សឿន សំណាង - La Reine Media

អាមេរិក សន្យាថា កសាង ហ្គាហ្សា ឡើងវិញ និងបន្ថែមរ៉ុក្កែតឱ្យប្រព័ន្ធ Iron Dome របស់អ៊ីស្រាអែល តែមិន «លេងចូល» ក្រុម ហាម៉ាស

ប្រធានាធិបតីសហរដ្ឋអាមេរិក បានសន្យាថា នឹងជួយកសាងតំបន់ ហ្គាហ្សា របស់ ប៉ាលេស្ទីន និងស្ដារប្រព័ន្ធការពារមីស៊ីល Iron Dome របស់កងទ័ព អ៊ីស្រាអែល ឡើងវិញ បន្ទាប់ពី អ៊ីស្រាអែល និង ប៉ាលេស្ទីន សម្រេចបានកិច្ចព្រមព្រៀងឈប់បាញ់នៅ ហ្គាហ្សា។

នៅក្នុងប្រកាសមួយ ពីសេតវិមាន កាលពីថ្ងៃទី20 ខែឧសភា ប្រធានាធិបតី សហរដ្ឋអាមេរិក លោក Joe Biden បានថ្កោលទោសកងជីវពល ហាម៉ាស និងបានឱ្យដឹងថា លោកបានពិភាក្សាតាមទូរស័ព្ទចំនួន 6លើក ជាមួយនឹងនាយករដ្ឋមន្ត្រី អ៊ីស្រាអែល លោក Benjamin Netanyahu ក្នុងអំឡុង 11ថ្ងៃ ដែល អ៊ីស្រាអែល និងក្រុម ហាម៉ាស ប្រយុទ្ធគ្នា។

«យើងនៅតែសន្យាថា ធ្វើការជាមួយអង្គការសហប្រជាជាតិ និងភាគីអន្តរជាតិផ្សេងទៀតដែលពាក់ព័ន្ធ ដើម្បីផ្ដល់ជំនួយមនុស្សធម៌ឆាប់រហ័ស និងសហការផ្ដល់ជំនួយជាអន្តរជាតិ ដល់ប្រជាជននៅតំបន់ ហ្គាហ្សា ក៏ដូចជាការកសាងតំបន់នេះឡើងវិញ» លោក Biden ថ្លែងដូច្នេះ។

ក៏ប៉ុន្តែ ប្រធានាធិបតី សហរដ្ឋអាមេរិក សង្កត់ធ្ងន់ថា៖ «យើងនឹងធ្វើដូច្នេះ នៅក្នុងកិច្ចសហការគ្រប់ជ្រុងជ្រោយជាមួយអាជ្ញាធរ ប៉ាលេស្ទីន តែប៉ុណ្ណោះ ពោកគឺមិនមែនជាមួយក្រុម ហាម៉ាស នោះឡើយ ហើយមិនអនុញ្ញាតឱ្យក្រុម ហាម៉ាស បំពាក់អាវុធរបស់ខ្លួនឡើងវិញ»។

ហាម៉ាស ដែលជាអង្គការអ៊ីស្លាមជ្រុលនិយមមួយ មានទំនាក់ទំនងជាមួយនឹងអង្គការបងប្អូនមូស្លីម របស់អេហ្ស៊ីប (Egypt’s Muslim Brotherhood) បានគ្រប់គ្រងតំបន់ ហ្គាហ្សា ចាប់តាំងពីឆ្នាំ2017 ខណៈដែលអាជ្ញាធរ ប៉ាលេស្ទីន របស់ប្រធានាធិបតី Mahmoud Abbas គ្រប់គ្រងបានតែតំបន់ វេសប៊ែង (West Bank) ប៉ុណ្ណោះ។

ផែនទីបង្ហាញពីការបាត់បង់ទឹកដីរបស់ ប៉ាលេស្ទីន (រូបភាព៖ palestinecampaign)

លោក Biden ក៏បានសង្កត់ធ្ងន់ដែរថា សហរដ្ឋអាមេរិក នឹងជួយបំពាក់អាវុធឡើងវិញ ដល់ប្រព័ន្ធការពារដែនអាកាស Iron Dome របស់ប្រទេសអ៊ីស្រាអែល ដែលបានស្ទាក់ចាត់ និងកម្ទេចរ៉ុក្កែតស្ទើរតែទាំងអស់ ដែលបាញ់ចេញពី ហ្គាហ្សា។

កិច្ចព្រមព្រៀងឈប់បាញ់មួយ បានមានសុពលភាពនៅតំបន់ ហ្គាហ្សា ចាប់ពីវេលាទៀបភ្លឺ នៃថ្ងៃទី21 ខែឧសភា បានបញ្ចប់ការប្រយុទ្ធគ្នាអស់រយៈពេល 11ថ្ងៃរវាង អ៊ីស្រាអែល និង ហាម៉ាស បន្ទាប់ពីប្រទេសអេហ្ស៊ីប ធ្វើជាអាជ្ញាកណ្ដាល។

ផែនទីបច្ចុប្បន្នរបស់ ប៉ាលេស្ទីន (រូបភាព៖ BBC)

យ៉ាងនេះក្ដី លោក Biden នៅតែបន្តអះអាងថា៖ «សហរដ្ឋអាមេរិក គាំទ្រទាំងស្រុងចំពោះសិទ្ធិការពារខ្លួនរបស់ អ៊ីស្រាអែល នៅចំពោះមុខការវាយប្រហារដោយរ៉ុក្កែតផ្ដេសផ្ដាស ពីសំណាក់ក្រុម ហាម៉ាស និងក្រុមភរវកម្មដទៃទៀត ដែលបានឆក់យកជីវិតពលរដ្ឋគ្មានកំហុសនៅ អ៊ីស្រាអែល»។

ចាប់តាំងពីផ្ទុះការវាយប្រហារគ្នារ វាងកងជីវពល ហាម៉ាស និងកងទ័ព អ៊ីស្រាអែល កាលពីថ្ងៃទី10 ខែឧសភា ក្រុមមន្ត្រីសុខាភិបាលនៅតំបន់ ហ្គាហ្សា បានឱ្យដឹងថា ពលរដ្ឋ ប៉ាលេស្ទីន 232នាក់ ក្នុងនោះមានទាំងកុមារចំនួន 65នាក់ និងស្ត្រីចំនួន 39នាក់ បានបាត់បង់ជីវិត និងជាង 1,900នាក់ បានរងរបួស នៅក្នុងការវាយប្រហារដោយយន្តហោះចម្បាំងរបស់ អ៊ីស្រាអែល។ ចំណែកភាគី អ៊ីស្រាអែល វិញ មានពលរដ្ឋប្រមាណតែ 10នាក់ប៉ុណ្ណោះ បានស្លាប់ក្រោមគ្រាប់រ៉ុក្កែត របស់ ហាម៉ាស។

