សឿន សំណាង - La Reine Media

លោកយាយ វ័យ 94ឆ្នាំ គ្រងឈុតកូនក្រមុំជាលើកដំបូង ក្រោយគេងស្រមៃមក 70ឆ្នាំ

លោកយាយ បានស្លៀកឈុតកូនក្រមុំជាលើកដំបូង ក្រោយគេងស្រមៃអស់ 70ឆ្នាំ ព្រោះតែការរើសអើងជាតិសាសន៍ពណ៌សម្បុរ កាលពីអតីតកាល ធ្វើឱ្យមិនបានស្លៀកឈុតអាពាហ៍ពិពាហ៍ ដូចដែលខ្លួននឹកសង្ឃឹម។

ការបានគ្រងឈុតកូនក្រមុំ ក្នុងថ្ងៃរៀបការ គឺជាក្ដីស្រមៃដ៏ធំធេងរបស់នារីគ្រប់រូប រួមទាំងក្ដីស្រមៃរបស់ “ម៉ាថា មែ អូហ្វ៊ីលៀ មូន ថាក់ឃើរ” លោកយាយស្បែកខ្មៅ អាយុ 94ឆ្នាំ មកពីរដ្ឋអាឡាបាម៉ា សហរដ្ឋអាមេរិកផងដែរ តែគួរឱ្យសោកសៅបំផុត ដែលនៅថ្ងៃត្រូវរៀបការ លោកយាយបែរជាត្រូវបានអាជ្ញាធររារាំង រើសអើងមិនឱ្យគ្រងឈុតកូនក្រមុំ ដូចដែលខ្លួនឯងនឹកសង្ឃឹមបាន។

លោកយាយ ថាក់ឃើរ រៀបការជាមួយស្វាមី ក្នុងឆ្នាំ1952 ដែលក្នុងអំឡុងពេលនោះ មានការបែងចែកពណ៌សម្បុរ និងរើសអើងជាតិសាសន៍យ៉ាងខ្លាំងក្លា ទើបធ្វើឱ្យស្ត្រីស្បែកខ្មៅ មិនបានទទួលការអនុញ្ញាត ឱ្យចូលហាង ដើម្បីជួលសម្លៀកបំពាក់ឈុតអាពាហ៍ពិពាហ៍បានឡើយ ដោយហេតុនេះហើយ ទើបលោកយាយត្រូវស្លៀកឈុតផ្សេង ដែលមានពណ៌ខៀវចាស់ ដើម្បីចូលពិធីមង្គលការរបស់ខ្លួនជំនួសវិញ។

ទោះជាពេលវេលា កន្លងផុតទៅជិត 70ឆ្នាំហើយក្ដី តែលោកយាយ ថាក់ឃើរ នៅតែនឹកស្រមៃ ចង់គ្រងឈុតកូនក្រមុំជានិច្ច ហើយថ្ងៃមួយ នៅពេលដែលលោកយាយអង្គុយទស្សនាឈុតឆាករៀបការនៅក្នុងខ្សែភាពយន្តរឿង “Coming to America” ជាមួយ “អ៊ែងជើឡា ស្ត្រូសៀរ” ដែលជាចៅស្រី លោកយាយក៏ខ្សិបប្រាប់នាងថា ចង់សាកល្បងស្លៀកឈុតកូនក្រមុំ ដូចនៅក្នុងកុនឱ្យបានម្ដង។

ក្រោយពីបានឮសេចក្ដីប្រាថ្នារបស់លោកយាយហើយ ស្ត្រូសៀរ ក៏សម្រេចចិត្តធ្វើឱ្យលោកយាយថាក់ឃើរ ភ្ញាក់ផ្អើល ដោយការណាត់លោកយាយទៅហាងជួលឈុតអាពាហ៍ពិពាហ៍ ហើយមិនត្រឹមតែប៉ុនហ្នឹងទេ នាងថែមទាំងជួលជាងតុបតែងមុខ មកជួយបន្ថែមភាពស្រស់ស្អាតជូនលោកយាយទៀតផង។

នៅទីបំផុត ថ្ងៃដែលទន្ទឹងរង់ចាំ ក៏មកដល់ នៅពេលដែលលោកយាយ បានសាកល្បងស្លៀកឈុតកូនក្រមុំពណ៌សដូចក្ដីបំណង…ភ្លាមៗនោះ នៅពេលដែលលោកយាយ បានឃើញខ្លួនឯងនៅក្នុងកញ្ចក់ ក៏ញញឹមឡើងយ៉ាងស្រស់ និងឈរថតរូបយ៉ាងមានសេចក្ដីសុខ ធ្វើឱ្យមនុស្សម្នា ដែលនៅជុំវិញទីនោះ រំភើបចិត្ត រលីងរលោងទឹកភ្នែកគ្រប់ៗគ្នា។

