សឿន សំណាង - La Reine Media

រដ្ឋបាលខណ្ឌប្ញស្សីកែវ ៖ យុទ្ធនាការចាក់វ៉ាក់សាំង COVID-19 ម្ជុលទីពីរ នឹងចាប់ផ្ដើមពីថ្ងៃពុធសប្ដាហ៍នេះ

រដ្ឋបាលខណ្ឌប្ញស្សីកែវ នៃរាជធានីភ្នំពេញ នារសៀលថ្ងៃទី7 ខែមិថុនា ឆ្នាំ2021 បានឱ្យដឹងថា យុទ្ធនាការចាក់វាក់សាំងបង្ការវីរុសCovid-19 ម្ជុលទីពីររបស់ខណ្ឌឫស្សីកែវ នឹងចាប់ផ្ដើម ចាប់ពីថ្ងៃទី9 ខែមិថុនា ឆ្នាំ2021នេះត ទៅ។

យុទ្ធនាការចាក់វ៉ាក់សាំងសម្រាប់ពលរដ្ឋដែលត្រូវចាក់ដូសទីពីរនេះ នឹងធ្វើឡើងនៅតាមទីតាំងចំនួនពីរ មានដូចខាងក្រោម ៖

1/ វត្តឧត្តរាវត្តី សង្កាត់ប្ញស្សីកែវ

2/ សាលាបឋមសិក្សាចំរើនរដ្ឋ សង្កាត់ស្វាយប៉ាក

រដ្ឋបាលខណ្ឌឫស្សីកែវ សូមបងប្អូនអញ្ជើញមកទទួលការចាក់វាក់សាំង ដូសទីពី តាមកាលកំណត់រៀងៗខ្លួន និងសូមភ្ជាប់មកនូវ ប័ណ្ណចាក់វាក់សាំងលើកទីពីរ និងឯកសារ អត្តសញ្ញាប័ណ្ណ ឬលិខិតឆ្លងដែនជាដើម។

ប្រភព៖ រដ្ឋបាលខណ្ឌឫស្សីកែវ, Press OCM
ដកស្រង់៖ បុត្រា

June 7, 2021

តួលេខអ្នកឆ្លង COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី7 ខែមិថុនា 2021

នាព្រឹកថ្ងៃទី7 ខែមិថុនា ឆ្នាំ2021 នេះ ក្រសួងសុខាភិបាល បានឱ្យដឹងថា អ្នកវិជ្ជមាននឹង Covid-19 ថ្មី ដែលត្រូវបានក្រសួងរកឃើញក្នុងថ្ងៃទី6 ខែមិថុនា មានចំនួន 589នាក់ និងអ្នកស្លាប់ថ្មីចំនួន 3នាក់។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 34,833នាក់ ក្នុងនោះមាន 266នាក់បានបាត់បង់ជីវិត, 28,092នាក់បានជា និងប្រមាណ 6,834នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 ចំនួន 3,744,029នាក់ បានស្លាប់, 157,064,600នាក់បានជា និង 13,243,957នាក់កំពុងព្យាបាល នៅក្នុងចំណោមអ្នកដែលបានឆ្លងវីរុសនេះសរុប 174,052,586នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 7, 2021

ឯកឧត្ដម កើត រិទ្ធ រដ្ឋមន្ត្រីក្រសួងយុត្តិធម៌ ត្រូវបានតែងតាំងជា អនុប្រធានគណៈកម្មការអន្តរក្រសួងប្រយុទ្ធនឹង COVID-19

អង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ត្រី នាព្រឹកនេះ បានរាយការណ៍ថា «សម្ដេចតេជោតែងតាំង ឯកឧត្ដម កើត រិទ្ធ រដ្ឋមន្ត្រីក្រសួងយុត្តិធម៌ ជាអនុប្រធានគណៈកម្មការអន្តរក្រសួងប្រយុទ្ធនឹង Covid-19។

