សឿន សំណាង - La Reine Media

ហុងឌូរ៉ាស មានប្រធានាធិបតីជាស្ត្រីភេទលើកដំបូងបង្អស់ក្នុងប្រវត្តិសាស្ត្រ

កាលពីថ្ងៃទី ២៧ មករា លោកស្រី Xiaomara Castro បានធ្វើសច្ចាប្រណិធានចូលកាន់តំណែង ក្លាយជាស្ត្រីដំបូងគេដែលកាន់កាប់កៅអីប្រធានាធិបតីនៅ ប្រទេសហុងឌូរ៉ាស។

ក្នុងពិធីស្បថចូលកាន់តំណែង លោកស្រីប្រធានាធិបតីថ្មី (ភរិយារបស់អតីតប្រធានាធិបតី Manuel Zelaya) បានសន្យាថា នឹងយកបញ្ហាបំណុលធំរបស់ប្រទេសជាតិជាគោលដៅអាទិភាពនៃលោកស្រីត្រូវដោះស្រាយ។

ក្នុងពិធីស្បថចូលកាន់តំណែងនេះក៏មានវត្តមានរបស់ អនុប្រធានាធិបតីអាម៉េរិក លោកស្រី Kamala Harris ផងដែរ។ លោកស្រី Harris ថ្លែងថា សហរដ្ឋអាម៉េរិក គាំទ្រ ហុងឌូរ៉ាស ក្នុងការប្រយុទ្ធប្រឆាំងនឹងអំពើពុករលួយ និងការដោះស្រាយបញ្ហាជនចំណាកស្រុក។

កត្តាសេដ្ឋកិច្ចគឺជាបញ្ហាស្នូលដែលបានជួយឱ្យលោកស្រី Castro ជាប់ឆ្នោតនៅក្នុងការបោះឆ្នោតកាលពីខែវិច្ឆិកា ២០២១។ លោកស្រីអះអាងថា មិនអាចទូទាត់ខ្ទង់បំណុលសាធារណៈ ១៥.៥ ពាន់លានដុល្លារអាម៉េរិក (៦០% នៃ GDP) នាបច្ចុប្បន្នបានឡើយ បើសិនជាមិនបង្កើតរចនាសម្ព័ន្ធដឹកនាំថ្មី។

ប្រធានាធិបតីថ្មីរបស់ ហុងឌូរ៉ាស ក៏បានសន្យា ប្រឆាំងនឹងអំពើពុករលួយ ភាពក្រីក្រ និងអំពើហិង្សា រួមនឹងបញ្ហាជាច្រើនផ្សេងទៀតដែលរួមចំណែកនាំឱ្យមានបញ្ហាពលរដ្ឋចំណាកស្រុកនៅឯព្រំដែនជាប់ ទឹកដីអាម៉េរិក៕

January 28, 2022

ក្ដៅ! អ្នកវិទ្យាសាស្ត្រចិន រកឃើញវីរុស កូរ៉ូណា (Corona) ប្រភេទថ្មីមួយទៀតហើយ!

អ្វីដែលគួរឱ្យព្រួយបារម្ភ នោះគឺថា បណ្ដាអង្គបដិប្រាណប្រឆាំងវីរុសបង្កជំងឺកូវីដ-១៩ បច្ចុប្បន្ន ទំនងជាមិនអាចជួយការពារមនុស្សពីប្រភេទវីរុសកូរ៉ូណា ដែលទើបតែត្រូវបានរកឃើញថ្មីនេះ។

ក្រុមអ្នកវិទ្យាសាស្ត្រនៅ ប្រទេសចិន ទើបតែបានប្រកាស និងព្រមានអំពីការគំរាមកំហែងយ៉ាងស្ងាត់ស្ងៀម ដោយសារតែ វីរុសកូរ៉ូណា ប្រភេទថ្មី បង្ហាញខ្លួន ហើយវាអាចឆ្លងពីសត្វមកមនុស្ស និងមិនអាចត្រូវបានបន្សាបដោយបណ្ដាអង្គបដិប្រាណដែលផលិតឡើងសម្រាប់ទប់ទល់នឹង កូវីដ-១៩។

