សឿន សំណាង - La Reine Media

គេហដ្ឋានចំនួន 3 កន្លែងដែលត្រូវបានលក់ក្នុងតម្លៃខ្ពស់ជាងគេនៅសហរដ្ឋអាមេរិកនាឆ្នាំ 2020

អ្នកដែលបានចំណាយប្រាក់ច្រើនជាងគេបង្អស់ដើម្បីទិញផ្ទះមួយខ្នងនៅសហរដ្ឋអាមេរិកក្នុងឆ្នាំ 2020 នេះគឺជាមហាសេដ្ឋីលំដាប់ទីមួយក្នុងពិភពលោក និងជាម្ចាស់នៃក្រុមហ៊ុនផ្សារអនឡាញ Amazon។

ទីមួយ៖ Warner Estate (ក្នុងទីក្រុង Los Angeles រដ្ឋ California សហរដ្ឋអាមេរិក)

តម្លៃទិញដូរ៖ 165 លានដុល្លារអាមេរិក

កាលពីខែមេសា ឆ្នាំ 2020 លោក Jeff Bezos ដែលជា CEO របស់ក្រុមហ៊ុន Amazon បានសម្រេចចិត្តទិញភូមិគ្រឹះមួយដែលមានឈ្មោះថា Warner Estate ដែលត្រូវបានសាងសង់ឡើងសម្រាប់លោក Jack Warner ដែលជាអតីតប្រធានក្រុមហ៊ុន Warner Bros កាលពីទសវត្សរ៍ឆ្នាំ 1930។ នៅមុនពេលត្រូវបានលក់មកឱ្យ Jeff Bezos ម្ចាស់ចុងក្រោយរបស់ភូមិគ្រឹះនេះគឺមានឈ្មោះថា David Gefen ។

ភូមិគ្រឹះដែលត្រូវបានសាងសង់នៅលើផ្ទៃដីទំហំ 3.6 ហិកតា និងស្ថិតនៅក្នុងតំបន់ Benedict Canyon នេះ មានទីលានវាយកូនគោល ទីលានវាយកូនបាល់ ផ្ទះសម្រាប់ទទួលភ្ញៀវ និងសួនច្បារដែលមានទំហំធំផងដែរ។

ទីពីរ៖ Jeffrey Katzenberg Estate (នៅទីក្រុង Beverly Hills រដ្ឋ California)

តម្លៃទិញដូរ៖ 125 លានដុល្លារអាមេរិក

កាលពីខែសីហា អ្នកផលិតភាពយន្ត Jeffrey Katzenberg បានលក់ផ្ទះរបស់ខ្លួននៅទីក្រុង Beverly Hills ក្នុងតម្លៃ 125 លានដុល្លារ ទៅឱ្យ Jan Koum ដែលជាសហស្ថាបនិកម្នាក់របស់កម្មវិធីផ្ញើសារ WhatsApp។ ផ្ទះនេះមានទំហំ 2,400 ម៉ែត្រការ៉េ ស្ថិតនៅលើផ្ទៃដីទំហំ 2.8 ហិកតា។

ទីបី៖ លំនៅដ្ឋានដែលស្ថិតនៅជាន់លើគេបង្អស់ (Penthouse) នៃអគារ 220 Central Park South (Manhattan, New York)

តម្លៃទិញដូរ៖ 99 លានដុល្លារអាមេរិក

លំនៅដ្ឋានដែលហៅថា penthouse ដែលមានបន្ទប់គេងចំនួន 4 និងមានទំហំ 910 ម៉ែត្រការ៉េ ស្ថិតនៅលើ 220 Central Park South ដែលជាអគារមួយត្រូវបានរចនាដោយក្រុមហ៊ុនស្ថាបត្យកម្ម Robert A.M. Stern Architects នេះ ត្រូវបានលក់ឱ្យម្ចាស់ថ្មីកាលពីខែកក្កដា ឆ្នាំ2020។ វាត្រូវបានទិញដំណាលគ្នាជាមួយនឹងជាន់បន្ទាប់ផ្ទាល់ ដែលត្រូវបានប្រើប្រាស់សម្រាប់ទទួលភ្ញៀវ ឬកន្លែងស្នាក់នៅរបស់ម្ចាស់ penthouse ដូច្នេះហើយទើបតម្លៃសរុបរបស់វា បានឡើងដល់ជិត 102 លានដុល្លារ។

នេះគឺជាការទិញដូរគេហដ្ឋានដែលមានតម្លៃខ្ពស់ជាងគេលំដាប់ទីបីនៅតំបន់ Manhattan។ ក៏ប៉ុន្តែ អត្តសញ្ញាណរបស់អ្នកទិញ penthouse នេះ មិនត្រូវបានគេបង្ហើបឱ្យដឹងនោះទេ៕

ប្រភព៖ WSJ

December 30, 2020

ផ្កាយរណបធ្វើពីឈើដំបូងគេបង្អស់ក្នុងពិភពលោក

សាកលវិទ្យាល័យ Kyoto កំពុងសហការជាមួយនឹងក្រុមហ៊ុនព្រៃឈើមួយដើម្បីអភិវឌ្ឍផ្កាយរណបធ្វើអំពីឈើ និងបញ្ជូនវាឡើងទៅកាន់គន្លងគោចរក្នុងឆ្នាំ 2023 ក្នុងបំណងកាត់បន្ថយសំរាមក្នុងទីអវកាស។

Takao Doi ដែលជាអ្នកអវកាសជនជាតិជប៉ុន និងជាសាស្ត្រាចារ្យនៅសាកលវិទ្យាល័យ Kyoto បានឱ្យដឹងថា គុណប្រយោជន៍របស់ផ្កាយរណបធ្វើអំពីឈើ នោះគឺថា បើសិនជាវាធ្លាក់មកកាន់ផែនដី ហើយឆេះ វានឹងមិនបញ្ចេញសារធាតុដែលបង្កផលប៉ះពាល់ដូចទៅនឹងផ្កាយរណបធ្វើអំពីលោហធាតុ។