បច្ចុប្បន្ន គណៈកម្មការអន្តរក្រសួងដើម្បីប្រយុទ្ធនឹងជំងឺ Covid-19 កំពុងត្រូវបានដឹកនាំដោយ ឯកឧត្តមសាស្ត្រាចារ្យ វេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល។

June 7, 2021

(វីដេអូ)-រថភ្លើងបុកគ្នានៅ ប៉ាគីស្ថាន! រាប់សិបនាក់ បាត់បង់ជីវិត

រថភ្លើងល្បឿនលឿនមួយខ្សែ ធ្លាក់ចេញពីផ្លូវដែកនៅក្នុងខេត្ត Sindh និងបានបុកជាមួយរថភ្លើងមួយខ្សែទៀតដែលនៅក្បែរនោះ បណ្ដាលឱ្យមនុស្សយ៉ាងតិច 30នាក់ត្រូវបាត់បង់ជីវិត និងរាប់សិបនាក់ ត្រូវរងរបួស និងជាប់គាំងក្នុងគំនរបាក់បែក។

រថភ្លើងល្បឿនលឿន Millat Express នាព្រឹកថ្ងៃទី7 ខែមិថុនានេះ បានរត់ធ្លាក់ពីផ្លូវ នៅពេលកំពុងធ្វើដំណើរឆ្លងកាត់ខណ្ឌ Ghotko ខេត្ត Sindh ភាគខាងត្បូងប្រទេស ប៉ាគីស្ថាន ក្រោយមកក៏ត្រូវរថភ្លើង Sir Syed Express បុកពេញមួយទំហឹង។

គ្រោះថ្នាក់នេះបណ្ដាលឱ្យមនុស្សយ៉ាងតិច 30នាក់ បានស្លាប់ ក្នុងពេលដែលមនុស្សជាង 20នាក់ កំពុងជាប់ក្រោមគំនរបាក់បែក។ ក្រុមប៉ូលិស និងកងកម្លាំងសង្គ្រោះបន្ទាន់ បានទៅដល់កន្លែងកើតហេតុ ដើម្បីជួយសង្គ្រោះ និងនាំយកសាកសពចេញពីរថភ្លើង។

ចំនួនអ្នកស្លាប់ និងរបួស រួមនឹងមូលហេតុពិតប្រាកដ នៃគ្រោះថ្នាក់នេះ មិនទាន់ត្រូវបានគេឱ្យដឹងនៅឡើយ។ គ្រោះថ្នាក់រថភ្លើង កើតមានជាញឹកញាប់នៅប្រទេស ប៉ាគីស្ថាន ដោយសារតែប្រព័ន្ធផ្លូវដែក និងស្លាកសញ្ញានានា មានសភាពចាស់ទ្រុឌទ្រោម មិនសូវទទួលបានការយកចិត្តទុកដាក់ថែទាំពីសំណាក់អាជ្ញាធរ៕

ប្រភព៖ AP
ប្រែសម្រួល៖ បុត្រា

June 7, 2021

ព្រមាន! វីរុសបំប្លែងខ្លួនថ្មី «របស់» ឥណ្ឌា ដែល កម្ពុជា ទើបតែរកឃើញ កំពុងឆ្លងរាលដាលខ្លាំងនៅ កាណាដា

ប្រភពព័ត៌មានពីទីក្រុង Ottawa បានឱ្យដឹងថា វីរុសCovid-19 បំប្លែងខ្លួនថ្មី ប្រភេទ B.1.617 ដែលត្រូវបានរកឃើញដំបូងគេនៅប្រទេស ឥណ្ឌា ហើយដែល កម្ពុជា បានរកឃើញកាលពីថ្ងៃទី4 ខែមិថុនា ឆ្នាំ2021 បច្ចុប្បន្ន កំពុងតែ «ចាក់ឫស» ជ្រៅ ក្នុងសហគមន៍ និងឆ្លងក្នុងល្បឿនយ៉ាងលឿន នៅប្រទេស កាណាដា។

