Author: សឿន សំណាង

(Updating) Biden 238សំឡេង ទល់នឹង Trump 213សំឡេង
Biden ទើបតែដណ្ដើមបានសំឡេងឆ្នោតគាំទ្រចំនួន10សំឡេងបន្ថែមទៀតនៅក្នុងរដ្ឋ Minnesota ធ្វើឱ្យសំឡេងឆ្នោតគាំទ្រដែលលោកមានក្នុងដៃ កើនដល់238សំឡេង។ រីឯលោក Trump វិញក៏បានឈ្នះនៅក្នុងរដ្ឋ Montana ដូច្នេះ សំឡេងឆ្នោតគាំទ្ររបស់លោកក៏បានកើនឡើងដល់213សំឡេង។
– Trump ឈ្នះនៅក្នុងរដ្ឋ៖ Alabama, Kentucky, Tennessee, Oklahoma, Arkansas, Mississippi, Virginia ខាងលិច, Indiana, Missouri, Carolina ខាងត្បូង, Lousiana, Dakota ខាងត្បូង, Dakota ខាងជើង, Wyoming, Nebraska, Kansas, Utah, Idaho, Florida, Ohio, Texas, Iowa, Montana។
– Biden ឈ្នះនៅក្នុងរដ្ឋ៖ Illinois, New Jersey, Virginia, Massachusetts, Connecticut, Rhode Island, Washington DC, Delaware, Vermont, New Mexico, New York, Colorado, Washington D.C, New Hampshire, Oregon, California, Arizona, New Mexico, Hawaii, Minnesota។
បណ្ដារដ្ឋដែលមានសំឡេងឆ្នោតច្រើនជាងគេ មានដូចជា Texas (38 សំឡេង), Ohio (18), Georgia (16), Carolina ខាងជើង (15)។
សូមបញ្ជាក់ថា ដើម្បីបានជាប់ឆ្នោតជាប្រធានាធិបតី បេក្ខភាពនីមួយៗត្រូវការសំឡេងឆ្នោតគាំទ្រយ៉ាងតិច270សំឡេងពីប្រតិភូតំណាងម្ចាស់ឆ្នោតមកពីបណ្ដារដ្ឋនៅទូទាំងប្រទេស។
November 4, 2020
Trump ឡើងដល់148សំឡេង ខណៈ Biden 207សំឡេង
លោក Trump ទើបតែបានឈ្នះនៅ Florida ដណ្ដើមបាន148សំឡេងគាំទ្រពីប្រតិភូតំណាងម្ចាស់ឆ្នោត ក្នុងគ្រាដែលលោក Biden បានឈ្នះនៅក្នុងរដ្ឋចំនួន14 និងរដ្ឋធានីវ៉ាស៊ីងតោន និងដណ្ដើមបានសន្លឹកឆ្នោត207សំឡេង។
លទ្ធផលមុននេះបង្ហាញថា លោក Trump បានឈ្នះនៅ Florida ដែលជារដ្ឋយុទ្ធសាស្ត្រ ចំណែកលោក Biden ដណ្ដើមបានសន្លឹកឆ្នោត55សន្លឹកបន្ថែមទៀតពីប្រតិភូតំណាងម្ចាស់ឆ្នោតនៅ California។
– Trump ឈ្នះនៅក្នុងរដ្ឋ៖ Alabama, Kentucky, Tennessee, Oklahoma, Arkansas, Mississippi, Virginia ខាងលិច, Indiana, Missouri, Carolina ខាងត្បូង, Lousiana, Dakota ខាងត្បូង, Dakota ខាងជើង, Wyoming, Nebraska, Kansas, Utah, Idaho, Florida។