«យើងយកចិត្តទុកដាក់ទៅលើភាពជាក់ស្ដែងដែលថា រាល់ផ្កាយរណបដែលធ្លាក់មកកាន់បរិយាកាសផែនដី សុទ្ធតែត្រូវឆេះ ហើយបង្កើតបានជាគ្រាប់អុកស៊ីដអាលុយមីញ៉ូមល្អិតៗ អណ្ដែតនៅក្នុងស្រទាប់បរិយាកាសខាងលើជាច្រើនឆ្នាំ ដែលនេះនឹងបង្កផលប៉ះពាល់ដល់បរិស្ថានលើផែនដី» លោក Takao Doi បកស្រាយដូច្នេះ។

សាកលវិទ្យាល័យ Kyoto និងក្រុមហ៊ុន Sumitomo Forestry កំពុងរៀបចំគម្រោងធ្វើពិសោធន៍ដើម្បីឱ្យដឹងថា ឈើប្រភេទណាដែលមានគុណភាពខ្ពស់ជាងគេក្នុងការស៊ូទ្រាំបានជាមួយនឹងបរិស្ថាននៅទីអវកាស និងដើម្បីអភិវឌ្ឍប្រភេទឈើទាំងនោះ ឱ្យកាន់តែមានគុណភាពដែលអាចទប់ទល់បានជាមួយនឹងសីតុណ្ហភាព និងពន្លឺព្រះអាទិត្យនៅក្នុងលម្ហអវកាស។

សំរាមអវកាសបានក្លាយជាបញ្ហាគួរឱ្យព្រួយបារម្ភសម្រាប់ក្រុមអ្នកវិទ្យាសាស្ត្រ។ «បំណែកនៃសំរាមនៅទីអវកាសកំពុងតែកើនឡើងពីមួយថ្ងៃទៅមួយថ្ងៃ។ ការប៉ះទង្គិចគ្នារវាងបំណែកសំរាមអវកាសនានាដែលមានទម្ងន់ចាប់ពី 1 ដល់ 10 តោន បង្កឱ្យមានហានិភ័យខ្ពស់ដល់បរិស្ថាន» នេះបើតាម Daniel Oltrogge ប្រធានមជ្ឈមណ្ឌស្ដង់ដានិងការច្នៃប្រឌិតក្នុងវិស័យអវកាស (CSSI / Center for Space Standards & Innovation)។

យោងតាម Oltrogge បច្ចុប្បន្ន មានវត្ថុធំជាង 1 សម ចំនួនជាង 760,000 ដុំ កំពុងស្ថិតនៅក្នុងគន្លងគោចររបស់ផែនដី។ តួលេខនេះនឹងចេះតែកើនឡើងជាបន្តបន្ទាប់ ដោយសារតែក្រុមហ៊ុននានាបន្តបាញ់បង្ហោះផ្កាយរណប និងបណ្ដុំផ្កាយរណប។ ក្រុមហ៊ុន SpaceX របស់លោក Elon Musk បានបាញ់បង្ហោះផ្កាយរណបអ៊ីនធើណិតល្បឿនលឿន Starlink ចំនួនជិត 900 គ្រឿងទៅកាន់គន្លងគោចរ និងកំពុងមានគម្រោងបាញ់បង្ហោះផ្កាយរណបថ្មីសរុបចំនួន ចាប់ពី 12,000 ទៅ 14,000 គ្រឿងទៀតនាពេលខាងមុខ៕

ប្រភព៖ Business Insider

December 30, 2020

កងទ័ពអាមេរិកទទួលបានក្បាលគ្រាប់នុយក្លេអែរដែលធ្លាប់ត្រូវបាន Biden ជំទាស់

កងទ័ពជើងទឹកសហរដ្ឋអាមេរិក ទទួលបានក្បាលគ្រាប់នុយក្លេអែរដែលមានកម្លាំងបំផ្លាញកម្រិតទាប W76-2 ដែលជាប្រភេទអាវុធធ្លាប់ត្រូវបានលោក Joe Biden រិះគន់ថាជា «គំនិតអាក្រក់»។

នាយកដ្ឋានសន្តិសុខនុយក្លេអែរជាតិអាមេរិកាំង (NNSA) ដែលជាស្ថាប័នគ្រប់គ្រងឃ្លាំងអាវុធនុយក្លេអែររបស់សហរដ្ឋអាមេរិក កាលពីថ្ងៃទី 28 ខែធ្នូកន្លងទៅ បានឱ្យដឹងថា ខ្លួនបានប្រគល់ក្បាលគ្រាប់នុយក្លេអែរ W76-2 ទាំងអស់ទៅឱ្យកងទ័ពជើងទឹកសហរដ្ឋអាមេរិករួចហើយ ដើម្បីបំពាក់ទៅលើកាំជ្រួចផ្លោងរបស់នាវាមុជទឹក Trident D5។ ក៏ប៉ុន្តែ NNSA មិនបានបង្ហើបឱ្យដឹងអំពីចំនួនក្បាលគ្រាប់ដែលត្រូវបានផលិត និងបំពាក់លើកាំជ្រួច Trident D5 នេះទេ។

