Author: សឿន សំណាង

លោក Xi Jinping ស្នើឱ្យកងម៉ារីនចិន ត្រៀមខ្លួនជាស្រេចសម្រាប់ការធ្វើសង្គ្រាម
ប្រធានាធិបតីចិន លោក Xi Jinping បានស្នើឱ្យកងទ័ពម៉ារីនរបស់ប្រទេសនេះ កែលម្អសមត្ថភាព និងត្រៀមខ្លួនជាស្រេចសម្រាប់ការធ្វើប្រតិបត្តិការសឹក និងប្រុងជើងការគ្រប់កាលៈទេសៈ។
នៅក្នុងថ្ងៃទីពីរនៃដំណើរទស្សនកិច្ចទៅកាន់ខេត្ត Guangdong កាលពីថ្ងៃទី13តុលា ប្រធានាធិបតីចិន លោក Xi Jinping ក៏បានចូលទៅពិនិត្យមើលមូលដ្ឋានទ័ពមួយនៅភាគខាងកើតប្រទេសនេះ។
លោក Xi Jinping បានប្រាប់កងម៉ារីននៅមូលដ្ឋានទ័ពនោះថា ពួកគេគួរតែកំណត់គោលដៅក្លាយជាកងកម្លាំងប្រដាប់អាវុធ “ពហុមុខងារ ប្រតិកម្មរហ័សគ្រប់កាលៈទេសៈ ទាំងអាកាសធាតុ ទាំងភូមិសាស្ត្រ”។
“គ្រប់គ្នាគួរតែផ្ដោតទៅលើឆន្ទៈ និងកម្លាំងដើម្បីត្រៀមសម្រាប់សង្គ្រាម ទន្ទឹមនឹងនេះក៏ត្រូវប្រុងជើងការក្នុងកម្រិតខ្ពស់បំផុត” ស្ថានីយទូរទស្សន៍ចិន CCTV ដកស្រង់សម្ដីរបស់លោក Xi Jinping។
លោក Xi Jinping បានប្រកាសថា៖ “កងម៉ារីនមានភារកិច្ចជាច្រើនផ្សេងៗគ្នា ហើយការស្នើដែលបានដាក់ចេញនឹងធ្វើឱ្យមានការផ្លាស់ប្ដូរ។ ដូច្នេះ គ្រប់គ្នាត្រូវតែប្រឹងប្រែងហ្វឹកហាត់ដើម្បីត្រៀមសម្រាប់ការធ្វើសង្គ្រាម ទន្ទឹមនឹងនេះក៏ត្រូវលើកកម្ពស់សមត្ថភាពនៃការប្រយុទ្ធ និងស្ដង់ដានៃការហ្វឹកហាត់”។
ប្រធានាធិបតីចិនសង្កាត់ធ្ងន់ថា កងម៉ារីន ត្រូវរ៉ាប់រង “ភារកិច្ចសំខាន់” ក្នុងកិច្ចការពារទឹកដី និងអធិបតេយ្យរបស់ប្រទេសចិន ក៏ដូចជាផលប្រយោជន៍នៅលើផ្ទៃសមុទ្រ និងផលប្រយោជន៍របស់ចិននៅបរទេស។ យោងតាម SCMP ការប្រកាសនេះទំនងជាសំដៅទៅលើការទាមទាររបស់ចិននៅលើសមុទ្រចិនខាងត្បូង និងកោះតៃវ៉ាន់។
ដំណើរទស្សនកិច្ចរបស់ប្រធានាធិបតីចិន ត្រូវបានធ្វើឡើងនៅក្នុងកាលៈទេសៈដែលភាពតានតឹងកំពុងកើនឡើងខ្លាំងនៅតំបន់ឆកសមុទ្រតៃវ៉ាន់ និងទំនាក់ទំនងរវាងសហរដ្ឋអាមេរិកនិងកោះនេះ ចេះតែល្អូកល្អិននឹងគ្នាពីមួយថ្ងៃទៅមួយថ្ងៃ។ អ្នកនាំពាក្យរបស់ក្រសួងការបរទេសចិន កាលពីថ្ងៃទី13តុលា បានព្រមានថា ទីក្រុងប៉េកាំងនឹងឆ្លើយតបយ៉ាងខ្លាំងក្លា បើសិនជាទីក្រុងវ៉ាស៊ីងតោនអនុម័តយល់ព្រមលក់អាវុធធុនធ្ងន់ទៅឱ្យកោះតៃវ៉ាន់៕
ប្រភព៖ SCMP
October 14, 2020
ការបោះឆ្នោតនៅអាមេរិក៖ សារព័ត៌មានអាមេរិកព្យាករថា Biden មានឱកាសជាប់ឆ្នោតរហូតដល់91%
ការព្យាករមួយរបស់ Economist យល់ថា លោក Biden កំពុងក្ដាប់ណែនក្នុងដៃនូវឱកាសជាប់ឆ្នោតជាប្រធានាធិបតីអាមេរិក ខណៈដែលនឹងទទួលបានសំឡេងឆ្នោតគាំទ្រយ៉ាងច្រើនលើសលុបពីម្ចាស់ឆ្នោតនៅមូលដ្ឋាន និងម្ចាស់ឆ្នោតជាតំណាងរាស្ត្រនៅសភា។
ការព្យាករខាងលើកនេះត្រូវបាន Economist ដែលជាកាសែតជំនាញខាងសេដ្ឋកិច្ចរបស់អាមេរិក ប្រកាសជាសាធារណៈកាលពីថ្ងៃទី12តុលា2020។ ការព្យាករនេះបានបង្ហាញថា បេក្ខភាពប្រធានាធិបតីមកពីបក្សប្រជាធិបតេយ្យ លោក Joe Biden មានឱការជាប់ឆ្នោតដល់ទៅ90% នៅក្នុងការបោះឆ្នោតពីក្រុមអ្នកតំណាងរាស្ត្រនៅសភា ខណៈដែលលោក Trump ត្រូវបានព្យាករថា មានឱកាសត្រឹមតែ9%ប៉ុណ្ណោះ។ Economist ក៏បានព្យាករដែរថា លោក Donald Trump មានឱកាសត្រឹមតែ9%ប៉ុណ្ណោះក្នុងការទទួលបានជ័យជំនះលើលោក Biden។ ការព្យាករបានបង្ហាញទៀតថា ឱកាសដែលលោក Biden នឹងទទួលបានសំឡេងគាំទ្រពីពលរដ្ឋមូលដ្ឋាន គឺមានអត្រា99%។
