សឿន សំណាង - La Reine Media

George Floyd! វីដេអូថ្មី បង្ហើបអំពីទិដ្ឋភាពមិនធ្លាប់បានឃើញក្នុងគ្រាប៉ូលិសចាប់ខ្លួនបុរសស្បែកខ្មៅរូបនេះ

ព័ត៌មានស្ដីអំពី George Floyd ដែលជាបុរសស្បែកខ្មៅម្នាក់ត្រូវបានប៉ូលិសយកជង្គង់សង្កត់ករហូតដល់ស្លាប់កាលពីថ្ងៃទី25ឧសភា នៅក្នុងទីក្រុង Minneapolis នៃរដ្ឋ Minnesota ដោយសារជាប់សង្ស័យថាបានប្រើប្រាស់លុយក្លែងក្លាយ ពេលនេះនៅលើទំព័រសារព័ត៌មាននានា មានការចុះផ្សាយវីដេអូថ្មីបំផុតដែលបង្ហើបឱ្យឃើញអំពីទិដ្ឋភាពមិនធ្លាប់បានដឹងក្នុងគ្រាប៉ូលិសចាប់ខ្លួនបុរសស្បែកខ្មៅរូបនេះ។

លោក Floyd អាយុ46ឆ្នាំ ត្រូវបានប៉ូលិស4នាក់ចាប់ខ្លួនកាលពីថ្ងៃទី25ឧសភា ក្រោមបទចោទថាបានប្រើប្រាស់ប្រាក់ក្លែងក្លាយ។ មន្ត្រីប៉ូលិសម្នាក់ឈ្មោះ Derek Chauvin បានយកជង្គង់សង្កត់ទៅលើកគល់កផ្នែកខាងក្រោយរបស់ Floyd ក្នុងរយៈពេល9នាទី បើទោះជាបុរសនេះបានស្រែកអង្វរ និងនិយាយថា “ខ្ញុំមិនអាចដកដង្ហើម” យ៉ាងណាក៏ដោយ។ លោក Floyd បានបាត់បង់ជីវិត នៅក្នុងមន្ទីរពេទ្យ។

ករណីនេះបានធ្វើឱ្យមានបាតុកម្មរាប់មិនអស់នៅទូទាំងសហរដ្ឋអាមេរិក រួមនឹងបាតុកម្មជាច្រើននៅក្រៅប្រទេស ក្នុងនោះមានទាំងបាតុកម្មអហិង្សា និងហិង្សាផងដែរ។

វីដេអូថ្មីនេះ បានបង្ហាញអំពីទិដ្ឋភាពទាំងមូលនៃសកម្មភាព17នាទីចុងក្រោយរបស់ជីវិតលោក Floyd។ សូមទស្សនាវីដេអូខាងក្រោម៖

ប្រភព៖ Nypost

August 11, 2020

ក្រុមហ៊ុនជប៉ុនលក់ដុំថ្មដែលរើសពីផ្លូវដែក ដើម្បីបញ្ចៀសការក្ស័យធន ព្រោះតែជួបការលំបាកក្នុងសម័យCOVID-19

ក្រុមហ៊ុនគ្រប់គ្រងផ្លូវដែកនៅក្នុងខេត្ត Chiba កំពុងតែប្រឹងប្រែងបញ្ចៀសការខាតបង់ក្នុងសម័យCOVID-19 ដោយការលក់ដុំថ្មដែលរើសពីផ្លូវដែកដែលពួកគេកំពុងគ្រប់គ្រង។

ត្រូវបានបង្កើតឡើងកាលពីឆ្នាំ1923 ក្រុមហ៊ុន Choshi Electric Railway នៅខេត្ត Chiba ប្រទេសជប៉ុន បានឆ្លងកាត់ការលំបាកជាច្រើនលើកក្នុងប្រវត្តិ97ឆ្នាំរបស់ក្រុមហ៊ុន។ ប៉ុន្តែកន្លងមក ពុំដែលមានស្ថានការណ៍ណាមួយដែលមានសភាពធ្ងន់ធ្ងរដូចពេលនេះឡើយ នៅក្នុងគ្រាដែលវិស័យទេសចរណ៍ត្រូវធ្លាក់ចុះយ៉ាងជ្រៅព្រោះតែឥទ្ធិពលរបស់COVID-19។

គណៈគ្រប់គ្រងផ្លូវដែកបានលើកឡើងអំពីវិធីនានាដើម្បីបង្កើតចំណូល ក្នុងនោះគំនិតមួយស្ដីអំពីការលក់ដុំថ្មដែលវេចខ្ចប់ក្នុងប្រអប់នៅលើ Youtube កំពុងតែបង្ហាញអំពីកម្លាំងទាកទាញចំណាប់អារម្មណ៍យ៉ាងខ្លាំងក្លានាបច្ចុប្បន្ន។

ឆាណែល Youtube របស់ក្រុមហ៊ុន Choshi Electric ត្រូវបានបង្កើតឡើងកាលពីជាង4ឆ្នាំមុន ហើយបច្ចុប្បន្ន កំពុងបង្កការចាប់អារម្មណ៍យ៉ាងខ្លាំងនៅលើបណ្ដាញសង្គមមួយនេះ។ ក្រុមទទួលខុសត្រូវផ្នែកខ្លឹមសារ បានបង្កើតវីដេអូកំប្លែងជាច្រើន ដែលមានចំណងជើងប្លែកៗ ដូចជា “នៅមុនពេលក្ស័យធន” ឬ “ស្ថានភាពជាក់ស្ដែងនៃក្រុមហ៊ុនក្ស័យធន” ជាដើម ដែលនេះបានទាក់ទាញទស្សនិកជនរាប់ពាន់នាក់ចូលទស្សនា។

