សឿន សំណាង - La Reine Media

អាមេរិកដាក់បម្រាមគោចរក្រោយករណីផ្ទុះដ៏ធំមួយដែលបណ្ដាលឱ្យអគាជាង 40 ត្រូវរងការខូចខាត

អភិបាលក្រុង Nashville បានចេញបទបញ្ជាហាមការធ្វើដំណើរមួយដែលនឹងអូសបន្លាយរហូតដល់ដំណាច់សប្ដាហ៍នេះនៅតំបន់ដែលរងផលប៉ះពាល់ពីករណីផ្ទុះរថយន្តកាលពីថ្ងៃទី 25 ខែធ្នូកន្លងទៅ។

«ខ្ញុំបានចុះហត្ថាលេខាលើបទបញ្ជាប្រតិបត្តិ 12 ដើម្បីដាក់តំបន់ឱ្យស្ថិតក្នុងស្ថានការណ៍អាសន្នផ្នែកស៊ីវិលចំពោះទីតាំងនានាដែលព័ទ្ធជុំវិញដោយមហាវិថី James Robertson ផ្នែកខ្លះនៃមហាវិថីលេខ 4 នៅភាគខាងជើង តំបន់ Broadway និងទន្លេ Cumberland។ បម្រាមគោចរនេះនឹងត្រូវអនុវត្តចាប់ពីម៉ោង 16កន្លះនៃថ្ងៃទី 25 ខែធ្នូ (ម៉ោង 5 កន្លះនៃថ្ងៃទី 26 ខែធ្នូ នៅកម្ពុជា) និងបញ្ចប់នៅម៉ោង 16 កន្លះនៃថ្ងៃទី 27 ខែធ្នូ (ម៉ោង 5 កន្លះនៃថ្ងៃទី 28 ខែធ្នូ នៅកម្ពុជា)» អភិបាលក្រុង Nashville លោក John Cooper បានសរសេរដូច្នេះនៅលើទំព័រ Twitter កាលពីថ្ងៃទី 25 ធ្នូ»។

លោក John Cooper បានឱ្យដឹងថា បទបញ្ជានេះក៏ផ្ដល់កម្លាំងបន្ថែមសម្រាប់ជួយដល់កិច្ចការដោះស្រាយ និងការផ្ដល់ជំនួយផងដែរ។

«ការវាយប្រហារសំដៅលើសហគមន៍របស់យើង ក្នុងបំណងបង្កភាពចលាចល និងការភ័យខ្លាចក្នុងថ្ងៃបុណ្យដ៏សុខសាន្ត និងប្រកបដោយក្ដីសង្ឃឹមនេះ។ ប៉ុន្តែ ប្រជាជន Nashville បានបង្ហាញជាច្រើនដងហើយថា ស្មារតីរបស់ទីក្រុងនេះមិនអាចត្រូវបានវាយបំបែកឡើយ»។

សូមរំលឹកថា រថយន្តមួយគ្រឿងបានផ្ទុះឡើងយ៉ាងកក្រើកដី នៅកណ្ដាលទីក្រុង Nashville នៃរដ្ឋ Tennessee សហរដ្ឋអាមេរិក កាលពីថ្ងៃទី 25 ខែធ្នូ។ ក្រុមប៉ូលិសឱ្យដឹងថា នេះគឺជាសកម្មភាពដែលមានគោលបំណង និងមានការព្រមានជាមុនថា គ្រាប់បែក «នឹងផ្ទុះ ក្រោយរយៈពេល 15 នាទីទៀត» បានបន្លឺចេញពីរថយន្ត នៅមុនពេលវាផ្ទុះ។

ក្នុងហេតុការណ៍នេះ មានមនុស្សយ៉ាងតិច 3 នាក់បានរងរបួស និងអគារច្រើនជាង 40 ត្រូវរងការខូចខាត។ មន្ត្រីពីររូបបានបញ្ជាក់ថា មានបំណែកនៃសាកសពនៅកន្លែងកើតហេតុ ប៉ុន្តែមិនទាន់ដឹងច្បាស់ថា វាជាប់ទាក់ទងនឹងហេតុការណ៍ផ្ទុះនេះដែរ ឬយ៉ាងណានៅឡើយ៕

ប្រភព៖ Fox

អត្ថបទទាក់ទង៖ ផ្ទុះកក្រើកទីក្រុងនៅអាមេរិកក្នុងថ្ងៃបុណ្យណូអែលឆ្នាំនេះ

December 26, 2020

ផ្ទុះកក្រើកទីក្រុងនៅអាមេរិកក្នុងថ្ងៃបុណ្យណូអែលឆ្នាំនេះ

ករណីផ្ទុះមួយបានកើតឡើងនៅកណ្ដាលទីក្រុង Nashville រដ្ឋ Tennessee សហរដ្ឋអាមេរិក កាលពីព្រឹកថ្ងៃទី 25 ខែធ្នូ បណ្ដាលឱ្យអគារមួយចំនួនរងការខូចខាត ប៉ុន្តែមិនទាន់មានសេចក្ដីរាយការណ៍អំពីការរងរបួស ឬបាត់បង់ជីវិតមនុស្សនៅឡើយ។

បណ្ដាលអគារនៅកណ្ដាលទីក្រុង Nashville និងតំបន់ជុំវិញ បានរងការញាប់ញ័រ នៅពេលមានករណីផ្ទុះមួយបានកើតឡើង នាំឱ្យមានផ្សែងយ៉ាងខ្មួលខ្មាញ់ និងអណ្ដាតភ្លើងបាញ់ឡើងទៅលើ។ ភ្លាមៗនេះ ក្រុមប៉ូលិស និងក្រុមពន្លត់អគ្គិភ័យ ក៏ត្រូវបានបញ្ជូនទៅកាន់កន្លែងកើតហេតុ។

