Author: សឿន សំណាង

តំបន់លម្ហែសម្រាប់ក្រុមអ្នកចូលចិត្តអាក្រាតកាយធំជាងគេក្នុងពិភពលោក កំពុងរងការរាតត្បាតពីCOVID-19
COVID-19 កំពុងតែវាយលុកតំបន់លម្ហែកាយសម្រាប់អ្នកចូលចិត្តអាក្រាតកាយនៅលើឆ្នេរសមុទ្រ Cap D’Agde នៃទីរួមស្រុក Adge របស់ប្រទេសបារាំង។
ក្រុមមន្ត្រីសុខាភិបាលបានឱ្យដឹងថា ភូមិ Cap D’Agde នៅតំបន់ Herault របស់ប្រទេសបារាំង បានរកឃើញមនុស្សជិត100នាក់ បានឆ្លងវីរុសCOVID-19 បើគិតចាប់ពីពេលវីរុសបានបង្ហាញវត្តមានរហូតមកដល់ថ្ងៃទី24សីហានេះ។
អត្រានៃករណីវិជ្ជមានCOVID-19 នៅលើក្រុមមនុស្សដែលមកដើរលម្ហែដោយអាក្រាតកាយក្នុងតំបន់នេះ គឺខ្ពស់ជាងដល់ទៅ4ដង បើធៀបនឹងក្រុមមនុស្សដទៃដែលកំពុងរស់នៅក្នុងភូមិ Cap D’Agde។ ទេសចរជាង50នាក់ត្រូវបានរកឃើញថា បានឆ្លងវីរុសCOVID-19 ក្រោយពីបានមកកាន់តំបន់សម្រាប់អ្នកចូលចិត្តអាក្រាតកាយ Cap D’Agde នាពេលថ្មីៗនេះ។ អត្រានៃករណីឆ្លងវីរុសថ្មីពីតំបន់អាក្រាតកាយនេះ ត្រូវបានគេជឿថា នឹងកើនឡើងច្រើនជាបន្តទៀត បន្ទាប់ពីលទ្ធផលនៃការធ្វើតេស្តនឹងត្រូវបានធ្វើឡើងរួចរាល់នាពេលដ៏ខ្លីខាងមុខ។
ភូមិ Cap D’Agde ដែលស្ថិតក្នុងទីរួមស្រុក Adge (បារាំង) ដើមឡើយគ្រាន់តែជាតំបន់ដាំដើមអូលីវតែប៉ុណ្ណោះ ប៉ុន្តែបច្ចុប្បន្ន វាបានក្លាយជាតំបន់ទេសចរណ៍ដ៏សែនទាក់ទាញសម្រាប់ក្រុមមនុស្សដែលចូលចិត្តដើរលម្ហែដោយអាក្រាតកាយ មកពីជុំវិញពិភពលោក។ នៅក្នុងរដូវដែលមានទេសចរច្រើន Cap D’Agde អាចទទួលភ្ញៀវបានដល់ទៅ400,000នាក់។
តំបន់លម្ហែសម្រាប់អ្នកចូលចិត្តអាក្រាតកាយធំជាងគេក្នុងពិភពលោក កំពុងរងការរាតត្បាតពីCOVID-19
ការកើនឡើងនៃចំនួនអ្នកជំងឺCOVID-19 នៅតំបន់ Cap D’Agde បានកើតមានក្នុងគ្រាដែលប្រទេសបារាំងកំពុងប្រឈមនឹងរលកCOVID-19 បន្ទាប់នាពេលថ្មីៗនេះ។ គិតមកដល់ថ្ងៃទី24សីហា បារាំងបានរកឃើញអ្នកឆ្លងវីរុសសរុបចំនួន242,899នាក់ អ្នកស្លាប់សរុប30,513នាក់ ក្នុងនោះមានអ្នកជំងឺកំពុងទទួលការព្យាបាលចំនួន127,413នាក់ ដែលក្នុងនេះដែរក៏មាន383នាក់កំពុងប្រឈមនឹងការស្លាប់ខ្ពស់ជាងគេ។ បារាំងកំពុងឈរលំដាប់ទី3 ក្នុងចំណោមប្រទេសដែលបានរកឃើញអ្នកជំងឺCOVID-19 ច្រើនជាងគេនៅទ្វីបអឺរ៉ុប បន្ទាប់ពីប្រទេសអង់គ្លេស និងអ៊ីតាលី និងឈរលំដាប់ទី19 នៅទូទាំងពិភពលោក។
គិតមកដល់ពេលនេះ ពិភពលោកបានរកឃើញអ្នកផ្ទុកវីរុសសរុប23,593,497នាក់ ក្នុងនោះមាន812,627នាក់បានបាត់បង់ជីវិត និង16,090,981នាក់បានជាសះស្បើយ ខណៈអ្នកជំងឺ6,689,889នាក់កំពុងទទួលការព្យាបាល ក្នុងនោះមាន61,418នាក់ (1%) កំពុងស្ថិតក្នុងស្ថានភាពអាក្រក់៕
ប្រភព៖ AFP, Worldometers
August 24, 2020
សារព័ត៌មានរដ្ឋចិន៖ ពិធីជប់លៀងយ៉ាងកុះករ ណែនអាងទឹក គឺជាការផ្ដល់កម្រៃជីវិតដល់អ្នកទីក្រុងវូហាន
ទីភ្នាក់ងារសារព័ត៌មានរ៉យទ័រ បានរាយការណ៍ថា រដ្ឋបាលក្រុងប៉េកាំង ប្រទេសចិន ចាប់ផ្ដើមបន្ធូរបន្ថយវិធានការគ្រប់គ្រងជំងឺកូវីដ-19 ដោយការអនុញ្ញាតឱ្យមនុស្សនៅក្នុងទីក្រុង មិនចាំបាច់ពាក់ម៉ាស់អនាម័យការពារទេ ពេលនៅកណ្ដាលថ្ងៃ ឬក្នុងទីកន្លែងដែលធំស្រឡះ ក្រោយពីលែងរកឃើញមានអ្នកឆ្លងថ្មីនៅក្នុងក្រុងប៉េកាំង រយៈពេល 13ថ្ងៃជាប់ៗគ្នាកន្លងមក។
តាមរយៈលទ្ធផលនៃការតាមដានអង្កេត របស់អ្នកយកព័ត៌មានរ៉យទ័រ បានឱ្យដឹងថា កាលពីថ្ងៃសុក្រ ទី21 សីហា មនុស្សម្នាភាគច្រើន នៅតែពាក់ម៉ាស់ការពារនៅឡើយ។ នៅពេលសាកសួរ មនុស្សភាគច្រើនប្រាប់ថា ពាក់ហើយ មានអារម្មណ៍ថា មានសុវត្ថិភាព និងអ្នកខ្លះទៀតនិយាយថា ត្រូវតែពាក់ម៉ាស់ការពារគ្រប់ពេលវេលា ដោយសារតែរងសម្ពាធពីសង្គមជុំវិញខ្លួន។
ការបន្ធូរបន្ថយវិធានការ មិនចាំបាច់ពាក់ម៉ាស់ការពារនេះ គឺជាលើកទី2 ហើយរបស់ទីក្រុងប៉េកាំង។ លើកទី1 ត្រូវបានធ្វើឡើង កាលពីខែមេសា តែលុះមកដល់ខែមិថុនា ដែលមានការចាប់ផ្ដើមរកឃើញ មេរោគត្រឡប់មកជាថ្មីម្ដងទៀតនោះ ទើបត្រឡប់មកប្រើវិធានការតឹងរ៉ឹងជាថ្មីឡើងវិញ។