សម្បុកវីរុសCovid-19 មួយ នៅខេត្ត Newfoundland & Labrador នៃប្រទេស កាណាដា ថ្មីៗនេះ ត្រូវបានគេរកឃើញករណីឆ្លង B.1.617 យ៉ាងតិច 60នាក់ ស្របពេលដែលការផ្ទុះឆ្លងរាលដាលនៃវីរុសប្រភេទនេះ ក៏ត្រូវបានគេរកឃើញនៅក្នុងខេត្ត British Columbia, Quebec, Alberta និង Ontario ផងដែរ។

អ្នកជំនាញ Troy Day មកពីសាកលវិទ្យាល័យ Quen នៅទីក្រុង Kingston នៃខេត្ត Ontario ប្រទេស កាណដា បានឱ្យដឹងថា B.1.617 ទំនងជានឹងក្លាយជាវីរុសបំប្លែងខ្លួនថ្មី ដែល «គ្រប់គ្រង» Ontario ជាខេត្តដែលមានប្រជាជនច្រើនជាងគេបង្អស់នៅ កាណាដា នាខែក្រោយ។

ក្រុមអ្នកជំនាញផ្នែកជំងឺឆ្លង មានការព្រួយបារម្ភថា B.1.617 នឹង «រកឃើញ» ចំណុចខ្សោយនៃយុទ្ធនាការចាក់វ៉ាក់សាំងម្ជុលដំបូងរបស់ កាណាដា ហើយអាចបង្កគ្រោះថ្នាក់ដល់ការបើកទ្វារសេដ្ឋកិច្ចឡើងវិញ។

វេជ្ជបណ្ឌិត Isaac Bogoch និយាយថា B.1.617 (រកឃើញដំបូងនៅ ឥណ្ឌា) និង B.1.1.7 (រកឃើញដំបូងនៅ អង់គ្លេស) មានចំណុចប្រហាក់ប្រហែលជាច្រើន ទាក់ទិននឹងការឆ្លងរាលដាលឆាប់រហ័ស។ យោងតាម Isaac Bogoch កាណាដា ត្រូវការប្រឹងប្រែងបន្ថែមទៀត ដើម្បីចាក់វ៉ាក់សាំងម្ជុលទីពីរឱ្យបានលឿនជាងមុន។

គិតមកដល់ថ្ងៃទី5 ខែមិថុនា កាណាដា បានចាក់វ៉ាក់សាំងរួចរាល់ដល់ពលរដ្ឋជាង 2.7លាននាក់ ស្មើនឹង 7.1% នៃប្រជាជនសរុបទូទាំងប្រទេស។ កាណាដា បច្ចុប្បន្ន ជាប់ចំណាត់ថ្នាក់លេខ3 នៅក្នុងចំណោមប្រទេសឧស្សាហកម្មរីកចម្រើនជាងគេក្នុងពិភពលោក (G7) ស្ដីពីការចាក់វ៉ាក់សាំងបង្ការវីរុស Covid-19 ដោយអត្រា 67.29ដូស/100នាក់ ខណៈដែល អង់គ្លេស (ប្រទេសនាំមុខគេនៅ G7) ចាក់បាន 98.33ដូស/100នាក់។

នៅ កាណាដា គិតត្រឹមព្រឹកថ្ងៃទី7 ខែមិថុនា ឆ្នាំ2021 នេះ បានរកឃើញអ្នកឆ្លងវីរុសCovid-19 សរុបចំនួន 1,392,563នាក់ ក្នុងនោះមានអ្នកស្លាប់ចំនួន 25,724នាក់ និងកំពុងព្យាបាលចំនួន 24,194នាក់៕

ប្រភព៖ CBC
ប្រែសម្រួល៖ បុត្រា

June 7, 2021

វីរុសCOVID-19 បំប្លែងខ្លួនឥណ្ឌា (B.1.617) ឆ្លងរាលដាលខ្ពស់ជាង 40% ធៀបនឹងវីរុសបំប្លែងខ្លួននៅ អង់គ្លេស

