សឿន សំណាង - La Reine Media

អ្នកមានជាងគេក្នុងលោកចំនួន3រូប ដែលមិនត្រូវបង់ពន្ធលើប្រាក់ចំណូលបុគ្គល

កំពូលមហាសេដ្ឋីពិភពលោកចំនួន 3រូប គឺ លោក Jeff Bezos លោក Elon Musk និងលោក Bill Gates មិនត្រូវបង់ពន្ធលើប្រាក់ចំណូលបុគ្គល នោះទេ ដោយសារតែគោលនយោបាយរបស់រដ្ឋដែលពួកគេកំពុងរស់នៅ។

នៅក្នុងសន្និសីទមួយដែលត្រូវបានរៀបចំដោយ Wall Street Journal កាលពីថ្ងៃទី 15ធ្នូ ឆ្នាំ2020 មហាសេដ្ឋី Elon Musk ដែលជា CEO របស់ក្រុមហ៊ុនផលិតរថយន្តអគ្គិសនី Tesla និងក្រុមហ៊ុនផលិតយានអវកាស SpaceX បានទទួលស្គាល់អំពីព័ត៌មានដែលថា លោករើផ្ទះទៅនៅឯរដ្ឋ Texas។

ការរើពីរដ្ឋ California ទៅនៅក្នុងរដ្ឋ Texas នេះ ពិតជាមានភាពងាយស្រួលដល់លោក Musk ដោយសារតែពេលនេះ លោកបាននៅក្បែររោងចក្ររបស់ SpaceX និង Tesla។ ក៏ប៉ុន្តែ មូលហេតុពិសេសមួយផ្សេងទៀតដែលនាំឱ្យមហាសេដ្ឋីរូបនេះ រើទៅនៅក្នុងរដ្ឋ Texas នោះគឺ Texas គឺជារដ្ឋមួយក្នុងចំណោមរដ្ឋចំនួន 9 នៅសហរដ្ឋអាមេរិក ដែលមិនយកពន្ធលើប្រាក់ចំណូលបុគ្គល (personal income tax)។ ដូច្នេះ លោក Musk នឹងកាត់បន្ថយចំណាយបានច្រើនទៅលើការបង់ពន្ធ នៅពេលបានចាកចេញពី California ជារដ្ឋដែលយកពន្ធលើប្រាក់ចំណូលខ្ពស់ជាងគេបំផុត បើធៀបនឹងបណ្ដារដ្ឋផ្សេងៗនៅសហរដ្ឋអាមេរិក។

លោក Elon Musk បច្ចុប្បន្នគឺជាមហាសេដ្ឋីលំដាប់ទីពីរក្នុងពិភពលោក ដោយមានទ្រព្យសរុបឡើងដល់ 152 ពាន់លានដុល្លារអាមេរិក។ ចំណែកលោក Jeff Bezos (មហាសេដ្ឋីលំដាប់ទីមួយ) និងលោក Bill Gates (មហាសេដ្ឋីលំដាប់ទីបី) សុទ្ធតែជាអ្នករស់នៅឯ Washington ជារដ្ឋដែលមិនយកពន្ធលើប្រាក់ចំណូលបុគ្គល។ ប្រការនេះមានន័យថា កំពូលអ្នកមានជាងគេទាំង 3 រូបនៅក្នុងលោក មិនត្រូវបង់ពន្ធលើប្រាក់ចំណូលបុគ្គលទៅឱ្យរដ្ឋដែលពួកគេកំពុងរស់នៅ។

ក៏ប៉ុន្តែ ដោយសារតែរដ្ឋមួយចំនួន យកពន្ធលើប្រាក់ចំណូលរបស់ពលរដ្ឋដោយយោងទៅតាមទីកន្លែងដែលពួកគេធ្វើការ ដែលហៅថា «ពន្ធលើប្រាក់ចំណូលសម្រាប់បុគ្គលក្រៅរដ្ឋ» ដូច្នេះ កំពូលអ្នកមានទាំង 3 រូបខាងលើ នៅតែត្រូវបង់ពន្ធចំពោះប្រាក់ចំណូលដែលបានពីការងាររបស់ពួកគេនៅឯរដ្ឋដទៃ។ តួយ៉ាង រដ្ឋ California នៅតែយកពន្ធពីលោក Elon Musk នៅក្នុងថ្ងៃដែលលោកធ្វើការនៅក្នុងរដ្ឋនេះ។

មួយវិញទៀត បណ្ដារដ្ឋដែលមិនយកពន្ធលើប្រាក់ចំណូលបុគ្គល តែបែរជាយកពន្ធក្នុងអត្រាខ្ពស់ទៅលើការលក់ដូរ ឬពន្ធលើអចលនទ្រព្យជាដើម ដើម្បី «ប៉ះប៉ូវ» សម្រាប់ពន្ធលើប្រាក់ចំណូលបុគ្គលទៅវិញ៕

ប្រភព៖ BI

December 24, 2020

កូនអណ្ដើកជាង 92,000ក្បាល ចាប់កំណើតដំណាលគ្នាលើវាលខ្សាច់នៅតំបន់អាមេរិកខាងត្បូង

អណ្ដើកដ៏ច្រើនសន្ធឹកនៅឯទន្លេនៃតំបន់អាមេរិកខាងត្បូង បានញាស់ដំណាលគ្នា ដើម្បីបង្កើនឱកាសរស់រានមានជីវិតនៅពេលវារទៅកាន់ទន្លេ និងចាប់ផ្ដើមជីវិតថ្មីរបស់ពួកវា។

អង្គការអភិរក្សសត្វព្រៃ (WCS) កាលពីថ្ងៃទី 14ធ្នូ បានចែករំលែកវីដេអូគួរឱ្យចាប់អារម្មណ៍ទាក់ទងនឹងអណ្ដើកយក្សនៅទន្លេនៃតំបន់អាមេរិកខាងត្បូង (Arrau turtle/South American river turtle) រាប់ម៉ឺនក្បាលដែលទើបតែបានញាស់ថ្មីៗ និងវារនៅលើវាលខ្សាច់ដែលស្ថិតក្នុងតំបន់អភិរក្សជម្រកជីវសាស្ត្រ Abufari នៃរដ្ឋ Amazonas ប្រទេស Brazil។

ក្រុមអ្នកអភិរក្សនៃអង្គការ WCS Brazil បានឱ្យដឹងថា ការញាស់នៃពងអណ្ដើក មានរយៈពេលតែប៉ុន្មានថ្ងៃប៉ុណ្ណោះ។ កូនអណ្ដើកប្រមាណ 71,000ក្បាលបានចាប់កំណើតក្នុងថ្ងៃជាមួយគ្នា ចំណែក 21,000ក្បាលទៀតបានញាស់នៅថ្ងៃបន្ទាប់។