ចំណែកនៅទីក្រុងវូហាន ទីក្រុងដែលរកឃើញការឆ្លងរាលដាលរបស់មេរោគកូវីដ-19 មុនគេនៅក្នុងពិភពលោកនោះ នៅតែស្ថិតជាប្រធានបទនៃការជជែកគ្នាយ៉ាងទូលំទូលាយដដែល នៅពេលមានរូបភាពនៃការប្រារព្ធពិធីជប់លៀងនៅក្នុងអាងហែលទឹក ដែលមានមនុស្សពេញណែនយ៉ាងកកកុញរាប់ពាន់នាក់។
វេបសាយ Fox News របស់សហរដ្ឋអាមេរិក បានរាយការណ៍ពីខ្លឹមសារអត្ថបទ របស់សារព័ត៌មានដែលអះអាងថាជារបស់រដ្ឋបាលចិន ហ្គ្លោបល ថាមស៍ ថា បានព្យាយាមសរសេរដោះសា និងជួយស្ដារភាពមិនត្រឹមត្រូវរបស់ចិន អំពីការប្រារព្ធពិធីជប់លៀងដ៏កកកុញមួយនោះ ដោយបានរិះគន់ថា ប្រជាជនចិនសប្បាយរីករាយហួសហេតុ និងធ្វេសប្រហែសជ្រុលពេកទេដឹង? ទាំងទីក្រុងវូហាន គឺជាប្រភពដែលធ្វើឱ្យមេរោគឆ្លងរាលដាលទូទាំងពិភពលោកនោះ។
អត្ថបទរបស់សារព័ត៌មាន ហ្គ្លោបល ថាមស៍ ដែលសរសេរ កាលពីថ្ងៃទី18 សីហា បានធ្វើការវាយបកទៅលើបណ្ដាអ្នកវាយប្រហារបក្សកុម្មុយនីស្តរបស់ចិនថា ជាពួកគ្មានបានការ ច្រណែននឹងវូហាន ដែលក្លាយជាជើងឯកនៃវិធានការបិទទីក្រុង ដែលអាចគ្រប់គ្រងមេរោគបាន និងថា ការប្រារព្ធពិធីជប់លៀងដ៏ធំនេះ គឺជាការផ្ដល់កម្រៃជីវិតជូនប្រជាជនក្នុងទីក្រុងវូហាន។
ហ្គ្លោបល ថាមស៍ បានសរសេរបន្ថែមទៀតថា “វូហាន ជាទីក្រុងដែលរកឃើញមេរោគកូវីដ-19មុនគេ និងបានប្រឈមនឹងជំងឺនេះយ៉ាងធ្ងន់ធ្ងរ តែឥលូវនេះ បានត្រឡប់មកទទួលស្វាគមន៍ការហូរចូលមករបស់អ្នកទេសចរឡើងវិញហើយ។ សេដ្ឋកិច្ចចាប់ផ្ដើមល្អប្រសើរឡើង អ្នកទីក្រុងវូហានមិនមែនត្រឹមតែមើលឃើញ សញ្ញាក្នុងការបានវិលត្រឡប់មករស់នៅយ៉ាងប្រក្រតីឡើងវិញប៉ុណ្ណោះទេ តែថែមទាំងជាការដាស់តឿន ដល់ប្រទេសជាច្រើនទៀត ឱ្យបានដឹងផងដែរថា ការប្រើវិធានការតឹងរ៉ឹង សមល្មមនឹងទទួលបានកម្រៃត្រឡប់មកវិញហើយ…”៕
ប្រភព៖ សារព័ត៌មានបរទេស
August 24, 2020
អាចម៍ផ្កាយមួយដុំនឹងហោះមកដល់ផែនដីនៅចុងឆ្នាំ2020នេះ
អាចម៍ផ្កាយមួយដុំដែលត្រូវបានអ្នកវិទ្យាសាស្ត្រដាក់ឈ្មោះឱ្យថា 2018VP1 នឹងហោះមកដល់ផែនដីនៅចុងឆ្នាំ2020នេះ ប៉ុន្តែលទ្ធភាពដែលវាអាចហោះមកបុកផែនដី មានត្រឹមតែ 0,41% ប៉ុណ្ណោះ។
មជ្ឈមណ្ឌលស្រាវជ្រាវវត្ថុអវកាសក្បែរផែនដី (CNEOS) នៃមន្ទីរពិសោធន៍កម្លាំងរុញច្រានរបស់ទីភ្នាក់ងារអវកាសអាមេរិក (NASA) បានឱ្យដឹងថា អាចម៍ផ្កាយដែលមានឈ្មោះថា 2018VP1 នឹងហោះកាត់មុខផែនដីនៅមុនថ្ងៃបោះឆ្នោតប្រធានាធិបតីសហរដ្ឋអាមេរិក ពោលគឺនៅថ្ងៃទី2វិច្ឆិកា។ យោងតាម NASA មានសេណារីយោចំនួន3នៃការប៉ះទង្គិចដែលអាចកើតឡើង ដែលនេះគឺយោងទៅតាមការសង្កេតចំនួន21លើក ក្នុងរយៈពេល12,968ថ្ងៃកន្លងមក។ ក៏ប៉ុន្តែ លទ្ធភាពនៃការប៉ះទង្គិចផ្ទាល់ជាមួយនឹងផែនដី គឺមានមិនដល់ 0.41% នោះទេ។
2018VP1 ត្រូវបានរកឃើញជាលើកដំបូងដោយមជ្ឈមណ្ឌលសង្កេតអវកាស Palomar ក្នុងរដ្ឋ California សហរដ្ឋអាមេរិក កាលពីឆ្នាំ2018 ប៉ុន្តែអាចម៍ផ្កាយនេះមិនស្ថិតក្នុងក្រុម “វត្ថុអវកាសអាថ៌កំបាំងដែលអាចបង្កគ្រោះថ្នាក់” ដល់ផែនដីនោះទេ ដោយសារតែវាមានទំហំតូច។ ទិន្នន័យពី NASA បានឱ្យដឹងថា អាចម៍ផ្កាយនេះមានអង្កត់ផ្ចិតប្រវែង2ម៉ែត្រ។
កាលពីដើមសប្ដាហ៍មុន អាចម៍ផ្កាយមួយដុំបានហោះកាត់ផែនដីក្នុងរយៈចម្ងាយ2,945គីឡូម៉ែត្រនៅពីលើតំបន់ភាគខាងត្បូងនៃមហាសមុទ្រឥណ្ឌា ដែលនេះបានក្លាយជាវត្ថុអវកាសដែលហោះក្បែរផែនដីបំផុតក្នុងប្រវត្តិសាស្ត្រ។ អាចម៍ផ្កាយដែលមានឈ្មោះថា 2020 GC នេះ ត្រូវបានរកឃើញដោយ Zwicky Transient Facility ដែលជាកាមេរ៉ារ៉ូបូត ជំនាញខាងស្កេនផ្ទៃអាកាស។ 2020 GC មានទំហំប៉ុនរថយន្តប្រភេទ sedan ប៉ុណ្ណោះ ដូច្នេះវាមិនបង្កគ្រោះថ្នាក់ដល់ផែនដីរបស់យើងទេ ព្រោះថា វានឹងត្រូវបំបែកជាបំណែកតូចៗនៅក្នុងបរិយាកាសផែនដី៕
ប្រភព៖ Independent

August 24, 2020
បញ្ហាបាត់បង់ការងារជាអ្នកបើកបរយន្តហោះ បាននាំឱ្យក្រុមហ៊ុនរកលុយតាមរយៈ drone បង្ហាញវត្តមាន
