Author: សឿន សំណាង

ប្រាក់ចំណេញក្នុងឆ្នាំសារពើពន្ធ2019 ដែលបញ្ចប់នៅក្នុងខែមីនា2019 របស់ Medialink បានកើនឡើង12% ដែលស្មើនឹង106លានដុល្លារហុងកុង (14លានដុល្លារអាមេរិក)។ ចំណូលរបស់ក្រុមហ៊ុនក៏កើនឡើងជាង50% ស្មើនឹង476លានដុល្លារហុងកុង។ រយៈពេល3ឆ្នាំ គិតមកដល់ឆ្នាំ2019 ទាំងប្រាក់ចំណូល និងប្រាក់ចំណេញរបស់ Medialink សុទ្ធតែកើនឡើងជិត300%។

កាលពីខែមករា2020 អ្នកជំនួញ Lovinia Chiu បានត្រលប់ពីសហរដ្ឋអាមេរិកមកកាន់ហុងកុងដើម្បីដោះស្រាយបញ្ហាកំពុងប្រឈមនៅទូទាំងពិភពលោក នោះគឺការរកវិធីដើម្បីបញ្ចៀសការបិទក្រុមហ៊ុននៅក្នុងរដូវ COVID-19។

ក្រុមហ៊ុន Medialink របស់អ្នកស្រី Lovinia Chiu បាននិងកំពុងផ្ដោតទៅលើការទិញកម្មសិទ្ធិបញ្ញាផ្នែកគំនូរជីវចលន៍ពីប្រទេសជប៉ុន មកលក់ឱ្យដៃគូនានានៅប្រទេសចិនដើម្បីទទួលបានចំណាញ។

អ្នកស្រី Lovinia Chiu បានឱ្យដឹងថា៖ នៅក្នុងសម័យ COVID-19 នេះ យើងមិនអាចទៅពិភាក្សាជាមួយអតិថិជន ដូច្នេះហើយ ឱកាសរកស៊ីមួយចំនួនត្រូវបានបាត់បង់”។

បច្ចុប្បន្ន ប្រាក់ចំណូលប្រមាណជា80% របស់ក្រុមហ៊ុន Medialink គឺបានមកពីការទិញកម្មសិទ្ធនៃភាពយន្តគំនូរជីវចលន៍ពីប្រទេសជប៉ុន មកលក់ឱ្យក្រុមហ៊ុនធំៗនៅប្រទេសចិន ក្នុងនោះមានដូចជាក្រុមហ៊ុន Bilibili និង iQiyi ជាដើម។ល។

ក្រុមហ៊ុន Medialink ឱ្យដឹងថា នៅក្នុងឆ្នាំសារពើពន្ធ2020ដែលបានបញ្ចប់ក្នុងខែមីនា2020កន្លងទៅ ប្រាក់ចំណូលរបស់ក្រុមហ៊ុននេះបានថយចុះ1/3 នៅសល់ត្រឹម315លានដុល្លារហុងកុង ដែលស្មើនឹង40លានដុល្លារអាមេរិក។ ប្រាក់ចំណេញរបស់ក្រុមហ៊ុនក៏ថយចុះ66% នៅសល់ត្រឹម36លានដុល្លារហុងកុង។

មុនពេល COVID-19 មកដល់ ប្រាក់ចំណេញក្នុងឆ្នាំសារពើពន្ធ2019 ដែលបញ្ចប់នៅក្នុងខែមីនា2019 របស់ Medialink បានកើនឡើង12% ដែលស្មើនឹង106លានដុល្លារហុងកុង (14លានដុល្លារអាមេរិក)។ ចំណូលរបស់ក្រុមហ៊ុនក៏កើនឡើងជាង50% ស្មើនឹង476លានដុល្លារហុងកុង។ រយៈពេល3ឆ្នាំ គិតមកដល់ឆ្នាំ2019 ទាំងប្រាក់ចំណូល និងប្រាក់ចំណេញរបស់ Medialink សុទ្ធតែកើនឡើងជិត300%។

ការលក់មូលបត្រ (IPO) ដំបូងរបស់ Medialink កាលពីឆ្នាំ2019 តម្លៃមូលបត្ររបស់ក្រុមហ៊ុននេះបានឡើងថ្លៃ15ដង បើធៀបនឹងតម្លៃលក់ដំបូង ដែលនេះបានជួយឱ្យទុនសរុបរបស់ Medialink កើនដល់600លានដុល្លារហុងកុង (77,417,880 ដុល្លារអាមេរិក)។

ក៏ប៉ុន្តែ ដោយសារតែ COVID-19 ពេលនេះ Medialink ត្រូវគិតដល់ការបង្កើតផ្សារអនឡាញដើម្បីដាក់លក់ផលិតផលដែលទាក់ទងនឹងយីហោភាពយន្តតុក្កតា ដូចជាសម្លៀកបំពាក់ ប្រដាប់ប្រដាលេងកម្សាន្ត និងផលិតផលិតផ្សេងៗទៀត។