WCS Brazil បានតាមដានអណ្ដើកមេ និងសម្បុករបស់ពួកវាយ៉ាងយកចិត្តទុកដាក់ នៅមុននិងក្រោយការញាស់។ ក្រុមអ្នកជំនាញនៅទីនេះបានសិក្សាស្រាវជ្រាវអំពីលក្ខណដែលពងអាចញាស់ជាហ្វូងដំណាលគ្នា ដើម្បីកែលម្អយន្តការនៃការគ្រប់គ្រង និងការពារពួកវាពីការជួញដូរ។ ពួកវាកំពុងរងគ្រោះធ្ងន់ធ្ងរដោយសារតែត្រូវគេចាប់យកទៅលក់សម្រាប់ធ្វើជាអាហារ។

Camila Ferrara អ្នកជំនាញខាងសត្វអណ្ដើកនៅអង្គការ WCS Brazil បានឱ្យដឹងថា៖ «សម្រាប់អណ្ដើកយក្សនៅទន្លេអាមេរិកខាងត្បូង ការបន្តពូជគឺជាដំណាក់កាលលេចធ្លោបំផុត ប៉ុន្តែក៏ជាពេលដែលងាយរងគ្រោះបំផុតផងដែរ។ នៅតំបន់មួយចំនួន កូនអណ្ដើកតែងតែញាស់ស្រុះគ្នាដើម្បីបង្កើនឱកាសក្នុងការរស់រានមានជីវិត។ ប្រការនេះអនុញ្ញាតឱ្យពួកវាធ្វើដំណើរជាហ្វូងទៅកាន់ទន្លេ និងចាប់ផ្ដើមជីវិតថ្មី»។

អណ្ដើកយក្សនៅទន្លេអាមេរិកខាងត្បូងគឺជាប្រភេទអណ្ដើកទឹកសាបធំបំផុតនៅក្នុងតំបន់អាមេរិកខាងត្បូង ដោយអណ្ដើកពេញវ័យមួយក្បាលៗ មានប្រវែងដល់ទៅជាង 1ម៉ែត្រ និងទម្ងន់ 90គីឡូក្រាម។ ពួកវាមានតួនាទីយ៉ាងសំខាន់នៅក្នុងប្រព័ន្ធអេកូឡូស៊ី ព្រោះថា ពួកវាជួយពង្រាយគ្រាប់ពូជនៃរុក្ខជាតិតូចធំ ដែលជួយដល់ការកែសម្រួលការបាត់បង់រុក្ខជាតិនៅជុំវិញទន្លេ៕

ប្រភព៖ Reuters

December 24, 2020

ក្លាយជាសេដ្ឋី ដោយសារគាំទ្រមហាសេដ្ឋី Elon Musk និងក្រុមហ៊ុន Tesla

មនុស្សជាច្រើនបានក្លាយជា Teslanaires (សេដ្ឋី Tesla) ព្រោះតែការគាំទ្រលោក Elon Musk និងបានចូលរួមទិញមូលបត្ររបស់ក្រុមហ៊ុន Tesla តែងតែពីដំណាក់កាលដំបូង។

Brandon Smith ដែលឆ្នាំ 2020 នេះ មានអាយុ 32ឆ្នាំ ជាអ្នកផលិតវីដេអូ និងមិនមានរថយន្តអគ្គិសនី Tesla ទេ បើទោះលោកអ្នកគាំទ្រក្រុមហ៊ុននេះក៏ដោយ។ ជាងនេះ នៅក្នុងទីរួមស្រុកមួយក្នុងទីក្រុង Milwaukee នៃរដ្ឋ Wisconsin ដែលលោកកំពុងរស់នៅ ការដែលគេមើលឃើញរថយន្ត Tesla ក៏ជារឿងកម្រ។

ក៏ប៉ុន្តែ កាលពីចុងខែមិថុនា ឆ្នាំ 2017 លោក Smith បានសម្រេចចិត្តយកប្រាក់សន្សំរបស់ខ្លួនចំនួន 10,000 ដុល្លារអាមេរិក ទៅទិញមូលបត្រ Tesla។ Smith បានឱ្យដឹងថា នេះគឺជាលើកទីមួយហើយដែលលោកបានវិនិយោគទៅក្នុងក្រុមហ៊ុនមួយ ហើយនេះគឺជាការចាប់ផ្ដើមដំបូងរបស់លោក។ រៀងរាល់លើកបន្ទាប់ពីបានបើកប្រាក់ខែ Smith ទូទាត់វិក្កយបត្រនានា និងនៅសល់ប៉ុន្មាន ក៏តែងតែយកទៅទិញមូលបត្រ Tesla។ ជាសរុប លោក Smith បានចំណាយប្រាក់ប្រហែល 90,000 ដុល្លារនៅក្នុងការទិញមូលបត្រក្រុមហ៊ុននេះ។

«ប្រាក់បៀវត្សរបស់ខ្ញុំមិនដល់6ខ្ទង់ទេ ហើយខ្ញុំក៏មិនយល់អ្វីអំពីកិច្ចព្រមព្រៀងលើសិទ្ធិជ្រើសរើសនោះដែរ។ ខ្ញុំគ្រាន់តែទិញ និងកាន់កាប់វា (មូលបត្រ) រហូតមកដល់បច្ចុប្បន្ន។ ខ្ញុំមិនធ្លាប់បានលក់មូលបត្រនេះមួយហ៊ុនណាឡើយ» លោក Smith បានប្រាប់ Bloomberg តាមទូរស័ព្ទបែបនេះ។

បច្ចុប្បន្ន លោក Smith បានក្លាយជាមនុស្សម្នាក់នៅក្នុងបញ្ជីឈ្មោះ «សេដ្ឋី Tesla» (Teslanaires) ជាឈ្មោះរបស់ក្រុមមនុស្សដែលបានក្លាយជាសេដ្ឋី ដោយសារការវិនិយោគទៅក្នុងក្រុមហ៊ុនផលិតរថយន្តអគ្គិសនី Tesla របស់មហាសេដ្ឋី Elon Musk។ មូលបត្រ Tesla សរុប ដែល Smith កំពុងកាន់កាប់បច្ចុប្បន្ន មានតម្លៃជាង 1 លានដុល្លារអាមេរិក បន្ទាប់ពីមូលបត្រនេះបានកើនឡើងជិត 731% នៅក្នុងឆ្នាំ 2020។