– Biden ឈ្នះនៅក្នុងរដ្ឋ៖ Illinois, New Jersey, Virginia, Massachusetts, Connecticut, Rhode Island, Washington DC, Delaware, Vermont, New Mexico, New York, Colorado, New Hampshire, Oregon, California។
November 4, 2020
Biden ឈ្នះបាន 207សំឡេង ខណៈ Trump បាន 119សំឡេង
លោក Trump បានឈ្នះនៅក្នុងរដ្ឋចំនួន18 និងដណ្ដើមបាន119សំឡេងឆ្នោតគាំទ្រពីប្រតិភូតំណាងម្ចាស់ឆ្នោត ខណៈដែលលោក Biden បានឈ្នះនៅក្នុងរដ្ឋចំនួន16 និងរដ្ឋធានីវ៉ាស៊ីងតោន ដណ្ដើមបានសន្លឹកឆ្នោតគាំទ្រ207សំឡេង។
– Trump ឈ្នះនៅក្នុងរដ្ឋ៖ Alabama, Kentucky, Tennessee, Oklahoma, Arkansas, Mississippi, Virginia ខាងលិច, Indiana, Missouri, Carolina ខាងត្បូង, Lousiana, Dakota ខាងត្បូង, Dakota ខាងជើង, Wyoming, Nebraska, Kansas, Utah
– Biden ឈ្នះនៅក្នុងរដ្ឋ៖ Illinois, New Jersey, Virginia, Massachusetts, Connecticut, Rhode Island, Washington DC, Delaware, Vermont, New Mexico, New York, Colorado, Washington D.C, New Hampshire
November 4, 2020
ទិដ្ឋភាពប្លែកៗនៅខាងក្នុងនិងក្រៅការិយាល័យបោះឆ្នោតនៅសហរដ្ឋអាមរិក
ក្នុងថ្ងៃទី3វិច្ឆិកា2020 ពលរដ្ឋអាមេរិកាំងរាប់លាននាក់ បានទៅបោះឆ្នោតជ្រើសរើសប្រធានាធិបតី និងសភាជាតិសម្រាប់អាណត្តិ4ឆ្នាំខាងមុខ។ ការបោះឆ្នោតលើកនេះ មណ្ឌលបោះឆ្នោតមួយចំនួនត្រូវបានដាក់នៅក្នុងទីតាំងដ៏ចម្លែកៗ មានដូចជា បន្ទប់បោះឆ្នោតនៅក្នុងហាងបោកគក់ខោអាវ ហាងស្រា និងវិហារអ៊ីស្លាម។ល។
ខាងក្រោមនេះគឺជាទិដ្ឋភាពប្លែកៗ នៅជុំវិញ និងក្នុងការិយាល័យបោះឆ្នោតនៅសហរដ្ឋអាមេរិក៖
ហាងបោកគក់សម្លៀកបំពាក់ Su Nueva Lavanderia នៅ Chicago
នៅក្នុងស្ថានីយនៃកងពន្លត់អគ្គិភ័យមួយនៅVirginia
ក្នុងហាងស្រាមួយនៅ Calfornia
បន្ទប់បោះឆ្នោតនៅក្នុងហាងស្រា និងកន្លែងលេងប៊ីយ៉ា
ក្នុងសាលមហោស្រពLos នៅ Angeles, California
នៅឯ Azusa, California បន្ទប់បោះឆ្នោតត្រូវបានដាក់ក្នុងវិហារអ៊ីស្លាម Masjid Al-Fatiha
ម្ចាស់ឆ្នោតម្នាក់ ជិះសេះទៅបោះឆ្នោតនៅក្នុងតំបន់ Houston, Texas
មនុស្សភេទទីបីម្នាក់កំពុងសម្ដែងនៅចំពោះមុខម្ចាស់ឆ្នោតនៅក្នុងបារ Buddy’s Houston រដ្ឋ Texas។ នេះគឺជាមណ្ឌលបោះឆ្នោតប្រធានាធិបតីដំបូងគេក្នុងលោកដែលត្រូវបានដាក់នៅក្នុងបារសម្រាប់ក្រុមមនុស្សភេទទីបី។
