សឿន សំណាង - La Reine Media

ទីក្រុងប៉េកាំង ធ្វើតេស្តរក កូវីដ-១៩ លើមនុស្ស ២០ លាននាក់ រកឃើញករណីវិជ្ជមានជាង ១០ នាក់

ទីក្រុងប៉េកាំង បានបញ្ចប់ជុំទី ១ នៃការធ្វើតេស្តរកអ្នកឆ្លង កូវីដ-១៩ ក្នុងទ្រង់ទ្រាយធំ និងបានរកឃើញមនុស្សជាង ១០ នាក់ វិជ្ជមាននឹង វីរុស SARS-CoV-2 (កូវីដ-១៩) ក្នុងចំណោមមនុស្សជាច្រើនលាននាក់ ដែលត្រូវបានធ្វើតេស្ត។

តួលេខវិជ្ជមាននឹង កូវីដ-១៩ កើនឡើងខ្ពស់កាលពីចុងសប្ដាហ៍កន្លង បាននាំឱ្យក្រុមមន្ត្រីនៅ ទីក្រុងប៉េកាំង ប្រទេសចិន សម្រេចចិត្តធ្វើតេស្ត ៣ ជុំ ក្នុងទ្រង់ទ្រាយធំ។ បញ្ចប់ជុំទី ១ នៃការធ្វើតេស្តទ្រង់ទ្រាយធំ ប៉េកាំង បានរកឃើញមនុស្ស ១២ នាក់ វិជ្ជមាននឹង កូវីដ-១៩ ក្នុងចំណោមមនុស្សជិត ២០ លាននាក់ ដែលត្រូវបានធ្វើតេស្ត។

យោងតាមលោក Li Ang អនុប្រធានគណៈកម្មការសុខាភិបាលនៃ ទីក្រុងប៉េកាំង ក្នុងចំណោមសំណាកទាំង ១២ ករណី ដែលវិជ្ជមាននឹង កូវីដ-១៩ នេះ មាន ៣ ករណីស្ថិតក្នុង «តំបន់ដែលកំពុងបិទខ្ទប់» ក្រោយការរកឃើញករណីវិជ្ជមានដំបូង។ ក្រៅពីនេះគឺជាករណីដែលស្ថិតក្រៅតំបន់បិទខ្ទប់។

អនុប្រធានមជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) របស់ ប្រទេសចិន Pang Xinghuo ឱ្យដឹងថា គិតចាប់ពីថ្ងៃទី ២៣ ដល់ ២៧ ខែមេសា ទីក្រុងប៉េកាំង បានរកឃើញអ្នកវិជ្ជមាននឹង កូវីដ-១៩ ចំនួន ១៣៨ នាក់ ក្នុងនោះមានកុមារប្រហែល ១/។ លោក Pang បន្ថមថា ហានិភ័យបច្ចុប្បន្នគឺមានភាពធ្ងន់ធ្ងរ និងស្មុគស្មាញ។ អាជ្ញាធរត្រូវតែអនុវត្តវិធានការឱ្យបានម៉ត់ចត់ជាដាច់ខាត និងកែសម្រួលប្រកបដោយភាពបត់បែននូវវិធានការប្រយុទ្ធប្រឆាំង និងទប់ស្កាត់ជំងឺរាតត្បាតនេះ៕

April 28, 2022

បណ្ដាប្រទេសដែល «ដុត» ប្រាក់ នៅក្នុងវិស័យការពារជាតិ ច្រើនជាងគេក្នុងឆ្នាំ ២០២១

នៅក្នុងឆ្នាំ ២០២១ ការចំណាយប្រាក់របស់បណ្ដាប្រទេសទៅលើវិស័យការពារជាតិ បានកើនឡើងខ្ពស់បំផុតក្នុងប្រវត្តិសាស្ត្រ ពោលគឺជាង ២.១ ទ្រីលាន ឬ ២,១០០ ពាន់លាន (២,១០០,០០០,០០០,០០០) ដុល្លារអាម៉េរិក។

