សឿន សំណាង - La Reine Media

លបបើកត្របកភ្នែករបស់អតីតសង្សារ ដើម្បីលួចផ្ទេរប្រាក់រាប់ម៉ឺនដុល្លារ យកទៅដោះបំណុល

(ប្រទេសចិន)-បុរសម្នាក់នៅក្នុង ខេត្តក្វាងស៊ី (Quangxi) ត្រូវបានកាត់ទោសដាក់ពន្ធនាគារពីបទលួចលុយពីទូរស័ព្ទរបស់អតីតសង្សារ ដោយប្រើប្រាស់មុខងារស្កេនផ្ទៃមុខ។

បុរសត្រកូល ហ្វាង (Huang) អាយុ ២៨ ឆ្នាំ នៅ ខេត្តក្វាងស៊ី ប្រទេសចិន កាលពីថ្ងៃទី ១១ ធ្នូ ២០២១ ត្រូវបានកាត់ទោសដាក់ពន្ធនាគារ ៣.៦ ឆ្នាំ និងពិន័យជាប្រាក់ ២០,០០០ យុន (៣,១៤០ ដុល្លារ)។ កាលពីខែធ្នូ ឆ្នាំ ២០២០ នៅពេលជំពាក់បំណុលគេវ័ណ្ឌក ឈ្មោះ ហ្វាង ក៏បានទូរស័ព្ទទៅអតីតមិត្តស្រីរបស់ខ្លួនដែលមានត្រកូល ដុង (Dong)។

ហ្វាង និយាយថា ចង់ជួប ដុង ដើម្បីជជែកអំពីវិធីសងបំណុល ៦០,០០០ យុន (៩,៤០០ ដុល្លារ) ដែលបុរសនេះបានខ្ចីកាលពីពួកគេនៅស្រលាញ់គ្នា។ ល្ងាចនោះ ហ្វាង បានទៅថែទាំ ដុង បន្ទាប់ពីបានដឹងថា នាងកំពុងឈឺ ព្រមទាំងបានដាំស្ល និងឱ្យនាងលេបថ្នាំ។

ក្រោយពីបានលេបថ្នាំ ដុង ក៏គេងលក់យ៉ាងស្កប់ស្កល់។ ពេលនោះ ហ្វាង ក៏បានដោះសោទូរស័ព្ទដោយស្កេនក្រយៅដៃរបស់នាង រួចក៏បើកត្របកភ្នែករបស់នារីរូបនេះដើម្បីដំណើរការបច្ចេកវិទ្យាស្កេតផ្ទៃមុខ ហើយក៏ផ្ទេរប្រាក់ ១៥០,០០០ យុន (២៣,០០០ ដុល្លារ) ពីកាបូបឌីជីថល Alibaba របស់នាង ចូលទៅគណនីធនាគាររបស់ខ្លួន។

មុនពេលគេចខ្លួន ជននេះថែមទាំងបានលួចយកទូរស័ព្ទ និងអាវក្រៅរបស់នារីរងគ្រោះ ដើម្បីលក់យកប្រាក់សងបំណុលល្បែង។ ថ្ងៃបន្ទាប់ ពេលដឹងខ្លួន ដុង បានឃើញទូរស័ព្ទផ្សេងមួយគ្រឿងដែលបង្ហាញសារអំពីការផ្ទេរប្រាក់។ នាងបានរាយការណ៍ប្រាប់សមត្ថកិច្ច ក្រោយពីហៅទូរស័ព្ទទៅកាន់ ហ្វាង ប៉ុន្តែ ជននេះមិនលើក។ ជនដៃដល់ឈ្មោះ ហ្វាង ត្រូវបានចាប់ខ្លួនកាលពីខែមេសា ឆ្នាំ ២០២១៕

December 18, 2021

នាវាចម្បាំងមួយគ្រឿងរបស់ ប្រទេសរុស្ស៊ី ត្រូវអគ្គិភ័យលេបត្របាក់អស់គ្មានសល់

នាវាចម្បាំងមួយគ្រឿងរបស់ ប្រទេសរុស្ស៊ី ដែលកំពុងត្រូវបានសាងសង់នៅឯរោងចក្រមួយកន្លែងដែលស្ថិតក្នុងតំបន់ St. Petersburg បានឆាបឆេះយ៉ាងសន្ធោសន្ធៅ បណ្ដាលឱ្យមនុស្សយ៉ាងតិច ៣ នាក់ រងរបួស។