បន្ទប់បោះឆ្នោតនៅក្នុងហាងសម្លៀកបំពាក់ Scelebrations Fashion នៅទីក្រុង Chicago រដ្ឋ Illinois
ម្ចាស់ឆ្នោតនាំគ្នាឈរជាលំដាប់លំដោយនៅខាងក្រៅមណ្ឌលបោះឆ្នោតនៅក្នុងវិហារ Oklahoma
ក្រុមតន្ត្រីកំពុងប្រគុំនៅខាងក្រៅការិយាល័យបោះឆ្នោត នៅ Houston, Texas
ក្រុមស្ម័គ្រចិត្ត កំពុងចែកអាហារដោយមិនគិតថ្លៃដល់អ្នកបោះឆ្នោតនៅ Durham, North Carolina
ប្រភព៖ Reuters, AFP, EPA, Getty
November 4, 2020
Trump ទទួលបាន107សំឡេង ចំណែក Biden បាន121សំឡេង ពីប្រតិភូតំណាងម្ចាស់ឆ្នោត
លោក Donald Trump ឈ្នះនៅក្នុងរដ្ឋចំនួន16 ដណ្ដើមបាន107សំឡេងគាំទ្រពីប្រតិភូតំណាងម្ចាស់ឆ្នោត ក្នុងពេលដែលលោក Joe Biden ឈ្នះនៅក្នុងរដ្ឋចំនួន12 និងរដ្ឋធានីវ៉ាស៊ីងតោន ដណ្ដើមបានសន្លឹកឆ្នោតគាំទ្រចំនួន121សំឡេង។
-ការបោះឆ្នោតប្រព្រឹត្តទៅដោយរលូន និងមិនមានបញ្ហាអ្វីកើតឡើងទេ។
-លោក Trump បានឈ្នះនៅក្នុងរដ្ឋ៖ Alabama, Kentucky, Tennessee, Oklahoma, Arkansas, Mississippi, Virginia ខាងលិច, Indiana, Missouri, Carolina ខាងត្បូង, Lousiana, Dakota ខាងត្បូង, Dakota ខាងជើង, Wyoming, Nebraska, Kansas
-លោក Biden បានឈ្នះនៅក្នុងរដ្ឋ៖ Illinois, New Jersey, Virginia, Massachusetts, Connecticut, Rhode Island, Washington DC, Delaware, Vermont, New Mexico, New York, Colorado, Washington D.C។
November 4, 2020
Biden បានឈ្នះ121សំឡេង ខណៈ Trump ឈ្នះ101សំឡេង ពីប្រតិភូតំណាងម្ចាស់ឆ្នោត
លោក Donald Trump បានទទួលជ័យជំនះនៅក្នុងរដ្ឋចំនួន15 ដោយដណ្ដើមបានសំឡេងគាំទ្ររបស់ក្រុមប្រតិភូតំណាងម្ចាស់ឆ្នោតចំនួន101សំឡេង ចំណែកលោក Joe Biden ដណ្ដើមបានជ័យជំនះនៅក្នុងរដ្ឋចំនួន12 និងរដ្ឋធានីវ៉ាស៊ីងតោន ដោយទទួលបានសំឡេងគាំទ្រពីក្រុមប្រតិភូតំណាងម្ចាស់ឆ្នោតចំនួន121សំឡេង។
ការបោះឆ្នោតប្រព្រឹត្តទៅដោយរលូន និងមិនមានបញ្ហាអ្វីកើតឡើងទេ។
-លោក Trump បានឈ្នះនៅក្នុងរដ្ឋ៖ Alabama, Kentucky, Tennessee, Oklahoma, Arkansas, Mississippi, Virginia ខាងលិច, Indiana, Missouri, Carolina ខាងត្បូង, Lousiana, Dakota ខាងត្បូង, Dakota ខាងជើង, Wyoming, Nebraska
