សឿន សំណាង - La Reine Media

តំណាងរាស្ត្រអាម៉េរិក ដាក់សេចក្ដីព្រាងច្បាប់ទទួលស្គាល់ចូលឆ្នាំចិនជាថ្ងៃបុណ្យជាតិ

សមាជិកសភាជាន់ទាបដើមកំណើតអាស៊ី Grace Meng ដាក់សេចក្ដីព្រាងច្បាប់ទទួលស្គាល់ពិធីបុណ្យចូលឆ្នាំចិន ជាបុណ្យជាតិរបស់ សហរដ្ឋអាម៉េរិក។

«ជនជាតិអាម៉េរិក ដើមកំណើតអាស៊ី គឺជាក្រុមដែលមានកំណើនលឿនជាងគេនៅប្រទេសយើង ហើយនៅពេលពិធីបុណ្យនេះមានគេនិយមកាន់តែច្រើន ការប្រែក្លាយថ្ងៃដំបូងនៃឆ្នាំថ្មី ឱ្យទៅជាថ្ងៃបុណ្យជាតិគឺជារឿងសមហេតុផលទាំងស្រុង» Grace Meng បានឱ្យដឹងដូច្នេះនៅក្នុងប្រកាសមួយ ក្រោយពីបានដាក់សេចក្ដីព្រាងច្បាប់នេះឡើងទៅសភា កាលពីថ្ងៃទី ៣១ មករា។

«សេចក្ដីព្រាងច្បាប់របស់ខ្ញុំនឹងបង្ហាញថា រដ្ឋាភិបាលអាម៉េរិក ផ្ដល់តម្លៃដល់ថ្ងៃបុណ្យដែលមនុស្សរាប់លាននាក់ទទួលអំណរ» លោកស្រី Meng អះអាងដូច្នេះ។

លោកស្រី Meng គឺជាមនុស្សម្នាក់ដែលបានជំរុញឱ្យមានការចាត់ទុកថ្ងៃដំបូងនៃឆ្នាំថ្មីរបស់ប្រទេសមួយចំនួននៅ អាស៊ី (ចូលឆ្នាំចិន) ជាថ្ងៃឈប់សម្រាកសម្រាប់សិស្សនៅក្នុង ទីក្រុងនីវយ៉ក តាំងតែពីឆ្នាំ ២០១៦។

ជនជាតិអាស៊ីនៅ សហរដ្ឋអាម៉េរិក ចង់គោរព និងអនុវត្តតាមប្រពៃណី ទំនៀមទម្លាប់ វប្បធម៌របស់គ្រួសារ និងចូលរួមសកម្មភាពសហគមន៍ក្នុងខែកុម្ភៈ ក្នុងនោះមានការជួបជុំសមាជិកគ្រួសារ និងផ្ដល់អាំងប៉ាវដល់ក្មេងៗជាដើម។

សេចក្ដីព្រាងច្បាប់របស់លោកស្រី Meng ត្រូវបានលើកឡើងក្នុងគ្រាដែលប៉ុន្មានឆ្នាំមកនេះ នៅ សហរដ្ឋអាម៉េរិក កើតមានការរើសអើង និងប្រមាថកាតទានលើជនជាតិអាស៊ី ពិសេសគឺចិនដីគោក។

នៅ សហរដ្ឋអាម៉េរិក មានថ្ងៃបុណ្យជាតិចំនួន ១១ ក្នុងនោះរួមមានទាំងថ្ងៃចូលឆ្នាំសកល ទិវាបុណ្យឯករាជ្យ បុណ្យអរគុណ និងបុណ្យណូអែលជាដើម។ ស្ថាប័នរដ្ឋតែងសម្រាកការងារនៅក្នុងថ្ងៃបុណ្យជាតិទាំងនេះ ខណៈដែលក្រុមហ៊ុនឯកជន និងសាលារៀន អាចជ្រើសរើសរវាងសម្រាក និងមិនសម្រាក។ ចំណែករដ្ឋនានាអាចជ្រើសរើស និងអនុវត្តថ្ងៃបុណ្យជាតិក៏បាន មិនអនុវត្តក៏បាន៕

February 4, 2022

ការវាយឆ្មក់របស់កម្លាំងពិសេសអាម៉េរិក ទៅលើមេដឹកនាំ IS អ្នកជិតខាងរៀបរាប់ថា មិនធ្លាប់បានឮផ្ទាល់ពីមុនមក

សំឡេងលាន់កក្រើកមេឃរបស់ឧត្ថម្ភាគចក្រដឹកក្រុមទាហានពិសេសអាម៉េរិក ដែលវាយឆ្មក់លើទីតាំងលាក់ខ្លួនរបស់ al-Qurashi កាលពីថ្ងៃទី ៣ កុម្ភៈ ធ្វើឱ្យប្រជាជនក្នុងទីរួមស្រុក Atmeh នៃ ប្រទេសស៊ីរី ត្រូវភ្ញាក់ដឹងខ្លួនទាំងកណ្ដាលយប់។

ពួកគេមិនធ្លាប់បានឮសំឡេងអ្វីដែលលាន់ដូចសំឡេងនេះ។ «មានរឿងអ្វីហ្នឹងពុក?» Abu Omar ដែលជាអ្នករស់នៅក្បែរផ្ទះរបស់មេដឹកនាំអង្គការរដ្ឋអ៊ីស្លាម (IS) Abu Ibrahim al-Hashimi al-Qurashi រៀបរាប់។

ពុំមានអ្នកណាស្មានដល់ថា មេដឹកនាំរបស់អង្គការភេរវកម្មដ៏គួរឱ្យភ័យខ្លាចបំផុតក្នុងពិភពលោក បែរជាលាក់ខ្លួននៅជាន់ទី ៣ ក្នុងអគារសាមញ្ញមួយ ដែលស្ថិតនៅឆ្ងាយពីទីតាំងរឹងមាំរបស់ក្រុមនេះ។ ម្ចាស់ផ្ទះបាននិយាយថា អ្នកបើកបររថយន្តជនជាតិស៊ីរីម្នាក់ បានជួលផ្ទះនេះតាំងពី ១១ ខែមុន ក្នុងតម្លៃ ១៣០ ដុល្លារអាម៉េរិក/ខែ។