លោក Biden ត្រូវបានព្យាករថា អាចដណ្ដើមបានសន្លឹកឆ្នោតគាំទ្រចំនួន347សំឡេងពីក្រុមតំណាសរាស្ត ដែលនេះបានកើនលើសពីសំឡេងអប្បរមា270សំឡេងដើម្បីបានជាប់ឆ្នោត។ ចំណែកលោក Trump វិញ ត្រូវគេយល់ថា នឹងអាចទទួលបានសន្លឹកឆ្នោតប្រមាណជា191សំឡេងប៉ុណ្ណោះ ពីក្រុមអ្នកតំណាងរាស្ត្រ។
អត្រាទាំងឡាយខាងលើនេះត្រូវបានលើកឡើងដោយយោងទៅតាមរូបមន្តនៃការព្យាករដែលបង្ហាញអំពីលទ្ធផលនៃការបោះឆ្នោតដែលមាន20,000សំឡេង ជាមួយនឹងស្ថានភាពនីមួយៗ ដែលត្រូវបានលើកឡើងដោយយោងទៅតាមអត្រានៃការចេញទៅបោះឆ្នោត និងកំហុសឆ្គងក្នុងការបោះឆ្នោត។
យោងតាមការព្យាករ ឱកាសដែលលោក Trump នឹងទទួលបានសំឡេងគាំទ្រ គឺមានអត្រាទាបជាងច្រើន បើធៀបនឹងគូបដិបក្ខមកពីបក្សប្រជាធិបតេ្យ។ ប៉ុន្តែ ប្រការនេះមិនមែនមានន័យថា លោក Trump ពុំមានឱកាសជាប់ឆ្នោតនោះទេ តែលោកនឹងទទួលបានសំឡេងឆ្នោតគាំទ្រចំនួន1% ផងដែរ។
ទំព័រ Five Thirty Eight របស់សារព័ត៌មាន ABC News យល់ថា លោក Trump កំពុងមានឱ្យចំនួន13%ដែលអាចយកឈ្នះលើលោក Biden ដែលនេះស្ទើរដូចទៅនឹងអត្រា13.1% ដែលសារព័ត៌មាននេះបានព្យាករអំពីលទ្ធភាពនៃការដណ្ដើមបានជ័យជំនះរបស់លោក Trump នៅចំពោះមុខគូប្រជែងកាលពីថ្ងៃទី12តុលា ឆ្នាំ2016៕
ប្រភព៖ Newsweek
October 14, 2020
ជនជាតិអាមេរិកាំងនាំគ្នាបើកក្រុមហ៊ុន ខណៈCOVID-19 នៅតែជាបញ្ហាធំក្នុងពិភពលោក
តួលេខរបស់នាយកដ្ឋានស្ថិតិអាមេរិក បានបង្ហាញថា ចំនួនពាក្យសុំបង្កើតក្រុមហ៊ុនថ្មីនៅសហរដ្ឋអាមេរិក កំពុងស្ថិតនៅក្នុងកម្រិតខ្ពស់មិនធ្លាប់មានក្នុងអំឡុងជាងមួយទសវត្សរ៍កន្លងមកនេះ។
កាលពីថ្ងៃទី3តុលា ទិន្នន័យពីនាយកដ្ឋានខាងលើបានឱ្យដឹងថា ពាក្យសុំបង្កើតក្រុមហ៊ុនថ្មីបានកើនជិត40% បើធៀបនឹងអំឡុងពេលដូចគ្នាកាលពីឆ្នាំ2019។ Joseph Brusuelas ដែលជាសេដ្ឋវិទូមកពីក្រុមហ៊ុន RSM US បានឱ្យដឹងថា នេះគឺជាទិន្នាការដែលគួរលើកទឹកចិត្ត។ ក្រោយពីវិបត្តិធ្ងន់ធ្ងរ មនុស្សនឹងមានក្ដីសង្ឃឹមច្រើននៅពេលបានឃើញកម្មករដែលបានបាត់បង់ការងារ ស្វែងរកវិធីដើម្បីប្រើប្រាស់លក្ខខណ្ឌអំណោយផលនៃសេដ្ឋកិច្ច (ដូចជាឥណទានមានការប្រាក់ទាបជាដើម) ដើម្បីបង្កើតមុខជំនួញថ្មី។
កាលពីវិបត្តិហិរញ្ញវត្ថុឆ្នាំ2008 តួលេខនៃពាក្យសុំចុះឈ្មោះបង្កើតក្រុមហ៊ុនថ្មីក៏មិនបានកើនឡើងខ្ពស់ដូចពេលនេះដែរ។ Joseph Brusuelas និយាយថា នោះគឺជាសញ្ញាមួយបង្ហាញអំពីល្បឿននៃការងើបឡើងរបស់សេដ្ឋកិច្ច មិនដូចទៅនឹងការរំពឹងទុក ព្រោះថា មនុស្សជាច្រើនត្រូវបាត់បង់ផ្ទះសម្បែង របស់ទ្រព្យសម្បត្តិជាច្រើនរបស់ពួកគេ។
ក៏ប៉ុន្តែ សម្រាប់លើកនេះ វិបត្តិបានប៉ះពាល់ដល់អ្នកជួលផ្ទះច្រើនជាងអ្នកទិញផ្ទះ។ យ៉ាងនេះក្ដី ដោយសារតែពលរដ្ឋជាច្រើននៅតែរក្សាបានទ្រព្យសម្បត្តិសំខាន់ៗរបស់ខ្លួនបាន ទើបពួកគេមានការតាំងចិត្តខ្ពស់ជាងមុនក្នុងការប្រឈមនឹងហានិភ័យផ្នែកហិរញ្ញវត្ថុនៅពេលសម្រេចចិត្តបើកក្រុមហ៊ុនថ្មី។