យោងតាម Bloomberg អ្នកវិនិយោគមិនចាំបាច់ធ្វើការនៅឯ Wall Street ដើម្បីស្វែងយល់លម្អិតអំពីសកម្មភាព និងស្ថានភាពហិរញ្ញវត្ថុរបស់ក្រុមហ៊ុន Tesla ឡើយ។ ប្រព័ន្ធចម្រុះដែលរួមមានដូចជា podcast ឬគណនី Youtube ជាច្រើនដែលពិពណ៌នាស្ទើរតែទាំងអស់នូវទិដ្ឋភាពទាំងមូលរបស់ Tesla អាចជួយឱ្យអ្នកស្វែងយល់អំពីក្រុមហ៊ុននេះដោយមិនចាំបាច់អានរបាយការណ៍វិភាគនានា មុនពេលសម្រេចចិត្តទិញមូលបត្រនេះ។

ក្រៅពី «ស្ថាប័ន» ខាងលើ ក៏នៅមានវេទិកា និងក្លឹបរបស់អ្នកមានរថយន្ត Tesla រាប់មិនអស់ផ្សេងទៀតដែលអាចពិភាក្សាគ្នាតាមរយៈកម្មវិធី Zoom ឬជួបគ្នាដើម្បីពិនិត្យមើលស្ថានីយបញ្ចូលអគ្គិសនី Supercharger ថ្មីបំផុតរបស់ Tesla ជាដើម។ Smith និយាយថា លោកចំណាយពេលចន្លោះពី 2-3 ម៉ោងក្នុងមួយថ្ងៃដើម្បីស្វែងយល់អំពី Tesla។ លោកក៏តែងតែចូលរួមក្នុងវេទិកាអនឡាញនានានៅម៉ោងហូបបាយថ្ងៃត្រង់។

មកដល់ពេលនេះ លោក Smith មិនទាន់មានគម្រោងលក់ ឬផ្អាកការវិនិយោគទៅលើមូលបត្រ Tesla នៅឡើយ បើទោះជាបានចាប់ផ្ដើមគិតអំពីការសាងសង់ផ្ទះ ឬទិញផ្ទះផ្ទាល់ខ្លួន។ បច្ចុប្បន្ន Smith និងបងប្រុសកំពុងរស់នៅក្នុងផ្ទះមួយខ្នងដែលជីតារបស់ពួកគេបានសង់ឡើងនៅក្នុងតំបន់ Cudahy នៃរដ្ឋ Wisconsin សហរដ្ឋអាមេរិក។ Smith នៅតែជឿជាក់លើអនាគតរបស់ Tesla ដោយគិតថា ក្រុមហ៊ុននេះនឹងបន្តរីកចម្រើនទៅមុខទៀត។

សូមបញ្ជាក់ថា ចំពោះអ្នកវិនិយោគលក្ខណបុគ្គលនៃក្រុមហ៊ុន Tesla មិនមែនមានតែ Smith ម្នាក់ដែលក្លាយជាសេដ្ឋី Tesla នោះទេ ពោលគឺនៅមានបុគ្គលជាច្រើនទៀតដែលមិនបានលើកយកមកនិយាយនៅក្នុងអត្ថបទនេះ៕

ប្រភព៖ Bloomberg

December 24, 2020

ស្ថានភាពជំងឺ Covid-19 នៅកម្ពុជា និងពិភពលោកសម្រាប់ថ្ងៃទី 24ធ្នូ 2020

បញ្ហាវីរុស Covid-19 នៅក្នុងតំបន់ជាច្រើនលើពិភពលោក ពិសេសគឺនៅអឺរ៉ុប និងអាមេរិក មិនបានថមថយសោះឡើយ ខណៈនៅអាស៊ីមានប្រទេសមួយចំនួនកំពុងប្រឈមនឹងការកើនឡើងខ្ពស់នៃករណីឆ្លង។

ទ្វីបអឺរ៉ុប៖ អ្នកបានឆ្លងវីរុស 21,965,000នាក់ អ្នកស្លាប់ 507,898នាក់ អ្នកជំងឺកំពុងព្យាល 10,892,782នាក់ ក្នុងនេះដែរក៏មានជាង 26ពាន់នាក់មានអាការធ្ងន់ធ្ងរ។

អាមេរិកខាងជើង៖ អ្នកជំងឺសរុប 21,705,294នាក់ អ្នកស្លាប់ 487,014នាក់ និង 7,973,324នាក់កំពុងព្យាបាល ខណៈដែលតំបន់អាមេរិកខាងត្បូង មនុស្សចំនួន 352,881នាក់បានស្លាប់ ក្នុងចំណោមអ្នកជំងឺសរុប 12,679,100នាក់។

ទ្វីបអាស៊ី៖ អ្នកជំងឺសរុប 20,039,153នាក់ អ្នកស្លាប់ 326,661នាក់ និង 1,334,990នាក់កំពុងព្យាបាល។

អាហ្វិក៖ អ្នកជំងឺសរុប 2,585,246នាក់ អ្នកស្លាប់សរុប 60,778នាក់ និង 358,691នាក់កំពុងសម្រាកព្យាបាល។

ទ្វីបអូសេអានី៖ មនុស្សចំនួន 47,704នាក់បានឆ្លង Covid-19 ក្នុងនោះមាន 1,051នាក់បានស្លាប់ និង 13,345នាក់បានបាត់បង់ជីវិត។

សម្រាប់កម្ពុជាវិញ៖ មានអ្នកជំងឺសរុប 363នាក់ (ករណីឆ្លងថ្ងៃនេះ មិនមាន) អ្នកបានជាសះស្បើយ 351នាក់ និង 12នាក់កំពុងទទួលការព្យាបាល។ ព័ត៌មានលម្អិត សូមមើលតារាងខាងក្រោម។

ជាសរុប ទូទាំងពិភពលោកបានរកឃើញអ្នកឆ្លង Covid-19 ចំនួន 79,023,118នាក់ អ្នកស្លាប់ដោយសារវីរុសនេះបានកើនដល់ 1,736,298នាក់ អ្នកកំពុងព្យាបាលមានចំនួន 21,685,528នាក់ ខណៈអ្នកជាសះស្បើយមានចំនួន 55,601,292នាក់៕

December 24, 2020

ទិដ្ឋភាពពលរដ្ឋអាមេរិកាំងដំបូងៗដែលបានចាក់វ៉ាក់សាំង Covid-19

វេជ្ជបណ្ដិតម្នាក់នៅទីក្រុង New York ដែលជាមនុស្សដំបូងគេបង្អស់មួយរូបនៅសហរដ្ឋអាមេរិក ត្រូវបានចាក់វ៉ាក់សាំងប្រឆាំង Covid-19 របស់ក្រុមហ៊ុន Pfizer-BioNTech កាលពីថ្ងៃទី 14ធ្នូ បាននិយាយប្រាប់ Fox News ថា «ប្រការនេះពីតជាអស្ចារ្យណាស់»។

