សឿន សំណាង - La Reine Media

ពលរដ្ឋដើមកំណើតអាស៊ីម្នាក់ទៀត ត្រូវគេធ្វើបាបនៅទីក្រុង New York

បុរសដើមកំណើតអាស៊ីម្នាក់ ត្រូវជនដៃដល់ដាល់ចំកណ្ដាលមុខ នៅលើដងផ្លូវក្នុងទីក្រុង New York ក្នុងគ្រាដែលស្ថានការណ៍នៃអំពើរើសអើងពូជសាសន៍ចំពោះជនជាតិអាស៊ី ចេះតែកើនឡើងមិនឈប់ឈរនៅសហរដ្ឋអាមេរិក។

ប៉ូលិសបានឱ្យដឹងថា ករណីវាយប្រហារនេះកើតឡើងនៅរសៀលថ្ងៃទី 4មេសា នៅពេលជនរងគ្រោះកំពុងដើរក្នុងទីប្រជុំជន។ ជនដៃដល់បានបង្ហាញខ្លួននៅខាងក្រោយខ្នង រួចបានប្រើកណ្ដាប់ដៃ ដាល់ទៅលើមុខរបស់បុរសរងគ្រោះ និងមិនបាននិយាយអ្វីទាំងអស់មុនពេលចាកចេញ។

ជនដៃដល់មានអាយុប្រហែល 40ឆ្នាំ និងមានកម្ពស់ប្រហែល 1.8ម៉ែត្រ។ ជនរងគ្រោះត្រូវងងឹតមុខបន្ទាប់ពីត្រូវគេដាល់មួយដៃ ប៉ុន្តែបានបដិសេធការព្យាបាលនៅនឹងកន្លែងកើតហេតុ។

បច្ចុប្បន្ន ប៉ូលិសមិនទាន់រកឃើញជនសង្ស័យនៅឡើយ។ ក្រុមប៉ូលិសបង្ក្រាបអំពើរើសអើងជាតិសាសន៍នៃទីក្រុង New York កំពុងស្រាវជ្រាវលើករណីវាយប្រហារនេះ ដើម្បីបញ្ជាក់ថា តើវាទាក់ទិននឹងបញ្ហារើសអើងពូជសាសន៍ដែរ ឬយ៉ាងណា។

នេះគឺជាករណីវាយប្រហារថ្មីបំផុតនៅក្នុងចំណោមការវាយប្រហារដោយគ្មានមូលហេតុ មកលើពលរដ្ឋដើមកំណើតអាស៊ីនៅទីក្រុង New York។ ពលរដ្ឋនៅទីក្រុង New York ជាច្រើនរូបផ្សេងទៀត បានក្លាយជាជនរងគ្រោះនៅក្នុងអំពើទាក់ទិននឹងបញ្ហារើសអើងពូជសាសន៍នេះដែរ។

ថ្មីៗនេះ នៅសហរដ្ឋអាមេរិក គេឃើញអំពើវាយប្រហារដោយសារការប្រកាន់ពូជសាសន៍ កើនឡើងយ៉ាងច្រើនមិនគួរឱ្យជឿ។ មជ្ឈមណ្ឌលស្រាវជ្រាវអំពីលទ្ធិស្អប់ខ្ពើប និងជ្រុលនិយម ប្រចាំសាកលវិទ្យាល័យរដ្ឋ California បានប្រកាសទិន្នន័យឱ្យដឹងថា អំពើឧក្រិដ្ឋប្រឆាំងនឹងពលរដ្ឋដើមកំណើតអាស៊ីនៅសហរដ្ឋអាមេរិកបានកើន 150% ក្នុងឆ្នាំ2020៕

ប្រភព៖ NY Post
ប្រែសម្រួល៖ បុត្រា

April 6, 2021

ជប៉ុនពិភាក្សាអំពីបញ្ហាស្នងរាជរបស់ក្សត្រី ដើម្បីធានាស្ថិរភាពរាជបល្ល័ង្កនៃប្រទេសនេះ

ប្រទេសជប៉ុនបានបើកកិច្ចប្រជុំពិភាក្សាជាផ្លូវការដើម្បីស្វែងរកវិធីសាស្ត្រនានាក្នុងបំណងធានាលើបញ្ហាស្នងរាជបល្ល័ង្ក ក្នុងនោះក៏មានទាំងការអនុញ្ញាតឱ្យក្សត្រីមានសិទ្ធិឡើងគ្រងរាជផងដែរ ក្នុងគ្រាដែលប្រទេសនេះមានបេក្ខភាពស្នងរាជតិចទៅ។

យោងតាមសារព័ត៌មាន Kyodo News ដើម្បីធានានូវអនាគតនៃរបបរាជានិយមយូរអង្វែងជាងគេក្នុងពិភពលោក ក្រុមប្រឹក្សារាជបល្ល័ង្កមួយដែលមានសមាជិក 6រួប បានបើកកិច្ចពិភាក្សាដំបូងកាលពីថ្ងៃទី 23មីនា ក្រោមការដឹកនាំរបស់ Atsushi Seike អតីតនាយកសាកលវិទ្យាល័យ Keio។ ក្រុមប្រឹក្សានេះបានសន្យាថា នឹងបើកកិច្ចពិភាក្សាយ៉ាងប្រុងប្រយ័ត្ន និងមិនប្រញាប់ប្រញាល់ ជាបន្តបន្ទាប់នាពេលខាងមុខ។

ឆ្លើយតបនឹងក្រុមអ្នកយកព័ត៌មាន បន្ទាប់ពីកិច្ចប្រជុំដំបូង លោក Seike ឱ្យដឹងថា៖ «មានការយល់ឃើញខុសៗគ្នាជាច្រើន ហើយយ៉ាងហោចណាស់ យើងក៏អាចពិនិត្យមើលភាពវិជ្ជមាន និងអវិជ្ជមាននៃវិធីសាស្ត្រនីមួយ»។

ប៉ុន្តែ ជាក់ស្ដែងគឺមិនមានពេលច្រើនទៀតនោះទេសម្រាប់រាជរង្ស នៅពេលដែលបច្ចុប្បន្ននេះ បេក្ខភាពស្នងរាជផ្លូវការជាក្សត្រាមានតែ3អង្គប៉ុណ្ណោះ រីឯក្សត្រីទាំងឡាយបានរៀបការជាមួយពលរដ្ឋសាមញ្ញ ត្រូវបោះបង់ឋានៈជាសមាជិករាជរង្ស ទៅតាមគោលការណ៍ច្បាប់។