ការប្រគល់ក្បាលគ្រាប់នុយក្លេអែរ W76-2 ខាងលើនេះ ត្រូវបានធ្វើឡើងចំពេលដែលលោក Trump នៅមានឱកាសតែប៉ុន្មានសប្ដាហ៍ទៀតប៉ុណ្ណោះក្នុងការដឹកនាំប្រទេស។ លោក Biden ធ្លាប់បានជំទាស់ទៅនឹងការអនុម័តលើការផលិត និងពង្រាយប្រភេទក្បាលគ្រាប់នុយក្លេអែរនេះ ខណៈដែលរដ្ឋាភិបាលរបស់លោក Trump បែរជាគាទ្រ និងជំរុញឱ្យអនុវត្តគំនិតនេះ។

W76-2 ត្រូវបានអភិវឌ្ឍនិងផលិតទៅតាមសំណើនៃរដ្ឋាភិបាលរបស់លោក Trump ក្រោយពីរបាយការណ៍របស់ NPR (អង្គភាពវាយតម្លៃស្ថានភាពអាវុធនុយក្លេអែរអាមេរិក) កាលពីឆ្នាំ 2018 បានបង្ហាញថា សហរដ្ឋអាមេរិកមិនត្រឹមតែមានបំណងធ្វើទំនើបកម្មលើអាវុធនុយក្លេអែររបស់ខ្លួនដែលកំពុងហួសសម័យប៉ុណ្ណោះទេ តែថែមទាំងស្រាវជ្រាវផលិតអាវុធថ្មីៗ ដើម្បីទប់ទល់នឹងរុស្ស៊ី ចិន និងប្រទេសជាសត្រូវជាច្រើនផ្សេងទៀត។

ឧបករណ៍ផ្ទុកក្បាលគ្រាប់នុយក្លេអែរ W76-1 ក្រោយពីត្រូវបានពិនិត្យរួចរាល់

របាយការណ៍បានអះអាងថា ទីក្រុងវ៉ាស៊ីងតោន អាចប្រើប្រាស់អាវុធនុយក្លេអែរកម្លាំងបំផ្លាញកម្រិតទាបដើម្បីឆ្លើយតបនឹងការវាយប្រហារដែលប្រើអាវុធយុទ្ធសាស្ត្រមិនមែននុយក្លេអែរ មានដូចជា ការវាយឆ្មក់សំដៅលើហេដ្ឋារចនាសម្ព័ន្ធ និងពលរដ្ឋអាមេរិកាំង ក៏ដូចជាប្រទេសសម្ព័ន្ធមិត្ត និងប្រទេសជាដៃគូយុទ្ធសាស្ត្រជាដើម។

ក្បាលគ្រាប់ W76-2 ត្រូវបានផលិតរួចរាល់ជាស្ថាពរលើកដំបូងកាលពីខែកុម្ភ ឆ្នាំ 2019។ នាវាមុជទឹក USS Tennessee របស់សហរដ្ឋអាមេរិក កាលពីដើមឆ្នាំនេះ ត្រូវបានគេដឹងថា បានចេញទៅល្បាតសមុទ្រជាមួយនឹងកាំជ្រួចផ្លោង Trident D5 ដែលមានបំពាក់ក្បាលគ្រាប់នុយក្លេអែរ W76-2។ រយៈពេលនៃការផលិត និងប្រគល់អាវុធនេះ ស៊ីពេលអស់ត្រឹមតែ 17 ខែប៉ុណ្ណោះ ខណៈដែលការផលិតផ្កាយគ្រាប់ម៉ូដែលមុនៗ ស៊ីពេលអស់ជាង 10 ឆ្នាំ ដែលប្រការនេះបង្ហាញថា W76-2 ទំនងជាត្រូវបានកែលម្អខ្លះៗពីក្បាលគ្រាប់ W76-1 ដែលមានស្រាប់។

W76-2 មានកម្លាំងបំផ្លាញប្រហាក់ប្រហែលនឹងរំសេវ TNT ចាប់ពី 5,000 ដល់ 7,000 តោន ដែលនេះគឺជាកម្លាំងកម្រិតទាបបើធៀបជាមួយនឹង 100,000 តោន របស់ម៉ូដែល W76-1 ឬ 455,000 តោន របស់ក្បាលគ្រាប់ W88 ដែលបំពាក់លើកាំជ្រួចផ្លោត Trident D5។ ក៏ប៉ុន្តែ W76-2 នឹងត្រូវបានបាញ់ទៅដល់គ្រប់ទីតាំងនៅលើពិភពលោកដោយប្រើពេលយ៉ាងខ្លី៕

ប្រភព៖ Drive

December 30, 2020

គ្រោះថ្នាក់ធ្លាក់យន្តហោះនឹងលែងមានទៀតហើយ! Airbus ឧទ្ទេសនាមយន្តហោះអ៊ីដ្រូសែនដែលអាចដោះប្រអប់ម៉ាស៊ីនចេញពីស្លាបដោយស្វ័យប្រវត្តិ

ក្រុមហ៊ុនអភិវឌ្ឍ និងផលិតយន្តហោះ Airbus បានប្រកាសបង្ហាញអំពីគំរូយន្តហោះដំណើរការដោយថាមពលអ៊ីដ្រូសែន ដែលមានប្រអប់ម៉ាស៊ីនដាច់ដោយឡែក និងងាយស្រួលដោះចេញ នៅពេលជួបបញ្ហាពេលកំពុងហោះហើរ។

ថ្មីៗនេះ ក្រុមហ៊ុន Airbus បានឧទ្ទេសនាមប្រភេទយន្តហោះដំណើរការដោយអ៊ីដ្រូសែនដែលមានលក្ខណពិសេសជាងមុន ដោយប្រព័ន្ធថាមពលអ៊ីដ្រូសែនត្រូវបានដាក់នៅក្នុងប្រអប់ដាច់ដោយឡែក ដែលងាយឱ្យគេដោះចេញ និងបំពាក់ឡើងវិញនៅលើស្លាបយន្តហោះ។