វេជ្ជបណ្ឌិត Yves Duroseau ប្រធានផ្នែករង្គ្រោះបន្ទាន់នៃមន្ទីរពេទ្យ Lenox Hill នាទីក្រុង New York ត្រូវបានចាក់វ៉ាក់សាំងរួមជាមួយនឹងគិលានុបដ្ឋាយិកា Sara Lindsay នៅឯមណ្ឌលសុខាភិបាល Long Island ក្នុងខណ្ឌ Queens កាលពីព្រឹកថ្ងៃទី 14ធ្នូ (ថ្ងៃទី 15ធ្នូ នៅកម្ពុជា) កន្លងទៅ។

វេជ្ជបណ្ឌិត Yves Duroseau ថ្លែងថា៖ «នេះគឺជាថ្ងៃមួយប្រកបដោយក្ដីសង្ឃឹម។ ខ្ញុំពិតជាមានមោទនភាព និងសុភមង្គលនៅពេលមានឱកាសដើម្បីបង្ហាញអំពីសារសំខាន់នៃការចាក់វ៉ាក់សាំង។ យើងកំពុងប្រឈមនឹងរលកទីពីរនៃការឆ្លងរាលដាលរបស់វីរុសនៅទីក្រុង New York។ ដូច្នេះ យើងត្រូវការចាក់វ៉ាក់សាំងនេះ»។

ទន្ទឹមនឹងវេជ្ជបណ្ឌិត Duroseau គិលានុបដ្ឋាយិកា Sandra Lindsay ដែលជាអ្នកធ្លាប់បានព្យាបាលអ្នកជំងឺ Covid-19 ដែលមានអាការធ្ងន់ធ្ងរបំផុតអស់រយៈពេលជាច្រើនខែកន្លងមកនេះ ក៏ទទួលបានការចាក់វ៉ាក់សាំងកាលពីម៉ោង 9និង23នាទីព្រឹក (ម៉ោងក្នុងស្រុក) នៅក្នុងព្រឹត្តិការណ៍មួយដែលត្រូវបានផ្សាយផ្ទាល់តាមទូរទស្សន៍។ អភិបាលរដ្ឋ New York លោក Andrew Cuomo ក៏បានចូលរួមពិនិត្យផ្ទាល់ក្នុងការចាក់វ៉ាក់សាំងនេះដែរ ហើយបានសរសើរនាងថា «មិនមានភាពជ្រួលច្របល់» នេះបើតាមសារព័ត៌មាន Reuters។

«ខ្ញុំបានត្រៀមខ្លួនរួចហើយ។ ចាប់ផ្ដើមយើង…» នាង Sandra និយាយដូច្នេះ មុនពេលក្លាយជាមនុស្សដំបូងគេម្នាក់ដែលបានចាក់វ៉ាក់សាំង Covid-19 នៅទីក្រុង New York។ ក្រុមមនុស្សនៅក្នុងបន្ទប់ចាក់វ៉ាក់សាំង បានទះដៃអបអរសាទរ និងលើកទឹកចិត្តនាង បន្ទាប់ពីម្ជុលត្រូវបានដកចេញពីសាច់។

នាង Sandra បាននិយាយថា នាងមានអារម្មណ៍ «ធូរស្រាល» និងចង់ «ចែករំលែកការជឿជាក់នេះទៅដល់សាធារណជនថា វ៉ាក់សាំងនេះពិតជាមានសុវត្ថិភាព»។

វេជ្ជបណ្ឌិត Michelle Chester ដែលជាអ្នកបានចាក់វ៉ាក់សាំងដោយផ្ទាល់ដៃ ឱ្យដឹងថា «គ្រប់យ៉ាងដំណើរការបានល្អខ្លាំងណាស់»។

ទិដ្ឋភាពស្រដៀងគ្នានេះក៏បានកើតឡើងនៅឯមន្ទីរពេទ្យមួយចំនួនក្នុងទីក្រុងផ្សេងៗ ក្នុងនោះក៏មានទាំង Los Angeles ផងដែរ។ អភិបាលរដ្ឋ California លោក Gavin Newsom បានឈរនៅក្បែរ និងបានលើកទឹកចិត្តនៅពេលគិលានុបដ្ឋាយិកា Kaiser Permanente នៃបន្ទប់សង្គ្រោះបន្ទាន់ កំពុងមូរដៃអាវដើម្បីត្រៀមទទួលការចាក់វ៉ាក់សាំង ដែលត្រូវបានគេផ្សាយផ្ទាល់តាមទូរទស្សន៍។

«នោះគឺជាព្រឹកមួយដែលពិបាកនឹងជឿ។ វាជាព្រឹត្តិការណ៍ប្រវត្តិសាស្ត្រ» វេជ្ជបណ្ឌិត Leonardo Seoane ឱ្យដឹងបែបនេះ បន្ទាប់ពីបានចាក់វ៉ាក់សាំងនៅឯមណ្ឌលសុខាភាព Ochsner ក្នុងទីក្រុង New Orleans រដ្ឋ Louisiana ជាកន្លែងដែលលោកបានដឹកនាំការពិសោធលើមនុស្សដែលបានបង្ហាញថា វ៉ាក់សាំងនេះមានប្រសិទ្ធភាព 95% នៅក្នុងការទប់ស្កាត់ Covid-19។

ភ្លាមៗនេះ ប្រធានាធិបតី Donald Trump ក៏បានចែករំលែកនៅលើ Twitter អំពីព្រឹត្តការណ៍នេះ ព្រមទាំងបានជូនពរដល់សហរដ្ឋអាមេរិក និងពិភពលោកទាំងមូលផងដែរ។

សូមរំលឹកថា បន្ទាប់ពីការបើកភ្លើងខៀវពី FDA វ៉ាក់សាំង Covid-19 របស់ Pfizer-BioNTech ជិត 3លានដូស ត្រូវបានដឹកជញ្ជូនទៅកាន់មណ្ឌលសុខភាពជាង 630កន្លែង នៅពាសពេញទឹកដីអាមេរិក។ តំបន់ជាច្រើនរបស់សហរដ្ឋអាមេរិក ទទួលបានវ៉ាក់សាំងនេះនៅព្រឹកថ្ងៃទី 15ធ្នូ និងមានការចាក់វ៉ាក់សាំងនៅក្នុងថ្ងៃនេះតែម្ដង។ ក្រុមមនុស្សអាទិភាពសម្រាប់ការចាក់វ៉ាក់សាំង Covid-19 ដំបូងគេគឺ បុគ្គលិកផ្នែកសុខាភិបាលជួរមុខ និងបុគ្គលិកនៅមន្ទីរថែទាំងចាស់ជរា។
តាមគម្រោង វិញ្ញាបនបត្រដែលអនុញ្ញាតឱ្យប្រើប្រាស់ជាបន្ទាន់សម្រាប់បេក្ខភាពវ៉ាក់សាំងទីពីរ មកពីក្រុមហ៊ុន Moderna ដែលមានទីស្នាក់ការនៅក្នុងរដ្ឋ Massachusetts នឹងមាននៅចុងខែធ្នូនេះ។

