Author: សឿន សំណាង

កងកម្លាំងពិសេសអង់គ្លេសប្រើប្រាស់ឈុត “Iron Man” ហោះពីទូកល្បាតតូចទៅចុះចតលើនាវាល្បាត នៅលើផ្ទៃសមុទ្រ (វីដេអូ)
នៅក្នុងការហោះហើរសាកល្បងមួយ កងកម្លាំងពិសេសរបស់ប្រទេសអង់គ្លេសបានប្រើប្រាស់ឈុតសម្លៀកបំពាក់ដែលដូចទៅនឹង “មនុស្សដែក” (Iron man) ហោះហើរចេញពីទូកល្បឿនលឿនសំដៅទៅចុះចតនៅលើនាវាល្បាតដែលកំពុងធ្វើដំណើរយ៉ាងលឿននៅលើផ្ទៃសមុទ្រ។
“កងទ័ពជើងទឹកអង់គ្លេសបានសាកល្បងកម្លាំងវាយឆ្មក់ដោយប្រើប្រាស់ឧបករណ៍ហោះហើរថ្មីបំពាក់នៅលើខ្លួនមនុស្ស ដែលមានឈ្មោះថា Jet Suit ក្នុងបំណងវាយតម្លៃឱ្យដឹងថា តើឈុតហោះហើរដែលដូចទៅនឹងមនុស្សដែក (Iron man) នេះ អាចជួយពួកគេឡោមព័ទ្ធ និងសម្រុកឡើងលើនាវាដែលជាគោលដៅរបស់ពួកគេបានដែរ ឬយ៉ាងអត់។ បញ្ជាការដ្ឋានយុទ្ធនាការពិសេសរបស់សហរដ្ឋអាមេរិក ក៏កំពុងតែវាយតម្លៃទៅលើឧបករណ៍ហោះហើរមួយដែលអាចហោះបានរហូតដល់320គម/ម៉ោងផងដែរ” នេះបើតាមវិទ្យាស្ថានកងទ័ពជើងទឹកអាមេរិក ដែលបានបង្ហោះសារនេះនៅលើទំព័រ Twitter កាលពីថ្ងៃទី17តុលា។
វីដេអូដែលមានថេរវេលាជាង1នាទីនេះបានបង្ហាញថា កងកម្លាំងពិសេសរបស់កងទ័ពជើងទឹកអង់គ្លេសដែលស្លៀកឈុត Jet Suit បានហោះហើរចេញពីទូកល្បាតល្បឿនលឿន ហើយហោះព័ទ្ធជុំវិញ រួចក៏ចុះចតលើនាវាល្បាត មុននឹងហោះត្រលប់មកកាន់ទូកល្បាតដើមវិញ។ យ៉ាងនេះក្ដី ទីតាំងនៃការហោះហើរសាកល្បងនេះ មិនត្រូវបានគេបង្ហើបឱ្យដឹងនោះឡើយ។
Jet Suit ត្រូវបានបំពាក់ម៉ាស៊ីនប្រតិកម្ម (ម៉ាស៊ីនសម្រាប់យន្តហោះ) ខ្នាតតូចចំនួន5គ្រឿង ក្នុងនោះមាន4គ្រឿងត្រូវដាក់នៅលើដៃទាំងសងខាងដើម្បីប្ដូរទិសដៅ និង1គ្រឿងនៅខាងក្រោយខ្នង ដែលអាចដំណើរការបាន8នាទី និងមានល្បឿន88គម/ម៉ោង។ ឈុតហោះហើរនេះត្រូវបានផលិតឡើងដោយក្រុមហ៊ុន Gravity Industries នៅប្រទេសអង់គ្លេស។
Richard Browning ដែលជាស្ថាបនិករបស់ក្រុមហ៊ុន Gravity Industries ធ្លាប់បានពាក់ឈុត Jet Suit នេះនៅក្នុងការហោះហើរសម្ដែងនៅពាសពេញពិភពលោក និងត្រូវបានគេដាក់រហ័សនាមឱ្យថា “Iron Man ពិតៗ”។
https://www.youtube.com/watch?v=rSgTJCyBT4g
កាលពីខែកញ្ញាកន្លងទៅ ឈុត Jet Suit ដែលប្រើប្រាស់សម្រាប់កិច្ចការសង្គ្រោះបន្ទាន់ ត្រូវបានក្រុមហ៊ុនផ្ដល់សេវាកម្មសង្គ្រោះបន្ទាន់ផ្នែកអាកាសចរណ៍ Great North យកទៅធ្វើការហោះហើរសាកល្បងនៅតំបន់ Lake District។ ការសាកល្បងនោះបានបង្ហាញថា បុគ្គលិកសង្គ្រោះបន្ទាន់ អាចទៅដល់គោលដៅដែលនៅភ្នំ និងគោលដៅដែលស្ថិតក្នុងភូមិសាស្ត្រលំបាកបានយ៉ាងឆាប់រហ័ស ដោយចំណាយពេលតែប៉ុន្មាននាទីប៉ុណ្ណោះ នៅពេលប្រើប្រាស់ឈុតហោះហើរ Jet Suit នេះ៕
ប្រភព៖ Sputnik
October 20, 2020
កម្ពុជារកឃើញអ្នកផ្ទុកCovid-19 ចំនួន2នាក់បន្ថែមទៀត ក្នុងគ្រាដែលពិភពលោករកឃើញករណីឆ្លងថ្មី 12,266នាក់
ក្រសួងសុខាភិបាលកម្ពុជា បានប្រកាសនាព្រឹកថ្ងៃទី20តុលានេះថា កម្ពុជាបានរកឃើញអ្នកវិជ្ជមានជាមួយនឹង Covid-19 ចំនួន2ករណីបន្ថែមទៀត នេះឱ្យតួលេខនៃអ្នកជំងឺ Covid-19 ដែលត្រូវបានរកឃើញនៅកម្ពុជា កើនឡើងដល់285នាក់។
