សឿន សំណាង - La Reine Media

ខ្សែឆត្រយោងទាក់គ្នានៅលើអាកាស បណ្ដាលឱ្យទាហានម្នាក់ស្លាប់ នៅ ប្រេស៊ីល

ទាហានឆត្រយោងពីរនាក់បានប៉ះទង្គិចគ្នា បណ្ដាលឱ្យខ្សែឆត្រយោងត្រូវទាក់ជាប់ និងធ្លាក់មកដីពីកម្អស់ជាង 100 ម៉ែត្រ នៅ Rio de Janeiro នាំឱ្យទាហានមួយរូបបាត់បង់ជីវិត ខណៈមួយរូបទៀតរងរបួសធ្ងន់ធ្ងរ។

គ្រោះថ្នាក់ខាងបានកើតឡើងនៅពេលទាហានលោតឆត្រយោងពីរនាក់គឺ Nascimento de Souza និង Francisco Damiao Vieira Neto ចូលរួមក្នុងព្រឹត្តិការណ៍លោតឆត្រយោងស៊ីវិលមួយនៅទីក្រុង Rio de Janeiro នៃប្រទេសប្រេស៊ីល កាលពីថ្ងៃទី 13 វិច្ឆិកា។

វីដេអូដែលត្រូវបានសារព័ត៌មានអាម៉េរិក ចុះផ្សាយកាលពីចុងសប្ដាហ៍មុន បង្ហាញថា នៅពេលកំពុងបញ្ជាឆត្រនៅលើកម្ពស់ជាង 100 ម៉ែត្រ ម្នាក់ក្នុងចំណោមពីរនាក់ខាងលើទំនងជាបាត់បង់ម្ចាស់ការ បណ្ដាលឱ្យប៉ះទង្គិចទៅលើឆត្ររបស់ម្នាក់ទៀត។

ឧបទ្ទវហេតុនេះបណ្ដាលឱ្យខ្សែឆត្រយោងត្រូវទាក់ជាប់គ្នា។ ដោយបាត់បង់កម្លាំងយោង ឆត្រទាំងពីរក៏ធ្លាក់យ៉ាងរហ័សមកដី នាំឱ្យ Souza ត្រូវបាត់បង់ជីវិត ចំណែក Neto ត្រូវបញ្ជូនទៅសង្គ្រោះបន្ទាន់ដោយសាររងរបួសធ្ងន់ធ្ងរ។

កងវរសេនាតូចឆត្រយោងដែលជាកន្លែងធ្វើការរបស់ Souza បានឱ្យដឹងថា ព្រឹត្តិការណ៍លោតឆត្រយោងដែលគាត់បានចូលរួម ត្រូវបានបង្កើតឡើងដោយក្លិបអ្នកលោតឆត្រយោងស៊ីវិល Resende។

បច្ចុប្បន្នមិនទាន់ដឹងច្បាស់ថា តើក្រុមមន្ត្រីប្រេស៊ីល បានស្រាវជ្រាវលើឧបទ្ទវហេតុនេះដែរ ឬយ៉ាងណានោះទេ។

សូមរំលឹកថា នៅ កម្ពុជា កាលពីខែមករា ឆ្នាំ 2021 ក៏មានករណីស្រដៀងគ្នានេះកើតឡើងផងដែរ។ កាលណោះ នៅពេលលោតពីលើយន្តហោះ ចុះមកក្រោម ឆត្ររបស់គ្រូបង្វឹក វរសេនីយ៍ត្រី លឹម សាយ បានព័ន្ធគ្នាជាមួយនឹងឆត្ររបស់សិស្សម្នាក់ទៀត បណ្ដាលឱ្យធ្លាក់មកដីពេញទំហឹង ធ្វើឱ្យអ្នកទាំងពីររងរបួសធ្ងន់ តែជាអកុសល លោកគ្រូ លឹម សាយ បានស្លាប់ នៅពេលកងកម្លាំងបញ្ជូនទៅដល់មន្ទីរពេទ្យ៕

November 22, 2021

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ នឹងត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃស្អែក

