សឿន សំណាង - La Reine Media

ប្រធានាធិបតីរបស់ បួគីណា ហ្វាសូ ត្រូវវរសេនីយ៍ទោការពាររដ្ឋធានី ធ្វើរដ្ឋប្រហារទម្លាក់ពីអំណាច

វរសេនីយ៍ទោ Damiba ដែលជាអ្នកទទួលខុសត្រូវក្នុងការការពាររដ្ឋធានី អៅហ្គាឌូហ្គូ (Ouagadougou) ប្រកាសទម្លាក់ប្រធានាធិបតី Roch Marc Christian Kabore រំលាយរដ្ឋាភិបាល និងសភា ព្រមទាំងបិទព្រំដែន។

ការប្រកាសនៅលើទូរទស្សន៍ជាតិ បួគីណា ហ្វាសូ (Burkina Faso) កាលពីយប់កន្លងទៅ ក៏បានឱ្យដឹងថា រដ្ឋប្រហារនេះកើតឡើងដោយមិនមានការបង្ហូរឈាម ហើយអ្នកដែលត្រូវបានចាប់ខ្លួន កំពុងស្ថិតក្នុងទីសុវត្ថិភាព។

នៅក្នុងវីដេអូដែលផ្សាយលើកញ្ចក់ទូរទស្សន៍ វរសេនីយ៍ទោ Paul-Henri Sandaogo Damiba ដែលជាមេរដ្ឋប្រហារ ស្លៀកពាក់ឈុតទាហាន និងមួកពណ៌ក្រហម សម្លឹងមើលត្រង់មកកាមេរ៉ា ក្នុងគ្រាដែលថ្នាក់ក្រោមកំពុងអានសេចក្ដីប្រកាស។

កងកម្លាំងរដ្ឋប្រហារដែលហៅខ្លួនឯងថា «ចលនាស្នេហាជាតិដើម្បីការពារ និងស្ដារប្រទេស» (MPSR) បានចោទប្រកាន់ប្រធានាធិបតីនៃប្រទេស បួគីណា ហ្វាសូ ថា បានបង្កឱ្យមានអំពើហិង្សាចំពោះក្រុមប្រដាប់អាវុធអ៊ីស្លាម និងបានសន្យាថា នឹងពន្លឿនដំណើរការផ្ទេរអំណាច។

មកដល់បច្ចុប្បន្ន មិនទាន់ដឹងច្បាស់ថា MPSR ទទួលបានការគាំទ្រពីសំណាក់កងទ័ព បួគីណា ហ្វាសូ ដែរ ឬយ៉ាងណានៅឡើយ។

January 25, 2022

ក្រសួងសាធារណការ៖ ស្ថានីយបញ្ចូលថាមពលថ្ម Evs សម្រាប់រថយន្តអគ្គិសនី កំពុងត្រូវបានរៀបចំដំឡើង

ក្រសួងសាធារណការ និងដឹកជញ្ជូន ប្តេជ្ញាចិត្តប្រកបដោយការទទួលខុសត្រូវខ្ពស់ ក្នុងការជំរុញការប្រើប្រាស់រថយន្តដើរដោយថាមពលអគ្គិសនី ដើម្បីរួមចំណែកកាត់បន្ថយការបំភាយឧស្ម័នកាបូនទៅក្នុងបរិយាកាស។

ឯកឧត្តម ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងដូចខាងលើ នៅក្នុងជំនួបជាមួយគណៈប្រតិភូសហព័ន្ធឧស្សាហកម្មយានយន្តកម្ពុជា (CAIF) ដឹកនាំដោយលោកបណ្ឌិត តាន់ មុនីវណ្ណ ប្រធានសហព័ន្ធ និងជាអនុប្រធានសភាពាណិជ្ជកម្មកម្ពុជា។

ក្នុងជំនួបខាងលើដែលត្រូវបានធ្វើឡើងកាលពីព្រឹកមិញ នៅទីស្ដីការក្រសួងសាធារណការ ក៏មានវត្តមានរបស់តំណាងរបស់ក្រុមហ៊ុន HGB Group, តំណាងរបស់ក្រុមហ៊ុន Mercedes, តំណាងក្រុមហ៊ុន HGB Group និង នាយកប្រតិបត្តិសហព័ន្ធឧស្សាហកម្មយានយន្តកម្ពុជា ផងដែរ។

