សឿន សំណាង - La Reine Media

David Beckham ទិញភាគហ៊ុន 10% នៃក្រុមហ៊ុន ធ្វើ «អគ្គិសនីឧបនីយកម្ម» លើរថយន្ត Rolls-Royce, Jaguar និង Range Rover

អតីតកំពូលកីឡាករបាល់ទាត់ដ៏ល្បីឈ្មោះរបស់ អង់គ្លេស លោក David Beckham បានក្លាយជាសមាជិកមួយរូប នៅក្នុងក្រុមអ្នកវិនិយោគថ្មី រួមមាន Reuben Brothers, the Barclay Family និង Alexander Dellal ដោយការវិនិយោគទៅលើក្រុមហ៊ុន Lunaz ដែលមានជំនាញខាងការធ្វើ «អគ្គិសនីឧបនីយកម្ម» លើរថយន្តប្រើប្រាស់ម៉ាស៊ីនសាំង ដែលមានទីស្នាក់ការកណ្ដាលនៅ Silverstone ប្រទេសអង់គ្លេស។

លោក David Beckham បានចុះហត្ថលេខាលើកិច្ចព្រមព្រៀងវិនិយោគថ្មីមួយ ដោយសាច់ប្រាក់សុទ្ធ ដើម្បីទិញភាគហ៊ុនចំនួន 10% របស់ក្រុមហ៊ុន Lunaz ដើម្បីផ្ដល់សេវាកម្មប្ដូរម៉ាស៊ីនរថយន្ត Rolls-Royce, Jaguar និង Range Rover ទៅជាម៉ូទ័រអគ្គិសនី ដែលប្រើអាគុយជាគោល។ នេះបើតាមសារព័ត៌មាន Irish Mirror។

សារព័ត៌មាន Reuters បានចេញផ្សាយថា Beckham បានវិនិយោគទៅលើ Lunaz តាមរយៈក្រុមហ៊ុនវិនិយោគដោយឡែករបស់ខ្លួន គឺ DB Ventures។ ក្រុមហ៊ុននេះបានប្រកាសដំណឹងខាងលើ កាលពីថ្ងៃទី3 ខែមិថុនា ប៉ុន្តែ មិនបានបង្ហើបឱ្យដឹងពីតម្លៃនៃការវិនិយោគនេះទេ។

Lunaz ត្រូវបានបង្កើតឡើងកាលពីឆ្នាំ2018 និងមានសេវាកម្មប្ដូរម៉ាស៊ីនសាំងដែលប៉ះពាល់ដល់បរិស្ថាន និងមានតម្លៃថ្លៃ ទៅជាអាគុយ និងម៉ូទ័រអគ្គិសនី ដែលមិនបញ្ចេញឧស្ម័នពុល។

បច្ចុប្បន្ន សេវាកម្មប្ដូរម៉ាស៊ីនសាំង ទៅជាអាគុយ និងម៉ូទ័រអគ្គិសនី លើស៊េរីរថយន្ត «បុរាណ» របស់ Range Rovers, Bentleys និង Rolls-Royce មានតម្លៃ ប្រមាណពី 240,000 ដល់ 500,000ផោន (ប្រហែលពី 338,856-70,5950ដុល្លារអាមេរិក) / គ្រឿង ប៉ុន្តែ គេជឿថា តម្លៃនេះនឹងថយចុះច្រើន នាពេលខាងមុខ៕

ប្រភព៖ Reuters
ប្រែសម្រួល៖ បុត្រា

June 4, 2021

អ្នកជំងឺCOVID-19 ដែលបានស្លាប់ បែរជាត្រលប់មកផ្ទះវិញ ក្រោយពីបូជាបាន 18ថ្ងៃ

(ឥណ្ឌា)- ស្ត្រីម្នាក់ ឈ្មោះថា Girijamma រស់នៅក្នុងរដ្ឋ Andhra Pradesh ត្រូវបានគ្រួសារធ្វើពិធីបញ្ចុះសពរួចរាល់ បន្ទាប់ពីបានស្លាប់ដោយសារជំងឺCovid-19 ប៉ុន្តែ រយៈពេល 18ថ្ងៃក្រោយមក គ្រួសារមានការភ្ញាក់ផ្អើលជាខ្លាំង នៅពេលបានឃើញស្ត្រីនេះ ត្រលប់មកផ្ទះវិញ។