ស្ពានដែលចំណាយថវិកាអស់ជិត 57 លានដុល្លារអាមេរិក និងចំណាយពេលក្នុងការសាងសង់អស់ 42 ខែ នេះ តាមគម្រោងនឹងត្រូវបានសម្ពោធដាក់ឱ្យប្រើប្រាស់ជាផ្លូវការនៅព្រឹកថ្ងៃទី 23 ខែវិច្ឆិកា ឆ្នាំ 2021។

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ចាប់ផ្តើមនៅត្រង់គីឡូម៉ែត្រលេខ 58+200 ត្រើយខាងលិច ស្ថិតលើផ្លូវខេត្តលេខ 2714 ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ភ្ជាប់ទៅត្រើយខាងកើតទន្លេមេគង្គ នៅត្រង់ចំណុចភូមិក្តុលកណ្តាល ឃុំទ្រា ស្រុកក្រូចឆ្មារ ខេត្តត្បូងឃ្មុំ។ តាមគម្រោង ស្ពាននេះនឹងត្រូវបានសម្ពោធដាក់ឱ្យប្រើប្រាស់ជាផ្លូវការនៅព្រឹកថ្ងៃទី 23 ខែវិច្ឆិកា ឆ្នាំ 2021 ដោយវត្តមានរបស់ សម្តេចអគ្គមហាសេនាបតីតេជោ ហ៊ុន សែន។

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ក្នុងពេលកំពុងសាងសង់កាលពីចុងឆ្នាំ 2020

ស្ពានមិត្តភាពកម្ពុជា-ចិន មួយនេះ មានតួស្ពានសុទ្ធសាធមានប្រវែង 1,131 ម៉ែត្រ ទទឹង 13.5 ម៉ែត្រ ក្រាលបេតុងកៅស៊ូកម្រាស់ 5 សង់ទីម៉ែត្រ មានផ្លូវរថយន្តចំនួន 2 គន្លង ផ្លូវម៉ូតូចំនួន 2 គន្លង ផ្លូវថ្មើរជើងចំនួន 2 គន្លង សម្រាប់ធ្វើដំណើរទៅមក។ ផ្លូវមេសងខាងស្ពាន តភ្ជាប់ទៅផ្លូវជាតិលេខ 71C មានប្រវែង 8,323 ម៉ែត្រ។ ជាសរុប ទាំងស្ពាន និងផ្លូវតភ្ជាប់មានប្រវែង 9,454 ម៉ែត្រ។

ស្ពានស្ទឹងត្រង់-ក្រូចឆ្មារ នេះ ត្រូវបានបើកការដ្ឋានសាងសង់កាលពីថ្ងៃទី 9 ខែកុម្ភៈ ឆ្នាំ 2018 និងសាងសង់ដោយក្រុមហ៊ុនសំណង់សៀងហៃ(SCG) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន។

ស្ថានភាពស្ពានកាលពីថ្ងៃទី 17 វិច្ឆិកា 2021

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ចំណាយថវិកាក្នុងការសាងសង់អស់ 56.998 លានដុល្លារអាមេរិក និងចំណាយពេលសាងសង់អស់ 42 ខែ៕

November 22, 2021

COVID-19! ករណីឆ្លងថ្មីនៅ កម្ពុជា ធ្លាក់ចុះមកត្រឹម 37 នាក់ ខណៈនៅ ទូទាំងពិភពលោក រកឃើញករណីថ្មីជាង 13,000 នាក់

ទន្ទឹមនឹងករណីជាសះស្បើយថ្មី 40 នាក់ និងករណីស្លាប់ថ្មី 5 នាក់ កាលពីអំឡុង 24 ម៉ោងនៃថ្ងៃទី 21 វិច្ឆិកា ឆ្នាំ 2021 កម្ពុជា ក៏បានរកឃើញអ្នកឆ្លងថ្មីចំនួន 37 នាក់ផងដែរ។

ទិន្នន័យបន្ថែម សូមអានសេចក្ដីជូនព័ត៌មានដូចខាងក្រោម៖

នៅទូទាំងពិភពលោក ករណី COVID-19 មានដូចខាងក្រោម៖

-ឆ្លងថ្មី ៖ 13,470 នាក់
-ឆ្លងសរុប ៖ 257,832,881 នាក់
-ស្លាប់សរុប ៖ 5,168,069 នាក់
-ជាសះស្បើយសរុប ៖ 232,756,149 នាក់