“អ្នកទាំងអស់គ្នា ដឹងទេ? ខ្ញុំមិនអាចបង្ហាញចេញមកទាំងអស់បានថា តើវាពិសេសប៉ុនណាឡើយ តែវាវិសេសខ្លាំងណាស់! ខ្ញុំមានអារម្មណ៍ថា ដូចខ្លួនឯងកំពុងជិតបានរៀបការអ៊ីចឹង ខ្ញុំមិនចង់ដោះឈុតហ្នឹងចេញវិញសោះ”៕

ប្រភព៖ timesnownews, Facebook
រៀបរៀងដោយអ្នកគ្រូ ស.សមចិន្ដា

July 13, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 13 ខែកក្កដា ឆ្នាំ 2021

នាព្រឹកថ្ងៃទី 13 ខែកក្កដា ឆ្នាំ 2021 នេះ ក្រសួងសុខាភិបាល បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 830 នាក់, អ្នកជាចំនួន 1,012 នាក់ និងអ្នកស្លាប់ចំនួន 28 នាក់បន្ថែមទៀត នៅក្នុងថ្ងៃទី 12 ខែកក្កដា ឆ្នាំ 2021។

ព័ត៌មានលម្អិតបន្ថែម សូមអានរបាយការណ៍សង្ខេប របស់ក្រសួងសុខាភិបាល ដែលមានដូចខាងក្រោម៖

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 188,080,000 នាក់ ត្រូវបានរកឃើញ ក្នុងនោះមានជាង 172,013,000 នាក់ បានជា, ជាង 4,055,800 នាក់ បានស្លាប់ និងជាង 12,010,000 នាក់ កំពុងព្យាបាល។

ប្រទេសចំនួន 3 ដែលមានអ្នកជំងឺ COVID-19 ច្រើនជាង 10 លាននាក់ រួមមាន សហរដ្ឋអាមេរិក (34,766,404 នាក់), ឥណ្ឌា (30,904,734 នាក់) និង ប្រេស៊ីល (19,106,971 នាក់)៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

July 13, 2021

អាមេរិក ត្រូវការបុគ្គលិកផ្នែកសំណង់ 1 លាននាក់ ៖ ប្រាក់ខែខ្ពស់ តែពិបាករកកម្មករ

ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដងៗ ក្រោយការវាយប្រហាររបស់វីរុស COVID-19។

Matthew Messer ជញ្ជូនផ្ទាំងសូឡានៅលើដំបូលផ្ទះមួយកន្លែងរបស់អតិថិជន នៅឯ Long Island នៃទីក្រុង New York ក្រោមកំដៅថ្ងៃ 38 អង្សា ក្នុងខែមិថុនា។ Messer គឺជាថៅកែនៃក្រុមហ៊ុន New York Solar Maintenance (ជំនាញជួសជុលផ្ទាំងសូឡា) ប៉ុន្តែ បច្ចុប្បន្ន គាត់ត្រូវចេញទៅធ្វើការជាមួយក្រុមបច្ចេកទេសរបស់ខ្លួនជារៀងរាល់ថ្ងៃ នៅពេលអាជីវកម្មចាប់ផ្ដើមកក្រើនជាថ្មី។

ក្រោយរលក COVID-19 តម្រូវការកម្លាំងពលកម្ម កើនឡើងឆាប់រហ័ស

«នេះមិនមែនជាវិធីល្អបំផុតក្នុងការប្រើប្រាស់ពេលវេលារបស់ខ្ញុំ។ ប៉ុន្តែ នោះគឺជាអ្វីដែលចាំបាច់ត្រូវធ្វើ» លោក Messer និយាយអំពីថ្ងៃដែលគាត់ត្រូវធ្វើការនៅលើដំបូលផ្ទះ។ នេះក៏ព្រោះតែម្ចាស់អាជីវកម្មរូបនេះ រកបុគ្គលិកមិនបាន។ ក្រុមហ៊ុនរបស់លោក ជួលបុគ្គលិកចំនួន 3 កម្រិត ក្នុងនោះក៏មានផ្នែកបច្ចេកទេសផងដែរ ប៉ុន្តែ ក្រុមហ៊ុនកំពុងប្រឈមនឹងបញ្ហារួមនៅក្នុងវិស័យសំណង់ នោះគឺបញ្ហាខ្វះបុគ្គលិក ដោយសារតែតម្រូវការរើសបុគ្គលិកក្នុងវិស័យនេះ កំពុងកក្រើកឡើងវិញ បន្ទាប់ពីការវាយប្រហាររបស់ COVID-19។

ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការទៅវិញ។ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដង។

តម្រូវការផ្នែកសាងសង់ និងជួសជុលផ្ទះ កំពុងកើនឡើង នៅពេលទីផ្សារលំនៅឋាន ងើបឡើងវិញ ចំណែកមនុស្សជាច្រើន ត្រូវធ្វើការនៅផ្ទះ។ យោងតាមសមាគមកម្មករនិងអ្នកម៉ៅការសំណង់ របស់ សហរដ្ឋអាមេរិក «ក្នុងវិស័យមួយដែលធ្លាប់តែខ្វះកម្លាំងពលកម្មតាំងពីមុន COVID-19 បណ្ដាក្រុមហ៊ុនសំណង់ នឹងត្រូវការបុគ្គលិកចំនួន 430,000 នាក់ ក្នុងឆ្នាំនេះ និង 1 លាននាក់ទៀតនៅក្នុងរយៈពេល 2 ឆ្នាំខាងមុខ ដើម្បីឆ្លើយតបនឹងតម្រូវការទីផ្សារការងារ»។