ផលិតផលដែលត្រូវបានឧទ្ទេសនាមនៅក្នុងវីដេអូកាលពីពេលថ្មីៗនេះ នោះគឺដុំថ្មនៅលើផ្លូវដែកដែលត្រូវបានគេវេចខ្ចប់យ៉ាងស្អាត។ បុគ្គលិករបស់ក្រុមហ៊ុន បានឱ្យដឹងថា ដុំថ្មទាំងនេះមានប្រយោជន៍ច្រើនសម្រាប់អតិថិជន ដូចជា អាចសង្កត់ក្រដាសមិនឱ្យប៉ើងពេលកំពុងធ្វើការនៅកន្លែងដែលមានខ្យល់ អាចធ្វើជាវត្ថុអនុស្សាវរីយ៍សម្រាប់អ្នកដែលចូលវិស័យផ្លូវដែក ហើយវាក៏អាចយកមកប្រើប្រាស់សម្រាប់ទប់ទល់នឹងចោរផងដែរ។

ការឃោសនាផ្សាយផលិតផលរបស់បុគ្គលិក បានបង្កើតជាសម្លេងសើចយ៉ាងសប្បាយសម្រាប់អ្នកកំពុងទស្សនា។ ប៉ុន្តែ ខាងក្រុមហ៊ុនបាននិយាយថា នេះមិនមែនជារឿងកំប្លែងឡើយ។ ផលិតផលជាដុំថ្មទាំងនេះ ពិតជាមាននៅលើហាងអនឡាញ Choshi Electric Railway ដោយវាមានតម្លៃ1,650យេន (15.5ដុល្លារអាមេរិក) ក្នុងមួយប្រអប់ ហើយវាបានក្លាយជាផលិតផលដែលត្រូវបានលក់ដាច់បំផុតរបស់ក្រុមហ៊ុននេះ។

ភាគីខាងក្រុមហ៊ុនបានឱ្យដឹងថា ផលិតផលជាដុំថ្មនេះត្រូវបានរើសពីផ្លូវដែកដែលក្រុមហ៊ុននេះកំពុងគ្រប់គ្រង។ ពួកវាត្រូវបានលាង និងសម្អាតមេរោគយ៉ាងត្រឹមត្រូវ មុននឹងវេចខ្ចប់យ៉ាងស្រស់ស្អាត។ ទំហំនៃប្រអប់ផលិតផល នឹងអាស្រ័យទៅលើទំហំ និងបរិមាណនៃដុំថ្ម។

ក្រុមហ៊ុនខាងលើនេះក៏មានលក់វត្ថុអនុស្សាវរីយ៍សម្រាប់អ្នកដែលមានចំណូលចិត្តខាងវិស័យរថភ្លើងផងដែរ ក្នុងនោះមានដូចជា កៅអីសម្រាប់អង្គុយក្នុងរថភ្លើង និងដែកគោលសម្រាប់ប្រើក្នុងវិស័យផ្លូវដែកជាដើម។ ប៉ុន្តែ ផលិតផលដុំថ្មដាក់ប្រអប់កំពុងទទួលបានការបញ្ជាទិញច្រើនជាងគេបង្អស់។

គំនិតជំនួញខាងលើនេះ ស្ដាប់ទៅ វាហាក់ដូចជារឿងកំប្លែង ប៉ុន្តែវាមិនមែនជារឿងឆ្កួតឡប់នោះឡើយ។ មុននេះ អ្នកជំនួញម្នាក់នៅសហរដ្ឋអាមេរិក ឈ្មោះ Gary Ross Dahl (បានស្លាប់កាលពីឆ្នាំ2015) ក៏ធ្លាប់រកបានប្រាក់រាប់លានដុល្លារនៅពេលបង្កើតបាននិន្នាការចិញ្ចឹមសត្វជាដុំថ្មកាលពីទសវត្សរ៍ទី70 ។ គំនិតចិញ្ចឹមសត្វជាដុំថ្មនេះ ក៏បានធ្វើឱ្យមានចំណាប់អារម្មណ៍នៅទូទាំងពិភពលោកផងដែរ៕

ប្រភព៖ ODC

August 11, 2020

កូនភព Ceres លាក់មហាសមុទ្រនៅក្រោមស្រទាប់ដី! នេះជារបកគំហើញថ្មីរបស់អាមេរិកនិងអឺរ៉ុប

លទ្ធផលនៃការសិក្សាស្រាវជ្រាវថ្មីមួយបានបង្ហាញថា វត្ថុអវកាសធំបំផុតក្នុងតំបន់ខ្សែក្រវាត់អាចម៍ផ្កាយដែលស្ថិតនៅចន្លោះពិភពព្រះអង្គារនិងពិភពព្រហស្បតិ៍ គឺជា “ពិភពមហាសមុទ្រ” មួយ។

ការរកឃើញនេះត្រូវបានអង្គការ NASA ប្រកាសឱ្យដឹងកាលពីថ្ងៃទី10សីហាកន្លងទៅ ក្រោយពីបានវិភាគទៅលើរូបភាពគុណភាពច្បាស់កម្រិតខ្ពស់ស្ដីអំពីផ្ទៃខាងលើរបស់កូនភព Ceres ដែលថតដោយយានរុករក Dawn។ មុននេះ Ceres តែងត្រូវបានគេចាត់ទុកថាជាដុំថ្មអាចម៍ផ្កាយដ៏សោះកក្រោះមួយនៅក្នុងលម្ហអវកាសតែប៉ុណ្ណោះ។

ក្រុមអ្នកវិទ្យាសាស្ត្រដែលធ្វើការលើរឿងនេះ រួមមានអ្នកជំនាញមកពីសហរដ្ឋអាមេរិក និងអឺរ៉ុប។ ពួកគេបានផ្ដោតការពិនិត្យទៅលើមាត់ភ្នំភ្លើង Occator ដែលមានអាយុកាល20លានឆ្នាំ។ តាមរយៈការប្រើប្រាស់រូបភាពអ៊ីនហ្វ្រារ៉េដដែលយានរុករកថតបានពីលើកម្ពស់ប្រហែល35គីឡូម៉ែត្រធៀបនឹងផ្ទៃរបស់កូនភព ក្រុមអ្នកវិទ្យាសាស្ត្របានរកឃើញវត្តមានរបស់ hydrohalite ដែលជាសមាសធាតុមាននៅក្នុងទឹកកកសមុទ្រ។ សមាសធាតុ hydrohalite នេះ កន្លងមកត្រូវបានគេរកឃើញនៅលើភពផែនដីតែប៉ុណ្ណោះ។

