សឿន សំណាង - La Reine Media

ប្រធានាធិបតីអ៊ុយក្រែន ធ្វើតាមបញ្ជាដ៏គួរឱ្យអស់សំណើចរបស់ខ្មាន់កាំភ្លើង ដើម្បីរំដោះចំណាប់ខ្មាំង20នាក់

ខ្មាន់កាំភ្លើងម្នាក់បានប្រើប្រាស់អាវុធជាច្រើនប្រភេទក្នុងការចាប់មនុស្សចំនួន20នាក់ធ្វើជាចំណាប់ខ្មាំងនៅលើរថយន្តក្រុងមួយគ្រឿងនៅប្រទេសអ៊ុយក្រែន ហើយក្រោយមកក៏បានដោះលែងមនុស្សទាំងនេះបន្ទាប់ពីប្រធានាធិបតី Volodymyr Zelensky បានធ្វើតាមបញ្ជាដ៏គួរឱ្យចង់សើចរបស់ខ្មាំងកាំភ្លើងដោយផ្ទាល់។

យោងតាមសារព័ត៌មាន Reuters ករណីបំភិតបំភ័យខាងលើនេះ បានកើតឡើងកាលពីថ្ងៃទី21កក្កដា នៅពេលដែលខ្មាំងកាំភ្លើងម្នាក់ឈ្មោះ Maksim Krivosh អាយុ44ឆ្នាំ បានឡើងលើរថយន្តក្រុងមួយគ្រឿងដែលមានអ្នកដំណើរប្រមាណជា20នាក់ នៅទីក្រុង Lutsk ដែលស្ថិតនៅភាគខាងលិចនៃប្រទេសអ៊ុយក្រែន។

រូបភាពដែលត្រូវបានគេចែករំលែកក្នុងបណ្ដាញសង្គម ឱ្យឃើញថា ខ្មាំងកាំភ្លើងឈ្មោះ Krivosh នេះ ប្រើប្រាស់កាំភ្លើង AK មួយដើម កាំភ្លើងខ្លីមួយដើម និងគ្រាប់បែបយ៉ាងតិច2គ្រាប់ ក្នុងនោះមាន1គ្រាប់ទំនងជារបស់ក្លែងក្លាយ។

ក្រោយពីបានគ្រប់គ្រងលើចំណាប់ខ្មាំងនៅលើរថយន្ត ជនដៃដល់ Krivosh ក៏បានទាមទារឱ្យមន្ត្រីរដ្ឋាភិបាលអ៊ុយក្រែន ធ្វើតាមការបញ្ជាដ៏ចម្លែករបស់ខ្លួន ក្នុងនោះជននេះបានទាមទារឱ្យប្រធានាធិបតី Zelensky “ឃោសនាផ្សាយពាណិជ្ជកម្ម” ឱ្យខ្សែភាពយន្តរឿង Earthlings ជាភាពយន្តឯកសារមួយគួរឱ្យខ្លាចរបស់សហរដ្ឋអាមេរិក ដែលត្រូវបានផលិតឡើងកាលពីឆ្នាំ2005 ស្ដីអំពីការពឹងផ្អែករបស់មនុស្សជាតិទៅលើសត្វនានាដើម្បីអភិវឌ្ឍសេដ្ឋកិច្ច។

ប្រធានាធិបតីអ៊ុយក្រែន ក្រោយមកក៏បានថតវីដេអូខ្លីមួយឈុត និងបង្ហោះនៅលើបណ្ដាញសង្គម ដោយប្រើប្រាស់សារដែលមានខ្លឹមសារថា “ភាពយន្ត Earthlings ឆ្នាំ2005។ នេះជាខ្សែភាពយន្តដែលអ្នកគ្រប់គ្នាគួរតែទស្សនា”។ ក្នុងគ្រានោះដែរ ខ្មាន់កាំភ្លើងបានគ្រប់គ្រងចំណាប់ខ្មាំងអស់រយៈពេល9ម៉ោង។

បើទោះជាការធ្វើតាមការទាមទាររបស់ជនចាប់ជំរឹត ត្រូវបានចាត់ទុកថាជាសកម្មភាពមួយដែលបង្កឱ្យមានភាពចម្រូងចម្រាសក៏ដោយ ប៉ុន្តែវាហាក់មានប្រសិទ្ធភាពក្នុងករណីនេះ។ ក្រោយពីប្រធានាធិបតី Zelensky បង្ហោះវីដេអូ ខ្មាន់កាំភ្លើងក៏បានដោះលែងចំណាប់ខ្មាំងចំនួន3នាក់ទៅលើប៉ូលិស។ បន្ទាប់មកទៀត ខ្មាន់កាំភ្លើងក៏បានដោះលែងមនុស្សទាំងអស់ជាបន្តបន្ទាប់។

ក្រោយពីក្រុមប៉ូលិសអ៊ុយក្រែនក៏បានគ្រប់គ្រងស្ថានការណ៍ និងចាប់ខ្លួនជនសង្ស័យបានដោយជោគជ័យ។
ប្រធានាធិបតី Zelensky ក៏បានថ្លែងអំណរគុណដល់សមត្ថកិច្ច និងមនុស្សគ្រប់គ្នាដែលបានចូលរួមរំដោះចំណាប់ខ្មាំង ដោយបញ្ជាក់ថា លោកពិតជាសប្បាយចិត្តណាស់ ព្រោះមិនមានជនរងគ្រោះណាម្នាក់បានស្លាប់នៅក្នុងហេតុការណ៍នេះ។ លោក Zelensky ក៏បានលុបវីដេអូ “ឃោសនា” ឱ្យខ្សែភាព Earthlings នោះចេញពីបណ្ដាញសង្គមផងដែរ។

ភាគីខាងប៉ូលិសអ៊ុយក្រែនបានឱ្យដឹងថា ជនសង្ស័យខាងនេះ ធ្លាប់ជាប់ពន្ធនាគារចំនួន10ឆ្នាំ ព្រោះតែបានបំពានច្បាប់ជាច្រើនករណី តាំងពីរឿងកេងបន្លំ ឆក់ប្លន់ ចាប់ជំរឹត រួមនឹងការរក្សានិងប្រើប្រាស់អាវុធខុសច្បាប់។ល។

ប្រភព៖ RT

July 22, 2020

មាសពិភពលោកឡើងថ្លៃខ្ពស់ជាងគេបង្អស់ រាប់ចាប់ពីឆ្នាំ2011

ក្រោយពីបានបង្កើតកំណត់ត្រាខ្ពស់បំផុតក្នុងរយៈពេល9ឆ្នាំកាលពីយប់ថ្ងៃទី21កក្កដាកន្លងទៅ តម្លៃមាសនាព្រឹកនេះ (22កក្កដា) បន្តកើនជាង20ដុល្លារ ពោលគឺកើនឡើងលើសពី1,860ដុល្លារក្នុង1អោន។

បិទការជួញដូរកាលពីថ្ងៃទី21កក្កដា តម្លៃមាសលក់ចេញផ្ទាល់បានកើនជិត24ដុល្លារក្នុង1អោន គឺកើនឡើងដល់1,841ដុល្លារ ខ្ពស់ជាងគេបង្អស់រាប់ចាប់តាំងពីខែកញ្ញា ឆ្នាំ2011។ ព្រឹកនេះ មាសក៏នៅតែបន្តឡើងថ្លៃ ដោយបច្ចុប្បន្ន ការជួញដូរមាស មានតម្លៃប្រមាណជា1,863ដុល្លារក្នុង1អោន។

Bart Melek ដែលជានាយកផ្នែកយុទ្ធសាស្ត្រទំនិញមកពីក្រុមហ៊ុន TD Securities យល់ថា “រូបិយប័ណ្ណដុល្លារអាមេរិកធ្លាក់ថ្លៃ នាំឱ្យពិភពលោកងាកទៅរកទ្រព្យផ្សេងទៀតដែលល្អជាងនេះ។ ប្រភេទទ្រព្យដែលមានអត្រាការប្រាក់ធ្លាក់ចុះ ក៏ជាកត្តាមួយជួយដល់មាសផងដែរ”។

