សឿន សំណាង - La Reine Media

កិច្ចព្រមព្រៀងពាណិជ្ជកម្មសេរីទ្វេភាគីរវាង កម្ពុជា និង កូរ៉េខាងត្បូង បានចុះហត្ថលេខារួចហើយ

ការចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី រវាង កម្ពុជា និង កូរ៉េខាងត្បូង នៅព្រឹក ថ្ងៃទី 26 ខែតុលា ឆ្នាំ 2021 នេះ ត្រូវបានធ្វើឡើងតាមរយៈប្រព័ន្ធអ៊ីនធើណិត។

តាមគម្រោង កិច្ចព្រមព្រៀងដែលចុះហត្ថលេខាដោយ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម តំណាងឱ្យភាគី កម្ពុជា និង ឯកឧត្តម YEO Han-Koo រដ្ឋមន្ត្រីពាណិជ្ជកម្ម និងឧស្សាហកម្ម ថាមពល តំណាងឱ្យភាគី កូរ៉េខាងត្បូង នេះ នឹងចូលជាធរមាន នៅដើមឆ្នាំក្រោយ។

កិច្ចព្រមព្រៀងនេះ និយាយអំពី ស្តង់ដារ បទប្បញ្ញត្តិបច្ចេកទេស និងនីតិវិធីវាយតម្លៃភាពអនុលោម វិធានការអនាម័យ និងភូតគាមអនាម័យ និង ព្រមទាំងមានវិសាលភាពលើឧបាស្រ័យពាណិជ្ជកម្ម វិធានដើមកំណើត នីតិវិធីគយ និងកិច្ចសម្រួលពាណិជ្ជកម្ម កិច្ចសហប្រតិបត្តិការសេដ្ឋកិច្ច តម្លាភាព យន្តការដោះស្រាយវិវាទ អញ្ញត្រកម្ម ការរៀបចំស្ថាប័ន និងអវសានប្បញ្ញត្តិ។ នេះបើតាមប្រសាសន៍របស់ ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យរបស់ក្រសួងពាណិជ្ជកម្ម កម្ពុជា។

យោងតាម Koreatimes កូរ៉េខាងត្បូង នឹងលុបចោលពន្ធ 95.6% នៃផលិតផលសរុបដែលនាំចូលពី កម្ពុជា ខណៈ កម្ពុជា ក៏នឹងលើកលែងពន្ធចំនួន 93.8% នៃទំនិញសរុបដែលនាំចូលពី កូរ៉េខាងត្បូង ផងដែរ។

កិច្ចព្រមព្រៀងនេះត្រូវបានឯកឧត្តមបានបញ្ជាក់ថា នឹងជំរុញកំណើននៃការនាំចេញ កំណើនផលទុនសរុបក្នុងស្រុក និងកំណើនឱកាសការងារ រួមទាំងការជួយស្តារសេដ្ឋកិច្ចរបស់ កម្ពុជា ក្រោយវិបត្តិ COVID-19។

ទំហំពាណិជ្ជកម្មទ្វេរភាគី រវាង កម្ពុជា-កូរ៉េខាងត្បូង គិតត្រឹមរយៈពេល 8 ខែ នៃឆ្នាំ 2021 នេះ សម្រេចបានជាង 514 លានដុល្លារអាម៉េរិក ពោលគឺកើនឡើងជាង 11% ធៀបនឹងអំឡុងពេលដូចគ្នាកាលពីឆ្នាំ 2020។

នេះគឺជាកិច្ចព្រមព្រៀងពាណិជ្ជកម្មសេរីទ្វេភាគីទីពីរហើយ ដែល កម្ពុជា ធ្លាប់បានធ្វើឡើង។ មុននេះ កម្ពុជា ក៏ធ្លាប់បានចុះហត្ថលេខាលើកិច្ចព្រមព្រៀងដូចគ្នានេះជាមួយនឹង ប្រទេសចិន ផងដែរ៕

October 26, 2021

ស្ថិតិស្ដីពី COVID-19 នៅ កម្ពុជា និងទូទាំងពិភពលោក គិតមកដល់ព្រឹកថ្ងៃទី 26 ខែតុលា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 25 តុលា 2021 រួមមាន៖