Brusuelas បន្តថា៖ “មួយក្នុងចំណោមកំហុសឆ្គងដែលយើងបានជួបប្រទះនៅក្នុងវិបត្តិសេដ្ឋកិច្ចលើកមុន នោះគឺដោយសារមិនបានផ្ដល់ឱកាសសម្រាប់អ្នកដែលចង់បង្កើតក្រុមហ៊ុនថ្មី”។ ទន្ទឹមនឹងនេះ យុគសម័យធ្វើការពីផ្ទះក៏បាននិងកំពុងបង្កើតឱកាសធ្វើពាណិជ្ជកម្មបែបថ្មី ដែលនាំមកនូវការបត់បែនខ្ពស់សម្រាប់អនាគតម្ចាស់អាជីវកម្ម។
ប៉ុន្តែ នៅក្នុងរបាយការណ៍មួយកាលពីពេលថ្មីៗនេះ ធនាគារ Goldman Sachs បានឱ្យដឹងថា ការកើនឡើងនៃពាក្យសុំបង្កើតក្រុមហ៊ុនថ្មីខាងលើនេះ មួយផ្នែកអាចបណ្ដាលមកពីចំនួនពាក្យដែលបានកកស្ទះក្នុងអំឡុងពេលអនុវត្តបម្រាមគោចរ។ យ៉ាងណាក៏ដោយ ធនាគារ Goldman Sachs បានពន្យល់ថា៖ “តួលេខនេះក៏បានបង្ហាញអំពីក្ដីសង្ឃឹមជាវិជ្ជមានច្រើនជាងបើធៀបនឹងវិបត្តិសេដ្ឋកិច្ចលើកមុន”៕
ប្រភព៖ CNN

October 13, 2020
ក្រុមហ៊ុនអាកាសចរណ៍ Vietnam Airlines ខាតបង់ជាង10.7លានលានដុង ក្នុងរយៈពេល9ខែនៃឆ្នាំ2020
ខ្ទង់ខាតបង់រហូតដល់ជាង10.7លានលានដុង (10,750,000,000,000) នេះ ប្រហាក់ប្រហែលនឹង70%នៃគម្រោងខាតបង់សម្រាប់ឆ្នាំ2020 របស់ក្រុមហ៊ុនអាកាសចរណ៍ Vietnam Airlines។
យោងតាមប្រភពព័ត៌មានពីក្រុមហ៊ុនVietnam Airlines ប្រាក់ចំណូលក្នុងរយៈពេល9ខែរបស់ក្រុមហ៊ុននេះ មានចំនួនជាង23.9លានលានដុង ថយចុះ58% បើធៀបនឹងអំឡុងពេលដូចគ្នាកាលពីឆ្នាំមុន។
Vietnam Airlines បានធ្វើប្រតិបត្តិការដឹកភ្ញៀវបានចំនួន10.2លានជើង ថយចុះ41% ចំណែកការដឹកទំនិញមានចំនួន146,000តោន ថយចុះ43%។
អំពីប្រាក់ចំណេញ ក្រុមហ៊ុនអាកាសចរណ៍របស់វៀតណាមនេះ បានបញ្ចេញរបាយការណ៍ខាតបង់របស់ខ្លួនដែលកើនឡើងដល់ 10.75លានលាន (10,750,000,000,000) ដុង (ប្រមាណជា 463,800,000ដុល្លារអាមេរិក)។
ខណៈនោះដែរ ក្រុមហ៊ុនអាកាសចរណ៍ Pacific Airlines ក៏បានខាតបង់ 1.1លានលានដុង (1,100,000,000,000ដុង) ដែលប្រហែល 47,459,000ដុល្លារអាមេរិក នៅក្នុងរយៈពេល8ខែ។ តាមការប៉ានស្មាន ក្រុមហ៊ុននេះនឹងត្រូវខាតសរុប 1.6លានលានដុង (69,032,465ដុល្លារ) ក្នុងឆ្នាំ2020នេះ៕
ប្រភព៖ CB
October 13, 2020
ពលរដ្ឋចិនក្នុងស្រុករាប់លាននាក់ត្រូវបានអនុញ្ញាតឱ្យប្រើប្រាស់ Google, Facebook ដោយស្របច្បាប់ជាលើកដំបូង ក្រោយរយៈពេលជាច្រើនឆ្នាំត្រូវបានហាមឃាត់
កម្មវិធីរុករក (Browser) ដែលមានឈ្មោះថា Tuber ទទួលបានការទាញយកមកប្រើប្រាស់ប្រមាណជា5លានលើកពីផ្សារលក់កម្មវិធីទូរស័ព្ទរបស់ក្រុមហ៊ុនចិន Huawei ដោយចំណាយពេលត្រឹមតែជិត2សប្ដាហ៍ប៉ុណ្ណោះ។
នៅក្នុងការសាកល្បងយ៉ាងស្ងាត់ស្ងៀមរយៈពេល2សប្ដាហ៍ ប្រទេសចិនបានបង្កើតឱកាសឱ្យមនុស្សរាប់លាននាក់ចូលទៅកាន់គេហទំព័រនានារបស់បរទេស ដែលធ្លាប់ត្រូវបានហាមឃាត់នៅប្រទេសនេះ ដូចជា YouTube និង Instagram ជាដើម។
ប្រការនេះទំនងជាបង្ហាញថា រដ្ឋាភិបាលចិនកំពុងចាប់ផ្ដើលដើរដល់ចំណុចដែលត្រូវបើកសិទ្ធិឱ្យពលរដ្ឋរបស់ខ្លួន អាចប្រើប្រាស់អ៊ីនធើណិតបានទូលំទូលាយជាងមុន ។ ក៏ប៉ុន្តែ រដ្ឋាភិបាលចិន នៅតែបន្តតាមឃ្លាំមើលចំពោះសកម្មភាពរបស់អ្នកលេងអ៊ីនធើណិតនៅប្រទេសនេះ។
