សឿន សំណាង - La Reine Media

ប្រទេសអូស្ត្រាលី នឹងចាប់ផ្ដើមបើកទ្វារព្រំដែនទទួលភ្ញៀវទេសចរណ៍បរទេស នៅ ២ សប្ដាហ៍ទៀត

ចាប់ពីថ្ងៃទី ២១ កុម្ភៈ ២០២២ ប្រទេសអូស្ត្រាលី នឹងបើកព្រំដែនឡើងវិញដើម្បីទទួលភ្ញៀវទេសចរណ៍បរទេស បន្ទាប់ពីបានបិទអស់រយៈពេល ២ ឆ្នាំ ដើម្បីអនុវត្តវិធានការទប់ស្កាត់ជំងឺរាតត្បាតសកលកូវីដ-១។

«លក្ខខណ្ឌតម្រូវដើម្បីអាចចូលទឹកដី អូស្ត្រាលី បានគឺត្រូវចាក់វ៉ាក់សាំងបាន ២ ដូស» នាយករដ្ឋមន្ត្រីអូស្ត្រាលី Scott Morrison ប្រកាសដូច្នេះ។

មេដឹកនាំអូស្ត្រលី ថ្លែងថា ដោយសារតែ អូមីក្រុង បានបង្ហាញវត្តមាននៅ អូស្ត្រាលី ដូច្នេះអ្នកដែលបានចាក់វ៉ាក់សាំងពេញលេញក៏មិនបង្កហានិភ័យធ្ងន់ធ្ងរបន្ថែមទៀតដល់ប្រជាជននៅប្រទេសនេះ។

អ្នកទេសចរណ៍បរទេសដែលមិនទាន់បានចាក់វ៉ាក់សាំងពេញលេញ នឹងត្រូវគោរពតាមការកំណត់លើការធ្វើចត្តាឡីស័ករបស់រដ្ឋ និងតំបន់នីមួយៗនៅ អូស្ត្រាលី។

នាយករដ្ឋមន្ត្រីអូស្ត្រាលី Scott Morrison

បន្ទាប់ពីបានអនុញ្ញាតឱ្យ ពលរដ្ឋអូស្ត្រាលី វិលចូលស្រុកវិញចាប់ពីខែមីនា ២០២០ រដ្ឋាភិបាលអូស្ត្រាលី បានបើកទ្វារព្រំដែនឡើងវិញទៅតាមដំណាក់កាល។

គិតមកដល់ព្រឹកថ្ងៃទី ៧ កុម្ភៈ អូស្ត្រាលី បានរកឃើញអ្នកវិជ្ជមាននឹងកូវីដ-១៩ សរុបចំនួន ២.៧ លានករណី ក្នុងនោះមានជាង ៤,០០០ នាក់ បានបាត់បង់ជីវិត៕

February 7, 2022

(វីដេអូ)-រ៉ូបូតជើង ៦ ខ្នាតយក្ស កើតឡើងពីការបំផុសគំនិតដោយខ្សែភាពយន្តវិទ្យាសាស្ត្រប្រឌិត

វិស្វករអង់គ្លេស បានច្នៃរ៉ូបូតកម្ពស់ ២.៨ ម៉ែត្រ និងទម្ងន់ ២.២ តោន អាចធ្វើដំណើរនៅលើសណ្ឋានដីលំបាកៗក្នុងល្បឿន ១ គីឡូម៉ែត្រ/ម៉ោង។

រ៉ូបូតខ្នាតយក្សនេះត្រូវបានបង្កើតឡើងដោយយោងទៅតាមចំណាប់អារម្មណ៍ពីខ្សែភាពយន្តវិទ្យាសាស្ត្រប្រឌិត។ រ៉ូបូតដែលមានឈ្មោះថា Mantis នេះ មានជើងចំនួន ៦ និងកំពុងកាន់កាប់អត្តទគ្គកម្មពិភពលោក Guinness ស្ដីអំពីរ៉ូបូតជើង ៦ ធំបំផុត ដែលអាចបញ្ជាបាន។

Mantis មានកម្ពស់ ២.៨ ម៉ែត្រ និងទម្ងន់ ២.២ តោន។ វាត្រូវបានបង្កើតឡើងដើម្បីអាចដើរនៅលើភូមិសាស្ត្រលំបាក។ តើវាបោះជំហានដោយរបៀបណា?

Mantis ដំណើរការដោយម៉ាស៊ីនម៉ាស៊ូត ២.២ លីត្រ និងដើរក្នុងល្បឿនលឿនបំផុតគឺ ១ គីឡូម៉ែត្រ/ម៉ោង។ វាមានដងបញ្ជាចំនួន ២ ដែលមានគ្រាប់ចុចចំនួន ២៨ គ្រាប់ និងអាចត្រូវបានបញ្ជាពីចម្ងាយតាមរយៈប្រព័ន្ធ Wi-Fi ឬបញ្ជាពីខាងក្នុងបន្ទប់បញ្ជាក្នុងរ៉ូបូតនេះ។

រ៉ូបូត Mantis ត្រូវបានច្នៃដោយវិស្វករ Matt Denton នៅ Hampshire ប្រទេសអង់គ្លេស។ Denton ធ្លាប់ច្នៃរ៉ូបូតដូចគ្នានេះ ប៉ុន្តែជាកំណែខ្នាតតូច នៅឯផ្ទះរបស់គាត់។

លោក Denton បានចំណាយពេលអស់ ៣ ឆ្នាំ ដើម្បីបង្កើត Mantis។ រ៉ូបូតនេះមិនមែនត្រូវបានបង្កើតឡើងសម្រាប់លក់នោះទេ ប៉ុន្តែ ដំណើរការរបស់រ៉ូបូតនេះពិតជាគួរឱ្យចាប់អារម្មណ៍៕

February 7, 2022

ព្រះអង្គម្ចាស់ Charles មានមោទកភាព នៅពេលព្រះនាង Camilla នឹងក្លាយជាអគ្គមហេសី

ព្រះអង្គម្ចាស់ Charles មានបន្ទូលថា មានមោទកភាពយ៉ាងជ្រាលជ្រៅចំពោះបំណងតែងតាំងព្រះនាង Camilla ជាអគ្គមហេសីនៃចក្រភពអង់គ្លេស។