– ឆ្លងថ្មី = 112 នាក់
– ជាសះស្បើយថ្មី = 263 នាក់
– ស្លាប់ថ្មី = 8 នាក់។

ក្នុងចំណោមអ្នកឆ្លងថ្មីទាំង 112 នាក់ មាន៖

– ករណីឆ្លងសហគមន៍ 102 នាក់
– អ្នកដំណើរពីបរទេស 10 នាក់

គិតមកដល់ព្រឹកថ្ងៃទី 26 ខែតុលា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖

– អ្នកឆ្លងសរុប= 118,000 នាក់
– អ្នកជាសះស្បើយ= 113,527 នាក់
– អ្នកស្លាប់= 2,751 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 244,837,800 នាក់
– អ្នកជាសះស្បើយសរុបជាង = 221,970,800 នាក់
– អ្នកស្លាប់សរុបជាង = 4,970,280 នាក់
– អ្នកកំពុងព្យាបាលសរុបជាង = 17,896,800 នាក់

October 26, 2021

ចិន ចាប់ខ្លួនអតីតប្រធានក្រុមហ៊ុនផលិតអាវុធក្នុងស្រុក

អាជ្ញាធរចិន បានសម្រេចចិត្តចាប់ខ្លួន Yin Jiaxu អតីតប្រធានរបស់ Norinco ដែលជាក្រុមហ៊ុនមួយក្នុងចំណោមក្រុមហ៊ុនផលិតអាវុធធំបំផុតនៅ ប្រទេសចិន។

ការចាប់ខ្លួន Yin Jiaxu អាយុ 65 ឆ្នាំនេះ ត្រូវបានធ្វើឡើងក្រោមបទចោទ «សង្ស័យថាបានប្រព្រឹត្តអំពើស៊ីសំណូក ផ្ដល់ផលប្រយោជន៍ដោយខុសច្បាប់ទៅឱ្យសាច់ញាតិ និងមិត្តភក្ដិ»។

អតីតប្រធានក្រុមហ៊ុនឧស្សាហក្មភាគខាងជើងប្រទេស (Norinco) ត្រូវបានគណៈកម្មការជាតិអធិការកិច្ច និងវិន័យ (Central Commission for Discipline Inspection/CCDI) ស៊ើបអង្កេតរយៈពេល 7 ឆ្នាំមកហើយ ទាក់ទិននឹង «ការរំលោភយ៉ាងធ្ងន់ធ្ងរលើវិន័យ និងច្បាប់» (ឃ្លាដែលតែងត្រូវបានគេប្រើប្រាស់ជំនួសពាក្យពុករលួយ នៅ ប្រទេសចិន) មុនពេលត្រូវបានចាប់ខ្លួន។

លោក Yin Jiaxu ធ្លាប់ជាលេខាបក្ស និងជាប្រធានក្រុមហ៊ុន Norinco រហូតដល់ឆ្នាំ 2018។ លោកត្រូវបានប្រគល់ខ្លួនទៅឱ្យតុលាការកាលពីថ្ងៃទី 30 កញ្ញា ឆ្នាំ 2021 បន្ទាប់ពីត្រូវបណ្ដេញពីបក្ស និងដកហូតរាល់មុខតំណាង និងអត្ថប្រយោជន៍។

CCDI បានចោទលោក Yin ថា បានទទួលសំណូកជាទឹកប្រាក់ និងអំណោយយ៉ាងច្រើន ព្រមទាំងប្រើតួនាទីទាញយកផលប្រយោជន៍ជួយដល់អ្នកផ្សេង និងចែករំលែកសកម្មភាពជំនួញឱ្យទៅសាច់ញាតិ និងមិត្តភក្ដិ ដែលនាំឱ្យជាតិមានការខាតបង់ច្រើន។

មុនពេលបានឡើងកាន់តំណែងខ្ពស់បំផុតនៅ Norinco ក្នុងពីឆ្នាំ 2013 លោក Yin ធ្លាប់បានធ្វើការរយៈពេល 14 ឆ្នាំនៅក្នុងក្រុមហ៊ុនបុត្រសម្ព័ន្ធរបស់ Norinco ដែលមានជំនាញខាងផលិតរថយន្តទេសចរណ៍ រថយន្តដឹកទំនិញខ្នាតតូច និងរថយន្តដឹកទំនិញពាណិជ្ជកម្ម។ លោក ត្រូវបានគេចាត់ទុកថាជាកូនសោសំខាន់ដែលជួយឱ្យក្រុមហ៊ុន Norinco បានចាកផុតពីហានិភ័យនៃការក្ស័យធនកាលពីឆ្នាំ 1998។