មហាក្សត្រ Naruhito, ព្រះមហេសី Masako និងព្រះរាជបុត្រី Aiko យាងចូលរួមព្រឹត្តិការណ៍ Tokyo’s Chiyoda Ward កាលពីឆ្នាំ2016

អតីតមន្ត្រីជាន់ខ្ពស់មួយរូបបានព្រមានថា ការស្នងរាជរបស់រាជវង្សដែលមានអាយុកាលជាង 2,600ឆ្នាំមកនេះនៅប្រទេសជប៉ុន អាចត្រូវបញ្ចប់នាពេលអនាគតដ៏ខ្លីខាងមុខ បើសិនជារដ្ឋាភិបាលមិនមានអន្តរាគមន៍ទាន់ពេល។

បច្ចុប្បន្ន មានបេក្ខភាពស្នងរាជស្របច្បាប់បន្ទាប់ពីមហាក្សត្រ Naruhito (ព្រះជន្ម 61វស្សា) មានចំនួនតែ 3អង្គគត់ រួមមាន អនុជ (ប្អូនប្រុស) Fumihito (55 វស្សា), រាជនត្តា (ចៅ) Hisahito (ព្រះជន្ម 14វស្សា) និងបិតុលា (មា) Hitachi (ព្រះជន្ម 85វស្សា)។ ព្រះរាជបុត្រតែមួយអង្គគត់របស់មហាក្សត្រ Naruhito និងមហេសី Masako គឺព្រះនាង Aiko ព្រះជន្ម 19វស្សា។

គោលការណ៍បេក្ខភាពស្នងរាជត្រូវតែជាក្សត្រា ត្រូវបានលើកយកមកពិភាក្សាកាលពីមុននេះរួចមកហើយ ពិសេសគឺនៅពេលទទួលបានការយកចិត្តទុកដាក់ខ្ពស់ពីរាជរដ្ឋាភិបាលរបស់នាយករដ្ឋមន្ត្រី Junichiro Koizumi កាលពីឆ្នាំ2005 នៅពេលដែលក្រុមប្រឹក្សានៃអ្នកជំនាញមួយបានស្នើឱ្យមានការអនុញ្ញាតឱ្យក្សត្រីមានសិទ្ធិស្នងរាជ។ ក៏ប៉ុន្តែ ការពិភាក្សាត្រូវបានពន្យារពេល បន្ទាប់ពីព្រះអង្គម្ចាស់ Hisahito បានប្រសូត្រកាលពីខែកញ្ញា2006 ក្នុងនាមជាសមាជិក (សមាជិកភេទប្រុស) ដំបូងរបស់រាជរង្ស ក្នុងអំឡុង41ឆ្នាំមកនេះ។

កាលពីខែតុលា2012 រដ្ឋាភិបាលរបស់នាយករដ្ឋមន្ត្រី Yoshihiko Noda បានស្នើឱ្យមានការអនុញ្ញាតឱ្យសមាជិកាក្នុងរាជវង្ស មានសិទ្ធិបង្កើតសាខារាជវង្សដោយឡែក សូម្បីតែនៅពេលបានរៀបអាពាហ៍ពិពាហ៍ជាមួយពលរដ្ឋសាមញ្ញ។ ប៉ុន្តែ ប្រធានបទនេះក៏ត្រូវបំភ្លេចចោល នៅពេលលោក Shinzo Abe ឡើងកាន់តំណែងជានាយករដ្ឋមន្ត្រី។

ព្រះនាង Aiko (ស្ដាំបង្អស់) ជារាជបុត្រតែមួយអង្គគត់របស់មហាក្សត្រ Naruhito និងមហេសី Masako

ប្រភពព័ត៌មានដែលស្និទ្ធនឹងមន្ត្រីរដ្ឋាភិបាល បានឱ្យដឹងថា នាយករដ្ឋមន្ត្រីបច្ចុប្បន្នរបស់ជប៉ុន គឺលោក Yoshihide Suga ក៏មិនសូវយកចិត្តទុកដាក់អំពីបញ្ហាខាងលើ និងមានការប្រុងប្រយ័ត្ននៅចំពោះការប្ដូរផ្លាស់ដែលអាចកើតមាន។

មានការលើកថា ក្រុមប្រឹក្សារាជបល្ល័ង្កថ្មីនឹងមិនសម្រេចចិត្តអ្វីមួយនៅមុនការបោះឆ្នោតសភាជាន់ទាបនារដូវស្លឹកឈើជ្រុះក្នុងឆ្នាំនេះ។ ប៉ុន្តែ បើទោះជាចង់ ឬមិនចង់ រដ្ឋាភិបាលរបស់នាយករដ្ឋមន្ត្រី Suga ក៏ត្រូវធ្វើការសម្រេចចិត្តចាំបាច់មួយដើម្បីរក្សាស្ថិរភាពនៃរាជបល្ល័ង្ករបស់ប្រទេសនេះ។

យោងតាមលទ្ធផលនៃការស្ទង់មតិរបស់ Kyodo News ដែលត្រូវបានធ្វើឡើងកាលពីរដូវផ្ការីកឆ្នាំមុន ពលរដ្ឋជប៉ុនចំនួន 85% គាំទ្រឱ្យក្សត្រីមានសិទ្ធិឡើងគ្រងរាជ និង 79% គាំទ្របេក្ខភាពស្នងរាជអាចប្រើប្រាស់ត្រកូលខាងម្ដាយ៕

ប្រភព៖ Kyodo News
ប្រែសម្រួល៖ បុត្រា

April 6, 2021

រឿងប្រកាន់ពូជសាសន៍ទៀតហើយ? ហាងទំនិញរបស់ពលរដ្ឋដើមកំណើតអាស៊ីនៅអាមេរិក ត្រូវគេវាយបំផ្លាញ

បុរសម្នាក់កាន់បំពង់ទីបដែក សម្រុកចូលហាងទំនើបរបស់ជនជាតិអាមេរិកាំងដើមកំណើតកូរ៉េខាងត្បូងមួយកន្លែងនៅក្នុងរដ្ឋ Carolina ខាងជើង ទាំងកម្រោល និងបានវាយបំផ្លាញបណ្ដើរ ជេរបណ្ដើរ។

ការវាយប្រហារនេះបានកើតឡើងកាលពីថ្ងៃទី30 ខែមីនា នៅឯហាងទំនើប Plaza Sundries ក្នុងទីក្រុង Charlotte។ ជនដៃដល់បានទាញធ្នើរទំនិញឱ្យរលំ មុននឹងវាយបំផ្លាញទូទឹកកកដោយបំពង់ទីបដែក។ ភាគីខាងម្ចាស់ហាង Plaza Sundries សង្ស័យថា អតិថិជនម្នាក់ដែលត្រូវបានហាមចូលហាងនេះ ជួលជនដៃដល់ឱ្យមកវាយបំផ្លាញ។

