សឿន សំណាង - La Reine Media

ក្រុមហ៊ុនវៀតណាមបង្ហាញរថយន្តស្វ័យប្រវត្ត ប្រើបញ្ហាសិប្បនិម្មិត និងទទួលការបញ្ជាទិញចាប់ពីខែឧសភា

ក្រុមហ៊ុនផលិតរថយន្តវៀតណាម VinFast បានស្រាវជ្រាវ និងអភិវឌ្ឍដោយជោគជ័យនូវរថយន្តឆ្លាតវៃ 3 ម៉ូដែលដំបូងរបស់ខ្លួន ដោយប្រើប្រាស់បច្ចេកវិទ្យាបញ្ញាសិប្បនិម្មិត (AI/Artificial intelligence) រួមនឹងកាមេរ៉ាពិសេសៗ និងអង្គញាណជាច្រើនផងដែរ។

ក្រុមហ៊ុន VinFast ថ្មីៗនេះបានប្រកាសបង្ហាញម៉ូដែលរថយន្តប្រភេទ SUV ឆ្លាតវៃចំនួន 3 ម៉ូដែល បន្ទាប់ពីការសិក្សាស្រាវជ្រាវ និងអភិវឌ្ឍអស់រយៈពេល 3 ឆ្នាំ។

ម៉ូដែលរថយន្តខាងលើនេះ មានឈ្មោះថា VF31, VF32 និង VF33 ក្នុងនោះ VF31 គឺជារថយន្តប្រភេទ SUV ខ្នាតតូច និងមានតែកំណែប្រើអគ្គិសនីប៉ុណ្ណោះ ចំណែក VF32 គឺជាប្រភេទ SUV ខ្នាតមធ្យម ខណៈដែល VF33 ជាប្រភេទ SUV ខ្នាតធំ។ VF32 និង VF33 សុទ្ធតែមានកំណែអគ្គិសនី និងកំណែសាំង។

VinFast VF31

រថយន្តទាំងនេះសុទ្ធតែមានបំពាក់មុខងារបើកបរស្វ័យប្រវត្តិកម្រិត 2-3។ មុខងារឆ្លាតវៃចំនួន 30 នៅលើក្នុងរថយន្តនេះត្រូវបានចែកជា 7 ប្រភេទ រួមមាន ប្រព័ន្ធជំនួយការបើកបរឆ្លាតវៃ ប្រព័ន្ធគ្រប់គ្រងគន្លងចរាចរណ៍ ប្រព័ន្ធគ្រប់គ្រងការធ្វើដំណើរ ប្រព័ន្ធព្រមានការប៉ះទង្គិចពហុទិស ប្រព័ន្ធកាត់បន្ថយបញ្ហាប៉ះទង្គិចទូទៅ ប្រព័ន្ធចូលចតស្វ័យប្រវត្តិឆ្លាតវៃ និងប្រព័ន្ធតាមដានអ្នកបើកបរ។

កំណែលំដាប់ខ្ពស់របស់ VF31, VF32 និង VF33 ក៏សុទ្ធតែមានអង្គញាណ LiDAR កាមេរ៉ាមើលឃើញឧបសគ្គរយៈចម្ងាយ 687 ម៉ែត្រ ចំនួន 17 គ្រាប់ និងអង្គញាណ 360 អង្សាចំនួន 19 គ្រាប់ដែលអនុញ្ញាតឱ្យព្រមាន និងចាត់ការនៅក្នុងល្បឿនលើសពី 100 គម/ម៉ោង។

VinFast VF32

កំណែលំដាប់ខ្ពស់របស់ម៉ូដែលរថយន្តទាំងនេះក៏ត្រូវបានបំពាក់បន្ថែមនូវមុខងារបើកបរស្វ័យប្រវត្តិកម្រិត 4 មួយចំនួនទៀត ដូចជា ការបង្កើតផែនទី 3 ទិសស្វ័យប្រវត្ត រួមនឹងមុខងារតភ្ជាប់ប្រព័ន្ធចរាចរណ៍ឆ្លាតវៃ។

តាមគម្រោង VF31 កំណែស្ដង់ដានឹងចាប់ផ្ដើមទទួលការបញ្ជាទិញនៅវៀតណាម ចាប់ពីខែឧសភា ឆ្នាំ 2021 និងប្រគល់ជូនដល់ដៃអតិថិជនចាប់ពីខែវិច្ឆិកា ឆ្នាំ 2021។ VF32 និង VF33 នឹងទទួលការបញ្ជាទិញនៅវៀតណាមចាប់ពីខែកញ្ញា ឆ្នាំ 2021 និងប្រគល់ចាប់ពីខែកុម្ភៈ ឆ្នាំ 2022 ខណៈនៅអាមេរិក កាណាដា និងអឺរ៉ុប ទទួលការបញ្ជាទិញចាប់ពីខែវិច្ឆិកា ឆ្នាំ 2021 និងប្រគល់ចាប់ពីខែ មិថុនា ឆ្នាំ 2022៕

VinFast VF33

ក្រៅពីមានរោងចក្រទំនើបលេចធ្លោជាងគេនៅអាស៊ីអាគ្នេយ៍ប្រចាំនៅវៀតណាម ក្រុមហ៊ុន VinFast បច្ចុប្បន្នមានបណ្ដាញមជ្ឈមណ្ឌលស្រាវជ្រាវ និងអភិវឌ្ឍ R&D (Research and development) នៅអូស្ត្រាលី អាល្លឺម៉ង់ និងអាមេរិក និងមជ្ឈមណ្ឌលធ្វើតេស្តរថយន្តទំនើបនៅអូស្ត្រាលីផងដែរ៕

ប្រភព៖ Vingroup, Taiwannews

January 22, 2021

Trump នៅសល់ទ្រព្យប៉ុន្មានទៀត ក្រោយ 4ឆ្នាំធ្វើជាប្រធានាធិបតី?

