សឿន សំណាង - La Reine Media

ឥណ្ឌូណេស៊ី បកស្រាយពីមូលហេតុដែលសម្រេចចិត្តប្រើតែពាក់កណ្ដាលដូស សម្រាប់ការចាក់វ៉ាក់សាំងកូវីដ-១៩ ដូសជំរុញ

រដ្ឋមន្ត្រីក្រសួងសុខាភិបាលរបស់ ឥណ្ឌូណេស៊ី ឱ្យដឹងថា ប្រទេសនេះប្រើប្រាស់វ៉ាក់សាំងបង្ការជំងឺកូវីដ-១៩ តែពាក់កណ្ដាលដូសប៉ុណ្ណោះ សម្រាប់ជាដូសជំរុញ ដើម្បីធានាសុវត្ថិភាពដល់ប្រជាជន។

លោក Budi Gunadi Sadikin រដ្ឋមន្ត្រីក្រសួងសុខាភិបាលរបស់ ប្រទេសឥណ្ឌូណេស៊ី ថ្លែងថា សហរដ្ឋអាម៉េរិក បានធ្វើការពិសោធ ស្រាវជ្រាវ និងបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសជំរុញ ដោយប្រើប្រាស់វ៉ាក់សាំង Moderna តែពាក់កណ្ដាលដូសប៉ុណ្ណោះ។ លោកបកស្រាយថា៖ «វ៉ាក់សាំង Moderna មានអត្រាផលវិបាកខ្ពស់ ដូច្នេះ យើងយល់ថា ការចាក់វ៉ាក់សាំងដូសជំរុញតែពាក់កណ្ដាលដូសនេះនឹងមានសុវត្ថិភាពខ្ពស់ជាង»។

លោករដ្ឋមន្ត្រីបន្ថែមថា ការសម្រេចនេះក៏យោងទៅតាមអនុសាសន៍របស់ក្រុមប្រឹក្សាផ្នែកបច្ចេកទេសចាក់វ៉ាក់សាំងឥណ្ឌូណេស៊ី (ITAGI) និងក្រុមសាស្ត្រាចារ្យនៃសាកលវិទ្យាល័យ Padjadjaran និងសាកលវិទ្យាល័យឥណ្ឌូណេស៊ី ហើយអនុសាសន៍នេះក៏ត្រូវបានយល់ព្រមដោយអាជ្ញាធរគ្រប់គ្រងអាហារ និងឱសថជាតិ (BPOM) ផងដែរ។

លោក Budi Gunadi Sadikin អះអាងថា គិតជាមធ្យម កម្រិតនៃអង្គបដិប្រាណដែលកើតពីការចាក់វ៉ាក់សាំងដូសទី ១ និងដូសទី ២ គឺប្រមាណពី ១០០-២០។ ក្រោយពីត្រូវបានចាក់ពាក់កណ្ដាលដូសនៃដូសជំរុញ អង្គបដិប្រាណនឹងកើនឡើងដល់ ៧,៥០០-៨,០០០ ខណៈដែលការចាក់ដូសជំរុញពេញ ១ ដូស បរិមាណនៃអង្គបដិប្រាណនឹងកើនដល់ ៨,០០០-៨,៥០។ «ដូច្នេះ សូម្បីតែប្រើប្រាស់ ១ ដូសពេញ សម្រាប់ការចាក់ដូសជំរុញ អត្រានៃការលើសខ្វះគ្នាក៏ប្រែប្រួលមិនច្រើនប៉ុន្មាន»៕

January 20, 2022

ការិយាល័យរដ្ឋាភិបាលរបស់កងទ័ពរដ្ឋប្រហារនៅ មីយ៉ានម៉ា ត្រូវរងការវាយប្រហារដោយគ្រាប់រ៉ុក្កែត និងគ្រាប់បែក

(មីយ៉ានម៉ា)-ប្រភពព័ត៌មានជាច្រើនបានឱ្យដឹងថា មានការប្រយុទ្ធគ្នាយ៉ាងសាហាវរវាងកងកម្លាំងគាំទ្ររដ្ឋាភិបាលចាស់ និងកងទ័ពរដ្ឋប្រហារមីយ៉ានម៉ា នៅក្នុងទីក្រុង ឡូយខាវ (Loikaw) ក្នុងរដ្ឋ កាយ៉ា (Kayah)។

កងកម្លាំងប្រឆាំងរដ្ឋប្រហារ កាលពីថ្ងៃទី ១៩ មករា បានវាយប្រហារទៅលើការិយាល័យរបស់កងទ័ពរដ្ឋប្រហារ ដោយប្រើប្រាស់គ្រាប់រ៉ុក្កែត និងគ្រាប់បែកដៃ បណ្ដាលឱ្យទាហានរដ្ឋប្រហារយ៉ាងតិច ១៥ នាក់ បានបាត់បង់ជីវិត នេះបើតាមសារព័ត៌មាន AFP ដែលបានដកស្រង់ប្រភពព័ត៌មានពីកងកម្លាំងប្រឆាំងរដ្ឋប្រហារ និងសារព័ត៌មានក្នុងស្រុក។

