សឿន សំណាង - La Reine Media

ប្រធានាធិបតីអាមេរិក Joe Biden នឹងទូរស័ព្ទទៅកាន់មេដឹកនាំប្រទេសមួយណាដំបូងគេបង្អស់?

នាយករដ្ឋមន្ត្រីកាណាដា លោក Justin Trudeau នឹងក្លាយជាមេដឹកនាំបរទេសដំបូងគេដែលទទួលបានការហៅទូរស័ព្ទពីលោក Joe Biden នៅក្នុងនាមជាប្រធានាធិបតីទី 46 របស់សហរដ្ឋអាមេរិក។

ទូរទស្សន៍ CNN ដកស្រង់សម្ដីរបស់ជំនួយការផ្នែកសារព័ត៌មាន Jen Psaki កាលពីព្រលប់ថ្ងៃទី 20 មករា (ម៉ោងនៅអាមេរិក) បានឱ្យដឹងថា ប្រធានាធិបតីអាមេរិក Joe Biden មានគម្រោងទូរស័ព្ទទៅកាន់មេដឹកនាំនានានៃបណ្ដាប្រទេសជាសម្ព័ន្ធមិត្តរបស់សហរដ្ឋអាមេរិក នៅថ្ងៃទី 22 មករាខាងមុខ ក្នុងនោះ នាយករដ្ឋមន្ត្រីកាណាដាមានអាទិភាពមុនគេ។

លេខាផ្នែកសារព័ត៌មាននៃសេតវិមានខាងលើ បានបង្ហើបឱ្យដឹងថា ខ្លឹមសារនៃការហៅទូរស័ព្ទទៅកាន់មេដឹកនាំកាណាដានេះ នឹងផ្ដោតសំខាន់លើទំនាក់ទំនងរវាងប្រទេសទាំងពីរ ក៏ដូចជាបទបញ្ជាដែលលោក Biden បានចុះហត្ថលេខាបញ្ចប់ការផ្ដល់សិទ្ធិទៅលើផ្លូវនៃបណ្ដាញបំពង់បង្ហូរប្រេង Keystone XL។

មុននេះ នាយករដ្ឋមន្ត្រីកាណាដា Trudeau បានឱ្យដឹងថា លោកមានការខកចិត្តចំពោះបទបញ្ជាថ្មីរបស់លោក Biden ទាក់ទងនឹងផ្លូវសម្រាប់បំពង់បង្ហូរប្រេងដែលមានតម្លៃ 9 ពាន់លានដុល្លារ។ «ក្នុងគ្រាដែលយើងអបអរចំពោះការដែលប្រធានាធិបតី Biden សន្យាថានឹងត្រលប់មកធ្វើសង្គ្រាមប្រឆាំងនឹងបម្រែបម្រួលអាកាសធាតុ យើងក៏មានការខកចិត្ត នៅពេលបានដឹងថា លោកបានធ្វើទៅតាមការសន្យាកាលពីពេលឃោសនាបោះឆ្នោត អំពីផ្លូវបំពង់បង្ហូរប្រេង Keystone XL» នាយករដ្ឋមន្ត្រីកាណាដា ថ្លែងដូច្នេះ។

នាយករដ្ឋមន្ត្រីកាណាដា មានការខកចិត្តនឹងលោក Biden ទាក់ទងនឹងបញ្ហាផ្លូវសម្រាប់បំពង់បង្ហូរប្រេង

ត្រូវបានចាប់ផ្ដើមសាងសង់កាលពីឆ្នាំ 2018 Keystone XL គឺជាប្រព័ន្ធផ្លូវនៃបំពង់បង្ហូរប្រេងឆៅពីបណ្ដាអណ្ដូងរ៉ែប្រេងនានានៅក្នុងខេត្ត Alberta (កាណាដា) ទៅកាន់រោងចក្រចម្រាញ់ប្រេងនានានៅក្នុងរដ្ឋតូចៗជាច្រើននៅសហរដ្ឋអាមេរិក។ គម្រោងនេះធ្លាប់ជាបញ្ហាចម្រូងចម្រាសនៅក្នុងអាណត្តិប្រធានាធិបតីអាមេរិកជាច្រើនជំនាន់ ព្រមទាំងត្រូវបានជំទាស់ដោយក្រុមអ្នកការពារបរិស្ថានផងដែរ។

នៅក្នុងសន្និសីទកាលពីព្រលប់ថ្ងៃទី 20 មករា លេខាផ្នែកសារព័ត៌មាន Psaki បានឱ្យដឹងដែរថា ប្រធានាធិបតី Biden មិនទាន់មានគម្រោងទូរស័ព្ទទៅកាន់អតីតប្រធានាធិបតី Donald Trump ក៏ដូចជាប្រធានាធិបតីរុស្ស៊ី លោក Vladimir Putin នៅឡើយ៕

ប្រភព៖ CNN, Thestar

January 21, 2021

ទស្សនាឃ្លីប អ្នកបើកគ្រឿងចក្រ ចាប់ “យន្តហោះ ១គ្រឿង” បង្វិល ដូចរបស់លេង

គេនាំគ្នានិយាយថា ក្មេងប្រុសៗ ពេលធំឡើង របស់លេងរបស់ពួកគេ ក៏នឹងធំ ហើយថ្លៃឡើងៗទៅតាមនោះដែរ ហើយរឿងនេះ វាបានក្លាយជាការពិត យ៉ាងមិនបាច់សង្ស័យ តាមរយៈឃ្លីបវីដេអូ ដែលកំពុងល្បីល្បាញក្នុងខណៈពេលនេះ នៅពេលដែលបុរសអ្នកស្រុកហ្វ្លរីដា ម្នាក់ បានប្រើដៃចាប់ របស់រថយន្តគ្រឿងចក្រប៊ែកហូ ចាប់យន្តហោះ ១គ្រឿង បង្វិលលេងដូចកូនក្មេង។

អ្នកផូស្ត និងថតឃ្លីបវីដេអូនេះ គឺមនុស្សម្នាក់ដែលប្រើឈ្មោះថា vice.aviator ក្នុងប្រព័ន្ធអ៊ីនស្តាក្រាម ដែលធ្វើការនៅក្នុងឧស្សាហកម្មយន្តហោះ ដោយឃ្លីបមួយនេះ បានក្លាយជា វ៉ាយរ៉ាល់ ក្នុងទូទាំងប្រព័ន្ធបណ្ដាញសង្គមផ្សេងៗ ដូចជា ហ្វេសប៊ុក រេតធីង ធ្វីតធើរ និងអ៊ីនស្តាក្រាម។

ឃ្លីបវីដេអូនេះ ត្រូវបានថតនៅក្នុងព្រលានយន្តហោះ Opa-Locka Executive ក្នុងទីក្រុងម៉ៃអាមី ដោយអ្នកជំនាញផ្នែកអាកាសចរណ៍រូបនេះ បានរៀបរាប់ឱ្យដឹងថា គាត់បានសម្លឹងទៅត្រង់កន្លែងនោះ ដើម្បីស្វែងរកយន្តហោះបូអ៊ីង 707 ចាស់ៗដែលទើបត្រូវកម្ទេចចោល តែគាត់បែរជាមើលឃើញ អ្នកបញ្ជារថយន្តគ្រឿងចក្រម្នាក់ បានប្រើដៃចាប់របស់គ្រឿងចក្រនោះ ចាប់រថយន្តហោះ ១គ្រឿងបង្វិលលេង តែគាត់មិនបានថា តើអ្នកបញ្ជារថយន្តគ្រឿងចក្រនោះមានឈ្មោះអ្វីឡើយ។

