Author: សឿន សំណាង

មហាសេដ្ឋី10រូបដែលរកបានប្រាក់ច្រើនជាងគេក្នុងអាណត្តិលោក Donald Trump
មនុស្សចំនួន10នាក់ដែលរកប្រាក់បានច្រើនជាងគេនៅក្នុងអាណត្តិប្រធានាធិបតី Donald Trump មានទ្រព្យបន្ថែមសរុប490ពាន់លានដុល្លារអាមេរិក ដែលតួលេខនេះ ច្រើនជាងទ្រព្យសរុបរបស់មហាសេដ្ឋីទាំងអស់នៅប្រទេសរុស្ស៊ីទៅទៀត។
យោងតាមទស្សនាវដ្ដី Forbes លោក Donald Trump បានក្លាយជាប្រធានាធិបតីអាមេរិកដ៏អស្ចារ្យដំបូងគេសម្រាប់មហាសេដ្ឋីទាំង10រូបនេះ។ ចាប់តាំងពីលោក Trump បានចូលកាន់កាប់សេតវិមានកាលពីចុងឆ្នាំ2016 ទ្រព្យសរុបរបស់ក្រុមមហាសេដ្ឋីអាមេរិក បានកើនឡើងជិត1លានលានដុល្លារបន្ថែមទៀត ដែលនាំឱ្យទ្រព្យសរុបរបស់ពួកគេបានឡើងដល់2.9លានលានដុល្លារ។
ខាងក្រោមនេះគឺជាមហាសេដ្ឋី10រូបនៅសហរដ្ឋអាមេរិកដែលរកប្រាក់បានច្រើនជាងគេបង្អស់ រាប់ចាប់តាំងពីលោក Trump បានក្លាយជាប្រធានាធិបតីកាលពីឆ្នាំ2016៖
1. Jeff Bezos
ទ្រព្យសុទ្ធ៖ 189ពាន់លានដុល្លារ
ទ្រព្យដែលបានកើនឡើង៖ 121ពាន់លានដុល្លារ
នៅពេលលោក Donald Trump បានជាប់ឆ្នោត លោក Jeff Bezos ដែលជាស្ថាបនិក និងជា CEO របស់ Amazon ទើបតែបានលោតរំលងមហាសេដ្ឋី Warren Buffett ដោយក្លាយជាអ្នកមានទ្រព្យច្រើនជាងគេលំដាប់ទីពីរនៅសហរដ្ឋអាមេរិក។
4ឆ្នាំកន្លងទៅនេះ ទ្រព្យរបស់លោក Bezos បានកើនឡើង121ពាន់លានដុល្លារបន្ថែមទៀត ហើយក្លាយជាអ្នកមានទ្រព្យច្រើនជាងគេបង្អស់ក្នុងពិភពលោក។ ថ្វីបើត្រូវលោក Trump រិះគន់ជាច្រើនលើក ប៉ុន្តែ Amazon នៅតែកើនឡើងជាង300% រាប់ចាប់ពីឆ្នាំ2016។ កាលពីខែសីហា2020 លោក Bezos បានក្លាយជាមនុស្សដំបូងគេក្នុងប្រវត្តិសាស្ត្រ ដែលមានទ្រព្យលើសពី2សែនលានដុល្លារ។ ប្រការនេះនៅតែបន្តកើតឡើង បើទោះជាលោកត្រូវលែងលះ និងចែកភាគហ៊ុនឱ្យអតីតភរិយា MacKenzie Scott ចំនួន25% ក្នុងចំណោមភាគហ៊ុនដែលលោកកំពុងកាន់កាប់នៅក្នុងក្រុមហ៊ុន។ បើសិនជាមិនបានលែងលះទេ នោះទ្រព្យរបស់លោកនឹងឡើងដល់250ពាន់លានដុល្លារអាមេរិក។
2. Elon Musk
ទ្រព្យសុទ្ធ៖ 9ម៉ឺនលានដុល្លារ
ទ្រព្យដែលបានកើនឡើង៖ 79ពាន់លានដុល្លារ
3. Steve Ballmer
ទ្រព្យសុទ្ធ៖ 73ពាន់លានដុល្លារ
ទ្រព្យដែលបានកើនឡើង៖ 44ពាន់លានដុល្លារ
4. Mark Zuckerburg
ទ្រព្យសុទ្ធ៖ 96
ទ្រព្យដែលបានកើនឡើង៖ 44ពាន់លានដុល្លារ
5. Dan Gilbert
ទ្រព្យសុទ្ធ៖ 44ពាន់លានដុល្លារ
ទ្រព្យដែលបានកើនឡើង៖ 39ពាន់លានដុល្លារ
6. Bill Gates
ទ្រព្យសុទ្ធ៖ 117ពាន់លានដុល្លារ
ទ្រព្យដែលបានកើនឡើង៖ 35ពាន់លានដុល្លារ
7. Alice Walton, Jim Walton និង Rob Walton (បងប្អូននៃត្រកូល Walton ដែលជាអ្នកកាន់កាប់បណ្ដាញផ្សារ Walmart)
សមាជិកត្រកូល Walton (ពីឆ្វេងទៅស្ដាំ) Rob, Alice និង Jim
ទ្រព្យសុទ្ធ៖ (រាប់តាមលំដាប់លំដោយ) 67ពាន់លាន, 67ពាន់លាន និង66ពាន់លានដុល្លារអាមេរិក
ទ្រព្យដែលបានកើនឡើង៖ (រាប់តាមលំដាប់លំដោយ) 33ពាន់លានដុល្លារ 32ពាន់លានដុល្លារ និង32ពាន់លានដុល្លារ
10. Larry Ellison
ទ្រព្យសុទ្ធ៖ 79ពាន់លានដុល្លារ
ទ្រព្យដែលបានកើនឡើង៖ 3ម៉ឺនលានដុល្លារអាមេរិក