អ្នកបើកបររថយន្តខាងលើ រស់នៅលើជាន់ទី ២ ជាមួយប្រពន្ធ និងកូន ៣ នាក់។ បងស្រី និងក្មួយស្រីរបស់បុរសនេះក៏រស់នៅជាមួយគ្នា។ ពួកគេមិនបានប្រស្រ័យ រាប់អានជាមួយអ្នកណាឡើយ។

លោក ចូ បៃដិន និងសហការី នៅក្នុងបន្ទប់ស្ថានការណ៍ តាមដានស្ថានភាពនៃបេសកកម្មវាយឆ្មកនៅ ស៊ីរី

ក្រុមមន្ត្រីអាម៉េរិក ឱ្យដឹងថា ពួកគេទទួលបានដំណឹងថា al-Qurashi រស់នៅលើជាន់ខ្ពស់បំផុតរបស់អគារនេះ និងមិនដែលបានចាកចេញពីទីនេះ ប៉ុន្តែ ជួនកាលក៏ងូតទឹកលើដំបូលផ្ទះ។ Al-Qurashi ទាក់ទងជាមួយសមាជិក IS ដទៃទៀត តាមរយៈអ្នកបើកបររថយន្តដែលរស់នៅលើជាន់ទី ។

ឧទ្ធម្ភាគចក្រ MH-៦០ Jayhawk ដឹកកម្លាំងពិសេសអាម៉េរិក មកដល់ Atmeh នៅវេលាម៉ោងប្រហែល ១ យប់ (ម៉ោង ៦ នៅ ភ្នំពេញ) កាលពីថ្ងៃទី ៣ កុម្ភៈ។

Abu Omar ឱ្យដឹងថា កម្លាំងពិសេសអាម៉េរិក មិនបានវាយឆ្មក់ចូលអគារនេះភ្លាមៗនោះទេ តែបានស្នើជាបន្តបន្ទាប់ឱ្យអ្នកដែលស្ថិតនៅក្នុងអគារនោះចេញមកសារភាព។

នៅជាន់ទី ១ នៃអគារនេះ មានជនស៊ីវិល រស់នៅ ដូច្នេះ កងកម្លាំងអាម៉េរិក បានស្នើឱ្យពួកគេចាកចេញ។ «ចេញទៅក្រៅ នាងនោះ ចេញទៅក្រោយ និងដើម្បីឱ្យកូនមានឱកាសរស់» Abu Omar រៀបរាប់ និងឱ្យដឹងថា សំឡេងនិយាយរបស់កម្លាំងពិសេសនេះ កាន់តែមានភាពគំរាម ព្រមានថា ទាហានអាម៉េរិក នឹងវាយកម្ទេចផ្ទះនេះ។

«គ្រប់គ្នានឹងមានសុវត្ថិភាព បើសិនជាចេញមកសារភាព» សំឡេងជាភាសាអារ៉ាប់ បានបន្លឺឡើង។ «អ្នកដែលមិនព្រមចេញមកសារភាពនឹងត្រូវស្លាប់»។

ពេលទាហានអាម៉េរិក បាញ់អាវុធដែលដូចទៅនឹងរ៉ុក្កែត មនុស្សម្នាក៏រត់ចេញពីផ្ទះ។ នេះបើតាមការឱ្យដឹងពីស្ត្រីម្នាក់។ ស្ត្រូរូបនេះនិយាយថា គ្រួសាររបស់អ្នកស្រី ត្រូវទាហានអាម៉េរិក សួរចម្លើយ។ «ពេលប្រាប់ថា មិនស្គាល់ពួកគេ (មេដឹកនាំ IS) ពួកគេ (ទាហានអាម៉េរិក) មិនជឿពួកខ្ញុំ។ ពួកគេសួរថា ជាអ្នកជិតខាង ហេតុអ្វីមិនស្គាល់គ្នា»។

នៅជាន់ទី ៣ al-Qurashi មិនព្រមចុះចាញ់ និងបានបំផ្ទុះគ្រាប់បែក បណ្ដាលឱ្យខ្លួនឯង និងក្រុមគ្រួសារបាត់បង់ជីវិត។ កងកម្លាំងសង្គ្រោះបន្ទាន់ឱ្យដឹងថា សាកសព ១៣ នាក់ ត្រូវបានរកឃើញនៅក្នុងគំនរបាក់បែក ក្នុងនោះមានក្មេងចំនួន ៦ នាក់ផងដែរ។

កម្លាំងអាម៉េរិក បានសម្រុកចូលផ្ទះ ប្រយុទ្ធជាមួយអ្នកបើកបររថយន្ត និងប្រពន្ធរបស់គេនៅជាន់ទី ។ អ្នកទាំង ២ បានស្លាប់ ខណៈកូន ៤ នាក់ ត្រូវបាននាំចេញមកក្រៅដោយសុវត្ថិភាព។ ស្ត្រីម្នាក់នៅជាន់ទី ១ ឱ្យដឹងថា ក្នុងចំណោមនោះ មានក្មេងប្រុសម្នាក់អាយុ ១៥ ឆ្នាំ។

លាក់ខ្លួនក្នុងជម្រកក្រោមដីក្នុងផ្ទះក្បែរនោះ Abu Omar និងកូនៗ បាន‌ឮសំឡេងគ្រាប់កាំភ្លើង និងសំឡេងផ្ទុះធំ។ ក្មេងៗភ័យរន្ធត់។ «ពួកគេមិនវាយប្រហារគ្រួសារយើងទេ។ ពួកគេមករកអ្នកផ្សេង» Omar ប្រាប់កូនៗដូច្នេះ។