ដោយសារតែមានការព្រួយបារម្ភ ខ្លាចត្រូវក្រុមហ៊ុនបញ្ឈប់ពីការងារ អ្នកបើកបរយន្តហោះអាមេរិករាប់ពាន់នាក់ បានចុះឈ្មោះចូលរៀនក្នុងវគ្គសិក្សាអំពីការបញ្ជាយន្តហោះគ្មានមនុស្សបើក (drone) ដើម្បីមានការងារបម្រុង។
គម្រោងបញ្ឈប់បុគ្គលិកក្នុងទ្រង់ទ្រាយធំនៅរដូវរំហើយឆ្នាំនេះរបស់ក្រុមហ៊ុនអាកាសចរណ៍នានា កំពុងតែធ្វើឱ្យអ្នកបើកបរយន្តហោះដូចជា Michelle Bishop ប្រឈមនឹងការបាត់បង់ការងារ។ “ខ្ញុំព្យាយាមហោះហើរឱ្យបានច្រើនបំផុតនៅពេលដែលអាចធ្វើទៅបាន ព្រោះខ្ញុំស្រលាញ់ការងារនេះ” នេះបើតាមសម្ដីរបស់ Bishop ដែលជាអ្នកបើកបរយន្តហោះម្នាក់ដែលមានបទពិសោធន៍20ឆ្នាំក្នុងការងារនេះ។
នៅក្នុងអំឡុងពេលផ្អាកការហោះហើរ ថ្មីៗនេះ Michelle Bishop បានស្វែងរកការងារមួយដែលមិនបាច់អង្គុយពេញមួយថ្ងៃនៅក្បែរតុដែលពេញដោយក្រដាស។ សំណាងល្អ នាងក៏បានរកឃើញការងារមួយដែលពាក់ព័ន្ធនឹងការហោះហើរ នោះគឺការបើកបរយន្តហោះគ្មានមនុស្សបើក ពោលគឺបញ្ជាយន្តហោះ drone។
Aquiline Drones ដែលជាក្រុមហ៊ុនថ្មីមួយនៅក្នុងរដ្ឋ Connecticut មានគម្រោងដំណើរការកម្មវិធីមួយនៅក្នុងរយៈពេល2ខែខាងមុខ ដែលមានមុខងារតភ្ជាប់សេវាកម្មជាមួយនឹងតម្រូវការ សម្រាប់អ្នកទាំងឡាយណាដែលមានវិញ្ញាបនបត្របើកបរ drone និងអតិថិជនដែលមានតម្រូវការថតរូប និងវីដេអូពីលើអាកាស នៅក្នុងព្រឹត្តិការផ្សេងៗ ដូចជាពិធីរៀបការ ឬរូបភាពឯកសារនៃការសាងសង់ហេដ្ឋារចនាសម្ព័ន្ធនានាជាដើម។
ជាមូលដ្ឋាន កិច្ចការរបស់ក្រុមហ៊ុន Aquiline Drones នេះ ស្រដៀងទៅនឹងក្រុមហ៊ុន Uber ឬ ក្រុមហ៊ុន Lyft។ ស្ថាបនិក Barry Alexander ជឿថា អ្នកបើកបរយន្តហោះរាប់ពាន់នាក់នឹងក្លាយជាអ្នកបញ្ជា drone ដែលមានវិញ្ញាបនបត្រ ចូលរួមធ្វើការឱ្យក្រុមហ៊ុននេះ។
លោក Barry Alexander ស្ថាបនិករបស់ក្រុមហ៊ុន Aquiline Drones
បច្ចុប្បន្ន ក្រុមអ្នកប្រើប្រាស់ដែលមានការទទួលស្គាល់ដោយរដ្ឋនៅសហរដ្ឋអាមេរិក គឺនៅមានតិចតួចនៅឡើយ ពោលគឺមិនដល់2សែននាក់ទេ។ ចាប់តាំងពីឆ្នាំ2016 នាយកដ្ឋានអាកាសចរណ៍ជាតិនៅសហរដ្ឋអាមេរិក បានតម្រូវឱ្យក្រុមហ៊ុន និងអ្នកប្រើប្រាស់យន្តហោះគ្មានមនុស្សបើក ត្រូវតែមានវិញ្ញាបនបត្រ។ គោលដៅរបស់ក្រុមហ៊ុន Aquiline Drones គឺជួយផ្ដល់វិញ្ញាបនបត្រដល់អ្នកបញ្ជា drone រាប់ពាន់នាក់នៅប្រទេសនេះ។ Alexander បានឱ្យដឹងថា ស្ទើរតែទាំងអស់នៃពួកគេ នឹងជាអតីតអ្នកបើកបរយន្តហោះរបស់បណ្ដាក្រុមហ៊ុនអាកាសចរណ៍។
កម្មវិធីផ្ដល់វិញ្ញាបនបត្ររបស់ក្រុមហ៊ុន ដែលត្រូវបានហៅថា “ជើងហោះហើរទៅកាន់អនាគត” តាមគម្រោងនឹងបើកវគ្គសិក្សាចាប់ពីថ្ងៃទី1កញ្ញាខាងមុខ។ គ្រប់គ្នាអាចចុះឈ្មោះរៀនក្នុងរយៈពេល8សប្ដាហ៍ ដោយតម្រូវឱ្យបង់ថ្លៃត្រឹមតែ1,000ដុល្លារអាមេរិកប៉ុណ្ណោះ។ ដោយឡែក សិស្សដែលជាអតីតអ្នកបើកបរយន្តហោះ ដែលជាអ្នកបានយល់ច្បាស់អំពីការហោះហើរ អាចចូលរួមវគ្គសិក្សាផ្សេងមួយទៀតដែលមានតម្លៃ800ដុល្លារ។
Alexander បានឱ្យដឹងថា សិក្ខាកាមជាង1,500នាក់បានចុះឈ្មោះរួចរាល់ហើយ ទន្ទឹមនឹងអ្នកបើកបរយន្តហោះចំនួន2,000នាក់ ក្នុងនោះមាន Bishop ផងដែរ។ Bishop បានឱ្យដឹងថា “ខ្ញុំពិតជាមិនដឹងអ្វីអំពីយន្តហោះគ្មានមនុស្សបើក។ ប៉ុន្តែ បើសិនជាជិតឈប់ហោះហើរ ខ្ញុំចង់មានឱកាសរៀនអ្វីមួយដែលថ្មី”។
បើសិនជា ក្រុមហ៊ុន Aquiline ទទួលបានជោគជ័យ នោះអ្នកបើកបរយន្តហោះគ្មានមនុស្សបើកថ្មីដែលទទួលបានវិញ្ញាបនបត្រដូចជា Bishop នឹងបង្កើតបានជាបណ្ដាញនៃអ្នកវិនិយោគស្នូលរបស់កម្មវិធីដែលក្រុមហ៊ុននេះគ្រប់គ្រង។ កិច្ចព្រមព្រៀងផ្ដល់និងទទួលសេវាកម្មផ្ដិតយករូបភាពដោយ drone នឹងមានតម្លៃយ៉ាងតិចចាប់ពី300ដុល្លារឡើងទៅ និងគិតជាម៉ោង វាមានតម្លៃ150ដុល្លារ៕
ប្រភព៖ CNN
August 24, 2020
អ្នកវិទ្យាសាស្ត្រអង់គ្លេសអះអាង៖ វីរុសកូរ៉ូណាប្រភេទថ្មីនេះ នឹងនៅជាមួយយើងរហូតទៅ…
សមាជិកក្រុមទីប្រឹក្សាខាងវិទ្យាសាស្ត្រ សម្រាប់ហេតុការណ៍អាសន្ន ឬ SAGE ដែលផ្ដល់ការណែនាំទៅដល់រដ្ឋបាលសហរាជអាណាចក្រ ឬ UK បានថ្លែងបញ្ជាក់ថា វីរុសកូរ៉ូណាប្រភេទថ្មីនេះ នឹងស្ថិតនៅ “ជារៀងរហូត បើមិនក្នុងរូបបែបណាមួយ ក៏ក្នុងរូបបែបណាមួយដែរ”។