ការប៉ះទង្គិចគ្នារវាងកម្លាំងរដ្ឋប្រហារ និងសមាជិកនៃកងកម្លាំងការពារប្រជាជន (PDF) បានកើតឡើងអស់ជាច្រើនថ្ងៃមកហើយ នៅក្នុងទីក្រុងរដ្ឋបាលរបស់រដ្ឋ កាយ៉ា។ កងកម្លាំងរដ្ឋប្រហារបានបញ្ជូនយន្តហោះចម្បាំង និងកាំភ្លើងធំ ទៅជួយដល់ទាហានរបស់ពួកគេនៅទីនោះ។

ប៉ូលិសមីយ៉ានម៉ា ឱ្យដឹងថា ក្រុមទាហានប្រឆាំងរដ្ឋប្រហារដណ្ដើមកាន់កាប់វិហារ និងផ្ទះជាច្រើនខ្នងនៅក្នុងទីក្រុង ឡូយខាវ និងបានវាយប្រហារលើពន្ធនាគារមួយផងដែរ។

ក្នុងថ្ងៃទី ១៩ មករា កងកម្លាំងមួយចំនួនរបស់ PDF បានវាយប្រហារលើការិយាល័យរដ្ឋមួយនៅក្នុងខណ្ឌមួយនៃរដ្ឋ កាយ៉ា បណ្ដាលឱ្យទាហានរដ្ឋប្រហារ ១៥ នាក់ បាត់បង់ជីវិត នៅក្នុងការប្រយុទ្ធគ្នារយៈពេលប្រហែល ១ ម៉ោង នេះបើតាមអ្នកនាំពាក្យមួយរូបរបស់ រណសិរ្សប្រជាធិបតេយ្យ ការ៉ែន (Karen)។ ក្រុមនេះបានប្រើប្រាស់គ្រាប់រ៉ុក្កែត និងគ្រាប់បែកដៃក្នុងការប្រយុទ្ធលើកនេះ។

សារព័ត៌មានក្នុងស្រុកឱ្យដឹងថា ការប៉ះទង្គិចគ្នាខាងលើ បានបណ្ដាលឱ្យផ្ទះជាច្រើនខ្នងត្រូវក្លាយជាគំនរបាក់បែក ដោយសារការវាយប្រហារពីកម្លាំងរដ្ឋប្រហារ។

អ្នកនាំពាក្យរបស់រដ្ឋាភិបាលរដ្ឋប្រហារ ហ្ស មីន ទុន (Zaw Min Tun) បានឱ្យដឹងថា កម្លាំង PDF បានយកមូលដ្ឋាននានារបស់កងទ័ពមីយ៉ានម៉ា នៅ ឡូយខាវ និងប៉ុស្ដិ៍មួយចំនួនក្នុងទីក្រុង ជាគោលដៅសម្រាប់ការវាយប្រហារ ក្នុងរយៈពេលច្រើនថ្ងៃមកនេះ៕

January 20, 2022

បុរសពិការម្នាក់ដែលត្រូវដេកនៅនឹងកន្ទេល បែរជាអាចដើរ និងនិយាយបានវិញ ក្រោយពីបានចាក់វ៉ាក់សាំងកូវីដ-១៩

(ឥណ្ឌា)-បុរសពិការម្នាក់នេះត្រូវរងរបួសឆ្អឹងខ្នងនៅក្នុងគ្រោះថ្នាក់ចរាចរណ៍កាលពី ៥ ឆ្នាំមុន ប៉ុន្តែ ត្រូវគេជឿថា អាចដើរ និងនិយាយបាន បន្ទាប់ពីបានទទួលការចាក់វ៉ាក់សាំងបង្ការជំងឺកូវីដ-១៩ ចំនួន ១ ដូស។

បុរសវ័យ ៥៥ ឆ្នាំ ឈ្មោះ Munda រស់នៅក្នុងតំបន់ Salgadih រដ្ឋ Jharhand នៃ ប្រទេសឥណ្ឌា ត្រូវពិការ មិនអាចនិយាយស្ដីបាន និងត្រូវដេកលើកន្ទេលអស់ជាច្រើនឆ្នាំមកហើយ ក្រោយពីរបួសឆ្អឹងខ្នងដោយសារគ្រោះថ្នាក់រថយន្តកាលពី ៥ ឆ្នាំមុន។

ក៏ប៉ុន្តែ យោងតាមសារព័ត៌មានក្នុងស្រុក លោក Munda បានធ្វើឱ្យក្រុមវេជ្ជបណ្ឌិតច្របូកច្របល់នៅពេលត្រូវបានក្រុមគ្រួសារជូនដំណឹងដល់ខាងមន្ទីរពេទ្យថា អ្នកជំងឺ Munda អាចកម្រើកជើង និងអាចនិយាយបានវិញហើយ។ ក្នុងកិច្ចសម្ភាសជាមួយទូរទស្សន៍ NDTV បុរសរូបនេះនិយាយថា៖ «ខ្ញុំពិតជាត្រេកអរណាស់ដោយបានទទួលការចាក់វ៉ាក់សាំង។ ខ្ញុំអាចកម្រើកជើងបានវិញ បន្ទាប់ពីបានចាក់វ៉ាក់សាំងកាលពីសប្ដាហ៍មុន»។

