សឿន សំណាង - La Reine Media

WHO ព្រមានថា កូវីដ-១៩ ប្រភេទ អូមីក្រុង (Omicron) ឆ្លងរាលដាលលឿនជាងគេ និងធ្វើឱ្យថយចុះនូវប្រសិទ្ធភាពរបស់វ៉ាក់សាំង

អង្គការសុខភាពពិភពលោក (WHO) កាលពីថ្ងៃទី ១២ ធ្នូ បានឱ្យដឹងថា ទិន្នន័យផ្លូវការដំបូងៗ បានបង្ហាញថា វីរុសបំប្លែងខ្លួនថ្មី អូមីក្រុង ងាយឆ្លងជាង ដេលតា (Delta) និងកាត់បន្ថយប្រសិទ្ធភាពរបស់វ៉ាក់សាំងបង្ការជំងឺកូវីដ-១៩ ប៉ុន្តែបែរជាបង្កអាការរោគស្រាលជាងទៅវិញ។

គិតត្រឹមថ្ងៃទី ៩ ធ្នូ វ៉ារ្យ៉ង់អូមីក្រុង បានបង្ហាញវត្តមាននៅក្នុងប្រទេសចំនួន ៦៣ រួចមកហើយ ក្នុងនោះ ល្បឿននៃការឆ្លងរាលដាលលឿនត្រូវបានរកឃើញនៅ អាហ្វ្រិកខាងត្បូង ជាទីដែលមិនសូវមាន វ៉ារ្យ៉ង់ដេលតា និងនៅ ប្រទេសអង់គ្លេស ជាទីដែល ដេលតា រាតត្បាតខ្លាំងជាងគេ។

យោងតាមរបាយការណ៍បច្ចេកទេសរបស់ WHO អូមីក្រុង បង្កឱ្យមាន «ការថយចុះនៃប្រសិទ្ធភាពរបស់វ៉ាក់សាំង នៅក្នុងការបង្ការការឆ្លងរាលដាល» ហើយបើយោងទៅតាមទិន្នន័យដែលមានស្រាប់ «អូមីក្រុង អាចមានលទ្ធភាពយកឈ្នះលើ ដេលតា» ស្ដីពីទំហំនៃការឆ្លងក្នុងសហគមន៍។

របាយការណ៍ក៏បានឱ្យដឹងថា គិតមកដល់បច្ចុប្បន្ន ករណីឆ្លង អូមីក្រុង នានា គ្រាន់តែបង្កអាការរោគ «ស្រាល» ឬស្ទើរតែពុំមានរោគសញ្ញា។ ប៉ុន្តែ WHO ក៏បានបញ្ជាក់ថា មិនទាន់មានទិន្នន័យគ្រប់គ្រាន់នៅឡើយ ដើម្បីអាចវាយតម្លៃសរុបអំពីភាពសាហាវរបស់ វ៉ារ្យ៉ង់ នេះ៕

December 13, 2021

មហាសេដ្ឋីដែលមានទ្រព្យច្រើនជាងគេលំដាប់ទីមួយក្នុងពិភពលោក បាននិយាយថា ចង់ឈប់ធ្វើការ

លោក Elon Musk បានសរសេរនៅលើបណ្ដាញសង្គមថា លោកកំពុងពិចារណាដល់ការឈប់ធ្វើការ បើទោះធ្លាប់បានប្រកាសថា នឹងធ្វើជា CEO របស់ Tesla ច្រើនឆ្នាំទៀត។

«កំពុងគិតដល់រឿងបោះបង់ការងារ និងងាកទៅធ្វើជាមនុស្សមានឥទ្ធិពល (influencer) ពេញម៉ោង។ គ្រប់គ្នាយល់ឃើញយ៉ាងណាដែរ» មហាសេដ្ឋអាម៉េរិក ដើមកំណើតអាហ្វ្រិកខាងត្បូង បានសរសេរនៅលើ Twitter ដូច្នេះ កាលពីម្សិលមិញ។

លោក Musk មិនបានបង្ហើបឱ្យដឹងលម្អិតថា លោកមានគម្រោងនឹងធ្វើជា influencer ដូចម្ដេចនៅឡើយ។ ប៉ុន្តែ អ្នកមានជាងគេក្នុងលោករូបនេះ កន្លងមក ធ្លាប់បានបង្កព្យុះភ្លៀងជាច្រើនលើកមកហើយ នៅក្នុងទីផ្សារប្រាក់ឌីជីថល។ គ្រប់ខ្លឹមសារដែលលោកបង្ហោះលើបណ្ដាញសង្គម សុទ្ធតែជះឥទ្ធិពលដល់តម្លៃរបស់ Bitcoin ឬ Dogecoin។ ចាប់ពីដើមឆ្នាំនេះ លោក Musk បានចែករំលែកជាបន្តបន្ទាប់អំពីការយល់ឃើញរបស់ខ្លួន ទាក់ទិននឹងប្រាក់ឌីជីថល នាំឱ្យទីផ្សារមួយនេះប្រែប្រួលខ្លាំង។

