សឿន សំណាង - La Reine Media

ធុញនឹងការបង្កើតរថយន្តប្រណិត ជាងឈើងាកមកធ្វើរថក្រោះវិញម្ដង

ខុសពី «កំពូលរថយន្ត» មុនៗដែលជាស្នាដៃរបស់ខ្លួន រថពាសដែក EBR 105 ថ្មីដែលធ្វើពីឈើនេះត្រូវបានច្នៃឡើងដោយយោងទៅតាមលំនាំនៃរថយន្ត Mitsubishi។

ក្រោយពីមានឈ្មោះល្បីទាក់ទងនឹងផលិតផលធ្វើពីឈើ ថ្មីៗនេះ បុរសជនជាតិវៀតណាម ម្នាក់ ឈ្មោះ Truong Van Dao បន្តបញ្ចេញស្នាដៃថ្មី ប្លែកជាងមុន។ ផលិតផលថ្មីជារថពាសដែក EBR 105 ធ្វើអំពីឈើនេះ យកគំរូតាមរថយន្ត Mitsubishi ជំនាន់ចាស់។

យានយោធា EBR 105 គឺជារថពាសដែករបស់កងទ័ពនៃ ប្រទេសបារាំង ធ្វើការចល័តដោយកង់ចំនួន 8 គ្រាប់ និងបំពាក់កាំភ្លើងធំ។

មុនពេលបង្ហាញរថពាសដែក EBR 105 ធ្វើអំពីឈើនេះ បុរសជនជាតិវៀតណាម Truong Van Dao ក៏ធ្លាប់បានច្នៃឈើទៅជារថយន្តប្រណិតជាច្រើនប្រភេទមកហើយ មានដូចជា Bugatti Chiron, Lamborghini Sian Roadster, Ferrari GTO 250 និង BMW 328 ជាដើម៕

October 27, 2021

មនុស្សអាចរុញច្រានផែនដីគេចចេញឆ្ងាយពីព្រះអាទិត្យដើម្បីរក្សាជីវិត ដោយប្រើរ៉ុក្កែតយក្សនៅប៉ូលខាងត្បូង

នៅពេលព្រះអាទិត្យបញ្ចេញថាមពលច្រើនហួស ការរុញផែនដីឱ្យចេញឆ្ងាយដោយប្រើប្រាស់ម៉ាស៊ីនរុញច្រានដ៏មហិមា អាចជាជម្រើសមួយដែលក្រុមអ្នកវិទ្យាសាស្ត្រគិតដល់។

ក្នុងរយៈពេលមួយពាន់លានឆ្នាំទៀត ព្រះអាទិត្យនឹងបញ្ចេញកម្ដៅខ្លាំងជាងបច្ចុប្បន្ន នាំឱ្យបរិមាណនៃអុកស៊ីសែននៅលើផែនដីត្រូវថយចុះរហូតដល់ថ្នាក់មិនអាចទ្រទ្រង់ជីវិតស្មុគស្មាញបន្តទៀតបាន នេះបើតាមអត្ថបទស្រាវជ្រាវដែលត្រូវបានចុះផ្សាយនៅលើទំព័រទស្សនាវដ្ដី Nature Geoscience។

អ្នកវិទ្យាសាស្ត្រ Ethan Siegel បានលើកឡើងនូវដំណោះស្រាយដ៏មហាអស្ចារ្យមួយ នោះគឺការដំឡើងម៉ាស៊ីនរ៉ុក្កែតខ្នាតយក្សនៅតំបន់ប៉ូលខាងត្បូង ដើម្បីផ្លាស់ទីគន្លងគោចររបស់ផែនដី។

ជាការពិត បរិមាណនៃ អេល្យូម ក្នុងស្នូលរបស់ព្រះអាទិត្យ ចេះតែកើនឡើងទៅតាមពេលវេលា ដែលនាំឱ្យវារួញចូលមកវិញដោយសារតែកម្លាំងទំនាញ បណ្ដាលឱ្យស្នូលខាងក្នុងព្រះអាទិត្យឡើងកម្ដៅកាន់តែខ្លាំង ធ្វើឱ្យដំណើរនៃប្រតិកម្មនុយក្លេអែរកាន់តែលឿនជាងមុន។ ប្រការនេះនឹងនាំឱ្យបរិមាណថាមពលដែលព្រះអាទិត្យបញ្ចេញមកក្រៅ ត្រូវកើនឡើងប្រហែល 10% ក្នុងរយៈពេលមួយពាន់លានឆ្នាំ ខណៈដែលផែនដីមានតែខែលធម្មជាតិប៉ុណ្ណោះសម្រាប់ការពារខ្លួន។ ដូច្នេះហើយបានជា អ្នកវិទ្យាសាស្ត្រ Ethan Siegel លើកឡើងនូវវិធីសាស្ត្រនេះ។