ម៉ោងប្រហែល ៣ (ម៉ោង ៨ នៅ ភ្នំពេញ) កម្លាំងអាម៉េរិក ចាប់ផ្ដើមប្រមូលសម្ភារៈដើម្បីចាកចេញ។ ក្រោយមក ក្រុមបុគ្គលិកសង្គ្រោះបន្ទាន់ក៏បានមកដល់ ដើម្បីស្វែងរកសាកសពក្រោមគំនរបាក់បែក។

Jamil al-Dadu អាយុ ៣០ ឆ្នាំ រស់នៅក្នុងជំរំជនភៀសខ្លួនក្បែរនោះ និយាយថា មិនដែលបានឃើញបេសកកម្មណាមួយដូច្នេះ។ «យើងនឹកស្មានមិនដល់ថា ជនជាតិអាម៉េរិក មកទីនេះ» al-Dadu និយាយដូច្នេះ។

ប្រធានាធិបតីអាម៉េរិក លោក ចូ បៃដិន កាលពីថ្ងៃទី ៣ កុម្ភៈ ប្រកាសថា «ប្រភពគំរាមកំហែងភេរវកម្មសកលត្រូវបានកម្ចាត់ចោល» បន្ទាប់ពី al-Qurashi បានបំផ្ទុះគ្រាប់បែកអត្តឃាតនៅក្នុងបេសកកម្មវាយឆ្មក់របស់អង្គភាពពិសេសអាម៉េរិក។ ចំណែក មន្ទីរបញ្ចកោណ វិញ អះអាងថា ការវាយឆ្មក់ថ្មីនេះគឺជាបេសកកម្មជោគជ័យប្រឆាំងនឹងភេរវកម្ម ហើយ សហរដ្ឋអាម៉េរិក ពុំមានទាហានណាម្នាក់ត្រូវរងរបួស៕

February 4, 2022

កូវីដ-១៩ នៅ កម្ពុជា ! រកឃើញអ្នកឆ្លងថ្មី ៦៦ នាក់ទៀត ខណៈអ្នកជាសះស្បើយ ៩៨ នាក់ និងស្លាប់ «គ្មាន»

ក្នុងចំណោមអ្នកវិជ្ជមានថ្មីចំនួន ៦៦ នាក់ មានករណីឆ្លងក្នុងសហគមន៍ ៦៤ នាក់ និង អ្នកដំណើរពីបរទេស ២ នាក់ ដែលទាំងអស់សុទ្ធតែជាករណី អូមីក្រុង។

February 4, 2022

អាម៉េរិក កម្ទេចឧត្ថម្ភាគចក្រដែលជួបបញ្ហានៅក្នុងបេសកកម្មវាយឆ្មក់លើមេដឹកនាំ IS

អង្គភាពពិសេស និងយន្តហោះចម្បាំង F-១៦ របស់ សហរដ្ឋអាម៉េរិក បានកម្ទេចឧទ្ធម្ភាគចក្រ MH-៦០ មួយគ្រឿងដែលបានជួបបញ្ហានៅក្នុងបេសកកម្មវាយឆ្មក់លើមេដឹកនាំអង្គការរដ្ឋអ៊ីស្លាម (IS) al-Qurashi នៅ ប្រទេសស៊ីរី (ISIS)។

មន្ទីរបញ្ចកោណ កាលពីថ្ងៃទី ៣ កុម្ភៈ ឱ្យដឹងថា ឧទ្ធម្ភាគចក្រ MH-៦០ Jayhawk បានជួបបញ្ហានៅពេលចូលរួមបេសកកម្មវាយឆ្មក់លើទីតាំងស្នាក់នៅរបស់មេដឹកនាំអង្គការរដ្ឋអ៊ីស្លាម (IS) ឈ្មោះ Abu Ibrahim al-Hashimi al-Qurashi នៅតំបន់ Atmeh ភាគខាងលិចនៃ ប្រទេសស៊ីរី។ ឧទ្ធម្ភាគចក្រ MH-៦០ Jayhawk ត្រូវចុះចតបន្ទាន់ ហើយក៏ត្រូវកម្ទេចចោលដោយគ្រាប់បែក និងការបាញ់កម្ទេចពី F-១៦ របស់ សហរដ្ឋអាម៉េរិក។

មូលហេតុនៃការកម្ទេចឧទ្ធម្ភាគចក្រ MH-៦០ Jayhawk នេះ ត្រូវបានឧត្តមសេនីយ៍ Frank McKenzie មេបញ្ជាការនៃអគ្គបញ្ជាការដ្ឋានកងទ័ពអាមេរិក លើកឡើងថា គឺដើម្បីកុំឱ្យឧបករណ៍សំខាន់ៗ នៅសល់លើទឹកដីស៊ីរី។ ចំពោះមូលហេតុដែលនាំឱ្យ MH-៦០ Jayhawk ជួបបញ្ហាវិញ មិនទាន់ត្រូវបានគេឱ្យដឹងនៅឡើយ។

ប្រធានាធិបតីអាម៉េរិក លោក ចូ បៃដិន កាលពីថ្ងៃទី ៣ កុម្ភៈ ប្រកាសថា «ប្រភពគំរាមកំហែងភេរវកម្មសកលត្រូវបានកម្ចាត់ចោល» បន្ទាប់ពី al-Qurashi បានបំផ្ទុះគ្រាប់បែកអត្តឃាតនៅក្នុងបេសកកម្មវាយឆ្មក់របស់អង្គភាពពិសេសអាម៉េរិក។ ការស្លាប់របស់ al-Qurashi គឺជាការខាតបង់ធំបំផុតសម្រាប់ IS ក្រោយពីមេដឹកនាំមុនគឺ Abu Bakr al-Baghdadi បានស្លាប់ក្នុងការវាយឆ្មក់កាលពីឆ្នាំ ២០១៩។

