សឿន សំណាង - La Reine Media

កម្ពុជារកឃើញអ្នកឆ្លង Covid-19 ថ្មី 62នាក់ ក្នុងថ្ងៃទី 11មីនា

ក្រសួងសុខាភិបាលកម្ពុជា បានរកឃើញអ្នកវិជ្ជមាននឹង Covid-19 ចំនួន 62 នាក់ទៀតនៅក្នុងអំឡុង 24 ម៉ោងនៃថ្ងៃទី 11 មីនា 2021 នាំឱ្យតួលេខនៃអ្នកវិជ្ជមានសរុបឡើងដល់ 1,225 នាក់។

ក្នុងចំណោមអ្នកវិជ្ជមានថ្មីខាងលើ មាន 2 នាក់ពាក់ព័ន្ធនឹងករណីនាំចូលដែលមិនមែនជាពលករខ្មែរមកពីប្រទេសថៃ។ ចំណែក 60 នាក់ទៀត ជាករណីពាក់ព័ន្ធនឹងព្រឹត្តិការណ៍ 20កុម្ភៈ។

គិតមកដល់ព្រឹកថ្ងៃទី 12 មីនា 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 1,225 នាក់ ក្នុងនោះមាន 619 នាក់បានជាសះស្បើយ ខណៈ 1 នាក់បានស្លាប់ និង 604 នាក់កំពុងព្យាបាលនៅមន្ទីរពេទ្យ។

ក្រៅពីអ្នកវិជ្ជមានថ្មី កម្ពុជាថ្ងៃនេះក៏មានករណីជាសះស្បើយចំនួន 2 នាក់ផងដែរ។ ព័ត៌មានលម្អិត សូមបន្តអានរបស់របាយការណ៍របស់ក្រសួងសុខាភិបាលដូចមាននៅខាងក្រោម៕

ប្រភព៖ ក្រសួងសុខាភិបាល
ដកស្រង់៖ បុត្រា

March 12, 2021

ម៉ាឡេស៊ីនឹងដាក់ទោសយ៉ាងធ្ងន់ធ្ងរចំពោះបុគ្គលបញ្ចេញព័ត៌មានក្លែងក្លាយទាក់ទងនឹង Covid-19

ចាប់ពីថ្ងៃទី 12 មីនា 2021 ប្រទេសម៉ាឡេស៊ី នឹងពិន័យជាប្រាក់ឡើងដល់ 100,000 រីងហ្កីត (ជិត 25,000 ដុល្លារ) ឬដាក់ពន្ធនាគាររហូតដល់ 3 ឆ្នាំ ឬក៏ពិន័យទាំងពីរវិធានការនេះ ចំពោះករណីផ្ដល់ព័ត៌មានក្លែងក្លាយ ផ្សាយព័ត៌មានក្លែងក្លាយ ទាក់ទងនឹងស្ថានភាព Covid-19 ឬស្ថានភាពបន្ទាន់របស់ប្រទេសជាតិ។

ព័ត៌មានខាងលើត្រូវបានចុះផ្សាយនៅលើទំព័រជូនដំណឹងរបស់រដ្ឋាភិបាលម៉ាឡេស៊ី កាលពីថ្ងៃទី 11 មីនា 2021។ ក្រៅពីប្រការទាំងនេះ តុលាការក៏អាចស្នើឱ្យជនល្មើសសុំទោសចំពោះជនទាំងឡាយណាដែលរងផលប៉ះពាល់ផងដែរ។ បើសិនជាជនល្មើសមិនអនុវត្តតាមតុលាការ នោះនឹងត្រូវពិន័យជាប្រាក់ឡើងដល់ 50,000 រីងហ្កីត (12,500 ដុល្លារអាមេរិក) ឬដាក់ពន្ធនាគារក្រោមមួយឆ្នាំ ឬត្រូវទទួលការពិន័យទាំងពីរ។

គិតមកដល់ព្រឹកថ្ងៃទី 12 មីនា 2021 នេះ ម៉ាឡេស៊ី បានរកឃើញអ្នកវិជ្ជមាននឹង Covid-19 សរុបចំនួន 319,364 នាក់ ក្នុងនោះមានអ្នកជាសះ 300,620 នាក់ ខណៈ 17,544 នាក់ កំពុងព្យាបាល និង 1,200 បានបាត់បង់ជីវិត៕

ប្រភព៖ CNA
ប្រែសម្រួល៖ បុត្រា

March 12, 2021

ប្រធានខុទ្ទកាល័យនៃអគ្គបញ្ជាការដ្ឋានកងទ័ព៖ យោធិនម្នាក់របស់ខ្លួន បានឆ្លង Covid-19

នាយទាហានម្នាក់ដែលធ្វើការនៅខុទ្ទកាល័យនៃអគ្គបញ្ជាការដ្ឋានកងទ័ព បានទទួលលទ្ធផលវិជ្ជមាននឹង Covid-19 បើទោះជាបានចាក់វ៉ាក់សាំងបង្ការវីរុស Covid-19 លើកទីមួយហើយក្ដី។