រដ្ឋមន្ត្រីក្រសួងសុខាភិបាលអង់គ្លេស បានព្រមានថា គួរតែចាក់វ៉ាក់សាំង Covid-19 ឱ្យបានពីរម្ជុល ព្រោះថា វីរុសបំប្លែងខ្លួនថ្មីដែលត្រូវបានរកឃើញនៅ ឥណ្ឌា (B.1.617) មានលទ្ធភាពឆ្លងរាលដាលខ្ពស់ជាងវីរុសបំប្លែងខ្លួនដែលត្រូវបានរកឃើញនៅប្រទេស អង់គ្លេស។

«តួលេខ 40% ស្ដីពីលទ្ធភាពនៃការឆ្លងរាលដាល គឺជា ការព្រមានផ្នែកវិទ្យាសាស្ត្រថ្មីបំផុត ដែលខ្ញុំបានទទួល» រដ្ឋមន្ត្រីក្រសួងសុខាភិបាល អង់គ្លេស Matt Hancock ប្រកាសកាលពីថ្ងៃទី6 ខែមិថុនា។ នេះគឺជាទិន្នន័យរបស់ SAGE ដែលជាក្រុមប្រឹក្សាវិទ្យាសាស្ត្ររបស់រដ្ឋាភិបាលអង់គ្លេស។

វីរុសCovid-19 បំប្លែងខ្លួនថ្មីឈ្មោះ Dalta ដែលហៅថា វីរុសក្លាយពូជឥណ្ឌា ឬ B.1.617 (B.1.617 ជាវីរុសក្លាយពូជថ្មី ដែលបំប្លែងខ្លួនចេញពី Covid-19 ប្រភេទ B.1.1.7 របស់ អង់គ្លេស។ B.1.617 ត្រូវបានចែកជា 3ប្រភេទទៀត (sub-variant) រួមមាន B.1.617.1, B.1.617.2 និង B.1.617.3) បច្ចុប្បន្នគឺជាប្រភេទ Covid-19 ដែលឆ្លងរាលដាលខ្លាំងនៅប្រទេសអង់គ្លេស។ មុននោះ វីរុស Alpha ឬហៅថា វីរុសបំប្លែងខ្លួនអង់គ្លេស ត្រូវបានរកឃើញនៅតំបន់ Kent ធ្លាប់បានធ្វើឱ្យអង់គ្លេស ត្រូវដាក់បម្រាមគោចរកាលពីខែមករា។

លោក Hancock ទទួលស្គាល់ថា វីរុស Covid-19 ប្រភេទ Delta «កំពុងធ្វើឱ្យការគណនា ត្រូវជួបឧបសគ្គច្រើន» ទាក់ទងនឹងការដកបទបញ្ជារឹតបន្តឹងការធ្វើដំណើររបស់រដ្ឋាភិបាល ដែលតាមគម្រោងនឹងត្រូវធ្វើឡើងនៅថ្ងៃទី21 ខែមិថុនាខាងមុខ។

រដ្ឋមន្ត្រីខាងលើ និយាយថា៖ «យើងនឹងពិនិត្យលើទិន្នន័យ ថែមមួយសប្ដាហ៍ទៀត ទើបធ្វើការសម្រេចចិត្តជាក្រោយ»។

«ការណែនាំផ្នែកវិទ្យាសាស្ត្រល្អបំផុត ដែលខ្ញុំទទួលបានក្នុងគ្រានេះ នោះគឺការចាក់វ៉ាក់សាំងមួយម្ជុល នឹងមិនអាចមានប្រសិទ្ធភាពក្នុងការការពារសុវត្ថិភាពនៅចំពោះមុខវីរុសបំប្លែងខ្លួន Dalta លើកលែងតែចាក់គ្រប់ពីរម្ជុល» លោក Hancock បញ្ជាក់ដូច្នេះ។