លោកយាយវ័យ 70ឆ្នាំ រស់នៅក្នុងភូមិ Christianpet ស្រុក Krishna កាលពីថ្ងៃទី12 ខែឧសភា ត្រូវបានប្ដី គឺ លោកតា Muthyala Gaddayya នាំទៅកាន់មន្ទីរពេទ្យ នាទីក្រុង Vijayawada ដើម្បីព្យាបាលជំងឺCovid-19។ លោកតា Gaddayya តែងទៅមើលប្រពន្ធគាត់ជាញឹកញាប់។

ប៉ុន្តែ នៅថ្ងៃទី15 ខែឧសភា លោកតា Gaddayya មិនបានឃើញប្រពន្ធរបស់គាត់នៅកន្លែងព្យាបាលនោះទេ ពេលគាត់ទៅសួរសុខទុក្ខម្ដងទៀត។ គាត់បានដើររកឯបន្ទប់ផ្សេងៗ ប៉ុន្តែ នៅតែរកមិនឃើញ។ ចុងក្រោយ ក្រុមគ្រូពេទ្យបានប្រាប់ថា អ្នកជំងឺប្រហែលជាបានស្លាប់ ហើយត្រូវនាំទៅកាន់សាលដាក់សាកសព។

នៅក្នុងសាលសាកសព លោកតា ត្រូវបានក្រុមការងារ ប្រគល់សាកសពស្ត្រីវ័យចំណាស់ម្នាក់ ដែលត្រូវរុំជិតដោយថង់ផ្លាស្ទិក។ លោកតាពិតជារន្ធត់ចិត្តជាពន់ពេក និងបាននាំសាកសពត្រលប់មកផ្ទះ ហើយធ្វើបុណ្យក្នុងថ្ងៃដដែលនោះ។

ដល់ថ្ងៃទី23 ខែឧសភា គ្រួសាររបស់លោកតា Gaddayya ត្រូវជួបទុក្ខធំមួយទៀត នៅពេលបានទទួលដំណឹងថា កូនប្រុសវ័យ 35ឆ្នាំរបស់គាត់ ឈ្មោះ Muthyala Ramesh ក៏បានបាត់បង់ជីវិត ដោយសារ Covid-19 នៅក្នុងមន្ទីរពេទ្យស្រុក Khammam។ គ្រួសរនេះ បានរៀបចំពិធីរំលឹកវិញ្ញាណក្ខន្ធលោកយាយ Girijamma និងកូនប្រុស Ramesh កាលពីថ្ងៃទី1 ខែឧសភា។

ក៏ប៉ុន្តែ មួយថ្ងៃក្រោយមក គ្រួសារ និងអ្នកភូមិ ត្រូវរន្ធត់ និងភ្ញាក់ផ្អើលជាលើកទីបី នៅពេលឃើញលោកយាយ Girijamma ត្រលប់មកផ្ទះ។ លោកយាយប្រាប់ថា គាត់អន់ចិត្ត អាណិតខ្លួនខ្លាំងណាស់ ព្រោះតែមិនមានអ្នកផ្ទះទៅទទួលគាត់ ក្រោយពីបានជាសះស្បើយ។ ខាងមន្ទីរពេទ្យ បានជូនប្រាក់ដល់លោកយាយ 3,000រូពី (41ដុល្លារអាមេរិក) ដើម្បីត្រលប់មកផ្ទះ។

គ្រួសាររបស់លោកយាយ និងអ្នកក្បែរខាងនិយាយថា ពួកគេមិនបានពិនិត្យមើលសាកសពនោះទេ ព្រោះខ្លាចឆ្លងវីរុស។ ចំណែកខាងប៉ូលិសវិញ ឱ្យដឹងថា ពុំមានអ្នកណាម្នាក់ ត្រូវបានស៊ើបអង្កេតនៅក្នុងករណីច្រឡំសាកសពនេះនោះដែរ។

បច្ចុប្បន្ន គេមិនបានដឹងថា លោកយាយបាននៅទីណាឡើយ ក្នុងរយៈពេល 18ថ្ងៃ បន្ទាប់ពីត្រូវគ្រូពេទ្យនិយាយថា បានស្លាប់។ ចម្ងាយផ្លូវពីទីក្រុង Vijayawada មកស្រុក Krishna ប្រហែល 18គីឡូម៉ែត្រ៕

