សឿន សំណាង - La Reine Media

បន្ទាប់ពី អ៊ុយក្រែន បានប្រកាសអាសន្ន រុស្ស៊ី ព្រមានថា ក្រុងកៀវ មិនត្រូវចល័តទ័ពនៅ Donbass ជាដាច់ខាត

រុស្ស៊ី បានប្រកាសថា មិនលើកលែងចំពោះការរំលោភបទឈប់បាញ់នៅ Donetsk និង Luhansk និងបានព្រលានទៅ អ៊ុយក្រែន ថា មិនត្រូវចល័តទ័ពនៅតំបន់នេះ ក្រោយពី រដ្ឋាភិបាលអ៊ុយក្រែន បានប្រកាសអាសន្នទូទាំងប្រទេស។

«យើងសូមព្រមានអស់លោកថា ក្នុងលក្ខខណ្ឌដែល កងកម្លាំងរុស្ស៊ី កំពុងគ្រប់គ្រងកិច្ចព្រមព្រៀងឈប់បាញ់ទៅតាមសំណើរបស់ Donetsk និង Luhansk អ្នកដែលបានរំលោភបំពាននឹងមិនរួចខ្លួនឡើយ» ឯកអគ្គរដ្ឋទូតរុស្ស៊ី ប្រចាំអង្គការសហប្រជាជាតិ Vassily Nebenzia ប្រកាសដូច្នេះនៅក្នុងកិច្ចប្រជុំកាលពីថ្ងៃទី ២៣ កុម្ភៈ។

បច្ចុប្បន្ន រុស្ស៊ី មិនទាន់ចេញបញ្ជាឱ្យបញ្ជូនទ័ពទៅកាន់តំបន់ Donbass ដែលមានខេត្ត Donetsk និង Luhansk ស្ថិតក្នុងភាគខាងកើតនៃ ប្រទេសអ៊ុយក្រែន នៅឡើយ ប៉ុន្តែ ប្រធានាធិបតីរុស្ស៊ី បានចេញបញ្ជាឱ្យត្រៀម និង សភារុស្ស៊ី បានអនុញ្ញាតឱ្យចល័តទ័ពរួចហើយ។

ឯកអគ្គរដ្ឋទូតរុស្ស៊ី ប្រចាំអង្គការសហប្រជាជាតិ លោក Vassily Nebenzia

ការព្រមានរបស់ រុស្ស៊ី ខាងលើនេះ ត្រូវបានធ្វើឡើងបន្ទាប់ពី អ៊ុយក្រែន បានប្រកាសដាក់ប្រទេសក្នុងស្ថានភាពអាសន្ន កាលពីម្សិលមិញ។ វិធានការនេះនឹងមានសុពលភាពចាប់ពីម៉ោង ០០:០០ នាទី នៃថ្ងៃនេះ និងអូសបន្លាយក្នុងរយៈពេល ៣០ ថ្ងៃទៅមុខ។ ស្ថានភាពអាសន្ននេះនឹងត្រូវបានអនុវត្តទូទាំងប្រទេស បូករួមទាំងដែនដី Donetsk និង Luhansk ដែលជាតំបន់ផ្ដាច់ខ្លួន ត្រូវបានប្រកាសអាសន្នតាំងពីឆ្នាំ ២០១៤។ អាជ្ញាធរអ៊ុយក្រែន នឹងបង្កើនសកម្មភាពផ្នែកសន្តិសុខ រួមទាំងការរឹតបន្តឹងការត្រួតពិនិត្យលិខិតស្នាម និងមធ្យោបាយធ្វើដំណើររបស់ប្រជាជនផងដែរ។

February 24, 2022

រថយន្ត Ford Ranger Raptor ជំនាន់ថ្មី បានប្រកាសចេញជាផ្លូវការ

កាលពីថ្ងៃទី22 ខែកុម្ភៈ ឆ្នាំ2022 ក្រុមហ៊ុន Ford Motor Company បានប្រកាសចេញជាផ្លូវការនៃរថយន្ត Ford Ranger Raptor ជំនាន់ទី 2 របស់ខ្លួនដែលរថយន្តនេះនឹងក្លាយជាជម្រើសដ៏ល្អសម្រាប់អ្នកចូលចិត្តបើកបរផ្លូវដែលមានឧបសគ្គ (Off-Road Performance) ។ Ford Ranger Raptor មួយនេះគឺជាត្រកូលចុងក្រោយនៃ Ford Ranger ជំនាន់ថ្មី (Next-Gen Ranger) ដែលមានភាពឆ្លាតវៃ និងធន់រឹងមាំជាងដែលនឹងក្លាយជាកំពូលរថយន្ត Pickup ក្នុងត្រកូល Ranger។

រូបរាងផ្នែកខាងក្រៅដ៏ទាក់ទាញ ជាមួយនឹងប៉ាណាអក្សរ FORD ធំចំកណ្តាលបង្ហាញពីអំណាច និងអនុភាព ចង្កៀងប្រភេទ Matrix LED យ៉ាន់កង់អាលុយមីញ៉ូមបែបស្ព័រទំហំ 17 អ៊ីញ និងសំបកកង់ Off-Road ម៉ាក BFGoodrich។

ផ្នែកខាងក្នុងត្រូវបានយកពណ៍ក្រហមមករំលេចជាថ្នេរដេរ កៅអីបែបស្ព័រស្រដៀងទៅនឹងរថយន្តស្ព័រ កុងទ័រឌីជីថលថ្មីស្រឡាងទំហំ 12.4 អ៊ីញ អេក្រង់ Touchscreen ទំហំ 12 អ៊ីញ ប្រើប្រាស់ប្រព័ន្ធប្រត្តិបត្តិការ SYNC 4A ជំនាន់ថ្មី និងឧបករណ៍បំពងសម្លេងម៉ាក B&O ដែលកាលពីមុនមានបំពាក់តែនៅលើ Ford F-150 Raptor តែប៉ុណ្ណោះ។

