Author: សឿន សំណាង

សភាប្រជាជនកំពូលកូរ៉េខាងជើង(Supreme People’s Assembly) បានចេញច្បាប់ ហាមការជក់បារីនៅតាមទីសាធារណៈមួយចំនួន ដើម្បីឱ្យពលរដ្ឋ មាន “សភាពបរិស្ថាន ដែលអំណោយផលល្អដល់ការរស់នៅ​ យ៉ាងមានអនាម័យ”

ទីភ្នាក់ងារព័ត៌មាន KCNA បានរាយការណ៍នៅថ្ងៃនេះ(ទី5 វិច្ឆិកា)ថា ច្បាប់ហាមជក់បារីនេះ មានគោលបំណងដើម្បីការពារជីវិត និងសុខភាពរបស់ពលរដ្ឋកូរ៉េខាងជើង ដោយប្រើវិធានការគ្រប់គ្រងការផលិត និងលក់បារី ទាំងក្នុងន័យច្បាប់ និងសង្គម។

ច្បាប់នេះ បានកំណត់ឱ្យការជក់បារី គឺជារឿងត្រូវហាមឃាត់ នៅក្នុងទីកន្លែងប្រភេទខ្លះ ដូចជា មណ្ឌលអប់រំកម្រិតនិយមខាងនយោបាយ, រោងភាពយន្ត, រោងល្ខោន, មជ្ឈមណ្ឌលសុខភាព និងអង្គភាពការងារសាធារណសុខាភិបាលផ្សេងៗ ជាដើម។

កូរ៉េខាងជើង ជាប្រទេសដែលមានចំនួនប្រជាជនជក់បារី ហាក់ដូចជាច្រើនគួរសម គឺ 43.9% នៃចំនួនប្រជាជនទាំងអស់ក្នុងឆ្នាំ2013។ នេះបើតាមទិន្នន័យរបស់អង្គការសុខភាពពិភពលោក។

មេដឹកនៃខ្ពស់បំផុតនៃប្រទេសកូរ៉េខាងជើង លោក គីម ជុងអ៊ុន ខ្លួនឯងក៏ជាមនុស្សបៀមផ្សែង(ជក់បារីឥតឈប់) ដែលតែងតែឃើញមានរូបភាពខណៈឈរកាន់បារីនៅក្នុងដៃដូចគ្នាដែរ ហើយកាលពីឆ្នាំ2019 ក៏មានអ្នកសង្កេតឃើញលោក គីម ឈរសម្រាក ជក់បារីនៅឯស្ថានីយរថភ្លើង ក្នុងទីក្រុង ណាននីង ភាគខាងត្បូងប្រទេសចិន ក្នុងអំឡុងពេលធ្វើដំណើរទៅទីក្រុងហាណូយ របស់ប្រទេសវៀតណាម ដើម្បីប្រជុំសាមមិត លើកទី2 ជាមួយលោកប្រធានាធិបតី ដូណាល់ ត្រាំ៕

ប្រភព៖ សារព័ត៌មានរ៉យទ័រ

ដើម្បីកែប្រែស្ថានការណ៍បច្ចុប្បន្ន និងដណ្ដើមបានឱកាសជាប់ឆ្នោតជាថ្មី លោក Donald Trump ត្រូវតែឈ្នះនៅក្នុងរដ្ឋយ៉ាងតិចចំនួន4ទៀត ក្នុងនោះរួមទាំងរដ្ឋដែលកំពុងនាំមុខដោយ Joe Biden ផងដែរ។

គិតដល់ដំណាច់ថ្ងៃទី4វិច្ឆិកា (ម៉ោងនៅអាមេរិក) បេក្ខភាព Joe Biden បានទទួលសំឡេងឆ្នោតគាំទ្រពីប្រតិភូតំណាងម្ចាស់ឆ្នោតចំនួន264សំឡេង ខណៈលោក Donald Trump បានទទួល214សំឡេង។ ឱកាសជាប់ឆ្នោតមិនទាន់បានបញ្ចប់នៅឡើយទេ នៅពេលដែលរដ្ឋសំខាន់ៗមួយចំនួននៅតែបន្តរាប់សន្លឹកឆ្នោត។