November 22, 2021

ដល់ពេល «ថ្ងៃឈប់រះ» ទីក្រុងខាងជើងបង្អស់របស់ សហរដ្ឋអាម៉េរិក ជិតលិចលង់ក្នុងភាពងងឹតរយៈពេល 66 ថ្ងៃ

(សហរដ្ឋអាម៉េរិក)-ចាប់ពីសប្ដាហ៍នេះ ប្រជាជនដែលរស់នៅក្នុងទីក្រុង Utquagvik នឹងត្រូវឆ្លងកាត់ «រាត្រីតំបន់ប៉ូល» ដែលអូសបន្លាយពេលរហូតដល់ 66 ថ្ងៃ ដោយពុំមានពន្លឺព្រះអាទិត្យ។

Utqiagvik គឺជាទីក្រុងនៅប៉ូលខាងជើងរបស់ សហរដ្ឋអាម៉េរិក ដែលជាតំបន់រស់នៅរបស់មនុស្សជាង 4,000 នាក់។ ទីក្រុងនៃរដ្ឋ Alaska នេះ មានរហ័សនាមជាច្រើន រួមមាន «ដំបូលផ្ទះរបស់ពិភពលោក» និង «ចំនុចចាប់ផ្ដើមនៃបម្រែបម្រួលអាកាសធាតុ»។

ចាប់ពីសប្ដាហ៍នេះ Utqiagvik នឹងត្រូវឆ្លងកាត់ «រាត្រីតំបន់ប៉ូល» រយៈពេល 66 ថ្ងៃ។ ដោយពុំមានពន្លឺថ្ងៃ សីតុណ្ហភាពនៅទីនេះនឹងចុះត្រជាក់ខ្លាំង។ Utqiagvik មានសីតុណ្ហភាពទាបជាង 0 អង្សាសេ រយៈពេល 160 ថ្ងៃ។ ដូច្នេះ ថ្ងៃបន្ទាប់ ព្រះអាទិត្យ នឹងរះឡើងនៅឯនាយជើងមេឃ នៅថ្ងៃទី 22 មករា 2022។

ពលរដ្ឋនៅ Utqiagvik នៅតែបន្តរស់នៅតាមធម្មតាក្នុងគ្រាមិនមានពន្លឺព្រះអាទិត្យ។ «មេឃងងឹតនៅពេលអ្នកត្រលប់មកផ្ទះនៅថ្ងៃត្រង់។ អ្នកត្រូវបើកភ្លើងហ្វានៅវេលាថ្ងៃត្រង់ដើម្បីបរឡានមកផ្ទះ។ ប្រការនេះខុសបន្តិចធៀបនឹងពលរដ្ឋដែលរស់នៅក្នុងរដ្ឋចំនួន 48 ផ្សេងទៀតរបស់ សហរដ្ឋអាម៉េរិក» Myron McCumber ម្ចាស់ផ្ទះសំណាក់មួយកន្លែងនៅក្នុងទីក្រុង Utqiagvik ប្រាប់ពីបទពិសោធន៍ក្នុងការរស់នៅ។

ភាគច្រើននៃប្រជាជនរស់នៅក្នុងខណ្ឌ North Slope របស់ Alaska គឺជាជនជាតិដើម Inupiat (Iñupiaq) ដែលពួកគេបានរស់នៅទីនេះអស់រយៈពេលរាប់ពាន់ឆ្នាំមកហើយ។ ក្នុងប្រវត្តិសាស្ត្រ ពួកគេអាចរក្សាជីវិតរស់នៅក្នុងសីតុណ្ហភាពមហាត្រជាក់បានក៏ដោយសារការនេសាទត្រីបាឡែន សត្វរមាំង ត្រីនាគ តោសមុទ្រ និងបក្សាបក្សី។

យោងតាមសារព័ត៌មាន Business Insider ប្រជាជននៅតំបន់ Utqiagvik ភាគច្រើនរស់នៅដាច់ដោយឡែកពីដំណើរការពាណិជ្ជកម្មនៅក្នុងរដ្ឋចំនួន 48 ផ្សេងទៀតរបស់ អាម៉េរិក។ ទីក្រុង Utquagvik ទាំងមូលដែលមានប្រជាជនសរុបប្រមាណ 4,500 នាក់ ប៉ុន្តែ មានផ្ទះត្រឹមតែ 5 ខ្នងប៉ុណ្ណោះ៕