សូមបញ្ជាក់ថា តម្លៃទ្រព្យខាងលើនេះត្រូវបានគិតចាប់ពីដំណាក់កាលបោះឆ្នោតនៅអាមេរិក ឆ្នាំ2016 រហូតមកដល់ថ្ងៃទី19តុលា2020៕
ប្រភព៖ Forbes
October 26, 2020
ភូមិមួយនៅអ៊ីតាលី ផ្ដល់ប្រាក់ដល់អ្នកចំណូលថ្មីដែលមករស់នៅ និងរកស៊ីនៅទីនេះ
ភូមិ Santo Stefano di Sessanio សង្ឃឹមថា ខ្ទង់ជំនួយដែលមានទំហំជាទឹកប្រាក់ឡើងដល់ 44,000អឺរ៉ូ (ជាង52,000ដុល្លារអាមេរិក) នឹងអាចទាក់ទាញយុវវ័យចូលមករស់នៅ និងបង្កើតមុខរបរនៅទីនេះកាន់តែច្រើន។
Santo Stefano di Sessanio ដែលស្ថិតនៅក្នុងតំបន់ Abruzzo ភាគអាគ្នេយ៍នៃប្រទេសអ៊ីតាលី កាលពីសប្ដាហ៍មុនបានបង្ហោះសារលម្អិតស្ដីអំពីគម្រោងខាងលើ នៅលើគេហទំព័ររបស់ក្រុមប្រឹក្សាមូលដ្ឋាន។ សារនេះបានឱ្យដឹងថា បច្ចុប្បន្ន Santo Stefano di Sessanio មានប្រជាជនត្រឹមតែ115នាក់ប៉ុណ្ណោះ ហើយក្នុងនោះមាន41នាក់មានវ័យលើសពី65ឆ្នាំ និងមានតែ13នាក់ប៉ុណ្ណោះដែលមានវ័យក្រោម20ឆ្នាំ។
ដូច្នេះ ក្រុមប្រឹក្សាភូមិយល់ថា ពួកគេ “ចាំបាច់” ត្រូវតែធ្វើអ្វីមួយដើម្បីធានាឱ្យបាននូវ “ការរីកចម្រើនប្រកបដោយស្ថិរភាព និងយូរអង្វែង” របស់ភូមិនេះ។ ដើម្បីទាក់ទាញអ្នកចំណូលថ្មី ក្រុមប្រឹក្សាភូមិក៏បានលើកជាយោបល់ដ៏អស្ចារ្យមួយ នោះគឺ “ផ្ដល់ជំនួយ8,000អឺរ៉ូ/ឆ្នាំ រយៈពេល3ឆ្នាំ សម្រាប់មនុស្សម្នាក់ ដោយទូទាត់ប្រចាំខែ។ ជាងនេះ ភូមិខាងលើក៏នឹងផ្ដល់ជំនួយ20,000អឺរ៉ូបន្ថែមទៀត ក្នុងករណីដែលអ្នកចំណូលថ្មីបើកអាជីវកម្មនៅទីនេះ។
អ្នកចំណូលថ្មីក៏នឹងទទួលបានកន្លែងស្នាក់នៅ ហើយគ្រាន់តែបង់ប្រាក់ឈ្នួលជាទម្រង់តំណាងតែប៉ុណ្ណោះ។ ក្រុមប្រឹក្សាភូមិក៏បានបញ្ជាក់ថា អ្នកដែលចូលរួមកម្មវិធីនេះ ត្រូវតែមានអាយុចាប់ពី18ដល់40ឆ្នាំ។
អ្នកចំណូលថ្មីទាំងនោះ អាចជាពលរដ្ឋអ៊ីតាលីដែលមកពីតំបន់ផ្សេងៗ ប៉ុន្តែភូមិទាំងនោះត្រូវតែមានប្រជាជនមិនក្រោម2,000នាក់។ ពួកគេក៏អាចជាប្រជាជននៅក្នុងសហភាពអឺរ៉ុប ឬមកពីខាងក្រៅ ប៉ុន្តែត្រូវតែជាពលរដ្ឋដែលមានសិទ្ធរស់នៅយូរអង្វែង។
បន្ទាប់ពីទទួលបានការយល់ព្រម អ្នកចំណូលថ្មីត្រូវតែស្នាក់នៅក្នុងភូមិ Santo Stefano នេះឱ្យបានយ៉ាងតិច5ឆ្នាំ និងរកស៊ីនៅក្នុងភូមិនេះ។ ប៉ុន្តែ វិស័យជំនួញត្រូវតែស្ថិតក្នុងបញ្ជីអាទិភាពរបស់ក្រុមប្រឹក្សាភូមិ ក្នុងនោះមានដូចជាវិស័យទេសចរណ៍ កីឡា វប្បធម៌ សេវាកម្មសម្អាតនិងអនាម័យ គ្រប់គ្រងឱសថ ទីផ្សារ និងជួញដូរស្បៀងអាហារ។
ភូមិ Santo Stefano បានបញ្ជាក់ថា សេចក្ដីប្រកាសស្វែងរកអ្នកចំណូលថ្មីនេះ នឹងទទួលពាក្យស្នើសុំចូលមករស់នៅ រហូតដល់ថ្ងៃទី15វិច្ឆិកា2020៕
ប្រភព៖ CNBC
October 26, 2020
ធ្ងន់ធ្ងរ! ចំណែកទីផ្សារ របស់ HUAWEI ធ្លាក់ចុះ នៅសល់ត្រឹម 3.7% ក្រោយត្រូវអាមេរិកដាក់ចូលបញ្ជីខ្មៅ
បណ្ដាទីភ្នាក់ងារព័ត៌មានអន្តរជាតិ បានរាយការណ៍កាលពីថ្ងៃទី23 តុលា ថា HUAWEI ក្រុមហ៊ុនដ៏ធំសម្បើមផ្នែកតិចណូឡូជីរបស់ចិន បានបង្ហើបឱ្យដឹងថា ប្រាក់ចំណូលរបស់ក្រុមហ៊ុនក្នុងត្រីមាសទី3 ឆ្នាំ2020 នេះបានធ្លាក់ចុះយ៉ាងធ្ងន់ធ្ងរ ដោយសារការរារាំងរបស់សហរដ្ឋអាមេរិក។