លោកបានសរសេរថា “ក្រោយចាកចេញពីព្រលានយន្តហោះ នៅពេលព្រឹក បន្ទាប់ពីការហ្វឹកហាត់របស់ខ្ញុំហើយ ក្នុងឋានៈជាអ្នកចូលចិត្ត និងស្រឡាញ់យន្តហោះ ខ្ញុំក៏សម្រេចចិត្ត ជិះឡានទៅមើលយន្តហោះបូអ៊ីង707 ចាស់ៗ ដែលទើបត្រូវកម្ទេចចោល តែក៏គ្មានសំណាងបានឃើញឡើយ។ ខ្ញុំក៏បើកឡានត្រឡប់វិញ និងបានឃើញយន្តហោះប្រភេទ Jet ១គ្រឿងដែលត្រូវគេឈប់ប្រើប្រាស់ទៅហើយនោះ វាបែរជាបានហោះហើរម្ដងទៀត ជាលើកចុងក្រោយ ដោយគ្មាននរណានឹកស្មានដល់…”

ត្រូវអរគុណចំពោះ ការទៅចំពេលវេលារបស់គាត់ ទើបធ្វើឱ្យយើងទាំងអស់គ្នា បានទស្សនាអំឡុងពេលដ៏គួរអស់សំណើចមួយនេះ៕

ប្រភព៖ សារព័ត៌មានបរទេស

January 21, 2021

ប្រធានាធិបតីទី 46 របស់អាមេរិក Joe Biden ស្បថចូលកាន់តំណែងជាផ្លូវការ

នៅវេលាថ្ងៃត្រង់ ទី 20 មករា (កណ្ដាលយប់នៅកម្ពុជា) លោក Joe Biden បានក្លាយជាប្រធានាធិបតីអាមេរិកទី 46 ជាផ្លូវការ បន្ទាប់ពីបានស្បថចូលកាន់តំណែង ខណៈលោកស្រី Kamala Harris ក៏ក្លាយជាស្ត្រីអនុប្រធានាធិបតីដំបូងគេរបស់សហរដ្ឋអាមេរិក។

នៅវេលាម៉ោង 11 និង 40 នាទី ថ្ងៃទី 20 មករា នៅភ្នំ Capitol ជាកន្លែងដែលមានវិមានសភាអាមេរិក លោកស្រី Kamala Harris បានចាប់ផ្ដើមការឡើងស្បថចូលកាន់តំណែងជាអនុប្រធានាធិបតី នៅចំពោះមុខការចាត់ចែងរបស់ចៅក្រមតុលាការកំពូល Sonia Sotomayor។ លោកស្រី Harris បានក្លាយជាស្ត្រីអនុប្រធានាធិបតីដំបូងគេរបស់សហរដ្ឋអាមេរិក និងជាជនជាតិអាស៊ីដំបូងដែលបានកាន់កាប់តំណែងនេះ។

បន្ទាប់ពីលោកស្រី Harris បានបញ្ចប់ពិធីរបស់ខ្លួន លោក Joe Biden ក៏បានឡើងស្បថចូលកាន់តំណែង ក្រោមការដឹកនាំពិធីរបស់ប្រធានចៅក្រមតុលាការកំពូល John Roberts និងបានក្លាយជាប្រធានាធិបតីទី 46 របស់សហរដ្ឋអាមេរិកជាផ្លូវការ។

នៅក្នុងពិធីស្បថចូលកាន់តំណែង លោក Biden បានថ្លែងថា «ថ្ងៃនេះគឺជាថ្ងៃរបស់សហរដ្ឋអាមេរិក ជាថ្ងៃនៃប្រជាធិបតេយ្យ ថ្ងៃនៃប្រវត្តិសាស្ត្រនិងក្ដីសង្ឃឹម ថ្ងៃនៃការផ្លាស់ប្ដូរនិងការប្ដេជ្ញាចិត្ត។ សហរដ្ឋអាមេរិកបានប្រឈមមុខនឹងឧបសគ្គថ្មី និងបានក្រោកឈរដើម្បីតតាំងនឹងឧបសគ្គទាំងនោះ»។

លោក Biden សង្កត់ធ្ងន់ថា៖ «ថ្ងៃនេះ យើងអបអរជ័យជំនះ ប៉ុន្តែមិនមែនជាជ័យជំនះរបស់បេក្ខភាពម្នាក់ ប៉ុន្តែជាជ័យជំនះរបស់ខឿនប្រជាធិបតេយ្យទាំងមូល។

លោក Biden ក៏បានអំពាវនាវឱ្យមានការសាមគ្គី ស្ដារ និងផ្សះផ្សាជាតិ។ ទាក់ទងនឹងបញ្ហាអន្តរជាតិ ប្រធានាធិបតីថ្មី បានសន្យាថានឹងស្ដារឡើងវិញនូវ «ទំនាក់ទំនងជាមួយសម្ព័ន្ធមិត្ត និងចូលរួមធ្វើកិច្ចការពិភពលោកជាថ្មីម្ដងទៀត»។ ប្រធានាធិបតីថ្មីនេះក៏បានប្រកាសថានឹងកែប្រែគោលនយោបាយឯកោនិយមរបស់អតីតប្រធានាធិបតី Trump ផងដែរ។

ពិធីស្បថចូលកាន់តំណែងត្រូវបានធ្វើឡើងបន្ទាប់ពីការបោះឆ្នោតកាលពីជាងពីរខែមុន ពោលគឺនៅថ្ងៃទី 3 ខែវិច្ឆិកា ឆ្នាំ 2020 ក្នុងនោះ លោក Joe Biden ដណ្ដើមបានជ័យជំនះ ដោយទទួលបានសំឡេងឆ្នោតគាំទ្រចំនួន 306 សំឡេងពីតំណាងម្ចាស់ឆ្នោត ខណៈលោក Trump ទទួលបាន 232 សំឡេង។

ព្រឹត្តិការណ៍នេះ ត្រូវបានពលរដ្ឋទូទាំងសហរដ្ឋអាមេរិកទន្ទឹងរង់ចាំ ប៉ុន្តែទំហំនៃពិធីនេះត្រូវបានកាត់បន្ថយ ដោយសារតែឥទ្ធិពលរបស់ Covid-19។ ទន្ទឹមនឹងនេះ បញ្ហាសន្តិសុខក៏ត្រូវបានរឹតបន្តឹងជាពិសេស ដោយសារមានការព្រួយបារម្ភចំពោះសុវត្ថិភាពរបស់ក្រុមមន្ត្រី ក្រោយពីមានបាតុកម្មហិង្សានៅវិមានសភាជាតិកាលពីថ្ងៃទី 6 មករា ឆ្នាំ 2021៕