ឆ្នាំ 2020 គឺជាឆ្នាំអាក្រក់បំផុតសម្រាប់អតីតប្រធានាធិបតីអាមេរិក Donald Trump ព្រោះថា ទន្ទឹមនឹងការចាញ់ឆ្នោត លោក Trump ក៏ជួបបញ្ហាហិរញ្ញវត្ថុផងដែរ។

ឆ្នាំ 2016 លោក Trump បានក្លាយជាមហាសេដ្ឋីដំបូងដែលជាប់ឆ្នោតជាប្រធានាធិបតីអាមេរិក។ ប៉ុន្តែ នៅក្នុងអំឡុង 4 ឆ្នាំនៅសេតវិមាន ចំណាត់ថ្នាក់មហាសេដ្ឋីរបស់លោក Trump បានធ្លាក់មកនៅលំដាប់ទី 1001 នៅក្នុងបញ្ជីចំណាត់ថ្នាក់អ្នកមានជាងគេក្នុងលោករបស់ទស្សនាវដ្ដី Forbes។

តាមការស្រាវជ្រាវ ទ្រព្យសុទ្ធរបស់លោក Trump បានថយចុះពី 4.5 ពាន់លានដុល្លារកាលពីខែមីនា ឆ្នាំ 2016 (មុនពេលជាប់ឆ្នោតជាប្រធានាធិបតី) មកនៅត្រឹម 2.1 ពាន់លានដុល្លារក្នុងឆ្នាំ 2020។ ក្នុងឆ្នាំ 2016 លោកបានចំណាយប្រាក់ផ្ទាល់ខ្លួនចំនួន 66 លានដុល្លារដើម្បីធ្វើសកម្មភាពឃោសនារកសំឡេងឆ្នោត ក្នុងដែលប្រាក់ប្រមូលបានពីការអ្នកគាំទ្រ មានចំនួន 368 លានដុល្លារ។

យោងតាម Forbes ទ្រព្យរបស់លោក Trump បានថយចុះច្រើនបំផុតគឺនៅក្នុងឆ្នាំ 2017 និង 2020។ ទ្រព្យរបស់មហាសេដ្ឋីរូបនេះ បានថយពី 3.7 ពាន់លានដុល្លារកាលពីចុងឆ្នាំ 2016 មកនៅត្រឹម 3.1 ពាន់លានដុល្លារក្នុងឆ្នាំ 2017 ដោយសារតែ «ឱនភាព» ក្នុងវិស័យលក់រាយ និងទីផ្សារអចលនទ្រព្យនៅទីក្រុង New York ព្រោះលោកមានទ្រព្យច្រើនក្នុងវិស័យទាំងនេះ។

អគារសណ្ឋាគារ Trump International Hotel Las Vegas

ការថយចុះនៃទ្រព្យដ៏គួរឱ្យកត់សម្គាល់របស់អតីតប្រធានាធិបតី Trump គឺកើតឡើងនៅក្នុងឆ្នាំ 2020។ បច្ចុប្បន្ន ទ្រព្យសុទ្ធរបស់លោកគឺមានត្រឹមតែ 2.1 ពាន់លានដុល្លារប៉ុណ្ណោះ នេះបើតាមស្ថិតិរបស់ Forbes។ ទស្សនាវដ្ដី Forbes បានរកឃើញថា Covid-19 គឺជាកត្តាសំខាន់បំផុតដែលបានធ្វើឱ្យទ្រព្យរបស់លោក Trump ត្រូវថយចុះនៅក្នុងឆ្នាំ 2020។

ប្រភពចំណូលសំខាន់របស់លោក Trump គឺបានមកពីបណ្ដាញហាង អគារការិយាល័យ និងសណ្ឋាគារខ្ពស់ៗ រួមនឹងទីលានវាយកូនគោលជាដើម។ ជាក់ស្ដែង ដើម្បីទប់ស្កាត់ការឆ្លងវីរុស Covid-19 ប្រជាជនទូទៅត្រូវធ្វើការពីផ្ទះ ក្រុមហ៊ុនត្រូវបិទទ្វារ ធ្វើឱ្យប្រភពចំណូលរបស់លោក Trump ក៏ត្រូវថយចុះទៅតាមនោះដែរ។

យោងតាមរបាយការណ៍ហិរញ្ញវត្ថុចុងក្រោយរបស់លោក Trump បង្ហាញថា ចំណូលរបស់លោកបានថយចុះនៅត្រឹមពី 273 ដល់ 308 លានដុល្លារក្នុងដំណាក់កាលពីឆ្នាំ 2020 បូកនឹង 20 ថ្ងៃដើមឆ្នាំ 2021។ ក្នុងរបាយការណ៍ឆ្នាំ 2017 លោករកបានជាង 528.9 លានដុល្លារក្នុងរយៈពេល 15.5 ខែ ដោយបានបូកជាមួយនឹង 3 ខែដើមអាណត្តិប្រធានាធិបតីរបស់លោក។

ជាងនេះ ក្រុមហ៊ុនអចលនទ្រព្យរបស់លោក Trump ក៏កំពុងតែលិចលង់ក្នុងបំណុលជាង 1 ពាន់លានដុល្លារផងដែរ ដែលភាគច្រើននឹងដល់ថ្ងៃកំណត់នៅ 3 ឆ្នាំទៀត។ ក្នុងចំណោមនេះ មានបំណុលចំនួន 1/3 ត្រូវបានធានាដោយបុគ្គល៕

ប្រភព៖ ព័ត៌មានចម្រុះ

January 22, 2021

តំបន់បឹងកប់ស្រូវនឹងមានអនុក្រឹត្យថ្មី កែប្រែអនុក្រឹត្យចាស់ ខណៈស្ថាប័នរដ្ឋចំនួន 3 ទៀត នឹងរើទៅទីនោះ