ដំណោះស្រាយ៖ ផ្ដល់ប្រាក់ខែច្រើនជាងមុន ដើម្បីទាក់ទាញបុគ្គលិក

នៅពេល Matthew Messer ចាប់ផ្ដើមដឹងថា មានបញ្ហាខ្វះបុគ្គលិក គាត់ក៏យល់ថា ខ្លួនត្រូវតែប្រញាប់ដំឡើងឈ្នួល ដើម្បីរក្សាកម្លាំងប្រកួតប្រជែង។ បុគ្គលិកដែលនៅសេះសល់របស់លោក កំពុងត្រូវក្រុមហ៊ុនផ្សេងៗ តាម «ចែចង់»។ ក្នុងអំឡុង 4 ខែកន្លង លោក Messer បានដំឡើងប្រាក់ឈ្នួលរហូតដល់ 40% ធៀបនឹងប្រាក់ឈ្នួលមុននេះ។

Messer និយាយថា៖ «ខ្ញុំឱ្យប្រាក់ឈ្នួលចាប់ពី 18 ដល់ 22 ដុល្លារ ក្នុង 1 ម៉ោង ប៉ុន្តែ ពុំមានអ្នកណាមកដាក់ពាក្យធ្វើការទាល់តែសោះ។ ខ្ញុំក៏ដំឡើងថ្លៃឈ្នួលដល់ 23 ដុល្លារ តែ នៅតែមិនអាចរកបានបុគ្គលិក។ ខ្ញុំបន្តដំឡើងរហូតដល់ 25 ដុល្លារ ទើបឃើញមានអ្នកមកដាក់ពាក្យខ្លះ។ នេះគឺជាការដំឡើងថ្លៃឈ្នួលខ្ពស់គួរសម ប៉ុន្តែ ដើម្បីអាជីវកម្មរីកចម្រើន ខ្ញុំចាំបាច់ត្រូវការជ្រើសរើសបុគ្គលិកឱ្យបាន»។

យោងតាមនាយកដ្ឋានស្ថិតិកម្លាំងពលកម្មរបស់ សហរដ្ឋអាមេរិក បុគ្គលិកនៅភោជនីយដ្ឋានម្នាក់ អាចរកប្រាក់បាន 18.23 ដុល្លារ/ម៉ោង ខណៈដែលបុគ្គលិកសំណង់ម្នាក់ អាចរកបាន 32.86 ដុល្លារ/ម៉ោង៕

ប្រភព៖ CNN
ប្រែសម្រួល៖ បុត្រា

July 13, 2021

ឆេះមន្ទីរពេទ្យព្យាបាលជំងឺ COVID-19 បណ្ដាលឱ្យមានអ្នកស្លាប់យ៉ាងតិច 42 នាក់

អ៊ីរ៉ាក់៖ មន្ទីរពេទ្យមួយដែលមានជំនាញក្នុងការព្យាបាលជំងឺ COVID-19 នៅទីក្រុង Nassiriya បានជួបគ្រោះអគ្គិភ័យ បណ្ដាលឱ្យមនុស្សយ៉ាងហោចណាស់ 100 នាក់ ត្រូវរងរបួស និងបាត់បង់ជីវិត។

អគ្គិភ័យដែលបានកើតឡើងកាលពីថ្ងៃទី 12 ខែកក្កដា នៅមន្ទីរពេទ្យ al-Hussain នាទីក្រុង Nassiriya ស្ថិតនៅភាគខាងត្បូងប្រទេសអ៊ីរ៉ាក់នេះ បានបណ្ដាលឱ្យមនុស្សយ៉ាងតិច 42 នាក់ បានស្លាប់ និងជាង 60 នាក់ រងរបួស។ មូលហេតុនៃអគ្គិភ័យនេះ ត្រូវបានគេជឿថា កើតឡើងដោយសារការផ្ទុះបំពង់អុកស៊ីហ្សែន។ ចំនួនអ្នកស្លាប់ អាចកើនឡើងបន្តទៀត ដោយសារមានមនុស្សជាច្រើនកំពុងបាត់ខ្លួននៅឡើយ។

ក្រុមមន្ត្រីមូលដ្ឋាន បានឱ្យដឹងថា សកម្មភាពជួយសង្គ្រោះ ត្រូវបានធ្វើឡើងមិនឈប់ឈរ ក្រោយពីអគ្គិភ័យត្រូវបានគ្រប់គ្រង ប៉ុន្តែ ដោយសារផ្សែងក្រាស់ខ្លាំង ដំណើរការជួយសង្គ្រោះ ក៏ត្រូវជួបការលំបាក។

