សឿន សំណាង - La Reine Media

អាមេរិកចាប់ខ្លួនអ្នកលួចឡើងយន្តហោះដឹកក្រុមមន្ត្រីជាន់ខ្ពស់

បុរសម្នាក់ត្រូវបានចាប់ខ្លួន ក្រោយពីបានលួចឡើងយន្តហោះ C-40 របស់ក្រុមហោះហើរនៅមូលដ្ឋានទ័ព Andrews ដែលតែងត្រូវបានប្រើប្រាស់ក្នុងការដឹកក្រុមមន្ត្រីជាន់ខ្ពស់របស់សហរដ្ឋអាមេរិក កាលពីថ្ងៃទី 4 កុម្ភៈ។

«បុរសនេះបានរំលោភចូលកន្លែងចតយន្តហោះ និងបានចូលទៅក្នុងយន្តហោះ C-40 មួយគ្រឿងដែលជាកម្មសិទ្ធិរបស់ក្រុមហោះហើរលេខ 89។ កងកម្លាំងសន្តិសុខនៅមូលដ្ឋានទ័ព Andrews បានចាប់ខ្លួន និងសួរនាំបុរសនេះ» ការិយាល័យនៃមូលដ្ឋានទ័ព Andrews នៅ Maryland ប្រកាសកាលពីថ្ងៃទី 5 កុម្ភៈ។

អ្នកនាំពាក្យនៃមន្ទីរបញ្ចកោណ លោក John Kerby បានឱ្យដឹងថា ក្រសួងការពារជាតិ និងទ័ពអាកាស កំពុងតែពិនិត្យហេតុការណ៍នេះយ៉ាងម៉ត់ចត់។ លោក Kerby បន្ថែមថា «មូលដ្ឋានទ័ព បានប្រគល់បុរសនេះឱ្យសមត្ថកិច្ចអនុវត្តច្បាប់ក្នុងតំបន់រួចហើយ។ មិនមានតម្រុយណាមួយបង្ហាញថា បុរសនេះជាប់ទាក់ទិននឹងក្រុមជ្រុលនិយមនោះទេ»។

ក្រុមហោះហើរលេខ 89 មានយន្តហោះ Air Force One សម្រាប់ដឹកប្រធានាធិបតី និងយន្តហោះមួយចំនួនទៀតដែលប្រើប្រាស់ដើម្បីដឹកអនុប្រធានាធិបតី និងសមាជិកគណៈរដ្ឋមន្ត្រីផងដែរ។

មន្ត្រីម្នាក់នៅក្រសួងការពារជាតិ បានបញ្ជាក់ថា យន្តហោះ C-40 ដែលបុរសនេះបានលួចចូលទៅខាងក្នុង មិនស្ថិតនៅក្នុងក្រុមយន្តហោះអមដំណើរប្រធានាធិបតីនោះទេ៕

ប្រភព៖ CNN

February 6, 2021

កម្ពុជារកឃើញ 2នាក់ទៀតដែលវិជ្ជមាននឹង Covid-19

ក្រសួងសុខាភិបាលកម្ពុជា នាព្រឹកថ្ងៃទី 6 កុម្ភៈ ឆ្នាំ 2021 នេះ បានប្រកាសថា រកឃើញអ្នកវិជ្ជមាននឹង Covid-19 ចំនួន 2 ករណីបន្ថែមទៀត នាំឱ្យតួលេខអ្នកឆ្លងសរុបកើនដល់ 472 នាក់។

ករណីឆ្លងថ្មីខាងលើនេះ កើតឡើងចំពោះ អ្នកដំណើរដែលចូលមកកម្ពុជា ក្នុងនោះមានជនជាតិខ្មែរម្នាក់ ស្នាក់នៅក្នុងទីក្រុងតាខ្មៅ និងជនជាតិឥណ្ឌូនេស៊ីម្នាក់ស្នាក់នៅក្នុងខណ្ឌចំការមន រាជធានីភ្នំពេញ។ ព័ត៌មានលម្អិត សូមបន្តអានរបាយការណ៍របស់ក្រសួងសុខាភិបាលដែលមាននៅក្នុងសេចក្ដីប្រកាសខាងក្រោម។

គិតមកដល់ព្រឹកថ្ងៃទី 6 កុម្ភៈ ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 472 នាក់ ក្នុងនោះមានអ្នកជាសះស្បើយចំនួន 453 នាក់ និងកំពុងព្យាបាលចំនួន 19 នាក់។

February 6, 2021

គម្រោងចាក់វ៉ាក់សាំង Covid-19 ជូនប្រមុខរដ្ឋាភិបាល និងឥស្សរជនជាន់ខ្ពស់អមដំណើរ ត្រូវបានលុបចោល