ប្រភព៖ NDTV
ប្រែសម្រួល៖ បុត្រា

June 4, 2021

អ្នកស្លាប់ដោយសារ COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី4 ខែមិថុនា 2021

យោងតាមរបាយការណ៍របស់ក្រសួងសុខាភិបាល ដែលបានប្រកាសនាព្រឹកថ្ងៃទី4 ខែមិថុនា ឆ្នាំ2021 នេះ កម្ពុជា មានអ្នកស្លាប់ថ្មី ដោយសារវីរុសCovid-19 ចំនួន 6នាក់ និងអ្នកឆ្លងថ្មីចំនួន 886នាក់ នៅក្នុងថ្ងៃទី3 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 33,075នាក់ ក្នុងនោះមាន 242នាក់បានបាត់បង់ជីវិត, 25,544នាក់បានជា និងប្រមាណ 7,190នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 ចំនួន 3,717,320នាក់ បានស្លាប់, 155,622,721នាក់បានជា និង 13,570,925នាក់កំពុងព្យាបាល នៅក្នុងចំណោមអ្នកដែលបានឆ្លងវីរុសនេះសរុប 172,910,966នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 4, 2021

មេបញ្ជាការកងទ័ព សហរដ្ឋអាមេរិក ថា វៀតណាម បញ្ជាទិញយន្តហោះហ្វឹកហាត់ T-6

មេបញ្ជាការទ័ពអាកាសប្រចាំមហាសមុទ្រ ប៉ាស៊ីហ្វិក លោក Kenneth Wilsbach បានឱ្យដឹងថា កិច្ចព្រមព្រៀងទិញយន្តហោះហ្វឹកហាត់ T-6 គឺជាចំណុចលេចធ្លោ នៅក្នុងកិច្ចសហការលើវិស័យការពារជាតិ រវាង សហរដ្ឋអាមេរិក-វៀតណាម។

«វៀតណាម បានបញ្ជាទិញយន្តហោះហ្វឹកហាត់ T-6 ដើម្បីកែលម្អកម្មវិធីហ្វឹកហាត់សម្រាប់អ្នកបើកបរយន្តហោះ។ នេះគឺជាចំណុចសំខាន់មួយ និងលេចធ្លោបំផុត នៅក្នុងកិច្ចសហការទ្វេភាគី» ឧត្តមសេនីយ Kenneth Wilsbach មេបញ្ជាការកងទ័ពអាកាសប្រចាំតំបន់មហាសមុទ្រប៉ាស៊ីហ្វិក (PACAF) នៃកងទ័ពអាកាសសហរដ្ឋអាមេរិក ថ្លែងនៅក្នុងសន្និសីទសារព័ត៌នាថ្ងៃនេះ។

ព័ត៌មាននេះ ត្រូវបាន Kenneth Wilsbach លើកឡើង នៅពេលត្រូវបានសួរដល់ទំនាក់ទំនងក្នុងវិស័យការពារជាតិ រវាង វៀតណាម និង សហរដ្ឋអាមេរិក។ ប៉ុន្តែ លោក មិនបានបង្ហើបអំពីចំនួនយន្តហោះ ក៏ដូចជាតម្លៃសរុបនៃយន្តហោះ ដែល វៀតណាម បានបញ្ជាទិញនោះទេ ដោយគ្រាន់តែនិយាយថា សហរដ្ឋអាមេរិក សន្យាផ្គត់ផ្គង់តាមការបញ្ជាទិញនេះ។

វៀតណាម កាលពីឆ្នាំ2018 បានបញ្ជូនអ្នកបើកបរយន្តហោះពីរនាក់ ទៅចូលរួមវគ្គបណ្ដុះបណ្ដាល 52សប្ដាហ៍ ជាមួយនឹងយន្តហោះ T-6 Texan II នៅក្នុងកម្មវិធីគ្រប់គ្រងអាកាសចរណ៍ (ALP) របស់ទ័ពអាកាសអាមេរិក។

T-6 Texan II គឺជាស៊េរីយន្តហោះធុនស្រាល ពីរកៅអី ផលិតដោយក្រុមហ៊ុន Raytheon របស់ អាមេរិក ដោយយោងទៅតាមម៉ូដែល Pilatus PC-9 របស់ប្រទេស ស្វីស។ វាត្រូវបានអភិវឌ្ឍក្នុងទសវត្សរ៍ 1990 និងដាក់ឱ្យប្រើប្រាស់ក្នុងជួរកងទ័ពអាមេរិក ចាប់ពីឆ្នាំ2001៕