លោក Ethan Siegel គណនាឃើញថា ផែនដីត្រូវការផ្លាស់ទីចេញឆ្ងាយពីព្រះអាទិត្យប្រមាណ 4.9% បន្ថែមទៀត ពីគម្លាត់មធ្យម 149.6 លានគីឡូម៉ែត្រ ឡើងទៅ 164 លានគីឡូម៉ែត្រ ដើម្បីរក្សាបរិមាណនៃថាមពលដែលទទួលបានពីព្រះអាទិត្យឱ្យនៅដូចបច្ចុប្បន្ន។

https://www.youtube.com/watch?v=gieE-9NZeY4

ម៉ាស៊ីនដែលប្រើប្រាស់សម្រាប់ការផ្លាស់ទីផែនដីនេះ នឹងត្រូវការថាមពលច្រើនជាង 500,000 ដង ធៀបនឹងថាមពលសរុបដែលមនុស្សជាតិបង្កើតឡើងជាបន្តបន្ទាប់ក្នុងរយៈពេលពីរពាន់លានឆ្នាំ។ សាស្ត្រាចារ្យ Ethan Siegel ថ្លែងថា ប្រភពថាមពលនេះ អាចត្រូវបានផ្ដល់ដោយប្រព័ន្ធផ្ទាំងសូឡាដ៏មហិមា។

ម៉ាស៊ីនរុញច្រាននឹងត្រូវបានបង្កើតឡើងនៅតំបន់ប៉ូលខាងត្បូងរបស់ផែនដី។ វានឹងមិនរាំងស្ទះដល់ទិសដៅបច្ចុប្បន្នរបស់ផែនដី ហើយឆ្លងកាត់រាប់លានឆ្នាំ វាអាចនាំផែនដីទៅកាន់គន្លងគោចរធំជាង និងសុវត្ថិភាពជាង ធៀបនឹងព្រះអាទិត្យ។

យន្តការនៃការផ្លាស់ទីអាចរួមមានទាំងការបាញ់ចេញនូវរលកនៃគ្រាប់ដែលផ្ទុកអគ្គិសនី ដែលអាចរុញច្រានផែនដីទៅមុខដោយប្រើគោលការណ៍រូបវិទ្យាដូចទៅនឹងការបាញ់បង្ហោះរ៉ុក្កែតចូលទៅក្នុងទីអវកាស ប៉ុន្តែទាមទារឱ្យមានថាមពលប្រហាក់ប្រហែលនឹងការបាញ់រ៉ុក្កែតឡើងទីអវកាសចំនួន 300,000,000,000,000,000,000 ដងឯណោះ។

យោងតាមសាស្ត្រាចារ្យ Siegel គន្លងគោចរថ្មីនឹងនាំផែនដីចេញពីផ្លូវគោចររបស់វត្ថុអវកាសមួយចំនួន និងចូលទៅដល់ផ្លូវហោះហើររបស់វត្ថុអវកាសដទៃ។ ប៉ុន្តែ យើងអាចសម្រេចគោលដៅនៃការកាត់បន្ថយបរិមាណវិទ្យុសកម្មដែលជះចេញពីព្រះអាទិត្យមកលើផែនដី៕

October 27, 2021

ការឈប់សម្រាកថ្ងៃបុណ្យ ដែលមានប្រាក់ឈ្នួល សម្រាប់ឆ្នាំ 2022

នាព្រឹកថ្ងៃទី 27 ខែតុលា ឆ្នាំ 2021 នេះ ក្រសួងការងារនិងបណ្ដុះបណ្ដាលវិជ្ជាជីវៈ បានចេញសេចក្តីប្រកាសព័ត៌មានស្ដីពី ថ្ងៃឈប់សម្រាកបុណ្យ ដែលមានប្រាក់ឈ្នួលប្រចាំឆ្នាំ 2022។

យោងតាមប្រកាសនេះ ក្នុងឆ្នាំ 2022 កម្ពុជា នឹងមានការឈប់សម្រាកថ្ងៃបុណ្យ ដែលមានប្រាក់ឈ្នួល សរុបចំនួន 21 ថ្ងៃ។ ព័ត៌មានលម្អិត សូមអានសេចក្ដីប្រកាសខាងក្រោម៖

