សឿន សំណាង - La Reine Media

ស្ថិតិស្ដីពី COVID-19 នៅ កម្ពុជា និងទូទាំងពិភពលោក គិតមកដល់ព្រឹកថ្ងៃទី 13 ខែវិច្ឆិកា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 12 វិច្ឆិកា 2021 រួមមាន៖

– ឆ្លងថ្មី = 60 នាក់
– ជាសះស្បើយថ្មី = 65 នាក់
– ស្លាប់ថ្មី = 5 នាក់។

ក្នុងចំណោមអ្នកឆ្លងថ្មីទាំង 60 នាក់ មាន៖

– ករណីឆ្លងសហគមន៍ 53 នាក់
– អ្នកដំណើរពីបរទេស 07 នាក់

គិតមកដល់ព្រឹកថ្ងៃទី 13 ខែវិច្ឆិកា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖

– អ្នកឆ្លងសរុប= 119,481 នាក់
– អ្នកជាសះស្បើយ= 115,862 នាក់
– អ្នកស្លាប់= 2,861 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 253,242,200 នាក់
– អ្នកជាសះស្បើយសរុបជាង = 229,017,400 នាក់
– អ្នកស្លាប់សរុបជាង = 5,104,500 នាក់
– អ្នកកំពុងព្យាបាលសរុបជាង = 19,120,200 នាក់

November 13, 2021

អាជីវកម្មម៉ាស្សានៅ កម្ពុជា ត្រូវបានក្រសួងដាក់ឱ្យអនុវត្តនីតិវិធីប្រតិបត្តិស្ដង់ដាអប្បបរមា តាមគន្លងប្រក្រតីភាពថ្មី សម្រាប់ដំណើរការរកស៊ី

នៅក្នុងសេចក្ដីសម្រេច ចុះថ្ងៃទី 11 វិច្ឆិកា ឆ្នាំ 2021 ក្រសួងទេសចរណ៍ កំណត់ឱ្យបណ្ដាទីតាំងអាជីវកម្មម៉ាស្សា អនុវត្តនីតិវិធីប្រតិបត្តិស្ដង់ដាអប្បបរមា ដើម្បីទប់ស្កាត់ការឆ្លងរាលដាលនៃជំងឺ COVID-19 នៅក្នុងពេលបើកទ្វារទទួលអតិថិជន។

សេចក្ដីសម្រេចដែលស្ដីពីការគោរពតាមវិធានការការពារការឆ្លងវីរុសនេះ ក៏បាននិយាយដល់ការលើកទឹកចិត្តឱ្យភ្ញៀវប្រើប្រាស់សេវាទូទាត់ប្រាក់តាមអនឡាញដើម្បីកាត់បន្ថយការប៉ះពាល់ ការកក់សេវាកម្មជាមុន ការប្រើសញ្ញា/កាយវិការនៅពេលមានតម្រូវការអ្វីមួយជំនួសឱ្យការបញ្ចេញសំឡេងខ្លាំងៗ ឬការធ្វើតេស្តរហ័ស។ល។

ព័ត៌មានលម្អិត សូមបន្តអានសេចក្ដីសម្រេចរបស់ក្រសួងទេសចរណ៍ ដូចខាងក្រោម៖

November 13, 2021

វីថីជោគជ័យក្នុងការរកប្រាក់របស់មហាសេដ្ឋី Peter Thiel ដែលជាអ្នកវិនិយោគដំបូងៗមួយរូបរបស់ក្រុមហ៊ុន Facebook

ឆ្នាំ 2012 Facebook បានបោះផ្សាយមូលបត្របំណុលជាសាធារណៈលើកដំបូង (IPO) របស់ខ្លួន ហើយ Thiel ដែលកាលណោះគឺជាសមាជិកក្រុមប្រឹក្សាភិបាល ក៏រកប្រាក់បានប្រមាណ 1,000 លានដុល្លារពីការលក់ភាគហ៊ុន។

Peter Thiel ដែលកើតឆ្នាំ 1967 នៅប្រទេស អាល្លឺម៉ង់ បានរួមដំណឹងជាមួយគ្រួសារទៅកាន់ សហរដ្ឋអាម៉េរិក ជាលើកដំបូងនៅពេលមានអាយុមួយឆ្នាំ។ ប៉ុន្តែ ក្រោយមក ពួកគេបានធ្វើដំណើរពាសពេញពិភពលោក មុនពេលសម្រេចរស់នៅក្នុងទីក្រុង Foster នៅភាគខាងត្បូង San Francisco សហរដ្ឋអាម៉េរិក ដែលកាលណោះ Thiel កំពុងរៀនថ្នាក់ទី 5។

