សឿន សំណាង - La Reine Media

រូបភាពរន្ធត់! វិបត្តិកូវីដឥណ្ឌា នាយករដ្ឋមន្ត្រីទទួលស្គាល់ថា ដូចព្យុះសង្ឃរាចាប់អង្រួនប្រទេស

កាលពីថ្ងៃទី25 មេសា ទីភ្នាក់ងារព័ត៌មាន Reuters បានរាយការណ៍ពីវិបត្តិកូវីដ-19 ដែលឆ្លងរាតត្បាតយ៉ាងធ្ងន់ធ្ងរនៅក្នុងប្រទេសឥណ្ឌា ដោយស្ថិតិអ្នកឆ្លងមេរោគថ្មីប្រចាំថ្ងៃ បានបំបែកស្ថិតិពិភពលោក លើស 3សែននាក់ក្នុង 1ថ្ងៃ ជាប់ៗគ្នា 4ថ្ងៃ ដោយកាលពីថ្ងៃទី24 មេសា មានចំនួន 349,691នាក់ និងស្លាប់ 2,767នាក់ ក្នុងអំឡុងពេល 24ម៉ោង។

សម្រាប់ចំនួនអ្នកឆ្លងមេរោគសរុប បានឡើងជិតដល់ 17លាននាក់ ចំណែកចំនួនអ្នកស្លាប់ កើនឡើងដល់ 192,310នាក់។ បច្ច័យចម្បងរបស់ការឆ្លងរាលដាលដ៏ធ្ងន់ធ្ងរនេះ បណ្ដាលមកពីមេរោគកូវីដ-19ក្លាយពូជ រួមទាំងការប្រមូលផ្ដុំគ្នា ក្នុងរដូវកាលខាងសាសនា ដែលមានប្រជាជននាំគ្នាហែមកចូលរួមជាច្រើនលាននាក់ កាលពីដើមខែមេសា។

ក្រៅពីវិបត្តិអ្នកជំងឺ ហៀរមន្ទីរពេទ្យហើយ បរិមាណខ្យល់អុកស៊ីហ្ស៊ែន ដែលទុកព្យាបាលអ្នកជំងឺ ក៏មានមិនគ្រប់គ្រាន់ រហូតធ្វើឱ្យអ្នកជំងឺអាការធ្ងន់ធ្ងរ ត្រូវស្លាប់យ៉ាងគួរតក់ស្លុត។

ក្រៅពីនោះ ប្រទេសឥណ្ឌា ថែមទាំងត្រូវប្រឈមនឹងចំនួនសាកសពអ្នកជំងឺកូវីដ-19 ដែលមានច្រើនហៀរកន្លែងតម្កល់សពជាបន្តបន្ទាប់ រហូតដល់អាជ្ញាធរត្រូវអាស្រ័យលើការដុតបូជា នៅតាមទីវាលស្រឡះៗ ដោយបណ្ដារថយន្តសង្គ្រោះរបស់មន្ទីរពេទ្យ បានដឹកសាកសពយកមកដាក់នៅកន្លែងឈាបនកិច្ចបណ្ដោះអាសន្នយ៉ាងបន្តកន្ទុយគ្នាឥតឈប់ឈរ អ្នកខ្លះអាចត្រូវរង់ចាំបូជាសពសាច់ញាតិ យូររហូតដល់ទៅ 6ម៉ោងក៏មាន។

រូបភាពពីយន្តហោះដ្រូន បានបង្ហាញឱ្យឃើញទីកន្លែងបូជាសពដ៏ធំទូលាយមួយ នៅក្នុងទីក្រុងនីវដេលី មានគំនរភ្លើងជាចំណុច។ សាកសពត្រូវបានរុំជុំជិតដោយក្រណាត់ស និងត្រូវគរសង្កត់ពីលើដោយគំនរអុស មុននឹងបញ្ឆេះភ្លើង ដុតបូជាដោយអាជ្ញាធរ និងសាច់ញាតិដែលសុទ្ធតែស្លៀកឈុត PPE ពណ៌ស ការពារខ្លួនយ៉ាងគត់មត់។

គិតតាំងពីថ្ងៃទី15 មេសាមក ប្រទេសឥណ្ឌា មានរបាយការណ៍អ្នកឆ្លងកូវីដ ខ្ពស់លើស 2សែននាក់ ដែលច្រើនជាងស្ថិតិខ្ពស់បំផុតប្រចាំឆ្នាំ2020 ដែលមានតែ 93,000នាក់ក្នុង 1ថ្ងៃនោះទៅទៀត បន្ទាប់ពីនោះ ចំនួនអ្នកឆ្លងមេរោគថ្មី ថែមទាំងបានកើនឡើងដល់ជាង 3សែននាក់ក្នុង 1ថ្ងៃ ជាប់ៗគ្នា 4ថ្ងៃហើយទៀតផង។

លោក ណារិនដ្រា ម៉ូឌី នាយករដ្ឋមន្ត្រីឥណ្ឌា បានថ្លែងអំពាវនាវ សុំឱ្យប្រជាជនគ្រប់រូប ចូលទទួលយកការចាក់វ៉ាក់សាំង និងប្រយ័ត្នខ្លួនឯងពី “ព្យុះសង្ឃរានៃការឆ្លងមេរោគ” ដែលគ្រានេះបានញាប់ញ័ររញ្ជួយទូទាំងប្រទេស។

លោកម៉ូឌី បានថ្លែងថា “ការឆ្លងរាលដាលរលកទី1 យើងតស៊ូប្រយុទ្ធ រហូតបានជោគជ័យ រហូតមានជឿជាក់ តែគ្រានេះ ព្យុះសង្ឃរា បានវាយបោកបក់ទូទាំងប្រទេសរហូតញ័ររញ្ជួយ”

រដ្ឋបាលលោក ម៉ូឌី ត្រូវរងការរិះគន់យ៉ាងធ្ងន់ធ្ងរថា បានបណ្ដោយឱ្យការការពារខ្លួនធ្លាក់ចុះ និងធ្វេសប្រហែស មានការរៀបចំពិធីជួបជុំរបស់មនុស្សចំនួនដ៏ច្រើន ទាំងពិធីខាងសាសនា និងកិច្ចការងារខាងនយោបាយ ដោយមិនបានត្រៀមរួចជាស្រេចនូវប្រព័ន្ធសុខភាពសាធារណៈ សម្រាប់ទប់ទល់នឹងស្ថានការណ៍នេះឡើយ។