October 27, 2021

ស្ថិតិស្ដីពី COVID-19 នៅ កម្ពុជា និងទូទាំងពិភពលោក គិតមកដល់ព្រឹកថ្ងៃទី 27 ខែតុលា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 26 តុលា 2021 រួមមាន៖

– ឆ្លងថ្មី = 111 នាក់
– ជាសះស្បើយថ្មី = 264 នាក់
– ស្លាប់ថ្មី = 7 នាក់។

ក្នុងចំណោមអ្នកឆ្លងថ្មីទាំង 111 នាក់ មាន៖

– ករណីឆ្លងសហគមន៍ 100 នាក់
– អ្នកដំណើរពីបរទេស 11 នាក់

គិតមកដល់ព្រឹកថ្ងៃទី 27 ខែតុលា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖

– អ្នកឆ្លងសរុប= 118,111 នាក់
– អ្នកជាសះស្បើយ= 113,791 នាក់
– អ្នកស្លាប់= 2,758 នាក់
តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 245,287,500 នាក់
– អ្នកជាសះស្បើយសរុបជាង = 222,385,600 នាក់
– អ្នកស្លាប់សរុបជាង = 4,978,800 នាក់
– អ្នកកំពុងព្យាបាលសរុបជាង = 17,923,075 នាក់

October 27, 2021

SEA Games 31 ត្រូវបានប្ដូរកាលបរិច្ឆេទថ្មី ខណៈ ASEAN Para Games ឆ្នាំនេះក៏ត្រូវលុបចោល

វៀតណាម បានសម្រេចលើកព្រឹត្តិការណ៍ SEA Games 31 ទៅធ្វើនៅត្រីមាសទីពីរ ឆ្នាំ 2022 ព្រមទាំងសម្រេចមិនប្រារព្ធព្រឹត្តិការណ៍ ASEAN Para Games 11 ផងដែរ។

យោងតាមប្រភពព័ត៌មានពី ប្រទេសវៀតណាម SEA Games 31 នៅប្រទេសនេះ ត្រូវបានលើកទៅធ្វើនៅត្រីមាសទីពីរ ឆ្នាំ 2022 ជំនួសឱ្យការចាប់ផ្ដើមនៅថ្ងៃទី 21 ខែវិច្ឆិកា ឆ្នាំ 2021 ដោយសារតែបញ្ហា COVID-19។ យោងតាមកាលបរិច្ឆេទថ្មី ពិធីសម្ពោធបើកព្រឹត្តិការណ៍ SEA Games 31 នឹងត្រូវបានធ្វើឡើងនៅខែឧសភា ឆ្នាំ 2022។ ក្រៅពីនេះ វៀតណាម ក៏បានសម្រេចមិនប្រារព្ធព្រឹត្តិការណ៍ Paragames 11 ផងដែរ ដោយសារបញ្ហាហិរញ្ញវត្ថុ។

SEA Games 31 តាមគម្រោង នឹងមានមនុស្សចូលរួមប្រមាណ 20,000 នាក់ មកពីក្រុមកីឡាករចំនួន 11 ក្រុម នៅក្នុងតំបន់អាស៊ីអាគ្នេយ៍។ ក្រុមកីឡាករនឹងប្រកួតប្រជែងនៅក្នុងវិញ្ញាសារចំនួន 40 នៅ ប្រទេសវៀតណាម។

នេះគឺជាលើកទីពីរដែល ប្រទេសវៀតណាម ទទួលប្រារព្ធព្រឹត្តិការណ៍ SEA Games បន្ទាប់ពីបានធ្វើជាម្ចាស់ផ្ទះលើកទីមួយកាលពីឆ្នាំ 2003៕

October 27, 2021

វគ្គជម្រុះពូល K នៃព្រឹត្តិការណ៍ AFC U23 Asian Cup 2022៖ ជប៉ុន ឈ្នះ កម្ពុជា 4-0

នៅក្នុងការប្រកួតជម្រុះពូល K នៅកីឡដ្ឋាន J-Village នៃព្រឹត្តិការណ៍ AFC U23 ASIAN CUP 2022 ក្រុមម្ចាស់ផ្ទះ ជប៉ុន ក្រោមអាយុ23 ឆ្នាំ បានយកឈ្នះក្រុម កម្ពុជា ក្រោមអាយុ 23 ឆ្នាំ ដោយលទ្ធផល 4-0 កាលពីថ្ងៃអង្គារ ទី 26 ខែតុលា ឆ្នាំ 2021។