ប្រភព៖ VNExpress
ប្រែសម្រួល៖ បុត្រា

June 4, 2021

អាមេរិក ប្រកាសគម្រោងលម្អិត ស្ដីពីការចែករំលែកវ៉ាក់សាំង COVID-19 ចំនួន 80លានដូស ដល់ប្រទេសនានាក្នុងពិភពលោក

កាលពីថ្ងៃទី3 ខែមិថុនា ប្រធានាធិបតីសហរដ្ឋអាមេរិក លោក Joe Biden បានប្រកាសព័ត៌មានលម្អិតស្ដីពីគម្រោងចែករំលែកវ៉ាក់សាំងបង្ការ Covid-19 ចំនួន 25លានដូសដំបូង ក្នុងចំណោម 80លានដូស ដែលលោកធ្លាប់បានប្រកាសនាពេលកន្លងថា នឹងផ្ដល់ឱ្យបណ្ដាប្រទេស និងដែនដីក្នុងពិភពលោក។

ក្នុងប្រកាសមួយ លោក Biden បានលើកឡើងថា ក្នុងចំណោមវ៉ាក់សាំង 25លានដូស ដែល សហរដ្ឋអាមេរិក ចែករំលែកដំបូង មានជិត 19លានដូសនឹងផ្ដល់ឱ្យបណ្ដាប្រទសក្រីក្រ តាមរយៈយន្តការ COVAX របស់អង្គការសុខភាពពិភពលោក។ ក្នុងនោះ ប្រហែល 6លានដូស នឹងផ្ដល់ឱ្យបណ្ដាប្រទេសនៅតំបន់អាមេរិកឡាទីន និងតំបន់ការីប៊ីន, ប្រហែល 7លានដូសសម្រាប់តំបន់អាស៊ីខាងត្បូង និងអាស៊ីអាគ្នេយ៍, ចំណែកជិត 5លានដូសទៀត សម្រាប់ទ្វីបអាហ្វ្រិក។ ក្រៅពីនេះ វ៉ាក់សាំងជាង 6លានដូសទៀត ក្នុងចំណោម 25លានដូសខាងលើ នឹងត្រូវបានចែករំលែកផ្ទាល់ដល់កាណាដា, ម៉ិកស៊ិក, ឥណ្ឌា និងកូរ៉េខាងត្បូង។

សូមបញ្ជាក់ថា វ៉ាក់សាំងប្រហែល 7លានដូស ដែលគ្រោងនឹងផ្ដល់ឱ្យតំបន់អាស៊ីខាងត្បូង និងអាស៊ីអាគ្នេយ៍ រួមមាន៖ ឥណ្ឌា, នេប៉ាល់, បង់ក្លាដែស, ប៉ាគីស្ថាន, ស្រីលង្កា, អាហ្វហ្គានីស្ថាន, ម៉ាឌីវ, ម៉ាឡេស៊ី, ហ្វីលីពីន, វៀតណាម, ឥណ្ឌូនេស៊ី, ថៃ, ឡាវ, ប៉ាពួញូហ្គីណេ, តៃវ៉ាន់ និងបណ្ដាកោះនៅមហាសមុទ្រប៉ាស៊ីហ្វិក។ កម្ពុជា មិនមាននៅក្នុងបញ្ជីឈ្មោះនេះទេ។

យោងតាមប្រកាសរបស់ សេតវិមាន វ៉ាក់សាំង 75% ក្នុងចំណោម 80លានដូស ដែលសហរដ្ឋអាមេរិក គ្រោងនឹងចែករំលែក នឹងត្រូវបានផ្ដល់ឱ្យយន្តការ COVAX។ ចំណែកនៅសល់ 25% ទៀត ទីក្រុងវ៉ាស៊ីងតោន នឹងផ្ដល់ឱ្យបណ្ដាប្រទេសកំពុងត្រូវការបន្ទាន់ បណ្ដាប្រទេសក្បែរខាងអាមេរិក និងបណ្ដាប្រទេសដែលបានស្នើសុំ អាមេរិក ឱ្យជួយ៕