ប្រអប់នេះនឹងមានផ្ទុកឧស្ម័ន និងប្រព័ន្ធម៉ាស៊ីនដោយឡែករបស់វា អនុញ្ញាតឱ្យ Airbus យកធុងដាក់ឥន្ធនៈទាំងអស់ចេញពីតួយន្តហោះ ដែលប្រការនេះនឹងជួយឱ្យយន្តហោះមានកន្លែងទំនេរច្រើនជាងមុនសម្រាប់ដាក់អីវ៉ាន់ និងកៅអីសម្រាប់អ្នកដំណើរ។

Airbus នឹងបំពាក់ប្រអប់ម៉ាស៊ីនចំនួន 3 នៅលើស្លាបនីមួយៗរបស់យន្តហោះ

ប្រអប់ម៉ាស៊ីន និងឥន្ធនៈដាច់ដោយឡែកនេះ ក៏ជួយកែលម្អផ្នែកសុវត្ថិភាពដល់យន្តហោះផងដែរ ព្រោះថា បើសិនប្រអប់ម៉ាស៊ីនណាមួយត្រូវខូច ឬឆេះ អ្នកបើកបរអាចឈប់ប្រើប្រាស់ ឬទម្លាក់វាចោល រួចធ្វើឱ្យមានតុល្យភាពលើកម្លាំងរុញច្រានឡើងវិញ តាមរយៈប្រអប់ម៉ាស៊ីនដែលនៅសល់។

តាមគម្រោង Airbus នឹងបំពាក់ប្រអប់ម៉ាស៊ីនចំនួន 3 ទៅលើស្លាបនីមួយៗ ហើយប្រអប់នីមួយៗមានធុងអ៊ីដ្រូសែនរាវអមជាមួយនឹងប្រព័ន្ធទប់ទល់កម្ដៅដោយឡែក។ ក្រៅពីនេះ ប្រអប់ម៉ាស៊ីនក៏នឹងមានអាគុយថាមពលមួយគ្រាប់ ឧបករណ៍អេឡិកត្រូនិកមួយឈុត និងម៉ាស៊ីនមួយគ្រឿងផងដែរ។

នៅលើដី គេអាចប្ដូរប្រអប់ម៉ាស៊ីនមួយ ជំនួសដោយប្រអប់ម៉ាស៊ីនមួយផ្សេងទៀត និងបំពេញថាមពលបានដោយងាយ។ ប្រការនេះនឹងជួយកាត់បន្ថយពេលវេលាបានច្រើននៅក្នុងការចាក់ឥន្ធនៈ ដែលជាដំណាក់កាលមួយ ទាមទារឱ្យមានប្រព័ន្ធស្មុគស្មាញដើម្បីរក្សាអ៊ីដ្រូសែនឱ្យមានសីតុណ្ហភាពត្រជាក់ខ្លាំង៕

ប្រភព៖ Next

December 30, 2020

ថតបានទិដ្ឋភាពយ៉ាងច្បាស់និងស្រស់ស្អាតនៃកាឡាក់ស៊ីមួយដែលមានចម្ងាយ 65 លានឆ្នាំពន្លឺពីផែនដី

កែវយឹតអវកាស Hubble បានបញ្ជូនរូបថតថ្មីនិងស្រស់ស្អាតនៃកាឡាក់ស៊ីរាងគូទខ្យង ដែលអ្នកវិទ្យាសាស្ត្រដាក់ឈ្មោះឱ្យថា NGC 2217។

មានចម្ងាយប្រមាណ 65 លានឆ្នាំពន្លឺពីផែនដី និងស្ថិតនៅក្នុងកញ្ចុំផ្កាយ Canis Major កាឡាក់ស៊ី NGC 2217 ដែលមានរាងដូចគូទខ្យង់និងមានខ្សែធូលីកាត់ទទឹងមួយកំណាត់ដ៏ពិសេសនេះ គឺជាកាឡាក់ស៊ីមួយដែលមានទំហំប្រហាក់ប្រហែលនឹងកាឡាក់ស៊ី Milky Way របស់មនុស្ស ដោយមានអង្កត់ផ្ចិតប្រវែង 100,000 ឆ្នាំពន្លឺ។

នៅក្នុងរូបថតថ្មីដែលទើបត្រូវបានទីភ្នាក់ងារអវកាសអាមេរិក (NASA) និងទីភ្នាក់ងារអវកាសអឺរ៉ុប (ESA) យើងឃើញថាមានគន្លងពណ៌ប្រផេះដ៏វែងមួយកំណាត់នៅតំបន់កណ្ដាល និងព័ទ្ធជុំវិញដោយរង្វង់មូលរាងពងក្រពើ ជាកន្លែងប្រមូលផ្ដុំនៃផ្កាយយ៉ាងច្រើនសន្ធឹក ដែលមានតួនាទីសំខាន់នៅក្នុងវិវត្តន៍របស់កាឡាក់ស៊ី។

«កំណាត់ខ្សែទទឹងរបស់ NGC 2217 កំពុងនាំយកឧស្ម័ន និងធូលីពីថាសជុំវិញ ចូលទៅក្នុងចំណុចកណ្ដាលរបស់កាឡាក់ស៊ី ដើម្បីបង្កបង្កើតផ្កាយថ្មី និងចិញ្ចឹមប្រហោងខ្មៅខ្នាតយក្ស។ កាឡាក់ស៊ីធំៗស្ទើរតែទាំងអស់ សុទ្ធតែមានប្រហោងខ្មៅយក្សនៅចំកណ្ដាល និងមានម៉ាសធ្ងន់ជាងព្រះអាទិត្យចាប់ពីរាប់រយ រហូតដល់ជាង 1 ពាន់លានដងឯណោះ»។