អ្នកស្រាវជ្រាវ Maria Cristina De Sanctis មកពីមន្ទីរតារាវិទ្យាជាតិនៃប្រទេសអ៊ីតាលី បានបកថ្លែងថា៖ “ពេលនេះយើងអាចនិយាយបានថា Ceres គឺជាពិភពមហាសមុទ្រ ដោយមានបឹងផ្ទុកទឹកសមុទ្រនានានៅខាងក្រោមផ្ទៃរបស់វា។ Hydrohalite គឺជាសញ្ញាដ៏ច្បាស់លាស់មួយបញ្ជាក់ថា កូនភពនេះមានទឹក”។

ក្រុមអ្នកវិទ្យាសាស្ត្រឱ្យដឹងដែរថា អណ្ដូងរ៉ែអំបិលទាំងឡាយនៅលើផ្ទៃរបស់កូនភព Ceres ទំនងជាត្រូវបានកកើតឡើងបន្តិចម្ដងៗក្នុងអំឡុង2លានឆ្នាំកន្លងមកហើយ។ ប្រការនេះក៏បង្ហាញថា ទឹកសមុទ្រនៅតែអាចត្រូវបានរុញឡើងពីខាងក្នុងកូនភព។ ដោយការវិភាគទៅលើរូបភាពនៃមាត់ភ្នំភ្លើង Occator អ្នកវិទ្យាសាស្ត្រក៏បានរកឃើញដំបូក និងកូនភ្នំជាច្រើន ដែលនេះទំនងជាត្រូវបានបង្កើតឡើងនៅពេលទឹកបាញ់ចេញពីក្រោមដី ដោយសារឥទ្ធិពលនៃការប៉ះទង្គិចជាមួយអាចម៍ផ្កាយផ្សេងៗ ហើយក្រោយមកក៏ត្រូវកកជាទឹកកក។

អ្នកវិទ្យាសាស្ត្រ De Sanctis សង្កត់ធ្ងន់ថា៖ “ធាតុរ៉ែទាំងឡាយដែលត្រូវបានរកឃើញនៅលើកូនភព Ceres មានដូចជា hydrohalite ជាដើម ពិតជាមានសារសំខាន់ទាក់ទិននឹងតារាជីវសាស្ត្រ ដោយសារពួកវាចាំបាច់សម្រាប់វត្តមាននៃជីវិត”។

លទ្ធផលនៃការសិក្សាស្រាវជ្រាវខាងលើនេះត្រូវបានចុះផ្សាយនៅលើទស្សនាវដ្ដី Nature Astronomy, Nature Geoscience និងទស្សនាវដ្ដី Nature Comunications៕

ប្រភព៖ AFP

August 11, 2020

CEO របស់ Apple ក្លាយជាមហាសេដ្ឋីពិភពលោក

ទ្រព្យសម្បត្តិរបស់ CEO នៃក្រុមហ៊ុន Apple បានកើនឡើងលើសពី1ពាន់លានដុល្លារ នៅពេលដែលតម្លៃទុនសរុបរបស់ Apple កើនឡើងជិតដល់2លានលាន (2,000,000,000,000.00)ដុល្លារអាមេរិក នេះបើតាមការគណនារបស់ Bloomberg។

បញ្ចប់ការជួញដូរកាលពីម្សិលមិញ (10សីហា) មូលបត្រ Apple បានកើន1.45%។ កាលពីសប្ដាហ៍មុន កូដមូលបត្រនេះក៏បានកើន5%ផងដែរ។ រយៈពេល9ឆ្នាំ ក្រោយពីលោក Steve Jobs បានទុកតំណែង CEO ឱ្យលោក Tim Cook តម្លៃទុនរបស់ Apple បានកើនឡើងដល់ចំណុចកំពូលបំផុតមិនធ្លាប់មានពីមុនមក ដោយមាន 1.93លានលានដុល្លារ។ នៅពេលលោក Steve Jobs ស្លាប់ តួលេខនេះមានត្រឹមតែ350ពាន់លានដុល្លារប៉ុណ្ណោះ។

យោងតាមការគណនារបស់ Bloomberg មកដល់បច្ចុប្បន្ន ទ្រព្យសម្បត្តិរបស់លោក Tim Cook ក៏បានកើនឡើងដល់ជាង1ពាន់លានដុល្លារអាមេរិក។ ឆ្នាំ2015 CEO រូបនេះធ្លាប់បានប្រកាសថា នឹងយកទ្រព្យមួយចំនួនធំរបស់លោកទៅធ្វើកិច្ចការមនុស្សធម៌។ គិតមកដល់ថ្ងៃនេះ លោក Tim Cook បានបរិច្ចាគភាគហ៊ុនរបស់លោករាប់លានដុល្លារដែលមាននៅក្នុងក្រុមហ៊ុន Apple។

បច្ចុប្បន្ន លោក Tim Cook កាន់កាប់មូលបត្រជិត850,000ហ៊ុននៅក្នុងក្រុមហ៊ុន Apple ដែលតួលេខនេះប្រហាក់ប្រហែលនឹង 0.02% នៃភាគហ៊ុនសរុបរបស់ក្រុមនេះ និងមានតម្លៃ375ដុល្លារអាមេរិក។ ក្រៅពីនេះ ទ្រព្យដែលបានមកពីការលក់ភាគហ៊ុន ភាគលាភ រួមនឹងខ្ទង់ចំណូលដទៃទៀតសរុបប្រមាណជា650លានដុល្លារ។ ដូច្នេះ ទ្រព្យសរុបរបស់លោក Tim Cook បច្ចុប្បន្នមានចំនួន1.025ពាន់លានដុល្លារ៕