មន្ត្រីយោធិនដែលត្រូវបានរកឃើញថាវិជ្ជមាននឹង Covid-19 កាលពីថ្ងៃទី 8 មីនា 2021 ខាងលើ មានឈ្មោះថា លី ចាន់សុវណ្ណបញ្ញា អាយុ 24 ឆ្នាំ មានតួនាទីជាជំនួយការរបស់ការិយាល័យហិរញ្ញវត្ថុនៃខុទ្ទកាល័យអគ្គបញ្ជាការដ្ឋានកងទ័ព។ ព័ត៌មាននេះគឺយោងតាមលិខិតជូនដំណឹងរបស់ប្រធានខុទ្ទកាល័យនៃអគ្គបញ្ជាការដ្ឋាន ដែលបានផ្ញើជូនអគ្គមេបញ្ជាការរងនៃកងយោធពលខេមរភូមិន្ទ នាថ្ងៃទី 11 មីនា ឆ្នាំ 2021 នេះ។

លិខិតជូនដំណឹងខាងលើក៏បានបញ្ជាក់ថា នាយទាហានខាងលើគឺជាកូនប្រសារបស់គ្រូពេទ្យមួយរូបនៅអ្នកលឿន ខេត្តព្រៃវែង ដែលបានឆ្លងវីរុស Covid-19 មុននោះ។

ទោះជាយ៉ាងនេះក្ដី ខុទ្ទកាល័យនៃអគ្គបញ្ជាការដ្ឋាន បានឱ្យដឹងថា ដោយសារតែនាយទាហានរូបនេះមិនសូវសកម្មនៅកន្លែងធ្វើការ ដូច្នេះមិនមានហានិភ័យនៃការចម្លងវីរុសដល់អ្នកដទៃក្នុងខុទ្ទកាល័យនោះឡើយ៕

March 11, 2021

រាជវាំងអង់គ្លេសថានឹងដោះស្រាយបញ្ហាទាក់ទិនកិច្ចសម្ភាសរបស់ Meghan Markle តែចៅប្រសាឆ្លើយវិញដោយអន្ថន័យ «ហ៊ានស៊ី ហ៊ានសង»

បន្ទាប់ពីមហាក្សត្រីអង់គ្លេស Elizabeth ទីពីរ ប្រកាសថានឹងដោះស្រាយបញ្ហាក្នុងរាជវង្សជាលក្ខណដោយឡែក ភ្លាមនោះ ភរិយារបស់អតីតអង្គម្ចាស់ Harry នាង Meghan ក៏ឆ្លើយតបទាក់ទងនឹងកិច្ចសម្ភាសមួយរបស់នាង ដែលបាន និងកំពុងធ្វើឱ្យរង្គោះរង្គើរាជវាំង Buckingham។

>អត្ថបទទាក់ទង៖ សម្ព័ន្ធ 54ប្រទេស តំណាងដោយក្សត្រី Elizabeth ទីពីរ កំពុងរង្គោះរង្គើ ក្រោយអតីតអង្គម្ចាស់ Harry និងនាង Meghan ចោទថា «រាជវង្សអង់គ្លេស រើសអើងពូជសាសន៍»

កាលពីថ្ងៃទី 7 មីនា គ្រួសារ Harry – Meghan បានធ្វើឱ្យពិភពលោកមានមតិច្របូកច្របល់ បន្ទាប់ពីកិច្ចសម្ភាសរបស់ពួកគេជាមួយនឹងមហាសេដ្ឋិនី និងជាកំពូលពិធីការិនីទូរទស្សន៍ CBS អ្នកស្រី Oprah Winfrey ត្រូវបានចាក់ផ្សាយ។ Meghan បានរិះគន់លើរាជវង្សអង់គ្លេស ដែលជាគ្រួសារខាងស្វាមីរបស់ខ្លួនថា មានការរើសអើងពូជសាសន៍ចំពោះរូបនាងដែលមានឈាមជ័រជាជនជាតិស្បែកខ្មៅ។

ពីរថ្ងៃក្រោយមក មហាក្សត្រីអង់គ្លេស Elizabeth ទីពីរ ក៏បានប្រកាសជាផ្លូវការថា បញ្ហាទាំងឡាយខាងលើនឹងត្រូវបានដោះស្រាយដោយឡែកក្នុងរាជរង្ស។ ក្រោយការប្រកាសនេះ ចៅប្រសាស្ដេចអង់គ្លេស នាង Meghan ក៏បានឆ្លើយតបភ្លាម។

មិត្តជិតស្និទ្ធរបស់ Meghan Markle បានប្រាប់សារព័ត៌មាន Daily Mail ថា Meghan Markle «មិនមានការសោកស្ដាយ» ចំពោះកិច្ចសម្ភាសរបស់នាង និងស្វាមី ជាមួយនឹង Oprah នោះទេ ហើយថា រាជវាំងគួរតែ «ត្រេកអរ និងធូរចិត្ត» នៅពេលនាងមិនបានរៀបរាប់លម្អិតជាងនេះអំពីអ្វីដែលបានកើតឡើងនៅខាងក្រោយក្លោងទ្វាររាជវាំង។