អាជ្ញាធរ Nashville បានឱ្យដឹងថា រថយន្តមួយគ្រឿងដែលកំពុងចតនៅក្នុងតំបន់នេះ បានផ្ទុះ និងបណ្ដាលឱ្យអគារមួយចំនួនរងការខូចខាត។ បច្ចុប្បន្នមិនទាន់មានព័ត៌មានអំពីការស្លាប់ ឬរងបួសនៅឡើយ ហើយក្រុមមន្ត្រីក៏បានអះអាងថា ករណីផ្ទុះនេះ ទំនងជា «មិនមានអ្វីគួរឱ្យសង្ស័យ» នោះទេ។

Muck McCoy ដែលជាពលរដ្ឋម្នាក់រស់នៅក្នុងតំបន់កើតហេតុ បានបង្ហោះវីដេអូមួយបង្ហាញឱ្យឃើញថា ទឹកកំពុងតែហូរធ្លាក់ចូលផ្ទះរបស់គាត់ ខណៈដែលសំឡេងសារ៉ែនប្រកាសអាសន្ន និងសំឡេងស្រែករបស់មនុស្សកំពុងលាន់ឮពេញទឹកពេញដី។

Buck McCoy បានប្រាប់សារព័ត៌មាន AP ថា៖ «បង្អួចទាំងអស់របស់ខ្ញុំបានបែក ហើយបើខ្ញុំឈរនៅទីនោះ វាពិតជាគ្រោះថ្នាក់ណាស់។ វាដូចទៅនឹងការផ្ទុះរបស់គ្រាប់បែក»។

ថៅកែរបស់អគារ Nashville Downtown Hostel ឱ្យដឹងថា ពួកគេបានប្រញាប់ជម្លៀសភ្ញៀវចេញពីអគារ នៅពេលមានសំឡេងផ្ទុះយ៉ាងធំមួយ និងសំឡេងជួងប្រកាសអាសន្នបានបន្លឺឡើង។ លោកបន្តថា អគាររបស់ខ្លួនរងការខូចខាត។

WeGo ដែលជាបណ្ដាញរថយន្តក្រុងរបស់ Nashville បានប្រាប់ថា ពួកគេមិនបានរងផលប៉ះពាល់ពីករណីផ្ទុះនេះទេ។ ពួកគេកំពុងធ្វើសកម្មភាពជួយរៀបចំតំបន់កើតហេតុ និងប្រើប្រាស់រថយន្តរបស់ខ្លួនធ្វើជាកន្លែងជ្រោកកោនដើម្បីឱ្យជនរងផលប៉ះពាល់ស្នាក់នៅក្នុងគ្រាអាកាសធាតុត្រជាក់ខ្លាំង។ ក្រុមប៉ូលិស និងក្រុមពន្លត់អគ្គិភ័យនៅទីក្រុង Nashville នៅតែធ្វើសកម្មភាពនៅកន្លែងកើតហេតុ ព្រមទាំងបានអំពាវនាវឱ្យពលរដ្ឋចៀសឆ្ងាយពីតំបន់កើតហេតុនេះ៕

ប្រភព៖ Fox News, AP

December 25, 2020

បារាំងផ្ដល់រង្វាន់ជាសញ្ជាតិ ជូនដល់បុគ្គលិកជួរមុខចំនួន700នាក់ ដែលសកម្មក្នុងការទប់ទល់នឹង Covid-19

បារាំងបានធ្វើសេចក្ដីសម្រេចយ៉ាងលឿនទៅលើពាក្យសុំចូលសញ្ជាតិរបស់បុគ្គលិកជួរមុខដែលជាជនជាតិបរទទេសចំនួន 700 នាក់ ដើម្បីទទួលស្គាល់ស្នាដៃរបស់ពួកគេក្នុងការចូលរួមប្រយុទ្ធប្រឆាំងនឹងមហារោគរាតត្បាត Covid-19 នាពេលកន្លង។

«បុគ្គលិកសុខាភិបាល អ្នកជំនាញផ្នែកអនាម័យ អ្នកមើលថែកុមារ រួមនឹងបុគ្គលិកលក់ទំនិញ បានបញ្ជាក់ចំពោះការសន្យារបស់ពួកគេសម្រាប់ប្រទេសនេះ។ ពេលនេះ សាធារណរដ្ឋបារាំងត្រូវតែផ្ដល់រង្វាន់ដល់ពួកគេដើម្បីជាការទទួលស្គាល់ស្នាដៃ» នេះបើតាមការិយាល័យរដ្ឋមន្ត្រីសញ្ជាតិបារាំង Marlene Schiappa ដែលបានប្រកាសកាលពីថ្ងៃទី 23 ខែធ្នូកន្លងទៅ។

ពាក្យស្នើសុំចូលសញ្ជាតិបារាំង តែងតែត្រូវចំណាយពេលជាច្រើនឆ្នាំ ទើបអាចត្រូវបានគេចាត់ការ ហើយបញ្ហា Covid-19 ក៏កាន់តែធ្វើឱ្យលិខិតស្នាមនេះត្រូវពន្យារពេលយូរ។ ក៏ប៉ុន្តែ កាលពីខែកញ្ញា ក្នុងគ្រាដែលបារាំងត្រូវប្រឈមមុខនឹងរលក Covid-19 លើកទីពីរ រដ្ឋាភិបាលបានស្នើឱ្យអាជ្ញាធរមូលដ្ឋាន បង្កលក្ខណងាយស្រួល និងពន្លឿនកិច្ចការផ្ដល់សញ្ជាតិដល់បុគ្គលិកជនជាតិបរទេសដែលសកម្មក្នុងការចូលរួមប្រយុទ្ធប្រឆាំងនឹង Covid-19។