បន្ទាប់ពីសហរដ្ឋអាមេរិក ប្រទេសកាណាដាក៏បានចាប់ផ្ដើមចាក់វ៉ាក់សាំង Covid-19 នេះដែរ។ ប៉ុន្មាននាទីបន្ទាប់ពីវ៉ាក់សាំងរបស់ Pfizer-BioNTech ដំបូងបានចុះចតលើទឹកដីប្រទេសនេះកាលពីយប់ថ្ងៃទី 13ធ្នូ នាយករដ្ឋមន្ត្រី Trudeau បានបង្ហោះសារនៅលើ Twitter បង្ហាញអំពីរូបភាពនៃជើងហោះហើររបស់យន្តហោះដឹកវ៉ាក់សាំង Covid-19 ដែលបានមកដល់កាណាដា។

ក្នុងចំណោមក្រុមមនុស្សដែលទទួលបានការចាក់វ៉ាក់សាំងដំបូងនៅប្រទេសកាណាដា ក៏មានបុគ្គលិកថែទាំសុខភាពឯកជនម្នាក់នៅទីក្រុង Toronto និងពលរដ្ឋវ័យចំណាស់ម្នាក់នៅទីក្រុង Montreal ផងដែរ នៅពេលប្រទេសនេះបានចាប់ផ្ដើមបែងចែកវ៉ាក់សាំងចំនួនដំបូងចំនួន 30,000ដូស៕

ប្រភព៖ Reuter

December 15, 2020

ក្រុមហ៊ុន Pfizer និង Moderna នឹងរកបាន 32 ពាន់លានដុល្លារ ពីការលក់វ៉ាក់សាំង Covid-19

ចាប់ពីពេលនេះ រហូតដល់ឆ្នាំ 2023 ការដែលពិភពលោកត្រូវការចាក់វ៉ាក់សាំង Covid-19 នឹងជួយឱ្យក្រុមហ៊ុនអភិវឌ្ឍឱសថ Pfizer និង Moderna រកចំណូលបានរាប់សិបពាន់លានដុល្លារអាមេរិក។

ការផ្ដល់ការអនុញ្ញាតទៅឱ្យវ៉ាក់សាំង Covid-19 របស់ក្រុមហ៊ុន Pfizer គឺជាជំហានដ៏សំខាន់ចំពោះវិទ្យាសាស្ត្រ សេដ្ឋកិច្ច និងមនុស្សជាតិ។ ទន្ទឹមនឹង វាក៏នាំមកនូវប្រភពចំណូលដ៏ធំសម្រាប់ក្រុមហ៊ុនដែលបានអភិវឌ្ឍវ៉ាក់សាំងនេះផងដែរ។

ក្រុមអ្នកវិភាគប្រចាំ Wall Street បានស្រាវជ្រាវ និងរកឃើញថាថា ក្រុមហ៊ុន Pfizer និង Moderna នឹងរកបានប្រាក់ចំណូល 32 ពាន់លានដុល្លារពីការលក់វ៉ាក់សាំង Covid-19 នៅក្នុងឆ្នាំ 2021 ក្នុងនោះ ក្រុមហ៊ុន Pfizer អាចរកបាន 19 ពាន់លានដុល្លារអាមេរិក នេះបើតាមក្រុមហ៊ុនវិនិយោគផ្នែកធនាគារ Morgan Stanley។

ក្នុងឆ្នាំ 2020 នេះ ប្រាក់ចំណូលពីការលក់វ៉ាក់សាំងរបស់ក្រុមហ៊ុន Pfizer បានត្រឹមតែ 975 លានដុល្លារប៉ុណ្ណោះ។ ប្រាក់ចំណូលដែលបានរំពឹងទុករបស់ក្រុមហ៊ុននេះសម្រាប់ឆ្នាំ 2021 នឹងកើនលើសប្រាក់ចំណូលដែលបានមកពីផលិតផលដែលលក់ដាច់បំផុតនៅក្នុងឆ្នាំ 2019 នោះគឺវ៉ាក់សាំងការពារជំងឺរលាកសួត ដែលរកបានចំណូល 5.8ពាន់លានដុល្លារ។

Morgan Stanley ក៏បានរំពឹងថា Pfizer នឹងរកបាន 9.3 ពាន់លានដុល្លារបន្ថែមទៀតពីវ៉ាក់សាំង Covid-19 ចាប់ពីឆ្នាំ 2022 ដល់ឆ្នាំ 2023 ក្នុងគ្រាដែលពិភពលោកកំពុងបន្តចាក់វ៉ាក់សាំង។ ក្រុមហ៊ុន Pfizer នឹងចែករំលែកប្រាក់ចំណូលជាមួយនឹង BioNTech ដែលជាក្រុមហ៊ុនមួយរបស់អាល្លឺម៉ង់ សហការជាមួយ Pfizer ក្នុងការអភិវឌ្ឍវ៉ាក់សាំង Covid-19។ វ៉ាក់សាំងរបស់ Pfizer-BioNTech ត្រូវបានអនុម័តឱ្យប្រើប្រាស់ជាបន្ទាន់នៅសហរដ្ឋអាមេរិក កាលពីថ្ងៃទី 12ធ្នូ ឆ្នាំ2020។

ការរកឃើញវិធីថ្មីក្នុងការអភិវឌ្ឍវ៉ាក់សាំង មិនបានធ្វើឱ្យតម្លៃមូលបត្ររបស់ Pfizer កើនឡើងខ្ពស់ខ្លាំងនោះទេ ព្រោះថា អ្នកផលិតឱសថនេះគឺជាក្រុមហ៊ុនធំស្រាប់ហើយ។ មូលបត្ររបស់ Pfizer កើន 12% ក្នុងឆ្នាំនេះ។ ប៉ុន្តែ មូលបត្ររបស់ក្រុមហ៊ុន BioNTech នៅក្នុងផ្សារហ៊ុនអាមេរិក បានកើនឡើងជិត 300% នាំឱ្យទុនរបស់ក្រុមហ៊ុនអាល្លឺម៉ង់នេះ កើនដល់ជិត 30ពាន់លានដុល្លារអាមេរិក។