តម្លៃរូបិយវត្ថុដុល្លារអាមេរិក កាលពីម្សិលមិញបានដាំក្បាលចុះជ្រៅបំផុតក្នុងរយៈពេល4ខែកន្លងទៅនេះ បើធៀបនឹងកញ្ចប់រូបិយវត្ថុធំៗឯទៀត។ ប្រាក់ដុល្លារត្រូវបានចាត់ទុកថាជាគូប្រជែងសំខាន់របស់មាស នៅពេលដែលក្រុមអ្នកវិនិយោគមានតម្រូវការគេចចេញពីហានិភ័យ។

ក្រុមមន្ត្រីសហរដ្ឋអាមេរិក សប្ដាហ៍នេះ កំពុងតែពិភាក្សាគ្នាអំពីកញ្ចប់ថវិកាថ្មីសម្រាប់ជំនួយសេដ្ឋកិច្ច។ ចំណែកក្រុមមេដឹកនាំនៃសហភាពអឺរ៉ុប កាលពីម្សិលមិញក៏សម្រេចបានកិច្ចព្រមព្រៀងមួយស្ដីអំពីការបញ្ចេញកញ្ចប់ថវិកាជំរុញកំណើនសេដ្ឋកិច្ចដែលមានតម្លៃជាង850ពាន់លានដុល្លារអាមេរិក ក្រោយការពិភាក្សាគ្នាអស់ជាច្រើនថ្ងៃ។

ការស្រង់ស្ថិតិមួយរបស់ទីភ្នាក់ងារសារព័ត៌មាន Reuters បានបង្ហាញថា តម្លៃមាសកំពុងតែឆ្ពោះទៅរកកំំណត់ត្រាថ្មីមួយទៀតក្នុងរយៈពេល18ខែទៅមុខ។ ក៏ប៉ុន្តែ អត្រានៃការលក់គ្រឿងអលង្ការនៅទ្វីបអាស៊ី នៅមានកម្រិតទាប បូករួមនឹងការរំពឹងដ៏តិចតួចចំពោះកំណើនសេដ្ឋកិច្ចទូទាំងពិភពលោកទៀត នោះនឹងអាចកាត់បន្ថយកំណើនដ៏ខ្លាំងក្លានៃតម្លៃមាសនាពេលខាងមុខ។

ចំណែកនៅក្នុងទីផ្សារក្នុងស្រុកវិញ តម្លៃមាសមួយចំនួនរួមមានដូចជា មាសគីឡួលក់ចេញ1តម្លឹងស្មើនឹង2,170ដុល្លារ ខណៈមាសគីឡួទិញចូល1តម្លឹងស្មើនឹង2,150ដុល្លារ និងមាសដេញលក់ចេញ1ជីស្មើនឹង822.000រៀល (ប្រហែល202ដុល្លារ)៕

ប្រភព៖ សារព័ត៌មានបរទេស/សាលាក្រុងភ្នំពេញ

July 22, 2020

មហាសេដ្ឋី Elon Musk ក្លាយជាអ្នកមានជាងគេលំដាប់ទី5ក្នុងពិភពលោក បន្ទាប់ពីម្ចាស់ Facebook

ភាគហ៊ុននៃក្រុមហ៊ុនផលិតរថយន្តអគ្គិសនី Tesla បានកើនឡើងជិត300% នៅក្នុងឆ្នាំ2020 ប្រការនេះបានជួយឱ្យទ្រព្យសម្បត្តិរបស់មហាសេដ្ឋី Elon Musk កើនឡើងជិត3ដង ដោយបច្ចុប្បន្ន លោក Musk មានទ្រព្យជាង74ពាន់លានដុល្លារ។

ក្រោយបញ្ចប់ការជួញដូរកាលពីថ្ងៃទី20មករា តម្លៃមូលបត្ររបស់ Tesla បានកើន9.5% ពោលគឺក្នុង1ហ៊ុនមានតម្លៃ1,643ដុល្លារ។ ទ្រព្យសម្បត្តិរបស់ Elon Musk ដែលជា CEO នៃក្រុមហ៊ុន Tesla ក៏កើនឡើងទៅតាមនោះដែរ គឺកើនឡើងដល់74.2ពាន់លានដុល្លារអាមេរិក។ ដូច្នេះ មហាសេដ្ឋីរូបនេះ ក៏បានក្លាយជាអ្នកមានជាងគេលំដាប់ទី5ក្នុងពិភពលោក។ នេះបើតាមទស្សនាវដ្ដី Forbes។

ជាសរុប នៅក្នុងរយៈពេល3សប្ដាហ៍កន្លងទៅ មូលបត្រ Tesla កើនឡើង60% ហើយបើគិតតាមឆ្នាំវិញ Tesla កើនឡើងជិត300%។ លោក Musk កាន់កាប់ភាគហ៊ុន Tesla ប្រមាណជា21% ប៉ុន្តែជាងពាក់កណ្ដាលនៃចំនួននេះ ត្រូវបានយកទៅដាក់បញ្ចាំនៅធនាគារដើម្បីខ្ចីប្រាក់មកវិនិយោគបន្ថែម។ ក្រៅពីនេះ ភាគហ៊ុនរបស់លោក Musk នៅក្នុងក្រុមហ៊ុនអវកាស SpaceX ក៏មានតម្លៃប្រមាណជា15ពាន់លានដុល្លារផងដែរ។

បច្ចុប្បន្ន Tesla មិនត្រឹមតែជាក្រុមហ៊ុនផលិតរថយន្តដែលមានតម្លៃជាងគេបំផុតក្នុងពិភពលោក ជាមួយនឹងទុនសរុបចំនួន304.5ពាន់លានដុលារនោះទេ ប៉ុន្តែ Tesla មានតម្លៃទុនសរុបច្រើនជាងទុនរបស់ក្រុមហ៊ុនផលិតរថយន្ត Ford, Ferrari, General Motors និង BMW បូកចូលគ្នាទៀតផង។

តម្លៃមូលបត្ររបស់ Tesla បានឡើងថ្លៃជាបន្តបន្ទាប់ នាំឱ្យទ្រព្យរបស់លោក Musk បង្កើតបានកំណត់ត្រាថ្មីៗជាហូរហែក្នុងមួយរយៈពេលខ្លីកន្លងទៅនេះ។ ទស្សនាវដ្ដី Forbes បានឱ្យដឹងថា កាលពីពាក់កណ្ដាលខែមីនា លោក Musk មានទ្រព្យមិនដល់25ពាន់លានដុល្លារនោះទេ និងឈរលំដាប់លេខ31ក្នុងចំណោមអ្នកមានជាងគេក្នុងពិភពលោក។ លោក Elon Musk ចាប់ផ្ដើមមានវត្តមានជាលើកដំបូងក្នុងបញ្ជីឈ្មោះអ្នកមានជាងគេទាំង400នៅសហរដ្ឋអាមេរិកកាលពីឆ្នាំ2012 ដោយមានទ្រព្យសរុប2.4ពាន់លានដុល្លារ និងឈរលំដាប់ទី190ក្នុងបញ្ជីនេះ។

លោក Jeff Bezos, លោក Bernard Arnoult, លោក Bill Gates និងលោក Zuck Markerberg (រាប់ពីឆ្វេងមកស្ដាំ ពីលើចុះក្រោម)

ក្រុមហ៊ុន Tesla ផលិតបានរថយន្តចំនួន103,000គ្រឿងក្នុងត្រីមាសទី1នៃឆ្នាំ2020។ ចំណែក Toyota វិញ បាននាំចេញរថយន្តដល់ទៅ2.4លានគ្រឿងឯណោះ។

