សឿន សំណាង - La Reine Media

សង្គ្រាមនៅ អ៊ុយក្រែន ថ្ងៃទី ៤៤៖ ចំណតរថភ្លើងត្រូវគ្រាប់រ៉ុក្កែត ធ្វើឱ្យមនុស្សរាប់សិបនាក់ត្រូវស្លាប់

អាជ្ញាធរអ៊ុយក្រែន ប្រកាសថា ចំណតរថភ្លើង Kramatorsk បានរងគ្រាប់រ៉ុក្កែត បណ្ដាលឱ្យមានមនុស្សស្លាប់ ៥០ នាក់ ប៉ុន្តែ រុស្ស៊ី ប្រកាសថា មិនមែនជាអំពើរបស់ខ្លួន។

ប្រធានាធិបតីអ៊ុយក្រែន លោក ហ្សេឡែនស្គី កាលពីថ្ងៃទី ៨ មេសា បានចោទថា កងកម្លាំងរុស្ស៊ី បានបាញ់កាំជ្រួចផ្លោង Tochka-U ចំនួន ២ គ្រាប់ សំដៅលើចំណតរថភ្លើង Kramatorsk នៅទីក្រុង Kramatorsk របស់ខេត្ត Donetsk ភាគខាងកើតនៃ ប្រទេសអ៊ុយក្រែន។

ក្រុមមន្ត្រីក្នុងតំបន់ខាងលើឱ្យដឹងថា មនុស្ស ៥០ នាក់បានស្លាប់ និងអ្នករងរបួសច្រើនរហូតដល់ថ្នាក់ធ្វើឱ្យបណ្ដាមន្ទីរពេទ្យក្នុងតំបន់ អស់គ្រែទំនេរ បន្ទាប់ពីរងការវាយប្រហារពីកាំជ្រួចផ្លោងនោះ។

ក៏ប៉ុន្តែ វិមានក្រឹមឡាំង បានច្រានចោលការចោទប្រកាន់ពី អ៊ុយក្រែន ដោយថា កងទ័ពរុស្ស៊ី ពុំមានផែនការធ្វើសង្គ្រាមណាមួយនៅ Kramatorsk ក្នុងថ្ងៃទី ៨ មេសា។ ចំណែកក្រសួងការពារជាតិរុស្ស៊ី ក៏បានប្រកាសដូចគ្នានេះដែរ។

ឧត្តមស្នងការនៃអង្គការសហប្រជាជាតិទទួលបន្ទុកជនភៀសខ្លួន (UNHCR) ឱ្យដឹងថា មនុស្សជាង ៤.៨៣ លាននាក់ បានចាកចេញពី ប្រទេសអ៊ុយក្រែន ក្នុងពេលសង្គ្រាមផ្ទុះឡើង។ មនុស្សជាច្រើនបានចូលទៅកាន់ទឹកដីប្រទេសក្បែរខាង មុននឹងទៅកាន់បណ្ដាប្រទេសផ្សេងទៀតនៅ អឺរ៉ុប។

ក្នុងចំណោមជនភៀសខ្លួនខាងលើ មានជិត ២.៥៤ លាននាក់ បានទៅកាន់ ប្រទេសប៉ូឡូញ, ជាង ៦៧១ ពាន់នាក់ទៅកាន់ រូម៉ានី, ជាង ៤០០ ពាន់នាក់ ទៅកាន់ ហុងគ្រី និងជាង ៤០០ ពាន់នាក់ ទៅកាន់ ម៉ុលដាវី។ ក្រៅពីនេះ ក៏មានជាង ៣៧៣ ពាន់នាក់ បានទៅកាន់ ប្រទេសរុស្ស៊ី។

April 9, 2022

រដ្ឋបាលរាជធានីភ្នំពេញ ស្នើកុំឱ្យមានការបញ្ចេញសំរាមនៅតាមដងផ្លូវសាធារណៈក្នុងអំឡុងថ្ងៃបុណ្យចូលឆ្នាំខ្មែរ

