សឿន សំណាង - La Reine Media

សមាជិករបស់ សម្ព័ន្ធយោធាណាតូ (NATO) ជំទាស់រឿងដាក់ទណ្ឌកម្មលើវិស័យថាមពលរបស់ រុស្ស៊ី

ហុងគ្រី ដែលជាសមាជិករបស់ អង្គការណាតូ (NATO) ប្រកាសជំទាស់រាល់ការដាក់ទណ្ឌកម្មរបស់ សហភាពអឺរ៉ុប (EU) សំដៅលើក្រុមហ៊ុនប្រេងរបស់ រុស្ស៊ី ដោយសារបារម្ភអំពីការខាតបង់ផលប្រយោជន៍របស់ប្រទេសជាតិ។

«យើងនឹងមិនគាំទ្រចំពោះបទបញ្ជាដាក់ទណ្ឌកម្មណាមួយដែលអាចបង្កហានិភ័យចំពោះប្រភពផ្គត់ផ្គង់ថាមពលរបស់ ហុងគ្រី» រដ្ឋមន្ត្រីការបរទេសហុងគ្រី Peter Szijjarto បានប្រាប់អ្នកសារព័ត៌មានបន្ទាប់ពីបានជួបប្រជុំជាមួយសមាជិកសហភាពអឺរ៉ុប នៅ ព្រុចសែល ប្រទេសបែលហ្ស៊ិក កាលពីថ្ងៃទី ២១ មីនា។

លោករដ្ឋមន្ត្រីយល់ថា ការដាក់ទណ្ឌកម្មលើក្រុមហ៊ុនប្រេងរបស់ រុស្ស៊ី នឹងបង្កការខាតបង់ដល់ផលប្រយោជន៍ក្នុងវិស័យថាមពលរបស់ ហុងគ្រី ហើយ EU អាចនឹងមិនសម្រេចបាននូវកិច្ចព្រមព្រៀងស្ដីពីវិធានការដាក់ទណ្ឌកម្មលើប្រភពផ្គត់ផ្គង់ប្រេងពី រុស្ស៊ី។

«ប្រភពផ្គត់ផ្គង់ថាមពលមិនមែនជាបញ្ហារបស់ស្មារតី ឬឧត្តមគតិ ប៉ុន្តែវាគឺជាប្រការជាក់ស្ដែង» លោក Peter Szijjarto បញ្ជាក់។

រដ្ឋមន្ត្រីការបរទេសរបស់ ហុងគ្រី លោក Peter Szijjarto

ការយល់ឃើញរបស់លោក Peter Szijjarto ត្រូវបានលើកឡើងបន្ទាប់ពីមានព័ត៌មានថា EU នឹងបើកកិច្ចប្រជុំដើម្បីពិនិត្យអំពីបម្រាមគោចរទូទៅចំពោះវិស័យថាមពលរបស់ រុស្ស៊ី បើទោះនៅមានការខ្វែងគំនិតគ្នាក្រោយពីកិច្ចប្រជុំកំពូលនៅ ព្រុចសែល កាលពីម្សិលមិញ។

រដ្ឋមន្ត្រីការបរទេសអៀឡង់ Simon Coveney អះអាងថា ពិបាកក្នុងការដែលមិនដាក់ទណ្ឌកម្មទៅលើវិស័យថាមពលរបស់ រុស្ស៊ី ដោយសារតែយុទ្ធនាការយោធារបស់ ទីក្រុងមូស្គូ នៅ អ៊ុយក្រែន។ ក៏ប៉ុន្តែ ការអះអាងនេះត្រូវបាន ហុងគ្រី, អាល្លឺម៉ង់ និង ប៉ូឡូញ បដិសេធ។

បច្ចុប្បន្ន EU ទាំងមូល នាំចូលប្រេង ៤០% ពី រុស្ស៊ី។ រុស្ស៊ី ក៏ជាប្រទេសដែលនាំចេញប្រេងប្រមាណ ២៧% និងធ្យូងថ្ម ៤៦% ទៅឱ្យ EU ផងដែរ។ ពាណិជ្ជកម្មទ្វេភាគីរវាង រុស្ស៊ី និង សហភាពអឺរ៉ុប ក្នុងវិស័យថាមពល មានតម្លៃរាប់សិបពាន់លានដុល្លារអាម៉េរិក ក្នុង ១ ឆ្នាំ៕

March 22, 2022

ដាក់ទោសមន្ត្រី ១១ រូប ព្រោះតែបានបណ្ដោយឱ្យគ្រួសារមួយ អាចបង្កើតកូនបានរហូតដល់ ១៥ នាក់

(ប្រទេសចិន)-មន្ត្រីនៅខេត្ត Guangxi បានដាក់ពិន័យលើមន្ត្រីថ្នាក់ស្រុក ១១ រូប ដោយសារខ្វះការទទួលខុសត្រូវ បណ្ដោយឱ្យប្ដីប្រពន្ធមួយគូ បង្កើតកូនបានរហូតដល់ ១៥ នាក់ ក្នុងរយៈពេល ២ ទសវត្សរ៍។