លោក Yin គឺជាប្រធានជាន់ខ្ពស់ទីពីររបស់ Norinco ដែលបានប្រឈមនឹងតុលាការ ចាប់តាំងពីប្រធានាធិបតីចិន លោក ស៊ី ជីនពីង ផ្ដួចផ្ដើមយុទ្ធនាការប្រឆាំងអំពើពុករលួយកាលពី 9 ឆ្នាំមុន៕

October 26, 2021

កម្ពុជា ជាប់ចំណាត់ថ្នាក់ទី 6 ក្នុងចំណោមប្រទេសដែលមានអត្រាចាក់វ៉ាក់សាំង COVID-19 ខ្ពស់ជាងគេ

នៅក្នុងដំណាក់កាលនៃវិបត្តិសុខភាពសកលបច្ចុប្បន្ន បណ្ដាប្រទេសដែលអត្រានៃការចាក់វ៉ាក់សាំងបង្ការ COVID-19 ជូនប្រជាពលរដ្ឋខ្ពស់ជាងគេ ប្រទេសទាំងនោះអាចនឹងមានឱកាសបើកដំណើរការសេដ្ឋកិច្ចទាំងស្រុងឡើងវិញឆាប់ជាងគេ នៅពេលដែលសង្គមមានភាពស៊ាំខ្ពស់។

ថ្មីៗនេះ នៅក្នុងតារាងទិន្នន័យស្ដីពីការចាក់វ៉ាក់សាំង COVID-19 លើពិភពលោក កម្ពុជា បានជាប់ចំណាត់ថ្នាក់លេខ 6 នៅក្នុងចំណោមប្រទេសដែលមានអត្រានៃការចាក់វ៉ាក់សាំងខ្ពស់ជាងគេបង្អស់។ នេះបើតាម គេហទំព័រ Our World In Data។

ទិន្នន័យរបស់គេហទំព័រខាងលើ បានបង្ហាញថា 48.7% នៃប្រជាជនពិភពលោកបានទទួលការចាក់វ៉ាក់សាំងបង្ការ COVID-19 យ៉ាងតិចមួយដូស ក្នុងនោះ មានប្រទេសចំនួនតែ 7 ប៉ុណ្ណោះ ដែលមានអត្រានៃការចាក់វ៉ាក់សាំងខ្ពាស់ជាងគេ រួមមាន ប្រទេសអារ៉ាប់រួម, ព័រទុយហ្គាល់, គុយបា, ស៊ីលី, អេស្ប៉ាញ, កម្ពុជា និងប្រទេសសិង្ហបុរី។

នៅ កម្ពុជា ការចាក់វ៉ាក់សាំងបង្ការ COVID-19 គិតត្រឹមថ្ងៃទី 25 ខែតុលា ឆ្នាំ 2021 រួមមាន៖ ពលរដ្ឋអាយុ 18 ឆ្នាំ ឡើងទៅ = 99.81% ;អាយុ 12-17 ឆ្នាំ = 90.72% ; អាយុ 6-11 ឆ្នាំ = 100.54%។

October 26, 2021

កម្ពុជា អាចទទួលរងឥទ្ធិពលព្យុះ ចាប់ពីថ្ងៃទី 27 ខែតុលា

ក្រសួងធនធានទឹក និងឧតុនិយម អំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់ នៅពេលតំបន់ជាច្រើនរបស់ កម្ពុជា អាចនឹងទទួលរងផលប៉ះពាល់ខ្លាំងពីឥទ្ធិពលព្យុះ ចាប់ពីថ្ងៃទី 27 ខែតុលា ខាងមុខ។

October 26, 2021

ចិន ចាក់វ៉ាក់សាំង COVID-19 ដល់កុមារចាប់ពីអាយុ 3 ឆ្នាំ ដល់ 11 ឆ្នាំ

កុមារដែលមានអាយុចាប់ពី 3 ឆ្នាំ នៅ ប្រទេសចិន ចាប់ផ្ដើមទទួលបានការចាក់វ៉ាក់សាំងបង្ការ COVID-19 ក្នុងគ្រាដែលសម្បុកវីរុសថ្មី កំពុងកើតមាន។