កម្មវិធី Tuber ដែលត្រូវបាន 360 Security Technology Inc ជាអង្គភាពដែលភ្ជាប់ទំនាក់ទំនងជាមួយរដ្ឋាភិបាលជាអ្នកបង្កើតឡើងនេះ បានបង្ហាញខ្លួនយ៉ាងស្ងាត់ស្ងៀមតាំងពីខែកញ្ញា ដោយអនុញ្ញាតឱ្យអ្នកប្រើប្រាស់ចូលទៅកាន់គេហទំព័រដែលត្រូវបានហាមឃាត់នៅប្រទេសចិន ដូចជា Google, Facebook ជាដើម។ អ្នកប្រើប្រាស់អ៊ីនធើណិតជាច្រើននៅប្រទេសចិន បានបង្ហាញការសប្បាយចិត្តជាខ្លាំងទន្ទឹមនឹងការចម្លែកក្នុងចិត្តនៅពេលបានទស្សនាផ្ទាល់នូវខ្លឹមសារដែលធ្លាប់ត្រូវបានរាំងខ្ទប់នានា ដោយមិនចាំបាច់ប្រើប្រាស់បណ្តាញឯកជននិម្មិត VPN (Virtual private network) ខុសច្បាប់។
Tuber ត្រូវបានដំណើរការនៅលើបណ្ដាហាងលក់កម្មវិធីដែលគ្រប់គ្រងដោយ Huawei និងក្រុមហ៊ុនមួយចំនួនផ្សេងទៀត។ ឧបករណ៍នេះត្រូវបានទាញយកមកប្រើប្រាស់ប្រមាណជា5លានលើកពីផ្សារលក់កម្មវិធីរបស់ក្រុមហ៊ុន Huawei រាប់ចាប់តាំងពីវាបានបង្ហាញខ្លួនជាសាធារណៈ។ ក្រុមអ្នកអភិវឌ្ឍកម្មវិធី Tuber នេះ ត្រូវបានគ្រប់គ្រងដោយក្រុមលោក Zhou Hongyi។
អាចនិយាយបានថា ទីក្រុងប៉េកាំងកំពុងចង់សាកល្បងប្រើប្រាស់ធម្យោបាយជាច្រើនផ្សេងគ្នាដើម្បីឱ្យអ្នកប្រើប្រាស់អ៊ីនធើណិតចំនួន904លាននាក់របស់ខ្លួន អាចចូលទៅកាន់គេហទំព័រដែលត្រូវបានហាមឃាត់កន្លងមក។ បើទោះជាត្រូវបានដកចេញពីអ៊ីនធើណិតដោយមិនមានការបកស្រាយកាលពីថ្ងៃទី10តុលាកន្លងទៅ ប៉ុន្តែ Tuber បានបង្ហាញថា នេះគឺជាការសាកល្បងដ៏សំខាន់មួយរបស់ទីក្រុងប៉េកាំងក្នុងបំណងឆ្ពោះទៅកាន់សេរីភាពនៃការប្រើប្រាស់អ៊ីនធើណិតនៅប្រទេសនេះ។
កម្មវិធីរុករក (Browser) ឈ្មោះ Tuberឧបករណ៍ ឬកម្មវិធីដូចជា Tuber នេះ ក៏មានលក្ខណផងដែរ៖ បរិស្ថានដែលត្រូវបានគ្រប់គ្រង ក្នុងនោះមានសកម្មភាពតាមដាន និងចម្រាញ់ខ្លឹមសារ។ ទន្ទឹមនឹងនេះ គ្រប់គ្នាអាចបញ្ជូនព័ត៌មានឱ្យគ្នាទៅវិញទៅមកដូចធម្មតា ដែលប្រការនេះនឹងជួយឱ្យបណ្ដាក្រុមហ៊ុនក្នុងស្រុកអាចចូលមើលទិន្នន័យពីបរទេសបានងាយស្រួលជាងមុន។
ជាច្រើនឆ្នាំមកហើយដែលរដ្ឋាភិបាលចិនបានលុបបំបាត់ VPN រាប់រយដែលត្រូវបានប្រើប្រាស់ដើម្បីឆ្លងកាត់ជញ្ជាំងភ្លើង (firewall)។ ការបង្កើតបាននូវច្រកចេញ-ចូលប្រភពអ៊ីនធើណិតសកលមួយដែលមានការអនុញ្ញាតពីរដ្ឋាភិបាលដើម្បីប្រើប្រាស់អ៊ីនធើណិត ក៏ប្រហែលជានឹងកាត់បន្ថយប្រសិទ្ធភាពរបស់បណ្ដា VPN ខុសច្បាប់នាពេលខាងមុខ។
បច្ចុប្បន្ន គេមិនទាន់ដឹងច្បាស់អំពីមូលហេតុដែលនាំឱ្យមានការបិទ Tuber នៅឡើយ។ ចំណែកបុគ្គលិកទំនាក់ទំនងសាធារណជនរបស់ក្រុមហ៊ុន 360 Security ក៏បានបដិសេធការអធិប្បាយទាក់ទិននឹងបញ្ហានេះផងដែរ។
យោងតាម Bloomberg កម្មវិធីរុករក Tuber ទំនងជាត្រួតពិនិត្យខ្លឹមសារមួយចំនួន រួមទាំងខ្លឹមសារនៅលើ YouTube ផងដែរ។ Tuber តម្រូវឱ្យអ្នកប្រើប្រាស់ចុះឈ្មោះលេខទូរស័ព្ទចល័តដើម្បីឱ្យអ្នកអភិវឌ្ឍអាចតាមដានសកម្មភាព ព្រោះថា រាល់លេខទូរស័ព្ទដែលប្រើប្រាស់ស្មាតហ្វូននៅប្រទេសចិន សុទ្ធតែត្រូវបាន “ស្គាល់អត្តសញ្ញាណ”។ ដូចទៅនឹងកម្មវិធីរុករកដទៃដែរ Tuber ក៏ស្នើសុំសិទ្ធិចូលទៅកាន់បញ្ជីទំនាក់ទំនងនៅក្នុងទូរស័ព្ទរបស់អ្នកប្រើប្រាស់។