ក្រសួងសុខាភិបាល នៅព្រលប់ថ្ងៃទី 5 កុម្ភៈ ឆ្នាំ 2021 នេះ បានប្រកាសឱ្យដឹងអំពីការប្រើប្រាស់វ៉ាក់សាំង Covid-19 ជាជំនួយរបស់ចិន ដែលនឹងមកដល់កម្ពុជានៅថ្ងៃទី 7 កុម្ភៈខាងមុខ។

សេចក្ដីប្រកាសថ្មីដែលយោងទៅតាមសេចក្ដីប្រកាសចាស់ចុះនៅថ្ងៃទី 3 កុម្ភៈ ឆ្នាំ 2021 បានបញ្ជាក់ថា វ៉ាក់សាំងចំនួន 3 សែនដូស និងសេរ៉ាំងចំនួន 300,800 ដើម នឹងមកដល់កម្ពុជានៅថ្ងៃទី 7 កុម្ភៈ ឆ្នាំ 2021។ ចំណែកអាយុដែលអាចចាក់វ៉ាក់សាំងនេះបាន គឺត្រូវមានចាប់ពី 18 ដល់ 59 ឆ្នាំ ខណៈអ្នកដែលមានអាយុលើសពី 60 ឆ្នាំ នឹងត្រូវរង់ចាំលទ្ធផលនៃការសិក្សាជាបន្តទៀត។

ក្រសួងបានបញ្ជាក់ថា គម្រោងចាក់វ៉ាក់សាំងជូន សម្ដេចតេជោ និងឥស្សរជនជាន់ខ្ពស់អមដំណើរដែលមានអាយុលើសពី 60 ឆ្នាំ ដែលគ្រោងនឹងធ្វើឡើងនៅថ្ងៃទី 10 ខាងមុខ ក៏ត្រូវបានលុបចោល និងត្រូវចាក់ជូនអ្នកដែលមានអាយុចាប់ពី 18 ឆ្នាំដល់ 59ឆ្នាំ ទៅតាមអាទិភាពដែលបានចែងនៅក្នុងពិធីសារសម្រាប់យុទ្ធនាការចាក់វ៉ាក់សាំង Covid-19។

ក្រុមមនុស្សអាទិភាពនឹងត្រូវបានជ្រើសរើសចេញពីបញ្ជីឈ្មោះអ្នកស្ម័គ្រចិត្តដែលបានចុះឈ្មោះតាមប្រព័ន្ធអនឡាញដែលនឹងត្រូវបានដាក់ឱ្យប្រើប្រាស់នៅសប្ដាហ៍ក្រោយ។ ការចាក់វ៉ាក់សាំងនឹងត្រូវបានធ្វើឡើងនៅតាមមន្ទីរពេទ្យរដ្ឋនៅថ្នាក់ជាតិ ខេត្ត និងស្រុក។ សម្រាប់កាលបរិច្ឆេទនៃការចាក់វ៉ាក់សាំង និងព័ត៌មានលម្អិតផ្សេងទៀត ក្រសួងសុខាភិបាលនឹងជម្រាមជូននៅពេលក្រោយ៕

February 5, 2021

បាតុករប្រឆាំងរដ្ឋប្រហារយោធានៅមីយ៉ានម៉ា ចាប់ផ្ដើមបង្ហាញសញ្ញាយកគំរូតាមបាតុករថៃ

មនុស្សប្រមាណ 200 នាក់ ដែលជានិស្សិត និងគ្រូបង្រៀននៅសាកលវិទ្យាល័យ Dagon នៃទីក្រុង Yangon របស់មីយ៉ានម៉ា នាំគ្នាចេញធ្វើបាតុកម្មប្រឆាំងនឹងអំពើរដ្ឋប្រហាររបស់កងទ័ពដែលបានដណ្ដើមអំណាចពីរដ្ឋាភិបាលរបស់លោកស្រី Suu Kyi។

នៅក្នុងបាតុកម្មនាថ្ងៃទី 5 កុម្ភៈនេះ គេឃើញក្រុមគ្រូបង្រៀនចងក្រណាត់ក្រហមនៅលើដៃ ដែលជាពណ៌របស់គណបក្សសម្ព័ន្ធជាតិដើម្បីប្រជាធិបតី (NLD) របស់លោកស្រី Aung San Suu Kyi ខណៈដែលក្រុមនិស្សិតលើកម្រាមដៃចំនួន 3 ស្រែកហ៊ោថា «អ្នកម្ដាយ Suu អមត!» (ទម្លាប់របស់ពលរដ្ឋមីយ៉ានម៉ាមួយចំនួន ដែលតែងហៅលោកស្រី Suu Kyi បែបនេះ)។ នេះគឺជាសញ្ញាមួយចំនួនដែលបង្ហាញថា ជាការយកគំរូតាមបាតុករនៅប្រទេសថៃ។

