបនេះគឺមានប្រមាណពី70ទៅ75%។ នៅបរទេស ក៏ធ្លាប់មានករណីវះកាត់បែបនេះដែរ ហើយក្រោយការវះកាត់បាន1សប្ដាហ៍ ពោះវៀនក៏បែកធ្លាយ ទារកក៏បានស្លាប់ ដូច្នេះហើយ ក្រុមវេជ្ជបណ្ឌិតវៀតណាមមិនហ៊ានអះអាងអ្វីជាមុនឡើយ។

មន្ទីរពេទ្យកុមារជាតិទីក្រុងហូជីមិញ បានទទួលយកទារិកា Truc Nhi និង Dieu Nhi ពីមន្ទីរពេទ្យមួយឈ្មោះ Hung Vuong បន្ទាប់ពីបានចាប់កំណើតមិនគ្រប់ខែដោយការវះកាត់។ ទារិកាទាំងពីរនេះ ពេលនោះមានទម្ងន់3.2គីឡូក្រាម មានអាការខ្សោយដង្ហើមដោយសារសួតរីកចម្រើនមិនទាន់ពេញលេញ។ ក្រុមគ្រូពេទ្យបានដាក់ឧបករណ៍ជំនួយដង្ហើម និងចញ្ចឹមក្នុងកែវរយៈពេល1ខែ។

មកដល់អាយុ13ខែ ទើបក្រុមវេជ្ជបណ្ឌិតសម្រេចចិត្តធ្វើការវះកាត់ទារិកាភ្លោះជាប់គ្នានេះ កាលពីថ្ងៃទី15កក្កដាកន្លងទៅ។ ក្នុងរយៈពេល13ម៉ោងនៃការវះកាត់ ទារិកាម្នាក់ៗត្រូវទទួលការវះកាត់ធំៗចំនួន4លើកជាប់ៗគ្នា រួមមាន ការវះកាត់បំបែកចេញពីគ្នា តភ្ជាប់ប្រព័ន្ធរំលាយអាហារ ប្រព័ន្ធទឹកនោម គ្រោងឆ្អឹងល្អាងត្រគាក និងបង្កើតរន្ធគូទជាដើម។

នៅក្នុងការវះកាត់នោះ ក្រុមវេជ្ជបណ្ឌិត គ្រូពេទ្យ និងគិលានុបដ្ឋាយិកាឆ្នើមៗបំផុតចំនួន93រូប មកពីមន្ទីរពេទ្យនានាក្នុងតំបន់ភាគខាងត្បូង បានចូលរួមជួយជ្រោមជ្រែងដោយពេញចិត្តជាទីបំផុត៕

ប្រភព៖ សារព័ត៌មានបរទេស

July 20, 2020

សហរដ្ឋអាមេរិក កំពុងត្រៀមហាម សមាជិកបក្សកុម្មុយនីស្តចិន ចូលប្រទេស…

ទីភ្នាក់ងារសារព័ត៌មាន ស៊ាងហៃ អ៊ីស្ត បានរាយការណ៍ថា “មន្ទីរសេតវិមាន” កំពុងស្ថិតក្នុងការពិចារណា ហាមសមាជិកបក្សកុម្មុយនីស្តចិនទាំងអស់ ធ្វើដំណើរចូលប្រទេសអាមេរិក កណ្ដាលភាពតានតឹងដែលកំពុងតែឡើងកម្ដៅ រវាងចិន-សហរដ្ឋអាមេរិក។

សារព័ត៌មាន នីវយ៉ក ថាមស៍ បានបញ្ជាក់ថា សហរដ្ឋអាមេរិក កំពុងធ្វើសេចក្ដីព្រាងបទបញ្ជាប្រធានាធិបតី ដើម្បីលុបចោលទិដ្ឋាការ(Visa) ចូលសហរដ្ឋអាមេរិក របស់សមាជិកបក្សកុម្មុយនីស្តចិន។

បច្ចុប្បន្ន បក្សកុម្មុយនីស្ត មានសមាជិកជាង 90លាននាក់ គិតជាភាគរយគឺ 6.5%នៃចំនួនប្រជាជនចិនទាំងអស់ ដោយបុគ្គលមួយចំនួន បានចូលជាសមាជិកបក្ស ដើម្បីរំពឹងផលប្រយោជន៍ក្នុងការមានការងារធ្វើ តែមិនមានកិច្ចការងាររួមជាមួយបក្សឡើយ។

ក្រោយពីមានរបាយការណ៍ខាងលើ លទ្ធផលបង្ហាញថា មានប្រជាជនចិនក្នុងចំនួនដ៏ច្រើន បានស្វែងរកពាក្យថា “退党” ដែលមានន័យថា “សុំឈប់ពីបក្ស”។