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 26, 2021

ក្រោយរកឃើញសាកសពនាវាមុជទឹក KRI Nanggala ដែលបានបាត់ខ្លួន តំណាងរាស្ត្រឥណ្ឌូនេស៊ីសង្ស័យថា «អាចមកពីកំហុសនៃការជួសជុលនៅកូរ៉េខាងត្បូង»

តំណាងរាស្ត្រ និងជាអតីតឧត្ដមសេនីយ៍យោធា TB Hasanuddin សំដែងការព្រួយបារម្ភថា នាវាមុជទឹក KRI Nanggala ដែលបានលិចនោះគឺ អាចបណ្ដាលមកពីការជួសជុលនៅឯប្រទេសកូរ៉េខាងត្បូង អំឡុងឆ្នាំ 2010-2012។

«ការជួសជុលនៅកូរ៉េខាងត្បូង មិនត្រឹមតែផ្លាស់គ្រឿងបន្លាស់នោះទេ តែក៏ប៉ះពាល់ដល់គ្រោងនាវាមុជទឹកនេះផងដែរ ពិសេសគឺប្រព័ន្ធបាញ់មីស៊ីលទឹក» អតីតមន្ត្រីយោធាជាន់ខ្ពស់ Hasanuddin និងជាសមាជិកនៃគណៈកម្មការការពារជាតិ ការបរទេស និងព័ត៌មាន នៃសភាជាន់ទាបឥណ្ឌូនេស៊ី បាននិយាយកាលពីម្សិលមិញ (25 មេសា) អំពីនាវាមុជទឹក KRI Nanggala ដែលបានលិចនៅឯសមុទ្រ Bali។

KRI Nanggala ត្រូវបានជួសជុលនៅកូរ៉េខាងត្បូង ក្នុងអំឡុងឆ្នាំ 2010-2012 ដើម្បីផ្លាស់អាគុយ និងគ្រឿងម៉ាស៊ីន ក៏ដូចជាបំពាក់ប្រព័ន្ធកំណត់ទិស sonar និងប្រព័ន្ធគ្រប់គ្រងការប្រយុទ្ធ។

តំណាងរាស្ត្រ Hasanuddin ឱ្យដឹងថា ការជួសជុលនេះ ត្រូវចំណាយប្រាក់អស់ប្រមាណ 75លានដុល្លារអាមេរិក និងបានបន្ថែមថា ការបាញ់សាកល្បងមីស៊ីលទឹក ធ្លាប់បានបរាជ័យ ដោយសារបំពង់បាញ់មីស៊ីល ជួបបញ្ហា បណ្ដាលឱ្យនាវិក 3នាក់ ត្រូវបាត់បង់ជីវិត។ បន្ទាប់មក វាក៏ត្រូវបានជួសជុលឡើងវិញ។

«ខ្ញុំសង្ស័យថា លទ្ធផលនៃការជួសជុល បាននាំឱ្យមានកំហុសឆ្គង បណ្ដាលឱ្យនាវា Nanggala ត្រូវលិច» នេះបើតាមសំដីរបស់ Hasanuddin។ លោកក៏បានស្នើឱ្យផ្អាកដំណើរការនាវាមុជទឹក KRI Cakra ដែលស្ថិតក្នុងប្រភេទជាមួយនឹង KRI Nanggala។

កងកម្លាំងជួយសង្គ្រោះ បានរកឃើញសាកសពនាវាមុជទឹក KRI Nanggala ស្ថិតនៅបាទសមុទ្រ Bali ជម្រៅ 838ម៉ែត្រ ដែលមានចម្ងាយពីកន្លែងមុជលើកចុងក្រោយប្រមាណតែ 1.4គីឡូម៉ែត្រប៉ុណ្ណោះ។

មេបញ្ជាការកងទ័ពជើងទឹកឥណ្ឌូនេស៊ី Yudo Margono កាលពីថ្ងៃទីល្ងាចថ្ងៃទី25 មេសា បានឱ្យដឹងថា៖ «នាវាមុជទឹក KRI Nanggala បានបែកបាក់ជាបីចំណែកធំ»។ ចំណែកមេបញ្ជាការកងទ័ពឥណ្ឌូនេស៊ី Hadi Tjahjanto បញ្ជាក់ថា៖ «នាវិកទាំង 53នាក់ដែលនៅក្នុងនាវាមុជទឹកនេះ បានបាត់បង់ជីវិត»៕

ប្រភព៖ AFP, Detik News
ប្រែសម្រួល៖ បុត្រា

April 26, 2021

ចេញសញ្ញាក្ដៅគគុក!! ភ្លើងឆេះកប៉ាល់ដឹកប្រេង ក្រៅឈូងសមុទ្រស៊ីរី សង្ស័យត្រូវ យន្តហោះដ្រូនសត្រូវ បាញ់កម្ទេច

ក្រសួងថាមពល នៃប្រទេសស៊ីរី បានបង្ហើបឱ្យដឹងថា ក្រុមអ្នកពន្លត់អគ្គិភ័យ ត្រូវបានបញ្ជូនទៅពន្លត់ភ្លើងដែលឆេះនាវាដឹកប្រេង ១គ្រឿង នៅក្រៅឈូងសមុទ្ររបស់ប្រទេសមួយនេះ កាលពីថ្ងៃសៅរ៍ (ទី24មេសា) ក្រោមការសង្ស័យថា វាអាចត្រូវវាយប្រហារដោយយន្តហោះដ្រូន ១គ្រឿង ដែលមានទិសដៅហោះមកពីដែនសមុទ្រលេបាណុន។