លោកតា Liang Er អាយុ ៧៦ ឆ្នាំ និងលោកអ្នកស្រី Lu Honglan អាយុ ៤៦ ឆ្នាំ នៅក្នុងភូមិក្រីក្រមួយក្នុងស្រុក Rong នៃខេត្ត Guangxi បង្កើតបានកូនប្រុស ៤ នាក់ និងកូនស្រី ១១ នាក់ ចាប់ពីឆ្នាំ ១៩៩៥ ដល់ ២០១៦ នេះបើតាមការឱ្យដឹងពីអាជ្ញាធរខេត្ត Guangxi កាលពីថ្ងៃទី ២០ មីនា ២០២២។

នោះគឺជាអំឡុងពេលដែលអាជ្ញាធរចិន អនុវត្តគោលនយោបាយកូនមួយយ៉ាងតឹងរ៉ឹង ហើយក្រោយមកក៏បានបន្ធូរបន្ថយ ដោយប្ដីប្រពន្ធ ១ គូ អាចបង្កើតកូនបាន ២នាក់។ បច្ចុប្បន្ន ប្រទេសចិន បានអនុញ្ញាតឱ្យគ្រួសារ ១ គ្រួ អាចបង្កើតកូនបាន ៣ នាក់ នៅក្នុងគ្រាដែលអត្រាបង្កើតកូនកំពុងថយចុះ និងអត្រាមនុស្សចាស់កើនឡើងខ្ពស់។

ក្រុមមន្ត្រីថ្នាក់ខេត្តរបស់ Guangxi សម្រេចចិត្តធ្វើការទិតៀន និងព្រមានចំពោះមន្ត្រីថ្នាក់ស្រុក ១១ រូប ដែលគ្រប់គ្រងតំបន់រស់នៅរបស់គ្រួសារខាងលើ ដោយយល់ថា ពួកគេបានបង្ហាញអំពីការមិនយកចិត្តទុកដាក់ មិនមានការទទួលខុសត្រូវនៅពេលគ្រប់គ្រងលិខិតស្នាមអាពាហ៍ពិពាហ៍ និងគ្រប់គ្រងប្រជាជនក្នុងករណីរបស់គ្រួសារលោកតា Liang។

លោកតា Liang និង អ្នកស្រី Lu មិនបានចុះសំបុត្រអាពាហ៍ពិពាហ៍នោះទេ ប៉ុន្តែ បានរស់នៅ និងមានកូនជាមួយគ្នា។ រឿងរ៉ាវនេះត្រូវបានបើកកកាយបន្ទាប់ពីមានការសង្ស័យថា អ្នកស្រី Lu ត្រូវបានចាប់បង្ខំឱ្យរៀបការដោយមិនស្របច្បាប់។

«ខ្ញុំបានរំលោភលើគោលនយោបាយផែនការគ្រួសារ ប៉ុន្តែ អាជ្ញាធរមិនបានបោះបង់ចោលខ្ញុំទេ។ សមាជិកទាំងអស់របស់គ្រួសារ បច្ចុប្បន្នទទួលបានជំនួយផ្នែកអប់រំ និងប្រាក់សម្រាប់គ្រួសារក្រីក្រ» លោកតា Liang បានប្រាប់សារព័ត៌មានកាលពីឆ្នាំ ២០១៨។

បច្ចុប្បន្ន កូនៗរបស់លោកតា Liang ធំឡើងដោយមានសុខភាពល្អ មានលិខិតស្នាមស្របច្បាប់ ហើយ ៤ នាក់ ក្នុងចំណោមកូនទាំង ១៥ នាក់ មានការងារធ្វើ ចំណែកក្រៅពីនេះ កំពុងនៅសិក្សា៕

March 22, 2022

មហាសំណាង ព្រោះតែមិនបានស្លាប់នៅក្នុងហេតុការណ៍ធ្លាក់យន្តហោះនៅ ប្រទេសចិន

(ប្រទេសចិន)-Huang អាយុ ២៤ ឆ្នាំ គ្រោងនឹងឡើងជើងហោះហើរ MU៥៧៣៥ ពី Kunming ទៅកាន់ Guangzhou ប៉ុន្តែ មិនមានវត្តមានក្នុងជើងហោះហើរនេះ ដោយសារជើងដំបូងត្រូវបានលុបចោល។

Huang រស់នៅក្នុងតំបន់ Tengchong នាទីក្រុង Baoshan ក្នុងខេត្ត Yunnan ប្រទេសចិន កាលពីថ្ងៃទី ២១ មីនា បានធ្វើឱ្យមានការចាប់អារម្មណ៍ខ្លាំង នៅពេលចែករំលែកអំពីរឿងរ៉ាវប្រកបដោយសំណាងមហាល្អ ព្រោះមិនបានឡើងជិះយន្តហោះដែលមានលេខសម្គាល់ MU៥៧៣៥ របស់ក្រុមហ៊ុនអាកាសចរណ៍ចិន China Eastern Airlines ដែលបានធ្លាក់នៅក្នុងខេត្ត Quangxi មុននោះ។