ក្រុមបាតុករមីយ៉ានម៉ា បានហែក្បួនព័ទ្ធជុំវិញទីលានរបស់សាកលវិទ្យាល័យ Dagon និងបាននាំគ្នាស្រែកច្រៀងចម្រៀងបដិវត្តដ៏ល្បីឈ្មោះ។

«ក្នុងនាមជាពលរដ្ឋម្នាក់ ខ្ញុំមិនទទួលយកការធ្វើរដ្ឋប្រហារយោធាបែបនេះ។ យើងត្រូវតែប្រឆាំងនឹងអំពើកៀបសង្កត់នេះ» គ្រូបង្រៀនឈ្មោះ Win Win Maw និយាយដូច្នេះ ខណៈដែលនិស្សិតឈ្មោះ Min Sithu អះអាងថា៖ «យើងនឹងមិនបណ្ដោយឱ្យជំនាន់របស់យើង ត្រូវរស់ក្រោមរដ្ឋអំណាចយោធាបែបនេះជាដាច់ខាត»។

បាតុកម្មខាងលើបានកើតឡើង បន្ទាប់ពី Win Htein ដែលជាថ្នាក់ដឹកនាំជាន់ខ្ពស់របស់បក្ស NLD និងជំនួយការសំខាន់របស់លោកស្រី Suu Kyi ត្រូវបានចាប់ខ្លួន។

ចលនាប្រឆាំងដែលមានឈ្មោះថា «Myanmar Civil Disobedience Movement» បានអំពាវនាវនៅលើបណ្ដាញសង្គមឱ្យប្រជាជនសម្ដែងការជំទាស់នឹងរដ្ឋប្រហារយោធា ដោយការគោះឆ្នាំង ឬខ្ទះជារៀងរាល់យប់។

សូមរំលឹកថា កងទ័ពមីយ៉ានម៉ា បានធ្វើរដ្ឋប្រហារយោធា ដែលចាប់ផ្ដើមដោយការចាប់ឃុំខ្លួនលោកស្រី Suu Kyi និងថ្នាក់ដឹកនាំជាន់ខ្ពស់មួយចំនួនរបស់រដ្ឋាភិបាលស៊ីវិល ក្រោយពីអាជ្ញាធរ និងគណៈកម្មការរៀបចំការបោះឆ្នោត បានបដិសេធការតវ៉ារបស់កងទ័ព ស្ដីអំពីបញ្ហាលួចបន្លំសន្លឹកឆ្នោតនៅក្នុងការបោះឆ្នោតសភាកាលពីចុងឆ្នាំ 2020។ កងទ័ព និងប៉ូលិស ក្រោយមកក៏បានចោទប្រកាន់លោកស្រី Suu Kyi ថា បាននាំចូលដោយខុសច្បាប់នូវវិទ្យុទាក់ទង និងបានសម្រេចឃុំខ្លួនលោកស្រីរហូតដល់ថ្ងៃទី 15 កុម្ភៈ ដើម្បីបន្តស៊ើបអង្កេត។

សមាគមជំនួយអ្នកទោសនយោបាយរបស់មីយ៉ានម៉ា (AAPP) កាលពីថ្ងៃទី 4 កុម្ភៈ បានឱ្យដឹងថា មនុស្សប្រមាណជា 147 នាក់ ត្រូវបានចាប់ឃុំខ្លួន បន្ទាប់ពីមានរដ្ឋប្រហារ ក្នុងនោះក៏មានក្រុមសកម្មភាព តំណាងរាស្ត្រ និងមន្ត្រីក្នុងរដ្ឋាភិបាលរបស់លោកស្រី Suu Kyi ផងដែរ៕

ប្រភព៖ AFP, RT

February 5, 2021

ផ្ទៃបឹងកប់ស្រូវ 4 ហិកតា នឹងត្រូវយកមកសាងសង់ទីស្ដីការថ្មីនៃក្រសួងមុខងារសាធារណៈ

ទីស្ដីការថ្មីរបស់ក្រសួងមុខងារសាធារណៈនឹងត្រូវបានសាងសង់លើតំបន់បឹងកប់ស្រូវ (បឹងតាមោក) បន្ទាប់ពីរដ្ឋាភិបាលកម្ពុជាបានសម្រេចប្រគល់ឱ្យក្រសួងនេះតាមរយៈអនុក្រឹត្យ មួយ ចុះថ្ងៃទី 28 ខែមករាកន្លងទៅ។