ការិយាល័យរដ្ឋមន្ត្រីខាងលើបានបន្ថែមថា ក្នុងរយៈពេល 3 ខែកន្លងទៅ បុគ្គលិកជួរមុខជាង 70 នាក់ ដែលកំពុងទប់ទល់នឹង Covid-19 ត្រូវបានផ្ដល់សញ្ជាតិបារាំង និងជិត 700 នាក់ផ្សេងទៀត កំពុងស្ថិតក្នុងដំណាក់កាលចុងក្រោយដើម្បីក្លាយជាពលរដ្ឋប្រទេសនេះ។ គិតមកដល់បច្ចុប្បន្ន មានមនុស្សសរុបចំនួន 2,890 នាក់ បានដាក់ពាក្យសុំចូលសញ្ជាតិបារាំង។

ឆ្នាំ 2019 មានមនុស្សជាង 112,000 នាក់ ត្រូវបានផ្ដល់សញ្ជាតិបារាំង ដែលតួលេខនេះ ទាបជាង 18% បើធៀបនឹងឆ្នាំ 2015។

នេះមិនមែនជាលើកដំបូងនោះទេដែលបារាំងបានទទួលស្គាល់ស្នាដៃបុគ្គលដោយការផ្ដល់រង្វាន់ជាសញ្ជាតិ។ កាលពីឆ្នាំ 2018 កំលោះម្នាក់មកពីប្រទេសម៉ាលីនៃអាហ្វ្រិកខាងលិច ក៏ទទួលបានសញ្ជាតិបារាំង និងក្លាយជាបុគ្គលិកពន្លត់អគ្គិភ័យ ក្រោយពីបានតោងឡើងអគារស្នាក់នៅមួយកន្លែង និងបានសង្គ្រោះក្មេងតូចម្នាក់ដែលជាប់តែកតោកនៅលើរានហាល។

កាលពីឆ្នាំ 2019 ជនជាតិអាមេរិកាំង 3 នាក់ ដែលធ្លាប់បានបំបែកផែនការភេរវកម្មសំដៅលើនាវាមួយគ្រឿងដែលឆ្ពោះទៅកាន់ទីក្រុងបារីស កាលពី 4 ឆ្នាំមុននោះ ក៏ត្រូវបានផ្ដល់សញ្ជាតិបារាំងផងដែរ៕

ប្រភព៖ CBS News

December 25, 2020

អាមេរិកឡាទីនចាប់ផ្ដើមចាក់វ៉ាក់សាំង ខណៈករណីឆ្លង Covid-19 ទូទាំងពិភពលោក កើនលើស 79 លាននាក់!

ពិភពលោកមានអ្នកជំងឺ Covid-19 ជាង 1.7 លាននាក់បានបាត់បង់ជីវិត ខណៈដែលប្រទេសចំនួន 3 ដំបូងគេនៅតំបន់អាមេរិកឡាទីន ចាប់ផ្ដើមចាក់វ៉ាក់សាំង។

គិតមកដល់ព្រឹកនៃថ្ងៃទី 25 ខែធ្នូនេះ ពិភពលោកបានរកឃើញអ្នកវិជ្ជមាននឹង Covid-19 សរុបចំនួន 79,690,271 នាក់ ក្នុងនោះមាន 1,748,183

នាក់បានស្លាប់ និង 56,085,204 នាក់ បានជាសះស្បើយ។ ក្នុងចំណោម 21,856,884 នាក់ដែលកំពុងព្យាបាល មាន 106,201 នាក់ កំពុងប្រឈមនឹងការបាត់បង់ជីវិត ដោយសារមានអាការធ្ងន់ធ្ងរ។

នៅអាមេរិកឡាទីន ក្រុមបុគ្គលិកសុខាភិបាលជួរមុខនៃប្រទេសម៉ិកស៊ិក និងឈីលី កាលពីថ្ងៃទី 24 ខែធ្នូ គឺជាក្រុមមនុស្សមួយក្នុងចំណោមក្រុមមនុស្សដំបូងគេដែលទទួលបានការចាក់វ៉ាក់សាំង នៅពេលដែលបណ្ដាប្រទេសក្នុងតំបន់អាមេរិកឡាទីនដែលរងផលប៉ះពាល់ធ្ងន់ធ្ងរ ចាប់ផ្ដើមយុទ្ធនាការចាក់វ៉ាក់សាំងជាបន្តបន្ទាប់។

ការចាក់វ៉ាក់សាំង Covid-19 ដោយមានផ្សាយផ្ទាល់តាមទូរទស្សន៍របស់ម៉ិកស៊ីក ត្រូវបានធ្វើឡើងក្រោយរយៈពេលមួយថ្ងៃដែលវ៉ាក់សាំងចំនួន 3,000 ដូសដំបូងរបស់ Pfizer-BioNTech ត្រូវបានដឹកមកដល់។ ម៉ិកស៊ិក បច្ចុប្បន្នមានអ្នកឆ្លងវីរុស 1,350,079 នាក់ និងស្លាប់ 120,311 នាក់ គឺជាប្រទេសដែលមានអ្នកស្លាប់ច្រើនជាងគេលំដាប់ទីបួនក្នុងពិភពលោក បន្ទាប់ពីសហរដ្ឋអាមេរិក ប្រេស៊ីល និងឥណ្ឌា។

នៅប្រទេសឈីលីវិញ ជំនួយការផ្នែកថែទាំសុខភាពម្នាក់ ឈ្មោះ Zulema Riquelme អាយុ 46 ឆ្នាំ គឺជាមនុស្សដំបូងគេដែលទទួលបានការចាក់វ៉ាក់សាំង Covid-19 ក្រោយរយៈពេលតែប៉ុន្មានម៉ោងប៉ុណ្ណោះដែលវ៉ាក់សាំង Pfizer-BioNTech 10,000 ដូសដំបូងត្រូវបានបញ្ជូនមកដល់ប្រទេសនេះ។