ស៊ើរ ម៉ាក វ៉លផត សមាជិកក្រុម SAGE បានប្រាប់ថា “មនុស្សនឹងត្រូវតែចាក់វ៉ាក់សាំងការពារ ជាដំណាក់កាលៗ ជាប់ជាប្រចាំ”។
លោកបានបង្ហាញពីការយល់ឃើញបែបនេះ បន្ទាប់ពីលោក ថេដ្រូស អាដហាណូម ហ្គេប្រេយេស៊ុស ប្រធានអង្គការសុខភាពពិភពលោក បានប្រាប់ថា លោកសង្ឃឹមថា ការឆ្លងរាលដាលដ៏ធំនេះ នឹងចប់អស់ក្នុងអំឡុងពេល 2ឆ្នាំ ដូចគ្នានឹងកាលពីសតវត្សរ៍កន្លងទៅ ដែលប្រើពេលវេលា 2ឆ្នាំ មុននឹងជំងឺគ្រុនផ្ដាសាយធំអេស្ប៉ាញ រលាយបាត់អស់ទៅវិញ។
ស៊ើរ ម៉ាក ប្រាប់ថា មេរោគក្នុងពេលបច្ចុប្បន្ននេះ អាចចម្លងសាយភាយបានយ៉ាងងាយ ដោយសារតែប្រជាជនក្នុងពិភពលោក កាន់តែកើនច្រើនឡើង ហើយមនុស្សក៏ធ្វើដំណើរទៅមកកាន់តែច្រើនឡើងដែរ។ លោកបានប្រាប់ទៀតថា ពេលនេះ ចំនួនប្រជាជនក្នុងពិភពលោក ក៏ច្រើនជាងកាលពីឆ្នាំ1918 ដែរ។
ស៊ើរ ម៉ាក បានផ្ដល់សម្ភាសតាមកម្មវិធីវិទ្យុ Today របស់ BBC Radio 4 ថា ត្រូវតែផ្ដល់វ៉ាក់សាំង ដល់មនុស្សទូទាំងពិភពលោក ទើបអាចគ្រប់គ្រងការឆ្លងរាលដាលដ៏ធំនេះបាន តែវីរុសកូរ៉ូណាប្រភេទថ្មី មិនមែនជាមេរោគនៃជំងឺអុតស្វាយ ដែលអាចកម្ចាត់ឱ្យអស់បាន ដោយវ៉ាក់សាំងនោះទេ។ លោកថ្លែងថា “នេះ គឺជាមេរោគវីរុស ដែលនឹងនៅជាមួយយើងរហូតតទៅ បើមិនក្នុងរូបបែបណាមួយ ក៏ក្នុងរូបបែបណាមួយដែរ និងសឹងតែប្រាកដច្បាស់ទៅហើយថា មនុស្សនឹងត្រូវតែនាំគ្នា ចាក់វ៉ាក់សាំងការពារម្ដងហើយ ម្ដងទៀត ដដែលៗ ដូច្នេះ វាក៏ដូចជំងឺគ្រុនផ្ដាសាយអ៊ីចឹង មនុស្សត្រូវតែទទួលយកការចាក់វ៉ាក់សាំងជាដំណាក់ៗ ជាប្រចាំ”
កាលពីពេលមុននេះ លោក ហ្គេប្រេយេស៊ុស ប្រធានអង្គការសុខភាពពិភពលោក បានប្រាប់ថា ក្នុងខណៈដែលត្រូវប្រើពេលវេលា 2ឆ្នាំ ក្នុងការចាត់ការជំងឺគ្រុនផ្ដាសាយធំអេស្ប៉ាញ តិចណូឡូជី ដែលទំនើបទាន់សម័យជាងនាពេលនេះ នឹងអាចបញ្ឈប់មេរោគវីរុសកូរ៉ូណាប្រភេទថ្មីនេះបាន ក្នុងអំឡុងពេលដែលខ្លីជាង។
ជំងឺគ្រុនផ្ដាសាយធំអេស្ប៉ាញកាលពីឆ្នាំ1918 បានសម្លាប់មនុស្សយ៉ាងតិច 50លាននាក់។
ពេលនេះ កូវីដ-19 បានសម្លាប់មនុស្សអស់ជាង 8សែននាក់ និងធ្វើឱ្យមានអ្នកឆ្លងមេរោគនេះជាង 23លាននាក់។
ស៊ើរ ម៉ាក បានដាស់តឿនថា អាចទៅរួច ដែលកូវីដ-19 នឹងឆ្លងរាលដាល “យ៉ាងមិនអាចគ្រប់គ្រងបាន” ជាថ្មីម្ដងទៀត តែយើងអាចប្រើវិធានការទប់ទល់ដែលចំមុខសញ្ញា ជាងកាលពីពេលមុនបាន ជំនួសឱ្យការបិទទីក្រុង ឬប្រទេសយ៉ាងទូលំទូលាយជាទូទៅ៕
ប្រភព៖ សារព័ត៌មានបរទេស
August 24, 2020
ចិនអនុញ្ញាតឱ្យប្រើប្រាស់វ៉ាក់សាំងCOVID-19 ជាបន្ទាន់និងជាបណ្ដោះអាសន្ន
ប្រទេសចិនបានអនុញ្ញាតឱ្យប្រើប្រាស់ក្នុងករណីបន្ទាន់ចំពោះវ៉ាក់សាំងCOVID-19 នានាដែលអភិវឌ្ឍដោយបណ្ដាក្រុមហ៊ុនក្នុងស្រុក ដែលវាមិនទាន់ត្រូវបានអនុម័តឱ្យប្រើប្រាស់ជាផ្លូវការនៅឡើយ។
ប្រការនេះត្រូវបានធ្វើឡើងដោយយោងទៅតាមច្បាប់គ្រប់គ្រងវ៉ាក់សាំងរបស់ប្រទេសចិន ដែលអនុញ្ញាតឱ្យប្រើប្រាស់វ៉ាក់សាំងទាំងឡាយណាដែលមិនទាន់ទទួលបានការអនុម័តឱ្យប្រើជាផ្លូវការ ទៅលើក្រុមហ៊ុនមនុស្សទាំងឡាយណាដែលមានហានិភ័យឆ្លងខ្ពស់ ក្នុងរយៈពេលកំណត់ណាមួយ។
Zheng Zhongwei ដែលជាមេដឹកនាំរបស់ក្រុមអ្នកអភិវឌ្ឍវ៉ាក់សាំងCOVID-19 របស់ប្រទេសចិន បានថ្លែងនៅលើកញ្ចក់ទូរទស្សន៍ជាតិ CCTV កាលពីថ្ងៃទី22សីហាថា៖ “យើងបានគូសវាសជាគម្រោងជាច្រើន រួមមានទាំងសំណុំបែបបទដែលទទួលស្គាល់ដោយផ្នែកសុខាភិបាល គម្រោងតាមដានផលវិបាក គម្រោងសង្គ្រោះ គម្រោងផ្ដល់សំណងជាដើម ដើម្បីធានាឱ្យបានប្រាកដថា ការប្រើប្រាស់បន្ទាន់នេះត្រូវបានគ្រប់គ្រង និងតាមដានបានល្អ”។
លោក Zheng ឱ្យដឹងថា ប្រទេសចិនបានផ្ដល់ការអនុញ្ញតឱ្យប្រើប្រាស់បន្ទាន់ និងបណ្ដោះអាសន្ននូវវ៉ាក់សាំងCOVID-19 ចាប់តាំងពីថ្ងៃទី22កក្កដា នៅពេលដែលបេក្ខភាពវ៉ាក់សាំងនានាកំពុងប្រើប្រាស់សាកល្បង។ អ្នកដែលត្រូវបានចាក់វ៉ាក់សាំងកាលណោះបានឱ្យដឹងថា ពួកគេទទួលបានផលវិបាកតិចតួចណាស់។