ប្រភព៖ Guardian

January 21, 2021

ទិដ្ឋភាពនៅរដ្ឋធានីរបស់អាមេរិក មុនម៉ោងលោក Joe Biden ឡើងទទួលតំណែងប្រធានាធិបតី

បេសកកម្មត្រៀមនានាត្រូវបានធ្វើឡើងរួចរាល់ សន្តិសុខត្រូវបានរឹតបន្តឹង ខណៈដែលនៅសល់តែប៉ុន្មានម៉ោងទៀតប៉ុណ្ណោះដែលពិធីស្បថចូលកាន់តំណែងប្រធានាធិបតីរបស់លោក Joe Biden នឹងត្រូវចាប់ផ្ដើម។

ផ្នែកខាងមុខនៃទិសខាងលិចរបស់ភ្នំ Capitol Hill ជាកន្លែងដែលពិធីស្បថចូលកាន់តំណែងរបស់ប្រធានាធិបតីអាមេរិកទី 46 Joe Biden នឹងត្រូវប្រារព្ធឡើង។ ទិដ្ឋភាពនេះគឺថតបានកាលពីយប់ថ្ងៃទី 19 មករា។ ឆាកសំខាន់ជាងគេដែលធ្វើអំពីឈើត្រូវបានដំឡើងរួចរាល់ក្នុងរយៈពេល 3 ម៉ោងសម្រាប់បម្រើដល់ព្រឹត្តិការណ៍មហាសំខាន់នេះ។

ពិធីស្បថចូលកាន់តំណែងនេះនឹងចាប់ផ្ដើមនៅវេលាម៉ោង 11 និង 30 នាទី (ម៉ោង 23 និង 30 នាទី នៅកម្ពុជា) ថ្ងៃទី 20 មករា។ អនុប្រធានាធិបតីជាប់ឆ្នោត Kamala Harris តាមគម្រោងនឹងជាអ្នកដែលត្រូវឡើងស្បថចូលកាន់តំណែងមុនគេ នៅចំពោះមុខចៅក្រមតុលាការកំពូល លោកស្រី Sonia Sotomayor។

បន្ទាប់មក ប្រធានាធិបតីជាប់ឆ្នោត Joe Biden នឹងត្រូវបានប្រធានចៅក្រមតុលាការកំពូលអាមេរិក ទទួលស្គាល់ការស្បថចូលកាន់តំណែងនៅវេលាម៉ោង 12 ថ្ងៃត្រង់។

ប្រធានសភាជាន់ទាប Nancy Pelosi (កណ្ដាល) រួមនឹងមេដឹកនាំសំឡេងភាគច្រើននៅសភាជាន់ខ្ពស់ Mitch McConnell កំពុងត្រួតពិនិត្យសកម្មភាពត្រៀមនៅក្នុងថ្ងៃចុងក្រោយ មុនពេលពិធីឡើងកាន់តំណែងចូលមកដល់។

នឹងមានឥស្សរជនប្រមាណ 1,000 នាក់ ចូលរួមពិធីខាងលើ ដែលភាគច្រើនគឺជាតំណាងរាស្ត្រ និងភ្ញៀវសំខាន់ៗរបស់រដ្ឋាភិបាលថ្មី។ នៅក្នុងពិធីស្បថចូលកាន់តំណែងកន្លងមក សំបុត្រអញ្ជើញសរុបចំនួន 200,000 សន្លឹក ត្រូវបានផ្ដល់ជូនដល់សមាជិកសភា ប៉ុន្តែឆ្នាំនេះ តំណាងរាស្ត្រម្នាក់ៗ ទទួលបានសំបុត្រអញ្ជើញតែមួយសន្លឹកគត់។

ព្រឹត្តិការណ៍នេះនឹងត្រូវបានគណៈកម្មធិការរៀបចំពិធីស្បថចូលកាន់តំណែងប្រធានាធិបតី ធ្វើការផ្សាយផ្ទាល់ ខណៈពលរដ្ឋអាមេរិកត្រូវបានស្នើឱ្យនៅផ្ទះ ដោយបារម្ភអំពីបញ្ហាសន្តិសុខ និងបញ្ហា Covid-19។

ក្រុមឆ្មាំការពារជាតិប្រមូលផ្ដុំគ្នានៅកន្លែងត្រូវរក្សាសន្តិសុខមួយ នៅជិតវិមានសភាជាតិ។ ឆ្មាំការពារជាតិចំនួន 25,000 នាក់ នឹងត្រូវបានដាក់ពង្រាយនៅក្នុងថ្ងៃទី 20 មករា ដើម្បីទប់ទល់នឹងការគំរាមកំហែងនានាផ្នែកសន្តិសុខ។

របងបន្លាលួស និងខ្សែបន្លាលួសត្រូវបានដំឡើងនៅជុំវិញ Capitol Hill ខណៈដែលកងកម្លាំងអនុវត្តច្បាប់ និងឆ្មាំការពារជាតិដើរល្បាត 24/7។

រថយន្តអគ្គិភ័យត្រូវបានប្រើប្រាស់ធ្វើជារបាំងការពារនៅតាមដងផ្លូវក្បែរទីតាំងប្រារព្ធពិធីខាងលើ។ តំបន់ជុំវិញ Capitol Hill និងទីប្រជុំជនធំៗនៅកណ្ដាលក្រុងវ៉ាស៊ីងតោន សុទ្ធតែត្រូវបានដាក់បម្រាមគោចរ ឬរឹតបន្តឹងការធ្វើចរាចរណ៍របស់យានយន្ត។

នៅក្នុងឧទ្យាន Lafayette ខាងក្រៅសេតវិមាន គេឃើញមានពាក្យស្លោកជាច្រើនដែលសរសេរអបអរពិធីឡើងកាន់តំណែងរបស់លោក Biden និងលោកស្រី Harris ត្រូវបានដាក់បង្ហាញជាជួរ និងជាច្រើនស្រទាប់។

នៅស្លាបខាងលិចនៃសេតវិមាន មានភាពស្ងប់ស្ងាត់ នៅពេលប្រធានាធិបតី Donald Trump ស្នាក់នៅយប់ចុងក្រោយនៅទីនេះ។ សេតវិមានមិនបានប្រកាសអំពីកាលបរិច្ឆេទថ្ងៃចុងក្រោយនៃអាណត្តិរបស់លោក Trump ដោយគ្រាន់តែឱ្យដឹងថា លោកនឹងចាកចេញនៅវេលាម៉ោង 8 ព្រឹក ទៅកាន់ Palm Beach រដ្ឋ Florida។

ព្រឹកថ្ងៃទី 20 មករា លោក Trump នឹងធ្វើដំណើរទៅកាន់មូលដ្ឋានទ័ពអាកាស Andrews ក្បែររដ្ឋធានីវ៉ាស៊ីងតោន ដោយប្រើប្រាស់ឧទ្ធម្ភាគចក្រ Marine One ដើម្បីចូលរួមពិធីជូនដំណើរលាគ្នាជាលើកចុងក្រោយរបស់កងទ័ព។

