Author: សឿន សំណាង

ម្ចាស់ក្រុមចម្រៀង BTS របស់កូរ៉េខាងត្បូង ក្លាយជាមហាសេដ្ឋីដូចការរំពឹងទុក
ស្ថាបនិក Bang Shi-hyuk បានក្លាយជាមហាសេដ្ឋី ចំណែកសមាជិក7រូបផ្សេងទៀតរបស់ក្រុមចម្រៀង BTS ក៏បានក្លាយជាសេដ្ឋី ដោយមានទ្រព្យរាប់លានដុល្លារអាមេរិក បន្ទាប់ពីក្រុមហ៊ុន Big Hit Entertainment បានចូលរួមធ្វើជំនួញក្នុងផ្សារហ៊ុន (IOP)។
Big Hit Entertainment ដែលជាក្រុមហ៊ុននៅពីក្រោយក្រុមចម្រៀងបុរស BTS ដ៏ល្បីឈ្មោះនៃចម្រៀង K-pop ប្រមូលបានទុនចំនួន963ពាន់លានវ៉ុន (840លានដុល្លារអាមេរិក) ពីការលក់មូលបត្រថ្មីចំនួន7.13លានហ៊ុនដែលទើបតែបានបោះផ្សាយកាលពីពេលថ្មីៗនេះ។ នេះគឺជាករណី IPO ធំបំផុតរបស់កូរ៉េខាងត្បូង រាប់ចាប់ពីឆ្នាំ2017។ មូលបត្រ Big Hit ត្រូវបានបោះផ្សាយលក់ចាប់ពីថ្ងៃទី15តុលា ដែលនេះបាននាំឱ្យស្ថាបនិក Bang Shi-hyuk ក្លាយជាមហាសេដ្ឋីថ្មីបំផុតនៅកូរ៉េខាងត្បូង។
មូលបត្រ Big Hit បើកទ្វារលក់ក្នុងតម្លៃ 270,000វ៉ុន/ហ៊ុន ខ្ពស់ជាងតម្លៃ IPO 135,000វ៉ុន/ហ៊ុន ដែលប្រការនេះ បានជួយឱ្យតម្លៃទុនរបស់ Big Hit ឡើងដល់ជាង9លានលានវ៉ុន។ លោក Bang វ័យ48ឆ្នាំ កំពុងកាន់កាប់ភាគហ៊ុនជិត35% នៅក្នុងក្រុមហ៊ុននេះ ហើយបច្ចុប្បន្ន ទ្រព្យរបស់លោកបានកើនឡើងដល់3.2ពាន់លានដុល្លារអាមេរិក នេះបើតាមសារព័ត៌មាន Forbes។ សមាជិកទាំង7រូបរបស់ BTS ដែលសុទ្ធតែមានវ័យ20ឆ្នាំ ក៏បានក្លាយជាសេដ្ឋី ដោយសារមុននោះ ពួកគេទទួលបានភាគហ៊ុនមួយចំនួនធំ។
សមាជិកក្រុមចម្រៀងប្រុស BTS
ព្រឹត្រិការណ៍ Big Hit IPO ត្រូវបានធ្វើឡើងក្នុងស្ថានភាពដែលកូរ៉េខាងត្បូងកំពុងស្ថិតក្នុងរលកនៃ COVID-19 ទីពីរ។ BTS ត្រូវបង្ខំចិត្តពន្យារពេលទៅលើគម្រោងសម្ដែងផ្ទាល់នានាចាប់ពីខែមីនា រួមទាំងព្រឹត្តិការណ៍តន្ត្រីដែលបានលក់សំបុត្រហើយផងដែរ។ ឆ្នាំ2019 ដំណើរសម្ដែងលក្ខណអន្តរជាតិដែលមានឈ្មោះថា Love Yourself របស់ក្រុមចម្រៀងនេះ រកបានប្រាក់ជាង196លានដុល្លារអាមេរិក។
Big Hit បច្ចុប្បន្នគឺជាក្រុមហ៊ុនកម្សាន្តដែលមានប្រាក់ចំណេញខ្ពស់ជាងគេបំផុតនៅប្រទេសកូរ៉េខាងត្បូង ដោយចំណេញ63លានដុល្លារនៅក្នុងចំណូលសរុប507លានដុល្លារកាលពីឆ្នាំ2019 ដែលតួលេខនេះខ្ពស់ជាងបណ្ដាក្រុមហ៊ុនតន្ត្រីកូរ៉េខាងត្បូង ដូចជា SM, YG និង JYP Entertainment (តែងត្រូវគេហៅថា “Big Three”) ទៅទៀត។ កាលពីឆ្នាំទៅ (2019) BTS ក៏មានវត្តមាននៅក្នុងបញ្ជីឈ្មោះ Forbes Celebrity 100 និងបានក្លាយជាក្រុមតន្រីដែលមានប្រាក់ចំណូលខ្ពស់ជាងគេបង្អស់នៅក្នុងទ្វីបអាស៊ីទាំងមូល។
បងប្អូនជីដូនមួយរបស់លោក Bang គឺលោក Bang Jun-hyuk ដែលជាស្ថាបនិកនៃក្រុមហ៊ុនហ្គេមអនឡាញ Netmarble ក៏ក្លាយជាមហាសេដ្ឋីមួយរូប ដោយទ្រព្យសរុបរបស់គាត់មានតម្លៃ2.8ពាន់លានដុល្លារ។ Netmarble គឺជាក្រុមហ៊ុនមួយក្នុងចំណោមក្រុមហ៊ុនដែលបានវិនិយោគទៅលើ Big Hit មុនគេ ហើយបច្ចុប្បន្ន Netmarble កាន់កាប់ភាគហ៊ុនចំនួន20% នៅក្នុងក្រុមហ៊ុន Big Hit៕
ប្រភព៖ Forbes
អត្ថបទទាក់ទង> អ្នកនៅពីក្រោយជោគជ័យរបស់ក្រុមចម្រៀងកូរ៉េ BTS នឹងក្លាយជាមហាសេដ្ឋីនាពេលដ៏ខ្លីខាងមុខ បន្ទាប់ពី Big Hit ចូលផ្សារហ៊ុន
October 16, 2020
ដូចការសង្ស័យមែន…!! កំពូលស្មាតហ្វូន Galaxy S20 FE ដែលកំពុងល្បីខ្លាំងជុំវិញពិភពលោក…ពេលនេះបានដាក់លក់ជាផ្លូវការក្នុងទីផ្សារប្រទេសកម្ពុជាយើងហើយ ជាមួយនឹងកាដូដ៏អស្ចារ្យទៀត…!!
