ក្នុងអំឡុង ២៤ ម៉ោងនៃថ្ងៃទី ១៤ កុម្ភៈ កម្ពុជា បានរកឃើញអ្នកវិជ្ជមាននឹង កូវីដ-១៩ ចំនួន ១៨៤ នាក់ ក្នុងនោះមាន ករណីឆ្លងក្នុងសហគមន៍ ១៧៥ នាក់ និងអ្នកដំណើរពីបរទេស ៩ នាក់ ដែលទាំងអស់សុទ្ធតែជាករណី អូមីក្រុង។
Author: សឿន សំណាង
កូរ៉េខាងជើង សម្ដែងសិល្បៈហែលទឹកដ៏គួរឱ្យចាប់ចិត្ត ដើម្បីរំលឹកថ្ងៃខួបកំណើតរបស់អតីតមេដឹកនាំ
ប្រទេសកូរ៉េខាងជើង បានប្រារព្ធពិធីពិសេស ក្នុងនោះមានទាំងការសម្ដែងសិល្បៈហែលទឹកផងដែរ ដើម្បីរំលឹកថ្ងៃខួបកំណើតគម្រប់ ៨០ ឆ្នាំ របស់លោក គីម ជុងអ៊ីល (Kim Jong-il) ១៦ កុម្ភៈ។
សារព័ត៌មាន Daily Mail របស់ អង់គ្លេស បានឱ្យដឹងថា ទិវារំលឹកខួបកំណើតរបស់អតីតមេដឹកនាំកូរ៉េខាងជើង លោក គីម ជុងអ៊ីល គឺជាព្រឹត្តិការណ៍សំខាន់បំផុតមួយរបស់ កូរ៉េខាងជើង។
សម្រាប់ឆ្នាំ ២០២២ នេះ កូរ៉េខាងជើង មិនទាន់បង្ហើបឱ្យដឹងលម្អិតអំពីកម្មវិធីនានាដែលនឹងប្រារព្ធឡើងនៅទិវានេះនៅឡើយ។ ប៉ុន្តែ នៅក្នុងព្រឹត្តិការណ៍សំខាន់ៗផ្សេងទៀត កូរ៉េខាងជើង តែងតែធ្វើព្យុហយាត្រា នៅ រដ្ឋធានីព្យុងយ៉ាង។
នេះគឺជាវីដេអូ ដែលយកការណ៍ដោយទីភ្នាក់ងារសារព័ត៌មានបារាំង AFP ស្ដីពីកម្មវិធីសម្ដែងសិល្បៈហែលទឹក ក៏ដូចជាព្យុហយាត្រ អបអរខួប ៨០ ឆ្នាំ នៃថ្ងៃកំណើតរបស់អតីតមេដឹកនាំ គីម ជុងអ៊ីល នៅ កូរ៉េខាងជើង។
លោក គីម ជុងអ៊ីល លោក គីម ជុងអ៊ីល បានដឹកនាំ កូរ៉េខាងជើង ក្នុងអំឡុងពីឆ្នាំ ១៩៩៤ រហូតដល់លោកបានទទួលមរណភាពកាលពីឆ្នាំ ២០១១ នៅថ្ងៃទី ១៧ ធ្នូ ក្នុងជន្មាយុ ៦៩ ឆ្នាំ។ ថ្ងៃទី ១៩ ធ្នូ ២០១១ ទូរទស្សន៍ជាតិកូរ៉េខាងជើង បានផ្សាយដំណឹងមរណភាពនេះ។ ក្រោយមក លោក គីម ជុងអ៊ុន ដែលជាកូនទី ៣ របស់លោក គីម ជុងអ៊ីល ក៏បានឡើងកាន់អំណាចជំនួសបិតារបស់លោក៕
សហរដ្ឋអាម៉េរិក ដាស់តឿនពលរដ្ឋរបស់ខ្លួន ឱ្យចាកចេញពី បេឡារូស ជាបន្ទាន់
កាលពីថ្ងៃទី ១៤ កុម្ភៈ សារព័ត៌មានអាម៉េរិក ដកស្រង់សម្ដីរបស់ក្រុមមន្ត្រីប្រទេសនេះ ឱ្យដឹងថា ក្រសួងការបរទេសអាម៉េរិក ប្រចាំរដ្ឋធានីមីនស្កិ៍ (Minsk) បានប្រកាសតឿនពលរដ្ឋអាម៉េរិក ឱ្យចាកចេញពី ប្រទេសបេឡារូស ជាបន្ទាន់។
