ប្រធានាធិបតីអាម៉េរិក បានប្រកាសដាក់ទណ្ឌកម្មដំបូងលើធនាគារ និងឥស្សរជនរុស្ស៊ី ព្រមទាំងសន្យាថា នឹងមានទណ្ឌកម្មជាច្រើនទៀត។
«នេះគឺជាការចាប់ផ្ដើមសម្រាប់ការឈ្លានពានរបស់ រុស្ស៊ី ទៅលើ អ៊ុយក្រែន» លោក ចូ បៃដិន បានថ្លែងដូច្នេះកាលពីថ្ងៃទី ២២ កុម្ភៈ នៅ សេតវិមាន។ «រុស្ស៊ី ពេលនេះប្រាកដជានឹងលុកលុយ ប្រទេសអ៊ុយក្រែន»។
សហរដ្ឋអាម៉េរិក ធ្លាប់បានសន្យាថា នឹងដាក់ទណ្ឌកម្មយ៉ាងធ្ងន់ធ្ងរលើ រុស្ស៊ី បើសិន ទីក្រុងមូស្គូ បញ្ជូនទ័ពចូលលុកលុយ អ៊ុយក្រែន។ លោក បៃដិន បានប្រកាសថា សហរដ្ឋអាម៉េរិក ចាប់ផ្ដើមដំឡើងយន្តការនៃការដាក់ទណ្ឌកម្មកម្រិតធ្ងន់បំផុតរបស់ខ្លួន ក្នុងនោះក៏មានការបញ្ចូលឈ្មោះក្រុមឥស្សរជនរុស្ស៊ី និងធនាគារចំនួន ២ របស់ប្រទេសនេះ ទៅក្នុងបញ្ជីទណ្ឌកម្ម។ បណ្ដាប្រទេសត្រូវបានណែនាំជាពិសេស នឹងបំបាត់ពួកគេចេញពីប្រព័ន្ធធនាគារអាម៉េរិក ហាមជួញដូរជាមួយ ពលរដ្ឋអាម៉េរិក និងបង្កក់ទ្រព្យសម្បត្តិរបស់ពួកគេនៅ សហរដ្ឋអាម៉េរិក។
លោក បៃដិន បញ្ជាក់ថា ទណ្ឌកម្មដំបូងនេះនឹងអនុវត្តទៅលើធនាគារ VEB និង ធនាគារយោធារុស្ស៊ី Promsvyazbank ដែលជាធនាគារតែងតែធ្វើប្រតិបត្តិការទាក់ទងនឹងវិស័យការពារជាតិ។ រដ្ឋាភិបាលរុស្ស៊ី ក៏មិនអាចទទួលបានប្រភពហិរញ្ញវត្ថុពីបណ្ដាប្រទេសលោកខាងលិច។
Dmitry Peskov អ្នកនាំពាក្យរបស់ វិមានក្រឹមឡាំង ឱ្យដឹងថា រុស្ស៊ី នឹងពិនិត្យលើអ្វីដែល សហរដ្ឋអាម៉េរិក បានលើកឡើង មុននឹងមានប្រតិកម្មតប។
វិបត្តិនៅ អ៊ុយក្រែន បន្តឡើងកម្ដៅ បន្ទាប់ពី ប្រធានាធិបតីរុស្ស៊ី លោក វ្លាឌីមៀ ពូទីន កាលពីថ្ងៃទី ២១ កុម្ភៈ បានទទួលស្គាល់ដែនដី Donetsk និង Luhansk នៅភាគខាងកើតរបស់ អ៊ុយក្រែន ជាប្រទេសឯករាជ្យ និងបានចុះកិច្ចព្រមព្រៀងសហការគ្នា ក្នុងនោះ រុស្ស៊ី មានសិទ្ធិបង្កើតមូលដ្ឋានទ័ពនៅដែនដីទាំងនេះ។
នៅក្នុងកិច្ចប្រជុំបន្ទាន់របស់ ក្រុមប្រឹក្សាសន្តិសុខនៃ អង្គការសហប្រជាជាតិ កាលពីម្សិលមិញ សហរដ្ឋអាម៉េរិក និងបណ្ដាប្រទេសលោកខាងលិច បានថ្កោលទោសចំពោះសកម្មភាពរបស់ រុស្ស៊ី។ ចំណែក ទីក្រុងមូស្គូ វិញ ក៏បានចោទថា អ៊ុយក្រែន បំផ្លាញកិច្ចព្រមព្រៀង Minsk និងថា លោកខាងលិច រុញច្រាន អ៊ុយក្រែន ឱ្យធ្លាក់ទៅក្នុងទម្លោះប្រដាប់អាវុធ៕