Peter Thiel មានសញ្ញាបត្រផ្នែកទស្សនវិជ្ជា និងច្បាប់របស់សាកលវិទ្យាល័យ Stanford។ កាលពីនៅសិក្សានៅទីនេះ លោកបានបង្កើត និងក្លាយជានិពន្ធនាយករបស់សារព័ត៌មាន The Stanford Review។

Thiel ក៏ធ្លាប់ជាម្នាក់ក្នុងចំណោមកំពូលអ្នកលេងអុកវ័យក្មេងដែលត្រូវបានចាត់ចូលក្នុងចំណាត់ថ្នាក់ពិភពលោក និងធ្លាប់បានក្លាយជាកំពូលអ្នកលេងអុកលំដាប់ខ្ពស់បំផុតប្រចាំ សហរដ្ឋអាម៉េរិក ផងដែរ។

មុនពេលចូលប្រលូកក្នុងវិស័យបច្ចេកវិទ្យា Thiel គឺជាជំនួយការម្នាក់របស់ចៅក្រម។ លោកក៏ធ្លាប់ទៅសម្ភាសដើម្បីក្លាយជាជំនួយការរបស់ចៅក្រមនៅតុលាការកំពូល ប៉ុន្តែបានបរាជ័យ។

បន្ទាប់មក លោក Thiel ធ្វើជាមេធាវីផ្នែកមូលបត្រក្នុងរយៈពេល 7 ខែ ហើយក្រោយមកក៏បានធ្វើកិច្ចការដោះដូរពាណិជ្ជកម្មនៅក្រុមហ៊ុន Credit Suisse។ ការងារនេះបានជួយឱ្យ Thiel មានប្រាក់គ្រប់គ្រាន់ដើម្បីសហការជាមួយ Max Levchin បង្កើតក្រុមហ៊ុនបច្ចេកវិទ្យាហិរញ្ញវត្ថុ PayPal ដែលក្រោយមក ក្រុមហ៊ុននេះត្រូវបានច្របាច់បញ្ចូលគ្នានឹងក្រុមហ៊ុន X.com របស់ Elon Musk មុនពេលត្រូវបានលក់ទៅឱ្យ eBay ក្នុងតម្លៃ 1.5 ពាន់លានដុល្លារ កាលពីឆ្នាំ 2002។ នេះបើយោងតាមព័ត៌មានពី CNet។

មហាសេដ្ឋី Peter Thiel (ឆ្វេង) និងមហាសេដ្ឋី Elon Musk

នៅពេល PayPal ត្រូវបានលក់កាលពីឆ្នាំ 2002 ភាគហ៊ុនរបស់ Thiel មានតម្លៃប្រហែល 55 លានដុល្លារ។ ខ្ទង់ប្រាក់នេះត្រូវបានលោកយកទៅបង្កើតមូលនិធិបង្ការហានិភ័យ Clarium Capital។ Clarium ដំបូងឡើយទទួលបានជោគជ័យខ្លាំង ប៉ុន្តែក្រោយមកក៏បានបាត់បង់ទុន 90% ក្នុងឆ្នាំ 2011។

ឆ្នាំ 2004 Thiel និង Alexander Karp បានសហការបង្កើតក្រុមហ៊ុន Palantir ដោយយោងទៅតាមគំនិតរបស់ Thiel ដែលថា ពួកគេនឹងប្រើកម្មវិធីកុំព្យូទ័ររុករកករណីបន្លំនៅក្នុងវិស័យហិរញ្ញវត្ថុក្នុងបំណងស្វែងរកសកម្មភាពភេរវកម្ម។

ឆ្នាំ 2004 ដដែល Thiel បានក្លាយជាអ្នកវិនិយោគមកពីខាងក្រៅរបស់ Facebook។ លោកបានវិនិយោគ 500,000 ដុល្លារសម្រាប់ទិញភាគហ៊ុន 10% របស់ក្រុមហ៊ុននេះ ហើយក៏បានចូលរួមក្នុងក្រុមប្រឹក្សាភិបាល។

ប្រធានក្រុមហ៊ុន Facebook កាលណោះគឺ Sean Parker បានជួប CEO Reid Hoffman របស់ LinkedIn មុន ហើយ Hoffman បានណែនាំ Parker ឱ្យស្គាល់ Thiel។ នៅពេលចូលរួមក្នុងក្រុមប្រឹក្សាភិបាល លោក Beter Thiel បានជួយ Mark Zuckerberg ដោយផ្ទាល់តាមរយៈការសម្រេចចិត្តជាច្រើនទាក់ទងនឹងការប្រមូលទុន។ ឆ្នាំ 2012 Facebook បានបោះផ្សាយមូលបត្របំណុលជាសាធារណៈលើកដំបូង (IPO) ហើយ Thiel ក៏រកប្រាក់បានប្រមាណ 1,000 លានដុល្លារពីការលក់ភាគហ៊ុនរបស់ខ្លួន។

