Author: សឿន សំណាង

បន្ទាប់ពីបានចុះឈ្មោះ វ៉ាក់សាំង Sputnik V របស់រុស្ស៊ី ទទួលបានចំណាប់អារម្មណ៍ពីប្រទេសជាច្រើនក្នុងពិភពលោក ក្នុងនោះមានដូចជា អារ៉ាប់រួម អារ៉ាប់ប៊ីសាអូឌីត ឥណ្ឌូនេស៊ី ហ្វីលីពីន ម៉ិកស៊ិក ប្រេស៊ីល និងឥណ្ដាជាដើម មានបំណងទិញយកទៅប្រើប្រាស់។

ឈុតវ៉ាក់សាំងទប់ស្កាត់ Covid-19 មានឈ្មោះថា Sputnik V ដែលត្រូវបានផលិតជាលើកដំបូង ត្រូវបានរុស្ស៊ីប្រកាសដាក់ឱ្យប្រើប្រាស់ ហើយតាមគម្រោងវានឹងត្រូវយកទៅចាក់បង្ការជូនក្រុមអ្នកស្ម័គ្រចិត្តនៅក្នុងអាទិត្យនេះ។

“ឈុតវ៉ាក់សាំង Sputnik V ដំបូងគេដែលត្រូវបានអភិវឌ្ឍដោយជម្ឈមណ្ឌលស្រាវជ្រាវផ្នែករោគឆ្លង និងអតិសុខុមប្រាណ Gamaleya របស់ក្រសួងសុខាភិបាលរុស្ស៊ី បានឆ្លងផុតដំណាក់កាលសាកល្បងទៅលើគុណភាព និងត្រូវបានដាក់ឱ្យប្រើប្រាស់” នេះបើតាមសេចក្ដីប្រកាសក្នុងថ្ងៃទី8កញ្ញារបស់ក្រសួងសុខាភិបាលរុស្ស៊ី។

មុននេះ រដ្ឋមន្ត្រីក្រសួងសុខាភិបាលរុស្ស៊ី Mikhail Murashko បានប្រកាសថា ការចាក់វ៉ាក់សាំង Sputnik V ដែលស្ថិតក្នុងការប្រើប្រាស់សាកល្បងក្នុងដំណាក់កាលទី3 សម្រាប់ចាក់ឱ្យក្រុមអ្នកស្ម័គ្រចិត្ត នឹងត្រូវចាប់ផ្ដើមនៅក្នុងសប្ដាហ៍នេះ។

សូមបញ្ជាក់ថា រុស្ស៊ីបានចុះឈ្មោះវ៉ាក់សាំង Sputnik V កាលពីថ្ងៃទី11សីហា ក្រោយពីបានបញ្ចប់ការប្រើប្រាស់សាកល្បងដំណាក់កាលទី1 និងទី2។ ប្រការនេះបានជួយឱ្យរុស្ស៊ីក្លាយជាប្រទេសដំបូងគេដែលបានផ្ដល់ការអនុម័តទៅលើវ៉ាក់សាំង COVID-19។

នៅដើមសប្ដាហ៍នេះ ទស្សនាវដ្ដីវេជ្ជសាស្ត្រ The Lancet ក៏បានចុះផ្សាយអំពីការប្រើប្រាស់សាកល្បងវ៉ាក់សាំង Sputnik V ដំណាក់ទី1 និងទី2។ ទន្ទឹមនឹងនេះ The Lancet ក៏បានសង្កត់ធ្ងន់ថា ការប្រើប្រាស់សាកល្បងក្នុងរយៈពេលវែងក៏នឹងនៅតែត្រូវធ្វើឡើងជាបន្តដើម្បីបញ្ជាក់អំពីប្រសិទ្ធភាពរបស់វ៉ាក់សាំងនេះ។