ប្រភពព័ត៌មានដែលស្និទ្ធនឹងគ្រួសាររបស់ Meghan Markle ឱ្យដឹងថា អាទិភាពបច្ចុប្បន្នរបស់ Meghan Markle នោះគឺរក្សាសុខភាពឱ្យល្អដើម្បីរង់ចាំថ្ងៃផ្ដល់កំណើតឱ្យកូន។ គ្រួសារ Meghan Markle ធ្លាប់បាននិយាយថា Meghan Markle នឹងឆ្លងទន្លេនៅក្នុងរដូវក្ដៅនេះ។ ក្រៅពីនេះ អតីតព្រះនាងរបស់អង់គ្លេសរូប ក៏បានអះអាងថា ខ្លួនបានត្រៀមខ្លួនជាស្រេចដើម្បីចរចាជាមួយអង្គម្ចាស់ទាំងឡាយណាដែលចង់ចូលរួមការពិភាក្សាដើម្បីស្ថាបនា៕

ប្រភព៖ Daily Mail
ប្រែសម្រួល៖ បុត្រា

March 11, 2021

សម្ព័ន្ធ 54ប្រទេស តំណាងដោយក្សត្រី Elizabeth ទីពីរ កំពុងរង្គោះរង្គើ ក្រោយអតីតអង្គម្ចាស់ Harry និងនាង Meghan ចោទថា «រាជវង្សអង់គ្លេស រើសអើងពូជសាសន៍»

កិច្ចសម្ភាស Harry – Meghan បានបង្កឱ្យមានហានិភ័យបែកបាក់ក្នុង «គ្រួសារ» នៃក្រុមប្រទេសរបស់សម្ព័ន្ធកុម្ម៉ង់វែល (Commonwealth of Nations) ជាសមាគមដែលមានប្រទេសចំនួន 54 ដែលភាគច្រើនគឺជាអតីតប្រទេសក្រោមអាណានិគមអង់គ្លេស។

ក្នុងបណ្ដាប្រទេសដែលមានទំនាក់ទំងជាប្រវត្តិសាស្ត្រជាមួយចក្រភពអង់គ្លេស ការចោទប្រកាន់របស់អតីតព្រះអង្គម្ចាស់ Harry និងនាង Meghan ដែលថា មាន «សមាជិករាជរង្សខ្លួនមានការព្រួយបារម្ភថា កូនៗរបស់ពួកគេនឹងមានសម្បុរស្បែកពណ៌ខ្មៅ» នោះ បាននាំឱ្យមានការលើកឡើងនូវសំណួរជាច្រើន៖ «តើប្រទេសទាំងនោះ (ប្រទេសដែលស្ថិតក្នុងសម្ព័ន្ធប្រជាជាតិកុម្ម៉ង់វែល) ពិតជាចង់ភ្ជាប់ទំនាក់ទំនងស្អិតល្មួតជាមួយអង់គ្លេស និងរាជវាំងអង់គ្លេស ឬទេ?»។

សូមបញ្ជាក់ថា មហាក្សត្រី Elizabeth ទីពីរ មិនត្រឹមតែជាមេដឹកនាំរបស់អង់គ្លេសប៉ុណ្ណោះទេ តែក៏ជាមេដឹកនាំរបស់កុម្ម៉ង់វែល ដែលជាសមាគមអន្តររដ្ឋាភិបាលមួយដែលមានការចូលរួមរបស់ប្រទេសអង់គ្លេស និងប្រទេសចំនួន 53 ផ្សេងទៀត ដែលសុទ្ធសឹងតែធ្លាប់ជាប្រទេសស្ថិតក្រោមអាណានិគមរបស់អង់គ្លេស។ សម្ព័ន្ធនេះត្រូវបានបង្កើតឡើងដោយប្រកាសមួយនាទីក្រុងឡុងដ៍កាលពីឆ្នាំ 1949 ដែលកំណត់ថា ប្រទេសជាសមាជិក «មានសេរីភាព និងសមភាព»។ មហាក្សត្រីរបស់អង់គ្លេសគឺជានិមិត្តរូបនៃសម្ព័ន្ធនេះ។ ក្រៅពីអង់គ្លេស មហាក្សត្រី Elizabeth ទីពីរ ក៏ជាក្សត្រីរបស់ប្រទេសចំនួន 15 ទៀតដែលស្ថិតក្នុងសម្ព័ន្ធកុម្ម៉ង់វែលនេះដែរ (រួមមានប្រទេស Antigua and Barbuda, Australia, the Bahamas, Barbados, Belize, Canada, Grenada, Jamaica, New Zealand, Papua New Guinea, St. Kitts and Nevis, St. Lucia, St. Vincent and the Grenadines, the Solomon Islands, និងប្រទេស Tuvalu)។