ទន្ទឹមនឹងការចូលរួមក្នុងក្រុមប្រឹក្សាភិបាលរបស់ Facebook លោក Thiel ក៏បង្កើតក្រុមហ៊ុន Founders Fund។ ក្រុមហ៊ុននេះបានវិនិយោគទៅក្នុងក្រុមហ៊ុនធុរកិច្ចថ្មីជាច្រើន មានដូចជា SpaceX និង Airbnb ។ល។ ក្រៅពីនេះ Thiel ក៏នៅតែជាអ្នកវិនិយោគធំនៃក្រុមហ៊ុនថ្មីជាច្រើនផ្សេងទៀត ក្នុងនោះក៏មាន LinkedIn, Yammer និង Yelp ផងដែរ។

បន្ទាប់មក Thiel ក៏បង្កើតក្រុមហ៊ុនវិនិយោគចំនួនពីរទៀតគឺ Valar Ventures ដែលផ្ដោតទៅលើខ្ទង់វិនិយោគនៅប្រទេស នូវែលសេឡង់ និង Mithril Capital ដែលបណ្ដាក់ទុនទៅក្នុងបណ្ដាក្រុមហ៊ុនធុរកិច្ចថ្មីទាំងឡាយដែលបានឆ្លងផុតដំណាក់កាលដំបូង។

ឆ្នាំ 2011 លោក Thiel បង្កើត The Thiel Fellowship ក្នុងបំណងផ្ដល់ជំនួយ 100,000 ដុល្លារ និងគាំទ្រពីរឆ្នាំដល់បេក្ខភាព 20 រូប អាយុក្រោម 20 ឆ្នាំ ដើម្បីអាចឱ្យពួកគេប្រែក្លាយក្ដីស្រមៃទៅជាការពិតក្នុងការបង្កើតក្រុមហ៊ុនផ្ទាល់ខ្លួន។

មូលនិធិនេះ ត្រូវបានបង្កើតឡើងទៅតាមគំនិតរបស់ Thiel ដែលយល់ថា ថ្លៃសាលានៅមហាវិទ្យាល័យខ្ពស់ខ្លាំង បើធៀបនឹងអ្វីដែលទទួលបាន ហើយអ្នកឆ្លាតវៃគួរចាប់ផ្ដើមធ្វើការឱ្យបានកាន់តែឆាប់ កាន់តែល្អ។

មិនត្រឹមតែជាអ្នកវិនិយោគដែលមានមនោសញ្ចេតនាខ្ពស់នោះទេ ប៉ុន្តែ Peter Thiel ក៏ជាម្ចាស់ស្នាដៃនិពន្ធនៃសៀវភៅមួយក្បាលដែលមានឈ្មោះថា Zero to One (ពីសូន្យដល់មួយ) ផងដែរ ដែលវាត្រូវបានក្រុមអ្នករកស៊ីថ្មី ចាត់ទុកថាជាសៀវភៅប្រចាំក្បាលដំណេករបស់ពួកគេ។ យោងតាមស្ថិតិរបស់ទស្សនាវដ្ដី Forbes មហាសេដ្ឋី Thiel បច្ចុប្បន្នមានទ្រព្យ 3.7 ពាន់លានដុល្លារអាម៉េរិក៕

November 13, 2021

AstraZeneca ឈប់លក់វ៉ាក់សាំង COVID-19 ក្នុង «តម្លៃដើម» ដល់បណ្ដាប្រទេស

ក្រុមហ៊ុន AstraZeneca គ្រោងនឹងប្រមូល «ប្រាក់ចំណេញតិចតួច» ពីកិច្ចសន្យាផ្គត់ផ្គង់វ៉ាក់សាំងបង្ការ COVID-19 ថ្មី ជំនួសឱ្យការរក្សារូបមន្ត «មិនស្វែងរកប្រាក់ចំណេញ»។

ក្នុងសេចក្ដីប្រកាសកាលពីថ្ងៃទី 12 វិច្ចិកា ក្រុមហ៊ុនផលិតឱសថរបស់ អង់គ្លេស-ស៊ុយអែត AstraZeneca បានឱ្យដឹងថា ពួកគេកំពុងមានគម្រោងផ្លាស់ប្ដូរបណ្ដើរៗដើម្បីរកប្រាក់ចំណេញតិចតួចនៅពេលទទួលការបញ្ជាទិញវ៉ាក់សាំងថ្មី»។ ពួកគេបន្តថា ខ្ទង់ប្រាក់ចំណេញតិចតួចដែលបានមកពីការលក់វ៉ាក់សាំងក្នុងត្រីមាសទីបួន នឹងត្រូវបានប្រើប្រាស់ដើម្បីប៉ះប៉ូវលើខ្ទង់ចំណាយទាក់ទងនឹងសមាសធាតុនៃអង្គបដិប្រាណដែលត្រូវបានអភិវឌ្ឍសម្រាប់ការទប់ស្កាត់ និងព្យាបាលជំងឺ COVID-19។

