អាជ្ញាធរចិន បន្តរឹតបន្តឹងការធ្វើដំណើរចេញចូលតាមច្រកព្រំដែន ដោយសារតែព្រួយបារម្ភអំពីការរាតត្បាតរបស់ កូវីដ-១៩ ប្រភេទ អូមីក្រុង។
សារព័ត៌មាន SCMP បានចុះផ្សាយថា អាជ្ញាធរគយរបស់ចិន កាលពីថ្ងៃទី ២០ ខែធ្នូ បានចេញប្រកាសមួយស្ដីពីការរឹតបន្តឹងវិធានការទប់ស្កាត់ ជំងឺកូវីដ-១៩ ចំពោះមនុស្ស មធ្យោបាយធ្វើដំណើរ និងទំនិញមកពីបណ្ដាប្រទេសដែលមានវត្តមានរបស់ អូមីក្រុង។ ព្រំដែនទាំងអស់របស់ប្រទេសនេះ ក៏នឹងត្រូវបានរឹតបន្តឹងការត្រួតពិនិត្យ ក្រោយពីអាជ្ញាធរចិន បានរកឃើញករណីឆ្លង អូមីក្រុង ចំនួន ៦ នាក់ នៅក្នុងទីក្រុងចំនួន ៣ របស់ប្រទេសនេះ កាលពីសប្ដាហ៍កន្លង។
ដោយប្រើប្រាស់យុទ្ធសាស្ត្រ «គ្មានកូវីដ» ក្រុមអ្នកជំនាញ និងអ្នកទទួលខុសត្រូវនៅ ប្រទេសចិន ជឿជាក់ថា ពួកគេអាចទប់ស្កាត់ជំងឺឆ្លងពីព្រំដែន ដែលនេះបង្ហាញថា គយរបស់ប្រទេសនេះអាចនឹងបិទខ្ទប់ព្រំដែន ដែលនាំឱ្យទំនិញត្រូវស្ទះនៅនឹងកន្លែង។
«ច្រកព្រំដែន បច្ចុប្បន្នគឺជាអាទិភាពទី ១ និងជាចំណុចសំខាន់នៅក្នុងការទប់ស្កាត់រោគឆ្លង។ យើងនឹងបង្កើនការត្រួតពិនិត្យទំនិញ និងមនុស្សដែលឆ្លងកាត់ ដើម្បីធានាសុវត្ថិភាពដល់ប្រជាជន នៅចំពោះមុខ វ៉ារ្យ៉ង់ថ្មី» Mi Feng អ្នកនាំពាក្យរបស់ក្រុមប្រឹក្សាសុខាភិបាលជាតិចិន (NHC) បានបញ្ជាក់ដូច្នេះ៕