យោងតាម NBC News ប្រកាសដែលបានចុះផ្សាយលើទំព័ររបស់ស្ថានទូតអាម៉េរិក នៅ ទីក្រុងមីនស្កិ៍ លើកឡើងថា៖ «ពលរដ្ឋអាម៉េរិក មិនត្រូវទៅកាន់ បេឡារូស ព្រោះថា មានការអនុវត្តច្បាប់យ៉ាងអនាធិបតេយ្យ ហានិភ័យត្រូវចាប់ខ្លួន និងការបង្កើនចំនួនទាហានខុសពីធម្មតា គួរឱ្យព្រួយបារម្ភ របស់ ប្រទេសរុស្ស៊ី នៅតាមបណ្ដោយព្រំដែនរបស់ បេឡារូស ដែលជាប់នឹង ប្រទេសអ៊ុយក្រែន។ល។ ពលរដ្ឋអាម៉េរិក ដែលកំពុងស្ថិតនៅក្នុង ប្រទេសបេឡារូស គួរចាកចេញជាបន្ទាន់ ដោយប្រើប្រាស់មធ្យោបាយពាណិជ្ជកម្ម ឬឯកជន»។
សារព័ត៌មាន Wall Street Journal ដកស្រង់សម្ដីរបស់ក្រុមមន្ត្រីជំនាញអាម៉េរិក សុំមិនបញ្ចេញឈ្មោះ ឱ្យដឹងថា ក្រសួងការបរទេសអាម៉េរិក បានបញ្ជាឱ្យបំផ្លាញឧបករណ៍អ៊ីនធើណិត និងកុំព្យូទ័រ ទន្ទឹមនឹងការផ្ដាច់ប្រព័ន្ធទូរស័ព្ទនៅក្នុងស្ថានទូតនៅ ទីក្រុងកៀវ ប្រទេសអ៊ុយក្រែន។
ចំណែកអ្នកនាំពាក្យក្រសួងការបរទេសអាម៉េរិក Ned Price ថ្លែងថា សួនរបស់ស្ថានទូតអាម៉េរិក នៅ ទីក្រុងកៀវ កំពុងត្រូវបានការពារដោយកងកម្លាំងការពារជាតិអ៊ុយក្រែន ចំណែក សហរដ្ឋអាម៉េរិក មានបំណងត្រលប់មកកាន់ស្ថានទូតវិញ «នៅពេលយល់ថា មានសុវត្ថិភាព»។
ការសម្រេចនានាខាងលើរបស់ សហរដ្ឋអាម៉េរិក ត្រូវបានធ្វើឡើងនៅពេលស្ថានការណ៍តានតឹងកំពុងកើនឡើងនៅក្នុងតំបន់។ កាលពីថ្ងៃទី ១០ កុម្ភៈ រុស្ស៊ី និង បេឡារូស បានធ្វើសមយុទ្ធយោធារួមគ្នាមួយដែលមានឈ្មោះថា «Allied Resolve-២០២២» នៅ បេឡារូស។
សមយុទ្ធរបស់ រុស្ស៊ី និង បេឡារូស នេះ បានធ្វើឱ្យបណ្ដាប្រទេសលោកខាងលិច មានការព្រួយបារម្ភថា ទីក្រុងមូស្គូ កំពុងមានផែនការបង្កើនភាពតានតឹងនៅក្នុងជម្លោះប្រដាប់អាវុធនៅ អ៊ុយក្រែន។ សមយុទ្ធនេះត្រូវបានធ្វើឡើងក្នុងគ្រាភាពតានតឹងរវាងលោកខាងលិច និង រុស្ស៊ី កើតមានឡើងនៅក្នុងប៉ុន្មានខែមកនេះ ទាក់ទិននឹងបញ្ហាសន្តិសុខនៅ អ៊ុយក្រែន ដែលជាប្រទេសជិតខាងរបស់ បេឡារូស និង រុស្ស៊ី៕
បេក្ខភាពប្រធានាធិបតីនិម្មិតដំបូងគេក្នុងពិភពលោក កំពុងបង្កការចាប់អារម្មណ៍ខ្លាំងនៅ កូរ៉េខាងត្បូង
នៅក្នុងការិយាល័យឃោសនារកសំឡេងឆ្នោតនៅ ទីក្រុងសេអ៊ូល ក្រុមបុគ្គលិកវ័យក្មេង ប្រើប្រាស់បច្ចេកវិទ្យា deepfake ដើម្បីបង្កើតបេក្ខភាពប្រធានាធិបតីនិម្មិត។
ក្រុមបច្ចេកទេស បង្កើតរូបភាពឌីជីថលមួយ និងដាក់ឈ្មោះឱ្យថា AI Yoon តំណាងឱ្យលោក Yoon Suk-yeol ដែលជាបេក្ខភាពប្រធានាធិបតីរបស់បក្សប្រឆាំង (បក្សកម្លាំងប្រជាជន)។ AI Yoon ត្រូវបានបង្កើតឡើង មួយផ្នែកដោយការប្រើប្រាស់វីដេអូរាប់សិបម៉ោង ដែលថតសកម្មភាពរបស់លោក Yoon Suk-yeol និងដើម្បីជួយឃោសនារកសំឡេងឆ្នោតនៅមុនការបោះឆ្នោតថ្ងៃទី ៩ មីនា។