(ភ្នំពេញ) ថ្ងៃទី ១៦ ខែតុលា ឆ្នាំ ២០២០៖ ចង់បានបែបណា…ម៉ូដណា…តម្លៃណា…ពេលណា… ស្រឡាញ់ និងចង់ប្រើខ្លាំងប៉ុណ្ណា…ក៏ក្រុមហ៊ុន សាមសុង អាចផ្តល់ជូនឱ្យអ្នកគាំទ្រជុំវិញពិភពលោកបានដែរ…! ជាពិសេសគឺអ្នកគាំទ្រទាំងអស់ដែលនៅក្នុងប្រទេសកម្ពុជាយើងតែម្តង…!! និយាយទៅគឺផ្តល់ជូនជម្រើសមិនឱ្យទាស់ចិត្តម៉ង…!!
សុំសួរមួយសិនថា…”អ្នកណាគេខ្លះជាហ្វេនរបស់កំពូលស្មាតហ្វូន Galaxy S20 FE?” ឥឡូវនេះក្តីស្រមៃកំពុងក្លាយជាការពិតហើយដែលក្រុមហ៊ុន សាមសុង នៅពេលនេះបាននាំយកកំពូលស្មាតហ្វូនក្នុងសករាជថ្មីស៊េរី Samsung Galaxy S20 FE (Truly Fan Edition) មកលក់ផ្លូវការក្នុងទីផ្សារប្រទេសកម្ពុជាជូនដល់អ្នកស្រឡាញ់ និងប្រាថា្នចង់បាន…ចង់ប្រើជាមួយនឹងតម្លៃដ៏អស្ចារ្យ…ពិសេសនឹកស្មានមិនដល់ទាល់តែសោះ…!!

* រាល់ការជាវ Galaxy S20 FE ចាប់ពីថ្ងៃទី16 ដល់ថ្ងៃទី 22 ខែតុលា ឆ្នាំ2020 នឹងទទូលបានការថែមជូនដ៏ពិសេសបំផុតដូចជា៖
– ធុងបាស JBL Flip5 មួយគ្រឿងដ៏ស្រស់ស្អាតភ្លាមៗ
– បញ្ចុះតម្លៃ 50% ពេលប្តូរអេក្រង់ថ្មី (រយៈពេល 1 ឆ្នាំចាប់គិតពីថ្ងៃជាវ)!
– ស៊ីមស្មាតលេខពិសេសតម្លៃ 54 ដុល្លារ ជាមួយគម្រោងស្មាតចំនួន 52 សប្តាហ៍!
សូមបញ្ជាក់ថាកំពូលស្មាតហ្វូន Samsung Galaxy S20 FE (Truly Fan Edition) នេះគឺត្រូវបានបង្កើតឡើងយ៉ាងពិសេស និងបំពេញតាមតម្រូវការរបស់អ្នកប្រើប្រាស់ទូទាំងពិភពលោកដោយបំពាក់នូវបច្ចេកវិទ្យាទំនើបចុងក្រោយដូចទៅនឹងអធិរាជស្តេចកំពូលស្មាតហ្វូនស៊េរី flagship ដែរ!
ហ្នឹង…បែបមិនជឿទេមើលទៅ…!! ជឿ…មិនជឿ…បន្តិចទៀតដឹងខ្លួនហើយ…!! ខាងក្រោមនេះគឺជាសមត្ថភាព…កម្លាំងម៉ាស៊ីន…អាវក្រោះការពារទឹក និងធូលី…កាមេរ៉ា…កំពូលថាមពលថ្មធំ…និងតម្លៃដែលសឹងតែមិនគួរឱ្យជឿទាល់តែសោះថាក្រុមហ៊ុន សាមសុង ហ៊ានហក់ដាក់លក់ក្នុងតម្លៃត្រឹមប៉ុណ្ណឹងដើម្បីឱ្យអតិថិជនរបស់ខ្លួនសម្រេចក្តីបំណងក្នុងការទទួលបានបទពិសោធន៍នៃកំពូលស្មាតហ្វូនដ៏អស្ចារ្យសម្រាប់អនាគតម៉ូឌែលនេះ…!
ដូច្នេះបើចង់ដឹងច្បាស់…សូមមកមើលតម្លៃ និងលក្ខណៈពិសេសអស្ចារ្យរបស់ Samsung Galaxy S20 FE (Truly Fan Edition) ជាមួយយើងទាំងអស់គ្នា៖
* Galaxy S20 FE (Fan Edition)
– តម្លៃ៖ $ 646 ជាមួយនឹង 8GB (RAM) / 128 GB (ROM) អាចបន្ថែមមេម៉ូរីក្រៅបានរហូតដល់ 1TB
– ទំហំអេក្រង់៖ 6.5 អ៊ីញ
– ប្រភេទកញ្ចក់អេក្រង់៖ 120Hz Refresh Rate, Infinity-O Display ប្រភេទ Dynamic SUPER AMOLED 2X
– កាមេរ៉ាមុខ 1 គ្រាប់៖ ទំហំ 32 MP
– កាមេរ៉ាក្រោយ 3 គ្រាប់៖ 12 MP (Wide), 8 MP (Telephoto), 12 MP (Ultra-Wide)
– ប្រព័ន្ធដំណើរការ (CPU)៖ Exynos 990
– ថាមពលថ្ម៖ 4,500 mAh (សាកថ្មល្បឿនលឿនបំផុតឥតខ្សែ 15 W និងប្រើខ្សែល្បឿនលឿន 25W)
– ពណ៌ 5 ជម្រើស៖ Cloudy Navy (ខៀវ), Cloudy Lavender (ស្វាយខ្ចី), Cloudy Mint (បៃតងខ្ចី), Cloudy Red (ក្រហម)
ម៉េចដែរប៉ុណ្ណឹង…!! គ្រប់គ្រាន់…និងអាចធ្វើការសម្រចចិត្តតែម្តងបាននៅ? មិនងាយនឹងបានប្រើទេណា…និយាយទៅលោកអ្នកដែលធ្លាប់ប្រើ និងដឹងពីចំណុចកំពូលក៏ដូចជាលក្ខណៈពិសេសនៃស្តេចកំពូលស្មាតហ្វូន ឬអធិរាជស្មាតហ្វូនរបស់ក្រុមហ៊ុន សាមសុង គឺប្រាកដជាដឹងច្បាស់ជាងអ្នកណាទាំងអស់…! អ៊ីចឹងនៅចាំអីទៀត…!!
សម្រាប់ព័ត៌មានលម្អិតបន្ថែមសូមអញ្ជើញមកទស្សនាផលិតផលដោយផ្ទាល់តាមហាងទំនើបចែកចាយផលិតផល សាមសុង ទាំងអស់ដែលនៅជិតលោកអ្នកបំផុតទូទាំងប្រទេស ឬក៏អាចធ្វើការទំនាក់ទំនងទៅកាន់ផ្នែកសេវាបម្រើអតិថិជនដោយឥតគិតថ្លៃតាមរយៈទូរស័ព្ទលេខ៖ 1800-20 32 32 !