កិច្ចសម្ភាសរបស់អតីតព្រះអង្គម្ចាស់ Harry របស់អង់គ្លេស និងនាង Meghan ត្រូវបានចាក់ផ្សាយលើទូរទស្សន៍អាមេរិក កាលពីយប់ថ្ងៃទី 7 មីនា មុនទិវានៃសម្ព័ន្ធប្រជាជាតិកុម្ម៉ង់វែល 8 មីនា។ អតីតនាយករដ្ឋមន្ត្រីអូស្ត្រាលី Malcolm Turnbull បាននិយាយថា ការបង្ហើបឱ្យដឹងនៅក្នុងកិច្ចសម្ភាសនេះគឺជាមូលហេតុដែលប្រទេសនេះអាចកាត់ផ្ដាច់ទំនាក់ទំនងជាលក្ខណធម្មនុញ្ញជាមួយនឹងរបបរាជាធិបតេយ្យអង់គ្លេស។

«យើងគួរតែបញ្ឈប់ នៅពេលសម័យកាលកាន់អំណាចរបស់មហាក្សត្រីបានបញ្ចប់» លោក Turnbull និយាយដូច្នេះ។ «តើយើងពិតជាចង់ឱ្យមនុស្សម្នាក់មកធ្វើជាមេដឹកនាំប្រទេសរបស់ខ្លួន ព្រោះតែអ្នកនោះជាក្សត្រា ឬក្សត្រីរបស់អង់គ្លេស?»។

តម្លៃរបស់សម្ព័ន្ធកុម្ម៉ង់វែល ធ្លាប់ត្រូវបានលើកយកមកជជែកវែកញែកជាច្រើនលើកមកហើយ ក្នុងនោះ ក្រុមអ្នករិះគន់បានចោទសួរថា តើបណ្ដាប្រទេស និងប្រជាជាតិដែលធ្លាប់ស្ថិតក្រោមអាណានិគម និងធ្លាប់ត្រូវបានកៀបសង្កត់ គួរតែបន្តទំនាក់ទំនងដូច្នេះជាមួយនឹងប្រទេសអង់គ្លេស ឬទេ?

គោលបំណងនៃការបង្កើតសម្ព័ន្ធកុម្ម៉ង់វែល គឺដើម្បីកែលម្អទំនាក់ទំនងអន្តរជាតិ ប៉ុន្តែ ទំនាក់ទំនងរបស់អង់គ្លេសជាមួយបណ្ដាប្រទេសជាសមាជិក ត្រូវបានកំហុសឆ្គងក្នុងការទូត និងប្រវត្តិសាស្ត្រនៃជំនាន់អាណានិគម ធ្វើឱ្យល្អក់កករ។ ក្នុងសុន្ទរកថាអបអរទិវាសម្ព័ន្ធកុម្ម៉ង់វែល កាលពីថ្ងៃទី 8 មីនា មហាក្សត្រីអង់គ្លេសបានសង្កត់ធ្ងន់ទៅលើ «ស្មារតីរួបរួម»។

កិច្ចសម្ភាសរបស់អតីតអង្គម្ចាស់ Harry និងអ្នកម្នាង Meghan «ជួយឱ្យយើងអាចមើលឃើញលម្អិតជាងមុន» អំពីតម្លៃរបស់សម្ព័ន្ធកុម្ម៉ង់វែល នេះបើតាម Nicholas Sengoba ដែលជាអ្នកកាសែតប្រចាំប្រទេសអ៊ូហ្គង់ដា អតីតប្រទេសក្រោមអាណានិគមរបស់អង់គ្លេស។

ផែនទីនៃបណ្ដាប្រទេសដែលស្ថិតក្នុងសម្ព័ន្ធកុម្ម៉ង់វែល ដែលតំណាងដោយមហាក្សត្រីអង់គ្លេស Elizabeth ទីពីរ

លោក Nicholas Sengoba និយាយថា នៅប្រទេសអ៊ូហ្គង់ដា នៅមាន «បញ្ហាជាច្រើនមិនទាន់ដោះស្រាយ» ទាក់ទិននឹងទង្វើរំលោភបំពានកាលពីជំនាន់អាណានិគម និងបានចោទសួរ ក្រោយពីមានកិច្ចសម្ភាសខាងលើ ថា «តើមេដឹកនាំបណ្ដាប្រទេសក្នុងសម្ព័ន្ធកុម្ម៉ង់វែល គួរមានមោទកភាពនៅពេលបានទទួលទានអាហារពេលយប់ជាមួយសមាជិករបស់រាជវង្សអង់គ្លេស ឬយ៉ាងណា?»។