របាយការណ៍បានបញ្ជាក់ថា ក្នុងអំឡុង 9ខែ នៃឆ្នាំ2020នេះ HUAWEI មានចំណូល 6.713សែនលានយន់ ឬប្រមាណជា 1សែនលានដុល្លារគិតជាអត្រាការកើនឡើង បានត្រឹមតែ 9.9% ធៀបនឹងរយៈពេលដូចគ្នាកាលពីឆ្នាំទៅ HUAWEIមានអត្រាកើនឡើងដល់ទៅ 24.4%។
ក្នុងត្រីមាសទី3 HUAWEI មានចំណូលសរុប 2.173សែនលានយន់ ឬប្រមាណជាង 3ម៉ឺនលានដុល្លារ កើនឡើងបានត្រឹមតែ 3.7%ប៉ុណ្ណោះ។
HUAWEI បានបញ្ជាក់ថា ខ្សែចង្វាក់ផ្គត់ផ្គង់របស់ក្រុមហ៊ុន ស្ថិតក្នុងសភាវមានសម្ពាធយ៉ាងខ្លាំង ក្រៅពីនេះ ផ្នែកផលិតកម្ម ក៏ជួបប្រទះនឹងឧបសគ្គដែលច្រើនឡើងផងដែរ តែទាំងអស់នេះ ក្រុមហ៊ុននឹងព្យាយាមរិះរកវិធីដើម្បីទ្រទ្រង់ និងឈានឆ្ពោះទៅខាងមុខជាបន្តទៅទៀត។
កាលពីពេលមុននេះ សហរដ្ឋអាមេរិក បានដាក់ HUAWEI ចូលក្នុងបញ្ជីខ្មៅ និងចេញបញ្ជា ដែលកំណត់ឱ្យបណ្ដាក្រុមហ៊ុនផ្គត់ផ្គង់សូហ្វវែរ និងឧបករណ៍ការផលិតរបស់ខ្លួន ផ្អាកដំណើរការធុរកិច្ចជាមួយ HUAWEI ដោយមិនបានទទួលការអនុញ្ញាត ដោយសំអាងថា អាចនឹងធ្វើឱ្យមានភាពប្រថុយប្រថានចំពោះសន្តិសុខជាតិ ក្រោយពីចិន និងអាមេរិក បានបញ្ឆេះសង្គ្រាមពាណិជ្ជកម្ម ដែលមានដើមហេតុមកពីចំណុចវិវាទខាងផ្នែកតិចណូឡូជីយូរអង្វែងមកហើយ តាំងពីឆ្នាំ2018។
វិធានការទាំងនោះ បានបង្ខំឱ្យ Google ត្រូវកាត់ផ្ដាច់សម្ព័ន្ធភាពជាមួយ HUAWEI ធ្វើឱ្យស្មាតហ្វូនស៊េរីថ្មីរបស់ HUAWEI មិនអាចប្រើសូហ្វវែរមួយចំនួនរបស់ហ្គូហ្គលបាន បណ្ដាលឱ្យប៉ះពាល់ដោយផ្ទាល់ ដល់ការលក់ផលិតផលរបស់ HUAWEI។
ក្រៅពីនេះ សហរដ្ឋអាមេរិក នៅបានដាក់សម្ពាធទៅលើក្រុមហ៊ុនផ្គត់ផ្គង់ឈីបទូទាំងពិភពលោកទៀតផង ធ្វើឱ្យ HUAWEI មិនអាចទំនាក់ទំនងបានជាមួយក្រុមហ៊ុនផលិតឈីបសិត ដូចជា គិរីន ដែលជាគ្រឿងផ្គុំដ៏សំខាន់របស់ស្មាតហ្វូនតទៅទៀតបាន៕
ប្រភព៖ សារព័ត៌មានបរទេស
October 26, 2020
ភោជនីយដ្ឋាននៅជប៉ុន កំពុងអភិវឌ្ឍសេវាកម្ម “គ្មានការប៉ះពាល់” ការពារការឆ្លងមេរោគ
ភោជនីយដ្ឋាននៅក្នុងប្រទេសជប៉ុន កំពុងសាកល្បងប្រើប្រាស់សេវាកម្ម រូបបែបថ្មិ ដែលកាត់បន្ថយការប៉ះពាល់ជាមួយអតិថិជន ឬ non-contact ដើម្បីកាត់បន្ថយការប្រថុយប្រថានក្នុងការឆ្លងមេរោគកូវីដ-19។
ហាង KFC នៅក្នុងប្រទេសជប៉ុន បានបើកបម្រើសេវាកម្មឱ្យអតិថិជនដែលកុម្ម៉ង់ម្ហូបអាហារតាមអនឡាញ បើកយកទំនិញពីថតទូឡក់ឃើរ ដែលនៅក្នុងហាង ដោយមិនចាំបាច់ទាក់ទងបុគ្គលិករបស់ហាងឡើង។ សេវាកម្មនេះ បានសាកល្បងប្រើនៅក្នុងហាង KFC 4កន្លែងក្នុងទីក្រុងតូក្យូ ប្រសិនបើទទួលបានការស្វាគមន៍ល្អ ក្រុមហ៊ុនក៏នឹងពង្រីកសេវាកម្មនេះ ឱ្យកាន់តែច្រើនឡើងទៀត។
សេវាកម្មនោះគឺ អតិថិជន នឹងកុម្ម៉ងម្ហូបអាហារតាមរយៈប្រព័ន្ធអនឡាញ បន្ទាប់ពីនោះ ក៏ជ្រើសរើសពេលវេលា និងសាខាមួយណាដែលខ្លួនងាយស្រួលទៅយក ហើយនៅពេលធ្វើដំណើរទៅដល់ហាង អតិថិជនគ្រាន់តែប្រើលេខកូដកុម្ម៉ង់ម្ហូបអាហារនោះ បើកថតទូឡក់ឃើរ យកម្ហូបអាហារ ដែលបុគ្គលិកបានដាក់ ត្រៀមទុកនៅក្នុងនោះរួចហើយ ជាការស្រេច។
សេវាកម្មនេះ ក្រៅពីកាត់បន្ថយភាពប្រថុយប្រថានក្នុងការឆ្លងមេរោគ តាមរយៈការប៉ះពាល់ហើយ វាថែមទាំងជួយកាត់បន្ថយរយៈពេលនៃការរង់ចាំយកម្ហូបអាហារទៀតផង ព្រោះអតិថិជនអាចកំណត់ម៉ោង ដើម្បីទៅយកទំនិញ ដោយបុគ្គលិកនឹងរៀបចំទុកដាក់ក្នុងថតទូរួចជាស្រេច។