របាយការណ៍បឋមរបស់ប៉ូលិស បានឱ្យដឹងថា បំពង់អុកស៊ីហ្សែនសម្រាប់ព្យាបាលអ្នកជំងឺ COVID-19 បានផ្ទុះ និងបណ្ដាលឱ្យកើតមានអគ្គិភ័យនេះ។

នេះគឺជាករណីឆេះមន្ទីរពេទ្យទីពីរនៅប្រទេសនេះ ក្នុងរយៈពេល 3 ខែកន្លង។ កាលពីខែមេសា មន្ទីរពេទ្យ Ibn Khatib នៅរដ្ឋធានី បាកដាដ ក៏ជួបគ្រោះអគ្គិភ័យ ដោយសារតែផ្ទុះបំពង់អុកស៊ីហ្សែន បណ្ដាលឱ្យមនុស្សចំនួន 82 នាក់ បានស្លាប់ និង 110 នាក់រងរបួស៕

ប្រភព៖ Reuters
ប្រែសម្រួល៖ បុត្រា

July 13, 2021

ម្ចាស់ផ្ទះអូឡាំពិក មិនអនុញ្ញាត ឱ្យមានទស្សនិកជន ចូលរួមទស្សនាផ្ទាល់ ជាដាច់ខាត

ដោយសារប្រឈមនឹងការស្ទុះឡើងនៃករណីឆ្លងជំងឺកូវីដ-19 រដ្ឋាភិបាលជប៉ុន ដែលជាម្ចាស់ផ្ទះនៃព្រឹត្តិការណ៍កីឡាអូឡាំពិករដូវក្ដៅ បានសម្រេចចិត្តកាលពីចុងសប្តាហ៍កន្លងទៅ ដោយបានប្រកាសដាក់ទីក្រុងតូក្យូ ក្នុងភាពអាសន្នសាជាថ្មី ក្នុងអំឡុងពេលនៃការប្រកួតកីឡាអូឡាំពិកតែម្តង។

ព្រឹត្តិការណ៍មហាកីឡាអូឡាំពិក ឆ្នាំ2020 ដែលត្រូវបានលើកមកធ្វើនៅឆ្នាំ2021 ចាប់ពីថ្ងៃទី23 ខែកក្កដា រហូតដល់ថ្ងៃទី8 សីហា ឆ្នាំ2021នេះ នឹងត្រូវស្វាគមន៍អត្តពលិកច្រើនជាង 1ម៉ឺននាក់ ដោយមានវិញ្ញាសាប្រកួតដល់ទៅ 339វិញ្ញាសា ក្នុងប្រភេទកីឡាករទាំង33 ដែលត្រូវដាក់ឱ្យប្រកួត។

ការដាក់ទីក្រុង ក្នុងភាពអាសន្នជាថ្មីម្ដងទៀតរបស់ជប៉ុនលើកនេះ ថ្វីបើមិនតឹងតែងខ្លាំងដូចបណ្តាប្រទេសដទៃ នៅលើពិភពលោក ដោយមានត្រឹមតែការណែនាំ ឱ្យហាងលក់នានា ត្រូវឆាប់បិទការបម្រើសេវាកម្មក្ដី ប៉ុន្តែគណៈកម្មការរៀបចំកម្មវិធីប្រកកួតកីឡាអូឡាំពិក ត្រូវប្រឈមមុខនឹងការលំបាកមួយទៀត ដោយការប្រកួតត្រូវប្រព្រឹត្តដោយការបិទទ្វារ គ្មានទស្សនិកជនឱ្យចូលរួមឡើយ មិនមែនឱ្យចូលពាក់កណ្តាល ដូចសេចក្តីសម្រេចកាលពីខែមិថុនា ឆ្នាំ2021នោះទេ៕

July 13, 2021

វ៉ាក់សាំង COVID-19 ៖ WHO ព្រមានចំពោះការចាក់វ៉ាក់សាំងលាយឡំគ្នា

អង្គការសុខភាពពិភពលោក (WHO) បានព្រមានដល់បណ្ដាប្រទេសថា មិនគួរប្រញាប់ចាក់វ៉ាក់សាំងលាយឡំគ្នា រវាងវ៉ាក់សាំងប្រភេទផ្សេងគ្នា ដោយសារតែមិនទាន់មានទិន្នន័យវិទ្យាសាស្ត្រជាក់លាក់ដែលបញ្ជាក់ថា មានប្រសិទ្ធភាព។

ពិភពលោក បានរកឃើញអ្នកវិជ្ជមាននឹង COVID-19 សរុបជាង 188 លាននាក់ ក្នុងនោះមានជាង 4 លាននាក់បានស្លាប់, ជាង 171 លាននាក់បានជា និងជាង 12 លាននាក់កំពុងព្យាបាល។ នេះបើតាមគេហទំព័រ Worldometers។