ចំណែកភាគីខាងរាជវាំង Buckingham វិញ បានប្រតិកម្មថា ការចោទប្រកាន់របស់ Harry និង Meghan ទាក់ទងនឹងបញ្ហារើសអើងពូជសាសន៍នៅក្នុងរាជវាំងអង់គ្លេស នោះ នឹងត្រូវបានដោះស្រាយដោយឡែក។ នាង Meghan មានឪពុកជាជនជាតិស្បែកខ្មៅ រីឯម្ដាយជាជនជាតិស្បែកស។

ក្រោយកិច្ចសម្ភាសរបស់ Harry និង Meghan ប្រជាជននៅអាហ្វ្រិក មានការប្រតិកម្មយ៉ាងខ្លាំងក្លា។ «ប្រទេសអង់គ្លេស និងរាជវាំង គឺបែបនេះ។ គ្រប់គ្នាសង្ឃឹមអ្វីទៀត? ពួកគេធ្លាប់កៀបសង្កត់យើងអស់ជាច្រើនឆ្នាំ» អ្នកលេង Twitter នៅអាហ្វ្រិកខាងត្បូងម្នាក់ បង្ហោះសារយ៉ាងដូច្នេះ។

Mohammed Groenewald ជាអ្នកដែលធ្លាប់បាននាំ Harry និង Meghan ទៅទស្សនកិច្ចវិហារអ៊ីស្លាមមួយនៅទីក្រុង Cape Town បាននិយាយថា កិច្ចសម្ភាសខាងលើ បានរំលឹក និងលាតត្រដាងឡើងវិញអំពីបញ្ហា «រើសអើងពូជសាសន៍របស់ចក្រពត្តិអង់គ្លេស»។ លោកបន្ថែមថា បញ្ហានេះ «បានបង្ហាញយ៉ាងច្បាស់លាស់ហើយ»។

កេនយ៉ាគឺជាអតីតប្រទេសក្រោមអាណានិគមដែលក្សត្រី Elizabeth ធ្លាប់មកធ្វើទស្សនកិច្ចកាលពីឆ្នាំ 1952 ក្នុងនាមជាមហាក្សត្រី។ «យើងមានការខឹងខ្លាំងណាស់នៅពេលបានដឹងថា ប្អូនស្រីមានដើមកំណើតអាហ្វ្រិក ត្រូវគេធ្វើបាបដោយសារតែនាងជាជនជាតិស្បែកខ្មៅ» Sylvia Wangari ជាពលរដ្ឋម្នាក់នៅរដ្ឋធានី Nairobi និយាយអំពីនាង Meghan។ Wangari បន្ថែមថា កាលពីក្សត្រី Elizabeth មកធ្វើទស្សនកិច្ចកេនយ៉ា ប្រជាជនប្រទេសនេះមិនបាន «សំដែងឥរិយាបថប្រកាន់ពូជសាសន៍អ្វីឡើយ»។

ចំណែកនាយករដ្ឋមន្ត្រីកាណាដា លោក Justin Trudeau វិញ បាននិយាយថា «មិនគួរបោះបង់កត្តាណាមួយភ្លាមៗ និងចាប់ផ្ដើមជាថ្មីនោះទេ»។ រីឯ Jagmeet Singh ដែលជាមេដឹកនាំបក្សប្រជាធិបតេយ្យថ្មី (New Democratic Party) វិញ បាននិយាយថា របបរាជាធិបតេយ្យ «មិនមានប្រយោជន៍អ្វីដល់ជីវភាពប្រចាំថ្ងៃរបស់ប្រជាជនកាណាដានោះឡើយ»។

កិច្ចសម្ភាសរបស់ Harry និង Meghan មិនបានចាក់បញ្ចាំងលើកញ្ចក់ទូរទស្សន៍ឥណ្ឌា ដែលជាប្រទេសមួយមានមនុស្សរស់នៅច្រើនជាងគេបង្អស់នៅក្នុងសម្ព័ន្ធកុម្ម៉ង់វែល ដោយមានប្រជាជនសរុបជាង 1.3 លាននាក់។ ក៏ប៉ុន្តែ សារព័ត៌មាននានានៅតែមានការចុះផ្សាយអំពីប្រតិកម្មអវិជ្ជមានចំពោះរាជវង្សអង់គ្លេស។

ទោះជាយ៉ាងណាក៏ដោយ «សម្ព័ន្ធកុម្ម៉ង់វែលពិតជាមានសារសំខាន់សម្រាប់រាជវង្សអង់គ្លេស ព្រោះវាបង្ហាញថា ពួកគេបានគ្រប់គ្រងប្រទេស និងតំបន់ជាច្រើន ប៉ុន្តែ ចំណែកពួកយើង យ៉ាងណាទៅវិញ? ខ្ញុំមិនយល់សោះថា ហេតុអ្វីបានជាយើងនៅតែស្ថិតក្នុងសម្ព័ន្ធនេះ» នេះបើតាមសម្ដីរបស់មេធាវី Sunaina Phul៕

ប្រភព៖ AP
ប្រែសម្រួល៖ បុត្រា

March 11, 2021

កម្ពុជាមានករណីស្លាប់ដោយសារ Covid-19 ហើយ!