Yik Chan Chin អ្នកស្រាវជ្រាវគោលនយោបាយទូរគមនាគមន៍នៃសាកលវិទ្យាមួយនៅទីក្រុង Suzhou បានឱ្យដឹងថា៖ “ប្រទេសចិនត្រូវតែមានការប្រុងប្រយ័ត្នខ្ពស់ដើម្បីថ្លឹងថ្លែងរវាងការបើកទូលាយជាងមុន និងការរក្សាស្ថិរភាពសង្គមក្នុងប្រទេស។ ប្រការដែលសំខាន់នោះគឺ ត្រូវរំដោះរលកព័ត៌មាន និងអនុញ្ញាតឱ្យពលរដ្ឋចិនអាចដោះចែករំលែកព័ត៌មាន ក៏ដូចជាយល់បានច្រើនអំពីពិភពលោកខាងក្រៅ”។
លោក Yik Chan Chin បន្តថា៖ “ព័ត៌មានស្ដីអំពី Tuber ត្រូវបានគេផ្សព្វផ្សាយ និងចែករំលែកយ៉ាងឆាប់រហ័ស ធ្វើឱ្យពលរដ្ឋចិនមានការសប្បាយចិត្តជាខ្លាំង។ នេះគឺជាប្រការមួយដែលបញ្ជាក់ថា ពលរដ្ឋនៅប្រទេសចិន ស្រេចឃ្លានការប្រើប្រាស់អ៊ីនធើណិតទូទាំងពិភពលោក”៕
ប្រភព៖ Bloomberg
October 13, 2020
ការបោះឆ្នោះអាមេរិក2020៖ លោក Trump ពោរពេញដោយថាមពល ពេលត្រលប់មកកាន់ “ទីលានប្រកួត”
បេក្ខភាពប្រធានាធិបតីមកពីបក្សសាធារណរដ្ឋ លោក Donald Trump បានចាប់ផ្ដើមដំណើរការព្រឹត្តិការណ៍ឃោសនារកសំឡេងឆ្នោតដំបូងរបស់ខ្លួននៅរដ្ឋ Florida រាប់ចាប់ពីពេលដែលលោកបានឆ្លងវីរុសCOVID-19 ដែលនេះគឺជាសញ្ញានៃការវិលត្រលប់របស់លោកនៅក្នុងការប្រជែងចូលកាន់កាប់សេតវិមានក្នុងឆ្នាំ2020។
ប្រធានាធិបតី Donald Trump ថ្លែងសុន្ទរកថានៅចំពោះមុខអ្នកគាំទ្ររាប់ពាន់នាក់នៅក្នុងព្រឹត្តិការណ៍ឃោសនារកសំឡេងឆ្នោតដែលធ្វើឡើងនៅក្នុងព្រលានយន្តហោះអន្តរជាតិ Orlando Sanford ក្នុងរដ្ឋ Florida កាលពីថ្ងៃទី12តុលា។
កាលពីថ្ងៃទី12តុលាដដែល លោក Trump ថ្លែងថា៖ “ពិតជាអស្ចារ្យនៅពេលបានត្រលប់មកកាន់ស្រុកកំណើត Florida ដើម្បីបង្ហាញអំពីការវិលត្រលប់ជាផ្លូវការរបស់ខ្ញុំសម្រាប់ការប្រកួតប្រជែងក្នុងការបោះឆ្នោតលើកនេះ”។
នៅក្បែរយន្តហោះ Air Force One ប្រធានាធិបតីអាមេរិក ថ្លែងថា៖ “យើងកំពុងធ្វើបានល្អជាងឆ្នាំ2016។ យើងនឹងទទួលបានជ័យជំនះដ៏អស្ចារ្យជាងជោគជ័យដែលយើងបានទទួលកាលពី4ឆ្នាំមុន”។
“ពេលនេះ ពួកគេ (ក្រុមវេជ្ជបណ្ឌិតនៅសេតវិមាន) និយាយថា ខ្ញុំលែងមានវីរុស។ ខ្ញុំមានអារម្មណ៍ថា មានកម្លាំងខ្លាំងក្លា។ ខ្ញុំនឹងថើបអ្នកគ្រប់គ្នា។ ខ្ញុំនឹងថើបបុរស និងស្ត្រីដ៏ស្រស់ស្អាត និងអ្នកគ្រប់រូប។ ខ្ញុំនឹងជូនដល់អ្នកគ្រប់គ្នានូវស្នាមថើបដ៏ផ្អែមល្ហែមមួយ” លោក Donald Trump និយាយទៅកាន់អ្នកគាំទ្ររបស់ខ្លួន។
ប្រធានាធិបតី Trump មិនបានពាក់ម៉ាស់នោះទេនៅពេលលោកនិយាយទៅកាន់មនុស្សរាប់ពាន់នាក់។ លោក Trump បានអធិប្បាយថា ការប្រជែងចូលកាន់កាប់សេតវិមានលើកនេះគឺជា “ការប្រជែងឆ្នោតដែលសំខាន់បំផុតក្នុងប្រវត្តិសាស្ត្រសហរដ្ឋអាមេរិក”៕
ប្រភព៖ RT
October 13, 2020
រង្វាន់ដែលគ្មានអ្នកណាចង់បាន…ចិនប្រគល់ “ស្លាកសញ្ញាខ្យងហៀន” ជូនអង្គភាពដែលមហាអន់-ធ្វើការយឺតបំផុត
ប្រទេសចិនមានការរៀបចំពិធីប្រគល់រង្វាន់ ជារង្វាន់រូបសត្វខ្យងហៀន ដើម្បីជំរុញការធ្វើការងាររបស់អង្គភាពរបស់រដ្ឋ ឱ្យធ្វើការយ៉ាងមានប្រសិទ្ធភាព និងឈប់ធ្វើការយឺតយ៉ាវ។
ប្រហែលជាមានអារម្មណ៍ថា សប្បាយរីករាយណាស់ បើសិនជាបានទទួលរង្វាន់ណាមួយនោះ តែប្រហែលជាមិនមែនរង្វាន់ “សញ្ញាខ្យងហៀន” នេះទេ ព្រោះធានាថា បើសិនអ្នកណាបានទទួលរង្វាន់នេះហើយ នឹងត្រូវស្ពឹកមុខគ្រប់គ្នាតែម្ដង។