នៅពេលកិច្ចព្រមព្រៀងឈប់បាញ់ រវាង អ៊ីស្រាអែល និងកងជីវពលរបស់ចលនាប៉ាលេស្ទីន ត្រូវបានបង្កើតឡើង នៅតំបន់ ហ្គាហ្សា គេឃើញមានប្រជាជន ប៉ាលេស្ទីន ជាច្រើន នាំគ្នាចេញមកអបអរសាទរ៕

ប្រភព៖ Al Jazeera, NYPost
ប្រែសម្រួល៖ បុត្រា

May 21, 2021

អ៊ីស្រាអែល និង ហាម៉ាស សម្រេចបានកិច្ចព្រមព្រៀងឈប់បាញ់! សហរដ្ឋអាមេរិក និងអង់គ្លេស សំដែងការសាទរ

ប្រធានាធិបតីសហរដ្ឋអាមេរិក និងរដ្ឋមន្ត្រីការបរទេសអង់គ្លេង បានសំដែងការអបអរសាទរចំពោះកិច្ចព្រមព្រៀងឈប់បាញ់ដែលសម្រេចបានរវាង អ៊ីស្រាអែល និងកងជីវពលហាម៉ាស នៃចលនាប៉ាលេស្ទីន។

ប្រធានាធិបតី Joe Biden កាលពីថ្ងៃទី20 ខែឧសភា ឆ្នាំ2021 បានអបអរសាទរចំពោះកិច្ចព្រមព្រៀងឈប់បាញ់ដែលសម្រេចបានរវាង អ៊ីស្រាអែល និងកងជីវពលហាម៉ាស របស់ប៉ាលេស្ទីន និងបានឱ្យដឹងថា សហរដ្ឋអាមេរិក នឹងគាំទ្រដល់តំបន់ ហ្គាហ្សា ដោយកញ្ចប់ជំនួយមនុស្សធម៌។

ពីសេតវិមាន ប្រធានាធិបតី Joe Biden បាននិយាយថា៖ «ខ្ញុំជឿថា យើងមានឱកាសពិតប្រាកដ ដើម្បីធ្វើឱ្យមានការរីកចម្រើន ហើយខ្ញុំសន្យាថា នឹងប្រឹងប្រែងសម្រេចឱ្យបានកិច្ចការនោះ»។ លោក Biden ក៏បានវាយតម្លៃខ្ពស់ចំពោះតួនាទីជាអាជ្ញាកណ្ដាលរបស់ប្រទេស អេហ្ស៊ីប នៅក្នុងការរៀបចំកិច្ចព្រមព្រៀងឈប់បាញ់នេះ។

ចំណែករដ្ឋមន្ត្រីការបរទេសអង់គ្លេង លោក Dominic Raab ក៏សំដែងការសាទរចំពោះកិច្ចព្រមព្រៀងខាងលើ។ ទន្ទឹមនឹងនេះ លោកក៏បានអំពាវនាវឱ្យគ្រប់ភាគី សហការគ្នាដើម្បីរក្សាបទឈប់បាញ់ឱ្យបានយូរអង្វែង និងបញ្ចប់អំពើហិង្សានៅក្នុងតំបន់។ លោក Dominic Raab បានសរសេរនៅលើទំព័រ Twitter ថា៖ «គ្រប់ភាគី ត្រូវការកិច្ចសហការគ្នា ដើម្បីរក្សាបទឈប់បាញ់ឱ្យបានយូរអង្វែង និងបញ្ចប់បញ្ហាវិលវល់នៃអំពើហិង្សាដែលមិនអាចទទួលយកបាន ក៏ដូចជាការបាត់បង់ជីវិតប្រជាពលរដ្ឋ»។

ការប្រយុទ្ធគ្នា បណ្ដាលឱ្យភាគី អ៊ីស្រាអែល និង ប៉ាលេស្ទីន រងការខូចខាតយ៉ាងធ្ងន់ធ្ងន់

សូមបញ្ជាក់ថា កាលពីថ្ងៃទី20 ខែឧសភា ឆ្នាំ2021 ប្រទេស អ៊ីស្រាអែល និងចលនា ហាម៉ាស របស់ ប៉ាលេស្ទីន បានប្រកាសថា សម្រេចបានកិច្ចព្រមព្រៀងឈប់បាញ់មួយដែលមានសុពលភាពចាប់ពីវេលាម៉ោង 2 នៃថ្ងៃទី21 ខែឧសភា ឆ្នាំ2021 (ម៉ោងក្នុងស្រុងក)។ កិច្ចព្រមព្រៀងនេះ ត្រូវបានលើកឡើងក្នុងគ្រាដែលទ័ពអាកាសរបស់ អ៊ីស្រាអែល បន្តវាយប្រហារពេញមួយយប់ នៃថ្ងៃទី20 ខែឧសភា។

ក្នុងសប្ដាហ៍កន្លងទៅ កងទ័ពអ៊ីស្រាអែល បានវាយប្រហារតាមផ្លូវអាកាស តម្រង់គោលដៅនានារបស់ ហាម៉ាស នៅតំបន់ ហ្គាហ្សា ខណៈដែលកងជីវពល ហាម៉ាស ក៏បានបាញ់រ៉ុក្កែត ជាង 3,000គ្រាប់ សំដៅគោលដៅនានារបស់ អ៊ីស្រាអែល ផងដែរ។

ទិន្នន័យរបស់ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ បានឱ្យដឹងថា ជនជាតិប៉ាលេស្ទីន យ៉ាងតិច 219នាក់ ក្នុងនោះមានកុមារ 63នាក់ផងដែរ បានបាត់បង់ជីវិត នៅក្នុងការប្រយុទ្ធគ្នា រវាង អ៊ីស្រាអែល និង ហាម៉ាស។ ប្រភពព័ត៌មានពី អ៊ីស្រាអែល ឱ្យដឹងថា ជនជាតិអ៊ីស្រាអែល 12នាក់ បានស្លាប់ ក្នុងនោះមានកុមារ 2នាក់ និងទាហាន 1នាក់។ ក្រៅពីនេះ ជម្លោះរវាងភាគីទាំងពីរនេះ ក៏បានធ្វើឱ្យមនុស្សរាប់ពាន់នាក់ រងរបួសផងដែរ ដែលភាគច្រើន កើតមាននៅក្នុងតំបន់ ហ្គាហ្សា និងតំបន់ វេសប៊ែង (West Bank)៕

ប្រភព៖ Reuters, Aljazeera
ប្រែសម្រួល៖ បុត្រា

May 21, 2021

“ប្លន់យន្តហោះរបស់កងទ័ពប៉ូឡូញ លើដែនអាកាសអឺរ៉ុប”! ការប្រកាសអាសន្ននេះ ធ្វើឱ្យអ្នកតាមដានព័ត៌មាន ច្របូកច្របល់!