នៅក្នុងអនុក្រឹត្យ លេខ 63 សជណ ចុះថ្ងៃទី 28 ខែមករា ឆ្នាំ 2021 ខាងលើ បានឱ្យដឹងថា ទីតាំងផ្ទៃដីបឹងតាមោកទំហំ 4 ហិកតា ដែលត្រូវបានប្រគល់ឱ្យក្រសួងមុខងារសាធារណៈនេះ ស្ថិតនៅក្នុងសង្កាត់គោករកា ខណ្ឌព្រែកភ្នៅ ក្រុងភ្នំពេញ ជាប់នឹងភាគខាងលិចនៃតំបន់ដីរបស់ក្រសួងយុត្តិធម៌។ ទីតាំងនេះមានចម្ងាយពីព្រលានយន្តហោះអន្តរជាតិភ្នំពេញប្រមាណ 12 គីឡូម៉ែត្រទៅទិសខាងជើង និងចម្ងាយពីវត្តភ្នំប្រមាណ 18 គីឡូម៉ែត្រ ទៅទិសខាងជើងឆៀងខាងលិច។

នៅថ្ងៃទី 3 ខែកុម្ភៈ ឆ្នាំ 2016 រដ្ឋាភិបាល បានចេញអនុក្រឹត្យមួយស្តីពីការកំណត់ផ្ទៃបឹង ចំនួន 3,239 ហិកតា ដែលគ្របដណ្តប់លើតំបន់បឹងតាមោក និងដីជុំវិញបឹងនេះ ទុកជាទ្រព្យសម្បត្តិរបស់រដ្ឋ។ ក្នុងឆ្នាំ 2020 រដ្ឋក៏បានសម្រេចកាត់ដីបឹងតាមោកប្រមាណ 682 ហិកតា ឱ្យទៅជាកម្មសិទ្ធិឯកជន និងស្ថាប័នរដ្ឋមួយចំនួន ប៉ុន្តែ ក្នុងនោះក៏មានករណីជាច្រើនត្រូវបានទុកជាមោឃៈផងដែរ។

បឹងកប់ស្រូវ គឺជាបឹងមួយ ដែលត្រូវបានចាប់ផ្ដើមអភិវឌ្ឍក្រោយគេនៅក្នុងចំណោមបឹងធំៗនៅរាជធានីភ្នំពេញ។ នៅជុំវិញបឹងនេះ មានខណ្ឌចំនួន 2 គឺខណ្ឌព្រែកព្នៅ និង ខណ្ឌសែនសុខ។ នៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារទីស្ដីការក្រសួងសាធារណការនិងដឹកជញ្ជូនថ្មី នាព្រឹកថ្ងៃទី 22 ខែមករា ឆ្នាំ 2021 សម្តេចតេជោ ហ៊ុន សែន បានមានប្រសាសន៍ថា ស្ថាប័នរដ្ឋចំនួន 3 ទៀត នឹងត្រូវរើទៅតំបន់បឹងតាមោក រួមមានអគ្គបញ្ជាការដ្ឋានកងទ័ព និងមន្ទីរពេទ្យរដ្ឋចំនួន 2។

ក្រោយពីមានអនុក្រឹត្យ ចុះថ្ងៃទី 3 ខែកុម្ភៈ ឆ្នាំ 2016 និងគម្រោងខ្លះៗរបស់រដ្ឋាភិបាល រហូតមកដល់បច្ចុប្បន្ន គេឃើញមានគម្រោងអភិវឌ្ឍឯកជនជាច្រើន បានចាប់ផ្ដើមមានឡើងនៅតំបន់នេះ៕

February 5, 2021

មហាសេដ្ឋី Jeff Bezos បង្ហើបឱ្យដឹងអំពីការកំណត់គោលដៅអនាគត ដែលមនុស្សភាគច្រើនជួបបរាជ័យ

ជាធម្មតា នៅពេលនិយាយអំពីផែនការយូរអង្វែង គ្រប់គ្នាតែងតែកំណត់គោលដៅក្នុងរយៈពេលមធ្យមដែលប្រកបដោយភាពជាក់លាក់ណាមួយ រួចភ្ជាប់គំនិតនានាជាមួយគ្នា។ ប៉ុន្តែ បញ្ហានៅទីនេះ នោះគឺ ផែនការនេះមានលក្ខណរឹង និងតឹងតែងនៅចំពោះមុខការប្រែប្រួលរបស់អនាគត ក៏ដូចជា មានលក្ខណជាក់លាក់ពេក ធ្វើឱ្យគ្រប់គ្នាងាយនឹងបាត់បង់ភាពអត់ធ្មត់នៅពេលអ្វីៗត្រូវ «ដួលរំលំ»។

បើទោះជាការកំណត់គោលដៅក្នុងរយៈពេល 10-20 ឬ 30 ឆ្នាំ មានលក្ខណមិនសូវជាច្បាស់លាស់បើធៀបនឹងរយៈពេល 5 ឆ្នាំ ប៉ុន្តែ វាជួយឱ្យគ្រប់គ្នាអាចបង្កើតយុទ្ធសាស្ត្រប្រកបដោយភាពបត់បែនក្នុងអនាគត ទន្ទឹមនឹងនេះក៏ជួយឱ្យគ្រប់គ្នាអាចរក្សាបាននូវការអត់ធ្មត់ ភាពមាំមួន នៅពេលគម្រោងខ្លះត្រូវបរាជ័យ។