ប្រភព៖ Bloomberg

August 11, 2020

ញាប់ញ័រ! លោកត្រាំ គេចចេញពីបន្ទប់ថ្លែងព័ត៌មាន ក្រោយមានហេតុការណ៍បាញ់គ្នានៅក្រៅសេតវិមាន

លោកប្រធានាធិបតី ដូណាល់ ត្រាំ នៃសហរដ្ឋអាមេរិក ត្រូវបានក្រុមអង្គរក្សប្រធានាធិបតី ឬអង្គភាព Secret service នាំខ្លួនចេញពីបន្ទប់ថ្លែងព័ត៌មានយ៉ាងប្រញាប់ប្រញាល់ កាលពីថ្ងៃម្សិលមិញ(ទី10សីហា) បន្ទាប់ពីមានកើតហេតុការណ៍បាញ់ប្រហារគ្នានៅខាងក្រៅមន្ទីរសេតវិមាន។

លោក ដូណាល់ ត្រាំ កំពុងឈរនៅលើផូឌៀម និងថ្លែងបញ្ជាក់ពីរឿងទីផ្សារភាគហ៊ុន ក្នុងខណៈដែលមន្ត្រីអង្គភាព Secret service ម្នាក់ បានចូលមកបញ្ឈប់ និងអញ្ជើញលោកប្រធានាធិបតីចេញពីបន្ទប់ ចំណែករដ្ឋមន្ត្រីក្រសួងហិរញ្ញវត្ថុ លោក ស្ទីវេន មនូឈីន និងអគ្គនាយកផ្នែកថវិកា រ៉ាស់ វ៉ត ក៏ត្រូវបាននាំចេញពីបន្ទប់ថ្លែងព័ត៌មានដូចគ្នាដែរ។

ជាច្រើននាទីបន្តមកទៀត មេដឹកនាំសហរដ្ឋអាមេរិក បានត្រឡប់ចូលមកក្នុងបន្ទប់ថ្លែងព័ត៌មានសាជាថ្មីម្ដងទៀត និងបានថ្លែងបញ្ជាក់ថា អាជ្ញាធរមានសមត្ថកិច្ចបានបាញ់កាំភ្លើងដើម្បីរារាំងបុគ្គលម្នាក់ដែលមានអាវុធក្នុងដៃ និងក្រោយមក បាននាំបុគ្គលម្នាក់នោះទៅមន្ទីរពេទ្យហើយ។

លោកត្រាំ បានប្រាប់អ្នកសារព័ត៌មានទាំងអស់ថា “មានការបាញ់គ្នាមួយ បានកើតឡើងនៅខាងក្រៅមន្ទីរសេតវិមាន ហើយពេលនេះមើលទៅដូចជាអាចគ្រប់គ្រងស្ថានការណ៍បានហើយ តែមានការបាញ់គ្នាកើតឡើងមែន និងមានមនុស្សម្នាក់ត្រូវបាននាំខ្លួនទៅមន្ទីរពេទ្យ ខ្ញុំមិនទាន់ដឹងថា អាការគេ យ៉ាងណាទៅហើយទេ”

លោកត្រាំ ថែមទាំងប្រាប់ទៀតថា ចំណុចដែលមានការបាញ់គ្នានោះ ស្ថិតនៅជិតរបងខាងក្រៅមន្ទីរសេតវិមាន។

អង្គភាព Secret service បានថ្លែងឱ្យដឹងតាមរយៈប្រព័ន្ធធ្វីតធើរថា “យើងកំពុងស៊ើបសួរមន្ត្រីអង្គភាព Secret service ដែលពាក់ព័ន្ធនឹងហេតុការណ៍បាញ់គ្នានេះ…បុរសដែលជាជនសង្ស័យ និងមន្ត្រីអង្គភាព Secret service ត្រូវបាននាំខ្លួនទៅមន្ទីរពេទ្យទាំង 2នាក់ តែយើងសូមអះអាងថា គ្មាននរណាសម្រុកចូលមកក្នុងទីតាំងមន្ទីរសេតវិមាន និងគ្មានអ្នកដែលត្រូវបានការពារណាម្នាក់បានទទួលគ្រោះថ្នាក់ឡើយ”

ទ្វារបន្ទប់ថ្លែងព័ត៌មានរបស់មន្ទីរសេតវិមាន ត្រូវបានចាក់សោបិទដោយស្វ័យប្រវត្តិភ្លាមៗ ក្រោយពីមន្ត្រីអង្គភាព Secret service បាននាំលោកត្រាំចេញផុត។

មេដឹកនាំសហរដ្ឋអាមេរិក បានថ្លែងកោតសរសើរក្រុមអង្គរក្ស ដែលបានប្រតិបត្តិតួនាទីឃុំគ្រងការពាររូបលោកយ៉ាងឆាប់រហ័ស និងបានបញ្ជាក់ថា ខាងអង្គភាព Secret service នឹងថ្លែងព័ត៌មានលម្អិតអំពីរឿងនេះឱ្យបានដឹង នៅពេលក្រោយ៕

ប្រភព៖ សារព័ត៌មានបរទេស

August 11, 2020

រុស្ស៊ីចាប់ផ្ដើមប្រើប្រាស់សាកល្បងវ៉ាក់សាំងទប់ស្កាត់វីរុសCOVID-19 នៅហ្វីលីពីន

ប្រទេសរុស្ស៊ីនឹងផ្ដើមប្រើប្រាស់សាកល្បងវ៉ាក់សាំងទប់ស្កាត់ COVID-19 នៅក្នុងប្រទេសហ្វីលីពីន ចាប់ពីពាក់កណ្ដាលខែសីហា2020 ក្នុងនោះ ប្រធានាធិបតីហ្វីលីពីននឹងអាចក្លាយជាអ្នកស្ម័គ្រចិត្តដំបូងគេបង្អស់។