រឿងហេតុ កើតឡើងនៅក្នុងប្រទេសចិន ក្នុងមណ្ឌលជើចៀង ទីក្រុងលីស៊ុយ ដោយមានការរៀបចំពិធីប្រកាសជូនរង្វាន់ ខ្យងហៀន ចំពោះអង្គភាពផ្សេងៗនៅក្នុងតំបន់ ដែលមានអ្នកប្រគល់រង្វាន់ទាំងនោះ គឺលោក លី អ៊ី ប៉ លេខាបក្សតំបន់ និងលោក វ៉ាង ជឹង ហ្វ៊ើយ រងលេខាធិការគណៈកម្មការរបក្ស។
គោលបំណងរបស់រង្វាន់ខ្យងហៀននេះ គឺសម្រាប់ប្រគល់ជូនអង្គភាពណា ដែលមានការបម្រើសេវាកម្មជូនប្រជាជន និងគ្រប់គ្រងចាត់ចែងការងារ ដែលមហាសែនអន់ និងយឺតយ៉ាវបំផុត។ ពានរង្វាន់នេះ បានទទួលកម្លាំងជំរុញចិត្តមកពីសត្វខ្យងហៀន ដែលមានលក្ខណៈសញ្ញាលេចធ្លោរបស់វា គឺភាពយឺតយ៉ាវ ប្រើពេលវេលាយូរ ទម្រាំនឹងវារគើមៗទៅដល់គោលដៅនោះ ត្រូវបានយកមកប្រៀបធៀបជាមួយនឹងប្រសិទ្ធភាព ការធ្វើការងាររបស់អង្គភាពរដ្ឋថា ទម្រាំតែដំណើការការងារចប់ គឺប្រើពេលវេលាធ្វើការ ប្រៀបដូចសត្វខ្យងហៀនហ្នឹងឯង(ស្ពឹក និងគើមៗ)។
ក្នុងឆ្នាំ2020នេះ មានការប្រកាសប្រគល់រង្វាន់រួចទៅហើយ កាលពីខែសីហាកន្លងទៅ ហើយអង្គភាព ដែលទទួលបានរង្វាន់ដ៏គួរឱ្យមហាសែនមោទនភាពនេះ គឺក្រុមធនធានទឹក និងអង្គភាពរបស់មន្ទីរពេទ្យឈូនីង។ លទ្ធផលនៃការសម្រេចប្រគល់រង្វាន់ គឺបានមកពីពិន្ទុសំឡេងឆ្នោតរបស់ប្រជាជននៅក្នុងតំបន់នោះ ហើយសម្រាប់អង្គភាពដែលបានទទួលរង្វាន់ខ្យងហៀននេះ បើសិនភ័យខ្លាចថា រង្វាន់នេះនឹងនៅដិតជាប់នឹងអង្គភាពយូរតទៅទៀតនោះ សូមកុំបាច់ព្រួយកង្វល់អី ព្រោះរង្វាន់នេះ អាចនឹងត្រូវទាមទារយកទៅវិញ នៅពេលណាដែលអង្គភាពមួយនោះ មានការអភិវឌ្ឍការធ្វើការងារបានល្អប្រសើរឡើង។
រង្វាន់ខ្យងហៀន ទទួលបានជោគជ័យក្នុងការជំរុញការធ្វើការងារបានយ៉ាងល្អ។ អង្គភាពដែលបានទទួលរង្វាន់ខ្យងហៀននេះទៅ ក្នុងអំឡុងពេលតែប៉ុន្មានថ្ងៃប៉ុណ្ណោះ ការធ្វើការងារ ក៏ស្វាហាប់ លឿនរហ័សឡើងយ៉ាងមើលឃើញច្បាស់ភ្លាមៗតែម្ដង។ ដូចជា គ្រោងការកសាងផ្លូវនៅក្នុងភូមិ ដែលប្រើពេលវេលាយូរ ទម្រាំនឹងរួចរាល់នោះ ក្រោយពីទទួលបានរង្វាន់នេះទៅ ក៏ស្រាប់តែរៀបចំអង្គភាពការងារចូលទៅមើលការខុសត្រូវការងារកសាងផ្លូវនោះឡើងបានភ្លាមៗ ក្នុងអំឡុងពេលមិនដល់ទាំង 10ថ្ងៃផង។ ហើយឧទាហរណ៍ 1ទៀត គឺគ្រោងការជួសជុល និងស្ដារបន្ទប់ទឹកសាធារណៈឡើងវិញ ដែលបានធ្វើរួចស្រេចជាស្ថាពរ ក្នុងរយៈពេលមិនដល់ 1ខែផង ក្រោយពីបានទទួលរង្វាន់នេះទៅ។ នេះគឺ ជារង្វាន់មួយ ដែលគួរឱ្យចាប់អារម្មណ៍មែនទែន និងគួរតែនាំយកមកប្រើជាមួយគ្រប់អង្គភាពការងារ…៕
ប្រភព៖ សារព័ត៌មានបរទេស

October 13, 2020
ការបោះឆ្នោះអាមេរិក2020៖ ពលរដ្ឋអាមេរិកាំងឈរតម្រង់ជួរតាំងពីម៉ោង4ទៀបភ្លឺ និងរង់ចាំ8ម៉ោងដើម្បីបានបោះឆ្នោតដោយផ្ទាល់ដៃសម្រាប់ការជ្រើសរើសប្រធានាធិបតី
ម្ចាស់ឆ្នោតនៅក្នុងរដ្ឋ Georgia នាំគ្នាតម្រង់ជួរចាប់ពីព្រឹកព្រលឹម និងរង់ចាំអស់រយៈពេល8ម៉ោងដើម្បីបានបោះឆ្នោតដោយផ្ទាល់ដៃនៅមុនថ្ងៃបោះឆ្នោតដែលបានកំណត់ ដែលនៅសល់2សប្ដាហ៍ទៀត។
រដ្ឋ Georgia ដែលបានក្លាយជា “សមរភូមិ” សំខាន់នៅក្នុងការបោះឆ្នោតឆ្នាំ2020 ដោយមានកៅអីសភាជាន់ខ្ពស់ចំនួនពីរ និងអត្រានៃការគាំទ្របេក្ខភាពប្រធានាធិបតីទាំងពីររូបដែលទំនងជាប្រកៀកប្រកិតគ្នាខ្លាំង បានចាប់ផ្ដើមអនុញ្ញាតឱ្យម្ចាស់ឆ្នោត បោះឆ្នោតដោយផ្ទាល់ដៃ ចាប់ពីថ្ងៃទី12តុលា។