បច្ចុប្បន្ន ប្រទេសចិនគឺជាទឹកដីដែលមានសក្ដានុពលសម្រាប់ Medialink ក្នុងការវាយលុកទីផ្សារ ពិសេសគឺក្រុមយុវជនក្មេងៗ និងកុមារដែលរងឥទ្ធិពលពីខ្សែភាពយន្តជីវចលន៍ជប៉ុន។

ឆ្នាំ2018 ជំនួញផ្នែកភាពយន្តតុក្កតា សៀវភៅរឿងព្រេង ហ្គេមអេឡិចត្រូនិច និងផលិតផលនានាដែលទាក់ទិននឹងវា ដែលត្រូវបានហៅថា ACG រកបានចំណូលសរុប6.9ពាន់លានដុល្លារអាមេរិកពីអ្នកគាំទ្រជាង400លាននាក់នៅប្រទេសចិន ដែលតួលេខនេះបានកើន10% ធៀបនឹងឆ្នាំ2017។

អំពីស្ថាបនិករបស់ក្រុមហ៊ុន Medialink៖

បន្ទាប់ពីបានបញ្ចប់ការសិក្សានៅសាកលវិទ្យាល័យ Shue Yan នៅហុងកុងកាលពីឆ្នាំ1987 អ្នកស្រី Chiu ក៏បានធ្វើជាលេខាផ្នែកទីផ្សារឱ្យក្រុមហ៊ុនផ្សព្វផ្សាយតូចមួយ។ ក្រោយមក អ្នកស្រីក៏បានក្លាយជានាយកផ្នែកជំនួញនៅក្រុមហ៊ុន Star TV នៅទីក្រុងហុងកុងក្នុងឆ្នាំ1993។

ប៉ុន្តែ 1ឆ្នាំក្រោយមក អ្នកស្រីក៏បានសម្រេចចិត្តបោះបង់ការងារនោះ ហើយប្រើប្រាស់ខ្ទង់ប្រាក់100,000ដុល្លារហុងកុង (12,900ដុល្លារអាមេរិក) ដើម្បីបង្កើត Medialink។ បច្ចុប្បន្ន ភាគហ៊ុនដែលស្ថាបនិក Chiu កំពុងកាន់កាប់ក្នុងក្រុមហ៊ុន Medialink មានតម្លៃឡើងដល់ជាង20លានដុល្លារអាមេរិក។

ជំនួញដំបូងរបស់សេដ្ឋិនី Chiu នោះគឺការទិញកម្មសិទ្ធិបញ្ហារបស់ខ្សែភាពយន្តជីវចលន៍មួយរបស់ប្រទេសកាណាដា ប៉ុន្តែ ភ្លាមៗនោះ អ្នកស្រីបានដឹងច្បាស់ថាការពេញនិយមភាពយន្តតុក្កតាជប៉ុននៅប្រទេសចិនទើបជា “ទឹកដីដ៏មានជីជាតិ” សម្រាប់អ្នកស្រី។ ឆ្នាំ1994 អ្នកជំនួញរូបនេះបានចំណាយពេល5ថ្ងៃនៅរាជធានីតូខ្យូ (Tokyo) ដើម្បីពិភាក្សាជាមួយដៃគូរកស៊ី។

នៅក្នុងគ្រានោះ ផលិតកម្មនានាដែលមានជំនាញខាងផលិតភាពយន្តគំនូរជីវចលន៍នៅជប៉ុន សុទ្ធតែមិនសូវមានទំនុកចិត្តជាមួយនឹង Startup វ័យក្មេងដូចជា Chiu។ និយាយដល់រឿងនេះ អ្នកស្រី Chiu ប្រាប់ថា “ខ្ញុំពិតជាអស់សង្ឃឹមខ្លាំងណាស់” កាលពីពេលនោះ។

រហូតដល់ជិត1ឆ្នាំក្រោយមក ទើបអ្នកជំនួញរូបនេះ រកបានដៃគូ និងការជួញដូរជាលើកដំបូងសម្រាប់ Medialink នៅប្រទេសជប៉ុន នោះគឺការទទួលបានសិទ្ធិចែកចាយផ្ដាច់មុខពីផលិតកម្ម Sogo Vision។ អ្នកស្រីថ្លែងថា ជោគជ័យនេះគឺបានមកដោយសារមានការយល់ដឹងទូលំទូលាយអំពីទីផ្សារភាពយន្តតុក្កតា និងចំណង់ចំណូលចិត្តរបស់ក្រុមយុវវ័យ និងកុមារនៅប្រទេសចិន។

ប៉ុន្មានឆ្នាំក្រោយមកទៀត Medialink ក៏បង្កើតបានបញ្ជីឈ្មោះដៃគូរបស់ខ្លួននៅជប៉ុន ក្នុងនោះក៏មានក្រុមហ៊ុន Aniplex, Avex Pictures និង Kadokawa Corp ផងដែរ។ គិតមកដល់ចុងឆ្នាំ2019 Medialink បានកាន់កាប់កម្មសិទ្ធិនៃខ្សែភាពយន្តគំនូរជីវចលន៍ចំនួន386រឿង។