មុននេះ កាលពីថ្ងៃទី10 កក្កដា 2020 សហរដ្ឋអាមេរិកបានប្រកាសដាក់ទណ្ឌកម្មលោក ឈឹន វៀនកួ លេខាធិការបក្សប្រចាំតំបន់គ្រប់គ្រងខ្លួនឯង(ស្វយ័ត)ស៊ីនចៀងអ៊ុយគូរ រួមទាំងមន្ត្រីចំនួន 3នាក់ទៀត ដោយបានចោទថា លោកឈឹន គឺជាអ្នកធ្វើសេចក្ដីព្រាងនយោបាយប្រឆាំងក្រុមជនជាតិដើមភាគតិចនៅក្នុងប្រទេសចិន។

ចំណែកអ្នកនាំពាក្យនៃក្រសួងការបរទេសចិនវិញ បានឆ្លើយតបនឹងសំណួរអ្នកសារព័ត៌មាន ដោយបានបញ្ជាក់ថា ទង្វើរបស់សហរដ្ឋអាមេរិកនេះ ជា “រឿងគួរឱ្យអាណិតណាស់”៕

ប្រភព៖ សារព័ត៌មានបរទេស

July 20, 2020

ក្រុមហ៊ុនជប៉ុនចំនួន30 ចាកចេញពីប្រទេសចិន មកកាន់អាស៊ីអាគ្នេយ៍

ក្រុមហ៊ុនជប៉ុនចំនួន30 នឹងទទួលបានជំនួយពីរដ្ឋាភិបាលប្រទេសនេះ ដើម្បីរើរោងចក្រ ឬចង្វាក់ផលិតកម្មចេញពីប្រទេសចិន ចូលមករកស៊ីនៅក្នុងតំបន់អាស៊ីអាគ្នេយ៍។

អង្គការលើកកម្ពស់ពាណិជ្ជកម្មជប៉ុន Jetro (Japan External Trade Organization) ទើបតែបានប្រកាសបង្ហាញបញ្ជីឈ្មោះក្រុមហ៊ុនចំនួន30នៃប្រទេសនេះ ដែលនឹងទទួលបានជំនួយសម្រាប់ការរើរោងចក្រ ក្រុមហ៊ុន ចេញពីប្រទេសចិន ចូលមករកស៊ីនៅក្នុងបណ្ដាប្រទេសនៃតំបន់អាស៊ីអាគ្នេយ៍ ដែលនេះគឺគោលនយោបាយថ្មីមួយរបស់ជប៉ុន។

មកដល់ពេលនេះ គេមិនបានដឹងច្បាស់ថា តើក្រុមហ៊ុនទាំងនេះដែលកំពុងស្ថិតនៅប្រទេសចិន នឹងរើចង្វាក់ផលិតកម្មរបស់ខ្លួនទាំងស្រុង ឬផ្នែកណាមួយរបស់ពួកគេចេញពីប្រទេសចិននៅឡើយ។

ក្រុមហ៊ុនជប៉ុនដែលនឹងរើចេញពីប្រទេសចិន មានដូចជា វិស័យផលិតសម្ភារៈសុខាភិបាល គ្រឿងបន្លាស់ទូរស័ព្ទ ម៉ាស៊ីនត្រជាក់ និងគ្រឿងអេឡិចត្រនិចផ្សេងៗទៀត។ នៅក្នុងបញ្ជីខាងលើនេះ ក្រុមហ៊ុន Hoya ដែលផលិតគ្រឿងបន្លាស់ផ្នែករឹងកុំព្យូទ័រជាដើម នឹងរើរោងចក្រពីប្រទេសចិនទៅកាន់ប្រទេសឡាវ និងវៀតណាម។

យោងតាមសេចក្ដីប្រកាសរបស់ Jetro ខ្ទង់ប្រាក់ជំនួយរបស់រាជរដ្ឋាភិបាលជប៉ុនសម្រាប់ប៉ះប៉ូវទៅលើការចំណាយនានានៅក្នុងពេលរើ និងដំឡើងរោងចក្រនៅប្រទេសផ្សេងៗ នឹងឡើងដល់ចន្លោះពី100លានយ៉េន (931,445ដុល្លារ) ដល់5ពាន់លានយ៉េន (46,572,250ដុល្លារ)។

ក្រៅពីក្រុមហ៊ុនចំនួន30ដែលនឹងមកកាន់តំបន់អាស៊ីអាគ្នេយ៍ រាជរដ្ឋាភិបាលជប៉ុនក៏ផ្ដល់ជំនួយយ៉ាងតិច57.5ពាន់លានយ៉េន (536លានដុល្លារ) ទៅឱ្យបណ្ដាក្រុមហ៊ុនជប៉ុនចំនួន57ផ្សេងទៀត រួមទាំងក្រុមហ៊ុនឯកជនផលិតម៉ាស់ Iris Ohyama និងក្រុមហ៊ុន Sharp ផងដែរ សម្រាប់ការរើត្រលប់មកកាន់ប្រទេសជប៉ុនវិញ។

