សឿន សំណាង - La Reine Media

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 18 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 593 នាក់, អ្នកជាចំនួន 748 នាក់ និងអ្នកស្លាប់ចំនួន 12 នាក់បន្ថែមទៀត នៅក្នុងថ្ងៃទី 17 ខែសីហា ឆ្នាំ 2021។

គិតត្រឹមព្រឹកថ្ងៃទី 18 ខែសីហា ឆ្នាំ 2021 តួលេខ COVID-19 នៅ កម្ពុជា រួមមាន៖ – អ្នកឆ្លងសរុប= 87,190 នាក់, – អ្នកជាសះស្បើយ= 82,666 នាក់ និង – អ្នកស្លាប់= 1,730 នាក់។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 209,388,980 នាក់ ត្រូវបានរកឃើញ ក្នុងនោះមានជាង 187,676,670 នាក់បានជា, ជាង 4,394,850 នាក់បានស្លាប់ និងជាង 17,317,440 នាក់ កំពុងព្យាបាល៕

August 18, 2021

Bloomberg ៖ «អាមេរិក បង្កកប្រាក់ជិត 9.5 ពាន់លានដុល្លារ របស់ អាហ្វហ្គានីស្ថាន»

មន្ត្រីមួយរូបរបស់រដ្ឋាភិបាលលោក Joe Biden បានទទួលស្គាល់ថា សហរដ្ឋអាមេរិក កំពុងបង្កកប្រាក់ជិត 9.5 ពាន់លានដុល្លារ ដែលជាកម្មសិទ្ធិរបស់ធនាគារជាតិ អាហ្វហ្គានីស្ថាន។

ទន្ទឹមនឹងការបង្កកប្រាក់ខាងលើ មន្ត្រី អាមេរិក រូបនេះក៏បានឱ្យដឹងថា សហរដ្ឋអាមេរិក ក៏បានផ្អាកការផ្ទេរសាច់ប្រាក់សុទ្ធទៅឱ្យ អាហ្វហ្គានីស្ថាន ផងដែរ។ សកម្មភាពនេះ ត្រូវបានធ្វើឡើងក្នុងបំណងរារាំងរដ្ឋាភិបាលដែលដឹកនាំដោយក្រុម តាលីបង់ អាចគ្រប់គ្រងប្រភពនៃខ្ទង់ប្រាក់នេះបាន។

ប្រភពព័ត៌មានរបស់ Bloomberg អះអាងថា រាល់ទ្រព្យសម្បត្តិរបស់ធនាគារជាតិណាមួយដែលត្រូវបានរដ្ឋាភិបាល អាហ្វហ្គានីស្ថាន ដាក់នៅឯ សហរដ្ឋអាមេរិក នឹងមិនត្រូវបានអនុញ្ញាតផ្ដល់ឱ្យ តាលីបង់ ព្រោះថា ក្រុមនេះនៅតែស្ថិតក្នុងបញ្ជីឈ្មោះនៃបណ្ដាក្រុមដែលត្រូវរងការដាក់ទណ្ឌកម្ម របស់ក្រសួងហិរញ្ញវត្ថុ សហរដ្ឋអាមេរិក។

ការដាក់ទណ្ឌកម្មរបស់ សហរដ្ឋអាមេរិក ចំពោះ តាលីបង់ គឺមានន័យថា ក្រុមប្រដាប់អាវុធនេះ មិនអាចចូលទៅគ្រប់គ្រងខ្ទង់ថវិកាណាទាំងអស់។ ប្រភពព័ត៌មានបញ្ជាក់ថា ភាគច្រើននៃខ្ទង់ប្រាក់ជិត 9.5 ពាន់លានដុល្លាររបស់ធនាគារជាតិ អាហ្វហ្គានីស្ថាន បច្ចុប្បន្ន មិនត្រូវបានគ្រប់គ្រងនៅ អាហ្វហ្គានីស្ថាន នោះទេ។ មកដល់ពេលនេះ ក្រសួងហិរញ្ញវត្ថុ អាមេរិក មិនទាន់បានអធិប្បាយអ្វីអំពីព័ត៌មាននេះនៅឡើយ៕

August 18, 2021

តាលីបង់ សន្យាថា អនុញ្ញាតឱ្យស្ត្រី អាហ្វហ្គានីស្ថាន ទៅរៀន និងទៅធ្វើការ

អ្នកនាំពាក្យរបស់ក្រុមប្រដាប់អាវុធ តាលីបង់ បានសន្យាថា ស្ត្រី អាហ្វហ្គានីស្ថាន នឹងមិនត្រូវរងការរើសអើង និងមានឱកាសទៅសិក្សារៀនសូត្រ ធ្វើការ «នៅក្នុងក្របខណ្ឌ» ច្បាប់សាសនាអ៊ីស្លាម។