«ក្នុងទិវាប្រវត្តិសាស្ត្រនេះ ខ្ញុំ និងមហេសី កំពុងថ្វាយព្រះពរមហាក្សត្រី ដែលទ្រង់បានគ្រប់គ្រងប្រទេស និងចក្រភពអង់គ្លេស (បណ្ដាប្រទេសជាសមាជិករបស់ខំមិនវែល (Commonwealth) អស់រយៈពេល ៧០ ឆ្នាំកន្លង។ យើងមានមនសិការយ៉ាងជ្រាលជ្រៅចំពោះមោទកភាពដែលត្រូវបានបង្ហាញតាមរយៈបំណងរបស់ព្រះមាតា។ នៅពេលយើងរួមដៃគ្នាបម្រើមហាក្សត្រី និងប្រជាជន មហេសីជាទីស្រលាញ់របស់ខ្ញុំ នៅតែជាទីពឹងដ៏រឹងមាំរបស់ខ្ញុំក្នុងរយៈពេលកន្លង» ព្រះអង្គម្ចាស់ Charles បានប្រកាសដូច្នេះកាលពីថ្ងៃទី ៦ កុម្ភៈ។

ប្រកាសរបស់ព្រះអង្គម្ចាស់ Charles ត្រូវបានលើកឡើងមួយថ្ងៃបន្ទាប់ពីមហាក្សត្រីអង់គ្លេស Elizabeth II សម្ដែងអំពីបំណងចង់ឱ្យរាជបុត្រីសុណិសា (បុត្រីប្រសា) Camilla ត្រូវបានតែងតាំងជាអគ្គមហេសី ជាឋានៈខ្ពស់បំផុតសម្រាប់មហេសីរបស់ស្ដេច នៅពេលព្រះអង្គម្ចាស់ Charles ឡើងគ្រងរាជសម្បត្តិ។

ព្រះអង្គម្ចាស់ Charles និងមហេសី Camilla បានរៀបអភិសេកកាលពីឆ្នាំ ២០០៥ បន្ទាប់ពីក្សត្រទាំងពីរអង្គនេះសុទ្ធតែធ្លាប់បានឆ្លងកាត់អាពាហ៍ពិពាហ៍បែកបាក់។ ព្រះអង្គម្ចាស់ Charles បានផ្ដាច់ចំណងអាពាហ៍ពិពាហ៍ជាមួយព្រះនាង Diana កាលពីឆ្នាំ ១៩៩៦ មួយឆ្នាំមុនពេលព្រះនាងបានចូលទិវង្គតដោយសារគ្រោះថ្នាក់ចរាចរណ៍នៅ ទីក្រុងបារីស។

យោងតាមច្បាប់ នៅពេលព្រះអង្គម្ចាស់ Charles ឡើងគ្រងរាជ ព្រះនាង Camilla នឹងត្រូវបានតែងតាំងជាអគ្គមហេសី ដែលជាតំណែងខ្ពស់បំផុតសម្រាប់មហេសីរបស់មហាក្សត្រ ប៉ុន្តែ រាជវាំងអង់គ្លេស នៅមានការរារែកអំពីប្រតិកម្មរបស់សាធារណមតិ ដូច្នេះមានដំណឹងចរាចាមអារ៉ាមថា ព្រះនាង Camilla នឹងត្រូវបានតែងតាំងជា មហេសី ប៉ុណ្ណោះ ពោលគឺមិនមែន អគ្គមហេសី នោះទេ។

ប៉ុន្តែ ប្រកាសរបស់មហាក្សត្រីអង់គ្លេស បានត្រួសត្រាយផ្លូវដើម្បីឱ្យព្រះនាង Camilla ក្លាយជា «អគ្គមហេស៊ី» ក្នុងពេលអនាគត។ មហាក្សត្រីអង់គ្លេស បច្ចុប្បន្នមានព្រះជន្មាយុ ៩៥ វស្សា ក៏មានសិទ្ធិតែងតាំងឋានៈជាអគ្គមហេសី ដល់បុត្រីសុណិសា នៅពេលរាជបុត្រា Charles របស់ទ្រង់ បានឡើងគ្រងរាជ។

មហាក្សត្រីអង់គ្លេស Elizabeth II កំពុងប្រារព្ធមហាទិវាអនុស្សាវរីយ៍នៃការឡើងសោយរាជសម្បត្តិរយៈពេល ៧០ ឆ្នាំ។ មហាក្សត្រីអង្គនេះ គឺជាក្សត្រដំបូងគេបង្អស់ដែលគ្រងរាជបាន ៧០ ឆ្នាំ ហើយក៏ជាក្សត្រដែលសោយរាជបានយូរជាងគេក្នុងពិភពលោកផងដែរ៕

February 7, 2022

ករណីក្មេងអាយុ ៥ ឆ្នាំ ជាប់ក្នុងកូនអណ្ដូងជម្រៅជាង ៣០ ម៉ែត្រ មេដឹកនាំបារាំងចូលរួមរំលែកទុក្ខ ខណៈសង្ឃរាជ Francis កោតសរសើរដល់ក្រុមសង្គ្រោះ

សម្ដេចសង្ឃរាជ Francis កាលពីម្សិលមិញ បានថ្លែងកោតសរសើរប្រជាជនម៉ារ៉ុក ដែលបានសាមគ្គីគ្នានៅក្នុងការជួយសង្គ្រោះកុមារ Rayan ដែលបានធ្លាក់ចូលជាប់ក្នុងកូនអណ្ដូងជម្រៅ ៣២ ម៉ែត្រ បើទោះជាលទ្ធផលមិនសមតាមបំណង។