ម៉ិកស៊ិកគឺជាប្រទេសដំបូងគេនៅអាមេរិកឡាទីនដែលទទួលបានវ៉ាក់សាំង Pfizer-BioNTech បន្ទាប់មកទៀតគឺប្រទេស ឈីលី និងកូស្តារីកា។ ប្រធានាធិបតីរបស់កូស្តារីកា លោក Carlos Alvarado ថ្លែងថា៖ «វាអាចជាការចាប់ផ្ដើមសម្រាប់ការបញ្ចប់មហារោគរាតត្បាតនេះ»។

ក្នុងខណៈនោះដែរ អាហ្សង់ទីន ក៏បានទទួលវ៉ាក់សាំង Sputnik V ចំនួន 300,000 ដូសដំបូងពីប្រទេសរុស្ស៊ី កាលពីថ្ងៃទី 24 ខែធ្នូ។ នេះជាប្រទេសតែមួយគត់នៅតំបន់អាមេរិកឡាទីនដែលបានអនុម័តប្រើប្រាស់វ៉ាក់សាំងរបស់រុស្ស៊ី៕

ប្រភព៖ BBC, Reuters

December 25, 2020

បរិយាកាសបុណ្យណូអែលនៅជុំវិញពិភពលោក ក្នុងសម័យ Covid-19

បណ្ដាប្រទេស និងតំបន់នានាក្នុងពិភពលោក បានត្រៀមរួចរាល់ហើយសម្រាប់ទទួលអំណរថ្ងៃបុណ្យណូអែល ឬបុណ្យគ្រីស្តម៉ាស ជាថ្ងៃដែលព្រះយេស៊ូគ្រិស្តប្រសូត្រ។

រដូវបុណ្យណូអែលឆ្នាំនេះ ប្រារព្ធឡើងក្នុងស្ថានភាពដែលករណីឆ្លង និងស្លាប់ដោយសារវីរុស Covid-19 មិនទាន់មានសញ្ញាថយចុះសោះឡើយ។

ក្នុងរូបភាពខាងលើដែលត្រូវបានថតកាលពីថ្ងៃទី 22 ខែធ្នូកន្លងទៅនេះ គឺជាផ្ទះមួយខ្នងដែលត្រូវបានតុបតែងដើម្បីទទួលអំណរថ្ងៃបុណ្យណូអែល នៅក្នុងតំបន់ Hastings Ranch នៃទីក្រុង Pasadena រដ្ឋ California សហរដ្ឋអាមេរិក។

ទីលាន Francisco Morazan ក្នុងរដ្ឋធានី San Salvador នៃប្រទេស El Salvador (អាមេរិកកណ្ដាល) ត្រូវបានតុបតែងលម្អ និងរង់ចាំអបអរបុណ្យណូអែល ដែលនឹងប្រារព្ធនៅថ្ងៃទី 25 ខែធ្នូនេះ។

ប្រជាជននាំគ្នាថតរូបសែលហ្វ៊ី នៅខាងមុខដើមណូអែលនៅទីក្រុង Kiev នៃប្រទេសអ៊ុយក្រែន។

នៅទីក្រុង Stansstad នៃប្រទេសស្វីស គេឃើញមានផ្ទះមួយខ្នង រួមនឹងដើមឈើនៅក្បែរនោះ ត្រូវបានតុបតែងយ៉ាងស្រស់ស្អាតដោយប្រើប្រាស់ប្រព័ន្ធអំពូលភ្លើងពណ៌គួរជាទីគយគន់។

ដើមណូអែលដែលត្រូវបានតុបតែងនៅលើទីលាន Palace កណ្ដាលទីក្រុង St. Petersburg នៃប្រទេសរុស្ស៊ី។

ទីងមោង ឬរូបត្លុកជាច្រើនមានការតុបតែងភ្លើងពណ៌យ៉ាងលេចធ្លោ ដែលគេហៅថា Magic Delivery ត្រូវបានដាក់លម្អភ្នែកនៅតាមចិញ្ចើមវិថិទី 5 (5th Avenue) ក្នុងទីក្រុង New York នៃរដ្ឋ New York សហរដ្ឋអាមេរិក។

វិមាន Hotel de Ville នៅទីក្រុងប៉ារីស ប្រទេសបារាំង នៅក្នុងរាត្រីនៃថ្ងៃទី 11 ខែធ្នូ 2020។

បុរសម្នាក់ស្លៀកពាក់ជាលោកតាណូអែល កំពុងហៅទូរស័ព្ទតាមអនឡាញទៅកាន់កុមារនានា នៅទីក្រុង Rome ប្រទេសអ៊ីតាលី។

«លោកតាណូអែល» បាញ់ទឹកអាល់កុលកម្ចាត់មេរោគឱ្យក្មេងៗ ដែលកំពុងរស់នៅក្នុងតំបន់សម្បុកកណ្ដុរ នាទីក្រុង Mumbai ប្រទេសឥណ្ឌា មុនពេលចែកកាដូ។

បុគ្គលិកសុខាភិបាលដែលថែទាំអ្នកជំងឺ Covid-19 នៅមណ្ឌលសុខភាពប្រចាំតំបន់ Trinitas ក្នុងទីក្រុង Elizabeth រដ្ឋ New Jersey សហរដ្ឋអាមេរិក។

ប្រភព៖ Reuters

December 25, 2020

ថៃបានចាប់ផ្ដើមដាក់បម្រាមគោចរ បន្ទាប់ពីរកឃើញករណីវិជ្ជមាននឹង Covid-19 ក្នុងសហគមន៍

សម្បុកវីរុសក្នុងខេត្ត Samut Sakhon នៃប្រទេសថៃ នៅតែបន្តវិវត្តន៍ពិបាកស្មាន ដោយមានអ្នកឆ្លងវីរុស Covid-19 រាប់សិបនាក់ជារៀងរាល់ថ្ងៃ ធ្វើឱ្យរដ្ឋាភិបាលថៃ ត្រូវចាប់ផ្ដើមដាក់បម្រាមគោចរដោយកន្លែងដើម្បីកាត់បន្ថយការឆ្លងរាលដាល។

