សឿន សំណាង - La Reine Media

Covid-19! កូរ៉េខាងត្បូង បន្ធូរបន្ថយការរឹតត្បិតលើការដើរហើរ

ប្រទេសកូរ៉េខាងត្បូង នាថ្ងៃនេះបានចាប់ផ្ដើមបន្ធូរបន្ថយលើការកំណត់មួយចំនួនដោយសារ Covid-19 នៅក្នុងវិស័យពាណិជ្ជកម្ម ប៉ុន្តែ នៅតែរឹតបន្តឹងលើការជួបជុំលក្ខណឯកជន។

ឥរិយាបថបែបនេះរបស់រដ្ឋាភិបាលកូរ៉េខាងត្បូង ត្រូវបានធ្វើឡើងបន្ទាប់ពីនាយកដ្ឋានគ្រប់គ្រងនិងទប់ស្កាត់រោគឆ្លង (KDCA) បានរាយការណ៍ថា តួលេខអ្នកឆ្លងថ្មីបានថយចុះពី 400 ករណីមុនចូលឆ្នាំចិន មកនៅត្រឹម 344 ករណី គិតត្រឹមពាក់កណ្ដាលយប់នៃថ្ងៃទី 14 កុម្ភៈ។

យ៉ាងនេះក្ដី រដ្ឋមន្ត្រីក្រសួងសុខាភិបាល លោក Kwon Deok-cheol បានព្រមានឱ្យមានការប្រុងប្រយ័ត្នខ្ពស់ ខណៈដែលសម្បុកវីរុសនៅរដ្ឋធានីសេអ៊ូល និងតំបន់ក្បែរខាងមិនទាន់ត្រូវបានគ្រប់គ្រង។

គោលនយោបាយបន្ធូរបន្ថយខាងលើនេះ ត្រូវធ្វើឡើងនៅ Sudogwon ដែលមានតំបន់ក្រុងចំនួនពីរ រួមមាន សេអ៊ូល និង Incheon រួមនឹងបណ្ដាទីក្រុងរណបមួយចំនួនទៀត នឹងមានសុពលភាពចាប់ពីថ្ងៃទី 15 នេះតទៅ។ ម៉ោងដែលត្រូវបានដាក់ឱ្យស្ថិតក្នុងបំរាមគោចរសម្រាប់ភោជនីយដ្ឋាន និងហាងកាហ្វេ ត្រូវបានប្ដូរពីម៉ោង 21យប់ ទៅម៉ោង 22យប់។ បារ និងក្លឹបរាត្រីក៏ត្រូវបានអនុញ្ញាតឱ្យដំណើរការឡើងវិញ ប៉ុន្តែត្រូវគោរពទៅតាមម៉ោងដែលត្រូវហាមឃាត់ គឺម៉ោង 10 យប់ ចំណែកចំនួនភ្ញៀវក៏ត្រូវបានកំណត់។ បំរាមគោចរត្រូវបានលើកលែងចំពោះរោងកុន ហាងអ៊ីនធើណិត មជ្ឈមណ្ឌលបង្រៀនលើការត្រៀមប្រលង ឧទ្យានកំសាន្ត ផ្សារទំនើបធំៗ និងហាងធ្វើសក់។

នៅខាងក្រៅ Sudogwon អាជីវកម្មទាំងឡាយមិនត្រូវបានបង្ខំឱ្យធ្វើតាមបំរាមគោចរនោះទេ។ ចំនួនអ្នកមកកាន់វិហារ និងអ្នកចូលរួមព្រឹត្តិការណ៍កីឡានៅតែត្រូវបានរឹតបន្តឹង ប៉ុន្តែ ការកំណត់ត្រូវបានបន្ធូរបន្ថយ។ ចំណែកការហាមមិនឱ្យជួបជុំក្នុងផ្ទះលើសពី 4 នាក់ នៅតែត្រូវបានអនុវត្តនៅទូទាំងប្រទេសដដែល។

គិតមកដល់បច្ចុប្បន្ន កូរ៉េខាងត្បូងបានរកឃើញអ្នកវិជ្ជមាននឹង Covid-19 សរុបចំនួន 83,869 នាក់ ក្នុងនោះមានអ្នកស្លាប់ចំនួន 1,527 នាក់ និងអ្នកជាសះស្បើយមានចំនួនជាង 73,000 នាក់ ខណៈអ្នកកំពុងវិជ្ជមាន មានចំនួន 8,548នាក់៕

ប្រភព៖ Reuters

February 15, 2021

យានរុករករបស់ចិន ប្រទះឃើញបង្គោលថ្មចម្លែកនៅលើឋានព្រះចន្ទ

យានរុករករបស់ចិន ឈ្មោះ Yutu-2 ឬ Jade Rabbit បានដំណើរការជាថ្មី និងថតបានបង្គោលថ្មចម្លែកមួយនៅផ្នែកងងឹតនៃឋានព្រះចន្ត។