ក្រោយមក លោក Trump នឹងធ្វើដំណើរមកកាន់ក្លឹប Mar-a-Lago នៅក្នុងរដ្ឋ Florida ដែលពេលនោះ អាណត្តិកាលប្រធានាធិបតីរបស់លោកនឹងត្រូវបញ្ចប់នៅវេលាម៉ោង 12 និង 01 នាទី ជាពេលដែលលោក Biden ចូលកាន់តំណែង។

នៅខាងលើដំបូលនៃអគារសេតវិមាន ក្រុមបុគ្គលិកសេវាកម្មសម្ងាត់អាមេរិក ត្រូវបានដាក់ពង្រាយជាមួយនឹងសព្វាវុធទំនើបៗ ដើម្បីការពារសន្តិសុខ។ ក្រោយពីបានស្បថចូលកាន់តំណែង លោក Biden នឹងត្រូវបានក្រុមកិត្តិយសដែលតំណាងឱ្យកងទ័ពសហរដ្ឋអាមេរិកទាំងមូល អមដំណើរចាប់ពីវិថី 15 Washington ចូលទៅកាន់សេតវិមាន។

ក្រុមបាតុករប្រឆាំងលោក Trump ប្រមូលផ្ដុំគ្នានៅទីប្រជុំជន Black Lives Matter Plaza ខាងមុខសេតវិមាន នៅថ្ងៃចុងក្រោយរបស់ប្រធានាធិបតី Donald Trump។ ពួកគេកាន់បដាដែលមានសរសេរថា «Trump បានបរាជ័យ» ឬ «ជញ្ជាំងកំពុងរាំងខ្ទប់ Trump»។ល។

ទិដ្ឋភាពនៃឧទ្យានជាតិ National Mall នៅខាងមុខតំបន់ Capitol Hill

ទិដ្ឋភាពនៅស្ថានីយរថភ្លើង Union នាទីក្រុងវ៉ាស៊ីងតោន

អ្នកគាំទ្ររបស់លោក Biden ជិះស្គីតាមដងផ្លូវក្បែរសេតវិមាន

ប្រភព៖ AFP, Reuters

January 20, 2021

ការផ្ទេរវ៉ាលីគ្រាប់បែកនុយក្លេអែរពី Trump ទៅឱ្យ Biden ត្រូវធ្វើឡើងយ៉ាងដូចម្ដេច?

Trump និង Biden នឹងកាន់កាប់វ៉ាលីគ្រាប់បែកនុយក្លែចំនួនពីរផ្សេងគ្នា និងមានលេខកូដសម្រាប់ធ្វើសកម្មភាពដោយឡែក ក្នុងនោះ លេខកូដរបស់ប្រធានាធិបតីជាប់ឆ្នោត Joe Biden នឹងដំណើរការនៅវេលាម៉ោង 12 ថ្ងៃទី 20 មករា ស្របពេលដែលលេខកូដរបស់លោក Trump ត្រូវអស់សុពលភាព។

ការដែលប្រធានាធិបតីអាមេរិក Donald Trump មិនចូលរួមក្នុងពិធីស្បថចូលកាន់តំណែងរបស់លោក Joe Biden នឹងមិនប៉ះពាល់ដល់ពិធីនេះ ប៉ុន្តែនឹងធ្វើឱ្យមានការផ្លាស់ប្ដូរដ៏សំខាន់មួយនៅក្នុងកាលៈទេសៈនេះ នោះគឺដំណើរការនៃការផ្ទេរ «គ្រាប់បាល់នុយក្លេអែ/nuclear football» ជាពាក្យដែលត្រូវបានប្រើសំដៅលើវ៉ាលីដែលមានផ្ទុកលេខកូដសម្រាប់ការចេញបញ្ជាឱ្យវាយប្រហារដោយគ្រាប់បែកនុយក្លេអែរ ដែលតែងតែត្រូវបានយកទៅតាមប្រធានាធិបតីអាមេរិក។

យោងតាមគោលការណ៍ វ៉ាលីពណ៌ខ្មៅនេះនឹងត្រូវបានជំនួយការផ្នែកយោធាម្នាក់ យកតាមខ្លួនដើម្បីអមដំណើរប្រធានាធិបតីនៅគ្រប់ទីកន្លែង និងគ្រប់ពេលវេលា រហូតដល់ប្រធានាធិបតីត្រូវផុតអាណត្តិនៅម៉ោង 12 ថ្ងៃត្រង់នៃថ្ងៃទី 20 មករា (ម៉ោងនៅអាមេរិក)។ ប្រការនេះមានន័យថា ជំនួយការយោធារួមនឹងវ៉ាលីនុយក្លេអែរនឹងត្រូវឡើងយន្តហោះរបស់កងទ័ព នាំលោក Trump ចាកចេញពីរដ្ឋធានីវ៉ាស៊ីងតោន ទៅកាន់ Florida នៅព្រឹកថ្ងៃទី 20 មករា ខណៈដែលលោក Biden មិនទាន់ដល់ពេលឡើងកាន់អំណាច។

កន្លងមក នៅក្នុងពិធីស្បថចូលកាន់តំណែង អ្នកជំនួយការជាន់ខ្ពស់ផ្នែកយោធា នឹងនាំយកវ៉ាលីនុយក្លេអែរទៅតាមប្រធានាធិបតីជិតផុតអាណត្តិ ដើម្បីប្រគល់អំណាចនេះជូនប្រធានាធិបតីថ្មី នៅក្នុងអគារសភាជាតិនាទីក្រុងវ៉ាស៊ីងតោន។

ដំណើរការនៃផ្ទេរវ៉ាលីនុយក្លេអែរដែល «មិនមានចន្លោះប្រហោង» នេះគឺដើម្បីទប់ស្កាត់មិនឱ្យសត្រូវរបស់សហរដ្ឋអាមេរិក ឆ្លៀតយកឱកាសដ៏រសើបនេះ ធ្វើការវាយប្រហារដោយគ្រាប់បែកនុយក្លេអែរប្រឆាំងនឹងអាមេរិក។

ច្បាប់រដ្ឋធម្មនុញអាមេរិកបានប្រគល់សិទ្ធិទាំងស្រុងក្នុងការប្រើប្រាស់គ្រាប់បែកនុយក្លេអែរ ទៅឱ្យប្រធានាធិបតី ដែលនេះក៏ជាពេលដែលវ៉ាលីនុយក្លេអែរត្រូវបានចាប់កំណើតដើម្បីធានាឱ្យបានប្រាកដថា អគ្គបញ្ជាការដ្ឋាននៃកងទ័ពសហរដ្ឋអាមេរិកអាចអនុវត្តទៅតាមការបញ្ជារបស់ប្រធានាធិបតីបានគ្រប់ពេល និងគ្រប់កាលៈទេសៈ។