នៅក្នុងវគ្គទីមួយ ក្រុម កម្ពុជា បានចាញ់ ក្រុមជប៉ុន ក្នុងលទ្ធផល 0-2 ខណៈវគ្គទី 2 ក្រុម ជប៉ុន ក៏បានបន្តឈ្នះ 2 គ្រាប់ទៀត។ ពេលនេះ ពូល K ក្រុម U23 ជប៉ុន ឈរលេខ 1 ដោយរកបាន 3 ពិន្ទុ។ ចំណែកក្រុម កម្ពុជា រកបាន 3 ពិន្ទុ ឈរលេខ 2 បន្ទាប់ពីបានឈ្នះក្រុម ហុងកុង 4-2 កាលពីថ្ងៃទី 23 ខែតុលា។

ស្អែកនេះ ក្រុម ជប៉ុន នឹងត្រូវប្រកួតជាមួយក្រុម ហុងកុង ដើម្បីអាចឡើងទៅវគ្គ 16 ក្រុម ដោយស្វ័យប្រវត្តិ សម្រាប់វគ្គជម្រុះនៃជុំផ្តាច់ព្រ័ត្រ។

វគ្គជម្រុះ AFC U23 ASIAN CUP Uzbekistan 2022 មានក្រុមចូលរួមសរុបចំនួន 41 ក្រុម មកពីទូទាំងទ្វីបអាស៊ី ដោយបែងចែកជា 11 ពូល ហើយក្រុមចំណាត់ថ្នាក់លេខ 1 នៃពូល នីមួយៗ រួមនឹងក្រុមចំណាត់ថ្នាក់លេខ 2 ល្អបំផុតចំនួន 4 ក្រុម (សរុប 16 ក្រុម) នឹងត្រូវឡើងទៅប្រកួតវគ្គជម្រុះនៃជុំផ្តាច់ព្រ័ត្រ នៅ ប្រទេសអ៊ូសបេគីស្ថាន ឆ្នាំ 2022៕

October 27, 2021

2% នៃទ្រព្យសម្បត្តិរបស់ Elon Musk អាចដោះស្រាយគ្រោះទុរភិក្ស នៅទូទាំងសកលលោក

ប្រាក់ចំនួន 2% នៃទ្រព្យសម្បត្តិសរុបចំនួន 289 ពាន់លានដុល្លារ របស់មហាសេដ្ឋី Elon Musk ដែលជានាយកប្រតិបត្តិនៃក្រុមហ៊ុន Tesla និងក្រុមហ៊ុន SpaceX អាចជួយសង្គ្រោះមនុស្សចំនួន 42 លាននាក់ និងដោះស្រាយគ្រោះទុរភិក្សនៅទូទាំងពិភពលោក។

ក្រុមមហាសេដ្ឋីគួរតែ «ឧបត្ថម្ភនៅពេលនេះ និងតែម្ដងគត់» នាយកកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ លោក David Beasley បានឆ្លើយក្នុងកិច្ចសម្ភាសរបស់កម្មវិធីដែលត្រូវបានផ្សាយកាលពីថ្ងៃទី 26 តុលា របស់ CNN ស្ដីពីកំពូលអ្នកមានជាងគេពីររូបគឺ លោក Jeff Bezos និងលោក Elon Musk។

«42 ពាន់លានដុល្លារ ដើម្បីជួយដល់ប្រជាជនចំនួន 42 លាននាក់ ដែលជាអ្នកនឹងត្រូវស្លាប់ បើសិនយើងមិនបានជួយពួកគេ។ រឿងនេះមិនស្មុគស្មាញឡើយ» លោក David Beasley និយាយដូច្នេះ។

យោងតាមសារព័ត៌មាន Bloomberg នាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla លោក Elon Musk មានទ្រព្យជិត 289 ពាន់លានដុល្លារ។ David Beasley បានស្នើសុំឱ្យមានការបរិច្ចាគ 2% នៃទ្រព្យរបស់មហាសេដ្ឋី Elon Musk។ តម្លៃទ្រព្យរបស់បណ្ដាមហាសេដ្ឋីនៅ សហរដ្ឋអាម៉េរិក បានកើនឡើងជិតទ្វេដង ចាប់ពីវីរុស COVID-19 បានបង្ហាញខ្លួនដំបូង ដោយកើនដល់ជាង 5 លានលាន (ទ្រីលាន) ដុល្លារ នៅក្នុងខែតុលា នេះបើតាមវិទ្យាស្ថានអាម៉េរិក សម្រាប់កិច្ចការស្រាវជ្រាវគោលនយោបាយ និងយុត្តធម៌ពន្ធដារ។