យានចុះចត Chang’e 4 និងរ៉ូបូតរុករក Yutu-2 បាន «ភ្ញាក់ដឹងខ្លួន» ឡើងវិញ នៅថ្ងៃទី 6 កុម្ភៈ ក្រោយពីបាន «ដេកលក់» នៅក្នុងរដូវត្រជាក់ និងបានបញ្ជូនរូបភាពថ្មីៗមកកាន់ផែនដី ក្នុងនោះគេឃើញមានរូបថតមួយសន្លឹកដែលបង្ហាញអំពីដុំថ្មចម្លែកមួយដែលមានរាងស្រដៀងនឹងបង្គោលមួយត្រូវបានបោះនៅផ្នែកងងឹតរបស់ព្រះចន្ទ។

នៅក្នុងអត្ថបទមួយដែលចេញផ្សាយដោយទំព័រ Our Space ក្រុមអ្នកវិទ្យាសាស្ត្រចិនបាននិយាយថា បង្គោលថ្មនេះគួរតែត្រូវបានពិនិត្យឱ្យមានលម្អិតជាងនេះ។

ក្រុមអ្នកគ្រប់គ្រងយាន បានរៀបចំផែនការដើម្បីបញ្ជាឱ្យយាន Yutu-2 ចូលទៅក្បែរដុំថ្មខាងលើ និងធ្វើការវិភាគដោយប្រើបច្ចេកវិទ្យា VNIS ដែលបំពាក់នៅលើយាន។ មុននេះ VNIS ត្រូវបានប្រើប្រាស់ដើម្បីពិនិត្យទៅលើសំណាកថ្ម និងថ្មកំបោរនៅតាមបណ្ដោយផ្លូវដែលរ៉ូបូតដើរកាត់តាមរណ្ដៅ Von Karman។

អ្នកស្រាវជ្រាវឋានព្រះចន្ទ Dan Moriarty មកពីមជ្ឈមណ្ឌលអវកាស Goddard របស់អង្គការ NASA ប្រចាំតំបន់ Greenbelt រដ្ឋ Maryland បាននិយាយថា «បង្គោលថ្មនេះ ដូចទៅនឹងបំណែកអ្វីមួយដែលលយចេញពីដី។ ប្រការនេះប្រាកដជាមានអ្វីមិនធម្មតា»។

អ្នកវិទ្យាសាស្ត្រខាងលើបកស្រាយថា ឥទ្ធិពលដដែលៗដែលកើតឡើងដោយសារវដ្ដនៃសីតុណ្ហភាព និងបាតុភូតរំលីងនៅលើផ្ទៃរបស់ព្រះចន្ទ តែងតែធ្វើឱ្យដុំថ្មនានាត្រូវប្រេះបែក និងរំលីងពួកវាជារាងមូល។ បង្គោលថ្មថ្មីដែលទើបត្រូវបានរកឃើញនេះ អាចជាលទ្ធផលនៃការធ្លាក់អាចម៍ផ្កាយនៅក្បែរនោះដោយមិនបានឆ្លងកាត់ដំណាក់កាលខាងលើ។

ក្រុមអ្នកវវិទ្យាសាស្ត្រសង្ឃឹមថា ទិន្នន័យដែលបានមកពី VNIS នៅក្នុងការស្រាវជ្រាវបន្ទាប់នឹងផ្ដល់ចម្លើយបានលម្អិតជាងបច្ចុប្បន្ន ដែលអនុញ្ញាតឱ្យគេដឹងបានថា បង្គោលថ្មនោះ ធ្លាក់ពីទីអវកាស ឬយ៉ាងណា៕

ប្រភព៖ Space

February 15, 2021

រាសីពិភពលោកក្នុងឆ្នាំឆ្លូវ ហោរាល្បីល្បាញហុងកុង ទាយថា លោក ស៊ី ជីនភីង ហេង ខណៈលោកបៃដិន នឿយ…

សារព័ត៌មាន សៅ ឆាយណា ម៉រនីង ផូស្ត បានរាយការណ៍ ពីការទស្សន៍ទាយជោគជតារាសី របស់មេដឹកនាំពិភពលោក ដោយហោរាល្បីឈ្មោះជនជាតិហុងកុង ស្វាគមន៍ឆ្នាំឆ្លូវ ដែលទើបតែចាប់ផ្ដើមឡើង តាមឆ្នាំតារានិកររបស់ចិន ដែលក្នុងរង្វង់ជុំនីមួយៗ នឹងកើតឡើង ៥ដង ក្នុងជុំ ៦០ឆ្នាំ និងក្នុងជុំនីមួយៗ នឹងចេញមកព្រមជាមួយធាតុផ្សេងៗ ដូចជា ឈើ ភ្លើង ដី មាស(លោហៈ) និងទឹក។

សត្វប្រចាំឆ្នាំតារានិករ នឹងមានលក្ខណៈពិសេសដោយឡែក ដែលហុចផលទៅដល់អ្នកដែលកើតឆ្នាំនោះ រួមទាំងអ្នកដែលមិនបានកើតក្នុងឆ្នាំតារានិករនោះផងដែរ។