ក្នុងចំណោម ១០ ប្រទេសដែលបានចំណាយថវិកាច្រើនជាងគេសម្រាប់វិស័យយោធា ក្នុងឆ្នាំ ២០២១ គឺឃើញថា សហរដ្ឋអាម៉េរិក ឈរលំដាប់លេខ ១ ប៉ុន្តែ ប្រទេសនេះបានកាត់បន្ថយកញ្ចប់ថវិកាការពារជាតិ ធៀបនឹងឆ្នាំ ២០២០។

យោងតាមគេហទំព័រ SIPRI ប្រទេសចំនួន ១០ ដែលចំណាយប្រាក់ច្រើនជាងគេទៅលើវិស័យការពារជាតិ រួមមាន សហរដ្ឋអាម៉េរិក ចំណាយរហូតដល់ ៨០១ ពាន់លានដុល្លារ, ចិន ចំណាយដល់ ២៩៣ ពាន់លានដុល្លារ, ឥណ្ឌា (៧៦.៦ ពាន់លានដុល្លារ), អង់គ្លេស (៦៨.៥ ពាន់លានដុល្លារ), រុស្ស៊ី (៦៥.៩ ពាន់លានដុល្លារ), បារាំង (៥៦.៦ ពាន់លានដុល្លារ), អាល្លឺម៉ង់ (៥៦ ពាន់លានដុល្លារ), អារ៉ាប៊ីសាអូឌីត (៥៥.៦ ពាន់លានដុល្លារ), ជប៉ុន (៥៤.១ ពាន់លានដុល្លារ) និង កូរ៉េខាងត្បូង (៥០.២ ពាន់លានដុល្លារ)។

កញ្ចប់ថវិកាសម្រាប់ការពារជាតិរបស់ ប្រទេសចិន នៅក្នុងឆ្នាំ ២០២១ កើនឡើង ៤.៧% ធៀបនឹងឆ្នាំ ២០២០ ឈរលំដាប់ទី ២ ស្មើនឹង កូរ៉េខាងត្បូង បន្ទាប់ពី ជប៉ុន នៅក្នុងចំណោមប្រទេសដែលបានបង្កើនខ្ទង់ចំណាយលើវិស័យការពារជាតិក្នុងឆ្នាំ ២០២១។

ចំណែកប្រទេសដែលបានកាត់បន្ថយកញ្ចប់ថវិកាសម្រាប់វិស័យយោធាក្នុងឆ្នាំ ២០២១ រួមមាន អារ៉ាប៊ីសាអូឌីត (កាត់បន្ថយ ១៧%), សហរដ្ឋអាម៉េរិក និង អាល្លឺម៉ង់ (កាត់បន្ថយ ១.៤%)៕

April 27, 2022

ស្ថានីយបញ្ចូលថាមពលយានយន្តអគ្គិសនីមួយកន្លែងទៀត ត្រូវបានសម្ពោធដាក់ឱ្យប្រើប្រាស់នៅផ្សារទំនើប ក្នុង ខេត្តព្រះសីហនុ

ពិធីសម្ពោធបើកឱ្យដំណើរការជាផ្លូវការនូវ ស្ថានីយបញ្ចូលថាមពលយានយន្តអគ្គិសនី (EV Charging Station) និង មណ្ឌលផ្ដល់សេវាសាធារណៈ នៅផ្សារទំនើប FURI ស្ថិតនៅសង្កាត់លេខ ៣ ក្រុង ខេត្តព្រះសីហនុ កាលពីព្រឹកថ្ងៃទី ២៧ មេសានេះ ប្រព្រឹត្តទៅក្រោមអធិបតីភាពរបស់ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន។

ការដាក់ឱ្យដំណើរការនូវ ស្ថានីយបញ្ចូលថាមពលយានយន្តអគ្គិសនី និង មណ្ឌលផ្ដល់សេវាសាធារណៈ នៅក្រុងព្រះសីហនុ នេះ គឺជាមោទកភាពថ្មីមួយទៀតសម្រាប់ ខេត្តព្រះសីហនុ។ នេះបើតាម លោក ជាវ វិជ្ជាក់ អភិបាលរងខេត្តព្រះសីហនុ។