រាជរដ្ឋាភិបាលគាំទ្រដល់ការវិនិយោគលើសម្ព័ន្ធសម្រាប់ដំណើរការរថយន្តដើរដោយថាមពលអគ្គិសនី នេះបើតាម ឯកឧត្ដមទេសរដ្ឋមន្ដ្រី ស៊ុន ចាន់ថុល។ លោកបន្ថែមថា សេចក្តីព្រាងគោលនយោបាយដឹកជញ្ជូនផ្លូវគោក ដើម្បីជំរុញការប្រើប្រាស់រថយន្តអគ្គិសនី កំពុងត្រូវបានរៀបចំ។

ក្រសួងសាធារណការ និងដឹកជញ្ជូន ក៏កំពុងសហការជាមួយអង្គការអភិវឌ្ឍន៍សហប្រជាជាតិ (UNDP)ដើម្បីដំឡើងស្ថានីយបញ្ចូលថាមពលថ្ម Evs ចំនួន ៥ ទីតាំង ទៀតផង។ ទីតាំងដែលគ្រោងនឹងត្រូវដំឡើងស្ថានីយបញ្ចូលថាមពលថ្ម រួមមាន ទីស្តីក្រសួងសាធារណការ និងបណ្តារាជធានី-ខេត្តមួយចំនួន គម្រោងដំឡើងស្ថានីយថ្ម EV នៅតាមផ្លូវល្បឿនលឿនភ្នំពេញ-ក្រុងព្រះសីហនុ ដែលគ្រោងដាក់ឱ្យប្រើប្រាស់ក្នុងខែកញ្ញា ឆ្នាំ២០២២ និងគម្រោងដំឡើងស្ថានីយសាកថ្ម EV នៅក្នុងរាជធានីចំនួន ១០ ទីតាំង ដោយសហការជាមួយវិស័យឯកជន។

គណៈប្រតិភូ CAIF បានសំណូមពរឱ្យក្រសួងជួយសម្រួលលើការងារបច្ចេកទេសពាក់ព័ន្ធនឹងការដំឡើងឧបករណ៍ស្តង់ដាររួម ដែលអនុញ្ញាតឱ្យរថយន្តអគ្គិសនីគ្រប់ប្រភេទ អាចប្រើប្រាស់រួមគ្នាបាន៕

January 24, 2022

«ស្រីស្អាតឌីជីថល» រកបានចំណូលរាប់លានដុល្លារអាម៉េរិក ពីរូបថត NFT ផ្ទាល់ខ្លួន

Irene Zhao អាយុ ២៨ ឆ្នាំ បានដាក់រូបថត NFT (Non-Fungible Token ឬ ទ្រព្យដែលមិនអាចផ្លាស់ប្ដូរបាន) របស់ខ្លួននៅលើផ្សារជួញដូរទ្រព្យឌីជីថល ក្នុងបំណងសាកល្បងប៉ុណ្ណោះ ប៉ុន្តែ នឹកស្មានមិនដល់ថា មានការជួញដូររហូតដល់ ៦ លានដុល្លារអាម៉េរិក។

កម្រងរូបថតរបស់ Irene ត្រូវបានដាក់ឡើងលើផ្សារ NFT OpenSea កាលពីថ្ងៃទី ១៤ មករា ហើយមកដល់បច្ចុប្បន្ន មានមនុស្ស ៤៩៩ នាក់ បានទិញ ជាមួយនឹងតម្លៃសរុបឡើងដល់ ២,៣០០ ETH (ប្រាក់ឌីជីថល Ethereum) ស្មើនឹង ៦ លានដុល្លារអាម៉េរិក។ តម្លៃទាបបំផុតនៅក្នុងកម្រងរូបថតរបស់នាងគឺ ០.៩៥ ETH។ បុគ្គលល្បីឈ្មោះជាច្រើនរូបដូចជា អ្នកវិនិយោគ Mike Novogratz ឬ YouTuber Logan Paul ជាដើម ត្រូវបានគេជឿថា បានទិញរូបថត NFT រាប់សិបសន្លឹករបស់ Irene។