ទិដ្ឋភាពខាងលើ ត្រូវបានថតដោយកាមេរ៉ាសង្កេតកម្រិតខ្ពស់ (ACS) របស់តេឡេស្កុបអវកាស Hubble និងត្រូវបានបន្ថែមពណ៌ដោយយោងទៅតាមទិន្នន័យពីកែវយឹតសង្កេតទិដ្ឋភាពទូលាយ & ប្រព័ន្ធប្រតិកម្មរហ័ស (PanSTARRS)៕

ប្រភព៖ SciTech Daily

December 30, 2020

ស្ថានភាព Covid-19 នៅកម្ពុជា និងពិភពលោក សម្រាប់ថ្ងៃទី 30ធ្នូ 2020

ពិភពលោកបានរកឃើញអ្នកឆ្លងវីរុស Covid-19 សរុបជាង 82,291,830 នាក់ ក្នុងនោះកម្ពុជាមាន 364 ករណី។

គិតមកដល់ព្រឹកថ្ងៃទី 30 ខែធ្នូ ឆ្នាំ 2020 នេះ កម្ពុជាបានធ្វើតេស្តរកឃើញអ្នកវិជ្ជមាននឹង Covid-19 សរុបចំនួន 364 នាក់ ក្នុងនោះមាន 361 នាក់បានជាសះស្បើយ និង 3 នាក់កំពុងសម្រាកព្យាបាលនៅមន្ទីរពេទ្យ។ លទ្ធផលនៃការធ្វើតេស្តកាលពីថ្ងៃទី 29 ខែធ្នូ បានបង្ហាញថា ពុំមានករណីឆ្លងថ្មីនោះទេ ប៉ុន្តែ មានអ្នកជាសះស្បើយចំនួន 1 នាក់បន្ថែមទៀត។ កម្ពុជាពុំទាន់មានករណីបាត់បង់ជីវិតដោយសារការឆ្លងវីរុស Covid-19 នៅឡើយ។

នៅទូទាំងពិភពលោកឯណោះវិញ គិតត្រឹមព្រឹកនេះដែរ មានអ្នកវិជ្ជមានសរុបចំនួន 82,291,833 នាក់ ក្នុងនោះមានអ្នកជំងឺ 1,795,172 នាក់បានស្លាប់ និង58,311,965 នាក់បានជាសះស្បើយ ខណៈដែលអ្នកជំងឺ 105,936 នាក់កំពុងមានអាការធ្ងន់ធ្ងរនៅក្នុងចំណោមអ្នកជំងឺទាំង 22,184,696 នាក់ ដែលកំពុងសម្រាកព្យាបាល។

ប្រទេសដែលមានអ្នកជំងឺ Covid-19 លើសពី 1 លាននាក់ មានចំនួន 18 ប្រទេស រួមមាន សហរដ្ឋអាមេរិក ឥណ្ឌា ប្រេស៊ីល រុស្ស៊ី បារាំង អង់គ្លេស ទួរគី អ៊ីតាលី អេស្ប៉ាញ អាល្លីម៉ង់ កូឡុំប៊ី អាហ្សង់ទីន ម៉ិកស៊ិក ប៉ូឡូញ អ៊ីរ៉ង់ អ៊ុយក្រែន អាហ្វ្រិកខាងត្បូង និងប្រទេសប៉េរូ៕

ប្រភព៖ ក្រសួងសុខាភិបាលកម្ពុជា, Worldometers

December 30, 2020

Elon Musk ព្យាករថា ពលរដ្ឋដែលរស់នៅលើពិភពព្រះអង្គារ នឹងទូទាត់ដោយប្រើប្រាក់ឌីជីថល

នេះប្រហែលជាមូលហេតុដែលនាំឱ្យមហាសេដ្ឋី Elon Musk យកចិត្តទុកដាក់ទៅលើរូបិយវត្ថុ bitcoin នាពេលថ្មីៗនេះ។

មហាសេដ្ឋីអាមេរិកាំងដើមកំណើតអាហ្វ្រិកខាងត្បូង លោក Elon Musk ដែលជា CEO របស់ក្រុមហ៊ុនអវកាស SpaceX កំពុងតែមានគម្រោងនាំមនុស្សឡើងទៅកាន់ភពព្រះអង្គារចាប់ពីឆ្នាំ 2024 ជាមួយនឹងគោលដៅបង្កើត «ទីក្រុងស្វ័យគ្រប់គ្រងមួយនៅលើភពព្រះអង្គារ»។ ដើម្បីមានទីក្រុងបែបនេះ វាត្រូវតែគ្រប់គ្រងដំណើរការសេដ្ឋកិច្ចដោយឡែករបស់ខ្លួន ហើយបើតាមលោក Musk ទីក្រុងនេះនឹងទូទាត់ថ្លៃទំនិញជាដើម ដោយប្រើប្រាស់រូបិយប័ណ្ណស្រមោល ដែលគេហៅថា ប្រាក់ឌីជីថល។

ឆ្លើយតបនឹងការបង្ហោះសារនៅលើ Twitter របស់អ្នកស្រាវជ្រាវ AI លោក Lex Fridman លោក Musk ក៏បានយល់ស្របនឹងគំនិតដែលថា «ខឿនសេដ្ឋកិច្ចលើពិភពព្រះអង្គារនឹងត្រូវដំណើរការដោយយោងទៅលើប្រាក់ឌីជីថល»។ មហាសេដ្ឋី Elon Musk ថែមទាំងបានបង្ហើបឱ្យដឹងថា រូបិយវត្ថុនោះអាចជាប្រាក់ Dogecoin ឬប្រភេទប្រាក់ឌីជីថលថ្មីមួយដែលមានឈ្មោះថា Marcoin។