«គ្រប់គ្នាបានរួមដៃគ្នាជួយសង្គ្រោះ Rayan» សម្ដេចសង្ឃ Francis មានសង្ឃដីកាដូច្នេះនៅក្នុងពិធីបួងសួងប្រចាំសប្ដាហ៍នៅឯទីលាន Peter នៃ បុរីវ៉ាទីកង់។ «ក្រុមបុគ្គលិកជួយសង្គ្រោះបានប្រឹងប្រែងអស់ពីកម្លាំងកាយ ប៉ុន្តែ គួរឱ្យសោកស្ដាយ ពួកគេមិនទទួលបានជោគជ័យ។ យ៉ាងណាក៏ដោយ នេះគឺជាគំរូល្អមួយ»។

Rayan ជាក្មេងប្រុសអាយុ ៥ ឆ្នាំ បានធ្លាក់ចូលជាប់ក្នុងអណ្ដូងគោក ជម្រៅរហូតដល់ ៣២ ម៉ែត្រ ក្នុងភូមិដាច់ស្រយាល Ighrane ក្នុងខេត្ត Chefchaouen ភាគខាងជើងប្រទេសម៉ារ៉ុក ស្ថិតក្នុងតំបន់ អាហ្វ្រិកខាងជើង ចាប់ពីរសៀលថ្ងៃទី ១ កុម្ភៈ និងជាប់ក្នុងអណ្ដូងនេះរហូតដល់ក្រុមអ្នកសង្គ្រោះបានរកឃើញ។

មាត់អណ្ដូងមានអង្កត់ផ្ចិត ៤៥ ស.ម ប៉ុណ្ណោះ ដូច្នេះ បុគ្គលិកសង្គ្រោះពិតជាពិបាកក្នុងការចុះទៅជួយដល់ផ្ទាល់។ ការកាយពង្រីកមាត់អណ្ដូងឱ្យធំ ក៏មានហានិភ័យខ្ពស់ ទើបកម្លាំងសង្គ្រោះសម្រេចចិត្តប្រើប្រាស់អាត្រាក់កាយដីតាមជើងភ្នំទន្ទឹមនឹងអណ្ដូងដើម្បីស្វែងរកវិធីសង្គ្រោះក្មេងនេះ។

ក្រុមវេជ្ជបណ្ឌិតបាននាំគ្នារង់ចាំពិនិត្យ និងព្យាបាលកុមារនេះ នៅពេលត្រូវបាននាំឡើងមកលើ។ ឧត្ថម្ភាគចក្រ ១ គ្រឿងក៏កំពុងត្រៀមក្បែរនោះ ដើម្បីដឹក Rayan ទៅកាន់មន្ទីរពេទ្យ។

ប្រជាជនអ៊ីតាលី បាននាំគ្នាតាមដានហេតុការណ៍នេះយ៉ាងយកចិត្តទុកដាក់ ព្រោះថា វាស្រដៀងនឹងហេតុការណ៍មួយកាលពីឆ្នាំ ១៩៨១ នៅពេលបុគ្គលិកសង្គ្រោះរាប់សិបនាក់ ព្យាយាមជួយសង្គ្រោះ Alfredino Rampi ជាក្មេងប្រុសអាយុ ៦ ឆ្នាំ ដែលជាប់ក្នុងអណ្ដូងរយៈពេល ៣ ថ្ងៃ។ ប៉ុន្តែ ក្មេងនេះបានបាត់បង់ជីវិត មុនពេលក្រុមសង្គ្រោះបានចូលដល់។

ក្នុងករណី Rayan មុនសង្ឃដីការបស់សម្ដេច Francis ប្រធានាធិបតីបារាំង Emmanuel Macron ក៏បានផ្ញើសារចូលរួមរំលែកទុក្ខនៃក្រុមគ្រួសារក្មេងប្រុសនេះផងដែរ។

អ្នកលេងបណ្ដាញសង្គម Twitter ក៏បានសម្ដែងការគោរពចំពោះបុគ្គលិកសង្គ្រោះម្នាក់ឈ្មោះ Ali Sahrawi ដែលជាអ្នកជំនាញផ្នែកជីកអណ្ដូង បានចំណាយពេលរាប់ម៉ោងដើម្បីជីកកកាយដីដោយដៃទទេ៕

February 7, 2022

(វីដេអូ)-ក្មេងអាយុ ៥ ឆ្នាំ ធ្លាក់ចូលក្នុងអណ្ដូងជម្រៅជាង ៣០ ម៉ែត្រ

(ម៉ារ៉ុក) Rayan ជាក្មេងប្រុសអាយុ ៥ ឆ្នាំ ធ្លាក់ចូល និងជាប់ក្នុងអណ្ដូងតូចមួយដែលមានជម្រៅរហូតដល់ ៣២ ម៉ែត្រ នៅក្នុងខេត្ត Chefchaouen អស់រយៈពេល ៤ យប់ ខណៈដែលអាជ្ញាធរកំពុងប្រឹងប្រែងជួយសង្គ្រោះ។

Rayan បានធ្លាក់ចូលក្នុងអណ្ដូងគោកក្នុងភូមិដាច់ស្រយាល Ighrane ភាគខាងជើងប្រទេសម៉ារ៉ុក ស្ថិតក្នុងតំបន់ អាហ្វ្រិកខាងជើង ចាប់ពីរសៀលថ្ងៃទី ១ កុម្ភៈ និងជាប់ក្នុងអណ្ដូងនេះរហូតដល់បច្ចុប្បន្ន។

មាត់អណ្ដូងមានអង្កត់ផ្ចិត ៤៥ ស.ម ប៉ុណ្ណោះ ដូច្នេះ បុគ្គលិកសង្គ្រោះពិតជាពិបាកក្នុងការចុះទៅជួយដល់ផ្ទាល់។ ការកាយពង្រីកមាត់អណ្ដូងឱ្យធំ ក៏មានហានិភ័យខ្ពស់ ទើបកម្លាំងសង្គ្រោះសម្រេចចិត្តប្រើប្រាស់អាត្រាក់កាយដីតាមជើងភ្នំទន្ទឹមនឹងអណ្ដូងដើម្បីស្វែងរកវិធីសង្គ្រោះក្មេងនេះ។