នាល្ងាចថ្ងៃទី ០៨ មេសានេះ រដ្ឋបាលរាជធានីភ្នំពេញ បានចេញសេចក្ដីជូនដំណឹងស្ដីពី ការផ្ដល់សេវាសម្អាត ប្រមូល និងដឹកជញ្ជូនសំរាម សំណល់រឹង ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ ២០២២»។

រដ្ឋបាលរាជធានីបានឱ្យដឹងថា ការប្រមូលសំរាមនៅក្នុងឱកាសបុណ្យចូលឆ្នាំខ្មែរ នឹងប្រព្រឹត្តទៅមិនបានពេញលេញនោះទេ ដោយសារកម្មករ កម្មការិនី ដែលជាបុគ្គលិករបស់បណ្ដាក្រុមហ៊ុនប្រមូលសំរាម ត្រូវឈប់សម្រាកនៅថ្ងៃបុណ្យ។

រដ្ឋបាលរាជធានី ក៏ស្នើសុំកុំឱ្យមានការបញ្ចេញសំរាមនៅតាមបណ្ដោយដងផ្លូវសាធារណៈក្នុងអំឡុង ៣ ថ្ងៃ រាប់ចាប់ពីថ្ងៃទី ១៤ ដល់ ១៦ ខែមេសា ២០២២។

April 8, 2022

កូរ៉េខាងជើង រុះរើសណ្ឋាគារដែលត្រូវបានចាត់ទុកជានិមិត្តរូបនៃកិច្ចសហការរវាងកូរ៉េទាំងពីរ

កូរ៉េខាងជើង បានរុះរើសណ្ឋាគារមួយដែលសាងសង់ដោយ កូរ៉េខាងត្បូង នៅក្នុងតំបន់លម្ហែកាយនៃភ្នំពេជ្រ (Geumgansan) ជាសណ្ឋាគារដែលត្រូវបានចាត់ទុកជានិមិត្តរូបនៃកិច្ចសហការរវាង កូរ៉េខាងជើង និង កូរ៉េខាងត្បូង។

កូរ៉េខាងត្បូង បានសាងសង់ជំរំផ្ទះស្នាក់នៅចំនួនរាប់សិប ក្នុងតំបន់លម្ហែកាយ ភ្នំពេជ្រ នៅក្នុងខេត្ត Kimgang នៃ ប្រទេសកូរ៉េខាងជើង ដើម្បីទទួលភ្ញៀវទេសចរណ៍ពី កូរ៉េខាងត្បូង ក្នុងគ្រាដែលប្រទេសទាំងពីរនេះ ឈានដល់ចំណុចកំពូលនៃការផ្សះផ្សាទំនាក់ទំនងនាអំឡុងទសវត្សរ៍ឆ្នាំ ១៩៩១។

ក៏ប៉ុន្តែ មេដឹកនាំកូរ៉េខាងជើង លោក គីម ជុងអ៊ុន កាលពីឆ្នាំ ២០១៩ បានបញ្ជាឱ្យរុះរើសំណង់ទាំងនេះ ដោយយល់ថា សំណង់របស់ កូរ៉េខាងត្បូង «មិនស្អាត»។ ការរុះរើគ្រោងនឹងធ្វើឡើងក្នុងឆ្នាំ ២០២០ ប៉ុន្តែ ក្រោយមកក៏ត្រូវបានពន្យារពេលដោយសារកូវីដ-១៩។