ការវាយឆ្មក់ថ្មីនេះគឺជាបេសកកម្មជោគជ័យប្រឆាំងនឹងភេរវកម្ម ហើយ សហរដ្ឋអាម៉េរិក ពុំមានទាហានណាម្នាក់ត្រូវរងរបួស។ ឧទ្ធម្ភាគចក្រ MH-៦០ Jayhawk ដែលដឹកក្រុមទាហានពិសេសអាម៉េរិក បានចេញដំណើរពីមូលដ្ឋានទ័ពនៅ ទីក្រុងកូបានី (Kobani) របស់ ប្រទេសស៊ីរី ជាទីដែលកងកម្លាំងជនជាតិ Kurd កំពុងគ្រប់គ្រង។

ចាប់តាំងពីបាត់បង់មូលដ្ឋានចុងក្រោយនៅភាគខាងត្បូងប្រទេសស៊ីរី កាលពីខែមីនា ២០១៩ ក្រុមប្រដាប់អាវុធ IS បានរត់ទៅជ្រកក្នុងតំបន់សមុទ្រខ្សាច់ ហើយធ្វើការវាយឆ្មក់ម្ដងម្កាល ទៅលើកងកម្លាំងជនជាតិ Kurd និងអាជ្ញាធរស៊ីរី។

សហរដ្ឋអាម៉េរិក រក្សាកម្លាំងតិចតួចនៅ ស៊ីរី ដើម្បីជួយដល់យុទ្ធនាការប្រឆាំង IS និងការពារទីតាំងទាញយករ៉ែប្រេង ដែលគ្រប់គ្រងដោយជនជាតិ Kurd។ ទាហានអាម៉េរិក ប្រមាណ ៧០០ នាក់ កំពុងបោះមូលដ្ឋាននៅភាគខាងជើងនៃ ប្រទេសស៊ីរី ខណៈដែល ២០០ នាក់ផ្សេងទៀត ឈរជើងនៅក្បែរព្រំដែនស៊ីរី-ហ្ស៊កដានី៕

February 4, 2022

ប្រទេសថៃ ដាក់ការកំណត់លើការប្រើប្រាស់រូបិយវត្ថុឌីជីថល

រូបិយវត្ថុឌីជីថលវិមជ្ឈការ នៅ ប្រទេសថៃ នឹងមិនមានសិទ្ធិស្របច្បាប់សម្រាប់ការប្រើប្រាស់ដើម្បីទូទាត់ ប៉ុន្តែ អាចជួញដូរក្នុងទម្រង់ជាទ្រព្យនៅលើថ្នាលបច្ចេកវិទ្យាហិរញ្ញវត្ថុដែលទទួលបានការអនុញ្ញាតពីរដ្ឋ។

ធនាគារជាតិរបស់ ប្រទេសថៃ (BoT) បានឱ្យដឹងថា កំពុងធ្វើសេចក្ដីព្រាងការកំណត់ដើម្បីទប់ស្កាត់ Bitcoin និងបណ្ដាប្រាក់ឌីជីថលដទៃទៀត ដែលត្រូវបានគេប្រើប្រាស់ក្នុងការទូទាត់។ ស្ថាប័ននេះយល់ថា ការប្រែប្រួលខ្លាំងរបស់ពួកវា នឹងបង្កឱ្យមានហានិភ័យ និងធ្វើឱ្យអ្នកលក់ និងអ្នកទិញត្រូវខាតបង់។

អ្នកដែលត្រូវបានរកឃើញថា បានបំពានការកំណត់ បើទោះជាអ្នកទិញ ឬអ្នកលក់ក៏ដោយ នឹងត្រូវបានពិន័យជាប្រាក់ចំនួន ៣០០,០០០ បាត (ប្រហែល ៩,០០០ ដុល្លារអាម៉េរិក) បូកជាមួយនឹង ១០,០០០ បាតសម្រាប់ ១ ថ្ងៃ បើសិនពួកគេបន្តល្មើសនឹងការកំណត់។

តាមគម្រោង ការកំណត់ថ្មីនេះនឹងត្រូវបានអនុវត្តចាប់ពីពាក់កណ្ដាលចុងខែកុម្ភៈ ២០២។ ឥរិយាបថរបស់ ថៃ ត្រូវបានគេយល់ថា នឹងរឹតត្បិតការផ្ទុះឡើងនៃនិន្នាការប្រើប្រាស់រូបិយវត្ថុឌីជីថលនៅប្រទេសនេះ ក្នុងគ្រាដែលតម្លៃ Bitcoin កំពុងធ្លាក់ចុះ។

កាលពីចុងឆ្នាំ ២០២១ BoT និង គណៈកម្មការមូលបត្រ (SEC) បានអនុញ្ញាតឱ្យទិញ លក់ និងដោះដូរប្រាក់ឌីជីថល នៅលើថ្នាលបច្ចេកវិទ្យាហិរញ្ញាវត្ថុទាំងឡាយណាដែល SEC បានផ្ដល់ការយល់ព្រម។

នៅ ប្រទេសថៃ មានថ្នាលបច្ចេកវិទ្យាហិរញ្ញវត្ថុដោះដូរប្រាក់ឌីជីថល ចំនួន ៨ មានលិខិតអនុញ្ញាតរបស់ SEC រួមមានទាំង Bitkub ដែលគ្រប់គ្រងដោយធនាគារពាណិជ្ជ Siam (SCB) ផងដែរ។

Nares Laopannarai អគ្គលេខាសមាគមទ្រព្យឌីជីថលថៃ យល់ថា ការប្រកាសថ្មីបំផុតនេះរបស់ BoT បានបណ្ដាលឱ្យក្រុមហ៊ុនធំៗត្រូវរងសម្ពាធ ក្នុងនោះមានទាំងបណ្ដាក្រុមហ៊ុនដែលបានប្រកាសវិនិយោគធំទៅលើវិស័យរូបិយវត្ថុឌីជីថល ពិសេសគឺនៅពេលដែលតម្លៃរបស់ Bitcoin កំពុងធ្លាក់ថ្លៃខ្លាំង។ នេះបើតាមសារព័ត៌មានជប៉ុន Nikkei។