លោក Musk ត្រូវបានគេចាត់ទុកដូចជា «ម្ចាស់សាសនានៅលើ Twitter» ដោយគណនីរបស់លោក មានអ្នកតាមដានជិត ៦៦ លាននាក់៕

December 11, 2021

កម្មករម្នាក់ ប៊ិះបោះចោលសន្លឹកឆ្នោតដែលត្រូវរង្វាន់ជិត ៤០០,០០០ ដុល្លារអាម៉េរិក

(សហរដ្ឋអាម៉េរិក)-បុរសម្នាក់រកឃើញសន្លឹកឆ្នោតដែលខ្លួនបានទិញ នៅពេលយកខោអាវទៅបោកគក់ ហើយប៊ិះបោះវាចោលក្នុងធុងសំរាម មុនពេលបានដឹងថា វាជាសន្លឹកឆ្នោតដែលត្រូវរង្វាន់ជាង ៣៨៧,00០ ដុល្លារ។

លោក Maricus «Bezo» Barnes រស់នៅក្នុងរដ្ឋ Virginia បានទិញឆ្នោត Cash 5 នៅឯកន្លែងលក់ឆ្នោតស្វ័យប្រវត្ត ក្នុងហាងមួយនៅតំបន់ Hampton កាលពីថ្ងៃទី ២៣ តុលា ហើយបានភ្លេចវា រហូតដល់ពេលយកសម្លៀកបំពាក់ទៅបោកគក់ ទើបបានឃើញ។

«ខ្ញុំបានប្រុងបោះវាចោល» Barnes រៀបរាប់នៅពេលទៅទទួលប្រាក់រង្វាន់ពីក្រុមហ៊ុនឆ្នោត Virginia កាលពីថ្ងៃទី ១០ វិច្ឆិកា។ «ប៉ុន្តែ ខ្ញុំបានសម្រេចចិត្តពិនិត្យឡើងវិញ ព្រោះគិតថា អាចត្រូវបានប៉ុន្មានដុល្លារដែរ»។

សន្លឹកឆ្នោតដែលមានលេខ ៦-១៨-២០-២២-២៤ របស់លោក Barnes បានត្រូវរង្វាន់តម្លៃ ៣៨៧,៤៥០ ដុល្លារអាម៉េរិក។

លោក Barnes ធ្លាប់បានបម្រើការក្នុងជួរកងទ័ពរបស់ សហរដ្ឋអាម៉េរិក ហើយបច្ចុប្បន្នគឺជាកម្មករនៅក្នុងរោងចក្រផលិតកប៉ាល់។ បុរសនេះមិនទាន់មានគម្រោងប្រើប្រាស់ទ្រព្យថ្មីដ៏មហាសំណាងរបស់ខ្លួននេះនៅឡើយ៕

December 11, 2021

ភាគហ៊ុនឡើងថ្លៃ ប្រធានក្រុមហ៊ុន Oracle រកប្រាក់បានជាង ១៥ ពាន់លានដុល្លារបន្ថែមទៀត ដោយប្រើពេលតែ ១ ថ្ងៃ

ក្រោយការប្រកាសរបាយការណ៍ហិរញ្ញវត្ថុដែលបង្ហាញថា «ល្អខ្លាំង» ភាគហ៊ុនរបស់ក្រុមហ៊ុន Oracle ក៏បានឡើងថ្លៃ ជួយឱ្យទ្រព្យសម្បត្តិរបស់មហាសេដ្ឋី Larry Ellison កើនឡើងដល់ជិត ១៤០ ពាន់លានដុល្លារអាម៉េរិក។

យោងតាមបញ្ជីមហាសេដ្ឋីរបស់ទស្សនវដ្ដី Forbes ប្រធានក្រុមហ៊ុន Oracle លោក Larry Ellison បច្ចុប្បន្នមានទ្រព្យសរុប ១៣៥.៧ ពាន់លានដុល្លារ និងជាអ្នកមានជាងគេលំដាប់ទី ៥ ក្នុងពិភពលោក។ ទ្រព្យរបស់លោកបានកើន ១៥.១ ពាន់លានដុល្លារ បន្ទាប់ពីការជួញដូរកាលពីថ្ងៃទី ១០ ធ្នូ ដោយសារភាគហ៊ុន Oracle កើនជិត ១៥% ក្រោយប្រកាសរបាយការណ៍ហិរញ្ញវត្ថុ ដែលល្អលើសពីការរំពឹងទុក។