ជោគជ័យរបស់ Medialink ក៏មានការរួមចំណែកពីប្អូនស្រីរបស់អ្នកស្រី Chiu ផងដែរ នោះគឺនាង Noletta។ នាង Noletta បានចូលធ្វើការឱ្យក្រុមហ៊ុននេះចាប់ពីឆ្នាំ1994 ក្រោយពីបានបញ្ចប់ការសិក្សាផ្នែកភាពយន្ត និងថតរូបនៅសាលា Southerns Illinois University សហរដ្ឋអាមេរិក។

Noletta ដែលបច្ចុប្បន្នជានាយិកាផ្នែកចែកចាយរបស់ Medialink ថ្លែងថា៖ “កាលនោះ ខ្ញុំមិនយល់អ្វីអំពីជំនួញកម្មសិទ្ធិបញ្ហាផ្នែកភាពយន្តគំនូរជីវចលន៍អ្វីសោះឡើយ។ យើងត្រូវស្រាវជ្រាវដោយខ្លួនឯងជាជំហានៗ”។

ក្រៅពីភាពយន្តគំនូរជីវចលន៍ បច្ចុប្បន្ន Medialink ថែមទាំងធ្វើជំនួញផ្នែកកម្មសិទ្ធិរូបថតរបស់តួអង្គក្នុងខ្សែភាពយន្តតុក្កតានានាដែលបោះពុម្ភនៅលើផលិតផលផ្សេងៗផងដែរ ដូចជាឧបករណ៍សម្រាប់លេងកម្សាន្ត សម្លៀកបំពាក់ និងវត្ថុអនុស្សាវរីយ៍ជាដើម។ គិតមកដល់ឆ្នាំ2019 Medialink មានទំនិញបែបនេះប្រមាណជា114មុខ កំពុងដាក់លក់ក្នុងទីផ្សារ។ ក្រៅពីប្រទេសចិន Medialink ក៏មានមុខជំនួញដូចគ្នានេះនៅប្រទេសជាច្រើនទៀត ដូចជាម៉ាឡេស៊ី សិង្ហបុរី និងប្រទេសថៃជាដើម។

តាមគម្រោង Medialink នឹងដំណើរការគេហទំព័រមួយដែលដាក់លក់ផលិតផលដែលមានភ្ជាប់រូបភាពមានកម្មសិទ្ធិនៃតួអង្គក្នុងខ្សែភាពយន្តគំនូរជីវចលន៍ផ្សេងៗនាពេលដ៏ខ្លីខាងមុខ៕

ប្រភព៖ Forbes

ពាក្យស្លោក (Slogan) “រសជាតិឆ្ងាញ់នៅលើគ្រប់ម្រាមដៃ” (It’s Finger Lickin’ Good) របស់ក្រុមហ៊ុន KFC ត្រូវបានវាយតម្លៃថា មិនសមស្របជាមួយនឹងស្ថានភាពនៃសម័យCOVID-19 ដូច្នេះ វាក៏ត្រូវបានលុបបំបាត់ជាបណ្ដោះអាសន្ន។

ក្រុមហ៊ុនលក់អាហារចម្អិនលឿន (fast food) KFC កាលពីម្សិលមិញ (24សីហា) បានប្រកាសថា ផ្អាកប្រើប្រាស់ពាក្យស្លោក It’s Finger Lickin’ Good នៅក្នុងការផ្សាយពាណិជ្ជកម្មនានារបស់ខ្លួនជាបណ្ដោះអាសន្ន។ មូលហេតុនៃប្រការនេះ គឺដោយសារជាច្រើនខែមកនេះ ក្រុមមន្ត្រីសុខាភិបាលបានណែនាំឱ្យប្រជាជន ឈប់យកដៃទៅប៉ះមុខមាត់ ដើម្បីចៀសវាងការឆ្លងវីរុសCOVID-19។

នាយកទីផ្សារសកលរបស់ KFC អ្នកស្រី Catherine Tan-Gillespie បានឱ្យដឹងថា៖ “យើងកំពុងស្ថិតក្នុងកាលៈទេសៈពិសេស។ ពាក្យស្លោកនេះលែងសមស្របជាមួយនឹងស្ថានភាពបច្ចុប្បន្នទៀតហើយ”។ ប៉ុន្តែ ក្រុមហ៊ុននេះបានអះអាងថា បញ្ជីមុខអាហារនឹងមិនប្ដូរផ្លាស់នោះទេ ចំណែកពាក្យស្លោកនេះនឹងត្រលប់មកវិញនៅក្នុងពេលវេលាដ៏សមស្រប”។

KFC បានបិទបាំងពាក្យស្លោកនេះនៅលើផ្ទាំងផ្សាយពាណិជ្ជកម្មចាស់ៗរបស់ខ្លួន និងបានបង្ហោះវីដេអូមួយអំពីករណីនេះនៅលើ Youtube។ ចំណែក CNN វិញ យល់ថា សេចក្ដីប្រកាសនេះ គ្រាន់តែជាយុទ្ធសាស្ត្រទីផ្សារតែប៉ុណ្ណោះ។

ដោយសារតែ COVID-19 ក្រុមហ៊ុន KFC បានបិទទ្វារហាងជាច្រើនកាលពីខែមីនា និងបានលើកទឹកចិត្តឱ្យអតិថិជន ទិញអាហារយកទៅញ៉ាំនៅឯផ្ទះ។