ក្រសួងបង្រួមបង្រួមកូរ៉េខាងត្បូង នាថ្ងៃនេះ បានឱ្យដឹងថា កូរ៉េខាងជើង ចាប់ផ្ដើមរុះរើសណ្ឋាគារ Haegumgang។ នេះគឺជាសណ្ឋាគារអណ្ដែតលើទឹក ស្ថិតនៅក្បែរឆ្នេរសមុទ្រលម្ហែកាយ និងជាសំណង់ធំមួយក្នុងចំណោមសំណង់សម្រាប់ទេសចរណ៍ ដែលត្រូវបាន កូរ៉េខាងត្បូង ផ្ដល់ប្រាក់ឱ្យសាងសង់ក្នុងបំណងទទួលភ្ញៀវដែលចង់មកទស្សនា ភ្នំពេជ្រ ដែលត្រូវបានសម្ពោធដាក់ឱ្យដំណើរការកាលពីឆ្នាំ ១៩៩៨។

យោងតាមអ្នកនាំពាក្យរបស់ ក្រសួងបង្រួបបង្រួមកូរ៉េខាងត្បូង លោក Cha Deok-cheol បច្ចុប្បន្នមិនដឹងច្បាស់ថា កូរ៉េខាងជើង រុះរើសំណង់នៅក្នុងទីតាំងទេសចរណ៍ផ្សេងទៀតដែលស្ថិតក្នុងតំបន់លម្ហែកាយភ្នំពេជ្រ ដែរ ឬយ៉ាងណានៅឡើយ។ លោកថា កូរ៉េខាងត្បូង មានការសោកស្ដាយចំពោះការសម្រេចចិត្តរបស់ ទីក្រុងព្យុងយ៉ាង ហើយស្នើឱ្យ កូរ៉េខាងជើង បើកការចរចាដើម្បីដោះស្រាយការខ្វែងគំនិតគ្នាទាក់ទងនឹងបណ្ដាសំណង់របស់ កូរ៉េខាងត្បូង នៅ ភ្នំពេជ្រ នោះ៕

April 8, 2022

អ្នកវិទ្យាសាស្ត្ររកឃើញវីធីថ្មី ជួយឱ្យស្បែកមនុស្ស ក្មេងជាងវ័យរហូតដល់ ៣០ ឆ្នាំ

ក្រុមអ្នកស្រាវជ្រាវរបស់ អង់គ្លេស អភិវឌ្ឍបច្ចេកទេសថ្មី ជួយឱ្យកោសិកាចាស់ធ្វើការដូចទៅនឹងកោសិកាក្មេងខ្ចី និងបំបាត់ចោលនូវការប្រែប្រួលដែលទាក់ទងនឹងវ័យ។

ក្រុមអ្នកវិទ្យាសាស្ត្រនៅវិទ្យាស្ថាន Babraham នៃសាកលវិទ្យាល័យ Cambridge (ចក្រភពអង់គ្លេស) អភិវឌ្ឍវិធីសាស្ត្រស្ដារកោសិកាស្បែកឡើងវិញ ដើម្បីឱ្យវាដំណើរការដូចទៅនឹងកោសិកាស្បែករបស់មនុស្សវ័យនៅក្មេង នេះបើតាម Guardian ចុះផ្សាយកាលពីថ្ងៃទី ០៧ មេសា។ វិធីសាស្ត្រនេះអាចជួយឱ្យវ័យរបស់មនុស្ស «ត្រលប់ថយក្រោយ» បានរហូតដល់ ៣០ ឆ្នាំ។ ការស្រាវជ្រាវថ្មីនេះអាចនាំទៅរកការអភិវឌ្ឍបច្ចេកទេសនានាដែលជួយទប់ស្កាត់ជំងឺចាស់ជរា តាមរយៈការស្ដារមុខងាររបស់កោសិកាចាស់ និងពន្យារអាយុកាលផ្នែកជីវសាស្ត្ររបស់ពួកវា។

ក្រុមអ្នកវិទ្យាសាស្ត្រ មុននោះក៏ធ្លាប់ធ្វើបានដូចខាងលើ ប៉ុន្តែ វិធីសាស្ត្រថ្មីនេះជួយកាត់បន្ថយពេលវេលាដែលប្រើប្រាស់ក្នុងការស្ដារកោសិកាពី ៥០ ថ្ងៃ មកនៅត្រឹម ១៣ ថ្ងៃ ព្រមទាំងអាចធ្វើឱ្យកោសិកាចាស់ ប្រែជាក្មេងជាងវិធីមុនទៀតផង។