អគ្គិភ័យដែលបានកើតឡើងកាលពីថ្ងៃទី ១៧ ធ្នូ ២០២១ នេះ បានលេបត្របាក់ទាំងស្រុង នាវាចម្បាំង Provorny ដែលកំពុងត្រូវបានសាងសង់នៅក្នុងរោងចក្រផលិតនាវាភាគខាងជើង នៅក្នុងទីក្រុង St. Petersburg។ អ្នកនាំពាក្យអង្គភាពគ្រប់គ្រងស្ថានការណ៍អាសន្ន របស់ Petersburg បានឱ្យដឹងថា អណ្ដាតភ្លើងបានឆាបឆេះនៅវេលាម៉ោងប្រហែល ១៩ (ម៉ោង ២៣ នៅ ភ្នំពេញ)។

បុគ្គលិកពន្លត់អគ្គិភ័យជិត ១៧០ នាក់ រួមនឹងឧបករណ៍ជាង ៤០ ឈុត ត្រូវបានបញ្ជូនទៅកាន់កន្លែងកើតហេតុ។ សមត្ថកិច្ចក្នុងតំបន់ ឱ្យដឹងថា ករណីអគ្គិភ័យនេះ បានបណ្ដាលឱ្យមនុស្សយ៉ាងតិច ៣ នាក់ រងរបួស ក្នុងនោះមាន ២ នាក់ ត្រូវចូលពេទ្យ។

នាវាចម្បាំង Provorny ស្ថិតក្នុងថ្នាក់ «គម្រោង ២០៣៨០» មានទម្ងន់លើផ្ទៃទឹក (displacement) 2.200 តោន, បណ្ដោយ ១០៤.៥ ម៉ែត្រ, ល្បឿនអតិបរមា ៥០ គីឡូម៉ែត្រ/ម៉ោង។ នាវានេះបំពាក់កាំភ្លើងធំប្រភេទកាណុង ១០០ មម, ប្រព័ន្ធបាញ់រ៉ុក្កែត ៤ គ្រាប់ Kh-35 ប្រឆាំងនាវាចម្បាំង ចំនួន ២, បំពង់ទម្របាញ់រ៉ុក្កែតប្រឆាំងយន្តហោះ Redut ចំនួន ១២ និងប្រព័ន្ធបាញ់គ្រាប់បែកក្រោមទឹក (torpedo) ប្រភេទ ៣៣០ មម ៤ បំពង់ ចំនួន ។

ប្រភពព័ត៌មានឱ្យដឹងថា តាមគម្រោង កងទ័ពជើងទឹករបស់ រុស្ស៊ី នឹងទទួលនាវាចម្បាំង Provorny នៅចុងឆ្នាំ ២០២២៕

December 18, 2021

កម្ពុជា រកឃើញករណីឆ្លងកូវីដ-១៩ ប្រភេទ អូមីក្រុង ម្នាក់ទៀត កាលពីម្សិលមិញ

ក្រសួងសុខាភិបាលកម្ពុជា កាលពីយប់ថ្ងៃទី ១៧ ខែធ្នូ ឆ្នាំ ២០២១ បានប្រកាសថា បានរកឃើញករណីវិជ្ជមានវីរុសកូវីដ-១៩ បំប្លែងថ្មី អូមីក្រុង (Omicron) ចំនួន ១ នាក់ នៅថ្ងៃទី ១៧ ខែធ្នូ ឆ្នាំ ២០២១។

ករណីវិជ្ជមានខាងលើនេះ ត្រូវបានក្រសួងបញ្ជាក់ថា គឺជាករណីវិជ្ជមាន អូមីក្រុង ទីពីរ ដែលបានរកឃើញនៅ កម្ពុជា។

ព័ត៌មានលម្អិត សូមអានសេចក្ដីជូនដំណឹងខាងក្រោម៖

December 18, 2021

ខុនដូ Penthouse ប្រណិតថ្មីរបស់លោក David Beckham មានអ្វីខ្លះ បានជាមានតម្លៃដល់ ២០ លានដុល្លារ?