នេះគឺជាអ្វីដែលបានកើតឡើងចំពោះកំពូលមហាសេដ្ឋីលំដាប់លេខពីរក្នុងលោក និងជាស្ថាបនិករបស់ Amazon គឺលោក Jeff Bezos នៅក្នុងដំណាក់កាលដំបូងៗនៃការដឹកនាំក្រុមហ៊ុននេះ។ គ្រប់គ្នាចូលចិត្តផ្ដោតទៅលើលទ្ធផលទៅតាមត្រីមាស ដោយមិនអាចមើលឃើញបាននូវប្រព័ន្ធទាំងមូលដែលត្រូវការការកសាងសម្រាប់អនាគតរយៈពេលវែងរាប់សិបឆ្នាំ។

ការកំណត់ទិសដៅក្នុងរយៈពេល 5 ឆ្នាំ គឺពិតជាជាក់លាក់ និងងាយស្រួលបញ្ចុះបញ្ចូលជាងសម្រាប់មនុស្សភាគច្រើន ក៏ប៉ុន្តែ ជោគជ័យអាចជារឿងហេងស៊យ។ ចំពោះក្រុមមនុស្សដែលកំណត់គោលដៅ ក៏ដូចជាចំណាយកម្លាំងកាយចិត្ត និងពេលវេលាដើម្បីរៀបចំគោលដៅសម្រាប់រយៈពេលវែង ត្រឹម 20-30 ឆ្នាំ នឹងមិនងាយបរាជ័យនោះទេ។ សូម្បីតែនៅពេលមិនអាចសម្រេចបានតាមផែនការ ក៏កម្លាំងកាយចិត្ត បទពិសោធន៍ និងចំណេះដឹងនៅក្នុងអំឡុង 30 ឆ្នាំកន្លងមករបស់គ្រប់គ្នា ក៏នឹងត្រូវបានទទួលស្គាល់ខ្លះផងដែរ។

យោងតាមមហាសេដ្ឋី Jeff Bezos គ្រប់គ្នាកំពុងតែរស់នៅក្នុងពិភពលោកមួយដែលពោរពេញដោយការប្ដូរផ្លាស់ជាបន្តបន្ទាប់ ហើយដើម្បីធ្វើការសម្រេចចិត្តប្រកបដោយប្រសិទ្ធភាព នោះគ្រប់គ្នាគួរតែចៀសវាងឱ្យបាននូវលក្ខណ «ត្រង់ រឹង និងច្រំដែល» ប៉ុន្តែ ជំនួសមកវិញ ត្រូវតែប្រកបដោយភាពបត់បែន និងធ្វើពិពិធកម្មដើម្បីឱ្យមានជម្រើសច្រើន។

ថ្វីបើអនាគតយូរអង្វែង ពិតជាធ្វើឱ្យគ្រប់គ្នាពិបាកក្នុងការព្យាករ ឬដឹងជាមុនបាន ប៉ុន្តែ ប្រការនេះមិនមែនមានន័យថា គ្រប់គ្នាមិនអាចកំណត់បាននូវរូបរាងនៃផ្លូវដែលត្រូវដើរទៅកាន់គោលដៅរបស់ខ្លួននោះដែរ៕

ប្រភព៖ Tipsmake

February 5, 2021

រដ្ឋប្រហារយោធាជាច្រើនដែលធ្វើឱ្យកក្រើកពិភពលោក អំឡុង 10ឆ្នាំកន្លងមកនេះ

ការធ្វើរដ្ឋប្រហារយោធានៅមីយ៉ានម៉ា ធ្វើឱ្យគេនឹកឃើញដល់រដ្ឋប្រហារនានាដែលបានកើតឡើងក្នុងអំឡុងមួយទសវត្សរ៍កន្លងទៅនេះ ក្នុងនោះ អាហ្វ្រិកគឺជាទ្វីបដែលកើតមានអំពើរដ្ឋប្រហារច្រើនជាងគេបង្អស់។