ចំណុចដែលផ្លាស់ប្តូរធំបំផុតនោះគឺជម្រើសម៉ាស៊ីននៃរថយន្ត ជាលើកដំបូងដែលក្រុមហ៊ុន Ford បានបំពាក់ម៉ាស៊ីន Twin-Turbo 3.0L EcoBoost V6 ដែលជាប្រភេទម៉ាស៊ីនសាំងជំនាន់ថ្មី ដែលអាចផលិតកម្លាំងសេះរហូតដល់ទៅ 392HP និងកម្លាំងរមួលដល់ទៅ 583Nm និងជម្រើសមួយទៀតនោះគឺ ម៉ាស៊ីនម៉ាស៊ូត 2.0L Bi-Turbo ជំនាន់ថ្មី។

ជាមួយនឹងប្រអប់លេខអេឡិចត្រូនិច 10 វគ្គអូតូជំនាន់ថ្មីដែលអាចប្រើប្រាស់បានទាំងលេខអូតូ និងលេខដៃដែលបង្កើតឡើងយ៉ាងពិសេសសម្រាប់ Ranger ជំនាន់ថ្មី (Next-Gen Ranger) ដំណើរការរួមគ្នាជាមួយនឹងម៉ាស៊ីនជំនាន់ថ្មីធ្វើឲ្យរថយន្ត Ford Ranger Raptor ជំនាន់ថ្មីនេះអាចជំនះបានគ្រប់ស្ថានភាពផ្លូវដូចជា៖ ផ្លូវគ្រួស ភក់ ផុក និងផ្លូវខ្សាច់។ល។ អ្វីដែលកាន់តែអស្ចារ្យនោះគឺ អាចជ្រើសរើស Mode នៃការដំណើរការម៉ាស៊ីនបានផងដែរ នេះប្រៀបបានទៅនឹងរថយន្តស្ព័រយ៉ាងអញ្ចឹង។ អ្នកបើកបរអាចជ្រើសរើស Mode ឬជម្រើសនៃសម្លេងម៉ាស៊ីននៅលើចង្កូតផ្ទាល់តែម្តងរួមមាន៖

សម្លេងស្ងាត់ (Quiet): កាត់បន្ថយសម្លេងរំខានពីម៉ាស៊ីន ល្អសម្រាប់ពេលបើកបររថយន្តនៅកន្លែងស្ងប់ស្ងាត់ការពារសម្លេងរំខានដល់អ្នកដទៃ
សម្លេងធម្មតា (Normal): បញ្ចេញសម្លេងធម្មតាពីម៉ាស៊ីន ដែលស័ក្តិសមសម្រាប់ការប្រើប្រាស់ប្រចាំថ្ងៃ
សម្លេងបែបស្ព័រ (Sport): បញ្ចេញសម្លេងលឺខ្លាំងពីម៉ាស៊ីន ដែលអាចប្រើប្រាស់ពេលបើកបរល្បឿនលឿន ឬបើកបរបែបស្ព័រ
សម្លេងបែបស្ព័រខ្លាំង (Baja): សម្រាប់ Mode មួយនេះវិញវានឹងបញ្ចេញសម្លេងខ្លាំងពីម៉ាស៊ីន ដែលធ្វើឲ្យការបើកបរកាន់តែមានអំណាច និងថាមពល ដែលសម្រាប់ Mode មួយនេះគឺអាចប្រើប្រាស់បានតែជាមួយនឹងការបើកបរលើផ្លូវមានឧបសគ្គតែប៉ុណ្ណោះ។

រថយន្ត Ford Ranger Raptor ជំនាន់ថ្មីនេះក៏ត្រូវបានកែប្រែប្រព័ន្ធជើងក្រោមថ្មីទាំងស្រុងដែរ ជាក់ស្តែងសាក់ស៊ីទាំងមូលត្រូវបានផ្លាស់ប្តូរថ្មីទាំងស្រុង មិនត្រឹមតែខុសពីស៊េរីឆ្នាំមុនៗនោះទេ តែថែមទាំងខុសប្លែកពីរថយន្ត Ford Ranger ជំនាន់ថ្មីទៅទៀត។ ជាមួយនឹងគ្រោងរថយន្តថ្មី ឃ្លុបក្រោយថ្មី និងស៊ុមរថយន្តថ្មី និងប្រព័ន្ធជើងក្រោមធន់រឹងមាំជាងមុន ដើម្បីប្រាកដថារថយន្ត Ford Ranger Raptor ជំនាន់ថ្មីពិតជាអាចជំនះបានគ្រប់ឧបសគ្គនៃការបើកបរ។

ចំណុចមួយដែល Ford មិនអាចភ្លេចបាននោះគឺការបំពាក់បូម Fox នៅលើប្រភេទរថយន្ត Raptor សម្រាប់លើកនេះ Ford Ranger Raptor ជំនាន់ថ្មីត្រូវបានបំពាក់ដោយបូម FOX 2.5 inch Live Valve Internal Bypass shock ជំនាន់ថ្មី ដែលមានសមត្ថភាពខ្ពស់ជាងមុនទាំងការបើកបរលើផ្លូវធម្មតាដែលវាជួយសម្រួលឲ្យមានភាពផាសុកភាពជាងមុន និងការបើកបរលើផ្លូវមានឧបសគ្គដែលអាចបើកបរទាំងល្បឿនលឿន ឬយឺតដោយគ្មានបញ្ហា។ មិនតែប៉ុណ្ណោះខែលដែកថែបការពារផ្ទៃផ្នែកខាងក្រោមត្រូវបានបង្កើនទំហំធំជាងមុនស្ទើរទ្វេដងលើសរថយន្ត Ford Ranger ជំនាន់ថ្មី និងត្រូវបានប្រើប្រាស់ដែកថែបពិសេសកម្រាស់ 2.3 មីលីម៉ែត្រមកធ្វើ។ ជាលើកដំបូងដែលរថយន្ត Ford Ranger Raptor ប្រើប្រាស់ប្រព័ន្ធគ្រប់គ្រងប៉ុងថ្មី (Advanced Permanent Four-Wheel Drive System) ជាមួយនឹងប្រព័ន្ធចាប់ប៉ុងរថយន្តទាំងកង់មុខ និងកង់ក្រោយដែលសម្រួលពេលជាប់ផុង (Front and Rear Locking Differentials)