Soumya Swaminathan ដែលជាប្រធានក្រុមអ្នកវិទ្យាសាស្ត្ររបស់ WHO មានយោបល់ថា មិនគួរយកវ៉ាក់សាំងរបស់ក្រុមហ៊ុនមួយ មកចាក់លាឡំជាមួយវ៉ាក់សាំងរបស់ក្រុមហ៊ុនផ្សេង លើមនុស្សម្នាក់នៅឡើយ។ លោកស្រី Soumya Swaminathan ថ្លែងថា នេះគឺជា «ប្រការគ្រោះថ្នាក់» ព្រោះថា មិនទាន់ដឹងច្បាស់អំពីផលប៉ះពាល់ដល់សុខភាព។

ប្រធាន WHO លោក Tedros Adhanom Ghebreyesus ក៏បានអំពាវនាវដល់បណ្ដាប្រទេសថា មិនគួរប្រញាប់បញ្ជាទិញ និងផ្ដើមយុទ្ធនាការចាក់វ៉ាក់សាំងដូសបន្ថែម ទៅលើអ្នកដែលបានទទួលការចាក់វ៉ាក់សាំងរួចរាល់ ក្នុងគ្រាដែលប្រទេសជាច្រើន មិនទាន់មានវ៉ាក់សាំង។

«ប្រទេស និងដែនដីមួយចំនួន កំពុងបញ្ជាទិញវ៉ាក់សាំងសម្រាប់ចាក់បន្ថែម (ដូសទីបី) ចំនួនរាប់លានដូស ខណៈប្រទេសដទៃជាច្រើន ពុំទាន់មានវ៉ាក់សាំងដើម្បីចាក់ឱ្យបុគ្គលិកសុខាភិបាល និងក្រុមពលរដ្ឋងាយរងគ្រោះ។ ជំនួសឱ្យការប្រើប្រាស់ Moderna និង Pfizer ជាដូសបន្ថែម នៅក្នុងប្រទេសដែលមានអត្រាការចាក់វ៉ាក់សាំងកម្រិតខ្ពស់ យើងស្នើឱ្យពួកគេបង្វែរកម្លាំងទាំងស្រុងមកឱ្យ COVAX ដែលជាកម្មវិធីផ្គត់ផ្គង់វ៉ាក់សាំងដល់បណ្ដាប្រទេសក្រីក្រ ប្រទេសដែលមានប្រាក់ចំណូលទាប និងមធ្យម ដែលមានអត្រានៃការចាក់វ៉ាក់សាំងទាប» លោក Tedros ថ្លែងដូច្នេះ។

COVAX បានឱ្យដឹងថា បានចុះកិច្ចព្រមព្រៀងទិញ-លក់វ៉ាក់សាំងចំនួន 550 លានដូស ជាមួយក្រុមហ៊ុនផលិតវ៉ាក់សាំងរបស់ ចិន ចំនួន 2 គឺ Sinopharm និង Sinovac ដើម្បីផ្ដល់ឱ្យបណ្ដាប្រទេសក្រីក្រ៕

ប្រភព៖ Reuters, CNN
ប្រែសម្រួល៖ បុត្រា

July 13, 2021

ទឹកជំនន់ “លេបយក” កប៉ាល់ និងផ្ទះជាច្រើន នៅប្រទេសចិន

ជំនន់ទឹកភ្លៀង បានគួច និងវាយពន្លិចកប៉ាល់ជាច្រើនគ្រឿង នៅពេលមេឃមានភ្លៀងធ្លាក់ខ្លាំង ដែលបានវាយប្រហារលើទីក្រុង Bazhong នៃខេត្ត Sichuan ភាគឦសានប្រទេសចិន។

ក្នុងវីដេអូ ដែលបានបង្ហោះនៅលើបណ្ដាញសង្គម បង្ហាញថា ទឹកជំនន់ កំពុងហូរគួចយ៉ាងខ្លាំងក្លានៅក្នុងតំបន់ភ្នំមួយនៃទីក្រុង Bazhong កាលពីថ្ងៃទី 10 កក្កដា បន្ទាប់ពីភ្លៀងចាប់ផ្ដើមធ្លាក់កាលពីដើមខែនេះ។ កប៉ាល់ជាច្រើនគ្រឿងត្រូវបានទឹកជំនន់គួចយកទៅទម្លាក់ចូលទៅក្នុងទីជ្រៅនៃទន្លេ។

ភ្លៀងធ្លាក់ខ្លាំងនៅក្នុងខេត្ត Sichuan ចាប់ពីថ្ងៃទី 9 កក្កដា បានបណ្ដាលឱ្យទឹកទន្លេចំនួន 14 នៅប្រទេសចិន ត្រូវឡើងខ្ពស់ និងគួចយកទាំងស្ពាន កប៉ាល់ និងផ្ទះជាច្រើន ហើយនាំឱ្យមនុស្សជាង 4,600 នាក់ ត្រូវជម្លៀសខ្លួនទៅកាន់ទីសុវត្ថិភាព។

https://www.youtube.com/watch?v=H25xs3dN4LQ

មិនទាន់មានរបាយការណ៍អំពីការស្លាប់ ប៉ុន្តែ សារព័ត៌មានចិន បានឱ្យដឹងថា ជំនន់ទឹកភ្លៀងបានប៉ះពាល់ដល់មនុស្សជាង 120,000 នាក់ និងបង្កការខូចខាតជាង 176 លានយុន (ប្រហែល 27 លានដុល្លារអាមេរិក)។