Mark Sung ដែលជាសមាជិកម្នាក់របស់គ្រួសារម្ចាស់ហាង បាននិយាយថា «ជននេះវាយបំផ្លាញបណ្ដើរ ជេរប្រមាថកាតទានដោយពាក្យអសុរោះទាក់ទងនឹងបញ្ហាពូជសាសន៍ ព្រមទាំងបានគំរាមកំហែងពួកយើងទៀតផង។ ក្រោយមក អតិថិជនម្នាក់ដែលយើងបានហាមមិនឱ្យចូលហាង ក៏បានបង្ហាញខ្លួន និងបានស្រែកលើកទឹកចិត្តដល់ជនដៃដល់ថា ‘នេះជាអ្វីដែលពួកឯងត្រូវទទួល។ ត្រលប់ទៅប្រទេសពួកឯងវិញទៅ’»។

ការវាយបំផ្លាញនេះ បានបង្កការខាតបង់ជាង 9,000ដុល្លារ។ ជនសង្ស័យឈ្មោះ Xavier Rashee Woody-Silas អាយុ24ឆ្នាំ បច្ចុប្បន្នត្រូវប្រឈមនឹងការចោទប្រកាន់ជាច្រើន រួមមាន ប្លន់ទ្រព្យសម្បត្តិដោយអាវុធ គំរាមកំហែង និងបង្កអស្ថិរភាពសាធារណៈ។

Mark Sung ឱ្យដឹងថា គ្រួសាររបស់លោក ធ្លាប់ក្លាយជាគោលដៅនៃការបៀតបៀនជាច្រើនលើកមកហើយ ដោយសារតែជាជនជាតិអាមេរិក ដើមកំណើតអាស៊ី។ ការវាយប្រហារនេះក៏ធ្វើឱ្យក្រុមគ្រួសាររបស់ Mark Sung មានការភ័យខ្លាចផងដែរ។

Mark Sung បន្តថា៖ «ពួកយើងងាយរងគ្រោះខ្លាំងណាស់ ព្រោះតែយើងជាជនជាតិភាគតិច។ ខ្ញុំតែងតែត្រូវប្រឈមនឹងអំពើប្រកាន់ពូជសាសន៍ដែលចេះតែកើនឡើងពីមួយថ្ងៃទៅមួយថ្ងៃ ដូច្នេះហើយ វាមិនមែនជារឿងថ្មីនោះទេ»។

ជនសង្ស័យឈ្មោះ Xavier Rashee Woody-Silas អាយុ24ឆ្នាំ

ទឹកប្រាក់ចំនួនជាង 30,000ដុល្លារ ត្រូវបានបរិច្ចាគតាមរយៈគេហទំព័រ GoFundMe ដើម្បីជួយដល់គ្រួសាររបស់ Mark Sung។ មនុស្សមួយចំនួនក៏បានសំដែងការគាំទ្រផ្ទាល់ ក្នុងនោះមានដូចជា ស្ត្រីម្នាក់បាននាំយកកាំភ្លើងមកឱ្យគ្រួសាររងគ្រោះដើម្បីទុកការពារខ្លួន អ្នកដឹកជញ្ជូនទំនិញបានជូននំភីហ្សា5ឈុតដល់គ្រួសារនេះ និងវេជ្ជបណ្ឌិតម្នាក់បាននាំយកប្រាក់មួយចំនួនមកជួយចេញថ្លៃជួសជុលហាង។ល។

ថ្មីៗនេះ នៅសហរដ្ឋអាមេរិក គេឃើញអំពើវាយប្រហារដោយសារការប្រកាន់ពូជសាសន៍ កើនឡើងយ៉ាងច្រើនមិនគួរឱ្យជឿ។ មជ្ឈមណ្ឌលស្រាវជ្រាវអំពីលទ្ធិស្អប់ខ្ពើប និងជ្រុលនិយម ប្រចាំសាកលវិទ្យាល័យរដ្ឋ California បានប្រកាសទិន្នន័យឱ្យដឹងថា អំពើឧក្រិដ្ឋប្រឆាំងនឹងពលរដ្ឋដើមកំណើតអាស៊ីនៅសហរដ្ឋអាមេរិកបានកើន 150% ក្នុងឆ្នាំ2020៕

ប្រភព៖ NY Post
ប្រែសម្រួល៖ បុត្រា

April 5, 2021

នារីជាប្រធានក្រុមនាវិកដំបូងរបស់អេហ្ស៊ីប ត្រូវគេសង្ស័យថា «ជាអ្នកធ្វើឱ្យកប៉ាល់ Ever Given ត្រូវជាប់គាំងលើព្រែក Suez»

នាង Marwa Elselehdar ដែលជានាវិកនាយិកាដំបូងបង្អស់របស់ប្រទេសអេហ្ស៊ីប មានការភ្ញាក់ផ្អើលជាខ្លាំងនៅពេលមានព័ត៌មានចចាមអារ៉ាមថា នាងបានបង្កឱ្យមានករណីកប៉ាល់ Ever Given ជាប់គាំង ធ្វើឱ្យស្ទះផ្លូវទឹករបស់ព្រែកជីក Suez កាលពីពេលថ្មីៗនេះ។

Marwa Elselehdar បានឱ្យដឹងថា មានមតិ និងខ្លឹមសារអត្ថបទសារព័ត៌មានមួយចំនួនដែលត្រូវគេកែប្រែ ត្រូវបានបង្ហោះលើបណ្ដាញសង្គមនៅអេហ្ស៊ីបចាប់ពីថ្ងៃទី23 ខែមីនា ដោយយល់ថា នាងជាប់ទាក់ទិននឹងករណីកប៉ាល់ដឹកកុងតឺន័រ Ever Given ដែលបានជាប់គាំងទទឹងព្រែកជីក Suez។ ប៉ុន្តែ Marwa Elselehdar មិនបានឱ្យដឹងច្បាស់អំពីខ្លឹមសារនៃពាក្យចចាមអារ៉ាមទាំងនោះទេ។

«ខ្ញុំពិតជាភ្ញាក់ផ្អើលណាស់។ ខ្ញុំគិតថា ខ្ញុំត្រូវគេវាយប្រហារ ដោយសារតែជាស្ត្រីដែលទទួលបានជោគជ័យក្នុងវិស័យនេះ ឬថា ខ្ញុំគឺជាជនជាតិអេហ្ស៊ីប» នាង Marwa Elselehdar និយាយដូច្នេះ និងបានបន្ថែមថា នាងកំពុងធ្វើការនៅលើកប៉ាល់ Aida IV Alexandria ក្នុងពេលកប៉ាល់ Ever Given ជួបបញ្ហា។

