ថ្វីបើពេលនេះ ក្នុងម្នាក់ៗមានទ្រព្យចំនួន 11 ពាន់លានដុល្លារអាមេរិកក៏ដោយ ប៉ុន្តែ ពីរនាក់បងប្អូនខាងក្រោមនេះ មិនមែនជាប្រភេទមហាសេដ្ឋីដែលចូលចិត្តបង្អួតភាពហ៊ឺហា ហ៊ឺកហ៊ាក់នោះឡើយ។
កាលពីចុងសប្ដាហ៍មុន ក្រុមហ៊ុនទូទាត់ប្រាក់ Stripe ដែលត្រូវបានបង្កើតឡើងដោយបងប្អូនប្រុសពីរនាក់គឺ Patrick និង John Collison ទើបតែប្រមូលទុនវិនិយោគបានចំនួន 600 លានដុល្លារអាមេរិក នាំឱ្យតម្លៃមូលធនទីផ្សាររបស់ក្រុមហ៊ុននេះកើនឡើងដល់ 95 ពាន់លានដុល្លារអាមេរិក។
ថ្វីបើនាពេលបច្ចុប្បន្ន ក្នុងម្នាក់ៗមានទ្រព្យសម្បត្តិចំនួន 11 ពាន់លានដុល្លារ ប៉ុន្តែពួកគេជួលផ្ទះដែលមានបន្ទប់គេងចំនួនពីរ ស្នាក់នៅរួមគ្នា នាទីក្រុង San Francisco អស់ជាច្រើនឆ្នាំមកហើយ សូម្បីតែនៅពេលតម្លៃរបស់ក្រុមហ៊ុនបានកើនឡើងកប់ពពក។ ពួកគេនៅតែជិះកង់ទៅធ្វើការរៀងរាល់ថ្ងៃ ជំនួសឱ្យការជិះរថយន្តផ្ទាល់ខ្លួន នេះបើតាមអ្នកដែលបានស្គាល់ពួកគេ។
Michael Moritz ដែលជាបុគ្គលិកមួយរូបធ្វើការឱ្យអ្នកវិនិយោគម្នាក់នាដំណាក់កាលដំបូងរបស់ Stripe បានឱ្យដឹងថា៖ «រឿងរ៉ាវជោគជ័យរបស់ពួកគេ ពិតជានឹកស្មានមិនដល់។ ខាងក្រោមនេះគឺជាប្រវត្តិនៃការបង្កើតមុខជំនួញរបស់ Patrick និង John៖
Patrick និង John ធំឡើងនៅក្នុងភូមិតូចមួយនៅប្រទេសអៀឡង់ និងជាកូនប្រុសរបស់គ្រួសារមួយដែលមានឪពុកជាម្ចាស់ផ្ទះជួល និងម្ដាយជាអ្នកគ្រប់គ្រងក្រុមហ៊ុនតូចមួយ។
អ្នកទាំងពីរចូលចិត្តអានសៀវភៅខ្លាំងណាស់។ Patrick (កូនច្បង) បានឱ្យដឹងថា ពួកគេបានអានសៀវភៅស្ដីអំពីការសរសេរកូដកុំព្យូទ័រ និងអ៊ីនធើណិត នៅក្នុងបណ្ណាល័យ ពេលកំពុងនៅជាសិស្ស មុនពេលពួកគេមានឱកាសប្រើអ៊ីនធើណិត។ ក្រោយមក Patrick និង John ក៏បានបង្កើតគេហទំព័រផ្ទាល់ខ្លួន និងនាំគ្នា «hack» ចូលគេហទំព័ររបស់គ្នាទៅវិញ-ទៅមក ដើម្បីបង្កើនចំណេះ។
ពេលចូលរៀននៅមហាវិទ្យាល័យ Patrick និង John រួមដៃគ្នាបង្កើតកម្មវិធីកុំព្យូទ័រមួយដែលជួយឱ្យអ្នកលក់អនឡាញនៅលើ eBay អាចលក់ដេញថ្លៃផលិតផល។ ឆ្នាំ 2008 ពួកគេបានលក់ក្រុមហ៊ុននេះក្នុងតម្លៃ 5 លានដុល្លារអាមេរិក។ បន្ទាប់មក សេដ្ឋីវ័យក្មេងទាំងពីរនាក់នេះបានសម្រេចចិត្តបោះបង់មហាវិទ្យាល័យដើម្បីតាមចាប់គម្រោងថ្មី។