នាយកប្រតិបត្តិក្រុមហ៊ុន AstraZeneca លោក Pascal Soriot បានបញ្ជាក់ថា ពួកគេកំពុងលើកឡើងនូវតម្លៃទាបសមរម្យ និងទៅតាមកម្រិតផ្សេងៗ អាស្រ័យទៅលើលទ្ធភាពចំណាយរបស់ប្រទេសនីមួយ។ លោកថា ប្រភេទវ៉ាក់សាំងបង្ការ COVID-19 ដែល AstraZeneca សហការអភិវឌ្ឍ និងផលិតជាមួយសាកលវិទ្យាល័យ Oxford របស់ អង់គ្លេស នឹងមិនក្លាយជា «ប្រភពចំណូលធំនោះទេ»។

ប្រាក់ចំណូលពីវ៉ាក់សាំងបង្ការ COVID-19 របស់ AstraZeneca ក្នុងត្រីមាសទីបីគឺ 1.1 ពាន់លានដុល្លារ ទាបជាងឆ្ងាយធៀបនឹង 13 ពាន់លានដុល្លាររបស់ Pfizer និង 4.8 ពាន់លានដុល្លាររបស់ Moderna។ ក្រុមហ៊ុននេះថែមទាំងបានប្រកាសអំពីខ្ទង់ខាតបង់ 1.65 ពាន់លានដុល្លារក្នុងត្រីមាសទីបី ធៀបនឹងខ្ទង់ចំណេញក្រោយពន្ធ 651 លានដុល្លារក្នុងដំណាក់កាលដូចគ្នាកាលពីឆ្នាំមុន ដោយសារតែការបង្កើនចំណាយទៅលើកម្មវិធីស្រាវជ្រាវ និងអភិវឌ្ឍជាច្រើន រួមទាំងវិធីសាស្ត្រព្យាបាលជំងឺ COVID-19 ផងដែរ។

AstraZeneca បានសន្យាលក់វ៉ាក់សាំងក្នុងតម្លៃដើមសម្រាប់អំឡុង COVID-19 រាតត្បាតសកល និងកំពុងគិតថ្លៃប្រហែល 5 ដុល្លារក្នុងមួយដូស។ ប៉ុន្តែ លោក Soriot យល់ថា គ្រប់គ្នាត្រូវទទួលស្គាល់ថា COVID-19 កំពុងតែក្លាយទៅជាជំងឺតាមតំបន់។ យើងនឹងត្រូវរៀនរស់នៅជាមួយជំងឺនេះ មានន័យថា ត្រូវការចាក់វ៉ាក់សាំងរំលឹកឱ្យបានទៀងទាត់» CEO របស់ក្រុមហ៊ុន AstraZeneca ថ្លែងដូច្នេះ។

គិតត្រឹមចុងខែកញ្ញា AstraZeneca បានផ្គត់ផ្គង់វ៉ាក់សាំង COVID-19 ជាង 145 លានដូស ដល់បណ្ដាប្រទេសដែលមានប្រាក់ចំណូលទាប និងមធ្យម តាមរយៈយន្តការ COVAX របស់អង្គការសុខភាពពិភពលោក (WHO) ពោលគឺស្មើនឹងពាក់កណ្ដាលនៃប្រភពវ៉ាក់សាំងរបស់ COVAX។ តួលេខនេះនឹងកើនឡើងដល់ 250 លានដូសនៅចុងឆ្នាំនេះ។

ទោះជាយ៉ាងណាក៏ដោយ ក្រុមហ៊ុន AstraZeneca ក៏នៅតែសន្យាថា ផ្គត់ផ្គង់វ៉ាក់សាំងក្នុងតម្លៃដើម ដល់បណ្ដាប្រទេសក្រីក្របំផុត៕

November 13, 2021

ចន្ទ្រគ្រាសដែលមានរយៈពេលវែងបំផុតក្នុងអំឡុងជិត 600 ឆ្នាំ នឹងកើតឡើងសប្ដាហ៍ក្រោយ

ចន្ទ្រគ្រាសនេះនឹងកើតឡើងនៅថ្ងៃទី 18 ឬ 19 វិច្ឆិកា ហើយអាចមើលឃើញនៅតំបន់ជាច្រើនក្នុងពិភពលោក រួមមាន ទ្វីបអាម៉េរិក អូស្ត្រាលី អឺរ៉ុប និងទ្វីបអាស៊ី។