អភិបាលក្រុងម៉ូស្គូ លោក Sergey Sobyanin បានបង្ហើបឱ្យដឹងថា ការប្រើប្រាស់សាកល្បងក្រោយពីការចុះឈ្មោះរបស់វ៉ាក់សាំង Sputnik V នៅទីក្រុងម៉ូស្គូ អាចប្រើពេលចាប់ពី2ទៅ6ខែ។ ចំណែកកម្មវិធីចាក់វ៉ាក់សាំងបង្ការCOVID-19 ជាទូទៅនៅក្នុងរដ្ឋធានីនៃប្រទេសរុស្ស៊ី ជាកន្លែងដែលរងផលប៉ះពាល់ធ្ងន់ធ្ងរពីCOVID-19 តាមគម្រោងនឹងត្រូវចាប់ផ្ដើមនៅចុងឆ្នាំ2020 ឬដើមឆ្នាំ2021។

បន្ទាប់ពីបានចុះឈ្មោះ វ៉ាក់សាំង Sputnik V របស់រុស្ស៊ី ទទួលបានចំណាប់អារម្មណ៍ពីប្រទេសយ៉ាងតិចចំនួន​20ក្នុងពិភពលោក ក្នុងនោះមានដូចជា អារ៉ាប់រួម អារ៉ាប់ប៊ីសាអូឌីត ឥណ្ឌូនេស៊ី ហ្វីលីពីន ម៉ិកស៊ិក ប្រេស៊ីល និងឥណ្ដាជាដើម បានសម្ដែងចំណាប់អារម្មណ៍របស់ខ្លួន ព្រមទាំងមានបំណងទិញយកទៅប្រើប្រាស់ទៀតផង។

ប្រទេសរុស្ស៊ី មានគម្រោងបង្កើនការផលិតវ៉ាក់សាំង Sputnik V ឱ្យបាន200លានឈុតនៅចុងឆ្នាំនេះ ក្នុង​នោះ​មាន​30​លាន​ឈុត​នឹងត្រូវយកទៅប្រើប្រាស់ក្នុងប្រទេស៕

ប្រភព៖ NDTV

អង្គការសុខភាពពិភពលោក (WHO) បានឱ្យដឹងថា ខ្លួនកំពុងធ្វើការជាមួយប្រទេសចិនទាក់ទិននឹងសំណើអនុម័តទៅលើវ៉ាក់សាំងCOVID-19 នៅថ្នាក់អន្តរជាតិមុនពេលដាក់ឱ្យប្រើប្រាស់ជាផ្លូវការ និងជាទូទៅ។

“ការិយាល័យអង្គការសុខភាពពិភពលោកប្រចាំនៅប្រទេសចិន និងការិយាល័យកណ្ដាលនៃអង្គការនេះ កំពុងតែធ្វើការជាមួយនឹងនាយកដ្ឋានគ្រប់គ្រងនានានៃប្រទេសចិន។ យើងបានចែករំលែកព័ត៌មាន ការស្នើឱ្យអន្តរជាតិអនុម័តទៅលើវ៉ាក់សាំង និងកំពុងតែទាក់ទងគ្នាដោយផ្ទាល់” នេះបើតាមសម្ដីរបស់លោកស្រី Mariangela Simao ជំនួយការប្រធានអង្គការសុខភាពពិភពលោក ដែលបានថ្លែងនៅក្នុងសន្និសីទសារព័ត៌មានមួយនៅទីក្រុងហ្សឺណែវកាលពីថ្ងៃទី7កញ្ញា។

ក្រុមហ៊ុនផលិតឱសថចិន Sinovac Biotech កាលពីម្សិលមិញ (8កញ្ញា) បានឱ្យដឹងថា បេក្ខភាពវ៉ាក់សាំងរបស់ពួកគេ ដែលត្រូវបានដាក់ឈ្មោះឱ្យថា CoronaVac ទំនងជាមានសុវត្ថិភាពសម្រាប់មនុស្សពេញវ័យ ដែលនេះគឺយោងទៅតាមលទ្ធផលនៃការប្រើប្រាស់សាកល្បងក្នុងដំណាក់កាលដំបូង និងដំណាក់កាលកណ្ដាល។ ក្នុងនោះ ប្រតិកម្មប្រឆាំងការឆ្លងវីរុសដែលត្រូវបានបង្កើតឡើងដោយវ៉ាក់សាំងនេះនៅលើមនុស្សចាស់ មានសភាពខ្សោយជាងបើធៀបនឹងនៅលើមនុស្សដែលមានវ័យនៅក្មេង។