អត្តសញ្ញាណរបស់នាវាផ្ទុកប្រេង 1គ្រឿងនេះ មិនបានបង្ហាញច្បាស់លាស់ឡើយ ដោយខាងស្ថានីយទូរទស្សន៍ អាល់-អាឡាម របស់ប្រទេសអ៊ីរ៉ង់ បានបញ្ជាក់ថា វាជានាវាមួយ ក្នុងចំណោមនាវាដឹកប្រេងរបស់ប្រទេសអ៊ីរ៉ង់ ដែលកាលពីពេលថ្មីៗនេះ ទើបនឹងចូលចតនៅកំពង់ផែឃ្លាំងប្រេងរបស់ប្រទេសស៊ីរី តែខាងទីភ្នាក់ងារព័ត៌មាន ថាស្នីម ប្រព័ន្ធផ្សព្វផ្សាយពាក់កណ្ដាលរដ្ឋរបស់អ៊ីរ៉ង់ដូចគ្នា បានរាយការណ៍ខុសពីគ្នា ដោយបានប្រាប់ថា វាមិនមែនជានាវាដឹកប្រេងរបស់អ៊ីរ៉ង់ទេ។

អាល់-អាឡាម ប្រព័ន្ធផ្សព្វផ្សាយជាភាសាអារ៉ាប់ របស់ប្រទេសអ៊ីរ៉ង់ បានបញ្ជាក់ថា កប៉ាលផ្ទុកប្រេង 1គ្រឿងនេះ បានរងការខូចខាតមួយផ្នែក និងមិនមានអ្នកស្លាប់ទេ តែខាង ថាស្នីម បានរាយការណ៍ ដោយអាងលើប្រភពព័ត៌មាន ដែលបានប្រាប់ថា “ហេតុការណ៍នេះកើតឡើងទៅលើនាវា 1គ្រឿងផ្សេងទៀត និងមិនមានភាពពាក់ព័ន្ធគ្នា ជាមួយនាវាដែលកំពុងផ្ទុកទំនិញរបស់អ៊ីរ៉ង់នោះទេ”

ចំណែក Tanker Trackers វេបសាយតាមដានការធ្វើដំណើររបស់កប៉ាលដឹកប្រេង បានសរសេរនៅលើប្រព័ន្ធធ្វីតធើរថា កប៉ាលដឹកប្រេង ដែលត្រូវបានប្រទះឃើញភ្លើងឆាបឆេះនៅក្រៅឈូងសមុទ្រទីក្រុង បានីយ៉ាស មិនមែនជាកប៉ាលរបស់ប្រទេសអ៊ីរ៉ង់ទេ តែវាមានលេខបញ្ជីលេបាណុន។

ទោះជាដូច្នេះក្ដី សាណា ប្រព័ន្ធផ្សព្វផ្សាយរបស់រដ្ឋស៊ីរី ដែលអាងលើសេចក្ដីថ្លែងការណ៍របស់ក្រសួងថាមពល បានហៅរឿងនេះថា ជាហេតុការណ៍វាយប្រហារដោយយន្តហោះដ្រូន តែមិនបានផ្ដល់សេចក្ដីលម្អិតបន្ថែមអំពីហេតុការណ៍នេះឡើយ និងទីភ្នាក់ងារព័ត៌មាន អាល់-ម៉ាយ៉ាឌីន ស្ថានីយទូរទស្សន៍គាំទ្រប្រទេសស៊ីរី បានរាយការណ៍ដោយសង្ស័យថា កប៉ាលផ្ទុកប្រេងនេះ ត្រូវបានវាយប្រហារដោយយន្តហោះដ្រូនរបស់អ៊ីស្រាអែល។ តែ ខាងកងទ័ពអ៊ីស្រាអែល បានបដិសេធ ផ្ដល់ការយល់ឃើញណាមួយចំពោះហេតុការណ៍ដែលកើតឡើងនេះ។

គួរបញ្ជាក់ដែរថា ហេតុការណ៍នេះកើតឡើង ក្នុងខណៈដែលអ៊ីស្រាអែល កំពុងបង្កើនប្រតិបត្តិការវាយប្រហារគោលដៅផ្សេងៗរបស់អ៊ីរ៉ង់ ក្នុងនោះរួមមានទីតាំងសង្ស័យផលិតអាវុធរបស់អ៊ីរ៉ង់ នៅក្នុងប្រទេសស៊ីរី ដើម្បីទប់ស្កាត់នូវអ្វីដែលពួកគេមើលឃើញថា ជាការរុករានឈ្លានពានខាងយោធានៅក្នុងប្រទេសស៊ីរី របស់អ៊ីរ៉ង់៕

ប្រភព៖ ទីភ្នាក់ងារព័ត៌មាន Reuters
ប្រែសម្រួល តាវ៉ែនតា

April 25, 2021

កម្ពុជា សម្រេចបញ្ចប់ការហាមឃាត់ការធ្វើដំណើរ និងបញ្ចប់ការបិទរមណីយដ្ឋានទេសចរណ៍

ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានចេញសេចក្តីសម្រេចបញ្ចប់ការហាមឃាត់ធ្វើដំណើរ និងបញ្ចប់ការបិទរមណីយដ្ឋានទេសចរណ៍នៅទូទាំងប្រទេស នេះបើយោងតាមក្រសួងព័ត៌មានដែលបានចេញផ្សាយនាថ្ងៃទី25 មេសានេះ។

ព័ត៌មានលម្អិត សូមអានសេចក្ដីប្រកាសរបស់ប្រមុខរដ្ឋាភិបាលកម្ពុជា ដូចខាងក្រោម៖

April 25, 2021

អាស៊ាន៖ សម្រេចបានឆន្ទាមតិ 5ចំណុច ក្រោយពិភាក្សាជាមួយលោក មីន អង់ឡាយ បញ្ចប់វិបត្តិមីយ៉ាន់ម៉ា

ក្រុមមេដឹកនាំប្រទេសក្នុងភូមិភាគអាស៊ីភាគអាគ្នេយ៍ បានថ្លែងថា ពួកគេបានឯកភាពលើផែនការមួយចំនួនជាមួយនឹងមេដឹកនាំក្រុមរដ្ឋប្រហារយោធាមីយ៉ាន់ម៉ា នៅថ្ងៃទី24 មេសា ដើម្បីបញ្ចប់វិបត្តិក្នុងប្រទេសនោះ តែមេដឹកនាំរដ្ឋប្រហាររូបនោះ មិនបានឆ្លើយតបយ៉ាងច្បាស់លាស់ ចំពោះសំណូមពរឱ្យបញ្ឈប់ការសម្លាប់អ្នកតវ៉ាប្រឆាំងដែលជាពលរដ្ឋនោះទេ។