លោក Beasley យល់ថា ការដែលពិភពលោកត្រូវប្រឈមនឹងវិបត្តិច្រើនក្នុងពេលតែមួយ ដូចជាបញ្ហាបម្រែបម្រួលអាកាសធាតុ និងរោគរាតត្បាត COVID-19 គឺមានន័យថា ប្រទេសជាច្រើនកំពុងដើរជិតដល់ «គ្រោះទុរភិក្ស»។

យោងតាមរបាយការណ៍របស់ WFP ដែលបានប្រកាសកាលពីថ្ងៃទី 25 តុលា ប្រជាជនអាហ្វហ្គានីស្ថាន ចំនួនពាក់កណ្ដាល ដែលស្មើនឹង 22.8 លាននាក់ កំពុងប្រឈមនឹងវិបត្តិទុរភិក្ស ក្នុងនោះមានកុមារជាង 3.2 លាននាក់ផងដែរ។

នៅប្រទេសអេត្យូពី អង្គការ WFP បានគណនាឃើញថា មនុស្ស 5.2 លាននាក់កំពុងត្រូវការជំនួយស្បៀងអាហារបន្ទាន់ នៅតំបន់ Tigray ជាទីដែលនាយករដ្ឋមន្ត្រី Abiy Ahmed បញ្ជាឱ្យវាយប្រហារទ្រង់ទ្រាយធំប្រឆាំងនឹងរណសិរ្យរំដោះប្រជាជន Tigray (TPLF) កាលពីឆ្នាំទៅ។ ជនស៊ីវិលរាប់ពាន់នាក់បានស្លាប់ និងជាង 2 លាននាក់ត្រូវរត់ចោលស្រុក។

បណ្ដាអង្គការមនុស្សធម៌ដូចជា WFP ជាដើម ត្រូវប្រឹងប្រែងធ្វើការដោយត្រដរដើម្បីមានប្រភពផ្គត់ផ្គង់សម្រាប់ពលរដ្ឋដែលកំពុងមានតម្រូវ ធ្វើឱ្យវិបត្តិកាន់តែធ្ងន់ធ្ងរឡើង។

«យើងមិនដឹងថា ពួកគេបានអ្វីដើម្បីបរិភោគនោះទេ» Beasley ថ្លែងនៅក្នុងកិច្ចសម្ភាសដូច្នេះ។ «យើងអស់ឥន្ធនៈ គ្មានប្រាក់ដើម្បីបើកប្រាក់ខែដល់បុគ្គលិក ហើយក៏មិនអាចបញ្ជូនរថយន្តដឹកទំនិញចូលតំបន់នោះ»៕

October 27, 2021

ជនជាតិអាស៊ី ដំបូងគេ ដែលធ្វើជាចៅក្រមតុលាការសហព័ន្ធ នៅ សហរដ្ឋអាម៉េរិក

Tana Lin ដែលជាពលរដ្ឋអាម៉េរិក ដើមកំណើតអាស៊ី ត្រូវបានសភាជាន់ខ្ពស់របស់ អាម៉េរិក អនុម័តឱ្យកាន់តំណែងជាចៅក្រមតុលាការសហព័ន្ធនៅ ទីក្រុង Seattle រដ្ឋវ៉ាស៊ីងតោន។

លោកស្រី Lin ដែលជាប្រធានក្រុមប្រឹក្សាសម្ព័ន្ធសេរីស៊ីវិលសហរដ្ឋអាម៉េរិក នៅក្នុងរដ្ឋ វ៉ាស៊ីងតោន នឹងក្លាយជាជនជាតិអាម៉េរិកដើមកំណើតអាស៊ី ដំបូងគេ ដែលក្លាយជាចៅក្រមតុលាការសហព័ន្ធនៅ វ៉ាស៊ីងតោន នេះបើតាម Patty Murray តំណាងរាស្ត្រនៅសភាជាន់ខ្ពស់របស់គណៈបក្សប្រជាធិបតេយ្យ។

«ជនជាតិអាម៉េរិកស័ក្ដិសមមានប្រព័ន្ធយុត្តិធម៌ការពារសិទ្ធិរបស់ពលរដ្ឋគ្រប់រូប។។ ការកសាងប្រព័ន្ធតុលាការដែលមានយុត្តិធម៌ជាង ចាប់ផ្ដើមដោយការតែងតាំងបណ្ដាមេធាវីសធារណៈ និងមេធាវីសិទ្ធិមនុស្ស ដូចជាលោកស្រី Lin ជាដើម ឱ្យធ្វើជាចៅក្រម» Murray ថ្លែងដូច្នេះ។