ប្រទេសម៉ាលី (Mali) នៅអាហ្វ្រិកខាងលិច

កាលពីថ្ងៃទី 18 ខែសីហា ឆ្នាំ 2020 កងទ័ពម៉ាលីបានធ្វើរដ្ឋប្រហារនៅក្នុងមូលដ្ឋានទ័ពធំមួយនៅក្បែររដ្ឋធានី បាម៉ាកូ (Bamako)។ ក្រុមទាហានបះបោរបានស្នើឱ្យធ្វើកំណែទម្រង់នយោបាយ ការប្រគល់អំណាច និងធ្វើការបោះឆ្នោត។ មន្ត្រីជាន់ខ្ពស់ជាច្រើនរូបរបស់រដ្ឋាភិបាលត្រូវបានចាប់ឃុំខ្លួន ក្នុងនោះមានប្រធានាធិបតី Ibrahim Boubacar Keita និងនាយករដ្ឋមន្ត្រី Boubou Cisse ផងដែរ។

ប្រទេសស៊ូដង់ (Sudan) នៅអាហ្វ្រិកខាងជើង

កងទ័ពស៊ូដង់បានផ្ដួលរំលំ និងចាប់ខ្លួនប្រធានាធិបតីកាន់អំណាចជិត 30 ឆ្នាំ Omar al-Bashir កាលពីថ្ងៃទី 11 មេសា 2019 នាំឱ្យក្រុមប្រឹក្សាយោធាឡើងកាន់អំណាច ក្រោយពីមានបាតុកម្មប្រឆាំងរដ្ឋាភិបាលដែលធ្វើឱ្យកក្រើកទឹកដីនេះអស់រយៈពេលជាច្រើនខែ។ Omar al-Bashir ត្រូវបានចោទប្រកាន់ពីបទទាក់ទិននឹងអំពើសម្លាប់រង្គាលបាតុករ លួចបន្លំហិរញ្ញវត្ថុ។ បច្ចុប្បន្ន លោក Bashir កំពុងត្រូវជាប់ពន្ធនាគារ 2 ឆ្នាំ។

ហ្ស៊ីមបាវ៉េ (Zimbabwe) នៅអាហ្វ្រិកខាងត្បូង

កាលពីថ្ងៃទី 15 វិច្ឆិកា 2017 កងទ័ពរបស់ប្រទេសហ្ស៊ីមបាវ៉េ បានបង្ខំឱ្យប្រធានាធិបតី Robert Mugabe ដែលកាន់អំណាចយូរជាងគេនៅអាហ្វ្រិក ឱ្យចុះចេញពីតំណែង ក្រោយពីត្រូវបានឃុំខ្លួនក្នុងផ្ទះមួយរយៈពេល។ រដ្ឋប្រហារត្រូវបានធ្វើឡើងក្នុងបំណងរារាំង Mugabe ផ្ទេរអំណាចទៅឱ្យភរិយារបស់ខ្លួន គឺលោកស្រី Grace Mugabe។

បួរគីណាហ្វាសូ (Burkina Faso) នៅអាហ្វ្រិកខាងលិច

កងវរសេនាធំទទួលបន្ទុកការពារប្រធានាធិបតី (RSP) ដែលជាអង្គភាពពាក់កណ្ដាលកងទ័ពដែលត្រូវបានបង្កើតឡើងក្នុងសម័យប្រធានាធិបតី Blaise Compaore កាលពីថ្ងៃទី 16 កញ្ញា 2015 បានចាប់ខ្លួនសមាជិកគណរដ្ឋមន្ត្រីប្រទេសនេះ ក្នុងនោះមានប្រធានាធិបតីស្ដីទី Michel Kafando នាយករដ្ឋមន្ត្រី Yacouba Isasc Zida (អតីតអគ្គមេបញ្ជាការរបស់ RSP)។ មូលហេតុនៃរដ្ឋប្រហារនេះ កើតឡើងដោយសារអស្ថិរភាពនយោបាយដែលបណ្ដាលមកពីរដ្ឋប្រហារឆ្នាំ 1987។

ប្រទេសថៃ

អំឡុងពាក់កណ្ដាលឆ្នាំ 2014 ប្រទេសថៃបានធ្លាក់ទៅក្នុងវិបត្តិអស្ថិរភាពនយោបាយ នៅពេលបាតុកម្មរបស់ក្រុមប្រឆាំងបានកើតមានទ្រង់ទ្រាយធំ នាំឱ្យមានការប៉ះទង្គិចគ្នារវាងក្រុមប្រឆាំងនិងក្រុមគាំទ្រត្រកូល Shiawatra។

ខែឧសភា ឆ្នាំ 2014 កងទ័ពថៃបានធ្វើរដ្ឋប្រហារ ដោយប្រើជ័យឃោសន៍ «ផ្សះផ្សាជាតិ»។ រដ្ឋប្រហារនេះបានទម្លាក់នាយករដ្ឋមន្ត្រីថៃ លោកស្រី Yingluck Shinawatra និងដកហូតអំណាចរបស់លោក Thaksin Shinawatra ដែលជាបងប្រុសរបស់លោកស្រី Yingluck។