លោក Ellison បច្ចុប្បន្នគឺជាភាគហ៊ុនិកធំជាងគេបង្អស់របស់ក្រុមហ៊ុននេះ ដោយកាន់កាប់ ១.១៤ ពាន់លានហ៊ុន។ យោងតាមស្ថិតិរបស់ Forbes លោក Ellison បាន «លោតរំលង» Larry Page និង Sergey Brin ដែលជាសហស្ថាបនិករបស់ Google ហើយក្លាយជាអ្នកមានជាងគេលំដាប់ទី ៥ ក្នុងពិភពលោក។ បច្ចុប្បន្ន ទ្រព្យរបស់ Ellison តិចជាងទ្រព្យរបស់ Bill Gates ត្រឹមតែជិត ៤ ពាន់លានដុល្លារប៉ុណ្ណោះ។

លោក Ellison ឆ្នាំនេះមានអាយុ ៧៧ ឆ្នាំ។ លោកគឺជាសហស្ថាបនិករបស់ក្រុមហ៊ុនបច្ចេកវិទ្យា Oracle កាលពីឆ្នាំ ១៩៧។ ទ្រព្យភាគច្រើនរបស់លោក បានមកពីភាគហ៊ុននៅក្នុងក្រុមហ៊ុននេះ។ ភាគហ៊ុន Oracle បានកើនជិត ៦០% នៅក្នុងឆ្នាំ ២០២១ ជួយឱ្យ Ellison រកបាន ៤៤ ពាន់លានដុល្លារបន្ថែមទៀតនៅក្នុងឆ្នាំនេះ។

លោក Ellison ក៏មានភាគហ៊ុននៅក្នុងក្រុមហ៊ុនផលិតរថយន្តអគ្គិសនី Tesla របស់មហាសេដ្ឋី Elon Musk ផងដែរ។ ចុងឆ្នាំ ២០១៨ លោក Ellison បានបង្ហើបឱ្យដឹង បានទិញភាគហ៊ុន Tesla ចំនួន ១ ពាន់លានដុល្លារ។ ៣ ឆ្នាំមកនេះ មូលធនទីផ្សាររបស់ Tesla បានកើនសរុបជិត ១,៣០០%។ បច្ចុប្បន្ន តម្លៃភាគហ៊ុនរបស់ Ellison នៅក្នុងក្រុមហ៊ុន Tesla គឺ ១៦ ពាន់លានដុល្លារអាម៉េរិក៕

December 11, 2021

ផ្កាយដុះកន្ទុយ កំពុងសំដៅមក «ធ្វើទស្សនកិច្ច» ផែនដី នៅចុងឆ្នាំនេះ មុនពេលបាត់ខ្លួន

ផ្កាយដុះកន្ទុយ Leonard ដែលមានគន្លងគោចរ ៨០,០០០ ឆ្នាំ កំពុងហោះមកកាន់តែជិតផែនដី ហើយនឹងក្លាយជាផ្កាយដុះកន្ទុយដែលមានពន្លឺចែងចាំងជាងគេបំផុតក្នុងឆ្នាំ ២០២១ ដែលនឹងនាំមកនូវឱកាសនៃការទស្សនាដ៏កម្រដល់អ្នកស្រលាញ់វិស័យតារាសាស្ត្រ។

ក្រុមអ្នកថតរូបក្នុងវិស័យតារាសាស្ត្រក្នុងពិភពលោក កំពុងតែប្រើប្រាស់ឱកាសដ៏កម្រដើម្បីផ្ដិតយករូបភាពនៃផ្កាយដុះកន្ទុយ Leonard នៅពេលវាគោចរមកក្បែរផែនដី នេះបើតាម Newsweek ដែលបានចុះផ្សាយកាលពីថ្ងៃទី ៩ ធ្នូ។ Leonard ឬ C/2021 A1 គឺជាផ្កាយដុះកន្ទុយដែលមានពន្លឺខ្លាំងបំផុតក្នុងឆ្នាំនេះ។ វាត្រូវបាន Gregory J. Leonard តារាវិទូនៃសាកលវិទ្យាល័យ Arizona រកឃើញកាលពីខែមករា ២០២។