ទូរទស្សន៍ RT របស់ រុស្ស៊ី បានរាយការណ៍ថា ក្រុមស្រាវជ្រាវដែលធ្វើការនៅសាកលវិទ្យាល័យអ៊ូហាន ប្រទេសចិន បានរកឃើញ វីរុសកូរ៉ូណា ប្រភេទថ្មី ដែលមានឈ្មោះថា NeoCoV មានប្រភពពី អាហ្វ្រិកខាងត្បូង។ ពួកគេជឿថា NeoCoV និង «សាច់ញាតិជិត» របស់វាគឺ PDF-២១៨០-CoV អាចជ្រៀតចូលកោសិកាមនុស្សដោយប្រើប្រាស់អង់ហ្សីម ACE២ មួយចំនួន។ បច្ចុប្បន្ន វីរុសកូរ៉ូណា ប្រភេទ NeoCoV នេះ កំពុងរាតត្បាតលើសត្វប្រចៀវ។

សូមរំលឹកថា វីរុស SARS-CoV-២ (Covid-19) ដែលបានបង្ហាញវត្តមានលើកដំបូងនៅក្នុង ខេត្តអ៊ូហាន ហើយក្រោយមកបានបង្កឱ្យមានជំងឺរាតត្បាតសកលកូវីដ-១៩ ក៏ប្រើប្រាស់ ACE២ ដើម្បីជ្រៀតចូលកោសិកាមនុស្ស។

របាយការណ៍ខាងលើដែលត្រូវបានប្រកាសនៅលើទំព័រ bioRxiv បានឱ្យដឹងថា NeoCoV មិនអាចត្រូវបានបន្សាបដោយអង្គបដិប្រាណទាំងឡាយដែលផលិតឡើងសម្រាប់ទប់ស្កាត់វីរុស SARS-CoV-២ ឬ MERS-CoV នោះឡើយ។

ក្រុមអ្នកវិទ្យាសាស្ត្រចិន បានព្រមានអំពីការគំរាមកំហែងលើសុវត្ថិភាពជីវសាស្ត្រពីវីរុសខាងលើនេះចំពោះសុខភាពមនុស្សលោក ក្នុងនោះក៏រាប់បញ្ចូលទាំងអត្រានៃការស្លាប់ និងល្បឿននៃការឆ្លងរាលដាលខ្ពស់ផងដែរ៕

January 28, 2022

សេដ្ឋកិច្ចរបស់ សហរដ្ឋអាម៉េរិក ឆ្នាំ ២០២១ មានកំណើនខ្ពស់បំផុតក្នុងអំឡុង ៤០ ឆ្នាំកន្លង

សេដ្ឋកិច្ចរបស់ សហរដ្ឋអាម៉េរិក បានងើបឡើងមកវិញ ដោយមានកំណើនជិត ៦% ក្នុងឆ្នាំ ២០២១ ដែលនេះគឺជាសញ្ញានៃការងើបឡើងវិញយ៉ាងលឿន បន្ទាប់ពីបានដាំក្បាលចុះក្នុងឆ្នាំ ២០២០។ នេះគឺជាព័ត៌មានដែលទើបតែត្រូវបាន រដ្ឋាភិបាលអាម៉េរិក ប្រកាសកាលពីថ្ងៃទី ២៧ មករា ២០២២។

យោងតាមការគណនារបស់ ក្រសួងពាណិជ្ជកម្មអាម៉េរិក កំណើនផលិតផលក្នុងស្រុកសរុប (GDP) ក្នុងឆ្នាំ ២០២១ របស់ប្រទេសនេះ គឺ ៥.៧% ដែលជាកំណើនខ្ពស់បំផុតរាប់ចាប់តាំងពីឆ្នាំ ១៩៨៤។ ប្រការនេះបានបង្ហាញអំពីការងើបឡើងវិញយ៉ាងលឿន ព្រោះថា កាលពី ១ ឆ្នាំមុននោះ សេដ្ឋកិច្ចអាម៉េរិក ដាំក្បាលចុះ ៣.៤% ដែលជាការធ្លាក់ចុះជ្រៅបំផុតក្នុងអំឡុង ៧៤ ឆ្នាំកន្លង។