ខាងលើនេះគឺជាផ្នែកមួយនៃគោលនយោបាយពិពិធកម្មខ្សែចង្វាក់ផ្គត់ផ្គង់ទូទាំងសកលលោកដែលត្រូវបានជប៉ុនប្រកាសកាលពីខែមេសាកន្លងទៅ។ ប្រទេសជប៉ុនគឺជាខឿនសេដ្ឋកិច្ចទីពីរហើយ (បន្ទាប់ពីកោះតៃវ៉ាន់) ដែលមានគោលនយោបាយលម្អិតដើម្បីជំរុញការធ្វើពិពិធកម្មខ្សែចង្វាក់ផ្គត់ផ្គង់ទូទាំងពិភពលោក ដើម្បីកាត់បន្ថយការពឹងផ្អែកលើសេដ្ឋកិច្ចចិន។

កាលពីឆ្នាំ2019 រដ្ឋាភិបាលកោះតៃវ៉ាន់ក៏បានផ្ដល់ជំនួយទាំងទឹក អគ្គិសនី ដី ទុន និងពន្ធ ដើម្បីអូសទាញក្រុមហ៊ុនតៃវ៉ាន់នានាឱ្យរើចង្វាក់ផលិតកម្ម ត្រលប់ចូលប្រទេសវិញផងដែរ៕

ប្រភព៖ សារព័ត៌មានបរទេស

July 20, 2020

វូហាន-ស៊ាងហៃ “ប្រកាសសភាវអាសន្ន” វិបត្តិទឹកជំនន់ អ្នកស្រុកនាំគ្នាជួយធ្វើទំនប់បាវខ្សាច់

ទីភ្នាក់ងារព័ត៌មាន ដេលី មេល បានរាយការណ៍ពីស្ថានការណ៍គ្រោះធម្មជាតិនៅក្នុងប្រទេសចិនថា រដ្ឋបាលក្នុងតំបន់នៃទីក្រុងវូហាន មណ្ឌលហ៊ូពេយ ភាគកណ្ដាលនៃប្រទេសចិន បានប្រកាសលើកកម្ពស់ស្ថានការណ៍ប្រកាសអាសន្នគ្រោះទឹកជំនន់ ខ្ពស់បំផុតកម្រិតបន្ទាត់ក្រហម ក្រោយពីបរិមាណទឹកនៅក្នុងទន្លេយ៉ាងហ្ស៊ី ដងទន្លេដ៏ធំបំផុតរបស់ប្រទេស បានកើនខ្ពស់ឡើងជាបន្តបន្ទាប់ដោយសារទឹកភ្លៀង ដែលនៅតែធ្លាក់ចុះមកជាប់ៗគ្នាឥតឈប់ឈរ តាំងពីខែមិថុនាកន្លងមក។

រដ្ឋបាលក្នុងតំបន់បានព្យាករថា ទឹកនៅក្នុងទន្លេយ៉ាងហ្ស៊ី នឹងកើនឡើងមកដល់កម្រិត 28ម៉ែត្រ ខ្ពស់ជាងផ្លូវថ្នល់នៅក្នុងទីក្រុងវូហាន ដែលជាមធ្យមស្ថិតក្នុងកម្រិត 24ម៉ែត្រលើកម្រិតទឹកសមុទ្រ និងមានសញ្ញាថា នឹងនៅតែស្ថិតក្នុងកម្រិតនេះ រយៈពេលយូរថ្ងៃទៀត បណ្ដាលឱ្យក្រុមអាជ្ញាធរ នៃអង្គភាពសម្រាលគ្រោះភ័យ ក្រុមអ្នកស្ម័គ្រចិត្ត និងអ្នកស្រុកវូហាន ត្រូវប្រញាប់នាំគ្នាប្រមូលផ្ដុំកម្លាំង រៀបចំដាក់បាវខ្សច់ ធ្វើជារបាំងការពារទឹកនៅក្នុងតំបន់ដែលនៅមិនទាន់ត្រូវទឹកលិច រួមទាំងមជ្ឈមណ្ឌលជួយសង្គ្រោះបណ្ដោះអាសន្នផងដែរ។

ខណៈពេលជាមួយគ្នា វិបត្តិគ្រោះធម្មជាតិក្នុងគ្រានេះ បានធ្វើឱ្យមានអ្នកស្លាប់រួចហើយយ៉ាងតិច 141នាក់ និងមានប្រជាជនជាង 15លាននាក់ ដែលរស់នៅតាមបណ្ដោយដងទន្លេយ៉ាងហ្ស៊ី ក្នុងមណ្ឌលអាន់ហ៊ុយ ចៀងស៊ី និងជើចៀង ត្រូវភៀសខ្លួនគេចពីសេចក្ដីស្លាប់។