វិធីសាស្ត្រថ្មីនេះគឺយោងទៅលើបច្ចេកទេសដែលក្រុមអ្នកវិទ្យាសាស្ត្រជំនាន់មុនប្រើប្រាស់ដើម្បីបង្កើតកោសិកាដើម (stem cells) ហើយធ្លាប់ទទួលបានពានរង្វាន់ណូបែល។ បច្ចេកទេសនេះត្រូវបានធ្វើត្រាប់តាមដំណើរការនៃកោសិកាចាស់របស់ឪពុកម្ដាយ ដែលត្រូវបានប្ដូរទៅជាជាលិកាក្មេងខ្ចីរបស់ទារកទើបកើត។

របកគំហើញថ្មីដ៏អស្ចារ្យមួយនេះបានបង្ហាញថា កោសិកាចាស់ដែលត្រូវបានធ្វើឱ្យទៅជាក្មេង ជួយព្យាបាលរបួសស្នាមឱ្យជាសះស្បើយឆាប់រហ័សជាងឆ្ងាយ បើធៀបនឹងកោសិកាដែលមិនបានឆ្លងកាត់វិធីសាស្ត្រខាងលើ៕

April 8, 2022

រូបសំណាក “ព្រះថោងនាងនាគ” ដែលកំពុងត្រូវបានផ្គុំលើកឡើងលើបល្ល័ង្ក នឹងត្រូវសម្ពោធនៅមុនបុណ្យចូលឆ្នាំខ្មែរខាងមុខ

នៅព្រឹកថ្ងៃសុក្រ ទី ៨ ខែមេសា ឆ្នាំ ២០២២ ក្រុមមន្ត្រីរដ្ឋាភិបាល និងអាជ្ញាធរ ខេត្តព្រះសីហនុ បានអញ្ជើញចុះពិនិត្យទីតាំងត្រៀមរៀបចំពិធីអភិសេករូបសំណាក “ព្រះថោងនាងនាគ”។

ក្នុងដំណើរពិនិត្យនេះ រួមមាន ឯកឧត្តម នាយឧត្តមសេនីយ៍ យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី, ឯកឧត្តម ហ៊ុន ស៊ីថា រដ្ឋមន្ត្រីប្រតិភូអមនាយករដ្ឋមន្ត្រី និងឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ។

រូបសំណាកដែលស្ថិតនៅរង្វង់មូលព្រះថោងនាងនាគ ក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ នឹងត្រូវបានអភិសេក នៅថ្ងៃទី ១៦ ខែមេសា ឆ្នាំ ២០២២ ក្រោមអធិបតីភាព សម្តេចអគ្គមហាសេនាបតីតេជោ ហ៊ុន សែន។

យោងតាមផែនការ រូបសំណាកនេះ នឹងត្រូវបានរៀបចំផ្គុំដាក់លើបល្ល័ង្ករួចរាល់មុនពិធីបុណ្យចូលឆ្នាំថ្មីប្រពៃណីជាតិខ្មែរពោលគឺមុនថ្ងៃទី ១៤ ខែមេសា ឆ្នាំ ២០២២។

April 8, 2022

ក្រុមហ៊ុនផលិតរថយន្តអគ្គិសនីរបស់ វៀតណាម ដាក់ពាក្យសុំធ្វើ IPO នៅ សហរដ្ឋអាម៉េរិក

ថ្ងៃនេះ ក្រុមហ៊ុន VinFast Tranding & Investment Pte.Ltd. ដែលជាក្រុមហ៊ុនបុត្រសម្ព័ន្ធមួយត្រូវបានបង្កើតឡើងនៅ សិង្ហបុរី របស់ Vingroup ប្រកាសថា បានដាក់ពាក្យស្នើសុំបោះផ្សាយមូលបត្រជាសាធារណៈដំបូង (IPO) តាមគំរូ F-១ ទៅកាន់ គណៈកម្មការមូលបត្រអាម៉េរិក (SEC)។

