សឿន សំណាង - La Reine Media

កម្ពុជាទទួលបានវ៉ាក់សាំង 324,000 ដូស ពីយន្តការ COVAX

នាយប់ថ្ងៃទី 2 មីនា វ៉ាក់សាំងបង្ការវីរុស Covid-19 ឈ្មោះ AstraZeneca/SII ចំនួន 324,000 ដូស ត្រូវបានដឹកមកដល់កម្ពុជា ដែលនេះគឺជាការផ្គត់ផ្គង់ពីយន្តការ COVAX ដឹកនាំឱ្យអង្គការសុខភាពពិភពលោក។

តួលេខនៃវ៉ាក់សាំងខាងលើនេះស្ថិតក្នុងចំណោមវ៉ាក់សាំងចំនួន 1.1 លានដូស ដែលកម្ពុជានឹងទទួលបានពី COVAX។ កម្ពុជារំពឹងថានឹងទទួលបានវ៉ាក់សាំងបង្ការវីរុស Covid-19 ពី COVAX ចំនួន 20% ធៀបនឹងពលរដ្ឋសរុប។

COVAX គឺជាយន្តការមួយដែលផ្គត់ផ្គង់វ៉ាក់សាំងបង្ការ Covid-19 ដល់បណ្ដាប្រទេសក្រីក្រ និងប្រទេសមានចំណូលទាបដោយសមភាព ដោយមានការចូលរួមពីអង្គការ Gavi, សម្ព័ន្ធវ៉ាក់សាំង, អង្គការសុខភាពពិភពលោក រួមនឹងអង្គការមួយចំនួនទៀត៕

March 3, 2021

កប៉ាល់ចិនក្រឡាប់នៅលម្ហសមុទ្រជប៉ុន 5នាក់បាត់ខ្លួន

សារព័ត៌មានរបស់ជប៉ុន បានចុះផ្សាយថា កងកម្លាំងល្បាតឆ្នេរសមុទ្រជប៉ុន (JCG) កាលពីថ្ងៃទី 2 មីនា បានឱ្យដឹងថា កប៉ាល់មួយគ្រឿងរបស់ចិនបានក្រឡាប់នៅតំបន់ដែលមានរលកធំៗនៃលម្ហសមុទ្ររបស់ខេត្ត Okinawa (ជប៉ុន) បណ្ដាលឱ្យមនុស្សចំនួន 5 នាក់បាត់ខ្លួន។

ទីភ្នាក់ងារសារព័ត៌មាន Kyodo ដកស្រង់ប្រភពព័ត៌មានពី JCG ឱ្យដឹងថា នៅវេលាម៉ោងប្រហែល 8 និង 50 នាទី ព្រឹកថ្ងៃទី 2 មីនា (ម៉ោងក្នុងស្រុក) កងកម្លាំងខាងលើបានបញ្ជូនយន្តហោះមួយគ្រឿង និងនាវាមួយគ្រឿងទៅកាន់កន្លែងកើតហេតុ បន្ទាប់ពីបានទទួលសញ្ញាអាសន្ន។

ប្រហែលកន្លះម៉ោងក្រោយមក យន្តហោះជប៉ុនបានរកឃើញមនុស្ស 8 នាក់ កំពុងតោងវត្ថុអណ្ដែតមួយនៅលើផ្ទៃទឹកសមុទ្រ ដែលមានចម្ងាយពីកោះ Ishigaki នៃខេត្ត Okinawa ប្រមាណ 330 គីឡូម៉ែត្រទៅទិសខាងជើង។

កប៉ាល់នេសាទរបស់ចិនមួយគ្រឿងដែលកំពុងស្ថិតនៅក្នុងតំបន់កើតហេតុ ស្រង់បានជនរងគ្រោះចំនួន 5 នាក់ ចំណែក 5 នាក់ផ្សេងទៀត កំពុងបាត់ខ្លួន៕

ប្រភព៖ Kyodo
ប្រែសម្រួល៖ បុត្រា

March 3, 2021

ប៉ូលិសមីយ៉ានម៉ាបន្តបាញ់គ្រាប់ពិត! បាតុកររងរបួស 2នាក់ស្ថិតក្នុងស្ថានភាពអាសន្នដល់ជីវិត