គម្រោង Marcoin ត្រូវបានបង្កើតឡើងកាលពីឆ្នាំ 2014 និងទទួលបានស្គាល់កំណើនរយៈពេលខ្លីក្នុងដំណាក់កាលទើបចាប់ផ្ដើមនៃរូបិយវត្ថុស្រមោលកាលពីឆ្នាំ 2017 ប៉ុន្តែ ចាប់ពីពេលនោះមក វាហាក់ដូចជាបានបាត់ខ្លួនពីទីផ្សារទៅហើយ។ ទំព័រ CoinMarketCap ឱ្យដឹងថា ប្រាក់ឌីជីថលនេះ បច្ចុប្បន្នមានតម្លៃទីផ្សារមិនដល់ 100,000 ដុល្លារអាមេរិក។

Dogecoin ទំនងជាបេក្ខភាពសមស្របជាង នៅពេលវាមានឈ្មោះល្បីគួរសម បើធៀបនឹង Marcoin និងមានលក្ខណស្រដៀងទៅនឹង bitcoin។

កាលពីសប្ដាហ៍មុន តម្លៃរបស់ប្រាក់ Dogecoin នេះ បានកើនឡើង 1/3 បន្ថែមទៀត បន្ទាប់ពីលោក Musk បានប្ដូរ story របស់ខ្លួននៅលើ Twitter ទៅជា «អតីត CEO របស់ Dogecoin» និងបង្ហោះសារ៖ «One word: Doge»។

កាលពីច្រើនខែមុន លោក Musk ធ្លាប់បានណែនាំឱ្យតារាសម្ដែង Maisie Williams ថា មិនគួរវិនិយោគទៅលើ bitcoin ហើយថែមទាំងប្រាប់ថា វាជាប្រាក់បីសាច។ ប៉ុន្តែ ប៉ុន្មានថ្ងៃមុននេះ លោក Musk បែរជាងាកមកសួរលោក Micheal Saylor ដែលជាបុគ្គលល្បីឈ្មោះក្នុងវិស័យប្រាក់ឌីជីថល អំពីសក្ដានុពលសម្រាប់ការទូទាត់ដោយប្រើរូបិយវត្ថុ bitcoin ទៅវិញ។

មិនត្រឹមតែនៅក្នុងវិស័យសេដ្ឋកិច្ចនៅលើផែនដីនោះទេ មុននេះ លោក Musk ក៏ធ្លាប់បានធ្វើឱ្យមានការរឿងចម្រូងចម្រាសផងដែរ នៅពេលលោកប្រកាសថា ច្បាប់អន្តរជាតិនឹងមិនត្រូវបានអនុវត្តនៅលើឋានព្រះអង្គារ។ ជំនួសមកវិញ វានឹងជាប្រព័ន្ធ «បទបញ្ជាស្វ័យគ្រប់គ្រង»។

យោងតាមប្រការដែលបានចែងនៅក្នុងលក្ខខណ្ឌនៃការផ្ដល់សេវាសម្រាប់គម្រោងអ៊ីនធើណិតពីផ្កាយរណប Starlink របស់ SpaceX រាល់ពលរដ្ឋដែលនឹងរស់នៅលើឋានព្រះអង្គារ ក៏នឹង «ទទួលស្គាល់ថា ពិភពព្រះអង្គារគឺជាភពសេរី» ហើយថា «មិនមានរដ្ឋាភិបាលណាមួយនៅលើផែនដី មានអំណាច ឬសកម្មសិទ្ធិលើសកម្មភាពនៅលើពិភពព្រះអង្គារ» នោះឡើយ៕

December 29, 2020

កម្រងពាក្យពេចន៍ដែលមហាសេដ្ឋី Jack Ma ធ្លាប់ប្រើ អាចជួយលើកទឹកចិត្តឱ្យយើងឆ្លងផុតពីការលំបាក

ពីគ្រូបង្រៀនភាសាអង់គ្លេស លោក Jack Ma បច្ចុប្បន្នបានក្លាយជាម្ចាស់ក្រុមហ៊ុនខ្នាតយក្ស Alibaba និងបានបំផុសគំនិតដ៏អស្ចារ្យជាច្រើនសម្រាប់យុវវ័យនៅទូទាំងពិភពលោក។

ខាងក្រោមនេះគឺជាពាក្យពេចន៍ ឃ្លាឃ្លោងមួយចំនួនដែលមិត្តអ្នកអាន អាចយកមកធ្វើជាការលើកទឹកចិត្តដើម្បីបន្តដំណើរឆ្ពោះទៅមុខ សំដៅគោលដៅជោគជ័យរៀងៗខ្លួន៖

«បើសិនជាអ្នកមិនចុះចាញ់ អ្នកនឹងនៅតែមានឱកាស។ ការបោះបង់សេចក្ដីព្យាយាមគឺជាបរាជ័យធំបំផុត»។

«បើសិនជាអ្នកកំពុងស្ថិតក្នុងវ័យ 25 ឆ្នាំ ចូរកុំខ្លាចក្នុងការបង្កកំហុសឆ្គង។ កុំព្រួបារម្ភ។ ពេលដួលគឺត្រូវតែក្រោក។ អ្នកបរាជ័យ អ្នកត្រូវតែងើបឡើង»។

«កុំអស់សង្ឃឹមពេលដែលត្រូវគេបដិសេធ កុំព្រួយចិត្តពេលដែលយើងបរាជ័យ នេះគ្រាន់តែជាការពិសោធរបស់ជីវិតតែប៉ុណ្ណោះ»។

«ខ្ញុំហៅ Alibaba ថាជាកំហុសទី 1,001។ ប៉ុន្តែ ពេលមានកំហុសកាន់តែច្រើន អ្នកនឹងកាន់តែរឹងមាំ»។