វេជ្ជបណ្ឌិត Albela Kerketta មកពីមជ្ឈមណ្ឌលសុខាភិបាលសាធារណៈ Peterwar បានឱ្យដឹងថា ក្រុមគ្រួសារបានដឹងថា លោក Munda អាចដើរបាន និងនិយាយបានវិញ ក្រោយពីចាក់វ៉ាក់សាំងបាន ២៤ ម៉ោង។

«Munda ត្រូវបានចាក់វ៉ាក់សាំង Covishield (កំណែផលិតនៅ ឥណ្ឌា របស់ AstraZeneca) នៅឯផ្ទះរបស់គាត់កាលពីថ្ងៃទី ៤ មករា» វេជ្ជបណ្ឌិត Albela Kerketta ប្រាប់ដូច្នេះ និងបន្តថា រឿងនេះត្រូវការការស្វែងយល់បន្ថែម។

ព័ត៌មានផ្លូវការ រួមនឹងចម្លើយជាក់លាក់នឹងមាននៅក្នុងរយៈពេលប៉ុន្មានថ្ងៃខាងមុខ បន្ទាប់ពីក្រុមអ្នកវិទ្យាសាស្ត្រធ្វើការស្រាវជ្រាវលើស្ថានភាពជំងឺរបស់លោក Dularchand Munda និងការជាសះស្បើយពីជំងឺរបស់គាត់៕

January 19, 2022

ជាពីជំងឺកូវីដ-១៩ បុរសម្នាក់ស្រាប់តែឃើញថា «ប្រដាប់បន្តពូជ» របស់ខ្លួន ខ្លីជាងមុន ៤ ស.ម! វេជ្ជបណ្ឌិតថា នេះជា «បញ្ហាក្រោយកូវីដ»

វេជ្ជបណ្ឌិតបានណែនាំឱ្យបុរសនេះប្រើប្រាស់ម៉ាស៊ីនដើម្បីជួយទាញឱ្យវែងឡើងវិញ មិនដូច្នោះទេ ត្រូវទទួលយកការពិតរបស់បញ្ហានេះ ព្រោះថា ផលប៉ះពាល់នេះអាចស្ថិតនៅជារៀងរហូត។

កូវីដ-១៩ មិនត្រឹមតែធ្វើឱ្យអ្នកជំងឺស្លាប់ របួសប្រព័ន្ធផ្លូវដង្ហើមនោះទេ តែវាក៏អាចបន្សល់ទុកនូវបញ្ហាយូរអង្វែងផងដែរ បន្ទាប់ពីអ្នកជំងឺបានជាសះស្បើយ។ អ្នកវិទ្យាសាស្ត្របានហៅផលវិបាកទាំងនោះថា «បញ្ហាក្រោយកូវីដ»។ រោគសញ្ញាមួយដែលត្រូវបានរាប់បញ្ចូលថាជា «បញ្ហាក្រោយកូវីដ» នោះគឺ វាកើតឡើងរយៈពេលយូរជាង ៤ សប្ដាហ៍ បន្ទាប់ពីបានជាពីជំងឺកូវីដ-១៩។ «បញ្ហាក្រោយកូវីដ» រួមានដូចជា៖ ពិបាកដកដង្ហើម, អស់កម្លាំង, ពិបាកផ្ដោតអារម្មណ៍គិតពិចារណា, ឈឺក្បាល, ឈឺសន្លាក់, ផ្លាស់ប្ដូរក្លិន និងផ្លាស់ប្ដូរវដ្ដនៃរដូវរបស់ស្ត្រី។

នៅមានអាការធ្ងន់ធ្ងរជាងអ្វីដែលបានរៀបរាប់ខាងលើ ប៉ុន្តែ វាកម្រកើតមាន។ បុរសម្នាក់អាយុជាង ៣០ ឆ្នាំ នៅ សហរដ្ឋអាម៉េរិក ថ្មីៗនេះបានកើត «បញ្ហាក្រោយកូវីដ» ដែលគួរឱ្យយកចិត្តទុកដាក់។ គាត់និយាយថា បានឆ្លងកូវីដ កាលពីខែកក្កដា ២០២១ និងបានជាសះស្បើយ។ គ្រប់យ៉ាងលើរាងកាយបានត្រលប់មករកសភាពដើម លើកលែងតែប្រដាប់ភេទរបស់គាត់។

«ប្រដាប់បន្តពូជរបស់ខ្ញុំត្រូវរួញខ្លីជាងមុន។ មុនពេលឆ្លងជំងឺកូវីដ ទំហំ និងប្រវែងរបស់វាស្ថិតនៅលើកម្រិតមធ្យម។ វាមិនធំខ្លាំង ប៉ុន្តែ វាប្រាកដជាធំជាងមនុស្សធម្មតាបន្តិច។ ពេលនេះ ប្រដាប់បន្តពូជរបស់ខ្ញុំបែរជាខ្លីជាងមុន ១.៥ អ៊ីញ (ប្រហែល ៣.៨ ស.ម) ពោលគឺធ្លាក់មកនៅក្រោមកម្រិតមធ្យម» បុរសដែលជួប «បញ្ហាក្រោយកូវីដ» បានប្រាប់កម្មវិធីសុខភាពផ្លូវភេទ «How to do it» ដូច្នេះ។