Huang ឱ្យដឹងថា គាត់មានគម្រោងឡើងជិះយន្តហោះនោះពី Tengchong ទៅកាន់ Kunming របស់ខេត្ត Yunnan ហើយក្រោយមកនឹងហោះទៅកាន់ Guangzhou ជាកន្លែងធ្វើការរបស់គាត់ ដោយជើងហោះហើរ MU៥៧៣។ ប៉ុន្តែ ដោយសារអាកាសធាតុមិនអំណោយផល ជើងហោះហើរពី Tengchong របស់ Huang ក៏ត្រូវបានលុបចោល។

យន្តហោះរបស់ក្រុមហ៊ុនអាកាសចរណ៍ចិន China Eastern Airlines

«ដោយសារតែជើងហោះហើរដំបូងត្រូវបានលុបចោល ដូច្នេះ ខ្ញុំក៏ត្រូវលុបចោលជើងហោះហើរបន្ទាប់ និងមិនបានឡើងជិះយន្តហោះនេះ» Huang បានចែករំលែកក្នុងវីដេអូដែលបានបង្ហោះលើបណ្ដាញសង្គមកាលពីម្សិលមិញ។

យន្តហោះ Boeing ៧៣៧-៨០០ របស់ China Eastern ដឹកអ្នកដំណើរ ១៣២ នាក់ និងបុគ្គលិក ៩ នាក់ ហោះពីព្រលានយន្តហោះអន្តរជាតិ Kunming Changshui នៅវេលាម៉ោង ១៣ និង ១៥ នាទី ហើយគ្រោងនឹងទៅដល់ទីក្រុង Guangzhou នៃខេត្ត Guangdong ម៉ោង ១៥ និង ០៧ នាទី។

យន្តហោះនេះ បានធ្លាក់ទៅលើខ្នងភ្នំមួយនៃទីក្រុង Wuzhou ក្នុងតំបន់ស្វយ័តជនជាតិ Zhuang នៅ Guangxi ភាគខាងត្បូងប្រទេសចិន កាលពីថ្ងៃទី ២១ មីនា។

Huang រស់នៅក្នុងតំបន់ Tengchong នាទីក្រុង Baoshan ក្នុងខេត្ត Yunnan ប្រទេសចិន

ទិន្នន័យពី Flighttradar24 បង្ហាញថា យន្តហោះនេះកំពុងហោះលើកម្ពស់ជិត ៩,០០០ ម៉ែត្រ នៅវេលាម៉ោងប្រហែល ១៤ និង ២០ នាទី ថ្ងៃទី ២១ មីនា ក៏ស្រាប់តែចាប់ផ្ដើមបន្ទាបកម្ពស់ភ្លាមៗ ក្រោយការហោះហើរបានជាង ១ ម៉ោង។ បន្ទាប់ពីហោះងើបឡើងនៅលើកម្ពស់ជាង ២,០០០ ម៉ែត្រ យន្តហោះក៏បន្តដាំក្បាលចុះក្នុងល្បឿនជិត ៦០០ គីឡូម៉ែត្រ/ម៉ោង ក្នុងរយៈប៉ុន្មានវិនាទីចុងក្រោយ៕

March 22, 2022

ភពពុធ អាចមានត្បូងពេជ្រប្រមាណ ១៦,០០០,០០០,០០០,០០០,០០០ តោន

លទ្ធផលនៃការសិក្សាស្រាវជ្រាវថ្មីមួយដែលត្រូវបានប្រកាសនៅឯវេទិកាវិទ្យាសាស្ត្រស្ដីពី ភព និងព្រះចន្ទ (LPSC) នៅ Houston, Texas សហរដ្ឋអាម៉េរិក កាលពីសប្ដាហ៍កន្លងបានបង្ហាញថា ភពពុធ (Mercury) អាចពោរពេញដោយត្បូងពេជ្រ។

ភពពុធ ត្រូវបានគ្របដណ្ដប់ដោយស្រទាប់ graphite ជាកាបូនដើមមួយប្រភេទដែលអាចប្រែប្រួលទៅជាត្បូងពេជ្រ បន្ទាប់ពីមានការប៉ះទង្គិចជាមួយអាចម៍ផ្កាយ កូនភព និងផ្កាយដុះកន្ទុយ។ ក្រុមអ្នកវិទ្យាសាស្ត្របានដឹងថា ភពពុធ ទទួលរងឥទ្ធិពលធ្ងន់ធ្ងរពីយុគសម័យភ្លៀងអាច៍ផ្កាយដំណាក់កាលចុងក្រោយដែលហៅថា Late Heavy Bombardment កាលពី ប្រព័ន្ធព្រះអាទិត្យ ទើបកកើត អំឡុងពី ៤.១ ដល់ ៣.៨ ពាន់លានឆ្នាំមុន នៅពេលមាត់រណ្ដៅធំៗនៅលើ ព្រះចន្ទ បង្ហាញខ្លួន។ ប៉ុន្តែ ភពពុធ មានមាត់រណ្ដៅធំជាងឆ្ងាយ ធៀបនឹងព្រះចន្ទ នាំឱ្យមានករណីប៉ះទង្គិច បង្កើតបានជាត្បូងពេជ្យ។