បញ្ញាសិប្បនិម្មិត (AI) ធ្លាប់បានបង្ហាញខ្លួនក្នុងការបោះឆ្នោតមួយចំនួនរួចមកហើយ។ នៅលើអ៊ីនធើណិត ធ្លាប់មានវីដេអូ deepfake ខ្លះ បង្ហាញថា Barack Obama រិះគន់លោក Donald Trump ឬបេក្ខភាពអភិបាលក្រុង New York លោក Andrew Yang កំពុងឃោសនារកសំឡេងឆ្នោត នៅក្នុងពិភពនិម្មិត។ ក៏ប៉ុន្តែ ក្រុមអ្នកអភិវឌ្ឍយល់ថា AI Yoon គឺជាបេក្ខភាពដែលឃោសនារកសំឡេងឆ្នោតផ្លូវការដំបូងគេបង្អស់ក្នុងពិភពលោក ដែលប្រើប្រាស់បច្ចេកវិទ្យា deepfake ជារូបភាពបង្កើតឡើងដោយ AI និងកំពុងត្រូវបានចាប់អារម្មណ៍ខ្លាំងនៅ កូរ៉េខាងត្បូង។
ដោយមានសក់ពណ៌ខ្មៅរលើប និងស្លៀកពាក់ឈុត vest ដ៏សង្ហា AI Yoon ដូចទៅនឹងមនុស្សពិតខ្លាំងណាស់ ប៉ុន្តែបែរជាប្រើប្រាស់ពាក្យពេចន៍កំប្លុកកំប្លែង និងរិះគន់ ដើម្បីទាក់ទាញម្ចាស់ឆ្នោតវ័យក្មេងដែលតែងតែតាមដានព័ត៌មាននៅលើអ៊ីនធើណិត។
ចាប់តាំងពីបានបង្ហាញខ្លួនកាលពីថ្ងៃទី ១ មករា AI Yoon បានទាក់ទាញអ្នកចូលមើលរាប់លានលើក។ មនុស្សរាប់ម៉ឺននាក់ បានដាក់ជាសំណួរឱ្យ AI Yoon ឆ្លើយ ប៉ុន្តែ ភាគច្រើនគឺជាសំណួរដែលមិនទាក់ទងនឹងគោលនយោបាយ។
«ប្រធានាធិបតី Moon Jae-in និងបេក្ខភាពរបស់គូប្រឆាំង Lee Jae-myung ជិតលង់ទឹកស្លាប់។ លោកជ្រើសរើសអ្នកណា? អ្នកលេងអ៊ីនធើណិតម្នាក់ សួរដូច្នេះ។
AI Yoon តំណាងឱ្យលោក Yoon Suk-yeol បេក្ខភាពប្រធានាធិបតី AI Yoon ឆ្លើយថា៖ «ខ្ញុំជូនពរឱ្យអ្នកទាំងពីរជួបតែសំណាងល្អ»។
បេក្ខភាព AI Yoon បានថតសំឡេងជាឃ្លានិយាយជាង ៣,០០០ ឃ្លា ដើម្បីធ្វើជាមូលដ្ឋានទិន្នន័យសម្រាប់ AI។ នេះបើតាម Baik Kyeong-hoon ប្រធានក្រុមការងារច្នៃប្រឌិត។ ប៉ុន្តែ តាមពិត ខ្លឹមសារដែល AI Yoon និយាយគឺសុទ្ធតែត្រូវបានសរសេរដោយក្រុមគ្រប់គ្រងយុទ្ធនាការឃោសនា។
វិធីច្នៃប្រឌិតនេះ ទទួលបានជោគជ័យ។ ការថ្លែងរបស់ បេក្ខភាព AI Yoon បានក្លាយជាប្រធានបទនៃការជជែកនានានៅលើសារព័ត៌មានកូរ៉េខាងត្បូង។ មនុស្ស ៧ លាននាក់បានចូលទៅគេហទំព័រ Wiki Yoon ដើម្បីដាក់ជាសំណួរដល់បេក្ខភាពប្រធានាធិបតិនិម្មិតនេះ។
Ko Sam-seog ជាអ្នកធ្វើការឱ្យ Lee Jae-myung ដែលជាគូប្រជែងសំខាន់របស់លោក Yoon Suk-yeol បានចោទបេក្ខភាពនិម្មិតនេះថា ប្រើប្រាស់ពាក្យពេចន៍មិនសមស្របជាមួយនឹងស្ដង់ដានយោបាយ។