ចំណែកហាង ឃូរ៉ាក់ ស៊ូហ្ស៊ី ខ្សែបណ្ដាញហាងលក់ស៊ូហ្ស៊ី បែបប៊ូហ្វេ ក៏ប្រើសេវាកម្មទួទាត់ប្រាក់បែបថ្មីដែរ ដោយវាជាផ្ទាំងអេក្រង់បង្ហាញរូបភាព ដែលអតិថិជនអាចគិតលុយថ្លៃម្ហូបអាហារបានដោយខ្លួនឯង ដោយមិនចាំបាច់ពឹងបុគ្គលិក។ ក្រៅពីនេះ ថែមទាំងមិនចាំបាច់ប៉ះផ្ទាំងអេក្រង់ទៀតផង អតិថិជនគ្រាន់តែរំកិលម្រាមចង្អុលដៃលើផ្ទាំងរូបផ្សេងៗ ដែលបង្ហាញនៅក្នុងអេក្រង់ សិនស៊ើរនឹងចាប់យកការធ្វើចលនារបស់ម្រាមដៃបាន ដោយមិនចាំបាច់ប៉ះ ឬចុចនៅលើអេក្រង់ឡើយ។
តិចណូឡូជីអេក្រង់ បែបមិនចាំបាច់ប៉ះពាល់នេះ ត្រូវបានគេរំពឹងថា នឹងនាំយកមកប្រើយ៉ាងទូលំទូលាយ ជំនួសអេក្រង់ថាច់ស្គ្រីននាពេលបច្ចុប្បន្ន ព្រោះវានឹងកាត់បន្ថយការឆ្លងមេរោគ និងកាត់បន្ថយចំនួនបុគ្គលិកក្នុងហាងបានទៀតផង។ ហាង ឃូរ៉ាក់ ស៊ូហ្ស៊ី បានចាប់ផ្ដើមសាកល្បងប្រើអេក្រង់បែបនេះ នៅឯសាខារបស់ខ្លួននៅក្នុងទីក្រុងតូក្យូ និងអូសាខារួចហើយ៕
ប្រភព៖ សារព័ត៌មានបរទេស
October 26, 2020
កូនប្រុសរបស់ Trump នឹងអាចឈរឈ្មោះជាបេក្ខភាពប្រធានាធិបតីសហរដ្ឋអាមេរិកនៅឆ្នាំ2024
Donald Trump Jr. បានបង្ហោះរូបថតមួយសន្លឹកដែលមានរូបលោក កំពុងឈរក្បែរផ្ទាំងបដាធំមួយដែលសរសេរថា “Don Jr 2024” ដែលនេះបានធ្វើឱ្យមានការសង្ស័យថា លោកប្រហែលជានឹងឈរឈ្មោះជាប្រធានាធិបតីសហរដ្ឋអាមេរិក នៅអាណត្តិក្រោយ។
“នេះគឺជាផ្ទាំងបដាមួយដែលខ្ញុំបានឃើញនៅក្នុងព្រឹត្តិការណ៍ដេញថ្លៃសត្វចញ្ចឹម Fallon Nevada។ ប្រការនេះនឹងនាំឱ្យអ្នកគាំទ្រត្រូវឈឺក្បាល។ ខ្ញុំសូមអនុញ្ញាតផ្ញើការអរគុណដល់អ្នកដែលបានធ្វើបដានេះ។ ប៉ុន្តែ ជាដំបូង ចូររួមដៃគ្នាដើម្បីដណ្ដើមជោគជ័យនៅក្នុងឆ្នាំ2020នេះសិន!!!” លោក Trump Jr. ដែលជាកូនប្រុសច្បងរបស់ប្រធានាធិបតីអាមេរិក Donald Trump បានបង្ហោះរូបថតអមនឹងសារយ៉ាងដូច្នេះ។
បើទោះជាស្និទ្ធស្នាលនឹងឪពុក ប៉ុន្តែ លោក Trump Jr. មិនមានតួនាទីជាផ្លូវការណាមួយនៅសេតវិមាននោះទេ ប៉ុន្តែ លោកធ្វើសកម្មភាពដូចទៅនឹងអ្នកតំណាងនៅខាងក្រៅ ដើម្បីជួយទាក់ទាញអ្នកគាំទ្រឱ្យឪពុករបស់ខ្លួននៅលើបណ្ដាញសង្គម។
កន្លងមក លោក Trump Jr. ធ្លាប់បានបង្ហើបអំពីបំណងឈរឈ្មោះជាអភិបាលក្រុង New York។ ក៏ប៉ុន្តែ ប្រធានាធិបតី Trump បានបដិសេធលទ្ធភាពនេះ។ កាលពីខែមុន លោក Trump បានប្រាប់សារព័ត៌មាន Fox Business ថា៖ “វាមិនអាចដណ្ដើមបានជោគជ័យក្នុងនាមជាសមាជិកបក្សសាធារណរដ្ឋនោះទេ មិនមានឱកាសសោះឡើយ”។
លោក Trump Jr. ត្រូវបានគេសង្កេតឃើញថា ជាមនុស្សសកម្មក្នុងការជួយជ្រោមជ្រែកឪពុក។ គាត់តែងមានទំនាក់ទំនងល្អជាមួយអ្នកគាំទ្ររបស់លោក Trump។ ក្នុងព្រឹត្តិការណ៍នានា លោក Trump Jr. ក៏តែងទទួលបានការស្វាគមន៍ពីអ្នកគាំទ្រ ដែលហាក់ចាត់ទុកលោក ជាមេដឹកនាំមួយរូបដែលអាចជំនួសឪពុកបាននាពេលអនាគត៕
ប្រភព៖ NYPost
October 26, 2020
ជំនួយការយ៉ាងតិច5នាក់របស់អនុប្រធានាធិបតីអាមេរិក បានឆ្លងCovid-19