អាជ្ញាធរនៃខេត្តយ៉ាងតិចចំនួន 5 របស់ ប្រទេសចិន បានប្រកាសបើកយុទ្ធនាការចាក់វ៉ាក់សាំងដល់កុមារអាយុចាប់ពី 3 ឆ្នាំ ដល់ 11 ឆ្នាំ។ ការពង្រីកវិសាលភាពនៃយុទ្ធនាការចាក់វ៉ាក់សាំងនេះ ធ្វើឡើងនៅពេលប្រទេសនេះកំពុងអនុវត្តវិធាការនានាដើម្បីគ្រប់គ្រងរលកនៃការផ្ទុះឆ្លងរាលដាលថ្មី។

គិតមកដល់បច្ចុប្បន្ន ប្រជាជនប្រមាណ 76% នៅ ប្រទេសចិន បានទទួលការចាក់វ៉ាក់សាំងគ្រប់ពីរដូសរួចហើយ ខណៈក្រុមមន្ត្រីកំពុងព្យាយាមរក្សាគោលការណ៍ «គ្មាន COVID-19» ចំពោះរលកនៃការឆ្លងដាលថ្មី។ ដើមសប្ដាហ៍នេះ ខេត្ត Gansu បានបិទទ្វាររាល់ទីតាំងទេសចរណ៍ ក្នុងពេលដែលប្រជាជននៅក្នុងអនុតំបន់មួយចំនួននៃតំបន់ស្វយ័ត ម៉ុងហ្គោលីខាងក្នុង (Inner Mongolia) ក៏ត្រូវបានស្នើឱ្យនៅក្នុងផ្ទះ ដោយសារមានករណីឆ្លងថ្មី៕

October 26, 2021

COVID-19! អ៊ីស្រាអែល ថា វ៉ារ្យ៉ង់ AY4.2 ឆ្លងរាលដាលខ្លាំងជាង Delta ទៅទៀត

អ្នកជំនាញរបស់ ប្រទេសអ៊ីស្រាអែល បានឱ្យដឹងថា វីរុស COVID-19 ប្រភេទ AY4.2 មានលទ្ធភាពឆ្លងរាលដាលខ្លាំងជាង ប៉ុន្តែសមត្ថភាពផ្ស៊ាំ ឬទប់ទល់នឹងវ៉ាក់សាំង ទំនងជាមិនអាចយកឈ្នះ Delta។

AY4.2 ដែលត្រូវបានរកឃើញដំបូងនៅ ប្រទេសអង់គ្លេស និងបានបង្ហាញខ្លួននៅ ប្រទេសអ៊ីស្រាអែល កាលពីសប្ដាហ៍មុន មានសមត្ថភាពឆ្លងរាលដាលខ្លាំងជាង Delta រហូតដល់ 15%។ នេះបើតាមលទ្ធផលនៃការស្រាវជ្រាវដំបូងរបស់ក្រសួងសុខាភិបាល អ៊ីស្រាអែល កាលពីថ្ងៃទី 24 តុលា។ ប៉ុន្តែ សមត្ថភាពក្នុងការទប់ទល់នឹងវ៉ាក់សាំងរបស់ AY4.2 នេះ ខ្សោយជាង Delta។ អ៊ីស្រាអែល រកឃើញវ៉ារ្យ៉ង់ AY4.2 ត្រឹមតែ 6 ករណីប៉ុណ្ណោះ ហើយសុទ្ធតែជាករណីនាំចូល។

វ៉ារ្យ៉ង់ AY4.2 ត្រូវបានក្រុមអ្នកវិទ្យាសាស្ត្រ អង់គ្លេស រកឃើញកាលពីខែមុន។ វាមិនទាន់ត្រូវបានគេចាត់ទុកថាជាវីរុសបំប្លែងខ្លួនថ្មីដែលគួរយកចិត្តទុកដាក់ ឬព្រួយបារម្ភនៅឡើយ ទើបអ្នកវិទ្យាសាស្ត្រមិនទាន់ដាក់ឈ្មោះទៅតាមអក្ខរក្រមក្រិក ដូចជា Alpha និង Delta ជាដើម។