យោងតាមច្បាប់គ្រប់គ្រងវ៉ាក់សាំងរបស់ប្រទេសចិន នៅពេលដែលមានករណីបន្ទាន់ផ្នែកសុខាភិបាលប្រកបដោយភាពធ្ងន់ធ្ងរកើតឡើង វ៉ាក់សាំងនានាដែលកំពុងប្រើប្រាស់សាកល្បង អាចត្រូវបានយកមកប្រើប្រាស់ជាទ្រង់ទ្រាយមានកំណត់ដើម្បីការពារបុគ្គលិកសុខាភិបាល និងការិយាល័យប្រឆាំងរោគឆ្លង បុគ្គលិកព្រំដែន និងក្រុមមនុស្សដែលធ្វើសកម្មភាពសំខាន់ៗក្នុងទីក្រុង។ នេះបើតាមការបកស្រាយរបស់លោក Zheng។
សារព័ត៌មាន Global Times មុននេះបានចេញផ្សាយថា បុគ្គលិកនានារបស់ក្រុមហ៊ុនរដ្ឋដែលកំពុងត្រៀមខ្លួនចេញទៅក្រៅប្រទេស និងក្រុមគ្រូពេទ្យជួរមុខ ទទួលបានជម្រើសចំនួនពីរក្នុងការចាក់វ៉ាក់សាំងដែលមិនទាន់ទទួលបានការអនុម័តឱ្យប្រើប្រាស់ជាផ្លូវការ ដែលអភិវឌ្ឍដោយក្រុមហ៊ុនផលិតឱសថជាតិ (sinopharm) ដើម្បីប្រើប្រាស់ជាបន្ទាន់ និងបណ្ដោះអាសន្ន។ កាលពីថ្ងៃទី20និង21សីហា ក្រុមហ៊ុន Sinopharm បានចុះហត្ថលេខាលើកិច្ចសហប្រតិបត្តិការទៅលើការប្រើប្រាស់សាកល្បងវ៉ាក់សាំងCOVID-19 នៅក្នុងដំណាក់កាលទី3 ជាមួយនឹងប្រទេសប៉េរូ ប្រទេសម៉ូណាកូ និងអាហ្សង់ទីន។
លោក Zheng បន្តថា ដើម្បីត្រៀមសម្រាប់ជំហានបន្ទាប់ ក្នុងបំណងទប់ស្កាត់ការផ្ទុះឆ្លងរាលដាលនៅក្នុងរដូវរំហើយ និងរដូវត្រជាក់ ការប្រើប្រាស់វ៉ាក់សាំងនេះនឹងត្រូវបានពង្រីកវិសាលភាពទៅដល់ក្រុមមនុស្សដែលធ្វើការនៅក្នុងផ្សារលក់ស្បៀងអាហារ ប្រព័ន្ធដឹកជញ្ជូន និងបណ្ដាវិស័យឧស្សាហកម្មសេវាកម្មនានាផងដែរ។
Tao Lina ដែលជាអ្នកជំនាញផ្នែករោគឆ្លងនៅទីក្រុងសៀងហៃ បានឱ្យដឹងកាលពីថ្ងៃទី23សីហាថា ចំនួនមនុស្សដែលត្រូវបានចាក់វ៉ាក់សាំងនៅក្នុងករណីបន្ទាន់ អាចឡើងដល់រាប់សែននាក់នៅពាសពេញប្រទេសចិនដោយមិនគិតថ្លៃ។
អ្នកស្រី Wu មេដឹកម្នាក់របស់ក្រុមហ៊ុនរដ្ឋចិនមួយ ដែលកំពុងធ្វើការក្នុងគម្រោងនានាទាក់ទិននឹងការសាងសង់នៃគំនិតផ្ដួចផ្ដើមស្ដីអំពីខ្សែក្រវាត់មួយផ្លូវមួយនៅបណ្ដាប្រទេសក្នុងទ្វីបអាស៊ី និងអាហ្វ្រិក បានប្រាប់ថា បុគ្គលិកទាំងអស់របស់អ្នកស្រីត្រូវបានចាក់វ៉ាក់សាំងដោយមិនគិតថ្លៃរួចរាល់ហើយ នៅក្នុងទម្រង់ស្ម័គ្រចិត្ត។ អ្នកស្រី Wu បន្តថា អ្នកស្រីក៏បានចាក់វ៉ាក់សាំងនេះកាលពីថ្ងៃទី7សីហា ហើយពុំមានផលវិបាកណាមួយកើតឡើងនោះឡើយ គឺដូចទៅនឹងបុគ្គលិកផ្សេងៗទៀតរបស់អ្នកស្រីដែរ។
Yang Xiaoming ដែលជាប្រធានក្រុមហ៊ុន Sinopharm បានអះអាងថា វ៉ាក់សាំងនេះនឹងមានប្រសិទ្ធភាពទប់ទល់នឹងរាល់វីរុសប្រភេទ nCoV ដែលត្រូវបានរកឃើញយ៉ាងហោចត្រឹមពាក់កណ្ដាលខែកក្កដា ហើយវាអាចបង្កផលវិបាកអាក្រក់តិចជាងវ៉ាក់សាំងផ្សេងៗដែលកំពុងត្រូវបានស្រាវជ្រាវ។
Yang Xiaoming ឱ្យដឹងថា មនុស្សជាង20,000នាក់នៅអារ៉ាប់រួម (UAE) ដែលបានប្រើប្រាស់វ៉ាក់សាំងរបស់ Sinopharm នៅក្នុងការប្រើប្រាស់សាកល្បងក្នុងដំណាក់កាលទី3 បានបង្ហាញថា វាមានសុវត្ថិភាពខ្ពស់។ ប្រសិទ្ធភាពរបស់វ៉ាក់សាំងក៏កំពុងត្រូវបានតាមដានបន្តទៅទៀត។
“ការប្រើប្រាស់សាកល្បងដំណាក់កាលទី3នៅ UAE មកដល់ពេលនេះ មិនទាន់មានករណីទទួលផលវិបាកណាមួយនៅឡើយ។ ក្រុមអ្នកស្ម័គ្រចិត្តចូលរួមបានលឿនជាងការរំពឹងទុក ហើយវ៉ាក់សាំងនេះពិតជាគួរឱ្យទន្ទឹងរង់ចាំ”៕
ប្រភព៖ សារព័ត៌មានបរទេស
August 24, 2020
Elon Musk និង Jeff Bezos ចាប់ផ្ដើមដណ្ដើមទីផ្សារអ៊ីនធើណិតផ្កាយរណបជាផ្លូវការហើយ
Elon Musk កំពុងនាំមុខគេក្នុងការប្រកួតប្រជែងនៅក្នុងទីផ្សារអ៊ីនធើណិតផ្កាយរណប ប៉ុន្តែ Jeff Bezos ឯណោះវិញ ក៏កំពុងតែវិនិយោគរាប់សិបពាន់លានដុល្លារដើម្បីប្រណាំងប្រជែងនឹង Elon Musk។
នាពេលខាងមុខ បណ្ដាតំបន់ដាច់ស្រយាលក្នុងពិភពលោកនឹងអាចប្រើប្រាស់សេវាកម្មអ៊ីនធើណិតពីផ្កាយរណប Starlink របស់ក្រុមហ៊ុន SpaceX។ ប្រព័ន្ធអ៊ីនធើណិត Starlink របស់មហាសេដ្ឋី Elon Musk ត្រូវបានដាក់ឱ្យប្រើសាកល្បងរួចមកហើយ។ កាលពីថ្ងៃទី13សីហា ក្រុមអ្នកលេងបណ្ដាញសង្គម Reddit បានបង្ហោះលទ្ធផលដំបូងស្ដីអំពីល្បឿនរបស់អ៊ីនធើណិតផ្កាយរណប Starlink ដោយក្នុងនោះ ជាមធ្យមវាមានល្បឿនប្រមាណជា30Mb/វិនាទី និងខ្ពស់បំផុតត្រឹម60.24Mb/វិនាទី។ បើទោះជាមិនទាន់បានដូចបំណង ប៉ុន្តែវាក៏អាចឆ្លើយតបទៅនឹងសកម្មភាពអនឡាញប្រចាំថ្ងៃបានយ៉ាងល្អ។