ប្រភព៖ Business Insider
ប្រែសម្រួល៖ បុត្រា

June 4, 2021

ការមើលថែទាំអញ្ចាញធ្មេញ និងធ្មេញ យ៉ាងត្រឹមត្រូវតាមវិធី

មានមនុស្សជាច្រើន ច្រើនតែព្រងើយកន្តើយនឹងការដុសសម្អាតធ្មេញ ដោយមិនបានដឹងឡើយថា ភាពស្អាត មានអនាម័យនៅក្នុងប្រអប់មាត់ ក៏មានចំណែកសំខាន់ខ្លាំងដែរ ព្រោះវាអាចហុចផលប៉ះពាល់ ដល់អវយវៈផ្នែកដទៃទៀតបាន ដោយយើងគួរដុសសម្អាតធ្មេញ យ៉ាងតិចក្នុង 1ថ្ងៃ ឱ្យបាន 2ដង និងចូរប្រើច្រាសដុសធ្មេញដែលមានសរសៃទន់ៗ មិនមែនជាច្រាសដែលរឹងខ្លាំងពេកនោះទេ ព្រោះវាអាចធ្វើឱ្យធ្មេញងាយឆាប់សឹករេចរឹល។ ទំហំរបស់ក្បាលច្រាសដុសធ្មេញ ក៏គួរមានខ្នាត ដែលសមល្មមក្នុងការចូលទៅដល់គ្រប់កន្លុកកន្លៀតរបស់ធ្មេញ បានយ៉ាងងាយស្រួល និងត្រូវផ្តល់ភាពសំខាន់ ទៅលើការដុសសម្អាតធ្មេញ ដែលត្រឹមត្រូវតាមក្បួនវិធី និងគ្រប់ៗទីតាំងរបស់ធ្មេញនីមួយ…ដោយសារដូច្នេះហើយ ទើបថ្ងៃនេះ ឡារ៉ែន មានវិធីដុសសម្អាតធ្មេញដែលត្រឹមត្រូវ មកជម្រាបជូនដូចតទៅ៖

គួរដុសសម្អាតធ្មេញឱ្យត្រូវវិធី ក្រោយពេលបរិភោគអាហាររួចគ្រប់ពេល តែបើមិនមានភាពងាយស្រួលក្នុងការដុសសម្អាតធ្មេញទេនោះ ក៏គួរតែខ្ពុរមាត់ខ្លាំងៗដោយទឹកស្អាត រៀងរាល់ពេលញ៉ាំបាយហើយ និងត្រូវដុសសម្អាតធ្មេញយ៉ាងតិចក្នុង 1ថ្ងៃ 2ដង គឺពេលភ្ញាក់ពីដំណេក និងមុនចូលគេង។
ក្រោយពេលដុសធ្មេញ អាចប្រើម្រាមដៃ ដុសធ្វើម៉ាស្សាលើសាច់អញ្ចាញធ្មេញស្រាលៗគ្រប់កន្លែង ដើម្បីជួយឱ្យអញ្ចាញធ្មេញរឹងមាំ។
ទទួលទានបន្លែ និងផ្លែឈើ ដែលជួយថែបំប៉នសាច់អញ្ចាញធ្មេញ និងជួយសម្អាតធ្មេញបែបងាយៗ ដូចជា ផ្លែក្រូច ប៉ិគក់ ត្របែក និងផ្លែជម្ពូ ជាដើម។
ចៀសវាងពីការខាំហែកវត្ថុរឹងៗដោយធ្មេញ ដូចជា ហែកថង់ប្លាស្ទិក ខាំខ្សែចំណងឱ្យដាច់ ប្រើធ្មេញខាំបើកគម្របដបជាដើម ព្រោះអាចធ្វើឱ្យធ្មេញជំពើស បែក ឬរង្គើបានយ៉ាងងាយ។
សង្កេតមើលធ្មេញ និងអញ្ចាញ បន្ទាប់ពីដុសសម្អាតធ្មេញរួច ដោយការឆ្លុះកញ្ចក់ មើលក្នុងប្រអប់មាត់ម្តងម្កាល បើឃើញមានចំណុចខ្មៅៗ ស្នាមហើមក្រហមៗនៅលើសាច់អញ្ចាញ ឬមានកំណកកំបោររឹងៗនៅតាមជើងធ្មេញ គួរតែទៅជួបទន្តពេទ្យ ដើម្បីពិនិត្យព្យាបាលជាបន្ទាន់។
មិនគួរកេះធ្មេញ ដោយមិនចាំបាច់នោះទេ ព្រោះនឹងធ្វើឱ្យជើងធ្មេញ មានប្រហោង និងអាចឆ្លងមេរោគបានទៀតផង។
ក្នុងករណីដែលធ្មេញទឹកដោះ(សម្រាប់ក្មេងតូច)រង្គើ ធ្វើឱ្យឈឺខណៈពេលញ៉ាំអាហារ ឬពេលដុសសម្អាតធ្មេញ ឬក៏មានធ្មេញពុកផុយ របេះអស់នៅសល់តែគល់ លែងមានធ្មេញហើយនោះ គួរតែទៅប្រឹក្សាជាមួយទន្តពេទ្យ ដើម្បីដកចេញភ្លាម។