គ្រួសាររបស់ David Beckham មាន penthouse មួយកន្លែងដែលមានតម្លៃ ២០ លានដុល្លារអាម៉េរិក ស្ថិតនៅក្នុងអគារ One Thousand Museum នៅ Miami ដែលទីតាំងនេះងាយស្រួលសម្រាប់ Beckham ក្នុងការធ្វើការជាមួយក្រុមបាល់ទាត់ Inter Miami។

គូស្វាមីភរិយា Victoria និង David Beckham គឺជាគូស្នេហ៍ដ៏លេចធ្លោមួយរបស់ Hollywood។ ស្វាមីគឺជាកំពូលតារាបាល់ទាត់ ចំណែកភរិយាគឺជាតារាចម្រៀង និងជាអ្នករចនាម៉ូដសម្លៀកបំពាក់ដ៏ល្បីឈ្មោះ។ សម្ព័ន្ធភាពរបស់ពួកគេ ជាច្រើនឆ្នាំកន្លងទៅនេះ នៅតែធ្វើឱ្យសាធារណជនមានការកោតសរសើរ។

បច្ចុប្បន្ន ទ្រព្យសម្បត្តិរបស់តារាដែលមានកូន ៤ នាក់នេះ កើនដល់ ៤៥០ លានដុល្លារអាម៉េរិក ដែលបានមកពីជំនួញ និងការធ្វើជាតំណាងរបស់យីហោល្បី។ ក្នុងចំណោមទ្រព្យរបស់ពួកគេ ក៏មាន penthouse លំដាប់ប្រណិតមួយកន្លែងផងដែរ។

ការសម្រេចចិត្តទិញខុនដូប្រណិតនេះ ត្រូវបានធ្វើឡើងនៅពេល David Beckham ទិញភាគហ៊ុនរបស់ក្លឹបបាល់ទាត់ Inter Miami CF។ យោងតាមគេហទំព័រអចលនទ្រព្យលំដាប់ប្រណិតខ្នាតអន្តរជាតិ Mansion Global កិច្ចព្រមព្រៀងទិញដូរនេះ ធ្វើឡើងដោយក្រុមហ៊ុន Beckham Brand Limited របស់ David Beckham។

ខុនដូ ដែលមានលក្ខណៈជា penthouse ថ្មី ដែលពួកគេទើបបានទិញនេះ មានទំហំជាង ១,០០០ ម៉ែត្រក្រឡា ស្ថិតនៅជាន់ទី ៥០ របស់អគារ One Thousand Museum នៅកណ្ដាលទីក្រុង Miami ក្នុងរដ្ឋ Florida សហរដ្ឋអាម៉េរិក។ អគារ One Thousand Museum ដែលមាន ៦២ ជាន់នេះ ក៏មានលក្ខណៈជាតំណាងរបស់ Miami ផងដែរ។

អគារ One Thousand Museum មានបន្ទប់ខុនដូចំនួន ៨៤ ដែលមានតម្លៃចាប់ពី ៥.៩ លានដុល្លារ ដល់ ២១ លានដុល្លារ។

ផ្ទះ penthouse ដែលមានតម្លៃ ២០ លានដុល្លារ របស់ Beckham រួមមាន បន្ទប់គេងចំនួន ៥, បន្ទប់ទឹកចំនួន ៦ ដែលបំពាក់ដោយបច្ចេកវិទ្យាទំនើប និងអាចមើលឃើញទេសភាពសមុទ្រ និងទីក្រុង យ៉ាងពេញភ្នែក។ ចំណែកផ្ទះបាយវិញគឺជាផ្នែកប្រណិតជាងគេរបស់ penthouse នេះ។