សារព័ត៌មាន Guardian បានអះអាងថា បេក្ខភាពទាំងពីរនៅតែមានឱកាសដើម្បីជាប់ឆ្នោត ប៉ុន្តែ ផ្លូវទៅកាន់ជោគជ័យរបស់លោក Biden ជិតជាង និងទូលាយជាង បើធៀបនឹងផ្លូវរបស់លោក Trump។

ជាមួយនឹងសន្លឹកឆ្នោតគាំទ្រ214សំឡេង ហើយបើបូករួមទាំង3សំឡេងទៀតនៅ Alaska ដែលអាចបានទៅលើលោក Trump នោះលោកត្រូវការរកឱ្យបាន53សំឡេងទៀតពីប្រតិភូតំណាងម្ចាស់ឆ្នោត ដើម្បីជាប់ឆ្នោតជាថ្មី។ ដូច្នេះ វិធីតែមួយគត់ដែលនៅសល់របស់លោក Trump នាពេលនេះ នោះគឺត្រូវតែឈ្នះនៅក្នុងរដ្ឋទាំងឡាយដែលកំពុងរាប់សន្លឹកឆ្នោត រួមមាន រដ្ឋ Pennsylvania, North Carolina, Georgia និង Nevada ដែលជារដ្ឋមួយកំពុងលំអៀងទៅរក Joe Biden ដោយមានសំឡេងឆ្នោតប្រតិភូតំណាងម្ចាស់ឆ្នោតចំនួន6សំឡេង។ ការឈ្នះនៅក្នុងរដ្ឋទាំង4ខាងលើនេះ នឹងជួយឱ្យលោក Trump ទទួលបានសំឡេងឆ្នោត57សំឡេងបន្ថែមទៀត។

ក៏ប៉ុន្តែ ដោយនៅមានសន្លឹកឆ្នោតយ៉ាងច្រើននៅទីក្រុង Philadelphia និង Pittsburgh របស់រដ្ឋ Pennsylvania ដែលភាគច្រើនជាសំឡេងគាំទ្ររបស់បក្សប្រជាធិបតេយ្យ មិនទាន់ត្រូវបានរាប់រួចរាល់ ដូច្នេះ ការកែប្រែស្ថានការណ៍របស់លោក Trump ដូចខាងលើ គឺជាសេណារីយ៉ូមួយដ៏មហាសែនលំបាកនៅក្នុងដំណាក់កាលនេះ។

ផ្ទុយទៅវិញ បេក្ខភាព Joe Biden មានឱកាសឈ្នះច្រើនជាង ព្រោះថា លោក Biden ត្រូវការសំឡេង​ឆ្នោត​គាំទ្រ​តែ​6​សំឡេង​ទៀត​​ប៉ុណ្ណោះ គឺគ្រប់ចំនួន270សន្លឹក ដែលជាសំឡេងឆ្នោតពីប្រតិភូតំណាងម្ចាស់ឆ្នោត ដើម្បីបានក្លាយជាប្រធានាធិបតី។ និយាយរួម លោក Biden គ្រាន់តែឈ្នះនៅក្នុងរដ្ឋ Nevada (6សំឡេង) ទៀតប៉ុណ្ណោះ នឹងទទួលបានជោគជ័យក្នុងការបោះឆ្នោត ដោយមិនចាំបាច់ឈ្នះនៅក្នុងបណ្ដារដ្ឋ ដូចជា Pennsylvania, Georgia និង North Carolina នោះទេ៕

ប្រភព៖ Guardian

លោក Joe Biden កំពុងកាន់កាប់សន្លឹកឆ្នោតគាំទ្រពីពលរដ្ឋផ្ទាល់ ច្រើនជាងលោក Donald Trump ជិត 3.5លានសំឡេង ដែលនេះគឺជាកំណត់ត្រាថ្មីបំផុតមិនធ្លាប់មាននៅក្នុងប្រវត្តិសាស្ត្រនៃការបោះឆ្នោតនៅសហរដ្ឋអាមេរិក។

យោងតាម Guardian បើទោះជាការរាប់សន្លឹកឆ្នោតនៅតែត្រូវបានធ្វើបន្ត បន្តែ ជាមួយនឹងសំឡេងឆ្នោតជាង70លានសន្លឹក គិតត្រឹមថ្ងៃទី4វិច្ឆិកា (ម៉ោងនៅអាមេរិក) បេក្ខភាពមកពីបក្សប្រជាធិបតេយ្យ លោក Joe Biden បានបង្កើតកំណត់ត្រាថ្មី ក្លាយជាបេក្ខភាពប្រធានាធិបតីអាមេរិកដែលបានទទួលសន្លឹកឆ្នោតគាំទ្រច្រើនជាងគេបង្អស់ក្នុងប្រវត្តិសាស្ត្រនៃការបោះឆ្នោតនៅប្រទេសនេះ។