ការដែលលោក Trump មិនចូលរួមពិធីស្បថចូលកាន់តំណែងរបស់លោក Biden នឹងនាំឱ្យសិទ្ធិប្រើប្រាស់អាវុធនុយក្លេអែរត្រូវផ្ទេរពីចម្ងាយជាលើកដំបូងក្នុងប្រវត្តិសាស្ត្រ ដែលនេះក៏ត្រូវការកិច្ចសហការយ៉ាងម៉ត់ចត់របស់ប្រព័ន្ធយោធា ទាក់ទងនឹង «គ្រាប់បាល់នុយក្លេអែរ» ក៏ដូចជាប្រព័ន្ធបញ្ជាក់អំពីបទបញ្ជាប្រើប្រាស់គ្រាប់បែកនុយក្លេអែរ មានរហ័សនាមថា «នំខូឃីស» ដែលមាននៅក្នុងវ៉ាលីទាំងពីរ។

Scott Sagan ជាសាស្ត្រាចារ្យម្នាក់នៅសាកលវិទ្យាល័យ Stanford និង Stephen Schwartz អ្នកស្រាវជ្រាវប្រចាំសារព័ត៌មាន BAS នៅសហរដ្ឋអាមេរិក យល់ថា ការដែល Trump មិនចូលរួមពិធីស្បថចូលកាន់តំណែងរបស់លោក Biden នឹងធ្វើឱ្យបញ្ហាមិនចាំបាច់មួយចំនួនកើតឡើង ហើយថានឹងមានការលំបាកច្រើនធៀបនឹងឆ្នាំមុន។ ប៉ុន្តែ អ្នកវិភាគខាងលើបានបញ្ជាក់ថា កងទ័ពអាមេរិកនៅតែមានវិធានការបម្រុងដើម្បីធានាថា ដំណើរការនៃការប្រគល់អំណាចប្រព្រឹត្តិដោយរលូន និងសុវត្ថិភាពបើទោះជាមានបញ្ហាអ្វីកើតឡើងក៏ដោយ។

Schwartz បានឱ្យដឹងថា៖ «មានគ្រាប់បាល់នុយក្លេអែរដូចគ្នាយ៉ាងតិចចាប់ពី 3-4 គ្រាប់។ 1 គ្រាប់តែងតែធ្វើដំណើរតាមប្រធានាធិបតី 1 គ្រាប់ទៀតសម្រាប់អនុប្រធានាធិបតី ចំណែក 1 គ្រាប់ផ្សេងទៀតគឺសម្រាប់អ្នកដែលនៅរស់រានមានជីវិតនៅក្នុងព្រឹត្តិការណ៍ធំៗដូចជា ពិធីទទួលតំណែងប្រធានាធិបតី ឬអ្នកអានសាររបស់ជាតិ»។ អ្នកវិភាគរូបនេះបន្ថែមថា ស្ថានភាពឆ្នាំនេះអាចបង្ខំឱ្យការិយាល័យយោធារបស់សេតវិមាន ត្រូវត្រៀមវ៉ាលីនុយក្លេអែរបម្រុងមួយទៀតសម្រាប់លោក Biden។

នៅក្នុងវ៉ាលីនុយក្លេអែរនេះ មិនមានគ្រាប់ចុច ឬលេខកូដដើម្បីឱ្យប្រធានាធិបតីអាចបញ្ជាឱ្យធ្វើការវាយប្រហារដោយគ្រាប់បែកនុយក្លេអែរបានភ្លាមៗនោះទេ។ ក្នុងវ៉ាលីនេះមានទូរស័ព្ទមួយគ្រឿង កាត «នំខូឃីស» មួយបន្ទះដែលមានផ្ទុកលេខកូដសម្ងាត់ដែលអនុញ្ញាតឱ្យប្រធានាធិបតីចេញបញ្ជាឱ្យវាយប្រហារដោយអាវុធនុយក្លេអែរ និងបញ្ជីឈ្មោះគោលដៅដែលបានជ្រើសរើសពីមុនជាស្រេច។

Schwartz បញ្ជាក់ថា៖ «Trump នៅតែជាប្រធានាធិបតីអាមេរិករហូតដល់ម៉ោង 11 59នាទី និង 59 វិនាទី ថ្ងៃទី 20 ខែមករានេះ។ Trump ជាមនុស្សតែម្នាក់គត់ដែលមានសិទ្ធិចេញបញ្ជាឱ្យប្រើប្រាស់អាវុធនុយក្លេអែររបស់សហរដ្ឋអាមេរិក គិតត្រឹមអំឡុងពេលខាងលើ។ បើសិនជាជំនួយការផ្នែកយោធា នាំវ៉ាលីនុយក្លេអែរនេះអមដំណើរ Trump ទៅកាន់ Florida នោះជំនួយការរូបនេះនឹងត្រូវចាកចេញពី Trump នៅវេលាថ្ងៃត្រង់ និងនាំយកវ៉ាលីនោះមកកាន់វ៉ាស៊ីងតោន»។

នៅម៉ោង 12 ថ្ងៃទី 20 មករា Trump នឹងលែងមានសិទ្ធិក្នុងការធ្វើសង្គ្រាមនុយក្លេអែរ ហើយវ៉ាលីនុយក្លេអែរដែលអមដំណើរលោកក៏នឹងត្រូវអស់សុពលភាព។ ក្នុងករណី Trump ចេញបញ្ជាឱ្យវាយប្រហារដោយអាវុធនុយក្លេអែរនៅវេលាលើសពីម៉ោង 12 នោះបទបញ្ជានេះនឹងត្រូវបានចាត់ទុកថាខុសច្បាប់ ហើយក្រុមមន្ត្រីគ្រប់គ្រងអាវុធនុយក្លេអែរនឹងបដិសេធបទបញ្ជានេះ។

លោក Biden ទំនងជានឹងបានទទួល «នំខូឃីស» នៅព្រឹកថ្ងៃទី 20 មករា (ម៉ោងនៅអាមេរិក) ក្នុងគ្រាដែលលោក និងអនុប្រធានាធិបតីជាប់ឆ្នោត Kamala Harris មានកិច្ចប្រជុំសម្ងាត់មួយដើម្បីទទួលការណែនាំអំពីវិធីប្រើប្រាស់វ៉ាលីនុយក្លេអែរ។ ក៏ប៉ុន្តែ ប្រព័ន្ធលេខកូដសម្ងាត់របស់លោក Biden នឹងមិនទាន់មានសុពលភាពនៅឡើយ រហូតដល់ម៉ោង 12 និង 00 នាទី ក្នុងអំឡុងពេលដែលលេខកូដរបស់លោក Trump អស់សុពលភាព៕

ប្រភព៖ CNN

January 20, 2021

Biden យំនៅពេលថ្លែងសារលាស្រុកកំណើត មុននឹងមកទទួលតំណែងប្រធានាធិបតីអាមេរិកនៅរដ្ឋធានី

លោក Joe Biden យំនៅពេលកំពុងថ្លែងសារលាស្រុកកំណើតនៅក្នុងរដ្ឋ Delaware ខណៈនិយាយពាក្យអរគុណដល់ពលរដ្ឋក្នុងតំបន់ និងរំលឹកដល់កូនប្រុស Beau ដែលបានបាត់បង់ជីវិតកាលពីឆ្នាំ 2015។