កាលពីព្រឹកមិញនេះ ប្រមុខរាជរដ្ឋាភិបាលកម្ពុជា បានមានប្រសាសន៍ថា ស្ថាប័នរដ្ឋចំនួន 3 ទៀត នឹងត្រូវរើទៅតំបន់បឹងតាមោក ក្នុងនោះក៏មានអគ្គបញ្ជាការដ្ឋានកងទ័ពផងដែរ។

នៅក្នុងពិធីសម្ពោធដាក់ឱ្យប្រើប្រាស់ជាផ្លូវការអគារទីស្ដីការក្រសួងសាធារណការនិងដឹកជញ្ជូនថ្មី នាព្រឹកថ្ងៃទី 22 ខែមករានេះ សម្តេចតេជោ ហ៊ុន សែន មានប្រសាសន៍ថា អនុក្រឹត្យដែលត្រូវបានចេញកាលពីលើកមុនគឺខុសពីស្ថានភាពជាក់ស្តែងនៃបឹងលិចទឹកនៅខាងជើងទីក្រុងភ្នំពេញ ដូច្នេះ សម្តេចនឹងចេញអនុក្រឹត្យថ្មីដើម្បីកែប្រែអនុក្រឹត្យចាស់ ទាក់ទងនឹងទំហំផ្ទៃបឹងតាមោក។

ទាក់ទងនឹងតំបន់បឹងតាមោកនេះដែរ សម្ដេច មានបន្ថែមថា ការលុបបឹង ឬប្រឡាយ ដែលបិទមុខទឹកនៅតំបន់បឹងតាមោកនេះ សម្តេចមិនយល់ស្របនោះទេ។ យ៉ាងនេះក្ដី ប្រមុខរាជរដ្ឋាភិបាលបានបញ្ជាក់ថា សម្ដេចគាំទ្រដល់ការលុបបឹង ប្រឡាយ ក្នុងបំណងអភិវឌ្ឍ និងពង្រីកទីក្រុងភ្នំពេញតែប៉ុណ្ណោះ។

នៅតំបន់បឹងតាមោក បច្ចុប្បន្នមានក្រុមហ៊ុនឯកជនជាច្រើនកំពុងតែមានគម្រោងអភិវឌ្ឍន៍ រួមនឹងសំណង់នានាគួរឱ្យកត់សម្គាល់ បន្ទាប់ពីរាជរដ្ឋាភិបាលមានគម្រោងអភិវឌ្ឍនៅតំបន់នេះ។ ប្រមុខរាជរដ្ឋាភិបាលមានប្រសាសន៍ថា ស្ថាប័នរដ្ឋចំនួន 3 ទៀត នឹងត្រូវរើទៅតំបន់បឹងតាមោក រួមមានអគ្គបញ្ជាការដ្ឋានកងទ័ព និងមន្ទីរពេទ្យចំនួន 2។

បឹងតាមោក ឬបឹងកប់ស្រូវដែលមានចម្ងាយពីអាកាសយានដ្ឋានអន្តរជាតិភ្នំពេញប្រមាណ 12 គីឡូម៉ែត្រ គឺជាបឹងធម្មជាតិធំជាងគេនៅរាជធានីភ្នំពេញនាបច្ចុប្បន្ន និងមានទីតាំងនៅភាគខាងលិចឈៀងខាងជើងតាមបណ្តោយមហាវិថីឈ្នះឈ្នះ លាតសន្ធឹងលើខណ្ឌចំនួន 2 សង្កាត់ចំនួន 6 និងភូមិចំនួន 25៕

January 22, 2021

អាមេរិកប្រកាសបន្តផ្ដល់ជំនួយដល់ WHO

កាលពីថ្ងៃទី 21 មករា សហរដ្ឋអាមេរិកបានប្រកាសថា នឹងបន្តជួយដល់អង្គការសុខភាពពិភពលោក (WHO) ក្នុងគ្រាដែលប្រធានាធិបតី Joe Biden កំពុងចាប់ផ្ដើមគោលនយោបាយសហការអន្តរជាតិទ្រង់ទ្រាយធំជាងមុន នៅក្នុងយុទ្ធនាការប្រឆាំងនឹងវីរុស Covid-19។

ក្នុងថ្ងៃធ្វើការដំបូងក្នុងឋានៈជាប្រធានាធិបតីអាមេរិក លោក Biden បានបញ្ជាក់ថា លោកបានលុបចោលសេចក្ដីសម្រេចរបស់អតីតប្រធានាធិបតី Trump ទាក់ទងនឹងបញ្ហាដកខ្លួនចេញពី WHO។ មួយថ្ងៃបន្ទាប់ ទីប្រឹក្សាជាន់ខ្ពស់ផ្នែកសុខាភិបាលរបស់រដ្ឋាភិបាលអាមេរិក លោក Anthony Fauci បានបញ្ជាក់ថា សហរដ្ឋអាមេរិកនឹងបន្តផ្ដល់វិភាគទានជាទឹកប្រាក់ក្នុងទំហំធំដល់ WHO។ នៅក្នុងកិច្ចប្រជុំតាមអនឡាញរបស់អង្គការសុខភាពពិភពលោក លោក Anthony Fauci បានលើកឡើងថា៖ «ក្នុងស្ថានភាពលំបាក WHO ប្រមូលបានសហគមន៍អ្នកវិទ្យាសាស្ត្រ ស្រាវជ្រាវ និងអភិវឌ្ឍដើម្បីពន្លឿនការបង្កើតវ៉ាក់សាំង វិធីសាស្ត្រព្យាបាល និងវិធីពិនិត្យជំងឺ»។