ដើម្បីផ្ដល់ការណែនាំដល់បុរសរងគ្រោះខាងលើ ពិធីកររបស់កម្មវិធី «How to do it» បានអញ្ជើញបុរសនេះមកកាន់កម្មវិធីរបស់វេជ្ជបណ្ឌិតឯកទេសខាងជំងឺផ្លូវទឹកនោម Ashley Winter ដែលបច្ចុប្បន្នគឺជាប្រធានផ្នែកសុខភាពបុរសប្រចាំសាកលវិទ្យាល័យសុខាភិបាល Albany។

លោកស្រីវេជ្ជបណ្ឌិត Ashley Winter បានបកស្រាយថា៖ «បញ្ហាខ្សោយលិង្គ ពិតណាស់ នឹងនាំឱ្យប្រដាប់ភេទបុរសត្រូវរួញខ្លី។ ក្នុងអំឡុងពេលដែលប្រដាប់ភេទបុរសមិនអាចវែងចេញ ឈាមមិនត្រូវបានបាញ់ទៅកាន់ទីនោះ ហើយប្រការនេះអាចធ្វើឱ្យប្រដាប់ភេទត្រូវបាត់បង់រូបរាងដើម នាំឱ្យវាខ្លីជាងមុន»។

ការស្រាវជ្រាវមួយដែលបានចុះផ្សាយលើទស្សនាវដ្ដី Endocrinological Investigation កាលពីចុងឆ្នាំ ២០២១ បានឱ្យដឹងថា បុរសទាំងឡាយដែលមានជំងឺកូវីដ-១៩ មានហានិភ័យខ្សោយលិង្គខ្ពស់ជាងប្រហែល ៣ ដង ធៀបនឹងមុនពេលមិនទាន់ឆ្លងវីរុស។ ចំណែកការស្រាវមួយចំនួនបាននិយាយថា ហានិភ័យនេះខ្ពស់ជាងជិត ៦ ដងឯណោះ។ ប៉ុន្តែ ការស្រាវជ្រាវខ្លះទៀតបានឱ្យដឹងថា ហានិភ័យនេះទាបជាងអត្រាដែលបាននិយាយខាងលើ និងថា បុរសប្រហែល ២០% ប៉ុណ្ណោះ ដែលរងផលប៉ះពាល់។

ក្រៅពីនេះ ការស្រាវជ្រាវធំមួយដែលបានស្រង់ស្ថិតិពីអ្នកជំងឺកូវីដ-១៩ ដែលបានជាសះស្បើយនៅក្នុងប្រទេសចំនួន ៥៦ ស្ដីពីអាការក្រោយជាពីជំងឺកូវីដ បង្ហាញថា បុរសប្រមាណ ១៥% មានបញ្ហាប្រដាប់ភេទមិនឡើងរឹង និង ៥% ទៀត ត្រូវជួបនឹងបញ្ហារួញពងស្វាស ឬរួញប្រដាប់ភេទ។

ការសិក្សាស្រាវជ្រាវទាំងឡាយបង្ហាញថា បញ្ហា «Covid Dick» (ពាក្យសម្រាប់ហៅផលប៉ះពាល់របស់ កូវីដ-១៩ ទៅលើប្រដាប់ភេទបុរស) ពិតជាមានប្រាកដមែន៕

January 19, 2022

ក្មេងស្រីអាយុ ៣ ឆ្នាំ មាន «ដែកគោល ៩ ដើម ជាប់ក្នុងក្បាល»! ម្ដាយរបស់នាងត្រូវប៉ូលិសហៅទៅសួរចម្លើយ

(វៀតណាម)-សមត្ថកិច្ចបានហៅម្ដាយរបស់ក្មេងស្រី រួមនឹងសាច់ញាតិ និងអ្នកជិតខាងមកសាកសួរព័ត៌មាន ដើម្បីកសាងសំណុំរឿងបញ្ជូនទៅតុលាការ បន្ទាប់ពីក្មេងស្រីអាយុ ៣ ឆ្នាំម្នាក់ ត្រូវបានថតឃើញថា មានវត្ថុចំនួន ៩ ដើម ដែលដូចទៅនឹងដែកគោល ជាប់នៅខាងក្នុងលលាដ៍ក្បាល។

កាលពីព្រឹកថ្ងៃទី ៩ មករា ប៉ូលិសវៀតណាម បានចាប់ផ្ដើមធ្វើការស៊ើបអង្កេតលើករណីសង្ស័យថា ក្មេងស្រីអាយុ ៣ ឆ្នាំ ត្រូវគេធ្វើបាប ដោយសារតែក្រុមវេជ្ជបណ្ឌិតបានរកឃើញថា មានវត្ថុចំនួន ៩ ដែលមានរូបរាងដូចដែកគោល ជាប់នៅក្នុងលលាដ៍ និងខួរក្បាលរបស់នាង បន្ទាប់ពីនាងត្រូវបានបញ្ជូនចូលពេទ្យសង្គ្រោះបន្ទាន់ ព្រោះតែមានអាការប្រកាច់ និងបាត់បង់ស្មារតី។ ម្ដាយរបស់ក្មេងស្រី រួមនឹងសាច់ញាតិ និងអ្នកជិតខាងជាច្រើននាក់ ត្រូវបានសមត្ថកិច្ចអញ្ជើញឱ្យចូលមកការិយាល័យដើម្បីសាកសួរព័ត៌មាន។