ករណីថ្មីនេះត្រូវបានរកឃើញកាលពីម្សិលមិញ (19តុលា) ដោយវិទ្យាស្ថានប៉ាស្ទ័រកម្ពុជានៅរាជធានីភ្នំពេញ។ អ្នកជំងឺថ្មីទាំង2ករណីនេះគឺជាប្ដីប្រពន្ធនឹងគ្នា និងមានអាសយដ្ឋាននៅភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។ ពួកគេបានធ្វើដំណើរពីប្រទេសអ៊ីរ៉ាក់ ឆ្លងកាត់ទីក្រុងដូហា បន្តជើងហោះហើរនៅកូរ៉េខាងត្បូង មុននឹងមកដល់កម្ពុជានៅថ្ងៃទី18តុលា2020។
អ្នកដំណើរចំនួន106នាក់ផ្សេងទៀតដែលធ្វើដំណើរតាមយន្តហោះជាមួយនឹងអ្នកជំងឺខាងលើ ក៏កំពុងត្រូវបានដាក់ឱ្យធ្វើចត្តាឡីស័កនៅក្នុងសណ្ឋាគារមួយចំនួននៅរាជធានីភ្នំពេញ។
គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCovid-19 សរុប ចំនួន285នាក់ ក្នុងនោះមាន280នាក់បានជាសះស្បើយ និង5នាក់កំពុងទទួលការព្យាបាល។ ក្នុងចំណោមអ្នកជំងឺទាំង5នាក់ដែលកំពុងសម្រាកព្យាបាលនេះ មានជនជាតិខ្មែរ3នាក់ និងជនបរទេសចំនួន2នាក់។
នៅទូទាំងពិភពលោក ក្នុងរយៈពេល24ម៉ោងចុងក្រោយនេះ បានរកឃើញអ្នកផ្ទុកវីរុសថ្មីចំនួន12,266នាក់ ដែលនេះឱ្យអ្នកបានឆ្លងវីរុសCovid-19 កើនឡើងដល់40,647,566នាក់ ក្នុងនោះមាន1,122,984នាក់បានស្លាប់ និង30,352,918នាក់បានជាសះស្បើយ៕
ប្រភព៖ ក្រសួងព័ត៌មាន, Worldometers

October 20, 2020
កាសែតអង់គ្លេស៖ នាយករដ្ឋមន្ត្រី Johnson កំពុងពិចារណាលាឈប់ពីតំណែង ព្រោះតែប្រាក់ខែទាប
នាយករដ្ឋមន្ត្រីអង់គ្លេស លោក Boris Johnson ត្រូវបានគេជឿថា កំពុងពិចារណាក្នុងការសុំលាឈប់ពីមុខតំណែងនៅរដូវផ្ការីកខាងមុខ ព្រោះតែជួបបញ្ហាជីវភាពខ្វះខាតដោយសារតែប្រាក់ខែតិច នេះបើតាមសារព័ត៌មានអង់គ្លេស។
យោងតាមសារព័ត៌មាននានារបស់អង់គ្លេស នាយករដ្ឋមន្ត្រី Boris Johnson មានគម្រោងចាកចេញពីតំណែងភ្លាមៗ បន្ទាប់ពីកិច្ចការមួយចំនួនដែលទាក់ទងនឹង Brexit (ការដកខ្លួនរបស់អង់គ្លេសចេញពីសហភាពអឺរ៉ុប) និងការដឹកនាំប្រទេសឆ្លងផុតពីដំណាក់កាលអាក្រក់បំផុតនៃវិបត្តិសុខភាពដែលកើតឡើងដោយសារ Covid-19។ លោក Boris Johnson ជឿថា លោកអាចដោះស្រាយបញ្ហាទាំងនោះដោយប្រើប្រាស់ពេលត្រឹមតែ6ខែទៀតប៉ុណ្ណោះ។
ទីភ្នាក់ងារសារព័ត៌មាន Mirror របស់អង់គ្លេស បានដកស្រង់សម្ដីរបស់មន្ត្រីមួយចំនួនដែលសុំមិនបញ្ចេញឈ្មោះ បានឱ្យដឹងថា លោក Boris Johnson ពិចារណាទៅលើការលាលែងពីតំណែងរបស់ខ្លួនក៏ព្រោះតែប្រាក់ខែទាបពេក គឺទាបជាងប្រាក់ខែនៃការងារចាស់របស់លោកទៅទៀត។ ប្រភពព័ត៌មានបានឱ្យដឹងថា លោក Boris Johnson បានរអ៊ូរទាំថា ជីវភាពរស់នៅរបស់លោកមិនបានប្រសើរជាមួយនឹងប្រាក់បៀវត្ស 150,000ផោន/ឆ្នាំ (195,000ដុល្លារអាមេរិក)នេះទេ។
អ្នកជំនាន់មុនរបស់លោក Boris Johnson គឺលោកស្រី Theresa May អាចរកបានប្រាក់1លានផោនពីការធ្វើបទបង្ហាញនានាក្រោយពីបានលាលែងពីតំណែង។ លោក Boris Johnson ជឿថា លោកអាចរកបានច្រើនជាងនេះ យ៉ាងតិចទ្វេដង។ លោក Johnson ធ្លាប់រកបាន160,000ផោនពីបទបង្ហាញចំនួន2លើកនៅក្នុងរយៈពេលតែ1ខែ មុនពេលលោកជាប់ឆ្នោតជានាយករដ្ឋមន្ត្រី។ នេះមិនទាន់បាននិយាយដល់ប្រាក់ចំណូលស្ថិរភាព 23,000ផោន/ខែ ដោយការងារជាអ្នកវិភាគឱ្យសារព័ត៌មាន Daily Telegraph នៅឡើយ។ កាលពីឆ្នាំ2019 នៅពេលលោក Johnson ត្រៀមកាន់កាប់តំណែងនាយករដ្ឋមន្ត្រី កាសែត Sunday Times បានព្យាករថា ប្រាក់ចំណូលរបស់លោក នឹងអាចថយចុះពី 829,000ផោន មកនៅត្រឹមជាង150,000ផោន/ឆ្នាំ។