យ៉ាងហោចណាស់មានជំនួយការចំនួន5នាក់របស់អនុប្រធានាធិបតីសហរដ្ឋអាមេរិក បានឆ្លងវីរុសCovid-19 ក្នុងនោះក៏មានប្រធានការិយាល័យ Marc Short និងជំនួយការ Zach Bauer ផងដែរ។
ប្រភពព័ត៌មានមួយដែលសុំមិនបញ្ចេញឈ្មោះ បានឱ្យដឹងថា ក្រុមមន្ត្រីរដ្ឋាភិបាលមានការព្រួយបារម្ភថា នឹងមានមនុស្សកាន់តែច្រើនដែលស្និទ្ធនឹងអនុប្រធានាធិបតី សហរដ្ឋអាមេរិក Mike Pence វិជ្ជមាននឹងវីរុសCovid-19 នាពេលខាងមុខ។
អនុប្រធានាធិបតី Mike Pence និងភរិយា Karen Pence ទទួលបានលទ្ធផលវិជ្ជមាននឹងCovid-19 កាលពីថ្ងៃទី25តុលា នេះបើតាមមន្ត្រីម្នាក់នៅសេតវិមាន។ បើទោះជាបានទាក់ទងផ្ទាល់ជាមួយនឹងអ្នកដែលវិជ្ជមាននឹងCovid-19 ជាច្រើននាក់ក៏ដោយ លោក Pence នៅតែបដិសេធការធ្វើចត្តាឡីស័ក ដោយមិនអើពើដល់ការណែនាំពីមជ្ឈមណ្ឌលជាតិគ្រប់គ្រងនិងទប់ស្កាត់រោគឆ្លងសហរដ្ឋអាមេរិក (CDC)។
ការិយាល័យអនុប្រធានាធិបតី Pence កាលពីយប់ថ្ងៃទី24តុលា បានប្រកាសថា ប្រធានការិយាល័យ Short បានឆ្លងវីរុស។ ក្រោយមកបន្តិច ប្រភពព័ត៌មានមួយបាននិយាយប្រាប់ CNN ថា Marty Obst ដែលជាទីប្រឹក្សាខាងក្រៅសេតវិមានរបស់លោក Pence រួមនឹងបុគ្គលិកក្នុងការិយាល័យនេះយ៉ាងតិចចំនួន3នាក់ទៀតបានឆ្លងវីរុស។
ជំនួយការ Bauer របស់អនុប្រធានាធិបតី ដែលតែងតែអមដំណើរលោក Pence ទាំងយប់ទាំងថ្ងៃ ទទួលបានលទ្ធផលវិជ្ជមានកាលពីថ្ងៃទី24តុលា។
អនុប្រធានាធិបតី Mike Pence ដែលជាមេដឹកនាំកម្លាំងទល់ទល់នឹងCovid-19 របស់សេតវិមាន មានគម្រោងបន្តធ្វើដំណើរទៅកាន់រដ្ឋមួយចំនួន ដើម្បីធ្វើការឃោសនារកសំឡេងឆ្នោតនៅប៉ុន្មានថ្ងៃចុងក្រោយនៃរដូវឃោសនាបោះឆ្នោតអាណត្តិនេះ ប៉ុន្តែ Mark Meadows ប្រធានការិយាល័យសេតវិមានបានឱ្យដឹងថា លោក Pence នឹងពាក់ម៉ាស់ ក៏ដូចជារក្សាគម្លាតសង្គមចាប់ពីពេលនេះតទៅ។
Covid-19 បានចាប់ផ្ដើមវាយលុកចូលសេតវិមានកាលពីខែកញ្ញា បណ្ដាលឱ្យប្រធានាធិបតី Donald Trump និងភរិយា រួមនឹងកូនប្រុសពៅរបស់គ្រួសារ Trump ត្រូវឆ្លងវីរុស។ ជំនួយការកំពូលៗជាច្រើនរូបរបស់លោក Trump មានដូចជា ប្រធានយុទ្ធនាការរកសំឡេងឆ្នោត លេខាផ្នែកសារព័ត៌មាន និងប្រធានាគណៈកម្មធិការជាតិបក្សសាធារណរដ្ឋ ក៏បានឆ្លងវីរុសCovid-19នេះដែរ៕
ប្រភព៖ CNN
October 26, 2020
Putin ថា សម្ព័ន្ធមិត្តយោធារុស្ស៊ី-ចិន នឹងអាចកើតមានឡើងក្នុងពេលខាងមុខ
ប្រធានាធិបតីប្រទេសរុស្ស៊ី លោក Putin យល់ថា សម្ព័ន្ធមិត្តយោធារវាងរុស្ស៊ីនិងចិន អាចកើតមានឡើងក្នុងពេលអនាគត នៅពេលដែលភាពតានតឹងរវាងប្រទេសទាំង2 ជាមួយនឹងសហរដ្ឋអាមេរិក បានកើនឡើងខ្ពស់។
“បច្ចុប្បន្ន យើងមិនទាន់ត្រូវការវាទេ ប៉ុន្តែ ជាទ្រឹស្ដី ការដែលស្រមៃអំពីទំនាក់ទំនងជាសម្ព័ន្ធមិត្តបែបនេះ គឺពិតជាអាចកើតមានឡើង” ប្រធានាធិបតីរុស្ស៊ី លោក Vladimir Putin បានឆ្លើយនឹងសំណួរដែលសួរអំពីលទ្ធភាពនៃការបង្កើតសម្ព័ន្ធមិត្តយោធារវាងទីក្រុងម៉ូស្គូ និងទីក្រុងប៉េកាំង នៅក្នុងកិច្ចប្រជុំតាមរយៈវីដេអូមួយជាមួយនឹងក្រុមអ្នកជំនាញផ្នែកគោលនយោបាយការបរទេសអន្តរជាតិកាលពីថ្ងៃទី22តុលា។