ទោះជាយ៉ាងណាក៏ដោយ បេក្ខភាព AI Yoon កំពុងបង្ហាញប្រសិទ្ធភាពខ្ពស់ នៅពេលបានជួយឱ្យលោក Yoon Suk-yeol នាំមុខគេនៅក្នុងការស្ទង់មតិលើក្រុមយុវវ័យដែលមានអាយុខ្ទង់ ២០ ឆ្នាំ។
គណៈកម្មការរៀបចំការបោះឆ្នោតរបស់ កូរ៉េខាងត្បូង បានអនុញ្ញាតឱ្យបេក្ខភាពទាំងឡាយ ប្រើប្រាស់ AI នៅក្នុងយុទ្ធនាការរកសំឡេងឆ្នោត ជាមួយនឹងលក្ខខណ្ឌ «ត្រូវនិយាយឱ្យបានច្បាស់ថា ជាបច្ចេកវិទ្យា deepfake និងមិនត្រូវលើកឡើងអំពីព័ត៌មានមិនពិត»៕
ពាក្យជូនពរក្នុងទិវានៃក្ដីស្រលាញ់ (Valentine’s Day) ដែលគួរឱ្យចាប់អារម្មណ៍សម្រាប់ឆ្នាំនេះ
ទន្ទឹមនឹងអំណោយ កាដូ ជូនដល់មនុស្សជាទីស្រលាញ់ ពាក្យជូនពរប្រកបដោយភាពផ្អែមល្ហែម និងកក់ក្ដៅ ក៏ត្រូវបានគេចាត់ទុកថា សំខាន់ នៅក្នុងទិវានៃក្ដីស្រលាញ់នេះផងដែរ។
ខាងក្រោមនេះគឺជាឃ្លាជូនពរមួយចំនួនដែលគួរឱ្យចាប់អារម្មណ៍ សម្រាប់យកទៅប្រើប្រាប់ក្នុងថ្ងៃនៃក្ដីស្រលាញ់៖
សម្រាប់គូស្នេហ៍ដែលនៅឆ្ងាយពីគ្នា
១-បងគ្រាន់តែប្រាថ្នាមានអូននៅក្បែរនៅក្នុងពេលវេលានេះ ពេលនោះ បងនឹងឱបអូនឱ្យណែន និងឱ្យអូនដឹងថា អារម្មណ៍នៃក្ដីនឹករលឹករបស់បង វាជ្រៅដល់កម្រិតណា។ ជូនពរអូន ថ្ងៃ Valentine រីករាយ។ ចូរអូនបិទភ្នែក ហើយស្រមៃដល់បងណា៎សម្លាញ់ចិត្ត ព្រោះថា បងក៏កំពុងស្រមៃដល់អូន។
២-បងសម្លាញ់ បើទោះជានៅទីណា យើងនៅតែស្រលាញ់គ្នា និងមានសុភមង្គលជាមួយគ្នា ព្រោះថា យើងតែងតែគិតដល់គ្នា មែនទេបង? ជូនពរបងថ្ងៃនៃក្ដីស្រលាញ់រីករាយ!
៣-ជូនពរអូនសុខភាពល្អ និងរីករាយក្នុងទិវានៃក្ដីស្រលាញ់ឆ្នាំនេះ! បងកំពុងនឹកអូនខ្លាំងណាស់ មិនដឹងថា ពេលនេះអូននឹកបងដែរ ឬអត់? គ្រាន់តែស្រមៃដល់ស្នាមញញឹមរបស់អូន បងក៏មានអារម្មណ៍ថា កក់ក្ដៅណាស់ទៅហើយ បើបាននៅក្បែរអូនទៀត មិនដឹងកក់ក្ដៅយ៉ាងណា? សង្ឃឹមថានឹងបានជួបគ្នាឆាប់ៗនេះ!
សម្រាប់ជូនពរគូស្វាមី ឬភរិយា និងមិត្តប្រុស មិត្តស្រី
១-អរគុណអូនសម្លាញ់ដែលបានចូលមកក្នុងជីវិតបង។ សូមឱ្យស្នេហាយើងមានភាពផ្អែមល្ហែម និងសុភមង្គលជានិច្ច។ ជូនពរថ្ងៃនៃក្ដីស្រលាញ់!
២-អូនសម្លាញ់ បងសន្យាថា នឹងកាន់ដៃអូនយ៉ាងជាប់ យើងរួមដំណើរជាមួយគ្នារហូតដល់អវសាននៃជីវិត។ ជូនពរថ្ងៃ Valentine រីករាយ។ យើងនៅតែជាគូនឹងគ្នាជារៀងរហូតណា៎ អូនណា៎!
៣-ពីក្នុងក្រឳបេះដូង បងចង់និយាយប្រាប់អូនថា អូននៅតែជានារីដែលបងស្រលាញ់បំផុត និងជារៀងរហូត។ ខ្វះអូន ជីវិតរបស់បងពិតជាគ្មានន័យ។ ជូនពរថ្ងៃនៃក្ដីស្រលាញ់ អូនសម្លាញ់ចិត្តបង!