យោងតាមស្ថិតិនៃការស្រាវជ្រាវរបស់ទីភ្នាក់ងារអវកាសអាម៉េរិក NASA គិតពីឆ្នាំ 2001 ដល់ឆ្នាំ 2100 ចន្ទ្រគ្រាសដែលនឹងកើតឡើងនៅសប្ដាហ៍ក្រោយនេះនឹងជាចន្ទ្រគ្រាសមួយផ្នែកដែលយូរជាងគេបង្អស់ក្នុងរយៈពេលមួយសតវត្សរ៍ ដោយវានឹងអូសបន្លាយពេលរហូតដល់ 3 ម៉ោង 28 នាទី និង 23 វិនាទី។ វាក៏នឹងយូរជាងឆ្ងាយ បើធៀបនឹងចន្ទ្រគ្រាសទាំងស្រុងដែលយូរជាងគេបំផុតក្នុងមួយសតវត្សរ៍ ដែលបានកើតឡើងកាលពីឆ្នាំ 2018 ជាមួយពេលវេលា 1 ម៉ោង និង 43 នាទី។ យោងតាមស្ថានីយតារាសាស្ត្រ Holcomb នៅរដ្ឋ Indiana សហរដ្ឋអាម៉េរិក នេះក៏ជាចន្ទគ្រាសមួយផ្នែកដែលយូរជាងគេក្នុងអំឡុង 580 ឆ្នាំផងដែរ។

ចន្ទ្រគ្រាសនេះនឹងចាប់ផ្ដើមកើតឡើងនៅវេលាម៉ោង 14 និង 19 នាទី ហើយឡើងដល់កម្រិតកំពូលនៅវេលាម៉ោងប្រហែល 16 រួចបញ្ចប់នៅម៉ោង 17 និង 47 នាទី ថ្ងៃទី 19 វិច្ឆិកា (ម៉ោងនៅភ្នំពេញ)។ ក្នុងព្រឹត្តិការណ៍ចន្ទ្រគ្រាសលើកនេះ ស្រមោលរបស់ផែនដីនឹងគ្របដណ្ដប់លើព្រះចន្ទស្ទើរតែទាំងស្រុង (97%)។

អ្នកដែលចូលចិត្តវិស័យតារាសាស្ត្រនៅតំបន់ជាច្រើនក្នុងទ្វីបអាម៉េរិក អូស្ត្រាលី ទ្វីបអឺរ៉ុប និងទ្វីបអាស៊ី អាចគយគន់ចន្ទ្រគ្រាសលើកនេះនៅថ្ងៃទី 18 វិច្ឆិកា ឬ 19 វិច្ឆិកា ដោយពេលវេលាជាក់ស្ដែងគឺអាស្រ័យទៅតាមតំបន់។

ព្រឹត្តិការណ៍ចន្ទ្រគ្រាសកើតឡើងនៅពេលផែនដីគោចរទៅដល់ចន្លោះព្រះអាទិត្យ និងព្រះចន្ទ។ ពេលនោះ ស្រមោលផែនដីនឹងជះទៅលើព្រះចន្ទ។ ផែនដីអាចបាំងពន្លឺព្រះអាទិត្យដែលចាំងទៅលើព្រះចន្ទមួយផ្នែក ឬទាំងស្រុង ដែលបណ្ដាលឱ្យផ្ទៃព្រះចន្ទត្រូវងងឹត៕

November 12, 2021

រាជរដ្ឋាភិបាល អនុញ្ញាតឱ្យពលរដ្ឋដែលត្រៀមរៀបអាពាហ៍ពិពាហ៍ អញ្ជើញភ្ញៀវតិច ឬច្រើន ទៅតាមលទ្ធភាព

នៅក្នុងសារជាសំឡេងមួយដែលត្រូវបានផ្សព្វផ្សាយនាល្ងាចថ្ងៃទី 12 ខែវិច្ឆិកា ឆ្នាំ 2021 នេះ ប្រមុខរដ្ឋាភិបាលកម្ពុជា សម្ដេច ហ៊ុន សែន បានមានប្រសាសន៍ថា រាជរដ្ឋាភិបាល អនុញ្ញាតឱ្យប្រជាពលរដ្ឋដែលត្រៀមធ្វើពិធីរៀបមង្គលការ អញ្ជើញភ្ញៀវទៅតាមលទ្ធភាព ពោលគឺអាចអញ្ជើញដល់រាប់ពាន់នាក់។

រាជរដ្ឋាភិបាលលុបចោលការកំណត់ទៅលើចំនួនមនុស្សដែលបានដាក់ចេញកន្លងមក ហើយប្រជាពលរដ្ឋអាចរៀបចំអាពាហ៍ពិពាហ៍ដោយអញ្ជើញភ្ញៀវចូលរួមតិច ឬច្រើនទៅតាមលទ្ធភាព។ ប៉ុន្តែ សម្ដេច បញ្ជាក់ថា ចំនួនភ្ញៀវត្រូវកំណត់ទៅតាមទំហំនៃទីតាំងប្រារព្ធពិធីនីមួយ។