ក្រុមហ៊ុនមេរបស់ KFC គឺក្រុមហ៊ុន Yum! Brands បានឱ្យដឹង ក្រុមហ៊ុននេះរកបានប្រាក់ចំណេញសរុប1.2ពាន់លានដុល្លារនៅក្នុងត្រីមាសទី2 ដែលនេះបានថយចុះ8.5% បើធៀបនឹងអំឡុងពេលដូចគ្នាកាលពីឆ្នាំមុន។ ក៏ប៉ុន្តែ ស្ថានភាពនេះកំពុងល្អប្រសើរឡើងវិញជាបណ្ដើរៗហើយ ដោយសារតែប្រទេសជាច្រើនបានចាប់ផ្ដើមដំណើរការសេដ្ឋកិច្ចឡើងវិញ៕

ប្រភព៖ CNN

អ្នកជំនាញម្នាក់បានប្រើប្រាស់ AI (បញ្ញាសិប្បនិម្មិត) ដើម្បីបន្ថែមពណ៌ និងសម្រួលទម្រង់ដើមឱ្យមកជាទម្រង់ទំនើបយ៉ាងស្រស់ស្អាតដោយជោគជ័យទៅលើវីដេអូប្រភេទសខ្មៅមួយត្រូវបានថតតាំងពីឆ្នាំ1902 ដែលគិតមកដល់បច្ចុប្បន្ន (2020) វីដេអូនេះមានអាយុ118ឆ្នាំទៅហើយ។

Neural Love ដែលជាក្រុមហ៊ុនមួយត្រូវបានបង្កើតឡើងដើម្បីស្ដារឡើងវិញនូវវីដេអូចាស់ៗដែលមានអាយុកាលរាប់សិប ឬរាប់រយឆ្នាំ ឱ្យមានពណ៌ស្រស់ស្អាតដូចបច្ចុប្បន្ន។ អ្នកជំនាញឈ្មោះ Denis Shiryaev មកពីក្រុមហ៊ុនខាងលើ បានធ្វើការស្ដារ និងកែលម្អវីដេអូបុរាណមួយដែលមានថិរវេលា2នាទីដែលត្រូវបានរក្សាទុកនៅក្នុងសារមន្ទីរសិល្បៈទំនើបរបស់​សហរដ្ឋ​អាមេរិក​ (MoMA)។ វីដេអូនេះត្រូវបានថតពីលើរថភ្លើងព្យួរ Wuppertaler Schwebebahn ដ៏ល្បីឈ្មោះ នៅទីក្រុង Wuppertal ប្រទេសអាល្លឺម៉ង់ កាលពីឆ្នាំ1902។

MoMA បានឱ្យដឹងថា វីដេអូនេះ ថតដោយខ្សែអាតទំហំ68មម របស់ក្រុមហ៊ុនផលិតភាពយន្តអាមេរិកាំង Biograph ទើបវាមានរូបភាពច្បាស់ជាងប្រភេទខ្សែអាតទំហំតូច ដូចជា 16មម ឬ35មម កាលពីជំនាន់នោះ។

ដើម្បីស្ដារ និងកែលម្អទិដ្ឋភាពក្នុងវីដេអូនេះ Shiryaev បានបញ្ចូលឈុតវីដេអូនេះទៅក្នុងប្រព័ន្ធមួយដែលប្រើប្រាស់បណ្ដាញ neural មានបំពាក់បច្ចេកវិទ្យាបញ្ញាសិប្បនិម្មិត ដើម្បីដំឡើងទិដ្ឋភាពឱ្យទៅដល់កម្រិត 4K។ ក្រោយមក ប្រព័ន្ធនេះក៏បន្តបន្ថែមពណ៌ បង្កើនលំនឹងនៃទិដ្ឋភាព និងបង្កើនទំហំស៊ុមរូបភាពឱ្យឡើងដល់60fps។

ជាចុងក្រោយ Shiryaev ក៏បានបន្ថយល្បឿនរបស់វីដេអូនេះឱ្យយឺតជាងមុន ដើម្បីធ្វើឱ្យវាមានលក្ខណៈដូច​ជា​ទិដ្ឋភាព​នា​បច្ចុប្បន្ន។ ​បន្ទាប់ពីបានបញ្ចប់ការស្ដារ និងកែលម្អរួចរាល់ វីដេអូនេះមានថិរវេលា4នាទី ជាមួយនឹងពណ៌យ៉ាងស្រស់ស្អាត រួមនឹងភាពច្បាស់កម្រិតខ្ពស់ ចំណែកលំនឹងក៏បានប្រសើរជាងមុន។

Wuppertaler Schwebebahn គឺជាផ្លូវដែកព្យួរដែលមានវ័យចំណាស់បំផុតក្នុងពិភពលោក និងចម្លែកជាងគេនៅប្រទេសអាល្លឺម៉ង់។ ប្រព័ន្ធរថភ្លើងព្យួរនេះ ត្រូវបានរចនាឡើងដោយ Eugen Langen និងសាងសង់តាំងពីឆ្នាំ1897ដល់ឆ្នាំ1903 និងត្រូវបានបើកឱ្យប្រើប្រាស់ចាប់ពីឆ្នាំ1901។ Wuppertaler Schwebebahn មានប្រវែង13គីឡូម៉ែត្រ។