ផ្ទាំងព័ត៌មាន ព្រមានអំពីវីរុសបំប្លែងខ្លួនថ្មី នៅអង់គ្លេស

អង់គ្លេស បានចាក់វ៉ាក់សាំងបង្ការ Covid-19 គ្រប់ពីរម្ជុល ដល់ពលរដ្ឋពេញវ័យជាង 50% ស្មើនឹង 27លាននាក់ ខណៈជាង 40លាននាក់ បានចាក់ម្ជុលទីមួយ។ ប្រទេសនេះគឺជាសម្បុកវីរុសCovid-19 ធំជាងគេលំដាប់ទី7 ក្នុងពិភពលោក ដោយមានអ្នកវិជ្ជមានជាង 4.5លាននាក់ និងស្លាប់ជាង 472,000នាក់៕

ប្រភព៖ ABC
ប្រែសម្រួល៖ បុត្រា

June 7, 2021

COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី6 ខែមិថុនា 2021

យោងតាមរបាយការណ៍របស់ក្រសួងសុខាភិបាល ដែលបានប្រកាសនាព្រឹកថ្ងៃទី6 ខែមិថុនា ឆ្នាំ2021 នេះ កម្ពុជា មានអ្នកស្លាប់ដោយសារវីរុសCovid-19 ចំនួន 11នាក់ និងអ្នកឆ្លងចំនួន 631នាក់ និងជា ចំនួន 1,069នាក់ នៅក្នុងថ្ងៃទី5 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 34,244នាក់ ក្នុងនោះមាន 263នាក់បានបាត់បង់ជីវិត, 27,147នាក់បានជា និងប្រមាណ 7,283នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 ចំនួន 3,736,352នាក់ បានស្លាប់, 156,595,909នាក់បានជា និង 13,391,687នាក់កំពុងព្យាបាល នៅក្នុងចំណោមអ្នកដែលបានឆ្លងវីរុសនេះសរុប 173,723,948នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 6, 2021

ស្ថានភាព COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី5 ខែមិថុនា 2021

យោងតាមរបាយការណ៍របស់ក្រសួងសុខាភិបាល ដែលបានប្រកាសនាព្រឹកថ្ងៃទី5 ខែមិថុនា ឆ្នាំ2021 នេះ កម្ពុជា មានអ្នកស្លាប់ដោយសារវីរុសCovid-19 ចំនួន 10នាក់ និងអ្នកឆ្លងចំនួន 538នាក់ និងជា ចំនួន 534នាក់ នៅក្នុងថ្ងៃទី4 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 33,613នាក់ ក្នុងនោះមាន 252នាក់បានបាត់បង់ជីវិត, 26,078នាក់បានជា និងប្រមាណ 7,289នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 ចំនួន 3,727,657នាក់ បានស្លាប់, 156,075,401នាក់បានជា និង 13,525,876នាក់កំពុងព្យាបាល នៅក្នុងចំណោមអ្នកដែលបានឆ្លងវីរុសនេះសរុប 173,328,934នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 5, 2021

COVID-19 បំប្លែងខ្លួនថ្មី ដែល កម្ពុជា ទើបរកឃើញ តើ “កាចសាហាវដល់កម្រិតណា?”

វីរុស SARS-CoV-2 (Covid-19) នៅតែបន្តបំប្លែងខ្លួន ឬក្លាយពូជថ្មីជាហូរហែ។ អង្គការសុខភាពពិភពលោក (WHO) កំពុងតាមដានវីរុសបំប្លែងខ្លួនដែលបង្កគ្រោះថ្នាក់ខ្លាំងដល់សុខភាពមនុស្ស ក្នុងនោះ វីរុសCovid-19 បំប្លែងខ្លួនថ្មី ប្រភេទ B.1.617 ដែលត្រូវបានគេចាត់ទុកថាជាអ្នកនៅពីក្រោយមហាវិបត្តិសុខភាពនៅ ឥណ្ឌា កំពុងឆ្លងរាលដាលខ្លាំង បង្កឱ្យមានការព្រួយបារម្ភនៅទូទាំងពិភពលោក ក្នុងនោះមាន កម្ពុជា ផងដែរ។