សម្ដេច បន្ថែមថា កម្មវិធីទទួលភ្ញៀវមកចូលរួមជប់លៀងអាពាហ៍ពិពាហ៍ មួយតុត្រូវកំណត់យកត្រឹម 7 នាក់ និងត្រូវអនុវត្តវិធានការសុខាភិបាលឱ្យបានតឹងរ៉ឹង មានដូចជា ការរក្សាគម្លាត ការពាក់ម៉ាស ការបាញ់អាល់កុល ការវាស់កម្ដៅ។ល។

ទន្ទឹមនឹងនេះ ប្រមុខរដ្ឋាភិបាល ក៏បានលើកទឹកចិត្តឱ្យក្រុមគ្រួសារដែលជាម្ចាស់ពិធីអាពាហ៍ពិពាហ៍ អញ្ជើញតែភ្ញៀងទាំងឡាយណាដែលបានទទួលការចាក់វ៉ាក់សាំងរួចរាល់ ព្រោះថា បើសិនជាក្នុងពិធីរៀបការនោះ មានវត្តមានរបស់អ្នកមិនបានចាក់វ៉ាក់សាំងដោយសារការគេចវេះ នោះអាចជាហានិភ័យនៃការឆ្លងរាលដាលវីរុស COVID-19។

ការសម្រេចខាងលើនេះ មិនមែនអនុវត្តត្រឹមតែពិធីរៀបមង្គលការនោះទេ ប៉ុន្តែក៏អនុវត្តចំពោះរាល់ព្រឹត្តិការណ៍ និងពិធីនានា រួមទាំងពិធីសាសនាផងដែរ៕

November 12, 2021

ទីក្រុង «10 នាទី» ប្រកបដោយបច្ចេកវិទ្យាខ្ពស់ នៅក្នុងរដ្ឋធានី សេអ៊ូល

(កូរ៉េខាងត្បូង)-ក្រុមស្ថាបត្យករនឹងសាងសង់ទីក្រុងមួយដែលប្រើប្រាស់បច្ចេកវិទ្យាទំនើប និងថាមពលស្អាត អនុញ្ញាតឱ្យប្រជាជនផ្លាស់ទីទៅគ្រប់កន្លងក្នុងរង្វង់ 10 នាទី។

មុននេះ គំនិតស្ដីពី «ទីក្រុង 15 នាទី» ក្នុងនោះ ប្រជាជនអាចធ្វើដំណើរទៅកន្លែងធ្វើការ និងកន្លែងលេងកម្សាន្តដោយចំណាយពេលដើរ ឬធ្វើដំណើរតាមយានយន្តតែ 15 នាទី ពីផ្ទះរបស់ពួកគេ កំពុងទាក់ទាញចំណាប់អារម្មណ៍ខ្លាំងពីសំណាក់អ្នកវិនិយោគនៅក្នុងសម័យ COVID-19។ ពេលនេះ ក្រុមស្ថាបត្យករកំពុងតែរៀបចំគម្រោងសាងសង់ទីក្រុងមួយដែលប្រកបដោយមហិច្ឆតាធំជាងនេះនៅទីក្រុង សេអ៊ូល របស់ កូរ៉េខាងត្បូង នោះគឺ «ទីក្រុង 10 នាទី»។

គម្រោងដែលមានឈ្មោះថា «គម្រោង H1» នេះ នឹងអភិវឌ្ឍតំបន់ឧស្សាហកម្មចាស់ ឱ្យទៅជាទីក្រុងឆ្លាតវៃដែលតភ្ជាប់គ្នា។ គម្រោងនេះនឹងមានអគារស្នាក់នៅខ្ពស់ចំនួន 8 និងមានការិយាល័យ សាលារៀន សួនកម្សាន្ត មជ្ឈមណ្ឌលកីឡា អាងហែលទឹក និងកសិដ្ឋានដាំបន្លែលើទឹក (hydroponic farm) ជាដើម នៅលើផ្ទៃដីទំហំ 50.5 ហិកតា។

ត្រូវបានរចនាឡើងដោយក្រុមហ៊ុនស្ថាបត្យកម្ម UNStudio របស់ប្រទេស ហូឡង់ និងមានការវិនិយោគពីក្រុមហ៊ុនអភិវឌ្ឍ Hyundai គម្រោងនេះនឹងក្លាយជាទីក្រុងបង្រួមតូចដែលមិនមានវត្តមានរបស់រថយន្ត។ គ្រប់ទីតាំងផ្ដល់សេវាកម្ម និងទំនិញ សុទ្ធតែមានចម្ងាយពីលំនៅឋានរបស់ប្រជាជនប្រមាណតែ 10 នាទីប៉ុណ្ណោះ។