បច្ចុប្បន្ន Wuppertaler Schwebebahn នៅតែត្រូវបានប្រើប្រាស់ជាមធ្យោបាយធ្វើដំណើរសាធារណៈចម្បងរបស់អ្នកស្រុក។ យោងតាមស្ថិតិឆ្នាំ2008 ប្រព័ន្ធផ្លូវដែកនេះ បានដឹកអ្នកដំណើរប្រមាណជា25លាននាក់ជារៀងរាល់ឆ្នាំ៕

ប្រភព៖ PetaPixel

Alexandr Wang គឺជារឿងជោគជ័យដែលលេចធ្លោជាងគេបង្អស់នៅជ្រលងភ្នំ Silicon៖ “ឈប់រៀនពីសាលា MIT (Massachusetts Institute of Technology) ដ៏ល្បីឈ្មោះ ដើម្បីបង្កើតក្រុមហ៊ុនក្នុងវ័យ19ឆ្នាំ និងទទួលបានជោគជ័យមកដល់សព្វថ្ងៃ។

កាលពីឆ្នាំទៅ2019 ក្រុមហ៊ុនរបស់ Alexandr Wang ដែលមានឈ្មោះថា Scale AI បានក្លាយជាក្រុមហ៊ុនថ្មីដែលមានតម្លៃលើសពី1ពាន់លានដុល្លារ ដែលគេហៅថា Unicorn បន្ទាប់ពីបានធ្វើសកម្មភាពរយៈពេលតែ3ឆ្នាំប៉ុណ្ណោះ។ ក្នុងអំឡុងពេលនោះ Scale AI ប្រមូលទុនបាន123លានដុល្លារអាមេរិក។ ក្រុមអ្នកវិនិយោគសំខាន់របស់ Scale AI រួមមានដូចជា ស្ថាបនិក និងជា CEO របស់ក្រុមហ៊ុន Dropbox ក្រុមហ៊ុន Quora និងសហស្ថាបនិក2រូបរបស់ Instagram ផងដែរ។

បច្ចុប្បន្ន ក្រោយពីប្រមូលទុនបន្ថែមបាន100លានដុល្លារ និងត្រូវបានកំណត់តម្លៃជាង1ពាន់លានដុល្លារ ក្រុមហ៊ុនរបស់ Wang មានបុគ្គលិកចំនួន180នាក់ និងកំពុងធ្វើការជាមួយដៃគូធំៗជាច្រើន ក្នុងនោះមានក្រុមហ៊ុន Airbnb, Pinterest, Samsung, Lyft និងក្រុមហ៊ុន Toyota ជាដើម។ល។

ប្រការដែលគួរឱ្យចាប់អារម្មណ៍បំផុតអំពីភាពជោគជ័យយ៉ាងឆាប់រហ័សរបស់ Wang នោះគឺប្រការដែលគាត់មិនធ្លាប់មានគំនិតបង្កើត Scale AI សោះឡើយ។ អ្វីដែលគាត់ចង់ធ្វើកាលពីនៅជាអ្នកសរសេរកូដវ័យជំទង់ គឺចង់ “បង្កើតអ្វីមួយ” ដោយខ្លួនឯង។

ក្នុងវ័យ19ឆ្នាំ Wang បានរកឃើញបញ្ហាបច្ចេកទេសមួយ៖ “បញ្ញាសិប្បនិម្មិត (AI) នឹងឆ្លាតវៃបាន លុះត្រាតែមានមនុស្សម្នាក់ជួយកំណត់ឱ្យបានច្បាស់ថា វាកំពុងត្រូវបានហ្វឹកហាត់ប្រកបដោយភាពត្រឹមត្រូវបំផុត”។ ដូច្នេះ Wang ក៏បានសម្រេចចិត្តបង្កើតថ្នាលបណ្ដុះបណ្ដាលមួយទាក់ទិននឹងដំណោះស្រាយនានាដោយប្រើប្រាស់ទិន្នន័យដែលអតិថិជនប្រមូលបាន ប្រកបដោយភាពជាក់លាក់ខ្ពស់ និងត្រូវបានបញ្ជាក់ដោយមនុស្ស។

ឧទាហរណ៍៖ បើសិនជាអតិថិជនចង់បង្កើតដំណោះស្រាយដើម្បីជួយឱ្យរថយន្តបើកបរស្វ័យប្រវត្តរបស់ពួកគេ ឱ្យស្គាល់រាល់រថយន្ត អ្នកថ្មើរជើង និងអ្នកជិះកង់នៅលើដងផ្លូវ នោះ Scale នឹងប្រើប្រាស់រូបថត និងវីដេអូដែលរថយន្តបើកបរស្វ័យប្រវត្តទាំងនោះថតបានក្នុងអំឡុងបើកបរសាកល្បង និងធ្វើការបញ្ជាក់ជាថ្មីថា ពួកវាអាចស្គាល់ ឬដឹងច្បាស់ដែរ ឬអត់។