នៅក្នុងពិភពលោក អ្នកមានជាងគេបង្អស់នាបច្ចុប្បន្ន នៅតែជាម្ចាស់ក្រុមហ៊ុន Amazon គឺលោក Jeff Bezos ដោយមានទ្រព្យសរុប189ពាន់លានដុល្លារអាមេរិក។ កាលពីថ្ងៃទី20កក្កដា ទ្រព្យរបស់លោក Bezos បានកើន13ពាន់លានដុល្លារបន្ថែមទៀត ដោយសារតម្លៃមូលបត្រ Amazon កើន8%។ ឈរលំដាប់ទី2 គឺម្ចាស់ក្រុមហ៊ុន LVMH លោក Bernard Arnault ជាមួយនឹងទ្រព្យសរុប114ពាន់លានដុល្លារ។ លោក Bill Gates ឈរលំដាប់ទី3 (113ពាន់លានដុល្លារ) និងទី4គឺលោក Mark Zuckerberg (90ពាន់លានដុល្លារ)៕

ប្រភព៖ Forbes

July 22, 2020

លោក Trump ទទួលស្គាល់ថា ម៉ាស់ពិតជាមានប្រសិទ្ធភាពក្នុងការទប់ស្កាត់COVID-19 ខណៈសហរដ្ឋអាមេរិកមាន144,888នាក់បានស្លាប់ដោយសារវីរុសនេះ

ប្រធានាធិបតីសហរដ្ឋអាមេរិកបានថ្លែងថា ម៉ាស់មានប្រសិទ្ធភាពក្នុងការទប់ស្កាត់ការឆ្លងវីរុសCOVID-19 ព្រមទាំងបានអំពាវនាវឱ្យពលរដ្ឋពាក់ម៉ាស់ ចំណែកខ្លួនលោកផ្ទាល់ក៏នឹងធ្វើដូច្នេះដែរ។

“យើងស្នើឱ្យគ្រប់គ្នាពាក់ម៉ាស់នៅពេលមិនអាចរក្សាគម្លាតពីគ្នាក្នុងសង្គម។ បើទោះជាអ្នកចូលចិត្ត ឬមិនចូលចិត្តក៏ដោយ ប៉ុន្តែវា (ម៉ាស់) នឹងបញ្ចេញប្រសិទ្ធភាព” លោក Trump ថ្លែងបែបនេះនៅក្នុងសន្និសីទសារព័ត៌មានមួយកាលពីថ្ងៃទី21កក្កដាកន្លងទៅ។

ប្រធានាធិបតីសហរដ្ឋអាមេរិកបានឱ្យដឹងថា លោកបានស៊ាំជាមួយនឹងការពាក់ម៉ាស់បន្តិចម្ដងៗ ហើយថា លោកនឹងពាក់វានៅទីកន្លែងដែលមានមនុស្សច្រើន ឬជិះជណ្ដើរប្រអប់។ លោក Trump បន្តថា “ខ្ញុំរីករាយនឹងប្រើប្រាស់វា។ អ្វីៗទាំងអស់ដែលមានផលប្រយោជន៍ គឺសុទ្ធតែជាប្រការល្អ”។ ម្ចាស់សេតវិមានក៏បានអំពាវនាវដល់យុវជនក្មេងៗនៅអាមេរិក ឱ្យចៀសវាងចូលបារដែលមានមនុស្សច្រើន ជាកន្លែងដែលCOVID-19 ងាយនឹងឆ្លងរាលដាល។

ការប្ដូរផ្លាស់គំនិតស្ទើរតែ360អង្សារបស់លោក Trump ចំពោះ COVID-19 បានមានកើតឡើងនៅពេលដែលប្រទេសរបស់លោកមានអ្នកស្លាប់ដោយសារវីរុសនេះដល់ទៅ144,888នាក់ ក្នុងចំណោមអ្នកផ្ទុកវីរុសចំនួន4,023,947នាក់ បើគិតមកដល់ថ្ងៃនេះ (22កក្កដា)។

នៅទូទាំងពិភពលោក បច្ចុប្បន្នមានមនុស្សចំនួន618,265នាក់បានស្លាប់ដោយសារវីរុសCOVID-19 ខណៈដែលចំនួនអ្នកផ្ទុកវីរុសនេះបានកើនដល់15,071,024នាក់។ ក្នុងរយៈពេល24ម៉ោងចុងក្រោយនេះ ពិភពលោកបានរកឃើញអ្នកផ្ទុកវីរុសចំនួន238,058នាក់ និងអ្នកស្លាប់ចំនួន5,992នាក់ នេះបើតាមស្ថិតិរបស់ Worldometers៕

ប្រភព៖ សារព័ត៌មានបរទេស

July 22, 2020

តួលេខនៃផលប៉ះពាល់នានាទាក់ទិននឹង “មហាគ្រោះទឹកជំនន់” កម្រជួបនៅប្រទេសចិន

ប្រទេសចិនកំពុងតែប្រឈមមុខនឹងគ្រោះទឹកជំនន់ដ៏ធ្ងន់ធ្ងរកម្របានជួប ដែលបានបង្កផលប៉ះពាល់ដល់ជីវភាពពលរដ្ឋរាប់សិបលាននាក់ និងនាំឱ្យខាត់បង់ផ្នែកសេដ្ឋកិច្ចប្រមាណជា12ពាន់លានដុល្លារអាមេរិក ប៉ុន្តែតួលេខនេះនឹងកើនឡើងបន្តទៀតនាពេលខាងមុខ។

ទឹកជំនន់នៅប្រទេសចិន បានបណ្ដាលឱ្យទឹកនៅក្នុងទន្លេជាង400ក្នុងប្រទេសនេះ ស្ថិតក្នុងស្ថានភាពប្រកាសអាសន្នចាប់ពីដើមខែមិថុនា ក្នុងនោះកម្រិតផ្ទៃទឹកក្នុងទន្លេចំនួន33បានឡើងដល់កម្ពស់ដែលមិនធ្លាប់មានទាល់តែសោះនៅក្នុងប្រវត្តិសាស្ត្រ។

គិតដល់ពាក់កណ្ដាលខែកក្កដា ប្រជាជនចិនជិត38លាននាក់នៅក្នុងខេត្តក្រុងចំនួន27របស់ចិន ត្រូវរងផលប៉ះពាល់ដោយសារភ្លៀងនិងទឹកជំនន់ ធ្វើឱ្យមនុស្សចំនួន141នាក់បាត់ខ្លួន និងបាត់បង់ជីវិត។ ចំនួននេះក៏ត្រូវបានព្យាករថានឹងកើនឡើងផងដែរ។

ក្រសួងគ្រប់គ្រងស្ថានការណ៍បន្ទាន់របស់ចិនបានឱ្យដឹងកាលពីថ្ងៃទី9កក្កដាថា មនុស្សប្រមាណជាជាង1.7លាននាក់ត្រូវជម្លៀសខ្លួន ផ្ទះចំនួន22,000ខ្នងត្រូវបាក់រលំ ខណៈដែលការខាតបង់ផ្ទាល់ផ្នែកសេដ្ឋកិច្ចគឺប្រមាណជា8.8ពាន់លានដុល្លារអាមេរិក។ 3ថ្ងៃក្រោយមក ចំនួនអ្នកត្រូវជម្លៀសខ្លួនបានកើនឡើងដល់ជិត2.3លាននាក់ ក្នុងនោះមានពលរដ្ឋចំនួន1.3លាននាក់ត្រូវការជំនួយបន្ទាន់ ចំណែកចំការចំនួន209,000ហិកតាត្រូវបានបំផ្លិចបំផ្លាញ ហើយការខាតបង់ផ្ទាល់ផ្នែកសេដ្ឋកិច្ចក៏បានកើនឡើងដល់12ពាន់លានដុល្លារអាមេរិក។

ក្នុងរយៈពេលត្រឹមតែ1សប្ដាហ៍កន្លងទៅនេះ ទីក្រុងចំនួន4នៅប្រទេសចិន បានប្រកាសអាសន្ន ដោយសារទឹកជំនន់ឡើងខ្ពស់។ ដោយឡែកនៅខេត្ត Jiangxi ពលរដ្ឋចំនួន5.5លាននាក់ត្រូវរងផលប៉ះពាល់ និងជិត500,000នាក់ត្រូវជម្លៀសខ្លួន នេះបើគិតមកត្រឹមថ្ងៃទី13កក្កដា។