ក្រុមអ្នកតាមដានសភាពការណ៍នយោបាយយល់ថា ការប្រកាសរបស់លោក Putin គឺជាសញ្ញាដែលបង្ហាញថា ទំនាក់ទំនងរវាងរុស្ស៊ី-ចិន នឹងកាន់តែស្និទ្ធស្នាល ក្នុងគ្រាដែលភាពតានតឹងរវាងប្រទេសទាំង2 ជាមួយនឹងសហរដ្ឋអាមេរិក កំពុងតែឡើងកម្ដៅ។
ប្រទេសរុស្ស៊ី និងចិន តែងតែសរសើរចំពោះ “ទំនាក់ទំនងជាដៃគូយុទ្ធសាស្ត្រ” រវាងប្រទេសទាំង2 ក៏ប៉ុន្តែ មកដល់ពេលនេះ នៅតែច្រានចោលរាល់ការចរចាអំពីលទ្ធភាពនៃការបង្កើតសម្ព័ន្ធមិត្តយោធា។
រុស្ស៊ី និងចិន បានព្យាយាមស្វែងរកវិធីដើម្បី “ចាប់ដៃគ្នាក្នុងបំណងបង្កើតភាពកក់ក្ដៅ” នៅពេលទំនាក់ទំនងរវាងទីក្រុងម៉ូស្គូ ជាមួយនឹងបណ្ដាប្រទេសលោកខាងលិច បានធ្លាក់ចុះដល់កម្រិតទាបបំផុត ក្រោយសង្គ្រាមត្រជាក់ ដោយសារកត្តាមួយចំនួន ដូចជា បញ្ហារុស្ស៊ីរឹបអូសយកតំបន់ Crimea ការចោទប្រកាន់ថារុស្ស៊ីបានលូកដៃចូលក្នុងកិច្ចការបោះឆ្នោតឆ្នាំ2016នៅអាមេរិក។ល។ ចំណែកទីក្រុងប៉េកាំងវិញ ក៏កំពុងតែប្រឈមមុខដាក់គ្នាជាមួយនឹងសហរដ្ឋអាមេរិកនៅក្នុងវិស័យជាច្រើន រាប់ចាប់ពី សង្គ្រាមពាណិជ្ជកម្ម បច្ចេកវិទ្យា រហូតដល់បញ្ហានៅតំបន់ Xinjiang បញ្ហាហុងកុង បញ្ហាតៃវ៉ាន់ និងសមុទ្រចិនខាងត្បូងជាដើម៕
ប្រភព៖ AP
October 24, 2020
កម្ពុជារកឃើញអ្នកផ្ទុកCovid-19 1ករណី និងជាសះស្បើយ3ករណី ខណៈពិភពលោកមានករណីវិជ្ជមាន42,469,950នាក់
ក្រសួងសុខាភិបាល បានប្រកាសឱ្យដឹងនាព្រឹកថ្ងៃទី24នេះថា កម្ពុជាទើបតែបានរកឃើញអ្នកផ្ទុកCovid-19 ចំនួន1ករណីបន្ថែមទៀត និងជាសះស្បើយចំនួន3ករណីផងដែរ។
ករណីវិជ្ជមានដែលបានរកឃើញខាងលើនេះ កើតឡើងចំពោះបុរសជនជាតិបារាំងអាយុ37ឆ្នាំ ស្នាក់នៅក្នុងទីក្រុងភ្នំពេញ។ បុរសនេះបានធ្វើដំណើរពីប្រទេសបារាំង និងឆ្លងកាត់កោះតៃវ៉ាន់មុននឹងមកដល់កម្ពុជានៅថ្ងៃទី11តុលា។ បច្ចុប្បន្ន អ្នកជំងឺរូបនេះកំពុងសម្បាកព្យាបាលនៅមន្ទីរពេទ្យមិត្តមានខ្មែរ-សូវៀតក្នុងទីក្រុងភ្នំពេញ។
គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុសCovid-19 សរុប 287នាក់ ក្នុងនោះមាន283នាក់បានជាសះស្បើយ និង4នាក់ទៀតកំពុងទទួលការព្យាបាលនៅមន្ទីរពេទ្យ ដែលក្នុងនោះដែរ មានជនជាតិខ្មែរ3នាក់ និងបារាំង1នាក់។
នៅទូទាំងពិភពលោក គិតដល់ពេលនេះ មានអ្នកឆ្លងវីរុសCovid-19 សរុប 42,469,950នាក់ ក្នុងនោះអ្នកស្លាប់បានឡើងដល់1,149,142នាក់ អ្នកបានជាសះស្បើយ31,423,036នាក់ និងអ្នកកំពុងព្យាបាលមានចំនួន9,897,772នាក់៕
ប្រភព៖ ក្រសួងសុខាភិបាល, Worldometers
October 24, 2020
ការសិក្សាតាមអនឡាញកំពុងពេញនិយម ក្រុមហ៊ុនអប់រំតាមអនឡាញចិនមួយ ត្រូវបានកំណត់តម្លៃឡើងដល់15.5ពាន់លានដុល្លារអាមេរិក
ការដែលក្រុមហ៊ុន Yuanfudao ត្រូវបានកំណត់តម្លៃឡើងដល់15.5ពាន់លានដុល្លារអាមេរិកនេះ បានកើតមានឡើងដោយចំណាយពេលត្រឹមតែកន្លះឆ្នាំប៉ុណ្ណោះ។
ក្រុមហ៊ុនបច្ចេកវិទ្យាអប់រំអនឡាញ Yuanfudao ដែលមានការិយាល័យកណ្ដាលនៅទីក្រុងប៉េកាំង កាលពីថ្ងៃទី22តុលាបានឱ្យដឹងថា ក្រុមហ៊ុននេះទើបតែប្រមូលទុនបាន2លើក និងរកបានទុន2.2ពាន់លានដុល្លារអាមេរិកពីក្រុមអ្នកវិនិយោគឯកជនចិន និងអន្តរជាតិ ដែលនេះបាននាំឱ្យការកំណត់តម្លៃរបស់ក្រុមហ៊ុននេះ ឡើងដល់15.5ពាន់លានដុល្លារអាមេរិក។ នេះបើតាមសារព័ត៌មាន Reuters។