លោក Dave Burn ជាប្រធានគ្រប់គ្រងវិស្វករនៃរថយន្ត Ford Ranger Raptor បានមានប្រសាសន៍ថា៖ “Ranger Raptor បានបំផុសគំនិតចេញពីអ្នកប្រណាំងឡានលើវាលខ្សាច់ ដូច្នេះហើយទើបយើងបានរចនារថយន្ត Off-Road Pickup ជំនាន់ថ្មីមួយដែលលោកអ្នកពុំចាំបាច់យកវាទៅកែច្នៃ (Modify) បន្ថែមនោះទេ”។

សម្រាប់ Mode នៃការបើកបរមានរហូតទៅដល់ 7 ហើយពណ៍នៅលើកុងទ័រ និងប្តូរពណ៍ទៅតាម Mode នៃការបើកបរដែលលោកអ្នកជ្រើសរើសដូចជា៖

ផ្លូវធម្មតា (Normal) សម្រាប់បើកបរផ្លូវធម្មតា និងការប្រើប្រាស់សន្សំសំចៃប្រេង
ការបើកបរបែបស្ព័រ (Sport) សម្រាប់ការបើកបរផ្លូវល្បឿនលឿនដែលត្រូវការកម្លាំងខ្លាំង
ផ្លូវរអិល (Slippery) សម្រាប់ការបើកបរលើផ្លូវរអិល ដែលវាជួយទប់លំនឹងរថយន្តបន្ថែម
ផ្លូវថ្ម គ្រួស (Rock Crawl) សម្រាប់ការបើកបរលើផ្លូវដែលមានថ្ម មានគ្រួស
ផ្លូវខ្សាច់ (Sand) សម្រាប់ការបើកបរលើផ្លូវខ្សាច់ និងផ្លូវដែលមានព្រិលក្រាស់
ផ្លូវភក់ (Mud/Ruts) សម្រាប់ការបើកបរលើផ្លូវដែលមានភក់ ផុកដែលវាជួយទប់លំនឹងរថយន្តបានល្អ
ផ្លូវឧបសគ្គ (Baja) សម្រាប់ការបើកបរលើផ្លូវដែលមានឧបសគ្គច្រើន និងអាចបើកបរក្នុងល្បឿនលឿន

មុខងារថ្មីមួយដែលទើបតែមានបំពាក់នៅលើរថយន្ត Ford Ranger Raptor ជំនាន់ថ្មីនោះគឺ Trail Control ដែលអនុញ្ញាតឲ្យអ្នកបើកបរកំណត់ល្បឿនថេរមិនលើសពី 32Km/h ក្នុងស្ថានភាពផ្លូវលំបាក និងមានឧបសគ្គដែលវាស្រដៀងទៅនឹងប្រព័ន្ធ Cruise Control ដែរ។ ប្រិយមិត្តយល់យ៉ាងណាដែរចំពោះការប្រកាសចេញនៃរថយន្ត Ford Ranger Raptor ជំនាន់ថ្មីនេះ?

February 23, 2022

Facebook ទើបតែបញ្ចេញ «អាវុធ» ថ្មី ដើម្បី «ប្រល័យ» TikTok

បណ្ដាញសង្គម Facebook របស់ក្រុមហ៊ុន Meta ទើបតែបានបញ្ចេញមុខងារវីដេអូខ្លី Reels នៅទូទាំងសកលលោក និងកំពុងត្រូវបានគេរំពឹងថា នឹងរកឃើញជោគជ័យដូចទៅនឹងមុខងារ Story។

សារព័ត៌មាន WSJ បានរាយការណ៍ថា Meta ដែលជាក្រុមហ៊ុនមេរបស់ Facebook បានបង្កើនការ «វាយបក» ប្រឆាំងនឹង TikTok ដោយការបញ្ចេញមុខងារវីដេអូខ្លី Reels សម្រាប់អ្នកប្រើប្រាស់ទូទាំងពិភពលោក (ជាង ១៦០ ប្រទេស) កាលពីថ្ងៃអង្គារកន្លងទៅ។ ពួកគេក៏បានណែនាំមុខងារថ្មីជាច្រើនផ្សេងទៀតដល់អ្នកផ្សាយពាណិជ្ជកម្មផងដែរ។

បច្ចុប្បន្ន Facebook កំពុងមាន «សង្គ្រាម» ជាមួយ TikTok ដែលជាបណ្ដាញសង្គមវីដេអូខ្លីត្រូវបានអ្នកប្រើប្រាស់ទាញយកមកប្រើច្រើនជាងគេកាលពីឆ្នាំ ២០២១ និងបានយកឈ្នះលើ Instagram ដោយក្លាយជាបណ្ដាញសង្គមដែលទទួលបានការគាំទ្រច្រើនជាងគេពីសំណាក់យុវវ័យ។

Meta ក៏រងផលប៉ះពាល់ពីមុខងារសុវត្ថិភាពមួយដែលត្រូវបាន Apple លាតត្រដាងកាលពីឆ្នាំ ២០២១។ រាប់ចាប់ពីបានបញ្ចេញរបាយការណ៍ហិរញ្ញវត្ថុកាលពីថ្ងៃទី ២ កុម្ភៈ តម្លៃមូលធនទីផ្សាររបស់ Meta ក៏បានថយចុះជាង ៣០០ ពាន់លានដុល្លារ។