Channel News Asia ដកស្រង់ការព្យាករពីក្រុមអ្នកជំនាញ ឱ្យដឹងថា ដំណាក់កាលគ្រោះថ្នាក់ធ្ងន់ធ្ងរបំផុតនៅក្នុងគ្រោះទឹកជំនន់នេះ អាចមិនទាន់មកដល់នៅឡើយ។ តាមបទពិសោធន៍ គ្រោះទឹកជំនន់នៅប្រទេសចិន តែងបង្កគ្រោះថ្នាក់ធ្ងន់ធ្ងរបំផុតចាប់ពីចុងខែកក្កដារហូតដល់ពាក់កណ្ដាលខែសីហា។

ប្រទេសចិនគឺជាទឹកដីមួយដែលរងគ្រោះទឹកជំនន់ធំៗច្រើនជាងគេក្នុងពិភពលោក។ នៅក្នុងគ្រោះទឹកជំនន់ធំបំផុតចំនួន10នៅទូទាំងពិភពលោកក្នុងរយៈពេល100ឆ្នាំកន្លងមកនេះ គឺមាន7ករណីកើតឡើងនៅលើទឹកដីចិន ក្នុងនោះមាន5ករណីនៅឯទន្លេ Yangtze និង2ករណីនៅឯទន្លេ Huang He៕

ប្រភព៖ CNA

July 21, 2020

មុខរបរប្រមូលសាកសពអ្នកជំងឺCOVID-19 កំពុងត្រូវប៉ាន់នៅប៉េរូ

“យមរាជៗ! យើងមកដល់ហើយៗ” Néstor Vargas និង Luis José Cerpa កំពុងតែឆ្លើយឆ្លងគ្នានៅលើរលកវិទ្យុទាក់ទង ក្នុងពេលពួកគេបើកបររថយន្តទៅកាន់មន្ទីរពេទ្យដែលបានជូនដំណឹងមកពួកគេថា “មានអ្នកជំងឺCOVID-19 បានស្លាប់”។

ស្លៀកពាក់ឈុតការពារវីរុសតាំងពីក្បាលដល់ចុងជើង Néstor Vargas និង Luis José Cerpa កំពុងតែធ្វើដំណើរទៅប្រមូលសាកសពនៃអ្នកជំងឺCOVID-19 នៅពាសពេញទីក្រុង Lima ក្នុងប្រទេសប៉េរូ។ នោះគឺជាមុខរបរដែលមានមនុស្សតិចតួចណាស់ដែលហ៊ានធ្វើ ព្រោះតែខ្លាចឆ្លងវីរុស។ ក៏ប៉ុន្តែ Néstor Vargas និង Luis José Cerpa ដែលជាជនអន្តោប្រវេសន៍មកពីប្រទេសវេណេស៊ុយអេឡានេះ ហ៊ានប្រឈមមុខនឹងហានិភ័យគ្រប់យ៉ាងនៅពេលពួកគេជ្រើសរើសការងារជាអ្នកប្រមូលសាកសពអ្នកជំងឺCOVID-19។

Vargas កាន់ទូរស័ព្ទដែលមានរូបភរិយាបណ្ដើរ ប្រាប់អ្នកយកព័ត៌មានបណ្ដើរថា “យើងពិតជាមានការភ័យខ្លាចឆ្លងវីរុស និងការចម្លងទៅអ្នកផ្ទះ ជាកន្លែងដែលខ្ញុំរស់នៅជាមួយម្ដាយ ភរិយា និងកូនៗ”។

យោងតាមអង្គការសហប្រជាជាតិ ពលរដ្ឋវេណេស៊ុយអេឡាជិត5លាននាក់បានចាកចេញពីប្រទេស ចាប់ពីឆ្នាំ2016 ក្នុងនោះមានយ៉ាងតិច878,000នាក់បានចូលមកកាន់ប្រទេសប៉េរូ ដើម្បីធ្វើការរកប្រាក់ចិញ្ចឹមជីវិត ឬផ្ញើទៅកាន់សាច់ញាតិដែលកំពុងជួបការលំបាកនៅឯស្រុកកំណើត។

Cerpa អាយុ21ឆ្នាំ ធ្លាប់ជានិស្សិតផ្នែករចនាក្រហ្វិកនៅមុនពេលមកកាន់ប្រទេសប៉េរូធ្វើជាអ្នករត់តុ។ ចំណែក Vargas វ័យ38ឆ្នាំ ធ្វើការនៅក្នុងក្រុមហ៊ុនរៀបចំពិធីបុណ្យសពនៅវេណេស៊ុយអេឡា ប៉ុន្តែ បច្ចុប្បន្នធ្វើជាអ្នកបើកបររថយន្តឱ្យក្រុមហ៊ុយហ្គាសមួយនៅប៉េរ៉ូ។ ពេល COVID-19 បានរាលដាលពេញតំបន់ ភ្ញៀវទេសចរណ៍ក៏លែងមាន ការងារក្នុងវិស័យដែលពួកគេធ្វើក៏ត្រូវបាត់បង់នៅសល់តែការងារក្នុងវិស័យរៀបចំបុណ្យសពតែប៉ុណ្ណោះ។

Vargas និយាយថា “ពួកយើងមិនបានធ្វើការអស់រយៈពេល3ខែមកហើយ ពួកយើងត្រូវការហូបចុក បង់ថ្លៃផ្ទះ និងផ្ញើប្រាក់ទៅឱ្យគ្រួសារនៅវេណេស៊ុយអេឡា។ មុខរបរនេះពិតជាមានការលំបាកច្រើនណាស់ ប៉ុន្តែដោយសារត្រូវការប្រាក់ ពួកយើងនៅតែធ្វើ”។

Vargas និង Cerpa ម្នាក់ៗអាចរកបានប្រហែល500ដុល្លារក្នុង1ខែៗ គឺច្រើនជាងជិតពីរដងបើធៀបនឹងប្រាក់ខែអប្បបរមានៅប្រទេសប៉េរូ។ ពួកគេធ្វើការរហូតដល់19ម៉ោងក្នុង1ថ្ងៃ និង7ថ្ងៃក្នុង1សប្ដាហ៍។

បើទោះជាប្រទេសប៉េរូ បានចាប់ផ្ដើមចាត់វិធានការទប់ស្កាត់យ៉ាងឆាប់រហ័សក៏ដោយ ប៉ុន្តែ COVID-19 នៅតែឆ្លងរាលដាលដូចភ្លើងឆេះព្រៃ បណ្ដាលឱ្យមនុស្សជាង353,000នាក់បានឆ្លងវីរុស និងជាង13,000នាក់បានបាត់បង់ជីវិត។ ជារៀងរាល់លើក នៅពេល Vargas និង Cerpa ចូលទៅយកសាកសពតាមការហៅរក ពួកគេតែងតែត្រូវបានទទួលស្វាគមន៍ដោយសំឡេងទ្រហោយំពីម្ចាស់ផ្ទះជានិច្ច។ ពួកគេតាំងតែព្យាយាមដើរចូលយ៉ាងប្រញាប់ដើម្បីនាំយកសាកសព រួចត្រលប់ចេញយ៉ាងលឿន ប៉ុន្តែក៏នៅតែសំដែងការគោរពចំពោះគ្រួសារនៃសព។

នៅក្នុងសាលបូជាសព El Angel Cemetery បុគ្គលិកដែលធ្វើការងារជាអ្នកបូជា ឬរំលាយសព ក៏ជាជនជាតិវេណេស៊ុយអេឡាដែរ។ ពលរដ្ឋម្នាក់ឈ្មោះ Orlando Arteaga បាននិយាយថា “ជនជាតិប៉េរូមិនធ្វើការងារនេះទេ។ ពិតជាលំបាកណាស់”។

ឡបូជាសព និងក្ដារមឈូសដាក់សាកសពយ៉ាងច្រើនគរលើគ្នាក្នុងទីលានរបស់ក្រុមហ៊ុន El Angel Cemetery នៅទីក្រុង Lima ប្រទេសប៉េរូ