សារព័ត៌មានអង់គ្លេស បានរាយការណ៍ថា ថ្ងៃទី20 ខែឧសភានេះ មានករណីប្លន់យន្តហោះរបស់កងទ័ពអាកាសនៃប្រទេសប៉ូឡូញ ខណៈដែលយន្តហោះនេះកំពុងស្ថិតនៅក្នុងដែនអាកាសអឺរ៉ុប។

យោងតាមទំព័រ Daily Express យន្តហោះមួយគ្រឿងរបស់ទ័ពអាកាសនៃប្រទេសប៉ូឡូញ ត្រូវបានចោរប្លន់ និងកំពុងហោះក្នុងដែនអាកាសអឺរ៉ុប ឆ្ពោះទៅកាន់មហាសមុទ្រអាត្លង់ទិក។

សារព័ត៌មាន News24 របស់បារាំង ឱ្យដឹងថា ក្រុមចោរប្លន់ បានគ្រប់គ្រងយន្តហោះនេះទាំងស្រុង និងកំពុងបញ្ជាឱ្យហោះទៅកាន់មហាសមុទ្រអាត្លង់ទិក។ ចំណែកប្រភពព័ត៌មានមួយចំនួនផ្សេងទៀត បញ្ជាក់ថា ករណីប្លន់នេះគឺជាផ្នែកមួយនៃសមយុទ្ធរបស់កងទ័ព។

កងទ័ពប៉ូឡូញ បានឱ្យដឹងថា សមយុទ្ធដែលមានឈ្មោះថា “tactical-special exercise renegade/Sarex-21” នេះ គឺដើម្បីប្រឆាំងនឹងការគំរាមពីអំពើភេរវកម្មនៅលើអាកាស និងសមុទ្រ។

កងទ័ពប៉ូឡូញ បានសរសេរនៅលើគេហទំព័ររបស់ខ្លួនថា៖ «សមយុទ្ធនេះ មាន 4វគ្គ ក្នុងនោះ វគ្គដំបូងគឺទាក់ទិននឹង «ករណីប្លន់យន្តហោះស៊ីវិលមួយគ្រឿង ដើម្បីជាមធ្យោបាយសម្រាប់ការវាយប្រហារភេរវកម្ម ដែលអាចគំរាមកំហែងដល់សន្តិសុខជាតិ»។ វគ្គពីរ «ទាក់ទិននឹងករណីបុកគ្នារវាងកប៉ាល់នៅលើសមុទ្រ ដែលមានការឆាបឆេះ និងលិច រួមនឹងបេសកកម្មជួយសង្គ្រោះ»។ វគ្គបន្ទាន់ចំនួនពីរទៀត នោះគឺ «ទាក់ទិននឹងការស្វែងរក និងសង្គ្រោះ បន្ទាប់ពីករណីគ្រោះថ្នាក់ធ្លាក់យន្តហោះ នៅតំបន់ពិបាកស្វែងរក»។

ខាងកងទ័ពនៃប្រទេសប៉ូឡូញ បានបញ្ជាក់ថា សមយុទ្ធខាងលើនេះ កំពុងត្រូវបានធ្វើឡើងនៅលើដែនអាកាសរបស់ប្រទេសប៉ូឡូញ៕

ប្រភព៖ Express
ប្រែសម្រួល៖ បុត្រា

May 20, 2021

CEO នៃក្រុមហ៊ុនមេ របស់ TikTok លាលែងពីតំណែង ក៏ដោយសារតែ «ខ្វះជំនាញជាអ្នកដឹកនាំល្អ»

យោងតាមសារព័ត៌មាន Reuters លោក Zhang Yiming សហស្ថាបនិករបស់ ByteDance ដែលជាក្រុមហ៊ុនមេ នៃបណ្ដាញសង្គម TikTok ទើបតែបានប្រកាសថា នឹងលាលែងពីតំណែង CEO ហើយកៅអីនេះ នឹងត្រូវប្រគល់ឱ្យសហស្ថាបនិក Rubo Liang។

នេះគឺជាសកម្មភាពកែទម្រង់ថ្នាក់ដឹកនាំថ្មីបំផុតរបស់ ByteDance រាប់ចាប់ពីពេលបង្ហាញខ្លួនកាលពីឆ្នាំ2012។ ក្រុមហ៊ុន ByteDance បានរីកចម្រើនយ៉ាងឆាប់រហ័ស និងក្លាយជាកម្លាំងមួយដែលគ្រប់គ្រងទីផ្សារបណ្ដាញសង្គមចិន ហើយប្រែក្លាយ TikTok ទៅជាកម្មវិធីចែករំលែកវីដេអូខ្លី ដ៏ពេញនិយមនៅលើពិភពលោក។

Zhang Yiming បានសរសេរនៅក្នុងសេចក្ដីប្រកាសរបស់ខ្លួនថា Rubo Liang ដែលបច្ចុប្បន្នកំពុងកាន់កាប់តំណែងប្រធានផ្នែកធនធានមនុស្ស គឺជា «ដៃគូដែលមិនអាចកាត់ថ្លៃបាន និងជាមនុស្សដែលបានជួយកែលម្អដំណើរការជ្រើសរើស និងគ្រប់គ្រងបុគ្គលិកនៅក្រុមហ៊ុន ByteDance។ លោក Zhang Yiming បន្ថែមថា នឹងធ្វើការជិតស្និទ្ធជាមួយនឹងលោក Rubo Liang នា 6ខែទៀត ដើម្បីធានាថា ដំណើរការនៃការផ្ទេរតំណែង ប្រព្រឹត្តិទៅបានរលូត។

ការសម្រេចចិត្តនេះ ត្រូវបានធ្វើឡើងបន្ទាប់ពី Zhang Yiming បានពិចារណាអស់ជាច្រើនខែ អំពីបញ្ហាថា តើអាចមានឥទ្ធិពលធំជាងណាមួយកើតឡើងចំពោះគំនិតច្នៃប្រឌិតសម្រាប់រយៈពេលយូររបស់ ByteDance ដែរ ឬអត់ បើសិនលោកផ្ទេរតំណែង CEO ទៅឱ្យអ្នកផ្សេង។