៤-អូនចង់ប្រាប់បងថា បងជាជីវិតរបស់អូន។ អូនស្រលាញ់បងពេញបេះដូង អូនមិនអាចខ្វះបងបានឡើយ។ ដូច្នេះ សូមកាន់ដៃអូនពេញមួយជីវិតណា៎បង់! ជូនពរបងរីករាយក្នុងថ្ងៃតំណាងនៃស្នេហារបស់យើង។
៥-បងអរគុណអូនខ្លាំងណាស់ដែលកន្លងមកមិនបានប្រកាន់ទោសរបស់បង និងបានជួយឱ្យបងក្លាយជាបុរសរឹងមាំ មានការទទួលខុសត្រូវជាងមុន។ បងដឹងច្បាស់ថា ជីវិតនេះបើសិនជាអូនមិនមែនជាភរិយារបស់បង នោះប្រាកដជាមិនមាននារីណាម្នាក់នឹងក្លាយជាប្រពន្ធរបស់បងឡើយ។
៦-បងសម្លាញ់ អូនស្រលាញ់បង មិនមែនដោយសារតែបងសង្ហា ហើយក៏មិនមែនព្រោះតែបងមានប្រាក់ច្រើននោះដែរ ប៉ុន្តែ គឺដោយសារតែអូនស្រលាញ់បង។ អូនសង្ឃឹមថា យើងនឹងមានថ្ងៃនៃក្ដីស្រលាញ់ដូច្នេះគ្រប់ពេល!
៧-សុភមង្គលរបស់អូន គឺការដែលបាននៅក្បែរបង។ Valentine នេះ អូនត្រូវការតែបងនៅក្បែរអូនប៉ុណ្ណោះ។
៨-បើបងសួរថា អូនត្រូវការកាដូអ្វី ក្នុងថ្ងៃនៃក្ដីស្រលាញ់នេះ។ អូននឹងប្រាប់បងថា អូនមិនត្រូវការអ្វីទាំងអស់ ព្រោះថា បងគឺជាអំណោយដ៏មានតម្លៃសម្រាប់អូនទៅហើយ។ គ្រាន់តែបងសប្បាយចិត្ត អូនក៏រីករាយ។ ជូនពរស្នេហាយើង កាន់តែមានសុភមង្គលក្នុងថ្ងៃពិសេសនេះ។
៩-ប្ដីសម្លាញ់ អូនចង់ប្រាប់បងថា ប្រពន្ធម្នាក់នេះស្រលាញ់ប្ដីខ្លាំងណាស់។ ជូនពរបងមានសេចក្ដីសុខ ពេលនៅក្បែរអូនក្នុងយប់នេះ។
ទិវានៃក្ដីស្រលាញ់ (Valentine’s Day) ឆ្នាំ ២០២២៖ ៧៦% នៃអ្នកដែលមានគម្រោងធ្វើខួបអនុស្សាវរីយ៍ យល់ថា ជារឿងសំខាន់ដែលត្រូវធ្វើខួប នៅក្នុងកាលៈទេសៈនេះ
(សហរដ្ឋអាម៉េរិក)-យោងតាមការស្ទង់មតិប្រចាំឆ្នាំដែលត្រូវបានប្រកាសនាថ្ងៃនេះដោយសម្ព័ន្ធជាតិលក់រាយ និង Prosper Insights & Analytics ជាមធ្យម មនុស្សម្នាក់គ្រោងនឹងចំណាយ ១៧៥.៤១ ដុល្លារអាម៉េរិក សម្រាប់អំណោយនៅក្នុងទិវានៃក្ដីស្រលាញ់។
ការស្រាវជ្រាវរបស់សម្ព័ន្ធជាតិលក់រាយ និង Prosper Insights & Analytics បានឱ្យដឹងថា ការចំណាយសម្រាប់ទិវានៃក្ដីស្រលាញ់ នឹងឡើងដល់ ២៣.៩ ពាន់លានដុល្លារក្នុងឆ្នាំ ២០២២ ខណៈឆ្នាំ ២០២១ តួលេខនេះត្រឹមតែ ២១.៨ ពាន់លានដុល្លារ។
«ទិវានៃក្ដីស្រលាញ់ គឺជាឱកាសពិសេសសម្រាប់ពលរដ្ឋអាម៉េរិកភាគច្រើន។ ជាងនេះទៀត នៅពេលយើងបានចាកផុតពីវិបត្តិកូវីដ-១៩ ក្រុមលក់រាយបានត្រៀមរួចរាល់ដើម្បីជួយពួកគេឱ្យទទួលបានបទពិសោធន៍មិនអាចបំភ្លេចបាន និងមានន័យជ្រៅ នៅក្នុងទិវានេះ» លោក Matthew Shay ដែលជាប្រធាន និងជានាយកប្រតិបត្តិរបស់ NRF (National Research Foundation) បានថ្លែងដូច្នេះ។