Irene បានប្រាប់ CoinDesk ថា ដំបូងឡើយនាងមានបំណងសាកល្បងប៉ុណ្ណោះ។ វាជារឿងដ៏គួរឱ្យភ្ញាក់ផ្អើលនៅពេលរូបថត NFT ទាំងនេះត្រូវបានគេទិញអស់យ៉ាងឆាប់រហ័ស និងមានតម្លៃខ្ពស់។ «ខ្ញុំបានចេញទៅក្រៅប្រហែល ៤០ នាទី ហើយពេលត្រលប់មកវិញ កម្រងរូបថត NFT ៥០០ សន្លឹក ត្រូវបានគេទិញអស់រលីង» នាងបន្ថែមដូច្នេះ។

Irene Zhao គឺជាតារាបង្ហាញម៉ូដនៅលើ Instagram និងមានអ្នកតាមដានជិត ៤ សែននាក់នៅលើបណ្ដាញសង្គមនេះ។ កាលពីឆ្នាំ ២០២១ នាងក៏ធ្លាប់បានល្បីឈ្មោះនៅក្នុងពិភព blockchain បន្ទាប់ពីក្លាយជានាយិកាផ្នែកទីផ្សាររបស់ Konomi Network ជាគម្រោងគ្រប់គ្រងទ្រព្យឌីជីថលលើ blockchain។

រូបថតរបស់ Irene ត្រូវបានបង្កើតឡើងក្នុងបំណងធ្វើជា sticker សម្រាប់អ្នកប្រើប្រាស់ Telegram។ កម្រង sticker នេះ មានអ្នកទាញយកមកប្រើប្រាស់ជាង ២,០០០ លើក បន្ទាប់ពីបង្ហាញខ្លួនបាន ៤ ថ្ងៃ។ អ្នកគាំទ្រម្នាក់ដែលមានរហ័សនាមថា libevm បានណែនាំឱ្យ Irene សាកល្បងប្រែក្លាយវាទៅជា NFT។

រូបថត NFT របស់ Irene ត្រូវបានបង្កើតឡើងដោយយោងទៅតាមការទាក់ទាញអារម្មណ៍ពីកម្រងរូបថត Ghozali Everday របស់និស្សិតជនជាតិឥណ្ឌូណេស៊ី។ កម្រងរូបថតដែលថតក្នុងរយៈពេល ៤ ឆ្នាំ បានជួយឱ្យ Ghozali Ghozalo ក្លាយជាបុគ្គលល្បីឈ្មោះ ហើយការជួញដូររូបថតទាំងនេះមានតម្លៃឡើងដល់ ១ លានដុល្លារអាម៉េរិក៕

January 24, 2022

សហរដ្ឋអាម៉េរិក ពិនិត្យលទ្ធភាពក្នុងការ «បង្កើតរូបិយវត្ថុដុល្លារឌីជីថល»

យោងតាមធនាគារជាតិអាម៉េរិក (FED/Federal Reserve System) ប្រាក់ដុល្លារអាម៉េរិកឌីជីថល ដែលគាំទ្រដោយរដ្ឋាភិបាល នឹងជួយឱ្យការជួញដូរ និងទូទាត់ប្រាក់ប្រព្រឹត្តទៅយ៉ាងឆាប់រហ័ស និងងាយស្រួលសម្រាប់មនុស្សភាគច្រើន បើធៀបនឹងប្រព័ន្ធធនាគារបច្ចុប្បន្ន។

ថ្មីៗនេះ FED បានប្រកាសជាសាធារណៈអំពីចំណុចវិជ្ជមាន និងអវិជ្ជមានរបស់ប្រាក់ដុល្លារឌីជីថល បំណងប្រមូលមតិយោបល់ពីសាធារណជន ដើម្បីកំណត់ និងសម្រេចថា តើគួរបញ្ចេញប្រាក់ឌីជីថល ឬទេ។

ការអភិវឌ្ឍប្រាក់ដុល្លារអាម៉េរិកឌីជីថលនេះនឹងជាការផ្លាស់ប្ដូរយ៉ាងធំទាក់ទងនឹងតួនាទីរបស់រដ្ឋនៅក្នុងប្រព័ន្ធហិរញ្ញវត្ថុ ហើយវាមានចំណុចវិជ្ជមានជាច្រើន។ ក៏ប៉ុន្តែ និយាយអំពីចំណុចអវិជ្ជមានវិញ អ្វីដែលគេអាចមើលឃើញច្បាស់ជាងគេ នោះគឺថា ភាពទាក់ទាញរបស់បណ្ដាធនាគារពាណិជ្ជកម្មនឹងត្រូវអនថយ។