October 16, 2020
បាតុករថៃរាប់ម៉ឺននាក់ ធ្វើបាតុកម្មនៅទីក្រុងបាងកក! “ដូចទៅនឹងឆ្កែដែលទាល់ច្រក យើងនឹងប្រយុទ្ធរហូតដល់ស្លាប់”
មនុស្សរាប់ម៉ឺននាក់ រួមមានទាំងសិស្សសាលាមធ្យមសិក្សាផងដែរ បាននាំគ្នាចូលរួមធ្វើបាតុកម្មនៅទីក្រុងបាងកក បើទោះជារាជរដ្ឋាភិបាលថៃបានចេញបទបញ្ជា ហាមមិនឱ្យប្រមូលផ្ដុំគ្នាលើសពី4នាក់ក៏ដោយ។
ហ្វូងមនុស្សបានប្រមូលផ្ដុំគ្នានៅក្នុងតំបន់ Ratchaprasong ដែលជាផ្លូវបំបែកមានមនុស្សច្រើនបំផុតនៅក្នុងរាជធានីបាងកក កាលពីល្ងាចថ្ងៃទី15តុលា និងបាននាំគ្នាស្រែកហ៊ោខ្លាំងៗថា៖ “ខ្ញុំមិនខ្លាច” “ប្រគល់សេរីភាពឱ្យមិត្តរបស់យើង” “នាយករដ្ឋមន្ត្រី Prayuth ត្រូវតែចុះចេញពីតំណែង” ព្រមទាំងបានហៅកងកម្លាំងនគរបាលថាជា “ទេសករ” របស់របបយោធាថៃទៀតផង។
Panupon Jadnok ជាមេដឹកនាំបាតុករម្នាក់បាននិយាយទៅកាន់ក្រុមបាតុករថា៖ “ដូចទៅនឹងឆ្កែដែលទាល់ច្រក យើងនឹងប្រយុទ្ធរហូតដល់ស្លាប់។ យើងនឹងមិនរាថយ មិនរត់គេចខ្លួន។ យើងនឹងមិនទៅណាទាំងអស់”។
ក្នុងហ្វូងមនុស្ស មានបាតុករម្នាក់កាន់បដាមួយដែលមានសរសេរសរសេរថា៖ “ផ្ញើជូនគ្រួសារនិងមិត្តភ័ក្ដិ បើសិនជាខ្ញុំជួបបញ្ហាអ្វី សូមកុំបន្ទោសព្រោះតែខ្ញុំបានមកធ្វើបាតុកម្ម ចូរបន្ទោសទៅលើអ្នកធ្វើបាបមនុស្ស”។
ពេលខ្លះ ក្រុមបាតុករបានធ្វើឱ្យរថយន្តរបស់ប៉ូលិសត្រូវថយក្រោយ ហើយហ្វូងមនុស្សច្រើនរហូតដល់ថ្នាក់ សំឡេងរបស់ពួកគេអាចស្ដាប់ឮស្ទើរតែទូទាំងទីក្រុង។ ដោយសារតែបាតុកម្មនេះ ផ្លូវបំបែក Ratchaprasong ត្រូវកកស្ទះ មជ្ឈមណ្ឌលពាណិជ្ជកម្មជាច្រើននៅក្នុងតំបន់ ត្រូវបិទទ្វារ។
ប៉ូលិសប្រឆាំងកុបកម្មប្រមាណជា2,500នាក់ត្រូវបានបញ្ជូនមកទប់ទល់នឹងបាតុករ។ Krissana Pattanacharoen អ្នកនាំពាក្យរបស់កងនគរបាលបានឱ្យដឹងថា ក្រុមមេដឹកនាំបាតុករបានអំពាវនាវឱ្យធ្វើបាតុកម្មកាលពីថ្ងៃទី15 “គឺពិតជាបានរំលោភច្បាប់”។
បាតុកម្មនេះបានកើតឡើងបន្ទាប់ពីរដ្ឋាភិបាលថៃ អនុវត្តការហាមមិនឱ្យប្រមូលផ្ដុំគ្នាលើសពី4នាក់ ទៅតាមបទបញ្ជាបន្ទាន់មួយដែលមានសុពលភាពចាប់ពីព្រឹកថ្ងៃទី15តុលា ដើម្បីទប់ស្កាត់នឹងបាតុកម្ម។ ក្រោយពីបទបញ្ជានេះត្រូវបានប្រកាស កម្លាំងប៉ូលិសបានបំបែកហ្វូងបាតុកររាប់ពាន់នាក់ដែលបានប្រមូលផ្ដុំគ្នានាព្រឹកនេះនៅមុខការិយាល័យនាយករដ្ឋមន្ត្រី និងបានចាប់ខ្លួនសកម្មជនចំនួន22នាក់។
សូមបញ្ជាក់ថា ចលនាបាតុកម្មនៅប្រទេសថៃ បានងើបឡើងវិញចាប់ពីខែកក្កដា ដើម្បីទាមទារឱ្យនាយករដ្ឋមន្ត្រីថៃ Prayuth Chan-ocha លាលែងពីតំណែង កែទម្រង់របបយោធាដែលដឹកនាំដោយមហាក្សត្រថៃ បង្កើតរដ្ឋធម្មនុញ្ញថ្មី និងធ្វើការបោះឆ្នោត។ ភាគីបាតុករយល់ថា មិនចាំបាច់លុបចោលរបបយោធានៅប្រទេសថៃ ប៉ុន្តែ គេត្រូវការកាត់បន្ថយអំណាចរបស់ស្ដេចទៅតាមច្បាប់រដ្ឋធម្មនុញ្ញ។
ទាក់ទងនឹងបញ្ហាខាងលើ បច្ចុប្បន្ន មិនទាន់ឃើញមានសេចក្ដីរាយការណ៍ណាមួយស្ដីពីប្រតិកម្មរបស់បរមរាជវាំងថៃនៅឡើយ។
សូមបញ្ជាក់ថា ពលរដ្ឋថៃ ត្រូវបានហាមមិនឱ្យមានការនិយាយអាក្រក់ ឬប្រមាថទៅលើមហាក្សត្រ ហើយអាចប្រឈមនឹងការជាប់ពន្ធនាគារ15ឆ្នាំ។ ក៏ប៉ុន្តែ ក្នុងមួយរយៈពេលចុងក្រោយនេះ មានមនុស្សកាន់តែច្រើនឡើងៗ ដែលបានបង្ហាញសកម្មភាព និងសម្ដីប្រឆាំងទៅនឹងស្ដេចថៃ បើទោះជាមានច្បាប់ហាមក៏ដោយ៕
ប្រភព៖ Straits Times, Guardian

October 16, 2020
កូនប្រុសពៅរបស់លោក Trump ឆ្លង COVID-19 ខណៈអ្នកបានឆ្លងសរុបនៅអាមេរិក ឡើងដល់8,148,083នាក់
ជំទាវទីមួយ Melania បានឱ្យដឹងថា Barron Trump ដែលមានអាយុ14ឆ្នាំ វិជ្ជមានជាមួយនឹងCOVID-19 ប៉ុន្តែ បច្ចុប្បន្ន លោកស្រី និងកូនប្រុសលែងមានវីរុសហើយ។
ក្រោយពីប្រធានាធិបតី Trump និងលោកជំទាវវិជ្ជមានជាមួយនឹងវីរុសCOVID-19 កាលពី2សប្ដាហ៍មុន ពេលនោះ Barron មានលទ្ធផលអវិជ្ជមាន នេះបើតាមបទអធិប្បាយដែលមានចំណងជើងថា “បទពិសោធន៍ឯកជនរបស់ខ្ញុំចំពោះ COVID-19” របស់លោកជំទាវ Melania ដែលត្រូវបានប្រកាសឱ្យដឹងកាលពីថ្ងៃទី14តុលា។