មណ្ឌលផ្តល់ សេវាសាធារណៈនៅផ្សារទំនើប (Furi Time Square Mall) នេះ នឹងបង្កលក្ខណៈងាយស្រួលដល់ប្រជាពលរដ្ឋមកទទួលសេវាដូចជា ការចុះបញ្ជីយានយន្ត, ផ្ទេរកម្មសិទ្ធិយានយន្ត, ការត្រួតពិនិត្យលក្ខណៈបច្ចេកទេសយានយន្ត(ឆៀក) និងធ្វើប័ណ្ណបើកបរយានយន្តបានលឿន មានប្រសិទ្ធភាព និងតម្លាភាព តាមរយៈការប្រើប្រាស់យន្តការបច្ចេកវិទ្យាទំនើប។

ចំណែក ស្ថានីយបញ្ចូលថាមពលយានយន្តអគ្គិសនី នៅក្នុង ខេត្តព្រះសីហនុ ដែលត្រូវបានក្រសួងសាធារណការ និងដឹកជញ្ជូន បង្កើតឡើង មិនត្រឹមតែដើម្បីបញ្ជ្រាបការយល់ដឹងដល់សាធារណជន អំពីបច្ចេកវិទ្យា ឧបករណ៍បរិក្ខារ និងអត្ថប្រយោជន៍នានានៃយានយន្តអគ្គិសនី និងការជំរុញការប្រើប្រាស់យានយន្ដអគ្គិសនីនៅ កម្ពុជា ប៉ុណ្ណោះទេ តែថែមទាំងលើកមុខមាត់របស់ ខេត្តព្រះសីហនុ ផងដែរ។ ស្ថានីយបញ្ចូលថាមពលយានយន្តអគ្គិសនី នេះ គឺមានការរួមចំណែកមួយរបស់ អង្គការ UNDP ដោយបានផ្តល់ឧបករណ៍បញ្ចូលថាមពលយានយន្តចំនួន ៤ គ្រឿង សម្រាប់ដាក់តាមបណ្តារាជធានី ខេត្ត រួមមាន រាជធានីភ្នំពេញ ខេត្តសៀមរាប បាត់ដំបង និង ខេត្តព្រះសីហនុ។

ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា ការបើកឱ្យដំណើរការមណ្ឌលផ្ដល់សេវាសាធារណៈ និង ស្ថានីយបញ្ចូលថាមពលយានយន្តអគ្គិ នៅផ្សារទំនើប FURI គឺដើម្បីផ្ដល់សេវា ឱ្យកៀកនឹងប្រជាពលរដ្ឋ។ លោកថា យើងជាមន្ត្រីរាជការគឺជាអ្នកបម្រើរាស្ត្រ៕

April 27, 2022

ធនាគារពិភពលោកព្យាករថា តម្លៃថាមពល ស្បៀងអាហារនឹងឡើងខ្ពស់ខ្លាំង ក្នុងរយៈពេល ៣ ឆ្នាំទៀត

សង្គ្រាមនៅ អ៊ុយក្រែន នឹងនាំឱ្យតម្លៃស្បៀងអាហារ និងថាមពលរបស់ពិភពលោក ឡើងថ្លៃខ្ពស់ខ្លាំងក្នុងរង្វង់ ៣ ឆ្នាំទៅមុខទៀត ធ្វើឱ្យមានការបារម្ភថា សេដ្ឋកិច្ចសកលកំពុងឆ្ពោះទៅរកដាននៃឱនភាព និងអតិផរណាខ្ពស់ក្នុងទសវត្សរ៍ឆ្នាំ ១៩៧០។

ក្នុងការវិភាគមួយ ធនាគារពិភពលោក (World Bank/WB) ដែលមានទីស្នាក់ការនៅ ទីក្រុងវ៉ាស៊ីងតោន ឱ្យដឹងថា តម្លៃទំនិញឡើងខ្ពស់អាចរក្សារហូតដល់ចុងឆ្នាំ ២០២៤ និងបង្កឱ្យស្ថានភាពអតិផរណាខ្ពស់ មិនប្រែប្រួល។ ប្រការនេះបង្ហាញថា កំណើនសេដ្ឋកិច្ច និងការទិញដូររបស់អ្នកប្រើប្រាស់ត្រូវថយចុះ ខណៈដែលអត្រាបាត់បង់ការងារមានកម្រិតខ្ពស់ ចំណែកតម្លៃទំនិញក៏កើនឡើងយ៉ាងលឿន។