Marwa Elselehdar អាយុ29ឆ្នាំ គឺជាស្ត្រីដំបូងគេដែលកាន់តំណែងជាប្រធានក្រុមនាវិករបស់ប្រទេសអេហ្ស៊ីប។ នាងធ្លាប់ទទួលរងការរិះគន់ប្រកបដោយការរើសអើងភេទកាលពីនៅសិក្សានៅឯវិទ្យាស្ថានវិទ្យាសាស្ត្រ បច្ចេកវិទ្យា និងដឹកជញ្ជូនជើងទឹកនៅ Alexandria។ នាង Marwa Elselehdar មិនត្រូវបានគេអនុញ្ញាតឱ្យចូលសិក្សានៅសាកលវិទ្យាល័យនេះ រហូតដល់មានការយល់ព្រមពីប្រធានាធិបតីអេហ្ស៊ីប ដែលពេលនោះគឺលោក Hosni Mubarak។

«សង្គមអេហ្ស៊ីប នៅតែមិនទាន់ទទួលយកគំនិតដែលថា ស្ត្រីអាចធ្វើការនៅលើសមុទ្រ និងឆ្ងាយពីផ្ទះសម្បែងក្នុងរយៈពេលយូរ។ ប៉ុន្តែ អ្នកមិនចាំបាច់សុំច្បាប់គ្រប់គ្នានោះឡើយ នៅពេលចង់ធ្វើអ្វីដែលខ្លួនចូលចិត្ត» Marwa Elselehdar ថ្លែងបញ្ជាក់។

នាង Marwa Elselehdar កំពុងត្រូវបានកាសែតនានាចាប់អារម្មណ៍ (រូបថត៖ the Sun)

Ever Given ដែលជាកប៉ាល់ដឹកកុងតឺន័រធំជាងគេមួយក្នុងពិភពលោក ដោយមានទម្ងន់សរុបជាង 200,000 តោន បានជ្រុលទៅបុកច្រាំងរបស់ព្រែកជីក Suez និងជាប់គាំងទទឹងផ្លូវទឹកកាលពីព្រឹកថ្ងៃទី 24មីនា នៅពេលកំពុងធ្វើដំណើរពីសមុទ្រក្រហម ទៅកាន់មជ្ឈិមបូព៌ា ធ្វើឱ្យកប៉ាល់ទាំងអស់ដែលមកពីមុខ និងតាមពីក្រោយ ត្រូវកកស្ទះអស់រយៈពេល 6ថ្ងៃ។

ក្រុមមន្ត្រីអេហ្ស៊ីប ក្រោយមកក៏បានបញ្ជូនកប៉ាល់អូស រួមនឹងគ្រឿងចក្រជាច្រើនគ្រឿងទៅជួយសង្គ្រោះ។ កិច្ចខិតខំរបស់អាជ្ញាធរ ទទួលបានជោគជ័យកាលពីថ្ងៃទី29 ខែមីនា ស្របពេលដេលទឹកជោរបានឡើងដល់ចំណុចកំពូល។

ក្រុមអ្នកជំនាញបានគណនាឃើញថា ទំនិញដែលបានស្ទះនៅក្នុងករណីខាងលើនេះ មានតម្លៃរហូតដល់ 9.6ពាន់លានដុល្លារអាមេរិក ខណៈដែលក្រុមហ៊ុនធានារ៉ាប់រងអាល្លឺម៉ង់ Allianz បានប្រាប់ថា វិស័យពាណិជ្ជកម្មទូទាំងពិភពលោក ទំនងជាបានខាតបង់អស់ចាប់ពី 6-10ពាន់លានដុល្លារ។

ទីប្រឹក្សាម្នាក់របស់ប្រធានាធិបតីអេហ្ស៊ីប បានឱ្យដឹងថា ទីក្រុងគែរ អាចស្នើឱ្យម្ចាស់កប៉ាល់ Ever Given សងការខូចខាត និងតម្រូវឱ្យប្រធានក្រុមនាវិកទទួលខុសត្រូវចំពោះករណីជាប់កប៉ាល់នេះ។ ប្រធានស្ថាប័នគ្រប់គ្រងព្រែកជីក Suez (SCA) លោក Osama Rabia បានឱ្យដឹងថា ប្រាក់ចំណាយទៅលើការជួយសង្គ្រោះកប៉ាល់ Ever Given នេះ កើនដល់ 1ពាន់លានដុល្លារអាមេរិក៕

ប្រភព៖ BBC
ប្រែសម្រួល៖ បុត្រា

April 5, 2021

តើក្រុម «មហាសេដ្ឋីរថយន្តអគ្គិសនី» របស់ពិភពលោក ជាអ្នកណាខ្លះ និងមានទ្រព្យច្រើនកម្រិតណា?

ពីមួយថ្ងៃទៅមួយថ្ងៃ មានក្រុមហ៊ុនកាន់តែច្រើនឡើងៗ បានចូលរួមប្រកួតប្រជែងក្នុងវិស័យផលិតរថយន្តអគ្គិសនី។ ខាងក្រោមនេះគឺជាស្ថាបនិកក្រុមហ៊ុនរថយន្តអគ្គិសនីមួយចំនួនដែលត្រូវបានគេស្គាល់ច្រើនបំផុត ហើយតួលេខនៃទ្រព្យសម្បត្តិរបស់ពួកគេត្រូវបានយោងទៅតាមបញ្ជីចំណាត់ថ្នាក់ Real Time របស់ទស្សនាវដ្ដី Forbes។

ទីមួយ៖ មហាសេដ្ឋី Elon Musk នាយកប្រតិបត្តិរបស់ក្រុមហ៊ុន Tesla
ទ្រព្យ៖ 163.8ពាន់លានដុល្លារអាមេរិក

តម្លៃមូលបត្រ Tesla កើនឡើងយ៉ាងលឿន ជួយឱ្យទ្រព្យរបស់លោក Elon Musk ប្រែប្រួលយ៉ាងឆាប់រហ័សក្នុងរយៈពេលជាងមួយឆ្នាំមកនេះ។ យោងតាមស្ថិតិរបស់ Forbes លោក Musk កំពុងកាន់កាប់ទ្រព្យដែលមានតម្លៃសុប 163.8ពាន់លានដុល្លារ ខ្ពស់ជាងឆ្ងាយបើធៀបនឹង 26.6ពាន់លានដុល្លារដែលគាត់មានកាលពីដើមឆ្នាំ2020។ បច្ចុប្បន្ន មហាសេដ្ឋីដែលកើតឆ្នាំ1971 រូបនេះ គឺជាអ្នកមានជាងគេលំដាប់ទីពីរក្នុងពិភពលោក បន្ទាប់ពីមហាសេដ្ឋី Jeff Bezos។ លោក Musk ក៏ធ្លាប់ជាអ្នកមានជាងគេលំដាប់លេខមួយផងដែរ កាលពីពេលថ្មីៗនេះ។