យោងតាម Bangkok Post ប្រទេសថៃបានរកឃើញអ្នកវិជ្ជមាននឹង Covid-19 សរុបចំនួន 67 នាក់ នៅក្នុងថ្ងៃទី 24 ខែធ្នូ ក្នុងនោះមាន 58 នាក់ជាករណីឆ្លងក្នុងសហគមន៍។

វេជ្ជបណ្ឌិត Taweesilp Visanuyothin អ្នកនាំពាក្យរបស់មជ្ឈមណ្ឌលគ្រប់គ្រងស្ថានការណ៍ Covid-19 បានឱ្យដឹងថា ក្នុងចំណោមអ្នកជំងឺ 58 នាក់ដែលឆ្លងក្នុងសហគមន៍គឺ មាន 55 នាក់ជាប់ទាក់ទងនឹងសម្បុកវីរុសនៅក្នុងខេត្ត Samut Sakhon។

ភាគច្រើននៃករណីឆ្លងក្នុងសហគមន៍នេះគឺជាអ្នកលក់ដូរ និងពលករថៃ ក្នុងនោះមាន 20 នាក់គឺជាបុគ្គលិកក្រុមហ៊ុន និងមេផ្ទះ។

គិតមកដល់បច្ចុប្បន្ន ប្រទេសថៃបានរកឃើញអ្នកវិជ្ជមាននឹង Covid-19 សរុបចំនួន 5,829 នាក់ ក្នុងនោះមាន 4,116 នាក់បានជាសះស្បើយ និង 1,653 នាក់ កំពុងព្យាបាលនៅមន្ទីរពេទ្យ។ ចំណែកតួលេខអ្នកស្លាប់ដោយសារវីរុសនេះ នៅតែ 60 ដដែល។

ពលករបរទេសដែលកំពុងធ្វើការនៅប្រទេសថៃ ចំនួន 1,273 នាក់ត្រូវបានរកឃើញថា មានផ្ទុក Covid-19 នេះបើតាមបណ្ឌិត Taweesilp។ អាជ្ញាធរថៃបានឱ្យដឹងថា នឹងមិនមានការដាក់បម្រាមគោចរទូទាំងប្រទេសនោះទេ ប៉ុន្តែ ប្រទេសនេះនឹងត្រូវបានបែងចែកជាតំបន់ទៅតាមពណ៌ចំនួន 4 រួមមាន ពណ៌ក្រហម ពណ៌ទឹកក្រូច ពណ៌លឿង និងពណ៌បៃតង ដែលស្មើនឹងកម្រិតទាំង 4 ដែលត្រូវប្រើប្រាស់ក្នុងការដាក់បម្រាមគោចរ ឬកាត់បន្ថយការធ្វើដំណើរ។

បច្ចុប្បន្ន តំបន់ពណ៌ក្រហម គឺមាននៅក្នុងខេត្ត Samut Sakhon ដែលនឹងត្រូវគ្រប់គ្រងយ៉ាងតឹងរ៉ឹង ខណៈដែលក្រុមបុគ្គលិកសុខាភិបាលនឹងធ្វើការអស់ពីសមត្ថភាព៕

ប្រភព៖ Bangkok Post

December 25, 2020

ពលរដ្ឋអាមេរិកាំងជាងមួយលាននាក់ បានចាក់វ៉ាក់សាំង Covid-19 លើកទីមួយរួចហើយ

មជ្ឈមណ្ឌលគ្រប់គ្រងនិងទប់ស្កាត់រោគឆ្លងរបស់អាមេរិក បានឱ្យដឹងថា ពលរដ្ឋអាមេរិកាំងជាង 1 លាននាក់ បានចាក់វ៉ាក់សាំង Covid-19 រួចហើយ ក្រោយរយៈពេល 10 ថៃដែលបានចាប់ផ្ដើមយុទ្ធនាការចាក់វ៉ាក់សាំងនៅប្រទេសនេះ។

«សហរដ្ឋអាមេរិកនៅថ្ងៃនេះ បានឈានដល់ដំណាក់កាលសំខាន់មួយ។ តំបន់នានាបានរាយការណ៍ថា ពលរដ្ឋជាង 1 លាននាក់ត្រូវបានចាក់វ៉ាក់សាំង Covid-19 លើកដំបូង រាប់ចាប់តាំងពីរដ្ឋាភិបាលបានចាប់ផ្ដើមយុទ្ធនាការកាលពី 10 ថ្ងៃមុន» នេះបើតាមសម្ដីរបស់ លោក Robert Redfield នាយកមជ្ឈមណ្ឌលគ្រប់គ្រងនិងបង្ការជំងឺឆ្លងរបស់សហរដ្ឋអាមេរិក ដែលបានឱ្យដឹងកាលពីថ្ងៃទី 23 ខែធ្នូ។

ចំណែកលោក Moncef Slaoui ទីប្រឹក្សានៃយុទ្ធនាការរហ័សរបស់រដ្ឋាភិបាលអាមេរិក បានឱ្យដឹងដែរថា គោលដៅចាក់វ៉ាក់សាំងឱ្យបាន 20 លាននាក់ក្នុងខែនេះ ពិតជា «ពិបាកសម្រេចបាន»។ ប៉ុន្តែ លោកបន្ថែមថា សហរដ្ឋអាមេរិកកំពុងមានគោលដៅចាក់វ៉ាក់សាំងឱ្យបាន 100 លាននាក់នៅមុនដំណាច់ត្រីមាសទីមួយនៃឆ្នាំ 2021 និង 100 លាននាក់ទៀត នៅក្នុងត្រីមាសទីពីរ។

សូមរំលឹកថា កាលពីថ្ងៃទី 11 ធ្នូ នាយកដ្ឋានគ្រប់គ្រងអាហារនិងឱសថអាមេរិក (FDA) បានអនុម័តលើវ៉ាក់សាំង Covid-19 ដំបូងនៃប្រទេសនេះ ដែលអភិវឌ្ឍដោយក្រុមហ៊ុន Pfizer និង BioNTech។ កាលពីសប្ដាហ៍កន្លងទៅ វ៉ាក់សាំងនេះចំនួន 3 លានដូស ត្រូវបានចែកចាយនៅពាសពេញទឹកដីអាមេរិក។