ជាមួយនឹងមុខងារថ្មី Reels ម្ចាស់ Facebook លោក Mark Zuckerberg ថ្លែងថា៖ «យើងចង់ឱ្យ Facebook Reels ក្លាយជាកន្លែងល្អបំផុតសម្រាប់អ្នកបង្កើតខ្លឹមសារជាវីដេអូ តភ្ជាប់ទំនាក់ទំនងជាមួយសហគមន៍របស់ពួកគេ និងរកប្រាក់»។

Meta បានណែនាំកម្មវិធី Reels កាលពីខែសីហា ឆ្នាំ ២០២០ សម្រាប់អ្នកប្រើប្រាស់ Instagram របស់ខ្លួននៅ សហរដ្ឋអាម៉េរិក ដើម្បីជាការ «វាយបក» មួយ ប្រឆាំងនឹង TikTok ដែលជាកម្មសិទ្ធិរបស់ ក្រុមហ៊ុនចិន ByteDance៕

February 23, 2022

តម្លៃសាំងនៅលើពិភពលោកទាំងមូលកំពុងឡើងថ្លៃខ្ពស់ ប៉ុន្តែសាំងនៅប្រទេសមួយនេះបែរជាថោកជាងទឹកសុទ្ធទៅទៀត

ប្រទេសមួយនេះ រក្សាប្រព័ន្ធតម្លៃប្រេងសាំង «ភ្លោះ» រួមមានតម្លៃប្រេងសាំងអន្តរជាតិ ០.៥ ដុល្លារ/លីត្រ និងតម្លៃសាំងជំនួយពីគោលនយោបាយរបស់រដ្ឋ។

វិបត្តិជម្លោះដណ្ដើមទឹកដីរវាង អ៊ុយក្រែន និង រុស្ស៊ី ដែលកំពុងឡើងកម្ដៅខ្លាំង ទីផ្សារទំនិញពិភពលោក ក្នុងនោះមានប្រេងឆៅជាដើម ក៏បន្តប្រែប្រួលខ្លាំង។ ក្នុងការជួញដូរកាលពីម្សិលមិញ មានពេលខ្លះ ប្រេង Brent បានឡើងថ្លៃជិត ៣% និងត្រូវបានជួញដូរក្នុងតម្លៃ ៩៦.២៨ ដុល្លារ/ធុងបារ៉ែល ដែលជាតម្លៃខ្ពស់បំផុតក្នុងរយៈពេល ៧ ឆ្នាំកន្លងមកនេះ។ តម្លៃប្រេងឆៅ WTI ក៏មានការប្រែប្រួលខ្លាំងដែរ ដោយត្រូវបានជួញដូរក្នុងតម្លៃ ៩៣.៨៦ ដុល្លារ/ធុងបារ៉ែល។

ក៏ប៉ុន្តែ ក្នុងគ្រាដែលប្រេងឡើងថ្លៃខ្លាំង ធ្វើឱ្យបណ្ដាប្រទេសស្ទើរតែទាំងអស់ក្នុងពិភពលោកមានការព្រួយបារម្ភ ក៏នៅមានប្រទេសមួយដែលតម្លៃប្រេង «មិនខ្ចីរើខ្លួន» បើទោះជាតម្លៃប្រេងពិភពលោក កើនឡើងដល់ណាក៏ដោយ។

នោះគឺជា វ៉េណេស៊ុយអេឡា ជាប្រទេសដែលត្រូវបានគេស្គាល់ថា «អ្នកលក់ប្រេងសាំងថោកបំផុតក្នុងពិភពលោក»។ យោងតាមក្រុមហ៊ុន Global Petrol Prices គិតត្រឹមថ្ងៃទី ១២ កុម្ភៈ ប្រេងសាំងប្រភេទ RON ៩៥ ក្នុង ១ លីត្រ មានតម្លៃ ០.១ បូលីវ៉ា វ៉េណេស៊ុយអេឡា (ប្រហែល ០.០២ ដុល្លារអាម៉េរិក/លីត្រ)។ ចំណែកនៅទូទាំងពិភពលោក សាំងនៅពេលនោះ គិតជាមធ្យម មានតម្លៃ ៥.០៥ បូលីវ៉ា វ៉េណេស៊ុយអេឡា ខ្ពស់ជាងជាង ៥០ ដង ធៀបនឹងតម្លៃនៅ វ៉េណេស៊ុយអេឡា។

ហេតុអ្វីបានជាដូច្នេះ?

វ៉េណេស៊ុយអេឡា គឺជាប្រទេសដែលរក្សាទុកប្រេងក្នុងបរិមាណច្រើនជាងគេបង្អស់ក្នុងពិភពលោក។ រដ្ឋាភិបាលប្រទេសនេះ ថែមទាំងមានគោលនយោបាយបញ្ចុះតម្លៃប្រេងសាំងស្ទើរតែគ្រប់ប្រភេទទាំងអស់ ព្រោះតែប្រាក់ចំណូលរបស់ប្រជាជននៅមានកម្រិតទាប ក្នុងនោះ កម្មករមានប្រាក់ខែជាមធ្យមត្រឹមតែ ៥៣ ដុល្លារ/ខែ ខណៈបុគ្គលិកជំនាញទទួលបានប្រហែល ១០០ ដុល្លារ/ខែ ដូច្នេះ ប្រជាជនសមនឹងទទួលបានតម្លៃប្រេងទាបបំផុតក្នុងពិភពលោក។