«រដ្ឋអ៊ីស្លាម (Islamic Emirate of Afghanistan) គោរពសិទ្ធិរបស់ស្ត្រី ក្នុងក្របខណ្ឌច្បាប់សាសនាអ៊ីស្លាម Sharia» អ្នកនាំពាក្យរបស់ តាលីបង់ លោក Zabihullah Mujahid ថ្លែងដូច្នេះ កាលពីថ្ងៃទី 17 សីហា ក្នុងសន្និសីទសារព័ត៌មានដំបូងរបស់ តាលីបង់ ក្រោយពីក្រុមនេះ គ្រប់គ្រងរដ្ឋធានីកាប៊ុល នៃប្រទេសអាហ្វហ្គានីស្ថាន។

លោក Zabihullah Mujahid និយាយថា ស្ត្រីនៅ អាហ្វហ្គានីស្ថាន នឹងទទួលបានសិទ្ធិ និង «សកម្មភាពក្នុងវិស័យ និងតំបន់ផ្សេងគ្នា ដោយយោងទៅតាមវិន័យ និងការកំណត់» ក្នុងនោះមានទាំងវិស័យអប់រំ សុខាភិបាល នគរបាល និងប្រព័ន្ធយុត្តិធម៌។

សិស្សសាលាវិចិត្រសិល្បៈក្នុងឈុតឈ្នួត Hijab នៅ អាហ្វហ្គានីស្ថាន

«ខ្ញុំចង់ធានាដល់គ្រប់គ្នាថា នឹងពុំមានការរើសអើងណាមួយចំពោះស្ត្រី ប៉ុន្តែ ពិតណាស់ ត្រូវតែស្ថិតក្នុងក្របខណ្ឌរបស់យើងខ្ញុំ» អ្នកនាំពាក្យរបស់ តាលីបង់ បញ្ជាក់បន្ថែម ប៉ុន្តែ មិនបាននិយាយលម្អិតអំពីក្របខណ្ឌនេះនោះទេ។

ឆ្លើយតបនឹងសំនួរអំពីលទ្ធភាពដែលស្ត្រី អាហ្វហ្គានីស្ថាន អាចបន្តធ្វើការក្នុងផ្នែកផ្សព្វផ្សាយ លោក Mujahid និយាយថា តាលីបង់ មិនទាន់បង្កើតរដ្ឋាភិបាល ហើយប្រទេសនេះ ត្រូវការពេលវេលាដើម្បីបង្កើតច្បាប់។

មុននេះ អ្នកនាំពាក្យមួយរូបផ្សេងទៀតរបស់ តាលីបង់ គឺលោក Suhail Shaheen បានអះអាងថា ស្ត្រីអាហ្វហ្កានីស្ថាន នៅតែអាចធ្វើការ និងរៀនដល់កម្រិតមហាវិទ្យាល័យ។ លោកថា តាលីបង់ សន្យាថា គោរពសិទ្ធិទទួលបានការអប់រំ ធ្វើការ និងសេរីភាពបញ្ចេញមតិ របស់ស្ត្រី «ក្រោមពន្លឺនៃច្បាប់សាសនាអ៊ីស្លាម»។

លោក Suhail Shaheen បន្ថែមថា តាលីបង់ នឹងមិនបង្ខំឱ្យស្ត្រីអាហ្វហ្គានីស្ថាន ពាក់ស្បៃ Burqa ដែលជាឈុតសម្លៀកបំពាក់ គ្របពីក្បាលដល់ចុងជើង នោះទេ ដោយគ្រាន់តែស្នើឱ្យពួកគេប្រើប្រាស់ឈ្នួត hijab ប្រពៃណីរបស់អ៊ីស្លាមសាសនិក (មូស្លីម)។

គួររំលឹកថា មុនពេលត្រូវបាន សហរដ្ឋអាមេរិក ផ្ដួលរំលំកាលពីឆ្នាំ 2001 ក្រុមតាលីបង់ មានឈ្មោះល្បីខ្លាំង ខាងប្រើច្បាប់អ៊ីស្លាមដ៏មហាតឹងរ៉ឹង នៅក្នុងអំឡុង 5 ឆ្នាំនៃការកាន់កាប់អំណាច ក្នុងនោះក៏មានការបង្ខំឱ្យស្ត្រីស្លៀកពាក់ជិតពីក្បាលដល់ចុងជើង ការហាមក្មេងស្រីមិនឱ្យទៅសាលារៀន និងដាក់ពិន័យលើស្ត្រីដែលចេញដើរតាមផ្លូវដោយមិនមានសាច់ញាតិជាមនុស្សប្រុសទៅជាមួយ៕

August 18, 2021

តាលីបង់ ប្រកាសថា «គំនុំគុំកួន បានបញ្ចប់ហើយ» ខណៈអនុប្រធានាធិបតី ប្រកាសថា ខ្លួនជាមេដឹកនាំស្របច្បាប់

ក្រុមតាលីបង់ ដែលទើបដណ្ដើមបានជ័យជំនះលើ សហរដ្ឋអាមេរិក ក៏ដូចជារដ្ឋាភិបាល អាហ្វហ្គានីស្ថាន បានឱ្យដឹងថា «គំនុំគុំកួន ត្រូវបានបញ្ចប់» និងមិនចង់មានសត្រូវណាមួយទៀតនោះឡើយ ទន្ទឹមនឹងការបោះជំហានទៅរកការបង្កើតរដ្ឋាភិបាលថ្មី។