យោងទៅលើស្ថានការណ៍រអាក់រអួលនៃសកម្មភាពជំនួញ និងចង្វាក់ផលិតកម្ម ដោយសារសង្គ្រាមនៅ អ៊ុយក្រែន WB ព្រមានថា តម្លៃថាមពលនឹងកើន ៥០% ក្នុងឆ្នាំនេះ។ ប្រេង Brent នឹងកើនដល់កម្រិតមធ្យម ១០០ ដុល្លារ/ធុង នៅឆ្នាំ ២០២២ ហើយធ្លាក់ទៅរក ៩២ ដុល្លារនៅឆ្នាំ ២០២៣ ប៉ុន្តែ តួលេខនេះនៅតែខ្ពស់ជាងតម្លៃមធ្យម ៦០ ដុល្លារ/ធុង ធៀបនឹងរយៈពេល ៥ ឆ្នាំ។

តម្លៃឧស្ម័នរបស់ អឺរ៉ុប នឹងខ្ពស់ជាងទ្វេដងនៅក្នុងឆ្នាំ ២០២២ ធៀបនឹងឆ្នាំ ២០២១ ខណៈដែលធ្យូងថ្មនឹងកើនឡើងជាង ៨០%។ ចំណែកស្រូវសាលីវិញ នឹងឡើងថ្លៃជាង ៤០% ក្នុងឆ្នាំនេះ ធ្វើឱ្យប៉ះពាល់ដល់បណ្ដាប្រទេសដែលពឹងផ្អែកលើការនាំចូលស្រូវសាលីពី រុស្ស៊ី និង អ៊ុយក្រែន។

រុស្ស៊ី គឺជាប្រទេសដែលនាំចេញឧស្ម័នធម្មជាតិ និងជីដាក់ដំណាំធំជាងគេបង្អស់ក្នុងពិភពលោក ទន្ទឹមនឹងនេះ រុស្ស៊ី ក៏ជាប្រទេសនាំចេញប្រេងឆៅធំជាងគេលំដាប់ទី ២ ផងដែរ។ ចំណែក អ៊ុយក្រែន វិញ នាំចេញស្រូវសាលីជិត ៣៣%, ពោត ១៩% និងប្រេងឈូករ័ត្ន ៨០% ធៀបនឹងពិភពលោកទាំងមូល៕

April 27, 2022

នាវាមុជទឹកប្រណិត អាចដឹកភ្ញៀវទេសចរណ៍ បាន ៩ នាក់ និងអាចមុជជម្រៅ ២០០ ម៉ែត្រ

(ហូឡង់)-នាវាមុជទឹក Nexus បំពាក់ថ្មដែលអាចដំណើរការបាន ១៨ ម៉ោង និងមានបង្អួចធំទូលាយ អាចមើលឃើញស្ទើរគ្រប់ទិស។

ក្រុមហ៊ុនអភិវឌ្ឍនាវាមុជទឹក U-Boat Worx (ហូឡង់) បង្ហាញម៉ូដែលនាវាមុជទឹកថ្មីដែលមានឈ្មោះថា Nexus នេះបើតាម New Atlas ចុះផ្សាយកាលពីថ្ងៃទី ២២ មេសា។ Nexus មានកំណែចំនួន ២ ក្នុងនោះ ទី ១ ដឹកមនុស្សបាន ៨ នាក់ រួមទាំងក្មេង ២ នាក់ និងអ្នកបើកបរម្នាក់ ចំណែកកំណែទី ២ ដឹកមនុស្សបាន ៧ នាក់។ កំណែទាំង ២ នេះ សុទ្ធតែមានរូបរាងដូចទៅនឹងពងក្រពើ។