ថ្លែងនៅចំពោះមុខអ្នកយកព័ត៌មាន លោក Kirill Dmitriev ដែលជាប្រធានមូលនិធិវិនិយោគផ្ទាល់របស់រុស្ស៊ី (RDIF) បានឱ្យដឹងថា ជាប្រទេសមួយក្នុងចំណោមប្រទេសជាដៃគូរបស់រុស្ស៊ីក្នុងការស្រាវជ្រាវនិងអភិវឌ្ឍវ៉ាក់សាំងទប់ស្កាត់COVID-19 រដ្ឋាភិបាលហ្វីលីពីនបានបង្កភាពងាយស្រួលជាច្រើនដើម្បីជួយឱ្យការសាកល្បងវ៉ាក់សាំង អាចធ្វើឡើងបានយ៉ាងឆាប់រហ័សតាមដែលអាចធ្វើបាន។ បច្ចុប្បន្ន ដំណាក់កាលនៃការត្រៀមសម្រាប់ការសាកល្បងនានាត្រូវបានរៀបចំរួចរាល់ហើយ។ តាមគម្រោង ការសាកល្បងប្រើប្រាស់វ៉ាក់សាំងCOVID-19នេះ នឹងត្រូវផ្ដើមធ្វើឡើងចាប់ពីថ្ងៃទី15សីហាខាងមុខ។

ទាក់ទិននឹងការសាកល្បងប្រើប្រាស់វ៉ាក់របស់រុស្ស៊ីខាងលើនេះ ប្រធានាធិបតីហ្វីលីពីន លោក Rodrigo Duterte បានឱ្យដឹងថា លោកមានក្ដីសង្ឃឹមយ៉ាងច្រើនទៅលើលទ្ធផលនៃការប្រើប្រាស់សាកល្បងវ៉ាក់សាំងរបស់រុស្ស៊ី។ ទន្ទឹមនឹងនេះ លោកក៏បានថ្លែងថា ខ្លួនលោកផ្ទាល់បានត្រៀមជាស្រេចដើម្បីធ្វើជាអ្នកស្ម័គ្រចិត្តដំបូងគេបង្អស់ក្នុងការសាកល្បងប្រើប្រាស់វ៉ាក់សាំងនេះនៅហ្វីលីពីន។ តាមផែនការ បើសិនជាទទួលបានជោគជ័យ វ៉ាក់សាំងនេះក៏នឹងត្រូវបានចែកចាយនៅក្នុងប្រទេសហ្វីលីពីនជាមួយនឹងតម្លៃសមរម្យ។

លោក Kirill Dmitriev ដែលជាប្រធានមូលនិធិវិនិយោគផ្ទាល់របស់រុស្ស៊ី RDIF (Russian Direct Investment Fund)

មូលនិធិវិនិយោគផ្ទាល់ និងមជ្ឈមណ្ឌលស្រាវជ្រាវ Gamaleya កំពុងតែញាប់ដៃញាប់ជើងក្នុងកិច្ចសហការនានាសម្រាប់ដំណាក់កាលផលិតវ៉ាក់សាំងCOVID-19 ដែលបច្ចុប្បន្នស្ថិតក្នុងដំណាក់កាលប្រើប្រាស់សាកល្បងនៅលើមនុស្ស។ ការសាកល្បងប្រើវ៉ាក់សាំងនៅលើមនុស្ស បានចាប់ផ្ដើមធ្វើឡើងនៅសាកលវិទ្យាល័យ Sechenov កាលពីថ្ងៃទី18មិថុនា ជាមួយនឹងអ្នកស្ម័គ្រចិត្តចំនួន38នាក់ ហើយសុវត្ថិភាពរបស់វ៉ាក់សាំងនេះក៏ត្រូវបានទទួលស្គាល់។ អ្នកស្ម័គ្រចិត្តទាំងអស់ សុទ្ធតែមានលទ្ធភាពទប់ទល់នឹងវីរុសCOVID-19 បន្ទាប់ពីបានចាក់វ៉ាំងសាំងនេះ៕

ប្រភព៖ សារព័ត៌មានបរទេស

August 11, 2020

កម្ពុជារកឃើញករណីវិជ្ជមានជាមួយនឹងCOVID-19 ថ្មី ចំនួន15នាក់ ខណៈពិភពលោករកឃើញ7,634នាក់ នៅក្នុងរយៈពេល24ម៉ោងចុងក្រោយនេះ

ក្រសួងសុខាភិបាលកម្ពុជា នាព្រឹកនេះបានឱ្យដឹងថា កម្ពុជាបានរកឃើញអ្នកផ្ទុកវីរុសCOVID-19 ថ្មី ចំនួន15ករណីបន្ថែមទៀត ក្នុងចំណោមនេះមានជនជាតិខ្មែរចំនួន2នាក់។

នាព្រឹកថ្ងៃទី11សីហានេះ កម្ពុជាបានប្រកាសថា បានរកឃើញករណីវិជ្ជមានជាមួយនឹងCOVID-19 ចំនួន15នាក់បន្ថែមទៀត ដែលនេះបានធ្វើឱ្យតួលេខអ្នកជំងឺសរុបនៅកម្ពុជាកើនឡើងដល់266នាក់។ នៅក្នុងចំណោមអ្នកជំងឺថ្មីទាំង15នាក់នេះ មានជនជាតិខ្មែរ2នាក់ និងជនជាតិចិន13នាក់។

គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុសCOVID-19 សរុប266នាក់ ក្នុងនោះមានអ្នកជំងឺ220នាក់បានជាសះស្បើយ និង46នាក់កំពុងទទួលការព្យាបាល។

នៅទូទាំងពិភពលោក មកដល់ពេលនេះត្រូវបានរាយការណ៍ថា បានរកឃើញអ្នកឆ្លងវីរុសCOVID-19 សរុបចំនួន20,247,575នាក់ ខណៈអ្នកជំងឺបានជាសះស្បើយមានចំនួន13,110,934នាក់ និង738,701នាក់បានបាត់បង់ជីវិត៕