មុននេះ លោក Fauci បានប្រកាសអំពីសេចក្ដីសម្រេចរបស់សហរដ្ឋអាមេរិកថា នៅតែជាសមាជិករបស់ WHO ព្រមទាំងបានអរគុណដល់អង្គការនេះដែលបានដឹកនាំបេសកកម្មទប់ទល់នឹង Covid-19 នៅទូទាំងសកលលោក។ ប្រធាន WHO លោក Tedros Adhanon Ghegreyesus បានសម្ដែងការសាទរចំពោះការសម្រេចចិត្តនេះរបស់អាមេរិក ខណៈដែលអគ្គលេខាធិការអង្គការសហប្រជាជាតិ លោក Antonio Guterres ក៏បានវាយតម្លៃខ្ពស់ចំពោះ «ជំហានប្រកបដោយវិជ្ជមាន» ដែលរដ្ឋាភិបាលថ្មីរបស់អាមេរិកបានប្រកាស។

លោក Anthony Fauci (ឆ្វេង) និងប្រធានអង្គការសុខភាពពិភពលោក

ក្រៅពីការសម្រេចចិត្តខាងលើ ប្រធានាធិបតីថ្មីរបស់អាមេរិក កាលពីថ្ងៃទី 21 មករា ក៏បានប្រកាសអំពីយុទ្ធនាការប្រយុទ្ធប្រឆាំងនឹង Covid-19 នៅក្នុងស្រុក ក្នុងនោះក៏មានការជំរុញលើយុទ្ធនាការចាក់វ៉ាក់សាំង ការធ្វើតេស្តរកវីរុស និងផ្ដោតទៅលើកត្តាវិទ្យាសាស្ត្រផងដែរ។ បទបញ្ជាតម្រូវឱ្យពាក់ម៉ាស ការពង្រឹងប្រព័ន្ធសុខាភិបាល ការការពារជនងាយរងគ្រោះបំផុត ការជំរុញឱ្យមានយុត្តិធម៌លើបញ្ហាពូជសាសន៍ ការស្ដារតួនាទីគ្រប់គ្រងពិភពលោករបស់សហរដ្ឋអាមេរិកជាមួយនឹងស្មារតីត្រៀមខ្លួនខ្ពស់សម្រាប់ទប់ទល់នឹងមហារោគរាតត្បាតនាពេលអនាគត ក៏ត្រូវបានយកចិត្តទុកដាក់ជាងមុន។

រដ្ឋាភិបាលថ្មីនៃសហរដ្ឋអាមេរិកក៏មានសង្ឃឹមថា សភានឹងអនុម័តយល់ព្រមឱ្យបញ្ចេញកញ្ចប់ថវិកាជំនួយចំនួន 1.9 លានលាន (1,900,000,000,000.00) ដុល្លារ សម្រាប់ការពារ និងការប្រយុទ្ធប្រឆាំងនឹង Covid-19 ក្នុងនោះ ទឹកប្រាក់ចំនួន 20 ពាន់លានដុល្លារទុកសម្រាប់ទិញវ៉ាក់សាំង និង 50 ពាន់លានដុល្លារសម្រាប់យុទ្ធនាការធ្វើតេស្តរកវីរុស។

សហរដ្ឋអាមេរិក បច្ចុប្បន្នគឺជាប្រទេសដែលរងគ្រោះធ្ងន់ធ្ងរបំផុតដោយសារតែ Covid-19 ដោយមានមនុស្សជាង 405,000 នាក់ បានបាត់បង់ជីវិត។ ការវិភាគ និងការព្យាកររបស់រដ្ឋាភិបាលអាមេរិក បានឱ្យដឹងថា វីរុសក្លាយពូជថ្មីរបស់ Covid-19 ដែលត្រូវបានរកឃើញដំបូងនៅអង់គ្លេស អាចឆ្លងចូលទឹកដីសហរដ្ឋអាមេរិក និងធ្វើឱ្យសម្បុកវីរុសនៅទីនេះកើនឡើងខ្ពស់នាប៉ុន្មានខែខាងមុខ៕

ប្រភព៖ UN

January 22, 2021

កម្ពុជារកឃើញអ្នកវិជ្ជមាននឹង Covid-19 ចំនួន 3នាក់ទៀត ខណៈតួលេខអ្នកវិជ្ជមានសរុបទូទាំងពិភពលោក កើនដល់ជាង 98លាននាក់

ក្រសួងសុខាភិបាលកម្ពុជាបានប្រកាសថា នៅក្នុងរយៈពេល 24 ម៉ោងកន្លង មានអ្នកឆ្លងវីរុស Covid-19 ចំនួន 3 នាក់ត្រូវបានរកឃើញ ហើយអ្នកជំងឺទាំងនេះគឺសុទ្ធតែជាករណីនេះចូលដែលមិនមែនជាពលករត្រលប់ពីប្រទេសថៃ។

សម្រាប់ព័ត៌មានបន្ថែមទាក់ទងនឹងករណីរកឃើញថ្មីនេះ សូមបន្តអានរបាយការណ៍ខាងក្រោមរបស់ក្រសួងសុខាភិបាលកម្ពុជា។

គិតត្រឹមព្រឹកថ្ងៃទី 22 ខែមករា ឆ្នាំ 2021 នេះ កម្ពុជាបានរកឃើញអ្នកឆ្លងវីរុស Covid-19 សរុបចំនួន 456 នាក់ ក្នុងនោះមានអ្នកជាសះស្បើយចំនួន 399 នាក់ និងអ្នកកំពុងព្យាបាលមានចំនួន 59 នាក់។