-លោក Biden បានឈ្នះនៅក្នុងរដ្ឋ៖ Illinois, New Jersey, Virginia, Massachusetts, Connecticut, Rhode Island, Washington DC, Delaware, Vermont, New Mexico, New York, Colorado, Washington D.C។
November 4, 2020
សហរដ្ឋអាមេរិក ”បើកភ្លើងខៀវ” សម្រាប់ការលក់អាវុធថ្មីមួយទៀតទៅឱ្យតៃវ៉ាន់ ដែលមានតម្លៃ600លានដុល្លារ
អាជ្ញាធររបស់ប្រធានាធិបតីអាមេរិក លោក Donald Trump បាន “បើកភ្លើងខៀវ” សម្រាប់ការលក់អាវុធជាយន្តហោះគ្មានមនុស្សបើក (UAV) ដែលមានតម្លៃ600លានដុល្លារទៅឱ្យកោះតៃវ៉ាន់។
ពីមន្ទីរបញ្ចកោណ កាលពីថ្ងៃទី3វិច្ឆិកា ក្រសួងការបរទេសអាមេរិក បានអនុម័តយល់ព្រមលក់យន្តហោះគ្មានមនុស្សបើក UAV MQ-9 ទៅឱ្យកោះតៃវ៉ាន់ និងបានបញ្ជូនសេចក្ដីប្រកាសផ្លូវការឡើងទៅកាន់សភាអាមេរិកដើម្បីធ្វើការសម្រេចចិត្តចុងក្រោយ។ នេះត្រូវបានគេចាត់ទុកថាជាដំណាក់កាលចុងក្រោយ មុនពេលទីក្រុងវ៉ាស៊ីងតោន បិទបញ្ចប់ការលក់អាវុធតម្លៃ600លានដុល្លារទៅឱ្យកោះតៃវ៉ាន់នៅក្នុងលើកនេះ។
សភាអាមេរិកនឹងមានពេល30ថ្ងៃ រាប់ចាប់ពីថ្ងៃដែលបានប្រកាសជូនដំណឹង ដើម្បីជំទាស់នឹងការលក់អាវុធនេះ។ ក៏ប៉ុន្តែ ក្រុមអ្នកឃ្លាំមើលអះអាងថា ជំនួញនេះនឹងទទួលបានការគាំទ្រពីតំណាងរាស្ត្រនៃគណបក្សទាំងពីរក្នុងសភា ដើម្បីជួយឱ្យតៃវ៉ាន់បង្កើនសមត្ថភាពការពារខ្លួន។
យន្តហោះគ្មានមនុស្សបើក MQ-9 ចំនួន4គ្រឿងដែលនឹងត្រូវលក់ទៅឱ្យតៃវ៉ាន់នេះ គឺជាផលិតផលរបស់ក្រុមហ៊ុន General Atomic Aeronautical System។ ក្រៅពីយន្តហោះ ប្រភេទ UAV ការជួញដូរអាវុធលើកនេះក៏រួមមានទាំងស្ថានីយបាញ់បង្ហោះនៅលើដី គ្រឿងបន្លាស់ និងសកម្មភាពហ្វឹកហាត់ផងដែរ។ MQ-9 អាចបំពាក់អាវុធ និងឧបករណ៍តាមដានសត្រូវ។
មុននេះ សារព័ត៌មាន Reuters បានដកស្រង់ប្រភពព័ត៌មានរបស់ខ្លួន ឱ្យដឹងថា រដ្ឋាភិបាលលោក Trump បានយល់ព្រមទៅលើការលក់អាវុធចំនួន4ករណីផ្សេងៗគ្នាទៅឱ្យកោះតៃវ៉ាន់ ដែលមានតម្លៃសរុប ឡើងដល់5ពាន់លានដុល្លារអាមេរិក នៅក្នុងគ្រាដែលសហរដ្ឋអាមេរិកសម្ដែងការព្រួយបារម្ភអំពីស្ថានការណ៍សន្តិសុខរបស់កោះតៃវ៉ាន់។
កាលពីថ្ងៃទី21តុលា ក្រសួងការបរទេសអាមេរិក បានផ្ញើសេចក្ដីប្រកាសអំពីការយល់ព្រមលក់អាវុធដ៏ធំមួយទៅឱ្យកោះតៃវ៉ាន់ ឡើងទៅកាន់សភាជាតិអាមេរិក ដោយក្នុងនោះមានដូចជាប្រព័ន្ធជើងទម្រសម្រាប់បាញ់រ៉ុកកែតពីរថយន្ត ដែលត្រូវបានផលិតដោយក្រុមហ៊ុន Lockheed Martin ប្រព័ន្ធគ្រាប់រ៉ុកកែត និងវិញ្ញាណសិប្បនិម្មិតសម្រាប់បំពាក់លើយន្តហោះចម្បាំង F-16 ។ល។