ក្រុមប៉ូលិសមីយ៉ានម៉ា (ភូមា) ត្រូវបានចោទប្រកាន់ថា បានបន្តបាញ់ប្រហារដោយគ្រាប់ពិតដើម្បីបំបែកហ្វូងបាតុករ បណ្ដាលឱ្យមនុស្ស 2 នាក់រងរបួសធ្ងន់ធ្ងរ មួយថ្ងៃបន្ទាប់ពីកងទ័ពបានស្នើឱ្យឈប់ប្រើប្រាស់គ្រាប់កាំភ្លើងពិត។

ក្រុមបាតុករប្រឆាំងរដ្ឋប្រហារនៅប្រទេសភូមា ថ្ងៃនេះនៅតែបន្តចេញធ្វើបាតុកម្ម។ នៅទីក្រុង Yangon ក្រុមបាតុករពាក់មួកសុវត្ថិភាពការងារ និងប្រដាប់ដោយខែលការពារដែលពួកគេបានច្នៃ និងបានប្រមូលផ្ដុំគ្នានៅខាងមុខរបងបន្លាលួសនៅក្នុងតំបន់ផ្សេងៗគ្នា។ ក្រុមបាតុករនាំគ្នាស្រែកហ៊ោប្រឆាំងរដ្ឋាភិបាលយោធា។

«បើសិនជាយើងត្រូវបានបង្រាប នឹងមានការផ្ទុះឡើង។ បើសិនយើងត្រូវបានវាយប្រហារ យើងនឹងតបត» នេះគឺជាជ័យឃោសន៍របស់ក្រុមបាតុករ។

មិនយូរប៉ុន្មាន ក្រុមប៉ូលិសក៏បានបង្ហាញខ្លួន បាញ់គ្រាប់បែកផ្សែងបង្ហូរទឹកភ្នែក និងគ្រាប់បែកបង្ករន្ធត់ស្មារតី (Stun grenade) ដើម្បីបំបែកហ្វូងបាតុករនៅក្នុងតំបន់ចំនួន 4 ផ្សេងៗគ្នា។ សកម្មជនម្នាក់ និងអ្នកសារព័ត៌មានម្នាក់បានឱ្យដឹងថា ប៉ូលិសនៅទីរួមស្រុក Kale ភាគពាយព្យប្រទេសភូមា បានបាញ់ប្រហារដោយគ្រាប់កាំភ្លើងពិត បណ្ដាលឱ្យមនុស្សជាច្រើននាក់រងរបួស។

វេជ្ជបណ្ឌិតម្នាក់នៅ Kale និយាយថា មាន 3 នាក់រងរបួសធ្ងន់ ខណៈដែលសកម្មជនម្នាក់ឈ្មោះ War War Pyone បានប្រាប់ថា៖ «មនុស្សមួយចំនួនបានរងរបួស ក្នុងនោះមាន 2 នាក់ស្ថិតក្នុងស្ថានភាពអាសន្ន»។ ចំណែកបុគ្គលិកសង្គ្រោះម្នាក់ក៏បានអះអាងថា បាតុករជាច្រើននាក់រងរបួសដោយសារគ្រាប់កាំភ្លើងពិត និងគ្រាប់កាំភ្លើងកៅស៊ូ។

ក្រុមមន្ត្រីយោធានៃប្រទេសមីយ៉ានម៉ា និងក្រុមមន្ត្រីប្រចាំតំបន់មិនទាន់មានប្រតិកម្មអ្វីទៅនឹងករណីប៉ូលិសបាញ់ប្រហារដោយប្រើគ្រាប់កាំភ្លើងពិតនេះនៅឡើយ៕

ប្រភព៖ Reuters
ប្រែសម្រួល៖ បុត្រា

March 2, 2021

មន្ទីរបញ្ចកោណ បង្កើតក្រុមការងារពិសេស ទទួលបន្ទុកបញ្ហាប្រទេសចិន

ក្រសួងការពារជាតិសហរដ្ឋអាមេរិក ទើបតែបានបង្កើតក្រុមការងារពិសេសមួយដែលទទួលខុសត្រូវលើបញ្ហាប្រទេសចិន នៅក្នុងកិច្ចប្រជុំមួយដែលមានវត្តមានរបស់រដ្ឋមន្ត្រី Lloyd Austin រួមនឹងក្រុមមេដឹកនាំកងទ័ព និងក្រុមស៊ើបការណ៍សម្ងាត់។