ទំហំនៃការបោះផ្សាយមូលបត្រសាធារណៈដំបូង និងតម្លៃរបស់ភាគហ៊ុន របស់ VinFast មិនទាន់ត្រូវបានកំណត់នៅឡើយ។ ការធ្វើ IPO របស់ VinFast នឹងកើតមានឡើងបន្ទាប់ពី SEC បញ្ចប់ដំណាក់កាលត្រួតពិនិត្យលើសំណើ និងឯកសារពាក់ព័ន្ធ ហើយអាស្រ័យលើទីផ្សារ និងលក្ខន្តិកផ្សេង។

Vingroup បានផ្ទេរទុន ៥១.៥២% របស់ VinFast វៀតណាម ឱ្យ VinFast សិង្ហបុរី កាលពីដើមខែធ្នូ ២០២។ ក្រោយពីបានធ្វើបច្ចុប្បន្នភាពរចនាសម្ព័ន្ធ ក្រុមហ៊ុន Vingroup និងបណ្ដាភាគហ៊ុនិករបស់ VinFast វៀតណាម នឹងកាន់កាប់ភាគហ៊ុន ១០០% របស់ VinFast សិង្ហបុរី ដោយផ្ទាល់ និងកាន់កាប់ដោយប្រយោលចំពោះភាគហ៊ុន ៩៩.៩% របស់ VinFast វៀតណាម។

រថយន្តអគ្គិសនី VinFast របស់ក្រុមហ៊ុនវៀតណាម VinGroup

ការធ្វើបច្ចុប្បន្នភាពនៃរចនាសម្ព័ន្ធខាងលើនេះគឺស្ថិតក្នុងដំណើរការនៃការត្រៀមខ្លួនសម្រាប់ VinFast ធ្វើ IPO នៅ សហរដ្ឋអាម៉េរិក ដែលជាគ្រឹះសំខាន់នៅក្នុងយុទ្ធសាស្ត្រក្លាយជាយីហោសកលរបស់ VinGroup។

April 8, 2022

កូវីដ-១៩! កម្ពុជា បានរកឃើញអ្នកវិជ្ជមានថ្មី នឹងកូវីដ-១៩ ជិត ៣០ នាក់ទៀត ក្នុងអំឡុងថ្ងៃទី ០៧ ខែមេសា ២០២២

ក្នុងអំឡុង ២៤ ម៉ោងនៃថ្ងៃទី ០៧ មេសា កម្ពុជា បានរកឃើញអ្នកវិជ្ជមាននឹង កូវីដ-១៩ ចំនួន ២៨ នាក់ ដែលសុទ្ធតែជាករណីឆ្លងក្នុងសហគមន៍ និងជាករណីអូមីក្រុង។

April 8, 2022

Samsung កំពុងស្ថិតក្នុងដំណាក់កាលរីកចម្រើនមិនធ្លាប់មាន៖ ទាំងស្មាតហ្វូន ទាំងឈីបចងចាំ សុទ្ធតែរកបានចំណូលខ្ពស់

ប្រាក់ចំណេញរបស់ក្រុមហ៊ុន Samsung នៅក្នុងត្រីមាសទីមួយ នៃឆ្នាំ ២០២២ នេះ បានកើន ៥០%។

ទស្សនាវដ្ដី Forbes របស់ អាម៉េរិក ឱ្យដឹងថា Samsung Electronics ទើបបានប្រកាសអំពីប្រាក់ចំណេញបឋមក្នុងត្រីមាសដំបូងនៃឆ្នាំ ២០២។ លទ្ធផលបង្ហាញថា ប្រាក់ចំណេញបានកើនឡើងលើសពីការព្យាកររបស់ក្រុមអ្នកវិភាគ ដោយសារតម្រូវការលើទូរស័ព្ទថ្មី និងឈីបអង្គចងចាំរបស់ក្រុមហ៊ុន។