នៅពេលដឹងថា ការទូទាត់ប្រាក់តាមអនឡាញនៅតាមបណ្ដាក្រុមហ៊ុន នៅមានចម្លោះប្រហោងច្រើន ពួកគេក៏បានបង្កើតកូដមួយដែលមាន 7 បន្ទាត់ សម្រាប់ដាក់ចូលក្នុងគេហទំព័រ និងកម្មវិធីនានាដើម្បីភ្ជាប់ជាមួយនឹងប័ណ្ណឥណទាន ប្រព័ន្ធធនាគារ ក្នុងគោលដៅទូទាត់ប្រាក់តាមអនឡាញ។ នោះគឺជាជំហានដំបូងរបស់ Stripe ដែលជាដំណោះស្រាយក្នុងការទូទាត់ប្រាក់ដែលកំពុងបច្ចុប្បន្នត្រូវបានប្រើប្រាស់នៅក្នុងបណ្ដាក្រុមហ៊ុនធំៗ ដូចជា Facebook, Twitter, Alibaba, Apple និង Lyft ជាដើម។ល។
ពួកគេបានសម្រេចចិត្តប្រែក្លាយក្ដីស្រមៃឱ្យទៅជាការពិត បើទោះជាមិនទាន់គ្រប់អាយុផឹកស្រាដោយស្របច្បាប់ក៏ដោយ ដោយពួកគេបានទៅជួប Y Combinator ដែលជាថ្នាលបណ្ដុះ «គ្រាប់ពូជ» ក្រុមហ៊ុនថ្មីនៅសហរដ្ឋអាមេរិក។ ហើយពួកគេក៏ទទួលបានខ្ទង់វិនិយោគពីក្រុមអ្នកបណ្ដាក់ទុនល្បីៗ ដូចជា Peter Thiel, Andreessen Horowitz និង Sequoia ជាដើម។
Patrick គឺជាមនុស្សស្ងាត់ស្ងៀម មានគំនិតច្រើន និងពូកែខាងកម្មវិធីកុំព្យូទ័រ។ ចំណែក John វិញគឺជាបុរសដែលមានសមត្ថភាពខ្ពស់ក្នុងការលក់ដូរ និងសមស្របជាមួយនឹងតំណែង CEO។
នៅក្នុងក្រុមហ៊ុន Stripe ពុំដែលមានមុខតំណែងនោះទេសម្រាប់បុគ្គលិកធម្មតា។ ពួកគេតែងធ្វើការជាក្រុមដើម្បីលើកឡើងអំពីការយល់ឃើញផ្ទាល់ខ្លួន ឬផ្ដល់មតិដោយស្មើភាពគ្នាបំផុត។
ក្រៅពីនេះ តម្លាភាពក៏ជាចំណុចសំខាន់មួយដែលត្រូវបានអនុវត្តនៅក្នុងក្រុមហ៊ុន Stripe។ រាល់អ៊ីមេលចេញ-ចូល សុទ្ធតែត្រូវបានធ្វើឡើងដោយបើកចំហ និងអាចស្វែងរកបាន។ គោលបំណងនៃប្រការនេះគឺដើម្បីជួយឱ្យបុគ្គលិកមានភាពងាយស្រួលក្នុងស្វែងរកចម្លើយសម្រាប់អ្វីដែលពួកគេមានចម្ងល់ ហើយវាបានជួយឱ្យការបំពេញកិច្ចការមានប្រសិទ្ធភាពខ្ពស់។
ចែករំលែកជាមួយ Financial Times លោក Patrick និយាយថា៖ «ពួកយើងជាក្រុមមនុស្សដែលធ្វើការដំបូងគេនៅ Stripe ក៏ប៉ុន្តែមិនមែនជាមនុស្សសំខាន់ជាងគេបង្អស់នោះឡើយ។ យើងគ្រាន់តែជាផ្នែកមួយនៃក្រុមហ៊ុនតែប៉ុណ្ណោះ»។
យោងតាមសារព័ត៌មាន Bloomberg បងប្អូនត្រកូល Collison នេះ បច្ចុប្បន្នស្ថិតនៅក្នុងចំណោមមហាសេដ្ឋីចំនួន 200 នាក់ ដែលមានទ្រព្យច្រើនជាងគេបង្អស់ក្នុងពិភពលោក៕
ប្រភព៖ Business Insider
ប្រែសម្រួល៖ បុត្រា
ប្រភព៖ ក្រសួងសុខាភិបាល
ប្រភព៖ AKP
ប្រភព៖ ក្រសួងសុខាភិបាល