បច្ចុប្បន្ន វ៉ាក់សាំង4ប្រភេទក្នុងចំណោម8ប្រភេទនៅលើពិភពលោកដែលកំពុងស្ថិតក្នុងការសាកល្បងដំណាក់កាលទី3 គឺជារបស់ប្រទេសចិន។

Liu Peicheng ដែលជាអ្នកនាំពាក្យរបស់ក្រុមហ៊ុន Sinovac Biotech បាននិយាយថា CoronaVac មិនបង្កផលវិបាកធ្ងន់ធ្ងរនោះទេនៅក្នុងការប្រើប្រាស់សាកល្បងក្នុងដំណាក់កាលទី1និងទី2 ដែលត្រូវបានធ្វើឡើងក្នុងខែឧសភាដោយមានអ្នកស្ម័គ្រចិត្តវ័យចាប់ពី60ឆ្នាំឡើងទៅចំនួន421នាក់ បានចូលរួម។ លទ្ធផលនៃការពិសោធខាងលើនេះ មិនទាន់ត្រូវបានប្រកាសជាផ្លូវការនៅឡើយ។

CoronaVac កំពុងត្រូវបានពិសោធដំណាក់កាលចុងក្រោយនៅប្រទេសប្រេស៊ីល និងឥណ្ឌូនេស៊ី ដើម្បីឱ្យប្រាកដថា វាមានប្រសិទ្ធភាព និងសុវត្ថិភាពគ្រប់គ្រាន់ដែលអាចទទួលបានការយល់ព្រមឱ្យប្រើប្រាស់ជាផ្លូវការ និងជាទូទៅ។ CoronaVac ត្រូវបានប្រើប្រាស់ទៅលើមនុស្សរាប់ម៉ឺននាក់រួចហើយ ក្នុងនោះមាន បុគ្គលិករបស់ក្រុមហ៊ុន Sinovac Biotech និងក្រុមគ្រួសាររបស់ពួកគេប្រមាណជា90% ដែលនេះត្រូវបានចាត់ទុកដូចជាផ្នែកមួយនៃកម្មវិធីចាក់វ៉ាក់សាំងបង្ការជាបន្ទាន់របស់ប្រទេសចិនដើម្បីការពារក្រុមមនុស្សដែលប្រឈមនឹងហានិភ័យខ្ពស់នៃការឆ្លងវីរុស។

Liu Peicheng និយាយថា តាមការពិសោធបានបង្ហាញថា CoronaVac នៅតែមានប្រសិទ្ធភាពក្នុងរយៈពេល42ថ្ងៃនៅពេលដាក់នៅក្នុងសីតុណ្ហភាព25អង្សា 28ថ្ងៃនៅក្នុងកម្ដៅ37អង្សា និង5ខែនៅក្នុងកម្ដៅចាប់ពី2ដល់8អង្សា។

បេក្ខភាពវ៉ាក់សាំងរបស់ Sinovac រួមជាមួយនឹងបេក្ខភាពដទៃទៀត ត្រូវបានដាក់តាំងបង្ហាញនៅក្នុងព្រឹតិការណ៍តាំងពិព័រណ៍មួយនៅឯទីក្រុងប៉េកាំងប្រទេសចិន កាលពីថ្ងៃទី7កញ្ញា2020។ ក្រុមហ៊ុនដែលជាម្ចាស់ផលិតផលទាំងនេះឱ្យដឹងថា ប្រភេទវ៉ាក់សាំងនេះមិនទាន់ត្រូវបានដាក់លក់ក្នុងទីផ្សារនៅឡើយ ប៉ុន្តែ ពួកគេសង្ឃឹមថា វានឹងទទួលបានការអនុញ្ញាតឱ្យចែកចាយក្រោយពីការពិសោធដំណាក់កាលចុងក្រោយត្រូវបានបញ្ចប់នាចុងឆ្នាំនេះ៕