«យើងគ្មានបំណងវិលទៅរកសង្គ្រាម ឬជម្លោះអ្វីទៀតនោះទេ។ ការគុំកួននឹងគ្នា បានបញ្ចប់ ហើយយើងចង់រស់នៅក្នុងសន្តិភាព។ យើងមិនចង់មានសត្រូវណាមួយទេ ទាំងក្នុង និងក្រៅប្រទេស» អ្នកនាំពាក្យរបស់ តាលីបង់ Zabihullah Mujahid និយាយដូច្នេះនៅក្នុងសន្និសីទសារព័ត៌មានកាលពីថ្ងៃទី 17 សីហា។

នេះគឺជាសន្និសីទសារព័ត៌មានដំបូងបង្អស់ រាប់ចាប់ពី តាលីបង់ ដណ្ដើមបានជ័យជំនះស្ទើរតែទាំងស្រុងនៅ អាហ្វហ្គានីស្ថាន កាលពីថ្ងៃទី 15 សីហា។ លោក Zabihullah Mujahid បញ្ជាក់ថា «អាហ្វហ្គានីស្ថាន នឹងមានរដ្ឋាភិបាលអ៊ីស្លាម ដ៏ខ្លាំងក្លាមួយ»។

យោងតាម Zabihullah Mujahid មេដឹកនាំកំពូលរបស់ តាលីបង់ បានប្រកាសលើកលែងទោសរួមរួចហើយ និងសន្យាថា ធានាសុវត្ថិភាពដល់ក្រុមអ្នកម៉ៅការ អ្នកបកប្រែដែលធ្លាប់ធ្វើការឱ្យ អាមេរិក និងសម្ព័ន្ធមិត្តរបស់ អាមេរិក ក៏ដូចជាទាហានរបស់រដ្ឋាភិបាលដែលប្រឆាំងនឹង តាលីបង់ រួមទាំងគ្រួសាររបស់ពួកគេ ដែលព្យាយាមចាកចេញពី អាហ្វហ្គានីស្ថាន។

ទោះជាយ៉ាងនេះក្ដី អនុប្រធានាធិបតី អាហ្វហ្គានីស្ថាន លោក Amrullah Saleh បានប្រកាសដែរថា លោកគឺជាមេដឹកនាំបណ្ដោះអាសន្នស្របច្បាប់ បន្ទាប់ពីប្រធានាធិបតី Ashraf Ghani ចាក់ចេញពីប្រទេស។

«យោងតាមរដ្ឋធម្មនុញ្ញរបស់ អាហ្វហ្គានីស្ថាន នៅពេលប្រធានាធិបតីអវត្តមាន រត់គេចខ្លួន លាលែងពីតំណែង ឬទទួលមរណភាព អនុប្រធានាធិបតីទីមួយ ត្រូវក្លាយជាប្រធានាធិបតីបណ្ដោះអាសន្ន។ ខ្ញុំកំពុងមានវត្តមាននៅក្នុងប្រទេសរបស់ខ្ញុំ និងជាប្រធានាធិបតីបណ្ដោះអាសន្នស្របច្បាប់។ ខ្ញុំកំពុងទាក់ទងទៅកាន់មេដឹកនាំនានា ដើម្បីធានាចំពោះការគាំទ្រ និងការយល់ស្របរបស់ពួកគេ» លោក Amrullah Saleh សរសេរនៅលើ Twitter កាលពីម្សិលមិញដូច្នេះ។

ក្រុមតាលីបង់ ចូលគ្រប់គ្រងរដ្ឋធានីកាប៊ុល បានយ៉ាងងាយស្រួល កាលពីព្រលប់ថ្ងៃទី 15 សីហា។ តាលីបង់ ដណ្ដើមបានជោគជ័យលើកងទ័ពរដ្ឋាភិបាល អាហ្វហ្គានីស្ថាន ក្រោយពី សហរដ្ឋអាមេរិក និងសម្ព័ន្ធមិត្តបានដកទ័ពភាគច្រើនរបស់ពួកគេ ចេញពី អាហ្វហ្គានីស្ថាន។

នៅពេល តាលីបង់ ជិតចូលដល់រដ្ឋធានី ប្រធានាធិបតី អាហ្វហ្គានីស្ថាន Ashraf Ghani ក៏បានរត់ចោលប្រទេស ដោយលើកឡើងថា «ដើម្បីបញ្ចៀសការបង្ហូរឈាម» បណ្ដាលឱ្យរដ្ឋាភិបាលដែលគាំទ្រដោយប្រទេសលោកខាងលិច ត្រូវដួលរលំ។ ក្រុមតាលីបង់ បានចូលដល់វិមានប្រធានាធិបតី ហើយប្រកាសថានឹងបង្កើត រដ្ឋ Islamic Emirate of Afghanistan (បកប្រែក្រៅផ្លូវការថា រដ្ឋអ៊ីស្លាមរួបរួមនៃអាហ្វហ្គានីស្ថាន)៕