ក៏ប៉ុន្តែ ពេលនោះ Wang នៅមិនទាន់មានគំនិតទាក់ទិននឹងការបង្កើត Scale AI នៅឡើយ រហូតដល់ពេលបានចូលជាសមាជិកនៃក្រុម Y Combinator កាលពីឆ្នាំ2016។ Wang ឱ្យដឹងថា៖ “ពេលនោះ ខ្ញុំមានគំនិតរាប់លានផ្សេងៗគ្នា ដូចជាការជួយឱ្យគ្រប់គ្នាអាចស្វែងរកវេជ្ជបណ្ឌិតបានងាយស្រួលជាដើម”។

ទីប្រឹក្សាម្នាក់របស់ក្រុម Y Combinator បាននិយាយជាមួយ Wang ថា៖ ចូរស្វែងរកស្ថានភាពមួយដែលមនុស្សជាច្រើនកំពុងជួបប្រទះ ហើយពួកគេត្រៀមខ្លួនជាស្រេចក្នុងការបង់ប្រាក់ជូនដើម្បីទទួលបានដំណោះស្រាយ។ ក្នុងអត្ថបទមួយស្ដីអំពីវិធីដើម្បីទទួលបានគំនិតក្នុងការបើកមុខជំនួញថ្មី ស្ថាបនិករបស់ក្រុមហ៊ុន Y Combinator ធ្លាប់បានណែនាំថា៖ “ចូររស់នៅក្នុងអនាគត ហើយកសាងនូវអ្វីដែលពេលនេះវានៅមានភាពខ្វះចន្លោះ”។

បន្ទាប់ពីបានដឹងច្បាស់អំពីអនាគតដ៏ត្រចះត្រចង់នៃវិស័យបញ្ញាសិប្បនិម្មិត Wang ក៏បានផ្ដោតទៅលើវិស័យ AI នេះ។ ប៉ុន្តែ ជំនួសឱ្យការបង្កើតផលិតផល AI ជាក់លាក់ណាមួយ Wang បែរជាជ្រើសយកការបង្កើតមូលដ្ឋានដើម្បីជួយឱ្យផលិតផល AI របស់ក្រុមហ៊ុននានា មានភាពងាយស្រួលក្នុងការអភិវឌ្ឍ និងដំណើរការ។ ពេលនោះ ក្រុមហ៊ុន Scale AI ក៏ត្រូវបានបង្កើតឡើង។

ដោយសារតែជាកំពូលអ្នកសរសេរកូដវ័យក្មេង Wang មានភាពងាយស្រួលក្នុងការប្រមូលទុនវិនិយោគសម្រាប់ក្រុមហ៊ុនថ្មីរបស់ខ្លួន។ មានស្រុកកំណើតនៅទីក្រុង Los Alamos រដ្ឋ New Mexico នៃសហរដ្ឋអាមេរិក ក្នុងគ្រួសារមួយដែលមានឪពុកនិងម្ដាយជាអ្នកវិទ្យាសាស្ត្រ Wang ទទួលបានចំណេះដឹងយ៉ាងច្រើនពីពួកគេ។ Wang ដណ្ដើមបានជ័យជំនះនៅក្នុងពិធីប្រកួតប្រជែងគណិតវិទ្យា និងសរសេរកូដដែលត្រូវបានរៀបចំដោយសាលាមធ្យមសិក្សាដែល Wang កំពុងរៀន។

ប្រការនេះបាននាំឱ្យ Wang ទទួលបានចំណាប់អារម្មណ៍ពីក្រុមហ៊ុនបច្ចេកវិទ្យានានា។ ក្រោយពីបានបញ្ចប់ការសិក្សានៅសាលាមធ្យមសិក្សា Wang ត្រូវបានបញ្ជូនទៅកាន់ជ្រលងភ្នំ Silicon ដើម្បីហាត់ការនៅឯក្រុមហ៊ុន Addepar។ ក្រោយមក Wang ក៏បានក្លាយជាបុគ្គលិកពេញសិទ្ធិរបស់ Quora។

ក្រោយពីបានធ្វើការនៅទីនេះអស់មួយរយៈពេល Wang ក៏បានចូលរៀននៅវិទ្យាស្ថានបច្ចេកវិទ្យា Massachusetts (MIT) ដែលមានឈ្មោះល្បីល្បាញនៅសហរដ្ឋអាមេរិក។ ប៉ុន្តែ បន្ទាប់ពីបានសិក្សារយៈពេល1ឆ្នាំ Wang ក៏សម្រេចចិត្តបោះបង់ការសិក្សាដើម្បីផ្ដោតទៅលើ Scale។