«កិច្ចប្រជុំថ្ងៃនេះគឺដើម្បីកំណត់បេសកកម្ម ផែនការពេលវេលា និងកិច្ចការបន្ទាប់របស់ក្រុមការងារ អមដោយការវាយតម្លៃរួមអំពីគោលនយោបាយ កម្មវិធី និងដំណើរការរបស់ក្រសួងការពារជាតិនៅក្នុងបញ្ហាទាំងឡាយដែលទាក់ទិននឹងប្រទេសចិន» លោក John Kirby បានឱ្យដឹងកាលពីថ្ងៃទី 1 មីនា (ម៉ោងក្នុងស្រុក)។

យោងតាមការប្រកាសរបស់មន្ទីរបញ្ចកោណ ជាច្រើនឆ្នាំមកនេះមានយោបល់ជាច្រើនត្រូវបានលើកឡើងដើម្បីទប់ទល់នឹង «ការបង្កហេតុកាន់តែខ្លាំងឡើងរបស់ចិន» នៅក្នុងវិស័យមួយចំនួន។ លើកនេះ រដ្ឋមន្ត្រីការពារជាតិចង់បានការវាយតម្លៃឡើងវិញដើម្បីបន្តសកម្មភាព «ទៅតាមវិធីល្អបំផុត»។

លោក John Kirby អ្នកនាំពាក្យក្រសួងការពារជាតិអាមេរិក

លោក John Kirby អ្នកនាំពាក្យរបស់ក្រសួងការពារជាតិនៃសហរដ្ឋអាមេរិក បានបន្ថែមថា៖ «ការវាយតម្លៃនេះនឹងជួយឱ្យក្រុមការងារបង្កើតគោលដៅជាក់លាក់ និងប្រមូលផ្ដុំនូវបញ្ហាអាទិភាពបំផុត អមជាមួយនឹងសកម្មភាពជាក់ស្ដែង ក៏ដូចជាដាក់ចេញនូវថេរវេលាក្នុងការដោះស្រាយបញ្ហាប្រឈមនឹងចិន»។

ក្រុមការងារទទួលបន្ទុកបញ្ហាប្រទេសចិនរបស់មន្ទីរបញ្ចកោណនេះគឺជាផ្នែកមួយនៃការពិនិត្យឡើងវិញនូវគោលនយោបាយរបស់រដ្ឋាភិបាលអាមេរិកជាមួយនឹងចិន។ ក្រុមការងារខាងលើនេះនឹងផ្ដោលសំខាន់ទៅលើអន្តរកម្មរបស់មន្ទីរបញ្ចកោណជាមួយនឹងប្រទេសចិន នេះបើតាមលោក John Kirby។

ក្រុមការងារនេះ តាមគម្រោងនឹងបញ្ចប់ការវាយតម្លៃរបស់ខ្លួននៅក្នុងរយៈពេល 4 ខែទៀត។ លោក John Kirby បញ្ជាក់ថា៖ «ការវាយតម្លៃស្ទើរតែទាំងអស់នឹងស្ថិតក្នុងប្រភេទកិច្ចការសម្ងាត់ ប៉ុន្តែ យើងនឹងប្រកាសឱ្យដឹងនូវអ្វីដែលយើងអាចធ្វើបាន»៕

ប្រភព៖ Financial Times
ប្រែសម្រួល៖ បុត្រា

March 2, 2021

(វីដេអូ)-ភ្នំភ្លើងនៅឥណ្ឌូនេស៊ី ផ្ទុះជាថ្មី! ផ្សែង និងផេះកម្ពស់ 5,000ម៉ែត្រ

ភ្នំភ្លើង Sinabung នៅលើកោះ Sumatra បានផ្ទុះឡើងកាលពីព្រឹកនេះ បង្កឱ្យមានផេះ និងធូលីកម្ពស់ 5,000 ម៉ែត្រ ប៉ុន្តែមិនទាន់មានបទបញ្ជាឱ្យជម្លៀសពលរដ្ឋនៅឡើយ។