សហរដ្ឋអាមេរិកគឺជាប្រទេសដែលមានអ្នកឆ្លងវីរុស Covid-19 ច្រើនជាងគេក្នុងពិភពលោក ដោយមានអ្នកជំងឺជាង 19 លាននាក់ ក្នុងនោះមានជាង 334,000 នាក់បានស្លាប់ដោយសារវីរុសនេះ៕

ប្រភព៖ AFP

December 24, 2020

Toyota ថា រថយន្តអគ្គិសនីនាំឱ្យខួចបរិស្ថាន រីឯក្រុមហ៊ុនរថយន្តអគ្គិសនីរំលឹកថា៖ «អស់លោកចង់យកគំរូតាម Nokia?»

ប្រធានក្រុមហ៊ុនផលិតរថយន្តអគ្គិសនីរបស់ចិន Xiaopeng Motors បានឆ្លើយតបទៅនឹងសាររបស់ប្រធានក្រុមហ៊ុនផលិតរថយន្ត Toyota ថា ការដែល ក្រុមហ៊ុនផលិតរថយន្តធម្មតា មើលស្រាលរថយន្តអគ្គិសនី ឬមិនមើលឃើញអំពីការនិយមថ្មី នឹងធ្វើឱ្យពួកគេជាន់ដានក្រុមហ៊ុនផលិតទូរស័ព្ទ Nokia។

លោក Akio Toyoda ដែលជាមេដឹករបស់ក្រុមហ៊ុន Toyota Motor បានឱ្យដឹងនៅក្នុងសន្និបាទចុងឆ្នាំរបស់សមាគមអ្នកផលិតរថយន្តជប៉ុន កាលពីថ្ងៃទី 17 ខែធ្នូថា៖ «យើងផលិតរថយន្តអគ្គិសនីកាន់តែច្រើន បរិមាណនៃឧស្ម័ន carbon dioxide នឹងកាន់តែអាក្រក់ជាងមុន»។

តាមការយល់ឃើញរបស់ Akio Toyoda រថយន្តអគ្គិសនីត្រូវបានគេលើកតម្កើង និងបំប៉ោងហួសហេតុ ហើយអ្នកគាំទ្ររថយន្តអគ្គិសនីមិនបានពិចារណាទៅលើបរិមាណឧស្ម័ន carbon dioxide និងថ្លៃប្ដូរផ្លាស់ដែលរថយន្តអគ្គិសនីបង្កើតឡើង។

សារព័ត៌មាន WSJ ដកស្រង់សម្ដីរបស់លោក Toyoda ឱ្យដឹងថា៖ «បើសិនជាអ្នកនយោបាយនិយាយថា «ចូរយើងទាំងអស់គ្នាឈប់ប្រើរថយន្តប្រើសាំង» តើពួកគេអាចយល់បានថា វាជាអ្វីដែរឬទេ?»។ លោកបន្តថា៖ «នៅពេលរថយន្តទាំងអស់សុទ្ធតែប្រើអគ្គិសនី នោះប្រទេសជប៉ុននឹងមិនមានអគ្គិសនីប្រើប្រាស់នៅក្នុងរដូវក្ដៅ។ នៅក្នុងប្រទេសមួយដូចជាជប៉ុន អគ្គិសនីស្ទើរតែទាំងអស់គឺសុទ្ធតែបានមកពីការដុតធ្យូង និងឧស្ម័នធម្មជាតិ ហើយរថយន្តអគ្គិសនីមិនមានប្រយោជន៍សម្រាប់បរិស្ថាន»។

លោក Akio Toyoda មេដឹករបស់ក្រុមហ៊ុន Toyota Motor

លោក Akio Toyoda ក៏បានសង្កាត់ធ្ងន់ថា បើសិនជប៉ុនប្រញាប់ប្រញាល់ក្នុងការហាមមិនឱ្យមានរថយន្តប្រើសាំង នោះ «ជំនួញបច្ចុប្បន្ននៃវិស័យឧស្សាហកម្មរថយន្តនឹងត្រូវដួលរលំ» បណ្ដាលឱ្យមនុស្សរាប់លាននាក់ត្រូវបាត់បង់ការងារ។ លោកមានការព្រួយបារម្ភថា ការហាមឃាត់រថយន្តប្រើសាំងក៏នឹងធ្វើឱ្យរថយន្តក្លាយជា «ផ្កានៅលើកំពូលភ្នំ» ជារបស់ដែលមនុស្សធម្មតាមិនអាចចាប់យកបាន។

យោបល់របស់ប្រធានក្រុមហ៊ុន Toyota ទំនងជាជាប់ទាក់ទងនឹងគោលនយោបាយថ្មីរបស់រដ្ឋាភិបាលជប៉ុន។ កាលពីដើមខែធ្នូ សារព័ត៌មានជប៉ុនបានចេញផ្សាយថា រាជរដ្ឋាភិបាលប្រទេសនេះ ជិតចេញបទបញ្ជាហាមលក់រថយន្តថ្មីដែលដើរដោយម៉ាស៊ីនចំហេះក្នុង ចាប់ពីឆ្នាំ 2035 ប៉ុន្តែ រថយន្តប្រភេទ hybrid នៅតែបន្តលក់បាន។