ទិន្នន័យថ្មីបំផុតនៅលើសារព័ត៌មាន Fox News បង្ហាញថា លោក Biden បានទទួលសំឡេងឆ្នោតគាំទ្រផ្ទាល់ពីពលរដ្ឋចំនួន 72លានសន្លឹក។

ក្នុងគ្រានេះដែរ គូបដិបក្ខរបស់លោក Biden គឺប្រធានាធិបតី Donald Trump បានទទួលសំឡេងឆ្នោតគាំទ្រផ្ទាល់ពីពលរដ្ឋត្រឹមតែ 68.5លានសន្លឹកប៉ុណ្ណោះ ដែលនេះបង្ហាញថា សន្លឹកឆ្នោតគាំទ្រលោក Trump តិចជាងលោក Biden ជិត3.5លានសំឡេង។

តួលេខខាងលើនេះ មិនទាន់រាប់បញ្ចូលទាំងសន្លឹកឆ្នោតដែលកំពុងត្រូវបានរាប់ជាបន្តបន្ទាប់នៅក្នុងរដ្ឋចំនួន5ផ្សេងទៀត គឺ Pennsylvania, North Carolina, Georgia, Nevada និង Alaska។

នៅមុនកំណត់ត្រារបស់លោក Biden បេក្ខភាពប្រធានាធិបតីអាមេរិកដែលបានទទួលសន្លឹកឆ្នោតគាំទ្រច្រើនជាងគេក្នុងប្រវត្តិសាស្ត្រ នោះគឺអតីតប្រធានាធិបតី Barack Obama។ លោក Obama បានទទួលសន្លឹកឆ្នោតគាំទ្រជិត69.5លានសន្លឹកកាលពីឆ្នាំ2018 នៅពេលដែលលោកបានផ្ដួលគូប្រជែង John McCain៕

ប្រភព៖ Guardian

បេក្ខ​ភាព​ប្រធានាធិបតី​មក​ពី​បក្ស​ប្រជាធិបតេយ្យ លោក Joe Biden មិន​ទាន់​ប្រកាស​ជោគជ័យ​របស់​ខ្លួន​នៅក្នុង​ការ​បោះ​ឆ្នោត​ជ្រើសរើស​ប្រធានាធិបតី​អាមេរិក​នៅឡើយ ប៉ុន្តែ​លោក​កំពុង​តែ​សង្ឃឹម​យ៉ាង​មុត​មាំ​លើ​លទ្ធភាព​នេះ​។

លោក​ Biden ទំនង​ជា​កំពុង​ត្រៀម​ខ្លួន​សម្រាប់​ “ការ​ធ្វើ​ដំណើរ​ចូល​កាន់កាប់​សេតវិមាន​” នា​ពេល​ដ៏ខ្លី​ខាង​មុខ ដោយ​ការ​បង្ហាញ​អំពី​គេហ​ទំព័រ​ប្រគល់​អំណាច​ថ្មី​មួយ​ដល់​សាធារណជន​។

នៅលើ​គេហទំព័រ buildbackbetter.com មាន​ឃ្លា​សរសេរ​ថា​៖ “ពលរដ្ឋ​អាមេរិកាំង​នឹង​សម្រេច​ថា​ អ្នក​ណា​នឹង​ក្លាយជា​ប្រធានាធិបតី​បន្ទាប់​។ សន្លឹក​ឆ្នោត​នៅ​តែ​កំពុង​ត្រូវ​បាន​រាប់​នៅ​ពាស​ពេញ​ផ្ទៃ​ប្រទេស​”។

ចំណែក​នៅ​លើ​គេហ​ទំព័រ​របស់​ Joe Biden វិញ គេ​ឃើញ​ថា​មាន​ការ​ចាប់​ផ្ដើម​ដោយ​ឃ្លា “Keep The Faith” (រក្សា​ការ​ជឿ​ជាក់​) និង​ខាង​ក្រោម​មាន​ឃ្លា “When all of the votes are counted, Joe Biden will be the​ next ​President of the United States” ដែល​មាន​ន័យ​ថា “នៅ​ពេល​ដែល​សន្លឹក​ឆ្នោត​ទាំងអស់​ត្រូវ​បាន​រាប់​ Joe Biden នឹង​ក្លាយ​ជា​ប្រធានាធិបតី​​បន្ទាប់​របស់​សហរដ្ឋ​អាមេរិក​”។