អ្នកដែលស្នាក់នៅក្នុងអគារនេះ នឹងបានទទួលបទពិសោធន៍ផាសុកភាពជាច្រើន ក្នុងនោះមានដូចជា អាងហែលទឹកនៅជាន់ទី ៦១, រោងកុនប្រកបដោយភាពឯកជន, ប្រព័ន្ធបន្ទប់ហាត់ប្រាណ, ស្ប៉ា, មជ្ឈមណ្ឌលកាយសម្ព័ន្ធលំដាប់ពិភពលោក ជាពិសេសគឺទីលានចតឧទ្ធម្ភាគចក្រសម្រាប់អ្នក «ខ្ជិល» ឡើងតាមជណ្ដើរប្រអប់។

ក្រៅពី penthouse ថ្មីនេះ គ្រួសាររបស់ Beckham ក៏នៅមានអចលនទ្រព្យជាច្រើនផ្សេងទៀត ដូចជា ភូមិគ្រឹះប្រណិតនៅឧទ្យាន Holland ក្នុងទីក្រុងឡុងដ៍, ផ្ទះលម្ហែកាយក្នុងតំបន់ Cotswolds នៅ ប្រទេសអង់គ្លេស, ភូមិគ្រឹះ និងផ្ទះច្រើនខ្នងនៅ Dubai អេស្ប៉ាញ និងនៅ LA ក៏ដូចជាភូមិគ្រឹះ Beckingham Palace នៅ Hertfordshire ក្នុងប្រទេសអង់គ្លេស ។ល។

December 17, 2021

ប្រទេសឡាវ កំណត់ពេលវេលាបើកច្រកព្រំដែនទទួលទេសចរ ទៅតាម ៣ ដំណាក់កាល

រដ្ឋាភិបាលឡាវ បានកំណត់ពេលវេលានៃការបើកច្រកព្រំដែនជា ៣ ដំណាក់កាល ចាប់ពីថ្ងៃទី ១ មករា ២០២២ ក្នុងបំណងទាក់ទាញភ្ញៀវទេសចរណ៍អន្តរជាតិមកទស្សនា កម្សាន្ត «តំបន់ទេសចរណ៍បៃតង» របស់ប្រទេសនេះនៅឆ្នាំក្រោយ។

ការិយាល័យនាយករដ្ឋមន្ត្រីឡាវ បានឱ្យដឹងថា គម្រោងបើកច្រកព្រំដែននេះនឹងត្រូវបានអនុវត្តជា ៣ ដំណាក់កាល៖ ដំណាក់កាលទី ១ ចាប់ពីថ្ងៃទី ១ មករា ២០២២, ដំណាក់កាលទី ២ ចាប់ពីថ្ងៃទី ១ មេសា ២០២២ និងដំណាក់កាលទី ៣ ចាប់ពីថ្ងៃទី ១ មិថុនា ២០២២។

ប្រកាសខាងលើក៏បានបញ្ជាក់ថា ទេសចរក្នុងស្រុក និងមកពីបរទេស ដែលចង់ទៅកាន់ «តំបន់ទេសចរណ៍បៃតង» ត្រូវតែជាអ្នកដែលបានទទួលការចាក់វ៉ាក់សាំងបង្ការកូវីដ-១៩ ចំនួន ២ ដូស យ៉ាងតិច ១៤ ថ្ងៃ មុនពេលចេញដំណើរ។ ទេសចរបរទេស ត្រូវសុំទិដ្ឋាការតាមអនឡាញ ត្រូវមានលិខិតបញ្ជាក់អំពីការធ្វើតេស្ត PCR អវិជ្ជមាននឹងកូវីដ-១៩ យ៉ាងតិច ៧២ ម៉ោង មុនពេលឡើងយន្តហោះ និងចូលមកទឹកដីឡាវ ហើយក៏ត្រូវធ្វើតេស្តម្ដងទៀតនៅពេលចូលដល់ទឹកដីនេះ៕