«សូមអភ័យទោសចំពោះការរំជួលចិត្តនេះ ប៉ុន្តែនៅពេលខ្ញុំស្លាប់ Delaware នឹងត្រូវឆ្លាក់ជាប់ក្នុងបេះដូងរបស់ខ្ញុំ ក៏ដូចជាបេះដូងរបស់គ្រប់គ្នា។ យើងស្រលាញ់គ្រប់គ្នា។ គ្រប់គ្នាបាននៅទីនោះដើម្បីយើងខ្ញុំ បើទោះជាដោយរលូន ឬដោយឧបសគ្គ មិនដែលបែរខ្នងដាក់សោះឡើយ។ ខ្ញុំពិតជាមានមោទកភាពជាកូនម្នាក់របស់ Delaware» ប្រធានាធិបតីជាប់ឆ្នោតអាមេរិក Joe Biden ថ្លែងនៅក្នុងព្រឹត្តិការណ៍លាគ្នានៅក្នុងទីក្រុង Wilmington រដ្ឋ Delaware កាលពីថ្ងៃទី 19 មករា មុនពេលធ្វើដំណើរមកកាន់រដ្ឋធានីវ៉ាស៊ីងតោន។

«ខ្ញុំក៏កាន់តែមានមោទកភាពនៅពេលបានឈរនៅទីនេះ និងធ្វើដូច្នេះនៅទីកន្លែងដែលមានឈ្មោះ វរសេនីយត្រី Beau Biden។ ខ្ញុំមានការសោកស្ដាយតែម្យ៉ាងគត់នោះគឺ Beau មិននៅទីនេះ ព្រោះថា យើងគួរតែជ្រើសតាំងគាត់ឱ្យធ្វើជាប្រធានាធិបតី» លោក Joe Biden និយាយបណ្ដើរយំបណ្ដើរ ពេលរំលឹកដល់កូនប្រុសរបស់គាត់។ ទីកន្លែងដែលលោក Joe Biden ថ្លែងការណ៍គឺជាមជ្ឈមណ្ឌលកម្លាំងប្រដាប់អាវុធបម្រុងវរសេនីយត្រី Joesph R. (Beau) Biden III ដែលត្រូវបានដាក់ឈ្មោះទៅតាមកូនប្រុសម្នាក់របស់លោក Joe Biden ដែលធ្លាប់ធ្វើជាអគ្គរដ្ឋអាជ្ញានៃរដ្ឋ Delaware ដែលបានស្លាប់កាលពីឆ្នាំ 2015 ដោយសារមហារីកខួរក្បាល។

Biden ចាកចេញពីរដ្ឋ Delaware មកកាន់រដ្ឋធានីវ៉ាស៊ីងតោនជាមួយនឹងភរិយា Jill Biden។ ពួកគេនឹងសម្រាកនៅក្នុងអគារ Blair ដែលជាទីសម្រាប់ទទួលមេដឹកនាំបណ្ដាប្រទេស និងភ្ញៀវសំខាន់ៗ និងមានទីតាំងស្ថិតនៅទល់មុខសេតវិមាន៕

ប្រភព៖ NBC News

January 20, 2021

ប្រធានាធិបតី Donald Trump ផ្ញើសារលាសេតវិមាន

នៅក្នុងសារលាសេតវិមាន លោក Trump បានអំពាវនាវឱ្យពលរដ្ឋអាមេរិកាំង «ចាកចេញផុតពីការចងគំនុំរវាងបក្សនឹងបក្ស» រួមនឹងការកោតសរសើរចំពោះសមិទ្ធផលក្រោមការដឹកនាំរបស់លោក ក៏ដូចជាជូនពរដល់រដ្ឋាភិបាលថ្មីជួបសំណាងល្អ។

«បានបម្រើការងារក្នុងនាមជាប្រធានាធិបតីរបស់គ្រប់គ្នាគឺជាកិត្តិយសដែលមិនអាចអធិប្បាយបាន។ សូមអរគុណគ្រប់គ្នាចំពោះឧបការគុណដ៏ពិសេសនេះ» ប្រធានាធិបតី Donald Trump បានថ្លែងនៅក្នុងវីដេអូមួយមានថេរវេលាជិត 20 នាទី ដែលត្រូវបានសេតវិមានចេញផ្សាយកាលពីថ្ងៃទី 19 មករា។

លោក Trump ក៏មិនភ្លេចកោតសរសើរចំពោះកិច្ចខិតខំក្នុងការកាត់បន្ថយពន្ធ កិច្ចព្រមព្រៀងពាណិជ្ជកម្ម និងគោលនយោបាយសេដ្ឋកិច្ចក្រៅប្រទេសរបស់រដ្ឋាភិបាលលោក ជាមួយនឹងការលើកកម្ពស់សេដ្ឋកិច្ចក្នុងស្រុក ស្ថានភាពទីផ្សារមូលបត្រ និងការដែលវ៉ាក់សាំង Covid-19 ត្រូវបានអភិវឌ្ឍយ៉ាងឆាប់រហ័ស។

«ពួកគេបានហៅប្រការនេះថាជាមន្តអាគមផ្នែកវេជ្ជសាស្ត្រ។ រដ្ឋាភិបាលដទៃនឹងត្រូវចំណាយពេល 3 ឆ្នាំ, 4 ឆ្នាំ, 5 ឆ្នាំ ឬ 10 ឆ្នាំ ដើម្បីអភិវឌ្ឍវ៉ាក់សាំងមួយប្រភេទ ប៉ុន្តែយើងបានធ្វើវាក្នុងរយៈពេលត្រឹមតែ 9 ខែប៉ុណ្ណោះ» លោក Trump បានឱ្យដឹងដូច្នេះ និងថែមទាំងបានវាយតម្លៃខ្ពស់ទៅលើការប្រឹងប្រែងរបស់រដ្ឋាភិបាលក្នុងការស្ដារសេដ្ឋកិច្ចនៅក្នុងវិបត្តិសុខភាព និងធានាសន្តិសុខនៅតាមបន្ទាត់ព្រំដែនភាគខាងត្បូងផងដែរ។

លោក Trump បន្តថា៖ «នៅពេលខ្ញុំត្រៀមប្រគល់អំណាចជូនដល់រដ្ឋាភិបាលថ្មីនៅថ្ងៃត្រង់ ទី 20 មករា ខ្ញុំចង់ប្រាប់គ្រប់គ្នាថា ចលនារបស់យើងទើបតែបានចាប់ផ្ដើមដំណើរការប៉ុណ្ណោះ»។

«ខ្ញុំមានមោទកភាពជាខ្លាំងដោយសារជាប្រធានាធិបតីដំបូងក្នុងអំឡុងជាច្រើនទសវត្សរ៍ដែលមិនបានបញ្ឆេះសង្គ្រាមណាមួយ។ យើងបានបញ្ជាក់ជាថ្មីថា នៅសហរដ្ឋអាមេរិក រដ្ឋាភិបាលបានឆ្លើយតបនឹងការចង់បានរបស់ពលរដ្ឋ» លោក Trump បន្ថែម។