ឥរិយាបថរបស់ FED ត្រូវបានធ្វើឡើងនៅក្នុងគ្រាដែលប្រទេសជាង ៩០ ក្នុងពិភពលោក កំពុងអភិវឌ្ឍរូបិយវត្ថុឌីជីថលដោយឡែករៀងៗខ្លួន។ ធនាគារកណ្ដាលរបស់អឺរ៉ុប បញ្ចេញ ប្រាក់អឺរ៉ូឌីជីថល (EUR) ចំណែក ប្រទេសចិន វិញ ដាក់ឱ្យប្រើប្រាស់សាកល្បង ប្រាក់យុនឌីជីថល (e-CNY) ដែលបានអភិវឌ្ឍតាំងតែពីឆ្នាំ ២០១៤។

ប្រកាសរបស់ FED ក៏បានឱ្យដឹងថា រដ្ឋាភិបាលសហរដ្ឋអាម៉េរិក កំពុងស្វែងរកវិធីដើម្បីរក្សាអំណាចរបស់ប្រាក់ដុល្លារអាម៉េរិក នៅក្នុងទីផ្សារពិភពលោក៕

January 24, 2022

(វីដេអូ)-រ៉ូបូត សម្ដែងសមត្ថភាពជិះស្គីលើភ្នំ មិនចាញ់កីឡាករអាជីពឡើយ

(ប្រទេសចិន)-ការប្រណាំងស្គីលើផ្ទៃព្រឹលមិនមែនសម្រាប់តែកីឡាករដែលមានសមត្ថភាពនោះទេ ប៉ុន្តែ រ៉ូបូតក៏អាចសម្ដែងបានយ៉ាងល្អនូវកីឡារដូវរងានេះផងដែរ។

ត្រូវបានអភិវឌ្ឍដោយសាកលវិទ្យាល័យចរាចរណ៍សៀងហៃ រ៉ូបូតដែលមានជើង ៦ នេះ បានឆ្លងផុតវិញ្ញាសាធ្វើតេស្តស្ដីពីការជិះស្គីលើព្រឹលនៅលើកំណាត់ផ្លូវមួយនៃចង្កេះភ្នំនៅតំបន់ Shenyang ក្នុងខេត្ត Liaoning ប្រទេសចិន ក្នុងខែនេះ។

រ៉ូបូតនេះមានរូបរាងដូចសុនក ដោយមានជើង ៤ សម្រាប់រក្សាលំនឹង និងជើង ២ ទៀតសម្រាប់រក្សាបន្ទះស្គី។ នៅក្នុងការធ្វើតេស្តកាលពីពេលកន្លង រ៉ូបូតនេះបានជិះស្គីក្នុងល្បឿនជាង ១០ ម៉ែត្រ/វិនាទី លើផ្លូវមានជម្រាល ១៨ អង្សា និងប្រវែង ៤០០ ម៉ែត្រ។ វាបានបញ្ចេញកាយវិការលំបាកៗជាច្រើន ដូចជាការបង្កើនល្បឿន បត់បែន បង្កើតគម្រោងផ្លូវត្រូវរត់ គេចពីឧបសគ្គ និងទាក់ទងជាមួយមនុស្ស។ រ៉ូបូតនេះមានសមត្ថភាពក្នុងការធ្វើត្រាប់តាមអ្នកជិះស្គីផងដែរ។

ក្នុងអនាគត អ្នកវិទ្យាសាស្ត្រជឿថា រ៉ូបូត ដែលត្រូវបានបញ្ជាពីចម្ងាយអាចប្រកួតប្រជែងនឹងមនុស្សនៅក្នុងវិស័យដូច្នេះ។ ក្រៅពីការសម្ដែង រ៉ូបូតនេះនឹងត្រូវបានប្រើប្រាស់សម្រាប់ការល្បាត ជួយសង្គ្រោះលើភ្នំ និងជួយការពារសន្តិសុខរបស់អ្នកជិះស្គីលើព្រឹល៕

January 24, 2022

គណនី WeChat របស់ នាយករដ្ឋមន្ត្រីអូស្ត្រាលី ត្រូវគេហែកចូលគ្រប់គ្រង និងក្លាយជាទំព័រឃោសនាឱ្យចិន