ក្រុមអ្នកវិទ្យាសាស្ត្រ បានរកឃើញមានករណីផ្ទុះផ្សេងៗគ្នាចំនួន 13 ករណី នៅពេលភ្នំភ្លើង Sinabung មានសកម្មភាពឡើងវិញ។ ក្រុមមន្ត្រីរដ្ឋាភិបាលឱ្យដឹងថា ភ្នំភ្លើងនេះមិនគំរាមកំហែងដល់អាយុជីវិត និងទ្រព្យសម្បត្តិរបស់ពលរដ្ឋនោះទេ ព្រោះថា ផ្ទៃដីប្រវែង 5 គីឡូម៉ែត្រនៅជុំវិញភ្នំភ្លើងនេះ ត្រូវបានបោះបង់ចោលអស់ជាច្រើនឆ្នាំមកហើយ។

បើទោះជាមិនមានបទបញ្ជាឱ្យជម្លៀស និងមិនមានរបាយការណ៍អំពីជើងហោះហើរដែលត្រូវពន្យារពេលដោយសារការផ្ទុះភ្នំភ្លើងនេះក៏ដោយ ប៉ុន្តែ ពលរដ្ឋក្នុងតំបន់នៅតែភ័យព្រួយ។

«ប្រជាជនមានការភ័យខ្លាច មនុស្សម្នានៅក្នុងផ្ទះដើម្បីចៀសពីផេះធូលីដ៏ក្រាស់របស់ភ្នំភ្លើង» Roy Bangun អាយុ 41 ឆ្នាំ បាននិយាយដូច្នេះ។

Muhammad Nurul Asrori ដែលជាមន្ត្រីតាមដានភ្នំភ្លើង Sinabung ឱ្យដឹងថា នេះគឺជាផ្សែង និងផេះធូលីធំបំផុតដែលគាត់មិនធ្លាប់បានឃើញរាប់ចាប់ពីឆ្នាំ 2010។ មន្ត្រីរូបនេះក៏បានព្រមានថា ផេះ និងធូលីនៅតែអាចកើតឡើងច្រើនជាងនេះ ព្រោះថា កម្អែដ៏ធំរបស់ភ្នំភ្លើងនេះ អាចផ្ទុះឡើងគ្រប់ពេល។

ភ្នំភ្លើង Sinabung មានកម្ពស់ 2,460 ម៉ែត្រ បានអសកម្មអស់ជាច្រើនសតវត្សរ៍ មុនពេលវាផ្ទុះឡើងវិញកាលពីឆ្នាំ 2010 ដែលបានសម្លាប់មនុស្សអស់ 2នាក់។ ក្រោយការ «ដេកលក់» រយៈពេល 3 ឆ្នាំ ភ្នំភ្លើងនេះក៏បន្តធ្វើសកម្មភាពឡើងវិញកាលពីឆ្នាំ 2013 ហើយតាំងពីពេលនោះ វាបានផ្ទុះជាញឹកញាប់។ ការផ្ទុះកាលពីឆ្នាំ 2014 បានបណ្ដាលឱ្យមានមនុស្សស្លាប់ចំនួន 16 នាក់ និងឆ្នាំ 2016 វាបានសម្លាប់មនុស្ស 7 នាក់។

ឥណ្ឌូនេស៊ីគឺជាប្រជុំកោះមួយ រួមមានកោះតូចធំជាង 17,000 ក្នុងនោះមានភ្នំភ្លើងជិត 130 កំពុងមានសកម្មភាព។ ប្រទសនេះស្ថិតនៅលើតំបន់ «ខ្សែក្រវាត់ភ្លើង» (Ring of Fire) ដែល «ឡោមព័ទ្ធ» មហាសមុទ្រប៉ាស៊ីហ្វិក។ តំបន់ខ្សែក្រវាត់ភ្លើងតែងកើតមានគ្រោះរញ្ជួយដី និងករណីផ្ទុះភ្នំភ្លើងជាញឹកញាប់៕

https://www.youtube.com/watch?v=B-lK_ClNFCw

ប្រភព៖ AFP
ប្រែសម្រួល៖ បុត្រា

March 2, 2021

កុមារីម្នាក់ត្រូវគ្រូចាប់ខ្មោចវាយរហូតដល់ស្លាប់ នៅក្នុងពិធីបណ្ដេញព្រលឹងបិសាច

ក្មេងស្រីម្នាក់អាយុ 9 ឆ្នាំម្នាក់ ត្រូវម្ដាយ និងគ្រូមន្តអាគមវាយតប់ជាបន្តបន្ទាប់រហូតនាំឱ្យបាត់បង់ជីវិត ក្នុងពេលពួកគេធ្វើពិធី «ប្ដូរព្រលឹង» នៅទីរួមស្រុក Delgoda នៃប្រទេសស្រីលង្កា។