អ្នកវិទ្យាសាស្ត្រកំពុងតាមដាន AY4.2 ដើម្បីឱ្យដឹងថា ការឆ្លងរាលដាលរបស់វាខ្លាំងកម្រិតណា។ ក្រុមមន្ត្រីរបស់ អង់គ្លេស ថ្មីៗនេះ បានប្រកាសថា វ៉ារ្យ៉ង់ថ្មីនេះមាន 6% ក្នុងចំណោមករណីឆ្លង COVID-19 ដែលត្រូវបានគេវិភាគនៅ អង់គ្លេស ហើយវា «កំពុងតែមានការកើនឡើង»។

Maria Van Kerkhove ប្រធានផ្នែកបច្ចេកទេសសម្រាប់បញ្ហា COVID-19 របស់អង្គការសុខភាពពិភពលោក (WHO) បានឱ្យដឹងនៅក្នុងសប្ដាហ៍នេះថា Delta នៅតែជាវ៉ារ្យ៉ង់ លេចធ្លោជាងគេនៅលើពិភពលោក។

វីរុសកាន់តែឆ្លងរាលដាល លទ្ធភាពនៃការកើតមានវ៉ារ្យ៉ង់ថ្មីក៏នឹងកើនឡើងខ្ពស់។ បច្ចុប្បន្ន WHO កំពុងតាមដានសាខាវ៉ារ្យ៉ង់ថ្មីចំនួន 20 របស់ Delta ក្នុងនោះក៏មាន AY4.2 ផងដែរ។ នេះបើតាមការបញ្ជាក់របស់លោកស្រី Maria Van Kerkhove៕

October 26, 2021

ប្រធានគណៈកម្មការចំពោះកិច្ចចាក់វ៉ាក់សាំង COVID-19 ៖ «ស្ត្រីត្រៀមយកបុត្រ អាចចាក់វ៉ាក់សាំងបាន»

«ស្ត្រីត្រៀមយកបុត្រ អាចចាក់វ៉ាក់សាំងបង្ការវីរុស COVID-19 បាន និងមិនមានប៉ះពាល់ដល់កូនក្នុងផ្ទៃនោះទេ តែផ្ទុយទៅវិញសិរីរាង្គអាចបង្កើតអង់ទីករការពារខ្លួន» នេះបើតាមសម្ដីរបស់ប្រធានគណៈកម្មការចំពោះកិច្ចចាក់វ៉ាក់សាំង COVID-19។

ប្រសាសន៍លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំង COVID-19 ក្នុងក្របខណ្ឌទូទាំងប្រទេស នេះ ត្រូវបានលើកឡើងនៅថ្ងៃទី 25 ខែតុលា ឆ្នាំ 2021 នេះ។

អង្គការសុខភាពពិភពលោក (WHO) កាលពីពេលថ្មីៗនេះក៏បានឱ្យដឹងដែរថា ការចាក់វ៉ាក់សាំងដល់ស្ត្រីមានផ្ទៃពោះ ក៏គួរតែត្រូវបានធ្វើឡើង ដោយសារតែផលប្រយោជន៍ធំជាងហានិភ័យ។

ការស្រាវជ្រាវដែលត្រូវបានធ្វើឡើងបន្ទាប់ពីវ៉ាក់សាំងដែលប្រើប្រាស់បច្ចេកវិទ្យា mRNA បានបង្ហាញខ្លួនក្នុងទីផ្សារ បានបង្ហាញថា ស្ត្រីមានផ្ទៃពោះ មានអង្គបដិប្រាណកើតឡើងបន្ទាប់ពីបានទទួលការចាក់វ៉ាក់សាំង ហើយអង្គបដិប្រាណទាំងនេះពិតជាត្រូវបាននាំចូលទៅតាមគ្រាប់ឈាមក្នុងទងសុក និងទឹកដោះម្ដាយ។ ប្រការនេះមានន័យថា ការចាក់វា់ក់សាំងមិនត្រឹមតែជួយការពារសុខភាពអ្នកម្ដាយនោះទេ តែក៏ជួយការពារទារកក្នុងផ្ទៃផងដែរ៕