លោកស្រី Lin ត្រូវបានប្រធានាធិបតី Joe Biden ជ្រើសរើសជាបេក្ខភាពសម្រាប់តំណែងចៅក្រមតុលាការសហព័ន្ធ នៅក្នុងខណ្ឌវ៉ាស៊ីងតោនខាងលិច កាលពីខែមេសា។ រដ្ឋវ៉ាស៊ីងតោន មានតុលាការសហព័ន្ធចំនួនពីរ រួមមានតុលាការស្រុកខាងកើត (United States District Court for the Eastern District of Washington) និងតុលាការស្រុកខាងលិច (United States District Court for the Western District of Washington)។

លោកស្រី Lin អាយុ 55 ឆ្នាំ គឺជាមេធាវីសម្រាប់ពលករក្នុងករណីរើសអើងក្នុងការងារ ក្នុងនោះក៏មានពលករអន្តោប្រវេសន៍មកពីខាងក្រៅ នៅក្នុង រដ្ឋវ៉ាស៊ីងតោន។

សភាជាន់ខ្ពស់អាម៉េរិក ថ្មីៗនេះក៏បានយល់ព្រមឱ្យ Lauren King ដែលជាមេធាវីឯកទេសខាងការពារកុលសម្ព័ន្ធ ធ្វើជាចៅក្រមតុលាការសហព័ន្ធរដ្ឋវ៉ាស៊ីងតោន ហើយនេះក៏ជាជនជាតិដើមអាម៉េរិកដំបូង ដែលបានធ្វើជាចៅក្រមតុលាការសហព័ន្ធ។ David Estudillo អតីតមេធាវីអន្តោប្រវេសន៍ និងជាចៅក្រមតុលាការស្រុក Grant ត្រូវបានជ្រើសតាំងជាជាចៅក្រមតុលាការសហព័ន្ធ នៅ វ៉ាស៊ីងតោនខាងលិច។

លោកស្រី Lin បានចាប់ផ្ដើមការងារជាមេធាវីសធារណៈនៅក្នុង រដ្ឋធានីវ៉ាស៊ីងតោន មុនពេលក្លាយជាមេធាវីសាកល្បងការងារទទួលបន្ទុកការពារក្ដីទាក់ទងនឹងបញ្ហាការងារ ស្ថិតក្រោមឱវាទនៃអង្គភាពសិទ្ធិពលរដ្ឋរបស់ក្រសួងយុត្តិធម៌។

លោកស្រី Lin គឺជាជនជាតិចិនតៃវ៉ាន់ ដែលបានមករស់នៅលើទឹកដីសហរដ្ឋអាម៉េរិក តាំងពីរអាយុ 3 ឆ្នាំ។ មុនពេលបានទៅសិក្សា លោកស្រីចេះនិយាយតែភាសាចិនកុកងឺប៉ុណ្ណោះ។ លោកស្រី បានបញ្ចប់ការសិក្សានៅសាកលវិទ្យាល័យ Cornell និងមហាវិទ្យាល័យច្បាប់នៃសាកលវិទ្យាល័យនីវយ៉ក៕

October 27, 2021

Tesla មានឈ្មោះក្នុងក្លឹបនៃបណ្ដាក្រុមហ៊ុនតម្លៃលានលានដុល្លារ ខណៈ Elon Musk រកបានរាប់សិបពាន់លានដុល្លារកាលពីម្សិលមិញ

មូលបត្រ Tesla បានកើនឡើង 13% កាលពីម្សិលមិញ (25/តុលា) ដែលជាការឡើងថ្លៃខ្ពស់បំផុតរាប់ចាប់តាំងពីដើមខែមីនា ឆ្នាំ 2021 ជួយឱ្យមូលធនទីផ្សាររបស់ក្រុមហ៊ុនផលិតរថយន្តអគ្គិសនីអាម៉េរិក នេះ បានកើនឡើងលើសពី 1 លានលាន (ទ្រីលាន/1000,000,000,000) ដុល្លារអាម៉េរិក។