តំណាងរាស្ត្រអង់គ្លេសម្នាក់បានប្រាប់សារព័ត៌មាន Mirror ថា កូនៗរបស់លោក Boris Johnson ក្នុងនោះមានកូនប្រុសអាយុ6ខែម្នាក់ឈ្មោះ Wilfred នៅតែត្រូវការប្រាក់ជំនួយ។ លោក Johnson ក៏ត្រូវចំណាយប្រាក់1/4 នៃប្រាក់ចំណូលដើម្បីផ្ដល់ឱ្យភរិយាដើមរបស់លោក ទៅតាមកិច្ចសន្យាលែងលះ។
មកដល់បច្ចុប្បន្ន លោក Johnson មិនទាន់មានប្រតិកម្មអ្វីទៅនឹងព័ត៌មាននេះនៅឡើយ ប៉ុន្តែសារព័ត៌មាន Mirror បានបង្ហាញបញ្ជីឈ្មោះមួយដែលមានឈ្មោះបេក្ខភាពសំខាន់ៗដែលអាចកាន់កាប់តំណែងនាយករដ្ឋមន្ត្រីជំនួសលោក Johnson បាន ក្នុងនោះមានដូចជា រដ្ឋមន្ត្រីការបរទេស Dominic Raab ប្រធានការិយាល័យគណៈរដ្ឋមន្ត្រី Michael Gove និងអតីតរដ្ឋមន្ត្រីក្រសួងការពារជាតិ Penny Mordaunt ជាដើម៕
ប្រភព៖ Mirror
October 19, 2020
គំរាមលោតពីលើអគារដើម្បីបានជួបលោក Trump (វីដេអូ)
បុរសម្នាក់ វ័យប្រហែលជាងម្ភៃ បានប្រើប្រាស់ខ្សែដែលជាប់ទៅនឹងអគារ Trump រួចក៏ព្យួរខ្លួនឯងអស់រយៈពេលជាច្រើនម៉ោង នៅក្នុងទីក្រុង Chicago ព្រមទាំងបានគំរាមថានឹងលោតចុះពីលើអគារនេះ បើសិនជាមិនបានជួបមុខប្រធានាធិបតីអាមេរិក។
វីដេអូ និងរូបភាពដែលត្រូវបានគេចែករំលែកនៅលើបណ្ដាញសង្គម បង្ហាញថា បរុសនេះកំពុងព្យួរខ្លួនឯងដោយខ្សែសម្រាប់ឡើងភ្នំ នៅខាងក្រៅជាន់ទី16 នៃអគារ Trump ដែលមានកម្ពស់98ជាន់ នៅក្នុងទីក្រុង Chicago កាលពីថ្ងៃទី18តុលាកន្លងទៅ។
Tom Ahern ដែលជាអ្នកនាំពាក្យរបស់នគរបាលបានឱ្យដឹងថា បុរសដែលមានវ័យប្រហែលជាងម្ភៃនេះ បាន “ព្យួរខ្លួនឯង” ចាប់ពីម៉ោងប្រមាណ15និង30នាទី រហូតដល់យប់ ដោយស្នើសុំ “និយាយគ្នាជាមួយប្រធានាធិបតី” និងបានបញ្ជូនសារទៅកាន់អ្នកសារព័ត៌មាន។
https://www.youtube.com/watch?v=yz5Vdwa74tI
កងកម្លាំងប៉ូលិស កម្លាំងពិសេស និងបុគ្គលិកពន្លត់អគ្គិភ័យ ត្រូវបានបញ្ជូនទៅកាន់កន្លែងកើតហេតុ។ អាជ្ញាធរក៏បានប្រញាប់បិទការចេញចូលក្នុងតំបន់ក្បែរអគារ Trump ខណៈដែល “ក្រុមអ្នកចង់ដឹងចង់ឮ” ចេះតែនាំគ្នាចូលមកកាន់តែច្រើន។
បុរសនេះបានគំរាមថានឹងលោតចុះមកក្រោម បើសិនមិនត្រូវបានគេអនុញ្ញាតឱ្យជួបប្រធានាធិបតី។ អ្នកជំនាញផ្នែកចរចាម្នាក់នៅតែបញ្ចុះបញ្ចូលឱ្យបុរសនេះចូលមកខាងក្នុងអគារ។ រហូតដល់ម៉ោង1និង36នាទីព្រឹកថ្ងៃទី19តុលា (ម៉ោង13និង36នាទី នៅកម្ពុជា) អង្គភាពប៉ូលិសនៅ Chicago ឱ្យដឹងថា “រាល់ការប្រឹងប្រែងនៅតែកំពុងត្រូវបានធ្វើឡើងដើម្បីនាំមកនូវលទ្ធផលវិជ្ជមានសម្រាប់ករណីនេះ” ក្រោយការចរចាជាបន្តបន្ទាប់អស់រយៈពេល8ម៉ោង។
យោងតាមសារព័ត៌មាន New York Post បុរសខាងលើនេះគឺជាសមាជិកម្នាក់របស់ចលនា “Black Lives Matter” (ជីវិតរបស់ជនស្បែកខ្មៅក៏សំខាន់) ក៏ប៉ុន្តែ បុរសនេះនិយាយថា៖ “បើសិនជាលោក Trump បានសន្យាអ្វីមួយ លោកគួរតែអនុវត្តវានៅមុនការបោះឆ្នោតនេះ”។
ប្រធានាធិបតីអាមេរិក Donald Trump ក្នុងថ្ងៃដដែលនេះ មានវត្តមាននៅក្នុងទីក្រុង Carson រដ្ឋ Nevada ដើម្បីធ្វើការឃោសនាបោះឆ្នោត។ នៅទីនេះ លោក Trump បានអំពាវនាវឱ្យម្ចាស់ឆ្នោតប្រញាប់ទៅបោះឆ្នោត ខណៈថ្ងៃបោះឆ្នោត 3វិច្ឆិកាជិតចូលមកដល់៕