March 11, 2021

កម្ពុជារកឃើញអ្នកវិជ្ជមាននឹង Covid-19 ថ្មី ចំនួន 39នាក់ទៀតហើយ ក្នុងអំឡុង 24ម៉ោងនៃថ្ងៃទី 10មីនា

ក្រសួងសុខភិបាលបានប្រកាសថា ក្នុងអំឡុង 24 ម៉ោងនៃថ្ងៃទី 10 ខែមីនា កម្ពុជាមានអ្នកឆ្លងវីរុស Covid-19 ថ្មី ចំនួន 39 នាក់ នាំឱ្យតួលេខសរុបកើនដល់ 1,163 នាក់។

អ្នកវិជ្ជមានថ្មីខាងលើ សុទ្ធតែជាករណីពាក់ព័ន្ធនឹងព្រឹត្តិការណ៍ 20កុម្ភៈ។ ក្រៅពីនេះ កម្ពុជាក៏មានអ្នកជាសះស្បើយថ្មីចំនួន 48 នាក់ផងដែរ។

គិតមកដល់ព្រឹកថ្ងៃទី 11 មីនា 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 1,163 ករណី ក្នុងនោះមាន 597 នាក់ បានជាសះស្បើយ និង 565 នាក់ កំពុងព្យាបាលនៅមន្ទីរពេទ្យ។ ព័ត៌មានលម្អិត សូមអានរបាយការណ៍របស់ក្រសួងសុខាភិបាលដែលមានដូចខាងក្រោម។

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 11, 2021

ស្ថានភាព Covid-19 នៅ ASEAN គិតត្រឹមថ្ងៃទី 10មីនា 2021

យោងតាមទំព័រ Worldometers គិតមកដល់ម៉ោង 23៖59 នាទីនៃថ្ងៃទី 10 មីនា បណ្ដាប្រទេសស្ថិតក្នុងសមាគមប្រជាជាតិអាស៊ីអាគ្នេយ៍ (ASEAN) បានរកឃើញអ្នកវិជ្ជមាននឹង Covid-19 ថ្មីសរុបចំនួន 10,059 ករណី។

ក្នុងអំឡុង 24 ម៉ោងកន្លងទៅ ASEAN មាន 3 ប្រទេសដែលមានអ្នកស្លាប់ដោយសារវីរុស Covid-19 នោះគឺ ហ្វីលីពីន, ឥណ្ឌូនេស៊ី និងម៉ាឡេស៊ី ខណៈដែលប្រទេសចំនួន 9 របស់សមាគមនេះ មានករណីឆ្លង Covid-19។ ដោយឡែកប្រទេស ប្រ៊ុយណេ, មីយ៉ានម៉ា (មិនបញ្ចេញរបាយការណ៍) និងឡាវ មិនមានករណីឆ្លង ឬស្លាប់នោះទេ។

ឥណ្ឌូនេស៊ីនៅតែជាសម្បុកវីរុស Covid-19 ធំជាងគេនៅ ASEAN ប៉ុន្តែ ស្ថានភាពកំពុងតែប្រសើរឡើងជាងមុននៅពេលតួលេខអ្នកវិជ្ជមានថ្មីបានថយចុះបន្តិចបើធៀបនឹងប៉ុន្មានថ្ងៃមុននេះ។ យ៉ាងណាក្ដី ក្នុងអំឡុង 24 ម៉ោងនៃថ្ងៃទី 10 មីនា ប្រទេសនេះនៅតែជាទឹកដីដែលមានអ្នកវិជ្ជមានថ្មី និងករណីស្លាប់ថ្មីដោយសារ Covid-19 ខ្ពស់ជាងគេបង្អស់នៅក្នុងទ្វីបអាស៊ី។

ជារួម Covid-19 គិតមកដល់បច្ចុប្បន្ន បានសម្លាប់មនុស្សចំនួន 55,020 នាក់ នៅតំបន់អាស៊ីអាគ្នេយ៍ ពោលគឺកើន 197 ករណី បើធៀបនឹងមុននោះមួយថ្ងៃ ខណៈដែលតួលេខអ្នកវិជ្ជមានសរុប ឡើងដល់ជាង 2,552,300 នាក់។ ទន្ទឹមនឹងនេះ តំបន់នេះក៏មានអ្នកជាសះស្បើយចំនួនជាង 2,281,670 នាក់ផងដែរ៕

តួលេខស្ដីអំពី Covid-19 នៅតំបន់ ASEAN គិតត្រឹមថ្ងៃទី 10មីនា 2021៖

ប្រភព៖ Xinhua, Worldometers
ប្រែសម្រួល៖ បុត្រា

March 11, 2021

Meghan Markle ភរិយារបស់អតីតព្រះអង្គម្ចាស់អង់គ្លេស បានធ្វើឱ្យពិភពលោកនាំគ្នាពិចារណាអំពីបញ្ហាពលរដ្ឋត្រូវបង់ពន្ធដើម្បីចិញ្ចឹមរាជវង្ស