ថ្ងៃទី26តុលា អាមេរិកបន្ត “បើកភ្លើងខៀវ” មួយទៀត សម្រាប់ការលក់កាំជ្រួចប្រឆាំងនាវាពិឃាត Harpoon ទៅឱ្យតៃវ៉ាន់។
ប្រទេសចិន ចាត់ទុកកោះតៃវ៉ាន់ថាជាផ្នែកមួយនៃទឹកដីដែលមិនអាចកាត់ផ្ដាច់បានរបស់ខ្លួន និងបានប្រកាសជាញឹកញាប់ថានឹងច្របាច់បញ្ចូលកោះនេះមកក្នុងប្រទេសចិនឱ្យខាងតែបាន បើទោះជាត្រូវប្រើប្រាស់កម្លាំងបាយក៏ដោយ។
សហរដ្ឋអាមេរិកមិនមានទំនាក់ទំនងការទូតផ្លូវការជាមួយនឹងកោះតៃវ៉ាន់ទេ ប៉ុន្តែទីក្រុងវ៉ាស៊ីងតោនគឺជាដៃគូពាណិជ្ជកម្មនិងយោធាសំខាន់របស់កោះនេះ។ តៃវ៉ាន់ក៏ជាបញ្ហាចម្រូងចម្រាសខ្លាំងនៅក្នុងចំណោមបញ្ហាធំៗដែលធ្វើឱ្យទំនាក់ទំនងរវាងចិន-អាមេរិកជួបប្រទះភាពតានតឹង។
កាលពីថ្ងៃទី27តុលា ប្រទេសចិនបានស្នើឱ្យសហរដ្ឋអាមេរិកបញ្ឈប់ការលក់អាវុធទៅឱ្យតៃវ៉ាន់ និងបញ្ចប់ទំនាក់ទំនងយោធារវាងទីក្រុងវ៉ាស៊ីងតោន និងទីក្រុងតៃប៉ិផងដែរ៕
ប្រភព៖ Reuters
November 4, 2020
Trump ដណ្ដើមបាន82សំឡេង ខណៈ Biden ដណ្ដើមបាន78សំឡេងនៃប្រតិភូតំណាងម្ចាស់ឆ្នោត
លោក Donald Trump ទទួលបានជ័យជំនះនៅក្នុងរដ្ឋចំនួន10 ដោយទទួលបាន82សំឡេងគាំទ្រពីក្រុមប្រតិភូតំណាងម្ចាស់ឆ្នោត ក្នុងគ្រាដែលលោក Joe Biden ទទួលជ័យជំនះនៅក្នុងរដ្ឋចំនួន9 ដែលមាន78សំឡេង។
ការបោះឆ្នោតបានប្រព្រឹត្តិទៅដោយរលូន មិនមានបញ្ហាអ្វីធំដុំកើតឡើងឡើយ។
លោក Trump មានគម្រោងតាមដានលទ្ធផលនៃការបោះឆ្នោតពីបន្ទប់ស្លាបខាងស្ដាំនៃសេតវិមាន។
ចំណែកលោក Biden វិញ មានប្រសាសន៍ថា លោកមិនមានគម្រោងប្រតិកម្មអ្វីនោះទេ បើសិនជាលោក Trump ប្រកាសជ័យជំនះមុនលទ្ធផលចុងក្រោយ។
November 4, 2020
ការបោះឆ្នោតអាមេរិក2020! ទីក្រុង New York រកឃើញសន្លឹកឆ្នោតរបស់ “ខ្មោច”
នៅក្នុងការបោះឆ្នោតជ្រើសរើសប្រធានាធិបតីអាមេរិកលើកនេះ ទីក្រុង New York បានរកឃើញសន្លឹកឆ្នោតមួយចំនួនរបស់ម្ចាស់ឆ្នោតដែលបានស្លាប់តាំងតែពីយូរយារមកហើយ ដែលនេះត្រូវបានគេចោទជាសំណួរថា “តើពិតជាមានការបន្លំសន្លឹកឆ្នោតដែរ ឬយ៉ាងណា?”។