«ជាការពិតគឺថា ខ្ញុំខ្វះជំនាញមួយចំនួនដើម្បីក្លាយជាអ្នកដឹកនាំល្អ។ ខ្ញុំចូលចិត្តផ្ដោតលើការវិភាគ និងគោលការណ៍នៃទីផ្សារ ហើយការប្រើប្រាស់សម្មតិកម្មនោះអាចកាត់បន្ថយពេលវេលាធ្វើកិច្ចការគ្រប់គ្រង ជំនួសឱ្យការគ្រប់គ្រងពិតប្រាកដ»។

លោក Zhang Yiming វ័យ 38ឆ្នាំ គឺជាមហាសេដ្ឋីដែលមានទ្រព្យច្រើនជាងគេមួយរូបនៅក្នុងពិភពលោក។ កើតនៅក្នុងទីក្រុង Longyan នៃខេត្ត Fujian ប្រទេសចិន លោក Zhang គឺជាកូនប្រុសតែមួយគត់នៅក្នុងគ្រួសារ។ លោកបានសិក្សាផ្នែកសរសេរកូដកុំព្យូទ័រ នៅសាកលវិទ្យាល័យ Nankai។

ក្រោយពីបានបញ្ចប់ការសិក្សាភ្លាម លោក Zhang ក៏បានចូលធ្វើការឱ្យក្រុមហ៊ុន Microsoft ប៉ុន្តែ ក្រោយមក ដោយសារមានអារម្មណ៍ធុញនឹងការងារ លោកក៏បានគិតដល់ការរកស៊ីដោយខ្លួនឯង។

របត់ដ៏សំខាន់របស់ Zhang បានមកដល់ នៅក្នុងឆ្នាំ2012 នៅពេលដែលលោកទាក់ទាញបានចំណាប់អារម្មណ៍ដ៏ខ្លាំងក្លាលើកដំបូង ជាមួយនឹង ByteDance ដែលជាកម្មវិធីចែករំលែករឿងរ៉ាវកំប្លែង បើទោះជាក្រោយមក ត្រូវបានអាជ្ញាធរស្នើឱ្យលុបចោល។

បន្ទាប់ពីការប្រឹងប្រែងជាមួយនឹងកម្មវិធី (App) នៅក្នុងវិស័យព័ត៌មាន ទើប Zhang បង្កើតបាន TikTok ដែលបច្ចុប្បន្នមានអ្នកលេងនៅជុំវិញពិភពលោក ជាង 1ពាន់លាននាក់ បូករួមទាំង Douyin ដែលជាកំណែ TikTok នៅប្រទេសចិន។ ក្រុមហ៊ុននេះ ទាក់ទាញបានអ្នកវិនិយោគធំៗ រួមមាន ក្រុមហ៊ុន Softbank, Sequoia Capital ។ល។

លោក Zhang Yiming វ័យ 38ឆ្នាំ គឺជាមហាសេដ្ឋីដែលមានទ្រព្យច្រើនជាងគេមួយរូបនៅក្នុងពិភពលោក។

Bytedance បច្ចុប្បន្នជាក្រុមហ៊ុនដែលមានតម្លៃជាងគេក្នុងពិភពលោក ដោយមានមូលបត្រដែលត្រូវបានជួញដូរជាមួយនឹងការកំណត់តម្លៃក្រុមហ៊ុនឡើងដល់ជាង 250ពាន់លានដុល្លារអាមេរិក នៅលើទីផ្សារបន្ទាប់ (Secondary market)។

ឆ្នាំ2019 ByteDance រកបានប្រាក់ចំណេញសុទ្ធ ជាង 3ពាន់លានដុល្លារអាមេរិក ដោយប្រាក់ចំណូលកើនទ្វេដង ឡើងដល់ 17ពាន់លានដុល្លារ ធៀបនឹង 7.4ពាន់លានដុល្លារកាលពីឆ្នាំ2018។ ប្រភពព័ត៌មានមួយចំនួន ឱ្យដឹងថា បច្ចុប្បន្ន ក្រុមហ៊ុននេះកាន់កាប់សាច់ប្រាក់សុទ្ធជាង 6ពាន់លានដុល្លារឯណោះ។

ក្រៅពី TikTok និងកំណែ TikTok សម្រាប់ជនជាតិ ដែលហៅថា Douyin ក្រុមហ៊ុន ByteDance ក៏នៅមាន App ជាច្រើនផ្សេងទៀត រួមមានដូចជា Toutiao និង App សម្រាប់ទំនាក់ទំនងក្នុងក្រុមហ៊ុន ដែលមានឈ្មោះថា Feishu ។ល។ ជាសរុប ByteDance ទាក់ទាញអ្នកប្រើប្រាស់ប្រចាំខែ បានប្រមាណ 1.5ពាន់លាននាក់។

គិតត្រឹមខែវិច្ឆិកា ឆ្នាំ2019 ក្រុមហ៊ុននេះ មានបុគ្គលិកជាង 60,000នាក់ និងធ្វើសកម្មភាពក្នុងទីផ្សារជាង 150ប្រទេស និងតំបន់។ ពួកគេមានការិយាល័យនៅក្នុងទីក្រុងចំនួន 126 ក្នុងពិភពលោក រួមមានទាំងទីក្រុងសៀងហៃ, នីវយ៉ក, ក្រុងឡុងដ៍, បារីស, ម៉ុមបៃ, សិង្ហបុរី, ហ្សាការតា, សេអ៊ូល និងតូខ្យូ។ល។

ប្រភព៖ Reuters
ប្រែសម្រួល៖ បុត្រា

May 20, 2021

ទីផ្សាររូបិយវត្ថុអេឡិចត្រូនិក បាត់បង់ 1,000,000,000,000 ដុល្លារអាមេរិក ចាប់តាំងពីតម្លៃឡើងដល់កំពូល កាលពីខែមេសា

ការធ្លាក់ថ្លៃដ៏ខ្លាំងនៃរូបិយវត្ថិអេឡិចត្រូនិក Bitcoin កាលពីម្សិលមិញ (19 ឧសភា) បាននាំឱ្យទីផ្សាររូបិយវត្ថិអេឡិចត្រូនិក (cryptocurrency) ទាំងមូល បាត់បង់ជិត 1ម៉ឺនកោដិដុល្លារអាមេរិក (1,000,000,000,000 ដុល្លារអាមេរិក/ជាង 4,073,000,000,000,000 រៀល) បើធៀបនឹងតម្លៃដែលឡើងដល់កំពូល កាលពីខែមេសា ឆ្នាំ2021។