“វាលើសពីការរំពឹងទុករបស់យើង…” លោកនាយករដ្ឋមន្ត្រី មូយីតឌីន យ៉ាស់ស៊ីន របស់ប្រទេសម៉ាឡេស៊ី បានថ្លែងប្រាប់ក្រុមអ្នកយកព័ត៌មាន ក្រោយកិច្ចប្រជុំមេដឹកនាំនៃប្រជាជាតិអាស៊ាន ដែលលោកឧត្ដមសេនីយ៍ឯក មីន អង់ឡាយ បានចូលរួមប្រជុំផងដែរនោះ។

មេដឹកនាំម៉ាឡេស៊ី បានថ្លែងបន្តថា៖ “យើងព្យាយាម មិននិយាយចោទប្រកាន់ភាគីគាត់ ច្រើនជ្រុលពេកទេ ព្រោះយើងមិនបានខ្វល់ថា អ្នកណាជាអ្នកបង្កនោះទេ យើងគ្រាន់តែបញ្ជាក់ថា អំពើហិង្សា ត្រូវតែបញ្ចប់ សម្រាប់គាត់ បញ្ហាកើតឡើង គឺដោយសារតែភាគីម្ខាងទៀត តែគាត់យល់ស្របថា អំពើហិង្សា ត្រូវតែបញ្ឈប់”

ក្រុមមេដឹកនាំក្នុងប្រទេសអាស៊ាន ត្រូវការការសន្យាពីលោក មីន អង់ឡាយ ក្នុងការរារាំងកងកម្លាំងសន្តិសុខរបស់គាត់ ដែលក្រុមអ្នកតាមដានស្ថានការណ៍ និងក្រុមសកម្មជន បានបញ្ជាក់ថា បានសម្លាប់មនុស្សអស់ 745នាក់ហើយ ចាប់តាំងពីកើតមានការតវ៉ាប្រឆាំងបែបអហិង្សា ដើម្បីតតាំងនឹងការធ្វើរដ្ឋប្រហារកាលពីថ្ងៃទី1 កុម្ភៈ ហើយពួកគេទាំងនោះ នៅតែត្រូវការឱ្យដោះលែងអ្នកទោសនយោបាយផងដែរ។

មេដឹកនាំប្រទេសម៉ាឡេស៊ី បានបន្តថា៖ “គាត់មិនបានបដិសេធនូវអ្វីដែលខ្ញុំ និងមេដឹកនាំឯទៀតលើកយកមកពិភាក្សានោះទេ”

ចំណែកឯការថ្លែងការណ៍របស់ប្រទេសប្រ៊ុយណេ ដែលជាប្រធានអាស៊ានវិញ បានបញ្ជាក់អំពីឆន្ទាមតិ ដែលសម្រេចបាន 5ចំណុច ប្រកបដោយ៖ ការបញ្ឈប់អំពើហិង្សា, ការចរចាដែលរីកចម្រើនរវាងគ្រប់ភាគីដែលពាក៉ព័ន្ធ, អ្នកតំណាងពិសេសរបស់អាស៊ាន នឹងសម្របសម្រួលក្នុងការចរចា, ការទទួលយកជំនួយ និងការទៅចូលទៅទស្សនកិច្ចរបស់អ្នកតំណាងពិសេស តែយ៉ាងណាក្ដី មិនមានការថ្លែងអំពីការដោះលែងអ្នកទោសនយោបាយនៅក្នុងសេចក្ដីថ្លែងការណ៍នោះទេ។

“គាត់ប្រាប់ថា គាត់(លោកមីន អង់ឡាយ) ទទួលស្ដាប់ពួកយើង ហើយគាត់នឹងនាំយកទៅពិចារណាថា តើវាមានចំណុចណាខ្លះ ដែលជាប្រយោជន៍?” លោក លី ស៊ានលុង នាយករដ្ឋមន្ត្រីរបស់សិង្ហបុរី បានថ្លែងបែបនេះ តាមការរាយការណ៍របស់ស្ថានីយទូរទស្សន៍ Channel NewsAsia។

មេដឹកនាំប្រទេសសិង្ហបុរី បានបន្តថា “គាត់មិនបានប្រឆាំងនឹងអាស៊ាន ដែលមានតួនាទីសម្របសម្រួល ឬការទៅទស្សនកិច្ចរបស់ក្រុមអ្នកតំណាងអាស៊ាន ឬការជួយសង្គ្រោះផ្នែកមនុស្សធម៌ណាមួយទេ”

តែលោក លី បានបន្ថែមថា ការងារនេះ នៅត្រូវដំណើរការបន្តយូរតទៅទៀត ព្រោះមានរឿងមួយ ដែលនឹងត្រូវធ្វើឱ្យបានសម្រេច គឺបញ្ឈប់អំពើហិង្សា និងដោះលែងអ្នកទោសនយោបាយ។

តែ ទាំងអស់នេះ មិនទាន់មានការយល់ឃើញណាមួយពីលោកឧត្ដមសេនីយ៍ មីន អង់ឡាយ នៅឡើយ។

លោក ឆាលស៍ សានទីអេហ្គោ ប្រធានសមាជិករដ្ឋសភាអាស៊ាន ដើម្បីសិទ្ធិមនុស្ស បានថ្លែងថា “ការដោះលែងអ្នកទោសនយោបាយ គឺជារឿងចាំបាច់មួយ សម្រាប់បញ្ឈប់អំពើហិង្សា”

លោក សានទីអេហ្គោ បញ្ជាក់ថា “អាស៊ានត្រូវតែដំណើរការយ៉ាងឆាប់រហ័ស និងកំណត់ពេលវេលាឱ្យបានច្បាស់លាស់ សម្រាប់លោកមីន អង់ឡាយ ក្នុងការបញ្ឈប់អំពើហិង្សា ឬត្រៀមខ្លួនជាស្រេចក្នុងការឱ្យគាត់ទទួលខុសត្រូវ”