គណនីបណ្ដាញសង្គមចិន WeChat របស់ នាយករដ្ឋមន្ត្រីនៃ ប្រទេសអូស្ត្រាលី លោក Scott Morrison ត្រូវបានគេហែក (Hack) ចូលគ្រប់គ្រង និងត្រូវបានប្ដូរទៅជាទំព័រដែលឃោសនាឱ្យ ប្រទេសចិន ទៅវិញ។

ដំណឹងដែលត្រូវបានចុះផ្សាយលើសារព័ត៌មាន News.com.au នាថ្ងៃទី ២៤ មករានេះ ត្រូវបានគេរិះគន់ថាជា «អន្តរាគមន៍របស់បរទេស» នៅក្នុងឆ្នាំដែល អូស្ត្រាលី ត្រូវធ្វើការបោះឆ្នោត និងជាទង្វើបំពានច្បាប់។

អ្នកតាមដានប្រហែល ៧៦,០០០ នាក់ នៃគណនីរបស់លោក Morrison ត្រូវបានប្រកាសថា ទំព័រនេះត្រូវបានប្ដូរទៅជា «ជីវភាពថ្មីរបស់ពលរដ្ឋអូស្ត្រាលីដើមកំណើតចិន» ក្នុងគ្រាដែលរូបតំណាងក៏ត្រូវបានផ្លាស់ប្ដូរ អមជាមួយនឹងអក្សរដែលសរសេរថា «ផ្ដល់ព័ត៌មានអំពីជីវភាពដល់ជនជាតិចិន នៅ អូស្ត្រាលី»។

តំណាងរាស្ត្រអូស្ត្រាលី James Paterson ដែលជាប្រធានគណៈកម្មការចម្រុះផ្នែកចារកម្ម និងសន្តិសុខ នៅសភាអូស្ត្រា យល់ថា ទីក្រុងប៉េកាំង កំពុងមានបំណង «ធ្វើការត្រួតពិនិត្យ ចាប់ពិរុទ្ធនៅក្រៅព្រំដែន និងលូកដៃចូលក្នុងសង្គមប្រជាធិបតេយ្យរបស់យើង»៕

January 24, 2022

ក្មេងស្រីតូចអាយុ ១៥ ខែ រស់ក្បែរសាកសពម្ដាយអស់រយៈពេល ៥ ថ្ងៃ នៅ សហរដ្ឋអាម៉េរិក

ក្មេងស្រីម្នាក់អាយុ ១៥ ខែ បានរស់នៅក្បែរសាកសពម្ដាយរយៈពេល ៥ ថ្ងៃ នៅក្នុងផ្ទះមួយខ្នងដែលសាងសង់សម្រាប់ពលរដ្ឋគ្មានផ្ទះសំបែង នៅក្នុងទីក្រុង New York សហរដ្ឋអាម៉េរិក។

យោងតាមការិយាល័យធ្វើតេស្តវេជ្ជសាស្ត្រនៃទីក្រុង New York ក្មេងស្រីអាយុ ១៥ ខែ ឈ្មោះ Lyric Laboy ត្រូវបានរកឃើញនៅក្នុងគំនរវត្ថុខាងក្រោមគ្រែ ជិតសាកសពរបស់ម្ដាយ ក្នុងផ្ទះមួយខ្នង នៅមជ្ឈមណ្ឌលគ្រួសារ East River កាលពីថ្ងៃទី ២៥ មិថុនា ២០២១។

ស្ត្រីជាម្ដាយមានឈ្មោះថា Shelbi Westlake អាយុ ២៦ ឆ្នាំ បានស្លាប់ដោយសារតែបានប្រើប្រាស់ថ្នាំអ្វីមួយ នេះបើតាមសារព័ត៌មាន New York Post ចុះផ្សាយកាលពីថ្ងៃទី ២២ មករា ២០២។ យោងតាមបណ្ដឹងរបស់លោក Quraan Laboy (អាយុ ៣១ ឆ្នាំ) ដែលជាឪពុករបស់ស្ត្រីរងគ្រោះ ក្មេងស្រី Lyric ត្រូវដេកដួលក្នុងថ្លុកលាមក បាត់បង់ជាតិទឹកយ៉ាងធ្ងន់ធ្ងរ និងត្រូវបានបញ្ជូនទៅសង្គ្រោះបន្ទាន់។