August 11, 2020

ចិនដាក់ទណ្ឌកម្មមន្ត្រីអាមេរិកាំងចំនួន11រូប ដើម្បីសងសឹក

ក្រសួងការបរទេសចិនបានឱ្យដឹងថា ប្រទេសនេះបានសម្រេចដាក់ទណ្ឌកម្មលើតំណាងរាស្ត្រ2រូបមកពីសភាជាន់ខ្ពស់ រួមនឹងមន្ត្រីអាមេរិកាំងចំនួន9រូបផ្សេងទៀតចាប់ពីថ្ងៃនេះតទៅ។

អ្នកនាំពាក្យក្រសួងការបរទេសចិន លោក Zhao Lijian បានឱ្យដឹងថា បទបញ្ជាដាក់ទណ្ឌកម្មនេះសំដៅទៅលើមន្ត្រីអាមេរិកាំងចំនួន11រូប ដើម្បីឆ្លើយតបទៅនឹងការដែលទីក្រុងវ៉ាស៊ីងតោនបានដាក់ទណ្ឌកម្មទៅលើលោកស្រី Carrie Lam ដែលជាប្រធានតំបន់ពិសេសហុងកុង រួមជាមួយនឹងមន្ត្រី10រូបផ្សេងទៀតនៅទីក្រុងនេះ និងនៅប្រទេសចិនដីគោក។

ក្រុមមន្ត្រីអាមេរិកាំងដែលត្រូវបានប្រទេសចិនដាក់ទណ្ឌកម្មលើកនេះ មានដូចជាសមាជិកសភាជាន់ខ្ពស់ Ted Cruz និង Marco Rubio រួមនឹងប្រធានអង្គភាពតាមដានបញ្ហាសិទ្ធិមនុស្ស Kenneth Roth និងលោក Michael Abramowitz ដែលជាប្រធានអង្គការក្រៅរដ្ឋាភិបាល Freedom House។ នេះបើតាមសម្ដីរបស់លោក Zhao Lijian ដែលបានថ្លែងនៅក្នុងសន្និសីទសារព័ត៌មានមួយនាថ្ងៃនេះនៅរដ្ឋធានីប៉េកាំង។

លោក Zhao Lijian បានប្រកាសថា “ដើម្បីឆ្លើយតបទៅនឹងឥរិយាបថខុសឆ្គងរបស់សហរដ្ឋអាមេរិក ប្រទេសចិនបានសម្រេចដាក់ទណ្ឌកម្មទៅលើបុគ្គលដែលបានធ្វើសកម្មភាពមិនល្អនៅក្នុងបញ្ហាដែលទាក់ទិននឹងហុងកុង”។

សមាជិកសភាជាន់ខ្ពស់អាមេរិកាំង លោក សមាជិកសភាជាន់ខ្ពស់ Ted Cruz

សូមរំឭកថា កាលពីពេលថ្មីៗនេះ ទីក្រុងប៉េកាំងក៏ធ្លាប់បានប្រកាសដាក់ទណ្ឌកម្មលើលោក Cruz និងលោក Rubio រួមនឹងក្រុមមន្ត្រីអាមេរិកាំងមួយចំនួនផ្សេងទៀតផងដែរ ក្រោយពីទីក្រុងវ៉ាស៊ីងតោនបានដាក់ទណ្ឌកម្មលើមន្ត្រីចិនដោយចោទថា “រើសអើង” ចំពោះជនជាតិអ៊ុយហ្គួនៅតំបន់ស៊ីនជាំង។

ការដាក់ទណ្ឌកម្មពីសំណាក់ទីក្រុងប៉េកាំងនេះ ត្រូវបានធ្វើឡើងក្រោយពីក្រសួងហិរញ្ញវត្ថុសហរដ្ឋអាមេរិក កាលពីថ្ងៃទី7សីហា បានប្រកាសដាក់ទណ្ឌកម្មទៅលើប្រធានតំបន់ពិសេសហុងកុង លោកស្រី Carrie Lam រួមជាមួយនឹងមន្ត្រីហុងកុងនិងមន្ត្រីចិនដីគោកចំនួន10រូបផ្សេងទៀត ដោយចោទថា “ធ្វើឱ្យថយចុះនូវស្វ័យភាព និងការបំបិទសិទ្ធិសេរីភាពក្នុងការបញ្ចេញមតិ ឬការប្រមូលផ្ដុំគ្នារបស់ពលរដ្ឋហុងកុង”។

លោកស្រី Carrie Lam ប្រធានតំបន់ពិសេសហុងកុង

ទំនាក់ទំនងរវាងអាមេរិកាំង និងចិន ក្នុងមួយរយៈពេលចុងក្រោយនេះ បានប្រែទៅជាតានតឹងឡើងៗ ពិសេសនៅពេលដែលទីក្រុងប៉េកាំងបានដាក់ឱ្យប្រើប្រាស់ច្បាប់សន្តិសុខហុងកុងកាលពីចុងខែមីថុនា។ ពលរដ្ឋហុងកុងដែលបំពានលើច្បាប់ថ្មីនេះ អាចត្រូវកាត់ទោសឱ្យជាប់ពន្ធនាគារអស់មួយជីវិត ហើយសិទ្ធិប្ដឹងផ្ដល់ និងកាត់ទោសលើ “ករណីធ្ងន់ធ្ងរ” គឺស្ថិតក្រោមការចាត់ចែងរបស់រដ្ឋអំណាចថ្នាក់កំពូលនៅប្រទេសចិន។