ប៉ុន្មានខែក្រោយមក ក្រុមអ្នកវិទ្យាសាស្ត្របានរកឃើញថា គន្លងគោចររបស់ Leopard នឹងនាំវាមកជិតផែនដី ហើយគ្រប់គ្នាទំនងជាអាចមើលឃើញវាដោយភ្នែកទទេនៅក្នុងខែធ្នូនេះ។ ប៉ុន្តែ ការប្រើប្រាស់កែវយឹត នឹងអាចជួយឱ្យការសង្កេតមើលផ្កាយដុះកន្ទុយនេះ មានភាពងាយស្រួលជាងភ្នែកទទេ។

នៅ អាម៉េរិកខាងជើង និងតំបន់ដែលមានរយៈទទឹងដូចគ្នានេះ អ្នកចូលចិត្តវិស័យតារាសាស្ត្រអាចមើលឃើញ Leonard ដោយសង្កេតទៅទិសខាងកើតប្រហែល ៤៥ នាទី មុនថ្ងៃរះ ដោយវាស្ថិតនៅខាងក្រោមកញ្ចុំផ្កាយ Big Dipper និង Arcturus។ ព្រឹត្តិការណ៍នេះនឹងកើតឡើងនៅថ្ងៃទី១២ ធ្នូ ២០២។ បន្ទាប់មក ពេលវេលាដែលល្អបំផុតសម្រាប់ការសង្កេតផ្កាយដុះកន្ទុយនេះគឺនៅវេលាយប់ បន្ទាប់ពីព្រះអាទិត្យបានលិចបាត់ ហើយគ្រប់គ្នានឹងអាចមើលឃើញវាស្ថិតនៅទិសនិរតី នៅពេលវាផ្លាស់ទីឆ្លងកាត់ភពសុក្រ (Venus), ភពពុធ (Mercury) ឆ្ពោះទៅកាន់ភពសៅរ៍ (Saturn) និងភាពព្រហស្បតិ៍ (Jupiter)។

Leonard មានគន្លងគោចរព័ទ្ធជុំវិញព្រះអាទិត្យ ដោយ ១ ឆ្នាំរបស់វា ស្មើនឹង ៨០,000 ឆ្នាំលើផែនដី។ មនុស្សនៅលើផែនដី នឹងមិនអាចមើលឃើញវាក្នុងរយៈពេលយ៉ាងយូរទៀតក្រោយព្រឹត្តិការណ៍ថ្ងៃទី ១២ ធ្នូ ដោយសារតែគន្លងគោចរដ៏ធំ និងមានរាងដូចពងក្រពើរបស់វា។

ផ្កាយដុះកន្ទុយគឺជាវត្ថុអវកាសរួមមាន ទឹកកក ឧស្ម័ន និងថ្ម ដែលគោចរជុំវិញព្រះអាទិត្យ។ នៅពេលទៅក្បែរព្រះអាទិត្យ ពួកវានឹងឡើងកំដៅ ហើយបញ្ចេញចំហាយ និងវត្ថុធាតុទៅខាងក្រោយ ដែលបង្កើតបានជាកន្ទុយដែលអាចវែងរហូតដល់រាប់លានគីឡូម៉ែត្រ ក៏មាន។ ចុងក្រោយ ពួកវាអាចនឹងបាត់ខ្លួនជារៀងរហូត នៅពេលចំហាយ និងវត្ថុធាតុនៅលើវា បានរលាយអស់ចូលទៅក្នុងទីអវកាស។

បច្ចុប្បន្ន មានផ្កាយដុះកន្ទុយចំនួន ៣,៧៤៣ ដួង ដែលត្រូវបានរកឃើញ ប៉ុន្តែ តួលេខសរុប អាចឡើងដល់រាប់ពាន់លានដួង ដែលកំពុងគោចរជុំវិញព្រះអាទិត្យ នេះបើតាមទីភ្នាក់ងារអវកាសអាម៉េរិក (NASA)៕

December 11, 2021

ហ្វ៊ីលីពីន ចាប់ខ្លួនជនជាតិវៀតណាម ៣៧ នាក់ ពាក់ព័ន្ធនឹងបទល្មើស លួចបន្លំឯកសារ

សមត្ថកិច្ចនៃ ប្រទេសហ្វ៊ីលីពីន បានចាប់ខ្លួនជនជាតិវៀតណាម ចំនួន ៣៧ នាក់ ទាក់ទងនឹងករណីបន្លំឯកសារធនាគារ បន្ទាប់ពីការស្រាវជ្រាវនៅ ម៉ាកាទី (Makati) ត្រូវបានធ្វើឡើង។