August 18, 2021

តាលីបង់ ប្រកាសលើកលែងទោសដល់ក្រុមមន្ត្រីរដ្ឋាភិបាលអាហ្វហ្គានីស្ថាន

ក្រុមតាលីបង់ បានប្រកាសបទបញ្ជាលើកលែងទោស ដល់ក្រុមមន្ត្រីរដ្ឋាភិបាល អាហ្វហ្គានីស្ថាន ទាំងអស់ ព្រមទាំងបានអំពាវនាវឱ្យពួកគេចូលមកធ្វើការវិញ។

«បទបញ្ជានៃការលើកលែងទោសរួម ត្រូវបានប្រកាសដល់គ្រប់គ្នា ដូច្នេះ អ្នកទាំងឡាយអាចចាប់ផ្ដើមជីវភាពតាមធម្មតាដោយភាពជឿជាក់» កងកម្លាំង តាលីបង់ បានប្រកាសនាថ្ងៃទី 17 សីហានេះ បន្ទាប់ពីគ្រប់គ្រង អាហ្វហ្គានីស្ថាន បានពីរថ្ងៃ។

អ្នកនាំពាក្យរបស់ តាលីបង់ Sohail Shaheen កាលពីថ្ងៃទី 15 សីហា ក៏បានឱ្យដឹងថា រដ្ឋាភិបាលថ្មីនឹងរួមបញ្ចូលទាំងក្រុមជនជាតិអាហ្វហ្គានីស្ថាន ដែលមិនស្ថិតក្នុងជួរកងទ័ពតាលីបង់ និងក្រុមមនុស្សមកពីរដ្ឋាភិបាលចាស់។

Sohail Shaheen និយាយថា អ្នកទាំងឡាយដែលបានប្រគល់អាវុធ និងចូលរួមជាមួយកម្លាំងតាលីបង់ សុទ្ធតែទទួលបានការលើកលែងទោស ក៏ដូចជាការធានាសុវត្ថិភាពអាយុជីវិត និងទ្រព្យសម្បត្តិ។

គួររំលឹកថា មុនពេលត្រូវបាន សហរដ្ឋអាមេរិក ផ្ដួលរំលំកាលពីឆ្នាំ 2001 ក្រុមតាលីបង់ មានឈ្មោះល្បីខ្លាំង ខាងប្រើច្បាប់អ៊ីស្លាមដ៏មហាតឹងរ៉ឹង នៅក្នុងអំឡុង 5 ឆ្នាំនៃការកាន់កាប់អំណាច ក្នុងនោះក៏មានការបង្ខំឱ្យស្ត្រីស្លៀកពាក់ជិតពីក្បាលដល់ចុងជើង ការហាមក្មេងស្រីមិនឱ្យទៅសាលារៀន និងដាក់ពិន័យលើស្ត្រីដែលចេញដើរតាមផ្លូវដោយមិនមានសាច់ញាតិជាមនុស្សប្រុសទៅជាមួយ៕

August 17, 2021

កងទ័ព អាមេរិក នឹងប្រើកម្លាំងបាយខ្លាំងក្លា បើសិន តាលីបង់ វាយប្រហារព្រលានយន្តហោះនៅកាប៊ុល

ឧត្ដមសេនីយ McKenzie បានជួបចរចាជាមួយតំណាងរបស់ក្រុម តាលីបង់ ដើម្បីស្នើក្រុមនេះចៀសវាងការវាយប្រហារទៅលើព្រលានយន្តហោះ Hamid Karzai ជាកន្លែងដែល អាមេរិក កំពុងប្រើប្រាស់ដើម្បីជម្លៀសពលរដ្ឋចេញពី អាហ្វហ្គានីស្ថាន ក្នុងទ្រង់ទ្រាយធំ។

ឧត្ដមសេនីយ Frank McKenzie មេបញ្ជាការកងទ័ពសហរដ្ឋអាមេរិក នៅក្នុងកិច្ចពិភាក្សាមួយនៅ Doha កាលពីថ្ងៃទី 15 សីហា បានព្រមានដល់ក្រុម តាលីបង់ ថា កងទ័ព អាមេរិក នឹងឆ្លើយតបយ៉ាងចាស់ដៃ ដើម្បីការពារព្រលានយន្តហោះនៅកាប៊ុល បើសិនជាចាំបាច់។ នេះបើតាមមន្ត្រីម្នាក់របស់ សហរដ្ឋអាមេរិក។

អ្នកនាំពាក្យរបស់មន្ទីរបញ្ចកោណ John Kerby និយាយថា ទាហានអាមេរិក ប្រមាណ 2,500 នាក់ កំពុងឈរជើងនៅឯព្រលានយន្តហោះក្នុងរដ្ឋធានីកាប៊ុល ដើម្បីការពារសន្តិសុខសម្រាប់ជម្លៀសពលរដ្ឋអាមេរិក អាហ្វហ្គានីស្ថាន រួមនឹងក្រុមមនុស្សដែលចង់ចាកចេញពីប្រទេស ក្រោយ តាលីបង់ ចូលមកកាន់កាប់កាប៊ុល។