ជាងនេះទៀត វ៉េណេស៊ុយអេឡា រក្សាប្រព័ន្ធតម្លៃប្រេងសាំង «ភ្លោះ» រួមមាន តម្លៃអន្តរជាតិគឺ ០.៥ ដុល្លារអាម៉េរិក/លីត្រ និងតម្លៃប្រេង គោលនយោបាយរដ្ឋ។ តម្លៃប្រេងគោលនយោបាយនេះគឺ ០.១ បូលីវ៉ា វ៉េណេស៊ុយអេឡា/លីត្រ អនុវត្តចំពោះ ១២០ លីត្រដំបូង/ខែ សម្រាប់ក្រុមពលរដ្ឋដែលមានប័ណ្ណប្រជាជាតិ (ស្រដៀងនឹងអត្តសញ្ញាណប័ណ្ណ)។ នៅពេលទិញលើសពី ១២០ លីត្រ/ខែ នឹងត្រូវគិតក្នុងតម្លៃ ០.៥ ដុល្លារ/លីត្រ។

វ៉េណេស៊ុយអេឡា គឺជាប្រទេសដែលមានអត្រាអតិផរណាខ្ពស់ខ្លាំង ដូច្នេះ ប្រាក់ បូលីវ៉ា ក៏ស្ទើរតែមិនមានតម្លៃ។ បើគិតទៅតាមប្រាក់ដុល្លារអាម៉េរិក ទឹកបរិសុទ្ធ ១ ដប នៅ វ៉េណេស៊ុយអេឡា មានតម្លៃ ០.៨៨ ដុល្លារ គឺថ្លៃជាងសាំង ១ ដបទៅទៀត៕

February 23, 2022

ភាគហ៊ុន Jinhui Mining កើនឡើងជិត ៤៤% ជួយឱ្យ ប្រទេសចិន មានមហាសេដ្ឋីថែមម្នាក់ទៀត

Li Ming បានក្លាយជាមហាសេដ្ឋី ដោយសារភាគហ៊ុនរបស់ក្រុមហ៊ុនកែច្នៃរ៉ែ Jinhui Mining កើនឡើងខ្ពស់ក្នុងថ្ងៃដំបូងនៃការដាក់ឱ្យជួញដូរនៅផ្សារហ៊ុន។

កាលពីថ្ងៃទី ២២ កុម្ភៈ ភាគហ៊ុនរបស់ Jinhui Mining ដែលជាក្រុមហ៊ុនកែច្នៃប្រាក់ សំណ ស័ង្កសី រួមនឹងរ៉ែច្រើនប្រភេទផ្សេងទៀតរបស់ ចិន បានកើនជិត ៤៤% ក្នុងថ្ងៃដំបូងនៃការដាក់ឱ្យជួញដូរលើផ្សារហ៊ុនសៀងហៃ។ ប្រការនេះបានជួយឱ្យលោក Li Ming ដែលមានភាគហ៊ុន ៩៨% នៅក្នុងក្រុមហ៊ុនវិនិយោគ Gansu Yate Investment Group ក្លាយជាមហាសេដ្ឋី។

Gansu Yate Investment Group ក្ដោបក្ដាប់ភាគហ៊ុនចំនួន ៤៩៥ លានហ៊ុន ប្រហាក់ប្រហែលនឹងពាក់កណ្ដាលនៃភាគហ៊ុនរបស់ Jinhu Mining។ ភាគហ៊ុននេះបញ្ចប់ការជួញដូរថ្ងៃដំបូងនៅក្នុងតម្លៃ ១៥.៥៥ យុន/ហ៊ុន កើនឡើងខ្ពស់បើធៀបនឹងតម្លៃ IPO ១០.៨ យុន/ហ៊ុន។ ប្រការនេះបាននាំឱ្យតម្លៃសរុបនៃភាគហ៊ុនរបស់លោក Li ឡើងដល់ ១.១៨ ពាន់លានដុល្លារអាម៉េរិក។

ប្រាក់ចំណូលក្នុងឆ្នាំ ២០២១ របស់ Jinhui បានកើនពី ១.១២ ពាន់លានយុន ក្នុងឆ្នាំ ២០២០ ឡើងដល់ ១.២៥ ពាន់លានយុន ក្នុងឆ្នាំ ២០២០។ លោក Li ក៏មានភាគហ៊ុននៅក្នុងក្រុមហ៊ុន Jinhui Liquor ដែលបានដាក់ឱ្យជួញដូរនៅផ្សារហ៊ុនសៀងហៃ។

ចិន គឺជាប្រទេសដែលមានមហាសេដ្ឋីច្រើនជាងគេលំដាប់ទី ២ ក្នុងពិភពលោក បន្ទាប់ពី សហរដ្ឋអាម៉េរិក។ កាលពីសប្ដាហ៍កន្លង ភាគហ៊ុន Huitongda Network ដែលជាក្រុមហ៊ុនមួយទទួលបានការគាំទ្រពី Alibaba ក៏បានឡើងថ្លៃនៅពេលឡើងផ្សារហ៊ុនហុងកុង ជួយឱ្យទ្រព្យរបស់ប្រធាន Wang Jianguo ឡើងខ្ពស់ថែមមួយកម្រិតទៀត៕

February 23, 2022

ទិដ្ឋភាពរួមនៃយុទ្ធនាការចាក់វ៉ាក់សាំងបង្ការ កូវីដ-១៩ ជូនកុមារអាយុពី ៣ ដល់ ៥ ឆ្នាំ នៅមណ្ឌលសុខភាពផ្សារដើមថ្កូវ

ការចាប់ផ្ដើមនៃយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនកុមារដែលមានអាយុចាប់ពី ៣ ដល់ក្រោម ៥ ឆ្នាំ នៅមណ្ឌលសុខភាពផ្សារដើមថ្កូវ ប្រព្រឹត្តទៅដោយរលូន។

យុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសដំបូង ជូនកុមារដែលមានអាយុចាប់ពី ៣ឆ្នាំ រហូតដល់ក្រោម ៥ ឆ្នាំ នៅមណ្ឌលសុខភាពផ្សារដើមថ្កូវ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ នេះ ត្រូវបានធ្វើឡើងនាព្រឹកថ្ងៃទី ២៣ ខែកុម្ភៈ ឆ្នាំ២០២២។