កំណើនសេដ្ឋកិច្ចអាម៉េរិក មួយភាគធំអាស្រ័យលើកញ្ចប់ថវិកាជំរុញសេដ្ឋកិច្ចធំៗ និងគោលនយោបាយការប្រាក់ទាបរបស់រដ្ឋាភិបាល។ ល្បឿននៃកំណើនសេដ្ឋកិច្ចបានថយចុះយឺតៗមកវិញកាលពីចុងឆ្នាំ ២០២១ នៅពេល សហរដ្ឋអាម៉េរិក ប្រឈមនឹង កូវីដ-១៩ ប្រភេទ អូមីក្រុង ដែលបានបណ្ដាលឱ្យការចំណាយមានការកាត់បន្ថយ ខណៈដែលសកម្មភាពពាណិជ្ជកម្មមួយចំនួនក៏ត្រូវរំខាន៕

January 28, 2022

សហភាពអឺរ៉ុប «បើកភ្លើងខៀវ» សម្រាប់ឱសថព្យាបាលជំងឺកូវីដ-១៩ របស់ Pfizer

EMA ដែលជាអាជ្ញាធរគ្រប់គ្រងឱសថរបស់ សហភាពអឺរ៉ុប កាលពីថ្ងៃទី ២៧ មករា បានអនុម័តឱ្យប្រើប្រាស់ដោយមានលក្ខខណ្ឌ ចំពោះថ្នាំប្រឆាំងវីរុសកូវីដ-១៩ ឈ្មោះ Paxlovid របស់ក្រុមហ៊ុន Pfizer (សហរដ្ឋអាម៉េរិក) សម្រាប់ការព្យាបាលអ្នកជំងឺកូវីដ-១៩ ពេញវ័យ និងមានហានិភ័យជំងឺវិវត្តទៅជាធ្ងន់ធ្ងរ។

ការសម្រេចនេះត្រូវបានធ្វើឡើងក្នុងគ្រាដែល សហភាពអឺរ៉ុប (EU) កំពុងបង្កើន «ឃ្លាំងអាវុធ» សម្រាប់សង្គ្រាមប្រឆាំងនឹង កូវីដ-១៩ ប្រភេទ អូមីក្រុង។

ការអនុម័តរបស់ EMA នឹងអនុញ្ញាតឱ្យបណ្ដាប្រទេសជាសមាជិករបស់ EU ប្រើប្រាស់ថ្នាំ Paxlovid ក្រោយពី EMA បានណែនាំឱ្យប្រើប្រាស់បន្ទាន់កាលពីចុងឆ្នាំទៅ។ អ៊ីតាលី អាល្លឺម៉ង់ និង បែលហ្ស៊ិក ស្ថិតក្នុងចំណោមប្រទេសតិចតួចបំផុតដែលមិនបានប្រើប្រាស់ថ្នាំនេះនាពេលកន្លង។

កាលពីខែធ្នូ ២០២១ សហរដ្ឋអាម៉េរិក បានផ្ដល់ការអនុញ្ញាតឱ្យប្រើប្រាស់ថ្នាំ Paxlovid របស់ Pfizer និងថ្នាំ Molnupiravir របស់ Merck នៅក្នុងប្រទេសនេះ។ ថ្នាំរបស់ Merck ក៏កំពុងត្រូវបាន EU ពិនិត្យ វាយតម្លៃ ប៉ុន្តែ វានឹងត្រូវចំណាយពេលបន្ថែមទៀត មុននឹងទទួលបានការអនុម័ត ព្រោះថា ក្រុមហ៊ុន Merck ទើបតែបានកែប្រែទិន្នន័យនៃការពិសោធលើមនុស្សកាលពីខែវិច្ឆិកា ២០២១៕