ជនជាតិវៀតណាម ទាំង ៣៧ នាក់ ដែលរួមមាន ស្ត្រី ២៣ នាក់ និង បុរសចំនួន ១៤ នាក់នេះ ត្រូវបានចាប់ខ្លួននៅក្នុង ទីក្រុងម៉ាកាទី នៃ រដ្ឋធានីម៉ានីល កាលពីថ្ងៃទី ៧ ធ្នូ។ នេះបើតាមការឱ្យដឹងរបស់ Randy Glenn Silvio ប្រធានក្រុមស៊ើបអង្កេតផ្នែកព្រហ្មទណ្ឌរបស់នគរបាលរដ្ឋធានី (CIDG) នាថ្ងៃនេះ។

ក្រុមប៉ូលិសបានឆ្មក់ចូលផ្ទះរបស់ក្រុមជនជាតិវៀតណាម បន្ទាប់ពីបានទទួលព័ត៌មានថា មានជនជាតិហ្វ៊ីលីពីន ចំនួន ៧ នាក់ ត្រូវបានបង្ខាំងខ្លួនដោយខុសច្បាប់នៅទីនេះ។

ជនជាតិហ្វ៊ីលីពីន ទាំង ៧ នាក់ ដែលសុទ្ធតែជាស្ត្រី ត្រូវបានគេជឿថា បានធ្វើការជាអ្នកបំប្លែងទិន្នន័យឱ្យក្រុមជនជាតិវៀតណាម។ ស្ត្រីម្នាក់បាននិយាយថា ខ្លួនមិនត្រូវបានអនុញ្ញាតឱ្យចេញពីផ្ទះ ជាទីដែលក្រុមជនល្មើសប្រើប្រាស់ជាការិយាល័យ។

សមត្ថកិច្ច ក្រោយមក បានរឹបអូសកុំព្យូទ័រចំនួន ១៤ គ្រឿង, ប័ណ្ណឥណទានចំនួន ៥០ បន្ទះ, ប័ណ្ណ ATM ចំនួន ៤៩ បន្ទះ, ទូរស័ព្ទចល័ត ៤២ គ្រឿង, ម៉ាស៊ីនចម្លងប័ណ្ណ រួមនឹងអត្តសញ្ញាណប័ណ្ណចំនួន ៨ បន្ទះ ពីក្រុមនេះ។ CIDG ឱ្យដឹងថា ជនសង្ស័យទាំងនេះ ត្រូវបានចោទប្រកាន់ពីបទបន្លំប័ណ្ណឥណទាន និងអំពើល្មើសច្បាប់ជាច្រើនទៀត៕

December 10, 2021

សេដ្ឋកិច្ចពិភពលោក ក្នុងឆ្នាំ ២០២១ ស្ដែងចេញតាមរយៈរូបថត

បើទោះជាឆ្នាំ ២០២១ ពិភពលោកបានមើលឃើញអំពីល្បឿនងើបឡើងវិញយ៉ាងលឿនរបស់សេដ្ឋកិច្ច ប៉ុន្តែ នៅតែមានឧបសគ្គជាច្រើនទៀតដែលត្រូវដោះស្រាយ។

ឆ្នាំ ២០២១ ត្រូវបានចាប់ផ្ដើមដោយការជឿជាក់ដែលថា ដោយការប្រឹងប្រែងរបស់អ្នកវិទ្យាសាស្ត្រ និងក្រុមហ៊ុនផលិតវ៉ាក់សាំងនានា វ៉ា់សាំងបង្ការជំងឺកូវីដ-១៩ នឹងត្រូវបានផ្ដត់ផ្គង់នៅទូទាំងសកលលោក ហើយជំងឺរាតត្បាតសកលនេះនឹងក្លាយជាអតីតកាល។

ប៉ុន្តែ ជាក់ស្ដែង គ្រប់យ៉ាងមិនបានកើតឡើងដូចការរំពឹងទុក ព្រោះថា វីរុសកូវីដ-១៩ ប្រភេទបំប្លែងខ្លួនថ្មី ជាច្រើនបានបង្ហាញវត្តមាន ក្នុងនោះមាន ដេលតា និង អូមីក្រុង ជាដើម។ បញ្ហានេះបាន និងកំពុងធ្វើឱ្យសេដ្ឋកិច្ចដាំក្បាលចុះនៅស្ទើរគ្រប់វិស័យ គ្រប់កន្លែងក្នុងពិភពលោក។ បណ្ដាញផ្គត់ផ្គង់ទំនិញត្រូវកាត់ផ្ដាច់ អតិផរណាកើតឡើង តម្លៃប្រេងឥន្ធនៈធ្លាក់ចុះ និងកើនឡើងយ៉ាងគំហុក ខណៈការិយាល័យនានាគ្មានបុគ្គលិក ព្រោះត្រូវក្រុមហ៊ុនស្នើឱ្យឈប់ ផ្អាក ឬត្រូវធ្វើការពីផ្ទះ។