វិធីដុសសម្អាតធ្មេញ

ការដុសសម្អាតធ្មេញ គួរដុសសម្អាត ឱ្យសព្វគ្រប់លើធ្មេញ និងគ្រប់ផ្នែករបស់ធ្មេញ ដែលច្រាសដុសធ្មេញអាចចូលទៅដល់។ ពេលដុស មិនចាំបាច់ប្រើកម្លាំងសង្កត់ខ្លាំងៗទេ ការដុសសម្អាតធ្មេញម្តងៗ គួរប្រើពេលវេលា ពី 2 – 3នាទី។ ការចាប់កាន់ច្រាសដុសធ្មេញ គួរចាប់កាន់ដងច្រាស ដោយម្រាម4 ចំណែកម្រាមមេដៃ ដាក់សង្កត់នៅលើដងច្រាស ដែលធ្វើឱ្យអាចកម្រើកម្រាមដៃ ឱ្យច្រាសដុសធ្មេញវាសចុះ ឬវាសឡើងបានពេញដៃ៕

June 3, 2021

កាបូបស្ពាយទៅរៀន និងសុខភាពខ្នងរបស់កូន

ឃើញកូនសិស្សតូចៗ ស្ពាយកាបូប ដែលធ្ងន់កន្តុក ពេញដោយសៀវភៅហើយនោះ ធ្វើឱ្យមនុស្សធំជាច្រើននាក់ហាក់ដូចជានឹកបារម្ភ ចំពោះសុខភាពរបស់ក្មេងៗទាំងនោះខ្លាំងណាស់ ជាពិសេសសុខភាពខ្នង និងក ដែលនឹងហុចផលប៉ះពាល់ទៅដល់ ភាពខុសប្រក្រតីរបស់ឆ្អឹងដងខ្លួនទៀតផង។

ចុះអ្នកវិញ តើអ្នកនឹងមើលថែទាំរឿងនេះ ចំពោះកូនៗយ៉ាងណាដែរ?

មានពាក្យណែនាំថា កាបូបដាក់សៀវភៅស្ពាយទៅរៀនរបស់ក្មេងៗ មិនគួរមានទម្ងន់លើស 10 % នៃទម្ងន់ខ្លួនរបស់ក្មេង និងខ្សែស្ពាយ គួរមានទំហំទទឹង មិនតូចជាង 6សង់ទីម៉ែត្រឡើយ ព្រោះខ្សែដែលតូចពេក នឹងធ្វើឱ្យកើតមានការសង្កត់លើសាច់ដុំស្មាខ្លាំងជ្រុលពេក។ ពេលស្ពាយ ក៏គួរស្ពាយដោយស្មាទាំងសងខាង ដើម្បីឱ្យកាបូប ចែកចាយទម្ងន់បានយ៉ាងសមតុល្យ និងជួយការពារ មិនធ្វើឱ្យស្មា ទាបខ្ពស់មិនស្មើគ្នាទៀតផង។ ក្រៅពីនេះ គួរសម្រួលខ្សែស្ពាយ ឱ្យតួកាបូបនៅផ្អឹបជាប់នឹងខ្នង និងស្មា កុំឱ្យកាបូបយារធ្លាក់ ទៅក្រោមជ្រុលពេក និងឱ្យក្មេងៗដើរ ខ្លួនឱ្យត្រង់ មិនអោនទៅមុខ ឬខំចំកោងខ្នង ដើម្បីខំទ្រទម្ងន់កាបូបនោះទេ។