សម្រាប់ឆ្នាំឆ្លូវ ក្នុងឆ្នាំនេះ មានភាពលេចធ្លោក្នុងរឿងភាពឧស្សាហ៍ព្យាយាម ស្មោះត្រង់ និងកម្លាំងថាមពល។

ចាប់ផ្ដើមពីមេដឹកនាំរបស់ទីក្រុងហុងកុង…ឆ្នាំនេះ នឹងក្លាយជាឆ្នាំដែលល្អមួយ របស់លោកស្រី ឃែរី ឡាំ អ្នកគ្រប់គ្រងតំបន់សេដ្ឋកិច្ចពិសេសហុងកុង បើទោះជាកូវីដ-១៩ រាតត្បាតខ្លាំងក្លា និងវិបត្តិសេដ្ឋកិច្ចវាយលុកខ្លាំងក៏ដោយ។

អ្នកស្រី ឆយ អ៊ីង វ៉ា សាស្ត្រាចារ្យផ្នែកហោរាសាស្ត្រហុងកុង បានទស្សន៍ទាយថា នឹងមានរឿងរ៉ាវល្អៗ កើតឡើងចំពោះលោកស្រីឡាំ ដែលកើតក្នុងឆ្នាំ១៩៥៧ ត្រូវនឹងឆ្នាំរកា (មាន់) ព្រោះមាន់ ជាសត្វដែលអាចទៅជាមួយគ្នា បានល្អជាមួយគោ(ឆ្លូវ) ដែលជារួមទៅ ឆ្នាំឆ្លូវ នឹងល្អចំពោះអ្នកដែលកើតឆ្នាំរកា។

លោកស្រីឡាំ នឹងមានសំណាង និងចេះរៀបយុទ្ធសាស្ត្របានល្អប្រសើរនាពេលអនាគត ដោយការតាំងប្រណិធានដែលមុតមាំនឹងនរ នឹងហុចផលឱ្យលោកស្រីឡាំ ឆ្លងកាត់ឧបសគ្គ និងការសាកល្បងផ្សេងៗទៅបាន ទោះជាមានបន្ទុកធំ ឱ្យចាត់ការក្ដី តែក៏នឹងកែខៃ ដោះស្រាយបានដោយការសម្រេចចិត្តដ៏ត្រឹមត្រូវបានដែរ។

ចំណែកលោក រេយ៍ម៉ុន ឡូ បរមគ្រូហុងស៊ុយ វិញ បានព្យាករថា លោកស្រីឡាំ នឹងមានឱកាសមាស ក្នុងឋានៈជាមន្ត្រីរបស់រដ្ឋ រហូតដល់ឆ្នាំខាងមុខ តែមិនបានទស្សន៍ទាយថា តើលោកស្រីឡាំ នឹងបានគ្រងតំណែង ជាអ្នកគ្រប់គ្រងតំបន់សេដ្ឋកិច្ចពិសេសហុងកុង ១អាណត្តិទៀតដែរឬទេ? ឬលោកស្រីឡាំ នឹងឈ្នះការបោះឆ្នោតជ្រើសតាំងក្នុងឆ្នាំក្រោយ ឬយ៉ាងណានោះទេ?

អ្នកស្រី ឆយ អ៊ីង វ៉ា-លោក រេយ៍ម៉ុន ឡូ-អ្នកស្រី យុន វឹន ស៊ី

អូឡាំពិក ឫក្សមិនល្អ ឯតៃវ៉ាន់ គួរឱ្យបារម្ភ

ចំណែកអ្នកស្រី យុន វឹន ស៊ី អ្នកជំនាញការខាងសាស្ត្រា ឈី មឹន ទុន ចៀ អាស្រ័យលើការតាមសង្កេតមើលសកម្មភាពខាងកម្លាំងថាមពល បានដាស់តឿនថា សម្ព័ន្ធភាពរវាងចិន-ជប៉ុន នឹងតានតឹង ក្នុងអំឡុងពាក់កណ្ដាលចុងក្រោយនៃឆ្នាំនេះ ពាក់ព័ន្ធនឹងបណ្ដុំកោះតៀវយូ ឬដែលជប៉ុនដាក់ឈ្មោះថា សេនសាគុ។

ឯអ្នកស្រី ឆយ អ៊ីង វ៉ា បានទស្សន៍ទាយបន្ថែម អំពីឧបសគ្គរបស់ប្រទេសជប៉ុនថា អូឡាំពិកហ្គេមស៍ ដែលទីក្រុងតូក្យូនឹងធ្វើជាម្ចាស់ផ្ទះ និងបានពន្យារពេលមករៀបចំក្នុងពាក់កណ្ដាលឆ្នាំនេះ ពីថ្ងៃទី១០ កក្កដា ដល់ថ្ងៃទី៧ សីហានោះ ត្រូវចំនឹងអំឡុងចង្វាក់ឫក្សមិនល្អរបស់ឆ្នាំឆ្លូវ ហើយបើនៅតែអះអាងថា នឹងរៀបចំក្នុងអំឡុងពេលនេះតទៅទៀត ត្រូវតែប្រយ័ត្នប្រយែងបំផុត ទើបជាការប្រសើរ។