នៅទូទាំងពិភពលោក ករណីវិជ្ជមាននឹង Covid-19 សរុប បានកើនដល់ 98,050,016 នាក់ ក្នុងនោះមានអ្នកស្លាប់សរុបចំនួន 2,098,160 នាក់ និងអ្នកជាសះស្បើយចំនួន 70,446,519 នាក់។ ក្នុងចំណោមអ្នកជំងឺដែលកំពុងព្យាបាលចំនួន 25,505,337 នាក់គឺមាន 111,298 នាក់កំពុងមានអាការធ្ងន់ធ្ងរ អាចប្រឈមនឹងការស្លាប់គ្រប់ពេល៕

January 22, 2021

ឆេះរោងចក្រផលិតវ៉ាក់សាំងធំជាងគេក្នុងពិភពលោក! មនុស្ស 5នាក់បាត់បង់ជីវិត

អណ្ដាតភ្លើងបានឆាបឆេះនៅក្នុងវិទ្យាស្ថានស្រាវជ្រាវមួយក្នុងរដ្ឋ Maharashtra ជាកន្លែងដែលកំពុងផលិតវ៉ាក់សាំង Covid-19 រាប់លានដូស បណ្ដាលឱ្យមនុស្ស 5 នាក់បានស្លាប់។

រូបភាពនៅលើកញ្ចក់ទូរទស្សន៍បង្ហាញថា ផ្សែងខ្មួលខ្មាញ់បាញ់ចេញពីអគារមួយនៃវិទ្យាស្ថាន Serum ផលិតវ៉ាក់សាំង នៅទីក្រុង Pune រដ្ឋ Maharashtra ភាគខាងលិចប្រទេសឥណ្ឌាកាលពីល្ងាចថ្ងៃទី 21 មករា។ អណ្ដាតភ្លើងបានឆាបឆេះនៅក្នុងទីតាំងដែលកំពុងសាងសង់លើផ្ទៃដីទំហំ 40 ហិកតា។

សេចក្ដីរាយការណ៍បានឱ្យដឹងថា តំបន់ដែលរងអគ្គិភ័យនេះ មានចម្ងាយពីទីតាំងផលិតវ៉ាក់សាំង Covid-19 ត្រឹមតែប៉ុន្មាននាទីប៉ុណ្ណោះ បើធ្វើដំណើរតាមរថយន្ត។ មានអគារចំនួន 9 ដែលកំពុងត្រូវបានសាងសង់នៅក្នុងតំបន់ដែលមានអគ្គិភ័យ ដើម្បីបង្កើនផលិតភាពក្នុងការផលិតវ៉ាក់សាំង។

Murlidhar Mohol អភិបាលក្រុង Pune បានឱ្យដឹងថា «មនុស្ស 5 នាក់់បានបាត់បង់ជីវិត។ សាកសពរបស់ជនរងគ្រោះត្រូវបានរកឃើញបន្ទាប់ពីអគ្គិភ័យត្រូវបានគ្រប់គ្រង។

បច្ចុប្បន្ន គេមិនទាន់រកឃើញមូលហេតុដែលនាំឱ្យមានគ្រោះអគ្គិភ័យខាងលើនេះនៅឡើយ។

វិទ្យាស្ថាន Serum ឥណ្ឌា (SII) ជាទីតាំងផលិតវ៉ាក់សាំងធំជាងគេបង្អស់ក្នុងពិភពលោក កំពុងផលិតវ៉ាក់សាំង Covishield ប្រឆាំង Covid-19 រាប់លានដូស ដែលត្រូវបានអភិវឌ្ឍដោយក្រុមហ៊ុន AstraZeneca និងសាកលវិទ្យាល័យ Oxford។ ភាគីក្រុមហ៊ុនបានអះអាងថា អគ្គិភ័យនេះមិនប៉ះពាល់ដល់ដំណើរការនៃការផលិតវ៉ាក់សាំងនោះទេ។

វិទ្យាស្ថាន Serum របស់ឥណ្ឌា ត្រូវបានបង្កើតឡើងកាលពីឆ្នាំ 1966 ដោយលោក Cyrus Poonawalla។ វិទ្យាស្ថាននេះផលិតវ៉ាក់សាំងចំនួន 1.5 ពាន់លានដូសជារៀងរាល់ឆ្នាំ រួមមានវ៉ាក់សាំងប្រឆាំងជំងឺស្វិតដៃជើង រលាកថ្លើមប្រភេទ B ជំងឺកញ្ជ្រិល។ល។ វ៉ាក់សាំងរបស់ SII ត្រូវបាននាំចេញទៅកាន់ប្រទេសជាង 170 នៅទូទាំងពិភពលោក។

វិទ្យាស្ថានខាងលើក៏មានគម្រោងផ្គត់ផ្គង់វ៉ាក់សាំង Covid-19 ដែលស្ថិតក្នុងកម្មវិធី Covax ដឹកនាំដោយអង្គការសុខភាពពិភពលោក (WHO) ដើម្បីប្រមូលទិញ និងចែកចាយវ៉ាក់សាំង Covid-19 ទៅឱ្យបណ្ដាប្រទេសក្រីក្រផងដែរ៕

ប្រភព៖ AFP

January 22, 2021

ខេត្តស្ទឹងត្រែងកំពុងសិក្សាអំពីទីតាំងសម្រាប់សាងសង់អាកាសយានដ្ឋានថ្មី

អាជ្ញាធរខេត្តស្ទឹងត្រែង នៅក្នុងសន្និសីទសារព័ត៌មានមួយ បានឱ្យដឹងថា ក្នុងករណីដែលព្រលានយន្តហោះចាស់មានទំហំតូច ពិបាកក្នុងការពង្រីកបន្ថែម និងមិនអំណោយផលដល់ការចុះចតរបស់យន្តហោះធុនធំ នោះអាកាសយានដ្ឋានថ្មីមួយអាចនឹងត្រូវបង្កើតឡើង។