យោងតាមសារព័ត៌មាន Bloomberg ខាងក្រោមនេះគឺជាបណ្ដារូបថតដែលបង្ហាញអំពីជ្រុងជាច្រើននៃសេដ្ឋកិច្ចរបស់ពិភពលោក នៅក្នុងឆ្នាំ ២០២១ នេះ៖

ទីក្រុងហ្វ្រែងហ្វ៊ើត (Frankfurt) ថ្ងៃទី ១១ កុម្ភៈ៖ ការិយាល័យនានាក្នុងអគារមួយ គ្មានបុគ្គលិកធ្វើការសូម្បីតែម្នាក់។

ទីក្រុងស៊ីដនី ថ្ងៃទី ២០ កុម្ភៈ៖ បុគ្គលិកផ្នែកលក់ដេញថ្លៃមួយរូបកំពុងតែបញ្ចុះបញ្ចូលគ្រប់គ្នានៅក្នុងព្រឹត្តិការណ៍លក់ដេញថ្លៃផ្ទះមួយខ្នងនៅ Paddington។

នៅតំបន់ ណាដវ៉ូយជី (Nadvoitsy) របស់ រុស្ស៊ី ថ្ងៃទី ១៨ មីនា៖ វិស្វករម្នាក់កំពុងធ្វើការនៅក្នុងបន្ទប់ «ជីក» រកប្រាក់ឌីជីថល របស់ CryptoUniverse ដែលកាលណោះ Bitcoin ឡើងថ្លៃកប់ពពក។

អេហ្ស៊ីប ថ្ងៃទី ២៣ មីនា៖ កប៉ាល់ Ever Given ជាប់គាំងលើព្រែកជីក Suez ធ្វើឱ្យស្ទះទំនិញ និងខាតបង់ប្រាក់រាប់ពាន់លានដុល្លារ។

ទីក្រុងប៉េកាំង ថ្ងៃទី ២១ មេសា៖ ក្រុមបុគ្គលិកប្រគល់អាហាររបស់ Meituan។ បណ្ដាក្រុមហ៊ុនដឹកអាហារ រកស៊ីជោគជ័យក្នុងសម័យកូវីដ-១។

ទីក្រុងម៉ៃអាមី (Miami) របស់ សហរដ្ឋអាម៉េរិក ថ្ងៃទី ៤ មិថុនា៖ មនុស្សជាង ១២,០០០ នាក់ ចូលរួមព្រឹត្តិការណ៍មួយដែលត្រូវគេចាត់ទុកថាជាវេទិកាធំបំផុតស្ដីពីប្រាក់ឌីជីថល Bitcoin។

ទីក្រុងឡុងដ៍ ថ្ងៃទី ៦ កញ្ញា៖ ក្រោយការរាតត្បាត ១៨ ខែ របស់ កូវីដ-១៩ បុគ្គលិកផ្នែកគក់ជេរក៏បានត្រលប់មកផ្សារជួញដូរហ៊ុនលោហធាតុ London Metal Exchange។

រដ្ឋកាលីហ្វរញ៉ា ថ្ងៃទី ៩ តុលា៖ កប៉ាល់ដឹកទំនិញនានា កំពុងរង់ចាំវេនចូលចតនៅកំពង់ផែ Los Angeles និង Long Beach។

ទីក្រុងឡាក់ណាវ (Lucknow) របស់ ឥណ្ឌា ថ្ងៃទី ១៣ តុលា៖ ប្រជាជនចាប់ផ្ដើមចេញធ្វើការ រកស៊ី។

ទីក្រុងនីវយ៉ក ថ្ងៃទី ២១ តុលា៖ អគារ Summit One Vanderbilt តម្លៃ ៣.៣ ពាន់លានដុល្លារ ក្នុងថ្ងៃសម្ពោធបើកដំណើរការ៕

December 10, 2021

សិង្ហបុរី រកឃើញករណីឆ្លង អូមីក្រុង (Omicron) ដំបូង ក្នុងសហគមន៍

ករណីឆ្លងវីរុសកូវីដ-១៩ ប្រភេទ អូមីក្រុង ក្នុងសហគមន៍ជាលើកដំបូង នៅ ប្រទេសសិង្ហបុរី គឺជាការព្រមានអំពីរលកនៃការឆ្លងរាលដាលបន្តទៀត។