ភពពុធ ចាប់ផ្ដើមមានសម្បក graphite ស្ដើង បន្ទាប់ពីវាចុះត្រជាក់ នេះបើតាម Kevin Cannon សាស្ត្រាចារ្យរងផ្នែកភូគព្ភសាស្ត្រ និងធនធានអវកាស នៃសាលារ៉ែ Colorado។ អាចម៍ផ្កាយ និងផ្កាយដុះកន្ទុយ ហោះមកបុកស្រទាប់សម្បក graphite របស់ ភពពុធ ក្នុងល្បឿនរាប់សិបគីឡូម៉ែត្រ/វិនាទី បង្កើតបានជាសម្ពាធខ្ពស់គ្រប់គ្រាន់ដែលអាចធ្វើឱ្យ graphite ប្រែក្លាយទៅជាត្បូងពេជ្យ។

ក៏ប៉ុន្តែ ដោយសារតែស្ថិតនៅក្បែរស្រទាប់លើរបស់ផ្ទៃនៃ ភពពុធ ដូច្នេះ ត្បូងនៅទីនោះ អាចខុសប្លែកពីត្បូងពេជ្រដែលមនុស្សយកមកធ្វើជាគ្រឿងអលង្ការ។ វានឹងដូចទៅនឹងត្បូងពេជ្រល្អក់តូចៗដែលគេប្រើក្នុងការកាត់ ឬឈូស នៅក្នុងវិស័យឧស្សាហកម្ម។

ការពិសោធដោយប្រព័ន្ធកុំព្យូព័របង្ហាញថា ស្រទាប់ graphite របស់ ភពពុធ មានកម្រាស់ ៣០០ ម៉ែត្រ ដូច្នេះ វានឹងអាចមានត្បូងពេជ្រចំនួន ១៦,០០០,០០០,០០០,០០០,០០០ (១៦ ក្វ័ទ្រីលាន-Quadrillion) ឬ ១៦ កោដិកោដិ តោន ច្រើនជាង ១៦ ដង ធៀបនឹងត្បូងពេជ្រលើ ផែនដី ដែលត្រូវបានគណនាឃើញ៕

March 22, 2022

អាម៉េរិក ថា ឥណ្ឌា ទន់ខ្សោយ នៅចំពោះមុខ រុស្ស៊ី

ប្រធានាធិបតីអាម៉េរិក លោក ចូ បៃដិន យល់ថា ឥណ្ឌា គឺជាប្រទេសតែមួយគត់ក្នុងចំណោមសម្ព័ន្ធមិត្តរបស់ ទីក្រុងវ៉ាស៊ីងតោន ដែលបានបង្ហាញភាពទន់ខ្សោយនៅពេលប្រឈមមុខនឹង រុស្ស៊ី។

កាលពីថ្ងៃទី ២១ មីនា ប្រធានាធិបតី បៃដិន បានលើកសរសើរចំពោះសម្ព័ន្ធមិត្តដែលដឹកនាំដោយ សហរដ្ឋអាម៉េរិក រួមមាន ណាតូ (ណាតូ), សហភាពអឺរ៉ុប (EU) និងដៃគូសហការដទៃទៀត ដោយសារតែមានសាមគ្គីភាពក្នុងការប្រឆាំងនឹងយុទ្ធនាការយោធារបស់ រុស្ស៊ី នៅ អ៊ុយក្រែន។

សហរដ្ឋអាម៉េរិក រួមនឹងបណ្ដាសម្ព័ន្ធមិត្ត បានដាក់ទណ្ឌកម្មជាបន្តបន្ទាប់មិនធ្លាប់មាន សំដៅបង្កកទ្រព្យ ពាណិជ្ជកម្មអន្តរជាតិ និងលទ្ធភាពនៃការប្រើប្រាស់ផលិតផលបច្ចេកវិទ្យាខ្ពស់របស់ រុស្ស៊ី។

ក៏ប៉ុន្តែ នៅពេលនិយាយដល់ សម្ព័ន្ធមិត្តចតុភាគី (QUAD) ដែលរួមមាន អាម៉េរិក, ឥណ្ឌា, ជប៉ុន និង អូស្ត្រាលី ប្រធានាធិបតី បៃដិន យល់ថា ទីក្រុងញូវដែលី មានប្រតិកម្មមិនខ្លាំងក្លាដូចទៅនឹងបណ្ដាសមាជិកដទៃ នៅពេលប្រឈមមុខនឹង រុស្ស៊ី ក្នុងបញ្ហាមួយចំនួន។

ទាក់ទិននឹងការយល់ឃើញរបស់ ប្រធានាធិបតីអាម៉េរិក រដ្ឋាភិបាលឥណ្ឌា មិនទាន់បញ្ចេញមតិប្រតិកម្មអ្វីនៅឡើយ។