លោក Orlando Arteaga ធ្វើការ7ថ្ងៃក្នុង1សប្ដាហ៍ ដើម្បីរកប្រាក់ចិញ្ចឹមកូនៗចំនួន3នាក់នៅវេណេស៊ុយអេឡា និងកូនស្រីអាយុ2ឆ្នាំម្នាក់នៅ Lima។ លោក Orlando Arteaga ថ្លែងថា លោកមិនដែលស្មានដល់ថា លោកបានឃើញទិដ្ឋភាពស្លាប់យ៉ាងច្រើនបែបនេះសោះ។

លោក Arteaga អាយុ40ឆ្នាំ ជាអ្នកទទួលខុសត្រូវលើឡបូជាសព កំពុងតែធ្វើការយ៉ាងមមាញឹក។ សាកសពដែលដាក់ក្នុងមឈូសធ្វើអំពីក្រដាស់រឹងយ៉ាងច្រើនកំពុងស្ថិតនៅគរលើគ្នានៅក្បែរនោះ រង់ចាំដល់វេនត្រូវបូជា។

លោក Orlando Arteaga បន្តថា “នេះគ្រាន់តែជាសាកសពមួយចំនួនតួចប៉ុណ្ណោះ។ នៅមានសាកសពជាច្រើនទៀតដែលដាក់នៅកន្លែងផ្សេងៗ ដោយសារតែទីនេះពេញអស់ហើយ”។ លោកថ្លែងថា “ពិតជាមិនមានអ្នកណាម្នាក់គួរតែត្រូវធ្វើការនេះឡើយ សូម្បីតែមនុស្សដែលខ្ញុំស្អប់បំផុត”៕

ប្រភព៖ សារព័ត៌មានបរទេស

July 21, 2020

NASA បញ្ចេញរូបថតរបស់កាឡាក់ស៊ីរាងគូទខ្យងដែលមាន “ដៃបីសាច” និងធំជាង Milky Way ជិតពាក់កណ្ដាលឯណោះ

ទីភ្នាក់ងារអវកាសអាមេរិក (NASA) បានបញ្ចេញរូបថត បង្ហាញអំពីទិដ្ឋភាពដ៏ស្រស់ស្អាតនៃកាឡាក់ស៊ីរាងគូទខ្យង NGC 4848 ប្រកបដោយភាពលម្អិត ដែលត្រូវបានហ្ស៊ូមមកជិត និងថតបានកាលពីពេលថ្មីៗនេះ។

កាឡាក់ស៊ី NGC 4848 មានទីតាំងស្ថិតនៅភាគខាងជើងនៃកញ្ចុំផ្កាយ Coma Berenices ដែលមានចម្ងាយពីផែនដីប្រមាណជា336លានឆ្នាំពន្លឺ (1ឆ្នាំពន្លឺមានប្រវែង 9.46លានលានគីឡូម៉ែត្រ)។ NGC 4848 ត្រូវបានចាត់ចូលក្នុងប្រភេទកាឡាក់ស៊ីគូទខ្យងដែលបាក់ជាកំណាត់ ឬកាឡាក់ស៊ីគូទខ្យងមានមែកទទឹង ដែលដូចទៅនឹងកាឡាក់ស៊ី Milky Way របស់មនុស្សយ៉ាងដូច្នោះដែរ។

ចំណុចពិសេសរបស់បណ្ដាកាឡាក់ស៊ីរាងគូទខ្យង នោះគឺ ពួកវាមានមែកធាង ឬដៃដែលមានរាងដូចដងធ្នូ ដែលលាតសន្ធឹងពីចំណុចកណ្ដាលទៅកាន់ជាយរបស់កាឡាក់ស៊ី។ នៅក្នុងរូបភាពថ្មីបំផុតរបស់កាឡាក់ស៊ី NGC 4848 ដែលត្រូវបានថតដោយកាមេរ៉ារបស់កែវយឹតអវកាស Hubble បង្ហាញថា ដៃនានាដែលមានរាងដូចគូទខ្យង និងពណ៌ខៀវខ្ចីដ៏ស្រស់ស្អាតរបស់កាឡាក់ស៊ីនេះ អាចឱ្យយើងសង្កេតមើលឃើញបានយ៉ាងលម្អិត។

NASA បញ្ចេញរូបថតរបស់កាឡាក់ស៊ីរាងគូទខ្យងដែលមាន "ដៃបីសាច" និងធំជាង Milky Way ជិតពាក់កណ្ដាល — NASA បញ្ចេញរូបថតរបស់កាឡាក់ស៊ីរាងគូទខ្យងដែលមាន “ដៃបីសាច” និងធំជាង Milky Way ជិតពាក់កណ្ដាល

“Hubble មិនត្រឹមតែថតបានទិដ្ឋភាពផ្នែកខាងក្នុងយ៉ាងច្បាស់នៃដៃនានាកាឡាក់ស៊ីនេះ ជាកន្លែងដែលមានផ្ទុកផ្កាយ “ក្មេងៗ” រាប់សែនដួងកំពុងបញ្ចេញពន្លឺដ៏ខៀវស្រងាត់ប៉ុណ្ណោះទេ ប៉ុន្តែវាក៏អនុញ្ញាតឱ្យយើងមើលឃើញកន្ទុយដ៏ស្រទន់របស់កាឡាក់ស៊ីដែលបន្លាយខ្លួនចេញឆ្ងាយពីចំណុចកណ្ដាល ប្រៀបបានទៅនឹងដៃបីសាចដូច្នេះដែរ” នេះបើតាមការពិពណ៌នារបស់ NASA។

NGC 4848 ត្រូវបានរកឃើញជាលើកដំបូងកាលពីថ្ងៃទី21មេសា ឆ្នាំ1865 ដោយតារាវិទូជនជាតិអាល្លឺម៉ង់ Heinrich Louis d’Arrest។ តាមការគន់គូរ កាឡាក់ស៊ីនេះ មានទំហំធំជាង Milky Way របស់មនុស្សដល់ទៅជិតពាក់កណ្ដាលឯណោះ ដោយវាមានអង្កត់ផ្ចិតប្រវែងជិត 150,000ឆ្នាំពន្លឺ៕

ប្រភព៖ Sci-News

July 21, 2020

តើជនជាតិចិនយុគសម័យថ្មីនេះ ពិតជាសម្បូរលុយកាក់(ជាអ្នកមាន)មែនឬ?

បច្ចុប្បន្ននេះ ប្រហែលជាគ្មានអ្នកណាបដិសេធឡើយថា ចិនជាប្រទេសដែលមានតួនាទីសំខាន់នៅក្នុងសេដ្ឋកិច្ចពិភពលោក ជាប្រទេសដែលមានអត្រាពាណិជ្ជកម្មអន្តរជាតិ ស្ថិតក្នុងកម្រិតខ្ពស់ជាបន្តបន្ទាប់…មូលហេតុចម្បងៗ មកពី ចិនជាប្រទេសដែលមានចំនួនប្រជាជនច្រើនមហាសាល មានដើមទុនពលកម្មតម្លៃថោក និងថែមទាំងជាពលកម្មដែលហាក់ដូចជាមានប្រសិទ្ធភាពក្នុងការធ្វើការងារទៀតផង ធូរប្រឹង តឹងខំ និងឧស្សាហ៍ព្យាយាម(ព្រោះមនុស្សច្រើន ការប្រកួតប្រជែងក៏ខ្ពស់ បើមិនឧស្សាហ៍ ច្បាស់អត់ការងារធ្វើមិនខាន) ធ្វើឱ្យការវិនិយោគពីបរទេស និងកិច្ចការងាររួមខាងសេដ្ឋកិច្ចជាមួយបរទេស របស់ប្រទេសចិន រីកធំធាត់ឡើងយ៉ាងឆាប់រហ័ស។

40ជាងឆ្នាំ តាមរយៈការរីកធំធាត់ខាងសេដ្ឋកិច្ច ធ្វើឱ្យការរីកធំឡើងរបស់ប្រទេសចិន ក្លាយជារឿងដែលគួរឱ្យព្រួយបារម្ភរបស់ប្រទេសលោកខាងលិច និងក្រុមអំណាចចាស់របស់ពិភពលោក ដែលមើលឃើញថា ការរីកធំធាត់របស់ចិននេះគឺ គ្រោះភ័យដែលកំពុងរុករាន។