ចំណែកសម្ព័ន្ធភាពរបស់ចិននឹងសហរដ្ឋអាមេរិក នឹងនៅតែស្ពឹកស្រពន់ដដែល ទោះជាការងើបឡើងរបស់ប្រទេសចិន នឹងមិនអាចថយត្រឡប់ទៅវិញដោយងាយៗក៏ដោយ តែអ្វីដែលត្រូវវិតក្កកង្វល់នោះ គឺតៃវ៉ាន់។

លោកគ្រូហុងស៊ុយ រេយ៍ម៉ុន ឡូ បានដាស់តឿនថា មានថាមពលអវិជ្ជមាន ស្ថិតនៅឯជើងមេឃ…តៃវ៉ាន់នឹងកើតបញ្ហាស្មុគស្មាញ និងមិនមែនជាឆ្នាំដែលល្អសម្រាប់លោកស្រីប្រធាធិបតី ឆៃ អ៊ឹងវឹន ឡើយ តែក៏មិនដល់ថ្នាក់ ប្រើប្រាស់កម្លាំងយោធាដែរ។

ខុសគ្នានឹងលោក ស៊ី ជីនភីង អ្នកកើតឆ្នាំរោង ក្រោយពីទើបបានជួបនឹងការប៉ះទង្គិច ក្នុងឆ្នាំជូតកន្លងមកថ្មីៗ ឆ្នាំឆ្លូវនេះ ការប៉ះទង្គិចនឹងស្រាកស្រាន្ត។ ប្រទេសចិន នឹងមានស្ថិរភាព និងភាពមានបានខាងសេដ្ឋកិច្ច និងស្ថានភាពលើវេទិកាពិភពលោក។

ចំណែកលោកប្រធានាធិបតី ចូ បៃដិន ដែលកើតឆ្នាំមមែ វិញ នឹងបានជួបនឹងឆ្នាំដែលធ្ងន់ធ្ងរដុនដាបខ្លាំងក្លា ទម្រាំនឹងបានធូរស្រាល ក៏ត្រូវរង់ចាំរហូតដល់ឆ្នាំខាល ក្នុងឆ្នាំ២០២២ ឯណោះ៕

ប្រភព៖ សារព័ត៌មានបរទេស
ប្រែ និងសម្រួលដោយ ទិទីតំតាតូ

February 15, 2021

Bitcoin ឡើងថ្លៃជិត 50,000ដុល្លារ/Bitcoin បន្ទាប់ពីសកម្មភាពថ្មីមួយចំនួននៅ Wall Street

សារព័ត៌មាន Bloomberg បានរាយការណ៍ថា មូលនិធិវិនិយោគតម្លៃ 150 ពាន់លានដុល្លាររបស់ធនាគារ Morgan Stanley កំពុងពិចារណាលើការបណ្ដាក់ទុនទៅលើ Bitcoin ដែលនេះក៏ជាកត្តាមួយជំរុញឱ្យ Bitcoin ឡើងថ្លៃកប់ពពក។

ប្រាក់ឌីជីថល ឬប្រាក់អេឡិចត្រូនិក Bitcoin ទើបតែបង្កើតបានឯតទគ្គកម្មថ្មីមួយទៀត ដោយតម្លៃរបស់វាឡើងដល់ 49,000 ដុល្លារក្នុងមួយ Bitcoin ជាលើកដំបូងក្នុងប្រវត្តិសាស្ត្រ។

តម្លៃរបស់ប្រាក់ឌីជីថលធំជាងគេបង្អស់ក្នុងពិភពលោកនេះ បានហក់ឡើងដល់ 49,433 ដុល្លារក្នុងមួយ Bitcoin ប៉ុន្តែក្រោយមកក៏បានធ្លាក់មកនៅត្រឹម 49,202 ដុល្លារនៅវេលាម៉ោង10 និង 20នាទីព្រឹក នៅទីក្រុងឡុងដ៍។ ជាសរុប តម្លៃរបស់ Bitcoin បានកើនឡើងប្រមាណ 70% រាប់ចាប់ពីដើមឆ្នាំ 2021។ គូប្រជែងរបស់ Bitcoin គឺប្រាក់អេឡិចត្រូនិក Ether ក៏បានបំបែកឯតទគ្គកម្មរបស់ខ្លួន និងបានឡើងថ្លៃប្រហែល 150% ចាប់តាំងពីដើមឆ្នាំ។