មជ្ឈមណ្ឌលជាតិឧតុនិយមរបស់ចិន កាលពីថ្ងៃទី 11 កក្កដា បានបន្តប្រកាសអាសន្ន ដោយប្រាប់ថា ភ្លៀងធំនឹងធ្លាក់នៅពាសពេញផ្ទៃប្រទេស ពិសេសគឺនៅភាគខាងជើង និងភាគកណ្ដាល៕

ប្រភព៖ Reuters, Global Times
ប្រែសម្រួល៖ បុត្រា

July 12, 2021

(វីដេអូ) – អ្នកក្លាហាន ប្រថុយស្លាប់ អង្គុយផឹកកាហ្វេលើផ្លូវដែក ដើម្បីបញ្ឈប់ដំណើររថភ្លើង

តុកាហ្វេ និងកៅអី ត្រូវបានរៀបចំដាក់នៅកណ្ដាលផ្លូវរថភ្លើង ហើយបុរសជា «អ្នកក្លាយហាន» ម្នាក់ អង្គុយជក់បារី ធ្វើព្រងើយ បើទោះជាអ្នកបើកបររថភ្លើង ខំប្រឹងចាប់ហ្វ្រាំង និងបរជិតមកដល់ហើយក្ដី។ ហេតុការណ៍នេះ បានកើតឡើងកាលពីថ្ងៃទី 22 ខែឧសភា ឆ្នាំ 2021 នៅឯ Casablanca នៃប្រទេស ម៉ារ៉ុក។

នៅក្នុងវីដេអូ គេឃើញតុ និងកៅអី ត្រូវបានគេដាក់កណ្ដាលផ្លូវដែក។ បន្ទាប់មក បុរសម្នាក់ក៏បានបង្ហាញខ្លួន និងដើរទៅអង្គុយលើកៅអីយ៉ាងក្លាហាន ស្របពេលដែលកញ្ចែរបស់រថភ្លើង បន្លឺឡើងកងរំពង និងតម្រង់មកដល់។ យ៉ាងនេះក៏ដោយ អ្នកក្លាហានរូបនេះ ហាក់មិនបានអើពើអ្វីទាំងអស់ រួមទាំងការស្លាប់ដែលស្ថិតនៅចំពោះមុខ។ ជំនួសមកវិញ បុរសនេះ បែរជាអុជបារី និងអង្គុយជក់ធ្វើដូចគ្មានរឿងអ្វីកើតឡើង ខណៈអ្នកបម្រើ នាំយកភេសជ្ជៈមកឱ្យ។ រថភ្លើងក៏បានចាប់ហ្វ្រាំងទាន់ពេល នៅពីក្រោយខ្នងអ្នកដំណើរចម្លែកនេះ។

សមត្ថកិច្ចក្នុងតំបន់ ក្រោយមកក៏កំណត់បានអត្តសញ្ញាណរបស់បុរសដែលបានរារាំងដំណើររបស់រថភ្លើងនេះ។ M.T ដែលជាពលរដ្ឋម្នាក់នៅក្នុងទីក្រុង Casablanca ត្រូវបានចាប់ខ្លួន រួមជាមួយនឹងមនុស្ស 2 នាក់ទៀត ក្នុងនោះមានម្នាក់ជាអ្នកថតវីដេអូ។ ពួកគេម្នាក់ៗ ត្រូវបានពិន័យដាក់ពន្ធនាគាររយៈពេល 2 ឆ្នាំ។ ដោយឡែក M.T ត្រូវបានពិន័យជាប្រាក់ 4,500 ដុល្លារអាមេរិក បន្ថែមពីលើការចាប់គុក 2 ឆ្នាំ ព្រោះតែបានបង្កការខូចខាតដល់ក្រុមហ៊ុនផ្លូវដែក៕

ប្រភព៖ News in 24
ប្រែសម្រួល៖ បុត្រា

July 12, 2021

Covid-19 នៅ វៀតណាម ៖ អ្នកវិជ្ជមានជាង 1,700 នាក់ ត្រូវបានរកឃើញ ចាប់ពីព្រឹក ដល់ថ្ងៃត្រង់ នៃថ្ងៃទី 12 ខែកក្កដា

វៀតណាម នាល្ងាចថ្ងៃទី 12 ខែកក្កដា ឆ្នាំ 2021 នេះ បានឱ្យដឹងថា បានរកឃើញករណីឆ្លង Covid-19 ចំនួន 1,112 នាក់បន្ថែមទៀត ក្នុងនោះមាន 1,105 នាក់ ជាករណីឆ្លងក្នុងស្រុក និង 7 នាក់ ជាករណីនាំចូលពីបរទេស។