ប្រភព៖ Reuters

បច្ចុប្បន្ន WHO គ្រាន់តែណែនាំឱ្យប្រើថ្នាំ corticosteroids ចំពោះអ្នកជំងឺCOVID-19 ដែលស្ថិតក្នុងសភាពធ្ងន់ធ្ងរបំផុតតែប៉ុណ្ណោះ ហើយជាងនេះទៀត ថ្នាំ corticosteroids ក៏មិនមានប្រសិទ្ធភាពក្នុងការទប់ស្កាត់មិនឱ្យឆ្លងវីរុសនោះដែរ។

ទីបំផុត អង្គការសុខភាពពិភពលោក (WHO) ក៏រកបានភ័ស្តុតាងគ្រប់គ្រាន់ដើម្បីបញ្ជាក់ថា៖ corticosteroids ដែលជាថ្នាំប្រឆាំងនឹងការរលាកសួត មានប្រសិទ្ធភាពក្នុងការសង្គ្រោះជីវិតអ្នកជំងឺCOVID19 ដែលមានសភាពធ្ងន់ធ្ងរបំផុត។ លទ្ធផលនេះត្រូវបានលើកឡើងបន្ទាប់ពីក្រុមអ្នកជំនាញបានបូកបញ្ចូលគ្នារវាងលទ្ធផលនៃការសាកល្បងប្រើប្រាស់ថ្នាំ corticosteroids ចំនួន7លើកនៅលើអ្នកជំងឺCOVID-19 ដែលត្រូវការម៉ាស៊ីនជំនួយដង្ហើមនៅក្នុងបន្ទប់ព្យាបាលពិសេស ICU។

កាលពីខែឧសភា ការពិសោធន៍ដំបូងបានបង្ហាញអំពីប្រសិទ្ធភាពយ៉ាងច្បាស់លាស់របស់ថ្នាំ dexamethasone ដែលមានផ្ទុកសារធាតុ corticosteroid សម្រាប់អ្នកជំងឺCOVID-19 ដែលមានអាការធ្ងន់ធ្ងរ។ បន្ទាប់ពីក៏មានការពិសោធន៍ថ្មីទៅលើថ្នាំ corticosteroid មួយប្រភេទទៀតដែលមានគេប្រើប្រាស់ច្រើន នោះគឺថ្នាំ hydrocortisone។ លទ្ធផលបានបង្ហាញថា hydrocortisone មានប្រសិទ្ធភាពខ្ពស់ជាង dexamethasone ទៅទៀត។

ការពិសោធន៍មួយរបស់អង់គ្លេស បានបង្ហាញដែរថា hydrocortisone អាចកាត់បន្ថយអត្រានៃការស្លាប់ដោយសារCOVID-19 នៅលើអ្នកជំងឺដែលកំពុងស្ថិតក្នុងស្ថានភាពធ្ងន់ធ្ងរបំផុតផងដែរ។

1. Corticosteroids គឺជាថ្នាំអ្វី?

Corticosteroids គឺជាថ្នាំមួយប្រភេទដែលត្រូវបានវេជ្ជបណ្ដិតនិយមប្រើជាច្រើនទសវត្សរ៍មកហើយសម្រាប់ព្យាបាលជំងឺរលាកសួត។ ប្រការនេះក៏មានន័យថា corticosteroids ក៏ធ្លាប់ត្រូវបានប្រើចំពោះអ្នកជំងឺរលាកសួត ជំងឺវីរុសឆ្លងចូលក្នុងឈាម (septic shock) និងអាការពិបាកដកដង្ហើមធ្ងន់ធ្ងរ។