ការលើកឡើងរបស់លោក បៃដិន បានកើតឡើងបន្ទាប់ពីក្រុមហ៊ុនប្រេងរបស់ ឥណ្ឌា កាលពីថ្ងៃទី ១៨ មីនា បានបញ្ជាក់ថា បានទិញប្រេងឆៅ ៣ លានធុង ពី រុស្ស៊ី ដើម្បីធានាចំពោះតម្រូវការប្រើប្រាស់ប្រេងសាំងក្នុងស្រុក ហើយថា នឹងមានការបញ្ជាទិញប្រេងជាច្រើនផ្សេងទៀត បើទោះមានប្រតិកម្មមិនល្អពីលោកខាងលិច។

March 22, 2022

អ៊ុយក្រែន ប្ដេជ្ញាមិនទទួលយកឱសានវាទបង្ខំឱ្យចុះចាញ់នៅចំពោះមុខ កងទ័ពរុស្ស៊ី

ប្រធានាធិបតីអ៊ុយក្រែន លោក ហ្សេឡែនស្គី បានប្រកាសថា មិនទទួលយកឱសានវាទស្នើឱ្យចុះចាញ់ជាដាច់ខាត និងប្ដេជ្ញាមិនបោះបង់បណ្ដាទីក្រុងដូចជា ម៉ារីប៉ូល (Mariupol), ខាកូវ (Khaarkov) ឬ រដ្ឋធានីកៀវ របស់ប្រទេសនេះ។

«យើងបានទទួលលិខិតដាក់ឱសានវាទដោយមានការស្នើជាច្រើន ក្នុងនោះមានទាំងការបង្ខំតាមរបៀប «ចូរធ្វើដូច្នេះ ហើយសង្គ្រាមនឹងត្រូវបានបញ្ចប់»។ អ៊ុយក្រែន មិនអាចធ្វើតាមឱសានវាទនោះ» ប្រធានាធិបតីអ៊ុយក្រែន វ៉ូឡូឌីមៀ ហ្សេឡែនស្គី ថ្លែងកាលពីថ្ងៃទី ២១ មីនាដូច្នេះ។

លោក ហ្សេឡែនស្គី បន្តថា រាប់កិច្ចព្រមព្រៀងសន្តិភាពជាមួយ រុស្ស៊ី ត្រូវតែឆ្លងកាត់ការធ្វើប្រជាមតិនៅ អ៊ុយក្រែន។ «ប្រជាជននឹងត្រូវតែមានសំឡេងនៅក្នុងកិច្ចព្រមព្រៀងមួយចំនួន» លោកបញ្ជាក់។

កងទ័ពរុស្ស៊ី កាលពីថ្ងៃទី ២១ មីនា បានដាក់ឱសានវាទស្នើឱ្យកងកម្លាំងការពារទីក្រុងម៉ារីប៉ូល ទម្លាក់អាវុធចុះចាញ់ ប៉ុន្តែ ត្រូវបានបដិសេធដោយ ឧបនាយករដ្ឋមន្ត្រីអ៊ុយក្រែន លោកស្រី Iryna Vereshchuk។ លោក ហ្សេឡែនស្គី ថ្លែងបន្ថែមថា អ៊ុយក្រែន ក៏នឹងមិនបោះបង់ទីក្រុងណាមួយដែលកំពុងត្រូវបានឡោមព័ទ្ធដោយ កងទ័ពរុស្ស៊ី ក្នុងនោះមាន រដ្ឋធានីកៀវ ឬ ទីក្រុងខាកូវ ជាដើម។

រុស្ស៊ី និង អ៊ុយក្រែន បានបើកកិច្ចចរចាច្រើនលើកមកហើយ បន្ទាប់ពីសង្គ្រាមបានផ្ទុះឡើង ប៉ុន្តែ មិនទាន់ទទួលបានផ្លែផ្កាអ្វីនៅឡើយ ទាក់ទងនឹងបទឈប់បាញ់។

March 22, 2022

អ្នកបើកបរយន្តហោះដែលបានធ្លាក់នៅ ប្រទេសចិន ម្សិលមិញ ទំនងជាបាត់បង់ស្មារតីមុនពេលកើតហេតុចុងក្រោយ

យន្តហោះដឹកអ្នកដំណើរ ១៣២ និងបុគ្គលិកហោះហើរ ៩ នាក់ របស់ China Eastern Airlines បានធ្លាក់ដោយដាំក្បាលចុះត្រង់ពីលើក្នុងល្បឿនរាប់រយគីឡូម៉ែត្រ/ម៉ោង អាចបណ្ដាលឱ្យអ្នកបើកបរបាត់បង់ស្មារតី មុនពេលដាំក្បាលដល់ដី នេះបើតាមអ្នកជំនាញ។

វីដេអូស្ដីពីទិដ្ឋភាពចុងក្រោយរបស់ជើងហោះហើរ MU៥៧៣៥ នៃក្រុមហ៊ុនអាកាសចរណ៍ China Eastern Airlines ដែលត្រូវបានបង្ហោះលើបណ្ដាញសង្គមចិន ក្រោយពីយន្តហោះបានធ្លាក់បុកខ្នងភ្នំក្នុងខេត្ត Guangxi កាលពីថ្ងៃទី ២១ មីនា បង្ហាញថា យន្តហោះ Boeing ៧៣៧-៨០០ នេះ ធ្លាក់ចុះដោយដាំក្បាលត្រង់ពីលើមេឃ។