ការជួបប្រជុំគ្នារបស់អាស៊ាននេះ គឺជាការព្យាយាមរវាងប្រទេសជាលើកដំបូង ក្នុងការជួយសម្រាលវិបត្តិក្នុងប្រទេសមីយ៉ាន់ម៉ា ចាប់តាំងពីកើតការធ្វើរដ្ឋប្រហារផ្ដួលរំលំរដ្ឋាភិបាល ដែលបានមកពីការបោះឆ្នោតរបស់លោកស្រី អ៊ុងសាន ស៊ូជី។ មីយ៉ាន់ម៉ា គឺជាប្រទេសមួយ ក្នុងចំណោម 10ប្រទេសសមាជិកអាស៊ាន ដែលមាននយោបាយការសម្រេចចិត្ត ដែលជាឆន្ទាមតិ និងការមិនជ្រៀតជ្រែកកិច្ចការផ្ទៃក្នុងរបស់ប្រទេសជាសមាជិក៕

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 25, 2021

ផ្សារធំៗទាំងអស់នៅរាជធានីភ្នំពេញ នឹងត្រូវបានបិទជាបណ្ដោះអាសន្ន ដើម្បីកាត់ផ្តាច់ការឆ្លងរាលដាលនៃវីរុសCovid-19

អភិបាលរាជធានីភ្នំពេញ បានណែនាំដល់អភិបាលខណ្ឌទាំង 14 របស់រាជធានីភ្នំពេញ ពិនិត្យសកម្មភាពនានារបស់ផ្សារទាំងឡាយនៅក្នុងរាជធានី ដើម្បីត្រៀមសម្រាប់ការបិទផ្សារធំៗទាំងអស់ជាបន្តទៀត។

អភិបាលរាជធានីភ្នំពេញ ឯកឧត្តម ឃួង ស្រេង បានលើកឡើងដូចខាងលើនេះ នៅក្នុងកិច្ចប្រជុំតាមអនឡាញរបស់គណៈបញ្ជាការឯកភាពរាជធានីភ្នំពេញ ដែលត្រូវបានធ្វើឡើងនៅសាលារាជធានី កាលពីថ្ងៃទី23 ខែមេសា ឆ្នាំ2021 ដោយមានវត្តមានរបស់អភិបាលខណ្ឌទាំង14 ស្នងការនគរបាល និងមេបញ្ជាការកងរាជអាវុធហត្ថរាជធានីភ្នំពេញ។

កិច្ចប្រជុំដែលត្រូវបានធ្វើឡើងកាលពីម្សិលមិញនេះគឺដើម្បីពង្រឹងលើកិច្ចការស្នូលមួយចំនួន ក្នុងនោះមានដូចជា ការចាក់វ៉ាក់សាំងបង្ការ Covid-19 នៅរាជធានី វិធានការសម្រាប់ការបិទផ្សារធំៗ និងកិច្ចការយកសំណាករបស់អ្នកត្រូវសង្ស័យថាបានឆ្លងវីរុសCovid-19 នៅក្នុងរាជធានីភ្នំពេញ។ល។

អភិបាលរាជធានីភ្នំពេញ បានលើកឡើងថា មូលហេតុដែលនាំឱ្យអាជ្ញាធរបានបិទផ្សារកន្លងមក និងត្រៀមបិទជាបន្តបន្ទាប់ទៀតនាពេលខាងមុខនេះគឺ ដោយសារសង្កេតឃើញថា ប្រជាពលរដ្ឋដែលទៅផ្សារ ហាក់មិនមានការភ័យខ្លាចអំពីការឆ្លងវីរុសនេះសោះឡើយ។

រដ្ឋបាលរាជធានី បានបញ្ជាក់ថា ផ្សារទាំងឡាយរបស់រាជធានីភ្នំពេញដែលនឹងត្រូវបិទនាពេលខាងមុខ មានដូចជា ផ្សារគីឡូម៉ែត្រលេខ6, ផ្សារគីឡូម៉ែត្រលេខ7 និងផ្សារព្រែកព្នៅជាដើម។ ថ្វីបើមានការបិទផ្សារ ប៉ុន្តែ ពលរដ្ឋនៅតែអាចទិញបន្លែ ត្រីសាច់បាន តាមរយៈផ្សារអនឡាញ និងអ្នកលក់តាមឡាន ឬរទេះជាដើម។ តាមគម្រោង ការបិទផ្សារខាងលើនេះនឹងត្រូវបានប្រកាសដោយរដ្ឋបាលរាជធានីនា៕

ប្រភព៖ ក្រសួងព័ត៌មាន
ដកស្រង់៖ បុត្រា

April 24, 2021

ច្បាស់មែនទែន! NASA បង្ហាញរូបភាពពណ៌ ថតពីលើឧទ្ធម្ភាគចក្រ ដែលហោះ 2ជុំ លើពិភពផ្កាយព្រះអង្គារ

អង្គការ NASA របស់សហរដ្ឋអាមេរិក បានផ្សព្វផ្សាយរូបភាពពណ៌ ដែលថតពីលើឧទ្ធម្ភាគចក្រ “Ingenuity” ដែលហោះឡើងទៅលើពិភពផ្កាយព្រះអង្គារ ជាលើកទី2 ថ្មីៗនេះ និងកំពុងត្រៀមឡើងហោះជាលើកទី3 នៅថ្ងៃទី២៥ មេសា។

វេបសាយព័ត៌មាន CNN បានរាយការណ៍ថា អង្គការគ្រប់គ្រងការហោះហើរអវកាសនៃសហរដ្ឋអាមេរិក ឬ NASA បានផ្សព្វផ្សាយរូបភាពពណ៌ ដែលថតបានដោយគ្រឿងយន្តឧទ្ធម្ភាគចក្រ Ingenuity ដែលកំពុងហោះក្នុងរយៈកម្ពស់ ៥ម៉ែត្រ ពីលើផ្ទៃដីនៃពិភពផ្កាយព្រះអង្គារ ក្នុងអំឡុងការសាកល្បងហោះលើកទី2 កាលពីថ្ងៃទី22 មេសាកន្លងទៅ ដោយប្រើពេលវេលាទាំងអស់ 52វិនាទី ស៊ីពេលយូរជាងការហោះជុំដំបូងដល់ទៅ 12វិនាទី។