សារព័ត៌មាន New York Post បានដកស្រង់ប្រភពព័ត៌មានឱ្យដឹងថា សន្លឹកឆ្នោតអវត្តមានម្ចាស់ឆ្នោតមួយចំនួនដែលបានផ្ញើមកកាន់ គជបនៃទីក្រុង New York របស់សហរដ្ឋអាមេរិក មានទាំងឈ្មោះរបស់ម្ចាស់ឆ្នោតដែលបានស្លាប់ទៅហើយផងដែរ។ ទាក់ទងនឹងបញ្ហានេះ គជបអាមេរិកនៃទីក្រុង New York បានទទួលសន្លឹកឆ្នោតអវត្តមានរបស់អ្នកស្រី Frances Reckhow ដែលគាំទ្របក្សប្រជាធិបតេយ្យ និងរស់នៅលើកោះ Staten កាលពីថ្ងៃទី6តុលា ហើយថ្ងៃទី8តុលា ត្រូវបានប្រកាសថា ជាសន្លឹកឆ្នោតបានការ។
ក៏ប៉ុន្តែ មានបញ្ហាមួយដែលបានកើតឡើង នោះគឺថា អ្នកស្រី Frances Reckhow បានស្លាប់តាំងតែពីឆ្នាំ2012មកម៉្លេះ។
ក្រោយមក គណៈកម្មការខាងលើបានរកឃើញថា កូនស្រីឈ្មោះ Carol Huben របស់អ្នកស្រី Reckhow ដែលជាអ្នកគាំទ្ររបស់បក្សសាធារណរដ្ឋ ក៏បានចុះឈ្មោះនៅក្នុងតំបន់ដែលម្ដាយនាងបានស្លាប់។
ម្ចាស់ឆ្នោត Huben មិនទាន់មានប្រតិកម្មអ្វីទៅនឹងការចុះផ្សាយរបស់ New York Post នៅឡើយ។ ចំណែកគជបរបស់ទីក្រុង New York បានប្រកាសថា ពួកគេនឹងពិនិត្យឡើងវិញលើបញ្ហានេះ។
បោះឆ្នោតអាមេរិក2020! ទីក្រុង New York រកឃើញសន្លឹកឆ្នោតរបស់ “ខ្មោច”
ក្រៅពីករណីខាងលើ នៅមានករណីមួយស្រដៀងគ្នានេះដែរនៅទីក្រុង New York។ គជបនៅ New York បានទទួលសន្លឹកឆ្នោតរបស់ម្ចាស់ឆ្នោតដែលគាំទ្របក្សប្រជាធិបតេយ្យ ឈ្មោះ Gertrude Nizzere កើតឆ្នាំ1919។ អ្នកស្រី Nizzere បានផ្ញើសន្លឹកឆ្នោតនៅថ្ងៃទី13តុលា និងត្រូវបានទទួលស្គាល់ថាបានការនៅថ្ងៃទី25តុលា។
ក៏ប៉ុន្តែ ក្រោយពីបានពិនិត្យលើទិន្នន័យ គជបរបស់ New York បានប្រកាសជាថ្មីថា សន្លឹកឆ្នោតនេះមិនបានការ ព្រោះឯកសារបង្ហាញថា អ្នកស្រីបានស្លាប់ទៅហើយ។
តំណាងរបស់គណបក្សសាធារណរដ្ឋនៅលើកោះ Staten បានបញ្ជូនព័ត៌មានខាងលើនេះទៅឱ្យសារព័ត៌មាន New York Post ព្រមទាំងឱ្យដឹងថា ពួកគេកំពុងស្នើឱ្យប៉ូលិស និងករិយាល័យរដ្ឋអាជ្ញានៅ Staten បើកការស៊ើបអង្កេតលើករណីនេះ។
ភាគីខាងបក្សសាធារណរដ្ឋបានព្រមានអំពីសន្លឹកឆ្នោតរបស់ខ្មោច ហើយសង្ស័យថា នេះគ្រាន់តែជា “ចំណុចអណ្ដែតនៃផ្ទាំងទឹកកកតែប៉ុណ្ណោះ”។
ការក្លែងបន្លំសន្លឹកឆ្នោតដោយប្រើប្រាស់ឈ្មោះអ្នកដែលបានស្លាប់ទៅហើយ គឺជាអំពើខុសច្បាប់នៅអាមេរិក ហើយអាចប្រឈមនឹងការកាត់ទោសផងដែរ៕
ប្រភព៖ Fox News
November 3, 2020
បោះឆ្នោតអាមេរិក2020! លទ្ធផលបឋមនៃការរាប់សន្លឹកឆ្នោតដំបូងៗនៅអាមេរិក៖ កុំជឿលើលទ្ធផលបឋមឱ្យសោះ!