អ្នកជំនាញផ្នែកអាកាសចរណ៍អង់គ្លេស Sally Gethin យល់ថា នៅពេលយន្តហោះធ្លាក់ដោយដាំក្បាលចុះត្រង់ពីលើបែបនេះក្នុងរយៈពេលជិត ២ នាទី កម្លាំងទំនាញដ៏ខ្លាំងនឹងធ្វើឱ្យឈាមច្រាលទៅកាន់ខួរក្បាលរបស់អ្នកនៅលើយន្តហោះ។

កម្លាំងទំនាញនោះ នឹងធ្វើឱ្យបាត់បង់ស្មារតី មិនអាចបញ្ជាលើយន្តហោះបាន។ ប៉ុន្តែ ទិន្នន័យនៃការហោះហើរបង្ហាញថា ក្នុងពេលធ្លាក់ដាំក្បាលចុះ យន្តហោះនេះបានហោះងើបក្បាលឡើងប្រហែលពី ១០ ទៅ ១៥ វិនាទី បង្ហាញថា អ្នកបើកបរបានដឹងខ្លួន និងព្យាយាមជួយសង្គ្រោះយន្តហោះ តែត្រូវបរាជ័យ។

ទិន្នន័យពី Flighttradar24 បង្ហាញថា យន្តហោះនេះកំពុងហោះលើកម្ពស់ជិត ៩,០០០ ម៉ែត្រ នៅវេលាម៉ោងប្រហែល ១៤ និង ២០ នាទី ថ្ងៃទី ២១ មីនា ក៏ស្រាប់តែចាប់ផ្ដើមបន្ទាបកម្ពស់ភ្លាមៗ ក្រោយការហោះហើរបានជាង ១ ម៉ោង។ បន្ទាប់ពីហោះងើបឡើងនៅលើកម្ពស់ជាង ២,០០០ ម៉ែត្រ យន្តហោះក៏បន្តដាំក្បាលចុះក្នុងល្បឿនជិត ៦០០ គីឡូម៉ែត្រ/ម៉ោង ក្នុងរយៈប៉ុន្មានវិនាទីចុងក្រោយ។

ក្រុមសង្គ្រោះបន្ទាន់រាប់ពាន់នាក់ត្រូវបានបញ្ជូនទៅកាន់កន្លែងកើតហេតុ ប៉ុន្តែ គ្មានអ្នកណាម្នាក់ក្នុងចំណោមអ្នកនៅលើយន្តហោះ ត្រូវបានគេជឿថា នៅមានជីវិតនោះឡើយ។ នេះគឺជាគ្រោះថ្នាក់ដ៏មហន្តរាយបំផុតនៅ ប្រទេសចិន ក្នុងអំឡុងរាប់ទសវត្សរ៍កន្លងមកនេះ។

March 22, 2022

(វីដេអូ)-យន្តហោះដឹកអ្នកដំណើរ ១៣២ នាក់ ដែលធ្លាក់នៅ ប្រទេសចិន ម្សិលមិញ ប្រហែលគ្មានអ្នកណាមួយនៅមានជីវិត!

យន្តហោះ Boeing ៧៣៧ របស់ China Eastern ហាក់ដាំក្បាលចុះដីទៅតាមទិសត្រង់ពីលើ និងផ្ទុះបែកបាក់ខ្ទេចខ្ទីជាបំណែកតូចៗនៅលើភ្នំក្នុងតំបន់ស្វយ័តនៃជនជាតិ Zhuang នៅខេត្ត Guangxi ខាងលិច។

យន្តហោះ Boeing ៧៣៧ របស់ក្រុមហ៊ុនអាកាសចរណ៍ China Eastern ដឹកអ្នកដំណើរ ១៣២ នាក់ និងបុគ្គលិក ៩ នាក់ បានធ្លាក់ទៅលើខ្នងភ្នំមួយនៃទីក្រុង Wuzhou ក្នុងតំបន់ស្វយ័តជនជាតិ Zhuang នៅ Guangxi ភាគខាងត្បូងប្រទេសចិន កាលពីថ្ងៃទី ២១ មីនា។

សក្សីនៅក្បែរកន្លែងកើតហេតុបានឱ្យដឹងថា យន្តហោះបានដាំក្បាលចុះ សំដៅលើខ្នងភ្នំមួយដែលមិនមានមនុស្សរស់នៅ។ «យន្តហោះនៅមានសភាពធម្មតាមុននឹងបានធ្លាក់។ វាធ្លាក់ចុះតែប៉ុន្មានវិនាទីប៉ុណ្ណោះ» សាក្សីរៀបរាប់។

រុក្ខជាតិនៅលើខ្នងភ្នំបានឆាប់ឆេះ បន្ទាប់ពីយន្តហោះបានធ្លាក់។ ដោយសារកន្លែងកើតហេតុមានឧបសគ្គច្រើន រថយន្តពន្លត់អគ្គិភ័យមិនអាចឡើងដល់ ដូច្នេះ កងកម្លាំងសង្គ្រោះក៏ត្រូវដើរដោយថ្នើរជើង។