December 17, 2021

កូវីដ-១៩ ប្រភេទ អូមីក្រុង ទម្រង់ «បំបាំងកាយ» អាចគំរាមកំហែងខ្លាំងក្លាដល់ពិភពលោក

កាលពីសប្ដាហ៍មុន ក្រុមអ្នកវិទ្យាសាស្ត្របានកំណត់ «អត្តសញ្ញាណ» នៃទម្រង់ទី ២ របស់ វ៉ារ្យ៉ង់អូមីក្រុង ដែលគេពិបាករកឃើញដោយការធ្វើតេស្ត PCR។ វាត្រូវបានអ្នកវិទ្យាសាស្ត្រហៅថា ទម្រង់ «បំបាំងកាយ» របស់ អូមីក្រុង ដែលទំនងជានឹងបង្កការស្មុគស្មាញក្នុងការតាមដាន និងគ្រប់គ្រងការឆ្លងរាលដាលបន្ថែមទៀត។

វត្តមានរបស់ទម្រង់ថ្មីខាងលើនេះ បាននាំឱ្យក្រុមអ្នកវិទ្យាសាស្ត្របំបែក វ៉ារ្យ៉ង់អូមីក្រុង ជា ២ ទម្រង់ រួមមាន អូមីក្រុងស្ដង់ដា (ទម្រង់ដើម) ឬហៅថា BA.1 និងទម្រង់ថ្មី BA.2។ មកដល់បច្ចុប្បន្ន BA.1 គឺជាទម្រង់ដែលគេស្គាល់ច្រើន និងត្រូវបានរកឃើញក្នុងប្រទេសរាប់សិប ហើយកំពុងឆ្លងរាលដាលយ៉ាងឆាប់រហ័ស ជំនួស វ៉ារ្យ៉ង់ ដេលតា។ ចំណែកទម្រង់ BA.2 ទើបតែត្រូវបានរកឃើញជិត ១០ ករណីប៉ុណ្ណោះ ប៉ុន្តែ BA.2 ពុំមានចំណុចពិសេសដែលផ្ដល់ភាពងាយស្រួលដល់ការធ្វើតេស្ត PCR សោះឡើយ។ ប្រការនេះអាចប៉ះពាល់ដល់ការតាមដានអំពីអត្រានៃការឆ្លងរាលដាលរបស់ BA.2។

ជាធម្មតា វីរុស SARS-CoV-2 (កូវីដ-១៩) រួមមានហ្សែនចំនួន ៤ គឺ N, S, E និង ORF។ ការធ្វើតេស្ត PCR ពេញលេញអាចរកឃើញហ្សែនទាំងនេះ។ អូមីក្រុង ទម្រង់ដើម ខ្វះកំណាត់ហ្សែន S ដូច្នេះ ការធ្វើតេស្ត PCR នៅតែអាចរកឃើញអ្នកវិជ្ជមាននឹង អូមីក្រុង ដោយមិនបាច់វិភាគហ្សែន។ «អូមីក្រុងបំបាំងកាយ» មានចំណុចដូចគ្នាជាច្រើន ធៀបនឹង អូមីក្រុងដំបូង ប៉ុន្តែ កំណាត់ហ្សែន S នៅតែមាន នាំឱ្យមានការពិបាកក្នុងបែងចែកប្រភេទ នៅពេលធ្វើតេស្ត PCR។

ជាមួយ BA.1 ការធ្វើតេស្ត PCR អាចរកឃើញចំណុចពិសេស «ខ្វះកំណាត់ហ្សែន S» ដើម្បីបែងចែកវាជាមួយនឹង ដេលតា ដូច្នេះ អ្នកវិទ្យាសាស្ត្រមានភាពងាយស្រួលក្នុងការ «ដាក់ស្លាក» ទៅលើសំណាកដែលគួរឱ្យសង្ស័យ ដើម្បីធ្វើការវិភាគហ្សែនដោយសុក្រឹត។ ដូច្នេះ បន្ទប់ពិសោធនានាអាចរកឃើញវត្តមានរបស់ អូមីក្រុង ទម្រង់ BA.1 នេះ ចាប់ពី ២ ដល់ ៣ ថ្ងៃ បន្ទាប់ពីបានយកសំណាកមកធ្វើតេស្ត។ ផ្ទុយទៅវិញ អ្នកវិទ្យាសាស្ត្រនឹងត្រូវចំណាយពេលពី ២ ដល់ ៣ សប្ដាហ៍ នៅក្នុងការកំណត់អត្តសញ្ញាណរបស់ អូមីក្រុង ប្រភេទ«បំបាំងកាយ»។