កាលពីយប់ថ្ងៃទី5 ខែមិថុនា ឆ្នាំ2021 ក្រសួងសុខាភិបាល បានប្រកាសព័ត៌មានសំខាន់មួយ ស្តីពី ការរកឃើញវីរុសបំប្លែងខ្លួនថ្មី ប្រភេទ B.1.617 លើអ្នកជំងឺចំនួន 3រូប ដែលជាពលករ កម្ពុជា ត្រលប់មកពីប្រទេសថៃ។ ក្រសួងបានណែនាំឱ្យស្ថាប័នពាក់ព័ន្ធ យកចិត្តទុកដាក់បន្ថែម ទៅលើវិធានការទប់ស្កាត់នានា ឱ្យបានត្រឹមត្រូវ។

WHO បានចាត់វីរុសបំប្លែងខ្លួនប្រភេទ B.1.617 នេះ ទៅក្នុងក្រុម «បំប្លែងខ្លួន ដែលគួរយកចិត្តទុកដាក់» ព្រោះថា ពួកវាបង្កឱ្យមានការឆ្លងរាលដាលលឿន ឬបង្កគ្រោះថ្នាក់ធ្ងន់ធ្ងរ ដល់អ្នកដែលបានឆ្លងវីរុសប្រភេទនេះ។

Covid-19 បំប្លែងខ្លួនប្រភេទ B.1.617 ដែលត្រូវបានរកឃើញដំបូងនៅប្រទេស ឥណ្ឌា គឺជាវីរុសក្លាយពូជថ្មី ដែលបំប្លែងខ្លួនចេញពី Covid-19 ប្រភេទ B.1.1.7 របស់ អង់គ្លេស ជាមួយនឹងប្រភេទក្លាយពូជថ្មីរង ឬវ៉ារ្យ៉ង់រង (sub-variant) ចំនួន 3ទៀត រួមមាន B.1.617.1, B.1.617.2 និង B.1.617.3។

Covid-19 បំប្លែងខ្លួនថ្មី ប្រភេទ B.1.617 របស់ ឥណ្ឌា នេះ បានឆ្លងចូលដល់ប្រទេសជាង 50 ក្នុងពិភពលោក។

វីរុសCovid-19 ប្រភេទក្លាយពូជថ្មី B.1.617 មានប្រភេទបំប្លែងខ្លួនផ្សេងៗចំនួន 13ទៀត ក្នុងនោះមាន 2ប្រភេទដែលគួរយកចិត្តទុកដាក់ជាងគេ នោះគឺ L452R និង E484Q។

E484Q ស្រដៀងខ្លាំងទៅនឹងវីរុសបំប្លែងខ្លួនប្រភេទ E484K ដែលត្រូវបានរកឃើញនៅលើវីរុសCovid-19 ក្លាយពូជថ្មីមួយចំនួន នៅ អាហ្វ្រិកខាងត្បូង និងប្រេស៊ីល ដែលត្រូវគេហៅថា «វ៉ារ្យ៉ង់លាកខ្លួន» ព្រោះថា វាមានសមត្ថភាពគេចខ្លួនពីប្រព័ន្ធការពាររាងកាយរបស់អ្នកជំងឺ។ ដូច្នេះហើយ ទើបវាមានសញ្ញាបង្ហាញថា អ្នកដែលធ្លាប់បានឆ្លង Covid-19 នៅតែអាចឆ្លងម្ដងទៀត ចំពោះប្រភេទក្លាយពូជថ្មីនេះ ពិសេសគឺនៅពេលប្រព័ន្ធភាពស៊ាំរបស់រាងកាយមនុស្ស មានភាពទន់ខ្សោយ។