ទន្ទឹមនឹង Tesla លោក Musk ក៏ជាសហស្ថាបនិករបស់ក្រុមហ៊ុនបច្ចេកវិទ្យាអវកាស SpaceX ទៀតផង។

ទីពីរ៖ មហាសេដ្ឋី Wang Chuanfu ស្ថាបនិករបស់ BYD
ទ្រព្យ៖ 14.5ពាន់លានដុល្លារអាមេរិក

លោក Wang Chuanfu គឺជាស្ថាបនិកនៃក្រុមហ៊ុនផលិតរថយន្តអគ្គីសនី និងថ្ម/អាគុយ BYD ជាក្រុមហ៊ុនដែលមានភាគហ៊ុនមួយចំនួនរបស់មហាសេដ្ឋីអាមេរិកាំង Warren Buffett។

ឆ្នាំ2009 លោក Wang Chuanfu ធ្លាប់ជាអ្នកមានជាងគេលំដាប់ទីមួយនៅប្រទេសចិន បើយោងតាមស្ថិតិរបស់ Hurun Report (ក្រុមហ៊ុននៅសៀងហៃដែលជំនាញខាងបោះពុម្ភផ្សាយសម្រាប់ក្រុមអ្នកមាន) ដោយកាលណោះលោកមានទ្រព្យ 5.1ពាន់លានដុល្លារ និងឈរលំដាប់លេខរៀងទី103 ក្នុងពិភពលោក។ បច្ចុប្បន្ន លោកមានទ្រព្យចំនួន 14.5ពាន់លានដុល្លារអាមេរិក។

ទីបី៖ លោក He Xiaopeng ស្ថាបនិករបស់ Xpeng Motors
ទ្រព្យ៖ 7.2ពាន់លានដុល្លារ

He Xiaopeng គឺជាស្ថាបនិក និងជាប្រធានរបស់ Xpeng Motors ជាក្រុមហ៊ុនមួយដែលត្រូវបានចាប់ផ្ដើមដំបូងជាមួយនឹងផលិតផលរថយន្តអគ្គិសនី។ មុន Xpeng លោក Xiaopeng ក៏ធ្លាប់បានបង្កើតកម្មវិធីរុករក (Browser) UCWEB ដែលក្រោយមកត្រូវបានលក់ទៅឱ្យក្រុមហ៊ុន Alibaba Group។

នៅពេល Elon Musk ដែលជា CEO របស់ Tesla បានសម្រេចចិត្តចែករំលែកប័ណ្ណកម្មសិទ្ធិបញ្ហារបស់ក្រុមហ៊ុនទៅឱ្យសាធារណជនពិនិត្យមើលកាលពីឆ្នាំ2014 លោក He Xiaopenh បាននិយាយថា លោកគឺជា «អ្នកគាំទ្រផ្កាប់មុខ» របស់ Tesla ហើយ Xpeng Motors ត្រូវបានបង្កើតឡើងទៅតាមចំណូលចិត្តនេះ។ ខែតុលា ឆ្នាំ2017 Xpeng បានឧទ្ទេសនាមម៉ូដែលរថយន្ត G3 ដំបូងដែលក្រុមហ៊ុន Xpeng Motors បានអភិវឌ្ឍ។

ទីបួន៖ មហាសេដ្ឋី William Li ស្ថាបនិករបស់ Nio
ទ្រព្យ៖ 6ពាន់លានដុល្លារ

តែងត្រូវបានគេចាត់ទុកថាជា «Elon Musk នៅប្រទេសចិន» លោក William Li គឺជាស្ថាបនិកនៃក្រុមហ៊ុនផលិតរថយន្តអគ្គិសនី Nio Inc ដែលជាគូប្រជែងរបស់ Tesla នៅលើទីផ្សារប្រទេសចិន។ ដោយការស្រលាញ់ចូលចិត្តរថយន្តខ្លាំងពេក ឆ្នាំ2014 លោក William Li សម្រេចចិត្តបង្កើតក្រុមហ៊ុន Nio ដោយទទួលបានទុនវិនិយោគពីបណ្ដាក្រុមហ៊ុនធំៗ ដូចជា Tencent, Baidu និង Lenovo។

ឆ្នាំ2016 នៅឯព្រឹត្រិការណ៍តាំងពិព័រណ៍ Saatchi (អង់គ្លេស) Nio បានឧទ្ទេសនាមរថយន្តកីឡាទ្វារពីរដំបូងដែលមានឈ្មោះថា EP9 និងលក់បាន 6គ្រឿងនៅទីនេះ ជាមួយនឹងតម្លៃ 3.2លានដុល្លារ/គ្រឿង។ ឆ្នាំ 2017 ក្រុមហ៊ុននេះក៏ទទួលបានការបញ្ជាទិញជាលើកដំបូង។

ក្រៅពី Nio លោក William Li ក៏ជាស្ថាបនិករបស់ Bitauto ជាក្រុមហ៊ុនផ្គត់ផ្គង់ខ្លឹមសារសម្រាប់ផ្សាយលើគេហទំព័រ និងសេវាកម្មផ្នែកទីផ្សារសម្រាប់បណ្ដាក្រុមហ៊ុននៅក្នុងវិស័យរថយន្តនៅប្រទេសចិនផងដែរ។

ទីប្រាំ៖ លោក Li Xiang ស្ថាបនិករបស់ Li Auto
ទ្រព្យ៖ 4.5ពាន់លានដុល្លារ

មហាសេដ្ឋី Li Xiang គឺជាស្ថាបនិករបស់ក្រុមហ៊ុនផលិតរថយន្តអគ្គិសនី Li Auto ដែលមានទីស្នាក់ការកណ្ដាលនៅទីក្រុងប៉េកាំង។ ក្រុមហ៊ុននេះបានចុះបញ្ជីនៅឯផ្សារហ៊ុន Nasdaq របស់សហរដ្ឋអាមេរិកកាលពីខែកក្កដា ឆ្នាំ2020។ ផលិតផលល្បីឈ្មោះបំផុតរបស់ក្រុមហ៊ុននេះ នោះគឺ Li One ដែលជារថយន្តអគ្គិសនីប្រភេទ SUV 6កៅអី។