តែ មកដល់ពេលបច្ចុប្បន្ន បើទោះបីជាចិន នឹងមានទំហំសេដ្ឋកិច្ចធំ លំដាប់លេខ2 របស់ពិភពលោកក្ដី តែចិននៅតែស្ថិតក្នុងក្រុមប្រទេសកំពុងអភិវឌ្ឍន៍ ដោយសារតែប្រជាជនដែលច្រើន អត្រាប្រាក់ចំណូល ស្ថានភាពរស់នៅរបស់ប្រជាជន និងមាត្រដ្ឋានធានារ៉ាប់រងសង្គម នៅក្នុងតំបន់នីមួយៗទូទាំងប្រទេសចិន នៅមានភាពខុសប្លែកពីគ្នាហាក់ដូចជាច្រើនណាស់ ហើយរឿងនេះ ក៏ជាចំណោទដ៏ធំមួយរបស់រដ្ឋបាលចិនដែរ ដែលនឹងត្រូវធ្វើយ៉ាងណា ឱ្យភាពខុសប្លែកគ្នានេះ ថយចុះ និងឈានផុតអន្ទាក់ប្រាក់ចំណូលមធ្យម ឆ្ពោះទៅរកការក្លាយជាប្រទេសអភិវឌ្ឍន៍។

មិត្តអ្នកអានជាច្រើន អាចនឹងស្គាល់ប្រទេសចិនតាមរយៈប្រព័ន្ធព័ត៌មានផ្សេងៗ ឃើញការចាយវាយរបស់អ្នកទេសចរចិននៅក្នុងប្រទេសរបស់យើង និងការទិញទំនិញឥតប្រណីដៃនៅក្នុងប្រទេសផ្សេងៗ…អាចនឹងមើលឃើញ និងមានអារម្មណ៍ថា ជនជាតិចិន គឺជាអ្នកមាន និងសម្បូរលុយកាក់គ្រប់គ្នាហើយមើលទៅ តែការពិតវិញ អាចមិនមែនដូច្នោះឡើយ អ្វីដែលយើងមើលឃើញ គ្រាន់តែជាមនុស្ស 1ក្រុមប៉ុណ្ណោះ។

សូមកុំភ្លេចថា ចិនមានប្រជាជនទូទាំងប្រទេសចំនួនជាង 1,400លាននាក់ ក្នុងចំនួននេះ 1ភាគ10 ស្នាក់អាស្រ័យនៅក្នុងទីក្រុងលំដាប់លេខ1 ដូចជា ប៉េកាំង ស៊ាងហៃ ហ្សិនជិន ដោយសារតែតម្លៃអចលនទ្រព្យរបស់ទីក្រុងលំដាប់លេខ1 របស់ចិន ដែលខ្ពស់ខ្លាំងជាងនៅទីក្រុងផ្សេងៗទូទាំងប្រទេស ធ្វើឱ្យទ្រព្យសម្បត្តិរបស់ប្រជាជននៅក្នុងទីក្រុងលំដាប់លេខ1 ទាំងនោះ ក៏ខ្ពស់ទៅតាមនោះដែរ។

តាមរយៈការឆ្លងរាតត្បាតទូទាំងពិភពលោករបស់មេរោគកូវីដ-19 បានចាប់ផ្ដើមប៉ះពាល់ដល់សេដ្ឋកិច្ច និងជីវភាពរស់នៅរបស់មនុស្សទូទាំងពិភពលោក សូម្បីតែប្រទេសធំ ដូចចិន ក៏នៅតែទទួលរងផលប៉ះពាល់នេះដូចគ្នា ជាពិសេសក្នុងរឿងការនាំចេញ និងធុរកិច្ចសេវាកម្មនៅក្នុងប្រទេស។ ក្រោយការថ្លែងរបស់លោកនាយករដ្ឋមន្ត្រី លី ខឺឆៀង កាលពីដើមឆ្នាំកន្លងទៅថា “ប្រាក់ចំណូលរបស់ពលរដ្ឋចិនទូទាំងប្រទេស ស្ថិតក្នុងអត្រា 1ឆ្នាំ 3ម៉ឺនយន់ និងនៅមានមនុស្ស 600លាននាក់ទៀតនៅក្នុងប្រទេសដែលមានប្រាក់ចំណូលជាមធ្យម 1ខែតែ 1,000យន់ប៉ុណ្ណោះ(1យន់ ស្មើនឹង 0,14ដុល្លារអាមេរិក ឬស្មើនឹងជិត 600រៀល)”

បើសិនជាលោកនាយករដ្ឋមន្ត្រី លី មិនចេញមកថ្លែងការណ៍ទេនោះ ជនជាតិចិនខ្លួនឯងដែលរស់នៅក្នុងទីក្រុងលំដាប់លេខ1 ជាច្រើន ប្រហែលជានឹកស្មានថា ប្រជាជនចិនភាគច្រើនទូទាំងប្រទេស មានលុយកាក់ចាយសម្បូរសប្បាយខ្លាំងណាស់មើលទៅ…ធ្វើឱ្យប្រព័ន្ធព័ត៌មានចាប់ផ្ដើមបែរមកចាប់អារម្មណ៍ ក្រុមមនុស្សលំដាប់កណ្ដាល ដល់លំដាប់ក្រោម នៅក្នុងប្រទេស ដែលជាមនុស្សក្រុមធំបំផុតនៅក្នុងប្រទេសចិន(ដូចប្រទេសកំពុងអភិវឌ្ឍន៍ដទៃទៀតដែរ)។

ការពិតទៅ ស្មេរយល់ឃើញថា ដែលលោកនាយករដ្ឋមន្ត្រីចិន ចេញមកបង្ហាញតួលេខនេះចំពោះភ្នែកប្រជាជន អាចនឹងជាការដាស់តឿនសតិស្មារតីថា កុំអាលសប្បាយភ្លេចខ្លួននឹងស្ថានការណ៍បច្ចុប្បន្ន ដែលការពិតទៅ ភារកិច្ចលើកកម្ពស់កម្រិតជីវភាពរស់នៅរបស់ប្រជាជន គឺជាការងារធំ និងធ្ងន់ធ្ងរណាស់។

ក្នុងខែមីនា ឆ្នាំនេះ ការិយាល័យស្ថិតិចិន បានរាយការណ៍ថា តាមរយៈការពិនិត្យ និងប្រមែប្រមូលស្ថិតិពីអ្នកលេងអ៊ីនធើណិតជនជាតិចិន ដែលមានចំនួនគំរូ 900លាននាក់(អត្រាចូលដល់ប្រជាជនទូទាំងប្រទេស គិតជាភាគរយ គឺ 65%) និងតាមរយៈការប្រមូលតួលេខប្រាក់ខែ ពីក្រុមគំរូទាំងនេះ បានរកឃើញថា 72% មានប្រាក់ចំណូលមិនដល់ 5,000យន់។ ប្រជាជននៅក្នុងទីក្រុងធំលំដាប់លេខ3 មានតែពាក់កណ្ដាលប៉ុណ្ណោះ ដែលមានប្រាក់ចំណូល ក្នុង1ខែច្រើនជាង 4,000យន់ និងតាមរយៈស្ថិតិរបស់ប្លាតហ្វ៉ម សបភីង អនឡាញចិនមួយ បានផ្ដល់តួលេខអតិថិជនក្នុងទីក្រុងលំដាប់លេខ2-3 តាមលេខរៀងនោះ គឺមួយផ្នែកធំមានកម្លាំងការចាយវាយ មិនដល់ 1,000យន់ឡើយក្នុង1ខែ។

តាមរយៈតួលេខទាំងនោះ យើងនឹងអាចមើលឃើញបានថា ប្រាក់ចំណូលរបស់ក្រុមគំរូទាំងនោះ ភាគច្រើនប្រមូលផ្ដុំនៅក្នុងចំនួនរវាង 3,001-5,000យន់ ក្នុង1ខែ។ បន្ទាប់មក គឺប្រាក់ចំណូលចន្លោះពី 5,001-8,000យន់ក្នុង1ខែ។