ប្រទេសចិនបានអះអាងថា ច្បាប់សន្តិសុខថ្មីសម្រាប់ហុងកុងនេះ សំដៅទៅលើតែមនុស្សមួយក្រុមតូចប៉ុណ្ណោះ ចំណែកផលប្រយោជន៍ សេរីភាពរបស់ពលរដ្ឋហុងកុង ក៏ដូចជាផលប្រយោជន៍របស់ក្រុមអ្នកវិនិយោគបរទេសនៅតែទទួលបានការធានា។ ក៏ប៉ុន្តែ សហរដ្ឋអាមេរិក និងប្រទេសជាច្រើននៅអឺរ៉ុប បានរិះគន់ទៅលើច្បាប់ថ្មីនេះ ហើយបានហៅច្បាប់នេះថា ជាការបំផ្លិចបំផ្លាញស្វ័យភាព សេរីភាពរបស់កុងហុង ព្រមទាំងបានធ្វើឱ្យគោលការណ៍ “ប្រទេសមួយ របបពីរ” ត្រូវថមថយឥទ្ធិពល។

មេដឹកនាំសារព័ត៌មាន Next Digital និងជាស្ថាបនិករបស់ក្រុមហ៊ុន Giordano លោក Jimmy Lai (Lai Chee-Ying)

នៅក្នុងថ្ងៃនេះដែរ ក្រុមប៉ូលិសហុងកុងក៏បានចាប់ខ្លួនមេដឹកនាំសារព័ត៌មាន Next Digital និងជាស្ថាបនិករបស់ក្រុមហ៊ុន Giordano ឈ្មោះ Jimmy Lai (Lai Chee-Ying) ដោយបានចោទប្រកាន់ថា បានឃុបឃិតជាមួយកម្លាំងបរទេស ដោយយោងទៅលើច្បាប់សន្តិសុខហុងកុង៕

ប្រភព៖ Reuters

August 10, 2020

Apple ដាក់ពាក្យប្ដឹងក្រុមហ៊ុនតូចមួយដែលប្រើឡូហ្គូជារាងផ្លែសារី

Apple កំពុងបំពេញបែបបទផ្សេងៗបន្ថែមទៀត ទៅតាមច្បាប់ដើម្បីប្ដឹងអ្នកអភិវឌ្ឍកម្មវិធី (App) មួយដែលមានឈ្មោះថា Prepear ព្រោះយល់ថា ឡូហ្គូរបស់ក្រុមហ៊ុននេះ ដូចទៅនឹងនិមិត្តរូបរបស់ Apple។

Prepear គឺជាកម្មវិធីមួយដែលជួយឱ្យអ្នកប្រើប្រាស់បង្កើតរូបមន្តនៃការចម្អិនម្ហូបអាហារថ្មីៗ និងធ្វើផែនការសម្រាប់អាហារប្រចាំថ្ងៃ បង្កើតបញ្ជីមុខទំនិញសម្រាប់ការដើរផ្សារ ក៏ដូចជារៀបចំការបញ្ជាទិញដែលត្រៀមនឹងប្រគល់ទៅឱ្យអតិថិជន។ Prepear គឺជាផលិតផលតភ្ជាប់ទំនាក់ទំនងរបស់គេហទំព័រឯកទេសខាងអាហារសម្រាប់កុមារ Super Healthy Kids។

នៅលើអត្ថបទដែលបានបង្ហោះលើបណ្ដាញសង្គម Instagram កម្មវិធីនេះ បានឱ្យដឹងថា “Apple បានបញ្ចេញសកម្មភាពក្នុងការប្រើប្រាស់ច្បាប់ដើម្បីប្រឆាំងទៅនឹង Prepear ព្រោះយល់ថា ឡូហ្គូផ្លែសារី ដែលដូចទៅនឹងឡូហ្គូផ្លែប៉ោម បង្កការខូចខាតដល់យីហោរបស់ Apple”។

ស្ថាបនិករបស់ Prepear បានបញ្ចេញយោបល់ថា សកម្មភាពរបស់ Apple គឺជា “ការឈឺចាប់ចំពោះ Prepear” ប៉ុន្តែ ពួកគេនឹងនៅតែបន្តប្រឹងប្រែងឱ្យអស់ពីលទ្ធភាពដើម្បីការពារឡូហ្គូរបស់ខ្លួន។ អត្ថបទខាងលើក៏មិនភ្លេច “ផ្ញើសារ” ទៅកាន់ក្រុមហ៊ុន “យក្ស” ផ្នែកបច្ចេកវិទ្យានានាថា ការសម្លុតទៅលើក្រុមហ៊ុនតូចៗ គង់មានថ្ងៃជួបលទ្ធផលអាក្រក់”។

ឡូហ្គូរបស់ក្រុមហ៊ុន Prepear និងឡូហ្គូរបស់ក្រុមហ៊ុន Apple

Prepear ក៏បានដាក់ញត្តិមួយច្បាប់ទៅកាន់ Change.org ដើម្បីបញ្ចុះបញ្ចូលឱ្យ Apple ដកពាក្យបណ្ដឹង។ ក្រុមហ៊ុននេះរំពឹងថា ញត្តិរបស់ខ្លួនអាច “ជួយទប់ស្កាត់ក្រុមហ៊ុនបច្ចេកវិទ្យាធំៗ មិនឱ្យរំលោភអំណាចរបស់ខ្លួនទៅលើក្រុមហ៊ុនតូចៗដែលកំពុងតែរងគ្រោះដោយសារCovid-19។

Prepear បានឧទ្ទេសនាមខ្លួនឯងថា ជាក្រុមហ៊ុនតូចមួយដែលមានបុគ្គលិកតែ5នាក់ប៉ុណ្ណោះ។ ខ្ទង់ចំណាយទៅលើការប្ដឹងផ្ដល់ខាងលើ បាននាំឱ្យក្រុមហ៊ុនតូចមួយនេះ ខាតបង់ប្រាក់រាប់ពាន់ដុល្លារ និងត្រូវបង្ខំបញ្ឈប់បុគ្គលិកម្នាក់របស់ខ្លួន។