នគរបាលស្រីលង្កា កាលពីថ្ងៃទី 1 មីនា បានឱ្យដឹងថា បានចាប់ខ្លួនជនសង្ស័យ 2 នាក់ ដែលទាក់ទិននឹងការស្លាប់របស់ក្មេងស្រីខាងលើ រួមមាន គ្រូមន្តអាគម និងម្ដាយរបស់កុមារីនេះ។ ជនសង្ស័យទាំង 2 នាក់នេះ ត្រូវបានគេជឿថា បានវាយតប់កុមារីរងគ្រោះរហូតដល់បាត់បង់ជីវិត នៅក្នុងពិធីបណ្ដេញព្រាយបិសាចនៅក្នុងទីរួមស្រុក Delgoda មានចម្ងាយពីរដ្ឋធានី Colombo ប្រមាណ 40 គីឡូម៉ែត្រទៅទិសឦសាន កាលពីចុងសប្ដាហ៍កន្លងទៅ។

តុលាការបានចេញបញ្ជាឱ្យឃុំខ្លួនបណ្ដោះអាសន្នលើជនសង្ស័យរហូតដល់ថ្ងៃកាត់ក្ដីដែលនឹងត្រូវធ្វើឡើងនៅថ្ងៃទី 12 មីនាខាងមុខ។ Ajith Rohana អ្នកនាំពាក្យរបស់នគរបាលក្នុងតំបន់ ឱ្យដឹងថា ម្ដាយរបស់កុមារីរងគ្រោះជឿថា កូនស្រីរបស់ខ្លួនត្រូវខ្មោចចូល ទើបបាននាំនាងទៅជួបគ្រូមន្តអាគមដើម្បី «បណ្ដេញព្រលឹងខ្មោច»។

Ajith Rohana បន្ថែមថា ដំបូង គ្រូចាប់ខ្មោចបានលាបប្រេងខ្យល់លើដងខ្លួនរបស់កុមារីនេះ ហើយក្រោយមកក៏យករំពាត់វាយនាងរហូតដល់សន្លប់។ ក្មេងស្រីរងគ្រោះក៏ត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ ប៉ុន្តែ មិនបានប៉ុន្មានម៉ោងក៏បានដាច់ខ្យល់ស្លាប់។ នគរបាលបានធ្វើកោសល្យវិច័យសាកសពកាលពីថ្ងៃទី 1 មីនា។

ប្រភពព័ត៌មានពីប៉ូលិសឱ្យដឹងថា គ្រូចាប់ខ្មោចនេះ បានចូលរួមធ្វើពិធីបណ្ដេញព្រលឹងខ្មោចព្រាយបិសាចជាញឹកញាប់ក្នុងអំឡុងច្រើនខែចុងក្រោយនេះ។ ប៉ូលិសកំពុងស្រាវជ្រាវបន្តដើម្បីឱ្យដឹងថា តើមានអ្នកណាទៀតដែលជាជនរងគ្រោះនៃពិធីឆ្កួតឡប់នេះដែរ ឬអត់៕

ប្រភព៖ AP
ប្រែសម្រួល៖ បុត្រា

March 2, 2021

កងទ័ពមីយ៉ានម៉ាចេញបញ្ជាមិនឱ្យប្រើគ្រាប់កាំភ្លើងពិត ក្នុងការបង្ក្រាបក្រុមបាតុករ

រដ្ឋាភិបាលយោធាភូមា (មីយ៉ានម៉ា) បានស្នើឱ្យក្រុមប៉ូលិស ឈប់ប្រើគ្រាប់កាំភ្លើងពិតក្នុងការបង្រាបក្រុមបាតុករ ក្រោយពីត្រូវអន្តរជាតិថ្កោលទោសដោយសារតែបានប្រើអំពើហិង្សា និងបាញ់ប្រហារ បណ្ដាលឱ្យបាតុករជាច្រើននាក់បានបាត់បង់ជីវិត។