សាច់ញាតិរបស់ក្មេងស្រីខាងលើបានឱ្យដឹងថា ឪពុកម្ដាយរបស់ក្មេងស្រីនេះ បានគ្នាជាប្ដីប្រពន្ធ មិនមែនដោយសារកើតឡើងពីការស្រលាញ់នោះទេ។ ពួកគេមានកូន ៣ នាក់ ប៉ុន្តែបុរសជាប្ដីហាក់មិនមានបញ្ញាល្អ ទើបស្ត្រីជាប្រពន្ធត្រូវរ៉ាប់រងគ្រួសារទាំងមូល។

វត្ថុចំនួន ៩ ដែលមានរូបរាងដូចដែកគោល ជាប់នៅក្នុងលលាដ៍ និងខួរក្បាលរបស់កុមារីរងគ្រោះ

កាលពីខែកុម្ភៈ ២០២១ ក្រោយពីរស់នៅជាមួយគ្នាបាន ១០ ឆ្នាំ ស្ត្រីជាប្រពន្ធបានរត់ចោលគ្រួសារ ហើយ ២ ខែក្រោយមក នាងក៏ត្រលប់មកយកកូនស្រីពៅទៅចិញ្ចឹម នៅពេលបានលែងលះជាមួយប្ដី។ ក្នុងអំឡុងរស់នៅជាមួយម្ដាយរយៈពេលប្រហែល ៧ ខែ កុមារីអាយុ ៣ ឆ្នាំ ត្រូវចូលពេទ្យ ៤ ដង ដោយសារតែលេបវិស ពុលថ្នាំសម្លាប់សត្វល្អិត និងបាក់ដៃ។ល។

ករណីខាងលើបានកន្លងផុតទៅដោយមិនមានការរករឿងពីគ្រួសារខាងប្ដី ឬបញ្ហាផ្លូវច្បាប់។ ប៉ុន្តែ លើកនេះ សាច់ញាតិខាងឪពុករបស់ក្មេងស្រី បានស្នើឱ្យសមត្ថកិច្ចស្រាវជ្រាវរកមូលហេតុពិត។

«ចៅរបស់ខ្ញុំ នាងមានអាយុទើបតែ ៣ ឆ្នាំ តែមានជាប់ដែកគោលរហូតដល់ ៩ ដើមក្នុងក្បាល គឺពិតជារឿងមិនគួរឱ្យជឿ មិនអាចទទួលយកបានឡើយ» ជីតារបស់កុមារីរងគ្រោះ និយាយដូច្នេះ និងស្នើឱ្យសមត្ថកិច្ចវែកមុខរកអ្នកដែលបានធ្វើបាបចៅរបស់គាត់៕

January 19, 2022

ដំណឹងល្អ! ការរាតត្បាតរបស់ កូវីដ-១៩ ប្រភេទ អូមីក្រុង «បញ្ចប់នៅ អាហ្វ្រិកខាងត្បូង»

រយៈពេល ២ ខែ បន្ទាប់ពី អូមីក្រុង បានបង្ហាញខ្លួន អ្នកជំនាញនៅ អាហ្វ្រិខាងត្បូង ជឿជាក់ថា រលកនៃការឆ្លងរាលដាល នៃ វ៉ារ្យ៉ង់ អូមីក្រុង របស់ កូវីដ-១៩ បានបញ្ចប់នៅប្រទេសនេះ ជាមួយនឹងផលប៉ះពាល់ «មិនធ្ងន់ធ្ងរ»។

ក្រោយពីក្រុមអ្នកស្រាវជ្រាវនៅ អាហ្វ្រិកខាងត្បូង បានរាយការណ៍ដល់ក្រុមមន្ត្រីសុខាភិបាលពិភពលោកស្ដីពី វ៉ារ្យ៉ង់ អូមីក្រុង កាលពីខែវិច្ឆិកា ២០២១ អូមីក្រុង ក៏បានក្លាយជាចំណុចកណ្ដាលយ៉ាងឆាប់រហ័សនៃការព្រួយបារម្ភនៅទូទាំងសកលលោក។ អូមីក្រុង បានឆ្លងរាលដាលពាសពេញ អាហ្វ្រិកខាងត្បូង ក្នុងល្បឿនយ៉ាងលឿនគួរឱ្យខ្លាច ធ្វើឱ្យប្រទេសនេះ ក្លាយជាសម្បុកវីរុសដោយចំណាយពេលតែប៉ុន្មានថ្ងៃប៉ុណ្ណោះ ប៉ុន្តែ ក្រោយមក អូមីក្រុង មិនបានបង្កឱ្យមានស្ថានការណ៍ធ្ងន់ធ្ងរច្រើនប៉ុន្មាននោះទេ។

យោងតាម CBS ភោជនីយដ្ឋាននានានៅជាយក្រុង Johannesburg បានចាប់ផ្ដើមបើកដំណើរការធម្មតាឡើងវិញចាប់ពីសប្ដាហ៍នេះ ខណៈចរាចរណ៍ក៏ចាប់ផ្ដើមស្ទះ រីឯទីប្រជុំជនទាំងឡាយក៏មានមនុស្សទៅមកយ៉ាងកុះករ។