វេជ្ជបណ្ឌិត Davey Smith ប្រធានផ្នែកជំងឺឆ្លងនៃសាកលវិទ្យាល័យ California San Diego (អាម៉េរិក) អះអាងថា ការយឺតយ៉ាវនេះអាចប៉ះពាល់ដល់ដំណើរការនៃការព្យាបាលអ្នកជំងឺកូវីដ-១៩ ព្រោះថា ក្រុមគ្រូពេទ្យត្រូវការដឹងអំពីពេលវេលាដែលត្រូវប្ដូរវិធីសាស្ត្រព្យាបាល។ ថ្នាំប្រភេទខ្លះ មានប្រសិទ្ធភាពក្នុងការប្រឆាំងនឹង ដេលតា ប៉ុន្តែ មិនសូវមានប្រសិទ្ធភាពចំពោះ អូមីក្រុង។

បច្ចុប្បន្ន អូមីក្រុង ប្រភេទ «បំបាំងកាយ» ត្រូវបានរកឃើញនៅ កាណាដា, អូស្ត្រាលី, អង់គ្លេស និង អាហ្វ្រិកខាងត្បូង។ ប៉ុន្តែ ក្រុមអ្នកវិទ្យាសាស្ត្រឱ្យដឹងថា ត្រូវការពេលបន្ថែមទៀតដើម្បីអាចយល់ច្បាស់អំពីភាពសាហាវរបស់វា៕

December 17, 2021

កម្មករចំនួន ២១ នាក់ កំពុងជាប់ក្នុងអណ្ដូងរ៉ែធ្យូងថ្មលិចទឹក នៅ ប្រទេសចិន

អាជ្ញាធរខេត្ត Shanxi ភាគខាងជើងនៃ ប្រទេសចិន នាថ្ងៃទី ១៧ ធ្នូ នេះ បានឱ្យដឹងថា កងកម្លាំងជួយសង្គ្រោះកំពុងដុតដៃ ដុតជើង សង្គ្រោះកម្មករ ២១ នាក់ ដែលជាប់នៅក្នុងអណ្ដូងរ៉ែធ្យូងថ្មកំពុងលិចទឹក មួយកន្លែងនៅខេត្តនេះ។

ក្រុមសង្គ្រោះដែលមានគ្នាជាង ៤០០ នាក់ កំពុងរត់ប្រណាំងនឹងពេលវេលាដើម្បីចូលទៅឱ្យដល់កន្លែងដែលកម្មករទាំងនេះកំពុងជាប់គាំង នេះបើតាមអាជ្ញាធរក្នុងតំបន់។ ពួកគេបានដំឡើងម៉ាស៊ីនបូមទឹកមួយចំនួនដើម្បីរំដោះទឹកចេញពីអណ្ដូងរ៉ែ ហើយមកដល់វេលាម៉ោង ៦ ព្រឹក ថ្ងៃទី ១៧ ធ្នូ ទឹកនៅក្នុងអណ្ដូងរ៉ែ បានថយចុះ ២.១ ម៉ែត្រ។

ហេតុការណ៍នេះបានកើតឡើងនៅម៉ោងប្រហែល ២៣ យប់ នៃថ្ងៃទី ១៥ ធ្នូ នៅក្នុងអណ្ដូងរ៉ែធ្យូងថ្មមួយ ក្នុងទីក្រុង Xiaoyi របស់ខេត្ត Shanxi។

យោងតាមការស្រាវជ្រាវដំបូង ការទាញយករ៉ែខុសច្បាប់គឺជាមូលហេតុដែលនាំឱ្យកើតមានគ្រោះថ្នាក់នេះ។ សីតុណ្ហភាពថយចុះ ខណៈដែលខ្យល់បក់ខ្លាំងគឺជាកត្តាដែលបណ្ដាលឱ្យបេសកកម្មជួយសង្គ្រោះប្រែជាលំបាកជាងមុន។