ជាក់ស្ដែង ប្រាក់ចំណេញពីប្រតិបត្តិការ (operating profit) របស់ Samsung កើន ៥០% ធៀបនឹងដំណាក់កាលដូចគ្នាក្នុងឆ្នាំ ២០២១ ឡើងដល់ ១១.៦ ពាន់លានដុល្លារអាម៉េរិក ក្នុងអំឡុង ៣ ខែ ដែលបញ្ចប់នៅក្នុងខែមីនា ២០២២។ ប្រាក់ចំណូលសរុបក្នុងត្រីមាសដំបូងនេះ ក៏បានកើន ១៨% ឡើងដល់ជាង ៦២.៨ ពាន់លានដុល្លារអាម៉េរិក។

Samsung នឹងបញ្ចេញព័ត៌មានស្ដីពីប្រាក់ចំណេញសុទ្ធ និងសេចក្ដីលម្អិតនៃប្រសិទ្ធភាពក្នុងការអនុវត្តការងាររបស់ផ្នែកនីមួយៗ នៅពេលពួកគេបញ្ចេញរបាយការណ៍សរុបនៅថ្ងៃទី ២៨ មេសាខាងមុខ។

ក្នុងផ្នែកបច្ចេកវិទ្យាចល័ត ប្រាក់ចំណូលបឋមរបស់ Galaxy S២២ មានកម្រិតខ្ពស់ ដោយលក់ចេញបានជាង ១ លានគ្រឿងនៅ កូរ៉េខាងត្បូង ក្នុងសប្ដាហ៍នេះ។ Galaxy S២២ ដែលបង្ហាញខ្លួនក្នុងទីផ្សារចាប់តាំងពីខែកុម្ភៈ ត្រូវបានលក់ចេញលឿនជាង ២០% ធៀបនឹង S២។ នៅ សហរដ្ឋអាម៉េរិក S២២ ត្រូវបានលក់ចេញលឿនជាង ៦០% ធៀបនឹង S២១ ក្នុងអំឡុង ៣ សប្ដាហ៍ដំបូង។

April 8, 2022

សហភាពអឺរ៉ុប ដាក់ទណ្ឌកម្មជាលើកដំបូង ប្រឆាំងវិស័យថាមពលរបស់ ប្រទេសរុស្ស៊ី

សហភាពអឺរ៉ុប (EU) ប្រកាសថា បានអនុម័តលើបទបញ្ជាហាមនាំចូលធ្យូងថ្មពី ប្រទេសរុស្ស៊ី ហើយថា ការសម្រេចនេះនឹងមានសុពលភាពចាប់ពីខែសីហា ២០២២។

«កញ្ចប់ទណ្ឌកម្មត្រូវបានគណៈកម្មការអចិន្ត្រៃយ៍តំណាងប្រទេសនានារបស់ EU អនុម័តរួចហើយ» បារាំង ដែលជាប្រទេសកំពុងកាន់តំណាងប្រធានក្រុមប្រឹក្សាសហភាពអឺរ៉ុប ប្រកាសកាលពីថ្ងៃទី ០៧ មេសា។

នេះគឺជាការដាក់ទណ្ឌកម្មលើកទី ៥ របស់ EU ប្រឆាំងនឹងការឈ្លានពានរបស់ រុស្ស៊ី នៅ អ៊ុយក្រែន។ សហភាពអឺរ៉ុប ក៏បានហាមការនាំចេញទំនិញតម្លៃ ១០.៩ ពាន់លានដុល្លារអាម៉េរិក ទៅកាន់ រុស្ស៊ី ក្នុងនោះ មានទាំងទំនិញបច្ចេកវិទ្យាជាន់ខ្ពស់ និងបង្កកទ្រព្យសម្បត្តិរបស់ធនាគារមួយចំនួនរបស់ រុស្ស៊ី។