កិច្ចប្រជុំកាលពីថ្ងៃទី 15 សីហា ឧត្តមសេនីយ McKenzie និង តាលីបង់ បានយល់ព្រមបង្កើត «យន្តការដោះស្រាយជម្លោះ» ជាកិច្ចព្រមព្រៀងមួយដែល តាលីបង់ នឹងមិនធ្វើអន្តរាគមន៍លើការជម្លៀសពលរដ្ឋនៅឯព្រលានយន្តហោះក្នុងរដ្ឋធានីកាប៊ុល។

មន្ត្រីម្នាក់របស់ សហរដ្ឋអាមេរិក និយាយថា បច្ចុប្បន្ន កងទ័ពអាមេរិក បានផ្អាករាល់សកម្មភាពវាយប្រហារតាមផ្លូវអាកាស សំដៅលើក្រុមតាលីបង់ ទៅតាមកិច្ចព្រមព្រៀងមុននេះ។

ក្រុមតាលីបង់ ចូលគ្រប់គ្រងរដ្ឋធានីកាប៊ុល បានយ៉ាងងាយស្រួល កាលពីព្រលប់ថ្ងៃទី 15 សីហា។ តាលីបង់ ដណ្ដើមបានជោគជ័យលើកងទ័ពរដ្ឋាភិបាល អាហ្វហ្គានីស្ថាន ក្រោយពី សហរដ្ឋអាមេរិក និងសម្ព័ន្ធមិត្តបានដកទ័ពភាគច្រើនរបស់ពួកគេ ចេញពី អាហ្វហ្គានីស្ថាន។

នៅពេល តាលីបង់ ជិតចូលដល់រដ្ឋធានី ប្រធានាធិបតី អាហ្វហ្គានីស្ថាន Ashraf Ghani ក៏បានរត់ចោលប្រទេស ដោយលើកឡើងថា «ដើម្បីបញ្ចៀសការបង្ហូរឈាម» បណ្ដាលឱ្យរដ្ឋាភិបាលដែលគាំទ្រដោយប្រទេសលោកខាងលិច ត្រូវដួលរលំ។ ក្រុមតាលីបង់ បានចូលដល់វិមានប្រធានាធិបតី ហើយប្រកាសថានឹងបង្កើត រដ្ឋ Islamic Emirate of Afghanistan (បកប្រែក្រៅផ្លូវការថា រដ្ឋអ៊ីស្លាមរួបរួមនៃអាហ្វហ្គានីស្ថាន)៕

August 17, 2021

«មេរោគស៊ីខួរក្បាល» Naegleria fowleri សម្លាប់មនុស្សនៅ សហរដ្ឋអាមេរិក

កុមារម្នាក់ រស់នៅក្នុងរដ្ឋ California បានស្លាប់ដោយសារតែមេរោគដ៏កម្រមួយប្រភេទដែលរស់នៅក្នុងទឹកសាប បានឆ្លងចូលទៅក្នុងខួរក្បាល។

សារព័ត៌មាន AP បានឱ្យដឹងថា កុមារាវ័យ 7 ឆ្នាំខាងលើ ត្រូវបានបញ្ជូនទៅសង្គ្រោះបន្ទាន់នៅឯមជ្ឈមណ្ឌលសុខាភិបាល UC Davis ក្នុងរដ្ឋ California សហរដ្ឋអាមេរិក កាលពីថ្ងៃទី 30 កក្កដា។ កុមារនេះមានអាការហើមខួរក្បាលយ៉ាងធ្ងន់ធ្ងរ និងបានស្លាប់បន្ទាប់ពីទទួលការព្យាបាលបានជាងមួយសប្ដាហ៍។ មូលហេតុនៃការស្លាប់នេះគឺដោយសារឆ្លងមេរោគ Naegleria fowleri ក្រោយពីកុមាររូបនេះបានទៅហែលទឹកបឹងមួយនៅក្នុងទីក្រុង Tehama។

Naegleria fowleri គឺជាប្រភេទមេរោគស៊ីខួរក្បាល ស្ថិតក្នុងក្រុមមេរោគកោសិកាទោល Excavata ដែលរស់នៅក្នុងបរិស្ថានទឹកសាប ដូចជាទន្លេ បឹង និងជ្រោះទឹកក្ដៅជាដើម។ មូលហេតុនៃការឆ្លងមេរោគនេះ ភាគច្រើនកើតឡើងដោយសារជនរងគ្រោះបណ្ដោយឱ្យទឹកដែលមានផ្ទុកមេរោគនេះ ចូលទៅក្នុងច្រមុះនៅពេលមុជទឹក។ ពេលបានចូលក្នុងច្រមុះ Naegleria fowleri អាចជ្រៀតចូល និងបំផ្លាញជាលិកាខួរក្បាល។