លោកស្រី Melania ឱ្យដឹងថា៖ “ប៉ុន្តែ ដូចទៅនឹងការគិតរបស់ឪពុកម្ដាយនានាកាលពីប៉ុន្មានខែកន្លងទៅ ខ្ញុំក៏មិនអាចមិនគិតអំពីថា “តើថ្ងៃស្អែក ឬខានស្អែកនឹងទៅជាយ៉ាងណា?” នោះឡើយ។ ការភ័យខ្លាចរបស់ខ្ញុំបានក្លាយជាការពិត នៅពេលកូនរបស់ខ្ញុំត្រូវបានធ្វើតេស្តម្ដងទៀត និងបានទទួលលទ្ធផលវិជ្ជមាន”។
លោកស្រីបន្តថា៖ “សំណាងល្អណាស់ដែល Barron ជាយុវជនដែលមានកម្លាំងមាំមួន និងមិនមានអាការរោគនោះទេ”។
ខណៈនោះដែរ លោកស្រី Melania មានរោគសញ្ញាស្រាលៗ ដូចជា ឈឺចាប់ក្នុងរាងកាយ ក្អក ឈឺក្បាល និងអស់កម្លាំង។ ប៉ុន្តែ លោកជំទាវទីមួយ បានប្រកាសថា បច្ចុប្បន្ន លោកស្រីនិងកូន ទើបតែទទួលបានលទ្ធផលអវិជ្ជមាននឹងCOVID-19។ លោកស្រីឱ្យដឹងថា៖ “ខ្ញុំពិតជាសប្បាយចិត្តខ្លាំងណាស់ នៅពេលយើងទាំងបីនាក់បានឆ្លងកាត់បញ្ហានេះ ហើយអាចថែរក្សាគ្នា និងអាចនៅក្បែរគ្នាបាន”។ លោកស្រីសង្ឃឹមថា “នឹងបន្តភារកិច្ចរបស់ខ្លួនបានឆាប់បំផុតតាមដែលអាចធ្វើទៅបាន”។
គិតមកដល់បច្ចុប្បន្ន សហរដ្ឋអាមេរិក បានរកឃើញអ្នកឆ្លងវីរុសCOVID-19 សរុបឡើងដល់8,148,083នាក់នាក់ ក្នុងនោះមានអ្នកស្លាប់221,818នាក់ និង2,656,624កំពុងព្យាបាល អ្នកជំងឺបានជាសះស្បើយ មានចំនួន5,269,641នាក់៕
ប្រភព៖ AFP
October 15, 2020
ចៅប្រុសរបស់ស្ថាបនិកនៃក្រុមហ៊ុន Hyundai Motor ទទួលបានតំណែងកំពូលជាផ្លូវការ
ចៅប្រុសតែមួយគាត់របស់ស្ថាបនិកក្រុមហ៊ុន Hyundai ទើបតែបានក្លាយជាអគ្គនាយកថ្មីរបស់ក្រុមហ៊ុននេះ បន្ទាប់ពីឪពុករបស់លោក បានលាលែងពីតំណែង។
អ្នកស្នងរបស់ក្រុមហ៊ុន Hyundai Motor គឺលោក Chung Eui-sun ទើបតែទទួលបានតំណែងខ្ពស់បំផុតនៅក្នុងក្រុមហ៊ុនផលិតរថយន្តធំជាងគេលំដាប់ទី5ក្នុងពិភពលោក ពីឪពុករបស់ខ្លួន និងបានក្លាយជាអ្នកជំនាន់ទីបីនៃគ្រួសាររបស់ស្ថាបនិកក្រុមហ៊ុន Hyundai ដែលបានឡើងមកដឹកនាំក្រុមហ៊ុននេះ។
Hyundai បានប្រកាសនៅក្នុងថ្ងៃនេះថា លោក Chung Eui-sun នឹងក្លាយជាអគ្គនាយករបស់ក្រុមហ៊ុន ហើយក៏ក្លាយជាសមាជិកនៃក្រុមប្រឹក្សាភិបាលរបស់ Hyundai Motor, Kia Motors រួមនឹង Hyundai Mobis ផងដែរ។ ឪពុករបស់លោក Chung Eui-sun គឺលោក Chung Mong-koo អាយុ82ឆ្នាំ បានលាលែងពីតំណែង និងបានក្លាយជាប្រធានកិត្តិយសរបស់ក្រុមហ៊ុន។
ការប្រកាសខាងលើនេះ ត្រូវបានធ្វើឡើងនៅក្នុងគ្រាដែលក្រុមហ៊ុន Hyundai កំពុងតែប្រឹងប្រែងក្នុងការកែប្រែខ្លួនឯងពីក្រុមហ៊ុនផលិតរថយន្ត ឱ្យទៅជា “ក្រុមហ៊ុនផ្ដល់ដំណោះស្រាយចល័ត” ដោយសារមានការអភិវឌ្ឍបច្ចេកវិទ្យារថយន្តស្វ័យប្រវត្តិ និងបច្ចេកវិទ្យារថយន្តហោះ។ ក្រុមហ៊ុននេះក៏បានវិនិយោគទៅលើគម្រោងផលិតរថយន្តដែលដើរដោយថាមពលអ៊ីដ្រូសែន និងបច្ចេកវិទ្យាថាមពលរបស់អនាគតផងដែរ។
ប៉ុន្តែ ក្រុមហ៊ុន Hyundai កំពុងតែជួបបញ្ហាលំបាកខ្លាំងដោយសារតែ COVID-19។ ប្រាក់ចំណូលរបស់ Hyundai Motor បានថយចុះ19.4% ពោលគឺលក់បានតែ2.6លានគ្រឿងនៅក្នុង3ត្រីមាសដើមឆ្នាំ នេះបើធៀបនឹង1ឆ្នាំមុន។
លោក Chung Eui-sun បានបញ្ចប់ការសិក្សានៅសាកលវិទ្យាកូរ៉េខាងត្បូង និងទទួលបានសញ្ញាបត្រអនុបណ្ឌិតផ្នែកគ្រប់គ្រងពាណិជ្ជកម្មពីសាកលវិទ្យាល័យ San Francisco សហរដ្ឋអាមេរិក។ ចាប់តាំងពីឆ្នាំ2005ដល់2009 ក្នុងនាមជាអគ្គនាយករបស់ក្រុមហ៊ុន Kia (ក្រុមហ៊ុនដែលត្រូវបាន Hyundai ទិញយកកាលពីឆ្នាំ1998) លោក Chung Eui-sun បានរួមចំណែកយ៉ាងច្រើនដល់ការរីកចម្រើនរបស់ក្រុមហ៊ុននេះ។
ប្រធានាធិបតីកូរ៉េខាងត្បូង លោក Moon Jae-in (ឆ្វេង) និងលោក Chung Eui-sun
ឆ្នាំ2009 លោក Chug Eui-sun បានក្លាយជាអគ្គនាយករងរបស់ក្រុមហ៊ុន Hyundai Motor និងត្រូវបានតែងតាំងជាសមាជិកក្រុមប្រឹក្សាភិបាលរបស់ក្រុមហ៊ុន កាលពីឆ្នាំ2010។
តាមការស្រាវជ្រាវរបស់សារព័ត៌មាន Forbes បច្ចុប្បន្ន លោក Chung មានទ្រព្យសម្បត្តិប្រមាណ 2.8ពាន់លានដុល្លារអាមេរិក និងជាអ្នកមានជាងគេលំដាប់ទី10នៅប្រទេសកូរ៉េខាងត្បូង៕
ប្រភព៖ Nikkei
October 14, 2020
អភិបាលខេត្តកំពង់ស្ពឺ៖ ទឹកជំនន់ឈានដល់ការប្រកាសអាសន្នហើយ!