ការជួយសង្គ្រោះ មានការលំបាកខ្លាំង ដោយសារតែតំបន់នេះភាគច្រើនជាដីលាយខ្សាច់ និងមានថ្មច្រើន អាចនាំឱ្យមានការបាក់ស្រុត។

ក្រុមសង្គ្រោះរកវិធីបញ្ជូនទឹក និងអុកស៊ីសែន ទៅឱ្យ Rayan កាលពីថ្ងៃទី ៣ កុម្ភៈ ប៉ុន្តែ តាំងពីពេលនោះមក ពួកគេមិនបានបង្ហើបឱ្យដឹងអំពីស្ថានភាពរបស់ក្មេងរងគ្រោះនេះ។

មនុស្សរាប់ពាន់នាក់ប្រមូលផ្ដុំគ្នានៅជុំវិញអណ្ដូង ជួនកាលពួកគេនាំគ្នាទះដៃ ស្រែកហ៊ោដើម្បីលើកទឹកចិត្តដល់ក្រុមសង្គ្រោះ។

នៅព្រលប់ថ្ងៃទី ៤ កុម្ភៈ កម្លាំងសង្គ្រោះចាប់ផ្ដើមធ្វើការក្រោមពន្លឺភ្លើងហ្វានៅក្នុងដំណាក់កាលចុងក្រោយនៃបេសកកម្ម។ ពួកគេកំពុងប្រើប្រាស់ចបជីក ដើម្បីជីកកាយរូងប្រវែង ៣ ម៉ែត្រ ឆ្ពោះចូលទៅកាន់កន្លែងក្មេងនេះកំពុងជាប់។

ម្ដាយរបស់កុមាររងគ្រោះនិយាយថា កូនប្រុសរបស់គាត់កំពុងលេងក្បែរអណ្ដូង ក៏ស្រាប់តែបានបាត់ខ្លួនកាលពីរសៀលថ្ងៃទី ១ កុម្ភៈ។ «ខ្ញុំនៅតែសង្ឃឹមថា កូនប្រុសខ្ញុំនៅមានជីវិត និងត្រូវបានសង្គ្រោះចេញមកក្រៅ»។

ក្រុមវេជ្ជបណ្ឌិត កំពុងរង់ចាំពិនិត្យ និងព្យាបាលកុមារនេះ នៅពេលត្រូវបាននាំឡើងមកលើ។ ឧត្ថម្ភាគចក្រ ១ គ្រឿងក៏កំពុងត្រៀមក្បែរនោះ ដើម្បីដឹក Rayan ទៅកាន់មន្ទីរពេទ្យ៕

February 5, 2022

កូវីដ-១៩ នៅ កម្ពុជា ! រកឃើញអ្នកឆ្លងថ្មី ជាង ១០០ នាក់ទៀត ខណៈអ្នកជាសះស្បើយ ១០៥ នាក់ និងស្លាប់ «គ្មាន»

ក្នុងចំណោមអ្នកវិជ្ជមានថ្មីចំនួន ១១២ នាក់ មានករណីឆ្លងក្នុងសហគមន៍ ៨៧ នាក់ និង អ្នកដំណើរពីបរទេស ២៥ នាក់ ដែលទាំងអស់សុទ្ធតែជាករណី អូមីក្រុង។

February 5, 2022

ក្រុមអ្នកជំនួញដែលក្លាយជាមហាសេដ្ឋីតែក្នុងរយៈពេលដ៏ខ្លី

ឆ្នាំ ២០២១ ការប្រែប្រួលខ្លាំងនៅលើទីផ្សារមូលបត្រ បានធ្វើឱ្យអ្នកជំនួញជាច្រើនរូប មានវត្តមាននៅក្នុងបញ្ជីចំណាត់ថ្នាក់មហាសេដ្ឋី បានត្រឹមតែប៉ុន្មានខែ ប៉ុន្មានថ្ងៃ ឬអ្នកខ្លះក៏បានតែប៉ុន្មានម៉ោងប៉ុណ្ណោះ។

១-អានថូនី តាន (Anthony Tan)

-តំណែង៖ CEO និងជាសហស្ថាបនិករបស់ក្រុមហ៊ុន Grab
-សញ្ជាតិ៖ សិង្ហបុរី
-ក្លាយជាមហាសេដ្ឋីក្នុងរយៈពេល៖ តែប៉ុន្មានម៉ោងប៉ុណ្ណោះ
-ទ្រព្យសម្បត្តិ គិតត្រឹមថ្ងៃទី ១៥ ធ្នូ ២០២១៖ ៦០០ លានដុល្លារអាម៉េរិក
-ក្រុមហ៊ុន៖ Grab Holdings គឺជាក្រុមហ៊ុនបច្ចេកវិទ្យានៅ អាស៊ីអាគ្នេយ៍ ដែលមានទីស្នាក់ការកណ្ដាលនៅ -សិង្ហបុរី និង ឥណ្ឌូណេស៊ី។ ក្រៅពីដឹកអ្នកដំណើរ ក្រុមហ៊ុននេះក៏មានសេវាកម្មប្រគល់អាហារ និងទូទាត់ប្រាក់បែបឌីជីថល តាមរយៈកម្មវិធីទូរស័ព្ទផងដែរ។

២-ធីម ជិន (Tim Chen)

-តំណែង៖ ស្ថាបនិក និងជា CEO របស់ Nerdwallet
-សញ្ជាតិ៖ អាម៉េរិក
-ក្លាយជាមហាសេដ្ឋីក្នុងរយៈពេល៖ ច្រើនម៉ោង
-ទ្រព្យសម្បត្តិ គិតត្រឹមថ្ងៃទី ១៥ ធ្នូ ២០២១៖ ៤៩៩ លានដុល្លារអាម៉េរិក
-ក្រុមហ៊ុន៖ Nerdwallet ផ្ដល់សេវាកម្មហិរញ្ញវត្ថុបុគ្គល។

៣-ជាន ជីង លីវ (Jean Qing Liu)