តាមរយៈរូបភាពដែលថតបាននេះ បានបង្ហាញឱ្យឃើញផ្ទៃដីរបស់ពិភពផ្កាយព្រះអង្គារ ដែលពេញទៅដោយធូលីដី និងដុំថ្ម និងថែមទាំងឃើញមានស្នាមកង់របស់គ្រឿងយន្តស្រាវជ្រាវ Perseverance ដែលនៅលើពិភពផ្កាយព្រះអង្គារនោះទៀតផង។

NASA បានបញ្ជាក់ថា ខណៈនេះ Ingenuity កំពុងត្រៀមសាកល្បងការហោះហើរលើកទី3 នៅថ្ងៃទី25 មេសា តាមផែនការហោះឡើង ក្នុងរយៈកម្ពស់ ៥ម៉ែត្រ ល្បឿន 7.2គីឡូម៉ែត្រក្នុង 1ម៉ោង ចម្ងាយហោះត្រឡប់ 100ម៉ែត្រ។

គ្រឿងយន្ត ឧទ្ធម្ភាគចក្រ Ingenuity នេះ មានទម្ងន់ 1.8គីឡូក្រាម មានតម្លៃ 85លានដុល្លារ ដោយមានការនាំយកគ្រឿងផ្គុំរបស់យន្តហោះ Wright Flyer របស់ 2នាក់បងប្អូនត្រកូល Wright ឡើងទៅជាមួយផងដែរ ដើម្បីរំឭកពីហេតុការណ៍ប្រវត្តិសាស្ត្រការហោះហើររបស់យន្តហោះ 1គ្រឿងនេះ ដែលធ្លាប់ហោះឡើងនៅឯ ឃីតធី ហក ក្នុងរដ្ឋ ណត ខារ៉ូឡៃណា កាលពីឆ្នាំ1903។

ភាពជោគជ័យក្នុងការហោះហើររបស់គ្រឿងយន្តឧទ្ធម្ភាគចក្រ 1គ្រឿងនេះ បានកើតឡើងក្រោមការសាកល្បងដ៏ពិបាក ដោយសារតែធាតុអាកាសនៅលើពិភពផ្កាយព្រះអង្គារ មានសភាពក្រាស់ណែនទាបជាងនៅលើផែនដីខ្លាំង ជាហេតុបណ្ដាលឱ្យកង្ហាររបស់គ្រឿងយន្ត ត្រូវច្នៃម៉ូដឡើងយ៉ាងពិសេស ដើម្បីឱ្យអាចវិលបានលឿនជាង ទើបអាចហោះឡើងបាន៕

ប្រភព៖ ទីភ្នាក់ងារព័ត៌មាន CNN
ប្រែសម្រួលដោយ តាវ៉ែនតា

April 24, 2021

CEO ផ្សាររូបិយវត្ថុឌីជីថល Thodex នាំយកប្រាក់ 2ពាន់លានដុល្លារអាមេរិក រត់ចោលស្រុក៖ អ្នកវិនិយោគ 400,000នាក់ យំលែងចេញ

ប្រធានាធិបតីប្រទេសទួរគី Recep Tayyip Erdogan ធ្លាប់បានព្រមានអំពីសញ្ញានៃការបំពានច្បាប់ និងថាមានរូបភាពបោកប្រាស់នៃទីផ្សាររូបិយវត្ថុអេឡិចត្រូនិក ក៏ប៉ុន្តែ ពុំមានពលរដ្ឋណាម្នាក់ស្ដាប់តាមនោះទេ។

សមត្ថកិច្ចនៃប្រទេសទួរគី ថ្មីៗនេះបានចាប់ខ្លួនមនុស្សចំនួន 60នាក់ ដែលទាក់ទិននឹងផ្សាររូបិយវត្ថុអេឡិចត្រូនិក Thodex ទន្ទឹមនឹងការប្រកាសតាមចាប់ខ្លួនជាលក្ខណៈអន្តរជាតិ ចំពោះនាយកប្រតិបត្តិឈ្មោះ Faruk Fatih Ozer ដោយចោទពីបទបោកប្រាស់។

សារព័ត៌មានក្នុងស្រុកបានឱ្យដឹងថា CEO នៃផ្សាររូបិយវត្ថុអេឡិចត្រូនិក Thodex បានគេចខ្លួនទៅកាន់ប្រទេសថៃ តាមជើងហោះហើរ Istanbul និងបាននាំយកទ្រព្យរបស់អ្នកវិនិយោគចំនួន 2ពាន់លានដុល្លារទៅតាមខ្លួន។ បញ្ហានេះបានធ្វើឱ្យកក្រើកទីផ្សាររូបិយវត្ថុអេឡិចត្រូនិកក្នុងពិភពលោក។ នៅពេលផ្សារជួញដូររូបិយវត្ថុអេឡិចត្រូនិក Thodex ត្រូវបានបិទទ្វារ ហើយក្រុមអ្នកវិនិយោគក្រៅប្រព័ន្ធ (speculation) ក៏មិនអាចចូលទៅកាន់គណនីរបស់ខ្លួនបាន ការិយាល័យរដ្ឋអាជ្ញានៃប្រទេសទួរគី ក៏ចាប់ផ្ដើមធ្វើការស៊ើបអង្កេត។

CEO Faruk Fatih Ozer របស់ Thedox នៅព្រលានយន្តហោះ Istanbul

សារព័ត៌មាន Demiroren News Agency ថ្មីៗនេះ បានចុះផ្សាយរូបភាពមួយសន្លឹកដែលបង្ហាញអំពីទិដ្ឋភាពដែល CEO Faruk Fatih Ozer កំពុងប្រញាប់ប្រញាល់ចាកចេញ្ពីប្រទេសទួរគី នៅឯព្រលានយន្តហោះ Istanbul។ លោក Ozer ក៏បានបិទរាល់មធ្យោបាយទំនាក់ទំនង និងបានបាត់ខ្លួនទាំងស្រុង បន្ទាប់ពីធនាគារជាតិទួរគី បានហាមទូទាត់ដោយប្រើរូបិយវត្ថុអេឡិចត្រូនិកជាផ្លូវការ។