សម្រាប់ស្ថានការណ៍របស់ទំនប់ទឹក 3ជ្រុង ដែលកំពុងប្រឈមនឹងចំនួនទឹកដ៏ច្រើនមហាសាលនោះ មានបរិមាណទឹកខ្ពស់ជាងកម្រិតប្រកាសអាសន្នយ៉ាងតិចបំផុត 10ម៉ែត្រស្រេចទៅហើយ ជាមួយនឹងបរិមាណទឹកដែលនៅតែហូរចូលមកក្នុងអាងស្តុកទឹកលើសពីចំណុចខ្ពស់បំផុត 50,000ម៉ែត្រគូប ក្នុង1វិនាទី។

ខណៈដែលទន្លេសាប ផូយ៉ាង ក្នុងមណ្ឌលចៀងស៊ី ដែលកំពុងហូរចូលទៅក្នុងដងទន្លេយ៉ាងហ្ស៊ីយ៉ាងគំហុកនោះ មានបរិមាណទឹកខ្ពស់ជាងកម្រិតប្រកាសអាសន្ន 2.5ម៉ែត្រ។ ចំណែកទីក្រុងស៊ាងហៃ បាននិងកំពុងប្រកាសអាសន្នទឹកជំនន់ខ្ពស់បំផុតកម្រិតបន្ទាត់ក្រហម ដោយសារតែទន្លេសាបថៃ នៅបរិវេណត្រីកោណមាត់ទន្លេយ៉ាងហ្ស៊ី កំពុងកើនឡើងលើសកម្រិតសុវត្ថិភាព ជិត 1ម៉ែត្រទៅហើយ។

ចំណែកសារព័ត៌មានស៊ីនហួ បានរាយការណ៍ថា ភ្លៀងដែលបង្អុរចុះមកយ៉ាងខ្លាំង និងឥតឈប់ឈរ បានហុចផលប៉ះពាល់ បណ្ដាលឱ្យដងទន្លេស៊ីងចៀង នៅក្នុងទីតាំងរបស់មណ្ឌលស្វយ័ត អ៊ឹនស៊ឺ ក្រុមកុលសម្ព័ន្ធ ធូចៀ និងមៀវ មណ្ឌលហ៊ូពេយ មានបរិមាណទឹក ហៀរខ្នងទំនប់ និងទីតាំងភាគច្រើនក្នុងតំបន់ទីក្រុង ត្រូវទឹកលិចបាត់ស្ទើរតែទាំងស្រុង ផ្លូវថ្នល់មួយចំនួនមានកម្ពស់ទឹកជ្រៅជាច្រើនម៉ែត្រ៕

ប្រភព៖ សារព័ត៌មានបរទេស

July 20, 2020

ថៅកែមន្ទីរពេទ្យ លក់លិខិតបញ្ជាក់ “លទ្ធផលអវិជ្ជមាននឹងCOVID-19 ក្លែងក្លាយ” ចំណេញប្រាក់រាប់សែនដុល្លារ

សារព័ត៌មាន New York Times កាលពីថ្ងៃទី16កក្កដា បានចេញផ្សាយថា អាជ្ញាធរប្រទេសបង់ក្លាដែស ទើបតែបានចាប់ខ្លួនម្ចាស់មន្ទីរពេទ្យម្នាក់ ទាក់ទិននឹងការលក់លទ្ធផលអវិជ្ជមាននឹង COVID-19 ក្លែងក្លាយរាប់ពាន់សន្លឹកទៅឱ្យអ្នកដែលមានតម្រូវការ។

ថៅកែម្នាក់របស់មន្ទីរពេទ្យមួយនៅប្រទេសបង់ក្លាដែស ត្រូវបានចាប់ខ្លួនពីបទបន្លំអតិថិជន ដោយសារបានចេញលទ្ធផលអវិជ្ជមាននៃការធ្វើតេស្តCOVID-19 ដើម្បីបោកប្រាស់អ្នកជំងឺ និងទទួលប្រាក់ចំណេញប្រមាណជា350,000ដុល្លារអាមេរិក។ ករណីនេះបានធ្វើឱ្យប៉ះពាល់យ៉ាងធ្ងន់ធ្ងរចំពោះទំនុកចិត្តរបស់ប្រជាជនទៅលើវិស័យសុខាភិបាលនៃប្រទេសនេះ។

Ashique Billah ដែលជាអ្នកនាំពាក្យនៃប៉ូលិសបង់ក្លាដែស បានឱ្យដឹងថា Mohammad Shahed គឺជាម្ចាស់បណ្ដាញមន្ទីរពេទ្យ Regent នៅក្នុងរដ្ឋធានី Dhaka។ ថៅកែមន្ទីរពេទ្យរូបនេះត្រូវបានចាប់ខ្លួននៅពេលកំពុងព្យាយាមរកវិធីឆ្លងទន្លេគេចខ្លួនទៅកាន់ប្រទេសឥណ្ឌា។