November 22, 2021

(វីដេអូ)-ក្រុមអ្នកចូលរួមព្យុហយាត្រាណូអែល នៅ សហរដ្ឋអាម៉េរិក ត្រូវរថយន្តបុក របួសរាប់សិបនាក់

ព្រឹកថ្ងៃទី 22 វិច្ឆិកា (ម៉ោងនៅ កម្ពុជា) ការិយាល័យស្នងការប៉ូលិស Waukesha បានឱ្យដឹងថា មនុស្សចំនួនជាង 20 នាក់ បានរងរបួស នៅពេលរថយន្ត (SUV) មួយគ្រឿង បើកបុករះលើហ្វូងមនុស្សដែលកំពុងចូលរួមព្យុហយាត្រារដូវបុណ្យណូអែល នៅទីក្រុងនៃរដ្ឋ Wisconsin សហរដ្ឋអាម៉េរិក ដែលបានធ្វើឡើងមុននោះ។

ស្នងការប៉ូលិសក្រុង Waukesha លោក Dan Thompson បានបញ្ជាក់ថា រថយន្តជាប់សង្ស័យនៅក្នុងហេតុការណ៍នេះត្រូវបានឃាត់ទុករួចហើយ ដូច្នេះពុំមានការគំរាមកំហែងទៀតទេ។ មុននេះ រថយន្ត SUV ពណ៌ក្រហមមួយគ្រឿង បានបុករះទៅលើហ្វូងមនុស្សដែលកំពុងធ្វើព្យុហយាត្រាណូអែល នៅក្នុងក្រុង។

សមត្ថកិច្ចកំណត់បានអត្តសញ្ញាណជនទាំងឡាយដែលជាប់ទាក់ទិននឹងហេតុការណ៍ខាងលើ ប៉ុន្តែមិនទាន់បានបង្ហើបឱ្យដឹងសេចក្ដីលម្អិតនៅឡើយ ដោយអះអាងថា កំពុងបន្តការស្រាវជ្រាវ។

November 22, 2021

ផ្លូវការ! ព្រឹត្តិការប្រកួតកីឡាយុវជនអាស៊ី ឆ្នាំ 2029 នឹងត្រូវធ្វើឡើងនៅ កម្ពុជា

ជាផ្លូវការ កម្ពុជា ទទួលបានសិទ្ធិធ្វើជាម្ចាស់ផ្ទះ ការប្រកួតកីឡាយុវជនអាស៊ី សម្រាប់នាឆ្នាំ 2029 ដែលនេះគឺជារាយការណ៍របស់ឯកឧត្តម វ៉ាត់ ចំរើន រដ្ឋលេខាធិការនៃក្រសួងទេសចរណ៍ និងជាអគ្គលេខាធិការនៃ គណៈកម្មាធិការជាតិអូឡាំពិកកម្ពុជា។

ដំណឹងជាផ្លូវការនេះត្រូវបានលើកឡើងបន្ទាប់ពីឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) និងឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានចុះហត្ថលេខាទទួលយកសិទ្ធិជាផ្លូវការ នៅទីក្រុងឌូបៃ ប្រទេសអារ៉ាប់រួម កាលពីល្ងាចថ្ងៃអាទិត្យ ទី 21 ខែវិច្ឆិកា ឆ្នាំ 2021។

ឯកឧត្តម ថោង ខុន ក្នុងនាមប្រធានគណៈកម្មាធិការជាតិកម្ពុជា (NOCC) និងក្នុងនាមជាអ្នករៀបចំការប្រកួតកីឡាយុវជនអាស៊ី និងឯកឧត្តម ឃួង ស្រេង ក្នុងនាមម្ចាស់ផ្ទះ រាជធានីភ្នំពេញ បានចុះហត្ថលេខាជាមួយប្រធានស្តីទីនៃក្រុមប្រឹក្សាកីឡាអូឡាំពិកអាស៊ី ដោយទទួលបានការអបអរសាទរពីបណ្តាប្រទេសទាំង 45 នៃ ទ្វីបអាស៊ី ដោយទទួលបានសិទ្ធិធ្វើម្ចាស់ផ្ទះ ការប្រកួតកីឡាយុវជនអាស៊ី នាឆ្នាំ 2029។