នៅក្នុងអំឡុងពេលធ្លាក់ថ្លៃចុះទាបបំផុត តម្លៃរបស់ Bitcoin បានថយចុះ 12,000ដុល្លារ ប្រហាក់ប្រហែលនឹង 30% ហើយត្រូវជួញដូរក្នុងតម្លៃត្រឹមតែជាង 30,000ដុល្លារអាមេរិក/bitcoin។ ចំណែក Ether ដែលជារូបិយវត្ថុអេឡិចត្រូនិកធំជាងគេលំដាប់ទីពីរក្នុងពិភពលោក បន្ទាប់ពី Bitcoin ក៏បានធ្លាក់ថ្លៃប្រមាណ 40% ខណៈរូបិយវត្ថុអេឡិចត្រូនិក Dogecoin ដាំក្បាលចុះរហូតដល់ 50%។

ទូរទស្សន៍ RT របស់រុស្ស៊ីវិញ បានរាយការណ៍ថា គិតមកដល់ម៉ោង 13និង58នាទី នៃថ្ងៃទី19 ខែឧសភា (ម៉ោង 20និង58នាទី នៅកម្ពុជា) Bitcoin បានធ្លាក់ថ្លៃរហូតដល់ 50% ធៀបនឹងតម្លៃខ្ពស់បំផុត (ជិត 65,000 ដុល្លារ/bitcoin) កាលពីខែមេសា។

ការដាំក្បាលចុះនេះ បានកើតឡើង បន្ទាប់ពីធនាគារប្រជាជនចិន ប្រកាសថា មិនទទួលយករូបិយវត្ថុអេឡិចត្រូនិក សម្រាប់ការទូទាត់។ ស្ថាប័នគ្រប់គ្រងហិរញ្ញវត្ថុនេះ បានឱ្យដឹងថា រូបិយវត្ថុអេឡិចត្រូនិក មិនមានពិតប្រាកដ ហើយប្រកាសថា មិនអាចប្រើប្រាស់វាដើម្បីជួញដូរក្នុងទីផ្សារ។

រូបិយវត្ថុអេឡិចត្រូនិក នៅលើទីផ្សារ «នាំគ្នា» ឡើងពណ៌ក្រហម គួរឱ្យព្រួយបារម្ភ

ទាក់ទិននឹងការប្រកាសរបស់ចិន លោក Paul Haswell អ្នកជំនាញមកពីក្រុមហ៊ុនច្បាប់ Pinsent Masons នៅទីក្រុងហុងកុង បានប្រាប់សារព័ត៌មាន Financial Times ថា៖ «មូលហេតុគឺដោយសារពួកគេមានប្រាក់យ៉ន់អេឡិចត្រូនិកផ្ទាល់ខ្លួន និងមួយផ្នែកទៀតគឺដោយសារកង្វះការគ្រប់គ្រងលើលំហូរប្រាក់។ ក្រៅពីនេះ ពួក (អាជ្ញាធរចិន) ព្យាយាមធានាឱ្យបានប្រាកដថា គ្រប់គ្នាមិនចាញ់បោកគេ»។

ការប្រកាសខាងលើរបស់ធនាគារកណ្ដាលចិន បានធ្វើឱ្យរលកនៃការលក់ចេញ Bitcoin របស់ក្រុមអ្នកវិនិយោគ កាន់តែកើនឡើងច្រើនជាងមុន ក្នុងគ្រាដែលមួយសប្ដាហ៍កន្លងទៅ ក្រុមហ៊ុន Tesla បានប្រកាសផ្អាកគម្រោងទទួលយកការទូទាត់ដោយប្រើ Bitcoin របស់អតិថិជនដែលទិញរថយន្តរបស់ក្រុមហ៊ុននេះ។

មុននេះ Tesla ក៏បានធ្វើឱ្យ Bitcoin ធ្លាក់ថ្លៃ 10% បន្ទាប់ពីមានដំណឹងចចាមអារ៉ាមថា Tesla ទំនងជាបានលក់ ឬកំពុងមានគម្រោងលក់ Bitcoin ដែលពួកគេបានទិញក្នុងតម្លៃ 1.5ពាន់លានដុល្លារ កាលពីដើមខែកុម្ភៈ។ ក្រោយមក តម្លៃរបស់ Bitcoin បានងើបឡើងបន្តិច បន្ទាប់ពីមហាសេដ្ឋី Elon Musk ច្រានចោលព័ត៌មានចចាមអារ៉ាមនេះ។

«ជាការពិត នេះមិនមែនជាលើកដំបូងនោះទេ ដែល Elon Musk បានប្រកាសមិនប្រកបដោយឯកភាពនៅលើ Twitter ហើយពេលខ្លះក៏ខុសទាំងស្រុងទៀតផង» លោក Ulrik Lykke នាយកប្រតិបត្តិរបស់មូលនិធិវិនិយោគរូបិយវត្ថុ ARK36 មានយោបល់ដូច្នេះ។ លោកពន្យល់ថា ទីផ្សាររូបិយវត្ថុអេឡិចត្រូនិក ត្រូវបានរុញច្រានទៅតាមអារម្មណ៍ ខណៈដែលអ្នកចូលរួមជួញដូរប្រាក់នេះ មាននិន្នាការប្រតិកម្មជ្រុលទៅនឹងព្រឹត្តិការណ៍ដែលពួកគេយល់ថា អវិជ្ជមាន៕

ប្រភព៖ Financial Times, CoinDesk
ប្រែសម្រួល៖ បុត្រា

May 20, 2021

ស្ថានភាព COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី20 ខែឧសភា ឆ្នាំ2021

នាព្រឹកថ្ងៃទី20 ខែឧសភានេះ ក្រសួងសុខាភិបាលកម្ពុជា បានប្រកាសថា បានរកឃើញ្អ្នកឆ្លងវីរុសCovid-19 ថ្មី ចំនួន 415នាក់បន្ថែមទៀត ខណៈពិភពលោក រកឃើញអ្នកជំងឺថ្មី ចំនួន 21,310នាក់។

គិតមកដល់បច្ចុប្បន្ន នៅកម្ពុជា អ្នកវិជ្ជមាននឹង Covid-19 សរុប បានកើនដល់ 23,697នាក់ ក្នុងនោះមានអ្នកស្លាប់សរុប 164នាក់, អ្នកជាសះស្បើយ សរុប 15,700នាក់។ ក្នុងថ្ងៃទី19 កន្លងទៅ កម្ពុជា ក៏មានអ្នកជំងឺCovid-19 ចំនួន 5នាក់បានស្លាប់។

ដូច្នេះ បើយោងតាមទិន្នន័យនៃរបាយការណ៍របស់ក្រសួងសុខាភិបាល បច្ចុប្បន្ន កម្ពុជា នៅមានអ្នកជំងឺCovid-19 ប្រមាណជាង 7,000នាក់ទៀត កំពុងទទួលការព្យាបាលនៅមន្ទីរពេទ្យ។