ពលរដ្ឋអាម៉េរិក នឹងចំណាយប្រាក់ ២៣.៩ ពាន់លានដុល្លារក្នុងទិវានៃក្ដីស្រលាញ់ ឆ្នាំ ២០២២ ជាក់ស្ដែង ជាងពាក់កណ្ដាល (៥៣%) នៃអ្នកប្រើប្រាស់នៅ សហរដ្ឋអាម៉េរិក មានគម្រោងប្រារព្ធពិធីអនុស្សាវរីយ៍នៅឆ្នាំ ២០២២ ដែលតួលេខនេះខ្ពស់ជាងបន្តិច ធៀបនឹង ៥២% ក្នុងឆ្នាំ ២០២១។ ទន្ទឹមនឹងនេះ ប្រហែល ៧៦% ក្នុងចំណោមអ្នកដែលមានគម្រោងប្រារព្ធខួបអនុស្សាវរីយ៍ យល់ថា នេះគឺជារឿងសំខាន់ដែលត្រូវធ្វើ ពិសេសគឺនៅក្នុងស្ថានការណ៍នៃជំងឺរាតត្បាតនេះ។
យោងតាមការស្ទង់មតិ មនុស្សម្នាក់មានគម្រោងចំណាយជាមធ្យម ១៧៥.៤១ ដុល្លារអាម៉េរិក សម្រាប់កាដូនៅក្នុងទិវានៃក្ដីស្រលាញ់។ ចំនួននៃការចំណាយនេះ កើនឡើងបន្តិច ធៀបនឹង ១៦៤.៧៦ ដុល្លារ កាលពីឆ្នាំ ២០២១។
ចំណែកកាដូដែលនឹងត្រូវបាននិយមបំផុតនៅក្នុងឆ្នាំនេះ រួមមានដូចជា ស្ករគ្រាប់ (៥៦%), លិខិតជូនពរ (៤០%) និង ផ្កា (៣៧%)។ ប្រមាណជា ៣១% នៃអ្នកដែលត្រូវបានស្ទង់មតិ ឆ្លើយថា នឹងទទួលទានអាហារក្នុងរាត្រីទិវានៃក្ដីស្រលាញ់ប្រកបដោយរ៉ូមេនទិច ខណៈតួលេខនេះកាលពីឆ្នាំ ២០២១ មាន ២៤%។
ទន្ទឹមនឹងនេះ ជិត ២២% នៃអ្នកត្រូវបានសួរ ប្រាប់ថា នឹងជ្រើសរើសគ្រឿងអលង្ការជូនមនុស្សពិសេស។ ការចំណាយសម្រាប់កាដូជាគ្រឿងអលង្ការឆ្នាំនេះ ត្រូវបានគណនាឃើញថា ប្រហែល ៦.២ ពាន់លានដុល្លារ ខ្ពស់ជាងច្រើន ធៀបនឹង ៤.១ ពាន់លានដុល្លារកាលពីឆ្នាំ ២០២១ និងជាកម្រិតខ្ពស់បំផុតក្នុងប្រវត្តិសាស្ត្រ។
«បើទោះជាកាដូជាប្រពៃណីនៅក្នុងទិវានៃក្ដីស្រលាញ់ ដូចជា ស្ករគ្រាប់ និងផ្កាជាដើម ហាក់នៅតែជាអំណោយទាន់សម័យ ប៉ុន្តែ អ្នកជូន និងអ្នកទទួលសុទ្ធតែមានអារម្មណ៍ថា មានផាសុកភាពជាង នៅពេលបានទៅបរិភោគអាហារពិសេស ឬចូលរួមទទួលយកបទពិសោធន៍ថ្មី ធៀបនឹងឆ្នាំមុន» លោក Philips Rist នាយកប្រតិបត្តិរងនៃក្រុមហ៊ុន Prosper Insights បញ្ជាក់ដូច្នេះ៕
រុស្ស៊ី បានអភិវឌ្ឍបច្ចេកវិទ្យាដែលអាចរកឃើញវីរុស SARS-CoV-2 (កូវីដ-១៩) នៅដំណាក់កាលដំបូងបំផុតបន្ទាប់ពីបានឆ្លង
យោងតាមសារព័ត៌មាន Sputniknews អាជ្ញាធរការពារផលប្រយោជន៍អ្នកប្រើប្រាស់ និងសុខភាពមនុស្ស របស់ សហព័ន្ធរុស្ស៊ី (Rospotrebnadzor) បង្ហើបឱ្យដឹងថា ក្រុមអ្នកវិទ្យាសាស្ត្រនៃវិទ្យាស្ថានជាតិស្រាវជ្រាវជំងឺឆ្លងរបស់ខ្លួន បានអភិវឌ្ឍបច្ចេកវិទ្យាដែលអនុញ្ញាតឱ្យរកឃើញវីរុស SARS-CoV-2 ក្នុងដំណាក់កាលដំបូងបំផុត បន្ទាប់ពីបានឆ្លងមកមនុស្សម្នាក់ នៅពេលកំហាប់វីរុសស្ថិតក្នុងកម្រិតទាបបំផុត។