អ្នកនាំពាក្យខាងលើបានបញ្ជាក់ថា “មន្ទីរពេទ្យរបស់គាត់នោះបានធ្វើតេស្តរកវីរុសCOVID-19 ចំនួន10,500លើក ក្នុងនោះមានលទ្ធផលចំនួន4,200គឺត្រឹមត្រូវ ចំណែកលទ្ធផលចំនួន6,300ផ្សេងទៀតត្រូវបានប្រគល់ឱ្យអតិថិជន ប៉ុន្តែមិនបានធ្វើតេស្តនោះទេ”។

យោងតាម New York Times លិខិតបញ្ជាក់លទ្ធផលអវិជ្ជមានក្លែងក្លាយនេះ ត្រូវបានលក់ក្នុងតម្លៃ59ដុល្លារក្នុងមួយច្បាប់។

ម្ចាស់មន្ទីរពេទ្យនេះក៏ត្រូវបានចោទប្រកាន់ដែរថា បានយកថ្លៃសេវាធ្វើតេស្ត និងព្យាបាលអ្នកជំងឺCOVID-19 បើទោះលោកធ្លាប់បានយល់ព្រមជាមួយរដ្ឋាភិបាលថា មន្ទីរពេទ្យនានារបស់លោកនៅក្នុងទីក្រុង Dhaka នឹងព្យាបាលដោយមិនគិតថ្លៃ។

សូមបញ្ជាក់ថា Shahed មិនមែនជាមនុស្សដំបូងគេដែលត្រូវបានចាប់ខ្លួននៅបង់ក្លាដែស ដោយសារសកម្មភាពបន្លំផ្នែកសុខាភិបាលនៅក្នុងវិបត្តិសុខភាពនេះឡើយ។ កាលពីសប្ដាហ៍មុន ម្ចាស់គ្លីនិកឯកជនដែលផ្ដល់សេវាកម្មធ្វើតេស្តរកវីរុសCOVID-19 មួយកន្លែងផ្សេងទៀត ក៏ត្រូវបានចាប់ខ្លួនពីបទចេញលិខិតបញ្ជាក់ការធ្វើតេស្តCOVID-19 ដោយមិនបានធ្វើតេស្តអ្វីសោះ។

ក្រុមអ្នកជំនាញការមានការព្រួយបារម្ភថា អំពើបោកប្រាស់នេះអាចធ្វើឱ្យប្រជាជនបង់ក្លាដែសមិនបានទទួលការធ្វើតេស្តរកវីរុសCOVID-19 ដោយត្រឹមត្រូវ ដែលនេះនឹងនាំឱ្យមានហានិភ័យខ្ពស់ចំពោះការឆ្លងវីរុសដែលពួកគេនឹកស្មានមិនដល់។

រាប់ចាប់ពីខែមីនារហូតមកដល់បច្ចុប្បន្ន រដ្ឋាភិបាលបង់ក្លាដែស បានធ្វើតេស្តរកវីរុសCOVID-19 ជាមធ្យមចាប់ពី13,000ដល់17,000នាក់ក្នុង1ថ្ងៃៗ ប៉ុន្តែតួលេខនេះនៅមានកម្រិតទាបនៅឡើយសម្រាប់ប្រទេសដែលមានប្រជាជនជាង168លាននាក់មួយនេះ។

យោងតាមស្ថិតិរបស់សាកលវិទ្យា Johns Hopkins មនុស្សចំនួនជាង193,500នាក់នៅបង់ក្លាដែស បានឆ្លងCOVID-19 ក្នុងនោះមានជាង2,400នាក់បានស្លាប់ដោយសារវីរុសនេះ។ ប៉ុន្តែមានការសង្ស័យថា តួលេខពិតប្រាកដ អាចខ្ពស់ជាងនេះ ដោយសារសមត្ថភាពនៃការធ្វើតេស្តរបស់ប្រទេសនេះ នៅមានកម្រិតនៅឡើយ៕

ប្រភព៖ New York Times

July 20, 2020

ជាង143,000នាក់ស្លាប់ដោយសារCOVID-19 នៅសហរដ្ឋអាមេរិក លោក Trump ចេញមុខទទួលខុសត្រូវ

ប្រធានាធិបតីសហរដ្ឋអាមេរិក លោក Donald Trump បានចេញមុខទទួលខុសត្រូវចំពោះផលវិបាកដែលកើតឡើងដោយសារ COVID-19 នៅសហរដ្ឋអាមេរិក ប៉ុន្តែលោកក៏នៅតែជឿជាក់ថា វីរុសរាតត្បាតនេះនឹងបាត់ខ្លួនទៅវិញដោយឯកឯង។