ប្រភព៖ NY Post
October 19, 2020
ស្ត្រី5រូបដែលមានទ្រព្យច្រើនជាងគេបង្អស់នៅក្នុងវិស័យអចលនទ្រព្យពិភពលោក
យោងតាមបញ្ជីចំណាត់ថ្នាក់អ្នកមានរបស់សារព័ត៌មាន Forbes បច្ចុប្បន្នអ្នកស្រី Yang Huiyan គឺជាមហាសេដ្ឋិនីដែលមានទ្រព្យច្រើនជាងគេបង្អស់នៅក្នុងវិស័យអចលនទ្រព្យពិភពលោក ដោយមានទ្រព្យសម្បត្តិឡើងដល់28.9ពាន់លានដុល្លារអាមេរិក។
1. Yang Huiyan៖ 28.9ពាន់លានដុល្លារអាមេរិក
ស្ត្រីអ្នកជំនួញវ័យ39ឆ្នាំរូបនេះ កាន់កាប់ភាគហ៊ុន57% និងជាសមាជិកក្រុមប្រឹក្សាភិបាលរបស់ក្រុមហ៊ុនអចលនទ្រព្យ Country Garden ដែលឪពុករបស់នាងជាអ្នកបង្កើតឡើង។ តាំងតែពីតូច Yang Huiyan ត្រូវបានឪពុកសង្ឃឹម ជឿជាក់ និងបណ្ដុះបណ្ដាលដើម្បីបន្តគ្រប់គ្រងក្រុមហ៊ុន។
អ្នកស្រី Yang Huiyan៖ មានទ្រព្យ 28.9ពាន់លានដុល្លារអាមេរិក
ក្រោយពីបានបញ្ចប់ការសិក្សានៅវិទ្យាល័យ Yang Huiyan បានចូលសិក្សាផ្នែកគ្រប់គ្រងអាជីវកម្មនៅសាកលវិទ្យាល័យ Ohio (អាមេរិក)។ ឆ្នាំ2003 នាងបានបញ្ចប់ការសិក្សា និងបានត្រលប់មកស្រុកកំណើត (ទីក្រុង Foshan ខេត្ត Guangdong) នៅប្រទេសចិន ដើម្បីជួយធ្វើការក្នុងក្រុមហ៊ុនរបស់គ្រួសារ។
2. Wu Yajun៖ 16ពាន់លានដុល្លារអាមេរិក
Wu Yajun កើតឆ្នាំ1964 នៅក្នុងខេត្ត Chongqing ប្រទេសចិន។ អ្នកស្រីធ្លាប់ធ្វើជាកម្មការិនី និងអ្នកកាសែត។ ឆ្នាំ1993 អ្នកស្រី Wu បានបង្កើតក្រុមហ៊ុន Longfor Properties ដោយឈរឈ្មោះជាមួយនឹងស្វាមី Cai Kui។ ក្រុមហ៊ុននេះ មានជំនាញខាងសាងសង់បុរីលំនៅដ្ឋាន។
Wu Yajun៖ 16ពាន់លានដុល្លារអាមេរិក
ឆ្នាំ2012 អ្នកស្រី និងស្វាមី បានលែងលះគ្នា។ បច្ចុប្បន្ន លោក Cai Kui លែងមានតួនាទីអ្វីនៅក្នុងក្រុមហ៊ុននេះទៀតហើយ។
3. Kwong Siu-hing៖ 12ពាន់លានដុល្លារ
អ្នកស្រី Kwong Siu-hing គឹជាភរិយារបស់លោក Kwok Tak-seng ដែលជាសហស្ថាបនិករបស់ក្រុមហ៊ុនអចលនទ្រព្យ Sun Hung Kai Properties។ លោក Kwok បានទទួលមរណភាពកាលពីឆ្នាំ1990។ អ្នកស្រី Kwong បានឡើងធ្វើជាប្រធានក្រុមហ៊ុនចាប់ពីឆ្នាំ2008 រហូតដល់ឆ្នាំ2011។
អ្នកស្រី Kwong Siu-hing រូបកណ្ដាល។
បច្ចុប្បន្ន មហាសេដ្ឋិនីរូបនេះ នៅតែជាម្ចាស់ភាគហ៊ុនធំជាងគេបង្អស់របស់ក្រុមហ៊ុន Sun Hung Kai ដោយកាន់កាប់ភាគហ៊ុនចំនួន26.8%។ (អ្នកស្រី Kwong Siu-hing (រូបកណ្ដាល))។
4. Chan Laiwa: 5.8ពាន់លានដុល្លារ
កាលពីនៅតូច គ្រួសាររបស់ Chan Laiwa ក្រខ្សត់រហូតដល់ថ្នាក់អ្នកស្រីត្រូវឈប់រៀនដើម្បីធ្វើការរកប្រាក់សម្រាប់ផ្គត់ផ្កង់គ្រួសារ។ ក្រោយមក Chan បានបង្កើតក្រុមហ៊ុនជួសជុលគ្រឿងសង្ហារិម និងបានរើមកនៅក្នុងទីក្រុងហុងកុងបន្ទាប់ពីមានវ័យជាង40ឆ្នាំ។ ពេលនោះ អ្នកស្រីក៏ចាប់ផ្ដើមវិនិយោគទៅលើវិស័យអចលនទ្រព្យ។
ឆ្នាំ1988 អ្នកស្រីបានបង្កើតក្រុមហ៊ុន Fuwah Group ដែលជាក្រុមហ៊ុនអចលនទ្រព្យធំជាងគេមួយនៅទីក្រុងប៉េកាំងប្រទេសចិន។
5. Alexandra Schoerghuber: 4,9ពាន់លានដុល្លារ