ប្រជាជនដែលរស់នៅក្បែរនោះប្រហែល ១០ គីឡូម៉ែត្រ បានប្រាប់ថា ឮសំឡេងផ្ទុះខ្លាំងនៅវេលាម៉ោងជាង ១។

បុគ្គលិកពន្លត់អគ្គិភ័យ ១១៧ នាក់ រួមនឹងរថយន្តពន្លត់អគ្គិភ័យ ២៣ គ្រឿងនៅក្នុងតំបន់ ត្រូវបានបញ្ជូនទៅកាន់កន្លែងកើតហេតុ។ បុគ្គលិកពន្លត់អគ្គិភ័យជាង ៥០០ នាក់ មកពីតំបន់នានារបស់ ខេត្ត Guangxi ក៏ត្រូវបានបញ្ជូនទៅជួយសង្គ្រោះ។ ខេត្ត Guangdong ក៏បានបញ្ជូនបុគ្គលិកពន្លត់អគ្គិភ័យជាង ៥០០ នាក់ រួមនឹងរថយន្តជួយសង្គ្រោះ ៩៧ គ្រឿង ទៅជួយស្វែងរកជនរងគ្រោះ។

«យន្តហោះបានផ្ទុះបែកបាក់ខ្ទេចខ្ទីជាបំណែកតូចៗ និងប៉ើងខ្ចាយទៅគ្រប់កន្លែង។ ខ្ញុំមិនបានឃើញអ្នកណាម្នាក់នៅមានជីវិតឡើយ» បុគ្គលិកផ្នែកបច្ចេកទេសរបស់ក្រុមហ៊ុនទូរគមនាគមន៍នៅក្នុងខេត្ត Guangxi ដែលពេលនោះកំពុងស្ថិតនៅក្បែរកន្លែងកើតហេតុ ឱ្យដឹងដូច្នេះ។

ក្រុមហ៊ុន China Eastern Airlines ឱ្យដឹងថា មូលហេតុនៃគ្រោះថ្នាក់នេះនឹងត្រូវបានស្រាវជ្រាវលម្អិត ប៉ុន្តែ មិនទាន់បញ្ជាក់អំពីចំនួនអ្នកស្លាប់ និងរងរបួសនៅឡើយ។ តំណែងរបស់ក្រុមហ៊ុន Boeing ប្រចាំ ប្រទេសចិន ឱ្យដឹងថា កំពុងញាប់ដៃញាប់ជើង ក្នុងការប្រមូលទិន្នន័យដើម្បីជួយដល់ការស្រាវជ្រាវ។

March 22, 2022

អង់គ្លេស សហរដ្ឋអាម៉េរិក ចង់ដំឡើងពន្ធចំពោះបណ្ដាក្រុមហ៊ុនប្រេង ដើម្បីជួយដល់អ្នករងផលប៉ះពាល់ពីបញ្ហាប្រេងឡើងថ្លៃ

នៅពេលតម្លៃប្រេងឆៅឡើងខ្ពស់ ប្រាក់ចំណេញរបស់បណ្ដាក្រុមហ៊ុនដូចជា BP ឬ ExxonMobil ជាដើម អាចកើនឡើងរាប់ពាន់លានដុល្លារក្នុងឆ្នាំនេះ។

ក្រុមហ៊ុន ExxonMobil រកបានប្រាក់ចំណេញ ២៣ ពាន់លានដុល្លារក្នុងឆ្នាំ ២០២១ ខ្ពស់បំផុតក្នុងរយៈពេល ៧ ឆ្នាំកន្លងមកនេះ។ នៅពេលតម្លៃប្រេងឆៅឡើងខ្ពស់ដូចបច្ចុប្បន្ន ក្រុមហ៊ុននេះត្រូវបានព្យាករថា នឹងរកបានប្រាក់ចំណេញ ៣៣ ពាន់លានដុល្លារក្នុងឆ្នាំ ២០២២។ ចំណែក BP ដែលរកបានប្រាក់ចំណេញ ១២.៨ ពាន់លានដុល្លារកាលពីឆ្នាំកន្លង នឹងអាចរកបាន ១៥.៦ ពាន់លានដុល្លារនាឆ្នាំនេះ។

អត្រាចំណេញដ៏សម្បើមនេះកំពុងនាំឱ្យក្រុមមន្ត្រីអាម៉េរិក និង អឺរ៉ុប ពិភាក្សាអំពីការដំឡើងពន្ធមិនធម្មតាចំពោះក្រុមហ៊ុនប្រេងទាំងនោះ។ ប្រាក់ដែលបានពីការដំឡើងពន្ធនេះនឹងត្រូវបានប្រើប្រាស់សម្រាប់ផ្ដល់ជំនួយផ្នែកហិរញ្ញវត្ថុផ្ទាល់ដល់អ្នកប្រើប្រាស់ដែលកំពុងជួបការលំបាកដោយសារប្រេងឡើងថ្លៃខ្ពស់។