មជ្ឈមណ្ឌលសុខាភិបាល Tehama និយាយថា នេះគឺជាជំងឺដ៏សែនកម្រ ដោយមានតែ 10 ករណីប៉ុណ្ណោះដែលត្រូវបានរាយការណ៍នៅ California ចាប់តាំងពីឆ្នាំ 1971 ប៉ុន្តែ អត្រានៃការរួចពីការស្លាប់បន្ទាប់ពីបានឆ្លងមេរោគនេះគឺមានមិនដល់ 3%។

អ្នកវិទ្យាសាស្ត្រមិនទាន់យល់ច្បាស់ថា ហេតុអ្វីមនុស្សមួយចំនួនអាចរួចពីការស្លាប់បាន ពេលបានឆ្លងមេរោគនេះ។ ប៉ុន្តែ កត្តាមួយចំនួនដែលអាចរួមចំណែកក្នុងការសង្គ្រោះជីវិតអ្នកជំងឺនេះបាន នោះគឺ ការឆាប់រកឃើញជំងឺ ការព្យាបាលដោយប្រើថ្នាំសាកល្បង miltefosine បូករួមនឹងវិធីសាស្ត្រព្យាបាលពិសេសៗមួយចំនួនទៀត ដើម្បីបន្ថយការហើមរបស់ខួរក្បាល។

ដើម្បីចៀសវាងការឆ្លងមេរោគដ៏កាចសាហាវនេះ អ្នកត្រូវតែឈប់ហែល ឬមុជទឹកក្នុងតំបន់ទឹកសាប ពិសេសគឺបឹងធម្មជាតិ។ បើនៅតែចង់ហែលទឹក អ្នកអាចហែលបាន ដោយកុំមុជចូលក្នុងទឹក ឬអាចប្រើប្រាស់ឧបករណ៍ដើម្បីបិទច្រមុះកុំឱ្យទឹកចូល។ អ្នកវិទ្យាសាស្ត្រសង្កត់ធ្ងន់ថា ការផឹក ឬលេបចំទឹកដែលមានមេរោគ Naegleria fowleri នឹងមិនបង្កឱ្យឆ្លងរោគនោះឡើយ៕

August 17, 2021

អាហ្វហ្គានីស្ថាន៖ រូបភាពពីផ្កាយរណប បង្ហាញអំពីចលាចលនៅឯព្រលានយន្តហោះក្រុងកាប៊ុល

រូបភាពពីផ្កាយរណបបង្ហាញថា មនុស្សរាប់ពាន់នាក់សម្រុកចូលព្រលានយន្តហោះនៅរដ្ឋធានីកាប៊ុល និងរត់តាមផ្លូវរត់របស់យន្តហោះ ដើម្បីស្វែងរកវិធីភៀសខ្លួនទៅបរទេស នៅពេល ក្រុម តាលីបង់ បានចូលកាន់កាប់រដ្ឋធានី។

ក្រុមហ៊ុន Maxar Technologies ថ្ងៃនេះ (17 សីហា) បានបញ្ចេញរូបថតស្ដីពីរដ្ឋធានីកាប៊ុល របស់ អាហ្វហ្គានីស្ថាន ដែលថតបានពីផ្កាយរណបកាលពីថ្ងៃទី 16 សីហា។ ក្នុងរូបថតទាំងនេះ គេឃើញមនុស្សរាប់ពាន់នាក់ នាំគ្នាសម្រុកចូលទៅខាងក្នុងព្រលានយន្តហោះអន្តរជាតិ Hamid Karzai ដើម្បីរកវិធីចាកចេញពីប្រទេសកំណើត ស្របពេលដែលរដ្ឋាភិបាលបានដួលរលំ ហើយក្រុម តាលីបង់ បានចូលមកគ្រប់គ្រងរដ្ឋធានី។

នៅក្នុងរូបថតខាងលើ ផ្លូវប្រសព្វគ្នាដែលនាំទៅកាន់ព្រលានយន្តហោះ កំពុងស្ទះចរាចរណ៍យ៉ាងណែន ខណៈមនុស្សរាប់ពាន់នាក់ដែលស្ថិតក្នុងភាពចលាចល កំពុងបើកបររថយន្តមកកាន់ទីនេះ។ រថយន្តភាគច្រើន ត្រូវបានគេទុកចោលកណ្ដាលផ្លូវ ដោយសារស្ទះចរាចរណ៍ ហើយមនុស្សម្នាក៏នាំគ្នាដើរយ៉ាងប្រញាប់ ឆ្ពោះទៅកាន់អាកាសយានដ្ឋាន។

នៅក្នុងព្រលានយន្តហោះ មនុស្សជាច្រើន ប្រមូលផ្ដុំគ្នានៅជុំវិញយន្តហោះ ក៏ដូចជារត់ទៅកាន់ផ្លូវចុះចតរបស់យន្តហោះ ដើម្បីស្វែងរកវិធីឡើងយន្តហោះទាំងឡាយណាដែលអាចនាំពួកគេភៀសខ្លួនទៅក្រៅប្រទេស។