U-Boat Worx បំពាក់ទ្វារចេញចូលធំបំផុតសម្រាប់នាវាតូចដូច Nexus ដើម្បីបង្កភាពងាយស្រួលដល់ភ្ញៀវ ខណៈដែលជណ្ដើរយន្តក៏អាចត្រូវបានបំពាក់បន្ថែម។

Nexus ត្រូវបានផលិតឡើងដើម្បីផ្ដល់ភាពងាយស្រួលដល់ការទម្លាក់ចូលទឹកសមុទ្រ និងទាញឡើងដោយនាវានៅលើផ្ទៃទឹក ប៉ុន្តែក៏អាចនាំចូលទឹកសមុទ្រពីដីគោក។ ប្រព័ន្ធបញ្ជាគ្មានខ្សែ ជួយឱ្យនាវានេះផ្លាស់ទីចេញឆ្ងាយពីនាវាជំនួយ និងជួយឱ្យវាស្ថិតនៅត្រង់ទីតាំងកំណត់។ នាវា Nexus អាចមុជចុះដល់ជម្រៅ ២០០ ម៉ែត្រ។

នាវានេះប្រើប្រាស់ថ្ម Li-ion ៦២ គីឡូវ៉ាត់ម៉ោង ស៊ូបានយ៉ាងល្អជាមួយនឹងសម្ពាធទឹក និងអាចដំណើរការបាន ១៨ ម៉ោង ក្រោយពីបញ្ចូលថាមពលពេញ ដែលនេះគឺគ្រប់គ្រាន់សម្រាប់មុជទឹក ១០ ជើងជារៀងរាល់ថ្ងៃ។ Nexus បំពាក់ម៉ាស៊ីនចំនួន ១០ ដែលមានថាមពល ៦.៤ គីឡូវ៉ាត់ អាចបើកបរក្នុងល្បឿន ៥.៦ គីឡូម៉ែត្រ/ម៉ោង និងអាចផ្លាស់ទីទៅកាន់ទិសណាក៏បាន។

នាវា Nexus អាចត្រូវបានដាក់ឱ្យប្រើប្រាស់នៅតាមតំបន់ទេសចរណ៍លំដាប់ប្រណិត បណ្ដាក្រុមហ៊ុនទេសចរណ៍ផ្លូវទឹក និងអតិថិជនគ្រប់រូបដែលមានបំណងទិញប្រើជាលក្ខណៈឯកជន។ ក្រុមហ៊ុន U-Boat Worx មិនទាន់បង្ហើបឱ្យដឹងអំពីតម្លៃរបស់នាវា Nexus នៅឡើយ ប៉ុន្តែ គេជឿថា វាទំនងជានឹងមានតម្លៃខ្ពស់។

https://www.youtube.com/watch?v=rTfD79ZiP8I

April 27, 2022

ឆេះឃ្លាំងអាវុធរបស់ រុស្ស៊ី នៅក្បែរព្រំដែនជាមួយនឹង អ៊ុយក្រែន

ក្រុមមន្ត្រីរបស់ខេត្ត Belgorod ជាប់នឹងព្រំដែនរវាង អ៊ុយក្រែន-រុស្ស៊ី ប្រកាសថា មានករណីអគ្គិភ័យនៅឯឃ្លាំងដាក់គ្រាប់រំសេវ ប៉ុន្តែ មិនទាន់រកឃើញអ្នកស្លាប់ និងរងរបួសនៅឡើយ។

«ខ្ញុំទើបតែបានទាក់ទងទៅកាន់ Denis Zolotukhin មេដឹកនាំតំបន់ Golovinsky។ យោងតាមព័ត៌មានបឋម ឃ្លាំងដាក់គ្រាប់រំសេវមួយនៅក្បែរភូមិ Staraya Nelidovka ត្រូវបានភ្លើងឆាបឆេះ» លោក Vyacheslav Gladkov អភិបាលខេត្ត Belgorod បង្ហោះសារនៅលើ Telegram នាថ្ងៃទី ២៧ មេសាដូច្នេះ។ មុននោះ លោកអភិបាល Gladkov ឱ្យដឹងថា លោកបានភ្ញាក់ដឹងខ្លួនពីដំណេក ដោយសារតែសំឡេងលាន់ឮដូចសំឡេងផ្ទុះ។