លិខិតតវ៉ារបស់ Prepear នៅលើ Change.org បានសរសេរថា៖ “Apple ជំទាស់ទៅនឹងលិខិតចុះឈ្មោះនិមិត្តរូបរបស់យើងខ្ញុំ។ ពួកគេក៏បានស្នើឱ្យយើងប្ដូរឡូហ្គូផ្លែសេរីដែលត្រូវបានប្រើប្រាស់ជាទូទៅនៅក្នុងខ្លឺមសារនានារបស់កម្មវិធីនេះរួចហើយ។ ក្រុមហ៊ុនតូចៗស្ទើរតែទាំងអស់ មិនមានលទ្ធភាពគ្រប់គ្រាន់ផ្នែកហិរញ្ញវត្ថុ ដើម្បីទប់ទល់នឹង Apple នោះទេ។ នេះពិតជាបទពិសោធន៍ដ៏រន្ធត់សម្រាប់យើងខ្ញុំ ពេលដែលត្រូវបានប្ដឹងដោយក្រុមហ៊ុនធំបំផុតមួយក្នុងពិផពលោក បើទោះជាជាក់ស្ដែង យើងមិនបានធ្វើខុសក៏ដោយ។ ក្រុមហ៊ុនផ្សេងៗដែលត្រូវបោះបង់ និងប្ដូរឡូហ្គូរបស់ខ្លួនដោយសារ Apple ពួកគេនឹងងាយយល់អំពីប្រការនេះ”។

ក្រុមហ៊ុន Apple យល់ថា ឡូហ្គូផ្លែសារី ដែលដូចទៅនឹងឡូហ្គូផ្លែប៉ោម បង្កការខូចខាតដល់យីហោរបស់ Apple

បច្ចុប្បន្ន ញត្តិរបស់ Prepear ទទួលបានហត្ថលេខាជិត9,000នាក់។ សមាជិកនៃក្រុមរបស់ Prepear សង្ឃឹមថា អាចរកបានហត្ថលេខាគាំទ្រចំនួន10,000នាក់ នៅលើថ្នាល់ Change.org។

ក្រុមហ៊ុន Apple ត្រូវបានគេដឹងថា បាន “ជំទាស់ទៅនឹងក្រុមហ៊ុនតូចៗជាច្រើនដែលប្រើប្រាស់ឡូហ្គូដែលមានរូបរាងជាផ្លែឈើ” បើទោះជាឡូហ្គូរបស់ក្រុមហ៊ុនតូចៗទាំងនោះ ខុសគ្នាឆ្ងាយបើធៀបនឹងឡូហ្គូរបស់ Apple។ ឡូហ្គូផ្លែប៉ោម ធ្លាប់ជាមូលហេតុដែលនាំឱ្យ Apple ធ្វើសកម្មភាពផ្នែកច្បាប់ជាច្រើនកាលពីអតីតកាល ក្នុងនោះក៏មានករណីប្ដឹងទៅលើគណបក្សនយោបាយមួយរបស់ប្រទេសន័រវែស និងផ្លូវសម្រាប់អ្នកជិះកង់មួយខ្សែនៅប្រទេសអាល្លឺម៉ង់ផងដែរ៕

ប្រភព៖ MacRumors

August 10, 2020

អាជ្ញាធរ Niger កំពុងតាមប្រមាញ់ក្រុមភេរវករ “បាញ់សម្លាប់-ដុតរថយន្ត” សម្លាប់ក្រុមមន្ត្រីមនុស្សធម៌បារាំង

នៅព្រឹកថ្ងៃទី10 សីហា ទីភ្នាក់ងារព័ត៌មាន AFP បានរាយការណ៍ថា កាលពីថ្ងៃអាទិត្យ(ទី9សីហា)ម្សិលមិញ វេលាម៉ោងប្រមាណជា11.30នាទី ម៉ោងនៅក្នុងស្រុករបស់ Niger ប្រទេសមួយក្នុងតំបន់អាហ្វ្រិកខាងលិច មានកើតហេតុការណ៍ក្រុមខ្មាន់កាំភ្លើង 1ក្រុមបានបើកម៉ូតូដេញតាមបាញ់រះរថយន្តក្រុមមន្ត្រី របស់អង្គការ ACTED ជាស្ថាប័នឯកជនមិនស្វែងរកប្រាក់កម្រៃ ដែលផ្ដល់ការជួយសង្គ្រោះផ្នែកមនុស្សធម៌ នៅក្នុងទីក្រុងឃូរេ តំបន់ធីរ៉ាបេរី បណ្ដាលឱ្យមានមនុស្សស្លាប់ 8នាក់ ជាបុគ្គលិកអង្គការជនជាតិបារាំង 6នាក់ អ្នកនាំផ្លូវជនជាតិណៃជើរ 1នាក់ និងអ្នកបើករថយន្តម្នាក់ទៀត។ ចំណែកទីភ្នាក់ងារព័ត៌មានBBC បានរាយការណ៍ឱ្យដឹងថា សាកសពជនរងគ្រោះ បានដេកស្លាប់រប៉ាត់រប៉ាយនៅជុំវិញរថយន្តដែលភេរវករបានដុតបំផ្លាញចោល ខណៈដែលប្រធានាធិបតី នៃប្រទេសបារាំង លោក អេមម៉ានូអែល ម៉ាក្រុង បានថ្លែងថ្កោលទោសក្រុមអ្នកបង្កហេតុ ចំណែកប៉ូលិសណៃជើរ កំពុងប្រញាប់ប្រញាល់ស៊ើបអង្កេត និងតាមប្រមាញ់ជនល្មើស ដែលទោះជានៅមិនទាន់ដឹងច្បាស់ថា ជាស្នាដៃរបស់ក្រុមណាក៏ដោយ តែនៅក្នុងតំបន់នោះ មានកងកម្លាំងបំពាក់អាវុធ ក្រុមបូកូហារ៉ាម កំពុងពួនសម្ងំនៅទីនោះ៕

ប្រភព៖ សារព័ត៌មានបរទេស

August 10, 2020

Author: សឿន សំណាង