ថ្នាក់ដឹកនាំនៃខេត្តកំពង់ស្ពឺ បានឱ្យដឹងថា ទឹកជំនន់នៅខេត្តនេះ បានឈានឡើងដល់កម្រិតដែលត្រូវប្រកាសអាសន្នហើយ នៅល្ងាចថ្ងៃទី14តុលានេះ។
អភិបាលខេត្តកំពង់ស្ពឺ លោក វ៉ី សំណាង បានប្រាប់អ្នកយកព័ត៌មានថា នៅវេលាម៉ោង16បន្តិចទៀតនេះ ទឹកជំនន់នឹងជន់ដល់ទីក្រុងច្បារមនទាំងមូល រួមនឹងផ្នែកខ្លះនៃស្រុកសំរោងទងផងដែរ។
អាជ្ញាធមក្រុងច្បារមន ពិសេសគឺលោកអភិបាលខេត្តកំពង់ស្ពឺ បានអំពាវនាវឱ្យពលរដ្ឋទាំងអស់ដែលស្ថិតនៅក្នុងក្រុងច្បារមន និងតំបន់ដែលអាចជន់លិច ត្រូវប្រញាប់ប្រមូលទ្រព្យសម្បត្តិដែលមានតម្លៃ និងចាំបាច់ ឡើងទៅកាន់ទីទួលសុវត្ថិភាពជាបន្ទាន់៕
October 14, 2020
មេ Facebook ផ្ដល់ជំនួយ100លានដុល្លារបន្ថែមទៀត ដល់ការបោះឆ្នោតនៅសហរដ្ឋអាមេរិក
ម្ចាស់បណ្ដាញសង្គម Facebook លោក Mark Zuckerberg និងភរិយា Priscilla Chan ប្រកាសផ្ដល់ជំនួយបន្ថែម100លានដុល្លារអាមេរិក ដើម្បីជួយដល់ក្រុមមន្ត្រី និងហេដ្ឋារចនាសម្ព័ន្ធនានាសម្រាប់គាំទ្រដល់ការបោះឆ្នោតនៅសហរដ្ឋអាមេរិកក្នុងឆ្នាំ2020នេះ។
“យើងខ្ញុំបានទទួលការឆ្លើយតបច្រើនជាងការរំពឹងទុកអំពីប្រការដែលក្រុមមន្ត្រីរៀបចំការបោះឆ្នោត ត្រូវការជំនួយសម្រាប់សាងសង់ហេដ្ឋារចនាសម្ព័ន្ធដើម្បីជួយដល់ការបោះឆ្នោត។ ហេតុនេះហើយ យើងខ្ញុំសន្យាថា នឹងផ្ដល់ជំនួយ100លានដុល្លារបន្ថែមទៀតទៅឱ្យមជ្ឈមណ្ឌលបច្ចេកវិទ្យានិងជីវភាពពលរដ្ឋ (CTCL) ដើម្បីធានាឱ្យបានប្រាកដថា តំបន់ដែលត្រូវការជំនួយ នឹងទទួលបានជំនួយ” លោក Zuckerberg បង្ហោះសារយ៉ាងដូច្នេះនៅលើបណ្ដាញសង្គម Facebook កាលពីថ្ងៃទី13តុលា។
លោក Zuckerberg បន្ថែមថា តំបន់ជាង2,100 នៅមូលដ្ឋានដែលមានករិយាល័យបោះឆ្នោត បានផ្ញើលិខិតឡើងទៅកាន់ CTCL ដើម្បីស្នើសុំជំនួយ។ CTCL គឺជាអង្គការមិនស្វែងរកកម្រៃមួយនៅទីក្រុង Chicago។ គោលដៅរបស់អង្គការនេះ គឺ “ជំរុញការរីកចម្រើនផ្នែកប្រជាធិបតេយ្យ និងជួយធ្វើទំនើបកម្មលើការបោះឆ្នោតនៅសហរដ្ឋអាមេរិក”។
ម្ចាស់ Facebook និងភរិយា កន្លងមក ធ្លាប់បានផ្ដល់ជំនួយ300លានដុល្លារអាមេរិក ដើម្បីជួយដល់សកម្មភាពទាក់ទងនឹងការបោះឆ្នោតនៅសហរដ្ឋអាមេរិក ដែលកំពុងប្រឈមនឹងការលំបាកដោយសារ COVID-19។ អ្នកទាំងពីរបានផ្ដល់ជំនួយជាសម្ភារសម្រាប់ការបោះឆ្នោត និងឈុតការពារការឆ្លងវីរុសទៅឱ្យក្រុមបុគ្គលិកដែលធ្វើការខាងស្ទង់មតិ។
លោក Zuckerberg ក៏កំពុងតែធ្វើសកម្មភាពប្រឆាំងតបតទៅនឹងករណីប្ដឹងនានាដែលត្រូវបានធ្វើឡើងក្នុងបំណងទប់ស្កាត់ការប្រើប្រាស់ខ្ទង់ប្រាក់ជំនួយរបស់លោកផងដែរ។
មហាសេដ្ឋីជនជាតិអាមេរិកាំងដើមកំណើតជ្វីហ្វ (Jews) រូបនេះ អះអាងថា៖ “ចាប់តាំងពីយើងខ្ញុំបានផ្ដល់ជំនួយលើកដំបូង មានករណីប្ដឹងជាច្រើនត្រូវគេធ្វើឡើងដើម្បីរារាំងការប្រើប្រាស់ខ្ទង់ជំនួយនោះ ដោយចោទថា អង្គការនេះ (CTCL) ទទួលជំនួយដោយប្រកាន់បក្សពួក។ ការចោទប្រកាន់នេះគឺពិតជាខុសស្រឡះ”។