រដ្ឋខាងលើនេះ ក៏បានអនុញ្ញាតឱ្យម្ចាស់ឆ្នោត ធ្វើការបោះឆ្នោតតាមរយៈការផ្ញើសំបុត្រ តាំងពីប៉ុន្មានសប្ដាហ៍មុនមកម្លេះ ប៉ុន្តែ ថ្ងៃទី12តុលាគឺជាថ្ងៃដំបូងដែលម្ចាស់ឆ្នោតត្រូវបានអនុញ្ញាតឱ្យទៅកាន់មណ្ឌលបោះឆ្នោតដើម្បីជ្រើសរើសប្រធានាធិបតី។ មូលហេតុនៃការបោះឆ្នោតមុនកាលកំណត់បែបនេះគឺដោយសារស្ថានភាព COVID-19 មិនទាន់អំណោយផល នាំឱ្យគណៈកម្មការរៀបចំការបោះឆ្នោតត្រូវរក្សាគម្លាតសង្គម ដើម្បីជៀសវាងការឆ្លងរាលដាល។
ម្ចាស់ឆ្នោតនៅក្នុងរដ្ឋ Florida ហាក់បានយល់ដឹងអំពីសារសំខាន់នៃការបោះឆ្នោតអាណត្តិនេះ ទើបពួកគេនាំគ្នាទៅតម្រង់ជួរ ឈររង់ចាំអស់រយៈពេលជាច្រើនម៉ោង និងមានកន្លែងខ្លះ ម្ចាស់ឆ្នោតទៅតម្រង់ជួរ មុនពេលមណ្ឌលបោះឆ្នោតបើកទ្វារទៅទៀត។ មនុស្សមួយចំនួនបានទៅដល់មណ្ឌលបោះឆ្នោតតាំងពីម៉ោង4ព្រឹក និងរង់ចាំដល់ទៅ8ម៉ោងទើបដល់វេនចូលបោះឆ្នោត។ នេះបើតាមមន្ត្រីនៅតំបន់ Gwinnett County។
ពលរដ្ឋអាមេរិកាំងឈរតម្រង់ជួរតាំងពីម៉ោង4ទៀងភ្លឺ ដើម្បីបានបោះឆ្នោតជ្រើសរើសប្រធានាធិបតី
ម្ចាស់ឆ្នោតម្នាក់ឈ្មោះ Dannielle Driscoll បាននិយាយថា នាងពិតជាមានការភ្ញាក់ផ្អើលជាខ្លាំងនៅពេលឃើញមនុស្សយ៉ាងច្រើនមកតម្រង់ជួរនៅជុំវិញបណ្ដាល័យ South Cobb។ នាងថ្លែងថា “នេះគឺជាសញ្ញានៃភាពវិជ្ជមានផង និងអវិជ្ជមានផង។ វិជ្ជមាន ព្រោះតែគ្រប់គ្នាកំពុងចូលរួមបោះឆ្នោត ប៉ុន្តែអវិជ្ជមាន គឺព្រោះតែខ្ញុំមិនចង់តម្រង់ជួររង់ចាំ”។
អ្នកស្រី Janice Elliott-Howard វ័យ54ឆ្នាំ ឱ្យដឹងថា អ្នកស្រីមិនមានការភ្ញាក់ផ្អើលទេ នៅចំពោះមុខហ្វូងមនុស្សដ៏ច្រើននេះ។ អ្នកស្រីយល់ថា ការបោះឆ្នោតផ្ទាល់គឺជារឿងល្អ។ “ខ្ញុំគិតថា នេះគឺជាវិធីដែលមានសុវត្ថិភាព។ អ្នកនឹងបានដឹងថា សន្លឹកឆ្នោតរបស់ខ្លួនត្រូវបានគេរាប់។ ខ្ញុំមិនជឿទៅលើការបោះឆ្នោតតាមរយៈការផ្ញើសំបុត្រ ឬអ៊ីម៉េលនោះឡើយ”។
យោងតាមទិន្នន័យដែលត្រូវបានប្រកាសកាលពីថ្ងៃទី12តុលារបស់គម្រោងបោះឆ្នោតអាមេរិកនៃសាកលវិទ្យាល័យ Florida ពលរដ្ឋជិត10.3លាននាក់នៅសហរដ្ឋអាមេរិក បានបោះឆ្នោតជ្រើសរើសប្រធានាធិបតីមុនកាលកំណត់ ដែលអត្រានេះគឺច្រើនជាងច្រើនដងបើធៀបនឹងអំឡុងពេលដូចគ្នាកាលពីឆ្នាំ2016។ មូលហេតុដែលនាំឱ្យមានម្ចាស់ឆ្នោតធ្វើការបោះឆ្នោតច្រើនមុនពេលកំណត់បែបនេះ គឺព្រោះតែពួកគេជ្រើសរើសការបោះឆ្នោតតាមរយៈការផ្ញើសំបុត្រដើម្បីរក្សាសុវត្ថិភាពនៅចំពោះមុខមហារោគរាតត្បាតCOVID19៕
ប្រភព៖ RT
October 13, 2020
វេជ្ជបណ្ឌិតនៅសេតវិមាន៖ “លោក Trump អវិជ្ជមាននឹងCOVID-19 ច្រើនថ្ងៃមកហើយ”
វេជ្ជបណ្ឌិត Sean Conley បានឱ្យដឹងថា ការធ្វើតេស្តរបស់ប្រធានាធិបតីសហរដ្ឋអាមេរិក លោក Donald Trump បានបង្ហាញថា លោកអវិជ្ជមានជាមួយនឹងវីរុសCOVID-19 អស់រយៈពេលជាច្រើនថ្ងៃកន្លងមកហើយ និងបានបញ្ជាក់ថា “មិនអាចចម្លងទៅអ្នកផ្សេងបានទេ”។