នៅទូទាំងពិភពលោក អ្នកវិជ្ជមាននឹង Covid-19 សរុប បានកើនដល់ 165,568,854នាក់ ក្នុងនោះមានអ្នកស្លាប់ 3,431,786នាក់, អ្នកជាសះស្បើយ 144,589,029នាក់ និងអ្នកកំពុងព្យាបាលចំនួន 17,548,039នាក់៕

ប្រភព៖ ក្រសួងព័ត៌មាន, worldometers
ដកស្រង់៖ បុត្រា

May 20, 2021

ហុងស៊ុយ៖ រៀបចំផ្ទះ ឱ្យរស់នៅសប្បាយ តាមទិសថ្ងៃ និងទិសខ្យល់

ក្រៅពីការតុបតែងផ្ទះឱ្យមើលទៅ ឃើញស្អាតបាត តាមស្ទីលដែលអ្នកស្នាក់អាស្រ័យស្រឡាញ់ពេញចិត្តហើយនោះ រឿងទិសថ្ងៃ និងទិសខ្យល់ ក៏សំខាន់ដូចគ្នាដែរ។ បើលោកអ្នកកំពុងសាងសង់ផ្ទះថ្មី ឬមានឱកាសបានជ្រើសរើសផ្ទះសម្រាប់ការរស់នៅថ្មីនោះ គួរតែពិចារណារឿងទិសរបស់ខ្យល់ សម្រាប់បន្ទប់ផ្សេងៗក្នុងផ្ទះរបស់លោកអ្នក ដូចខាងក្រោមនេះផង…

1-បន្ទប់ទទួលភ្ញៀវ គួរតែជាបន្ទប់ដែលមានខ្យល់អាកាសបែបសប្បាយៗ មិនមែនក្តៅ តាំងពីព្រឹក រហូតដល់ល្ងាចនោះឡើយ។

2-បន្ទប់ចង្ក្រានបាយ បន្ទប់នេះគួរតែមានខ្យល់បក់ វិលចេញចូលល្អ។

3-បន្ទប់គេង គួរតែស្ថិតនៅក្នុងទិសខាងកើត ដើម្បីទទួលបានពន្លឺថ្ងៃស្រទន់ៗនាពេលព្រឹក និងពេលរសៀល ពន្លឺថ្ងៃមិនចាំងចូលក្នុងបន្ទប់ ដែលនឹងធ្វើឱ្យពេលព្រលប់ ក្នុងបន្ទប់គេងមិនក្តៅហប់។

4-ចំណែកឯបន្ទប់ទឹកវិញ អាចស្ថិតនៅក្នុងទិសខាងលិចបាន ព្រោះអាចទទួលបានពន្លឺថ្ងៃក្តៅខ្លាំងៗបាន ដោយមិនប៉ះពាល់ដល់អ្នកស្នាក់អាស្រ័យឡើយ ហើយថែមទាំអាចបំបាត់ភាពសើមអាប់ ចេញពីក្នុងបន្ទប់ទឹកបានទៀតផង។

សម្រាប់ទិសខ្យល់ គួររៀបចំប្លង់ផ្ទះឱ្យផ្នែកខាងបណ្តោយវែង បែរទៅខាងទិសខាងជើង-ត្បូង ព្រោះខ្យល់នឹងបក់មកពីទិសខាងត្បូង ក្នុងអំឡុងខែកុម្ភៈ ដល់កញ្ញា ហើយបក់មកពីទិសខាងជើង ក្នុងអំឡុងខែតុលា ដល់មករា បន្ទាប់ពីនោះ ក៏រៀបចំឱ្យមានទ្វារបង្អួច បើកចាំទទួលផ្លូវខ្យល់ចូល-ចេញផង។

បានដឹងពីដំណាក់កាលដំបូង ដែលពាក់ព័ន្ធនឹងទិសថ្ងៃ ទិសខ្យល់បន្តិចបន្តួច ដើម្បីគួបផ្សំនឹងការសម្រេចចិត្តក្នុងការជ្រើសរើសលំនៅឋានហើយ ចំណែកឯព័ត៌មានលម្អិតផ្សេងៗទៀត រឿងទិសថ្ងៃ ទិសខ្យល់នេះ គួរប្រឹក្សាជាមួយស្ថាបនិកជាបន្ត៕

May 20, 2021

មន្ត្រីនយោបាយរបស់ ហាម៉ាស ព្យាករថា ហ្គាហ្សា នឹងឈប់បាញ់ ឆាប់ៗនេះ

មន្ត្រីជាន់ខ្ពស់មួយរូបរបស់កងជីវពលអ៊ីស្លាម ហាម៉ាស នៃចលនាប៉ាលេស្ទីន បានព្យាករថា ប៉ុន្មានថ្ងៃខាងមុខនេះនឹងមានការឈប់បាញ់ ខណៈដែលសង្គ្រាមរវាង អ៊ីស្រាអែល និង ប៉ាលេស្ទីន នៅតំបន់ ហ្គាហ្សា ឈានដល់ថ្ងៃទី11។

«ខ្ញុំយល់ថា ការខិតខំដើម្បីឈានដល់ការបង្កើតបទឈប់បាញ់នឹងទទួលបានជោគជ័យ» Moussa Abu Marzouk អ្នកនយោបាយមួយរបស់ក្រុម ហាម៉ាស បានប្រាប់ទូរទស្សន៍ al-Mayadeen របស់ លីបង់ នាថ្ងៃទី20 ខែឧសភានេះ។ «ខ្ញុំសង្ឈឹមថា នឹងសម្រេចបាននូវបទបញ្ជាឈប់បាញ់ នៅមួយ ឬពីរថ្ងៃទៀត ដោយយោងទៅលើការឯកភាពរបស់ភាគីទាំងសងខាង»។

ប្រធានាធិបតីអាមេរិក លោក Joe Biden កាលពីថ្ងៃទី19 ឧសភា បានអំពាវនាវឱ្យនាយករដ្ឋមន្ត្រី អ៊ីស្រាអែល Benjamin Netanyahu រកវិធីដើម្បីបន្ថយភាពតានតឹង សំដៅឈានដល់ការឈប់បាញ់។ ប្រភពព័ត៌មានសន្តិសុខពីប្រទេស អេហ្ស៊ីប បានឱ្យដឹងថា ភាគីទាំងពីរ ជាមូលដ្ឋាន គឺបានយល់ស្របថា នឹងមានការឈប់បាញ់ ដោយសារតែមានជំនួយពីអន្តរការី ប៉ុន្តែ កំពុងចរចាលម្អិតនៅឡើយ។