ក្នុងអំឡុងច្រើនខែកន្លងទៅ ប្រាក់ Bitcoin ទទួលបានការគាំទ្រពីក្រុមអ្នកវិនិយោគជាច្រើនដូចជា Paul Tudor Jones និង Stan Druckenmiller ជាដើម។ ថ្មីៗនេះ Bloomberg បានចុះផ្សាយថា មូលនិធិវិនិយោគតម្លៃ 150 ពាន់លានដុល្លាររបស់ធនាគារ Morgon Stanley កំពុងតែពិចារណាលើការបោះទុនទៅក្នុងប្រាក់ Bitcoin ខណៈកាលពីសប្ដាហ៍មុន ធនាគារ BNY Mellon ក៏បានឱ្យដឹងថា កំពុងតែរៀបចំគម្រោងអនុញ្ញាតឱ្យអតិថិជនរបស់ខ្លួនជួញដូរដោយប្រាក់ឌីជីថលផងដែរ។ បន្ទាប់មកទៀត ក៏មានដំណឹងថា ក្រុមហ៊ុនផលិតរថយន្តអគ្គិសនី Tesla បណ្ដាក់ទុនប្រមាណ 1.5 ពាន់លានដុល្លារអាមេរិកទៅក្នុង Bitcoin៕

ប្រភព៖ Bloomberg

February 15, 2021

មីយ៉ានម៉ាផ្ដាច់អ៊ីនធើណិត និងដាក់ពង្រាយរថពាសដែកនៅទីក្រុងធំៗ ក្រោយរដ្ឋប្រហារយោធា

កងទ័ពនៃប្រទេសមីយ៉ានម៉ាបាននិងកំពុងដាក់ពង្រាយរថពាសដែកដើម្បីទប់ទល់នឹងក្រុមបាតុករនៅក្នុងបណ្ដាទីក្រុងធំៗ ព្រមទាំងបានកាត់ផ្ដាច់សេវាអ៊ីនធើណិតតាំងពីវេលាទៀបភ្លឺថ្ងៃទី 15 កុម្ភៈនេះ។

អ្នកប្រើប្រាស់សេវាកម្មទូរគមនាគមន៍នៃក្រុមហ៊ុនទាំង 4 របស់មីយ៉ានម៉ា មិនអាចប្រើអ៊ីនធើណិតបានចាប់ពីវេលាម៉ោង 1 ទៀបភ្លឺនៃថ្ងៃទី 15 កុម្ភៈ (ប្រហែលម៉ោង 1និង30នាទីនៅភ្នំពេញ)។ នៅក្នុងរយៈពេលប៉ុន្មានថ្ងៃក្រោយការធ្វើរដ្ឋប្រហារ អ៊ីនធើណិតនៅប្រទេសនេះក៏ត្រូវបានកាត់ផ្ដាច់នៅទូទាំងពិភពលោក។

Alex Warofka ប្រធានផ្នែកគោលនយោបាយសិទ្ធិមនុស្ស និងសេរីភាពបញ្ចេញមតិប្រចាំ Facebook បាននិយាយថា អ៊ីនធើណិតអាចត្រូវបានផ្ដាច់រហូតដល់ម៉ោង 9 ព្រឹកនេះ (ម៉ោង 9និង30នាទីព្រឹកនៅភ្នំពេញ)។

កាលពីយប់ថ្ងៃទី 14 កន្លងទៅ បាតុកម្មទី 9 ត្រូវបានធ្វើឡើងនៅមីយ៉ានម៉ា ទន្ទឹមនឹងនេះ គេក៏ឃើញមានរថពាសដែកជាច្រើនគ្រឿងបង្ហាញវត្តមាននៅទីក្រុង Yangon, Myitkyina និងទីក្រុង Sittwe។ នេះគឺជាលើកដំបូងហើយដែលរថពាសដែកត្រូវបានដាក់ពង្រាយទ្រង់ទ្រាយធំបែបនេះ រាប់ចាប់ពីរដ្ឋប្រហារនៅថ្ងៃទី 1 កុម្ភៈ។ ក្នុងថ្ងៃម្សិលមិញ កងកម្លាំងសន្តិសុខមីយ៉ានម៉ាក៏បានផ្ទុះអាវុធដើម្បីរំសាយបាតុកម្មនៅខាងក្រៅរោងចក្រមួយនៅទីក្រុង Myitkyina ប៉ុន្តែមិនបានដឹងច្បាស់ថា ពួកគេប្រើប្រាស់គ្រាប់កាំភ្លើងពិត ឬជ័រនោះទេ។ សារព័ត៌មាន 74 Media បានចេញផ្សាយថា អាជ្ញាធរបានចាប់ខ្លួនអ្នកកាសែតចំនួន 5 នាក់ ក្រោយការផ្ទុះអាវុធ។

ថ្ងៃទី 15 កុម្ភៈនេះ រថយន្តដឹកប៉ូលិសជាង 10 គ្រឿង និងរថយន្តពន្លត់អគ្គិភ័យចំនួន 4 គ្រឿង ត្រូវបានដាក់ពង្រាយនៅក្បែរវត្ត Sule ក្នុងទីក្រុង Yangon ដែលជាទីតាំងមានបាតុកម្មដ៏ធំមួយ។