ខ្ទង់ថវិកាជំនួយរបស់លោក Zuckerberg ត្រូវបានលើកឡើងនៅពេលដែល Facebook កំពុងប្រឈមនឹងការតាមដានពីទីក្រុងវ៉ាស៊ីងតោន រួមនឹងសម្ពាធពីក្រុមអ្នកបង្កើតច្បាប់ ទាក់ទងនឹងបញ្ហាព័ត៌មានមិនពិតស្ដីអំពីការបោះឆ្នោតដែលត្រូវគេបង្ហោះនៅលើបណ្ដាញសង្គមនេះ៕
ប្រភព៖ Reuters
October 14, 2020
មហាក្សត្រថៃដែលមានសម្បត្តិរាប់សិបពាន់លានដុល្លារ កំពុងប្រឈមនឹងរលកនៃការរិះគន់កាន់តែខ្លាំង
ព្រះមហាក្សត្រនៃព្រះរាជាណាចក្រថៃ ត្រូវបានគេមើលឃើញថា កំពុងបណ្ដោយឱ្យបាត់បង់ការគាំទ្រពីពលរដ្ឋ និងសាធារណជនទាំងក្នុងនិងក្រៅប្រទេស បើទោះជាទ្រង់មានទ្រព្យសម្បត្តិប្រមាណ 40ពាន់លានដុល្លារក៏ដោយ។
ក្នុងរយៈពេលជាច្រើនខែកន្លងទៅថ្មីៗនេះ មហាក្សត្រថៃ ព្រះបាទ មហាវ៉ាតឈីរ៉ាឡុងកន (Maha Vajiralongkorn) បានចំណាយពេលវេលាភាគច្រើនរបស់ទ្រង់ ប្រថាប់នៅឯសណ្ឋាគារ Grand Hotel Sonnenbichl ដែលស្ថិតនៅលើជួរភ្នំ Alps ក្នុងរដ្ឋ Bavaria ប្រទេសអាល្លឺម៉ង់ ជាមួយនឹងក្រុមស្នំសរុបឡើងដល់20នាក់ឯណោះ។
ប៉ុន្តែ ពេលវេលានៃការប្រថាប់នៅប្រកបដោយហឫទ័យក្សេមក្សាន្តរបស់មហាក្សត្រ មហាវ៉ាជីរ៉ាឡុងកន ទំនងជាជិតមកដល់ទីបញ្ចប់ហើយ នៅពេលទីក្រុងប៊ែរឡាំង បានព្រមានទ្រង់ថា មិនគួរដឹកនាំប្រទេសពីទឹកដីអាល្លឺម៉ង់ ខណៈដែលបាតុកម្មនានាដែលប្រឆាំងនឹងរបបយោធាកំពុងកើតមានឡើងនៅក្នុងប្រទេសថៃ បណ្ដាលឱ្យមនុស្សជាច្រើនយល់ថា មហាក្សត្រកំពុងតែធ្វើឱ្យបាត់បង់ការគាំទ្រពីសាធារណជន ទាំងក្នុងនិងក្រៅប្រទេស។
កាលពីដើមឆ្នាំ សណ្ឋាគារ Grand Hotel Sonnenbichl បានស្វែងរកវិធីសុំច្បាប់ពិសេសពីអាជ្ញាធរនៅ Bavaria ដើម្បីឱ្យមហាក្សត្រថៃអាចប្រថាប់នៅទីនេះក្នុងរយៈពេលវែង ក្នុងគ្រាដែលអាល្លឺម៉ង់កំពុងអនុវត្តវិធានាការទប់ស្កាត់ការឆ្លងវីរុសCOVID-19។ ក៏ប៉ុន្តែ ប្រការនេះក៏បាននាំឱ្យពលរដ្ឋថៃរកឃើញថា មហាក្សត្ររបស់ពួកគេ មិនប្រថាប់នៅក្នុងស្រុក ក្នុងគ្រាដែលប្រទេសជាតិទាំងមូលកំពុងជួបបញ្ហាលំបាក។
ព័ត៌មានខាងលើ រួមនឹងការបង្ហើបឱ្យដឹងរបស់ Financial Times អំពីទំហំនៃទ្រព្យសម្បត្តិរបស់ក្សត្រថៃ (បើតាមការគន់គូរ អាចឡើងដល់ពី 30ទៅ40ពាន់លានដុល្លារអាមេរិក) បានក្លាយជាប្រភពមួយនៃបាតុកម្មប្រឆាំងរបបយោធាថៃ ដែលបញ្ហានេះមិនធ្លាប់បានកើតឡើងពីមុនមកនោះទេ។
មហាក្សត្រថៃ និងមហេសី ស៊ុធីដា យាងទៅជួបពលរដ្ឋដែលជាអ្នកគាំទ្ររបស់ទ្រង់
មហាក្សត្រថៃ ព្រះបាទ មហាវ៉ាជីរ៉ាឡុងកន ត្រូវបានគេជឿថា កំពុងកាន់កាប់ទ្រព្រសម្បត្តិខាងលើនេះ បន្ទាប់ពីបានដាក់មូលនិធិនានារបស់ព្រះបរមរាជវាំង ឱ្យស្ថិតក្រោមការគ្រប់គ្រងផ្ទាល់របស់ទ្រង់ ក្រោយពីការឡើងគ្រងរាជបានមួយរយៈពេលខ្លី។
ព្រះបាទ មហាវ៉ាជីរ៉ាឡុងកន ត្រូវបានគេចាត់ទុកថា ជាមហាក្សត្រមួយអង្គដែលមានទ្រព្យច្រើនជាងគេបំផុតក្នុងពិភពលោក។ ប៉ុន្តែ កត្តាមួយចំនួន បាននាំឱ្យកិត្តិនាមរបស់ទ្រង់ និងការគាំទ្ររបស់ពលរដ្ឋចំពោះទ្រង់ បានធ្លាក់ចុះជាលំដាប់ ក្នុងនោះ លេចធ្លោជាងគេគឺករណីលើកលែងទោសដល់អតីតស្នំឯក ស៊ិនិណាត វង្សវ៉ាតឈីរ៉ាក់ផាក់ឌី (Sineenat Wongvajirapakdi) ដែលត្រូវបានដកហូតរាល់ឋានន្តរស័ក្ដិកាលពីខែតុលា2019 ដោយសារ “មានផែនការដណ្ដើមតំណែង” ពីមហេសី ស៊ុធីដា (Suthida)។