សេចក្ដីប្រកាសខាងលើនេះត្រូវបានលើកឡើងនៅក្នុងកម្មវិធីផ្សាយនៃស្ថានីយទូរទស្សនកងទ័ពកាលពីថ្ងៃទី 1 មីនា មួយថ្ងៃក្រោយកងសន្តិសុខបាញ់ប្រហារក្រុមបាតុករដោយប្រើប្រាស់គ្រាប់កាំភ្លើងពិត។ ការិយាល័យសិទ្ធិមនុស្សរបស់អង្គការសហប្រជាជាតិ បានឱ្យដឹងថា បាតុករយ៉ាងតិច 18 នាក់បានស្លាប់ និង 30 នាក់ត្រូវរងរបួសនៅក្នុងអំពើបាញ់ប្រហារនោះពីសំណាក់ប៉ូលិសភូមា។ កងទ័ពភូមាក៏បានឱ្យដឹងថា មនុស្សជាង 1,300 នាក់ ត្រូវបានចាប់ខ្លួននៅក្នុងបាតុកម្មនានានៅទូទាំងប្រទេស។

តាមគម្រោង បាតុកម្មនឹងត្រូវបន្តធ្វើឡើងនៅថ្ងៃនេះ បន្ទាប់ពីតុលាការមីយ៉ានម៉ា បានប្រកាសអំពីការចោទប្រកាន់បន្ថែមចំនួន 2 ករណីទៀត ប្រឆាំងនឹងមេដឹកនាំ Aung San Suu Kyi ដែលត្រូវបានកងទ័ពធ្វើរដ្ឋប្រហារកាលពីថ្ងៃទី 1 កុម្ភៈ ឆ្នាំ 2021។ លោកស្រី Suu Kyi បានបង្ហាញខ្លួននៅតុលាការតាមរយៈវីដេអូ កាលពីថ្ងៃទី 1 មីនា និងត្រូវបានគេជឿថា នឹងត្រូវកងទ័ពបញ្ជូនទៅឃុំខ្លួនជាបន្តទៀតក្នុងរយៈពេលយូរ។

ករណីកងសន្តិសុខបាញ់ប្រហារសម្លាប់ក្រុមបាតុករនៅភូមា បាននាំឱ្យមានការប្រតិកម្មដោយការថ្កោលទោសយ៉ាងខ្លាំងក្លាពីអន្តរជាតិ ក្នុងនោះមានសហរដ្ឋអាមេរិក កាណាដា អាល្លឺម៉ង់ សហភាពអឺរ៉ុប និងប្រទេសមួយចំនួននៅតំបនអាស៊ីអាគ្នេយ៍ផងដែរ៕

ប្រភព៖ Bloomberg
ប្រែសម្រួល៖ បុត្រា

March 2, 2021

ស្ថាបនិករបស់ Bitcoin កំពុងកាន់កាប់ 1លាន Bitcoin តម្លៃរាប់ម៉ឺនលានដុល្លារអាមេរិក

ក្នុងរយៈពេលជាង 10 ឆ្នាំ រាប់ចាប់ពី Bitcoin បានបង្ហាញខ្លួនលើកដំបូង អត្តសញ្ញាណរបស់ស្ថាបនិកនៅពីក្រោយរូបិយវត្ថុអេឡិចត្រូនិកនេះ នៅតែជាអាថ៌កំបាំងសម្រាប់ពិភពលោកទាំងមូល។

ឆ្នាំ 2007 សេដ្ឋកិច្ចពិភពលោកធ្លាក់ចូលទៅក្នុងវិបត្តិធ្ងន់ធ្ងរ ដោយមូលហេតុដំបូងគឺការដួលរលំរបស់ Lehman Brothers ដែលជាធនាគារធំជាងគេលំដាប់ទីបួននៅសហរដ្ឋអាមេរិកកាលពីជំនាន់នោះ។ បន្ទាប់មកគឺជាការដាំក្បាលចុះរបស់ផ្សារមូលបត្រ និងធនាគារជាច្រើន រួមនឹងបណ្ដាក្រុមហ៊ុនធំៗ ត្រូវក្ស័យធនជាបន្តបន្ទាប់។ នៅក្នុងអំឡុងពេលនោះ ឈ្មោះ Bitcoin-Satoshi Nakamoto បានបង្ហាញខ្លួនជាលើកដំបូង។