ប្រធានាធិបតី Trump ឱ្យដឹងថា៖ «សប្ដាហ៍នេះ រដ្ឋាភិបាលថ្មីមួយនឹងចូលកាន់អំណាច ហើយយើងបួងសួងឱ្យពួកគេទទួលបានជោគជ័យក្នុងការរក្សាទឹកដីអាមេរិកឱ្យនៅមានសុវត្ថិភាព និងរីកចម្រើន។ យើងសូមផ្ញើពាក្យជូនពរបវរប្រសើរបំផុត និងប្រាថ្នាឱ្យពួកគេជួបសំណាងល្អ ដែលជាប្រការមួយដ៏មានសារសំខាន់»។

លោក Trump កន្លងមកបានប្រកាសថា នឹងមិនចូលរួមពិធីស្បថចូលកាន់តំណែងរបស់លោក Biden នៅថ្ងៃទី 20 មករានេះ។ លោក Trump មានគម្រោងចូលរួមពិធីលាគ្នាជាមួយនឹងកងកម្លាំងប្រដាប់អាវុធនៅមូលដ្ឋានទ័ពអាកាស Andrews នាព្រឹកថ្ងៃទី 20 មករា មុនពេលឡើងយន្តហោះត្រលប់ទៅកាន់ Florida ក្នុងគ្រាប្រធានាធិបតីជាប់ឆ្នោត Joe Biden ស្បថចូលកាន់តំណែង។

នៅក្នុងព្រឹត្តិការណ៍ចុងក្រោយនៃអាណត្តិរបស់លោក Trump លោកស្រី Melania Trump ក៏បានថ្លែងសារលាសេតវិមានផងដែរ។

ពិធីស្បថចូលកាន់តំណែងរបស់លោក Biden នឹងមានការចូលរួមពីក្រុមមន្ត្រីក្នុងចំនួនតិចបំផុត រាប់ចាប់ពីឆ្នាំ 1945 ពោលគឺប្រមាណជា 1,000 នាក់ប៉ុណ្ណោះ។ ប្រការនេះគឺដោយសារអាជ្ញាធរកាត់បន្ថយទំហំនៃព្រឹត្តិការណ៍ ដោយសារឥទ្ធិពលរបស់ Covid-19។

ប្រភព៖ Fox News, Reuters

January 20, 2021

Covid-19 ថ្មីនៅកម្ពុជាក្នុងអំឡុងថ្ងៃទី 19មករា ឆ្នាំ2021

ក្រសួងសុខាភិបាលកម្ពុជាឱ្យដឹង បានរកឃើញអ្នកវិជ្ជមាននឹង Covid-19 ថ្មីចំនួន 7 ករណីបន្ថែមទៀត នាំឱ្យតួលេខសរុបនៃអ្នកវិជ្ជមាន កើនដល់ 448 នាក់។

ករណីវិជ្ជមាននៅក្នុងថ្ងៃទី 19 ខែមករាទាំង 7 នាក់នេះ សុទ្ធតែជាពលករ និងពលការិនីខ្មែរ ដែលទើបត្រលប់មកពីប្រទេសថៃ។ ព័ត៌មានលម្អិតសូមអានតារាងខាងក្រោម។

គិតត្រឹមព្រឹកថ្ងៃទី 19 មករានេះ អ្នកវិជ្ជមាននឹង Covid-19 នៅកម្ពុជាមានចំនួន 448 នាក់ ក្នុងនោះមាន 392 នាក់បានជាសះស្បើយ និង 56 នាក់កំពុងសម្រាកព្យាបាល។

នៅទូទាំងពិភពលោក អ្នកវិជ្ជមាននឹង Covid-19 សរុប បានកើនដល់ 96,571,899 នាក់ ខណៈអ្នកស្លាប់កើនដល់ 2,063,454 នាក់ និងអ្នកជាសះស្បើយមានចំនួន 69,217,638 នាក់។ អ្នកជំងឺ Covid-19 ដែលកំពុងព្យាបាល មានចំនួន 25,290,807 នាក់ ក្នុងនោះមាន 112,028 នាក់កំពុងប្រឈមនឹងហានិភ័យបាត់បង់ជីវិត៕

January 20, 2021

Covid-19 នៅ ASEAN គិតត្រឹមដំណាច់ថ្ងៃទី 19 មករា

ក្នុងថ្ងៃទី 19 មករា បណ្ដាប្រទេសនៅក្នុងតំបន់ ASEAN បានរកឃើញអ្នកវិជ្ជមាននឹង Covid-19 ជាង 16,000 នាក់ ខណៈតួលេខអ្នកស្លាប់ថ្មីកើនលើសពី 300 នាក់។

យោងតាមស្ថិតិរបស់ទំព័រ Worldometers គិតត្រឹមម៉ោង 23 និង 59 នាទី ថ្ងៃទី 19 មករា បណ្ដាប្រទេសក្នុងសមាគមប្រជាជាតិអាស៊ីអាគ្នេយ៍ បានរកឃើញអ្នកវិជ្ជមាននឹង Covid-19 សរុបចំនួន 1,806,077 នាក់ ក្នុងនោះមានអ្នកស្លាប់សរុប 40,310 នាក់ និងអ្នកជាសះស្បើយ 1,534,045 នាក់។

ក្នុងរយៈពេល 24 ម៉ោងកន្លងទៅ តំបន់អាស៊ីអាគ្នេយ៍មានប្រទេសចំនួន 4 ដែលមានអ្នកស្លាប់ដោយសារ Covid-19 ក្នុងនោះ ឥណ្ឌូនេស៊ីមានដល់ទៅជាង 300 ករណី។ ជាមួយនឹងករណីឆ្លងថ្មីជាង 10,000 នាក់ ប្រទេសឥណ្ឌូនេស៊ីនៅតែជាសម្បុកវីរុស Covid-19 ធំជាងគេនៅក្នុងតំបន់។

ម៉ាឡេស៊ីជាប់ចំណាត់ថ្នាក់លេខពីរបន្ទាប់ពីឥណ្ឌូនេស៊ី ដោយមានករណីឆ្លងសរុប 165,371 នាក់ ក្នុងនោះមានករណីថ្មីជាង 3,600 នាក់ ក្នុងថ្ងៃទី 19 មករា។ ហ្វីលីពីន រកឃើញករណីថ្មីចំនួន 1,357 នាក់ នាំឱ្យតួលេខសរុបកើនដល់ 504,084 នាក់ ក្នុងនោះមានអ្នកស្លាប់ចំនួន 9,978 នាក់។ ប្រទេសថៃទើបរកឃើញករណីថ្មី 171 នាក់។ ចំណែកប្រ៊ុយណេ ទីម័រខាងកើត និងឡាវ ពុំមានករណីវិជ្ជមានថ្មី៕

January 20, 2021

អ្នកនៅពីក្រោយមហាជោគជ័យរបស់ហ្គេម PUBG ធ្លាប់បរាជ័យជាច្រើនលើកក្នុងអាជីពជាអ្នកសរសេរកូដ

បន្ទាប់ពីបានទទួលបរាជ័យជាមួយនឹង startup ចុងក្រោយចំនួន 3 ទើប «កំពូលអ្នកសរសេរកូដ» រូបនេះ អាចបង្កើតបានជោគជ័យជាមួយនឹងកំពូលហ្គេម PUBG។