កាលពី ៦ ខែមុន ក្នុងការរាតត្បាតរបស់ ដេលតា មន្ទីរពេទ្យនានាបានដំណើរការយ៉ាងមមាញឹក និងលើសចំណុះ។ ចំណែកក្នុងអំឡុងពេលនៃការរាតត្បាតរបស់ អូមីក្រុង ស្ថានភាពនៅតាមមន្ទីរពេទ្យនានាមានសភាពខុសពីមុន ដោយចំនួនគ្រែប្រហែលពាក់កណ្ដាលនៅតែទំនេរ ហើយមានអ្នកជំងឺតិចតួចណាស់ដែលត្រូវការអុកស៊ីសែន ចំណែកបុគ្គលិកសុខាភិបាល ក៏ទទួលរងសម្ពាធតិចជាងមុនឆ្ងាយណាស់។

ទោះជាយ៉ាងនេះក៏ដោយ វេជ្ជបណ្ឌិត Anthony Fauci ដែលជាទីប្រឹក្សាផ្នែកសុខាភិបាលរបស់ សេតវិមាន នៃ សហរដ្ឋអាម៉េរិក កាលពីថ្ងៃទី ១៧ មករា បានបញ្ជាក់ថា អូមីក្រុង គឺជាសញ្ញាបញ្ចប់របស់ជំងឺរាតត្បាត កូវីដ-១៩ ឬអត់ គឺជា «សំណួរមិនទាន់មានចម្លើយ» ដោយវាអាស្រ័យទៅលើស្ថានភាព ថាតើ នឹងមាន វ៉ារ្យ៉ង់ ថ្មី ដែលអាចគេចពីប្រព័ន្ធប្រតិកម្មភាពស៊ាំរបស់ វ៉ារ្យ៉ង់ មុនៗដែរ ឬទេ៕

January 19, 2022

កូវីដ-១៩ នៅ កម្ពុជា៖ អ្នកវិជ្ជមានថ្មីចំនួន ៣០ នាក់ទៀត ត្រូវបានរកឃើញក្នុងអំឡុងថ្ងៃទី ១៨ មករា

ក្នុងរយៈពេល ២៤ ម៉ោងនៃថ្ងៃទី ១៨ មករា ២០២២ កម្ពុជា បានរកឃើញអ្នកវិជ្ជមានថ្មីនឹងកូវីដ-១៩ ចំនួន ៣០ នាក់ រួមនឹងអ្នកជាសះស្បើយ ១៧ នាក់ ខណៈអ្នកស្លាប់ដោយសារជំងឺនេះ «ពុំមាន»។

អ្នកវិជ្ជមានថ្មីទាំងនេះគឺសុទ្ធតែជាករណី អូមីក្រុង ក្នុងនោះ មានករណីឆ្លងក្នុងសហគមន៍ ២៣ នាក់ និងករណីនាំចូល ៧ នាក់។

January 19, 2022

រាជបុត្រីរបស់មហាក្សត្រនៃ ប្រទេសព្រុយណេ រៀបអភិសេក រយៈពេល ១០ ថ្ងៃ

ព្រះនាង Fadzilah នៃរាជាណាចក្រព្រុយណេ ប្រារព្ធព្រះរាជពិធីអភិសេករយៈពេលរហូតដល់ ១០ ថ្ងៃ ជាមួយគូដណ្ដឹង ឈ្មោះ Al-Hashimi។

ព្រះនាង Fadzilah Lubabul Bolkiah វ័យ ៣៦ វស្សា រួមនឹងគូដណ្ដឹង Abdullah Nabil Mahmoud Al-Hashimi ប្រារព្ធរាជពិធីអភិសេក ចាប់ពីថ្ងៃទី ១៦ មករា ដល់ ២៥ មករា។ យោងតាមគេហទំព័រ Hype របស់ ម៉ាឡេស៊ី ព្រះរាជពិធីនានាត្រូវបានប្រារព្ធនៅថ្ងៃដំបូងនៃពិធីអភិសេក ចំណែកពិធី «ចូលរោង» ត្រូវបានធ្វើឡើងមួយថ្ងៃបន្ទាប់ ហើយតមកទៀតគឺជារាជពិធីលៀងសាយភោជន និងចុងក្រោយគឺពិធី «ឆ្លងរោង»។

កាលពីម្សិលមិញ គ្រួសារខាងប្រុសបានបញ្ជូនប្រតិភូជាមេបា ចេញដំណើរពីគេហដ្ឋានរបស់កូនកំលោះ នៅ Darussidiq ក្នុងតំបន់ Jerudong នាំយកគ្រឿងភ័ស្ដុភារបណ្ណាការទៅកាន់រាជវាំង Nurul Iman ជាទីគង់ប្រថាប់របស់មហាក្សត្រព្រុយណេ ដើម្បីសម្ដែងការគោរព។

រាជពិធីត្រូវបានធ្វើឡើងក្រោមការយកចិត្តទុកដាក់ពីសំណាក់សមាជិករាជវង្សជាច្រើនអង្គ ក្នុងនោះក៏មានវត្តមានរបស់អង្គម្ចាស់ Abdul Mateen ដែលជាព្រះអនុជរបស់ព្រះនាង Fadzilah។