-តំណែង៖ ប្រធានក្រុមហ៊ុន Didi Global
-សញ្ជាតិ៖ ចិន
-ក្លាយជាមហាសេដ្ឋីក្នុងរយៈពេល៖ ជិតមួយសប្ដាហ៍
-ទ្រព្យសម្បត្តិ គិតត្រឹមថ្ងៃទី ១៥ ធ្នូ ២០២១៖ ៤៦៦ លានដុល្លារអាម៉េរិក
-ក្រុមហ៊ុន៖ DiDi Global ដែលជាក្រុមហ៊ុនផ្ដល់សេវាហៅរថយន្ត បានចុះបញ្ជិកាក្នុងផ្សារមូលបត្រ New York កាលពីខែមិថុនា ២០២១។

៤- ចូបែន បែវឺត (JoeBen Bevirt)

-តំណែង៖ ស្ថាបនិក និង CEO របស់ Joby Aviation
-សញ្ជាតិ៖ អាម៉េរិក
-ក្លាយជាមហាសេដ្ឋីក្នុងរយៈពេល៖ ជិត ៣ ខែ
-ទ្រព្យសម្បត្តិ គិតត្រឹមថ្ងៃទី ១៥ ធ្នូ ២០២១៖ ៦៧០ លានដុល្លារអាម៉េរិក
-ក្រុមហ៊ុន៖ តាក់ស៊ីហោះដំណើរការដោយថាមពលអគ្គិសនី ធ្វើ IPO ក្នុងផ្សារហ៊ុនកាលពីខែសីហា ២០២១។

៥- ខល ដាយក្លើ (Carl Daikeler)

-តំណែង៖ ប្រធាន និង CEO របស់ BeachBody
-សញ្ជាតិ៖ អាម៉េរិក
-ក្លាយជាមហាសេដ្ឋីក្នុងរយៈពេល៖ ជិត ៤ ខែ
-ទ្រព្យសម្បត្តិ គិតត្រឹមថ្ងៃទី ១៥ ធ្នូ ២០២១៖ ៣២០ លានដុល្លារអាម៉េរិក
-ក្រុមហ៊ុន៖ BeachBody ផ្ដល់សេវាជាគ្រូបង្វឹកលំហាត់ប្រាណតាមផ្ទះ បានធ្វើ IPO នៅផ្សារហ៊ុនកាលពីខែមិថុនា ២០២១។

៦- អេន វ៉ូជិកស្គី (Anne Wojcicki) អតីតភរិយារបស់ Sergey Brin សហស្ថាបនិករបស់ Google

-តំណែង៖ សហស្ថាបនិករបស់ ២៣andMe
-សញ្ជាតិ៖ អាម៉េរិក
-ក្លាយជាមហាសេដ្ឋីក្នុងរយៈពេល៖ ជិត ៦ ខែ
-ទ្រព្យសម្បត្តិ គិតត្រឹមថ្ងៃទី ១៥ ធ្នូ ២០២១៖ ៧៦៥ លានដុល្លារអាម៉េរិក
-ក្រុមហ៊ុន៖ ២៣andMe ជាក្រុមហ៊ុនបច្ចេកវិទ្យាហ្សេន និងបច្ចេកវិទ្យាជីវសាស្ត្រលក្ខណៈបុគ្គល

៧-អាថូនី ហ្សេ (Anthony Hsieh)

-តំណែង៖ ស្ថាបនិក និង CEO របស់ LoanDepot
-សញ្ជាតិ៖ អាម៉េរិក
-ក្លាយជាមហាសេដ្ឋីក្នុងរយៈពេល៖ ជិត ៨ ខែ
-ទ្រព្យសម្បត្តិ គិតត្រឹមថ្ងៃទី ១៥ ធ្នូ ២០២១៖ ៦៤៩ លានដុល្លារអាម៉េរិក
-ក្រុមហ៊ុន៖ LoanDepot ផ្ដល់សេវាប្រាក់កម្ចីមិនមែនធនាគារ ធំលំដាប់ទី ២ នៅ សហរដ្ឋអាម៉េរិក។

៨- វីតនី វ៉ូល ហឺត (Whitney Wolfe Herd)

-តំណែង៖ សហស្ថាបនិក និង CEO របស់ Bumble
-សញ្ជាតិ៖ អាម៉េរិក
-ក្លាយជាមហាសេដ្ឋីក្នុងរយៈពេល៖ ជិត ១១ ខែ
-ទ្រព្យសម្បត្តិ គិតត្រឹមថ្ងៃទី ១៥ ធ្នូ ២០២១៖ ៩៧០ លានដុល្លារអាម៉េរិក
-ក្រុមហ៊ុន៖ Bumble គឺជាកម្មវិធី (App) សម្រាប់អ្នកដែលត្រូវការណាត់ជួបមិត្តស្រី/ប្រុសថ្មី។

February 5, 2022

ជម្រករបស់មេដឹកនាំ IS រំលំរលាយ បន្ទាប់ពីការវាយឆ្មក់របស់កម្លាំងពិសេសអាម៉េរិក

ជាន់ទី ៣ របស់អគារដែលជាទីលាក់ខ្លួនរបស់មេដឹកនាំអង្គការរដ្ឋអ៊ីស្លាម (IS) al-Quraishi នៅ ប្រទេសស៊ីរី ហាក់ដូចនៅសល់តែគំនរបាក់បែក ក្រោយពីមេភេរវករនេះបានបំផ្ទុះគ្រាប់បែកអត្តឃាត។

មេដឹកនាំអង្គការរដ្ឋអ៊ីស្លាម Abu Ibrahim al-Hashimi al-Quraishi កាលពីថ្ងៃទី ៣ កុម្ភៈ ត្រូវបានកម្ចាត់ចោលនៅកន្លែងលាក់ខ្លួនក្នុងទីរួមស្រុក Atmeh ភាគខាងជើងប្រទេសស៊ីរី ក្នុងបេសកកម្មវាយឆ្មក់របស់ អាម៉េរិក។