គណៈប្រតិភូកីឡារបស់ កម្ពុជា ដែលអញ្ជើញទៅបំពេញបេសកកម្មអន្តរជាតិ នៅ ប្រទេសអារ៉ាប់រួម នេះ រួមមាន ប្រធានគណៈប្រតិភូ ឯកឧត្តមបណ្ឌិត ថោង ខុន អមដំណើរដោយឯកឧត្តម ឃួង ស្រេង ឯកឧត្តម អ៊ុក សិទ្ធជាតិ អគ្គនាយកកីឡាដែលជាតំណាងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម វ៉ាត់ ចំរើន។ល។

November 22, 2021

Apple ដាក់ពាក្យស្នើសុំប័ណ្ណប៉ាតង់សម្រាប់ម៉ូដែល iPhone ធ្វើអំពីកញ្ចក់ថ្លា មានអេក្រង់ច្រើន

ក្រុមហ៊ុន Apple របស់ អាម៉េរិក ទើបតែបានដាក់ពាក្យសុំចុះឈ្មោះប័ណ្ណប៉ាតង់សម្រាប់រចនាបថលម្អិតនៃរូបរាងរបស់ iPhone ជំនាន់ថ្មីដែលធ្វើអំពីកញ្ចក់ទាំងស្រុង ដោយមានអេក្រង់ព័ទ្ធជុំវិញ អនុញ្ញាតឱ្យបង្ហាញរូបភាពទាំងអេក្រង់មុខ ទាំងអេក្រង់ក្រោយ។

យោងតាមសារព័ត៌មាន Daily Mail កញ្ចក់អាចជាទិន្នាការថ្មីបំផុតរបស់ Apple ហើយក្រុមហ៊ុននេះក៏កំពុងតែត្រៀមខ្លួនក្នុងការបញ្ចេញផលិតផលដែលប្រើប្រាស់កញ្ចក់ភាគច្រើន មានដូចជានាឡិកាឆ្លាតវៃ និងកុំព្យូទ័រជាដើម។

ពាក្យស្នើសុំប័ណ្ណប៉ាតង់ ទើបត្រូវបាន Apple បញ្ជូនទៅកាលពីសប្ដាហ៍មុន។ ប៉ុន្តែ ប្រការនេះមិនមែនមានន័យថា រចនាបថណាមួយដែលមាននៅក្នុងពាក្យស្នើសុំនោះ សុទ្ធតែនឹងត្រូវបានផលិតនោះឡើយ។

iPhone ដែលធ្វើអំពីកញ្ចក់ពិសេសនេះត្រូវបានអធិប្បាយថា ដូចទៅនឹងឧបករណ៍អេឡិចត្រូនិកដែលមានសម្បកជាកញ្ចក់។

ពាក្យស្នើសុំប័ណ្ណប៉ាតង់ រួមមានទាំងគំនូរដែលបង្ហាញថា ប៊ូតុងមួយចំនួននឹងមាននៅលើអេក្រង់កោងដែលលាតសន្ធឹងតាមបណ្ដោយគែមរបស់ទូរស័ព្ទ ក្នុងនោះមានដូចជា ប៊ូតុង Airplane mode, Wi-Fi និង ប៊ូតុងគ្រប់គ្រងសំឡេង។

ចំនុចពិសេសបំផុតនៅក្នុងរចនាបថនៃទូរស័ព្ទនេះគឺអេក្រង់ខាងក្រោយ ពោលគឺវាមានទាំងអេក្រង់មុខ និងអេក្រង់ក្រោយ។
ឯកសារថែមទាំងបានបរិយាយថា iPhone ថ្មីរបស់ Apple នឹងមានអេក្រង់ព័ទ្ធជុំវិញគែមទាំងឡាយរបស់វា ដើម្បីអនុញ្ញាតឱ្យផ្ទៃទាំង 6 របស់វាអាចបង្ហាញរូបភាព ឬយ៉ាងហោចណាស់ក៏ត្រូវបានបិទជិត និងមានរន្ធសម្រាប់មុខងារផ្សេង។

ទន្ទឹមនឹងនេះ Apple ក៏បានបង្ហាញអំពីរចនារូបរាងនៃនាឡិកាថ្លាមើលឃើញគ្រឿងក្នុង និងប្រអប់ sever case របស់កុំព្យូព័រ Mac Pro ផងដែរ។