នៅក្នុងខែតុលា ឆ្នាំ 2007 ជាលើកដំបូង Bitcoin ត្រូវបានរំលឹកដល់នៅក្នុងអត្ថបទមួយនិយាយអំពីរបៀបទូទាត់របស់បុគ្គលម្នាក់ មានឈ្មោះថា Satoshi Nakamoto។

យោងតាមឯកសារ P2P Foundation បុគ្គលឈ្មោះ Satoshi Nakamoto បានហៅខ្លួនឯងថាជាបុរសម្នាក់មកពីប្រទេសជប៉ុន កើតឆ្នាំ 1975។ ប៉ុន្តែ មានមតិជាច្រើននិយាយថា បុរស់នេះមិនមែនមកពីប្រទេសជប៉ុននោះទេ។

មូលហេតុដែលថាបុរសនេះមិនមែនជាមនុស្សមកពីជប៉ុន នោះគឺ ទីមួយ អត្ថបទសាធារណៈរបស់ Satoshi សរសេរជាភាសាអង់គ្លេសយ៉ាងស្ទាត់ជំនាញដូចទៅនឹងជនជាតិអង់គ្លេសពិត។ ទីពីរ ពេលវេលាឈប់សម្រាករបស់បុរសនេះក៏ផ្ទុយពីល្វែងម៉ោងរបស់មនុស្សម្នាក់ដែលរស់នៅក្នុងប្រទេសជប៉ុន។

ហេតុអ្វីបានជា Satoshi Nakamoto មិនបង្ហាញអត្តសញ្ញាណពិតរបស់ខ្លួន? មានសម្មតិកម្មជាច្រើនត្រូវបានលើកឡើង ក្នុងនោះមានមូលហេតុដូចជា «ដើម្បីចៀសវាងការតាមដានរបស់រដ្ឋាភិបាលនានា» «ដើម្បីលើកកម្ពស់ភាពអាថ៌កំបាំងរបស់ប្រព័ន្ធជួញដូរ» ឬ «ដើម្បីចៀសវាងការធ្លាក់ថ្លៃរបស់ប្រាក់ Bitcoin»។ល។

ផ្សារជួញដូររូបិយវត្ថុអេឡិចត្រូនិក Coinbase សង្កត់ធ្ងន់ថា៖ «បើសិនជាអត្តសញ្ញាណរបស់បុគ្គលិអាថ៌កំបាំងនេះត្រូវបានបង្ហើបឱ្យដឹង នោះតម្លៃរបស់ Bitcoin អាចដាំក្បាលចុះ»។

ឯកសាររបស់ Coinbase ក៏បានឱ្យដឹងថា Satoshi Nakamoto បច្ចុប្បន្ន កាន់កាប់ Bitcoin ជាង 1 លានឯណោះ។ បើគណនាទៅតាមតម្លៃ 50,000 ដុល្លារអាមេរិក/Bitcoin កាលពីខែកុម្ភៈ ដូច្នេះ Bitcoin ចំនួនជាង 1 លាននេះ មានតម្លៃស្មើនឹងជាង 5 ម៉ឺនលាន (50,000,000,000) ដុល្លារអាមេរិក៕

ប្រភព៖ BI, Republicworld
ប្រែសម្រួល៖ បុត្រា

March 2, 2021

សណ្ឋាគារអវកាសដំបូងគេបង្អស់ក្នុងពិភពលោក នឹងហោះចូលគន្លងគោចរចាប់ពីឆ្នាំ 2025

ការសាងសង់សណ្ឋាគារអវកាសដំបូងគេបង្អស់ក្នុងពិភពលោក កំពុងស្ថិតក្នុងដំណាក់កាលចាប់ផ្ដើម ហើយវាគ្រោងនឹងត្រូវបានបញ្ជូនឡើងទៅកាន់គន្លងគោចរកម្ពាស់ទាបរបស់ផែនដី នៅក្នុងឆ្នាំ 2025 ខាងមុខ។