ក្រៅពីលោក Musk មហាសេដ្ឋី Jeff Bezos ក៏ចូលរួមដណ្ដើមចំណែកទីផ្សារអ៊ីនធើណិតផ្កាយរណបនេះដែរ។ កាលពីថ្ងៃទី30កក្កដា គម្រោង Kuiper របស់ Amazon ទទួលបានការយល់ព្រមពី FCC រួចហើយ ដែលនេះមានន័យថា Starlink របស់លោក Elon Musk និង Kuiper របស់លោក Jeff Bezos បានឈានចូល “សមរភូមិ” អ៊ីនធើណិតផ្កាយរណបជាផ្លូវការ។
Elon Musk មានប្រៀបជាងគេ
កាលពីខែវិច្ឆិកា2018 FCC បានអនុញ្ញតឱ្យ SpaceX បាញ់បង្ហោះផ្កាយរណបចំនួន12,000គ្រឿងទៅកាន់គន្លងគោចររបស់ផែនដី។ បច្ចុប្បន្ន ក្រុមហ៊ុននេះបានបាញ់បង្ហោះផ្កាយរណប Starlink ប្រមាណជា600គ្រឿង ទៅកាន់ទីអវកាស។ លោក Musk អះអាងថា តួលេខនេះនឹងកើតដល់30,000គ្រឿងនាពេលដ៏ខ្លីខាងមុខ។ ក្នុងដំណាក់កាលពីឆ្នាំ2019-2024 ផ្កាយរណបនេះចំនួន1,584គ្រឿងនឹងត្រូវបានដាក់ពង្រាយនៅលើគន្លងគោចរ។ ពេលនេះ ប្រព័ន្ធផ្កាយរណប “យក្ស” 3ជាន់ ក៏កំពុងត្រូវបាន SpaceX សាងសង់ផងដែរ។
កាលពីខែមិថុនា2020 សេវាកម្មអ៊ីនធើណិតផ្កាយរណបរបស់ Starlink បានអនុញ្ញាតឱ្យប្រើប្រាស់សាកល្បងដោយមិនគិតថ្លៃ។ ភ្លាមនោះ មានអ្នកប្រើប្រាស់ជាង700,000នាក់បានចុះឈ្មោះ។ SpaceX ក៏បានស្នើទៅកាន់ FCC ដើម្បីសុំបន្ថែមឧបករណ៍ទទួលរលកសញ្ញាពី1លាន ឡើងទៅ5លានគ្រឿង។
ឧបករណ៍ចាប់រលកសញ្ញាអ៊ីនធើណិតពីផ្កាយរណប Starlink របស់ SpaceX
គោលដៅចុងក្រោយរបស់លោក Musk នោះគឺផ្ដល់សេវាកម្មអ៊ីនធើណិតនៅទូទាំងពិភពលោកក្នុងឆ្នាំ2021 រួមមានទាំងសេវាអ៊ីនធើណិតតម្លៃទាបនៅក្នុងទីក្រុងផងដែរ។
Amazon ប្ដេជ្ញា “រត់ប្រណាំង” ជាមួយ SpaceX
បើទោះជាត្រូវបាន FCC អនុញ្ញាតឱ្យដំណើរការគម្រោងរបស់ខ្លួនយឺតជាង SpaceX ប៉ុន្តែ Amazon កំពុងតែបង្ហាញថា មានការប្ដេជ្ញាខ្ពស់ក្នុងការប្រកួតដណ្ដើមយកចំណែកទីផ្សារអ៊ីនធើណិតផ្កាយរណបនេះដែរ។ Jeff Bezos បានប្រកាសថា នឹងវិនិយោគ1ម៉ឺនលានដុល្លារសម្រាប់គម្រោង Kuiper របស់ខ្លួន។ លោកនឹងបាញ់បង្ហោះផ្កាយរណបចំនួន3,236គ្រឿង ឱ្យបានមុនថ្ងៃទី30កក្កដា2029។ សេវាកម្មអ៊ីនធើណិតរបស់ Kuiper តាមគម្រោងនឹងដាក់លក់ភ្លាមៗក្រោយពីបានបាញ់បង្ហោះផ្កាយរណបអ៊ីនធើណិតបានចំនួន578គ្រឿង។
ក្រៅពី SpaceX និង Amazon ក៏នៅមានក្រុមហ៊ុនជាច្រើនផ្សេងទៀតមានគម្រោងចូលរួមប្រកួតប្រជែងក្នុងទីផ្សារអ៊ីនធើណិតផ្កាយរណប ក្នុងនោះក៏មាន Facebook ឬ OneWeb ផងដែរ៕
ប្រភព៖ សារព័ត៌មានបរទេស
August 22, 2020
យានអវកាស Chandrayaan-2 របស់ឥណ្ឌា គោចរជុំវិញឋានព្រះចន្ទបាន4,4000ជុំ និងគូរផែនទីបាន4លានគីឡូម៉ែត្រក្រឡា
យានអវកាសស្រាវជ្រាវព្រះចន្ទ Chandrayaan-2 សម្រេចបានជោគជ័យជាច្រើន មានដូចជាបង្កើតផែនទីទំហំផ្ទៃដី4លានគីឡូម៉ែត្រក្រឡា ថតរូបភាពគុណភាពខ្ពស់ និងប្រមូលទិន្នន័យអំពីផ្ទៃដីរបស់ឋានព្រះចន្ទ។ល។
អង្គការស្រាវជ្រាវអវកាសឥណ្ឌា (ISRO) កាលពីថ្ងៃទី20សីហា បានប្រកាសថា យានអវកាស Chandrayaan-2 បានហោះហើរជុំវិញឋានព្រះចន្ទចំនួន4,4000ជុំ បន្ទាប់ពីបានដំណើរការអស់រយៈពេល1ឆ្នាំ។ ISRO បានឱ្យដឹងថា “យានអវកាសនេះនៅតែដំណើរការល្អ ហើយប្រព័ន្ធបន្ទាប់បន្សំនានាក៏ប្រតិបត្តិការដូចធម្មតា។ ថាមពលរបស់វា គ្រប់គ្រាន់សម្រាប់ដំណើរការរយៈពេលប្រមាណជា7ឆ្នាំ”។
Chandrayaan-2 បានហោះទៅដល់គន្លងតារាវិថីនៃឋានព្រះចន្ទកាលពីថ្ងៃទី20សីហា ឆ្នាំ2019។ យាននេះបានទម្លាក់យានស្រាវជ្រាវ Vikram ទៅលើផ្ទៃដីរបស់ព្រះចន្ទ ប៉ុន្តែបានទទួលបរាជ័យ។ បើទោះជា Vikram មិនអាចចុះចតលើដីព្រះចន្ទដោយសុវត្ថិភាព តែបទពិសោធន៍នេះនឹងមានប្រយោជន៍សម្រាប់ការអភិវឌ្ឍយានចុះចតនាពេលអនាគត។ នេះបើតាមទីភ្នាក់ងារអវកាសឥណ្ឌា ISRO។