ហ្វូងមនុស្សដែលចេះតែច្រើនឡើងៗ ធ្វើឱ្យព្រលានយន្តហោះ Hamid Karzai ប្រែជាច្របូកច្របល់អស់រយៈពេលពីថ្ងៃកន្លងទៅនេះ។ ព្រលានយន្តហោះ Hamid Karzai បច្ចុប្បន្ន ជាកន្លែងចុងក្រោយនៅ អាហ្វហ្គានីស្ថាន ដែលនៅស្ថិតក្រោមការគ្រប់គ្រងរបស់ សហរដ្ឋអាមេរិក។

មន្ត្រី អាមេរិក ម្នាក់ បានឱ្យដឹងថា ទាហាន អាមេរិក ដែលត្រូវបានបញ្ជូនទៅការពារព្រលានយន្តហោះខាងលើ បានបាញ់ប្រហារបុរសពីរនាក់ដែលមានអាវុធក្នុងដៃ កំពុងរកវិធីចូលទៅជិតពួកគេ។ សហរដ្ឋអាមេរិក បានបញ្ជូនទាហានប្រមាណ 6,000 នាក់ ទៅកាន់ព្រលានយន្តហោះ Hamid Karzai ដើម្បីការពារសន្តិសុខ គ្រប់គ្រងដែនអាកាស ជួយជម្លៀសពលរដ្ឋអាមេរិក និងពលរដ្ឋអាហ្វហ្គានីស្ថាន។

ពលរដ្ឋអាហ្វហ្គានីស្ថាន ជាច្រើននាក់ដែលបានតោងពីក្រោមយន្តហោះ បានបាត់បង់ជីវិត នៅពេលធ្លាក់មកលើដី ហើយត្រូវយន្តហោះកិន ពីលើ និងអ្នកខ្លះទៀតក៏ធ្លាក់ពីលើយន្តហោះ នៅពេលយន្តហោះចាប់ផ្ដើមហោះឡើងខ្ពស់។

ក្រុមតាលីបង់ ចូលគ្រប់គ្រងរដ្ឋធានីកាប៊ុល បានយ៉ាងងាយស្រួល កាលពីព្រលប់ថ្ងៃទី 15 សីហា។ តាលីបង់ ដណ្ដើមបានជោគជ័យលើកងទ័ពរដ្ឋាភិបាល អាហ្វហ្គានីស្ថាន ក្រោយពី សហរដ្ឋអាមេរិក និងសម្ព័ន្ធមិត្តបានដកទ័ពភាគច្រើនរបស់ពួកគេ ចេញពី អាហ្វហ្គានីស្ថាន។

នៅពេល តាលីបង់ ជិតចូលដល់រដ្ឋធានី ប្រធានាធិបតី អាហ្វហ្គានីស្ថាន Ashraf Ghani ក៏បានរត់ចោលប្រទេស ដោយលើកឡើងថា «ដើម្បីបញ្ចៀសការបង្ហូរឈាម» បណ្ដាលឱ្យរដ្ឋាភិបាលដែលគាំទ្រដោយប្រទេសលោកខាងលិច ត្រូវដួលរលំ។ ក្រុមតាលីបង់ បានចូលដល់វិមានប្រធានាធិបតី ហើយប្រកាសថានឹងបង្កើត រដ្ឋ Islamic Emirate of Afghanistan (បកប្រែក្រៅផ្លូវការថា រដ្ឋអ៊ីស្លាមរួបរួមនៃអាហ្វហ្គានីស្ថាន)៕

August 17, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 17 សីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 556 នាក់, អ្នកជាចំនួន 716 នាក់ និងអ្នកស្លាប់ចំនួន 14 នាក់បន្ថែមទៀត នៅក្នុងថ្ងៃទី 16 ខែសីហា ឆ្នាំ 2021។

គិតត្រឹមព្រឹកថ្ងៃទី 17 ខែសីហា ឆ្នាំ 2021 តួលេខសរុបនៃករណីឆ្លង ស្លាប់ និងជាសះស្បើយនៃអ្នកជំងឺ COVID-19 នៅ កម្ពុជា មានដូចខាងក្រោម៖

– អ្នកឆ្លងសរុប= 86,597 នាក់

– អ្នកជាសះស្បើយ= 81,918 នាក់

– អ្នកស្លាប់= 1,718 នាក់

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 208,705,980 នាក់ ត្រូវបានរកឃើញ ក្នុងនោះមានជាង 187,101,200 នាក់បានជា, ជាង 4,383,780 នាក់បានស្លាប់ និងជាង 17,220,980 នាក់ កំពុងព្យាបាល៕

August 17, 2021

រុស្ស៊ីថា កាប៊ុល សុវត្ថិភាពជាងមុន ក្រោមការគ្រប់គ្រងរបស់ តាលីបង់

ឯកអគ្គរដ្ឋទូតរុស្ស៊ី ប្រចាំប្រទេសអាហ្វហ្គានីស្ថាន បានសរសើរដល់ តាលីបង់ ដែលកន្លងមកក្រុមនេះធ្លាប់ត្រូវបាន រុស្ស៊ី ចាត់ទុកថាជាភេរវករ ដោយសារតែ តាលីបង់ គ្រប់គ្រងរដ្ឋធានីកាប៊ុល បានល្អ និងសុខសុវត្ថិភាពជាង បើធៀបនឹងការគ្រប់គ្រងរបស់រដ្ឋាភិបាលចាស់។