Ben van Berkel សហស្ថាបនិករបស់ UNStudio បានឱ្យដឹងថា ទីក្រុងនេះផ្ដោតសំខាន់ទៅលើផាសុកភាពនៃការរស់នៅ និងពេលវេលាធ្វើដំណើររបស់ប្រជាជន។

អ្នកនាំពាក្យមួយរូបរបស់ UNStudio បានបញ្ជាក់ថា គម្រោងនេះទទួលបានការអនុញ្ញាតរួចហើយសម្រាប់ការសាងសង់។ ក្រុមវិស្វករឱ្យដឹងថា ថាមពលស្អាតនឹងត្រូវបានផលិតនៅនឹងកន្លែង។ ទន្ទឹមនឹងនេះ ប្រព័ន្ធប្រមូល និងរក្សាទុកទឹកភ្លៀងក៏ត្រូវបានរចនាជាពិសេសដើម្បីជួយបន្ថែមប្រភពផ្គត់ផ្គង់ទឹកសម្រាប់ការប្រើប្រាស់ប្រចាំថ្ងៃ៕

November 12, 2021

ស្ថាបនិករបស់ WikiLeaks ត្រូវបានអនុញ្ញាតឱ្យរៀបការក្នុងពន្ធនាគារ

Julian Assange ដែលជាស្ថាបនិករបស់គេហទំព័រ WikiLeaks ត្រូវបានក្រុមមន្ត្រីនៃប្រទេសអង់គ្លេស អនុញ្ញាតឱ្យធ្វើពិធីរៀបការជាមួយមិត្តស្រី Stella Morris នៅក្នុងពន្ធនាគារ Belmarsh។

«ខ្ញុំមានអារម្មណ៍ធូរស្រាលក្នុងចិត្ត និងមានសង្ឃឹមថា អាពាហ៍ពិពាហ៍របស់ពួកយើងនឹងមិនជួបឧបសគ្គអ្វីទៀតទេ» Stella Morris បានប្រាប់សារព័ត៌មាន PA របស់ អង់គ្លេស កាលពីថ្ងៃទី 11 វិច្ឆិកា។

អ្នកនាំពាក្យនៃស្ថាប័នគ្រប់គ្រងពន្ធនាគាររបស់ អង់គ្លេស ឱ្យដឹងថា លិខិតស្នើសុំរៀបការក្នុងពន្ធនាគាររបស់ស្ថាបនិក WikiLeaks ត្រូវបានទទួលយក និងចាត់ការដូចករណីធម្មតា។ Morris មិនទាន់ប្រកាសថ្ងៃរៀបមង្គលការនៅឡើយ។

Assange និង Morris បានស្គាល់គ្នាក្នុងអំឡុងស្ថាបនិក WikiLeaks កំពុងជ្រកកោននៅក្នុងស្ថានទូតប្រទេសអេក្វាឌ័រ នៅទីក្រុងឡុងដ៍។ ពួកគេមានកូនពីរនាក់ដែលសុទ្ធតែមានសញ្ញាអង់គ្លេស។

Assange បានលាក់ខ្លួនក្នុងស្ថានទូត អេក្វាឌ័រ នៅទីក្រុងឡុងដ៍អស់រយៈពេល 5 ឆ្នាំ ដើម្បីគេចពីដីកាធ្វើបត្យាប័នត្រលប់ទៅកាន់ប្រទេសស៊ុយអែត ដោយត្រូវបានចោទប្រកាន់ពីបទរំលោភផ្លូវភេទ។ Assange យល់ថា រឿងក្ដីនេះគឺគ្រាន់តែជាការបិទបាំងដើម្បីអាចនាំខ្លួនលោកទៅទទួលទោសនៅ សហរដ្ឋអាម៉េរិក ប៉ុណ្ណោះ ទាក់ទិននឹងសកម្មភាពកាលពីច្រើនឆ្នាំមុនរបស់ WikiLeaks។

តុលាការរបស់ អង់គ្លេស កាលពីខែមករា បានបដិសេធសំណើរបស់ សហរដ្ឋអាម៉េរិក ដែលចង់នាំខ្លួន Assange ទៅកាត់ទោស។ បច្ចុប្បន្ន Assange កំពុងរង់ចាំសេចក្ដីសម្រេចរបស់តុលាការកំពូល៕

November 12, 2021

ស្ថិតិស្ដីពី COVID-19 នៅ កម្ពុជា និងទូទាំងពិភពលោក គិតមកដល់ព្រឹកថ្ងៃទី 12 ខែវិច្ឆិកា ឆ្នាំ 2021