តាមការពិត ផ្សារជួញដូររូបិយវត្ថុអេឡិចត្រូនិក Thodex ត្រូវបានគេសង្ស័យតាំងពីដំបូង ប៉ុន្តែដោយសារតែភាពលោភលន់របស់ក្រុមអ្នកវិនិយោគក្រៅប្រព័ន្ធ និងស្ថានភាពអតិផរណាខ្ពស់ ក៏ដូចជានិន្នាការប្រើប្រាស់រូបិយវត្ថុអេឡិចត្រូនិកនៅលើពិភពលោក មនុស្សជាច្រើនក៏បានវិនិយោគទៅលើផ្សារនេះ។

តាមធម្មតា CEO របស់ Thodex តែងតែប្រតិកម្មប្រឆាំង នៅពេលមានព័ត៌មានមិនល្អទាក់ទងនឹងរូបិយវត្ថុអេឡេចត្រូនិក។ ប៉ុន្តែ លើកនេះ នៅពេលដែលធនាគារជាតិ ហាមប្រើប្រាស់ប្រាក់ឌីជីថល CEO Ozer ក៏ត្រូវបង្ខំចិត្ត វេចបង្វេករត់ចោលប្រទេស ទុកឱ្យអ្នកវិនិយោគក្រៅប្រព័ន្ធជាង 400,000នាក់ ត្រូវបាត់បង់ប្រាក់។

យោងតាម Bloomberg ផ្សារជួញដូររូបិយវត្ថុអេឡិចត្រូនិក Thodex ទើបតែបានចាប់ផ្ដើមដាក់លក់ប្រាក់ Dogecoin កាលពីខែមុន។ ប្រាក់ Dogecoin ប្រមាណ 4លាន ត្រូវបានជួញដូរ ប៉ុន្តែអ្នកវិនិយោគជាច្រើនឱ្យដឹងថា ពួកគេមិនទាន់ទទួលបានរូបិយវត្ថុនេះនៅឡើយ បើទោះជាបានទូទាត់រូចរាល់។

ទាក់ទងនឹងបញ្ហារូបិយវត្ថុអេឡិចត្រូនិកនេះដែរ Bitcoin ក៏បានធ្លាក់ថ្លៃអស់ជាង 20% រាប់ចាប់ពីបានឡើងដល់កំពូល 63,000ដុល្លារ/bitcoin កាលពីថ្ងៃទី13 ខែមេសា ឆ្នាំ2021។ មូលហេតុចម្បងនៃការធ្លាក់ថ្លៃនេះគឺ ដោយសារបណ្ដាប្រទេស ចាប់ផ្ដើមរឹតបន្តឹងលើការគ្រប់គ្រងប្រាក់អេឡិចត្រូនិក។ នៅហសរដ្ឋអាមេរិក ប្រធានាធិបតី Joe Biden កំពុងពិនិត្យលើការដាក់ឱ្យប្រើប្រាស់គោលនយោបាយថ្មី ដែលយកពន្ធបន្ថែមពីវិស័យរូបិយវត្ថុអេឡិចត្រូនិក ដែលនេះនឹងធ្វើឱ្យការជួញដូរត្រូវជួបបញ្ហា៕

ប្រភព៖ CNBC
ប្រែសម្រួល៖ បុត្រា

April 24, 2021

យកអុកស៊ីហ្ស៊ែនតាមខ្លួន!? ឥណ្ឌា ទប់លែងឈ្នះ ឆ្លងកូវីដជាង 3សែននាក់ក្នុង 1ថ្ងៃ

ចំនួនអ្នកជំងឺកូវីដ-19 នៅក្នុងប្រទេសឥណ្ឌា បានកើនឡើងច្រើនជាង 3សែននាក់ ជាថ្ងៃទី2 ជាប់ៗគ្នា កណ្ដាលវិបត្តិខ្វះខ្យល់អុកស៊ីហ្ស៊ែន។

ទីភ្នាក់ងារព័ត៌មានអន្តរជាតិ បានរាយការណ៍ពីទីក្រុងនីវដេលី ប្រទេសឥណ្ឌា កាលពីថ្ងៃទី23 មេសាថា ក្រសួងសុខាភិបាលរបស់ឥណ្ឌា បានរាយការណ៍ពីស្ថិតិថ្មីពាក់ព័ន្ធនឹងជំងឺកូវីដ-19 នៅក្នុងប្រទេស ដោយបានរកឃើញអ្នកជំងឺថ្មី 332,730នាក់ ជាចំនួនមួយ ខ្ពស់បំផុតជាប្រវត្តិសាស្ត្រ ទាំងលំដាប់ប្រទេស និងលំដាប់ពិភពលោក ដោយកើនឡើង 17,895នាក់ ពីស្ថិតិចាស់កាលពីថ្ងៃព្រហស្បតិ៍ ដែលនេះគឺជាថ្ងៃទី2 ជាប់គ្នាហើយ ដែលប្រទេសឥណ្ឌា បានអះអាងពីអ្នកឆ្លងមេរោគថ្មីប្រចាំថ្ងៃ ច្រើនជាង 3សែននាក់ និងធ្វើឱ្យចំនួនអ្នកជំងឺកូវីដ-19 សរុប ច្រើនជាង 16លាននាក់ ច្រើនជាប់លំដាប់លេខ2 បន្ទាប់ពីសហរដ្ឋអាមេរិក។