Alexandra Schoerghuber គឺជាភរិយារបស់លោក Stefan Schoerghuber ដែលជាអ្នកស្នងកេរដំណែលរបស់គ្រួសារ ប៉ុន្តែ លោកបានទទួលមរណភាពកាលពីឆ្នាំ2008 ក្នុងវ័យ47ឆ្នាំ។ បច្ចុប្បន្ន អ្នកស្រី Alexandra Schoerghuber កំពុងគ្រប់គ្រងក្រុមហ៊ុនវិនិយោគឯកជនរបស់គ្រួសារ ដែលមានឈ្មោះថា Schoerghuber Unternehmensgruppe។
អ្នកស្រី Alexandra Schoerghuber ៖ 4,9ពាន់លានដុល្លារ
ក្រុមហ៊ុននេះ មានភាគហ៊ុននៅក្នុងក្រុមហ៊ុនផលិតស្រាបៀរ (ជាម្ចាស់រួមជាមួយនឹង Heineken និងល្បីឈ្មោះជាមួយនឹងផលិតផល Pauliner) និងក្រុមហ៊ុន Arabella Hospitality ដែលជាសណ្ឋាគារមួយដែលមានការសហការនឹងក្រុមហ៊ុន Marriott។ ក្រុមហ៊ុនរបស់អ្នកស្រី Alexandra ក៏កាន់កាប់ក្រុមហ៊ុនបុត្រសម្ព័ន្ធផ្នែកអចលនទ្រព្យធំជាងគេមួយ (Bayerische Bau und Immobilien GmbH) នៅប្រទេសអាល្លឺម៉ង់ ដែលក្រុមហ៊ុននេះ មានជំនាញខាងសំណង់ និងកាន់កាប់អចលនទ្រព្យជាច្រើនផងដែរ៕
ប្រភព៖ Forbes
October 19, 2020
ផ្ទះជាច្រើនខ្នងត្រូវបានដីភ្នំបាក់សង្កត់ និងទាហាន22នាក់ត្រូវកប់ក្រោមដីនៅវៀតណាម បន្ទាប់ពីភ្លៀងច្រើនថ្ងៃ
ហេតុការណ៍បាក់ដីភ្នំនៅប្រទេសវៀតណាម បានបណ្ដាលឱ្យអគារជាច្រើនខ្នងរបស់អង្គភាព337 និងទាហានវៀតណាមរាប់សិបនាក់ ត្រូវបានដីនិងថ្មភ្នំរាប់លានតោនបាក់សង្កត់និងកប់ ហើយក្លាយទៅជាទីឋានមួយគួរឱ្យខ្លាច។
មកដល់ថ្ងៃទី18តុលា សមត្ថកិច្ចបានរកឃើញសាកសពចំនួន14នាក់ នៅក្នុងចំណោមមន្ត្រីអង្គភាពសេដ្ឋកិច្ចការពារជាតិលេខ337ចំនួន22នាក់ដែលត្រូវបានកប់ក្នុងដីនៅក្នុងហេតុការណ៍បាក់ដីភ្នំក្នុងខេត្ត Quang Tri ដែលបានកើតឡើងកាលពីថ្ងៃទី18តុលា បន្ទាប់ពីដីភ្នំបានបាក់ និងកប់អគារ3ខ្នងដែលមានទាហានរាប់សិបនាក់នៅក្នុងនោះ។
ក្រោយពីហេតុការណ៍បានកើតឡើងភ្លាមៗ ក្រុមទាហានបានជួយសង្គ្រោះមនុស្សបាន5នាក់ ចំណែកមន្ត្រីយោធា22នាក់ផ្សេងទៀត បានបាត់ខ្លួន។
ខាងក្រោមនេះគឺជារូបថតមួយចំនួនបង្ហាញអំពីទិដ្ឋភាពទាំងស្រុងនៃហេតុការណ៍បាក់ដីភ្នំនេះ៖
ប្រភព៖ PLBD
October 19, 2020
នាយិការដ្ឋមន្ត្រីហ្វាំងឡង់ដែលត្រូវគូបដិបក្ខរិះគន់ដោយសារតែអាវចំហដើមទ្រូង និងត្រូវនៅដាច់ដោយឡែកព្រោះតែ Covid-19 ទទួលបានការគាំទ្រច្រើនពីស្ត្រីភេទ
នាយិការដ្ឋមន្ត្រីនៃប្រទេសហ្វាំងឡើង ដែលជាស្ត្រីម្នាក់ធ្លាប់បានធ្វើឱ្យសាធារណជនមានការភ្ញាក់ផ្លើលខ្លាំងជាមួយនឹងឈុតសម្លៀកបំពាក់សិចស៊ីបែបចំហដើមទ្រូងកាលពីប៉ុន្មានថ្ងៃកន្លងទៅនេះ បានចាកចេញពីកិច្ចប្រជុំកំពូលរបស់សហភាពអឺរ៉ុប (EU) ដើម្បីស្ថិតនៅដាច់ដោយឡែកពីគេឯង ព្រោះតែ Covid-19។
យោងតាមសរព័ត៌មាន DW នាយិការដ្ឋមន្ត្រីហ្វាំងឡង់ Sanna Marin បានចាកចេញពីកិច្ចប្រជុំនៅរដ្ឋធានី Brussels របស់ប្រទេសបែលហ្ស៊ិកកាលពីថ្ងៃទី16តុលា (ម៉ោងក្នុងស្រុក) ក្រោយពីបានដឹងថា ខ្លួនមានហានិភ័យឆ្លងវីរុសCovid-19។
ប្រការខាងលើនេះត្រូវបានធ្វើឡើងបន្ទាប់ពីអ្នកនយោបាយមួយចំនួនរបស់ហ្វាំងឡង់ ដែលធ្លាប់នៅក្បែរលោកស្រី បានទទួលលទ្ធផលវិជ្ជមានជាមួយនឹងវីរុសCovid-19។