January 28, 2022

វ៉ាក់សាំងកូវីដ-១៩! កុមាររលាកសាច់ដុំក្រោយការចាក់វ៉ាក់សាំងនៅ អ៊ីស្រាអែល មានអត្រាទាប

ប្រភពព័ត៌មានពីទីក្រុង តែល អាវីវ ដកស្រង់ទិន្នន័យរបស់ក្រសួងសុខាភិបាលដែលបានប្រកាសកាលពីថ្ងៃទី ២៧ មករា ឱ្យដឹងថា ក្នុងចំណោមកុមារអាយុពី ១២ ដល់ ១៥ ឆ្នាំ រាប់សែននាក់ដែលបានចាក់វ៉ាក់សាំងបង្ការជំងឺកូវីដ-១៩ នៅ ប្រទេសអ៊ីស្រាអែល គឺមានកុមារតែ ១៥ នាក់ប៉ុណ្ណោះ ដែលមានអាការរលាកសាច់ដុំបេះដូង។

ក្នុងចំណោមកុមារដែលមានបញ្ហារលាកសាច់ដុំបេះដូងខាងលើ មានម្នាក់ត្រូវរលាកក្រោយពីចាក់ដូសដំបូង, ១២ នាក់ រលាកក្រោយចាក់ដូសទី ២ និង ២ នាក់ទៀតត្រូវរលាកបន្ទាប់ពីចាក់ដូសទី ។ អ្នកជំងឺទាំងនេះសុទ្ធតែមានអាការស្រាល និងត្រូវបានអនុញ្ញាតឱ្យចេញពីពេទ្យរួចហើយ ក្រោយការព្យាបាលតែប៉ុន្មានថ្ងៃប៉ុណ្ណោះ។

ចំណែកកុមារអាយុចាប់ពី ៥ ដល់ ១១ ឆ្នាំ មិនមានបញ្ហារលាកសាច់ដុំបេះដូងនោះទេ រាប់ចាប់ពីពេលបានចាក់វ៉ាក់សាំង រហូតដល់បច្ចុប្បន្ន។

របាយការណ៍របស់ក្រសួងសុខាភិបាលអ៊ីស្រាអែល គឺយោងទៅតាមការសិក្សាស្រាវជ្រាវដែលត្រូវបានធ្វើឡើងចាប់ពីថ្ងៃទី ២ មិថុនា ដល់ ២០ តុលា ឆ្នាំ ២០២១ នៅពេលដែលកុមារអាយុពី ១២ ដល់ ១៥ ឆ្នាំ ប្រមាណជិតកន្លះលាននាក់បានចាក់ដូសដំបូង និង មនុស្សពេញវ័យ ៣២៦,០០០ នាក់ បានចាក់ដូសទី ។

ហានិភ័យនៃការរលាកសាច់ដុំបេះដូងនៅលើកុមារអាយុពី ១២ ដល់ ១៥ ឆ្នាំ មានអត្រាទាបជាង បើធៀបនឹងក្រុមដែលមានវ័យចាប់ពី ១៦ ដល់ ២៤ ឆ្នាំ ប៉ុន្តែ ខ្ពស់ជាងបន្តិច បើធៀបនឹងទិន្នន័យរបស់ សហរដ្ឋអាម៉េរិក ដែលបានប្រកាសមុននោះ។

January 28, 2022

កំពូលអ្នករចនាម៉ូដរថយន្តដែលជួយឱ្យក្រុមហ៊ុនវៀតណាម បានល្បីឈ្មោះ

លោក David Lyon (ឬ Dave Lyon) ដែលបច្ចុប្បន្នគឺជានាយកផ្នែករចនាម៉ូដរថយន្តរបស់រោងចក្រផលិតរថយន្ត VinFast កើតឆ្នាំ ១៩៦៨ មកពី សហរដ្ឋអាម៉េរិក និងធ្លាប់ធ្វើការឱ្យ General Motors (GM) ចាប់ពីឆ្នាំ ១៩៩០ ដល់ ២០១២។