ទូរទស្សន៍ Al Jazeera ដែលមានទីស្នាក់ការនៅប្រទេសកាតា បានរាយការណ៍ថា Tor Wennesland ប្រេសិតពិសេសរបស់អង្គការសហប្រជាជាតិ ទទួលបន្ទុកលើបញ្ហាសន្តិភាពនៅមជ្ឈិមបូព៌ា កំពុងជួបពិភាក្សាជាមួយនឹងមេដឹកនាំ Ismail Haniyeh របស់ក្រុម ហាម៉ាស នៅប្រទេសកាតា។

ក៏ប៉ុន្តែ ក្ដីសង្ឃឹមដែលថា នឹងឈានដល់កិច្ចព្រមព្រៀងឈប់បាញ់ កំពុងតែជួបឧបសគ្គធំ នៅពេលដែលការប្រយុទ្ធគ្នារវាង អ៊ីស្រាអែល និងក្រុម ហាម៉ាស នៅតែបន្តកើតមាន។ អ៊ីស្រាអែល បានវាយប្រហារតាមផ្លូវអាកាសជាង 10លើក ទៅលើតំបន់ ហ្គាហ្សា កាលពីរំលងអធ្រាត្រ ខណៈ ក្រុម ហាម៉ាស ឱ្យដឹងថា មានមនុស្ស 4នាក់ បានរងរបួសក្នុងការវាយប្រហាររបស់ អ៊ីស្រាអែល នៅទីរួមស្រុក Khan Younis ភាគខាងត្បូង ហ្គាហ្សា។

វេលាទៀបភ្លឺ នៃថ្ងៃទី20 ខែឧសភា សំឡេងស៊ីរ៉ែនប្រកាសអាសន្នដែលជាសញ្ញាណប្រាប់ថា រ៉ុក្កែត កំពុងហោះចូលទឹកដី បានបន្លឺឡើងពាសពេញទីរួមស្រុក Beersheba នៅភាគខាងត្បូងនៃប្រទេស អ៊ីស្រាអែល និងតំបន់ជាប់ព្រំដែនជាមួយ ហ្គាហ្សា។ ប៉ុន្តែ មិនទាន់មានរបាយការណ៍អំពីករណីស្លាប់ ឬរបួស និងការខូចខាតនៅឡើយ។

ចាប់ពីមានការវាយប្រយុទ្ធគ្នាតាំងពីថ្ងៃទី10 ខែឧសភា ក្រុមមន្ត្រីសុខាភិបាល ប៉ាលេស្ទីន ឱ្យដឹងថា មនុស្សយ៉ាងតិច 228នាក់បានស្លាប់ នៅក្នុងការវាយប្រហារពី អ៊ីស្រាអែល។ ចំណែក អ៊ីស្រាអែល ក៏បានឱ្យដឹងថា ពលរដ្ឋរបស់ខ្លួនចំនួន 12នាក់បានស្លាប់ នៅក្នុងការវាយប្រហារពីរ៉ុក្កែត របស់កងជីវពល ហាម៉ាស។

សូមរំលឹកថា ក្រុម ហាម៉ាស បានបាញ់រ៉ុក្កែតទៅលើទឹកដីអ៊ីស្រាអែល កាលពីថ្ងៃទី10 ខែឧសភា ដើម្បីសងនឹងសកម្មភាពដែលពួកគេហៅថាជា ទង្វើរំលោភសិទ្ធិមនុស្សរបស់ អ៊ីស្រាអែល ទៅលើជនជាតិប៉ាលេស្ទីន ដែលកំពុងរស់នៅក្នុងតំបន់ យេរូសាឡឹម នៅក្នុងរដូវបុណ្យ Ramadan របស់សាសនិកអ៊ីស្លាម និងការព្រមានអំពីការបណ្ដេញចេញជនជាតិ ប៉ាលេស្ទីន ពីតំបន់ យេរូសាឡឹមខាងកើត។

ភាពតានតឹងរវាងគូភាគីនេះ ក៏បានរួមចំណែកបង្កើតឱ្យមានអំពើហិង្សារវាងជនជាតិជ្វីហ្វ និងជនជាតិអារ៉ាប់ នៅក្នុងប្រទេសអ៊ីស្រាអែល។ ការប្រយុទ្ធគ្នាក៏បានរាលដាលដល់ព្រំដែនអ៊ីស្រាអែល-លីបង់ បណ្ដាលឱ្យមានអំពើហិង្សានៅតំបន់ West Bank ដែលត្រូវអ៊ីស្រាអែលកាន់កាប់។

ភាគីអ៊ីស្រាអែល ឱ្យដឹងថា កាលពីថ្ងៃទី19 ខែឧសភា រ៉ុក្កែតចំនួន 4គ្រាប់ ត្រូវបានបាញ់ចេញពីប្រទេសលីបង់ ចូលទឹកដីរបស់អ៊ីស្រាអែល ជាលើកទីបី រាប់ចាប់ពីមានការប្រយុទ្ធគ្នានៅ ហ្គាហ្សា។ អ៊ីស្រាអែល ក៏បានឆ្លើយតបដោយគ្រាប់កាំភ្លើងធំ៕

ប្រភព៖ Reuters
ប្រែសម្រួល៖ បុត្រា

May 20, 2021

(វីដេអូ)-ពលរដ្ឋចំណាកស្រុក ម៉ារ៉ុក រាប់ពាន់នាក់ ហែលឆ្លងសមុទ្រពេលយប់ ដើម្បីបានចូលប្រទេសអេស្ប៉ាញ

នៅចំពោះមុខស្ថានភាពឆ្លងដែនខុសច្បាប់នេះ រដ្ឋាភិបាលនៃប្រទេសអេស្ប៉ាញ ត្រូវបញ្ជូនទាហាន និងប៉ូលិស ទៅកាន់តំបន់ Ceuta នៅឆ្នេរសមុទ្រភាគខាងជើងទ្វីបអាហ្វ្រិក ដើម្បីដោះស្រាយ និងទប់ស្កាត់បញ្ហា។

យោងតាមគេហទំព័រ news.sky.com កងទ័ពអេស្ប៉ាញ បាន និងកំពុងធ្វើសកម្មភាព ដើម្បីទប់ស្កាត់ការហូរចូលនៃជនចំណាកស្រុកបរទេស ខណៈដែលមនុស្សរាប់ពាន់នាក់ ក្នុងនោះមានទាំងក្មេងៗផងដែរ បានហែលឆ្លងសមុទ្រ ចូលទឹកដី Ceuta។ ទីក្រុងស្វយ័ត Ceuta នៃប្រទេសអេស្ប៉ាញ ដែលមានប្រជាជនជាង 80,000នាក់ ស្ថិតនៅតំបន់មជ្ឈិមបូព៌ា និងមានព្រំដែនគោកជាប់នឹងប្រទេសម៉ារ៉ុក។ Ceuta តែងតែជាទីតាំងដែលក្រុមអ្នកចំណាកស្រុកមកពីអាហ្វ្រិក ជ្រើសរើស ដើម្បីចូលទៅកាន់តំបន់អឺរ៉ុប ដោយសារតែការគ្រប់គ្រងព្រំដែននៅធូររលុង។