បន្ទាប់ពីមានសម្ពាធកាន់តែខ្លាំងពីខាងក្នុង និងក្រៅប្រទេស មហាក្សត្រថៃ ដែលមានព្រះជន្ម68ឆ្នាំអង្គនេះ បានយាងត្រលប់ចូលប្រទេសវិញកាលពីចុងសប្ដាហ៍មុន ក្នុងឱកាសខួបគម្រប់4ឆ្នាំនៃការយាងចូលទិវង្គតរបស់អតីតមហាក្សត្រ ភូមិបុល អាឌុលយ៉ាដេត (Bhumibol Adulyadej)។ តាមគម្រោង ទ្រង់នឹងប្រថាប់នៅក្នុងប្រទេសរហូតដល់ចុងខែតុលា។ កាលពីម្សិលមិញ ទ្រង់រួមនឹងមហេសី បានយាងចេញទៅជួបពលរដ្ឋរបស់ទ្រង់ដែលកំពុងអង្គុយហាលភ្លៀងដើម្បីបង្ហាញអំពីការគោរពដ៏ស្ម័គ្រស្មោះចំពោះរាជវង្ស៕
ប្រភព៖ Daily Beast
អត្ថបទទាក់ទង > ទីក្រុងប៊ែរឡាំងប្រកាសព្រមានស្ដេចថៃថា “មិនគួរដឹកនាំប្រទេសពីទឹកដីអាល្លឺម៉ង់”
October 14, 2020
អ្នកទេសចរVIP : ប្រទេស ប៉េរូ បើករមណីយដ្ឋាន “ម៉ាឈូ ពិកឈូ” ឱ្យបុរសជប៉ុនតែម្នាក់គត់ ចូលទស្សនា ក្រោយទិញសំបុត្រ ហើយរង់ចាំអស់ 7ខែ
រដ្ឋបាលប្រទេសប៉េរូ បានបើកឧទ្យានបុរាណស្ថាន “ម៉ាឈូ ពិកឈូ” ឱ្យអ្នកទេសចរ ជនជាតិជប៉ុនម្នាក់ ចូលទស្សនាជាករណីពិសេស ក្រោយពីបុរសម្នាក់នេះ ត្រូវទុកសំបុត្រចូលទស្សនា រង់ចាំអស់រយៈពេល 7ខែ ក្នុងអំឡុងពេលដែលរូបគេមិនអាចធ្វើដំណើរត្រឡប់ទៅប្រទេសកំណើតវិញបាន ដោយសារតែវិបត្តិជំងឺឆ្លងកូវីដ-19។
លោក ចេសស៍ ខាតាយ៉ាម៉ាក់(Jesse Katayama) បានជាប់នៅក្នុងទីក្រុង Aguas Calientes ប្រទេសប៉េរូ ដែលជាទីក្រុងដើមផ្លូវ សម្រាប់ឡើងទៅរមណីយដ្ឋានបុរាណស្ថាន ម៉ាឈូ ពិកឈូ តាំងពីពាក់កណ្ដាលខែមីនា និងទើបតែបានទទួលការអនុញ្ញាតឱ្យចូលទស្សនាសំណាកអគារវប្បធម៌បុរាណរបស់ជនជាតិកុលសម្ព័ន្ធ អ៊ីនខា ក្រោយពីរូបគេបានដាក់ពាក្យសុំអនុញ្ញាត ជាករណីពិសេស កាលពីពេលកន្លងមក។
លោក អាឡេខាន់ដ្រូ ណេយ៍រ៉ា រដ្ឋមន្ត្រីក្រសួងវប្បធម៌ប៉េរូ បានថ្លែងតាមរយៈប្រព័ន្ធវីដេអូខុនហ្វើរិន កាលពីថ្ងៃចន្ទ(ទី13តុលា)ថា “គាត់(ចេសស៍ ខាតាយ៉ាម៉ាក់) ធ្វើដំណើរមកប៉េរូ ដោយក្ដីស្រមៃថា នឹងបានឃើញ ម៉ាឈូ ពិកឈូ…ឥលូវពលរដ្ឋជប៉ុនម្នាក់នេះ បានទទួលការអនុញ្ញាតឱ្យចូលទស្សនាប្រសាទបុរាណ ព្រមជាមួយប្រធានឧទ្យានជាតិទីនោះ ដើម្បីឱ្យគាត់ បានសមដូចបំណងប្រាថ្នាដែលបានតាំងចិត្ត មុននឹងធ្វើដំណើរត្រឡប់ទៅប្រទេសរបស់គាត់វិញ”
ខាតាយ៉ាម៉ាក់ បានទិញសំបុត្រចូលទស្សនាឧទ្យានបុរាណស្ថានម៉ាឈូ ពិកឈូ តាំងពីខែមីនា តែទើបនឹងបានចូលក្នុងរមណីយដ្ឋានបុរាណស្ថាន អាយុជាង 500ឆ្នាំនោះ កាលពីថ្ងៃទី10 តុលាកន្លងមកនេះឯង និងអាចរាប់បានថា ជាអ្នកទេសចរដំបូងគេបំផុត ដែលបានទៅលេងម៉ាឈូ ពិកឈូ ក្នុងរង្វង់ 7ខែកន្លងមកនេះ។ លោកបានសារភាពថា ពីដំបូង លោកតាំងចិត្តថា នឹងស្នាក់នៅប៉េរូ ត្រឹមតែ 2-3ថ្ងៃប៉ុណ្ណោះ។ ខាតាយ៉ាម៉ាក់ បានថ្លែងតាមរយៈឃ្លិបវីដេអូ បន្ទាប់ពីធ្វើដំណើរឡើងទៅដល់កំពូលភ្នំម៉ាឈូ ពិកឈូ ថា “វាពិតជាអស្ចារ្យណាស់!! ខ្ញុំសូមអរគុណមែនទែន!!”