ដូច្នេះ ក្រុមអ្នកវិទ្យាសាស្ត្រក៏មានបំណងប្រើប្រាស់សាកល្បងប្រភេទថ្នាំនេះនៅលើអ្នកជំងឺCOVID-19 ដែលមានអាការធ្ងន់ធ្ងរ ដើម្បីស្វែងយល់អំពីប្រសិទ្ធភាពរបស់ថ្នាំនេះថា តើអាចជួយកាត់បន្ថយអត្រានៃការស្លាប់បានដែរ ឬទេ។ ពិសេសជាងនេះ corticosteroids គឺជាថ្នាំដែលមានស្រាប់ មានតម្លៃទាប និងស្ថិតនៅក្នុងបញ្ជីថ្នាំសំខាន់ៗរបស់ WHO។ ប្រការនេះក៏មានន័យថា ប្រទេសទាំងអស់ក្នុងពិភពលោក សុទ្ធតែមានថ្នាំ corticosteroids នេះនៅក្នុងឃ្លាំង ហើយអាចយកមកប្រើបានភ្លាមៗ។

2. ភ័ស្តុតាងអំពីប្រសិទ្ធភាពរបស់ថ្នាំ corticosteroids

នៅក្នុងការពិសោធន៍កាលពីខែមិថុនារបស់ក្រុមអ្នកវិទ្យាសាស្ត្រអង់គ្លេស បានបង្ហាញថា ថ្នាំ corticosteroids មួយប្រភេទដែលមានឈ្មោះថា dexamethasone អាចកាត់បន្ថយអត្រានៃការស្លាប់បានរហូតដល់1/3 ចំពោះអ្នកជំងឺCOVID-19 ដែលត្រូវការម៉ាស៊ីនជំនួយដង្ហើម និង1/5 ចំពោះអ្នកជំងឺដែលត្រូវការអ៊ុកស៊ីហ្សែនបន្ថែម។

ការពិសោធន៍ប្រហាក់ប្រហែលខាងលើ ដែលត្រូវបានធ្វើឡើងនៅអូស្ត្រាលី និងនូវែលហ្សេឡង់ ក៏បានបង្ហាញថា អ្នកជំងឺCOVID-19 ជាង67% ដែលត្រូវបានព្យាបាលដោយថ្នាំ corticosteroids បានរួចផុតពីការស្លាប់ បន្ទាប់ពីបានលេបថ្នាំនេះក្នុងរយៈពេល28ថ្ងៃ។ នៅក្នុងការប្រៀបធៀប គេឃើញថា អ្នកជំងឺដែលមិនបានទទួលការព្យាបាលដោយថ្នាំ corticosteroids ឬគ្រាន់តែទទួលបានថ្នាំ placebo (ថ្នាំដែលមិនមានសារធាតុថ្នាំ និងមិនមានប្រសិទ្ធភាពជាក់ស្ដែងក្នុងការព្យាបាលជំងឺ) គឺមានចំនួនមិនដល់59% នោះទេ ដែលនៅមានជីវិត។

យោងតាមភ័ស្តុតាងពីការសិក្សាស្រាវជ្រាវនានាខាងលើ WHO បានប្រមូលទិន្នន័យនៃការពិសោធន៍លើអ្នកជំងឺCOVID-19 ចំនួន1,703នាក់ដែលបានចូលរួមក្នុងការសាកល្បងប្រើប្រាស់ថ្នាំ corticosteroids ចំនួន7លើកផ្សេងៗគ្នា ហើយបានរកឃើញថា ការព្យាបាលដោយប្រើប្រាស់ថ្នាំ corticosteroids នេះ បានជួយកាត់បន្ថយអត្រានៃការស្លាប់ដល់ទៅ32% ខណៈដែលអ្នកជំងឺប្រមាណជា40% បានស្លាប់បើសិនមិនបានប្រើប្រាស់ថ្នាំនេះ។

សាស្ត្រាចារ្យ Anthony Gordon មកពីសាកលវិទ្យាល័យ London បានឱ្យដឹងថា នេះគឺជាអត្រាមួយដ៏គួរឱ្យចាប់អារម្មណ៍ ពោលគឺឡើងដល់20%។ ប្រការនេះមានន័យថា បើសិនជាអ្នកព្យាបាលអ្នកជំងឺCOVID-19 ចំនួន100នាក់ ដោយប្រើប្រាស់ថ្នាំ corticosteroids នោះអ្នកនឹងអាចសង្គ្រោះជីវិតពួកគេបាន8នាក់។ នោះពិតជាតួលេខដ៏អស្ចារ្យមួយនៅក្នុងដំណាក់កាលនេះ។