យោងតាមស្ថិតិរបស់ Worldometers គិតដល់ដំណាច់ថ្ងៃទី19កក្កដា ចំនួនអ្នកស្លាប់ដោយសារ COVID-19 នៅសហរដ្ឋអាមេរិកបានកើនដល់ជាង143,000នាក់ ខណៈដែលចំនួនករណីឆ្លងវីរុសនេះក៏បានកើនដល់ជិត4លាននាក់ផងដែរ។ ជាមធ្យម ក្នុង1សប្ដាហ៍ គឺមានមនុស្សប្រមាណជា5,000នាក់បានស្លាប់ដោយសារCOVID-19 នៅសហរដ្ឋអាមេរិក។

ទាក់ទិននឹងបញ្ហាCOVID-19 កាលពីថ្ងៃទី17កក្កដា លោក Trump បានប្រកាសទទួលខុសត្រូវចំពោះផលវិបាកដែលកើតឡើងដោយសារ COVID-19 នៅប្រទេសរបស់លោក។ “ខ្ញុំតែងតែទទួលខុសត្រូវគ្រប់យ៉ាង ព្រោះថា ជាចុងក្រោយ វានៅតែជាការទទួលខុសត្រូវរបស់ខ្ញុំ” លោក Trump ឆ្លើយតបដូច្នេះនៅក្នុងកិច្ចសម្ភាសមួយជាមួយ Fox News។

ប៉ុន្តែ លោកក៏យល់ថា អភិបាលរដ្ឋនានាក៏ត្រូវតែទទួលខុសត្រូវចំពោះការរក្សាទុកសម្ភារៈសុខាភិបាល និងការចេញបទបញ្ជារក្សាគម្លាតសង្គម ដូចជាបង្ខំឱ្យពាក់ម៉ាស់ជាដើម។ ម្ចាស់សេតវិមានឱ្យដឹងថា លោកមិនគាំទ្រចំពោះបទបញ្ជាឱ្យពាក់ម៉ាស់នៅទូទាំងសហរដ្ឋអាមេរិកនោះឡើយ ព្រោះថា លោកចង់ឱ្យប្រជាជន “មានសេរីភាពក្នុងព្រំដែនកំណត់ណាមួយ”។ ជាងនេះទៀត លោក Trump នៅតែយល់ថា តួលេខនៃការឆ្លងវីរុសដែលកើនឡើងយ៉ាងឆាប់រហ័សនេះក៏ដោយសារអាជ្ញាធរសហរដ្ឋអាមេរិក បានបង្កើនការធ្វើតេស្តរកវីរុស។ លោក Trump ថែមទាំងអះអាងថា “ជាចុងក្រោយ COVID-19 នឹងបាត់ខ្លួនទៅវិញដោយឯកឯងមិនខាន”។

គិតមកដល់បច្ចុប្បន្ន ប្រទេសនិងដែនដីចំនួន221ក្នុងពិភពលោក ត្រូវបានរាយការណ៍ថា បានរកឃើញអ្នកផ្ទុកវីរុសCOVID-19 ចំនួន14,622,597នាក់ និងអ្នកស្លាប់សរុបចំនួន608,403នាក់ ក្នុងនោះមានអ្នកឆ្លងវីរុសថ្មីចំនួន238,295នាក់ និងអ្នកស្លាប់5,161នាក់ ត្រូវបានរកឃើញក្នុងរយៈពេល24ម៉ោងចុងក្រោយនេះ ខណៈដែលអ្នកជំងឺបានជាសះស្បើយមានចំនួន 8,726,028នាក់៕

ប្រភព៖ Reuters

July 20, 2020

ចិនកំពុងបង្ហើយការសាងសង់នាវាផ្ទុកយន្តហោះក្នុងស្រុកទីពីរ ខណៈនាវាបន្ទាប់កំពុងចាប់ផ្ដើមសាងសង់ ឯនាវាទីប្រាំនឹងដើរដោយថាមពលនុយក្លេអែ

ប្រទេសចិនអាចសាងសង់បង្ហើយនាវាផ្ទុកយន្តហោះក្នុងស្រុកទីពីរ នៅពាក់កណ្ដាលឆ្នាំ2021 និងកំពុងពន្លឿនការសាងសង់នាវាផ្ទុកយន្តហោះបន្ទាប់ទៀត។

Type-002 ដែលជានាវាផ្ទុកយន្តហោះចម្បាំងទីបីរបស់ប្រទេសចិន និងជានាវាផ្ទុកយន្តហោះទីពីរដែលផលិតឡើងដោយស្នាដៃវិស្វករក្នុងស្រុក បានឈានចូលដល់ដំណាក់កាលដំឡើងចុងក្រោយ នេះបើតាមប្រភពព័ត៌មានចំនួន2ដែលបានឱ្យដឹងកាលពីថ្ងៃទី17កក្កដា។