ក្នុងរូបថតខាងលើគឺជាស្ថានភាពបាក់បែកនៅជាន់ទី ៣ របស់អគារមួយដែល al-Quraishi លាក់ខ្លួន។ Muhammad Sheikh ដែលជាម្ចាស់ផ្ទះ និយាយថា អ្នកបើកបររថយន្តជនជាតិស៊ីរីម្នាក់ បានជួលផ្ទះនេះតាំងពី ១១ ខែមុនក្នុងតម្លៃ ១៣០ ដុល្លារ/ខែ។

អ្នកបើកបរនេះត្រូវបានគេស៊ើបដឹងថាជាថ្នាក់ក្រោមរបស់ al-Quraishi ដែលធ្វើកិច្ចការជាអ្នកបញ្ជូនសារ។

នៅពេលត្រូវបានឡោមព័ទ្ធដោយកងកម្លាំងពិសេសអាម៉េរិក al-Quraishi បានបំផ្ទុះគ្រាប់បែកអត្តឃាត ធ្វើឱ្យជាន់ទី ៣ របស់អគារត្រូវខ្ទេចខ្ទី ហើយសមាជិកទាំងអស់របស់គ្រួសារជននេះក៏បានស្លាប់ ក្នុងនោះមានស្ត្រី និងកុមារផងដែរ។

ក្នុងការរៀបផែនការ ក្រុមមន្ត្រីស៊ើបការណ៍អាម៉េរិក បានធ្វើការវិភាគព័ត៌មានផ្សេងៗជាច្រើនដើម្បីកំណត់ទីតាំងរបស់ al-Quraishi និងស្វែងយល់អំពីសកម្មភាពរបស់ជននេះ។ ពួកគេបានដឹងថា al-Quraishi កម្រចេញពីជម្រកនៅជាន់ទី ៣ លើកលែងតែពេលងូតទឹក ឬបួងសួងនៅលើដំបូលផ្ទះ។

ដោយយល់ថា al-Quraishi ប្រាកដជាអាចបំផ្ទុះគ្រាប់បែកអត្តឃាត បើសិនកម្លាំងអាម៉េរិក សម្រុកចូលមកក្បែរជញ្ជាំងអគារ ក្រុមមន្ត្រីអាម៉េរិក ក៏បានចេញបញ្ជាឱ្យស្រាវជ្រាវអំពីលក្ខណៈបច្ចេកទេសរបស់អគារដែលមាន ៣ ជាន់នេះ ដើម្បីឱ្យដឹងថា វាអាចបាក់ស្រុតរំលំ ឬទេ នៅក្នុងករណីនេះ។ ចុងក្រោយ ពួកគេកំណត់ច្បាស់ថា ផ្ទះនេះរឹងមាំគ្រប់គ្រាន់ អាចទប់ទល់បាន។

Al-Quraishi ដែលមានឈ្មោះពិតថា Amir Mohammed Said Abd al-Mawla បានឡើងកាន់តំណែងជាមេដឹកនាំតាំងពី ២ ឆ្នាំមុន បន្ទាប់ពី Abu Bakr al-Baghdadi ដែលជាអ្នកបង្កើតអង្គការរដ្ឋអ៊ីស្លាម បានបំផ្ទុះគ្រាប់បែកអត្តឃាតនៅក្នុងបេសកកម្មវាយឆ្មក់របស់កម្លាំងពិសេសអាម៉េរិក កាលពីខែតុលា ២០១៩។

បើទោះជាមិនមានភាពលេចធ្លោដូចទៅនឹងមេដឹកនាំមុនរបស់ខ្លួន ប៉ុន្តែ al-Quraishi ត្រូវបានគេស្គាល់ថាជាមនុស្សឆ្លាតវៃ អាចបង្កើតយុទ្ធសាស្ត្រប្រយុទ្ធ នេះបើតាម Colin P. Clarke អ្នកវិភាគផ្នែកភេរវកម្មរបស់ Soufan Group ដែលជាក្រុមហ៊ុនប្រឹក្សាយោបល់ផ្នែកសន្តិសុខនៅ នីវយ៉ក សហរដ្ឋអាម៉េរិក។

មន្ត្រីអាម៉េរិក បង្ហើបឱ្យដឹងថា កងកម្លាំងពិសេសអាម៉េរិក បានហាត់សមវាយឆ្មក់រាប់សិបដង មុននឹងចាប់ផ្ដើមបេសកកម្មផ្លូវការ។ ការហោះហើរពីមូលដ្ឋានទ័ពទៅកាន់គោលដៅ ត្រូវចំណាយពេលប្រហែល ២ ម៉ោង។ នៅពេលទៅដល់គោលដៅ កងកម្លាំងពិសេសអាម៉េរិក បានស្រែកតាមឧបករណ៍បំពងសំឡេង ស្នើឱ្យពលរដ្ឋស៊ីវិល ចាកចេញពីគោលដៅ។

ជាន់ទី ២ គឺជាកន្លែងស្នាក់នៅរបស់អ្នកបើកបររថយន្តដែលជាថ្នាក់ក្រោមរបស់ al-Quraishi និងគ្រួសាររបស់គេ។ ក្រុមរបស់ជននេះបានប្រយុទ្ធជាមួយកងកម្លាំងពិសេសអាម៉េរិក ប៉ុន្តែ ត្រូវបានសម្លាប់។

ជាន់ទី ១ គឺជាកន្លែងរស់នៅរបស់គ្រួសារមួយដែលមិនជាប់ទាក់ទងនឹង IS និងមិនបានដឹងអ្វីអំពី al-Quraishi។

Al-Quraishi មានឈ្មោះពិតថា Amir Mohammed Said Abd al-Mawla

ក្រុមអ្នកជំនាញបានហៅការស្លាប់របស់ al-Quraishi ថាជា «ជំហានថយក្រោយដ៏ធំសម្រាប់ IS» នៅពេលបានបាត់បង់មេដឹកនាំទី ។ ប៉ុន្តែ IS ត្រូវបានគេយល់ថា បានរៀបចំរួចហើយសម្រាប់សេណារីយ៉ោស្ដីពីមេដឹកនាំត្រូវគេកម្ចាត់ ដោយបានត្រៀមអ្នកស្នងតំណែងថ្មី។