ប្រភព៖ Information

February 23, 2022

ករណី កូវីដ-១៩ ថ្មី នៅ កម្ពជា! រកឃើញអ្នកឆ្លងថ្មីជិត ៥៦០ នាក់ទៀត កាលពីម្សិលមិញ

ក្នុងអំឡុង ២៤ ម៉ោងនៃថ្ងៃទី ២២ កុម្ភៈ ឆ្នាំ ២០២២ កម្ពុជា បានរកឃើញអ្នកវិជ្ជមានថ្មីនឹង កូវីដ-១៩ ចំនួន ៥៥៨ នាក់ ក្នុងនោះមាន ករណីឆ្លងក្នុងសហគមន៍ ៥៥៤ នាក់ និង អ្នកដំណើរពីបរទេស ៤ នាក់ ដែលទាំងអស់សុទ្ធតែជាករណី អូមីក្រុង។

February 23, 2022

អ៊ុយក្រែន ត្រៀមរួចរាល់ដើម្បីការពារទឹកដី «សូម្បីតែមួយចំអាម»

រដ្ឋមន្ត្រីការបរទេសអ៊ុយក្រែន Kuleba ប្រកាសថា ប្រទេសនេះបានត្រៀមរួចរាល់សម្រាប់ប្រយុទ្ធដើម្បីការពារទឹកដី សូម្បីតែមួយចំអាម ប៉ុន្តែ នៅតែផ្ដល់អាទិភាពដល់ផ្នែកការទូតជាមួយ រុស្ស៊ី។

«ផែនការ A គឺការប្រើប្រាស់រាល់មធ្យោបាយការទូត ដើម្បីគំរាម រុស្ស៊ី និងទប់ស្កាត់ការកើនឡើងនៃភាពតានតឹង។ បើសិនជាផែនការ A បរាជ័យ នោះផែនការ B នឹងជាការប្រយុទ្ធដើម្បីការពារទឹកដីសម្បីតែមួយចំអាមរបស់យើង នៅគ្រប់ទីក្រុង និងគ្រប់ភូមិឋាន។ ច្បាស់ណាស់ យើងនឹងប្រយុទ្ធរហូតដល់ដណ្ដើមបានជ័យជំនះ» រដ្ឋមន្ត្រីការបរទេសរបស់ អ៊ុយក្រែន លោក Dmytro Kuleba បានថ្លែងដូច្នេះនៅក្នុងសន្និសីទសារព័ត៌មានជាមួយសមភាគីអាម៉េរិក លោក Antony Blinken នៅ វ៉ាស៊ីងតោន កាលពីថ្ងៃទី ២២ កុម្ភៈ។

លោក Kuleba ក៏បានរិះគន់ថា រុស្ស៊ី «រំលោភយ៉ាងធ្ងន់ធ្ងរលើច្បាប់អន្តរជាតិ និងប្រឆាំងនឹងអធិបតេយ្យភាព និងបូរណភាពទឹកដីរបស់ អ៊ុយក្រែន» នៅពេលទទួលស្គាល់ឯករាជ្យរបស់ Donetsk និង Luhansk ដែលជាដែនដីផ្ដាច់ខ្លួននៅភាគខាងកើតរបស់ ប្រទេសអ៊ុយក្រែន។

រដ្ឋមន្ត្រីរូបនេះក៏បានអំពាវនាវឱ្យពិភពលោក ប្រើប្រាស់រាល់កម្លាំងសេដ្ឋកិច្ចដើម្បីដាក់ទណ្ឌកម្មលើ រុស្ស៊ី «ជាបន្ទាន់ និងឱ្យបានខ្លាំងក្លា»។ លោក Kuleba ក៏សម្ដែងការសាទរចំពោះការដាក់ទណ្ឌកម្មរបស់ សហរដ្ឋអាម៉េរិក ទៅលើ រុស្ស៊ី ផងដែរ។

នៅក្នុងសន្និសីទខាងលើ រដ្ឋមន្ត្រីការបរទេសអាម៉េរិក ក៏បានរិះគន់ ប្រធានាធិបតីរុស្ស៊ី លោក វ្លាឌីមៀ ពូទីន ថា បានបង្ហាញនូវគោលដៅ «គ្រប់គ្រង អ៊ុយក្រែន ទាំងមូល»។ លោកក៏បានប្រកាសថា សហរដ្ឋអាម៉េរិក នឹង «នៅតែប្រើប្រាស់» គ្រប់មធ្យោបាយដែលមាន ដើម្បីទប់ស្កាត់ការវាយប្រហារសង្គ្រុបទៅលើ អ៊ុយក្រែន ផងដែរ។

សហរដ្ឋអាម៉េរិក និងបណ្ដាប្រទេសលោកខាងលិច តាំងពីចុងឆ្នាំ ២០២១ បានចោទថា រុស្ស៊ី ប្រមូលផ្ដុំទាហានជាង ១០០,០០០ នាក់ នៅតំបន់ព្រំដែនភាគខាងលិច ដើម្បីរៀបផែនការលុកលុយ អ៊ុយក្រែន។ សហរដ្ឋអាម៉េរិក បានព្រមានជាបន្តបន្ទាប់ថា រុស្ស៊ី ជិតវាយប្រហារលើ អ៊ុយក្រែន ប៉ុន្តែ រដ្ឋាភិបាលអ៊ុយក្រែន ជឿថា ស្ថានការណ៍ «មិនមានអ្វីថ្មី»។