បុរសជាឪពុក គ្រោងនឹងដាក់ពាក្យប្ដឹងប្រឆាំងអាជ្ញាធរក្រុង និងស្ថាប័នផ្ដល់សេវាសម្រាប់ពលរដ្ឋគ្មានផ្ទះសំបែងនៅ New York (DHS) និងទាមទារសំណង ៥ លានដុល្លារ។ DHS បានច្រានចោលការចោទប្រកាន់ដែលថា ក្មេងស្រី Lyric ត្រូវបានបោះបង់ចោលឱ្យនៅម្នាក់ឯងក្នុងរយៈពេល ៥ ថ្ងៃ ប៉ុន្តែ មិនបាននិយាយច្បាស់ថា យូរប៉ុនណានោះទេ។

បច្ចុប្បន្ន ករណីនេះកំពុងត្រូវបានស៊ើបអង្កេតបន្ត។ បុរសជាឪពុករបស់ស្ត្រីរងគ្រោះ បានឱ្យដឹងថា ក្រោយហេតុការណ៍នេះ ចៅរបស់គាត់មិនទាន់បានធូរស្បើយដូចដើមនៅឡើយ៕

January 24, 2022

កូវីដ-១៩! កម្ពុជា រកឃើញអ្នកឆ្លងថ្មី ៤០ នាក់ទៀត ក្នុងថ្ងៃទី ២៣ មករា ២០២២

អ្នកវិជ្ជមានថ្មីទាំងអស់នេះសុទ្ធតែជាករណី អូមីក្រុង ក្នុងនោះមានករណីឆ្លងក្នុងសហគមន៍ ២៥ នាក់ និងអ្នកដំណើរពីបរទេស ១៥ នាក់។

January 24, 2022

ក្រុមហ៊ុន SpaceX ទទួលបានកិច្ចព្រមព្រៀងដឹកទំនិញតម្លៃ ១០២ លានដុល្លារ

ទ័ពអាកាសអាម៉េរិក បានប្រគល់កិច្ចព្រមព្រៀងរយៈពេល ៥ ឆ្នាំ ឱ្យ SpaceX ដើម្បីអភិវឌ្ឍមធ្យោបាយដឹកទំនិញ និងជំនួយដោយប្រើប្រាស់រ៉ុក្កែត។

កិច្ចព្រមព្រៀងដែលត្រូវបានចុះហត្ថលេខាកាលពីថ្ងៃទី ១៤ មករា ប៉ុន្តែ ទើបត្រូវបាន AviationWeek ចុះផ្សាយកាលពីពេលថ្មីៗនេះ គឺស្ថិតក្នុងកម្មវិធីដឹកជញ្ជូនតាមរ៉ុក្កែតរបស់បន្ទប់ពិសោធន៍-ស្រាវជ្រាវនៃកងទ័ពអាកាសអាម៉េរិក (AFRL) ដើម្បីទាញយកអត្ថប្រយោជន៍នៃរ៉ុក្កែតពាណិជ្ជកម្មខ្នាតធំសម្រាប់កិច្ចការដឹកជញ្ជូនសកលរបស់ក្រសួងការពារជាតិសហរដ្ឋអាម៉េរិក។

ដោយមានតម្លៃឡើងដល់ ១០២ លានដុល្លារ នេះគឺជាកិច្ចព្រមព្រៀងធំបំផុតមិនធ្លាប់មានពីមុនមក ចំពោះការដឹកជញ្ជូនទំនិញតាមរ៉ុក្កែត នេះបើតាមប្រធានកម្មវិធី លោក Greg Spanjers ដែលបានប្រាប់ Space News កាលពីពេលថ្មីៗនេះ។

កិច្ចព្រមព្រៀងនេះមិនបាននិយាយលម្អិតថានឹងប្រើប្រាស់មធ្យោបាយមួយណារបស់ SpaceX ប៉ុន្តែ កន្លងមក SpaceX ធ្លាប់បានប្រើប្រាស់រ៉ុក្កែត Falcon 9 និង Falcon Heavy នៅក្នុងបេសកកម្មយោធា ស្រាបពេលដែល ប្រធាននាយកប្រតិបត្តិរបស់ SpaceX គឺមហាសេដ្ឋី Elon Musk បាននិយាយថា លោកចាត់ទុក Starship ជាយានរបស់អនាគត។