3. របបនៃការព្យាបាល COVID-19 នឹងត្រូវបានធ្វើបច្ចុប្បន្នភាពភ្លាមៗ

មេដឹកនាំនៃសេវាកម្មសុខាភិបាលជាតិរបស់អង់គ្លេស (NHS) Simon Stevens បានហៅថ្នាំ corticosteroids នេះថាជា “អាវុធបន្ទាប់នៅក្នុងការប្រយុទ្ធប្រឆាំងនឹងCOVID-19 នៅទូទាំងពិភពលោក”។ លោក Simon Stevens បានឱ្យដឹងថា NHS នឹងធ្វើបច្ចុប្បន្នភាពនៃការព្យាបាលដើម្បីអនុញ្ញាតឱ្យអ្នកជំងឺCOVID-19 អាចទទួលបានផលប្រយោជន៍ពីការព្យាបាលដោយប្រើថ្នាំ hydrocortisone ដែលដូចទៅនឹងថ្នាំ dexamethasone នាពេលកន្លងមក។

នៅអូស្ត្រាលីវិញ ក្រុមវេជ្ជបណ្ឌិតក៏បានប្រើប្រាស់ corticosteroids ដើម្បីព្យាបាលអ្នកជំងឺCOVID-19 ដែលត្រូវការអ៊ុកស៊ីហ្សែន។ WHO ក៏បានណែនាំអំពីការព្យាបាលអ្នកជំងឺCOVID-19 ក្នុងនោះ ក៏បានលើកទឹកចិត្តឱ្យប្រើប្រាស់ corticosteroids ដើម្បីព្យាបាលអ្នកជំងឺដែលមានសភាពធ្ងន់ធ្ងរ ឬកំពុងប្រឈមនឹងការស្លាប់ខ្ពស់។

4. ប្រជាជនមិនគួររក្សាទុកថ្នាំ corticosteroids ឬប្រើប្រាស់វាដើម្បីការពារការឆ្លងវីរុសCOVID-19នោះទេ

ប្រការដែលសំខាន់នោះ គឺថា ការរកឃើញថ្មីស្ដីអំពី corticosteroids ពេលនេះត្រូវបានគាំទ្រឱ្យប្រើសម្រាប់អ្នកជំងឺCOVID-19 ដែលកំពុងមានអាការធ្ងន់ធ្ងរតែប៉ុណ្ណោះ។ បច្ចុប្បន្ន មានព៏ត៌មានមួយចំនួនបង្ហាញថា ថ្នាំ corticosteroids នេះ មិនសមស្របសម្រាប់ព្យាបាលអ្នកជំងឺCOVID-19 ដែលមានអាការរោគស្រាលៗ។

បើទោះជា corticosteroids អាចព្យាបាលអ្នកជំងឺCOVID-19 ប៉ុន្តែ វាមិនមែនជាថ្នាំបង្ការការឆ្លងវីរុសនោះឡើយ។ ថ្នាំ corticosteroids គ្រាន់តែអាចជួយព្យាបាលអាការដែលកើតឡើងដោយសារប្រតិកម្មធ្ងន់ធ្ងររបស់រាងកាយក្រោយពីបានឆ្លងCOVID-19 តែប៉ុណ្ណោះ ហើយវាមិនមែនជាថ្នាំសម្រាប់ព្យាបាល ឬការពារនោះទេ។

ហេតុដូច្នេះ ក្រុមអ្នកជំនាញផ្នែកសុខាភិបាលបានណែនាំថា អ្នកទាំងឡាយមិនគួរទិញថ្នាំ corticosteroids យកមកលេបនៅឯផ្ទះ។ ការណែនាំបានបញ្ចាក់ថា corticosteroids ដែលត្រូវបានប្រើនៅក្នុងការពិសោធន៍របស់ក្រុមអ្នកវិទ្យាសាស្ត្រ គឺជាថ្នាំចាក់ចូលតាមសរសៃឈាម ពោលគឺមិនមែនថ្នាំ corticosteroids ប្រភេទគ្រាប់ដែលអាចរកទិញបានពីឱសថស្ថាននោះឡើយ។