Yuanfudao ដែលជាថ្នាលបណ្ដុះបណ្ដាលចំណេះដឹងតាមអនឡាញ ដោយប្រើពេលយ៉ាងខ្លី (ជាងកន្លះឆ្នាំ) បែបនេះ គឺមកពីតម្រូវការនៃការសិក្សាតាមអនឡាញបានកើនឡើងខ្ពស់មិនធ្លាប់មាន ព្រោះតែបញ្ហា Covid-19។ កាលពីខែមីនា Yuanfudao ប្រមូលបានទុន1ពាន់លានដុល្លារអាមេរិក ក្នុងគ្រាដែលក្រុមហ៊ុនត្រូវបានកំណត់តម្លៃត្រឹម7.8ពាន់លានដុល្លារ។ បច្ចុប្បន្ន Yuanfudao មានអ្នកប្រើប្រាស់ប្រមាណ400លាននាក់នៅប្រទេសចិន។
គូប្រជែងធំបំផុតរបស់ Yuanfudao គឺ Zuoyebang ដែលជាក្រុមហ៊ុនថ្មីមួយ ប្រមូលបានទុនយ៉ាងច្រើនសន្ធឹកកាលពីខែកញ្ញា។ Zuoyebang ត្រូវបានកំណត់តម្លៃត្រឹម10ពាន់លានដុល្លារអាមេរិក។
ព្រឹត្តិការណ៍ប្រមូលទុនមួយកាលពីពេលថ្មីៗនេះរបស់ Yuanfudao ត្រូវបានដឹកមុខដោយក្រុមហ៊ុនបច្ចេកវិទ្យាចិន Tencent និងមានការចូលរួមពីមូលនិធិ Hillhouse Capital, Boyu Capital និង IDG Capital។ ការហៅទុនមួយទៀត ត្រូវបាននាំមុខដោយ DST Global និងមានការចូលរួមរបស់ CITICPE និងក្រុមអ្នកវិនិយោគសិង្ហបុរី ដូចជា GIC និង Temasek ជាដើម។
កាលពីដើមឆ្នាំនេះ ប្រភពព័ត៌មានមួយបានបង្ហើបឱ្យដឹងថា Yuanfudao រកចំណូលបានប្រមាណពី3ទៅ4ពាន់លានយន់ (450-600លានដុល្លារអាមេរិក) នៅក្នុងឆ្នាំ2019 និងមានគម្រោងរកចំណូលឱ្យបានជាង10ពាន់លានយន់ (1.2ពាន់លានដុល្លារ) ក្នុងឆ្នាំ2020នេះ។
នៅក្នុងកិច្ចសម្ភាសមួយកាលពីពេលថ្មីៗនេះ Li Xin ដែលជាសហស្ថាបនិករបស់ Yuanfudao បានឱ្យដឹងថា ក្រុមហ៊ុនទទួលបានចំណាប់អារម្មណ៍យ៉ាងខ្លាំងពីអ្នកវិនិយោគនៅក្នុងឆ្នាំ2019។ តាមរយៈការប្រមូលទុនចំនួន10លើក មកដល់ពេលនេះ Yuanfudao មានទុនក្នុងដៃជិត4ពាន់លានដុល្លារអាមេរិក។
Gloria Tam ដែលជាសមាជិកនៃគម្រោងអប់រំ Minerva Project របស់សហរដ្ឋអាមេរិក បានពន្យល់ថា Covid-19 បានធ្វើឱ្យមានបញ្ហារអាក់រអួលនៅគ្រប់វិស័យ ហើយវាក៏ជាកត្តាជំរុញមួយដែលនាំឱ្យក្រុមអ្នករកស៊ីខាងអប់រំក្នុងពិភពលោក នាំគ្នាស្វែងរកវិធីសាស្ត្រថ្មី។
“ជាមួយនឹងបច្ចេកវិទ្យា5G ដែលកាន់តែរីកចម្រើននៅក្នុងបណ្ដាប្រទេសដូចជាចិន សហរដ្ឋអាមេរិក និងជប៉ុនជាដើម សិក្ខាកាម និងក្រុមអ្នកផ្ដល់សេវាអប់រំនឹងទទួលស្គាល់យ៉ាងប្រាកដទៅលើនិយមន័យ “រៀននៅទីណាក៏បាន ពេលណាក៏បាន”” អ្នកស្រី Gloria Tam និយាយដូច្នេះ។
កាលពីខែកុម្ភៈ ប្រទេសចិនបានចាប់ផ្ដល់ប្រើប្រាស់កម្មវិធីសិក្សាតាមអនឡាញថ្នាក់ជាតិ ដោយមានថ្នាក់រៀនដែលត្រូវបានផ្សាយតាមទូរទស្សន៍សម្រាប់សិស្សបឋម និងប្រព័ន្ធបញ្ជូនទិន្នន័យតាមរយៈបច្ចេកវិទ្យា Cloud Computing សម្រាប់សិស្សមធ្យមសិក្សា។ កម្មវិធីនេះត្រូវបានរដ្ឋមន្ត្រីក្រសួងអប់រំចិននិយាយថា នឹងជួយដល់សិស្សចំនួន180លាននាក់ អាចបន្តការសិក្សា បើទោះសាលានានាត្រូវបិទទ្វារ។
នៅឯទីក្រុងហុងកុងវិញ សិស្សចំនួន900,000នាក់ក៏ត្រូវរៀនតាមអនឡាញ ចាប់តាំងពីរដ្ឋបានបិទទ្វារសាលាជាបណ្ដោះអាសន្នដោយសារតែបញ្ហាCovid-19។