លោក David Lyon ធ្លាប់សិក្សានៅសាលា College for Creative Studies ដែលជាវិទ្យាស្ថានស្រាវជ្រាវមួយនៅទីក្រុង Detroit ក្នុងរដ្ឋ Michigan សហរដ្ឋអាម៉េរិក ជាទីដែលគាត់ទទួលបានសញ្ញាបត្របរិញ្ញាផ្នែករចនាម៉ូដែលចរាចរណ៍កាលពីឆ្នាំ ១៩៩០។

ក្រោយពីចូលរៀនមហាវិទ្យាល័យ លោកក៏បានចូលធ្វើការឱ្យក្រុមហ៊ុន General Motors នៅ Michigan។ ឆ្នាំ ១៩៩៧ លោកបានចូលធ្វើការឱ្យក្រុមហ៊ុន Cadillac និងបានបញ្ចេញរថយន្តម៉ូដែល CTS ជំនាន់ដំបូង។ ឆ្នាំ ១៩៩៨ លោកបានចូល Buick Brand Studio និងកាន់តំណែងជាប្រធានក្រុមរចនាម៉ូដ។

ឆ្នាំ ២០០២ លោក Lyon ត្រូវបានតែងតាំងជានាយកផ្នែករចនាម៉ូដនៅ Truck Interior Studios ជាកន្លែងដែលលោកដឹកនាំក្រុមការងារក្នុងការរចនាគ្រឿងសង្ហារិមអនាគតរបស់បណ្ដារថយន្ត GM រួមមានដូចជា Cadillac Escalade, Chevrolet Tahoe/GMC Yukon និង Hummer H3 ជាដើម។

ឆ្នាំ ២០០៧ លោកបានកាន់តំណែងជានាយកប្រតិបត្តិរបស់ GM អាស៊ី-ប៉ាស៊ីហ្វិក ផ្នែករចនាម៉ូដ ជាកន្លែងដែលគាត់គ្រប់គ្រងក្រុមការងារនៅ កូរ៉េខាងត្បូង ចិនដីគោក និង អូស្ត្រាលី ដើម្បីអភិវឌ្ឍបណ្ដាម៉ូដែលរថយន្ត Chevrolet Cruze, Sonic និង Spark។

ឆ្នាំ ២០០៧ លោកបានរើទៅកាន់ Michigan និងត្រូវបានតែងតាំងជាប្រធានប្រតិបត្តិផ្នែករចនាម៉ូដសង្ហារិមក្នុងរថយន្ត ប្រចាំ តំបន់អាម៉េរិកខាងជើង។

ឆ្នាំ ២០១២ លោកក៏ត្រូវបានតែងតាំងជាប្រធានផ្នែករចនាម៉ូដរថយន្តរបស់ GM អឺរ៉ុប (នៅ អាល្លឺម៉ង់) និងបានចាកចេញពីក្រុមហ៊ុននេះកាលពីចុងខែកក្កដា ២០១២។

បន្ទាប់ពីបានចាក់ចេញពី GM លោក Lyon ក៏បានបង្កើតក្រុមហ៊ុនផ្ទាល់ខ្លួនមួយដែលមានឈ្មោះថា David Lyon Design LLC។

ចាប់ពីឆ្នាំ ២០១៧ ដល់បច្ចុប្បន្ន លោក David Lyon គឺជាប្រធានផ្នែករចនាម៉ូដរថយន្តរបស់ក្រុមហ៊ុនផលិតរថយន្តអគ្គិសនីវៀតណាម VinFast របស់មហាសេដ្ឋី ហ្វាម ញ៉ឹតវឿង៕