នាយិការដ្ឋមន្ត្រីដែលមានវ័យ34ឆ្នាំរូបនេះ បានត្រលប់ទៅកាន់ស្រុកកំណើតនៅហ្វាំងឡង់ដើម្បីនៅដាច់ដោយឡែក និងកំពុងទទួលបានការតាមដានសុខភាព។ នៅលើទំព័រ Twitter លោកស្រីនាយិការដ្ឋមន្ត្រីដ៏ស្រង់ស្អាត Sanna Marin បានសរសេរថា លោកស្រីបានពឹងពាក់លោកនាយករដ្ឋមន្ត្រីស៊ុយអែត Stefan Lofven ឱ្យធ្វើជាតំណាង ជំនួសឱ្យប្រទេសហ្វាំងឡង់នៅក្នុងពេលវេលាដែលនៅសល់នៃកិច្ចប្រជុំកំពូលនេះ។
មុននោះ សារព័ត៌មានហ្វាំងឡង់បានចេញផ្សាយថា នាយិការដ្ឋមន្ត្រីរូបនេះ បានចូលរួមកិច្ចប្រជុំមួយដែលមានវត្តមានរបស់ Tom Packalen តំណាងរាស្ត្រមួយរូបរបស់ហ្វាំងឡង់ ដែលវិជ្ជមានជាមួយនឹង Covid-19។
លោកស្រី Sanna ធ្លាប់បាននៅដាច់ដោយឡែកជាច្រើនលើកមកហើយនៅក្នុងឆ្នាំនេះ ដោយសារតែ Covid-19។ ប៉ុន្តែ ចាប់ពីពេលនោះមក លទ្ធផលនៃការធ្វើតេស្តជាបន្តបន្ទាប់របស់លោកស្រី សុទ្ធតែអវិជ្ជមាន។
សូមបញ្ជាក់ថា លោកស្រី Sanna បានក្លាយជានាយិការដ្ឋមន្ត្រីដែលមានវ័យនៅក្មេងជាងគេបង្អស់របស់ប្រទេសហ្វាំងឡង់ ក៏ដូចជាពិភពលោកទាំងមូល ក្រោយពីទទួលបានសំឡេងឆ្នោតគាំទ្រច្រើនជាងគេនៅក្នុងការបោះឆ្នាំជ្រើសតាំងនាយករដ្ឋមន្ត្រីជំនួសឱ្យលោក Antti Rinne កាលពីខែធ្នូ ឆ្នាំ2019។
កាលពីដើមសប្ដាហ៍ នាយិការដ្ឋមន្ត្រីដ៏ស្រស់ស្អាតរបស់ហ្វាំងឡង់រូបនេះ បានបង្កឱ្យមានការភ្ញាក់ផ្អើលជាខ្លាំងនៅពេលស្ថិតក្នុងសម្លៀកបំពាក់ចំហដើមទ្រូង និងមិនពាល់អាវទ្រនាប់ ប្រកបដោយភាពសិចស៊ី។ បើទោះជាត្រូវបានគូប្រជែងផ្នែកនយោបាយរិះគន់យ៉ាងខ្លាំង ប៉ុន្តែ លោកស្រីនៅតែទទួលបានការគាំទ្រច្រើនពីស្ត្រីនៅក្នុងប្រទេសនេះ៕
ប្រភព៖ Independent, CNN
October 19, 2020
ក្រុមបាតុករថៃ៖ ថ្វីបើត្រូវបានបំបែក និងបញ្ចប់បាតុកម្មពេលនេះ ប៉ុន្តែពួកគេនឹងនៅតែបន្តតវ៉ា
ក្រុមមេដឹកនាំបាតុកម្មថៃ កាលពីយប់មិញ (16តុលា) បានប្រកាសបញ្ចប់បាតុកម្មនៅទីក្រុងបាងកក ក្រោយពីកងកម្លាំងប៉ូលិសប្រឆាំងកុបកម្មបានដាក់ពង្រាយរថយន្តបាញ់ទឹកដើម្បីបំបែកហ្វូងបាតុករ។
“បញ្ចប់បាតុកម្ម” នេះគឺជាសារមួយដែលត្រូវបានផ្ញើពីសមាជិកម្នាក់នៃក្រុមមេដឹកនាំចលនាបាតុកម្មកាលពីយប់ថ្ងៃទី16តុលា។
ការសម្រេចចិត្តនេះត្រូវបានធ្វើឡើងបន្ទាប់ពីកងកម្លាំងនគរបាលប្រឆាំងកុបកម្មរាប់រយនាក់ត្រូវបានដាក់ពង្រាយដើម្បីទប់ទល់នឹងបាតុករជាង2,000នាក់នៅក្នុងទីក្រុងបាងកកកាលពីរសៀលថ្ងៃទី16តុលា។ ក្រុមប៉ូលិសបានស្នើឱ្យក្រុមបាតុករត្រលប់ទៅផ្ទះ បើមិនដូច្នោះទេពួកគេនឹងត្រូវបំបែកហ្វូងដោយការបាញ់ទឹក។ ប៉ុន្តែ ក្រុមបាតុករបានបិទផ្លូវមួយកំណាត់ ច្រៀងបទចម្រៀងជាតិ និងស្នើឱ្យក្រុមប៉ូលិស “ចាកចេញ”។
បន្ទាប់មក ប៉ូលិសបានដំឡើងប្រព័ន្ធបាញ់ទឹក និងតម្រង់ទៅរកក្រុមបាតុករ នាំឱ្យបាតុករជួរមុខប្រើប្រាស់ឆត្រដើម្បីទប់ទល់ ក្នុងនោះមានអ្នកខ្លះបានគប់ដបជ័រសំដៅរកប៉ូលិសផងដែរ។ ក្រោយមក ក្រុមបាតុករត្រូវបានបំបែកយ៉ាងឆាប់រហ័ស ប៉ុន្តែពួកគេនិយាយថានឹងនៅតែបន្តធ្វើបាតុកម្ម។ យោងតាមមន្ទីរសុខាភិបាលនៃមន្ទីរពេទ្យមួយនៅទីក្រុងបាងកក ប៉ូលិសចំនួន4នាក់ និងបាតុករម្នាក់បានរងរបួស។
“រដ្ឋាភិបាលកំពុងប្រើប្រាស់អំពើហិង្សាដើម្បីបំបែកចលនារបស់ពលរដ្ឋ” Tattep Ruangprapaikitseree ដែលជាមេដឹកនាំបាតុករម្នាក់និយាយដូច្នេះ។ Pin ដែលជានិស្សិតម្នាក់ វ័យ22ឆ្នាំ បានឱ្យដឹងថា៖ “ខ្ញុំត្រូវតែតស៊ូដើម្បីអនាគតរបស់ខ្ញុំ”។