ប្រទេសអេហ្ស៊ីប នៅភាគឦសាននៃទ្វីបអាហ្វ្រិក

ឆ្នាំ 2012 ក្រុម «បងប្អូនមូស្លីម/ភាតរភាពមូស្លីម» (Muslim Brotherhood) បានឆ្លៀតយកបញ្ហាអស្ថិរភាពនយោបាយនៅអេហ្ស៊ីប ក្រោយប្រធានាធិបតី Hosni Mubarak ត្រូវបានផ្ដួលរំលំកាលពីឆ្នាំ 2011 ជួយឱ្យលោក Mohamed Morsi ឡើងកាន់អំណាច។ ប៉ុន្តែ នៅខែកក្កដា 2013 ក្រោយពីបាតុកម្ម និងអស្ថិរភាពដែលទាក់ទងនឹងការដឹកនាំរបស់ក្រុមភាតរភាពមូស្លីម អគ្គមេបញ្ជាការកងទ័ពអេហ្ស៊ីប ឧត្ដមសេនីយ៍ Abdel Fattah al-Sisi បានធ្វើរដ្ឋប្រហារយោធា ទម្លាក់ប្រធានាធិបតី Mohamed Morsi។ ក្រុមភាតរភាពមូស្លីម ក្រោយមកក៏ត្រូវបានបញ្ចូលទៅក្នុងបញ្ជីភេរវកម្ម។

សាធារណរដ្ឋអាហ្វ្រិកកណ្ដាល (Central African Republic)

ថ្ងៃទី 24 មីនា 2013 សាធារណរដ្ឋអាហ្វ្រិកកណ្ដាល បានធ្លាក់ទៅក្នុងវិបត្តិនយោបាយនៅពេលកងកម្លាំង Seleka ដែលភាគច្រើនជាអ្នកកាន់សាសនាអ៊ីស្លាម បានផ្ដួលរំលំប្រធានាធិបតី Francois Bozize ដែលជាអ្នកកាន់សាសនាគ្រិស្ត។ មេដឹកនាំរដ្ឋប្រហារ Michel Jotodia បានឡើងធ្វើជាប្រធានាធិបតី ខណៈ Bozizet ត្រូវរត់ភៀសខ្លួនទៅកាន់ កាមេរូន។

ហ្គីណេប៊ីសូ (Guinea-Bissau)

ថ្ងៃទី 12 មេសា 2012 រដ្ឋប្រហារបានកើតឡើងនៅចំពេលដែលការបោះឆ្នោតប្រធានាធិបតីជុំទីពីរដើម្បីជ្រើសរើសបេក្ខភាព Carlos Gomes Junior និង Kumba Iala ជិតចូលមកដល់។

កងទ័ពហ្គីណេប៊ីសូបានគ្រប់គ្រងប្រទេសស្ទើរតែទាំងស្រុង។ ប្រធានាធិបតីស្ដីទី Raymund Pereira និងអតីតនាយករដ្ឋមន្ត្រី និងជាបេក្ខភាពប្រធានាធិបតី លោក Gomes Junior ក៏ត្រូវបានចាប់ខ្លួន។ ខែមេសា 2014 Jose Mario Vaz មកពីបក្ស អាហ្វ្រិកដើម្បីឯករាជ្យរបស់ហ្គីណេប៊ីសូនិងកាបវែរ ត្រូវបានជ្រើសរើសជាប្រធានាធិបតីនៅក្នុងការបោះឆ្នោតសភា៕

ប្រភព៖ Sputnik

February 5, 2021

កម្ពុជាមានករណីវិជ្ជមាននឹង Covid-19 ថ្មី 3ករណីបន្ថែមទៀត

ក្រសួងសុខាភិបាលកម្ពុជា ព្រឹកថ្ងៃទី 5 កុម្ភៈ បានឱ្យដឹងថា បានរកឃើញអ្នកឆ្លង Covid-19 ចំនួន 3 ករណីបន្ថែមទៀតអំឡុងថ្ងៃទី 4 កុម្ភៈ នាំឱ្យតួលេខសរុបនៃអ្នកវិជ្ជមានកើនដល់ 470 នាក់។

ករណីវិជ្ជមានថ្មីខាងលើគឺសុទ្ធតែជាករណីនាំចូល រួមមាន ជនជាតិឥណ្ឌា 2 នាក់ និងជនជាតិខ្មែរ 1នាក់។ ព័ត៌មានលម្អិត សូមបន្តអានរបាយការណ៍របស់ក្រសួងសុខាភិបាលដែលមានដូចខាងក្រោម។

គិតមកដល់ព្រឹកថ្ងៃទី 5 ខែកុម្ភៈនេះ កម្ពុជាបានរកឃើញអ្នកឆ្លងវីរុស Covid-19 សរុបចំនួន 470 នាក់ ក្នុងនោះមានអ្នកជាសះស្បើយចំនួន 452 នាក់ និងអ្នកកំពុងផ្ទុកវីរុសមានចំនួន 18 នាក់៕