គិតចាប់ពីវេលាទៀបភ្លឺ នៃថ្ងៃទី17 ខែឧសភា រហូតដល់ព្រឹកថ្ងៃទី18 ខែឧសភា ជនចំណាកស្រុកប្រមាណ 6,000នាក់ ក្នុងនោះមានក្មេងៗចំនួន 1,500នាក់ បានហែលឆ្លងសមុទ្រ មកកាន់តំបន់ Ceuta នេះ។ ក្នុងចំណោមនោះ ក៏មានម្នាក់បានលង់ទឹកស្លាប់ នៅពេលហែលលើសមុទ្រ។

ពលរដ្ឋចំណាកស្រុក ម៉ារ៉ុក ទាំងនេះ សុទ្ធតែទទឹកជោក បន្ទាប់ពីហែល ឬប្រើប្រាស់ទូកកៅស៊ូ ឆ្លងកាត់សមុទ្រ ចូលទឹកដីរបស់ អេស្ប៉ាញ។ ក្នុងថ្ងៃទី18 ខែឧសភា ជនចំណាកស្រុក នៅតែមកកាន់តំបន់នេះ Ceuta ប៉ុន្តែមានចំនួនតិចជាងថ្ងៃទី17 ដោយសារ អេស្ប៉ាញ បានបន្ថែមកម្លាំងយោធា និងប៉ូលិស ដើម្បីគ្រប់គ្រងស្ថានការណ៍។

កងកម្លាំងប្រដាប់អាវុធ ត្រូវបានដាក់ពង្រាយនៅឆ្នេរសមុទ្រ និងបានចាប់ខ្លួនមនុស្សមួយចំនួនដែលព្យាយាមឆ្លងដែនដោយខុសច្បាប់។ មនុស្សពេញវ័យ ត្រូវបាននាំទៅកាន់ទីលានបាល់ទាត់មួយកន្លែង រួចបញ្ជូនទៅកាន់ប្រទេស ម៉ារ៉ុក។ ចំណែកកូនក្មេងវិញ ត្រូវបានបញ្ជូនទៅកាន់អគារមួយនៅក្នុងតំបន់។

គិតមកដល់ថ្ងៃត្រង់នៃថ្ងៃទី18 ខែឧសភា ពលរដ្ឋចំណាកស្រុកប្រមាណ 2,700នាក់ ត្រូវបានបញ្ជូនត្រលប់ទៅកាន់ប្រទេស ម៉ារ៉ុក។

នាយករដ្ឋមន្ត្រីអេស្ប៉ាញ Pedro Sanchez បានឱ្យដឹងថា ជនណាដែលចូលតំបន់ Ceuta ដោយខុសច្បាប់ នឹងត្រូវបណ្ដេញត្រលប់ទៅវិញ។ លោកនិយាយថា ការកើនឡើងយ៉ាងឆាប់រហ័សនៃចំនួនជនចំណាកស្រុក គឺជា វិបត្តិធ្ងន់ធ្ងរសម្រាប់ អេស្ប៉ាញ ក៏ដូចជាតំបន់អឺរ៉ុបទាំងមូល៕

ប្រភព៖ Reuters
ប្រែសម្រួល៖ បុត្រា

May 19, 2021

ក្រសួងព័ត៌មាន ប្រកាសដល់ប្រព័ន្ធផ្សព្វផ្សាយដែលពុំទាន់ស្របច្បាប់ រួសរាន់មកចុះបញ្ជិកា ឱ្យបានមុនដំណាច់ឆ្នាំ2021

ភ្នំពេញ៖ ក្រសួងព័ត៌មាន ប្រកាសដល់ប្រព័ន្ធផ្សព្វផ្សាយទាំងអស់ដែលមិនទាន់បានចុះបញ្ជីពាណិជ្ជកម្ម និងកិច្ចការពារពាណិជ្ជនាម និងពាណិជ្ជសញ្ញា ឱ្យមកចុះបញ្ជីពាណិជ្ជកម្ម ឱ្យបានត្រឹមត្រូវ និងស្របតាមច្បាប់។

សេចក្ដីប្រកាសរបស់ក្រសួងព័ត៌មាននេះ ត្រូវបានធ្វើឡើងបន្ទាប់ពីក្រសួងបានសង្កេតឃើញថា នៅមានក្រុមហ៊ុន អង្គភាព និងស្ថាប័ននៃប្រព័ន្ធផ្សព្វផ្សាយមួយចំនួនតូច មិនទាន់បានមកចុះបញ្ជីត្រឹមត្រូវនៅឡើយ។ ការចុះបញ្ជិកានេះគឺ ដើម្បីការពារពាណិជ្ជនាម និងពាណិជ្ជសញ្ញារបស់ស្ថាប័ន អង្គភាព និងក្រុមហ៊ុនរបស់អស់លោក លោកស្រី ព្រមទាំងដើម្បីចៀសវាងការរំលោភបំពានពាណិជ្ជនាម និងពាណិជ្ជសញ្ញា ពីភាគីណាមួយ។

ក្រសួងព័ត៌មាន ណែនាំដល់ម្ចាស់ស្ថាប័ន អង្គភាពសារព័ត៌មាន រួមនឹងក្រុមហ៊ុនផ្តល់សេវាកម្មលើវិស័យព័ត៌មាន និងសោតទស្សន៍ទាំងអស់ ដែលមិនទាន់បានមកចុះបញ្ជិកា អញ្ជើញមកចុះឈ្មោះ ចាប់ពីថ្ងៃជូនដំណឹងនេះ រហូតដល់ដំណាច់ឆ្នាំ2021។

ក្នុងករណីមិនអនុវត្តតាមសេចក្តីជូនដំណឹងនេះ ហើយនៅតែបន្តប្រើប្រាស់ម៉ាក និងពាណិជ្ជនាមស្ថាប័ន អង្គភាព និងក្រុមហ៊ុនរបស់ខ្លួនដោយបំពានច្បាប់ ក្រសួងព័ត៌មាន នឹងបញ្ឈប់ការផ្តល់អាជ្ញាបណ្ណប្រកបអាជីវកម្ម ចាប់ពីឆ្នាំ2022 តទៅ៕
ប្រភព៖ ក្រសួងព័ត៌មាន
ដកស្រង់៖ បុត្រា

May 19, 2021

Author: សឿន សំណាង