តួលេខ COVID-19 ថ្មី នៅ កម្ពុជា ក្នុងអំឡុង 24 ម៉ោង នៃថ្ងៃទី 11 វិច្ឆិកា 2021 រួមមាន៖

– ឆ្លងថ្មី = 63 នាក់
– ជាសះស្បើយថ្មី = 67 នាក់
– ស្លាប់ថ្មី = 6 នាក់។

ក្នុងចំណោមអ្នកឆ្លងថ្មីទាំង 63 នាក់ មាន៖

– ករណីឆ្លងសហគមន៍ 55 នាក់
– អ្នកដំណើរពីបរទេស 08 នាក់

គិតមកដល់ព្រឹកថ្ងៃទី 12 ខែវិច្ឆិកា ឆ្នាំ 2021 តួលេខ COVID-19 សរុបនៅ កម្ពុជា រួមមាន៖

– អ្នកឆ្លងសរុប= 119,421 នាក់
– អ្នកជាសះស្បើយ= 115,797 នាក់
– អ្នកស្លាប់= 2,856 នាក់

តួលេខ COVID-19 សរុប នៅទូទាំងពិភពលោក គិតមកដល់ថ្ងៃនេះ រួមមាន៖

– អ្នកឆ្លងសរុបជាង = 252,651,600 នាក់
– អ្នកជាសះស្បើយសរុបជាង = 228,575,300 នាក់
– អ្នកស្លាប់សរុបជាង = 5,095,600 នាក់
– អ្នកកំពុងព្យាបាលសរុបជាង = 18,980,600 នាក់

November 12, 2021

តាក់ស៊ីហោះរបស់ Hyundai អាចដឹកភ្ញៀវចាប់ពីឆ្នាំ 2028

ក្រុមហ៊ុន Hyundai កាលពីថ្ងៃទី 9 វិច្ឆិកា បានប្រកាសអំពីគម្រោងអភិវឌ្ឍតាក់ស៊ីហោះអគ្គិសនីបើកបរស្វ័យប្រវត្ត 5 កៅអី របស់ខ្លួន ដែលអាចចាប់ផ្ដើមការហោះហើរពីឆ្នាំ 2028។

ក្រុមហ៊ុនផលិតរថយន្តនៅទីក្រុង Seoul បានប្ដូរឈ្មោះផ្នែកដឹកជញ្ជូនផ្លូវអាកាសទៅជាក្រុមហ៊ុនថ្មីដែលមានឈ្មោះថា Supernal។ ក្រុមហ៊ុន Hyundai បានបង្ហាញតាក់ស៊ីហោះដំបូងរបស់ខ្លួនដែលមានឈ្មោះថា S-A1 នៅឯព្រឹត្តិការណ៍ពិព័រណ៍ CES នៅ Las Vegas កាលពីឆ្នាំមុន។ កាលណោះ ពួកគេក៏បានបង្ហើបឱ្យដឹងអំពីគម្រោងសហការជាមួយ Uber ផងដែរ។

ម៉ូដែលតាក់ស៊ីហោះរបស់ Hyundai នឹងបំពាក់ប្រព័ន្ធអាគុយអ៊ីដ្រូសែន។ ពួកគេក៏កំពុងអភិវឌ្ឍប្រព័ន្ធអាគុយ lithium ដែលអាចផ្ទុកថាមពលបានខ្ពស់ផងដែរ។ S-A1 នឹងដំណើរការដោយស្វ័យប្រវត្តទាំងស្រុងនាពេលអនាគត។

តាក់ស៊ីហោះនេះមានស្លាបកង្ហារចំនួន 12 និងអាចដឹកមនុស្សបាន 5 នាក់ ហោះហើរក្នុងល្បឿន 290 គីឡូម៉ែត្រ/ម៉ោង អាចហោះបាន 96.5 គីឡូម៉ែត្រ/លើក និងកម្ពស់ 600 ម៉ែត្រ។

យោងតាម Hyundai និង Supernal អតិថិជននឹងប្រើប្រាស់កម្មវិធីដូចទៅនឹង Uber, Lyft និង Bolt ដើម្បីបង្កើតគម្រោងដំណើរពីផ្ទះរបស់អ្នកដំណើរ ទៅកាន់គោលដៅរបស់ពួកគេ។

Hyundai និង Supernal បានសហការជាមួយក្រុមហ៊ុន Urban-Air Port ដើម្បីអភិវឌ្ឍហេដ្ឋារចនាសម្ព័ន្ធសម្រាប់តាក់ស៊ីហោះចុះចត និងហោះឡើងត្រង់ នៅជុំវិញពិភពលោក៕

November 11, 2021

Author: សឿន សំណាង