AFRL មិនទាន់បង្ហើបឱ្យដឹងអំពីពេលវេលាដែលជើងហោះហើរដំបូងត្រូវបានធ្វើឡើង ប៉ុន្តែ មានផែនការបន្ថែមក្រុមហ៊ុនជាច្រើនផ្សេងទៀតទៅក្នុងកម្មវិធីនេះ ទៅតាមពេលវេលាជាក់ស្ដែង៕

January 24, 2022

WHO ថា អូមីក្រុង អាចបញ្ចប់ជំងឺរាតត្បាតសកលនៅ អឺរ៉ុប

វីរុសកូវីដ-១៩ ប្រភេទ អូមីក្រុង ធ្វើឱ្យជំងឺរាតត្បាតសកល ងាកទៅរកដំណាក់កាលថ្មី និងអាចបញ្ចប់នៅ អឺរ៉ុប នេះបើតាម Hans Kluge ប្រធានអង្គការសុខភាពពិភពលោក (WHO) ប្រចាំ តំបន់អឺរ៉ុប។

«ជំងឺរាតត្បាតសកលក្នុងតំបន់ ទំនងជាកំពុងស្ថិតនៅលើផ្លូវទៅរកទីបញ្ចប់» Kluge បានប្រាប់សារព័ត៌មាន AFP កាលពីថ្ងៃទី ២៣ មករា ដូច្នេះ និងបន្ថែមថា វ៉ារ្យ៉ង់ អូមីក្រុង អាចនឹងឆ្លងដល់ប្រជាជនចំនួន ៦០% ក្នុងតំបន់អឺរ៉ុប នៅខែមីនាខាងមុខ។

នៅពេលល្បឿននៃការឆ្លង អូមីក្រុង កើនឡើងពាសពេញតំបន់អឺរ៉ុប ត្រូវថយចុះ «ភាពស៊ាំក្នុងសហគមន៍នឹងត្រូវបានរក្សាក្នុងរយៈពេលច្រើនសប្ដាហ៍ ដល់ច្រើនខែទៅមុខ ដោយសារវ៉ាក់សាំង ឬគ្រប់គ្នាមានអង្គបដិប្រាណ បន្ទាប់ពីបានឆ្លងវីរុស» លោក Kluge និយាយដូច្នេះ។

លោក Kluge បន្ថែមថា «ដូច្នេះ យើងព្យាករថា នឹងមានអំឡុងពេលស្ងប់ស្ងាត់មួយ មុនពេល កូវីដ-១៩ វិលមកវិញនៅចុងឆ្នាំ ប៉ុន្តែ មិនប្រាកដថា វានឹងត្រលប់មកវិញទេ»។

«គ្រប់គ្នាពិភាក្សាគ្នាច្រើនអំពីជំងឺរាតត្បាតអសកល (ឬជំងឺរាតត្បាតតាមតំបន់) ប៉ុន្តែ ការរាតត្បាតអសកលគឺស្មើនឹងការដែលអាចព្យាករបាននូវប្រការអ្វីខ្លះដែលនឹងកើតឡើង។ វីរុសប្រភេទនេះបានធ្វើឱ្យយើងគ្រប់គ្នាភ្ញាក់ផ្អើលជាច្រើនលើកមកហើយ ដូច្នេះ យើងត្រូវតែប្រុងប្រយ័ត្នបំផុត» លោក Kluge បញ្ជាក់បន្ថែម។

អ្នកវិទ្យាសាស្ត្របានរកឃើញថា អ្នកដែលបានឆ្លង អូមីក្រុង មានអាការមិនធ្ងន់ធ្ងរស្មើនឹង ដេលតា យ៉ាងហោចក៏ចំពោះអ្នកដែលបានចាក់វ៉ាក់សាំង។ ប្រការនេះបាននាំឱ្យមានក្ដីសង្ឃឹមថា កូវីដ-១៩ កំពុងប្រែក្លាយពីជំងឺរាតត្បាតសកល ទៅជាជំងឺរាតត្បាតអសកល ដែលងាយទប់ទល់ជាងមុន និងដូចទៅនឹងជំងឺផ្ដាសាយធំ៕

January 24, 2022

Author: សឿន សំណាង