ប្រភព​៖ Forexlive

ក្រោយ​ពី​ចាញ់​ឆ្នោត​នៅ​ Michigan លោក​ Trump ក៏​បាន​ស្នើឱ្យ​តុលាការ​ជាន់​ខ្ពស់​ធ្វើ​អន្តរាគមន៍​នៅ​លើ​ការរាប់​សន្លឹក​ឆ្នោត​នៅ​ Pennsylvania។

លោក Trump បាន​ប្រញាប់ធ្វើពាក្យបណ្ដឹងប្រឆាំងនឹងលទ្ធផលនៅ Michigan បន្ទាប់​ពី​បេក្ខភាព Joe Biden ទទួលបានជ័យជំនះបន្ថែមនៅក្នុងរដ្ឋចំនួន2ទៀត នោះគឺ Wisconsin និង Michigan ដែលនេះបាននាំឱ្យលោកខិតចូលទៅកាន់តែជិតនឹង​គោល​ដៅ​ចុង​ក្រោយ។

ទន្ទឹម​នឹង​ការ​ប្ដឹង​ចំពោះ​រដ្ឋ​ Michigan គណៈគ្រប់​គ្រង​យុទ្ធ​នាការ​ឃោសនា​បោះ​ឆ្នោត​របស់​លោក​ Trump ក៏​បាន​ស្នើ​ឱ្យ​តុលាការ​កំពូល​ធ្វើ​អន្តរាគមន៍​​ដើម្បី​កែប្រែ​សេចក្ដី​សម្រេច​របស់​តុលា​ការ Pennsylvania ដែល​អនុញ្ញាត​ឱ្យ​ផ្ទៀង​ផ្ទាត់​សន្លឹក​ឆ្នោត​ក្រោយ​ថ្ងៃ​បោះ​ឆ្នោត​។

Pennsylvania គឺជា​រដ្ឋ​មួយ​ក្នុង​ចំណោម​រដ្ឋ​យុទ្ធ​សាស្ត្រ​ ដោយ​មាន​សំឡេង​ឆ្នោត​នៃ​ប្រតិភូតំណាង​ម្ចាស់​ឆ្នោត​ដល់​ទៅ​20​សំឡេង​។ លោក​ Trump បច្ចុប្បន្ន គឺជា​អ្នក​នាំ​មុខ​នៅក្នុង​រដ្ឋ​នេះ​ ប៉ុន្តែ មាន​ការ​ព្រួយបារម្ភ​ថា ការ​នាំ​មុខ​នេះ​នឹង​ត្រូវ​បាត់​បង់​ ក្រោយពី​ Pennsylvania បន្ត​រាប់​សន្លឹក​ឆ្នោត​ ដែល​នេះ​គឺជា​អ្វី​ដែល​បាន​កើត​ឡើង​រួច​ទៅ​ហើយ​នៅក្នុង​រដ្ឋ​​ Michigan និង​ Wisconsin។

ប្រភព៖ Fox News

បេក្ខភាព Joe Biden ទទួលបានជ័យជំនះបន្ថែមនៅក្នុងរដ្ឋចំនួន2ទៀត នោះគឺ Wisconsin និង Michigan ដែលនេះបាននាំឱ្យលោកខិតចូលទៅកាន់តែជិតនឹងគោលដៅជោគជ័យ។

ការបោះឆ្នោតជ្រើសរើសប្រធានាធិបតីអាមេរិកឆ្នាំ2020៖

TRUMP៖ 214 សំឡេង BIDEN៖ 264 សំឡេង

បេក្ខភាពរូបណាដែលរកបានសំឡេងឆ្នោតគាំទ្រយ៉ាងតិច270សំឡេងក្នុងចំណោម538សំឡេងពីប្រតិភូតំណាងម្ចាស់ឆ្នោត នឹងក្លាយជាប្រធានាធិបតីអាមរិក។