បើទោះជាគំនិតស្ដីអំពី iPhone ធ្វើអំពីកញ្ចក់ថ្លា អាចនឹងមិនមានលទ្ធភាពត្រូវបានបង្កើតឡើងក៏ដោយ ប៉ុន្តែ រចនារូបរាងបែបនេះអាចបង្ហាញឱ្យគ្រប់គ្នាយល់អំពីទិសដៅថ្មីនាពេលអនាគតរបស់ Apple៕

November 22, 2021

ក្រសួងទេសចរណ៍ជំរុញឱ្យក្រុមហ៊ុនទេសចរណ៍ រៀបចំលក់កញ្ចប់ទស្សនា ក្នុងតម្លៃសរម្យ ដើម្បីទាក់ទាញទេសចរបរទេស

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានជំរុញឱ្យបណ្ដាក្រុមហ៊ុនទេសចរណ៍ រៀបចំលក់កញ្ចប់ទស្សនាក្នុងតម្លៃមួយសរម្យ ដើម្បីអាចទាក់ទាញភ្ញៀវបរទេសដែលចាក់វ៉ាក់សាំងរួចរាល់ ចូលមកទស្សនា។

ប្រសាសន៍របស់លោក ត្រូវបានលើកឡើងនាថ្ងៃទី 17 ខែវិច្ឆិកា នេះ នៅក្នុងកិច្ចប្រជុំផ្សព្វផ្សាយស្តីពីការទទួលទេសចរអន្តរជាតិ និងអ្នកដំណើរ ដែលបានចាក់វ៉ាក់សាំងបង្ការជំងឺ COVID-19 ពេញលេញ ចូលមក កម្ពុជា នៅខេត្តសៀមរាប។

លោករដ្ឋមន្ត្រី បានមានប្រសាសន៍ថា អ្វីដែលយើងត្រូវត្រៀម គឺការអនុវត្តតាមស្តង់ដារអប្បបរមា (SOP) តាមគន្លងប្រក្រតីភាពថ្មី ក្រោយពីរាជរដ្ឋាភិបាលកម្ពុជាបានអនុញ្ញាតឱ្យទេសចរបរទេស និងអ្នកដំណើរពីក្រៅប្រទេសដែលបានចាក់វ៉ាក់សាំងរួចរាល់ ចូលមក កម្ពុជា។

គោលដៅតំបន់ទេសចរណ៍សំខាន់ៗចំនួន 6 នៅខេត្តសៀមរាប មានដូចជា តំបន់ឧទ្យានជាតិព្រះជ័យវរ្ម័ន្ម-នរោត្តមភ្នំគូលែន តំបន់ទេសចរណ៍ជុំវិញតំបន់ការពារប្រាសាទបន្ទាយស្រី តំបន់ទេសចរណ៍អង្គរ តំបន់ទេសចរណ៍ក្រុងសៀមរាប តំបន់ទេសចរណ៍បឹងទន្លេសាប និងតំបន់ទេសចរណ៍សៀមរាបថ្មី ត្រូវបានដាក់ឱ្យអនុវត្តន៍ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ 2021-2023 ផងដែរ។ នេះបើតាមប្រសាសន៍របស់ ឯកឧត្តម ថោង ខុន៕

November 17, 2021

ព្រះចន្ទនឹងប្រែទៅជាពណ៌ក្រហមទុំ នៅក្នុងព្រឹត្តិការណ៍ចន្ទ្រគ្រាសដែលមានរយៈពេលវែងបំផុតប្រចាំសតវត្ស ដែលកើតឡើងក្នុងសប្ដាហ៍នេះ

នៅពេលព្រឹត្តិការណ៍ចន្ទ្រគ្រាសកើតឡើង ពន្លឺមួយផ្នែករបស់ព្រះអាទិត្យនៅតែអាចឆ្លងកាត់បរិយាកាសផែនដី ហើយទៅដល់ព្រះចន្ទ បណ្ដាលឱ្យភពរណបមួយនេះប្រែជាពណ៌ក្រហម។