កាលពីថ្ងៃទី 14 កុម្ភៈ ស្ថានទូតរបស់បណ្ដាប្រទេសលោកខាងលិច ក្នុងនោះមានដូចជា សហភាពអឺរ៉ុប អង់គ្លេស កាណាដា និងប្រទេសចំនួន 11 ផ្សេងទៀត បានចេញសេចក្ដីប្រកាស អំពាវនាវឱ្យកងកម្លាំងសន្តិសុខ «គ្រប់គ្រងអំពើហិង្សាប្រឆាំងនឹងក្រុមបាតុករ និងជនស៊ីវិល ដែលកំពុងតែជំទាស់នឹងការផ្ដួលរំលំរដ្ឋាភិបាលស្របច្បាប់របស់ពួកគេ»។

ចំណែកអង្គការសហប្រជាជាតិក៏បានចេញសេចក្ដីអំពាវនាវដូចគ្នានេះដែរ ទន្ទឹមនឹងការស្នើឱ្យកងទ័ពមីយ៉ានម៉ា «អនុញ្ញាតជាបន្ទាន់» ឱ្យអ្នកការទូតស្វីស Christine Schraner Burgener ចូលមកក្នុងប្រទេសនេះដើម្បីវាយតម្លៃស្ថានការណ៍។

កងទ័ពមីយ៉ានម៉ា កាលពីថ្ងៃទី 1 កុម្ភៈ បានចាប់ខ្លួនទីប្រឹក្សារដ្ឋ លោកស្រី Aung San Suu Kyi ដែលជាមេដឹកនាំជាក់ស្ដែងរបស់ប្រទេសនេះ រួមនឹងមន្ត្រីជាន់ខ្ពស់របស់រដ្ឋាភិបាលប្រទេសនេះជាច្រើនរូបទៀត ដោយចោទប្រកាន់ថា មានអំពើលួចបន្លំសន្លឹកឆ្នោតនៅក្នុងការបោះឆ្នោតសភាកាលពីខែវិច្ឆិកា ឆ្នាំ 2020។ រដ្ឋប្រហារនេះបាននាំឱ្យមានបាតុកម្មធំៗជាច្រើនកើតឡើងជាបន្តបន្ទាប់ ក្នុងនោះក៏មានក្រុមពលករផងដែរ៕

ប្រភព៖ AFP

February 15, 2021

ព័ត៌មានអំពីតួលេខ Covid-19 នៅកម្ពុជា និងពិភពលោក សម្រាប់ព្រឹកថ្ងៃទី 14កុម្ភៈ

ក្រសួងសុខាភិបាលបានឱ្យដឹងថា ក្នុងអំឡុង 24 ម៉ោងកន្លងទៅនេះ កម្ពុជាមិនមានករណីឆ្លង Covid-19 ថ្មីនោះទេ ប៉ុន្តែ ពិភពលោករកឃើញជាង 369,240 នាក់បន្ថែមទៀត។

កម្ពុជា នៅថ្ងៃទី 14 ខែកុម្ភៈ ឆ្នាំ 2021 នេះ បានរាយការណ៍ថា អ្នកជំងឺ Covid-19 ចំនួន 3 នាក់ បានជាសះស្បើយ ខណៈករណីឆ្លងថ្មីមិនត្រូវបានរកឃើញនោះទេ។ ព័ត៌មានបន្ថែមអំពីករណីជាសះស្បើយ សូមបន្តអានរបាយការណណ៍របស់ក្រសួងសុខាភិបាលដូចខាងក្រោម។

គិតមកដល់ថ្ងៃទី 14 កុម្ភៈនេះ កម្ពុជាមានអ្នកវិជ្ជមាននឹង Covid-19 សរុប ចំនួន 479 នាក់ ក្នុងនោះមានអ្នកជាសះស្បើយចំនួន 469 នាក់ និងអ្នកកំពុងព្យាបាលមានចំនួន 10 នាក់។

នៅទូទាំងពិភពលោក តួលេខអ្នកវិជ្ជមាននឹងវីរុស Covid-19 បានកើនដល់ 109,086,929 នាក់ ក្នុងនោះមានអ្នកស្លាប់ចំនួន 2,404,041 នាក់ និងជាសះស្បើយចំនួន 81,110,385 នាក់។ អ្នកជំងឺដែលកំពុងព្យាបាលមានចំនួន 25,422,223 នាក់ ក្នុងនោះក៏មាន 98,684 (0.4%) កំពុងប្រឈមនឹងហានិភ័យនៃការបាត់បង់ជីវិតដោយសារមានអាការធ្ងន់ធ្ងរ៕