October 25, 2021

ប្រទេសក្រីក្រមានសង្ឃឹមហើយ! ខឹង Moderna មិនព្រមចែករំលែករូបមន្តវ៉ាក់សាំង WHO ក៏រត់ទៅរកក្រុមហ៊ុនផលិតឱសថបសុសត្វ ដើម្បីឱ្យជួយ

បន្ទាប់ពីក្រុមហ៊ុន Moderna បដិសេធសំណើចែករំលែករូបមន្តវ៉ាក់សាំង អង្គការសុខភាពពិភពលោក (WHO) ក៏បានបង្កើតគម្រោងថ្មីមួយភ្លាម ដើម្បីវិភាគរូបមន្ត ក៏ដូចជាបច្ចេកវិទ្យា mRNA ក្នុងបំណងបង្កើតវ៉ាក់សាំងមួយប្រភេទដែលដូចទៅនឹងវ៉ាក់សាំង Moderna។

Afrigen ដែលជាក្រុមហ៊ុនជំនាញខាងអភិវឌ្ឍវ៉ាក់សាំងសម្រាប់បសុសត្វ នៅ ប្រទេសអាហ្វ្រិកខាងត្បូង នៃ ទ្វីបអាហ្វ្រិក បានក្លាយជាស្ថាប័នស្នូលនៅក្នុងគម្រោងដែលមានតម្លៃ 100 លានដុល្លារ របស់ WHO។ ការបញ្ជាទិញដែលក្រុមហ៊ុននេះបានទទួលគឺ ការស្វែងរកវ៉ាក់សាំងបង្ការវីរុស COVID-19 ដោយប្រើប្រាស់បច្ចេកវិទ្យា mRNA ឱ្យដូច ឬប្រហាក់ប្រហែលទៅនឹងវ៉ាក់សាំងរបស់ Moderna។

កន្លងមក Afrigen ប្រើប្រាស់តែបច្ចេកវិទ្យាប្រពៃណីដើម្បីអភិវឌ្ឍវ៉ាក់សាំងសម្រាប់បសុសត្វ ប៉ុន្តែ ពួកគេបានសម្រេចចិត្តទទួលយកគម្រោងរបស់ WHO។ នាយកប្រតិបត្តិ Petro Treblanche បានអធិប្បាយថា បន្ទប់ពិសោធន៍របស់ក្រុមហ៊ុន ពេលនេះក្លាយទៅជា «សម្បុកឃ្មុំ» មួយ ដែលជំនាញខាងស្រាវជ្រាវបច្ចេកវិទ្យាវ៉ាក់សាំង mRNA។

នៅពេល Afrigen វិភាគដឹកអំពីដំណើរការដ៏ស្មុគស្មាញនៃការអភិវឌ្ឍវ៉ាក់សាំងបង្ការ COVID-19 របស់ Moderna ពេលនោះ WHO រួមនឹងដៃគូមួយចំនួននឹងបន្តវិនិយោគ ដើម្បីជួយឱ្យពួកគេអាចបង្រៀនបច្ចេកវិទ្យានេះដល់បណ្ដាប្រទេស។ Martin Friede ដែលជាមន្ត្រីម្នាក់ទទួលខុសត្រូវលើគម្រោងខាងលើរបស់ WHO បានហៅបន្ទប់ពិសោធន៍របស់ក្រុមហ៊ុន Afrigen ថាជា «មជ្ឈមណ្ឌលផ្ទេរបច្ចេកវិទ្យាវ៉ាក់សាំង»។

«ក្រុមហ៊ុនផលិតវ៉ាក់សាំងមកពីជុំវិញពិភពលោកនឹងត្រូវបានអញ្ជើញឱ្យមករៀនសូត្រនូវដំណើរការទាំងអស់ដែលទាក់ទងនឹងការផលិត»។