បើក្មេងមានអាការឈឺខ្នង ឈឺក ឈឺស្មា ឬឈឺក្បាលញឹកញាប់ គួរប្រញាប់នាំទៅប្រឹក្សាជាមួយគ្រូពេទ្យជំនាញភ្លាម ព្រោះបើសិនចេះតែបណ្តោយទុកយូរ មិនប្រញាប់ព្យាបាល ការសង្កត់ដ៏ធ្ងន់ របស់កាបូប ក៏នឹងធ្លាក់ចុះ ឆ្ពោះទៅរកឆ្អឹងកងខ្នងរបស់ក្មេង ដែលអាចនឹងហុចផល ឱ្យកើតមានបញ្ហាធំទៅថ្ងៃក្រោយបាន។

ការមើលថែទាំសុខភាពរបស់ក្មេងៗ គឺជារឿងចាំបាច់ និងសំខាន់ណាស់ មិនមែនហុចផលប៉ះពាល់ ត្រឹមតែពេលបច្ចុប្បន្នប៉ុណ្ណោះទេ ព្រោះការមានសុខភាពដែលល្អ ឬមិនល្អចំពោះក្មេង ច្បាស់ជាហុចផលក្នុងរយៈពេលវែង រហូតដល់ក្លាយជាមនុស្សធំមិនខាន។ ដូច្នេះទើបគួរមើលថែទាំកូនៗឱ្យបានល្អ តាំងពីថ្ងៃនេះតែម្តង ទើបជាការប្រសើរ៕

June 3, 2021

សហរដ្ឋអាមេរិក ដំណើរការគម្រោងចែកវ៉ាក់សាំង COVID-19 ដល់ប្រទេសផ្សេងៗ

រដ្ឋបាលប្រធានាធិបតី Joe Biden គ្រោងនឹងប្រកាសឱ្យដឹងពីឈ្មោះប្រទេសដែលនឹងទទួលបានវ៉ាក់សាំងបង្ការវីរុសCovid-19 ដែលជាជំនួយដំបូងរបស់សហរដ្ឋអាមេរិក។

សារព័ត៌មាន Bloomberg កាលពីថ្ងៃទី3 ខែមិថុនា ដកស្រង់ប្រភពព័ត៌មានមួយ ឱ្យដឹងថា សេតវិមាន បានសម្រេចលើការបង្កើតផែនការបែងចែកវ៉ាក់សាំង Covid-19 រាប់សិបលានដូស ទៅដល់បណ្ដាប្រទេស ដែលកំពុងត្រូវការ បន្ទាប់ពីបានពិភាក្សារួចរាល់។

លោក Joe Biden ទំនងជានឹងប្រកាសព័ត៌មានលម្អិតទាក់ទងនឹងបញ្ហាខាងលើនៅក្នុងសប្ដាហ៍នេះ ដោយគិតទៅលើកត្តាសមធម៌ និងសហការស៊ីជម្រៅជាមួយនឹងកម្មវិធី Covax ដែលដឹកនាំដោយអង្គការសហប្រជាជាតិ សម្រាប់ការផ្គត់ផ្គង់វ៉ាក់សាំងដល់បណ្ដាប្រទេសក្រីក្រ។

យុទ្ធនាការចាក់វ៉ាក់សាំងនៅសហរដ្ឋអាមេរិក មានការរីកចម្រើនខ្លាំង ដោយវ៉ាក់សាំងចំនួន 297លានដូស ត្រូវបានប្រើប្រាស់ ក្នុងនោះ ពលរដ្ឋពេញវ័យចំនួន 62.9% ទទួលបានការចាក់វ៉ាក់សាំងយ៉ាងតិចមួយដូស គិតត្រឹមថ្ងៃទី2 ខែមិថុនា ឆ្នាំ2021។

មុននោះ ប្រធានាធិបតី Joe Biden បានឱ្យដឹងថា សហរដ្ឋអាមេរិក គ្រោងនឹងផ្ដល់វ៉ាក់សាំងចំនួន 80លានដូស ក្នុងនោះមានវ៉ាក់សាំង AstraZeneca ចំនួន 60លានដូស និងវ៉ាក់សាំង Moderna, Pfizer និង Johnson & Johnson ចំនួន 20លានដូស ដល់បណ្ដាប្រទេសក្នុងពិភពលោក៕