ចន្ទ្រគ្រាសមួយផ្នែកដែលមានរយៈពេលវែងជាងគេប្រចាំសតវត្សរ៍ និងវែងជាងគេក្នុងអំឡុង 580 ឆ្នាំ នឹងកើតមានឡើងក្នុងសប្ដាហ៍នេះ។ ព្រឹត្តិការណ៍ចន្ទ្រគ្រាសស្ទើរតែទាំងស្រុងនេះ កើតឡើងនៅពេលចន្ទពេញបូណ៌មី ហើយផែនដីគោចរដល់ចំនុចកណ្ដាល នៅចន្លោះព្រះចន្ទ និងព្រះអាទិត្យ។

ស្រមោលរបស់ផែនដី គ្របដណ្ដប់លើព្រះចន្ទ នាំឱ្យភពរណបធម្មជាតិនេះស្ថិតក្នុងភាពងងឹតក្នុងរយៈពេលជិត 3 ម៉ោង និង 30 នាទី។ ស្រមោលផែនដីនឹងបាំងពន្លឺស្ទើរតែទាំងអស់ដែលជះពីព្រះអាទិត្យ ធ្វើឱ្យព្រះចន្ទប្រែទៅជាពណ៌ក្រហមទុំ។

មូលហេតុដែលនាំឱ្យព្រះចន្ទត្រូវប្រែពណ៌ទៅជាក្រហមទុំនេះគឺដោយសារពន្លឺពីព្រះអាទិត្យ បើទោះជាត្រូវបាំងដោយផែនដី ប៉ុន្តែ វានៅតែកាច់កោងព័ទ្ធជុំវិញ និងឆ្លងកាត់បរិយាកាសរបស់ផែនដីដើម្បីទៅដល់ឋានព្រះចន្ទ។ បរិយាកាសផែនដី ច្រោះយករលកពន្លឺខ្លីពណ៌ខៀវ នៅសល់តែរលកពន្លឺវែងពណ៌ក្រហមដែលអាចធ្វើដំណើរទៅមុខ។ នៅពេលរលកពន្លឺពណ៌ក្រហមនេះឆ្លងកាត់ផុតបរិយាកាសផែនដី និងទៅដល់ព្រះចន្ទ វានឹងបណ្ដាលឱ្យព្រះចន្ទត្រូវប្រែពណ៌ទៅតាមពណ៌នៃពន្លឺនោះ។

ប្រជាជនដែលរស់នៅក្នុងតំបន់ជាច្រើននៃទ្វីបអាម៉េរិក អឺរ៉ុប អូស្ដ្រាលី និងទ្វីបអាស៊ី អាចមើលឃើញព្រឹត្តិការណ៍នេះនៅថ្ងៃទី 18 និង 19 ខែវិច្ឆិកា ឆ្នាំ 2021 ប៉ុន្តែ ពេលវេលាជាក់ស្ដែងនឹងអាស្រ័យទៅតាមតំបន់នីមួយ៕

November 17, 2021

ខាងក្នុងឋានសួគ៌លម្ហែកាយនៃទីក្រុងទំនើបរបស់ ប្រទេសកូរ៉េខាងជើង

សាមជីយ៉ុន (Samjiyon) ជាទីក្រុងដែលមានភ្នំ ប៉ាកទូ (Paektu) ត្រូវបាន កូរ៉េខាងជើង ចាត់ទុកជា «គំរូរបស់វប្បធម៌ជឿនលឿន» ដោយមានតំបន់សម្រាកលម្ហែកាយ និងសណ្ឋាគារជាច្រើន។

(រូបខាងលើគឺជាទិដ្ឋភាពទាំងមូលរបស់ទីក្រុង សាមជីយ៉ុន ដែលស្ថិតនៅជើងភ្នំ ប៉ាកទូ ក្នុងខេត្ត រីយ៉ាងហ្កាង (Ryanggang) មើលពីទីខ្ពស់ នៅក្នុងពិធីសម្ពោធបើកដំណើរការហេដ្ឋារចនាសម្ព័ន្ធទីនេះកាលពីខែធ្នូ 2019)