នាយករដ្ឋមន្ត្រីថៃ លោក Prayuth Chan-ocha កាលពីថ្ងៃទី15តុលា បានចេញបទបញ្ជាបន្ទាន់មួយដែលហាមមិនឱ្យមានការប្រមូលផ្ដុំគ្នាលើសពី4នាក់ ប៉ុន្តែ មនុស្សប្រមាណ10,000នាក់បានជួបជុំគ្នាធ្វើបាតុកម្មដើម្បីប្រឆាំងតវ៉ានៅក្នុងថ្ងៃដដែលនោះ បើទោះជាមានការព្យាយាមបំបែកពីកងកម្លាំងប៉ូលិសក៏ដោយ។
ក្រុមបាតុករបានចោទប្រកាន់លោក Prayuth ដែលបានឡើងកាន់កាប់អំណាចក្រោយរដ្ឋប្រហារយោធាកាលពីឆ្នាំ2014ថា បានប្រើឧបាយកលក្នុងការបោះឆ្នោតកាលពីឆ្នាំទៅដើម្បីបន្តក្ដោបក្ដាប់អំណាច។ ប៉ុន្តែ លោកនាយករដ្ឋមន្ត្រីថៃ បានឱ្យដឹងថា ការបោះឆ្នោតបានប្រព្រឹត្តទៅដោយយុត្តិធម៌ និងបានអះអាងថា លោកនឹងមិនលាលែងពីតំណែងនោះឡើយ។
ក្រុមបាតុករក៏បានស្នើឱ្យធ្វើវិសោធនកម្មរដ្ឋធម្មនុញ្ញ និងកែទម្រង់របបយោធាផងដែរ។ ជាងនេះ ក្រុមបាតុករក៏បានស្នើឱ្យរាជវង្សមានតម្លាភាពជាងបច្ចុប្បន្ន ទាក់ទងនឹងឯកសារហិរញ្ញវត្ថុនៅក្នុងស្ថានភាពសេដ្ឋកិច្ចកំពុងដាំក្បាលចុះដោយសារ Covid-19 នេះ។
ជាទូទៅ បាតុកម្មបានប្រព្រឹត្តទៅដោយសន្តិវិធី ប៉ុន្តែមានហេតុការណ៍តែមួយគាត់ដែលបាននាំឱ្យអាជ្ញាធរយកជាលេសដើម្បីអនុវត្តបទបញ្ជាបន្ទាន់ដែលបណ្ដាលឱ្យមានការចាប់ខ្លួនបាតុករ2រូប នោះគឺហេតុការណ៍ឡោមព័ទ្ធរថយន្តដែលកំពុងដឹកមហេសី Suthida។ ចំណែកក្រុមមន្ត្រីរដ្ឋាភិបាលវិញបានឱ្យដឹងថា បាតុកម្មបានបង្កផលប៉ះពាល់ធ្ងន់ធ្ងរដល់សេដ្ឋកិច្ច និងសន្តិសុខជាតិ៕
ប្រភព៖ Reuters
October 17, 2020
ប្រធានាធិបតីចិន “ក្អក” ច្រើនដង នៅពេលកំពុងថ្លែងការណ៍ ធ្វើឱ្យមហាជនព្រួយបារម្ភខ្លាំង (វីដេអូ)
ប្រធានាធិបតីចិន លោក Xi Jinping មានអាការក្អកច្រើនដង នៅពេលកំពុងថ្លែងការណ៍នៅទីក្រុង Shenzhen នាំឱ្យពលរដ្ឋប្រទេសនេះមានការព្រួយបារម្ភអំពីបញ្ហាសុខភាពរបស់លោក។
នៅក្នុងពេលធ្វើសេចក្ដីថ្លែងការមួយដែលត្រូវបានផ្សាយផ្ទាល់នៅទីក្រុង Shenzhen កាលពីថ្ងៃទី14តុលាដើម្បីជំរុញការអភិវឌ្ឍនៅក្នុងតំបន់សេដ្ឋកិច្ចពិសេសដំបូងរបស់ប្រទេសចិនបន្តរីកចម្រើនទៅមុខទៀត ប្រធានាធិបតី Xi Jinping មានអាការក្អកជាបន្តបន្ទាប់។
នៅពេលលោកឈប់និយាយដោយសារតែអាការក្អក ទូរទស្សន៍ជាតិចិន (CCTV) ក៏បានបែរកាមេរ៉ាទៅរកតំណាងរាស្ត្រផ្សេងទៀត។ យ៉ាងនេះក្ដី គេនៅតែឮសំឡេងក្អករបស់លោក និងសំឡេងលោកលើកកែវទឹកមកពិសាដើម្បីផ្សើមបំពង់ក។
វីដេអូដែលបង្ហាញអំពីសកម្មភាពខាងលើនេះ ក៏ត្រូវបានគេចុះផ្សាយ និងចែករំលែកយ៉ាងឆាប់រហ័សនៅលើបណ្ដាញសង្គមចិន អមជាមួយនឹងការព្រួយបារម្ភអំពីសុខភាពរបស់ប្រធានាធិបតីចិន។ សារព័ត៌មាន CNN យល់ថា អាការក្អកនេះអាចបណ្ដាលមកពីមេដឹកនាំចិនស្ងួតបំពង់ក ព្រោះតែបានថ្លែងការណ៍ជិត1ម៉ោង។ លោក Xi Jinping ក៏ធ្លាប់បានក្អកពេលដែលលោកកំពុងថ្លែងការណ៍កាលពីឆ្នាំ2019ផងដែរ។
https://www.youtube.com/watch?v=INNJi9Ax3w8
លោក Xi Jinping ដែលមានអាយុ67ឆ្នាំ ធ្លាប់បានបង្ហាញឱ្យឃើញជាច្រើនលើកថា លោកជាមនុស្សចូលចិត្តធ្វើកីឡា ដូចជាការហាត់ប្រាណ ហែលទឹក និងឡើងភ្នំជាដើម។ កាលពីនៅកំលោះ បុរសនេះធ្លាប់ហាត់ប្រដាល់ ទាត់បាល់ និងចូលចិត្តបាល់ទះផងដែរ៕