ចំណែក Moderna វិញ វ៉ាក់សាំង Covid-19 ក៏បានជួយឱ្យមូលបត្ររបស់ក្រុមហ៊ុននេះ កើនឡើងដល់ជិត 700% ក្នុងឆ្នាំ 2020 ធ្វើឱ្យទុនរបស់ Moderna មានតម្លៃឡើងដល់ 62ពាន់លានដុល្លារ។ ក្រុមហ៊ុន Morgan Stanley ឱ្យដឹងថា តាមការស្រាវជ្រាវ ទុនប្រមាណជាពាក់កណ្ដាលរបស់ Moderna គឺផ្សារភ្ជាប់ជាមួយនឹងវ៉ាក់សាំង។

ចំណែកក្រុមហ៊ុនវិនិយោគផ្នែកធនាគារ Goldman Sachs វិញ ឱ្យដឹងថា ក្រុមហ៊ុន Moderna អាចរកបាន 13.3ពាន់លានដុល្លារពីវ៉ាក់សាំង Covid-19 នៅក្នុងឆ្នាំ 2021។ Morgan Stanley អះអាងថា តម្លៃមូលបត្រ Moderna កើនឡើងយ៉ាងលឿនបែបនេះបង្ហាញថា ក្រុមអ្នកវិនិយោគរំពឹងថា ក្រុមហ៊ុននេះអាចរកបានចាប់ពី 10 ទៅ 15ពាន់លានដុល្លារ ពីការលក់វ៉ាក់សាំង Covid-19 នៅក្នុងឆ្នាំ 2021 និង 2022 រួមនឹងប្រាក់ចំណូលរាប់ពាន់លានដុល្លារផ្សេងទៀតដែលនឹងត្រូវបានជំរុញបន្ថែម។ មុននេះ ក្នុងឆ្នាំ 2019 ក្រុមហ៊ុន Moderna រកបានប្រាក់ចំណូលត្រឹមតែ 60លានដុល្លារប៉ុណ្ណោះ៕

ប្រភព៖ CNN

December 15, 2020

បេក្ខភាព Joe Biden បានក្លាយជាប្រធានាធិបតីអាមេរិកជាផ្លូវការហើយ

លោក Joe Biden ទទួលបានសំឡេងឆ្នោតគាំទ្រចំនួន 320សំឡេង នៅក្នុងការបោះឆ្នោតកាលពីម្សិលមិញ (14ធ្នូ 2020) របស់ក្រុមអ្នកតំណាងម្ចាស់ឆ្នោត ដែលនេះបានធ្វើឱ្យលោក ក្លាយជាប្រធានាធិបតីអាមេរិកជាផ្លូវការសម្រាប់អាណត្តិថ្មីនេះ។

អ្នកតំណាងម្ចាស់ឆ្នោតចំនួន 4រូប របស់រដ្ឋ Hawaii កាលពីរសៀលថ្ងៃទី 14ធ្នូ (ព្រឹកថ្ងៃទី 15ធ្នូ នៅកម្ពុជា) បានបោះឆ្នោតក្រោយគេនៅក្នុងការបោះឆ្នោតជ្រើសរើសប្រធានាធិបតីអាមេរិកដោយផ្ទាល់ ដែលនេះបានបញ្ចប់រដូវបោះឆ្នោតឆ្នាំ 2020 ជាផ្លូវការ។ លទ្ធផលចុងក្រោយនៃការបោះឆ្នោតរបស់ក្រុមអ្នកតំណាងម្ចាស់ឆ្នោតនេះ បង្ហាញថា លោក Joe Biden ទទួលបាន 306សំឡេងគាំទ្រ ខណៈប្រធានាធិបតី Donald Trump ទទួបាល 232សំឡេង។

ជាមួយនឹងលទ្ធផលនេះ លោក Biden បានទទួលជ័យជំនះនៅចំពោះមុខលោក Trump បើទោះជាមានការប្រឹងប្រែងដើម្បីកែប្រែលទ្ធផលនៃការបោះឆ្នោតពីសំណាក់ម្ចាស់សេតវិមានក៏ដោយ។

លោក Trump និងក្រុមរបស់លោក ធ្លាប់បានសង្ឃឹមថា នឹងរកបានសំឡេងឆ្នោតគ្រប់គ្រាន់ ពី «តំណាងម្ចាស់ឆ្នោតប្រឆាំង» ដែលជាក្រុមតំណាងរាស្ត្របោះឆ្នោតខុសពីកិច្ចសន្យាដំបូងរបស់ខ្លួន ដើម្បីកែប្រែលទ្ធផលនៃការបោះឆ្នោតសកល។ ក៏ប៉ុន្តែ នៅក្នុងការបោះឆ្នោតចុងក្រោយនេះ ពុំមានតំណាងម្ចាស់ឆ្នោតណាម្នាក់ក្លាយជា «តំណាងម្ចាស់ឆ្នោតប្រឆាំង» នោះទេ៕

ប្រភព៖ Reuters

December 15, 2020

កម្ពុជារកឃើញមនុស្ស 3នាក់បន្ថែមទៀតដែលវិជ្ជមាននឹង Covid-19

ក្នុងរយៈពេល 24ម៉ោងកន្លងទៅនេះ ក្រសួងសុខាភិបាលកម្ពុជាបានរកឃើញអ្នកឆ្លងវីរុស Covid-19 សរុបចំនួន 3ករណីបន្ថែមទៀត ក្នុងនោះមានទាំងករណីនាំចូល និងករណីពាក់ព័ន្ធនឹងព្រឹត្តិការណ៍សហគមន៍28វិច្ឆិកាផងដែរ។

ករណីវិជ្ជមាននឹង Covid-19 ដែលត្រូវបានរកឃើញកាលពីម្សិលមិញ (14ធ្នូ) រួមមាន៖

ករណីនាំចូល៖ ទីមួយ៖ ស្ត្រីជនជាតិខ្មែរ អាយុ 66ឆ្នាំ ស្នាក់នៅក្នុងសណ្ឋាគារមួយនៅទីក្រុងភ្នំពេញ និងជាអ្នកដំណើរមកពីសហរដ្ឋអាមេរិក។ ទីពីរ៖ ស្ត្រីជនជាតិជប៉ុន អាយុ 34ឆ្នាំ ស្នាក់នៅក្នុងសណ្ឋាគារមួយក្នុងទីក្រុងភ្នំពេញ ជាអ្នកដំណើរមកពីប្រទេសជប៉ុន។