Kim Chang-han មានឈ្មោះបោះសំឡេងនៅក្នុងសហគមន៍អ្នកអភិវឌ្ឍហ្គេមនៅប្រទេសកូរ៉េខាងត្បូង ប៉ុន្តែ ក្នុងអាជីពជាអ្នកបង្កើតហ្គេម បុរសនេះបានឆ្លងកាត់បរាជ័យជាច្រើនគួរឱ្យកត់សម្គាល់។

ឆ្នាំ 2014 Kim Chang-han ត្រូវបង្ខំចិត្តបញ្ឈប់បុគ្គលិកចំនួន 1/3 ពីក្រុមហ៊ុនហ្គេមរបស់ខ្លួន។ ចាប់ពីឆ្នាំ 2020 លោក Kim Chang-han បង្កើតបានហ្កេមអនឡាញចំនួន 3 ជាមួយនឹងក្រុមហ៊ុនថ្មីចំនួន 3 ផ្សេងៗគ្នាផងដែរ។ ក៏ប៉ុន្តែ ចុងក្រោយ សុទ្ធតែត្រូវបរាជ័យ។

Kim Chang-han និយាយថា៖ «នោះគឺជាកាលៈទេសៈដ៏មហាសែនជូរចត់នៃជីវិតរបស់ខ្ញុំ»។ ក្នុងអំឡុងពេលបរាជ័យ គាត់បានលក់ក្រុមហ៊ុនទៅឱ្យ Krafton Inc និងចូលបម្រើការក្នុងក្រុមហ៊ុនថ្មីនេះដោយមានតួនាទីជានាយកផ្នែកផលិត។

ចាប់តាំងពីពេលនោះ អាជីពរបស់ Kim Chang-han ក៏ចាប់ផ្ដើមផ្លាស់ប្ដូរ។ គាត់បានសម្រេចចិត្តធ្វើការប្រឹងប្រែងជាលើកចុងក្រោយជាមួយនឹងក្ដីសង្ឃឹមថាអាចជោគជ័យក្នុងការងារនេះ នោះគឺ «បង្កើតហ្គេមអនឡាញមួយដែលអ្នកលេងប្រយុទ្ធគ្នាជាមួយនឹងអ្នកលេងដទៃ ហើយអ្នកចុងក្រោយដែលនៅមាន «ជីវិត» គឺជាអ្នកឈ្នះ។

Kim Chang-han បានបញ្ចុះបញ្ចូល Brendan Greene ឱ្យចូលមកជួយក្រុមហ៊ុននៅកូរ៉េខាងត្បូង ដោយឱ្យធ្វើជានាយកផ្នែកច្នៃប្រឌិតសម្រាប់ហ្គេមនេះ។

ឆ្នាំ 2017 Bluehole (ឈ្មោះចាស់របស់ Krafton) ក៏បានឧទ្ទេសនាមហ្គេមមួយដែលមានឈ្មោះថា PUBG ហើយវាក៏បានក្លាយជាហ្គេមមួយដែលមានឈ្មោះល្បីល្បាញ និងជោគជ័យបំផុតមិនធ្លាប់មានពីមុនមក ក្នុងនោះកំណែសម្រាប់កុំព្យូទ័រ លក់បានជាង 70 លានឈុតនៅទូទាំងពិភពលោក និងកំណែសម្រាប់ទូរស័ព្ទត្រូវបានទាញយកជាង 600 លានលើក។

បច្ចុប្បន្ន ក្រុមហ៊ុនកំពុងតែមានគម្រោងធ្វើ IPO (បោះផ្សាយលក់មូលបត្រដំបូងនៅផ្សារហ៊ុន) នៅពាក់កណ្ដាលចុងឆ្នាំ 2021 ហើយវានឹងអាចក្លាយជាករណី IPO ធំបំផុតនៅកូរ៉េខាងត្បូងក្នុងអំឡុងប៉ុន្មានឆ្នាំមកនេះ។

ការធ្វើ IPO របស់ក្រុមហ៊ុនថ្មីនេះ ត្រូវគេវាយតម្លៃថានឹងប្រមូលបានយ៉ាងតិច 30 ពាន់លានវ៉ុន ដែលប្រហាក់ប្រហែលនឹង 27.2 ពាន់លានដុល្លារអាមេរិក។ ការធ្វើ IPO ដែលធំបំផុតក្នុងប្រវត្តិសាស្ត្រកូរ៉េខាងត្បូងគឺ Samsung Life Insurance ដោយប្រមូលបានទុន 4.3 ពាន់លានដុល្លារអាមេរិកកាលពីឆ្នាំ 2020។

ក្រុមហ៊ុន Krafton បច្ចុប្បន្នគ្រប់គ្រង studio ហ្គេមចំនួន 4 ប៉ុន្តែ PUBG រកបានចំណូល និងចំណេញច្រើនជាងគេបង្អស់។ PUBG រកបាន 1.1 ពាន់លានដុល្លារក្នុងរយៈពេល 9 ខែដើមឆ្នាំ 2020។

ស្ថាបនិករបស់ Krafton លោក Chang Byung-gyu បច្ចុប្បន្នជាម្ចាស់ភាគហ៊ុនធំជាងគេ ដោយកាន់កាប់ភាគហ៊ុន 17% គិតត្រឹមខែកញ្ញា។ តាមពីក្រោយគឺក្រុមហ៊ុន Tencent Holdings ដោយមានភាគហ៊ុន 16% ខណៈដែលលោក Kim Chang-han កាន់កាប់ 1.5%។

Kim Chang-han ធ្លាប់ទទួលបានជ័យជំនះនៅក្នុងការប្រកួតផ្នែកកុំព្យូទ័រដែលត្រូវបានរៀបចំដោយក្រសួងវិទ្យាសាស្ត្រកូរ៉េខាងត្បូងកាលពីឆ្នាំ 1985 នៅពេលគាត់មានវ័យទើបតែ 10 ឆ្នាំ។ ក្រោយមក លោកក៏ដណ្ដើមបានពានរង្វាន់ជាច្រើនផ្សេងទៀតដែលទាក់ទងនឹងការសរសេរកម្មវិធីកុំព្យូទ័រ។ លោក Chang-han ក៏ជាសហស្ថាបនិករបស់ហ្គេម Ginno Games កាលពីឆ្នាំ 2009 ក្រោយពីបរាជ័យជាមួយក្រុមហ៊ុនថ្មីចំនួន 2 មុននោះ។

ក៏ប៉ុន្តែ បរាជ័យទាំងនោះបានក្លាយជាអតីតកាលទៅហើយ ចំណែកបច្ចុប្បន្ន Chang-han កំពុងតែជួយ Krafton ក្នុងការធ្វើ IPO នាពេលខាងមុខ។ លោក Chan-han និយាយថា ការសម្រេចពង្រីកប្រភេទហ្កេមរបស់ក្រុមហ៊ុន ទទួលបានជោគជ័យលើសពីការរំពឹងទុកគ្រាដំបូង៕

ប្រភព៖ Bloomberg

January 19, 2021

Author: សឿន សំណាង