«អគ្គិភ័យនៅឯឃ្លាំងគ្រាប់រំសេវ Staraya Nelidovka ត្រូវបានពន្លត់អស់ហើយ។ Sergey Potapov ប្រធានអាជ្ញាធរគ្រប់គ្រងគ្រោះអាសន្នរបស់ខេត្ត Belgorod បានប្រាប់ថា ពុំមានអ្នករងរបួស និងស្លាប់នោះទេ ហើយផ្ទះសំបែងក៏មិនមានខូចខាតដែរ» លោក Gladkov ប្រកាសដូច្នេះ ប៉ុន្តែ មិនទាន់បានបង្ហើបឱ្យដឹងពីមូលហេតុនៅឡើយដែលនាំឱ្យកើតមានអគ្គិភ័យនេះទេ។

ខេត្ត Belgorod ស្ថិតនៅភាគខាងលិចរបស់ ប្រទេសរុស្ស៊ី ជាប់នឹងតំបន់ Luhansk, Sumy និង Kharkov របស់ អ៊ុយក្រែន។ ទីក្រុងមូស្គូ ក្នុងខែនេះបានចោទប្រកាន់ អ៊ុយក្រែន ថា បានវាយប្រហារឃ្លាំងប្រេងមួយនៅខេត្ត Belgorod ដោយប្រើប្រាស់ឧទ្ធម្ភាគចក្រ និងកាំភ្លើង បណ្ដាលឱ្យអគារ និងសំណង់ជាច្រើនត្រូវខូចខាត។

ចំណែកភាគីខាង អ៊ុយក្រែន មិនទាន់មានប្រតិកម្មអ្វីទៅនឹងព័ត៌មានខាងលើនេះនៅឡើយ។

April 27, 2022

មន្ត្រីរបស់ រុស្ស៊ី ព្រមានថា អ៊ុយក្រែន អាចត្រូវបានបំបែកជាប្រទេសតូចៗ

អគ្គលេខានៃក្រុមប្រឹក្សាសន្តិសុខរុស្ស៊ី Patrushev ព្រមានថា ការដែល «អាម៉េរិក ប្រើប្រាស់ ទីក្រុងកៀវ ដើម្បីធ្វើឱ្យ មូស្គូ ចុះខ្សោយ» អាចបណ្ដាលឱ្យ អ៊ុយក្រែន ត្រូវបានកាត់បំបែកចេញជាប្រទេសតូច។

ក្នុងកិច្ចសម្ភាសជាមួយសារព័ត៌មាន Rossiyshkya Gazeta កាលពីថ្ងៃទី ២៦ មេសា អគ្គលេខានៃក្រុមប្រឹក្សាសន្តិសុខ របស់ រុស្ស៊ី លោក Nikolai Patrushev ថ្លែងថា សហរដ្ឋអាម៉េរិក ច្រើនឆ្នាំមកនេះបានព្យាយាមបង្កហេតុធ្វើឱ្យ ជនជាតិអ៊ុយក្រែន ស្អប់គ្រប់យ៉ាងដែលទាក់ទិននឹង រុស្ស៊ី។

«ការប្រើប្រាស់អាយ៉ងនៅ ទីក្រុងកៀវ ក្នុងការប្រឹងប្រែងដើម្បីដាក់សម្ពាធលើ រុស្ស៊ី ជនជាតិអាម៉េរិក ក៏បានសម្រេចបង្កើតភាគីជាសត្រូវរបស់ប្រទេសជាតិយើង និងជ្រើសរើស អ៊ុយក្រែន សម្រាប់កិច្ចការនេះ។ លទ្ធផលពីគោលនយោបាយរបស់លោកខាងលិច និង អាជ្ញាធរនៅ ទីក្រុងកៀវ គ្រាន់តែអាចនាំមកនូវផលវិបាក នោះគឺ អ៊ុយក្រែន អាចត្រូវបានបំបែកជាប្រទេសតូច»។