យោងតាមសារព័ត៌មាន Bloomberg ក្រុមហ៊ុន Tesla គឺជាក្រុមហ៊ុនដែលសម្រេចបានគោលដៅនៃមូលធនទីផ្សារ 1 លានលានដុល្លារ លឿនជាងគេលំដាប់ទីពីរក្នុងពិភពលោកបន្ទាប់ពី Facebook ដោយចំណាយពេលតែជាង 11 ឆ្នាំ រាប់ចាប់ពីថ្ងៃធ្វើ IPO ក្នុងខែមិថុនា ឆ្នាំ 2010។ ដូច្នេះ ក្លឹបនៃក្រុមហ៊ុនដែលមានមូលធនទីផ្សារ 1 លានលានដុល្លារបច្ចុប្បន្ន រួមមាន ក្រុមហ៊ុន Facebook, Amazon, Microsoft, Alphabet និង Tesla ដែលសុទ្ធតែជាក្រុមហ៊ុនរបស់ អាម៉េរិក។

មូលបត្រ Tesla បានឡើងថ្លៃខ្លាំងបន្ទាប់ពីក្រុមហ៊ុន Hertz Global Holdings បានបញ្ជាទិញរថយន្តចំនួន 100,000 គ្រឿង។ នេះគឺជាជំហានដំបូងនៅក្នុងគម្រោងប្រកបដោយមហិច្ឆតាដើម្បីក្ដោបក្ដាប់ទីផ្សាររថយន្តអគ្គិសនីសម្រាប់ជួលរបស់ Hertz Global Holdings។

នេះអាចជាការជួញដូរធំបំផុតមិនធ្លាប់មានពីមុនមក ហើយវានាំមកនូវចំណូល 4.2 ពាន់លានដុល្លារដល់ Tesla។ នេះបើតាមប្រភពព័ត៌មានរបស់ Bloomberg។

គ្រាន់តែក្នុងថ្ងៃម្សិលមិញ មហាសេដ្ឋី Elon Musk ដែលជា CEO របស់ក្រុមហ៊ុន Tesla ក៏រកបានប្រាក់ចំនួន 36.2 ពាន់លានដុល្លារ។ Bloomberg ឱ្យដឹងថា បច្ចុប្បន្ន មហាសេដ្ឋីអាម៉េរិក ដើមកំណើតអាហ្វ្រិកខាងត្បូងរូបនេះ មានទ្រព្យចំនួន 288.6 ពាន់លានដុល្លារអាម៉េរិក៕

October 26, 2021

កំពូលស្ត្រីឆបោក! បោះពុម្ភប័ណ្ណបញ្ចុះតម្លៃក្លែងក្លាយ ធ្វើឱ្យក្រុមហ៊ុននានា ខាតរាប់សិបលានដុល្លារ

(សហរដ្ឋអាម៉េរិក)-Talens អាយុ 41 ឆ្នាំ រស់នៅក្នុងរដ្ឋ Virginia បោះពុម្ភប័ណ្ណបញ្ចុះតម្លៃផលិតផល (voucher) ក្លែងក្លាយ ដើម្បីលក់យកប្រាក់ ធ្វើឱ្យក្រុមហ៊ុននានានៅ សហរដ្ឋអាម៉េរិក ខាតបង់ជិត 32 លានដុល្លារ។

ការិយាល័យសហព័ន្ធស៊ើបអង្កេត (FBI) របស់សហរដ្ឋអាម៉េរិក កាលពីចុងសប្ដាហ៍មុន បានប្រកាសថា បានរកឃើញប័ណ្ណបញ្ចុះតម្លៃក្លែងក្លាយដែលមានតម្លៃជាង 1 លានដុល្លារ នៅពេលឆែកឆេរផ្ទះរបស់នាង Lori Ann Talens និងប្ដីឈ្មោះ Pacifico Talens នៅឯ ទីក្រុង Virginia Beach រដ្ឋ Virginia។

អធិការប្រៃសណីយ៍ Jason Thomasson ឱ្យដឹងថា៖ «ប័ណ្ណបញ្ចុះតម្លៃក្លែងក្លាយទាំងនេះត្រូវបានញាត់ជាបាច់ៗចូលក្នុងហោប៉ៅ ដាក់គរក្នុងរថយន្តរបស់ពួកគេ»។ សមត្ថកិច្ចក៏បានរកឃើញថា ក្នុងកុំព្យូទ័ររបស់ Talens ក៏មានគំរូដែលអាចជួយឱ្យស្ត្រីរូបនេះ បោះពុម្ភប័ណ្ណ បញ្ចុះតម្លៃក្លែងក្លាយរបស់ផលិតផលជាង 13,000 ប្រភេទ ដោយខ្លួននាងផ្ទាល់។

«នាងរៀនបច្ចេកទេសផ្សេងៗគ្នាដោយខ្លួនឯង ដើម្បីធ្វើឱ្យកូដនៅលើ ប័ណ្ណបញ្ចុះតម្លៃក្លែងក្លាយដំណើរការ» សមត្ថកិច្ចម្នាក់ឈ្មោះ Shannon Brill ប្រាប់សារព័ត៌មានដូច្នេះ។