សមត្ថកិច្ចបាន និងកំពុងធ្វើការស៊ើបអង្កេតលើជនសង្ស័យ ៧ នាក់ ដែលទាក់ទិននឹងហេតុការណ៍នេះ និងកំពុងស្វែងរកជនមួយចំនួនទៀតដែលបច្ចុប្បន្នបានគេចខ្លួនបាត់ស្រមោលពីកន្លែងកើតហេតុ៕

December 17, 2021

បច្ចុប្បន្នភាពស្ដីពី កូវីដ-១៩ នៅ កម្ពុជា សម្រាប់ថ្ងៃនេះ៖ ស្លាប់ ៣ នាក់ និង ជាសះស្បើយ ១២ នាក់

កម្ពុជា ក្នុងអំឡុង ២៤ ម៉ោង នៃ ថ្ងៃទី ១៦ ធ្នូ ២០២១ បានរកឃើញអ្នកឆ្លងថ្មី ៨ នាក់ ជាសះស្បើយ ១២ នាក់ និងស្លាប់ 0៣ នាក់។

December 17, 2021

ជប៉ុន រកឃើញបម្រែបម្រួលដែលនាំឱ្យ វីរុសកូវីដ-១៩ ប្រភេទ ដេលតា (Delta) សាហាវជាងមុន

យោងតាមប្រភពព័ត៌មានពី ទីក្រុងតូក្យូ ក្រុមអ្នកវិទ្យាសាស្ត្ររបស់ ជប៉ុន ទើបតែបានរកឃើញបម្រែបម្រួលមួយនៅក្នុង វ៉ារ្យ៉ង់ដេលតា នៃ វីរុសកូវីដ-១៩ ដែលនាំឱ្យ វីរុសបំប្លែងខ្លួននេះ ប្រែជាសាហាវជាងមុន។

ភាពសាហាវរបស់ ដេលតា អាចបណ្ដាលមកពីបម្រែបម្រួលមួយត្រូវបានដាក់ឈ្មោះថា P681R ដែលកើតឡើងនៅលើប្រូតេអ៊ីនបន្លា ជារចនាសម្ព័ន្ធដែលជួយឱ្យ វីរុស អាចតោងជាប់កោសិការបស់មនុស្ស។ បម្រែបម្រួល P681R ធ្វើឱ្យបណ្ដាកោសិកាដែលមានផ្ទុកវីរុស កកើតជាចំណុចអុជៗរាងមូលនៅលើសួត និងនាំឱ្យមានអាការធ្ងន់ធ្ងរជាងមុន។

ដើម្បីស្វែងយល់អំពីភាពសាហាវរបស់ បម្រែបម្រួល P681R ក្រុមអ្នកវិទ្យាសាស្ត្រជប៉ុន បានដាក់ វ៉ារ្យ៉ង់ដេលតា ឱ្យឆ្លងរាលដាលចូលកោសិកាដែលបានត្រៀមទុកពិសោធ។ ពួកគេរកឃើញថា កោសិកាទាំងនេះត្រូវជាប់ស្អិតចូលគ្នា និងកកើតស្នាមអុជមូលនៅលើសួត មានទំហំធំជាង ៣.៦ ដង ធៀបនឹងទំហំមធ្យមរបស់កោសិកាដែលមានផ្ទុក វីរុសដើមរបស់ កូវីដ-១។ សត្វកណ្ដុរដែលត្រូវបានយកមកពិសោធ បានចុះស្គមយ៉ាងលឿន និងត្រូវរលាកសួតធ្ងន់ធ្ងរជាង បើធៀបនឹងកណ្ដុរដែលឆ្លងវីរុសដើម។

សាស្ត្រាចារ្យរង Kei Sato របស់វិទ្យាស្ថានវេជ្ជសាស្ត្រ នៃ សាកលវិទ្យាល័យតូក្យូ ដែលជាអ្នកវិទ្យាសាស្ត្រមួយរូបបានរួមចំណែកក្នុងការពិសោធខាងលើ យល់ថា ការស្រាវជ្រាវទៅលើ បម្រែបម្រួល P681R នេះ អាចបកស្រាយបាននូវមូលហេតុដែលនាំឱ្យ ដេលតា បង្កឱ្យមានរោគសញ្ញាធ្ងន់ធ្ងរជាង វ៉ារ្យ៉ង់ ដទៃ៕