ប្រភពព័ត៌មានមួយបានឱ្យដឹងថា ដំណើរការនៃការដំឡើងនាវាផ្ទុកយន្តហោះជំនាន់ថ្មី Type-002 បានចាប់ផ្ដើម ហើយបើតាមគម្រោង កិច្ចការនេះនឹងរួចរាល់នៅពាក់កណ្ដាលដើមឆ្នាំក្រោយ។ បុគ្គលិកនៃក្រុមសាងសង់នាវានេះក៏កំពុងតែចាប់ផ្ដើមដំឡើងបាតនាវា និងបានធ្វើពិធីសម្ពោធបើកការសាងសង់នាវាផ្ទុកយន្តហោះបន្ទាប់ ដែលជា “បងប្អូនរបស់ Type-002។ រោងសាងសង់នាវា Jiangnan នៅជាយក្រុងសៀងហៃ គឺជាអ្នកផលិតនាវាទាំងពីរនេះ”។

គម្រោងអភិវឌ្ឍនាវាផ្ទុកយន្តហោះចម្បាំង Type-002 ត្រូវបានចាប់ផ្ដើមតាំងពីឆ្នាំ2015 និងផ្ដើមការសាងសង់ចាប់ពីឆ្នាំ2018 ប៉ុន្តែផែនការនេះបានជួបបញ្ហាច្រើនជាបន្តបន្ទាប់។ រហូតដល់ឆ្នាំ2019 ដំណើរការសាងសង់នាវានេះក៏ត្រូវបានផ្អាកដោយសារតែបញ្ហាបច្ចេកទេស ក៏ដូចជាខ្វះថវិកា ព្រោះតែឥទ្ធិពលនៃសង្គ្រាមពាណិជ្ជកម្មរវាងចិនជាមួយនឹងសហរដ្ឋអាមេរិក រួមនឹងសកម្មភាពកំណែទម្រង់កងទ័ពរបស់ប្រទេសចិន។ មកដល់ដើមឆ្នាំ2020 ដំណើរការសាងសង់ក៏ត្រូវកាត់បន្ថយ ដោយសារតែ COVID-19។

ប្រភពព័ត៌មានមួយផ្សេងទៀតបានឱ្យដឹងថា “នាវាផ្ទុកយន្តហោះ Type-002 បន្ទាប់ នឹងត្រូវបានសាងសង់ឆាប់រហ័សជាងនាវាទីមួយ ដោយសារបុគ្គលិកមានបទពិសោធន៍ច្រើនជាងមុន និងអាចដោះស្រាយបញ្ហាបានលឿន។ នេះគឺជាការងារប្រកបដោយឧបសគ្គ ព្រោះថា Type-002 គឺជានាវាផ្ទុកយន្តហោះដំបូងដែលផលិតដោយជនជាតិចិន”។

រូបភាពមួយចំនួនដែលត្រូវបានបង្ហោះនៅលើបណ្ដាញសង្គមចិន និងត្រូវបានបង្ហោះឡើងវិញកាលពីថ្ងៃទី15កក្កដាដោយគណនី Twitter RupprechtDeino បានបង្ហាញថា ផ្នែកដ៏ធំចំនួន2 ដែលត្រូវបានដំឡើងភ្ជាប់ពីគ្រោងសម្រាប់សាងសង់ដែលមានស្រាប់របស់នាវា Type-002 កំពុងស្ថិតនៅលើផែអណ្ដែត។ នៅខាងលើនោះគឺជាទីលានសម្រាប់យន្តហោះចុះចត ដែលវាមិនទាន់ត្រូវបានសាងសងរួចរាល់នៅឡើយ។

រូបភាពនានាបានបង្ហាញថា ដំណើរការសាងសង់ ត្រូវបានពន្លឿនជាងមុន បើធៀបជាមួយនឹងរូបភាពផ្កាយរណបដែលត្រូវបានមជ្ឈមណ្ឌលស្រាវជ្រាវយុទ្ធសាស្ត្រនិងអត្តរជាតិប្រកាសបង្ហាញកាលពីខែមេសា2019។

Type-002 នឹងក្លាយជានាវាផ្ទុកយន្តហោះទីបីរបស់ប្រទេសចិន បន្ទាប់ពីនាវា Liaoning ដែលស្ថិតក្នុងក្រុម Type-001 ដែលត្រូវបានជួសជុលកែលម្អពីនាវាផ្ទុកយន្តហោះ Varyag និងនាវា Shandong ដែលផលិតក្នុងស្រុក និងស្ថិតក្នុងក្រុម Type-001A។

Liang Gouliang អ្នកជំនាញផ្នែកយោធានៅហុងកុង បានអះអាងថា Type-002 មិនមានឡប្រតិកម្មនុយក្លេអែ (រ៉េអាក់ទ័រនុយក្លេអ៊ែរ) នោះទេ។ “បច្ចេកវិទ្យានេះនឹងប្រើប្រាស់នៅក្នុងនាវា Type-003 ជានាវាផ្ទុកយន្តហោះទីប្រាំរបស់ចិន ដែលវាអាចត្រូវបានផលិតឡើងនៅក្នុងរោងសាងសង់នាវា Dalian” នេះបើតាមសម្ដីរបស់លោក Liang Gouliang៕