ករណីពាក់ព័ន្ធនឹង «ព្រឹត្តិការណ៍សហគមន៍28វិច្ឆិកា»៖ កុមារជនជាតិខ្មែរ អាយុ 1ឆ្នាំ ស្នាក់នៅក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ជាកូនប្រុសរបស់ស្ត្រីវ័យ 30ឆ្នាំ ដែលវិជ្ជមាននឹង Covid-19 កាលពីថ្ងៃទី 29វិច្ឆិកា។

ក្រៅពីវិជ្ជមាន កម្ពុជាក៏មានអ្នកជាសះស្បើយពី Covid-19 ចំនួន 3នាក់ផងដែរដែលសុទ្ធតែជាអ្នកពាក់ព័ន្ធនឹងព្រឹត្តិការណ៍28វិច្ឆិកា។

គិតមកដល់ព្រឹកថ្ងៃទី 15 ខែធ្នូនេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 362 នាក់ ក្នុងនោះមាន 312 នាក់បានជាសះស្បើយ និង 50 នាក់កំពុងសម្រាកព្យាបាលនៅមន្ទីរពេទ្យ និងមណ្ឌលសុខភាពនារាជធានីភ្នំពេញ៕

December 15, 2020

សន្សំបាន 1,5000ដុល្លារអាមេរិក/ឆ្នាំ កំលោះជនជាតិសិង្ហបុរសម្នាក់នេះ ចែករំលែកអំពីវិធីសាស្ត្រងាយៗក្នុងការសំច័យប្រាក់របស់ខ្លួន

សម្រាប់មនុស្សស្ទើរតែទាំងអស់ ការសន្សំសំច័យប្រាក់គឺជាបញ្ហាលំបាកដ៏ធំមួយ ហើយមានមនុស្សជាច្រើនបានបរាជ័យក្នុងរឿងនេះ។ ក៏ប៉ុន្តែ បញ្ហានេះទំនងជាមិនអាចកើតឡើងចំពោះកំលោះម្នាក់នៅក្នុងអត្ថបទនេះឡើយ។

ថ្មីៗនេះ Clyde Chye បានចែករំលែកអាថ៌កំបាំងអំពីការសន្សំសំច័យប្រាក់របស់ខ្លួននៅលើបណ្ដាញសង្គម និងទទួលបានចំណាប់អារម្មណ៍យ៉ាងច្រើន។ Clyde Chye ឱ្យដឹងថា ខ្លួនបានសន្សំសំច័យប្រាក់ដោយមិនគោរពទៅតាមគោលការណ៍វិទ្យាសាស្ត្រ ឬវិធីសាស្ត្រជាក់លាក់ណាមួយឡើយ។ Clyde Chye គ្រាន់តែនិយាយពាក្យថា «No» ចំពោះការដើរផ្សារទិញអីវ៉ាន់ និងការដើរស៊ីចាយហឺហា តែប៉ុណ្ណោះ។

ជាលម្អិត Clyde Chye ឱ្យដឹងថា ជាធម្មតា ប្រាក់សម្រាប់ហូបចុកប្រចាំសប្ដាហ៍របស់ខ្លួនគឺប្រមាណជា 10ដុល្លារអាមេរិក។ ប៉ុន្តែ តួលេខនេះបានថយចុះមកនៅត្រឹមពាក់កណ្ដាល គឺស្មើនឹង 5 ដុល្លារអាមេរិក។ អាថ៌កំបាំងដែល Clyde Chye បាននិងកំពុងប្រើប្រាស់ នោះគឺថា កំលោះនេះទិញតែអាហារក្នុងបរិមាណគ្រប់គ្រាន់ប៉ុន្តែ ហើយក៏មិនចូលចិត្តទិញរបស់បញ្ចុះតម្លៃក្នុងចំនួនច្រើន ឬទំនិញសន្សំពិន្ទុនោះដែរ។ សម្រាប់ការចូលហាងកាហ្វេវិញ កំលោះនេះ តែងចូលចិត្តហាងតូចល្មមដែលមានលក់ភេសជ្ជឆ្ងាញ់ ជំនួសឱ្យហាងប្រែន។ និយាយអំពីខ្ទង់ប្រាក់សម្រាប់ហូបចុក Clyde សន្សំបានជាង 117ដុល្លារ/ខែ ហើយបើគិតពេញមួយឆ្នាំវិញ តួលេខនេះនឹងឡើងដល់ជាង 1,400ដុល្លារអាមេរិក។

មិនត្រឹមតែប៉ុណ្ណោះ Clyde ថែមទាំងបានសន្សំសំច័យទៅលើ «ខ្ទង់សម្រាប់ស្នេហា» ទៀតផង។ Clyde និងមិត្តស្រីមិនដែលចេញទៅញ៉ាំអាហារនៅខាងក្រៅ ឬទៅកាន់រោងកុននោះដែរ តែជំនួសមកវិញ ពួកគេជ្រើសរើសការចម្អិនអាហារនៅឯផ្ទះ និងមើលទូរទស្សន៍ដែលពួកគេមាន ដោយសារតែប្រាក់ចំណាយសម្រាប់សេវាកម្មភាពយន្តអនឡាញ មានតម្លៃទាបជាងឆ្ងាយ បើធៀបនឹងការទិញសំបុត្រមើលនៅរោងកុន។ ការសំច័យទាំងនេះបានជួយឱ្យ Clyde សន្សំបានប្រហែល 7,300 ដុល្លារអាមេរិក/ឆ្នាំ។

ទន្ទឹមនឹងនេះ Clyde Chye ក៏ជ្រើសរើសការធ្វើដំណើរដោយមធ្យោបាយសាធារណៈ ជំនួសឱ្យការជិះម៉ូតូឌុបបច្ចេកវិទ្យាថ្មី ឬជួលរថយន្ត។ កំលោះនេះក៏កម្រនឹងទិញទំនិញតាមអនឡាញ ប៉ុន្តែគាត់ចូលចិត្តទៅទិញផ្ទាល់ដៃ។ ខ្ទង់ប្រាក់ដែលសន្សំបានពីប្រការនេះ រួមនឹងការមិនចេញទៅជប់លៀង និងការចាយវាយផ្ដេសផ្ដាសផ្សេងទៀត ជាសរុបក្នុងមួយឆ្នាំ Clyde សន្សំបានជាង 15,000 ដុល្លារអាមេរិក។