ប្រភព៖ Reuters
ប្រែសម្រួល៖ បុត្រា

June 3, 2021

(វីដេអូ)-ឆេះរោងចក្រចម្រាញ់ប្រេងរបស់រដ្ឋ នៅប្រទេស អ៊ីរ៉ង់! ផ្សែងខ្មៅគ្របដណ្ដប់ពេញអាកាសរដ្ឋធានី

ឆេះរោងចក្រចម្រាញ់ប្រេងនៃក្រុមហ៊ុន Tondgooyan នៅភាគខាងត្បូងរដ្ឋធានី តេហេរ៉ង់ (Tehran) នៃប្រទេស អ៊ីរ៉ង់ បង្កជាផ្សែងយ៉ាងខ្មួលខ្មាញ់ ពេញផ្ទៃអាកាស។

«អគ្គិភ័យបានឆាបឆេះចេញពីទីតាំងឧស្ម័នរាវរបស់រោងចក្រចម្រាញ់ប្រេង Tondgooyan នៅ តេហេរ៉ង់» កាលពីថ្ងៃទី2 ខែមិថុនា។ នេះបើតាមមន្ត្រីមូលដ្ឋានម្នាក់។ ក្រុមបុគ្គលិកពន្លត់អគ្គិភ័យ និងក្រុមសង្គ្រោះបន្ទាន់ បានទៅដល់កន្លែងកើតហេតុ ដើម្បីគ្រប់គ្រងស្ថានការណ៍។

រូបភាពដែលត្រូវបានផ្សាយផ្ទាល់ពី តេហេរ៉ង់ បង្ហាញថា អគ្គិភ័យនេះ នៅតែបន្តឆេះរហូតដល់ពេលយប់ ដោយមានអណ្ដាតភ្លើងដែលគេអាចមើលឃើញពីចម្ងាយរាប់សិបគីឡូម៉ែត្រ។ បច្ចុប្បន្ន មិនទាន់មានរបាយការណ៍ស្ដីពីការស្លាប់ ឬរងរបួស ក៏ដូចជាការខូចខាតដោយសារអគ្គិភ័យនេះនៅឡើយ។

https://www.youtube.com/watch?v=nz74DpJ9kgs

មូលហេតុនៃអគ្គិភ័យនេះ កំពុងត្រូវបានស៊ើបអង្កេត ប៉ុន្តែ អ្នកនាំពាក្យមួយរូបរបស់រោងចក្រនេះ បានបដិសេធអំពីលទ្ធភាពដែលរោងចក្រ ត្រូវបានគេលួចដុត។ សីតុណ្ហភាពនៅរដ្ឋធានី តេហេរ៉ង់ កាលពីម្សិលមិញ ឡើងដល់ជិត 40អង្សាសេ៕

ប្រភព៖ ABC News
ប្រែសម្រួល៖ បុត្រា

June 3, 2021

ចំនួនករណីឆ្លង COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី3 ខែមិថុនា ឆ្នាំ2021

នៅ កម្ពុជា ក្រសួងសុខាភិបាល បានប្រកាសឱ្យដឹងថា បានរកឃើញអ្នកជំងឺCovid-19 ចំនួន 729នាក់បន្ថែមទៀត ខណៈពិភពលោក រកឃើញជាង 19,130នាក់ នៅក្នុងអំឡុងថ្ងៃទី2 ខែមិថុនា ឆ្នាំ2021។

គិតមកដល់បច្ចុប្បន្ន ទូទាំងប្រទេស កម្ពុជា មានពលរដ្ឋសរុបចំនួន 32,189នាក់ បានឆ្លងវីរុសCovid-19 ក្នុងនោះមាន 24,763នាក់បានជាសះស្បើយ, 236នាក់បានបាត់បង់ជីវិត និងប្រមាណ 7,188នាក់ កំពុងទទួលការព្យាបាល។

នៅទូទាំងសកលលោកឯណោះវិញ អ្នកស្លាប់ដោយសារវីរុសCovid-19 បានកើនឡើងដល់ 3,706,563នាក់ ខណៈអ្នកជាសះស្បើយមានចំនួន 155,060,668នាក់ និងអ្នកកំពុងទទួលការព្យាបាល មានចំនួន 13,659,263 នាក់ នៅក្នុងចំណោមអ្នកជំងឺCovid-19 សរុបចំនួន 172,426,494នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 3, 2021

Author: សឿន សំណាង