ឥឡូវនេះ យើងមកមើលពីចន្លោះអាយុរបស់ក្រុមគំរូមួយនេះ យើងនឹងឃើញថា ភាគច្រើនប្រមូលផ្ដុំក្នុងក្រុមមនុស្សចន្លោះអាយុធ្វើការងារ ប្រមាណ 20-30ជាងឆ្នាំ។ ក្រៅពីតួលេខរបស់ក្រុមគំរូហើយ ខាងការិយាល័យស្ថិតិនៃប្រទេសចិន កាលពីឆ្នាំ2019 ក៏បានរាយការណ៍ពីចំណែកប្រាក់ចំណូលរបស់ជនជាតិចិនទូទាំងប្រទេសដូចតទៅគឺ 38% គឺប្រជាជនដែលមានប្រាក់ចំណូលក្នុង1ខែទាបជាង 2,000យន់, 46% គឺប្រជាជនដែលមានប្រាក់ចំណូលក្នុង1ខែក្នុងចន្លោះ 2,000-2,500យន់, 13% គឺប្រជាជនដែលមានប្រាក់ចំណូលក្នុង1ខែចន្លោះ 5,000-10,000យន់ និងប្រជាជនដែលមានប្រាក់ចំណូលច្រើនជាង 10,000យន់ មានចំនួនត្រឹមតែ 3%ប៉ុណ្ណោះ។

ក្នុងចំណែករបស់ប្រាក់ចំណូលដែលអាចចាយវាយបានជាមធ្យម សម្រាប់បុគ្គលម្នាក់របស់ចិន ក្នុងដើមឆ្នាំនេះ ទីក្រុងដែលជាប់លំដាប់លេខ1(ប្រជាជនចាយលុយច្រើនជាងគេ) គឺស៊ាងហៃ 19,621យន់(ក្នុងម្នាក់) និងតាមមកដោយទីក្រុងប៉េកាំង 17,874យន់ ដោយប្រាក់ចំណូលដែលអាចចាយវាយបាននេះ ជាសន្ទស្សន៍ចង្អុលវាស់ពីស្តង់ដាជីវិតរបស់ប្រជាជនបានយ៉ាងច្បាស់។

ទីក្រុងធំៗនៅក្នុងប្រទេសចិន ក៏ដូចទីក្រុងធំៗនៅក្នុងប្រទេសផ្សេងទៀតដែរ ដែលប្រជាជនមកពីតំបន់ផ្សេងៗ តែងតែចូលមកស្វែងរកឱកាស និងម្នាក់ៗត្រូវខំប្រឹងតស៊ូ ដើម្បីឱ្យខ្លួនឯងមានជីវិតរស់នៅដែលល្អប្រសើរឡើង។
ដូច្នេះ តាមរយៈអ្វីដែលស្មេរបានសរសេររៀបរាប់មក នឹងធ្វើឱ្យមើលឃើញថា ចិនជាប្រទេសដែលធំ យើងមិនអាចយកក្រុមមនុស្សមួយចំនួនតូចដែលយើងបានឃើញ ឬបានដឹង មកសម្រេចសេចក្ដីថា មនុស្សភាគច្រើនរបស់ប្រទេសមួយនេះ គឺសុទ្ធតែដូច្នោះទាំងអស់បានទេ។

មួយជ្រុងទៀត…ប្រទេសចិនមានថ្ងៃនេះ មិនមែនជារឿងងាយឡើយ ផ្លូវនៅខាងមុខ នៅត្រូវដើរទៅទៀតវែងឆ្ងាយណាស់។ ប្រាក់ចំណូលរបស់ប្រជាជនចិនក្នុងពេលបច្ចុប្បន្ន ក៏អាចរាប់បានថា ខ្ពស់ជាងពីមុនច្រើន។ ដោយប្រើពេលវេលាត្រឹមតែ 40ឆ្នាំប៉ុណ្ណោះ ជីវិតរស់នៅរបស់ប្រជាជនចិនល្អប្រសើឡើងខ្លាំងណាស់ មនុស្សភាគច្រើន មានផ្ទះសំបែងជារបស់ខ្លួនឯង រឿងខ្វះខាតអត់ឃ្លាន បានរលត់បាត់អស់…ពេលនេះចំណោទធំរបស់ចិន គឺការគ្រប់គ្រង និងការជួយសង្គ្រោះមនុស្សលំដាប់ថ្នាក់ក្រោមបំផុត ឱ្យមានហូប មានចុក រស់នៅបានសុខស្រួល មានមុខរបរអាជីពដែលនឹងនរ និងមានកន្លែងឈរនៅក្នុងសង្គមយ៉ាងស្ថិតស្ថេរ៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

July 21, 2020

ក្រុមហ៊ុន Ant Group របស់មហាសេដ្ឋី Jack Ma នឹងធ្វើ IPO ទាំងនៅហុងកុងនិងសៀងហៃ

ក្រុមហ៊ុន Ant Group ដែលជាអ្នកគ្រប់ពីលើក្រុមហ៊ុន Alipay កំពុងតែស្វែងរកកម្រិតនៃការកំណត់តម្លៃឡើងដល់2សែនលានដុល្លារអាមេរិក ជាមួយនឹងគម្រោង IPO ព្រមៗគ្នានៅទីក្រុងហុងកុង និងនៅទីក្រុងសៀងហៃ។

Alibaba ដែលជាក្រុមហ៊ុនមេរបស់ក្រុមហ៊ុន Ant Group កំពុងអនុវត្តផែនការនាំយកក្រុមហ៊ុនទូទាត់ចល័តធំបំផុតនៅប្រទេសចិន ចូលទៅក្នុងផ្សារមូលបត្រហុងកុង និងសៀងហៃ ដែលនេះត្រូវបានគេរំពឹងថានឹងក្លាយជាព្រឹត្តិការណ៍ IPO (ការបោះផ្សាយលក់មូលបត្រដំបូង/Initial public offering or stock market launch) ធំបំផុតប្រចាំឆ្នាំ2020។ ក្រុមហ៊ុន Ant Group អាចមានតម្លៃទុនខ្ពស់ជាងច្រើនបើធៀបនឹងក្រុមហ៊ុននៅ Wall Street។ ប្រភពអនាមិករបស់សារព័ត៌មាន Bloomberg បានឱ្យដឹងថា បើសិនជាមានលក្ខណអំណោយផល Ant Group អាចប្រមូលទុនបានលើសពីកំណត់ត្រា29ពាន់លានដុល្លាររបស់ក្រុមហ៊ុន Saudi Aramco ទៀតផង។

“មាន់ពងមាស” របស់ Alibaba កំពុងតែរីកចម្រើនយ៉ាងខ្លាំងក្លា។ Simon Hu ដែលជា CEO របស់ក្រុមហ៊ុន Ant Group បានថ្លែងថា លោកចង់ឱ្យគ្រប់គ្នាគិតដល់ Alipay មិនត្រឹមតែជាអ្នកផ្គត់ផ្គង់សេវាកម្មហិរញ្ញវត្ថុ និងសេវាទូទាត់សម្រាប់ពាណិជ្ជកម្មអេឡិចត្រនិចធំបំផុតរបស់ពិភពលោកនោះទេ ប៉ុន្តែ Ant Group បាននិងកំពុងអភិវឌ្ឍខ្លួនដើម្បីក្លាយជាមជ្ឈមណ្ឌលពាណិជ្ជកម្មអនឡាញដែលមានសេវាកម្មគ្រប់បែបសព្វយ៉ាង តាំងពីឥណទាន ទេសចរណ៍ រហូតដល់សេវាដឹកជញ្ជូនអាហារ ដែលជាគូប្រជែងដ៏ “សាហាវ” របស់ក្រុមហ៊ុន Tencent។

ក្រុមហ៊ុន Ant កំពុងតែពង្រីកវិសាលភាពយ៉ាងឆាប់រហ័សនៅពាសពេញទ្វីបអាស៊ី ក្នុងនោះមានការសហការនិងផ្ដល់ជំនាញទាក់ទិននឹងការគ្រប់គ្រងទ្រព្យ និងគ្រប់គ្រងហានិភ័យទៅឱ្យបណ្ដាក្រុមហ៊ុនផ្គត់ផ្គង់សេវាកម្មទូទាត់បែបបច្ចេកវិទ្យានៅប្រទេសជាច្រើន ដូចជាឥណ្ឌា និងប្រទេសថៃជាដើម។