ក្នុងស្ថានការណ៍កូវីដ-១៩ កំពុងរាតត្បាត កម្រិតប្រសិទ្ធភាពនៃឧបករណ៍ធ្វើតេស្តសំណាក និងការដែលឆាប់ប្រមូលបានលទ្ធផលគឺជាកត្តាសំខាន់បំផុតរបស់ប្រព័ន្ធវិនិច្ឆយរោគ។ បច្ចេកវិទ្យាថ្មីរបស់ Rospotrebnadzor មានសមត្ថភាពឆ្លើយតបនឹងតម្រូវការទាំងអស់ខាងលើនេះ។
សមាជិកម្នាក់នៃក្រុមស្រាវជ្រាវខាងលើ បានប្រាប់ថា របកគំហើញនេះអាចក្លាយជាមូលដ្ឋានសម្រាប់ប្រព័ន្ធវិនិច្ឆយរោគរហ័សនៅនឹងកន្លែងអ្នកជំងឺ ឬគោលដៅធ្វើតេស្ត។ ប្រព័ន្ធដែលប្រើប្រាស់បច្ចេកវិទ្យានេះនឹងមិនត្រូវការឧបករណ៍ដែលមានបច្ចេកវិទ្យាខ្ពស់ ដូច្នេះ ការចំណាយក្នុងការផលិតឧបករណ៍ធ្វើតេស្តនឹងទាប តែផ្ដល់លទ្ធផលបានយ៉ាងលឿន ជួយឱ្យមានការព្យាបាលទាន់ពេល។
បច្ចុប្បន្ន បច្ចេកវិទ្យារបស់ Rospotrebnadzor ត្រូវបានចុះបញ្ជិកានៅការិយាល័យផ្ដល់ប័ណ្ណកម្មសិទ្ធិបញ្ញារបស់ រុស្ស៊ី (Rospatent) រួចហើយ។
របកគំហើញរបស់ក្នុងអ្នកវិទ្យាសាស្ត្ររុស្ស៊ីនេះគឺទាក់ទងទៅនឹងបច្ចេកទេសតំណពូជ និងបច្ចេកវិទ្យាជីវសាស្ត្រ ដោយយោងទៅលើ ម៉ូលេគុល RNA នាំផ្លូវ (Guide RNA/gRNA) នឹងអាចត្រូវបានប្រើក្នុងប្រព័ន្ធ CRISPR-Cas14 ដើម្បីស្វែងរក RNA របស់ វីរុសកូវីដ-១៩ ប្រកបដោយភាពទាន់ចិត្ត៕
(វីដេអូ)-ផ្ទុះភ្នំភ្លើងនៅ អឺរ៉ុបខាងត្បូង បង្កឱ្យមានព្យុះរន្ទះគួរឱ្យខ្លាច
(អ៊ីតាលី)-ភ្នំភ្លើង Etna បានផ្ទុះយ៉ាងខ្លាំងក្លាភ្លាមៗកាលពីសប្ដាហ៍កន្លង បណ្ដាលឱ្យមានព្យុះរន្ទះនៅលើមេឃភាគខាងត្បូងរបស់កោះ Sicily។
យោងតាមវិទ្យាស្ថានជាតិភូគព្ភសាស្ត្រ និងភ្នំភ្លើង របស់ អ៊ីតាលី (INGV) ភ្នំភ្លើងនេះបានផ្ទុះឡើងកាលពីពាក់ជិតកណ្ដាលយប់នៃថ្ងៃទី ១០ កុម្ភៈ និងមិនបានបង្កឱ្យមានការខូចខាតណាមួយឡើយ។ ក៏ប៉ុន្តែ វាបានធ្វើឱ្យមានផេះកម្ពស់រហូតដល់ ១០ គីឡូម៉ែត្រ។
Etna គឺជាភ្នំភ្លើងមួយដែលមានសកម្មភាពខ្លាំងក្លាបំផុតនៅ អឺរ៉ុប ប៉ុន្តែ វាកម្រនឹងមានការផ្ទុះខ្លាំងដូចលើកនេះ។ ប៉ុន្តែ កាលពីឆ្នាំ ២០១៥ និង ២០២១ ភ្នំភ្លើង Etna មានការផ្ទុះស្រដៀងគ្នានេះដែរ។
រន្ទះក្នុងបន្ទុះភ្នំភ្លើង និងរន្ទះក្នុងភ្លៀងសុទ្ធតែកើតឡើងដោយសារការប៉ះទង្គិចគ្នារវាងគ្រាប់ល្អិតនានា ប៉ុន្តែ ជំនួសឱ្យការបង្កើតឡើងដោយគ្រាប់ទឹកកកក្នុងភ្លៀងធម្មតា រន្ទះនៅក្នុងបន្ទុះភ្នំភ្លើងគឺកើតឡើងដោយសារគ្រាប់នៃកំអែរម៉ាក់ម៉ា។ នេះបើតាម Adam Varbel អ្នកស្រាវជ្រាវអំពីព្យុះនៅឯបន្ទប់ពិសោធន៍ជាតិ ប៉ាស៊ីហ្វិកភាគពាយព្យ។
https://www.youtube.com/watch?v=fXQfL77Om8U