February 14, 2021

លិចកប៉ាល់ដឹកជនចំណាកស្រុកនៅសមុទ្រអ៊ីតាលី! 23នាក់បានស្លាប់និងបាត់ខ្លួន

កងទ័ពជើងទឹកនៃប្រទេសទុយនីស៊ី កាលពីថ្ងៃទី 13 កុម្ភៈ បានឱ្យដឹងថា ជនភៀសខ្លួនម្នាក់បានស្លាប់ និង 22 នាក់ផ្សេងទៀតបានបាត់ខ្លួន ក្រោយពីកប៉ាល់ដែលដឹកពួកគេត្រូវលិចនៅលើសមុទ្រមេឌីទែរ៉ាណេ លើលម្ហសមុទ្រក្បែរកោះ Lampedusa នៃប្រទេសអ៊ីតាលី។

កងកម្លាំងល្បាតសមុទ្រទុយនីស៊ី សង្គ្រោះមនុស្សបាន 25 នាក់ ក្នុងនោះមានស្ត្រីចំនួន 6នាក់ផងដែរ។ ប៉ុន្តែ អាកាសធាតុមិនអំណោយផលបានរំខានដល់សកម្មភាពជួយសង្គ្រោះ ដែលត្រូវបានធ្វើឡើងនៅតំបន់កើតហេតុ ចម្ងាយប្រហែល 100 គីឡូម៉ែត្រទៅទិសពាយព្យនៃកោះ Lampedusa។

ក្រុមជនភៀសខ្លួនបានឱ្យដឹងថា នៅលើកប៉ាល់ដែលជួបគ្រោះថ្នាក់ មានមនុស្សចំនួន 48 នាក់។ ពួកគេចេញដំណើរកាលពីថ្ងៃទី 12 កុម្ភៈ ពីតំបន់ Sidi Mansour នៃខេត្ត Sfax របស់ប្រទេសទុយនីស៊ី។

ប្រទេសទុយនីស៊ី ដែលមានចម្ងាយពីទ្វីបអឺរ៉ុបតែប៉ុន្មានរយគីឡូម៉ែត្រប៉ុណ្ណោះ តាំងពីយូរមកហើយត្រូវបានចាត់ទុកថាជាកន្លែងចេញដំណើរដ៏ល្អសម្រាប់ក្រុមជនចំណាកស្រុកខុសច្បាប់ដែលមានបំណងទៅកាន់ទ្វីបអឺរ៉ុប។ យោងតាមអង្គភាពគ្រប់គ្រងព្រំដែនរបស់សហភាពអឺរ៉ុប (Frontex) តួលេខជនចំណាកស្រុកពីទុយនីស៊ីដែលឆ្លងកាត់សមុទ្រចូលមកទ្វីបនេះ បានកើនឡើងជាថ្មីក្នុងឆ្នាំ 2020៕

ប្រភព៖ Alarabiya

February 14, 2021

រកឃើញអង្គបដិប្រាណអាចទប់ស្កាត់ Covid-19 នៅលើសត្វប្រចៀវក្នុងប្រទេសថៃ

ក្រុមអ្នកស្រាវជ្រាវបានប្រទះឃើញវីរុសកូរ៉ូណាដែលដូចទៅនឹង Covid-19 រហូតដល់ 91.5% នៅលើសត្វប្រចៀវក្នុងតំបន់អភិរក្សធម្មជាតិ ជាមួយនឹងអង្គបដិប្រាណដែលមានសមត្ថភាពទប់ស្កាត់ការឆ្លងវីរុស Covid-19។

ក្រុមអ្នកវិទ្យាសាស្ត្រដែលដឹកនាំដោយសាស្ត្រាចារ្យ Wang Linfa នៅមហាវិទ្យាល័យវេជ្ជសាស្ត្រ Duke នៃសាកលវិទ្យាល័យជាតិសិង្ហបុរី (NUS) កំពុងសិក្សាស្រាវជ្រាវនៅតំបន់អាស៊ីអាគ្នេយ៍ទាក់ទងនឹងប្រភេទសត្វប្រចៀវ និងសត្វពង្រូល ដោយសារសត្វទាំងនេះត្រូវបានគេរកឃើញថា មានផ្ទុកវីរុស Covid-19 នាពេលកន្លង។ ក្រុមអ្នកស្រាវជ្រាវបានរកឃើញវីរុសកូរ៉ូណាមួយប្រភេទដែលមានឈ្មោះថា RacCS203 នៅលើសត្វប្រចៀវក្រចកជើងសេះ (Horseshoe bat) នៅក្នុងរូងភ្នំសិប្បនិម្មិតក្នុងតំបន់អភិរក្សសត្វព្រៃដែលស្ថិតនៅភាគខាងត្បូងប្រទេសថៃ មានប្រព័ន្ធហ្សែនដូច Covid-19 ដល់ទៅ 91.5%។