ក្នុងចំណោមអ្នកជំងឺថ្មីខាងលើ មាន 879 នាក់ ត្រូវបានរកឃើញនៅទីក្រុងហូជីមិញ ខណៈរដ្ឋធានីហាណូយ មានតែ 82 នាក់ប៉ុណ្ណោះ។ រាប់ចាប់ពីព្រឹក រហូតដល់ម៉ោង 2 ល្ងាចថ្ងៃនេះ វៀតណាម បានរកឃើញអ្នកវិជ្ជមានសរុបចំនួន 1,764 នាក់ នៅទូទាំងប្រទេស។

គិតមកដល់បច្ចុប្បន្ន វៀតណាម បានរកឃើញអ្នកវិជ្ជមាននឹង Covid-19 សរុបចំនួន 27.259 នាក់ ក្នុងនោះមាន 19.125 នាក់ កំពុងព្យាបាល, 8.025 នាក់បានជា និង 105 នាក់ បានបាត់បង់ជីវិត៕

ប្រភព៖ ក្រសួងសុខាភិបាលវៀតណាម
ប្រែសម្រួល៖ បុត្រា

July 12, 2021

វ៉ាក់សាំង Sinovac របស់ ចិន មានប្រសិទ្ធភាពពិត ដល់កម្រិតណា?

វ៉ាក់សាំងរបស់ក្រុមហ៊ុន ចិន ស៊ីណូវ៉ាក់ (Sinovac) ជួយទប់ស្កាត់ការឆ្លង Covid-19 ការត្រូវចូលពន្យាបាលនៅមន្ទីរពេទ្យ និងអត្រានៃការស្លាប់ ប៉ុន្តែ កម្រិតនៃប្រសិទ្ធភាពរបស់វា ថយចុះទៅតាមពេលវេលា និងខ្សោយ នៅចំពោះមុខ វ៉ារ្យ៉ង់ (វីរុសបំប្លែងខ្លួន) ឈ្មោះ Delta។

វ៉ាក់សាំងរបស់ក្រុមហ៊ុន ចិន Sinovac Biotech គឺជាវ៉ាក់សាំងប្រឆាំង Covid-19 ដែលត្រូវបានប្រើប្រាស់ច្រើនបំផុតក្នុងពិភពលោក ដោយមានជាង 943 លានដូស ត្រូវបានផ្គត់ផ្គង់។ នេះបើតាមសារព័ត៌មាន South China Morning Post។

ទិន្នន័យនៃការចាក់វ៉ាក់សាំងខាងលើ នៅប្រទេស ឈីលី ដែលត្រូវបានចុះផ្សាយលើគេហទំព័រវេជ្ជសាស្ត្រ New England Journal of Medicine កាលពីសប្ដាហ៍មុន បានបង្ហាញថា វ៉ាក់សាំង Sinovac មានប្រសិទ្ធភាព 65.9% ក្នុងការទប់ស្កាត់ការឆ្លងនៃវីរុស Covid-19, 87.5% ក្នុងការទប់ស្កាត់ការចូលពេទ្យ និង 86.3% ក្នុងការទប់ស្កាត់មិនឱ្យអ្នកជំងឺបាត់បង់ជីវិត។

បច្ចុប្បន្ន នៅមានកង្វះខាតច្រើន ទាក់ទិននឹងការសិក្សាស្រាវជ្រាវអំពីប្រសិទ្ធភាពរបស់វ៉ាក់សាំង នៅចំពោះមុខឥទ្ធិពលរបស់ វ៉ារ្យ៉ង់ Delta នៃវីរុស Covid-19។ Feng Zijian អនុប្រធាននៃមជ្ឈមណ្ឌលគ្រប់គ្រង និងបង្ការជំងឺឆ្លងរបស់ ចិន កាលពីខែមិថុនា បានននិយាយថា អង្គបដិប្រាណដែលបង្កើតឡើងដោយសារវ៉ាក់សាំង Covid-19 ចំនួន 2 ប្រភេទរបស់ ចិន មានប្រសិទ្ធភាពតិច នៅចំពោះមុខ វ៉ារ្យ៉ង់ Delta បើធៀបនឹង វ៉ារ្យ៉ង់ ដទៃ ប៉ុន្តែ វ៉ាក់សាំងនេះនៅតែជួយការពារបាន។ លោក Feng Zijian មិនបានបង្ហើបឱ្យដឹងអំពីឈ្មោះរបស់វ៉ាក់សាំងទាំង 2 ខាងលើនេះទេ។

ក្រុមមន្ត្រីសុខាភិបាល កំពុងស្នើឱ្យមានការសិក្សាបន្ថែមអំពីប្រសិទ្ធភាពរបស់វ៉ាក់សាំងខាងលើ នៅចំពោះមុខវីរុសបំប្លែងខ្លួន Delta និងថា តើចាំបាច់ត្រូវចាក់ម្ជុលទីបីដែរ ឬទេ ដើម្បីបង្កើនកម្លាំងការពាររាងកាយ។