សាមជីយ៉ុន ត្រូវបានទីភ្នាក់ងារសារព័ត៌មានរដ្ឋកូរ៉េខាងជើង ហៅថា «គំរូនៃវប្បធម៌ជឿនលឿន» ដោយមានផ្ទះស្នាក់នៅ និងសណ្ឋាគាររចនាបថបែបថ្មី រួមនឹងតំបន់សម្រាកលម្ហែកាយកម្សាន្ត និងសេវាកម្មពាណិជ្ជកម្ម វប្បធម៌ និងសុខាភិបាល។ ទីក្រុងនេះអាចឱ្យមនុស្សរស់នៅបាន 4,000 គ្រួសារ ជាមួយនឹងសំណង់សាធារណៈ និងឧស្សាហកម្ម ដែលលាតសន្ធឹងនៅលើផ្ទៃដីរាបរយហិកតា។

(មេដឹកនាំរបស់ កូរ៉េខាងជើង លោក គីម ជុងអ៊ុន (Kim Jong-un) ធ្វើទស្សនកិច្ចសំណង់នានានៅ សាមជីយ៉ុន នៅក្នុងរូបថតដែលត្រូវបានសារព័ត៌មានរដ្ឋចេញផ្សាយកាលពីថ្ងៃទី 16 វិច្ឆិកា ដែលជាការបង្ហាញខ្លួនលើកដំបូងរបស់លោក បន្ទាប់ពីអវត្តមាន 35 ថ្ងៃ។)

យោងតាម KCNA លោក គីម ជុងអ៊ុន មកកាន់ទីតាំងនេះដើម្បីត្រួតពិនិត្យដំណាក់កាលទីបីនៃការសាងសង់ទីក្រុង។

(ផ្ទះស្នាក់នៅដែលមានរចនាបថដូចៗគ្នា ត្រូវបានសាងសង់នៅក្នុងទីក្រុង សាមជីយ៉ុន នៅក្នុងរូបថតដែលត្រូវបានចុះផ្សាយកាលពីខែមុន)

(ប្រជាពលរដ្ឋកូរ៉េខាងជើង ត្រូវបានអនុញ្ញាតឱ្យរើមករស់នៅក្នុងលំនៅឋានថ្មីក្នុងទីក្រុង សាមជីយ៉ុន ចាប់តាំងពីថ្ងៃទី 20 តុលា ដល់ថ្ងៃទី 28 តុលា 2021។)

(ប្រជាជននាំគ្នាប្រារពពិធីសម្ពោធគេហដ្ឋានថ្មី ដោយមានពិធីរាំរបាំ និងច្រៀងចម្រៀងប្រពៃណី)

ទីក្រុងគឺជាទ្រព្យមួយក្នុងចំណោមគំនិតផ្ដួចផ្ដើមផ្នែកសេដ្ឋកិច្ចធំបំផុតរបស់ គីម ជុងអ៊ុន ដើម្បីបង្ហាញឱ្យឃើញអំពីកិច្ចប្រឹងប្រែងសម្រាប់សេដ្ឋកិច្ចម្ចាស់ការ។ ដំណើរការនៃការសាងសង់ទីក្រុង សាមជីយ៉ុន បានជួបឧបសគ្គជាច្រើន និងត្រូវពន្យារពេលដោយសារបញ្ហាខ្វះគ្រឿងសំណង់ និងកម្លាំងពលកម្ម ព្រោះតែផលប៉ះពាល់ពីទណ្ឌកម្មរបស់អន្តរជាតិដើម្បីបង្អាក់កម្មវិធីអភិវឌ្ឍអាវុធនុយក្លេអែររបស់ ទីក្រុងព្យុងយ៉ាង។

(រូបខាងលើគឺជា ពិធីបុណ្យឆ្លាក់ទឹកកកដែលត្រូវបានរៀបចំឡើងនៅក្នុងទីក្រុង សាមជីយ៉ុន កាលពីខែកុម្ភៈ 2020 ដើម្បីជាការរំលឹកវិញ្ញាណក្ខន្ធ និងថ្ងៃកំណើតរបស់លោក គីម ជុងអ៊ីល។)

ទីក្រុង សាមជីយ៉ុន នេះ បានចាប់ផ្ដើមដំណាក់កាលរីកច្រើនចាប់ពីឆ្នាំ 2018 និងត្រូវបាន កូរ៉េខាងជើង ចាត់ទុកថាជា «ទីក្រុងតំបន់ភ្នំគំរូទាក់សម័យ ទៅតាមលទ្ធិសង្គមនិយម និងស្ដង់ដាអភិវឌ្ឍជនបទ»៕

November 17, 2021

Author: សឿន សំណាង