ត្រឹមតែរយៈពេល10ខែដំបូង ក្រុមហ៊ុនរបស់ Wang ប្រមូលទុនបានដល់ទៅ4.5លានដុល្លារអាមេរិក និងបង្កើតបានផលិតផលដំបូងដែលផ្ដោតសំខាន់លើ machine vision ជាប្រព័ន្ធមួយដែលប្រើប្រាស់វិញ្ញាណសិប្បនិម្មិត (sensor) ក្បូនដំណោះស្រាយផ្នែករឹងនិងផ្នែកតន់ (hardware and software algorithm) ដើម្បីបង្កើតស្វ័យភាពនៃមុខងារត្រួតពិនិត្យទិន្នន័យជារូបភាព ចាប់ពីសាមញ្ញដល់ស្មុគស្មាញ។ តាមរយៈនេះ Scale AI ក៏ចាប់ផ្ដើមមានអតិថិជនដំបូងៗ ក្នុងនោះមានដូចជាបណ្ដាក្រុមហ៊ុនផលិតរថយន្តបើកបរស្វ័យប្រវត្ត និងយន្តហោះ drone ជាដើម។

ចាប់តាំងពីពេលនោះមក Wang ក៏មានឈ្មោះល្បីល្បាញនៅជ្រលងភ្នំ Silicon ជាមួយនឹងរហ័សនាមថា “Mark Zuckerberg ទី2”។ ពាក្យណែនាំរបស់ Wang សម្រាប់ក្រុមអ្នកដែលចង់បង្កើតក្រុមហ៊ុនថ្មី នោះគឺ “ផ្ដោតទៅលើការកសាងផលិតផលដែលអាចជួយដោះស្រាយបញ្ហាដែលមនុស្សជាច្រើនកំពុងជួបប្រទះ ដែលពួកគេត្រៀមខ្លួនជាស្រេចក្នុងការបង់ប្រាក់ដើម្បីទទួលបានដំណោះស្រាយ”៕

ប្រភព៖ Business Insider

Jeff Wilke ដែលជា​បុគ្គល​មួយ​រូប​ក្នុង​ចំណោម​ថ្នាក់​ដឹក​នាំ​ដែល​មាន​អំណាច​ខ្លាំង​​របស់​ក្រុម​ហ៊ុន Amazon នឹង​ចាក​ចេញ​ពី​​ក្រុម​ហ៊ុន​នេះ នៅ​ដើម​ឆ្នាំ​​ក្រោយ​។

លោក Jeff Wilke ដែល​ជា​នាយក​ប្រតិបត្តិជើង​ចាស់​​ម្នាក់​​របស់​ Amazon និង​ធ្លាប់​ត្រូវ​បាន​គេ​ចាត់​ទុក​ថា​ជា​អ្នក​ស្នង​តំណែង​បន្ត​ពី​លោក Jeff Bezos នឹង​ឈប់ពី​ការ​ងារ​នៅ​ក្នុងក្រុម​ហ៊ុន​ផ្សារ​អេឡិច​ត្រូនិច​ធំជាង​គេ​លំដាប់​ទី​1​នេះនៅ​ដើម​ឆ្នាំ​2021។ លោក​ Jeff Wilke បាន​ចាប់​ផ្ដើម​ធ្វើ​ការ​ឱ្យ​ Amazon តាំង​ពី​ឆ្នាំ​1999​។ លោក​កាន់​កាប់​តំណែង​ប្រធាន​ផ្នែក​គ្រប់​គ្រង​អតិថិជន​​នៅ​ទូទាំង​ពិភពលោក​​របស់​ក្រុម​ហ៊ុន​ Amazon ចាប់​ពី​ឆ្នាំ​2016​។

ក្រោយពី​លោក​ Wilke បាន​ចាក​ចេញ តំណែង​របស់​លោក​នឹង​ត្រូវ​ធ្លាក់​ទៅ​លើ​ដៃ​ Dave Clark ដែល​បច្ចុប្បន្ន​ជា​អនុ​ប្រធាន​ជាន់​ខ្ពស់​ទទួល​បន្ទុក​គ្រប់​គ្រង​សកម្ម​ភាព​សកល​របស់​ Amazon។ លោក Clark ក៏​បាន​ចូល​រួម​ធ្វើ​ការ​ឱ្យ​ក្រុម​ហ៊ុន​នេះ​ ចាប់​ពី​ឆ្នាំ​1999​។

ការ​ចាក​ចេញ​​ខាងលើ​នេះ​​បាន​កើតឡើង​​​នៅ​ពេល​តម្រូវ​ការ​នៃការ​ប្រគល់​ទំនិញ​របស់​ Amazon កំពុង​តែ​កើន​ឡើង​ជា​លំដាប់​នៅក្នុង​អំឡុង​COVID-19កំពុង​រាត​ត្បាត​ខ្លាំង​។ ប្រាក់​ចំណូល​របស់​ក្រុម​ហ៊ុន​នេះ​ក្នុង​រយៈ​ពេល​3​ខែ​ដែល​បាន​បញ្ចប់​កាល​ពី​ខែ​មីថុនា មាន​ចំនួន​88.9​ពាន់​លាន​ដុល្លារ​អាមេរិក​ កើន​40​% បើ​ធៀប​នឹង​អំឡុង​ពេល​ដូច​គ្នា​ក្នុង​ឆ្នាំ​2019។