មូលហេតុនេះហើយ គឺមានតែវេជ្ជបណ្ឌិតប៉ុណ្ណោះ ទើបអាចចេញវេជ្ជបញ្ជាឱ្យប្រើថ្នាំនេះបាន។ ពលរដ្ឋមិនគួរទិញថ្នាំនេះដោយខ្លួនឯង ក្នុងបំណងលេបដើម្បីការពារការឆ្លងវីរុស ឬព្យាបាលCOVID-19 នោះឡើយ៕

ប្រភព៖ Medicalxpress/WHO

ក្រសួងសុខាភិបាលនៃប្រទេសម៉ិកស៊ិកកំពុងស្នើឱ្យរដ្ឋាភិបាលបោះពុម្ភសំបុត្របញ្ជាក់មរណភាពចំនួន1.1លានច្បាប់បន្ថែមទៀត ដោយសារតែតំបន់ជាច្រើនបានអស់ ឬខ្វះ ខណៈដែលតួលេខនៃមរណភាពដោយសារCOVID-19 នៅតែកើនឡើងយ៉ាងឆាប់រហ័ស។

នៅក្នុងសន្និសីតសារព័ត៌មានមួយកាលពីថ្ងៃទី4កញ្ញា មន្ត្រីសុខាភិបាលម៉ិកស៊ិក លោក Hugo Lopez-Gatell Ramirez ឱ្យដឹងថា រដ្ឋមួយចំនួន ក្នុងនោះមានរដ្ឋម៉ិកស៊ិកផងដែរ កំពុងស្ថិតក្នុងស្ថានភាពអស់សំបុត្របញ្ជាក់មរណភាព។ ក្រុមមន្ត្រីមានសមត្ថកិច្ច កាលពីប៉ុន្មានសប្ដាហ៍មុនបញ្ជូនសំបុត្របញ្ជាក់មរណភាពពីតំបន់មួយចំនួន ទៅឱ្យតំបន់ដែលកំពុងស្វះសំបុត្រនេះ។ អនុរដ្ឋមន្ត្រីក្រសួងសុខាភិបាលបានថ្លែងថា រដ្ឋធានីម៉ិកស៊ិក ក៏ជិតអស់សំបុត្របញ្ជាក់កំណើតនេះហើយដែរ។

គិតមកដល់ពេលនេះ ប្រទេសម៉ិកស៊ិក មានអ្នកស្លាប់ដោយសារបានឆ្លងវីរុសCOVID-19 ជាង67,000នាក់ ដូច្នេះម៉ិកស៊ិកបានក្លាយជាប្រទេសដែលមានអ្នកស្លាប់ដោយសារCOVID-19 ច្រើនជាងគេលំដាប់ទី4ក្នុងពិភពលោក បន្ទាប់សហរដ្ឋអាម៉េរិក ប្រេស៊ីល និងឥណ្ឌា។ ម៉ិកស៊ិកក៏បានរកឃើញអ្នកឆ្លងវីរុសសរុបឡើងដល់ 634,023នាក់ និងអ្នកស្លាប់សរុបឡើងដល់67,558នាក់។

នៅទូទាំងពិភពលោក បច្ចុប្បន្នមានអ្នកស្លាប់ដោយសារឆ្លងវីរុសCOVID-19 ចំនួន887,549នាក់ ខណៈអ្នកបានឆ្លងវីរុសនេះមានចំនួន27,288,595នាក់ ក្នុងនោះមាន59,960នាក់កំពុងប្រឈាមនឹងហានិភ័យនៃការស្លាប់ខ្ពស់ ក្នុងគ្រាដែលអ្នកជំងឺបានជាសះស្បើយបានកើនឡើងដល់19,370,858នាក់៕

ប្រភព៖ Bloomberg