February 5, 2021

កោះកុងនឹងមានព្រលានយន្ដហោះថ្មីទីពីរ ខណៈទីមួយនឹងហោះហើរសាកល្បងនៅត្រីមាសទីបួន ឆ្នាំ2021

នៅចុងឆ្នាំ 2021 នេះ រដ្ឋាភិបាលកម្ពុជានឹងបើកដំណើរការជើងហោះហើរសាកល្បងសម្រាប់អាកាសយានដ្ឋានថ្មីដែលស្ថិតនៅក្នុងតំបន់តារាសាគរ ក្នុងស្រុកបទុមសាគរនៃខេត្តកោះកុង ដែលនេះគឺប្រសាសន៍របស់អភិបាលរងខេត្តកោះកុង។

នៅក្នុងសន្និសីទសារព័ត៌មានមួយដែលត្រូវបានធ្វើឡើងកាលពីព្រឹកថ្ងៃទី 4 កុម្ភៈនេះ អភិបាលរងខេត្តកោះកុង លោក សុខ សុទ្ធី បានឱ្យដឹងថា ផ្លូវរត់សម្រាប់យន្តហោះនៃព្រលានយន្តហោះថ្មីនេះ ត្រូវបានសាងសង់រួចរាល់ជាស្ថាពរ នៅឡើយតែការបំពាក់ភ្លើងសញ្ញាប៉ុណ្ណោះ។

ទាក់ទងនឹងការដាក់ឱ្យដំណើរការព្រលានយន្ដហោះតារាសាគរ ដែលវិនិយោគដោយក្រុមហ៊ុន Union Development Group របស់ចិន ជាមួយនឹងទំហំទឹកប្រាក់ 150 លានដុល្លារនេះ លោកអភិបាលរងខេត្តកោះកុង បានសង្កត់ធ្ងន់ថា៖ «នឹងត្រូវពន្យារពេលរហូតដល់ត្រីមាសទីបួននៃឆ្នាំ 2021 នេះ» ដោយសារតែបញ្ហាវិបត្តិសុខភាពដែលបង្កឡើងដោយ Covid-19។

អាកាសយានដ្ឋានតារាសារគរនេះ មិនមែនជាព្រលានយន្តហោះថ្មីតែមួយនៅខេត្តកោះកុងនោះទេ អភិបាលរងខេត្តកោះកុង បានបង្ហើបឱ្យដឹងថា ព្រលានយន្តហោះថ្មីមួយផ្សេងទៀតដែលអាចនឹងត្រូវសាងសង់នៅត្រង់ព្រំប្រទល់នៃស្រុកកោះកុង និងស្រុកមណ្ឌលសីមា ក៏កំពុងត្រូវបានសិក្សាលម្អិតផងដែរ៕

February 4, 2021

ទារកអាយុ 8ខែម្នាក់ នៅវៀតណាម ឆ្លង Covid-19

ក្រោយពីត្រូវបាននាំទៅធ្វើចត្តាឡីស័ក ព្រោះតែជាប់ទាក់ទងនឹងករណីឆ្លង Covid-19 នៅខេត្ត Hai Duong ទារិកាអាយុ 8 ខែម្នាក់នៅខេត្ត Binh Duong ជាប់ព្រំប្រទល់នឹងក្រុងហូជីមិញនៃប្រទេសវៀតណាម ទទួលបានលទ្ធផលវិជ្ជមាននឹង Covid-19។

ព័ត៌មានខាងលើនេះត្រូវបានវេជ្ជបណ្ឌិត Nguyen Hong Chuong ប្រធានមន្ទីរសុខាភិបាលខេត្ត Binh Duong ឱ្យដឹង កាលពីប៉ុន្មានម៉ោងមុននេះ។

យ៉ាងនេះក្ដី ក្រសួងសុខាភិបាលវៀតណាមបានបញ្ជាក់ថា ដោយសារតែទារិកានេះត្រូវបាននាំទៅធ្វើចត្តាឡីស័កតាំងតែពីដំបូង ដូច្នេះ លទ្ធភាពនៃការចម្លងវីរុសទៅអ្នកដទៃគឺមិនមាននោះទេ។

គិតមកដល់ថ្ងៃទី 4 កុម្ភៈនេះ ប្រទេសវៀតណាមបានរកឃើញអ្នកវិជ្ជមាននឹង Covid-19 សរុបចំនួន 1,948 នាក់ ក្នុងនោះមាន 449 នាក់កំពុងព្យាបាល និង 1,461 បានជាសះស្បើយ ខណៈ 35 នាក់បានបាត់បង់ជីវិត៕

February 4, 2021

Author: សឿន សំណាង