ប្រាក់​ចំណេញ​សុទ្ធ​នៅក្នុង​ត្រី​មាស​​នោះ​បាន​កើន​ឡើង​ទ្វេដង​ ពោល​គឺ​ឡើង​ដល់​5.2​ពាន់​លាន​ដុល្លារ​ បើ​ទោះ​ជា​ក្រុម​ហ៊ុន​នេះ​បាន​ចំណាយ​4​ពាន់​លាន​ដុល្លារ​ដើម្បី​គ្រប់​គ្រង​ស្ថាន​ការណ៍​ក្នុង​អំឡុង​COVID-19 ក៏ដោយ៕

ប្រភព​៖ CNN

Lil Miquela ជាតួអង្គតារាប្រឌិតមួយដួងដែលត្រូវបានបង្កើតឡើងដោយកុំព្យូទ័រ អាចរកប្រាក់ចំណូលបាន​រហូត​ដល់​11,738,406​លានដុល្លារនៅក្នុង1ឆ្នាំៗ តាមរយៈការបង្ហោះរូបថតនៅលើបណ្ដាញសង្គម Instagram។

បណ្ដាញសង្គមនានាក្នុងពេលថ្មីៗនេះ បានក្លាយជាទីឋានដ៏ល្អប្រសើរក្នុងការ “កើបលុយ” សម្រាប់ក្រុមមនុស្សដែលមានឥទ្ធិពល (influencer) មកពីជុំវិញពិភពលោក។ សូម្បីតែរ៉ូបូត ឬតួអង្គប្រឌិតក៏បានចាប់ផ្ដើមសាកល្បងរកប្រាក់តាមរយៈបណ្ដាញសង្គមផងដែរ។ ថ្មីៗនេះ OnBuy បានបង្ហើបឱ្យដឹងព័ត៌មានស្ដីអំពីប្រាក់ចំណូលដ៏ច្រើនសន្ធឹកដែលក្រុមតារាប្រឌិត ឬតារានិម្មិតអាចរកបានតាមរយៈបណ្ដាញសង្គម Instagram។

យោងតាមរបាយការណ៍របស់ក្រុមហ៊ុន OnBuy៖ “ចំនួនតួអង្គនិម្មិតដែលមានឥទ្ធិពល កំពុងតែមានការកើនឡើងពីមួយថ្ងៃទៅមួយថ្ងៃ។ ពួកគេត្រូវបានបង្កើតឡើងដោយកុំព្យូទ័រ ដែលហៅថា CGI (Computer-generated imagery) ឬរ៉ូបូត ដែលមានចំណុចពិសេស និងមានលក្ខណៈស្រដៀងនឹងមនុស្សពិត។ ពួកគេបានក្លាយជាកម្លាំងពិតនៅក្នុងវិស័យ influencer ដែលកំពុងដណ្ដើមកាន់កាប់ឥទ្ធិពលនៅលើបណ្ដាញសង្គម។ តើនេះគឺជាសញ្ញាមួយដែលបង្ហាញអំពីទីអវសានរបស់ influencer ដែលជាមនុស្សពិតមែនដែរ ឬយ៉ាងណា?

របាយការណ៍របស់ OnBuy បានឱ្យដឹងថា តួអង្គប្រឌិតដែល “ស៊ីថ្លៃ” បំផុត នោះគឺ Lil Miquela។ នាងរកបាន​ប្រហែល​8,000​ដុល្លារអាមេរិក សម្រាប់អត្ថបទនីមួយៗដែលបង្ហោះនៅលើបណ្ដាញសង្គម Instagram។ ជារៀងរាល់ឆ្នាំ នាងអាចរកបានប្រាក់ដល់ទៅ8.96លានផោន (11,738,406លានដុល្លារអាមេរិក) តាមរយៈការផ្សាយពាណិជ្ជកម្ម។

ឈរលំដាប់ទី2បន្ទាប់ពី Lil Miquela នោះគឺ Noonoouri ដែលត្រូវបានបង្កើតឡើងដោយអ្នកជំនាញខាងរចនាក្រាហ្វិច ឈ្មោះ Joerg Zuber។ ដោយមានអ្នកតាមដានចំនួនជាង362,000នាក់ តាមការគណនា នាងអាចរកបាន1,382ផោន (1,810ដុល្លារអាមេរិក) សម្រាប់អត្ថបទផ្សាយពាណិជ្ជកម្មនីមួយៗ និងរកបានជាង​2​លាន​ផោន (2,620,000ដុល្លារ)/ឆ្នាំ។

តារារូបនិម្មិតមកពីជប៉ុន គឺនាង Imma ឈរលំដាប់ទី3។ ទាក់ទងនឹងវប្បធម៌ ភាពយន្ត និងសិល្បៈជប៉ុន បណ្ដារូបថតដ៏គួរឱ្យស្រលាញ់របស់នាង ត្រូវបានអ្នកប្រើប្រាស់ Instagram ចំនួនជាង237,000នាក់ “គយគន់” ជារៀងរាល់លើក ហើយនាងក៏រកបានប្រាក់ប្រមាណជាជាង498,000ផោន (652,424ដុល្លារអាមេរិក) ជារៀងរាល់ឆ្នាំ ដែលតួលេខនេះ គឺច្រើនជាង13ដង បើធៀបនឹងប្រាក់ខែជាមធ្យមនៅប្រទេសអង់គ្លេសទៅទៀត។

ប្រភព៖ Mirror