«បេសកកម្មនេះ ជាសារដ៏ខ្លាំងក្លា ផ្ញើទៅកាន់ក្រុមភេរវករនៅទូទាំងពិភពលោក៖ យើងនឹងតាមរក ហើយក្របួចកក្រុមអ្នកឯង» លោក បៃដិន បានថ្លែងដូច្នេះនៅពេលប្រកាសលទ្ធផលនៃការវាយឆ្មក់របស់កងកម្លាំងពិសេសអាម៉េរិក៕

February 5, 2022

ទ្វីបអាស៊ី មានកំពូលអ្នកមានថ្មី ចូលមកជំនួសមហាសេដ្ឋីឥណ្ឌា Mukesh Ambani

យោងតាមបញ្ជីចំណាក់ថ្នាក់របស់ Forbes Real Time Billionaire កាលពីថ្ងៃទី ៣ កុម្ភៈ ២០២២ អ្នកជំនួញឥណ្ឌា លោក Gautam Adani បានក្លាយជាអ្នកមានជាងគេនៅ ទ្វីបអាស៊ី ដោយមានទ្រព្យ ៩០.១ ពាន់លានដុល្លារអាម៉េរិក និងជាអ្នកមានជាងគេលំដាប់ទី ១០ ក្នុងពិភពលោក។

Forbes បានឱ្យដឹងថា មហាសេដ្ឋី Gautam Adani បានយកឈ្នះលើមហាសេដ្ឋីឥណ្ឌា Mukesh Ambani ក្លាយជាអ្នកមានជាងគេនៅតំបន់អាស៊ី ដោយមានទ្រព្យច្រើនជាង ១០០ លានដុល្លារ។ មុននោះ មហាសេដ្ឋ Ambani គឺជាអ្នកមានជាងគេប្រចាំ ទ្វីបអាស៊ី។

នេះគឺជាជោគជ័យមួយទៀតរបស់អ្នកជំនួញ Adani វ័យ ៥៩ ឆ្នាំ ដែលបានបង្កើតក្រុមហ៊ុននាំចេញផលិតផលកាលពីឆ្នាំ ១៩៨។ ឆ្នាំ ២០០៨ លោកមានវត្តមាននៅក្នុងបញ្ជីចំណាត់ថ្នាក់មហាសេដ្ឋីពិភពលោករបស់ Forbes ដោយមានទ្រព្យ ៩.៣ ពាន់លានដុល្លារ។

ក្រុមហ៊ុន Adani Group របស់លោក Adani រកស៊ីក្នុងវិស័យជាច្រើន ចាប់ពីការផលិត និងផ្គត់ផ្គង់អគ្គិសនី អណ្ដូងប្រេង អចលនទ្រព្យ និងរ៉ែធ្យូងថ្ម។ ក្រុមហ៊ុននេះ មានក្រុមហ៊ុនបុត្រសម្ព័ន្ធចំនួន ៦ ដែលមានឈ្មោះនៅក្នុងផ្សារមូលបត្រ នៅ ឥណ្ឌា។ ភាគហ៊ុនរបស់ក្រុមហ៊ុននេះ បានកើនឡើង ៧៧% ក្នុងឆ្នាំ ២០២។

ទ្រព្យសុទ្ធរបស់លោក Adani បានកើនឡើងជិតទ្វេដង ធៀបនឹង ៥០.៥ ពាន់លានដុល្លារ កាលពីខែមេសា ២០២។

មហាសេដ្ឋី Adani កើតនៅក្នុងរដ្ឋ Gufarat ភាគខាងលិចនៃ ប្រទេសឥណ្ឌា។ លោកបានបោះបង់ការសិក្សា និងបង្កើតក្រុមហ៊ុន Adani Enterprises ដែលចាប់ផ្ដើមធ្វើជំនួញកាលពីឆ្នាំ ១៩៨៨ ដោយការនាំចេញផលិតផលទៅបរទេស៕

February 4, 2022

ការរកប្រាក់មិនមែនជារឿងលំបាក៖ គ្រាន់តែការងារបន្ទាប់បន្សំសោះ នារីវ័យ ២៨ ឆ្នាំ រកបាន ១០០,០០០ ដុល្លារ/ថ្ងៃ និងបង្កើតបានក្រុមហ៊ុនមួយតម្លៃរាប់លានដុល្លារ នៅក្នុងយុគសម័យកូវីដ

Kat Norton បង្រៀន Excel ដល់បុគ្គល ក្រុមហ៊ុន និងស្ថាប័នអប់រំនានា។ ចាប់តាំងពីបានបញ្ចេញ Miss Excel កាលពីឆ្នាំ ២០២០ Kat រកបានអ្នកតាមដានគណនី TikTok និង Instagram របស់ខ្លួន ឡើងដល់ជាង ១ លាននាក់។

ដូចទៅនឹងអ្នកដទៃ ដំណាក់កាលដំបូងៗនៃសម័យកូវីដ Kat នៅតែផ្ទះ។ ប៉ុន្តែ ក្រោយរយៈពេលធ្វើការពីផ្ទះបានប៉ុន្មានខែ នាងក៏ចាប់ផ្ដើមធុញ។ ថ្ងៃមួយ បន្ទាប់ពីបាននិយាយគ្នាជាមួយមិត្តភក្ដិ Kat បានគិតដល់ការចេញរកស៊ី ដោយពឹងលើបទពិសោធន៍ ៤ ឆ្នាំ ដែលបានធ្វើការឱ្យក្រុមហ៊ុនប្រឹក្សាយោបល់។ Kat ក៏ចាប់ផ្ដើមបង្រៀន Excel និងបង្ហោះវានៅលើ TikTok។