ការបោះឆ្នោតនៅសភាជាន់ខ្ពស់៖

បក្សសាធារណរដ្ឋ៖ 48 កៅអី បក្សប្រជាធិបតេយ្យ៖ 47 កៅអី

បក្សនីមួយៗត្រូវការកៅអីយ៉ាងតិច51ក្នុងចំណោម100កៅអីដើម្បីក្លាយជាសំឡេងភាគច្រើនក្នុងសភាជាន់ខ្ពស់។

ការបោះឆ្នោតនៅសភាជាន់ទាប៖

បក្សសាធារណរដ្ឋ៖ 188 កៅអី បក្សប្រជាធិបតេយ្យ៖ 203 កៅអី

បក្សនីមួយៗត្រូវការកៅអីយ៉ាងតិច218 ក្នុងចំណោម435កៅអី ដើម្បីក្លាយជាសំឡេងភាគច្រើនក្នុងសភាជាន់ខ្ពស់។

ប្រភព៖ Fox News

លទ្ធផល​បណ្ដោះ​អាសន្ន​នៃ​ការ​រាប់​សន្លឹក​ឆ្នោត​បាន​បង្ហាញ​ថា លោក Trump ទទួល​បាន​213​សំឡេង​គាំទ្រ​ពី​ប្រតិភូ​តំណាង​ម្ចាស់​ឆ្នោត​ ខណៈ​លោក​ Biden ទទួល​បាន​238​សំឡេង​។

តាម​ច្បាប់​នៃ​ការ​បោះ​ឆ្នោត ដើម្បី​បានក្លាយ​ជា​ប្រធានាធិបតី​ បេក្ខ​ភាព​ត្រូវ​តែ​មាន​​​សំឡេង​គាំទ្រ​យ៉ាង​តិច​270​សំឡេង​ក្នុង​ចំណោម​538​សំឡេង​របស់​ប្រតិភូ​តំណាង​ម្ចាស់​ឆ្នោត​។

នៅ​សភា​ជាន់​ខ្ពស់​៖ បក្សសាធារណរដ្ឋ (Trump) ទទួល​បាន​47​កៅអី ចំណែក​បក្ស​ប្រជាធិបតេយ្យ​ (Biden) បាន​46​កៅ​អី។ បក្ស​នីមួយ​ៗ​ត្រូវ​ការ​51​កៅ​អី​ក្នុង​ចំណោម​100​កៅអី​ដើម្បី​ក្លាយជា​សំឡេង​ភាគ​ច្រើន​​។

នៅ​សភា​ជាន់​ទាប​៖ បក្សសាធារណរដ្ឋ (Trump) ទទួល​បាន​170​កៅអី ចំណែក​បក្ស​ប្រជាធិបតេយ្យ​ (Biden) បាន​175​កៅ​​អី។ បក្ស​នីមួយ​ៗ​ត្រូវ​ការ​218​​កៅ​អី​ក្នុង​ចំណោម​435​​កៅអី​ដើម្បី​បាន​ក្លាយជា​សំឡេង​ភាគ​ច្រើន​​។

ប្រភព​៖ Fox News

ប្រធានាធិបតី​ Donald Trump ថ្លែង​ការណ៍​​ពី​សេត​វិមាន​នៅ​ព្រឹកព្រលឹម​ថ្ងៃទី​4​វិច្ឆិកា បន្ទាប់​ពី​សន្យា​ថានឹង “ឈ្នះ​ធំ”។

លោក Trump បាន​សរសើរ​ទៅ​លើ​ជ័យ​ជំនះ​របស់ខ្លួន​នៅ​ក្នុង​បណ្ដា​រដ្ឋ​ ព្រម​ទាំង​បាន​ចោទ​ប្រកាន់​ថា ការ​បោះ​ឆ្នោត​នេះ​មាន​ការ​លួច​បន្លំ​សន្លឹក​ឆ្នោត​។ លោក​ថា “នេះ​គឺ​ជា​អំពើ​លួច​បន្លំ​ទៅ​លើ​សាធារណជន​អាមរិកាំង​។ នេះ​គឺ​ជា​ភាព​អាម៉ាស់​ចំពោះ​ប្រទេស​ជាតិ​របស់​យើង​”។

នៅ​ក្នុង​សេចក្ដី​ថ្លែង​ការណ៍​​នេះ លោក​ Trump បាន​ថ្លែង​ដែរ​ថា “យើង​បាន​ទទួល​ជ័យ​ជំនះ​ក្នុងការ​បោះ​ឆ្នោត​នេះ​”។