សកម្មភាពរបស់ Clyde បាននាំឱ្យមានការរិះគន់ថា ជីវិតបែបនេះគឺពិតជាវេទនា និងខ្វះភាពសប្បាយរីករាយ។ ក៏ប៉ុន្តែ Clyde បានឆ្លើយតបថា ក្រៅពីគោលដៅសន្សំសំច័យ សកម្មភាពរបស់ខ្លួនក៏បានជួយឱ្យមានសុខភាពល្អជាងមុន ដោយសារតែបានកាត់បន្ថយអាហារដែលមានខ្លាញ់ច្រើន។ ជាងនេះ Clyde អះអាងថា ខ្លួនមិនមែនជាមនុស្សប្រភេទកំណាញ់ជ្រុលនិយមឡើយ គាត់ក៏ចេះចាយលុយផងដែរនៅពេលមានកម្មវិធីពិសេសៗ ឬពេលចង់បំបាត់ភាពតានតឹងម្ដងម្កាលជាដើម៕

ប្រភព៖ Asiaone

December 14, 2020

ភពដែលមានទម្ងន់ធ្ងន់ជា 11ដងធៀបនឹងភពព្រហស្បតិ៍ មានគន្លងគោចរចម្លែក អាចបង្ហើបអំពីភពទី9 នៃប្រពន្ធព្រះអាទិត្យរបស់មនុស្ស

កែវយឹតអវកាស Hubble បានជួយឱ្យក្រុមអ្នកវិទ្យាសាស្ត្ររកឃើញគន្លងគោចររបស់ HD106906 b ដែលជាភពខាងក្រៅប្រព័ន្ធព្រះអាទិត្យកំពុងស្ថិតនៅយ៉ាងឆ្ងាយ និងវិលជុំវិញផ្កាយមេមួយគូរបស់វា ជាមួយនឹងគន្លងគោចរខុសពីធម្មតា។

អ្នកវិទ្យាសាស្ត្រជាចច្រើន តាំងតែពីយូរណាស់មកហើយ បានសង្ស័យថា មានភពមួយមិនទាន់ត្រូវបានរកឃើញ កំពុងតែគោចរនៅជាយប្រព័ន្ធព្រះអាទិត្យ ដែលឆ្ងាយជាងខ្សែក្រវាត់អាចម៍ផ្កាយ Kuiper ដែលជាតំបន់សម្បូរទៅដោយអាចម៍ផ្កាយតូចធំ ស្ថិតនៅខាងក្រៅគន្លងគោចររបស់ភពណិបទូន។ ទោះជាមិនទាន់រកឃើញភពណាមួយបែបនេះ ប៉ុន្តែពួកគេជឿថា វត្តមានរបស់វានឹងបកស្រាយអំពីភាពមិនប្រក្រតីរបស់បណ្ដាអាចម៍ផ្កាយនៅក្នុងតំបន់ខ្សែក្រវាត់អាចម៍ផ្កាយ Kuiper មិនបាន។

HD106906 b គឺជាភពមួយដែលស្ថិតក្នុងប្រព័ន្ធផ្កាយមួយគូ ដែលមានចម្ងាយពីផែនដីប្រមាណ 336 ឆ្នាំពន្លឺ អាចផ្ដល់តម្រុយអំពីភពទី 9 នៃប្រព័ន្ធព្រះអាទិត្យ។ ភពខាងក្រៅប្រព័ន្ធប្រព័ន្ធព្រះអាទិត្យនេះ ស្ថិតនៅយ៉ាងឆ្ងាយពីផ្កាយមេ ហើយវាត្រូវចំណាយដល់ 15,000 ឆ្នាំដើម្បីវិលបានមួយជុំផ្កាយមេរបស់វា។ HD106906 b មានទម្ងន់ធ្ងន់ជាង 11 ដង បើធៀបនឹងភពព្រហស្បតិ៍ ដែលជាភពធំជាងគេបង្អស់ក្នុងប្រព័ន្ធព្រះអាទិត្យ។

ក្រុមអ្នកវិទ្យាសាស្ត្របានរកឃើញ HD106906 តាំងពីឆ្នាំ 2013 ប៉ុន្តែ មិនទាន់កំណត់បានអំពីគន្លងគោចររបស់វា។ ពួកគេមិនដឹងច្បាស់ថា វាកំពុងវិលជុំវិញផ្កាយមួយគូនេះ ឬគ្រាន់តែជាភពមួយដែលកំពុងអណ្ដែតត្រសែតចេញឆ្ងាយពីប្រព័ន្ធផ្កាយមេរបស់វា។

នៅក្នុងការសិក្សាស្រាវជ្រាវមួយដែលត្រូវបានចុះផ្សាយនៅលើទស្សនាវដ្ដី Astronomical កាលពីថ្ងៃទី 10 ធ្នូ ក្រុមអ្នកវិទ្យាសាស្ត្របានរកឃើញការបំផ្លាស់ទីរបស់ HD106906 b ដោយមានជំនួយពីកែវយឹតអវកាស Hubble។ HD106906 b អាចឆ្លងកាត់ដំណាក់កាលមួយដែលបណ្ដាលឱ្យភពទី 9 របស់ប្រព័ន្ធព្រះអាទិត្យត្រូវខ្ទាតចេញឆ្ងាយ។

ប្រព័ន្ធព្រះអាទិត្យ និងខ្សែក្រវាត់អាចម៍ផ្កាយ Kuiper

អ្នកវិទ្យាសាស្ត្រ Meiji មកពីសាកលវិទ្យាល័យ Berkeley នៅ California បាននិយាយថា៖ « HD106906 b នៅសែនឆ្ងាយពីផ្កាយមេមួយគូ និងមានកន្លងគោចរចម្លែក ដូចទៅនឹងការសន្និដ្ឋានអំពីភពទី 9 នៃប្រព័ន្ធព្រះអាទិត្យ។ ប្រការនេះធ្វើឱ្យមានសំណួរសួរថា តើបណ្ដាភពដូច្នេះ បានកកើតឡើង និងរីកចម្រើនបានយ៉ាងដូចម្ដេច ដើម្បីមានស្ថានភាពដូចបច្ចុប្បន្ន?

ក្រុមអ្នកវិទ្យាសាស្ត្រនិយាយថា មានប្រការជាច្រើនមិនទាន់ត្រូវបានរកឃើញ ជុំវិញភព HD106906 b នេះ។ ក្រុមអ្នកវិទ្យាសាស្ត្រមិនទាន់យល់ច្បាស់ថា តើហេតុអ្វីបានជាវានៅឆ្ងាយពីផ្កាយមេរបស់វា។ វាអាចកកើតឡើងនៅជិតតំបន់កណ្ដាល ប៉ុន្តែក្រោយមកក៏ត្រូវខ្ទាតចេញឆ្ងាយដោយប្រការណាមួយ ឬក៏វាកកើតឡើងដំបូងនៅខាងក្រៅជាយប្រព័ន្ធផ្កាយមេនេះក៏ថាបាន៕

ប្រភព៖ Independent

December 14, 2020

Author: សឿន សំណាង