កាលពីថ្ងៃទី 21 ខែមករានេះ នៅក្នុងសន្និសីទសារព័ត៌មានមួយ ក្រោមប្រធានបទ «វឌ្ឍនភាពមូលដ្ឋានឃុំ សង្កាត់ និងទិសដៅការងារបន្ដខេត្ដស្ទឹងត្រែង» លោក ដួង ពៅ អភិបាលរងនៃគណៈឣភិបាលខេត្តស្ទឹងត្រែងបានលើកឡើងថា ព្រលានយន្តហោះនៅក្នុងខេត្តស្ទឹងត្រែង អាចនឹងត្រូវសាងសង់ឡើងនាពេលអនាគត ដោយពង្រីកពីព្រលានយន្តហោះចាស់។ លោកបានថ្លែងថា អនាគតអាកាសយានដ្ឋាននេះនឹងមានទំហំផ្ទៃដីប្រមាណ 500 ហិកតា និងបន្ថែមថា រាជរដ្ឋាភិបាលបានអនុញ្ញាតឱ្យក្រសួងទេសចរណ៍ និងអាជ្ញាធរអាកាសចរណ៍ស៊ីវិលកម្ពុជា ធ្វើការសិក្សា និងរៀបចំផែនទីគោលសម្រាប់ការសាងសង់ដើម្បីពង្រីកព្រលានយន្តហោះចាស់ក្នុងខេត្តនេះ។

ខេត្តស្ទឹងត្រែងកំពុងសិក្សាទីតាំងសម្រាប់សាងសង់អាកាសយានដ្ឋានថ្មី — អគារមួយនៃអាកាសយានដ្ឋានចាស់របស់ខេត្តស្ទឹងត្រែង

ទាក់ទងនឹងគម្រោងសាងសង់ខាងលើ អភិបាលរងខេត្តស្ទឹងត្រែងមានប្រសាសន៍ថា គោលដៅរយៈពេល 5 ឆ្នាំខាងមុខទៀត អាជ្ញាធរអាកាសចរណ៍ស៊ីវិល និងក្រសួងទេសចរណ៍កម្ពុជា កំពុងតែសិក្សាលម្អិតជាមួយភាគីធនាគារអភិវឌ្ឍន៍អាស៊ី (ADB) ហើយអាជ្ញាធរក៏កំពុងតែសិក្សាអំពីទីតាំងដទៃទៀតដែលអាចសាងសង់ជាអាកាសយានដ្ឋានថ្មីបាន ក្នុងករណីព្រលានយន្តហោះចាស់មិនអំណោយផលដល់ការចុះចតរបស់យន្តហោះប្រភេទធំ។

លោកអភិបាលរងខេត្តស្ទឹងត្រែង បានបញ្ជាក់យ៉ាងច្បាស់ថា អនាគតអាចមានព្រលានយន្តហោះនៅខេត្តនេះ ដោយការស្ដារ ពង្រីក និងអភិវឌ្ឍនៅពេលណាមួយ។ ក៏ប៉ុន្តែលោកសង្កត់ធ្ងន់ថា មិនទាន់ដឹងច្បាស់ថា នឹងអាចមាននៅពេលណាឱ្យប្រាកដនៅឡើយ៕

January 21, 2021

ស្ពានឫស្សីកែវ ឆ្លងកាត់ទន្លេសាប ស្ថាបនារួចរាល់បាន 36% ហើយ

យោងតាមគេហទំព័រហ្វេសប៊ុក របស់មន្ទីរ សាធារណការ រាជធានីភ្នំពេញ គិតត្រឹមថ្ងៃទី 20 ខែមករា ឆ្នាំ 2021 ស្ពានឫស្សីកែវ ឆ្លងកាត់ទន្លេសាប ត្រូវបានសាងសង់រួចប្រមាណ 36%។

ស្ពាននេះមានប្រវែង 922 ម៉ែត្រ និងទទឹង 20.5 ម៉ែត្រ។ ចិញ្ចើមស្ពានសម្រាប់ថ្មើរជើង មានទទឹង 1.25 ម៉ែត្រសងខាង សសរស្ពានសម្រាប់ព្យួរខ្សែកាប ធៀបនឹងកម្រាលស្ពាន មានកម្ពស់ 34 ម៉ែត្រ។

ស្ពានឫស្សីកែវ ឆ្លងកាត់ទន្លេសាបនេះ មានតួនាទីសំខាន់ ក្នុងការរួមមចំណែក ដោះស្រាយបញ្ហាកកស្ទះចរាចរណ៍លើផ្លូវជាតិលេខ 6 និងផ្លូវជាតិលេខ 5 រួមនឹង ច្រកចេញចូលរាជធានីភ្នំពេញផងដែរ៕

ប្រភព៖ មន្ទីរសាធារណការរាជធានីភ្នំពេញ

January 21, 2021

ខាងក្នុងបន្ទប់ការិយាល័យពងក្រពើរបស់ប្រធានាធិបតីអាមេរិក Joe Biden មានអ្វីខ្លះ?