ភាពតានតឹងនៅជុំវិញ «វិបត្តិ អ៊ុយក្រែន» កាន់តែឡើងកម្ដៅខ្លាំង បន្ទាប់ពី ប្រធានាធិបតីប្រធានាធិបតីរុស្ស៊ី លោក វ្លាឌីមៀ ពូទីន កាលពីថ្ងៃទី ២១ កុម្ភៈ បានប្រកាសទទួលស្គាល់ឯករាជ្យរបស់តំបន់ Donetsk និង Luhansk ដែលជាដែនដីភាគខាងកើតរបស់ ប្រទេសអ៊ុយក្រែន និងបានចុះកិច្ចព្រមព្រៀងសហការផ្នែកយោធាជាមួយមេដឹកនាំរបស់តំបន់ទាំងពីរនេះ។

សហរដ្ឋអាម៉េរិក និងបណ្ដាប្រទេសលោកខាងលិច បានចាប់ផ្ដើមដាក់ទណ្ឌកម្មលើ រុស្ស៊ី។ ប្រធានាធិបតីអាម៉េរិក លោក បៃដិន ប្រកាសថា នឹងមានទណ្ឌកម្មជាច្រើនផ្សេងទៀតដែលត្រូវដាក់ចេញបន្ទាប់ពីទណ្ឌកម្មបើកឆាក បើសិន រុស្ស៊ី មិនមានសកម្មភាពបន្ធូរបន្ថយភាពតានតឹងនៅ អ៊ុយក្រែន៕

February 23, 2022

សហរដ្ឋអាម៉េរិក បញ្ជូនយន្តហោះចម្បាំង និងឧទ្ធម្ភាគចក្រវាយប្រហារ រាប់សិបគ្រឿង ទៅជិត «របងផ្ទះ» របស់ រុស្ស៊ី

អាម៉េរិក បញ្ជូនយន្តហោះចម្បាំង F-១៥ និងឧទ្ធម្ភាគចក្រ Apache ចំនួន ៣២ គ្រឿង ទៅកាន់ ប្រទេសប៉ូឡូញ និងបណ្ដាប្រទេសនៅតំបន់សមុទ្របាល់ទិក ក្នុងគ្រាដែល រុស្ស៊ី ពង្រាយកងទ័ពក្បែរ ព្រំដែនអ៊ុយក្រែន ក្រោយពីលោក ពូទីន បានទទួលស្គាល់ដែនដីផ្ដាច់ខ្លួននៅភាគខាងកើតរបស់ អ៊ុយក្រែន។

ប្រធានាធិបតីអាម៉េរិក លោក ចូ បៃដិន កាលពីម្សិលមិញ បានប្រកាសពង្រាយទ័ពនៅ អឺរ៉ុប ជាថ្មី ក្នុងនោះ អង្គភាពជាច្រើនរបស់យោធា ក៏ត្រូវបានពង្រាយនៅភាគខាងកើតរបស់ ណាតូ។ «ខ្ញុំបានបញ្ជាឱ្យពង្រាយកម្លាំង និងសព្វាវុធរបស់ អាម៉េរិក ដែលមានស្រាប់នៅ អឺរ៉ុប ដើម្បីបង្កើតកម្លាំងឱ្យសម្ព័ន្ធមិត្តនៅ តំបន់បាល់ទិក រួមមាន អេស្តូនី, ឡេតូនី និង លីទុយអានី» លោក បៃដិន ឱ្យដឹងដូច្នេះ។

កងទ័ពអាម៉េរិក បង្កើនវត្តមាននៅ តំបន់បាល់ទិក ក្នុងនោះមាន ប្រទេសអេស្តូនី, ឡេតូនី និង លីទុយអានី ផងដែរ

ក្រសួងការពារជាតិអាម៉េរិក ក្រោយមកក៏បានប្រកាសលម្អិតអំពីការចល័តទ័ព ក្នុងនោះ ទាហាន ៨០០ នាក់ នឹងធ្វើដំណើរពី អ៊ីតាលី ទៅកាន់ តំបន់បាល់ទិក ខណៈដែល យន្តហោះចម្បាំង F-៣៥ ចំនួន ៨ គ្រឿង នឹងចល័តពី អាល្លឺម៉ង់ ទៅកាន់តំបន់យុទ្ធសាស្ត្រជាច្រើននៅភាគខាងកើតរបស់ ណាតូ»។

ឧទ្ធម្ភាគចក្រវាយប្រហារ AH-៦៤ Apache ចំនួន ២០ គ្រឿង ដែលស្ថិតនៅក្នុង ប្រទេសអាល្លឺម៉ង់ នឹងហោះទៅកាន់ តំបន់បាល់ទិក ក្នុងគ្រាដែល ១២ គ្រឿងទៀត នឹងហោះពី ប្រទេសក្រិក ទៅកាន់ ប្រទេសប៉ូឡូញ។ លោក បៃដិន ក៏ប្រកាសថា អាម៉េរិក នឹងបន្តផ្គត់ផ្គង់អាវុធការពារខ្លួន ឱ្យទៅ អ៊ុយក្រែន ផងដែរ។

តំបន់ដែលកំពុងមានភាពតានតឹងខ្លាំង ជុំវិញបញ្ហាវិបត្តិអ៊ុយក្រែន

ភាពតានតឹងនៅជុំវិញ «វិបត្តិ អ៊ុយក្រែន» កាន់តែឡើងកម្ដៅខ្លាំង បន្ទាប់ពី ប្រធានាធិបតីប្រធានាធិបតីរុស្ស៊ី លោក វ្លាឌីមៀ ពូទីន កាលពីថ្ងៃទី ២១ កុម្ភៈ បានប្រកាសទទួលស្គាល់ឯករាជ្យរបស់តំបន់ Donetsk និង Luhansk នៅភាគខាងកើតរបស់ ប្រទេសអ៊ុយក្រែន និងបានចុះកិច្ចព្រមព្រៀងសហការគ្នាជាមួយមេដឹកនាំរបស់តំបន់ទាំងពីរនេះ។ កិច្ចព្រមព្រៀងនេះ អនុញ្ញាតឱ្យ រុស្ស៊ី មានសិទ្ធិកសាងមូលដ្ឋានទ័ពនៅ Donetsk និង Luhansk។ លោក ពូទីន ក៏បានបញ្ជាឱ្យក្រសួងការពារជាតិ បញ្ជូនទ័ពទៅតំបន់ទាំងនេះដើម្បី «រក្សាសន្តិភាព»៕