ប្រភព៖ CNN
October 16, 2020
ប្រទេសចិនបញ្ចេញវ៉ាក់សាំង Covid-19 ប្រភេទសាកល្បង ដែលមានតម្លៃក្រោម60ដុល្លារ
ប្រទេសចិនចាប់ផ្ដើមផ្ដល់វ៉ាក់សាំងប្រភេទសាកល្បងដល់ពលរដ្ឋមួយចំនួននៅក្នុងទីក្រុង Jiaxing នៃខេត្ត Zhejiang ភាគខាងកើតប្រទេសនេះ ក្នុងតម្លៃ60ដុល្លារអាមេរិក។
អាជ្ញាធរទីក្រុង Jiaxing កាលពីថ្ងៃទី15តុលា បានឱ្យដឹងថា ពលរដ្ឋដែលមានវ័យចាប់ពី18ដល់59ឆ្នាំ ដែលមានតម្រូវការចាំបាច់ អាចសុំប្រឹក្សាយោបល់នៅមន្ទីរពេទ្យដើម្បីទិញវ៉ាក់សាំងប្រឆាំង Covid-19 របស់ក្រុមហ៊ុន Sinovac Biotech ដែលអាជ្ញាធរកំពុងផ្ដល់សម្រាប់ក្រុមមនុស្សមួយចំនួន ដូចជាបុគ្គលិកសុខាភិបាលជាដើម។
មជ្ឈមណ្ឌលគ្រប់គ្រងនិងបង្ការរោគឆ្លងនៃទីក្រុង Jiaxing មិនបានបញ្ជាក់ថា “តម្រូវការចាំបាច់” គឺជាអ្វីខ្លះនោះទេ។ ចំណែកក្រុមមន្ត្រីក៏មិនបានឱ្យដឹងថា មានមនុស្សប៉ុន្មាននាក់នៅក្នុងទីក្រុងនេះបានចាក់វ៉ាក់សាំងនេះនោះដែរ។ វ៉ាក់សាំងនេះ ត្រូវចាក់ជាពីរលើក និងឃ្លាតពីគ្នា28ថ្ងៃ។ អាជ្ញាធរឱ្យដឹងថា វ៉ាក់សាំងនេះមានតម្លៃ400យុន ប្រហែលនឹង59ដុល្លារអាមេរិក។
យោងតាមអាជ្ញាធរក្រុង Jiaxing ប្រទេសចិនបានផ្ដល់វ៉ាក់សាំងដល់ពលកររាប់សែននាក់នៅក្នុងវិស័យសំខាន់ៗមួយចំនួន ដូចជានៅកំពង់ផែ មន្ទីរពេទ្យ និងនៅតាមតំបន់ដែលប្រឈមនឹងហានិភ័យឆ្លងវីរុសខ្ពស់។
ប្រទេសចិន បើទោះជាមានវ៉ាក់សាំងចំនួន11ប្រភេទបានឈានដល់ដំណាក់កាលប្រើប្រាស់សាកល្បង ក្នុងនោះមាន4ប្រភេទស្ថិតក្នុងដំណាក់កាលទីបីក៏ដោយ ប៉ុន្តែមិនទាន់មានវ៉ាក់សាំងណាមួយត្រូវបានផ្ដល់អាជ្ញាប័ណ្ណដើម្បីអាចដាក់លក់ក្នុងទីផ្សារនៅឡើយ។
ប្រទេសចិនបានអនុញ្ញាតឱ្យប្រើប្រាស់ប្រភេទវ៉ាក់សាំងមួយចំនួននៅក្នុងករណីចាំបាច់នាពេលកម្លងមក ប៉ុន្តែមិនទាន់មានសេចក្ដីរាយការណ៍ណាមួយបង្ហាញថា មានករណីប្រតិកម្មអាក្រក់ក្នុងកម្រិតធ្ងន់ធ្ងរនៅឡើយ។ ទីក្រុងប៉េកាំងបានព្យាករថា ប្រទេសចិននឹងមានការផ្ដល់វ៉ាក់សាំងជាទ្រង់ទ្រាយធំនៅចុងឆ្នាំនេះផងដែរ។
នៅក្នុងសន្និសីទសារព័ត៌មានមួយកាលពីខែមុន ក្រុមមន្ត្រីចិនបានប្រកាសថា ប្រទេសនេះអាចផលិតវ៉ាក់សាំងបានចំនួន610លានអំពូលនៅចុងឆ្នាំ2020 និងបានសង្កត់ធ្ងន់ថា វានឹងមានតម្លៃសមរម្យ។ ចំណែកប្រធានាធិបតីចិន លោក Xi Jinping ក៏ធ្លាប់បានប្រកាសថា វ៉ាក់សាំងចិន នឹងក្លាយជា “ផលិតផលសាធារណៈនៅទូទាំងពិភពលោក”។
សូមបញ្ជាក់ថា ប្រទេសចិនបានចុះឈ្មោះចូលរួមការដេញថ្លៃមួយដែលត្រូវបានដឹកនាំដោយអង្គការសុខភាពពិភពលោក (WHO) ដើម្បីធានាឱ្យបានប្រាកដថា វ៉ាក់សាំង Covid-19 នឹងត្រូវបានចែកចាយដល់បណ្ដាប្រទេសកំពុងអភិវឌ្ឍនៅក្នុងពិភពលោក។ ទីក្រុងប៉េកាំងមិនបាននិយាយលម្អិតអំពីខ្ទង់ប្រាក់ដែលខ្លួនបានសន្យានៅក្នុងកិច្ចព្រមព្រៀងមួយនេះទេ។ កិច្ចព្រមព្រៀងនេះមានគោលដៅដើម្បីបង្កើតមូលនិធិមួយដែលនឹងមានតម្លៃ2ពាន់លានដុល្លារអាមេរិក ក្នុងបំណងផ្ដល់វ៉ាក់សាំង Covid-19 ទៅឱ្យប្រទេសក្រីក្រចំនួន92 ក្នុងពិភពលោកដែលមានចំណូលទាប និងមធ្យម៕
ប្រភព៖ AFP
October 16, 2020