ខណៈដែលក្នុងជុំ 1ថ្ងៃដូចគ្នា មានអ្នកស្លាប់ទាំងអស់ 2,263នាក់ ជាស្ថិតិស្លាប់ប្រចាំថ្ងៃខ្ពស់បំផុតដូចគ្នា ចាប់តាំងពីមានការឆ្លងរាលដាលនៅក្នុងប្រទេសកាលពីខែមករាមក ធ្វើឱ្យបច្ចុប្បន្នប្រទេសឥណ្ឌា មានចំនួនអ្នកស្លាប់ដោយសារជំងឺកូវីដ-19 យ៉ាងតិច 186,920នាក់ ជាប់លំដាប់ថ្នាក់លេខ3 បន្ទាប់ពីសហរដ្ឋអាមេរិក និងប្រេស៊ីល ចំណែកស្ថិតិអ្នកជំងឺ ដែលនៅសល់ និងកំពុងព្យាបាលក្នុងប្រព័ន្ធមន្ទីរពេទ្យ មានចំនួនយ៉ាងតិច 2,428,600នាក់។

ទាំងអស់នេះ មន្ទីរពេទ្យនៅក្នុងប្រទេសឥណ្ឌា យ៉ាងតិច 2កន្លែង បានទទួលស្គាល់ថា កំពុងជួបនឹងវិបត្តិខ្វះខ្យល់អុកស៊ីហ្ស៊ែន ចំណែកលោកនាយករដ្ឋមន្ត្រី ណារិនដ្រា ម៉ូឌី បានត្រៀមប្រជុំបន្ទាន់ ជាមួយប្រមុខមន្ត្រី ក្នុងរដ្ឋដែលបញ្ហាអុកស៊ីហ្ស៊ែនមិនគ្រប់គ្រាន់ និងក្រុមហ៊ុនផលិតខ្យល់អុកស៊ីហ្ស៊ែនទាំងអស់នៅថ្ងៃនេះ៕

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 24, 2021

ក្ដីសង្ឃឹមក្នុងការជួយសង្គ្រោះនាវិកជាង 50នាក់ នៃនាវាមុជទឹកប្រទេសឥណ្ឌូនេស៊ីដែលបាត់ខ្លួន បានរលាយបាត់ទៅហើយ!

ក្ដីសង្ឃឹមដែលថានឹងអាចជួយសង្គ្រោះក្រុមនាវិកជាង 50នាក់នៃនាវាមុជទឹករបស់ឥណ្ឌូនេស៊ី ដែលកំពុងបាត់ខ្លួន បានរលាយបាត់បង់អស់រលីង នៅពេលដែលបរិមាណអុកស៊ីសែនរបស់នាវា ត្រូវបានគេគណនាឃើញថា អស់គ្មានសល់ នៅព្រឹកនេះ។

ក្នុងគ្រាដែលទាហានរាប់រយនាក់កំពុងចូលរួមស្វែងរកនាវាមុជទឹក KRI Nanggala 402 ក្រុមមន្ត្រីឥណ្ឌូនេស៊ី បានឱ្យដឹងថា បរិមាណអុកស៊ីសែនដែលមាននៅក្នុងនាវានេះ អាចប្រើបានតែក្នុងរយៈពេល 72ម៉ោងទៀតប៉ុណ្ណោះ បន្ទាប់ពីដាច់ចរន្តអគ្គិសនី។ កាលកំណត់នោះ បានកន្លងផុតទៅនៅវេលាទៀបភ្លឺនៃថ្ងៃទី24 ខែមេសានេះ ប៉ុន្តែ គេនៅមិនទាន់រកឃើញនាវា ក៏ដូចជាក្រុមនាវិកចំនួន 53នាក់នោះដដែល។

នាវាមុជទឹក KRI Nanggala បានទាក់ទងមកកាន់បញ្ជាការដ្ឋានកាលពីវេលាម៉ោង 3ទៀបភ្លឺ នៃថ្ងៃទី21 ខែមេសា ដើម្បីសុំការអនុញ្ញាត មុជទៅក្រោមសមុទ្រ ហើយនាវានេះក៏បានដាច់ទំនាក់ទំនងទាំងស្រុងនៅវេលាម៉ោង 4កន្លះ នៃថ្ងៃដដែល។ ក្រុមអ្នកជួយសង្គ្រោះឥណ្ឌូនេស៊ី កាលពីថ្ងៃទី23 ខែមេសា បានរកឃើញសញ្ញានៃវត្ថុមួយដែលមាន «ដែនម៉ាញេទិកខ្ពស់» កំពុងលិចក្រោមទឹក ជម្រៅពី 50-100ម៉ែត្រ នៅភាគខាងជើងសមុទ្រ Bali ប៉ុន្តែ មិនទាន់ដឹងច្បាស់ថា វាជាអ្វី។

មុននោះ កងទ័ពជើងទឹកឥណ្ឌូនេស៊ី បានសន្និដ្ឋានថា នាវាមុជទឹកនេះ ទំនងជាបានលិចក្នុងជម្រៅពី 600-700ម៉ែត្រ ជ្រៅជាងឆ្ងាយបើធៀបនឹងជម្រៅអតិបរមាដែលនាវានេះអាចធ្វើសកម្មភាពបាន។ ទឹកសមុទ្រជម្រៅ 700ម៉ែត្រ មានសម្ពាធខ្ពស់ជាង 70ដង បើធៀបនឹងសម្ពាធបរិយាកាសលើផ្ទៃទឹកសមុទ្រ ដូច្នេះ សម្បកនាវាទំហំមួយម៉ែត្រក្រឡានឹងត្រូវរងសម្ពាធជាង 720តោន។ នាវាមុជទឹកធម្មតា នៅពេលស្ថិតក្នុងជម្រៅបែបនេះ អាចនឹងត្រូវបាត់បង់រូបរាងដើម ឬក៏អាចត្រូវសម្ពាធទឹកសមុទ្រច្របាច់ កៀបខ្ទេចខ្ទី បើសិនជាដងខ្លួនរបស់វាមានបញ្ហា។

នាវាមុជទឹក KRI Nanggala ទម្ងន់ 1,395តោន ត្រូវបានផលិតនៅប្រទេសអាល្លឺម៉ង់កាលពីឆ្នាំ1977 និងត្រូវបានដាក់ឱ្យប្រើប្រាស់នៅក្នុងជួរកងទ័ពជើងទឹកឥណ្ឌូនេស៊ី ចាប់ពីឆ្នាំ1981៕

ប្រភព៖ AFP
ប្រែសម្រួល៖ បុត្រា

April 24, 2021

Author: សឿន សំណាង