ចំណែកប្រភេទ L452R ជាប់ទាក់ទងនឹងការឆ្លងរាលដាលខ្លាំងនៅក្នុងរដ្ឋ California សហរដ្ឋអាមេរិក និងត្រូវបានគេចាត់ទុកថា ជាមូលហេតុដែលនាំឱ្យមានការឆ្លងរាលដាលលឿនជាង 20% បើធៀបនឹងរលកនៃការឆ្លងរាលដាលមុន។

ប្រការពិសេសផ្សេងទៀតដែលនាំឱ្យ B.1.617 ដែលទើបត្រូវបានរកឃើញនៅ កម្ពុជា ប្រែជាកាចសាហាវជាងគេ នោះគឺថា វាមិនត្រឹមតែអាចបង្កើតកូនចៅតាមរបៀប «ថត-ចម្លង» (copy-past) នៅក្នុងសួតនោះទេ ប៉ុន្តែ B.1.617 ថែមទាំងអាច «ស្នាក់នៅ» ក្នុងទីកន្លែងណាក៏បាន ដូចជានៅក្នុងបំពង់កជាដើម។ បញ្ហានេះហើយ ដែលធ្វើឱ្យល្បឿននៃការឆ្លងពីមនុស្សម្នាក់ ទៅមនុស្សម្នាក់ លឿនជាងឆ្ងាយ បើធៀបនឹងបណ្ដាវ៉ារ្យ៉ាងដទៃ៕

ប្រភព៖ Newscientist, WHO, ក្រសួងសុខាភិបាល
ដកស្រង់ និងប្រែសម្រួល៖ បុត្រា

June 5, 2021

បាតុភូត សូរ្យគ្រាស «រង្វង់ភ្លើង» ដ៏កម្រ នឹងកើតមានឡើងនៅសប្ដាហ៍ក្រោយ នៃខែមិថុនា ឆ្នាំ2021

បាតុភូតសូរ្យគ្រាស «រង្វង់ភ្លើង» ឬហៅថា សូរ្យគ្រាសរាងចិញ្ចៀន កើតឡើងនៅពេលព្រះអាទិត្យ ព្រះចន្ទ និងផែនដី តម្រៀបត្រង់ជាជួរ ក្នុងគ្រាព្រះចន្ទស្ថិតនៅលើគន្លងគោចរឆ្ងាយពីផែនដីបំផុត។

ដោយសារតែនៅឆ្ងាយពេក ព្រះចន្ទមិនអាចបិទបាំងទាំងស្រុងនូវពន្លឺពីព្រះអាទិត្យ ដូច្នេះក៏បន្សល់ទុក រូបរាង «រង្វង់ភ្លើង» ស្ថិតនៅជុំវិញ «គ្រាប់បាល់យក្សងងឹត» មួយគ្រាប់ (ព្រះចន្ទពេលថ្ងៃ)។

បាតុភូតខាងលើនេះ នឹងកើតឡើងនៅថ្ងៃទី10 ខែមិថុនា ឆ្នាំ2021 ខាងមុខ ហើយតំបន់ដែលអាចមើលឃើញច្បាស់បំផុតគឺ កាណាដា, ហ្គ្រីនឡែន និងរុស្ស៊ី។ បាតុភូតនេះនឹងបង្ហាញខ្លួនក្នុងរយៈពេល 3នាទី និង51វិនាទី។

ពលរដ្ឋនៅប្រទេស អង់គ្លេស នឹងមើលឃើញតែ 20% នៃបាតុភូតសូរ្យគ្រាសនេះ ខណៈ ស្កុតឡែន មើលឃើញ 32% នៃចំណុចខ្មៅ។ ចំណែកតំបន់ឆ្នេរនៃមហាសមុទ្រអាត្លង់ទិក ពលរដ្ឋ ក៏នឹងមើលឃើញសូរ្យគ្រាសមួយចំណិតផងដែរ នៅពេលព្រឹកព្រលឹម៕

ប្រភព៖ CBS News
ប្រែសម្រួល៖ បុត្រា

June 4, 2021

Author: សឿន សំណាង