លោកស្រី Petro Treblanche នាយិកាប្រតិបត្តិរបស់ក្រុមហ៊ុន Afrigen

Friede សង្ឃឹមថា គម្រោងនេះនឹងជួយបង្កើនការគ្របដណ្ដប់នៃបច្ចេកវិទ្យាវ៉ាក់សាំង mRNA នៅទូទាំងសកលលោក ពោលគឺមិនមែនត្រឹមតែជាការផ្ទេរទៅឱ្យក្រុមហ៊ុនមួយចំនួនតូចនោះទេ។ WHO យកចិត្តទុកដាក់ជាពិសេសទៅលើបណ្ដាក្រុមហ៊ុនផលិតវ៉ាក់សាំងនៃបណ្ដាប្រទេសដែលមានចំណូលទាប និងមធ្យម ជាប្រទេសដែលកំពុងខ្វះវ៉ាក់សាំងបង្ការ COVID-19 ជាងគេ។

Moderna កំពុងប្រឈមនឹងសម្ពាធកាន់តែខ្លាំងទាក់ទងនឹងបញ្ហាចែករំលែកបច្ចេកវិទ្យាផលិតវ៉ាក់សាំងទៅឱ្យពិភពលោក។ កាលពីសប្ដាហ៍មុន តំណាងរាស្ត្រមួយចំនួនរបស់បក្សប្រជាធិបតេយ្យដែលបានឈរឈ្មោះនៅក្នុងលិខិតមួយ ឱ្យដឹងថា ក្រុមហ៊ុន Moderna បានទទួលកញ្ចប់ថវិកាឧបត្ថម្ភដ៏ធំពី រដ្ឋាភិបាលអាម៉េរិក នៅក្នុងដំណាក់កាលនៃការអភិវឌ្ឍវ៉ាក់សាំង ក្នុងនោះ ការស្រាវជ្រាវអំពីសមាសធាតុវ៉ាក់សាំង mRNA បានទទួលប្រាក់យ៉ាងតិច 1 ពាន់លានដុល្លារ។

ក្រុមតំណាងរាស្ត្រខាងលើយល់ថា រដ្ឋាភិបាល អាច និងគួរតែប្រើប្រាស់ការកំណត់ក្នុងកិច្ចព្រមព្រៀងជាមួយ Moderna ដោយបង្ខំឱ្យក្រុមហ៊ុនផលិតឱសថនេះចែករំលែករូបមន្តវ៉ាក់សាំងរបស់ពួកគេ។

គម្រោងដែល WHO ប្រគល់ឱ្យ Afrigen អាចចំណាយពេលចាប់ពី 3-4 ឆ្នាំ ទើបអាចបង្កើតបានវ៉ាក់សាំងបង្ការ COVID-19 «ចម្លង» ពីគេ ដោយប្រើប្រាស់បច្ចេកវិទ្យា mRNA។ ក្នុងករណី WHO បញ្ចុះបញ្ចូល Moderna បានដោយជោគជ័យទាក់ទងនឹងការចែករំលែកបច្ចេកវិទ្យា Friede សង្ឃឹមថា បណ្ដាក្រុមហ៊ុនផលិតវ៉ាក់សាំងនៅក្នុងបណ្ដាប្រទេសក្រីក្រ អាចនឹងផលិតបានវ៉ាក់សាំងដំបូងក្រោយរយៈពេលពីរឆ្នាំ៕

October 25, 2021

រដ្ឋប្រហារយោធានៅ ស៊ូដង់! នាយករដ្ឋមន្ត្រី និងរដ្ឋមន្ត្រីច្រើនរូបត្រូវបានឃុំខ្លួន

កងទ័ពរបស់ ប្រទេសស៊ូដង់ ត្រូវបានគេជឿថា កំពុងឃុំខ្លួននាយករដ្ឋមន្ត្រី Hamdok នៅក្នុងផ្ទះ និងចាប់ខ្លួនរដ្ឋមន្ត្រី 4 រូប ក្រោយពីមានការខ្វែងគំនិតជាមួយនឹងអាជ្ញាធរស៊ីវិលអស់ជាច្រើនខែ។

នាយករដ្ឋមន្ត្រី Abdalla Hamdok ត្រូវបានឃុំខ្លួនក្នុងផ្ទះចាប់ពីព្រឹកនេះ បន្ទាប់ពីអង្គភាពមួយនៃកងទ័ពបានឡោមព័ទ្ធផ្ទះរបស់លោកនៅឯរដ្ឋធានី Khartoum។ ទូរទស្សន៍ Al Hadath បានរាយការណ៍ថា ក្រុមមនុស្សដែលស្លៀកឈុតទាហាន និងប្រដាប់ដោយអាវុធ ក៏បានចាប់ខ្លួនមន្ត្រីជាន់ខ្ពស់មួយចំនួននៅក្នុងរដ្ឋាភិបាល ក្នុងនោះក៏មានទាំងរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងព័ត៌មាន ទីប្រឹក្សាផ្នែកសារព័ត៌មានរបស់នាយករដ្ឋមន្ត្រី និងសមាជិកម្នាក់នៃក្រុមប្រឹក្សាអធិបតេយ្យ។