ប្រទេសជាសមាជិកសមាគមប្រជាជាតិអាស៊ីអាគ្នេយ៍ (ASEAN) រួមមាន ព្រុយណេ ឥណ្ឌូណេស៊ី និង ម៉ាឡេស៊ី ក៏បានប្រកាសអនុវត្តការកំណត់លើការគ្រប់គ្រងប្រាក់ឌីជីថល នាប៉ុន្មានឆ្នាំចុងក្រោយនេះ។ សូម្បីតែប្រទេសដែលមានការនិយមប្រើប្រាស់ Bitcoin ដូចជា សិង្ហបុរី និង វៀតណាម ក៏មិនអនុញ្ញាតឱ្យទូទាត់ប្រាក់ដោយប្រើប្រាស់រូបិយវត្ថុឌីជីថលវិមជ្ឈការ (decentralized digital currency) នេះដែរ៕

February 4, 2022

WHO ថា អឺរ៉ុប កំពុង «មានបទឈប់បាញ់» ជាមួយ កូវីដ-១៩

អង្គការសុខភាពពិភពលោក (WHO) បាននិយាយថា ទ្វីបអឺរ៉ុប កំពុងស្ថិតក្នុងដំណាក់កាល «អនុវត្តបទឈប់បាញ់» ជាមួយនឹង កូវីដ-១៩ នៅពេលមានសមត្ថភាពការពារខ្លួនខ្ពស់ បើកផ្លូវឱ្យមានក្ដីសង្ឃឹមអំពី «យុគសម័យស្ងប់ស្ងាត់យូរអង្វែង»។

«ចាប់តាំងពីមានជំងឺរាតត្បាតសកលរហូតដល់បច្ចុប្បន្ន យើងមិនធ្លាប់បានឆ្លងកាត់ស្ថានការណ៍ដូចពេលនេះ ជាហេតុធ្វើឱ្យមានឱកាសក្នុងការសង្ឃឹមអំពីសម័យកាលស្ងប់ស្ងាត់យូរអង្វែង» Hans Kluge ប្រធានអង្គការសុខភាពពិភពលោកប្រចាំតំបន់អឺរ៉ុប បានឱ្យដឹងដូច្នេះកាលពីម្សិលមិញ ដោយយល់ថា តំបន់នេះកំពុងមានភាពស៊ាំក្នុងសហគមន៍ខ្ពស់ ព្រោះតែបានចាក់វ៉ាក់សាំងយ៉ាងទូលំទូលាយ និងប្រជាជនមួយភាគធំធ្លាប់បានឆ្លងវីរុស ខណៈដែល អូមីក្រុង បង្កអាការស្រាលជាង វ៉ារ្យ៉ង់ ដទៃ ហើយរដូវរងាក៏ជិតដាច់ទៅវិញ។

យោងតាម Kluge មូលហេតុទាំងឡាយខាងលើនឹងនាំមកឱ្យ អឺរ៉ុប នូវសមត្ថភាពទប់ទល់នឹង កូវីដ-១៩ បានប្រសើរជាងមុន សូម្បីតែនៅពេលមាន កូវីដ-១៩ ប្រភេទថ្មី ដែលសាហាវជាង អូមីក្រុង។

មន្ត្រី WHO រូបនេះសង្កត់ធ្ងន់ថា ប្រការនេះ «មិនមែនមានន័យថា ជំងឺរាតត្បាតសកលត្រូវបានបញ្ចប់នោះទេ» ប៉ុន្តែ «មានឱកាសដើម្បីគ្រប់គ្រងបាននូវការឆ្លងរាលដាល»។

លោក Kluge ព្រមានថា ស្ថានការណ៍ដែល WHO ព្យាករ នឹងមិនកើតឡើងឡើយ បើសិនបណ្ដាប្រទេសមិនបន្តយុទ្ធនាការចាក់វ៉ាក់សាំង និងបង្កើនការតាមដានដើម្បីស្វែងរក វីរុសបំប្លែងខ្លួនថ្មី រួមនឹងការអនុវត្តវិធានការទប់ស្កាត់ការឆ្លងរាលដាល។

យោងតាម WHO អ្នកវិជ្ជមាននឹង កូវីដ-១៩ ប្រហែល ១២ លាននាក់ ត្រូវបានរកឃើញនៅ អឺរ៉ុប កាលពីសប្ដាហ៍មុន ដែលនេះគឺជាតួលេខខ្ពស់បំផុត រាប់ចាប់ពី កូវីដ-១៩ បានផ្ទុះឡើង។ ក៏ប៉ុន្តែ ដោយសារតែអ្នកជំងឺត្រូវចូលពេទ្យមានអត្រាទាប ទើបបណ្ដាប្រទេសដូចជា បារាំង អៀរឡង់ និង អង់គ្លេស ជាដើម បានប្រកាសដក ឬកាត់បន្ថយវិធានការទប់ស្កាត់នានា។ ដាណឺម៉ាក កាលពីថ្ងៃទី ១ កុម្ភៈ បានក្លាយជាប្រទេសដំបូងគេនៅក្នុងសហភាពអឺរ៉ុប ដែលបានដកវិធានការទប់ស្កាត់ទាំងស្រុងនៅប្រទេសនេះ៕

February 4, 2022

ឥណ្ឌា ចាត់ទុកការជួញដូររូបិយវត្ថុឌីជីថល ដូចទៅនឹងការលេងល្បែងស៊ីសងស្របច្បាប់

រដ្ឋាភិបាលឥណ្ឌា បានឱ្យដឹងថា ពួកគេមិនចាត់ទុកការជួញដូរប្រាក់ឌីជីថលជារៀងខុសច្បាប់នោះទេ ប៉ុន្តែបញ្ជាក់ថា នឹងយកពន្ធដូចទៅនឹងអ្វីដែលបានអនុវត្តចំពោះអ្នកឈ្នះល្បែងស៊ីសង។