សារព័ត៌មាន Washington Post បានចេញផ្សាយថា ការិយាល័យរាងពងក្រពើគឺជានិមិត្តរូបនៃអំណាចរបស់ប្រធានាធិបតីអាមេរិក។ នៅពេលក្លាយជាម្ចាស់សេតវិមាន ប្រធានាធិបតីនីមួយៗ តែងតែស្នើឱ្យមានការតុបតែងការិយាល័យនេះទៅតាមចំណូលចិត្តរបស់ខ្លួនដើម្បីបង្ហាញអំពីភាពដោយឡែក និងរបៀបនៃការដឹកនាំ។

សម្រាប់លោក Joe Biden វិញ លោកបានស្នើឱ្យដាក់តាំងរូបភាព និងរូបចម្លាក់នានារបស់បុគ្គលល្បីឈ្មោះជាច្រើនរូបរបស់សហរដ្ឋអាមេរិក នៅក្នុងការិយាល័យពងក្រពើ (Oval Office) នេះ។

កម្រាលព្រំថ្មីនៅក្នុងបន្ទប់ការិយាល័យរបស់ប្រធានាធិបតី Joe Biden

អ្វីដែលជាចំណុចគួរឱ្យចាប់អារម្មណ៍ជាងគេនៅក្នុងការិយាល័យនេះ នោះគឺរូបភាពទំហំធំរបស់ប្រធានាធិបតីទី 32 ឈ្មោះ Franklin Delano Roosevelt ដែលត្រូវបានដាក់តាំងនៅក្បែរតុ Resolute របស់ប្រធានាធិបតី។ Franklin Delano Roosevelt គឺជាប្រធានាធិបតីដែលបានជួយឱ្យសហរដ្ឋអាមេរក ឆ្លងផុតពីវិបត្តិដ៏ធំ ដែលដូចទៅនឹងឧបសគ្គដែលលោក Biden កំពុងជួបប្រទះ។

រូបថតមួយចំនួនត្រូវបានព្យួរជាគូ ដូចជា រូបថតរបស់ប្រធានាធិបតីទី 3 Thomas Jefferson និងរូបអតីតរដ្ឋមន្ត្រីហិរញ្ញវត្ថុ Alexander Hamilton ជាដើម ដែលជាបុគ្គលមិនសូវចុះសម្រុងនឹងគ្នា ដែលនេះបង្ហាញអំពីផលប្រយោជន៍ដែលបានមកពីការយល់ឃើញផ្ទុយគ្នា។ ការិយាល័យរបស់ប្រធានាធិបតី Biden ឱ្យដឹងថា ការដែលរូបថតត្រូវបានដាក់តាំងជាគូបែបនេះគឺដើម្បីបញ្ជាក់ និងសង្កត់ធ្ងន់ថា ភាពខុសគ្នានៅក្នុងការយល់ឃើញគឺជាប្រការដ៏ចាំបាច់នៃលទ្ធិប្រជាធិបតេយ្យ។

រូបរបស់បុគ្គលល្បីៗដែលត្រូវបានដាក់តាំងជាគូ

ក្រៅពីរូបថតនានា ការិយាល័យពងក្រពើនេះក៏មានតាំងរូបចម្លាក់ពាក់កណ្ដាល់ខ្លួនជាច្រើនផងដែរ ក្នុងនោះក៏មានរូបចម្លាក់របស់ Martin Luther King និង Robert F. Kennedy ដែលត្រូវបានដាក់នៅក្បែរម៉ាស៊ីនកម្ដៅ។ លោក Biden តែងតែរំលឹកដល់បុគ្គលទាំងពីររូបនេះ នៅពេលលោកនិយាយដល់សិទ្ធិពលរដ្ឋ។

រូបភាពរបស់ Benjamin Franklin នៅក្នុងការិយាល័យនេះបង្ហាញអំពីការយកចិត្តទុកដាក់របស់លោក Biden នៅក្នុងការដើរតាមមាគ៌ាវិទ្យាសាស្ត្រ។ រូបភាពនេះត្រូវបានដាក់តាំងនៅក្បែរដុំថ្មរបស់ឋានព្រះចន្ទដែលស្ថិតនៅលើធ្នើរសៀវភៅ ក្នុងបំណងរំលឹកដល់ប្រជាជនអាមេរិកាំងអំពីមហិច្ឆតា និងសមិទ្ធផលរបស់មនុស្សជំនាន់មុន។

រូបចម្លាក់របស់សកម្មជនសិទ្ធិពលរដ្ឋ Cesar Chavez និងរូបថតឯកជនរបស់លោក Biden

គ្រឿងសង្ហារិមក្នុងការិយាល័យប្រធានាធិបតី ត្រូវបានប្ដូរនៅក្នុងថ្ងៃចូលកាន់តំណែងដំបូងរបស់លោក Biden។ ទង់ជ័យរបស់កងទ័ពអាមេរិកដែលលោក Trump ដាក់តាំងនៅខាងក្រោយតុប្រធានាធិបតី ត្រូវបានដកចេញ និងជំនួសដោយទង់ជាតិអាមេរិក និងទង់ដែលមានរូបត្រាប្រធានាធិបតី។

រូបភាពរបស់ប្រធានាធិបតី Andrew Jackson ដែលលោក Trump បានតាំង ក៏ត្រូវបានយកចេញ។ លោក Trump និងលោក Jackson សុទ្ធតែជាអ្នកដើរតាមមាគ៌ាប្រជានិយម។ លោក Andrew Jackson គឺជាប្រធានាធិបតីដំបូងគេដែលត្រូវបានបោះឆ្នោតផ្ទាល់ ហើយលោកក៏ជាអ្នកដែលបានស្នើឱ្យលុបបំបាត់របបប្រតិភូតំណាងម្ចាស់ឆ្នោត (ប្រតិភូតំណាងម្ចាស់ឆ្នោតគឺជាក្រុមតំណាងរាស្ត្រដែលបោះឆ្នោតជ្រើសរើសប្រធានាធិបតីដោយផ្ទាល់ បន្ទាប់ពីការបោះឆ្នោតពីពលរដ្ឋទូទៅ) ផងដែរ។

ក្នុងការិយាល័យពងក្រពើនេះ មានវត្ថុមួយដែលមិនត្រូវបានប្ដូរផ្លាស់ នោះគឺតុ Resolute របស់ប្រធានាធិបតី។ តុនេះសុទ្ធតែត្រូវបានប្រធានាធិបតីមុនៗប្រើប្រាស់ រួមទាំងលោក Trump ផងដែរ។