កាំភ្លើងធំចំនួន ១៧ គ្រាប់ ត្រូវបានបាញ់ដើម្បីបញ្ជាក់ថា រាជវង្សព្រុយណេ បានទទួលយកបណ្ណាការ។ ក្រុមប្រតិភូមេបាខាងកូនកំលោះ ក៏ត្រូវបានអញ្ជើញឱ្យចូលក្នុងបន្ទប់លៀងសាយភោជនរបស់រាជវាំង Nurul Iman និងត្រូវបានទទួលស្វាគមន៍ដោយសមាជិករាជវង្ស។

ព្រះនាង Fadzilah គឺជារាជបុត្រីរបស់មហាក្សត្រព្រុយណេ Hassanal Bolkiah ជាស្ដេចដែលគ្រងរាជសម្បត្តិបានយូរជាងគេលំដាប់ទី ២ ក្នុងពិភពលោក បន្ទាប់ពីម្ចាស់ក្សត្រី Elizabeth របស់ចក្រភពអង់គ្លេស៕

January 19, 2022

តាំងពីទើបកើត ត្រូវឪពុកម្ដាយលក់ឱ្យអ្នកដទៃ ប៉ុន្តែ ដល់ពេលបានរកឃើញឪពុកម្ដាយបង្កើតវិញ ក៏ត្រូវបានបោះបង់ចោលជាថ្មី

(ប្រទេសចិន)-ឪពុកម្ដាយរបស់ Liu Xuezhou ដែលជាក្មេងប្រុសជំទង់វ័យ ១៧ ឆ្នាំ នៅខេត្ត Hebei បានលក់កូនឱ្យអ្នកដទៃតាំងតែពីកូនទើបចាប់កំណើត ហើយបន្ត «ទាត់កូនចោល» នៅពេលកូនបានរកឃើញពួកគេ។

ក្នុងសារដែលបានបង្ហោះលើបណ្ដាញសង្គមកាលពីថ្ងៃទី ១៧ មករា Liu Xuezhou បានឱ្យដឹងថា ខ្លួនបានកើតក្នុងឆ្នាំ ២០០៥ មុនពេលឱពុកម្ដាយបានរៀបការ ហើយក៏ត្រូវបានលក់ឱ្យទៅអ្នកដទៃដើម្បីយកប្រាក់មករៀបការនឹងគ្នា។ តាមរយៈមនុស្សម្នាក់ Liu ក៏មានគ្រួសារថ្មី និងត្រូវបានឪពុកម្ដាយធម៌ ចិញ្ចឹម បីបាច់រក្សា។ ប៉ុន្តែ ជាអកុសល ឪពុកម្ដាយធម៌របស់ Liu ក៏បានស្លាប់នៅក្នុងហេតុការណ៍ផ្ទុះមួយ នៅពេលដែល Liu មានអាយុទើបតែ ៤ ឆ្នាំ។

ក្រោយមក Liu ត្រូវបានលោកតា និងលោកយាយ រួមនឹងញាតិខាងឪពុកម្ដាយធម៌ ជួយគ្នាចិញ្ចឹម។ នៅក្នុងវ័យ ១៧ ឆ្នាំ Liu បច្ចុប្បន្នគឺជានិស្សិតឆ្នាំទី ២ នៃសាកលវិទ្យាល័យមួយ នៅទីក្រុង Shijiazhuang ខេត្ត Hebei របស់ ប្រទេសចិន និងបានធ្វើការងារមួយចំនួនក្នុងរយៈពេលប៉ុន្មានឆ្នាំមកនេះ។ Liy រស់នៅដោយមានការផ្គត់ផ្គង់ជំនួយពីរដ្ឋាភិបាលសម្រាប់កុមារកំព្រា។

កាលពីដើមខែមុន Liu បានសម្រេចចិត្តស្វែងរកឪពុកម្ដាយបង្កើត តាមរយៈការបង្ហោះសារនៅលើបណ្ដាញសង្គម។ មួយសប្ដាហ៍ក្រោយមក ប៉ូលីសខេត្ត Shanxi ក៏បានរកឃើញថា បុរសដែលមានឈ្មោះថា Ding Shuangquan គឺជាឪពុកបង្កើតរបស់ Liu។

អាជ្ញាធរក្នុងតំបន់ កាលពីចុងខែកន្លង បានប្រារព្ធពិធីជួបជុំរវាង Liu និង Ding។ កាលពី ១ សប្ដាហ៍កន្លងទៅ Liu ក៏បានជួបម្ដាយបង្កើតរបស់ខ្លួននៅតំបន់ ម៉ុងហ្គោលីខាងក្នុង (Inner Mongolia)។ ប៉ុន្តែ បន្ទាប់ពីពិធីជួបជុំឪពុកម្ដាយ Liu ក៏ត្រូវបានឪពុកម្ដាយបង្កើតបោះបង់ម្ដងទៀត។

Liu បានរៀបរាប់ថា ឪពុកម្ដាយបង្កើតសុទ្ធតែមិនទទួលយករូបខ្លួន ព្រោះពួកគេបានលែងលះ និងសុទ្ធតែមានគ្រួសារថ្មីរៀងៗខ្លួន។ ទាំងម្ដាយ ទាំងឪពុក សុទ្ធតែបានស្នើឱ្យ Liu នៅឱ្យឆ្ងាយពីពួកគេ ដោយសារតែយល់ថា វត្តមានរបស់ Liu ធ្វើឱ្យជីវភាពរបស់ពួកគេត្រូវច្របូកច្របល់។ ពុំមានអ្នកណាម្នាក់ព្រមជួយផ្គត់ផ្គង់ប្រាក់កាសដល់ Liu ព្រោះតែក្មេងជំទង់នេះជិតពេញវ័យ។