ក៏ប៉ុន្តែ មិនយូរប៉ុន្មានក្រោយការបញ្ចេញយោបល់របស់លោក Akio Toyoda ពោលគឺនៅថ្ងៃទី 21 ខែធ្នូ ប្រធានក្រុមហ៊ុនរថយន្តអគ្គិសនី Xiaopeng Motor គឺលោក He Xiaopeng បានបង្ហោះនៅលើបណ្ដាញសង្គម Weibo របស់ចិន នូវរូបភាពដែលថតពីអត្ថបទសារព័ត៌មានដែលនិយាយអំពីប្រសាសន៍របស់លោក Akio Toyoda អមជាមួយនឹងរឿងរ៉ាវមួយយ៉ាងជូរចត់ និងគួរឱ្យពិចារណា ទាក់ទងនឹងការទិញក្រុមហ៊ុន Nokia ពីសំណាក់ Microsoft កាលពីឆ្នាំ 2014។

ប្រធានក្រុមហ៊ុនរថយន្តអគ្គិសនី Xiaopeng Motor គឺលោក He Xiaopeng

ភ្លាមៗនោះ ក្រុមអ្នកលេងបណ្ដាញសង្គមនៃប្រទេសចិន ក៏យល់ថា រឿងរ៉ាវដែលលោក He Xiaopeng បានបង្ហោះ គឺបានប្រដូចបណ្ដាក្រុមហ៊ុនរថយន្តអគ្គិសនីទៅនឹងក្រុមហ៊ុន Microsoft និងប្រដូចបណ្ដាក្រុមហ៊ុនរថយន្តប្រើសាំងដែលមើលស្រាលក្រុមហ៊ុនរថយន្តអគ្គិសនី ឬមិនផ្ដោតសំខាន់ទៅលើនិន្នាការរីកចម្រើននៃអគ្គិសនី ដូចទៅនឹងក្រុមហ៊ុន Nokia។

គិតមកដល់បច្ចុប្បន្ន ប្រទេស និងតំបន់ចំនួន 22 ក្នុងពិភពលោក បានប្រកាសអំពីកាលបរិច្ឆេទសម្រាប់ការចេញបទបញ្ជាហាមរថយន្តដែលប្រើប្រាស់ម៉ាស៊ីនចំហេះក្នុង ក្នុងនោះ អឺរ៉ុបមាន 13 ប្រទេស ដែលក្នុងចំណោមនេះ ប្រទេសហូឡង់ ន័វ៉ែស និងអាល្លឺម៉ង់ បានចាប់ផ្ដើមអនុវត្តតាំងពីឆ្នាំ 2016។ រាប់ចាប់ពីដើមឆ្នាំ 2020 នេះ អង់គ្លេស និងសហរដ្ឋអាមេរិក ក៏បានយកតម្រាប់តាមប្រទេសទាំងនោះផងដែរ៕

ប្រភព៖ iFeng

December 24, 2020

មហាសេដ្ឋី Elon Musk ធ្លាប់ព្យាយាមលក់ Tesla ឱ្យ Apple តែមិនបានសម្រេច

CEO របស់ក្រុមហ៊ុនផលិតរថយន្ត Tesla បានឱ្យដឹងថា លោកចង់លក់ក្រុមហ៊ុននេះទៅឱ្យ Apple «នៅក្នុងកាលៈទេសៈដ៏ខ្មៅងងឹតបំផុតរបស់កម្មវិធី Medel 3» ប៉ុន្តែមិនបានសម្រេច។

«ខ្ញុំបានទាក់ទងទៅកាន់លោក Tim Cook ដើម្បីសុំពិភាក្សាគ្នាអំពីលទ្ធភាពនៃការលក់ Tesla ឱ្យ Apple ជាមួយនឹងតម្លៃស្មើនឹង 1/10 នៃតម្លៃបច្ចុប្បន្នរបស់យើង» លោក Musk សរសេរនៅលើ Twitter កាលពីថ្ងៃទី 22 ធ្នូ ដូច្នេះ។ លោកបន្តថា៖ «ប៉ុន្តែ គាត់បានបដិសេធអំពីកិច្ចពិភាក្សានេះ»។

ការបង្ហើបខាងលើរបស់លោក Musk ត្រូវបានធ្វើឡើងបន្ទាប់ពី Reuters បានចុះផ្សាយកាលពីមុននោះមួយថ្ងៃថា Apple កំពុងមានគម្រោងផលិតរថយន្តអគ្គិសនី បើកបរដោយស្វ័យប្រវត្ត ដែលប្រើប្រាស់អាគុយបច្ចេកវិទ្យាថ្មី។ លោក Musk និយាយថា ព័ត៌មានរបស់ Reuters ជា «រឿងចម្លែក បើសិនវាជាការពិត»។ ប៉ុន្តែ ព័ត៌មានដែលបានចុះផ្សាយដោយ Reuters ក៏បានធ្វើឱ្យមូលបត្រ Tesla ត្រូវធ្លាក់ថ្លៃជាង 6% នៅក្នុងថ្ងៃដំបូងដែលក្រុមហ៊ុននេះបានចូលរួមក្នុងសន្ទស្សន៍ S&P 500។

Tesla Model 3 បានបង្ហាញខ្លួនក្នុងទីផ្សារកាលពីឆ្នាំ 2007។ មុននោះ រថយន្តម៉ូដែលនេះធ្លាប់ជួបប្រទះបញ្ហាជាច្រើនទាក់ទងនឹងការផលិត និងបញ្ហាផ្សេងមួយចំនួនទៀត។ ប៉ុន្តែ បច្ចុប្បន្ន ម៉ូដែលរថយន្តនេះបានក្លាយជារថយន្តទំនើបដែលបានលក់ដាច់ជាងគេនៅសហរដ្ឋអាមេរិក ជួយឱ្យ Tesla ក្លាយជាក្រុមហ៊ុនផលិតរថយន្តដែលមានតម្លៃទុនខ្ពស់ជាងគេបំផុតក្នុងពិភពលោក។