ក្រោយធ្វើសកម្មភាពអស់រយៈពេល1ឆ្នាំ យាន Chandrayaan-2 បង្កើតបានផែនទីជិត4លានគីឡូម៉ែត្រក្រឡានៃផ្ទៃដីលើឋានព្រះចន្ទ។ មួយក្នុងចំណោមតំបន់ដែលគួរចាប់អារម្មណ៍នោះគឺតំបន់បាតខ្ទះ Balmer-Kapteyn ដែលមានស្រទាប់ដីនៅពីលើស្រទាប់ថ្ម basalt ដ៏ចំណាស់។ ទីនេះបង្ហាញអំពីការប្ដូរផ្លាស់ ក្រោយពីមានអាចម៍ផ្កាយជាច្រើនបានធ្លាក់ទៅលើផ្ទៃដីនៃឋានព្រះចន្ទ បង្កើតបានជារណ្ដៅអាចម៍ផ្កាយយ៉ាងច្បាស់។
Chandrayaan-2 បានផ្ដិតយករូបភាពគុណភាពខ្ពស់ និងប្រមូលទិន្នន័យបានយ៉ាងច្រើនអំពីផ្ទៃដីរបស់លោកខែ ដែលនេះនឹងជួយឱ្យអ្នកវិទ្យាសាស្ត្រយល់បន្ថែមអំពីចំណុចពិសេសរបស់ភូមិសាស្ត្រ និងអាចសិក្សាអំពីទីតាំងចុះចតសម្រាប់យាននានាក្នុងពេលអនាគត។
ប្រព័ន្ធរ៉ាដារបស់ Chandrayaan-2 កំពុងបន្តសង្កេតមើលទឹកកកនៅត្រង់តំបន់ប៉ូលនានារបស់ព្រះចន្ទ ដែលវាអាចក្លាយជាធនធានដ៏មានតម្លៃសម្រាប់បេសកកម្មបន្ទាប់។ ក្រុមអ្នកវិទ្យាសាស្ត្រកំពុងតែវិភាគទៅលើទិន្នន័យពីយានឃ្លាំមើលព្រះចន្ទ (LRO) របស់ NASA និង Chandrayaan-2 ដើម្បីយល់បន្ថែមអំពីការកកើត និងទីតាំងរបស់ទឹកកកនៅលើព្រះខែ។
Chandrayaan-2 របស់ឥណ្ឌាថែមទាំងទទួលបានជោគជ័យជាច្រើនផ្សេងទៀត ដូចជាការរកឃើញស្លាកស្នាមវត្ថុធាតុ argon-40 ការបង្កើតផែនដីរ៉ែនៅលើតំបន់មួយចំនួននៃឋានព្រះចន្ទ និងតាមដានសកម្មភាពរបស់ព្រះអាទិត្យដោយប្រយោលផងដែរ។
កាលពីខែមករាឆ្នាំ2020នេះ ឥណ្ឌាក៏ធ្លាប់បានអះអាងថា នឹងបាញ់បង្ហោះយានអវកាស Chandrayaan-3 ឡើងទៅកាន់ទីអវកាស ប៉ុន្តែមិនទាន់បានកំណត់ពេលវេលាជាក់លាក់នៅឡើយ។ គួររំឭកថា Chandrayaan-1 ដែលជាយានអវកាសព្រះចន្ទដំបូងរបស់ឥណ្ឌា ត្រូវបានបាញ់បង្ហោះកាលពីខែតុលា2008 និងបានផ្អាកដំណើរការកាលពីខែសីហាឆ្នាំ2019៕
ប្រភព៖ Space
August 22, 2020
សហអាមេរិកត្រូវបង្ខំជម្លៀសយន្តហោះយុទ្ធសាស្ត្ររាប់សិបគ្រឿង ដោយសារភ្លើងឆេះព្រៃ
ទិដ្ឋន័យនៅលើទំព័រតាមដានដំណើរហោះហើររបស់យន្តហោះ ADSB Exchange កាលពីយប់ថ្ងៃទី19សីហា បានបង្ហាញថា យន្តហោះរាប់សិបគ្រឿងបានហោះចេញពីអាកាសយានដ្ឋានយោធា Travis នៅក្នុងរដ្ឋ California សហរដ្ឋអមេរិក និងហោះទៅកាន់មូលដ្ឋានទ័ពអាកាសផ្សេងៗនៅភាគខាងជើង។ យ៉ាងហោចណាស់មានយន្តហោះចាក់ប្រេង KC-10 Extender យន្តហោះដឹកទំនិញយុទ្ធសាស្ត្រ C-17 Globmaster III និង C-5M Galaxy ចំនួន10គ្រឿង បានបង្ហាញខ្លួននៅលើអាកាសក្នុងអំឡុងពេលមិនដល់1ម៉ោង។
Armada Farr ដែលជាអ្នកនាំពាក្យនៃមូលដ្ឋានទ័ពអាកាស Travis បានឱ្យដឹងថា “យន្តហោះជិត30គ្រឿងត្រូវបានជម្លៀស។ យន្តហោះមួយចំនួនត្រូវនៅកន្លែងដដែលដោយសារតែកំពុងស្ថិតក្នុងអំឡុងពេលថែទាំ ឬមិនមានមានលទ្ធភាពយន្តហោះដោយសុវត្ថិភាព”។ វីដេអូដែលបានចែករំលែកនៅលើបណ្ដាញសង្គម Facebook បង្ហាញថា យន្តហោះ C-17 ជាច្រើនគ្រឿងកំពុងចតនៅក្នុងព្រលានយន្តហោះ Travis នៅល្ងាចថ្ងៃទី19សីហា ហើយនៅខាងក្រោយគឺជាផ្ទៃអាកាសដែលពេញទៅដោយផ្សែងនៃភ្លើងឆេះព្រៃ។
ការិយាល័យសារព័ត៌មាននៃមូលដ្ឋាន Travis បានឱ្យដឹងថា “មេបញ្ជាការនៃមូលដ្ឋានទ័ពបានចេញបញ្ជាឱ្យជម្លៀសបុគ្គលិកដែលមិនមានភារកិច្ចចាំបាច់ ទៅតាមការស្នើរបស់នាយកដ្ឋានគ្រប់គ្រងអគ្គិភ័យស្រុក Solano ដើម្បីទប់ទល់នឹងភ្លើងព្រៃនៅក្បែរទីក្រុង Fairfield និង Vacaville”។
ភ្លើងឆេះព្រៃចំនួន23កន្លែងត្រូវបានរាយការណ៍កាលពីថ្ងៃទី19សីហា នៅពាសពេញរដ្ឋ California។ តំបន់ឈូងសមុទ្រ San Francisco មានភ្លើងឆេះព្រៃចំនួន15ករណី ក្នុងនោះភាគច្រើនមិនអាចគ្រប់គ្រងបាន។ មនុស្សរាប់ពាន់នាក់ត្រូវបានស្នើឱ្យជម្លៀសខ្លួនចេញពីស្រុក Napa និងពីបណ្ដាកូនភ្នំនៅលើជ្រលង Silicon នៃស្រុក Santa Cruz និងស្រុក San Mateo។
នៅភាគខាងត្បូង California ភ្លើងព្រៃជាច្រើនកន្លែងត្រូវបានរាយការណ៍ថាកើតឡើងនៅក្នុងស្រុក Ventura និង Riverside ដែលបានកម្ទេចព្រៃឈើចំនួនជាង17,000ហិកតា នៅតំបន់អភិរក្ស Mojave។ កាលពីថ្ងៃទី19សីហា អ្នកបើកបរឧទ្ធម្ភាគចក្រម្នាក់បានបាត់បង់ជីវិតនៅពេលកំពុងចូលរួមពន្លត់ភ្លើងព្រៃនៅឯស្រុក Fresno។