«ខ្ញុំមិនគិតថា ខ្ញុំឆ្លាតជាងអ្នក។ ខ្ញុំប្រលងចូលមហាវិទ្យាល័យធ្លាក់ 3 ដង។ ខ្ញុំដួល ខ្ញុំក្រោកឡើង ខ្ញុំដួលទៀត ខ្ញុំនៅតែក្រោកឡើងទៀត។ ហើយខ្ញុំក៏បានជោគជ័យ»។

«ជាអ្នករកស៊ី ថ្ងៃនេះអ្នកជួបការលំបាក។ ថ្ងៃស្អែកវានឹងលំបាកកាន់តែខ្លាំង។ ប៉ុន្តែ ថ្ងៃបន្ទាប់ទៀត វានឹងល្អប្រសើរ។ មនុស្សភាគច្រើនបានបោះបង់នៅ «យប់ស្អែក» ជាពេលដែលកំពុងស្ថិតនៅកៀកនឹងជោគជ័យ។ អ្នកត្រូវតែធ្វើការដោយការប្រឹងប្រែង អ្នកត្រូវតែរៀនស្វែងយល់ និងចេះពឹងផ្អែកទៅលើក្រុមរបស់អ្នក»។

«ជារៀងរាល់ថ្ងៃ ខ្ញុំជួបបញ្ហាជាច្រើន ហើយបើសិនជាការយំអាចដោះស្រាយបញ្ហាបាន ខ្ញុំនឹងយំពេញមួយថ្ងៃ។ ប៉ុន្តែ ការយំស្រែកគ្រាន់តែជួយឱ្យខ្ញុំបានធូរស្រាលក្នុងចិត្តប៉ុណ្ណោះ ចំណែកក្រុមរបស់ខ្ញុំវិញ ពួកគេនឹងមិនសប្បាយចិត្ត។ ដូច្នេះ អ្វីដែលខ្ញុំត្រូវធ្វើ នោះគឺធ្វើឱ្យខ្លួនឯងរីករាយ។ ខ្ញុំយកដៃឆ្វេងក្ដាប់ដៃស្ដាំរបស់ខ្លួន»។

«ពុំមានឱកាសនៃការជួញដូរណាដែលជួយឱ្យអ្នកជោគជ័យភ្លាមៗនៅថ្ងៃស្អែក ឬឆ្នាំក្រោយឡើយ។ នៅពេលចង់ធ្វើអ្វីនៅថ្ងៃនេះ ចូរចាំថា បើសិនជានៅតែបន្តធ្វើ នោះអ្នកនឹងជោគជ័យក្នុងរយៈពេល 10 ឆ្នាំទៀតមិនខាន»។

«ខ្ញុំមើលឃើញថា អ្នកជោគជ័យជាច្រើនលើពិភពលោក ដូចជា Warren Buffett, Bill Gates, Steve Jobs ជាដើម មានចំណុចរួមមួយ នោះគឺមិនដែលត្អូញត្អែរ មិនដែលមានទុទ្ទិដ្ឋិនិយម»។

«ជ្រូកមួយក្បាលក៏អាចហោះបានបើសិនវាជួបនឹងខ្យល់ដ៏ខ្លាំង ប៉ុន្តែ ពេលខ្យល់លែងបក់ ជ្រូកនោះអាចបាត់បង់ជីវិត។ និយាយរួម វានៅតែជាជ្រូកមួយក្បាលដដែល។ អ្វីដែលគ្រប់គ្នាត្រូវគិត នោះគឺធ្វើយ៉ាងណាដើម្បីគ្រប់គ្រងខ្យល់ ដឹងអំពីទិសរបស់ខ្យល់ ហើយឱ្យវាបក់យើងឡើងទៅលើ។ ខ្ញុំយល់ថា យើងមិនគួរទៅស្វែងរកខ្យល់ដែលមានកម្លាំងខ្លាំងជាងបច្ចុប្បន្ននោះទេ តែយើងត្រូវតែប្រែក្លាយទៅជាមនុស្សដែលអាចហោះបាន សូម្បីតែនៅពេលមានខ្យល់បក់ស្រាល»៕

ប្រភព៖ Getty Images, Reuters, Bloomberg

December 29, 2020

ក្រសួងអប់រំកម្ពុជាអនុញ្ញាតឱ្យគ្រឹះស្ថានសិក្សាឯកជនដំណើរការឡើងវិញ ចាប់ពីថ្ងៃជូនដំណឹងនេះតទៅ

នៅព្រឹកថ្ងៃទី 29 ខែធ្នូ ឆ្នាំ 2020 នេះ ក្រសួងអប់រំយុវជននិងកីឡាកម្ពុជា បានប្រកាសជូនដំណឹងថា ក្រសួងសម្រេចអនុញ្ញាតឱ្យគ្រឹះស្ថានសិក្សាឯកជនដំណើរការឡើងវិញ ចាប់ពីថ្ងៃជូនដំណឹងនេះតទៅ។

ចំណែកកាលបរិច្ឆេទនៃការបើកបវេសនកាលឆ្នាំសិក្សាថ្មី សម្រាប់គ្រឹះស្ថានសិក្សាចំណេះទូទៅសាធារណៈ ក្រសួងអប់រំសម្រេចយកថ្ងៃទី 11 ខែមករា ឆ្នាំ២០២។

December 29, 2020

កសិដ្ឋានរបស់ Michael Jackson ត្រូវបានលក់ក្នុងតម្លៃជាង 20 លានដុល្លារអាមេរិក

ធ្លាប់ត្រូវបានដាក់លក់ក្នុងតម្លៃ 100 លានដុល្លារអាមេរិក ប៉ុន្តែមកដល់បច្ចុប្បន្ន កសិដ្ឋានរបស់អតីតកំពូលតារាចម្រៀង លោក Michael Jackson ទើបតែមានអ្នកទិញក្នុងតម្លៃត្រឹមតែ 22 លានដុល្លារប៉ុណ្ណោះ។