រថយន្តរបស់ Li Xiang ត្រូវបានបំពាក់ទាំងម៉ាស៊ីនប្រើប្រេងឥន្ធនៈ ទាំងម៉ាស៊ីនប្រើថាមពលអគ្គិសនី។

យោងតាមរបាយការណ៍ ក្រុមហ៊ុន Li Auto លក់រថយន្តបានចំនួន 10,400គ្រឿង គិតត្រឹមថ្ងៃទី30 ខែមិថុនា ឆ្នាំ2020 បន្ទាប់ពីបានចាប់ផ្ដើមផលិតទ្រង់ទ្រាយធំកាលពីខែវិច្ឆិការ ឆ្នាំ2019។

ទីប្រាំមួយ៖ មហាសេដ្ឋី RJ Scaringe ស្ថាបនិករបស់ Rivian Automotive
ទ្រព្យ៖ 3.4ពាន់លានដុល្លារអាមេរិក

RJ Scaringe គឺជាស្ថាបនិករបស់ក្រុមហ៊ុនផលិតរថយន្តអគ្គិសនី Rivian។ គាត់មានបំណងបង្កើតក្រុមហ៊ុនផលិតរថយន្តតាំងតែពីនៅរៀនមធ្យមសិក្សា។ បន្ទាប់ពីទទួលបានសញ្ញាបត្របណ្ឌិតពីសាកលវិទ្យាល័យ MIT ឆ្នាំ2009 លោក Scaringe ក៏បានត្រលប់មកស្រុកកំណើតនៅឯ Melbourne រដ្ឋ Florida និងបង្កើតក្រុមហ៊ុនដំបូងរបស់ខ្លួន មុនពេលត្រូវប្ដូរឈ្មោះមកជា Rivian។

ក្រុមហ៊ុន Rivian ទទួលបានទុនវិនិយោគពី Amazon, Ford រួមនឹងអ្នកវិនិយោគមួយចំនួនទៀត។ គិតមកដល់ដើមឆ្នាំ2021 ក្រុមហ៊ុន Rivian ត្រូវបានគេកំណត់តម្លៃឡើងដល់ 27.6ពាន់លានដុល្លារអាមេរិក។ Scaringe បានឧទ្ទេសនាមរថយន្តចំនួនពីរម៉ូដែលដំបូងរបស់ Rivian នៅក្នុងព្រឹត្តិការណ៍ Auto Show កាលពីខែវិច្ឆិកា 2018 នោះគឺប្រភេទ SUV មួយគ្រឿង និងប្រភេទ pickup មួយគ្រឿង ដែលតាមគម្រោងនឹងត្រូវផលិតនៅពាក់កណ្ដាលឆ្នាំ2021នេះ៕

ប្រភព៖ Forbes, Bloomberg
ប្រែសម្រួល៖ បុត្រា

April 5, 2021

កម្ពុជាមានអ្នកស្លាប់សរុប 21នាក់ ខណៈពិភពលោកមានអ្នកស្លាប់ជាង 2.8លាននាក់ ដោយសារCovid-19

ព្រឹកថ្ងៃទី5មេសា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា តួលេខសរុបនៃអ្នកដែលបានស្លាប់ដោយសារវីរុសCovid-19 នៅកម្ពុជា បានកើនឡើងដល់ 21នាក់។

នៅក្នុងចំណោមអ្នកស្លាប់ទាំង 21នាក់ខាងលើ មាន 11នាក់ជាស្ត្រី និង 10នាក់ជាបុរស។

គិតមកដល់បច្ចុប្បន្ន កម្ពុជាមានអ្នកឆ្លងវីរុសនេះចំនួន 2,752នាក់ ក្នុងនោះមាន 63នាក់ទើបតែបានរកឃើញក្នុងថ្ងៃទី4មេសា ដែលករណីថ្មីទាំងនេះសុទ្ធតែជាអ្នកពាក់ពាក់ព័ន្ធនឹងព្រឹត្តិការណ៍20កុម្ភៈ។ កម្ពុជានៅមានអ្នកជំងឺ 984នាក់កំពុងទទួលការព្យាបាល និង 1,747នាក់បានជាសះស្បើយ។

នៅទូទាំងពិភពលោក បច្ចុប្បន្ន អ្នកវិជ្ជមាននឹងវីរុសCovid-19 បានកើនដល់ 131,920,255នាក់ ក្នុងនោះមានអ្នកស្លាប់ 2,866,007នាក់, អ្នកបានជាចំនួន 106,202,786នាក់ និងអ្នកកំពុងព្យាបាលចំនួន 22,851,462នាក់។ ក្នុងអំឡុង 24ម៉ោងកន្លង មានអ្នកជំងឺថ្មីចំនួន 2,866,007នាក់ និងអ្នកស្លាប់ថ្មីចំនួន 238នាក់ផងដែរ៕

April 5, 2021

ស្ត្រីជាពលរដ្ឋអាមេរិកាំងដើមកំណើតអាស៊ីម្នាក់ទៀតហើយ ត្រូវគេចាក់សម្លាប់ពេលកំពុងដើរលម្ហែកាយ

Ke Chieh Meng ត្រូវបានគេចាក់សម្លាប់ក្នុងពេលកំពុងនាំឆ្កែដើរលម្ហែកាយក្នុងក្រុងមួយនៃរដ្ឋ California ហើយសមត្ថកិច្ចបានហៅអំពើនេះថាជា «ការវាយប្រហារបែបចៃដន្យ»។

Ke Chieh Meng អាយុ 64ឆ្នាំ ត្រូវបានជនដៃដល់ចាក់នឹងកាំបិតជាបន្តបន្ទាប់ នៅក្នុងទីក្រុង Riverside នៃរដ្ឋ California កាលពីព្រឹកថ្ងៃទី3មេសាកន្លង។ ស្ត្រីរងគ្រោះត្រូវបានប្រទះឃើញដេកសន្លប់នៅលើដី ដោយមានរបួសយ៉ាងធ្ងន់ធ្ងរ។ ស្ត្រីដើមកំណើតអាស៊ីរូបនេះ ក៏ត្រូវបានបញ្ជូនទៅកាន់មន្ទីរពេទ្យភ្លាមៗ ប៉ុន្តែនៅតែមិនអាចជួយសង្គ្រោះទាន់ពេល។