នៅលើតុនេះ ក្នុងថ្ងៃចូលធ្វើការដំបូង លោក Biden បានចុះហត្ថលេខាលើបទបញ្ជាចំនួន 15 ដើម្បីដោះស្រាយបញ្ហាបន្ទាន់មួយចំនួន ដូចជា បញ្ហា Covid-19 បញ្ហាប្រែប្រួលអាកាសធាតុ និងបញ្ហារើសអើងពូជសាសន៍ រួមនឹងការលុបចោលគោលនយោបាយមួយចំនួនដែលត្រូវបានអតីតប្រធានាធិបតី Donald Trump ដាក់ចេញ៕

ប្រភព៖ Washington Post

January 21, 2021

ធ្លាក់យន្តហោះនៅអាមេរិក ចំថ្ងៃលោក Biden ស្បថឡើងកាន់តំណែង! ទាហាន 3នាក់បាត់បង់ជីវិត

នៅយប់ថ្ងៃទី 20 ខែមករា (នៅអាមេរិក) ឧទ្ធម្ភាគចក្រមួយគ្រឿងរបស់កងកម្លាំងឆ្មាំការពារជាតិសហរដ្ឋអាមេរិក បានធ្លាក់នៅពេលកំពុងបំពេញបេសកកម្មហ្វឹកហាត់តាមធម្មតារបស់ខ្លួននៅជាយក្រុង New York បណ្ដាលឱ្យទាហានចំនួន 3 នាក់បានស្លាប់។

CNN បានដឹកស្រង់ប្រភពព័ត៌មានពីការិយាល័យយោធា និងកងទ័ពជើងទឹកនៃរដ្ឋ New York ឱ្យដឹងថា ករណីគ្រោះធ្លាក់ឧទ្ធម្ភាគចក្រនេះកើតឡើងនៅក្នុងទីរួមស្រុក Mendon ដែលមានចម្ងាយប្រហែល 27 គីឡូម៉ែត្រទៅទិសខាងត្បូងនៃទីក្រុង Rochester។

យោងតាមអធិការដ្ឋាននគរបាលនៃតំបន់ Monroe ឧទ្ធម្ភាគចក្រដែលជួបគ្រោះថ្នាក់នេះគឺជាប្រភេទ UH-60 ប្រើប្រាស់សម្រាប់ជម្លៀសផ្នែកសុខាភិបាល។ UH-60 បានធ្លាក់ទៅលើវាលស្រែស្ងាត់មួយនៅវេលាម៉ោង 6 និង 32 នាទីល្ងាច ថ្ងៃទី 20 មករា។

ព័ត៌មានដែលទទួលបានពីការហៅទូរស័ព្ទមកកាន់លេខ 911 បានឱ្យដឹងថា មុនពេលធ្លាក់ ឧទ្ធម្ភាគចក្រនេះបានហោះក្នុងកម្ពស់ទាប និងមានរបាយការណ៍អំពីបញ្ហាម៉ាស៊ីនផងដែរ នេះបើតាមការឱ្យដឹងពីអាជ្ញាធរ នៅក្នុងសន្និសីទសារព័ត៌មានមួយកាលពីព្រលប់ថ្ងៃទី 20 ខែមករា។

អធិការដ្ឋាននគរបាលខាងលើក៏បានឱ្យដឹងថា ក្រុមពន្លត់អគ្គិភ័យ ប៉ូលិសថ្នាក់រដ្ឋ និងតំណាងកងទ័ព ត្រូវបានបញ្ជូនទៅកាន់កន្លែងកើតហេតុ។ ឧទ្ធម្ភាគចក្រនេះកំពុងឆាបឆេះយ៉ាងសន្ធោសន្ធៅនៅពេលក្រុមអ្នកជួយសង្គ្រោះដំបូងបានទៅដល់។

បច្ចុប្បន្ន ផ្លូវដែលនៅក្បែរកន្លែងកើតហេតុ ត្រូវបានបិទការចេញចូលជាបណ្ដោះអាសន្ន ដើម្បីទុកឱ្យសមត្ថកិច្ចធ្វើការ។

Andrew Cuomo អភិបាលរដ្ឋ New York បានប្រកាសថា៖ «ក្រុមឆ្មាំការពារជាតិគឺជាក្រុមទាហានរបស់ប្រជាជន ជាក្រុមមនុស្សដែលស្ម័គ្រចិត្តបម្រើ និងការពារប្រទេសជាតិ។ ខ្ញុំជំនួសមុខឱ្យប្រជាជន New York សូមផ្ញើសេចក្ដីបួងសួង និងរំលែកទុក្ខដល់ក្រុមគ្រួសារសព អ្នកជាទីស្រលាញ់ និងមិត្តរួមក្រុមរបស់អ្នកក្លាហានដ៏គួរឱ្យគោរពទាំងនេះ ពួកគេគឺជាមនុស្សដែលយើងនឹងមិនបំភ្លេចចោលឡើយ»។

អភិបាលរដ្ឋខាងលើក៏បានបញ្ជាឱ្យបង្ហូតទង់ជាតិពាក់កណ្ដាលដងនៅលើអគារទាំងអស់របស់រដ្ឋ New York នៅថ្ងៃទី 21 ខែមករានេះ ដើម្បីគោរព និងផ្ដល់កិត្តិយសដល់ទាហានរងគ្រោះទាំងនេះ។

ការិយាល័យយោធា និងកងទ័ពជើងទឹករបស់រដ្ឋ New York បានបញ្ជាក់ថា ការណីគ្រោះថ្នាក់នេះកំពុងត្រូវបានស៊ើបអង្កេតយ៉ាងយកចិត្តទុកដាក់៕

ប្រភព៖ CNN

January 21, 2021

Author: សឿន សំណាង