កសិដ្ឋាន Neverland នៅ California របស់ Michael Jackson បានរកឃើញម្ចាស់ថ្មីរបស់វា នោះគឺមហាសេដ្ឋី Ron Burkle។ អ្នកជំនួញនេះ ធ្លាប់ជាសហការីរបស់ Michael Jackson និងជាសហស្ថាបនិកនៃក្រុមហ៊ុនវិនិយោគ Yucaipa Compaies។

Neverland ធ្លាប់ត្រូវបានដាក់លក់ក្នុងតម្លៃ 100 លានដុល្លារកាលពីឆ្នាំ 2015 ហើយក្រោយមកក៏បានថយមកនៅត្រឹម 67 លានដុល្លារក្នុងឆ្នាំ 2016 រួចក៏ធ្លាក់ថ្លៃមួយកម្រិត ដោយមកនៅត្រឹម 31 លានដុល្លារកាលពីឆ្នាំមុន។ ប៉ុន្តែ មហាសេដ្ឋី Burkle បានយល់ព្រមទិញក្នុងតម្លៃ 22 លានដុល្លារ នាចុងឆ្នាំ 2020 នេះ។ អ្នកនាំពាក្យរបស់លោក Burkle និយាយថា ថៅកែរបស់លោកចាត់ទុកដីទំហំ 1,000 ហិកតានេះថាជាឱកាសល្អសម្រាប់ជំនួញ។

លោក Burkle ចាប់អារម្មណ៍ទៅលើ Zaca Lake ដែលស្ថិតនៅក្បែរកសិដ្ឋានរបស់ Michael Jackson និងទុកវាដូចទៅនឹងទីតាំងថ្មីសម្រាប់ Soho House ជាក្លឹបមួយសម្រាប់តែសមាជិកប៉ុណ្នោះ ដែលវាមានទីតាំងនៅ Los Angeles, Miami, New York និង Toronto។

ប៉ុន្តែ ចុងក្រោយ Burkle យល់ថា Zaca Lake មានទីតាំងនៅឆ្ងាយ និងថ្លៃពេក ដូច្នេះ ក្រោយពីបានពិនិត្យមើលកសិដ្ឋានរបស់ Michael Jackson ពីលើអាកាស លោកក៏បានទាក់ទងដើម្បីទិញ។ មហាសេដ្ឋី Burkle បច្ចុប្បន្នគឺជាម្ចាស់ភាគហ៊ុនធំបំផុតរបស់ Soho House។

មុនពេលបានធ្លាក់មកដល់ដៃម្ចាស់ថ្មី កសិដ្ឋាន Neverland ត្រូវបានគ្រប់គ្រងដោយលោក Michael Jackson និងមូលនិធិវិនិយោគលើអចលនទ្រព្យ Colony Capital។ ក្រុមហ៊ុនវិនិយោគរួមគ្នានេះត្រូវបានបង្កើតឡើងក្រោយពី Colony «សង្គ្រោះ» Michael Jackson ពីការក្ស័យធនដោយប្រាក់ឥណទានដែលយកកសិដ្ឋានខាងលើធ្វើជារបស់បញ្ចាំ។

ដំបូងឡើយ Michael Jackson បានទិញកសិដ្ឋាន Neverland នេះក្នុងតម្លៃ 19.5 លានដុល្លារអាមេរិកកាលពីឆ្នាំ 1987។ លោកបានធ្វើឱ្យ Neverland ល្បីឈ្មោះ ដោយសារសាងសង់ហេដ្ឋារចនាសម្ព័ន្ធជាច្រើនបន្ថែមទៀត ដូចជា ផ្លូវរថភ្លើង និងឧទ្យាសម្រាប់កម្សាន្តជាដើម។ ក្នុងឧទ្យាននេះក៏មានចិញ្ចឹមសត្វស្វាធំៗ និងសត្វដំរីផងដែរ។

កសិដ្ឋាននេះមានសំណង់សរុបចំនួនជាង 22 ក្នុងនោះមានវិមានបែប Normandy ដែលមានផ្ទៃក្រឡាទំហំ 1,100 ម៉ែត្រ។ ក្រៅពីនេះក៏មានផ្ទះសម្រាប់សម្រាកលម្ហែកាយ ទីលានបាល់បោះ ទីលានវាយកូនបាល់ រោងភាពយន្តដែលអាចផ្ទុកមនុស្សបាន 50 នាក់។ បន្ទាប់ពិលោក Jackson បានទទួលមរណភាព កសិដ្ឋាននេះត្រូវបានប្ដូរឈ្មោះទៅជា Sycamore Valley Ranch។

មហាសេដ្ឋី Ron Burkle គឺជាមនុស្សម្នាក់ដែលស្រលាញ់ចូលចិត្តស្ថាបត្យកម្មល្បីៗ និងបានកាន់កាប់ផ្ទះជាច្រើនខ្នងដែលគួរឱ្យចាប់អារម្មណ៍ រួមមាន Ennis House នៅ Los Angeles ដែលរចនាដោយ Frank Lloyd Wright និងត្រូវបានលក់ក្នុងតម្លៃ 18 លានដុល្លារកាលពីឆ្នាំមុន ក្រោយពីជួសជុលអស់ 10 លានដុល្លារ។ Burkle ក៏កាន់កាប់ផ្ទះមួយខ្នងមានឈ្មោះថា John Lautner នៅតំបន់ Palm Springs ដែលត្រូវបានរចនា និងសាងសង់កាលពីទសវត្សរ៍ឆ្នាំ 70 សម្រាប់តារាសិល្បអាមេរិក ដែលមានឈ្មោះថា Bob និង Dolores Hope៕

ប្រភព៖ WSJ

December 29, 2020

Author: សឿន សំណាង