ដំណាក់កាលថ្មីក្នុងយុទ្ធនាការយោធារបស់ រុស្ស៊ី នៅ អ៊ុយក្រែន កំពុងផ្ដោតទៅលើតំបន់ Donbass ជាទីដែលក្រុមផ្ដាច់ខ្លួនស្និទ្ធនឹង រុស្ស៊ី បានគ្រប់គ្រងមួយផ្នែករាប់ចាប់ពីឆ្នាំ ២០១៤។ ការគ្រប់គ្រងបាន Donbass នឹងអនុញ្ញាតឱ្យ រុស្ស៊ី បង្កើតច្រកនៅលើដីគោកដែលភ្ជាប់ទៅនឹង ឧបទ្វីប Crimea ដែល រុស្ស៊ី បានកាត់យកពី អ៊ុយក្រែន កាលពីឆ្នាំ ២០១៤។

ចំណែកមេដឹកនាំរបស់តំបន់ផ្ដាច់ខ្លួន Donetsk និង Luhansk បានបង្ហាញនូវគោលបំណងក្នុងការធ្វើប្រជាមតិស្ដីពីការបង្រួបបង្រួមដែនដីទាំងនេះ ជាមួយនឹង ប្រទេសរុស្ស៊ី។

April 27, 2022

កូវីដ-១៩! កម្ពុជា បានរកឃើញអ្នកឆ្លងថ្មីតែ ០៥ នាក់ទៀតប៉ុណ្ណោះ ក្នុងអំឡុងថ្ងៃទី ២៦ ខែមេសា ២០២២

ក្នុងអំឡុង ២៤ ម៉ោងនៃថ្ងៃទី ២៦ មេសា កម្ពុជា បានរកឃើញអ្នកវិជ្ជមាននឹង កូវីដ-១៩ ចំនួន ០៥ នាក់ ដែលសុទ្ធតែជាប្រភេទ អូមីក្រុង និងសុទ្ធតែជាករណីឆ្លងក្នុងសហគមន៍។

April 27, 2022

តម្លៃមូលធនទីផ្សាររបស់ Tesla បាត់បង់អស់ ១២៦ ពាន់លានដុល្លារ ក្នុងមួយថ្ងៃ

ភាគហ៊ុនរបស់ក្រុមហ៊ុនផលិតរថយន្តអគ្គិសនីអាម៉េរិក Tesla កាលពីម្សិលមិញ ថយចុះជាង ១២% ដោយសារតែអ្នកវិនិយោគបារម្ភថា មហាសេដ្ឋី Elon Musk នឹងលក់ភាគហ៊ុនខ្លះដើម្បីយកប្រាក់ទៅទិញ Twitter។

បញ្ចប់ការជួញដូរក្នុងថ្ងៃទី ២៦ មេសា ភាគហ៊ុន Tesla ដាំក្បាលចុះ ១២.២% មកនៅត្រឹម ៨៧៦ ដុល្លារ/ហ៊ុន។ ប្រការនេះបណ្ដាលឱ្យតម្លៃមូលធនទីផ្សារ (Market Capitalization) នៃក្រុមហ៊ុន Tesla របស់ Elon Musk បាត់បង់ ១២៦ ពាន់លានដុល្លារ មកនៅត្រឹម ៩០៨ ពាន់លានដុល្លារ។

រាប់ចាប់តាំងពីថ្ងៃទី ៤ មេសា ២០២២ ជាពេលដែលលោក Musk ប្រកាសបង្កើនភាគហ៊ុននៅក្នុងបណ្ដាញសង្គម Twitter គេឃើញថា មូលធនទីផ្សាររបស់ Tesla ថយចុះរហូតដល់ជាង ២៧៥ ពាន់លានដុល្លារ ប្រហាក់ប្រហែលនឹង ២៣%។ តម្លៃនៃភាគហ៊ុនចំនួន ១៧% របស់មហាសេដ្ឋី Elon Musk នៅក្នុងក្រុមហ៊ុន Tesla ក៏បានបាត់បង់ជាង ៤០ ពាន់លានដុល្លារអាម៉េរិក ផងដែរ។