សំណេររបស់លោក Musk ខាងលើ មកដល់ពេលនេះ មិនត្រូវបានបញ្ជាក់ជាផ្លូវការណាមួយនៅឡើយ។ ក៏ប៉ុន្តែ ការលោតឆ្លងវិស័យចូលទៅក្នុងទីផ្សារផលិតរថយន្ត តែងតែជួបការលំបាកខ្លាំង។ លោក Musk ធ្លាប់បានឱ្យដឹងថា នៅក្នុងអំឡុង 17 ឆ្នាំមកនេះ Tesla វិះនឹងត្រូវក្ស័យធនជាច្រើនដងមកហើយ។ ក្រុមហ៊ុននេះ ក៏ទើបតែមានប្រាក់ចំណេញប្រចាំឆ្នាំចាប់ពីឆ្នាំ 2019 តែប៉ុណ្ណោះ៕

ប្រភព៖ CNN

December 24, 2020

អាចម៍ផ្កាយចំនួន 3 ដុំ នឹងហោះកាត់មុខផែនដីនៅថ្ងៃបុណ្យណូអែល

អាចម៍ផ្កាយដែលធំជាងគេក្នុងចំណោមអាចម៍ផ្កាយចំនួន 3 ដុំ មកពីទីអវកាស នឹងហោះតម្រង់មកកាន់ផែនដីក្នុងល្បឿន 10 គីឡូម៉ែត្រក្នុង 1 ម៉ោង។

អាចម៍ផ្កាយដែលមានឈ្មោះថា 2014 SD224 (501647) ត្រូវបានរកឃើញកាលពីខែកញ្ញា ឆ្នាំ 2014 និងត្រូវបានចាត់ចូលទៅក្នុងប្រភេទអាចម៍ផ្កាយ Aten ដែលមានន័យថា គន្លងគោចររបស់វាតែងតែហោះកាត់មុខផែនដី។ អាចម៍ផ្កាយ 501647 នេះ ត្រូវបានក្រុមអ្នកវិទ្យាសាស្ត្រប្រមាណឃើញថា មានអង្កត់ផ្ចិតចាប់ពី 91-210 ម៉ែត្រ ដោយយោងទៅតាមកម្រិតនៃការចាំងប្លាតពន្លឺ ប៉ុន្តែពួកគេជឿជាក់ថា ប្រវែងពិតរបស់វាគឺប្រហែល 150 ម៉ែត្រ។

មជ្ឈមណ្ឌលសង្កេតវត្ថុអវកាសដែលនៅក្បែរផែនដីរបស់អង្គការអវកាសអាមេរិក (NASA) ក៏បានគន់គូរឃើញថា 2014 SD224 នឹងហោះមកក្បែរផែនដីបំផុត នៅវេលាយប់នៃថ្ងៃទី 25 ធ្នូស្អែកនេះ។ 2014 SD224 នឹងមិនបង្កគ្រោះថ្នាក់អ្វីដល់ផែនដីឡើយ ព្រោះថា វានឹងមានចម្ងាយពីផែនដីដល់ទៅ 3 លានគីឡូម៉ែត្រឯណោះ។ ប៉ុន្តែ សម្រាប់ NASA ការហោះមកក្បែរបែបនេះ សុទ្ធតែត្រូវបានចាត់ចូលក្នុងបញ្ជីអាចម៍ផ្កាយដែល “មានលទ្ធភាពបង្កគ្រោះថ្នាក់” នៅពេលគេនិយាយអំពីការខូចខាតទ្រង់ទ្រាយតំបន់ដែលវាអាចបង្កឡើង បើសិនហោះមកបុកផែនដី។

1 ឯកតាតារាសាស្ត្រ (Astronomical_unit) មានចម្ងាយប្រហាក់ប្រហែលពីផែនដីទៅកាន់ព្រះអាទិត្យ

2014 SD224 មិនមែនជា «ភ្ញៀវ» តែមួយគត់ដែលមក «សួរសុខទុក្ខ» ផែនដី នៅក្នុងរដូវបុណ្យណូអែលឆ្នាំនេះទេ។ អាចម៍ផ្កាយចំនួន 2 ដុំទៀតដែលមានទំហំតូចជាង 2014 SD224 ក៏នឹងហោះមកក្បែរផែនដីនៅក្នុងយប់នៃថ្ងៃទី 25 ធ្នូ នោះគឺ 2020 XY និង 2020 YM1។ អាចម៍ផ្កាយទាំង 2 ដុំនេះ សុទ្ធតែជាអាចម៍ផ្កាយដែលហោះក្បែរផែនដី (NEO) ដូចទៅនឹង 2014 SD224 ប៉ុន្តែពួកវាមិនបង្កគ្រោះថ្នាក់អ្វីឡើយ។

NEO ដែលមានលទ្ធភាពអាចបង្កគ្រោះថ្នាក់ដល់ផែនដី នោះគឺអាចម៍ផ្កាយដែលគោចរក្នុងរយៈចម្ងាយ 0,05 នៃឯកតាតារាសាស្ត្រ (1 ឯកតាតារាសាស្ត្រមានចម្ងាយជិត 15 លានគីឡូម៉ែត្រ) និងមានអង្កត់ផ្ចិតប្រវែងជាង 140 ម។ យោងតាម Planetary.org អាចម៍ផ្កាយប្រភេទ NEO ដែលត្រូវបានគេរកឃើញ មានចំនួនជាង 18,000 ដុំ។ កាលពីខែមេសា ឆ្នាំ 2019 អង្គការ NASA បានចុះកិច្ចព្រមព្រៀងមួយដែលមានតម្លៃ 69 លានដុល្លារ ជាមួយនឹងក្រុមហ៊ុន SpaceX របស់លោក Elon Musk ដើម្បីបំពេញបេសកកម្មមួយដែលមានភារកិច្ចបង្វែងទិសដៅរបស់អាចម៍ផ្កាយមួយដុំដែលមានឈ្មោះថា DART ក្នុងបំណងការពារមិនឱ្យវាហោះឆ្ពោះត្រង់មកកាន់ផែនដី៕

ប្រភព៖ Fox News

December 24, 2020

Author: សឿន សំណាង