“ខ្ញុំចង់និយាយថា លោក (Trump) បានទទួលលទ្ធផលអវិជ្ជមានអស់រយៈពេលច្រើនថ្ងៃជាបន្តបន្ទាប់ នៅពេលធ្វើតេស្តដោយប្រើប្រាស់ឧបករណ៍ធ្វើតេស្តរហ័ស Abbot BinaxNOW” វេជ្ជបណ្ឌិតប្រចាំសេតវិមាន លោក Sean Conley បានឱ្យដឹងដូច្នេះនៅក្នុងកំណត់ហេតុមួយដែលត្រូវបានប្រកាសប្រាប់សារព័ត៌មានកាលពីថ្ងៃទី12តុលា ខណៈដែលលោក Trump ធ្វើដំណើរទៅកាន់រដ្ឋ Florida ដើម្បីបន្តធ្វើយុទ្ធនាការឃោសនារកសំឡេងឆ្នោត។
ក្រុមមន្ត្រីនៅសេតវិមានមិនបានឱ្យដឹងលម្អិតអំពីពេលវេលាជាក់លាក់នោះទេ ប៉ុន្តែបានអះអាងថា ទិន្នន័យនៃការធ្វើតេស្ត អនុញ្ញាតឱ្យក្រុមវេជ្ជបណ្ឌិតប្រចាំសេតវិមាន អាចសន្មតបានថា “ប្រធានាធិបតីលែងមានហានិភ័យក្នុងការចម្លងវីរុសទៅអ្នកដទៃទៀតហើយ”។
វេជ្ជបណ្ឌិតប្រចាំសេតវិមាន លោក Sean Conley
តាមបទពិសោធន៍កន្លងមក ក្រុមអ្នកវេជ្ជសាស្ត្រផ្នែករោគឆ្លងឱ្យដឹងថា អ្នកដែលបានឆ្លងវីរុសCOVID-19 អាចមិនមានរោគសញ្ញា ឬមិនមានហានិភ័យក្នុងការចម្លងវីរុសទៅអ្នកផ្សេង ប៉ុន្តែពួកគេនៅតែមានផ្ទុកវីរុសនៅក្នុងរាងកាយ។ ប្រធានាធិបតីសហរដ្ឋអាមេរិក កាលពីថ្ងៃទី11តុលាបានថ្លែងទៅកាន់អ្នកគាំទ្ររបស់លោកថា លោក “ទទួលបានលទ្ធផលធ្វើតេស្តអវិជ្ជមានទាំងស្រុង” ជាមួយនឹងCOVID-19។
សូមរំឭកថា កាលពីថ្ងៃទី2តុលា លោក Trump បានប្រកាសថា លោក និងភរិយា បានឆ្លងវីរុសCOVID-19 ហើយបន្ទាប់មកក៏បានធ្វើដំណើរទៅកាន់មន្ទីរពេទ្យយោធា Walter Reed ដើម្បីទទួលការព្យាបាល។ លោក Trump បានចេញពីមន្ទីរពេទ្យ និងត្រលប់មកសេតវិមានកាលពីថ្ងៃទី5តុលាដើម្បីបន្តធ្វើការនៅក្នុងការិយាល័យបណ្ដោះអាសន្នដែលស្ថិតនៅក្រោមដីដែលជាប់នឹងបន្ទប់សុខាភិបាល ដើម្បីអាចតាមដាន និងពិនិត្យសុខភាពបានភ្លាមនៅពេលមានអាការរោគណាមួយកើតឡើង។ ថ្ងៃទី7តុលា លោក Trump ក៏បានត្រលប់ចូលធ្វើការក្នុងបន្ទប់រាងពងក្រពើ (The Oval Office)។ ប្រធានាធិបតីអាមេរិករូបនេះ បានប្រកាសឈប់ប្រើប្រាស់ថ្នាំព្យាបាលCOVID-19 ចាប់ពីថ្ងៃទី9តុលា៕
ប្រភព៖ Reuters
October 13, 2020
កិច្ចព្រមព្រៀងពាណិជ្ជកម្មសេរីកម្ពុជា-ចិន នឹងដាក់ឱ្យប្រើប្រាស់ចាប់ពីដើមឆ្នាំ2021ខាងមុខ
កិច្ចព្រមព្រៀងពាណិជ្ជកម្មសេរី រវាងប្រទេសកម្ពុជានិងប្រទេសចិន ដែលត្រូវបានចុះហត្ថលេខានាព្រឹកថ្ងៃទី12តុលានេះ នឹងត្រូវបានដាក់ឱ្យអនុវត្តជាផ្លូវការចាប់ពីខែមករា ឆ្នាំ2021។
អ្នកនាំពាក្យរបស់ក្រសួងពាណិជ្ជកម្មកម្ពុជា លោក ស៊ាង ថៃ បានឱ្យដឹងថា រដ្ឋាភិបាលកម្ពុជានឹងដាក់ឱ្យប្រើប្រាស់កិច្ចព្រមព្រៀងខាងលើនេះ ចាប់ពីថ្ងៃទី1មករា ឆ្នាំ2021។ យ៉ាងនេះក្ដី ការដាក់ឱ្យអនុវត្តជាផ្លូវការនឹងអាស្រ័យទៅលើពេលវេលានៃការអនុម័តរបស់សភាជាតិ និងការចុះហត្ថលេខាពីអង្គព្រះមហាក្សត្រនៃព្រះរាជាណាចក្រកម្ពុជា។
សូមបញ្ជាក់ថា កិច្ចព្រមព្រៀងពាណិជ្ជកម្មសេរី រវាងប្រទេសកម្ពុជានិងប្រទេសចិន ត្រូវបានចុះហត្ថលេខាកាលពីព្រឹកមិញនេះ (12តុលា2020) ដោយមានវត្តមានរបស់ សម្តេច ហ៊ុន សែន ប្រមុខរាជរដ្ឋាភិបាល និងលោកវ៉ាង យី (Wang Yi) រដ្ឋមន្ត្រីការបរទេសនៃសាធារណរដ្ឋប្រជាមានិតចិន។
ទាក់ទងនឹងផលប្រយោជន៍នៃកិច្ចព្រមព្រៀងពាណិជ្ជកម្មសេរីនេះ គេសង្ឃឹមថា កម្ពុជានឹងអាចនាំចេញផលិតផលរបស់ខ្លួនទៅកាន់ប្រទេសចិនបានកាន់តែច្រើន ដោយមិនចាំបាច់បង់ពន្ធដូចមុន៕
October 12, 2020