ប្រភព៖ SCMP

July 18, 2020

រ៉ុកកែត Falcon 9 របស់លោក Elon Musk នឹងនាំមនុស្សទៅកាន់អវកាសជាលើកទី2 នាពេលដ៏ខ្លីខាងមុខ

ជាន់ទីមួយនៃរ៉ុកកែត Falcon 9 ដែលប្រើប្រាស់សម្រាប់ជើងហោះហើរ Crew-1 ត្រូវបានដឹកទៅកាន់រដ្ឋ Florida កាលពីថ្ងៃទី14កក្កដា2020 ដើម្បីត្រៀមសម្រាប់ជើងហោះហើរដឹកមនុស្សទៅកាន់អវកាសជាលើកទី2នាពេលខាងមុខ។

តាមគម្រោង Falcon 9 នឹងត្រូវបានបាញ់បង្ហោះចេញពីមជ្ឈមណ្ឌលអវកាស Kennedy (KSC) របស់ទីភ្នាក់ងារអវកាសអាមេរិក NASA នៅថ្ងៃទី30សីហា ឆ្នាំ2020។ ក្បាលរុញច្រានរបស់រ៉ុកកែតនេះត្រូវបានដឹកពីមូលដ្ឋានរបស់ SpaceX នៅតំបន់ McGregor ក្នុង Texas ដោយមានស្រទាប់ការពារពណ៌ខ្មៅដែលត្រូវបានគ្របដណ្ដប់ពីលើ។

រ៉ុកកែត Falcon 9 កំពុងស្ថិតក្នុងដំណាក់កាលរៀបចំខ្លួន នៅមុនពេលត្រូវបានបាញ់បង្ហោះចេញពីទីតាំងរបស់ SpaceX ស្ថិតនៅក្នុងមូលដ្ឋានទ័ពអាកាស Cape Canavera ក្បែរ KSC។ នៅក្នុងជើងហោះហើរ The Crew-1 នឹងមានវត្តមានរបស់ក្រុមអវកាសចរ NASA គឺលោក Victor Glover លោក Michael Hopkins និងលោកស្រី Shannon Walker រួមនឹងអវកាសចរជប៉ុន លោក Soichi Noguchi។ ពួកគេនឹងធ្វើដំណើរតាមយានអវកាស Crew Dragon របស់ក្រុមហ៊ុន SpaceX ឡើងទៅកាន់ស្ថានីយអវកាសអន្តរជាតិ (ISS)។

Crew-1 នឹងជាជើងហោះហើរដំបូងបង្អស់នៅក្នុងបេសកកម្មយ៉ាងតិចចំនួន6 ដែល SpaceX នឹងត្រូវដំណើរការទៅតាមកិច្ចសន្យាតម្លៃ2.6ពាន់លានដុល្លារ ដែលក្រុមហ៊ុននេះបានចុះហត្ថលេខាជាមួយ NASA កាលពីឆ្នាំ2014។ ក៏ប៉ុន្តែ នេះមិនមែនជាជើងហោះហើរដឹកអ្នកអវកាសឡើងទៅលើ “មេឃ” ជាលើកទី1របស់ក្រុមហ៊ុន SpaceX នោះទេ។ មុននេះ ជើងហោះហើរសាកល្បងដំបូងដែលហៅថា Demo-2 ក៏បាននាំអវកាសចរ2រូបរបស់ NASA គឺលោក Bob Behnken និងលោក Doug Hurley ឡើងទៅកាន់ ISS កាលពីចុងខែឧសភា2020ម្ដងរួចហើយ។ Demo-2 គឺជាជើងហោះហើរដែលមានដឹកមនុស្សហោះចេញពីទឹកដីសហរដ្ឋអាមេរិកជាលើកដំបូងបង្អស់ រាប់ចាប់ពីក្រោយសម័យយានអវកាស Space Shuttle របស់ NASA ដែលត្រូវបានដាក់ឱ្យចូលនិវត្តន៍កាលពីខែកក្កដា2011 ហើយចាប់ពីពេលនោះមក ការហោះហើរពីផែនដីទៅកាន់ស្ថានីយអវកាសអន្តរជាតិ គឺសុទ្ធតែពឹងទៅលើយានអវកាស Soyuz របស់រុស្ស៊ី។

យោងតាមកាលបរិច្ឆេទ អវកាសចរ Behnken និង Hurley នឹងត្រលប់មកកាន់ផែនដីក្នុងរយៈពេលប៉ុន្មានសប្ដាហ៍ទៀតប៉ុណ្ណោះ។ បើសិនជាជើងហោះហើរ Demo-2 ទទួលបានជោគជ័យ នោះ SpaceX នឹងត្រូវបានអនុម័តឱ្យបាញ់បង្ហោះយាន Crew-1 ជាក់ជាមិនខាន៕

ប្រភព៖ Space

July 18, 2020

Author: សឿន សំណាង