December 17, 2021

EMA ណែនាំឱ្យប្រើប្រាស់បន្ទាន់នូវថ្នាំគ្រាប់ព្យាបាលជំងឺកូវីដ-១៩ របស់ Pfizer

អាជ្ញាធរគ្រប់គ្រងឱសថអឺរ៉ុប (EMA) កាលពីថ្ងៃទី ១៦ ធ្នូ បានណែនាំឱ្យប្រើប្រាស់បន្ទាន់នូវថ្នាំគ្រាប់ព្យាបាលជំងឺកូវីដ-១៩ Paxlovid ដែលផលិតដោយក្រុមហ៊ុន Pfizer។

យោងតាម EMA ថ្នាំគ្រាប់ Paxlovid ដែលបច្ចុប្បន្នមិនទាន់ទទួលបានការអនុម័តឱ្យប្រើប្រាស់នៅឯ សហភាពអឺរ៉ុប (EU) អាចនឹងត្រូវបានប្រើប្រាស់ដើម្បីព្យាបាលអ្នកជំងឺកូវីដ-១៩ ដែលជាមនុស្សពេញវ័យ អ្នកដែលមិនទាន់ត្រូវការជំនួយអុកស៊ីសែន និងអ្នកជំងឺដែលប្រឈមនឹងហានិភ័យជំងឺវិវត្តទៅរកធ្ងន់ធ្ងរ។

EMA សង្កត់ធ្ងន់ថា ថ្នាំនេះ ប្រើប្រាស់កាន់តែឆាប់ កាន់តែល្អ សម្រាប់អ្នកដែលមានលទ្ធផលតេស្តវិជ្ជមាននឹងកូវីដ-១៩ និងក្នុងរយៈពេល ៥ ថ្ងៃ បន្ទាប់ពីមានអាការរោគ។

EMA បញ្ជាក់ថា ការណែនាំនេះនឹងជួយដល់ស្ថាប័នសុខាភិបាលរបស់បណ្ដាប្រទេស អាចសម្រេចចិត្តបានឆាប់រហ័ស ទាក់ទងនឹងការអនុញ្ញាតឱ្យប្រើថ្នាំ Paxlovid មុនពេលវាត្រូវបានអនុញ្ញាតជាផ្លូវការ។

យោងតាម EMA ទិន្នន័យបានបង្ហាញថា ថ្នាំ Paxlovid ជួយកាត់បន្ថយហានិភ័យត្រូវចូលពេទ្យ និងស្លាប់ បើសិនជាត្រូវបានព្យាបាលភ្លាមៗក្នុងរយៈពេល ៥ ថ្ងៃ រាប់ចាប់ពីថ្ងៃដែលអ្នកជំងឺមានរោគសញ្ញា។ លទ្ធផលនៃការពិសោធបានបង្ហាញថា មានតែ ប្រហែល ១% ប៉ុណ្ណោះ ក្នុងចំណោមអ្នកជំងឺដែលបានប្រើប្រាស់ថ្នាំ Paxlovid ក្នុងអំឡុងពេលខាងលើ ត្រូវចូលពេទ្យ បន្ទាប់ពីបានព្យាបាល ២៨ ថ្ងៃ ធៀបនឹង ៦.៧% នៃអ្នកជំងឺដែលប្រើប្រាស់ថ្នាំបញ្ឆោត (Placebo)។ ពុំមានអ្នកជំងឺណាម្នាក់ស្លាប់ឡើយ នៅក្នុងក្រុមអ្នកប្រើប្រាស់ថ្នាំ Paxlovid ខណៈអ្នកជំងឺ ១០ នាក់នៅក្នុងក្រុមអ្នកប្រើថ្នាំបញ្ឆោត បានបាត់បង់ជីវិត៕

December 17, 2021

Author: សឿន សំណាង