January 27, 2022

ធនាគារមួយ ផ្ដល់រង្វាន់ជាភាគហ៊ុនតម្លៃ ១ពាន់លានដុល្លារ ដល់បុគ្គលិក

យោងតាមកំណត់ហេតុពីអគ្គនាយក Brian Moynihan របស់ Bank of America រង្វាន់ខាងលើនេះត្រូវបានលើកឡើងក្នុងបំណងប្រកួតប្រជែងនៅក្នុងទីផ្សារការងារ។

Bank of America កំពុងផ្ដល់រង្វាន់ជាភាគហ៊ុនតម្លៃ ១ ពាន់លានដុល្លារ ដល់បុគ្គលិកស្ទើរតែទាំងអស់របស់ក្រុមហ៊ុន។ នេះគឺជាការប្រឹងប្រែងដើម្បីប្រកួតប្រជែងនឹងក្រុមហ៊ុនផ្សេងៗ ទាក់ទងនឹងការអូសទាញបុគ្គលិកថ្មី និងចងជើងបុគ្គលិកពូកែ។

យោងតាមកំណត់ហេតុពីអគ្គនាយក Brian Moynihan របស់ Bank of America រង្វាន់ខាងលើនេះត្រូវបានអមជាមួយនឹងប្រាក់រង្វាន់ធម្មតាសម្រាប់បុគ្គលិកទាំងឡាយណាដែលរកបានចំណូល ៥០០,០០០ ដុល្លារ/ឆ្នាំ។ បុគ្គលិកប្រមាណ ៩៧% របស់ធនាគារ Bank of America មានគុណសម្បត្តិគ្រប់គ្រាន់ក្នុងការទទួលយករង្វាន់នេះ។

អ្នកនាំពាក្យរបស់ BofA លោក John Yiannacopoulos ឱ្យដឹងថា នេះគឺជាឆ្នាំទី ៥ ហើយ ដែលក្រុមហ៊ុនបានលើកឡើងនូវខ្ទង់រង្វាន់សរុប ៣.៣ ពាន់លានដុល្លារអាម៉េរិក។

អគ្គនាយក Brian Moynihan បានសរសេរថា៖ «ខ្ទង់រង្វាន់ចែករំលែកភាពជោគជ័យគឺជាវិធីមួយក្នុងចំណោមវិធីសាស្ត្រដែលយើងវិនិយោគទៅលើផ្នែកធនធានមនុស្សរបស់យើង»។

យោងទៅតាមលក្ខខណ្ឌនៃរង្វាន់នេះ បុគ្គលិកដែលមានគុណសម្បត្តិគ្រប់គ្រាន់នឹងទទួលបានភាគហ៊ុនចាប់ពី ៦៥ ដល់ ៦០០ ហ៊ុន/ម្នាក់។

ភាគហ៊ុនរបស់ធនាគារដែលមានមូលដ្ឋាននៅ ឆាឡុត (Charlotte) រដ្ឋកាលីហ្វរញ៉ាខាងជើង នេះ បានកើនប្រមាណ ១.៨% ឡើងដល់ ៤៥.៣៥ ដុល្លារ/ហ៊ុន កាលពីម្សិលមិញ និងកើន ៤៧% ក្នុងឆ្នាំ ២០២១៕

January 27, 2022

ក្រុមហ៊ុនផលិតរថយន្តអគ្គិសនី តេសឡា (Tesla) ចំណេញកប់ក្ដោង

តេសឡា ដែលមានមហាសេដ្ឋី អ៊ីឡន ម៉ាស (Elon Musk) ជាអគ្គនាយក ក្នុងត្រីមាសទី ៤ ឆ្នាំ ២០២១ រកបានប្រាក់ចំណេញច្រើនជាង ៣ ដង ធៀបនឹងដំណាក់កាលដូចគ្នាក្នុងឆ្នាំ ២០២០ គឺលើសពីអ្វីដែល Wall Street បានព្យាករទៅទៀត។