ក្រសួងសុខាភិបាលសិង្ហបុរី ថ្ងៃនេះ បានឱ្យដឹងថា អ្នកវិជ្ជមាននឹង វ៉ារ្យ៉ង់អូមីក្រុង ករណីដំបូងក្នុងសហគមន៍ នេះគឺជាស្ត្រីដែលមានសញ្ជាតិសិង្ហបុរី អាយុ ២៤ ឆ្នាំ ធ្វើការនៅអាកាសយានដ្ឋាន។ «អ្នកវិជ្ជមាននឹង កូវីដ-១៩ ម្នាក់នេះ ប្រហែលជាបានប៉ះពាល់អ្នកដំណើរមកពីបណ្ដាប្រទេសដែលរងឥទ្ធិពលពី វ៉ារ្យ៉ង់អូមីក្រុង» នេះបើតាមក្រសួងសុខាភិបាលសិង្ហបុរី។

បុគ្គលិកអាកាសយានដ្ឋានរូបនេះ ត្រូវបានរកឃើញថា កំពុងផ្ទុកវីរុសកូវីដ-១៩ ប្រភេទ អូមីក្រុង នៅក្នុងការពិសោធសំណាកជាទៀងទាត់ចំពោះបុគ្គលិកជួរមុខ។ នាងបានទទួលការវាក់វ៉ាក់សាំងពេញលេញ និងពុំមានអាការរោគអ្វីឡើយ។

កន្លងមក ប្រទេសសិង្ហបុរី បានរកឃើញករណីវិជ្ជមាននឹង កូវីដ-១៩ ប្រភេទ អូមីក្រុង ជាច្រើននាក់ ក៏ប៉ុន្តែ ទាំងនោះសុទ្ធតែជាករណីនាំចូល។

វ៉ារ្យ៉ង់អូមីក្រុង ត្រូវបានរកឃើញដំបូងនៅ ប្រទេសបុតស្វាណា (Botswana) កាលពីថ្ងៃទី ១១ វិច្ឆិកា ២០២១ និងត្រូវបាន ប្រទេសអាហ្វ្រិកខាងត្បូង រាយការណ៍ជូនអង្គការសុខភាពពិភពលោក នៅថ្ងៃទី ២៤ វិច្ឆិកា ហើយគិតមកដល់បច្ចុប្បន្ន វ៉ារ្យ៉ង់ នេះ បានឆ្លងរាលដាលដល់ប្រទេសចំនួន ៥៧ រួចហើយ។

ក្រុមអ្នកវិទ្យាសាស្ត្ររបស់ពិភពលោក កំពុងប្រឹងប្រែង «រត់ប្រណាំងនឹងពេលវេលា» ដើម្បីវិភាគអំពីកម្រិតនៃគ្រោះថ្នាក់របស់ អូមីក្រុង៕

December 10, 2021

គម្រោងសាងសង់រោងចក្រផលិតវ៉ាក់សាំងនៅ កម្ពុជា នឹងត្រូវពិភាក្សាផ្លូវការចាប់ពីសប្តាហ៍ក្រោយ

រាជរដ្ឋាភិបាលកម្ពុជា បានចេញ ស.ជ.ណ ដល់ក្រុមហ៊ុនក្នុងស្រុករួចហើយ ហើយការចរចាជាមួយស្ថានទូតចិនប្រចាំកម្ពុជា និងក្រុមហ៊ុនចិន អាចនឹងចាប់ផ្តើមនៅសប្តាហ៍ក្រោយ នេះបើយោងតាមសម្ដីរបស់លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល។

ព័ត៌មាននេះត្រូវបានលើកឡើងនៅក្នុងឱកាសដែលរដ្ឋលេខាធិការក្រសួងសុខាភិបាល បានអញ្ជើញទៅទទួលវ៉ាក់សាំង អាស្ត្រាហ្សេនេកា (AstraZeneca) ចំនួន ២៩០,៤០០ ដូស ដែលជាជំនួយរបស់រាជរដ្ឋាភិបាល នៃប្រទេសហូឡង់ តាមរយៈយន្តការកូវ៉ាក់ (Covax Facility) នាព្រឹកថ្ងៃទី ១០ ខែធ្នូ នៅឯព្រលានយន្តហោះអន្តរជាតិភ្នំពេញ។

វ៉ាក់សាំង អាស្ត្រាហ្សេនេកា (AstraZeneca) ចំនួន ២៩០,៤០០ ដូស ដែលជាជំនួយរបស់រាជរដ្ឋាភិបាល នៃប្រទេសហូឡង់ បានមកដល់ កម្ពុជា កាលពីព្រឹកថ្ងៃទី ១០ ខែធ្នូ