ក្រសួងព័ត៌មានរបស់ ស៊ូដង់ ក្រោយមកបានចេញប្រកាសទទួលថា រដ្ឋមន្ត្រីជាច្រើនរូបត្រូវបាន «កងកម្លាំងចម្រុះ» ចាប់ខ្លួន។ «បន្ទាប់ពីនាយករដ្ឋមន្ត្រី Hamdok បដិសេធមិនចូលរួមធ្វើរដ្ឋប្រហារ អង្គភាពមួយរបស់កងទ័ព បានចាប់ខ្លួនលោក និងនាំទៅកាន់ទីតាំងអាថ៌កំបាំង» សេចក្ដីប្រកាស មានឃ្លាមួយសរសេរដូច្នេះ។

ក្រុមអ្នកយកព័ត៌មានរបស់ AFP បានឱ្យដឹងថា បណ្ដាញអ៊ីនធើណិត ត្រូវបានកាត់ផ្ដាច់ទូទាំងប្រទេស នៅពេលមានបាតុកម្មកើតឡើងនៅតាមដងផ្លូវដើម្បីប្រឆាំងនឹងទង្វើរបស់កងទ័ព។ ទាហានត្រូវបានគេដាក់ពង្រាយនៅតាមបណ្ដោយផ្លូវទៅកាន់រដ្ឋធានី ខណៈទូរទស្សន៍ជាតិកំពុងចាក់ផ្សាយបទចម្រៀងស្នេហាជាតិ។

សមាគមអ្នកជំនាញស៊ូដង់ ដែលជាក្រុមគាំទ្រប្រជាធិបតេយ្យ បានហៅទង្វើរបស់កងទ័ពថាជាអំពើរដ្ឋប្រហារយោធា និងបានអំពាវនាវឱ្យប្រជាជនចេញធ្វើបាតុកម្មប្រឆាំង។

អស្ថិរភាពនយោបាយបានកើតឡើងនៅ ប្រទេសស៊ូដង់ បន្ទាប់ពីរដ្ឋប្រហារយោធាបរាជ័យមួយកាលពីខែមុន។ កាលណោះ ទាហានប្រហែល 40 នាក់ ត្រូវបានចាប់ខ្លួននៅពេលពួកគេកំពុងរកវិធីគ្រប់គ្រងអគាររបស់ស្ថានីយទូរទស្សន៍ជាតិ និងអគ្គបញ្ជាការដ្ឋានកងទ័ព។

បណ្ដាក្រុមដែលគាំទ្រដោយកងទ័ព និងក្រុមស៊ីវិលគាំទ្រប្រជាធិបតេយ្យនៅ ស៊ូដង់ បាន និងកំពុងប្រកួតប្រជែងគ្នាក្នុងការចែករំលែកអំណាច បន្ទាប់ពីមេដឹកនាំយូរឆ្នាំ Omar al-Bashir ត្រូវបានផ្ដួលរំលំកាលពីឆ្នាំ 2019។ Bashir បច្ចុប្បន្នជាប់ឃុំនៅក្នុងពន្ធនាគារនៅ Khartoum និងកំពុងប្រឈមនឹងការចោទប្រកាន់ជាច្រើន។

ក្រុមប្រឹក្សាអធិបតេយ្យស៊ូដង់ កំពុងទទួលបន្ទុកដឹកនាំប្រទេស ទៅតាមកិច្ចព្រមព្រៀងចែករំលែកអំណាចរវាងកងទ័ព និងកងកម្លាំងស៊ីវិល ក្រោយពី Bashir ត្រូវបានផ្ដួលរំលំ។ តាមគម្រោង ការបោះឆ្នោតនានានឹងត្រូវធ្វើឡើងនៅឆ្នាំ 2024៕

October 25, 2021

Author: សឿន សំណាង