ប៉ូលិស Riverside ក្រោយមក បានទទួលទូរស័ព្ទពីពលរដ្ឋនៅក្បែរកន្លែងកើតហេតុ បានឱ្យដឹងថា «មានស្ត្រីវ័យក្មេងម្នាក់ គួរឱ្យសង្ស័យ» បង្ហាញខ្លួននៅក្នុងតំបន់។ ភ្លាមនោះ ប៉ូលិសក៏បានចាប់ខ្លួនស្ត្រីជាប់សង្ស័យដែលមានឈ្មោះថា Darlene Stephanie Montoya អាយុ 23ឆ្នាំ នៅ Los Angeles។

ស្ត្រីដែលជាជនជាប់សង្ស័យ ឈ្មោះ Darlene Stephanie Montoya

Ryan Railsback អ្នកនាំពាក្យនៃស្នងការដ្ឋានប៉ូលិសក្រុង Riverside បានហៅករណីនេះថាជាអំពើវាយប្រហារ «ដោយចៃដន្យ» និងបានបញ្ជាក់ថា មិនទាន់មានភ័ស្តុតាងណាមួយបង្ហាញថា កើតឡើងដោយសារការរើងអើងពូជសាសន៍នៅឡើយ។

ការស្លាប់របស់អ្នកស្រី Meng បានកើតឡើងនៅក្នុងគ្រាដែលករណីវាយប្រហារមកលើពលរដ្ឋដើមកំណើតអាស៊ីនៅសហរដ្ឋអាមេរិក កំពុងកើនឡើងជាបន្តបន្ទាប់។ ការសិក្សាស្រាវជ្រាវរបស់សាកលវិទ្យាល័យ California អំពីលទ្ធិស្អប់ខ្ពើម និងជ្រុលនិយម បានបង្ហាញថា អំពើឧក្រិដ្ឋប្រឆាំងនឹងពលរដ្ឋដើមកំណើតអាស៊ីនៅសហរដ្ឋអាមេរិក កើន 150% ក្នុងឆ្នាំ 2020។

ក្រុមសកម្មជនប្រឆាំងការរើសអើងជាតិសាសន៍ បានឱ្យដឹងថា អាណាព្យាបាល និងម្ចាស់អាជីវកម្មដែលជាពលរដ្ឋដើមកំណើតអាស៊ីនៅសហរដ្ឋអាមេរិក កំពុងមានការព្រួយបារម្ភខ្លាំងចំពោះបញ្ហាដែលអាចកើតឡើងដល់កូនៗរបស់ពួកគេ ពិសេសគឺនៅពេលចេញ្ដើរនៅខាងក្រៅ៕

ប្រភព៖ NY Post, CNN
ប្រែសម្រួល៖ បុត្រា

April 5, 2021

Covid-19 នៅ ASEAN៖ ស្លាប់ជិត 60,000នាក់ ក្នុងនោះស្ថានភាពនៅឥណ្ឌូនេស៊ីគួរឱ្យបារម្ភជាងគេ

យោងតាមទំព័រ Worldometers គិតត្រឹមម៉ោង 23និង59នាទីថ្ងៃទី 4មេសា បណ្ដាប្រទេសនៃសមាគមប្រជាជាតិអាស៊ីអាគ្នេយ៍ (ASEAN) រកឃើញអ្នកវិជ្ជមាននឹងCovid-19 ចំនួន 19,281ករណី ខណៈដែលតួលេខអ្នកស្លាប់សរុបរបស់តំបន់នេះកើនដល់ 59,770នាក់។

ក្នុងរយៈពេល 24ម៉ោងកន្លងទៅនៃថ្ងៃទី4មេសា ASEAN មានសមាជិកចំនួន3 ដែលមានអ្នកស្លាប់ដោយសារវីរុសCovid-19 រួមមាន ហ្វីលីពីន, ឥណ្ឌូនេស៊ី និងម៉ាឡេស៊ី ខណៈដែលប្រទេសចំនួន 8 បានរកឃើញអ្នកវិជ្ជមាននឹងCovid-19 ខណៈដែល ឡាវ និងប្រ៊ុយណេ មិនមានករណីវិជ្ជមាន ឬស្លាប់ រីឯប្រទេសភូមា មិនមានរបាយការណ៍។

ជារួម មកដល់បច្ចុប្បន្ន Covid-19 បានសម្លាប់មនុស្សជាង 59,770នាក់ នៅក្នុងតំបន់ ASEAN កើន 431នាក់ បើធៀបនឹងមួយថ្ងៃមុន។ ចំណែក តួលេខសរុបនៃអ្នកដែលបានឆ្លងវីរុសនេះ កើនឡើងដល់ 2,980,426នាក់ ខណៈអ្នកជំងឺបានជាសះស្បើយមានចំនួន 2,621,508នាក់។

ឥណ្ឌូនេស៊ីនៅតែជាសម្បុកវីរុសCovid-19 ធំជាងគេបង្អស់ក្នុងតំបន់ ASEAN ដោយមានអ្នកជំងឺសរុប 1,534,255នាក់ ក្នុងនោះមានអ្នកជំងឺថ្មី 6,731នាក់, អ្នកស្លាប់សរុបកើនដល់ 41,669នាក់ ខ្ពស់ជាងម្សិលមិញ 427នាក់។

ហ្វីលីពីន៖ តួលេខអ្នកវិជ្ជមានសរុបនៃប្រទេសនេះកើនដល់ 795,051នាក់ ក្នុងនោះមានអ្នកជំងឺថ្មី 11,028នាក់, អ្នកស្លាប់សរុប កើនដល់ 13,425នាក់ និងកំពុងព្យាបាល 135,526នាក់។

ម៉ាឡេស៊ី៖ អ្នកជំងឺសរុប 350,959នាក់, ស្លាប់ 1,288នាក់, ជាសះស្បើយ 335,162នាក់ និងកំពុងព្យាបាល 14,509នាក់។

មីយ៉ានម៉ា៖ អ្នកជំងឺសរុប 142,497នាក់, ស្លប់ 3,206នាក់, កំពុងព្យាបាល 7,478នាក់។

សិង្ហបុរី៖ អ្នកជំងឺសរុប 60,478នាក់, ស្លាប់ 30នាក់, កំពុងព្យាបាល 246នាក់។

ប្រទេសថៃ៖ អ្នកឆ្លងសរុប 29,127នាក់, អ្នកជំងឺថ្មី 96នាក់, កំពុងព្យាបាល 1,258នាក់ និងអ្នកស្លាប់សរុប 95នាក់។

កម្ពុជា កាលពីថ្ងៃទី4មេសា បានប្រកាសថា បានរកឃើញអ្នកជំងឺថ្មីចំនួនន 44នាក់ (ថ្ងៃទី3មេសា) នាំឱ្យតួលេខសរុបនៃអ្នកវិជ្ជមាន កើនដល់ 2.689នាក់ ក្នុងនោះមានអ្នកស្លាប់20នាក់ និង 1,017នាក់កំពុងព្យាបាល។