នាង Talens ត្រូវបានចោទប្រកាន់ពីបទបង្កើតកូដលើប័ណ្ណបញ្ចុះតម្លៃក្លែងក្លាយ ជាមួយនឹងការបញ្ចុះតម្លៃជិតស្មើ ឬខ្ពស់ជាងតម្លៃលក់រាយរបស់ផលិតផលជាក់ស្ដែងមួយមុខទៀតផង។ Thomasson ឱ្យដឹងថា៖ «នាងបោះពុម្ភប័ណ្ណបញ្ចុះតម្លៃ ដែលមានតម្លៃ 24.99 ដុល្លារ សម្រាប់ខោទឹកនោមមួយកញ្ចប់តម្លៃ 25 ដុល្លារ ហើយអាចយកវាចេញទៅដោយស្ទើរតែមិនត្រូវចំណាយប្រាក់»។

បុគ្គលិកផ្នែកគិតលុយរបស់ហាងនានា មិនយកចិត្តទុកដាក់ចំពោះប័ណ្ណបញ្ចុះតម្លៃនោះទេ ឱ្យតែម៉ាស៊ីនស្កេនស្គាល់កូដលើប័ណ្ណនោះ។ ប័ណ្ណបញ្ចុះតម្លៃទាំងនេះត្រូវបានគេរកឃើញថាក្លែងក្លាយនៅពេលវាត្រូវបានប្រមូលបញ្ជូនទៅកាន់ក្រុមហ៊ុន ប៉ុន្តែ វាត្រូវចំណាយពេលជាច្រើនខែ ហើយស្ទើរតែមិនអាចរកឃើញប្រភព។

Talens មិនបានប្រើប្រាស់ប័ណ្ណបញ្ចុះតម្លៃនេះទាំងស្រុងនោះទេ តែនាងលក់វានៅលើបណ្ដាញសង្គម ហើយទាក់ទងអ្នកទិញតាមរយៈកម្មវិធីផ្ញើសារដែលបានបំប្លែងជាកូដ។ ប័ណ្ណក្លែងក្លាយ ក្រោយមកនឹងត្រូវផ្ញើតាមប្រៃសណីយ៍ទៅឱ្យអ្នកទិញ។

FBI ឱ្យដឹងថា Talens រកបានប្រាក់ចំណេញជាង 400,000 ដុល្លារ តាមរយៈប្រាក់ឌីជីថល ដូចជា bitcoin ជាដើម ហើយពេលខ្លះនាងប្ដូរប័ណ្ណបញ្ចុះតម្លៃក្លែងក្លាយនេះដើម្បីយកក្រដាសពិសេសសម្រាប់បោះពុម្ភប័ណ្ណនេះ»។

ករណីឆបោកនេះកើតឡើងអស់រយៈពេល 3 ឆ្នាំ រហូតដល់ថ្ងៃមួយ មានអ្នកទិញម្នាក់សង្ស័យថា នេះគឺជាប័ណ្ណក្លែងក្លាយ ហើយក៏បានរាយការណ៍ប្រាប់សមត្ថកិច្ច។

កាលពីខែកញ្ញា ឆ្នាំ 2021 នាង Talens ត្រូវបានកាត់ទោសដាក់ពន្ធនាគារ 12 ឆ្នាំ ដោយសារតែបានបោះពុម្ភប័ណ្ណបញ្ចុះតម្លៃក្លែងក្លាយ ធ្វើឱ្យហាងលក់រាយ និងក្រុមហ៊ុនផលិត ខាតបង់ប្រាក់ 31.8 លានដុល្លារ។ ចំណែកប្ដីរបស់ Talens ក៏ត្រូវជាប់ពន្ធនាគារ 7 ឆ្នាំ ព្រោះតែទោស «បានដឹងអំពីសកម្មភាពរបស់ប្រពន្ធ ប៉ុន្តែមិនរាយការណ៍ប្រាប់សមត្ថកិច្ច និងទទួលផលប្រយោជន៍ពីអំពើនេះ» នេះបើតាមក្រសួងយុត្តិធម៌សហរដ្ឋអាម៉េរិក។

ស្ត្រីជាជនល្មើសបានសារភាពថា នាងមានការ «ខ្មាសអៀនខ្លាំងណាស់» ចំពោះសកម្មភាពល្មើសច្បាប់របស់ខ្លួន៕

October 26, 2021

Author: សឿន សំណាង