ក៏ប៉ុន្តែ លោក Pamela Chung អ្នកជំនាញផ្នែក IPO មកពីក្រុមហ៊ុន Tricor Group ប្រចាំហុងកុង បានអះអាងថា “បើទោះជាមានប្រភពទុនសម្បូរបែប ប៉ុន្តែគេនៅមិនទាន់ដឹងច្បាស់ថា អ្នកវិនិយោគនឹងវាយតម្លៃយ៉ាងណាចំពោះ Ant Group នៅឡើយ ព្រោះថា នៅក្នុងផ្សារហ៊ុន មានក្រុមហ៊ុនបច្ចេកវិទ្យាច្រើនណាស់”។

ការសម្រេចចិត្តរបស់ក្រុមហ៊ុន Ant គឺជាជោគជ័យថ្មីសម្រាប់សន្ទស្សន៍ STAR ដែលមានជំនាញខាងមូលបត្របច្ចេកវិទ្យារបស់ទីក្រុងសៀងហៃ ដែលដូចទៅនឹងសន្ទស្សន៍ Nasdaq នៅសហរដ្ឋអាមេរិក។

ការសម្រេចខាងលើក៏ជួយឱ្យផ្សារហ៊ុនហុងកុង អូសទាញក្រុមមូលបត្របច្ចេកវិទ្យា ក្រោយពីបានបាត់បង់ឱកាសទទួលយកបណ្ដាក្រុមហ៊ុនបច្ចេកវិទ្យាធំបំផុតរបស់ចិន ដូចជា Alibaba (Alibaba កាន់កាប់ភាគហ៊ុនចំនួន1ភាគ3នៅក្នុងក្រុមហ៊ុន Ant) ជាដើម ដោយបានបណ្ដោយឱ្យធ្លាក់ទៅក្នុងដៃផ្សារហ៊ុន New York។

យោងតាមរបាយការណ៍របស់ Alibaba ក្រុមហ៊ុន Ant ត្រូវបានកំណត់តម្លៃ 150ពាន់លានដុល្លារនៅក្នុងការប្រមូលទុនលើកចុងក្រោយ។ ក្រុមហ៊ុននេះ រកបានប្រាក់ចំណេញ2ពាន់លានដុល្លារក្នុងត្រីមាសទី4នៃឆ្នា2019។ ដូចទៅនឹង Alibaba ក្រុមហ៊ុន Ant បានជួបការលំបាកខ្លាំងក្នុងការពង្រីងសកម្មភាពនៅសហរដ្ឋអាមេរិក ដោយសារតែភាពតានតឹងផ្នែកនយោបាយរវាងចិនជាមួយនឹងសហរដ្ឋអាមេរិក។ កាលពីឆ្នាំ2018 មហាសេដ្ឋី Jack Ma ធ្លាប់បានថ្លែងថា ការសន្យាបង្កើតការងារចំនួន1លាននៅសហរដ្ឋអាមេរិករបស់លោក មិនអាចអនុវត្តបានឡើយ ព្រោះតែសង្គ្រាមពាណិជ្ជកម្មរវាង “មហាយក្សចិន និងមហាយក្សអាមេរិក”។

ជំនួសមកវិញ Ant បានប្ដូរទិសដៅរបស់ខ្លួន ដោយមានមហិច្ឆតាកសាងវត្តមាននៅលើទ្វីបអាស៊ី ជាកន្លែងដែល Ant កំពុងឈរក្នុងលំដាប់លេខរៀងទី10 បន្ទាប់ពីបណ្ដាក្រុមហ៊ុនផ្ដល់សេវាទូទាត់ធំៗនៅទីនេះ ក្នុងនោះមាន Paytm នៅឥណ្ឌា និង GCash នៅហ្វីលីពីន។

នៅក្នុងប្រទេសចិន Ant បានពង្រីកវិសាលភាពរបស់ខ្លួនទៅក្នុងវិស័យសេវាកម្មអ្នកប្រើប្រាស់ និងបច្ចេកវិទ្យា។ ដំណោះស្រាយរបស់ក្រុមហ៊ុន Ant រួមមាន សេវាកម្ម cloud computing បញ្ហាសិប្បនិម្មិត blockchain និងគ្រប់គ្រងហានិភ័យ ដោយមានអតិថិជនសំខាន់ៗដូចជា KFC Holdings និង Marriott International ជាដើម។

លោក Simon Hu កំពុងតែដាក់ការផ្នល់ថា បណ្ដាយុទ្ធសាស្ត្រខាងលើ នឹងជួយឱ្យ Ant រក្សាការគ្រប់គ្រងទៅលើទីផ្សារទូទាត់ចល័តដែលមានតម្លៃ29លានលានដុល្លារអាមេរិករបស់ប្រទេសចិន។ ក្រុមហ៊ុន iResearch បានឱ្យដឹងថា ទីផ្សារទូទាត់ចល័តរបស់ Alipay នឹងកើនឡើងនៅក្នុងត្រីមាសចំនួន3ជាបន្តបន្ទាប់ខាងមុខ ដោយសារវាបានកើនឡើង55,1% ក្នុងត្រីមាសទី4នៃឆ្នាំ2019 ខណៈដែល Tencent កាន់កាប់38.9% នៃចំណែកទីផ្សារនៅប្រទេសចិន។

Ant ក៏បានធ្វើពិធិធកម្មលើសកម្មភាពពាណិជ្ជកម្មរបស់ខ្លួន ទៅក្នុង “តំបន់” ដែលមិនសូវមានការ “រសើបខ្លាំង” បន្ទាប់ពីក្រុមហ៊ុននេះត្រូវបានអាជ្ញាធរតាមដានទាក់ទិននឹងការពង្រីកសេវាកម្មហិរញ្ញវត្ថុជាមួយនឹងផលិតផលក្នុងស្រុក។ ដើម្បីបង្ហាញអំពីការប្ដូផ្លាស់ Ant បានប្ដូរឈ្មោះពី Ant Financial Services Group ទៅជា Ant Group កាលពីខែឧសភាកន្លងទៅ៕

ប្រភព៖ Bloomberg

July 21, 2020

កម្ពុជារកឃើញអ្នកផ្ទុកCOVID-19 ចំនួន26នាក់ទៀតហើយ សម្រាប់ថ្ងៃទី21កក្កដានេះ

ក្រសួងសុខាភិបាលកម្ពុជានាព្រឹកនេះបានប្រកាសឱ្យដឹងថា បានរកឃើញអ្នកផ្ទុកវីរុសCOVID-19 ចំនួន26នាក់ទៀត ដែលទាំងនេះគឺជាករណីនាំចូល។

ករណីរកឃើញថ្មីទាំង26នាក់នេះ ត្រូវបានក្រសួងសុខាភិបាលបានបញ្ជាក់ថា គឺជាអ្នកដំណើរដែលវិលត្រលប់មកពីប្រទេសរុស្ស៊ី និងប្រទេសអេហ្ស៊ីប។ ដូច្នេះ គិតមកដល់ព្រឹកថ្ងៃទី21កក្កដានេះ កម្ពុជាបានរកឃើញអ្នកផ្ទុកវីរុសCOVID-19 សរុប197នាក់ ក្នុងនោះ អ្នកជំងឺដែលបានជាសះស្បើយមានចំនួន140នាក់ ខណៈដែលអ្នកជំងឺកំពុងសម្រាកព្យាបាលក្នុងមន្ទីរពេទ្យ មានចំនួន55នាក់។

ក្នុងចំណោមករណីទាំង55នាក់ដែលកំពុងទទួលការព្យាបាល មាន7នាក់នៅមន្ទីរពេទ្យខ្មែរ-សូវៀត និង48នាក់នៅមជ្ឈមណ្ឌលសុខភាពចក្រអង្រែ ក្នុងរាជធានីភ្នំពេញ៕

July 21, 2020

Author: សឿន សំណាង