ក្រុមហ៊ុនផលិតរថយន្តអគ្គិសនី តេសឡា កាលពីម្សិលមិញបានបញ្ចេញរបាយការណ៍ហិរញ្ញវត្ថុត្រីមាសទី ៤ ឆ្នាំ ២០២១ បង្ហាញថា រកបានប្រាក់ចំណេញ ២.៩ ពាន់លានដុល្លារអាម៉េរិក កើនឡើងយ៉ាងខ្ពស់ ធៀបនឹង ៩០៣ លានដុល្លារកាលពីត្រីមាសទី ៤ ឆ្នាំ ២០២០។ តួលេខនេះក៏លើសពីការព្យាករ ២.៦ ពាន់លានដុល្លាររបស់ក្រុមអ្នកវិភាគនៅក្នុងការស្ទង់មតិរបស់ Refinitiv។ ចំណែកប្រាក់ចំណូលវិញ មានចំនួន ១៧.៧ ពាន់លានដុល្លារ កើន ៦៥%។

លទ្ធផលខាងលើបានជួយឱ្យប្រាក់ចំណេញពេញមួយឆ្នាំ ២០២១ របស់ តេសឡា ឡើងដល់ ៧.៦ ពាន់លានដុល្លារ។ រីឯប្រាក់ចំណូលសរុបក៏ឡើងដល់ ៥៣.៨ ពាន់លានដុល្លារ។

អគ្គនាយក លោក អ៊ីឡន ម៉ាស កាលពីម្សិលមិញ បានឱ្យដឹងថា តេសឡា កំពុងផ្អាកផែនការផលិតថ្មី ដោយសារបញ្ហាពាក់ព័ន្ធនឹងការផ្គត់ផ្គង់។

តេសឡា មុននោះក៏បាននិយាយដល់ប្រភេទរថយន្តជាច្រើនដែលជិតបញ្ចេញពីរោងចក្រ ដូចជា រថយន្តទ្រុង Cybertruck, រថយន្តសណ្ដោង, រថយន្ត Tesla Roadster និងរថយន្តមួយប្រភេទទៀតដែលមានតម្លៃត្រឹមតែ ២៥,០០០ ដុល្លារប៉ុណ្ណោះ។

កាលពីឆ្នាំមុន តេសឡា លក់រថយន្តបាន ៩៣៦,០០០ គ្រឿង ច្រើនជាងជិតទ្វេដង ធៀបនឹង ៥០០,០០០ គ្រឿងកាលពីឆ្នាំ ២០២០។

ក្រុមហ៊ុននេះបានឱ្យដឹងថា រោងចក្រនៅ កាលីហ្វរញ៉ា នឹងផលិតរថយន្ត តេសឡា បានលើសពី ៦០០,០០០ គ្រឿងជារៀងរាល់ឆ្នាំ។ តេសឡា នឹងបង្កើនផលិតភាពនៅក្នុងរោងចក្រនានា ដូចជារោងចក្រនៅ កាលីហ្វាញ៉ា, សៀងហៃ, តិចសាស និង ក្រុងបែរឡាំង ប្រទេសអាល្លឺម៉ង់។

ចំណែកភាគហ៊ុនតេសឡា កាលពីម្សិលមិញ ក៏បានកើនឡើងបន្តិច (២%)។ ចាប់ពីដើមឆ្នាំ ២០២២ មកដល់បច្ចុប្បន្ន ភាគហ៊ុន តេសឡា បានថយចុះ ១១.៣%៕

January 27, 2022

កូវីដ-១៩! កម្ពុជា រកឃើញអ្នកឆ្លងថ្មី ៣៤ នាក់ទៀត កាលពីម្សិលមិញ

ក្នុងអំឡុង ២៤ ម៉ោង នៃថ្ងៃទី ២៦ មករា ២០២២ កម្ពុជា បានរកឃើញអ្នកឆ្លងកូវីដ-១៩ ចំនួន ៣៤ នាក់ និងជាសះស្បើយ ១៩ នាក់ ខណៈអ្នកស្លាប់ «គ្មាន»។