ភ្នំភ្លើង Etna ស្ថិតនៅលើឆ្នេរសមុទ្រភាគខាងកើតនៃកោះ Sicily ដែលនៅក្នុងតំបន់កណ្ដាលនៃសមុទ្រ មេឌីទែរ៉ាណេ។ ដោយមានកម្ពស់ ៣,៣៥៧ ម៉ែត្រ និងទំហំ ១,១៩០ គីឡូម៉ែត្រក្រឡា នេះគឺជាភ្នំភ្លើងសកម្មធំបំផុតនៅ អ៊ីតាលី៕
កម្ពុជា រកឃើញអ្នកវិជ្ជមាននឹងវីរុសកូវីដ-១៩ ជាង ៥០០ នាក់ទៀត ក្នុងអំឡុងថ្ងៃទី ១៣ កុម្ភៈ ២០២២
ក្នុងអំឡុង ២៤ ម៉ោងនៃថ្ងៃទី ១៣ កុម្ភៈ កម្ពុជា បានរកឃើញអ្នកវិជ្ជមាននឹង កូវីដ-១៩ ចំនួន ៥១២ នាក់ ក្នុងនោះមាន ករណីឆ្លងក្នុងសហគមន៍ ៤៩៦ នាក់ និងអ្នកដំណើរពីបរទេស ១៦ នាក់ ដែលទាំងអស់សុទ្ធតែជាករណី អូមីក្រុង។
ប៉ូលិសចាក់ចម្រៀងដើម្បីដេញហ្វូងបាតុករប្រឆាំងវ៉ាក់សាំង ដែលជួបជុំគ្នានៅសួនវិមានសភា
(នូវែលសេឡង់)-ក្រុមមន្ត្រីនៅ វែលីងតោន បានចាក់បទចម្រៀងរបស់ Manilow ដើម្បីទប់ទល់នឹងបាតុកររាប់រយនាក់ដែលបោះជំរំនៅសួនរបស់វិមានសភា ដើម្បីសម្ដែងការប្រឆាំងទៅនឹងការតម្រូវឱ្យចាក់វ៉ាក់សាំងបង្ការជំងឺកូវីដ-១។
បាតុកម្មប្រឆាំងវ៉ាក់សាំង និងជំទាស់ចំពោះវិធានការទប់ស្កាត់កូវីដ-១៩ បានផ្ទុះឡើងនៅ នូវែលសេឡង់ បន្ទាប់ពីក្បួនរថយន្ត បានឆ្ពោះទៅខាងមុខវិមានសភា នៅក្នុង រដ្ឋធានីវែលីងតោន ដែលយកតម្រាប់តាមបាតុកម្ម «ក្បួនរថយន្តសេរីភាព» នៅ កាណាដា។
នៅពេលបាតុករប្រមាណ ១,០០០ នាក់ បោះតង់ជាមូលដ្ឋានស្នាក់នៅច្រើនថ្ងៃ នៅលើសួននៃវិមានរដ្ឋសភា Trevor Mallard ដែលជាប្រធានសភារបស់ នូវែលសេឡង់ កាលពីថ្ងៃទី ១២ កុម្ភៈ បានអនុញ្ញាតឱ្យអាជ្ញាធរប្រើប្រាស់ឧបករណ៍បំពងសំឡេង ដើម្បីបញ្ជូនសារស្ដីពីវ៉ាក់សាំងបង្ការកូវីដ-១៩ ដល់ហ្វូងបាតុករ។
ប្រព័ន្ធបំពងសំឡេងនេះ ក៏ចាក់ចម្រៀងរបស់តារាចម្រៀងអាម៉េរិក Barry Manilow ជាបន្តបន្ទាប់ ក្នុងនោះក៏មានបទញាក់កន្ត្រាក់អារម្មណ៍ Macarena នៃទសវត្សរ៍ឆ្នាំ ១៩៩០ ផងដែរ ដើម្បីទប់ទល់នឹងបាតុករ។
មុននោះ សមត្ថកិច្ចរបស់ នូវែលសែឡង់ បានស្វែងរកវិធីដើម្បីដេញបាតុករចេញពីសួនរបស់វិមានសភា។ Mallard កាលពីថ្ងៃទី ១១ មិថុនា ២០២១ ក៏ធ្លាប់បានចេញបញ្ជាឱ្យបុគ្គលិកប្រើប្រាស់រថយន្តបាញ់ទឹកបំបែកហ្វូងបាតុករផងដែរ។
មនុស្សជាច្រើននាក់បានចេញធ្វើបាតុកម្មប្រឆាំងនឹងការតម្រូវឱ្យចាក់វ៉ាក់សាំងបង្ការកូវីដ-១៩ ចំពោះបុគ្គលិកនៅក្នុងវិស័យមួយចំនួន ក្នុងនោះមាន គ្រូបង្រៀន វេជ្ជបណ្ឌិត បុគ្គលិកថែអ្នកជំងឺ ប៉ូលិស និងទាហាន។ ក្រៅពីនេះក៏មានអ្នកខ្លះប្រឆាំងនឹងការកំណត់ស្ដីពីការពាក់ម៉ាស នៅ នូវែលសែឡង់៕