«វាកំពុងស្ថិតក្នុងតំបន់ប្រផេះ។ ការទិញ និងលក់ប្រាក់ជីឌីជល មិនមែនជារឿងខុសច្បាប់។ បច្ចុប្បន្ន យើងបានលើកឡើងនូវប្រភេទពន្ធលើការជួញដូរប្រាក់ឌីជីថល ដូចទៅនឹងវិធីដែលយើងអនុវត្តចំពោះអ្នកដែលបានឈ្នះល្បែងភ្នាល់ប្រណាំងសេះ ឬរូបភាពនៃល្បែងស៊ីសងដទៃ» លោក T.V. Somanathan រដ្ឋមន្ត្រីក្រសួងហិរញ្ញវត្ថុឥណ្ឌា ឱ្យដឹងដូច្នេះ។

ក្រោយការតាមដាន និងពិចារណាអស់ច្រើនឆ្នាំ រដ្ឋាភិបាលឥណ្ឌា បានដាក់សំណើយកពន្ធ ៣០% លើប្រាក់ចំណូលចំពោះការជួញដូរប្រាក់ឌីជីថល។ ការសម្រេចនេះ បានធ្វើឱ្យរូបិយវត្ថុឌីជីថលវិមជ្ឈការ មាន Bitcoin ជាដើម ក្លាយជាប្រាក់ស្របច្បាប់។

ក៏ប៉ុន្តែ កម្រិតនៃការយកពន្ធ ៣០% ខាងលើនេះនឹងក្លាយជាឧបសគ្គធំចំពោះការជួញដូរប្រាក់ឌីជីថលវិមជ្ឈការ ដែលកំពុងតែមានការកើនឡើងនៅ ឥណ្ឌា។ រដ្ឋាភិបាលក៏កំពុងប្រឹងប្រែងក្នុងការធ្វើសេចក្ដីព្រាងច្បាប់ទាក់ទងនឹងប្រាក់ឌីជីថលនេះដែរ តែវាត្រូវការការអនុម័តពីគណៈរដ្ឋមន្ត្រី មុននឹងត្រូវបានបញ្ជូនទៅដល់សភា។

បច្ចុប្បន្ន ធនាគារជាតិរបស់ ឥណ្ឌា ក៏កំពុងតែរៀបផែនការដើម្បីអាចដាក់ឱ្យប្រើប្រាស់រូបិយវត្ថុឌីជីលផ្ទាល់ខ្លួននៅថ្ងៃទី ១ មេសាខាងមុខ។ ឥរិយាបថនេះត្រូវបានគេជឿថា នឹងបើកផ្លូវឱ្យមានយុគសម័យគ្រប់គ្រងរូបិយវត្ថុប្រកបដោយប្រសិទ្ធភាព និងការចំណាយទាប៕

February 3, 2022

វិស័យពិភពនិម្មិត Metaverse នឹងធ្វើឱ្យទីផ្សារបច្ចេកវិទ្យា «ផ្ទុះកក្រើកខ្លាំង» ក្នុងឆ្នាំ ២០២២

ពិភពនិម្មិត metaverse, ផ្ទះឆ្លាតវៃ smarthome, យានយន្តអគ្គិសនី (EV) ជាដើម មិនត្រឹមតែជានិន្នាការថ្មីនោះទេ ប៉ុន្តែ វានឹងជ្រៀតចូលជ្រៅទៅក្នុងជីវភាពប្រចាំថ្ងៃរបស់មនុស្សនៅក្នុងឆ្នាំនេះ។

២០២២ គឺជាឆ្នាំដែលត្រូវបានចាត់ទុកថា បញ្ញាសិប្បនិម្មិត (AI) មានការកែលំអយ៉ាងសម្បើម និងកាន់តែមានភាពជិតស្និតនៅក្នុងជីវភាពរបស់មនុស្សលោក។ បច្ចេកវិទ្យា blockchain, NFT បានចាប់ផ្ដើមក្លាយជាទីពេញនិយម។ ទន្ទឹមនឹងនេះ វិស័យពិភពនិម្មិត metaverse ក៏មានការបោះជំហានទៅមុខ ជាមួយនឹងក្ដីសង្ឃឹមខ្ពស់ក្នុងឆ្នាំ ២០២២។

«២០២២ នឹងជាឆ្នាំដែលមានការប្រកួតប្រជែងយ៉ាងខ្លាំងក្លានៅក្នុងវិស័យពិភពនិម្មិត metaverse។ ក្រុមហ៊ុនបច្ចេកវិទ្យាធំៗនឹងដណ្ដើមចំណែកទីផ្សារនៅក្នុងវិស័យដែលទើបលេចធ្លោនេះ» Rolf Illenberger ដែលជានាយកប្រតិបត្តិរបស់ក្រុមហ៊ុនផលិតកម្មវិធីពិភពនិម្មិត VRdirect បានប្រាប់សារព័ត៌មាន Washington Post ដូច្នេះ។

ការប្រកួតប្រជែងក្នុងទីផ្សារពិភពនិម្មិត ត្រូវបានផ្ដួចផ្ដើមតាំងពីច្រើនឆ្នាំមកហើយ។ ស្ថាប័ន Oculus របស់ក្រុមហ៊ុន Meta (Facebook) បានឈានដល់របត់សំខាន់ នោះគឺការបញ្ចេញឧបករណ៍ពិភពនិម្មិត VR បានចំនួន ១០ លានគ្រឿង។

ចំណែកក្រុមហ៊ុន Microsoft ក៏ចូលប្រលូកក្នុងទីផ្សារ VR បានច្រើនឆ្នាំហើយដែរ ទន្ទឹមនឹងការចំណាយជិត ៦៩ ពាន់លានដុល្លារ ដើម្បីទិញក្រុមហ៊ុនហ្គេម Activision Blizzard ជាមួយនឹងក្ដីសង្ឃឹមថានឹងបានឈានចូលជ្រៅទៅក្នុងពិភពនិម្មិត។