ក្នុងចំណោមអ្នកវិជ្ជមានថ្មីទាំងអស់ មានករណីឆ្លងក្នុងសហគមន៍ ២៧ នាក់ និងអ្នកដំណើរពីបរទេស ៧ នាក់ ដែលទាំងអស់សុទ្ធតែជាករណី អូមីក្រុង។

January 27, 2022

ប្រទេសដំបូងគេនៅ អឺរ៉ុប ដែលបានប្រកាសថា នឹងដកទាំងស្រុងនូវវិធានការរឹតបន្តឹងការទប់ស្កាត់កូវីដ-១៩

នាយិការដ្ឋមន្ត្រី Mette Frederiksen ប្រកាសថា ប្រទេសដាណឺម៉ាក នឹងដកទាំងស្រុងនូវវិធានការរឹតបន្តឹងការទប់ស្កាត់កូវីដ-១៩ ចាប់ពីថ្ងៃទី ១ កុម្ភៈ ២០២២។

Pllitico.eu កាលពីថ្ងៃទី ២៦ មករា បានឱ្យដឹងថា ការសម្រេចចិត្តខាងលើត្រូវបានលើកឡើងនៅក្នុងគ្រាដែល ដាណឺម៉ាក មានអត្រាចូលពេទ្យ និងស្លាប់ដោយសារ អូមីក្រុង ស្ថិតក្នុងរង្វង់នៃការគ្រប់គ្រង និងអត្រានៃការចាក់វ៉ាក់សាំងខ្ពស់។

នាយិការដ្ឋមន្ត្រីដាណឺម៉ាក ថ្លែងថា «យប់នេះយើងអាចរកឃើញស្នាមញញឹម។ យើងមានដំណឹងល្អបំផុត ពេលនេះយើងអាចដកបទបញ្ជារឹតបន្តឹងវិធានការទប់ស្កាត់កូវីដ-១៩ ចុងក្រោយនៅ ដាណឺម៉ាក» ក្រោយពីបានទទួលអនុសាសន៍ពីគណៈកម្មការជំនាញផ្នែកជំងឺឆ្លង និងការគាំទ្ររបស់បណ្ដាគណបក្សនយោបាយធំ។

លោកស្រី Frederiksen បន្ថែមថា៖ «ក្នុងប៉ុន្មានសប្ដាហ៍មកនេះ អត្រានៃការឆ្លងកើនឡើងខ្ពស់ ពោលគឺខ្ពស់បំផុតមិនធ្លាប់មាននាពេលកន្លង។ ដូច្នេះ ហាក់ដូចជារឿងចម្លែក និងមិនសមហេតុផលដែលយើងត្រៀមដកវិធានការរឹតបន្តឹងនានា»។

ប្រកាសរបស់ ដាណឺម៉ាក ត្រូវបានធ្វើឡើងចំពេលដែល វ៉ារ្យ៉ង់ ថ្មីមួយរបស់ អូមីក្រុង គឺ BA២ កំពុងឆ្លងរាលដាលនៅប្រទេសនេះ និងធ្វើឱ្យការឆ្លងមានការកើនឡើង ក្នុងនោះ ករណីវិជ្ជមានចំនួន ៤៦,០០០ នាក់ ត្រូវបានរកឃើញនៅ ដាណឺម៉ាក ក្នុងថ្ងៃទី ២៦ មករា។

យោងតាមអាជ្ញាធរសុខាភិបាល និងឱសថរបស់ ដាណឺម៉ាក គិតមកដល់បច្ចុប្បន្ន ប្រជាជនប្រមាណ ៨២% នៅ ដាណឺម៉ាក ដែលមានអាយុចាប់ពី ១២ ឆ្នាំឡើងទៅ បានចាក់វ៉ាក់សាំងពេញលេញ (២ ដូស) ក្នុងនោះមាន ៥០% បានចាក់ដូសទី ៣៕

January 27, 2022

Author: សឿន សំណាង