នៅពេលដែល Florida បានរាយការណ៍អំពីលទ្ធផលរាប់សន្លឹកឆ្នោតបឋម លោក Biden ត្រូវបានគេជឿថា ទំនងជាកំពុងនាំមុខដាច់យ៉ាងឆ្ងាយ ខណៈដែលនៅ Pennsylvania ហាក់លំអៀងទៅរកលោក Trump។
ក៏ប៉ុន្តែ ក្រុមអ្នកស្រាវជ្រាវ និងអ្នកជំនាញផ្នែកបោះឆ្នោតយល់ថា គ្រប់គ្នាមិនគួរបណ្ដោយខ្លួនឱ្យចាញ់បោកដោយសារតែព័ត៌មានស្ដីអំពីលទ្ធផលបឋមនៃការរាប់សន្លឹកឆ្នោតនេះទេ។ លទ្ធផលនេះបានបង្កើតឡើងដោយសារតែម្ចាស់ឆ្នោតនៅមូលដ្ឋានបាននាំគ្នាបោះឆ្នោតតាមរយៈការផ្ញើជាសំបុត្រក្នុងអត្រាខ្ពស់មិនធ្លាប់មាន ខណៈដែលរដ្ឋនានាមានវិធីសាស្ត្រដោះស្រាយផ្សេងគ្នាជាមួយនឹងសន្លឹកឆ្នោតទាំងនោះ។
បណ្ដារដ្ឋដែលត្រូវបានអនុញ្ញាតឱ្យរាប់សន្លឹកឆ្នោតដែលផ្ញើតាមសំបុត្រមុនថ្ងៃបោះឆ្នោត លទ្ធផលនឹងអាចលំអៀងទៅរកលោក Biden ព្រោះថា កន្លងមក ការស្ទង់មតិជាច្រើន រួមនឹងទិន្នន័យទាក់ទងនឹងការបោះឆ្នោតមុនកាលកំណត់បង្ហាញថា ម្ចាស់ឆ្នោតដែលបោះឆ្នោតតាមការផ្ញើសំបុត្រ ភាគច្រើនគាំទ្របក្សប្រជាធិបតេយ្យ។
ផ្ទុយមកវិញ នៅក្នុងបណ្ដារដ្ឋដែលមិនបានរាប់សន្លឹកឆ្នោតដែលបោះតាមការផ្ញើសំបុត្ររហូតដល់ថ្ងៃទី3វិច្ឆិកានេះ សន្លឹកទាំងនោះនឹងត្រូវការវិធីសាស្ត្រច្រើនក្នុងការចាត់ការ ដូច្នេះសន្លឹកឆ្នោតដែលបោះផ្ទាល់ក្នុងថ្ងៃបោះឆ្នោតនេះតែងត្រូវបានរាប់បានមុន។ ជាមួយនឹងវិធីនេះ លទ្ធផលដំបូងនៅក្នុងបណ្ដារដ្ឋខាងលើនេះ អាចលំអៀងទៅរកលោក Trump។
ខាងលើនេះត្រូវបានគេហៅថា “រលកស្រមោលក្រហម” និង “រលកស្រមោលខៀវ” ដែលជាពណ៌របស់បក្សសាធារណរដ្ឋ និងបក្សប្រជាធិបតេយ្យ ដែលជាសញ្ញាដំបូងប្រាប់ថា បេក្ខភាពណាមានប្រៀបជាង រវាងលោក Donald Trump និងលោក Joe Biden នៅក្នុងការបោះឆ្នោតម៉ោងដំបូងៗ ក្រោយពីមណ្ឌលបោះឆ្នោតត្រូវបានបិទ។ ដូច្នេះហើយបានជាក្រុមអ្នកវិភាគយល់ថា មិនគួរចាញ់បោកលទ្ធផលនៃការរាប់សន្លឹកឆ្នោតបឋមនោះឡើយ៕
ប្រភព៖ Reuters
November 3, 2020