នៅទូទាំងពិភពលោក បទបញ្ជាហាមជួបជុំ បំរាមគោចរ និងវិធានការទប់ស្កាត់ការឆ្លងវីរុសCovid-19 នានា ត្រូវបានធ្វើឡើងជាបន្តបន្ទាប់ ធ្វើឱ្យស្ថាប័នអប់រំ និងសិស្ស នាំគ្នាងាកមកប្រើប្រាស់កម្មវិធីបង្រៀននិងរៀនតាមអនឡាញ ពិសេសគឺនៅក្នុងបណ្ដាប្រទេសរីកចម្រើន ដូចជាសហរដ្ឋអាមេរិក ចិន កូរ៉េខាងត្បូង អ៊ីតាលី និងអ៊ីរ៉ង់។ល។
ប្រភព៖ Reuters,Thestar
October 23, 2020
អតីតគ្រូបង្រៀនផ្នែកគីមីនៅសាលាមធ្យមសិក្សា ក្លាយជាមហាសេដ្ឋិនីលេខមួយក្នុងទ្វីបអាស៊ីដែលបានប្រឹងប្រែងពីបាតដៃទទេ
នៅមុនពេល Zhong Huijuan បានក្លាយជាមហាសេដ្ឋិនីលេខមួយនៅអាស៊ីដែលបានងើបឡើងពីបាតដៃទទេ លោកស្រីក៏ធ្លាប់ជាគ្រូបង្រៀនផ្នែកគីមីវិទ្យាម្នាក់នៅសលាវិទ្យាល័យ។
លោកស្រី Zhong Huijuan គឺជាស្ថាបនិក ជាភាគហ៊ុនិកធំជាងគេ និងជាប្រធាននៃក្រុមហ៊ុនផលិតឱសថរបស់ចិន ឈ្មោះ Hansoh Pharmaceutical ដែលមានជំនាញខាងស្រាវជ្រាវ និងអភិវឌ្ឍថ្នាំព្យាបាលជំងឺប្រព័ន្ធប្រសាទកណ្ដាល មហារីក ទឹកនោមផ្អែម ក៏ដូចជាថ្នាំដែលទាក់ទងនឹងបញ្ហាប្រព័ន្ធរំលាយអាហារ និងបេះដូង។ល។
លោកស្រី Zhong Huijuan កើតឆ្នាំ1961 និងទទួលបានសញ្ញាបត្រផ្នែកគីមីវិទ្យាពីមហាវិទ្យាល័យគរុកោសល្យ Jiangsu (Jiangsu University) ហើយក៏បានក្លាយជាគ្រូបង្រៀនម្នាក់នៅក្នុងសាលាមធ្យមសិក្សាមួយនៅតំបន់ Lianyunggang បន្ទាប់ពីបានបញ្ចប់ការសិក្សា។ ស្វាមីរបស់លោកស្រី គឺលោក Sun Piaoyang ធ្វើការនៅក្នុងរោងចក្រផលិតឱសថមួយរបស់រដ្ឋដែលមានទីតាំងក្នុងតំបន់ជាមួយនឹងលោកស្រី។
ឆ្នាំ1995 លោកស្រី Zhong បានឈប់បង្រៀន រួចក៏បានបង្កើតក្រុមហ៊ុន Jiangsu Hansoh Pharmaceutical ដោយមានបុគ្គលិក10នាក់។ ក្រុមហ៊ុននេះបានរីកចម្រើនយ៉ាងឆាប់រហ័ស និងរកបានចំណូល4.5លានដុល្លារអាមេរិកកាលពីឆ្នាំ1997។ ក្រោយមក ក្រុមហ៊ុនក៏បានបង្កើតរោងចក្រផលិតឱសថដំបូងរបស់ខ្លួននៅក្នុងឆ្នាំ2000។ មកដល់ឆ្នាំ2016 Hansoh ទទួលបានខ្ទង់វិនិយោគពី Hillhouse Capital Group ដែលជាក្រុមហ៊ុនល្បីឈ្មោះជាងគេមួយនៅអាស៊ី។
មុនពេលត្រូវបានដាក់ចូលផ្សារហ៊ុន ក្រុមហ៊ុន Hansoh ប្រមូលបានទុន334លានដុល្លារអាមេរិកពីក្រុមហ៊ុនវិនិយោគចំនួន9 ក្នុងនោះមានមូលនិធិវិនិយោគជាតិរបស់សិង្ហបុរី GIC និងក្រុមហ៊ុន Boyu Capital របស់ចិនដីគោកផងដែរ។ នៅពេលបានឡើងផ្សារហ៊ុន Hong Kong កាលពីរដូវក្ដៅឆ្នាំ2019 ក្រុមហ៊ុនរបស់លោកស្រី Zhong ក៏ប្រមូលទុនបាន1ពាន់លានដុល្លារអាមេរិក ជួយឱ្យតម្លៃទីផ្សាររបស់ក្រុមហ៊ុននេះ ឡើងដល់10ពាន់លានដុល្លារអាមេរិក។ បន្ទាប់ពីថ្ងៃជួញដូរមូលបត្រដំបូងរបស់ Hansoh លោកស្រី Zhong បានក្លាយជាមហាសេដ្ឋិនីលំដាប់លេខ1នៅក្នុងទ្វីបអាស៊ីដែលរកស៊ីមានបានពីបាតដៃទទេ ដោយបច្ចុប្បន្ន ទ្រព្យសរុបរបស់លោកស្រី បានឡើងដល់10.5ពាន់លានដុល្លារអាមេរិក។
ស្វាមីរបស់លោកស្រី Zhong គឺលោក Sun Piaoyan បច្ចុប្បន្នក៏ជាមហាសេដ្ឋីម្នាក់នៅក្នុងវិស័យឱសថ ដោយមានទ្រព្យចំនួន35.2ពាន់លានដុល្លារ។ ដូច្នេះ គូស្វាមីភរិយានេះ កំពុងកាប់កាន់ទ្រព្យសរុបឡើងដល់ជាង54ពាន់លានដុល្លារអាមេរិក។ នេះបើតាមការស្រាវជ្រាវ និងវាយតម្លៃដោយទស្សនាវដ្ដី Forbes៕
ប្រភព៖ Forbes
October 23, 2020