ជាមួយនឹងប្រជាជនសរុបចំនួន 66.8 លាននាក់ ជាមធ្យម ពលរដ្ឋអង់គ្លេសម្នាក់ត្រូវបង់ពន្ធចំនួន 1.28 ផោន ដើម្បីចិញ្ចឹមមហាក្សត្រី និងរាជវង្សានុវង្សនៃចក្រភពអង់គ្លេស។

កិច្ចសម្ភាសរបស់អតីតព្រះនាង Meghan Markle ដែលជាភរិយារបស់អតីតព្រះអង្គម្ចាស់ Harry (Henry Charles Albert David) នៃរាជវង្សអង់គ្លេស បានវាយប្រហារចំៗទៅលើរាជវាំង បើទោះជាប្រជាជនប្រទេសនេះ មានទម្លាប់គោរពរាជវង្សានុវង្ស។

ក្រោយពីកិច្ចសម្ភាសខាងលើ ក្រុមហ៊ុន YouGov ក៏បានធ្វើការស្ទង់មតិមួយ ហើយលទ្ធផលបានបង្ហាញថា ពលរដ្ឋប្រមាណ 40% មានការអាណិតដល់រាជវង្ស និងមហាក្សត្រីអង់គ្លេស Elizabeth II (Elizabeth Alexandra Mary Windsor) ដោយចាត់ទុកថា ត្រូវបានគេ «លាបពណ៌» នៅលើកញ្ចក់ទូរទស្សន៍ ខណៈដែល 24% សំដែងការអាសូរចំពោះគ្រួសារ Meghan ព្រោះតែបញ្ហាដែលពួកគេបានឆ្លងកាត់។ ចំណែក មតិចំនួន 24% ទៀត មិនចូលចិត្តភាគីខាងណាទាំងអស់។

តាមការពិត ពលរដ្ឋអង់គ្លេសបានជជែកគ្នាជាច្រើនអំពីខ្ទង់ថវិកាជាតិដែលត្រូវបានចំណាយទៅលើរាជវង្ស។ បើទោះជាកិត្តិនាមដ៏ល្បីល្បាញរបស់មហាក្សត្រី និងរាជវង្សានុវង្សអង់គ្លេស ទាក់ទាញបានភ្ញៀវទេសចរណ៍យ៉ាងច្រើនក៏ដោយ ប៉ុន្តែ សមាជិករាជវង្សក៏ត្រូវការខ្ទង់ប្រាក់ជំនួយសម្រាប់ជីវភាពលំដាប់ថ្លៃថ្នូរផងដែរ។

កិច្ចសម្ភាសខាងលើ មានអ្នកតាមដានរាប់សិបលាននាក់

យោងតាមច្បាប់ រាជវង្សអង់គ្លេស មានសិទ្ធិកាន់កាប់ទ្រព្យសម្បត្តិរបស់រាជវាំង ឬហៅថា «Crown Estate» រួមមានដីធ្លី រាជវាំង ឬកសិដ្ឋាន។ វិមាន Buckingham, Windsor ជាដើម សុទ្ធតែជាកម្មសិទ្ធិរបស់រាជវាំង និងទាក់ទាញភ្ញៀវទេសចរណ៍មកទស្សនាយ៉ាងច្រើនជារៀងរាល់ឆ្នាំ។ ក្រៅពីនេះ ថវិកាជាតិក៏ត្រូវបានទុកមួយខ្ទង់សម្រាប់ជាជំនួយដល់រាជវង្ស ដែលនេះត្រូវបានគេហៅថា «Sovereign Grant»។

ខ្ទង់ថវិកាខាងលើ ត្រូវបានគេចែងយ៉ាងច្បាស់ថា ដើម្បីជួយដល់មហាក្សត្រី រួមនឹងសមាជិករាជវង្ស សម្រាប់បំពេញកិច្ចការដែលជាភារកិច្ចរបស់មេដឹកនាំកិត្តិយស មានដូចជា ការទទួលជួបមេដឹកនាំបរទេស ដំណើរទស្សនកិច្ចក្រៅប្រទេស សកម្មភាពមនុស្សធម៌។ល។

ផ្ទុយមកវិញ ប្រភពចំណូលនៃវិមាននានារបស់រាជវាំងអង់គ្លេស នឹងត្រូវប្រគល់មកឱ្យរដ្ឋ ដែលនេះប្រៀបបានដូចជាការ «ដោះដូរ» គ្នា។

កិច្ចសម្ភាសរបស់អតីតព្រះនាង Meghan Markle និងអតីតព្រះអង្គម្ចាស់ Harry ជាមួយនឹងទូរទស្សន៍ CBS កាលពីពេលថ្មីៗនេះ