កាលពីខែមករា ២០២២ CEO របស់ Apple លោក Tim Cook បានថ្លែងថា metaverse គឺជាវិស័យដ៏គួរឱ្យចាប់អារម្មណ៍ ព្រោះមានសក្ដានុពលធំធេង ហើយថា ក្រុមហ៊ុន Apple ក៏កំពុងវិនិយោគយ៉ាងសមស្របទៅលើវិស័យនេះ។

ដោយឡែក ក្រុមហ៊ុន Google វិញ ត្រូវបានគេជឿថា កំពុងអភិវឌ្ឍយ៉ាងសម្ងាត់នូវវ៉ែនតា AR ជំនាន់ថ្មី ដោយមានបុគ្គលិកចូលរួម ៣០០ នាក់។

បណ្ដាផលិតផល VR, AR និងកម្មវិធីជាច្រើនដែលទាក់ទងនឹងវិស័យពិភពនិម្មិត ក៏ត្រូវបានដាក់បង្ហាញនៅឯពិធីពិព័រណ៍អេឡិចត្រូនិក CES ២០២២ កាលពីដើមខែមករា នៅ សហរដ្ឋអាម៉េរិក។ យោងតាម New York Times នេះគឺជាសញ្ញានៃការផ្ទុះឡើងរបស់ប្រភេទឧបករណ៍បច្ចេកវិទ្យាពិភពនិម្មិត នៅក្នុងឆ្នាំ ២០២២៕

February 3, 2022

គម្រោងអភិវឌ្ឍន៍ហេដ្ឋារចនាសម្ព័ន្ធសម្រាប់យានយន្តដើរដោយថាមពលអគ្គិសនីនៅកម្ពុជា ត្រូវបានបញ្ជាក់កាន់តែច្បាស់ ក្នុងជំនួបជាមួយគណៈប្រតិភូ UNDP

ក្រសួងសាធារណការ នឹងរៀបចំផែនទីបង្ហាញផ្លូវគ្រប់ជ្រុងជ្រោយទាក់ទងនឹងការអភិវឌ្ឍន៍ហេដ្ឋារចនាសម្ព័ន្ធគាំទ្រការប្រើប្រាស់យានយន្តដើរដោយថាមពលអគ្គិសនីនៅ កម្ពុជា។

នាទីស្តីការក្រសួងសាធារណការ និងដឹកជញ្ជូន កាលពីថ្ងៃទី ២ កុម្ភៈ ២០២២ ក្នុងឱកាសជួបពិភាក្សាជាមួយគណៈប្រតិភូកម្មវិធីអភិវឌ្ឍន៍សហប្រជាជាតិ (UNDP) ប្រចាំនៅកម្ពុជា ដែលដឹកនាំដោយលោកស្រីនាយិកា Alissar Chaker លោករដ្ឋមន្ត្រី ស៊ុន ចាន់ថុល បានលើកឡើងអំពីការរៀបចំសេចក្តីព្រាងគោលនយោបាយដឹកជញ្ជូនផ្លូវគោក ក្នុងនោះមានដូចជាគម្រោងសម្រាប់យានយន្តដើរដោយថាមពលអគ្គិសនីជាដើម។

គម្រោងមួយចំនួនដែលត្រូវបានលើកឡើងដោយលោករដ្ឋមន្ត្រីក្រសួងសាធារណការ នៅក្នុងជំនួបខាងលើ មានដូចជា គម្រោងអភិវឌ្ឍហេដ្ឋារចនាសម្ព័ន្ធសម្រាប់គាំទ្រដល់ការប្រើប្រាស់រថយន្តដើរដោយថាមពលអគ្គិសនី គម្រោងដំឡើងស្ថានីយបញ្ចូលថាមពលថ្មរថយន្តដើរដោយថាមពលអគ្គិសនី (EVs) គម្រោងនាំចូលរថយន្តចាស់ៗ និងគម្រោងជួបពិភាក្សាជាមួយនឹងស្ថានីយ៍ប្រេងឥន្ធនៈទាក់ទងនឹងការដំឡើងស្ថានីយ៍បញ្ចូលថាមពលថ្មរថយន្ត EVs ផងដែរ។

គណៈប្រតិភូរបស់ UNDP បានលើកឡើងអំពីនិន្នាការពិភពលោកឆ្ពោះទៅរកការប្រើប្រាស់រថយន្តដើរដោយថាមពលអគ្គិសនី និងបម្រែបម្រួលអាកាសធាតុ ព្រមទាំងបានស្នើ ឱ្យក្រសួងធ្វើការឱ្យបានជិតស្និទ្ធជាមួយដៃគូសហការ ដើម្បីអភិវឌ្ឍហេដ្ឋារចនាសម្ព័ន្ធទ្រទ្រង់រថយន្តដើរដោយថាមពលអគ្គិសនី និងជំរុញឱ្យមានការចូលរួមពីក្រសួង-ស្ថាប័នពាក់ព័ន្ធទាក់ទងនឹងបញ្ហានេះ។

លោករដ្ឋមន្ត្រី បានណែនាំឱ្យអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ រៀបចំផែនទីបង្ហាញផ្លូវគ្រប់ជ្រុងជ្រោយទាក់ទងនឹងការអភិវឌ្ឍន៍ហេដ្ឋារចនាសម្ព័ន្ធគាំទ្រការប្រើប្រាស់យានយន្តដើរដោយថាមពលអគ្គិសនី និងពិភាក្សាជាមួយសេវាដឹកជញ្ជូនម្ហូបអាហារ ដើម្បីពិនិត្យលទ្ធភាពលើការប្រើប្រាស់ម៉ូតូដើរដោយថាមពលអគ្គិសនី ជំនួសម៉ូតូដែលប្រើសាំងក្នុងការបម្រើសេវារបស់ពួកគេ។

ការណែនាំរបស់លោក រដ្ឋមន្ត្រី គឺដើម្បីឆ្លើយតបទៅនឹងសំណើរបស់គណៈប្រតិភូ UNDP និងគម្រោង ផែនការ រួមនឹងនិងគោលនយោបាយដឹកជញ្ជូនផ្លូវគោករបស់ កម្ពុជា៕

