ដើម្បីមានទ្រព្យសម្បត្តិច្រើនដូចទៅនឹងមហាសេដ្ឋីពិភពលោកទាំងឡាយដូចជា លោក Elon Musk ជាដើម អ្នកធ្វើការស៊ីប្រាក់ខែនៅ សហរដ្ឋអាម៉េរិក ម្នាក់ ជាមធ្យមត្រូវធ្វើការក្នុងរយៈពេលតែ ៣.១ លានឆ្នាំប៉ុណ្ណោះ។ នេះគឺជារយៈពេលខ្លីបំផុតបើធៀបនឹងនៅ ឥណ្ឌា និង ចិន ជាទីដែលអ្នកត្រូវចំណាយពេលជាង ១០ លានឆ្នាំ ដើម្បីមានទ្រព្យសម្បត្តិស្មើនឹងមហាសេដ្ឋីលំដាប់កំពូលៗនៃពិភពលោក។
នៅក្នុងបណ្ដាប្រទេស ពលរដ្ឋសាមញ្ញម្នាក់ត្រូវចំណាយពេលធ្វើការក្នុងរយៈពេលរាប់លានឆ្នាំ ទើបអាចក្លាយជាមហាសេដ្ឋីលំដាប់លេខ ១ របស់ប្រទេសពួកគេ។ ឧទាហរណ៍៖ ពលរដ្ឋម្នាក់នៅ សហរដ្ឋអាម៉េរិក ដែលមានប្រាក់បៀវត្តជាមធ្យមខ្ទង់ ៦៨,៣៩៣ ដុល្លារ ក្នុង ១ ឆ្នាំ (២០២០) នឹងត្រូវធ្វើការប្រហែល ៣ លានឆ្នាំ ទើបអាចមានទ្រព្យប្រហាក់ប្រហែល ២១៩ ពាន់លានដុល្លារ ដែលស្មើនឹងទ្រព្យបច្ចុប្បន្នរបស់ Elon Musk ដែលជាមហាសេដ្ឋីលេខ ១ របស់ អាម៉េរិក និងលេខ ១ នៅទូទាំងសកលលោក។ នេះបើតាមទិន្នន័យរបស់ OECD។
ចំណែក ជនជាតិអាល្លឺម៉ង់ វិញ គ្រាន់បើជាងនេះបន្តិច ដោយគ្រាន់តែធ្វើការជាបន្តបន្ទាប់រយៈពេលប្រហែល ៩០០,០០០ ឆ្នាំ គឺអាចមានទ្រព្យស្មើនឹងមហាសេដ្ឋីលេខ ១ Dieter Schwarz របស់ប្រទេសនេះ ដែលមានទ្រព្យ ៤៧ ពាន់លានដុល្លារអាម៉េរិក បើសិនពួកគេមានប្រាក់បៀវត្សជាមធ្យម ៥៣,៤៧៥ ដុល្លារ/ឆ្នាំ។
ភាពខុសគ្នាឆ្ងាយត្រូវបានលាតត្រដាងដោយទិន្នន័យស្ដីពី ប្រទេសចិន និង ឥណ្ឌា។ នៅ ប្រទេសឥណ្ឌា ទ្រព្យរបស់មហាសេដ្ឋីឥណ្ឌា លោក Mukesh Ambani ម្ចាស់ក្រុមហ៊ុន Reliance Industries មានចំនួន ៩១ ពាន់លានដុល្លារអាម៉េរិក ខណៈដែលប្រាក់ចំណូលជាមធ្យមរបស់ពលរដ្ឋសាមញ្ញនៅប្រទេសនេះ រកបានត្រឹមតែ ៥,០០០ ដុល្លារអាម៉េរិក/ឆ្នាំ។ ដើម្បីអាចមានទ្រព្យស្មើនឹងមហាសេដ្ឋី Ambani ពលរដ្ឋឥណ្ឌាម្នាក់នឹងត្រូវធ្វើការជាង ១៧ លានឆ្នាំឯណោះ។