February 23, 2022

រុស្ស៊ី ផ្គុំកម្លាំង-អាវុធ ក្បែរព្រំដែនរបស់ បេឡារុស-អ៊ុយក្រែន ចម្ងាយ ៤០ គូឡូម៉ែត្រ

យោងតាមរូបភាពផ្កាយរណប យានប្រហែល ១០០ គ្រឿង និងតង់រាប់សិប ដែលសង្ស័យថាជារបស់ រុស្ស៊ី បានបង្ហាញខ្លួននៅក្នុងព្រលានយន្តហោះរបស់ បេឡារុស ដែលមានចម្ងាយប្រហែល ៤០ គីឡូម៉ែត្រ ពីព្រំដែនរបស់ អ៊ុយក្រែន។

រូបភាពផ្កាយរណបដែលត្រូវបានក្រុមហ៊ុន Maxar Technologies នៅ សហរដ្ឋអាម៉េរិក ប្រកាសកាលពីថ្ងៃទី ២២ កុម្ភៈ បង្ហាញថា មានការដាក់ពង្រាយទ័ពថ្មី អាចជារបស់ រុស្ស៊ី នៅឯព្រលានយន្តហោះក្បែរទីក្រុង Mazyr នៃ ប្រទេសបេឡារុស។ ទីតាំងនៃការផ្គុំកម្លាំងនេះស្ថិតនៅចម្ងាយ ៤០ គីឡូម៉ែត្រ ពីព្រំដែនរបស់ បេឡារុស-អ៊ុយក្រែន និងប្រហែល ១៧៧ គីឡូម៉ែត្រ ពី រដ្ឋធានីកៀវ។

និពន្ធនាយក Christoph Koettl របស់ NY Times ឱ្យដឹងថា កម្លាំងប្រដាប់អាវុធបង្ហាញខ្លួននៅតំបន់ខាងលើចាប់ពីពាក់កណ្ដាលខែកុម្ភៈ។ វីដេអូមួយដែលបង្ហោះកាលពីថ្ងៃទី ១៤ កុម្ភៈ បង្ហាញថា ក្រុមទាហានជញ្ជូនធុងប្រេងជាច្រើនទៅកាន់ព្រលានយន្តហោះ។ រូបភាពផ្កាយរណបដែលទើបតែបានបញ្ចេញកាលពីពេលថ្មីៗនេះ ក៏បញ្ជាក់ថា យានយន្តជាង ១០០ គ្រឿង និងតង់រាប់សិប បង្ហាញវត្តមាននៅទីតាំងនេះផងដែរ។

Maxar រាយការណ៍ថា ផ្កាយរណបថតបានមន្ទីរពេទ្យបណ្ដោះអាសន្នមួយ បង្ហាញខ្លួននៅទីតាំងបោះទ័ពរបស់អង្គភាពយោធាមួយរបស់ រុស្ស៊ី នៅតំបន់ភាគខាងលិច ជិតព្រំដែនជាមួយ អ៊ុយក្រែន។

រថភ្លើងដឹកសព្វាវុធធុនធ្ងន់ដូចជា រថក្រោះ និងកាំភ្លើងធំជាដើម ក៏បង្ហាញខ្លួននៅតំបន់ព្រំដែនភាគខាងលិចរបស់ រុស្ស៊ី ជាប់ជាមួយ អ៊ុយក្រែន និងតំបន់មួយចំនួនផ្សេងទៀត។

ព័ត៌មានខាងលើត្រូវបានលើកឡើងបន្ទាប់ពី ប្រធានាធិបតីប្រធានាធិបតីរុស្ស៊ី លោក វ្លាឌីមៀ ពូទីន កាលពីថ្ងៃទី ២១ កុម្ភៈ បានប្រកាសទទួលស្គាល់ឯករាជ្យរបស់តំបន់ Donetsk និង Luhansk នៅភាគខាងកើតរបស់ ប្រទេសអ៊ុយក្រែន និងបានចុះកិច្ចព្រមព្រៀងសហការគ្នាជាមួយមេដឹកនាំរបស់តំបន់ទាំងពីរនេះ។ កិច្ចព្រមព្រៀងនេះ អនុញ្ញាតឱ្យ រុស្ស៊ី មានសិទ្ធិកសាងមូលដ្ឋានទ័ពនៅ Donetsk និង Luhansk។ លោក ពូទីន ក៏បានបញ្ជាឱ្យក្រសួងការពារជាតិ បញ្ជូនទ័ពទៅតំបន់ទាំងនេះដើម្បី «រក្សាសន្តិភាព»។

នៅក្នុងកិច្ចប្រជុំបន្ទាន់របស់ ក្រុមប្រឹក្សាសន្តិសុខនៃ អង្គការសហប្រជាជាតិ កាលពីម្សិលមិញ សហរដ្ឋអាម៉េរិក និងបណ្ដាប្រទេសលោកខាងលិច បានថ្កោលទោសចំពោះសកម្មភាពរបស់ រុស្ស៊ី។ ចំណែក ទីក្រុងមូស្គូ វិញ ក៏បានចោទថា អ៊ុយក្រែន បំផ្លាញកិច្ចព្រមព្រៀង Minsk និងថា លោកខាងលិច រុញច្រាន អ៊ុយក្រែន ឱ្យធ្លាក់ទៅក្នុងទម្លោះប្រដាប់អាវុធ៕

February 23, 2022

Author: សឿន សំណាង