ខាងក្រោមនេះគឹជាទិដ្ឋភាពនៃភ្លើងឆេះព្រៃដែលមើលពីលើអាកាស៖
ប្រភព៖ Sci Tech Daily,Aviationist
August 22, 2020
ប្រធានាធិបតីម៉ាលីប្រកាសចុះចេញពីតំណែង ក្រោយត្រូវកងទ័ពចាប់ខ្លួន
ប្រធានាធិបតីនៃប្រទេសម៉ាលី លោក Ibrahim Boubacar Keita វ័យ75ឆ្នាំ បានប្រកាសលាងលែងពីតំណែងភ្លាមៗនៅព្រឹកនេះ ក្រោយរយៈពេល1ថ្ងៃបន្ទាប់ពីមានរដ្ឋប្រហារយោធាកើតឡើង។
“នៅក្នុងគ្រានេះ ខ្ញុំសូមអរគុណដល់ប្រជាជនម៉ាលីទាំងអស់ដែលបានគាំទ្រខ្ញុំ ក៏ដូចជាមនោសញ្ចេតនាដ៏កក់ក្ដៅរបស់ពួកគេសម្រាប់ខ្ញុំក្នុងរយៈពេលច្រើនឆ្នាំមកនេះ។ ខ្ញុំក៏សូមប្រកាសប្រាប់ប្រជាជនអំពីការបោះបង់តំណែងរបស់ខ្ញុំ” នេះជាប្រសាសន៍របស់ប្រធានាធិបតី Keita ដែលថ្លែងនៅលើកញ្ចក់ទូរទស្សន៍ជាតិ ពីបន្ទាយទាហាននៅតំបន់ Kati ជាយក្រុង Bamako ជាទីដែលលោកត្រូវបានឃុំខ្លួនមុននេះ។
ដោយពាក់ម៉ាស់ និងទំនងជាកំពុងអស់កម្លាំង ប្រធានាធិបតី Keita ឱ្យដឹងថា រដ្ឋាភិបាល និងសភារបស់ប្រទេសម៉ាលីនឹងត្រូវរំលាយ។ លោកថ្លែងថា “បើសិនជាថ្ងៃនេះ មួយផ្នែកនៃកងកម្លាំងប្រដាប់អាវុធរបស់យើងសម្រេចចិត្តថា ការធ្វើអន្តរាគមន៍គឺជារឿងចាំបាច់ តើខ្ញុំមានជម្រើសដែរឬ? ខ្ញុំមិនចង់ឃើញមានការបង្ហូរឈាមនោះឡើយ”។
សេចក្ដីប្រកាសនេះ ត្រូវបានធ្វើឡើងក្រោយរយៈពេល1ថ្ងៃបន្ទាប់ពីក្រុមទាហានបះបោរបានចាប់ខ្លួនលោក Keita និងនាយករដ្ឋមន្ត្រី Boubou Cisse ក្រោយពីមានទាហានបះបោរនៃបន្ទាយ Kati នៅជាយក្រុង Bamako បានចាប់ផ្ដើមឡោមព័ទ្ធចាប់ខ្លួនក្រុមមន្ត្រីស៊ីវិលជាន់ខ្ពស់ និងក្រុមមន្ត្រីយោធានៃប្រទេសនេះ។
បច្ចុប្បន្ន មិនទាន់ដឹងច្បាស់ថា អ្នកណាជាមេបះបោរនៃការចាប់ខ្លួននេះ ហើយអ្នកណានឹងឡើងដឹកនាំប្រទេសនៅពេលប្រធានាធិបតី Keita អវត្តមាន។ ជាងនេះ គេនៅមិនទាន់ដឹងអំពីរចនាសម្ព័ន្ធរបស់ក្រុមនេះដែរ។ អ្នកនាំពាក្យម្នាក់របស់កងទ័ពម៉ាលីបានថ្លែងថា លោកមិនទាន់ទទួលបានព័ត៌មាននេះនៅឡើយ។
សម្ព័ន្ធមិត្ត M5-RFP ជាក្រុមដែលនៅពីក្រោយបាតុកម្មធំៗនៅប្រទេសអាហ្វ្រិកមួយនេះដែលធ្លាប់បានស្នើឱ្យប្រធានាធិបតី Keita ចុះចេញពីតំណែង ពេលនេះក៏បានសម្ដែងការគាំទ្រចំពោះសកម្មភាពរបស់ក្រុមទាហានបះបោរនេះដែរ។ អ្នកនាំពាក្យរបស់ក្រុម Nouhoum Togo នៃសម្ព័ន្ធមិត្ត M5-RFP បានឱ្យដឹងថា នេះ “មិនមែនជារដ្ឋប្រហារយោធានោះទេ តែវាគឺជាការក្រោកឈររបស់ប្រជាជន”។
មនុស្សរាប់រយនាក់ដែលជាក្រុមបាតុករ បាននាំគ្នាចេញមកកាន់ដងផ្លូវនៅរដ្ឋធានី Bamako ដើម្បីអបអរសាទរ ក្រោយពីបានទទួលដំណឹងថា Keita ត្រូវបានចាប់ខ្លួន។ ពួកគេបានចោទប្រធានាធិបតីថា បានប្រព្រឹត្តអំពើពុករលួយ និងធ្វើឱ្យមានការអន់ថយផ្នែកសន្តិសុខនៅភាគខាងជើងនិងភាគកណ្ដាលនៃប្រទេសម៉ាលី ជាកន្លែងដែលក្រុមប្រដាប់អាវុធអ៊ីស្លាមកំពុងធ្វើសកម្មភាព។
លោក Keita បានឡើងកាន់អំណាចចាប់ពីឆ្នាំ2013 និងបានជាប់ឆ្នោតម្ដងទៀតនៅឆ្នាំ2018។ ប៉ុន្តែ ពលរដ្ឋប្រទេសនេះ មានការមិនពេញចិត្តកាន់តែខ្លាំងឡើងៗ នៅចំពោះមុខភាពអន់ខ្សោយរបស់រដ្ឋាភិបាល អំពើពុករលួយ និងសេដ្ឋកិច្ចអនថយ។ ក្រុមបាតុករ កាលពីខែមុនបាននាំគ្នាចេញតវ៉ា ក្រោយពីតុលាការធម្មនុញ្ញបានធ្វើបញ្ច្រាសទៅនឹងលទ្ធផលបណ្ដោះអាសន្ននៃការបោះឆ្នោតសភាជាតិដែលត្រូវបានធ្វើឡើងកាលពីខែមិនា និងខែមេសា ក្នុងនោះ បក្សរបស់លោក Keita បានទទួលបរាជ័យ។
ការបះបោររបស់ក្រុមទាហានធ្លាប់បានកើតឡើងនៅប្រទេសម៉ាលីកាលពីឆ្នាំ2012 ដោយចាប់ផ្ដើមចេញពីបន្ទាយ Kati ក្រោយមកបានបណ្ដាលឱ្យមានរដ្ឋប្រហារទម្លាក់ប្រធានាធិបតី ដែលកាលណោះគឺលោក Amadou Toumani Toure។ បញ្ហានេះបានរុញច្រានតំបន់ភាគខាងជើងប្រទេសឱ្យធ្លាក់ទៅក្នុងកណ្ដាប់ដៃរបស់ក្រុមប្រដាប់អាវុធអ៊ីស្លាម។ មួយឆ្នាំក្រោយមក កងកម្លាំងរបស់ប្រទេសបារាំងក៏បានធ្វើអន្តរាគមន៍រុញច្រានក្រុមប្រដាប់អាវុធនេះឱ្យទៅម្ខាង។
ប្រភព៖ Reuters, Guardian
August 19, 2020