លោក​ Trump ក៏​បាន​ប្រកាស​ថា​នឹង​ដាក់​ពាក្យ​ប្ដឹង​ទៅ​កាន់​តុលាការ​កំពូល​ទាក់​ទង​នឹង​ការ​លួច​បន្លំ​សន្លឹក​ឆ្នោត​​។ លោក​ថា “យើង​ចង់​ឱ្យ​ផ្អាក​រាល់​កិច្ច​ការ​ដែល​ទាក់​ទិន​នឹង​ការ​រាប់​ និង​ពិនិត្យ​សន្លឹក​ឆ្នោត​”។

លោក​ថ្លែង​ដូច្នេះ ទំនង​ជា​ចង់​បញ្ឈប់​ការ​រាប់​សន្លឹក​ឆ្នោត​ដែល​បោះ​តាម​ប្រៃសណីយ៍ ដែល​ត្រូវ​បាន​គណៈកម្មការ​រៀប​ចំ​ការ​បោះ​ឆ្នោត​ទទួល​ស្គាល់​បន្ទាប់​ពី​ថ្ងៃ​បោះ​ឆ្នោត​បាន​បញ្ចប់ ឱ្យ​តែ​សន្លឹក​ឆ្នោតទាំង​នោះ​​ត្រូវ​បាន​ផ្ញើ​មក​តាម​ពេល​ដែល​បាន​កំណត់​។

NBC News

ការប៉ះទង្គិចគ្នាដោយការរុញច្រានរវាងក្រុមបាតុករ Black Lives Matter ជាមួយនឹងក្រុមគាំទ្ររបស់លោក Trump នៅខាងក្រៅសេតវិមានបានផ្ទុះឡើង បើទោះជាមានវត្តមានរបស់កងកម្លាំងប៉ូលិសក៏ដោយ។

ក្រុមបាតុករ Black Lives Matter (BLM-ជីវិតរបស់ជនស្បែកខ្មៅក៏សំខាន់) បានខឹងយ៉ាងខ្លាំងនៅពេលដែលមានមនុស្សម្នាក់ដែលប្រឆាំងនឹងពួកគេបានស្រែកឡើងថា “ជីវិតរបស់ជនសម្បុរណាក៏សំខាន់ដែរ ជនស្បែកសក៏សំខាន់”។

វីដេអូមួយបង្ហាញថា មនុស្សម្នាក់ដែលបានធ្វើឱ្យក្រុមបាតុករស្បែកខ្មៅខឹងខាងលើ បាននិយាយគ្នាជាមួយនឹងក្រុមបាតុករនៅមុនពេលត្រូវរុញច្រានខ្ទប់ទៅនឹងរបងការពារ និងត្រូវឡោមព័ទ្ធ។ បុរសនេះត្រូវបានគេវាយតប់ រុញច្រានឱ្យដួលទៅលើដីមុនពេលបាន​រត់គេចខ្លួន។

វីដេអូមួយផ្សេងទៀតបង្ហាញថា បុរសម្នាក់ដែលពាក់អាវមានសរសេរឃ្លា “ជួយឱ្យទឹកដីអាមេរិកមហស្ចារ្យឡើងវិញ” ដែលជាជ័យឃោសន៍របស់លោក Trump បានត្រវាយប្រតប់នឹងបាតុករ BLM ម្នាក់ បន្ទាប់មកក៏បានលោតចូលវាយគ្នាតែ​ម្ដង​។

សំឡេងស្រែកយ៉ាងកងរំពងក៏លាន់ឡើងនៅក្នុងការប៉ះទង្គិចគ្នារវាងក្រុមបាតុករ និងក្រុមប៉ូលិសផងដែរ ធ្វើឱ្យក្រុមប៉ូលិសត្រូវដកថយដើម្បីកាត់បន្ថយការខឹងសម្បាពី​សំណាក់​ក្រុម​បាតុករ​ BLM។

ក្រុមបាតុករ BLM បានព្រមានថា នឹងឡោមព័ទ្ធសេតវិមានក្នុងរយៈពេលច្រើនសប្ដាហ៍ បើសិនជាលោក Trump ជាប់ឆ្នោតម្ដងទៀត។

ប្រភព៖ BCFocus/Dailymail