ចុងក្រោយ គំនិតរបស់នាងបានប្រែក្លាយទៅជា Miss Excel ហើយការងារនេះក៏បានក្លាយជាមុខរបរចម្បងរបស់នាង។ Kat បង្កើតបានក្រុមហ៊ុនមួយដែលរកចំណូលបាន ១ លានដុល្លារ ដោយមានអ្នកតាមដានជាង ១ លាននាក់ នៅលើ TikTok និង Instagram។

ដំណើរដើមទងនៃការប្រែក្លាយការងារបន្ទាប់បន្សំ ឱ្យទៅជាក្រុមហ៊ុនរកចំណូលបានខ្ទង់លានដុល្លារ

Kat បង្ហោះវីដេអូដំបូងរបស់ខ្លួនលើ TikTok កាលពីខែមិថុនា ២០២០ ក្រោយមក នាងចាប់ផ្ដើមបង្ហោះ ១ វីដេអូ/ថ្ងៃ។ ជោគជ័យក៏បានមកដល់ បន្ទាប់ពីបង្ហោះវីដេអូទី ៤ ដែលនិយាយអំពីមុខងារ XLOOKUP របស់ Excel។ វីដេអូនេះ មានអ្នកចូលមើលជាង ១០០,០០០ នាក់ ក្នុងរយៈពេលតែប៉ុន្មានថ្ងៃប៉ុណ្ណោះ។

វីដេអូទី ៦ របស់ Kat បានធ្វើឱ្យនាយកប្រតិបត្តិរបស់ក្រុមហ៊ុន CNTT ចាប់អារម្មណ៍ និងផ្ញើសារមកប្រាប់ថា ចង់ជួល Kat បង្កើតវីដេអូបណ្ដុះបណ្ដាលអំពី Excel ដល់អតិថិជនរបស់គាត់។ Kat បានយល់ព្រម និងចាប់ផ្ដើមបំពាក់ឧបករណ៍បន្ថែមដើម្បីជួយដល់ការបង្រៀន។

មិនយូរប៉ុន្មាន Kat បានបង្កើតក្រុមហ៊ុនផ្ទាល់ខ្លួន និងបង្កើតវីដេអូបានជាច្រើនឈុត។ ដល់ខែតុលា ២០២០ ចំនួនអ្នកតាមដានលើ TikTok និង Instagram របស់នាង បានឡើងដល់ ៣០០,០០០ នាក់។ នាងក៏ក្លាយជាអ្នកពិពន្ធខ្លឹមសារវីដេអូ «ពេញម៉ោង»។ ក្រោយមក Kat ក៏បានគិតដល់ការបង្កើតវគ្គសិក្សាអនឡាញ និងលក់ឱ្យអ្នកប្រើប្រាស់តាមរយៈបណ្ដាញសង្គម។

Kat បានឈប់ធ្វើការជាអ្នកប្រឹក្សាយោបល់ និងថតវីដេអូបានជាង ១០០ ឈុត រួចក៏ច្របាច់វាបញ្ចូលគ្នាទៅជាកញ្ចប់សិក្សាដែលមានឈ្មោះថា The Excelerator Course។ វគ្គសិក្សានេះមានតម្លៃ ២៩៧ ដុល្លារ/វគ្គ។ ខែវិច្ឆិកា ២០២០ Kat បានលក់វគ្គសិក្សាដំបូងរបស់ខ្លួន។ ដល់ខែមករា ២០២១ នាងរកបានប្រាក់អកម្ម ១៥,០០០ ដុល្លារ/ខែ ពីវគ្គសិក្សានេះ។ Kat បានឈប់ធ្វើការផ្សេង ហើយងាកមកធ្វើជាម្ចាស់ក្រុមហ៊ុន។

អភិវឌ្ឍ Miss Excel

ក្រោយពីចំណាយពេលទាំងស្រុងលើការងារបង្រៀន Excel កញ្ញា Kat ក៏រកបាន ១ លានដុល្លារ ពី Miss Excel។ ខែតុលា ២០២១ នាងរកបានជាង ១០០,០០០ ដុល្លារក្នុងរយៈពេលតែ ១ ថ្ងៃ។

ទន្ទឹមនឹងវគ្គ Excelerator កញ្ញា Kat ក៏មាន ២ វគ្គទៀត ទាក់ទងនឹង Excel រួមនឹងវគ្គសម្រាប់ PowerPoint, Word, Teams, Outlook, OneNote និង Google Sheets។

វគ្គសិក្សាលក់រាយ មានតម្លៃពី ៤៤ ដុល្លារ ដល់ ៣៩៧ ដុល្លារ/វគ្គ។ នាងក៏មានវគ្គដែលមានតម្លៃចាប់ពី ៣៩៧ ដុល្លារ ដល់ ៩៩៧ ដុល្លារផងដែរ។

គម្រោងថ្មីបំផុតរបស់នារីវ័យ ២៨ ឆ្នាំរូបនេះ មានឈ្មោះថា Workplace FUNdamentals Course ដែលបង្រៀនអំពីជំនាញសំខាន់ៗនៅត្រូវការចាំបាច់នៅក្នុងកន្លែងធ្វើការ ដូចជា Microsoft Office។ល។ ក្រៅពីវគ្គសិក្សាដែលលក់ជាកញ្ចប់ Kat ក៏មានវគ្គបណ្ដុះបណ្ដាលផ្នែក Excel សម្រាប់ក្រុមហ៊ុន និងធ្វើជាវាគ្មិនក្នុងកម្មវិធីលើកទឹកចិត្តផ្សេងៗផងដែរ។

Kat ក៏បានលើកឡើងនូវអនុសាសន៍មួយចំនួនដើម្បីអាចកសាងក្រុមហ៊ុនមួយ ដែលឆ្ពោះទៅរកភាពជោគជ័យ៖

១-រកឱ្យឃើញនូវគោលដៅពិតប្រាកដរបស់ខ្លួន
២-ថែទាំសុខភាពរាងកាយ និងរូបសម្ផស្សរបស់ខ្លួន
៣-ត្រៀមខ្លួនឱ្យបានរួចរាល់ដើម្បីប្រឈម និងដោះស្រាយបញ្ហា

February 4, 2022

Author: សឿន សំណាង