យោងតាមព័ត៌មានពី ព្រុចសែល ប្រទេសហ្វាំងឡង់ និង ស៊ុយអែត អាចនឹងដាក់ពាក្យសុំចូលជាសមាជិករបស់ អង្គការសន្ធិសញ្ញាអាត្លង់ទិកខាងជើង (ណាតូ/NATO) នៅក្នុងខែឧសភាខាងមុខ។
សារព័ត៌មាន Iltalenhti របស់ ហ្វាំងឡង់ ឱ្យដឹងថា ក្រុមមេដឹកនាំរបស់ ប្រទេសហ្វាំងឡង់ និង ស៊ុយអែត គ្រោងនឹងជួបគ្នានៅថ្ងៃទី ១៦ ឧសភា ហើយក្រោយមកប្រទេសទាំង ២ នេះ នឹងប្រកាសជាសាធារណៈអំពីគម្រោងចូលជា សមាជិកណាតូ។ រដ្ឋមន្ត្រីការបរទេសហ្វាំងឡង់ Pekka Haavisto បដិសេធការអធិប្បាយអំពីព័ត៌មាននេះ ប៉ុន្តែ ប្រាប់ថា លោកចង់ឱ្យ ហ្វាំងឡង់ និង ស៊ុយអែត មានជ្រើសរើសដូចគ្នានេះ។
ចំណែកសារព័ត៌មាន Aftonbladet របស់ ស៊ុយអែត ដកស្រង់ដំណឹងពីប្រភពព័ត៌មានជិតស្និទ្ធនឹងរដ្ឋាភិបាលស៊ុយអែត ឱ្យដឹងថា សហរដ្ឋអាម៉េរិក និង អង់គ្លេស បានសន្យាជាមួយ ស៊ុយអែត ថា នឹងមានការបង្កើនវត្តមានយោធា ការធ្វើសមយុទ្ធ និងការគាំទ្រផ្នែកនយោបាយ «ខ្លាំងក្លា» ពីបណ្ដាប្រទេសរបស់ ណាតូ ក្នុងករណីលទ្ធភាពនៃការបញ្ចូល ស៊ុយអែត ជាសមាជិក ប្រព្រឹត្តទៅដោយភាពរលួន។ ក៏ប៉ុន្តែ ក្រសួងការបរទេសស៊ុយអែត ក៏បានបដិសេធការអធិប្បាយអំពីព័ត៌មានខាងលើ។
កាលពី ២ សប្ដាហ៍មុន នាយករដ្ឋមន្ត្រីហ្វាំងឡង់ Sanna Marin នៅក្នុងជំនួបជាមួយសមភាគីស៊ុយអែត បានឱ្យដឹងថា ហ្វាំងឡង់ នឹងធ្វើការសម្រេចចិត្តអំពីការដាក់ពាក្យសុំចូលជាសមាជិក ណាតូ នៅប៉ុន្មានសប្ដាហ៍ខាងមុខ។ បច្ចុប្បន្ន ពួកគេកំពុងពិចារណាលើប្រការនេះ ហើយការសម្រេចចុងក្រោយនឹងអាចត្រូវបានធ្វើឡើងនៅពាក់កណ្ដាលខែឧសភា។