ក្រៅពីការដាក់ទណ្ឌកម្មលើ រុស្ស៊ី EU ក៏បានគាំទ្រសំណើផ្ដល់ជំនួយជាអាវុធបន្ថែម ដែលមានតម្លៃ ៥៤៣ លានដុល្លារ ដល់ អ៊ុយក្រែន ដែលនេះធ្វើឱ្យកញ្ចប់ជំនួយសរុបឡើងដល់ ១.៦៣ ពាន់លានដុល្លារអាម៉េរិក។

នេះគឺជាលើកដំបូងដែល EU ដាក់ទណ្ឌកម្មលើវិស័យថាមពលរបស់ រុស្ស៊ី។ បណ្ដាប្រទេសនៅក្នុង សហភាពអឺរ៉ុប នាំចូលធ្យូងថ្មពី រុស្ស៊ី ក្នុងតម្លៃ ៤.៣៥ ពាន់លានដុល្លារ/ឆ្នាំ។ បទបញ្ជានៃការដាក់ទណ្ឌកម្មខាងលើនេះនឹងមានសុពលភាពចាប់ពីដើមខែសីហាខាងមុខ។

April 8, 2022

អាម៉េរិក និងសម្ព័ន្ធមិត្ត បញ្ចេញប្រេង ១២០ លានធុង ពីឃ្លាំងយុទ្ធសាស្ត្រ

IEA បញ្ជាក់ថា ប្រេងចំនួន ១២០ លានធុង ត្រូវបានបញ្ចេញពីឃ្លាំងយុទ្ធសាស្ត្រ ក្នុងនោះ សហរដ្ឋអាម៉េរិក ចូលរួមចំនួនពាក់កណ្ដាល ខណៈ ជប៉ុន ឈរលេខ ២ ដោយបញ្ចេញ ១៥ លានធុង។

អង្គការថាមពលអន្តរជាតិ (IEA) កាលពីថ្ងៃទី ០៧ មេសា បានឱ្យដឹងថា បរិមាណប្រេងខាងលើនេះនឹងត្រូវបានបណ្ដាប្រទេសជាសមាជិក បញ្ចេញទៅក្នុងទីផ្សារ ក្នុងរង្វង់ ០៦ ខែខាងមុខ ដើម្បីដោះស្រាយស្ថានភាពខ្វះថាមពលនៅទូទាំងសកលលោក ដោយសារសង្គ្រាមរវាង រុស្ស៊ី-អ៊ុយក្រែន។

«សមាជិកទាំងឡាយរបស់ IEA កំពុងធ្វើការបញ្ចេញប្រេងចំនួន ១២០ លានធុងពីឃ្លាំងរួម ក្នុងនោះ អាម៉េរិក រួមចំណែក ៦០ លានធុង» Fatih Birol ប្រធាន IEA សរសេរនៅលើ Twitter ដូច្នេះ និងបន្ថែមថា «ព័ត៌មានលម្អិតស្ដីពីបរិមាណនៃការរួមចំណែករបស់សមាជិកនានា នឹងត្រូវបានប្រកាសនាពេលដ៏ខ្លីខាងមុខ»។

នេះគឺជាការបញ្ចេញប្រេងលើកទី ៥ ពីឃ្លាំងយុទ្ធសាស្ត្ររបស់ IEA រាប់ចាប់ពីឆ្នាំ ១៩៩១។ បរិមាណប្រេងសរុបដែលមាននៅក្នុងឃ្លាំងយុទ្ធសាស្ត្ររបស់ IEA ដែលមានសមាជិកចំនួន ៣១ ប្រទេស គឺ ១.៥ ពាន់លានធុង។

April 8, 2022

Author: សឿន សំណាង