February 3, 2022

ការតាមដានយន្តហោះរបស់មហាសេដ្ឋី Elon Musk ជួយឱ្យនិស្សិតម្នាក់ ទទួលបានការអញ្ជើញឱ្យចូលធ្វើការនៅក្នុងក្រុមហ៊ុនធំ

(សហរដ្ឋអាម៉េរិក)-និស្សិតម្នាក់ត្រូវបានក្រុមហ៊ុនអាកាសចរណ៍មួយ អញ្ជើញឱ្យចូលធ្វើការ បន្ទាប់ពីមហាសេដ្ឋី Elon Musk ផ្ញើសារមកស្នើឱ្យកំលោះនេះ ឈប់តាមដានយន្តហោះរបស់គាត់។

Jack Sweeney អាយុ ១៩ ឆ្នាំ ដែលកំពុងសិក្សានៅសាកលវិទ្យាល័យ Central Florida (UCF) នៅ សហរដ្ឋអាម៉េរិក ទទួលបានការអញ្ជើញឱ្យចូលធ្វើការនៅក្នុងក្រុមហ៊ុនអាកាសចរណ៍ឯកជន Stratos Jet Charters ដែលមានទីស្នាក់ការនៅ Florida កាលពីថ្ងៃទី ១ កុម្ភៈ ២០២។

Joel Thomas ដែលជាប្រធាន និងជា CEO របស់ Stratos ឱ្យដឹងថា ក្រុមហ៊ុនស្នើឱ្យ Sweeney ចូលរួមក្នុងក្រុមអភិវឌ្ឍផលិតផល ក្រោយពីបានឃើញភាពច្នៃប្រឌិតរបស់កំលោះនេះនៅលើទំព័រ Twitter ដែលមានគណនីឈ្មោះ ElonJet។

Sweeney បានទទួលស្គាល់ថា ពិតជាទទួលបានការអញ្ជើញឱ្យចូលធ្វើការពីសំណាក់ក្រុមហ៊ុន Stratos ប៉ុន្តែ កំលោះនេះក៏បានឱ្យដឹងថា ខ្លួនទំនងជាមិនយល់ព្រម ព្រោះតែបច្ចុប្បន្ន ជាប់ធ្វើការឱ្យ UberJets ក្នុងគម្រោងអភិវឌ្ឍថ្នាលបច្ចេកវិទ្យាតាមដានជើងហោះហើរដើម្បីស្វែងរកសំបុត្រដែលមានតម្លៃទាប ជូនអតិថិជន។ «ខ្ញុំគោរពតាមកិច្ចព្រមព្រៀងការពារព័ត៌មានសម្ងាត់ ដូច្នេះ ពិតជាពិបាកធ្វើការឱ្យ Stratos» Sweeney បញ្ជាក់ដូច្នេះ។

កំលោះ Jack Sweeney និងមហាសេដ្ឋី Elon Musk

កំលោះ Jack Sweeney ត្រូវបានគេចាប់អារម្មណ៍ច្រើនកាលពីចុងខែមុន បន្ទាប់ពីបានបង្ហើបឱ្យដឹងអំពីការឆ្លើយឆ្លងគ្នារវាងខ្លួន និងមហាសេដ្ឋី Elon Musk។ ក្នុងការឆ្លើយឆ្លងនោះ CEO របស់ Tesla បានស្នើឱ្យលុបគណនី Twitter ឈ្មោះ ElonJet ដែលមានជំនាញក្នុងការបញ្ចេញទិន្ន័យស្ដីពីជើងហោះហើររបស់យន្តហោះដែលដឹកលោក Elon Musk ព្រោះតែយល់ថា ជា «ការគំរាមកំហែងផ្នែកសន្តិសុខ»។

ElonJet ដែលមានអ្នកតាមដានជាង ១២៧,០០០ នាក់ នៅលើ Twitter កំពុងប្រើប្រាស់ ADS-B ដែលជាកម្មវិធីស្វ័យប្រវត្តក្នុងការទាញយកទិន្នន័យទីតាំងនៃជើងហោះហើររបស់អាកាសចរណ៍ស៊ីវិល ដើម្បីតាមដានយន្តហោះផ្ទាល់ខ្លួនរបស់មហាសេដ្ឋីអាម៉េរិក លោក Elon Musk ទៅតាមពេលវេលាជាក់ស្ដែង។

លោក Musk ថា នឹងផ្ដល់ប្រាក់ ៥,០០០ ដុល្លារ ជាថ្នូរនឹងការលុបគណនី ElonJet ប៉ុន្តែ Sweeney និយាយលេងថា ខ្លួនត្រូវការ ៥០,០០០ ដុល្លារ ដើម្បីផ្គត់ផ្គង់ដល់ការសិក្សា និងអាចទិញរថយន្ត Model 3 បាន ១ គ្រឿង។ មហាសេដ្ឋី Elon Musk ប្រាប់ថា នឹងពិចារណាអំពីប្រការនោះ ហើយក្រោយមកក៏បានឆ្លើយថា «មិនសមហេតុផល» នៅពេលត្រូវឱ្យប្រាក់ដើម្បីលុប ElonJet ព្រមទាំងបានរាំងខ្ទប់គណនីទាំងអស់នៅលើបណ្ដាញសង្គមដែលទាក់ទងនឹង Sweeney។

Sweeney បានតាមដានជើងហោះហើររបស់មហាសេដ្ឋី Elon Musk តាំងពីយូរមកហើយ ប៉ុន្តែ គណនី ElonJet នេះ ទើបត្រូវបានបង្កើតឡើងកាលពីខែមិថុនា ២០២០ ក្នុងគ្រាដែល កូវីដ-១៩ កំពុងធ្វើឱ្យការសិក្សាងាកទៅរកអនឡាញ នាំឱ្យកំលោះនេះមានពេលសរសេរកូដ៕

February 3, 2022

Author: សឿន សំណាង