របាយការណ៍ថ្មីបំផុតរបស់រដ្ឋាភិបាលបង្ហាញថា ប្រាក់ចំណូលដែលរាជវាំងរកបានក្នុងឆ្នាំសារពើពន្ធ 2018-2019 ឡើងដល់ 343.5 លានផោន (476.5 លានដុល្លារអាមេរិក)។ ចំណែកខ្ទង់ជំនួយរបស់រដ្ឋាភិបាលសម្រាប់រាជវាំងក្នុងឆ្នាំ 2020-2021 មានត្រឹមតែ 85.9 លានផោនប៉ុណ្ណោះ ពោលគឺស្មើនឹង 25% បើធៀបនឹងចំណូលដែលរាជវាំង។

ដូច្នេះ ជាមួយនឹងប្រជាជន 66.8 លាននាក់ ជាមធ្យម ពលរដ្ឋអង់គ្លេសម្នាក់នឹងត្រូវបង់ 1.28 ផោន (ប្រហែលជិត 2 ដុល្លារអាមេរិក) ដើម្បីចិញ្ចឹមរាជវង្សានុវង្សអង់គ្លេស៕

ប្រភព៖ NYT, ABC News
ប្រែសម្រួល៖ បុត្រា

March 10, 2021

ប្រធានាធិបតីអ៊ីតាលី តម្រង់ជួររង់ចាំវេនចាក់វ៉ាក់សាំង Covid-19 ដូចគេ ដូចឯង

ប្រធានាធិបតីអ៊ីតាលី លោក Sergio Mattarella មិនត្រូវបានប្រព្រឹត្តជាពិសេសពីសំណាក់ក្រុមវេជ្ជបណ្ឌិតនោះទេ នៅពេលលោកទៅទទួលការចាក់វ៉ាក់សាំងបង្ការវីរុស Covid-19 នៅឯមន្ទីរពេទ្យមួយនាទីក្រុង Rome។

រូបថតដែលត្រូវបានការិយាល័យប្រធានាធិបតីចុះផ្សាយនៅថ្ងៃទី 9 មីនា បង្ហាញថា មេដឹកនាំវ័យ 79 ឆ្នាំរូបនេះ អង្គុយនៅលើកៅអីដូចទៅនឹងមនុស្សវ័យចំណាស់ដទៃទៀត នៅក្នុងសាលធំមួយនៃមន្ទីរពេទ្យ Spallanzani ក្នុងពេលដែលក្រុមគ្រូពេទ្យកំពុងធ្វើការ។ គ្រប់គ្នាសុទ្ធតែរក្សាគម្លាតសុវត្ថិភាពទៅតាមការកំណត់។

ប្រធានាធិបតី Sergio Mattarella រង់ចាំរហូតដល់ក្រុមវ័យរបស់លោកត្រូវបានហៅឈ្មោះ និងចាក់វ៉ាក់សាំង Moderna។ ការិយាល័យប្រធានាធិបតីឱ្យដឹងថា ប្រធានាធិបតីអ៊ីតាលីត្រូវបានចាក់វ៉ាក់សាំងទៅតាម «យុទ្ធនាការចាក់ថ្នាំបង្ការសម្រាប់មនុស្សដែលកើតក្នុងឆ្នាំ 1941»។

ប្រទេសអ៊ីតាលី ចាប់ផ្ដើមចាក់វ៉ាក់សាំងបង្ការវីរុស Covid-19 តាំងពីចុងខែធ្នូ 2020 ប៉ុន្តែ ដូចទៅនឹងប្រទេសផ្សេងៗ យុទ្ធនាការនេះត្រូវបានពន្យារពេលដោយសារខ្វះប្រភពផ្គត់ផ្គង់។ នាយករដ្ឋមន្ត្រីថ្មី Mario Draghi បានសន្យារថានឹងជំរុញល្បឿននៃយុទ្ធនាការចាក់វ៉ាក់សាំង ដោយសារអត្រាឆ្លងកើនឡើងលឿនព្រោះតែវីរុសក្លាយពូជថ្មី។

គិតមកដល់បច្ចុប្បន្ន អ៊ីតាលីបានចាក់វ៉ាក់សាំងអស់ចំនួន 5.6 លានដូស ក៏ប៉ុន្តែ មានតែ 1.7 លាននាក់ប៉ុណ្ណោះដែលបានចាក់រួចរាល់ នៅក្នុងចំណោមប្រជាជនសរុបជាង 60 លាននាក់។

មកដល់បច្ចុប្បន្ន ប្រទេសនេះបានរកឃើញអ្នកវិជ្ជមាននឹង Covid-19 សរុបចំនួន 3,101,093 នាក់ ក្នុងនោះមានអ្នកស្លាប់សរុប 100,479 នាក់ និងជាសះស្បើយចំនួន 2,521,731 នាក់ ខណៈអ្នកកំពុងព្យាបាលមានចំនួន 478,883 នាក់៕

ប្រភព៖ AFP
ប្រែសម្រួល៖ បុត្រា

March 10, 2021

Author: សឿន សំណាង