នៅលើរលកវិទ្យុ Ekho Moskvy របស់ រុស្ស៊ី កាលពីថ្ងៃទី 16 សីហា ឯកអគ្គរដ្ឋទូតរបស់ រុស្ស៊ី ប្រចាំ អាហ្វហ្គានីស្ថាន លោក Dmitry Zhirnov និយាយថា ពេញចិត្តនឹងរបៀបប្រព្រឹត្តរបស់ តាលីបង់ ដោយអធិប្បាយអំពីវីធីគ្រប់គ្រង កាប៊ុល របស់កងកម្លាំងនេះថា «ល្អ សកម្ម និងបែងចែកច្បាស់លាស់»។

លោក Zhirnov ឱ្យដឹងថា៖ «ស្ថានការណ៍សុខសាន្ត ហើយគ្រប់យ៉ាងបានស្ងប់ស្ងាត់។ កាប៊ុល ក្រោមការគ្រប់គ្រងរបស់ តាលីបង់ ល្អប្រសើរជាងឆ្ងាយ បើធៀបនឹងក្រោមការដឹកនាំរបស់ប្រធានាធិបតី Ashraf Ghani»។

ឯកអគ្គរដ្ឋទូត រុស្ស៊ី រូបនេះ បន្ថែមថា ដំបូងឡើយ អង្គភាពមួយចំនួនដែលមិនបំពាក់អាវុធ របស់ តាលីបង់ បានចូលមករដ្ឋធានី ហើយស្នើឱ្យរដ្ឋាភិបាល អាហ្វហ្គានីស្ថាន និងកងទ័ពអាមេរិក ចុះចាញ់។ កងកម្លាំងប្រដាប់អាវុធសំខាន់របស់ តាលីបង់ បានសម្រុកចូលតាមក្រោយ នៅពេល Ghani បានរត់ចោលប្រទេស។ បន្ទាប់មក តាលីបង់ ក៏បានដាក់បម្រាមគោចរ។

យោងតាម Zhirnov ក្រុម តាលីបង់ បានសន្យាការពារអ្នកការទូតរុស្ស៊ី។ លោកក៏និយាយថា ក្រុមទាហានរបស់ តាលីបង់ បច្ចុប្បន្ន ពុំទាន់មានសកម្មភាពអាក្រក់ណាមួយដែលប្រទេសលោកខាងលិចកំពុងព្រួយបារម្ភនៅឡើយ។ សាលារៀននៅ កាប៊ុល ក្នុងនោះមានទាំងសាលាសម្រាប់សិស្សស្រី ក៏បានដំណើរការឡើងវិញ។

ប្រេសិតពិសេសសម្រាប់កិច្ចការនៅ អាហ្វហ្គានីស្ថាន របស់ប្រធានាធិបតីរុស្ស៊ី Vladimir Putin បានឱ្យដឹងថា យុទ្ធនាការយូរថ្ងៃរបស់ទីក្រុងមូស្គូ ក្នុងបំណងកសាងទំនាក់ទំនងជាមួយក្រុម តាលីបង់ ទំនងជាបានជោគជ័យទៅហើយ។

ក្រុមតាលីបង់ ចូលគ្រប់គ្រងរដ្ឋធានីកាប៊ុល បានយ៉ាងងាយស្រួល កាលពីព្រលប់ថ្ងៃទី 15 សីហា។ តាលីបង់ ដណ្ដើមបានជោគជ័យលើកងទ័ពរដ្ឋាភិបាល អាហ្វហ្គានីស្ថាន ក្រោយពី សហរដ្ឋអាមេរិក និងសម្ព័ន្ធមិត្តបានដកទ័ពភាគច្រើនរបស់ពួកគេ ចេញពី អាហ្វហ្គានីស្ថាន។

នៅពេល តាលីបង់ ជិតចូលដល់រដ្ឋធានី ប្រធានាធិបតី អាហ្វហ្គានីស្ថាន Ashraf Ghani ក៏បានរត់ចោលប្រទេស ដោយលើកឡើងថា «ដើម្បីបញ្ចៀសការបង្ហូរឈាម» បណ្ដាលឱ្យរដ្ឋាភិបាលដែលគាំទ្រដោយប្រទេសលោកខាងលិច ត្រូវដួលរលំ។ ក្រុមតាលីបង់ បានចូលដល់វិមានប្រធានាធិបតី ហើយប្រកាសថានឹងបង្កើត រដ្ឋ Islamic Emirate of Afghanistan (បកប្រែក្រៅផ្លូវការថា រដ្ឋអ៊ីស្លាមរួបរួមនៃអាហ្វហ្គានីស្ថាន)៕

August 17, 2021

Author: សឿន សំណាង