ស្ថានីយប្រេងសាំងមួយកន្លែងនៅ រុស្ស៊ី របស់ក្រុមហ៊ុន BP

កន្លងមក ទាំង អាម៉េរិក ទាំង អង់គ្លេស សុទ្ធតែធ្លាប់បានដំឡើងពន្ធមិនធម្មតាបែបនេះ ដោយមានការគាំទ្រច្រើនពីសភា។ ក៏ប៉ុន្តែ ក្នុងករណីបច្ចុប្បន្ន ការគាំទ្រហាក់មានសំឡេងតែពីក្រុមមួយតូចប៉ុណ្ណោះ មិនថា នៅ សហរដ្ឋអាម៉េរិក មិនថា នៅ អង់គ្លេស។

March 21, 2022

អង្គការថាមពលអន្តរជាតិ ផ្ដល់អនុសាសន៍សម្រាប់ទប់ទល់នឹងស្ថានការណ៍ប្រេងឡើងថ្លៃ៖ ចូរធ្វើការពីផ្ទះ និងបើកបរយឺតជាងមុន ដើម្បីសំច័យប្រេងសាំង

ទាំង សហរដ្ឋអាម៉េរិក ទាំង អឺរ៉ុប សុទ្ធតែមិនអាចស្មានដល់អំពីបញ្ហាធ្ងន់ធ្ងរដែលបាន និងកំពុងកើតឡើងដោយសារការដាច់ចង្វាក់ផ្គត់ផ្គង់ប្រេងដោយសារការដាក់ទណ្ឌកម្មលើ រុស្ស៊ី។

សារព័ត៌មាន CNN បានឱ្យដឹងថា អង្គការថាមពលអន្តរជាតិ (International Energy Agency-IEA) ថ្មីៗនេះបានស្នើឱ្យបណ្ដាប្រទេសកាត់បន្ថយការប្រើប្រាស់ប្រេងសាំង នៅក្នុងគ្រាដែលសង្គ្រាមរវាង រុស្ស៊ី និង អ៊ុយក្រែន បាន និងកំពុងកាត់ផ្ដាច់ប្រភពផ្គត់ផ្គង់។

ជាក់ស្ដែង IEA បានលើកសំណើផែនការ ១០ ចំណុចចម្បង ដែលក្នុងនោះមាន ៣ ចំណុចគួរឱ្យចាប់អារម្មណ៍ រួមមាន ការបន្ថយល្បឿនយ៉ាងហោច ១០ គីឡូម៉ែត្រ/ម៉ោង សម្រាប់ល្បឿនយឺតបំផុតលើផ្លូវល្បឿនលឿន, ការស្នើឱ្យធ្វើការពីផ្ទះយ៉ាងតិច ៣ ថ្ងៃ/សប្ដាហ៍ និងការហាមរថយន្តចូលក្នុងទីក្រុងក្នុងថ្ងៃអាទិត្យ។

យោងតាម IEA សំណើទាំងឡាយនោះ បើសិនត្រូវបានបណ្ដាប្រទេសលោកខាងលិចដូចជា អាម៉េរិក និង អឺរ៉ុប អនុវត្ត នោះវាអាចជួយកាត់បន្ថយបាន ១/៣ នៃការពឹងផ្អែកលើបរិមាណប្រេងរបស់ រុស្ស៊ី នាបច្ចុប្បន្ន។

ទន្ទឹមនឹងនេះ IEA ក៏បានស្នើឱ្យបង្កើនការអភិវឌ្ឍកម្មវិធីហៅរថយន្ត ជំរុញវិស័យរថភ្លើងល្បឿនលឿន នាវារត់ពេលយប់ កាត់បន្ថយសកម្មភាពក្នុងវិស័យអាកាសចរណ៍ បន្ថយជើងហោះហើរពាណិជ្ជកម្ម ពង្រីក និងបង្កើនចំនួនផ្លូវក្នុងក្រុងសម្រាប់ថ្មើរជើង ផ្លូវសម្រាប់កង់ ឬបណ្ដាមធ្យោបាយសាធារណៈដទៃទៀត។

ជាមួយនឹងវិធានការខាងលើ សហរដ្ឋអាម៉េរិក និង អឺរ៉ុប នឹងអាចសំច័យប្រេងសាំងបានប្រហែល ២.៧ លានធុង/ថ្ងៃ ក្នុងរយៈពេល ៤ ខែខាងមុខ ដែលនេះស្មើនឹងបរិមាណប្រេងសាំងរបស់រថយន្តទំនើបទាំងអស់នៅ ប្រទេសចិន។

ទន្ទឹមនឹងនេះ បើសិនជាបណ្ដាប្រទេសដែលប្រើប្រាស់ប្រេងសាំងច្រើនដូចជា ចិន និង ឥណ្ឌា ធ្វើតាមអនុសាសន៍ខាងលើ នោះស្ថានការណ៍នឹងកាន់តែល្អប្រសើរជាងនេះទៅទៀត៕

March 21, 2022

Author: សឿន សំណាង