ខាងក្រោមនេះគឺជាការប្រែប្រួលនៃតម្លៃភាគហ៊ុន Tesla ក្នុងថ្ងៃទី ២៦ មេសា ២០២២៖

April 27, 2022

ការប្រកួតកីឡាជាតិ ឆ្នាំ ២០២២ នឹងធ្វើឡើងនៅ ពហុកីឡដ្ឋានជាតិមរកតតេជោ

ក្រសួងអប់រំ យុវជន និងកីឡា នឹងរៀបចំការប្រកួតកីឡាជាតិ លើកទី ៣ ឆ្នាំ ២០២២ នៅពហុកីឡដ្ឋានជាតិមរតកតេជោ ចាប់ពីថ្ងៃទី ១៧ ដល់ ២៨ វិច្ឆិកា ២០២២ បន្ទាប់ពីបានទទួលការអនុញ្ញាតពី ប្រមុខរាជរដ្ឋាភិបាលកម្ពុជា តាមរយៈ សជណ ដែលចុះហត្ថលេខាដោយ ឯកឧត្តម អ៊ីន វីរជាតិ រដ្ឋលេខាធិការទីស្ដីការគណៈរដ្ឋមន្ដ្រី កាលពីថ្ងៃទី ២៥ មេសា ២០២២។

ការអនុញ្ញាតខាងលើ ត្រូវបានធ្វើឡើង បន្ទាប់ពី រដ្ឋមន្ដ្រីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានស្នើសុំគោលការណ៍ ក្នុងការរៀបចំព្រឹត្តិការណ៍កីឡាជាតិ លើកទី ៣ នៅ ពហុកីឡដ្ឋានជាតិមរតកតេជោ។

កន្លងមក កម្ពុជា ធ្លាប់បានរៀបចំការប្រកួតកីឡាជាតិ តាមទម្រង់ហ្គេម ដោយជោគជ័យចំនួន ២ លើកមកហើយ ក្នុងនោះ លើកទី ១ កាលពីឆ្នាំ ២០១៦ និងលើកទី ២ កាលពីឆ្នាំ ២០១៨។ ព្រឹត្តិការណ៍កីឡាជាតិ ត្រូវបានធ្វើឡើងក្នុងគោលដៅឆ្ពោះទៅទទួលរៀបចំធ្វើជាម្ចាស់ផ្ទះ នៃ ការប្រកួតកីឡា ស៊ីហ្គេម លើកទី ៣២ ឆ្នាំ ២០២៣ ដែលជាលើកដំបូងបង្អស់ត្រូវធ្វើឡើងនៅ កម្ពុជា។

ការប្រកួតកីឡាជាតិ លើកទី ៣ នឹងត្រូវរៀបចំការប្រកួតនៅទីលាន នៃ រាជធានី-ខេត្ត ចំនួន ៦ ក្នុងនោះ ក៏មាននៅ ពហុកីឡដ្ឋានជាតិមរតកតេជោ ផងដែរ។ ពហុកីឡដ្ឋានជាតិមរតកតេជោ គឺជាកន្លែងប្រារព្ធពិធីបើក-បិទជាផ្លូវការនៃព្រឹត្តិការណ៍ស៊ីហ្គេម លើកទី ៣២ ឆ្នាំ ២០២៣។

ស្មារតីកិច្ចនៃប្រជុំមួយ ដែលដឹកនាំដោយ ឯកឧត្តមបណ្ឌិតសភាចារ្យ ហង់ជួន ណារ៉ុន នាពេលកន្លង ឱ្យដឹងថា ប្រតិភូ គ្រូបង្វឹក កីឡាករ-កីឡាការិនី និងគណៈកម្មការ សរុបប្រមាណជា ៧,០០០ នាក់ នឹងត្រូវចូលរួមព្រឹត្តិការណ៍ដែលមានការប្រកួតកីឡាចំនួន ៣៩ ប្រភេទ និងកីឡាប៉ារ៉ាឡាំពិក ចំនួន ៧ ប្រភេទ នាចុងឆ្នាំនេះ។

April 27, 2022

Author: សឿន សំណាង