ឥណ្ឌូនេស៊ី គឺជាប្រទេសមួយ ក្នុងចំណោមប្រទេសដែលប្រើប្រាស់វ៉ាក់សាំង Sinovac ច្រើនជាងគេ។ ទិន្នន័យរបស់ក្រុមស្រាវជ្រាវឯករាជ្យ LaporCovid-19 បង្ហាញថា បុគ្គលិកសុខាភិបាលរបស់ ឥណ្ឌូនេស៊ី ជាង 130 នាក់ បានស្លាប់ដោយសារ Covid-19 រាប់ចាប់ពីខែមិថុនា ក្នុងនោះមាន 58 នាក់ បានស្លាប់ក្នុងខែកក្កដា។ ក្រុមស្រាវជ្រាវ មិនបានឱ្យដឹងថា មានជនរងគ្រោះប៉ុន្មាននាក់បានទទួលការចាក់វ៉ាក់សាំងរួចរាល់នោះទេ ប៉ុន្តែ មានបុគ្គលិកសុខាភិបាល ឥណ្ឌូនេស៊ី ចំនួនប្រហែល 95% បានទទួលការចាក់វ៉ាក់សាំង។

អ្នកជំនាញផ្នែករោគឆ្លង ជនជាតិ ឥណ្ឌូនេស៊ី Dicky Budiman មកពីសាកលវិទ្យាល័យអូស្ត្រាលី Griffith និយាយថា បុគ្គលិកសុខាភិបាលជាច្រើននាក់ បើទោះបានឆ្លងវីរូស ប៉ុន្តែ នៅតែគេចផុតពីការស្លាប់ និងមានរោគសញ្ញាស្រាល។ «ប្រការនេះនាំឱ្យយើងជឿថា វ៉ាក់សាំង Sinovac មានប្រសិទ្ធភាពក្នុងកម្រិតណាមួយ ក្នុងការប្រឆាំងនឹងវ៉ារ្យ៉ង់ថ្មី។ នេះជាមូលហេតុដែលយើងលើកទឹកចិត្តឱ្យពលរដ្ឋ ទទួលយកការចាក់វ៉ាក់សាំងនេះ» លោក Budiman បញ្ជាក់បន្ថែម។

ករណីដែលបុគ្គលិកសុខាភិបាលបាត់បង់ជីវិតដោយសារ Covid-19 ត្រូវបានលោក Budiman អះអាងថា អាចបណ្ដាលមកពីការចុះថយនៃប្រសិទ្ធភាពរបស់វ៉ាក់សាំង ទៅតាមពេលវេលា និងថមថយឥទ្ធិពល នៅចំពោះមុខវ៉ារ្យ៉ង់ Delta។

នៅឯប្រទេស ទួរគី វិញ ការស្រាវជ្រាវលើបុគ្គលិកសុខាភិបាលចំនួន 1,053 នាក់ បានបង្ហាញថា ក្រោយការចាក់វ៉ាក់សាំង Sinovac រួចរាល់បាន 3 ខែ 23% ក្នុងចំណោមនេះ មានអង្គបដិប្រាណតិចជាងមុន និងក្រោមកម្រិតនៃប្រសិទ្ធភាព។ ក៏ប៉ុន្តែ ក្នុងចំណោមបុគ្គលិកសុខាភិបាលដែលបានចាក់វ៉ាក់សាំង គឺមាន ត្រឹមតែ 2.8% ប៉ុណ្ណោះ ដែលបានឆ្លងវីរុស និងពុំមានអ្នកណាម្នាក់ត្រូវចូលពេទ្យនោះឡើយ ក្រោយការចាក់វ៉ាក់សាំង ចន្លោះពី 1 ដល់ 3 ខែ។

សាស្ត្រាចារ្យមួយរូប មកពីមហាវិទ្យាល័យជីវវេជ្ជសាស្ត្រ នៃសាកលវិទ្យាល័យហុងកុង យល់ថា ប្រសិទ្ធភាពរបស់ Sinovac ប្រាកដជានឹងថយចុះនៅចំពោះមុខវីរុសបំប្លែងខ្លួន Delta ប៉ុន្តែ ថយចុះប៉ុន្មានភាគរយ គេមិនទាន់ដឹងច្បាស់នៅឡើយ។ លោកយល់ថា ត្រូវការកែសម្អប្រសិទ្ធភាព និងសាកល្បងចាក់ម្ជុលទីបី សម្រាប់ក្រុមមនុស្សដែលមានហានិភ័យខ្ពស់ ឬចាក់លាយជាមួយវ៉ាក់សាំងដទៃ។

ចំណែក Yin Weidong ដែលជាប្រធានប្រតិបត្តិរបស់ក្រុមហ៊ុន Sinovac បាននិយាយថា លទ្ធផលនៃការពិសោធលើមនុស្ស បង្ហាញថា អ្នកដែលបានចាក់វ៉ាក់សាំងដូសទីបី បន្ទាប់ពីបានចាក់ដូសទីពីរបានពី 3 ដល់ 6 ខែ មានអង្គបដិប្រាណកើនឡើងច្រើនជាងមុន 10 ដង ដោយប្រើពេលត្រឹមតែ 10 ថ្ងៃ ក្រោយពីបានចាក់៕

ប្រភព៖ SCMP
ប្រែសម្រួល៖ បុត្រា

July 12, 2021

Author: សឿន សំណាង