រដ្ឋបាលប៉េរូ មានកំណត់ពេលការបើករមណីយដ្ឋានបុរាណស្ថានម៉ាឈូ ពិកឈូ ឱ្យភ្ញៀវទេសចរជាតិ និងអន្តរជាតិ ចូលទស្សនាឡើងវិញបាន នៅក្នុងខែវិច្ឆិកាខាងមុខនេះ តែមិនបានបញ្ជាក់ពីថ្ងៃទី ជាក់លាក់នៅឡើយ និងថែមទាំងមានផែនការកំណត់ចំនួនអ្នកទេសចរត្រឹមតែ 30% ពីចំនួនដែលធ្លាប់ទទួលបាន 675នាក់ក្នុង 1ថ្ងៃទៀតផង៕
ប្រភព៖ សារព័ត៌មានបរទេស

October 14, 2020
ពិធីចុះអនុស្សរណៈក្នុងការបើកលក់អគារខុនដូ CEO Business Residence ក្នុងទីផ្សារកម្ពុជា
កាលពីថ្ងៃទី10 ខែតុលា ឆ្នាំ2020 ក្រុមហ៊ុន CEO បានរៀបចំពិធីចុះហត្ថលេខាលើ អនុស្សរណៈនៃការយោគយល់គ្នា រវាងក្រុមហ៊ុន Lixin Group និងក្រុមហ៊ុន Sunshine Group ដែលប្រជុំទៅដោយភ្ញៀវ VIP ជាច្រើនរូបបានចូលរួមធ្វើជាសាក្សីសម្រាប់ថ្ងៃពិសេសនេះទៀតផង។
ក្រុមហ៊ុន Lixin Group បានបង្កើតឡើងនៅឆ្នាំ2013 មានទីស្នាក់ការកណ្តាលស្ថិតនៅក្នុងរាជធានីភ្នំពេញ នៃប្រទេសកម្ពុជា ហើយក្រុមហ៊ុន Lixin Group បានក្លាយជាអ្នកអភិវឌ្ឍន៍វិស័យអចលនទ្រព្យក្នុងស្រុកចម្រុះ។ ក្រៅពីការអភិវឌ្ឍវិស័យអចលនទ្រព្យ ក្រុមហ៊ុននៅមានអង្គភាពអាជីវកម្មចំនួន6 ដែលតែងតែចូលរួមសកម្មភាពជាច្រើនទៀត ដូចជាវិស្សមកាលអាជីវកម្ម សុខុមាលភាពសាធារណៈ និងសប្បុរសធម៌ ការគ្រប់គ្រងទ្រព្យសម្បត្តិអន្តរជាតិទៅតាមតំបន់ វិទ្យាសាស្ត្រ និងបច្ចេកវិទ្យា សណ្ឋាគារ និងអាហារ។
ចំណែកក្រុមហ៊ុន Sunshine Group មានវត្តមាននៅប្រទេសកម្ពុជាអស់រយៈពេលជាង 10ឆ្នាំមកហើយ ដោយបានពង្រីកនូវអាជីវកម្មជាច្រើនរួមមាន មន្ទីរពេទ្យ គ្លីនិកធ្មេញ ផ្សារទំនើប គ្រឿងសង្ហារិម ដែលនាំំចូលពីប្រទេសកូរ៉េ គ្រឿងសម្ភារផ្ទះបាយ រោងចក្រផលិតក្រដាសជូតមាត់ និងជាភ្នាក់ងារអចលនទ្រព្យទៀតផង។ ដោយទទួលបានបទពិសោធ និងមានជំនាញខ្ពស់ ក្រុមហ៊ុន Sunshine Group បានក្លាយជាភ្នាក់ងារអចលនទ្រព្យដែលមានការរីកចម្រើនលឿនបំផុតនៅក្នុងប្រទេសកម្ពុជា។
អនុស្សរណៈនៃការយោគយល់គ្នា (MoU) នេះត្រូវបានធ្វើឡើងជាមួយក្រុមហ៊ុន Sunshine Group នឹង ក្រុមហ៊ុន CEO Business Residence។ ក្នុងកម្មវិធីនេះផងដែរ ក្រុមភ្ញៀវVIP បានធ្វើការចុះហត្ថលេខាលើកិច្ចព្រមព្រៀងនៃការទិញ-លក់ ហើយវាក៏ជានិមិត្តសញ្ញានៃការចាប់ផ្តើមបើកលក់គម្រោងរបស់ CEO Business Residence នៅក្នុងប្រទេសកម្ពុជា ផងដែរ។
CEO Business Residence គឺជាអគារភ្លោះ ដែលមានទីតាំងស្ថិតនៅទល់មុខវិទ្យាល័យបាក់ទូក ដែលត្រូវបានគ្រោង និងដាក់លក់នៅក្នុងប្រទេសកម្ពុជា ដោយមានដៃគូជាច្រើន ដូចជាក្រុមហ៊ុន Lixin Group និង ក្រុមហ៊ុន Golden Cambodia Century (GCC)។ សូមជម្រាបថា សំណង់អគារនេះ មានកម្ពស់ 32ជាន់ ហើយបច្ចុប្បន្នដំណើរការសាងសង់អគារនេះ បានធ្វើដល់ជាន់ទី27 ហើយ ហើយយើងរំពឹងថា នឹងបញ្ចប់ការសាងសង់នៅក្នុងឆ្នាំ2022 ខាងមុខនេះ។
ជាមួយនឹងការរៀបចំសេវាកម្មសណ្ឋាគារលំដាប់ផ្កាយ5 របស់ Wyndham Grand នៅក្នុងអគារភ្លោះ CEO Business Residence នេះ អតិថិជនរបស់យើងទាំងអស់ នឹងបានរីករាយជាមួយនឹងបទពិសោធអាជីវកម្មដ៏ពិសេសបំផុតមួយ នៅក្នុងប្រទេសកម្ពុជា។ Wyndham Grand មានសាខាប្រហែលជាង 8.000សាខា នៅក្នុង 78ប្រទេស ដូចជាសហរដ្ឋអាមេរិក អូស្ត្រាលី និងថៃ ជាដើម។ ហើយ Wyndham Grand បានបង្កើនសមាជិកជាង 50លាននាក់នៅទូទាំងពិភពលោកផងដែរ។
ជាមួយនឹងភាពរួសរាយរាក់ទាក់ និងផ្ដល់នូវសេវាកម្មដ៏ល្អបំផុត រួមជាមួយរចនាប័ទ្ម ដ៏ទាន់សម័យ គឺជាចំណុចសំខាន់ នៃអគារភ្លោះ CEO Business Residence។ ការបរិភោគអាហារលំដាប់ថ្នាក់ពិភពលោក ការគយគន់ទេសភាពទីក្រុងដ៏អស្ចារ្យ កន្លែងទទួលភ្ញៀវដ៏ធំទូលាយ ដែលមានទំហំដល់ទៅ 8ម៉ែត្រ កន្លែងញ៉ាំកាហ្វេ ដែលមានផ្ទាំងគំនូរដល់ស្រស់ស្អាត កន្លែងពិសាស្រា និងជក់បារី សាលពិធីជប់លៀង បន្ទប់KTV មជ្ឈមណ្ឌលពាណិជ្ជកម្ម CEO បន្ទប់ប្រជុំដែលមានទំហំ 12 និង 20កៅអី រោងកុនដែលមាន 85កៅអី អាងហែលទឹកដែលមានទំហំធំទូលាយ បន្ទប់ស្ប៉ាដ៏ល្អប្រណីត កន្លែងហាត់ប្រាណដែលមានឈ្មោះថា SKY និងកន្លែងកម្សាន្តជាច្រើនទៀត ដែលអគារភ្លោះ CEO Business Residence នឹងផ្តល់ជូននូវផាសុកភាព ព្រមជាមួយនឹងភាពទាន់សម័យ ដ៏ល្អបំផុតនៅក្នុងរាជធានីភ្នំពេញ។
ដោយផ្តោតលើពេលអនាគតខាងមុខនេះ តំបន់បាក់ទូក នឹងក្លាយជាតំបន់ KLCC ដែលដូចគ្នានឹងប្រទេសម៉ាឡេស៊ី ឬផ្លូវ Orchard នៅប្រទេសសិង្ហបុរី។ តំបន់នេះមិនត្រឹមតែជាតំបន់ទាក់ទាញភ្ញៀវទេសចរប៉ុណ្ណោះទេ ប៉ុន្តែថែមទាំងជាតំបន់ពាណិជ្ជកម្មសំខាន់ដែលទាក់ទាញជនបរទេសពីទូទាំងពិភពលោកទៀតផង៕
October 14, 2020