វីរុស RacCS203 ក៏ជាសែស្រឡាយជិតជាមួយនឹង RmYN02 ដែលជាវីរុសកូរ៉ូណាមាននៅលើសត្វប្រចៀវក្នុងរូងភ្នំនៅខេត្ត Yunnan ភាគនិរតីប្រទេសចិន។ សាស្ត្រាចារ្យ Wang និយាយថា វីរុសនានានៅលើសត្វប្រចៀវនៅក្នុងប្រទេសថៃ និងចិន មានតួនាទីដូច «ច្បាប់ចម្លងដ៏ពេញលេញ អាចរួមផ្សំជាមួយនឹងវីរុសផ្សេងៗឡើងវិញ និងអាចមានវិវឌ្ឍន៍ទៅជាមេរោគថ្មី»។

ការរកឃើញនេះ បាននាំមកនូវតម្រុយបន្ថែមសម្រាប់ការស្វែងរកប្រភពពិតរបស់វីរុស Covid-19។ ក្រុមអ្នកវិទ្យាសាស្ត្រយល់ឃើញថា ប្រភេទវីរុសកូរ៉ូណាដែលមានហ្សែនដូចទៅនឹង Covid-19 នៅលើសត្វប្រចៀវគឺមានវត្តមាននៅក្នុងប្រទេស និងដែនដីជាច្រើននៅពាសពេញទ្វីបអាស៊ី រួមមាន ប្រទេសចិន ជប៉ុន និងប្រទេសថៃ។ ព័ត៌មានទាំងនេះត្រូវបានចុះផ្សាយនៅលើទំព័រទស្សនាវដ្ដី Nature Communications កាលពីថ្ងៃទី 9 កុម្ភៈ ឆ្នាំ 2021៕

ប្រភព៖ BBC

February 13, 2021

Covid-19 នៅកម្ពុជា និងពិភពលោក សម្រាប់ព្រឹកថ្ងៃទី 13កុម្ភៈ 2021

កម្ពុជារកឃើញអ្នកវិជ្ជមាននឹង Covid-19 សរុបចំនួន 479 នាក់ ខណៈពិភពលោកមានដល់ទៅជាង 108,702,000 នាក់។

នាព្រឹកថ្ងៃទី 13 ខែកុម្ភៈ ឆ្នាំ 2021 នេះ កម្ពុជាប្រកាសថា មិនមានករណីវិជ្ជមាននឹងវវីរុស Covid-19 នោះទេ នៅក្នុងរយៈពេល 24 ម៉ោងកន្លងទៅនេះ ប៉ុន្តែមានករណីជាសះស្បើយចំនួន 3 នាក់ ដែលជាករណីនាំចូល។

គិតមកដល់ព្រឹកនេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 479 នាក់ ក្នុងនោះមានអ្នកជាសះស្បើយចំនួន 466 នាក់ និងអ្នកកំពុងព្យាបាលមានចំនួន 13 នាក់។

នៅទូទាំងពិភលោក ករណីវិជ្ជមានសរុបដែលត្រូវបានរកឃើញរហូតមកដល់បច្ចុប្បន្ន បានកើនដល់ 108,702,262 នាក់ ក្នុងនោះមាន 2,392,289 នាក់បានស្លាប់ និង 80,699,756 នាក់បានជាសះស្បើយ។ បច្ចុប្បន្នមានអ្នកជំងឺ 25,460,454 នាក់កំពុងសម្រាកព្យាបាល ក្នុងចំណោមនេះដែរ មានអ្នកជំងឺ 99,809 នាក់ មានអាការធ្ងន់ធ្ងរដែលអាចបាត់បង់ជីវិត៕

February 13, 2021

រញ្ជួយដីកម្លាំង 58រ៉ិចទ័រ នៅតំបន់ព្រំដែនរបស់តាហ្ស៊ីគិស្ថាន-ចិន

មជ្ឈមណ្ឌលស្រាវជ្រាវភូមិសាស្ត្រ (GFZ) របស់ប្រទេសអាល្លឺម៉ង់ បានប្រកាសថា មានរញ្ជួយដីមួយករណីដែលមានកម្លាំង 5.8 រ៉ិចទ័រ កើតឡើងនៅតំបន់ព្រំដែនរវាងប្រទេសតាហ្ស៊ីគិស្ថាន និងតំបន់ស៊ីនជាំង (ចិន) កាលពីយប់ថ្ងៃទី 12 កុម្ភៈ (ម៉ោងក្នុងស្រុក)។

យោងតាមមជ្ឈមណ្ឌល GFZ គ្រោះធម្មជាតិរញ្ជួយដីនេះ ស្ថិតនៅក្នុងជម្រៅប្រមាណ 100 គីឡូម៉ែត្រក្រោយដី។

បច្ចុប្បន្នមិនទាន់មានព័ត៌មានទាក់ទងនឹងការខូចខាតចំពោះទ្រព្យសម្បត្តិ និងមនុស្សដែលបង្កឡើងដោយការរញ្ជួយដីនេះនៅឡើយ។

ប្រភព៖ Volcanodiscovery

February 13, 2021

Author: សឿន សំណាង