Liu Xuezhou ឱ្យដឹងថា ឪពុកម្ដាយបង្កើតគ្រាន់តែយល់ព្រមជួបមុខកូន ក៏ដោយសារតែសម្ពាធពីសាធារណមតិ ហើយក្រោយមកក៏បានផ្ដាច់ទំនាក់ទំនង។ ម្ដាយបង្កើតបានប្លុក Liu នៅលើកម្មវិធី WeChat ចំណែកឪពុកបង្កើតហាក់ដូចមានការព្រួយបារម្ភ ខ្លាចប្រពន្ធថ្មីរបស់គាត់ប្ដឹងលែងលះ បើសិនគាត់ទទួលយក Liu ឱ្យចូលរស់នៅក្នុងគ្រួសារ។

«ខ្ញុំមិនយល់សោះថា ហេតុអ្វីបែរជានិយាយថា ខ្ញុំជាអ្នកអុកឡុកជីវភាពរបស់គាត់ទៅវិញ។ គឺគាត់ហ្នឹងហើយដែលជាអ្នក បានធ្វើឱ្យជីវិតរបស់ខ្ញុំច្របូកច្របល់» Liu សរសេរផ្ញើជូនឪពុកបង្កើតរបស់ខ្លួនដូច្នេះ នៅលើបណ្ដាញសង្គម៕

January 19, 2022

ហេតុការណ៍ផ្ទុះភ្នំភ្លើងឯ ប្រទេសតុងហ្គោ! ទិដ្ឋភាពមួយចំនួន នៅមុន និងក្រោយការផ្ទុះភ្នំភ្លើង

រូបភាពដែលថតពីទីខ្ពស់បង្ហាញថា ប្រទេសតុងហ្គោ ត្រូវគ្របដណ្ដប់ដោយធូលី ផេះ ខណៈដែលហេដ្ឋារចនាសម្ព័ន្ធមួយចំនួនត្រូវដួលរលំ បន្ទាប់ពីហេតុការណ៍ផ្ទុះភ្នំភ្លើង។

មជ្ឈមណ្ឌលផ្កាយរណបរបស់ អង្គការសហប្រជាជាតិ បញ្ចេញរូបថតដំបូងៗ ដែលទាក់ទិងនឹងការខូចខាតនៅ ប្រទេសតុងហ្គោ ក្រោយពីហេតុការណ៍ផ្ទុះភ្នំភ្លើងនៅប្រទេសនេះ ដែលបានបង្កឱ្យមានរលកយក្សកាលពីចុងសប្ដាហ៍កន្លង។ ផ្លូវថ្នល់ រុក្ខជាតិ ផ្ទះសម្បែងជាដើមនៅប្រទេសនេះ ត្រូវបានគ្របដណ្ដប់ដោយផេះ ធូលី។

នាយករដ្ឋមន្ត្រីនៃ ប្រទេសនូវែលសែឡង់ ដែលនៅក្បែរខាង បានឱ្យដឹងថា បើទោះជា រដ្ឋធានី Nuku’alofa ត្រូវបានគ្របដណ្ដប់ដោយផេះ និងធូលីយ៉ាងក្រាស់ ប៉ុន្តែ ស្ថានការណ៍នៅទីនេះស្ងប់ស្ងាត់ និងមានស្ថិរភាព។

ក្រោយពីទទួលរងផលប៉ះពាល់ពីហេតុការណ៍ផ្ទុះភ្នំភ្លើង និងរលកយក្ស ប្រទេសតុងហ្គោ ហាក់នៅតែមិនទាន់អាចភ្ជាប់ទំនាក់ទំនងជាមួយនឹងពិភពខាងក្រៅ ដោយសារដាច់ខ្សែកាបអ៊ីនធើណិត។ រូបភាពស្ដីពីប្រទេសនេះ ភាគច្រើនត្រូវបានថតដោយផ្កាយរណប។

ក្រសួងការបរទេស និងពាណិជ្ជកម្ម នៃ ប្រទេសនូវែលសេឡង់ កាលពីថ្ងៃទី ១៨ មករា ឱ្យដឹងថា មានមនុស្ស ២ នាក់ បានបាត់បង់ជីវិតនៅក្នុងគ្រោះធម្មជាតិ នៅ តុងហ្គោ ក្នុងនោះមានជនរងគ្រោះម្នាក់ជា ពលរដ្ឋអង់គ្លេស។ តុងហ្គោ មិនទាន់ប្រកាសអំពីចំនួនអ្នករងគ្រោះនៅឡើយ។

ការិយាល័យចាត់ចែងលើបញ្ហាមនុស្សធម៌របស់ អង្គការសហប្រជាជាតិ បានឱ្យដឹងកាលពីថ្ងៃទី ១៧ មករា ថា មានការខូចខាតច្រើន ពិសេសគឺហេដ្ឋរចនាសម្ព័ន្ធជុំវិញកោះចម្បង Tongatapu។

January 19, 2022

Author: សឿន សំណាង