ដំណឹងដ៏ល្អនេះ ក៏ត្រូវបានបញ្ជាក់នៅក្នុងគ្រាដែលអត្រាចាក់វ៉ាក់សាំងកូវីដ-១៩ នៅ កម្ពុជា មានការកើនឡើងខ្ពស់ ក្នុងនោះ ប្រជាជនអាយុពី ១៨ ឆ្នាំឡើង ចាក់បាន ១០១.១៥% ធៀបជាមួយចំនួនប្រជាជនគោលដៅ ១០លាននាក់, កុមារយុវវ័យអាយុពី ១២ ឆ្នាំ ទៅក្រោម ១៨ ឆ្នាំ ចាក់បាន ៩៨,៨៨% ធៀបនឹង ចំនួនប្រជាជនគោលដៅ ១,៨២៧,៣៤៨ នាក់, កុមារអាយុពី ៦ ឆ្នាំ ដល់ក្រោម ១២ ឆ្នាំ ចាក់បាន ១០៤,៧៧% ធៀប នឹងប្រជាជនគោលដៅ ១,៨៩៧, ៣៨២ នាក់ និងកុមារអាយុ ៥ ឆ្នាំ ចាក់បាន ៩៣,៤៨% ធៀប នឹងប្រជាជនគោលដៅ ៣០៤,៣១៧ នាក់ ខណៈលទ្ធផលនៃការចាក់វ៉ាក់សាំងសរុបធៀបនឹងចំនួនប្រជាជនសរុប ១៦ លាននាក់ បានកើនដល់ ៨៨,៧២%៕

December 10, 2021

កុមារអាយុ ៣-៤ ឆ្នាំ នៅ កម្ពុជា អាចនឹងទទួលបានការចាក់វ៉ាក់សាំងបង្ការជំងឺកូវីដ-១៩ នាពេលឆាប់ៗខាងមុខ

រដ្ឋលេខាធិការក្រសួងសុខាភិបាល របស់ កម្ពុជា បានថ្លែងថា កុមារតូចៗដែលមានអាយុ ៣ ឆ្នាំ និង ៤ ឆ្នាំ អាចនឹងទទួលបានការចាក់វ៉ាក់សាំងបង្ការជំងឺកូវីដ-១៩ ក្នុងពេលឆាប់ៗខាងមុខ ដោយយោងទៅតាមការណែនាំរបស់ប្រមុខរដ្ឋាភិបាលកម្ពុជា និងក្រុមហ៊ុនផលិតវ៉ាក់សាំងរបស់ ប្រទេសចិន។

លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល បានថ្លែងដូចខាងលើ នៅឯព្រលានយន្តហោះអន្តរជាតិភ្នំពេញ ក្នុងឱកាសអញ្ជើញទទួលវ៉ាក់សាំងប្រភេទ អាស្ត្រាហ្សេនេកា (AstraZeneca) ចំនួន ២៩០,៤០០ ដូស ដែលជាជំនួយរបស់រាជរដ្ឋាភិបាល នៃ ប្រទេសហូឡង់ តាមរយៈយន្តការលកូវ៉ាក់ (Covax Facility) កាលពីព្រឹកថ្ងៃទី ១០ ខែធ្នូ ឆ្នាំ២០២។

“ក្រុមហ៊ុនស៊ីណូវ៉ាក់ បានបញ្ជាក់រួចហើយពីប្រសិទ្ធភាព និងសុវត្ថិភាព ហើយ ប្រទេសចិន នៅពេលនេះបាននិងកំពុងចាក់វ៉ាក់សាំងស៊ីណូវ៉ាក់ ជូនដល់កុមារដែលមានអាយុ ៣ ឆ្នាំឡើងរួចហើយដែរ» លោកជំទាវ យក់ សម្បត្តិ បញ្ជាក់ដូច្នេះ។

សម្តេចតេជោ ហ៊ុន សែន ក៏បានណែនាំដល់ក្រសួងសុខាភិបាល ក៏ដូចជាគ.វ.ក១៩ ពិនិត្យ និងសិក្សាពីលទ្ធភាពក្នុងការចាក់វ៉ាក់សាំងបង្ការជំងឺកូវីដ-១៩ ជូនដល់កុមារតូចៗ នៅ កម្ពុជា ផងដែរ។

គិតមកដល់បច្ចុប្បន្ន កម្ពុជា បានទទួលវ៉ាក់សាំងបង្ការជំងឺកូវីដ-១៩ សរុបជាង ៤០,៥ លានដូសហើយ ក្នុងនោះវ៉ាក់សាំងនៅសល់ក្នុងឃ្លាំង ប្រមាណ ៥ លានដូស។

December 10, 2021

Author: សឿន សំណាង