ទីភ្នាក់ងារសារព័ត៌មានអង់គ្លេស Daily Mail កាលពីថ្ងៃទី 1 មីនា ឆ្នាំ 2021 បានចុះផ្សាយថា សណ្ឋាគារអវកាសដែលមានឈ្មោះថា Voyager Station នេះ ត្រូវបានអភិវឌ្ឍដោយក្រុមហ៊ុន OAC របស់សហរដ្ឋអាមេរិក។ Voyager Station នឹងមានរូបរាងជារង្វង់មូលដ៏ធំ ដោយមានអង្កត់ផ្ចិត 61 ម៉ែត្រ ដែលក្នុងនោះមានភោជនីយដ្ឋាន រោងកុន ស្ប៉ា និងបន្ទប់សម្រាប់ទេសចរចំនួន 400 នាក់។

នៅលើ Voyager Station ក៏មានកាប៊ីនភ្ជាប់បន្ថែមនៅជុំវិញសណ្ឋាគារ ដែលគ្រោងនឹងលក់ទៅឱ្យទីភ្នាក់អវកាសអាមេរិក (NASA) និងអឺរ៉ុប (ESA) សម្រាប់ការសិក្សាស្រាវជ្រាវ។ ក្រុមហ៊ុន OAC ឱ្យដឹងថា គម្រោងនេះនឹងត្រូវបើកដំណើរការទទួលភ្ញៀវចាប់ពីឆ្នាំ 2027។

OAC មិនទាន់ប្រកាសអំពីខ្ទង់ចំណាយនៅក្នុងការសាងសង់ Voyager Station ប៉ុន្តែ ក្រុមហ៊ុននេះបង្ហើបឱ្យដឹងថា ការចំណាយលើការសាងសង់នឹងអាចកាត់បន្ថយបានច្រើន ដោយសារតែមធ្យោបាយដឹកជញ្ជូនពីផែនដីអាចប្រើប្រាស់ឡើងវិញ ដូចជាកាំជ្រួច Falcon 9 និងយានអវកាស Starship របស់ក្រុមហ៊ុន SpaceX ជាដើម។

ខ្ទង់ចំណាយសម្រាប់ការដឹកជញ្ជូនសម្ភារឡើងទៅកាន់ទីអវកាសគឺ 8,000ដុល្លារ/គីឡូក្រាម ប៉ុន្តែ ការប្រើប្រាស់ Falcon 9 ការចំណាយនេះអាចធ្លាក់មកនៅត្រឹម 2,000ដុល្លារ/គីឡូក្រាម៕

ប្រភព៖ Daily Mail
ប្រែសម្រួល៖ បុត្រា

March 2, 2021

ស្ថានភាព Covid-19 នៅកម្ពុជា គិតត្រឹមព្រឹកថ្ងៃទី 2មីនា 2021

នាព្រឹកថ្ងៃទី 2 មីនា ឆ្នាំ 2021 នេះ ក្រសួងសុខាភិបាលកម្ពុជា ឱ្យដឹងថា បានរកឃើញករណីវិជ្ជមាននឹង Covid-19 ថ្មីចំនួន 24 នាក់ទៀតនៅក្នុងរយៈពេល 24 ម៉ោងកន្លងទៅ ដែលទាំងនេះគឺជាករណីពាក់ព័ន្ធនឹង «ព្រឹត្តិការណ៍ 20កុម្ភៈ»។

ក្នុងចំណោមអ្នកវិជ្ជមានខាងលើ មានជនជាតិខ្មែរ 4 នាក់ និងវៀតណាម 4 នាក់ ក្រៅពីនេះគឺសុទ្ធតែជាជនជាតិចិន។ ព័ត៌មានលម្អិត សូមបន្តអានរបាយការណ៍របស់ក្រសួងដែលមានដូចខាងក្រោម។

គិតមកដល់ព្រឹកថ្ងៃទី 2 មីនានេះ កម្ពុជាមានអ្នកវិជ្ជមាននឹង Covid-19 សរុបចំនួន 844 នាក់ ក្នុងនោះមាន 478 នាក់បានជាសះស្បើយ និង 366 នាក់ កំពុងសម្រាក់ព្យាបាលនៅមន្ទីរពេទ្យ៕

March 2, 2021

Author: សឿន សំណាង