វៀតណាម៖ អ្នកជំងឺសរុប 2,631នាក់ ក្នុងនោះមាន 35នាក់បានស្លាប់ និង 213នាក់កំពុងព្យាបាល។

ប្រ៊ុយណេ៖ អ្នកជំងឺសរុប 214នាក់, ស្លាប់ 3នាក់, ជាសះស្បើយ 197នាក់ និងកំពុងព្យាបាល 14នាក់។

ឡាវ៖ អ្នកជំងឺសរុប 49នាក់, កំពុងព្យាបាល 3នាក់ និងជាសះស្បើយ 46នាក់។

ប្រភព៖ Worldometers
ដកស្រង់និងប្រែសម្រួល៖ បុត្រា

April 5, 2021

ផ្អាកដំណើរការផ្សារអូរឫស្សីរយៈពេល14ថ្ងៃ ដើម្បីបង្ការCovid-19

រដ្ឋបាលរាជធានីភ្នំពេញ នៅយប់ថ្ងៃទី3 ខែមេសា ឆ្នាំ2021នេះ បានសម្រេចផ្អាកការចេញចូលផ្សារអូរឫស្សី ជាបណ្តោះអាសន្នរយៈពេល14ថ្ងៃ ដើម្បីបង្ការវីរុសCovid-19 ក្រោយអាជីវករ និងសន្តិសុខមួយចំនួនរបស់ផ្សារនេះ បានឆ្លងវីរុស។

ការឆ្លងវីរុសនៅក្នុងផ្សារខាងលើនេះ ត្រូវបានរដ្ឋបាលរាជធានីភ្នំពេញអធិប្បាយថា បានកើតឡើងជាបន្តបន្ទាប់ នៅទីតាំងផ្សេងៗគ្នា និងនៅតាមតូចជាច្រើន គួរឱ្យព្រួយបារម្ភ។

ព័ត៌មានបន្ថែម សូមបន្តអានសេចក្ដីជូនដំណឹងដូចខាងក្រោម៖

ប្រភព៖ រដ្ឋបាលរាជធានីភ្នំពេញ
ដកស្រង់៖ បុត្រា

April 4, 2021

(វីដេអូ)-វះកាត់បេះដូងក្នុងពេលមន្ទីរពេទ្យកំពុងឆាបឆេះ ក្រុមវេជ្ជបណ្ឌិតរុស្ស៊ី នៅតែទទួលបានជោគជ័យ

ក្រុមវេជ្ជបណ្ឌិតនៅទីក្រុង Blagoveshchecnsk នៃប្រទេសរុស្ស៊ី បានទទួលជោគជ័យក្នុងការវះកាត់ព្យាបាលបេះដូងរបស់អ្នកជំងឺម្នាក់ បើទោះជាអគ្គិភ័យកំពុងឆាបឆេះយ៉ាងសន្ធោសន្ធៅនៅខាងក្រៅបន្ទប់។

អង្គភាពគ្រប់គ្រងស្ថានករណ៍បន្ទាន់ក្នុងតំបន់បានឱ្យដឹងថា មន្ទីរពេទ្យមួយនៅក្នុងទីក្រុង Blagoveshchensk ខេត្ត Amur នៃប្រទេសរុស្ស៊ី បានជួបនឹងគ្រោះអគ្គិភ័យកាលពីថ្ងៃទី 2មីនា បណ្ដាលឱ្យក្រុមគ្រូពេទ្យ និងអ្នកជំងឺ 60នាក់ ត្រូវជម្លៀសខ្លួនភ្លាម។

ក៏ប៉ុន្តែ ក្នុងគ្រាដែលក្រុមពន្លត់អគ្គិភ័យកំពុងប្រឹងប្រែងគ្រប់គ្រងអណ្ដាតភ្លើងនៅខាងក្រៅ ក្រុមវេជ្ជបណ្ឌិតដែលមានគ្នា 8នាក់ នៅតែបន្តការវះកាត់ព្យាបាលបេះដូងនៅខាងក្នុង។ «យើងត្រូវសង្គ្រោះអ្នកជំងឺនេះ ហើយយើងបានធ្វើគ្រប់យ៉ាងដែលអាចធ្វើបាន» Valentin Filatov ប្រធានផ្នែកវះកាត់បេះដូងប្រចាំមន្ទីរពេទ្យ បានប្រាប់ទូរទស្សន៍រុស្ស៊ី។

អង្គភាពទទួលបន្ទុកស្ថានការណ៍បន្ទាន់នៅខេត្ត Amur ឱ្យដឹងថា ក្នុងពេលកម្លាំងពន្លត់អគ្គិភ័យកំពុងរារាំងមិនឱ្យផ្សែងចូលទៅដល់បន្ទប់វះកាត់ បន្ទុបនេះក៏ទទួលបានចរន្តអគ្គិសនីដោយឡែកនៅក្នុងអំឡុងភ្លើងកំពុងឆាប់ឆេះ។ បន្ទាប់ពីបានវះកាត់រួចរាល់ អ្នកជំងឺពិសេសនេះក៏ត្រូវបានជម្លៀសទៅកាន់មន្ទីរពេទ្យផ្សេងមួយទៀត។

បុគ្គលិកសុខាភិបាលម្នាក់ឈ្មោះ Antonina Smolina ឱ្យដឹងថា ក្រុមវេជ្ជបណ្ឌិតដែលបានចូលរួមការវះកាត់នេះ «មិនបានតក់ស្លុតនោះទេ» នៅពេលអណ្ដាតភ្លើងកំពុងឆាបឆេះ។ អគ្គិភ័យដែលត្រូវបានគេជឿថា កើតចេញពីបញ្ហាទុសេខ្សែភ្លើងនេះ ក៏ត្រូវបានគ្រប់គ្រងទាំងស្រុង និងមិនបានបង្កឱ្យមានអ្នកស្លាប់ ឬរងរបួសនោះដែរ។

អាជ្ញាធររុស្ស៊ីបានសន្យាថា នឹងផ្ដល់រង្វាន់ដល់ក្រុមវេជ្ជបណ្ឌិត និងកម្លាំងពន្លត់អគ្គិភ័យដែលបានប្រឹងប្រែងដោយភាពក្លាហានក្នុងការបំពេញភារកិច្ចរបស់ខ្លួនដោយជោគជ័យ៕

ប្រភព៖ AFP, Reuters
ប្រែសម្រួល៖ បុត្រា

April 3, 2021

Author: សឿន សំណាង